增支部第790經（Aṅguttara Nikāya 6.33 / 4. Devatāvagga / Dutiyaaparihānasutta）

Aṅguttara Nikāya 6.33

4. Devatāvagga

Dutiyaaparihānasutta

“Imaṁ, bhikkhave, rattiṁ aññatarā devatā abhikkantāya rattiyā abhikkantavaṇṇā kevalakappaṁ jetavanaṁ obhāsetvā yenāhaṁ tenupasaṅkami; upasaṅkamitvā maṁ abhivādetvā ekamantaṁ aṭṭhāsi. Ekamantaṁ ṭhitā kho, bhikkhave, sā devatā maṁ etadavoca:

‘chayime, bhante, dhammā bhikkhuno aparihānāya saṁvattanti.

Katame cha?

Satthugāravatā, dhammagāravatā, saṅghagāravatā, sikkhāgāravatā, hirigāravatā, ottappagāravatā—

ime kho, bhante, cha dhammā bhikkhuno aparihānāya saṁvattantī’ti.

Idamavoca, bhikkhave, sā devatā.

Idaṁ vatvā maṁ abhivādetvā padakkhiṇaṁ katvā tatthevantaradhāyīti.

Satthugaru dhammagaru,

saṅghe ca tibbagāravo;

Hiriottappasampanno,

sappatisso sagāravo;

Abhabbo parihānāya,

nibbānasseva santike”ti.

Tatiyaṁ.