寶積部第43卷（དཀོན་བརྩེཊ་ཅ་པ་བཞུགས་སོ། །）

འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་ཉི་ཤུ་པ་སྟེ་གློག་ཐོབ་ཀྱིས་ཞུས་པ།

བམ་པོ་དང་པོ།

རྒྱ་གར་སྐད་དུ།

ཨཱརྱ་བི་དྱུཏ་པྲཱཔྟ་པ་རི་པྲྀ་ཙྪཱ་ནཱ་མ་མ་ཧཱ་ཡཱ་ན་སཱུ་ཏྲ།

བོད་སྐད་དུ།

འཕགས་པ་གློག་ཐོབ་ཀྱིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ།

སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ།

འདི་སྐད་བདག་གིས་ཐོས་པ་དུས་གཅིག་ན།

བཅོམ་ལྡན་འདས་རྒྱལ་པོའི་ཁབ་བྱ་རྒོད་ཕུང་པོའི་རི་ལ།

དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་ཡོན་ཏན་ཁྱད་པར་དུ་འཕགས་པ་ཕུན་སུམ་ཚོགས་ཤིང་སེང་གེའི་སྒྲ་སྒྲོགས་པ་སྟོང་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་ལྔ་བརྒྱ་དང་ཐབས་ཅིག་ཏུ་བཞུགས་ཏེ།

དེ་དག་ཐམས་ཅད་ཀྱང་གཟུངས་རབ་ཏུ་ཐོབ་པ།

སྤོབས་པ་ཐོགས་པ་མེད་པར་གྱུར་པ།

མི་སྐྱེ་བའི་ཆོས་ལ་བཟོད་པ་མངོན་སུམ་དུ་བྱས་པ།

ཕྱིར་མི་ལྡོག་པ་ལ་གནས་པ།

ཏིང་ངེ་འཛིན་རྣམས་དང་ལྡན་པ།

མངོན་པར་ཤེས་པས་རྣམ་པར་རྩེན་པ།

སེམས་ཅན་གྱི་སེམས་ཀྱི་སྤྱོད་པའི་ཚུལ་རབ་ཏུ་རྟོགས་པ་ཤ་སྟག་ལ་

འདི་ལྟ་སྟེ།

བྱང་ཆུབ་སེམས་དཔའ་ཉི་མའི་རྒྱལ་མཚན་དང་།

བྱང་ཆུབ་སེམས་དཔའ་ཟླ་བའི་རྒྱལ་མཚན་དང་།

བྱང་ཆུབ་སེམས་དཔའ་ཀུན་ཏུ་འོད་དང་།

བྱང་ཆུབ་སེམས་དཔའ་ཟླ་བའི་རྒྱལ་པོ་དང་།

བྱང་ཆུབ་སེམས་དཔའ་ཤིན་ཏུ་མཐོ་གསལ་དང་།

བྱང་ཆུབ་སེམས་དཔའ་རྣམ་པར་སྣང་བྱེད་དང་།

བྱང་ཆུབ་སེམས་དཔའ་སེང་གེའི་བློ་གྲོས་དང་།

བྱང་ཆུབ་སེམས་དཔའ་རིན་པོ་ཆེའི་ཡོན་ཏན་འོད་དང་།

བྱང་ཆུབ་སེམས་དཔའ་དོན་ཐམས་ཅད་གྲུབ་པ་དང་།

བྱང་ཆུབ་སེམས་དཔའ་སྔོན་གྱི་རྐྱེན་དང་ལྡན་པ་དང་།

བྱང་ཆུབ་སེམས་དཔའ་སྨོན་ལམ་དང་སྤྱོད་པ་ཕུན་སུམ་ཚོགས་པ་དང་།

བྱང་ཆུབ་སེམས་དཔའ་སྟོང་པའི་བློ་གྲོས་དང་།

བྱང་ཆུབ་སེམས་དཔའ་མཉམ་པའི་སེམས་དང་།

བྱང་ཆུབ་སེམས་དཔའ་དགའ་སྲེད་དང་།

བྱང་ཆུབ་སེམས་དཔའ་འཁོར་ལོ་མོས་པ་དང་།

བྱང་ཆུབ་སེམས་དཔའ་གཡུལ་ལས་རྣམ་པར་རྒྱལ་བ་དང་།

བྱང་ཆུབ་སེམས་དཔའ་བློ་གྲོས་སྤྱོད་པ་དང་།

བྱང་ཆུབ་སེམས་དཔའ་གློག་ཐོབ་དང་།

བྱང་ཆུབ་སེམས་དཔའ་རྣམ་པར་རྒྱལ་བའི་སྤོབས་པ་དང་།

བྱང་ཆུབ་སེམས་དཔའ་སེང་གེའི་ང་རོ་དང་།

བྱང་ཆུབ་སེམས་དཔའ་རབ་དབྱངས་དང་།

བྱང་ཆུབ་སེམས་དཔའ་སད་བྱེད་དང་།

བྱང་ཆུབ་སེམས་དཔའ་སྤྱོད་པ་སྒྱུར་བ་ལ་མཁས་པ་དང་།

བྱང་ཆུབ་སེམས་དཔའ་རབ་ཏུ་ཞི་བའི་སྤྱོད་པ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་འདི་དག་ནི་གཙོ་བོར་གྱུར་ཏོ།

གཞན་ཡང་བརྒྱ་བྱིན་ལྷའི་དབང་པོ་དང་།

རྒྱལ་པོ་ཆེན་པོ་བཞི་དང་།

འཇིག་རྟེན་གྱི་ཁམས་མི་མཇེད་ཀྱི་བདག་པོ་ཚངས་པའི་རྒྱལ་པོ་དང་།

མཐུ་ཆེན་པོ་དང་ལྡན་པའི་ལྷ་དང་།

ཀླུ་དང་།

གནོད་སྦྱིན་དང་།

དྲི་ཟ་དང་།

ལྷ་མ་ཡིན་དང་།

ནམ་མཁའ་ལྡིང་དང་།

མིའམ་ཅི་དང་།

ལྟོ་འཕྱེ་ཆེན་པོ་ལ་སོགས་པའི་འཁོར་ཚད་མེད་པ་རྣམས་དང་ཡང་ཐབས་ཅིག་

ཏུ་བཞུགས་སོ།

དེ་ནས་དེའི་ཚེ་བྱང་ཆུབ་སེམས་དཔའ་གློག་ཐོབ་ཅེས་བྱ་བས་འཁོར་མང་པོ་རབ་ཏུ་ཞི་ཞིང་ཡོངས་སུ་དག་པ་དག་འདུས་པར་གྱུར་པ་མཐོང་བ་དང་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ།

བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་བདག་ལ་ཐེ་ཚོམ་ཅུང་ཟད་ཅིག་མཆིས་ཏེ་དེང་ཞུ་བར་འཚལ་ན།

