相應部第1171經（Saṁyutta Nikāya 42.11 / 1. Gāmaṇivagga / Bhadrakasutta）

部類相應部

Pali NikāyaSaṁyutta Nikāya

總句數55

已譯句數0

1-1

巴利原文

Saṁyutta Nikāya 42.11

2-1

巴利原文

1. Gāmaṇivagga

3-1

巴利原文

Bhadrakasutta

4-1

巴利原文

Ekaṁ samayaṁ bhagavā mallesu viharati uruvelakappaṁ nāma mallānaṁ nigamo.

5-1

巴利原文

Atha kho bhadrako gāmaṇi yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho bhadrako gāmaṇi bhagavantaṁ etadavoca:

6-1

巴利原文

“sādhu me, bhante, bhagavā dukkhassa samudayañca atthaṅgamañca desetū”ti.

7-1

巴利原文

“Ahañce te, gāmaṇi, atītamaddhānaṁ ārabbha dukkhassa samudayañca atthaṅgamañca deseyyaṁ:

8-1

巴利原文

‘evaṁ ahosi atītamaddhānan’ti, tatra te siyā kaṅkhā, siyā vimati.

9-1

巴利原文

Ahañce te, gāmaṇi, anāgatamaddhānaṁ ārabbha dukkhassa samudayañca atthaṅgamañca deseyyaṁ:

10-1

巴利原文

‘evaṁ bhavissati anāgatamaddhānan’ti, tatrāpi te siyā kaṅkhā, siyā vimati.

11-1

巴利原文

Api cāhaṁ, gāmaṇi, idheva nisinno ettheva te nisinnassa dukkhassa samudayañca atthaṅgamañca desessāmi.

12-1

巴利原文

Taṁ suṇāhi, sādhukaṁ manasi karohi; bhāsissāmī”ti.

13-1

巴利原文

“Evaṁ, bhante”ti kho bhadrako gāmaṇi bhagavato paccassosi.

14-1

巴利原文

Bhagavā etadavoca:

15-1

巴利原文

“Taṁ kiṁ maññasi, gāmaṇi,

16-1

巴利原文

atthi te uruvelakappe manussā yesaṁ te vadhena vā bandhena vā jāniyā vā garahāya vā uppajjeyyuṁ sokaparidevadukkhadomanassupāyāsā”ti?

17-1

巴利原文

“Atthi me, bhante, uruvelakappe manussā yesaṁ me vadhena vā bandhena vā jāniyā vā garahāya vā uppajjeyyuṁ sokaparidevadukkhadomanassupāyāsā”ti.

18-1

巴利原文

“Atthi pana te, gāmaṇi, uruvelakappe manussā yesaṁ te vadhena vā bandhena vā jāniyā vā garahāya vā nuppajjeyyuṁ sokaparidevadukkhadomanassupāyāsā”ti?

19-1

巴利原文

“Atthi me, bhante, uruvelakappe manussā yesaṁ me vadhena vā bandhena vā jāniyā vā garahāya vā nuppajjeyyuṁ sokaparidevadukkhadomanassupāyāsā”ti.

20-1

巴利原文

“Ko nu kho, gāmaṇi, hetu, ko paccayo yena te ekaccānaṁ uruvelakappiyānaṁ manussānaṁ vadhena vā bandhena vā jāniyā vā garahāya vā uppajjeyyuṁ sokaparidevadukkhadomanassupāyāsā”ti?

21-1

巴利原文

“Yesaṁ me, bhante, uruvelakappiyānaṁ manussānaṁ vadhena vā bandhena vā jāniyā vā garahāya vā uppajjeyyuṁ sokaparidevadukkhadomanassupāyāsā, atthi me tesu chandarāgo.

22-1

巴利原文

Yesaṁ pana, bhante, uruvelakappiyānaṁ manussānaṁ vadhena vā bandhena vā jāniyā vā garahāya vā nuppajjeyyuṁ sokaparidevadukkhadomanassupāyāsā, natthi me tesu chandarāgo”ti.

23-1

巴利原文

“Iminā tvaṁ, gāmaṇi, dhammena diṭṭhena viditena akālikena pattena pariyogāḷhena atītānāgate nayaṁ nehi:

24-1

巴利原文

‘yaṁ kho kiñci atītamaddhānaṁ dukkhaṁ uppajjamānaṁ uppajji sabbaṁ taṁ chandamūlakaṁ chandanidānaṁ.

