相應部第1192經（Saṁyutta Nikāya 44.4 / 1. Abyākatavagga / Dutiyasāriputtakoṭṭhikasutta）

Saṁyutta Nikāya 44.4

1. Abyākatavagga

Dutiyasāriputtakoṭṭhikasutta

Ekaṁ samayaṁ āyasmā ca sāriputto, āyasmā ca mahākoṭṭhiko bārāṇasiyaṁ viharanti isipatane migadāye …pe…

(sāyeva pucchā.)

“Ko nu kho, āvuso, hetu, ko paccayo, yenetaṁ abyākataṁ bhagavatā”ti?

“Rūpaṁ kho, āvuso, ajānato apassato yathābhūtaṁ, rūpasamudayaṁ ajānato apassato yathābhūtaṁ, rūpanirodhaṁ ajānato apassato yathābhūtaṁ, rūpanirodhagāminiṁ paṭipadaṁ ajānato apassato yathābhūtaṁ, ‘hoti tathāgato paraṁ maraṇā’tipissa hoti;

‘na hoti tathāgato paraṁ maraṇā’tipissa hoti;

‘hoti ca na ca hoti tathāgato paraṁ maraṇā’tipissa hoti;

‘neva hoti na na hoti tathāgato paraṁ maraṇā’tipissa hoti.

Vedanaṁ …pe…

saññaṁ …pe…

saṅkhāre …pe…

viññāṇaṁ ajānato apassato yathābhūtaṁ, viññāṇasamudayaṁ ajānato apassato yathābhūtaṁ, viññāṇanirodhaṁ ajānato apassato yathābhūtaṁ, viññāṇanirodhagāminiṁ paṭipadaṁ ajānato apassato yathābhūtaṁ, ‘hoti tathāgato paraṁ maraṇā’tipissa hoti;

‘na hoti tathāgato paraṁ maraṇā’tipissa hoti;

‘hoti ca na ca hoti tathāgato paraṁ maraṇā’tipissa hoti;

‘neva hoti na na hoti tathāgato paraṁ maraṇā’”tipissa hoti.

Rūpañca kho, āvuso, jānato passato yathābhūtaṁ, rūpasamudayaṁ jānato passato yathābhūtaṁ, rūpanirodhaṁ jānato passato yathābhūtaṁ, rūpanirodhagāminiṁ paṭipadaṁ jānato passato yathābhūtaṁ, ‘hoti tathāgato paraṁ maraṇā’tipissa na hoti …pe…

‘neva hoti na na hoti tathāgato paraṁ maraṇā’tipissa na hoti.

Vedanaṁ …pe…

saññaṁ …pe…

saṅkhāre …pe…

viññāṇaṁ jānato passato yathābhūtaṁ, viññāṇasamudayaṁ jānato passato yathābhūtaṁ, viññāṇanirodhaṁ jānato passato yathābhūtaṁ, viññāṇanirodhagāminiṁ paṭipadaṁ jānato passato yathābhūtaṁ, ‘hoti tathāgato paraṁ maraṇā’tipissa na hoti;

‘na hoti tathāgato paraṁ maraṇā’tipissa na hoti;

‘hoti ca na ca hoti tathāgato paraṁ maraṇā’tipissa na hoti;

‘neva hoti na na hoti tathāgato paraṁ maraṇā’tipissa na hoti.

Ayaṁ kho, āvuso, hetu ayaṁ paccayo, yenetaṁ abyākataṁ bhagavatā”ti.

Catutthaṁ.