དེ་བཞིན་གཤེགས་པས་ཐུགས་རྗེས་གསན་ཅིང་གནང་བར་མཛད་དུ་གསོལ།

དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་གློག་ཐོབ་ལ་བཀའ་སྩལ་པ།

དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཁྱོད་ལ་སྐབས་ཕྱེས།

ཁྱོད་ཅི་དང་ཅི་འདོད་པ་དྲིས་ཤིག་དང་ཁྱོད་ལ་ཡང་དག་པར་བསྟན་པར་བྱའོ།

དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་གློག་ཐོབ་ཀྱིས་འདི་སྐད་ཅེས་གསོལ་ཏོ།

བཅོམ་ལྡན་འདས་བྱང་ཆུབ་སེམས་དཔའ་ཆོས་ཇི་ལྟ་བུ་ཞིག་དང་ལྡན་པར་གྱུར་ན་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་བགྱིད་ཅིང་སྐྱོན་རྣམས་ཀྱིས་གོས་པར་མི་འགྱུར་བ་དང་།

དབང་པོ་དང་རང་བཞིན་ཇི་ལྟ་བ་བཞིན་དུ་ཐབས་མཁས་པས་སེམས་ཅན་དེ་དག་དྲངས་ཏེ་ལུས་ཞིག་པའི་འོག་ཏུ་ངན་འགྲོ་རྣམས་སུ་ལྟུང་བར་མི་འགྱུར་ཞིང་གདོན་མི་འཚལ་བར་མཉམ་པ་ཉིད་རྟོགས་པར་འགྱུར་བ་དང་།

འཇིག་རྟེན་ན་གནས་ཀྱང་པད་མ་བཞིན་སྐྱོན་གྱིས་གོས་པར་མི་འགྱུར་བ་དང་།

ཆོས་ཀྱི་དབྱིངས་ལས་མ་གཡོས་པར་ཡང་སངས་རྒྱས་ཀྱི་ཞིང་ཀུན་ཏུ་རྒྱུ་ཞིང་རྟག་པར་དེ་བཞིན་གཤེགས་པའི་གཟུགས་ཀྱི་སྐུ་མཐོང་བ་དང་འབྲལ་བར་མི་འགྱུར་བ་དང་།

རྣམ་པར་ཐར་པ་གསུམ་ལ་རབ་ཏུ་གནས་ཀྱང་སྙོམས་པར་མི་འཇུག་པར་སེམས་ཅན་གྱི་མོས་པ་ཇི་ལྟ་བ་བཞིན་དུ་སངས་རྒྱས་ཀྱི་ཞིང་གི་བཀོད་པ་ཡོངས་སུ་སྦྱངས་ནས་སྐད་ཅིག་མ་གཅིག་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ལགས།

དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་གློག་ཐོབ་ཀྱིས་བཅོམ་ལྡན་འདས་ཀྱི་སྤྱན་སྔར་ཚིགས་སུ་བཅད་དེ་ཞུ་བ་ཞུས་པ།