25-1

巴利原文

Chando hi mūlaṁ dukkhassa.

26-1

巴利原文

Yampi hi kiñci anāgatamaddhānaṁ dukkhaṁ uppajjamānaṁ uppajjissati, sabbaṁ taṁ chandamūlakaṁ chandanidānaṁ.

27-1

巴利原文

Chando hi mūlaṁ dukkhassā’”ti.

28-1

巴利原文

“Acchariyaṁ, bhante, abbhutaṁ, bhante.

29-1

巴利原文

Yāva subhāsitañcidaṁ, bhante, bhagavatā:

30-1

巴利原文

‘yaṁ kiñci dukkhaṁ uppajjamānaṁ uppajjati, sabbaṁ taṁ chandamūlakaṁ chandanidānaṁ.

31-1

巴利原文

Chando hi mūlaṁ dukkhassā’ti.

32-1

巴利原文

Atthi me, bhante, ciravāsī nāma kumāro bahi āvasathe paṭivasati.

33-1

巴利原文

So khvāhaṁ, bhante, kālasseva vuṭṭhāya purisaṁ uyyojemi:

34-1

巴利原文

‘gaccha, bhaṇe, ciravāsiṁ kumāraṁ jānāhī’ti.

35-1

巴利原文

Yāvakīvañca, bhante, so puriso nāgacchati, tassa me hoteva aññathattaṁ:

36-1

巴利原文

‘mā heva ciravāsissa kumārassa kiñci ābādhayitthā’”ti.

37-1

巴利原文

“Taṁ kiṁ maññasi, gāmaṇi,

38-1

巴利原文

ciravāsissa kumārassa vadhena vā bandhena vā jāniyā vā garahāya vā uppajjeyyuṁ sokaparidevadukkhadomanassupāyāsā”ti?

39-1

巴利原文

“Ciravāsissa me, bhante, kumārassa vadhena vā bandhena vā jāniyā vā garahāya vā jīvitassapi siyā aññathattaṁ, kiṁ pana me nuppajjissanti sokaparidevadukkhadomanassupāyāsā”ti.

40-1

巴利原文

“Imināpi kho etaṁ, gāmaṇi, pariyāyena veditabbaṁ:

41-1

巴利原文

‘yaṁ kiñci dukkhaṁ uppajjamānaṁ uppajjati, sabbaṁ taṁ chandamūlakaṁ chandanidānaṁ.

42-1

巴利原文

Chando hi mūlaṁ dukkhassā’ti.

43-1

巴利原文

Taṁ kiṁ maññasi, gāmaṇi,

44-1

巴利原文

yadā te ciravāsimātā adiṭṭhā ahosi, assutā ahosi, te ciravāsimātuyā chando vā rāgo vā pemaṁ vā”ti?

45-1

巴利原文

“No hetaṁ, bhante”.

46-1

巴利原文

“Dassanaṁ vā te, gāmaṇi, āgamma savanaṁ vā evaṁ te ahosi:

47-1

巴利原文

‘ciravāsimātuyā chando vā rāgo vā pemaṁ vā’”ti?

48-1

巴利原文

“Evaṁ, bhante”.

49-1

巴利原文

“Taṁ kiṁ maññasi, gāmaṇi,

50-1

巴利原文

ciravāsimātuyā te vadhena vā bandhena vā jāniyā vā garahāya vā uppajjeyyuṁ sokaparidevadukkhadomanassupāyāsā”ti?

51-1

巴利原文

“Ciravāsimātuyā me, bhante, vadhena vā bandhena vā jāniyā vā garahāya vā jīvitassapi siyā aññathattaṁ, kiṁ pana me nuppajjissanti sokaparidevadukkhadomanassupāyāsā”ti.

52-1

巴利原文

“Imināpi kho etaṁ, gāmaṇi, pariyāyena veditabbaṁ:

53-1

巴利原文

‘yaṁ kiñci dukkhaṁ uppajjamānaṁ uppajjati, sabbaṁ taṁ chandamūlakaṁ chandanidānaṁ.

54-1

巴利原文

Chando hi mūlaṁ dukkhassā’”ti.

55-1

巴利原文

Ekādasamaṁ.