相應部第886經（Saṁyutta Nikāya 35.31 / 3. Sabbavagga / Paṭhamasamugghātasappāyasutta）

Saṁyutta Nikāya 35.31

3. Sabbavagga

Paṭhamasamugghātasappāyasutta

“Sabbamaññitasamugghātasappāyaṁ vo, bhikkhave, paṭipadaṁ desessāmi.

Taṁ suṇātha.

Katamā ca sā, bhikkhave, sabbamaññitasamugghātasappāyā paṭipadā?

Idha, bhikkhave, bhikkhu cakkhuṁ na maññati, cakkhusmiṁ na maññati, cakkhuto na maññati, cakkhuṁ meti na maññati.

Rūpe na maññati …pe…

cakkhuviññāṇaṁ na maññati, cakkhusamphassaṁ na maññati, yampidaṁ cakkhusamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā tampi na maññati, tasmimpi na maññati, tatopi na maññati, taṁ meti na maññati.

Yañhi, bhikkhave, maññati, yasmiṁ maññati, yato maññati, yaṁ meti maññati, tato taṁ hoti aññathā.

Aññathābhāvī bhavasatto loko bhavamevābhinandati …pe…

jivhaṁ na maññati, jivhāya na maññati, jivhāto na maññati, jivhā meti na maññati.

Rase na maññati …pe…

jivhāviññāṇaṁ na maññati, jivhāsamphassaṁ na maññati.

Yampidaṁ jivhāsamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā tampi na maññati, tasmimpi na maññati, tatopi na maññati, taṁ meti na maññati.

Yañhi, bhikkhave, maññati, yasmiṁ maññati, yato maññati, yaṁ meti maññati, tato taṁ hoti aññathā.

Aññathābhāvī bhavasatto loko bhavamevābhinandati …pe…

manaṁ na maññati, manasmiṁ na maññati, manato na maññati, mano meti na maññati.

Dhamme na maññati …pe…

manoviññāṇaṁ na maññati, manosamphassaṁ na maññati.

Yampidaṁ manosamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā tampi na maññati, tasmimpi na maññati, tatopi na maññati, taṁ meti na maññati.

Yañhi, bhikkhave, maññati, yasmiṁ maññati, yato maññati, yaṁ meti maññati, tato taṁ hoti aññathā.

Aññathābhāvī bhavasatto loko bhavamevābhinandati.

Yāvatā, bhikkhave, khandhadhātuāyatanaṁ tampi na maññati, tasmimpi na maññati, tatopi na maññati, taṁ meti na maññati.

So evaṁ amaññamāno na ca kiñci loke upādiyati.

Anupādiyaṁ na paritassati. Aparitassaṁ paccattaññeva parinibbāyati.

‘Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā’ti pajānāti.

Ayaṁ kho sā, bhikkhave, sabbamaññitasamugghātasappāyā paṭipadā”ti.

Navamaṁ.