相應部第155經（Saṁyutta Nikāya 4.19 / 2. Dutiyavagga / Kassakasutta）

Saṁyutta Nikāya 4.19

2. Dutiyavagga

Kassakasutta

Sāvatthinidānaṁ.

Tena kho pana samayena bhagavā bhikkhūnaṁ nibbānapaṭisaṁyuttāya dhammiyā kathāya sandasseti samādapeti samuttejeti sampahaṁseti.

Te ca bhikkhū aṭṭhiṁ katvā manasi katvā sabbacetasā samannāharitvā ohitasotā dhammaṁ suṇanti.

Atha kho mārassa pāpimato etadahosi:

“ayaṁ kho samaṇo gotamo bhikkhūnaṁ nibbānapaṭisaṁyuttāya dhammiyā kathāya …pe…

yannūnāhaṁ yena samaṇo gotamo tenupasaṅkameyyaṁ vicakkhukammāyā”ti.

Atha kho māro pāpimā kassakavaṇṇaṁ abhinimminitvā mahantaṁ naṅgalaṁ khandhe karitvā dīghapācanayaṭṭhiṁ gahetvā haṭahaṭakeso sāṇasāṭinivattho kaddamamakkhitehi pādehi yena bhagavā tenupasaṅkami; upasaṅkamitvā bhagavantaṁ etadavoca:

“api, samaṇa, balībadde addasā”ti?

“Kiṁ pana, pāpima, te balībaddehī”ti?

“Mameva, samaṇa, cakkhu, mama rūpā, mama cakkhusamphassaviññāṇāyatanaṁ.

Kuhiṁ me, samaṇa, gantvā mokkhasi?

Mameva, samaṇa, sotaṁ, mama saddā …pe…

mameva, samaṇa, ghānaṁ, mama gandhā;

mameva, samaṇa, jivhā, mama rasā;

mameva, samaṇa, kāyo, mama phoṭṭhabbā;

mameva, samaṇa, mano, mama dhammā, mama manosamphassaviññāṇāyatanaṁ.

Kuhiṁ me, samaṇa, gantvā mokkhasī”ti?

“Taveva, pāpima, cakkhu, tava rūpā, tava cakkhusamphassaviññāṇāyatanaṁ.

Yattha ca kho, pāpima, natthi cakkhu, natthi rūpā, natthi cakkhusamphassaviññāṇāyatanaṁ, agati tava tattha, pāpima.

Taveva, pāpima, sotaṁ, tava saddā, tava sotasamphassaviññāṇāyatanaṁ.

Yattha ca kho, pāpima, natthi sotaṁ, natthi saddā, natthi sotasamphassaviññāṇāyatanaṁ, agati tava tattha, pāpima.

Taveva, pāpima, ghānaṁ, tava gandhā, tava ghānasamphassaviññāṇāyatanaṁ.

Yattha ca kho, pāpima, natthi ghānaṁ, natthi gandhā, natthi ghānasamphassaviññāṇāyatanaṁ, agati tava tattha, pāpima.

Taveva, pāpima, jivhā, tava rasā, tava jivhāsamphassaviññāṇāyatanaṁ …pe…

taveva, pāpima, kāyo, tava phoṭṭhabbā, tava kāyasamphassaviññāṇāyatanaṁ …pe…

taveva, pāpima, mano, tava dhammā, tava manosamphassaviññāṇāyatanaṁ.

Yattha ca kho, pāpima, natthi mano, natthi dhammā, natthi manosamphassaviññāṇāyatanaṁ, agati tava tattha, pāpimā”ti.

“Yaṁ vadanti mama yidanti,

ye vadanti mamanti ca;

Ettha ce te mano atthi,

na me samaṇa mokkhasī”ti.

“Yaṁ vadanti na taṁ mayhaṁ,

ye vadanti na te ahaṁ;

Evaṁ pāpima jānāhi,

na me maggampi dakkhasī”ti.

Atha kho māro pāpimā …pe… tatthevantaradhāyīti.