བླ་

ན་མ་མཆིས་མི་ཡི་གཙོ།

མཁྱེན་དང་གཟིགས་པ་ཚད་མ་མཆིས།

མ་འདྲེས་ཆོས་ལ་བཞུགས་ནས་ནི།

འཇིག་རྟེན་རྣམས་ལ་ཕན་འདོགས་མཛད།

སེམས་ཅན་ཀུན་ལ་སྙོམས་པར་གཟིགས།

འཇིག་རྟེན་ཀུན་གྱི་མགོན་སྐྱབས་མཛད།

ལོག་དང་ཡང་དག་ལམ་བསྟན་ནས།

མཐར་ཐུག་བདེ་ལ་འགོད་པར་མཛད།

ཡོན་ཏན་མཆོག་ནི་རབ་བསགས་པས།

རིན་ཆེན་སྣ་ཚོགས་ཕུང་པོ་འདྲ།

འཇིག་རྟེན་ཤེས་རབ་ཉི་མ་ཁྱོད།

ཁམས་གསུམ་མཆོད་འོས་གཙོ་བོ་ལགས།

ཐེག་པ་ཆེན་པོ་བཀས་བཤད་ནས།

བྱང་ཆུབ་ལམ་ནི་རྫོགས་པར་མཛོད།

ཞལ་མཚན་ཟླ་བ་ཉ་བ་འདྲ།

ཞི་གནས་དག་ནི་ཕུན་སུམ་ཚོགས།

ཉེར་ཞི་ཆོས་ནི་རབ་བསྟན་ནས།

ཉོན་མོངས་རྣམས་ནི་ཞི་བར་མཛད།

བྱང་ཆུབ་སྤྱོད་པ་བཀས་བཤད་ནས།

སེམས་ཅན་རྣམས་ལ་ཕན་མཛད་གསོལ།

སངས་རྒྱས་ཞིང་དང་སྐུ་ཚེ་དང་།

གཟུགས་སྐུ་དང་ནི་འཁོར་རྣམས་དང་།

ཕྲིན་ལས་གསུམ་དང་ཆོས་རྣམས་ཀྱང་།

ཐམས་ཅད་ཀུན་ནི་རྣམ་པར་དག །

བཅོམ་ལྡན་བྱང་ཆུབ་སེམས་དཔའ་ཡི།

རྣམ་དག་སྤྱོད་པ་བཀས་བཤད་གསོལ།

ཇི་ལྟར་བདུད་ནི་གདུལ་བར་བགྱི།

ཇི་ལྟར་ཆོས་ནི་བསྟན་པར་བགྱི།

ཇི་ལྟར་དྲན་པ་ཉམས་མི་འགྱུར།

ཁྱོད་ཀྱི་བཀས་ནི་བཤད་དུ་གསོལ།

ཇི་ལྟར་དཔའ་བོ་དག་གིས་ནི།

འཁོར་བ་ཀུན་དུ་ཞུགས་གྱུར་ཀྱང་།

མཚན་ཉིད་གཅིག་ལ་གནས་བགྱིད་ཅིང་།

ཆོས་ལ་རྟག་ཏུ་གཡོ་མི་འགྱུར།

ཇི་ལྟར་སངས་རྒྱས་རྣམས་ལ་ནི།

བསྟན་ཅིང་མཆོད་པ་བགྱིས་ནས་ནི།

རྟག་པར་སངས་རྒྱས་སྐུ་བལྟས་ཀྱང་།

མཐར་ནི་མཚན་མ་སྤོང་འགྱུར་ལགས།

རྣམ་ཐར་གསུམ་པོ་མངོན་བགྱིས་ཀྱང་།

མཁའ་ལ་བྱ་ནི་འཕུར་བ་བཞིན།

ཡོན་ཏན་ཕུན་ཚོགས་མ་གྱུར་པར།

ནམ་ཡང་མྱ་ངན་མི་འདའ་ལགས།

དབང་པོ་རང་བཞིན་ཡོངས་རྟོགས་ནས།

འཇིགས་པ་མ་མཆིས་རྗེས་འབྲང་ཞིང་།

མངོན་པར་ཞེན་པ་མ་མཆིས་བར།

སེམས་ཅན་དེ་དག་སྨིན་བགྱིད་ལགས།

སྔར་ནི་འཇིག་རྟེན་བདེ་བཏང་ནས།

སླད་ཀྱིས་དང་བའི་སེམས་བསྐྱེད་དེ།

ཡེ་ཤེས་གྱ་ནོམ་ཕུན་ཚོགས་པས།

བླ་མེད་བྱང་ཆུབ་འཐོབ་པར་འགྱུར།

འདི་འདྲའི་ཟབ་མོ་གྱ་ནོམ་དོན།

དེ་བཞིན་གཤེགས་པས་བཀས་བཤད་གསོལ།

དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་གློག་ཐོབ་ལ་བཀའ་སྩལ་པ།

རིགས་ཀྱི་བུ་ཁྱོད་ཀྱིས་སེམས་ཅན་ཚད་མེད་པ་རྣམས་ལ་ཕན་ཞིང་བདེ་བར་བྱ་བ་དང་།

ད་ལྟར་གྱི་ལྷ་དང་བཅས་པའི་འཇིག་རྟེན་དང་།

མ་འོངས་པའི་བྱང་ཆུབ་སེམས་དཔའ་རྣམས་ཡོངས་སུ་གཟུང་བའི་ཕྱིར་དེ་བཞིན་གཤེགས་པ་ལ་དོན་འདི་ལྟ་བུ་ཞུས་པ་ལེགས་སོ་ལེགས་སོ།

དེའི་ཕྱིར་གློག་ཐོབ་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དང་ཁྱོད་ལ་ཡང་དག་པར་བསྟན་པར་བྱའོ།

བྱང་ཆུབ་སེམས་དཔའ་གློག་ཐོབ་ཀྱིས་བཅོམ་ལྡན་འདས་དེ་བཞིན་དུ་ཐོས་པར་འཚལ་ལོ་ཞེས་གསོལ་པ་དང་།

བཅོམ་ལྡན་འདས་ཀྱིས་བཀའ་སྩལ་པ།

གློག་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་གཏེར་ཆེན་པོ་དང་།

ཟད་མི་ཤེས་པའི་གཏེར་དང་།

ཀུན་དུ་ཟད་མི་ཤེས་པའི་གཏེར་དང་།

མཐའ་མེད་པའི་གཏེར་རྣམ་པ་ལྔ་དང་ལྡན་པ་སྟེ།

བྱང་ཆུབ་སེམས་དཔའ་དེ་ལྟ་བུའི་གཏེར་ཕུན་སུམ་ཚོགས་པར་གྱུར་པས་རྒུད་པ་རྣམས་གཏན་དུ་སྤོང་ཞིང་གོང་དུ་བསྟན་པ་ལྟ་བུའི་ཡོན་ཏན་ཁྱད་པར་དུ་འཕགས་པ་ཡང་ཡོངས་སུ་རྫོགས་པར་བྱེད་ལ་ཚེགས་ཆུང་ངུས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་འཐོབ་པར་འགྱུར་རོ།

ལྔ་གང་ཞེ་ན།

འདི་ལྟ་སྟེ།

འདོད་ཆགས་སྤྱོད་པའི་གཏེར་དང་།

ཞེ་སྡང་སྤྱོད་པའི་གཏེར་དང་།

གཏི་མུག་སྤྱོད་པའི་གཏེར་དང་།

ཆ་མཉམ་པ་སྤྱོད་པའི་གཏེར་དང་།

ཆོས་ཐམས་ཅད་ཀྱི་གཏེར་གང་ཡིན་པའོ།

གློག་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་འདོད་ཆགས་སྤྱོད་པའི་གཏེར་ཞེས་བྱ་བ་ཇི་ལྟ་བུ་ཡིན་ཞེ་ན།

འདི་ལྟ་སྟེ།

སེམས་ཅན་རྣམས་ནི་འདོད་ཆགས་ཀྱི་སྤྱོད་པའི་རྗེས་སུ་འཐུན་ཞིང་ཕྱིན་ཅི་ལོག་གིས་བཅིངས་པས་མཚན་མ་རྣམས་ཀྱི་རྗེས་སུ་གཟུགས་དང་།

སྒྲ་དང་།

དྲི་དང་།

རོ་དང་།

རེག་བྱ་དང་།

ཆོས་ལ་སོགས་པའི་ཡུལ་དག་ལ་རྣམ་པ་སྣ་ཚོགས་སུ་རྣམ་པར་བརྟགས་ནས་བརྟན་པ་ཉིད་དུ་མངོན་པར་ཞེན་པ་དང་།

བདེ་བ་ལ་ཆགས་ཤིང་མྱོས་པར་གྱུར་པ་ཡིན་ལ།

བྱང་ཆུབ་སེམས་དཔའ་ནི་སེམས་ཅན་དེ་དག་

གི་སེམས་ཀྱི་སྤྱོད་པ་རྣམ་པ་སྣ་ཚོགས་གང་ཡིན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པས་སེམས་ཅན་དེ་དག་གང་ལ་མོས་ཤིང་འདུན་པ་དང་།

སྤྱོད་ཡུལ་གང་ལ་ཆགས་ཤིང་གོམས་པས་མཐུ་ཅན་དུ་གྱུར་པ་དང་།

དད་པ་ཇི་ལྟ་བུ་དང་ལྡན་ཞིང་ཕུན་སུམ་ཚོགས་པར་གྱུར་པ་དང་།

སྔོན་དགེ་བའི་རྩ་བ་ཇི་ལྟ་བུ་བསྐྱེད་པ་དང་།

ཐེག་པ་གང་ལ་གཞོལ་བར་བྱེད་པ་དང་།

དགེ་བའི་རྩ་བ་ཇི་སྙེད་ཡོད་པ་དག་ནམ་ཞིག་ན་ཡོངས་སུ་སྨིན་པར་གྱུར་པ་ཡང་རབ་ཏུ་ཤེས་ཏེ།

བྱང་ཆུབ་སེམས་དཔའ་ནི་སེམས་ཅན་དེ་དག་གི་འདོད་པ་ཐམས་ཅད་ཡོངས་སུ་སྤང་བའི་ཕྱིར་དང་།

དེ་དག་གི་དགེ་བའི་སེམས་རྟག་པར་རྒྱུན་མི་འཆད་པར་བྱ་བའི་ཕྱིར་ཤིན་ཏུ་ལེགས་པར་བརྟགས་ནས་ཡོངས་སུ་གསོ་བར་བྱེད་དེ།

གློག་ཐོབ་སེམས་ཅན་རྣམས་ཀྱི་དབང་པོ་དང་།

སྤྱོད་པའི་བྱེ་བྲག་ནི་ཤིན་ཏུ་ཤེས་པར་དཀའ་བར་རིག་པར་བྱ་སྟེ།

ཉན་ཐོས་དང་།

རང་སངས་རྒྱས་ཐམས་ཅད་ཀྱིས་ཀྱང་རིག་པར་མི་ནུས་ན་སོ་སོའི་སྐྱེ་བོ་དང་།

མུ་སྟེགས་ཅན་རྣམས་ཀྱིས་ལྟ་སྨོས་ཀྱང་ཅི་དགོས།

གློག་ཐོབ་སེམས་ཅན་ཁ་ཅིག་ནི་འདོད་པ་རྣམས་ལ་མངོན་པར་ཞེན་པར་གྱུར་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་སྨིན་པར་བྱེད་པ་ཡང་ཡོད་དོ།

