中部第124經（Majjhima Nikāya 124 / Bākulasutta）

Majjhima Nikāya 124

Bākulasutta

Evaṁ me sutaṁ—

ekaṁ samayaṁ āyasmā bākulo rājagahe viharati veḷuvane kalandakanivāpe.

Atha kho acelakassapo āyasmato bākulassa purāṇagihisahāyo yenāyasmā bākulo tenupasaṅkami; upasaṅkamitvā āyasmatā bākulena saddhiṁ sammodi.

Sammodanīyaṁ kathaṁ sāraṇīyaṁ vītisāretvā ekamantaṁ nisīdi. Ekamantaṁ nisinno kho acelakassapo āyasmantaṁ bākulaṁ etadavoca:

“Kīvaciraṁ pabbajitosi, āvuso bākulā”ti?

“Asīti me, āvuso, vassāni pabbajitassā”ti.

“Imehi pana te, āvuso bākula, asītiyā vassehi katikkhattuṁ methuno dhammo paṭisevito”ti?

“Na kho maṁ, āvuso kassapa, evaṁ pucchitabbaṁ:

‘imehi pana te, āvuso bākula, asītiyā vassehi katikkhattuṁ methuno dhammo paṭisevito’ti.

Evañca kho maṁ, āvuso kassapa, pucchitabbaṁ:

‘imehi pana te, āvuso bākula, asītiyā vassehi katikkhattuṁ kāmasaññā uppannapubbā’”ti?

(…)

“Asīti me, āvuso, vassāni pabbajitassa nābhijānāmi kāmasaññaṁ uppannapubbaṁ”.

“Yampāyasmā bākulo asītiyā vassehi nābhijānāti kāmasaññaṁ uppannapubbaṁ idampi mayaṁ āyasmato bākulassa acchariyaṁ abbhutadhammaṁ dhārema”.

“Asīti me, āvuso, vassāni pabbajitassa nābhijānāmi byāpādasaññaṁ …pe…

vihiṁsāsaññaṁ uppannapubbaṁ”.

“Yampāyasmā bākulo asītiyā vassehi nābhijānāti vihiṁsāsaññaṁ uppannapubbaṁ, idampi mayaṁ āyasmato bākulassa acchariyaṁ abbhutadhammaṁ dhārema”.

“Asīti me, āvuso, vassāni pabbajitassa nābhijānāmi kāmavitakkaṁ uppannapubbaṁ”.

“Yampāyasmā bākulo asītiyā vassehi nābhijānāti kāmavitakkaṁ uppannapubbaṁ, idampi mayaṁ āyasmato bākulassa acchariyaṁ abbhutadhammaṁ dhārema”.

“Asīti me, āvuso, vassāni pabbajitassa nābhijānāmi byāpādavitakkaṁ …pe…

vihiṁsāvitakkaṁ uppannapubbaṁ”.

“Yampāyasmā bākulo asītiyā vassehi nābhijānāti vihiṁsāvitakkaṁ uppannapubbaṁ, idampi mayaṁ āyasmato bākulassa acchariyaṁ abbhutadhammaṁ dhārema”.

“Asīti me, āvuso, vassāni pabbajitassa nābhijānāmi gahapaticīvaraṁ sāditā”.

“Yampāyasmā bākulo asītiyā vassehi nābhijānāti gahapaticīvaraṁ sāditā, idampi mayaṁ āyasmato bākulassa acchariyaṁ abbhutadhammaṁ dhārema”.

“Asīti me, āvuso, vassāni pabbajitassa nābhijānāmi satthena cīvaraṁ chinditā”.

“Yampāyasmā bākulo asītiyā vassehi nābhijānāti satthena cīvaraṁ chinditā …pe… dhārema”.

