相應部第902經（Saṁyutta Nikāya 35.64 / 7. Migajālavagga / Dutiyamigajālasutta）

Saṁyutta Nikāya 35.64

7. Migajālavagga

Dutiyamigajālasutta

Atha kho āyasmā migajālo yena bhagavā tenupasaṅkami …pe…

ekamantaṁ nisinno kho āyasmā migajālo bhagavantaṁ etadavoca:

“sādhu me, bhante, bhagavā saṅkhittena dhammaṁ desetu, yamahaṁ bhagavato dhammaṁ sutvā eko vūpakaṭṭho appamatto ātāpī pahitatto vihareyyan”ti.

“Santi kho, migajāla, cakkhuviññeyyā rūpā iṭṭhā kantā manāpā piyarūpā kāmūpasaṁhitā rajanīyā.

Tañce bhikkhu abhinandati abhivadati ajjhosāya tiṭṭhati.

Tassa taṁ abhinandato abhivadato ajjhosāya tiṭṭhato uppajjati nandī.

Nandisamudayā dukkhasamudayo, migajālāti vadāmi …pe…

santi ca kho, migajāla, jivhāviññeyyā rasā …pe…

santi ca kho, migajāla, manoviññeyyā dhammā iṭṭhā kantā manāpā piyarūpā kāmūpasaṁhitā rajanīyā.

Tañce bhikkhu abhinandati abhivadati ajjhosāya tiṭṭhati.

Tassa taṁ abhinandato abhivadato ajjhosāya tiṭṭhato uppajjati nandī.

Nandisamudayā dukkhasamudayo, migajālāti vadāmi.

Santi ca kho, migajāla, cakkhuviññeyyā rūpā iṭṭhā kantā manāpā piyarūpā kāmūpasaṁhitā rajanīyā.

Tañce bhikkhu nābhinandati nābhivadati nājjhosāya tiṭṭhati. Tassa taṁ anabhinandato anabhivadato anajjhosāya tiṭṭhato nandī nirujjhati.

Nandinirodhā dukkhanirodho, migajālāti vadāmi …pe…

santi ca kho, migajāla, jivhāviññeyyā rasā iṭṭhā kantā …pe…

santi ca kho, migajāla, manoviññeyyā dhammā iṭṭhā kantā manāpā piyarūpā kāmūpasaṁhitā rajanīyā.

Tañce bhikkhu nābhinandati nābhivadati nājjhosāya tiṭṭhati. Tassa taṁ anabhinandato anabhivadato anajjhosāya tiṭṭhato nandī nirujjhati.

Nandinirodhā dukkhanirodho, migajālāti vadāmī”ti.

Atha kho āyasmā migajālo bhagavato bhāsitaṁ abhinanditvā anumoditvā uṭṭhāyāsanā bhagavantaṁ abhivādetvā padakkhiṇaṁ katvā pakkāmi.

Atha kho āyasmā migajālo eko vūpakaṭṭho appamatto ātāpī pahitatto viharato nacirasseva—yassatthāya kulaputtā sammadeva agārasmā anagāriyaṁ pabbajanti, tadanuttaraṁ—brahmacariyapariyosānaṁ diṭṭheva dhamme sayaṁ abhiññā sacchikatvā upasampajja vihāsi.

“Khīṇā jāti, vusitaṁ brahmacariyaṁ, kataṁ karaṇīyaṁ, nāparaṁ itthattāyā”ti abbhaññāsi.

Aññataro ca panāyasmā migajālo arahataṁ ahosīti.

Dutiyaṁ.