སེམས་ཅན་ཁ་ཅིག་ནི་འདོད་པའི་ཡུལ་ལ་རེག་པ་ཙམ་འམ།

འདོད་པའི་སེམས་ཀྱིས་ཚིག་སྨྲས་པ་ཙམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་སྨིན་པར་བྱེད་པ་ཡང་ཡོད་དོ།

སེམས་ཅན་ཁ་ཅིག་ནི་གཟུགས་སྡུག་གུ་དག་མཐོང་ནས་འདོད་ཆགས་ཀྱི་སེམས་སྐྱེས་པ་ལས་གཟུགས་དེ་རྣམ་པར་འགྱུར་ཞིང་ཞིག་པར་མཐོང་བ་ཉིད་ཀྱིས་གཟུགས་མི་རྟག་པར་ཁོང་དུ་ཆུད་པར་གྱུར་ནས་འདོད་པའི་གདུང་བ་ཉེ་བར་ཞི་སྟེ།

མི་རྟག་པ་ཉིད་ཤིན་ཏུ་ཡིད་ལ་བྱེད་པ་ཉིད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་སྨིན་པར་བྱེད་པ་ཡང་ཡོད་དོ།

སེམས་ཅན་ཁ་ཅིག་ནི་བུད་མེད་མཐོང་བ་ན་མངོན་པར་ཞེན་པ་སྐྱེས་བ་མེད་ཀྱང་ཕྱིས་ཡིད་ལ་དྲན་པའི་དབང་གིས་འདོད་ཆགས་ཀྱི་སེམས་སྐྱེས་ནས་དེའི་ཁ་དོག་དང་དབྱིབས་ཡིད་ལ་བྱས་ནས་རྗེས་སུ་ཆགས་པ་སྐྱེ་བར་འགྱུར་བ་ཡང་ཡོད་དོ།

སེམས་ཅན་ཁ་

ཅིག་ནི་རྨི་ལམ་ན་གཟུགས་ཡིད་དུ་འོང་བ་རྣམས་མཐོང་བའི་དབང་གིས་འདོད་ཆགས་ཀྱི་མངོན་པར་ཞེན་པ་སྐྱེས་ནས་ཡིད་ལ་བྱེད་ཅིང་ཡོངས་སུ་གཉེར་བར་བྱེད་པ་ཡང་ཡོད་དོ།

སེམས་ཅན་ཁ་ཅིག་ནི་བུད་མེད་ཀྱི་སྒྲ་ཐོས་པ་ཙམ་གྱིས་འདོད་ཆགས་ཀྱི་སྲེད་པ་སྐྱེད་པར་བྱེད་ལ།

རེས་འགའ་ནི་མཐོང་བ་ཙམ་གྱིས་འདོད་ཆགས་ཀྱི་སེམས་དང་བྲལ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་སྨིན་པར་བྱེད་པ་ཡང་ཡོད་པས།

དེའི་ཕྱིར་གློག་ཐོབ་བྱང་ཆུབ་སེམས་དཔའ་ནི་འདོད་ཆགས་ཀྱི་ནད་རྣམ་པ་སྣ་ཚོགས་གང་ཡིན་པ་དང་།

འདོད་ཆགས་ཀྱི་སྨན་རྣམ་པ་སྣ་ཚོགས་གང་ཡིན་པ་དེ་དག་ཐབས་མཁས་པས་ལེགས་པར་ཁོང་དུ་ཆུད་ཀྱང་ཆོས་ཀྱི་དབྱིངས་ལ་གཉིས་སུ་འཛིན་པའི་མཚན་མ་ཡང་མེད་ལ།

ཆོས་ཀྱི་དབྱིངས་ལ་རྨོངས་པར་གྱུར་པའི་སེམས་ཅན་དེ་དག་ལ་ཡང་སྙིང་རྗེ་ཆེན་པོ་སྐྱེད་པར་བྱེད་དོ།

གློག་ཐོབ་འདོད་ཆགས་དང་།

ཞེ་སྡང་དང་།

གཏི་མུག་ཅེས་བྱ་བ་དང་།

ཆོས་ཀྱི་དབྱིངས་ཀྱི་ཡེ་ཤེས་ཞེས་བྱ་བའི་ཆོས་ཅུང་ཟད་ཙམ་ཡང་དམིགས་སུ་མེད་པས་བྱང་ཆུབ་སེམས་དཔའ་འདི་སྙམ་དུ་བདག་གིས་མཐོང་བ་ལྟར་ན་སེམས་ཅན་རྣམས་ནི་མཚན་མ་མེད་པ།

རང་བཞིན་གྱིས་སྟོང་ཞིང་དབེན་པ།

བཏགས་པ་ཙམ་དུ་རྣམ་པར་གཞག་པ་ཚོགས་ཤིང་འདུས་པའི་ཆོས་འདི་ལ་འདོད་ཆགས་དང་།

ཞེ་སྡང་དང་།

གཏི་མུག་སྐྱེད་པར་བྱེད་པས་བདག་གིས་འདི་དག་ཡང་དག་པ་ཇི་ལྟ་བ་བཞིན་དུ་སོ་སོར་བརྟགས་ནས་འདོད་ཆགས་ཀྱིས་རྨོངས་པར་གྱུར་པའི་སེམས་ཅན་དེ་དག་གི་ཆེད་དུ་སྙིང་རྗེ་ཆེན་པོ་ལ་གནས་ནས་སྔོན་གྱི་སྨོན་ལམ་ཡོངས་སུ་རྫོགས་པར་བྱའོ།

ཆོས་ཀྱི་དབྱིངས་ལས་མ་གཡོས་པར་རྩོལ་བ་མེད་པའི་ཡེ་ཤེས་ཀྱིས་ཡོངས་སུ་སྨིན་པར་བྱའོ་སྙམ་དུ་སེམས་སོ།

སྐྱེས་པ་གང་ཞིག་བུད་མེད་དག་ལ་ཡང་དག་པ་མ་ཡིན་པས་སྡུག་པའི་འདུ་ཤེས་བསྐྱེད་ནས་འདོད་ཆགས་ལྕི་བ་སྐྱེས་པར་གྱུར་ན།

བྱང་ཆུབ་སེམས་དཔས་བུད་མེད་ཤིན་ཏུ་སྡུག་ཅིང་མཛེས་པ།

གཟུགས་ཀྱི་མཚན་ཁྱད་པར་དུ་འཕགས་པ།

རིན་པོ་ཆེའི་རྒྱན་ཕྲེང་དང་ལྡན་པ།

རྒྱན་རྣམ་པ་སྣ་ཚོགས་ཀྱིས་རབ་ཏུ་བརྒྱན་པས་ལྷའི་བུ་མོ་དང་འདྲ་བར་གྱུར་པ་སྔོན་མ་མཐོང་བ་དག་ཏུ་བསྒྱུར་ནས་