“Asīti me, āvuso, vassāni pabbajitassa nābhijānāmi sūciyā cīvaraṁ sibbitā …pe…

nābhijānāmi rajanena cīvaraṁ rajitā …

nābhijānāmi kathine cīvaraṁ sibbitā …

nābhijānāmi sabrahmacārīnaṁ cīvarakamme vicāritā …

nābhijānāmi nimantanaṁ sāditā …

nābhijānāmi evarūpaṁ cittaṁ uppannapubbaṁ:

‘aho vata maṁ koci nimanteyyā’ti …

nābhijānāmi antaraghare nisīditā …

nābhijānāmi antaraghare bhuñjitā …

nābhijānāmi mātugāmassa anubyañjanaso nimittaṁ gahetā …

nābhijānāmi mātugāmassa dhammaṁ desitā antamaso catuppadampi gāthaṁ …

nābhijānāmi bhikkhunupassayaṁ upasaṅkamitā …

nābhijānāmi bhikkhuniyā dhammaṁ desitā …

nābhijānāmi sikkhamānāya dhammaṁ desitā …

nābhijānāmi sāmaṇeriyā dhammaṁ desitā …

nābhijānāmi pabbājetā …

nābhijānāmi upasampādetā …

nābhijānāmi nissayaṁ dātā …

nābhijānāmi sāmaṇeraṁ upaṭṭhāpetā …

nābhijānāmi jantāghare nhāyitā …

nābhijānāmi cuṇṇena nhāyitā …

nābhijānāmi sabrahmacārīgattaparikamme vicāritā …

nābhijānāmi ābādhaṁ uppannapubbaṁ, antamaso gaddūhanamattampi …

nābhijānāmi bhesajjaṁ upaharitā, antamaso haritakikhaṇḍampi …

nābhijānāmi apassenakaṁ apassayitā …

nābhijānāmi seyyaṁ kappetā”.

“Yampāyasmā …pe… dhārema”.

“Asīti me, āvuso, vassāni pabbajitassa nābhijānāmi gāmantasenāsane vassaṁ upagantā”.

“Yampāyasmā bākulo asītiyā vassehi nābhijānāti gāmantasenāsane vassaṁ upagantā, idampi mayaṁ āyasmato bākulassa acchariyaṁ abbhutadhammaṁ dhārema”.

“Sattāhameva kho ahaṁ, āvuso, saraṇo raṭṭhapiṇḍaṁ bhuñjiṁ;

atha aṭṭhamiyaṁ aññā udapādi.

Yampāyasmā bākulo sattāhameva saraṇo raṭṭhapiṇḍaṁ bhuñji; atha aṭṭhamiyaṁ aññā udapādi idampi mayaṁ āyasmato bākulassa acchariyaṁ abbhutadhammaṁ dhārema.

Labheyyāhaṁ, āvuso bākula, imasmiṁ dhammavinaye pabbajjaṁ, labheyyaṁ upasampadan”ti.

Alattha kho acelakassapo imasmiṁ dhammavinaye pabbajjaṁ, alattha upasampadaṁ.

Acirūpasampanno panāyasmā kassapo eko vūpakaṭṭho appamatto ātāpī pahitatto viharanto nacirasseva—yassatthāya kulaputtā sammadeva agārasmā anagāriyaṁ pabbajanti, tadanuttaraṁ—brahmacariyapariyosānaṁ diṭṭheva dhamme sayaṁ abhiññā sacchikatvā upasampajja vihāsi.

“Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā”ti abbhaññāsi.

Aññataro kho panāyasmā kassapo arahataṁ ahosi.

Atha kho āyasmā bākulo aparena samayena avāpuraṇaṁ ādāya vihārena vihāraṁ upasaṅkamitvā evamāha:

“abhikkamathāyasmanto, abhikkamathāyasmanto. Ajja me parinibbānaṁ bhavissatī”ti.

“Yampāyasmā bākulo avāpuraṇaṁ ādāya vihārena vihāraṁ upasaṅkamitvā evamāha: ‘abhikkamathāyasmanto, abhikkamathāyasmanto; ajja me parinibbānaṁ bhavissatī’ti, idampi mayaṁ āyasmato bākulassa acchariyaṁ abbhutadhammaṁ dhārema”.

Āyasmā bākulo majjhe bhikkhusaṅghassa nisinnakova parinibbāyi.

“Yampāyasmā bākulo majjhe bhikkhusaṅghassa nisinnakova parinibbāyi, idampi mayaṁ āyasmato bākulassa acchariyaṁ abbhutadhammaṁ dhāremā”ti.

Bākulasuttaṁ niṭṭhitaṁ catutthaṁ.