སེམས་ཅན་དེ་དག་གིས་ཇི་ལྟར་སྲེད་ཅིང་རྗེས་སུ་ཆགས་པ་དང་།

ཤིན་ཏུ་མངོན་པར་ཞེན་པར་གྱུར་པ་སྟོན་པར་བྱེད་དེ།

དེ་དག་གི་ནུས་པ་དང་སྦྱར་ནས་ཐབས་ཀྱིས་འདོད་ཆགས་ཀྱི་དུག་མདའ་དབྱུང་བའི་ཆེད་དུ་རང་དབང་དུ་གྱུར་པའི་མཐུས་བུད་མེད་ཀྱི་གཟུགས་སུ་བསྒྱུར་ནས་དེའི་མདུན་དུ་སྣང་བར་བྱས་ནས་ཆོས་བསྟན་པ་ཉིད་ཀྱིས་སེམས་ཅན་དེ་དག་ཆོས་ཀྱི་དབྱིངས་རྟོགས་པར་བྱས་ཏེ་མི་སྣང་བར་འགྱུར་རོ།

བུད་མེད་གང་ཞིག་སྐྱེས་པ་དག་ལ་འདོད་ཆགས་ཀྱི་སེམས་སྐྱེས་པར་གྱུར་ན་བྱང་ཆུབ་སེམས་དཔས་སྐྱེས་པའི་ལུས་བསྟན་ནས་འདོད་ཆགས་ཀྱི་དུག་མདའ་དབྱུང་བའི་ཆེད་དུ་ཆོས་བསྟན་པ་ཉིད་ཀྱིས་ཆོས་ཀྱི་དབྱིངས་ལ་ཞུགས་པར་བྱས་ནས་མི་སྣང་བར་བྱེད་དོ།

གློག་ཐོབ་འདོད་ཆགས་ཀྱི་སྤྱོད་པ་ཉི་ཁྲི་ཆིག་སྟོང་དང་།

སྤྱོད་པ་གཞན་དེ་དག་ཀྱང་གཏོགས་པར་བརྒྱད་ཁྲི་བཞི་སྟོང་དུ་གྱུར་པ་དེ་དག་བྱང་ཆུབ་སེམས་དཔས་རྩོལ་བ་མེད་པའི་ཡེ་ཤེས་ཀྱིས་ཆོས་ཀྱི་སྒོ་མོ་བྱེ་བ་སྟོང་ཕྲག་ཚད་མེད་པ་བསྐྱེད་དེ།

སེམས་ཅན་རྣམས་ཀྱི་སེམས་ཁོང་དུ་ཆུད་པར་བྱས་ནས་ཐམས་ཅད་རྣམ་པར་གྲོལ་བར་གྱུར་ཀྱང་བདག་གིས་སེམས་ཅན་དག་ལ་འདི་ལྟ་བུའི་ཆོས་བསྟན་ཏོ་སྙམ་དུ་སེམས་པ་ཡང་མེད་ལ།

སེམས་ཅན་རྣམ་པར་གྲོལ་བར་གྱུར་པ་ཡང་མི་དམིགས་སོ།

གློག་ཐོབ་འདི་ལྟ་སྟེ་དཔེར་ན་མཚོ་མ་དྲོས་པའི་ཀླུའི་རྒྱལ་པོ་ནི་ལས་ཀྱི་མཐུའི་དབང་གིས་དེའི་ཕོ་བྲང་གི་ནང་ནས་ཆུ་ཀླུང་ཆེན་པོ་བཞི་བྱུང་ནས་སེམས་ཅན་ཆུ་དང་སྐམ་ལ་གནས་པ་དག་དབྱར་ཚ་བའི་དུས་ཀྱི་ཚེ་བསིལ་བ་དང་།

རླན་གྱིས་མེ་ཏོག་དང་།

འབྲས་བུ་དག་རྒྱས་ཤིང་འབྲུ་རྣམས་འཕེལ་བར་གྱུར་ནས་སེམས་ཅན་མང་པོ་ཤིན་ཏུ་བདེ་བར་བྱེད་ཀྱང་།

ཀླུའི་རྒྱལ་པོ་དེ་བདག་གིས་ཆུ་བོ་འདི་དག་ཕྱུང་ངོ་།

དབྱུང་བར་བྱའོ་སྙམ་དུ་མི་སེམས་མོད་ཀྱི།

འོན་ཀྱང་ཆུ་ཀླུང་བཞི་པོ་དག་རྟག་ཏུ་འབབ་ཅིང་སེམས་ཅན་རྣམས་ཉེ་བར་སྤྱོད་པར་བྱེད་དོ།

བྱང་ཆུབ་སེམས་དཔའ་ཡང་དེ་བཞིན་དུ་སྔོན་གྱི་སྨོན་ལམ་ཡོངས་སུ་རྫོགས་པར་གྱུར་པའི་དབང་གིས་རྩོལ་བ་མེད་པའི་ཡེ་ཤེས་ཀྱིས་འཕགས་པའི་བདེན་པ་བཞི་བསྟན་ནས་འཁོར་བའི་ཡོངས་སུ་གདུང་བ་ཐམས་ཅད་བསལ་ཏེ་ལྷ་དང་མི་རྣམས་ལ་འཕགས་

པའི་རྣམ་པར་གྲོལ་བའི་བདེ་བ་སྦྱིན་པར་བྱེད་ཀྱང་བྱང་ཆུབ་སེམས་དཔའ་དེ་བདག་གིས་ཆོས་བསྟན་ཏོ།

བསྟན་པར་བྱའོ་སྙམ་དུ་མི་སེམས་མོད་ཀྱི།

འོན་ཀྱང་རང་གི་ངང་གིས་སྙིང་རྗེ་ཆེན་པོའི་བསམ་པ་ལ་གནས་ནས་སེམས་ཅན་རྣམས་ལ་སོ་སོར་བརྟགས་ཏེ་ཅི་རིགས་པར་ཆོས་སྟོན་པར་བྱེད་དོ།

གཞན་ཡང་གློག་ཐོབ་འདི་ལྟ་སྟེ་དཔེར་ན་བརྒྱ་བྱིན་ལྷའི་དབང་པོ་ལ་ལྷའི་བུ་མོ་ཁྲག་ཁྲིག་ཕྲག་བཅུ་གཉིས་ཡོད་པ་དེ་དག་བརྒྱ་བྱིན་ལྷའི་དབང་པོའི་རང་དབང་གི་མཐུའི་དབང་གིས་ལུས་མང་པོ་བསྟན་ནས་ལྷའི་བུ་མོ་དེ་དག་དེ་དང་ལྷན་ཅིག་འདོད་པའི་བདེ་བ་ཡོངས་སུ་རྫོགས་པར་མྱོང་བས་དེ་དག་སོ་སོ་ནས་འདི་སྙམ་དུ་བདག་གཅིག་པུ་ནི།

དེང་ལྷའི་དབང་པོ་དང་ལྷན་ཅིག་རྩེས་སོ་སྙམ་དུ་སེམས་ཀྱང་ཡང་དག་པར་ལྷའི་དབང་པོ་དེ་ལ་མངོན་པར་ཞེན་པར་གྱུར་པ་ཅི་ཡང་མེད་དོ།

བྱང་ཆུབ་སེམས་དཔའ་ཡང་དེ་བཞིན་དུ་སེམས་ཅན་གང་ཡོངས་སུ་བཟླ་བའི་འོས་སུ་གྱུར་པ་དེ་དག་གི་བསམ་པ་ཇི་ལྟ་བ་བཞིན་དུ་ཡོངས་སུ་སྨིན་པར་བྱེད་ཀྱང་།

བྱང་ཆུབ་སེམས་དཔའ་ལ་མངོན་པར་ཞེན་པར་གྱུར་པ་མེད་དོ།

གཞན་ཡང་གློག་ཐོབ་འདི་ལྟ་སྟེ་དཔེར་ན་ཉི་མའི་དཀྱིལ་འཁོར་རི་མཐོན་པོའི་རྩེ་མོ་ལ་ཤར་བའི་ཚེ་འོད་ཀྱིས་འཛམ་བུའི་གླིང་ཀུན་དུ་སྣང་བར་བྱེད་པས་གང་དུ་སྣང་བར་བྱས་པའི་གནས་དེ་དག་ཏུ་ཁ་དོག་སྔོན་པོ་དང་།

སེར་པོ་དང་།

དམར་པོ་དང་།

དཀར་པོ་རྣམ་པ་སྣ་ཚོགས་རབ་ཏུ་སྟོན་པར་བྱེད་ཀྱང་ཉི་མའི་དཀྱིལ་འཁོར་དེ་ནི་ཁ་དོག་གཅིག་པ།

འོད་གཅིག་པ་ཉིད་དེ་ཐ་དད་པའི་མཚན་མ་མེད་དོ།

བྱང་ཆུབ་སེམས་དཔའ་ཡང་དེ་བཞིན་དུ་ཤེས་རབ་ཀྱི་ཉི་མའི་དཀྱིལ་འཁོར་གྱིས་ཆོས་ཀྱི་དབྱིངས་སྣང་བར་བྱས་ནས་སེམས་ཅན་གྱི་མངོན་པར་ཞེན་པའི་རིའི་རྩེ་མོ་དེ་དག་ཏུ་ཤར་བ་ན་དམིགས་པའི་མཚན་ཉིད་གཅིག་ཏུ་གྱུར་ཅིང་དེ་དག་གི་མོས་པ་ཇི་ལྟ་བ་བཞིན་དུ་ཆོས་སྟོན་པར་བྱེད་ཀྱང་།

ཆོས་ཀྱི་དབྱིངས་ལ་གཉིས་སུ་གྱུར་པའི་མཚན་ཉིད་མེད་དེ།

གློག་ཐོབ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་འདོད་ཆགས་ཀྱི་སྤྱོད་པའི་གཏེར་ཅེས་བྱའོ།

བྱང་ཆུབ་སེམས་དཔའ་གང་གིས་གཏེར་འདི་ཐོབ་པར་གྱུར་ན་བསྐལ་པའམ།

བསྐལ་པ་ལས་ལྷག་པར་སེམས་ཅན་

རྣམས་ཀྱི་མོས་པ་སྣ་ཚོགས་ཇི་ལྟ་བ་བཞིན་དུ་ལུས་ཚད་མེད་པ་བསྟན་ནས་ཚིག་རྣམ་པ་སྣ་ཚོགས་ཀྱིས་ཆོས་སྟོན་པར་བྱེད་ཀྱང་ཆོས་ཀྱི་དབྱིངས་ལ་གཉིས་སུ་གྱུར་པའི་མཚན་ཉིད་མེད་དོ།

གཞན་ཡང་གློག་ཐོབ་འདི་ལྟ་སྟེ་དཔེར་ན་གསེར་ཡང་དག་པ་ནི་མགར་བའི་ཐབས་མཁས་པའི་མཐུའི་དབང་གིས་མོས་པ་ཇི་ལྟ་བ་བཞིན་དུ་རྒྱན་རྣམ་པ་སྣ་ཚོགས་སུ་བྱས་ཏེ་མཚན་ཉིད་ཐ་དད་པར་གྱུར་ཀྱང་གསེར་གྱི་རང་བཞིན་ལ་ནི་ཐ་དད་དུ་གྱུར་པ་ཅི་ཡང་མེད་དོ།

བྱང་ཆུབ་སེམས་དཔའ་ཡང་དེ་བཞིན་དུ་ཆོས་ཀྱི་དབྱིངས་ཤིན་ཏུ་ལེགས་པར་བརྟགས་ནས་སེམས་ཅན་མོས་པ་རྣམ་པ་སྣ་ཚོགས་ཇི་ལྟ་བ་བཞིན་དུ་ལུས་ཚད་མེད་པ་དག་བསྟན་ནས་ཚིག་རྣམ་པ་སྣ་ཚོགས་ཀྱིས་ཆོས་སྟོན་པར་བྱེད་ཀྱང་ཆོས་ཀྱི་དབྱིངས་ལ་ནི་གཉིས་སུ་གྱུར་པའི་མཚན་ཉིད་མེད་དེ།

འདི་ནི་རྟག་པར་ཆོས་ཀྱི་དབྱིངས་ལ་ཞུགས་པས་མཚན་ཉིད་གཅིག་ཏུ་གྱུར་པ་ཞེས་བྱའོ།

བྱང་ཆུབ་སེམས་དཔའ་གང་གིས་གཏེར་འདི་ལྟ་བུ་ཐོབ་པར་གྱུར་ན་སེམས་ཅན་གྱི་ཆེད་དུ་རྣམ་པ་སྣ་ཚོགས་ཀྱི་སྒོ་ནས་ཆོས་སྟོན་པར་བྱེད་པས་དེ་དག་གིས་ཆོས་ཐོས་པའི་དབང་གིས་འཕགས་པའི་ནོར་ཕུན་སུམ་ཚོགས་པའི་དབང་ཕྱུག་དང་ལྡན་པར་གྱུར་པས་འཁོར་བའི་རྒུད་པ་དག་གཏན་དུ་ཡོངས་སུ་སྤོང་བར་བྱེད་དོ།

གཞན་ཡང་གློག་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཞེ་སྡང་སྤྱོད་པའི་གཏེར་ཞེས་བྱ་བ་ཇི་ལྟ་བུ་ཞེ་ན།

འདི་ལྟ་སྟེ།

སེམས་ཅན་རྣམས་ནི་ང་རྒྱལ་དང་མཚུངས་པར་ལྡན་པ།

བདག་དང་བདག་གིར་འཛིན་པ་དང་བཅས་པ།

བདག་དང་བདག་གི་མཚན་མ་ལ་གནས་པས་ཡུན་རིང་པོ་ནས་བྱམས་པ་དང་།

བཟོད་པ་མ་བསྒོམས་པ།

ཞེ་སྡང་གི་གདུང་བས་རང་གི་སེམས་བཤིག་པར་གྱུར་པ།

སངས་རྒྱས་དང་།

ཆོས་དང་།

དགེ་འདུན་རྗེས་སུ་དྲན་པར་མ་གྱུར་པ།

ཞེ་སྡང་གི་གདུག་པས་གཡོགས་པས་ཆོས་ཉིད་ལ་རྨོངས་པར་གྱུར་པ་ཡིན་ཡང་བྱང་ཆུབ་སེམས་དཔའ་ནི་ཞེ་སྡང་མང་བའི་སེམས་ཅན་དེ་དག་ལ་ནམ་ཡང་གནོད་སེམས་དང་རྣམ་པར་འཚེ་བ་སྐྱེད་པར་མི་བྱེད་ཀྱི།

འདི་སྙམ་དུ་ཀྱེ་མ་སེམས་ཅན་འདི་དག་ནི་གཏི་མུག་གིས་རྨོངས་པས་ཆོས་རྣམས་གཟོད་མ་ཉིད་ནས་

རབ་ཏུ་དབེན་ཞིང་ཞི་བ།

དྲི་མ་དང་རྙོག་པ་མེད་པ།

འདུམ་པ་མེད་པ།

རྩོད་པ་མེད་པ།

རབ་ཏུ་དབེན་པའི་ཆོས་ཉིད་ལ་ཕྱིན་ཅི་ལོག་དང་མཚུངས་པར་ལྡན་པར་གྱུར་པའི་དབང་གིས་ཡང་དག་པ་མ་ཡིན་པའི་ཞེ་སྡང་དང་།

འཁོན་དུ་འཛིན་པ་རྒྱས་པར་གྱུར་ཏོ་སྙམ་དུ་སེམས་པ་ཁོ་ནར་ཟད་དོ།

དེ་སྙམ་དུ་བསམས་ནས་ཀྱང་སྙིང་རྗེ་ཆེན་པོ་ལ་གནས་ཏེ་རྟག་པར་བདག་ཉིད་འགྱོད་ཅིང་བཤགས་པར་ཡང་བྱེད་ལ།

གལ་ཏེ་ལུས་ཀྱི་ཡན་ལག་དང་ཉིང་ལག་གཅོད་པ་ཞིག་ཡོད་ན་ཡང་ཞེ་སྡང་སྤྱོད་པའི་སེམས་ཅན་དེ་དག་འདུལ་བར་འདོད་པའི་ཕྱིར་བཟོད་པ་ལ་རབ་ཏུ་གནས་པར་བྱེད་དོ།

གལ་ཏེ་ཞེ་སྡང་སྤྱོད་པའི་སེམས་ཅན་ཚད་མེད་པ་དེ་དག་ཕན་ཚུན་གཅིག་ལ་གཅིག་རྒྱབ་ཀྱིས་ཕྱོགས་ཤིང་ཞེ་སྡང་དང་།

འཁོན་དུ་འཛིན་པའི་ལས་ཡོངས་སུ་རྫོགས་པའི་དབང་གིས་སྦྲུལ་གདུག་པ་ངན་འགྲོའི་ལུས་སུ་ལྟུང་བར་གྱུར་པ་དག་ལ་ནི་བྱང་ཆུབ་སེམས་དཔའ་བཟོད་པ་ལ་རབ་ཏུ་གནས་པ་དེས་འདི་ལྟར་བྱམས་པ་དང་།

དྲན་པའི་སྟོབས་ཀྱིས་སེམས་ཅན་དེ་དག་བཏུལ་ནས་ངན་འགྲོའི་རྣམ་པར་སྨིན་པ་ལེན་པར་མི་འགྱུར་ཞིང་།

གདོན་མི་ཟ་བར་མཉམ་པ་ཉིད་རྟོགས་པར་བྱེད་པ་གང་ཡིན་པ་འདི་ནི་བྱང་ཆུབ་སེམས་དཔའ་ཐབས་མཁས་པས་སེམས་ཅན་གྱི་ཞེ་སྡང་གི་སྤྱོད་པ་ཡོངས་སུ་བསལ་བར་བྱེད་པ་ཞེས་བྱའོ།

གཞན་ཡང་གློག་ཐོབ་བྱང་ཆུབ་སེམས་དཔའ་ནི་གལ་ཏེ་སེམས་ཅན་ཞེ་སྡང་ཅན་དག་མཐོང་བར་གྱུར་ན།

འདི་སྙམ་དུ་ཆོས་ཐམས་ཅད་ནི་རང་བཞིན་གྱིས་རྣམ་པར་དག་པ་ཡིན་ན།

ཀྱེ་མ་སེམས་ཅན་འདི་དག་ནི་ཞེ་སྡང་གི་རྗེས་སུ་འབྲངས་ནས་ཡང་དག་པ་མ་ཡིན་པས་རྣམ་པར་རྟོག་པ་བསྐྱེད་ནས་མཉམ་ཞིང་རྩོད་པ་མེད་པའི་ཆོས་ཉིད་འདི་ལ་ཞེ་སྡང་གི་བསམ་པ་བསྐྱེད་པས་སེམས་ཅན་འདི་དག་ཆོས་ཀྱི་དབྱིངས་ཉིད་མ་རྟོགས་པར་གྱུར་ཏོ།

གལ་ཏེ་སེམས་ཅན་འདི་དག་ཆོས་ཉིད་མཐོང་བར་གྱུར་ན་ནི་གཞན་དག་ལ་གནོད་སེམས་བསྐྱེད་པར་མི་འགྱུར་བ་ཞིག་ན།

ཆོས་ཀྱི་དབྱིངས་ཀྱི་ངོ་བོ་ཉིད་མ་རྟོགས་པས་དེའི་ཕྱིར་ཞེ་སྡང་སྐྱེས་པར་གྱུར་ཏོ་ཞེས་བྱང་ཆུབ་སེམས་དཔའ་དེས་ཞེ་སྡང་མང་བའི་སེམས་ཅན་དེ་དག་ལ་ལྷག་པར་སྙིང་བརྩེ་བ་བསྐྱེད་ནས་སྙིང་རྗེ་ཆེན་

པོ་ལ་གནས་ཏེ།

སྔོན་གྱི་སྨོན་ལམ་ཡང་ཡོངས་སུ་རྫོགས་པར་བྱེད་ལ།

རྩོལ་བ་མེད་པའི་ཡེ་ཤེས་ཀྱིས་སེམས་ཅན་གྱི་ཞེ་སྡང་གི་སྤྱོད་པ་རྣམ་པར་གཞིག་པའི་ཕྱིར་ཆོས་ཀྱི་སྒོ་མོ་རྣམ་པ་སྣ་ཚོགས་ཡང་དག་པར་སྟོན་པར་བྱེད་ཀྱང་བདག་གིས་སེམས་ཅན་གྱི་ཞེ་སྡང་བསལ་བའི་ཕྱིར་ཆོས་བསྟན་ཏོ་སྙམ་དུ་མི་སེམས་སོ།

དེ་ཅིའི་ཕྱིར་ཞེ་ན།

བྱང་ཆུབ་སེམས་དཔས་ཆོས་ཀྱི་དབྱིངས་ཀྱི་མཚན་ཉིད་ཤིན་ཏུ་ལེགས་པར་རྟོགས་པའི་ཕྱིར་རོ།

འདི་ནི་བྱང་ཆུབ་སེམས་དཔའ་ཆོས་ཀྱི་དབྱིངས་དབྱེར་མེད་པའི་མཚན་ཉིད་ལ་གནས་ནས་ཉོན་མོངས་པའི་སྤྱོད་པ་རབ་ཏུ་བསལ་བ་ཞེས་བྱའོ།

གློག་ཐོབ་འདི་ལྟ་སྟེ།

དཔེར་ན་མུན་པ་བསལ་ནས་སྣང་བ་འཐོབ་པར་འགྱུར་ཡང་མུན་པ་སེལ་བར་བྱེད་པ་མེད་དེ།

འདི་ལྟར་མུན་པ་དང་སྣང་བའི་ངོ་བོ་ཉིད་ནམ་མཁའ་དང་མཚུངས་ཤིང་དབྱེར་མེད་པ་ཡིན་ནོ།

དེ་བཞིན་དུ་བྱང་ཆུབ་སེམས་དཔའ་ཡང་ཆོས་ཀྱི་དབྱིངས་དབྱེར་མེད་པའི་ཡེ་ཤེས་དེ་ལ་བརྟེན་ནས་ཐབས་མཁས་པས་ཆོས་བསྟན་ཏེ།

ཞེ་སྡང་སྤྱོད་པའི་སེམས་ཅན་རྣམ་པ་སྣ་ཚོགས་འདུལ་ཞིང་ཞི་བར་བྱེད་ཀྱང་ཆོས་ཀྱི་དབྱིངས་ལ་ཐ་དད་དུ་གྱུར་པ་མེད་དོ།

གློག་ཐོབ་འདི་ལྟ་སྟེ་དཔེར་ན་ཉི་མའི་དཀྱིལ་འཁོར་ཤར་ནས་འོད་ཀྱིས་གང་དང་གང་དུ་སྣང་བར་བྱས་པ་དེ་དག་ཐམས་ཅད་ནི་ཉི་མའི་དཀྱིལ་འཁོར་གྱིས་བསྡུས་པ་ཡིན་ནོ།

དེ་བཞིན་དུ་བྱང་ཆུབ་སེམས་དཔའ་ཡང་ཞེ་སྡང་གི་སྤྱོད་པ་གདུལ་ཞིང་བསལ་བའི་ཕྱིར་ཇི་ཙམ་དུ་ཚིག་ཏུ་བརྗོད་པ་ཐམས་ཅད་ཆོས་ཀྱི་འཁོར་ལོ་ཡིན་ཡང་ཆོས་ཀྱི་དབྱིངས་ལ་ནི་ཐ་དད་དུ་གྱུར་པ་མེད་དོ།

འདི་ལྟར་ཞེ་སྡང་གི་སྤྱོད་པ་ཉི་ཁྲི་ཆིག་སྟོང་དང་།

སྤྱོད་པ་གཞན་གཏོགས་པ་བརྒྱད་ཁྲི་བཞི་སྟོང་དུ་གྱུར་པ་དེ་དག་བྱང་ཆུབ་སེམས་དཔའ་རྩོལ་བ་མེད་པའི་ཡེ་ཤེས་ཡོངས་སུ་གྲུབ་པས་སེམས་ཅན་དེ་དག་གི་ཞེ་སྡང་གི་སྤྱོད་པ་རྣམ་པ་སྣ་ཚོགས་ཀྱི་རྗེས་སུ་ཆོས་སྟོན་པར་བྱེད་ཀྱང་བདག་གིས་སེམས་ཅན་ལ་ཆོས་བསྟན་ཏོ།

སྟོན་ཏོ།

སྟོན་པར་འགྱུར་རོ་སྙམ་དུ་སེམས་པ་མེད་དོ།

འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཞེ་སྡང་སྤྱོད་པའི་གཏེར་ཞེས་བྱའོ།

བྱང་ཆུབ་སེམས་དཔའ་གང་གིས་

གཏེར་འདི་ཐོབ་པར་གྱུར་ན་བསྐལ་པ་འམ།

བསྐལ་པ་ལས་ལྷག་པར་སེམས་ཅན་གྱི་མོས་པ་རྣམ་པ་སྣ་ཚོགས་ཀྱི་རྗེས་སུ་ཚིག་འབྲུ་དང་།

ཡི་གེ་དང་།

བརྗོད་པ་རྣམ་པ་སྣ་ཚོགས་ཀྱི་ཐབས་མཁས་པས་ཆོས་སྟོན་པར་བྱེད་ཀྱང་ཞེ་སྡང་སྤྱོད་པའི་མཐའ་རྙེད་པར་མི་འགྱུར་ལ།

བྱང་ཆུབ་སེམས་དཔའ་དེའི་ཤེས་རབ་དང་།

སྤོབས་པ་ཡང་གཏུགས་པར་མི་འགྱུར་ཏེ།

འདི་ནི་བྱང་ཆུབ་སེམས་དཔའ་ཆོས་ཀྱི་དབྱིངས་དབྱེར་མེད་པའི་མཚན་ཉིད་ལེགས་པར་བཤད་པས་ཐོབ་པའི་ཞེ་སྡང་སྤྱོད་པའི་གཏེར་ཞེས་བྱའོ།

གཞན་ཡང་གློག་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་གཏི་མུག་སྤྱོད་པའི་གཏེར་ཞེས་བྱ་བ་ཇི་ལྟ་བུ་ཞེ་ན།

གློག་ཐོབ་བྱང་ཆུབ་སེམས་དཔའ་རྣམས་ཀྱི་སྤྱོད་པ་འདི་ལྟ་བུ་འདི་ནི་ཤིན་ཏུ་དཀའ་བའི་དངོས་པོ་ཡིན་ཏེ།

འདི་ལྟར་སེམས་ཅན་རྣམས་ནི་ཉོན་མོངས་པའི་རྗེས་སུ་འབྲང་བ།

གཞན་ལ་གནོད་པ་བྱེད་པ།

མ་རིག་པའི་མངལ་གྱི་སྒོ་ངས་ཀུན་ཏུ་དཀྲིས་པ།

དར་གྱི་སྲིན་བུ་བཞིན་དུ་བདག་ཉིད་བཅིངས་པས་ཆོས་ཀྱི་དབྱིངས་རྟོགས་པའི་ཐབས་མེད་པ།

བྱ་བ་དག་ལ་ལེགས་པར་སོ་སོར་མི་རྟོག་པ་བདག་ཏུ་ལྟ་བ་ལ་མངོན་པར་ཞེན་པ།

ལམ་ལོག་པར་ཞུགས་པ།

བྱིས་པའི་སྤྱོད་པ་ལ་གནས་པ།

ངེས་པར་འབྱུང་བ་དཀའ་བ་ཡིན་པས་འདི་ལྟ་བུ་ལ་སོགས་པས་རྨོངས་པར་གྱུར་པའི་སེམས་ཅན་དག་གི་ཆེད་དུ་དང་པོ་སེམས་བསྐྱེད་པ་ནས་སྦྱོར་བ་ཆེན་པོ་བསྐྱེད་དེ།

ངལ་ཞིང་སྡུག་བསྔལ་བ་ཡང་མེད།

ལེ་ལོ་ཡང་མེད་པར་རྐྱེན་གང་དང་།

མོས་པ་གང་དང་།

ཆོས་བསྟན་པ་ཇི་ལྟ་བུ་ཞིག་གིས་སེམས་ཅན་འདི་དག་བྱང་ཆུབ་སེམས་དཔའི་སྤྱོད་པ་ལ་བཙུད་དེ་རྣམ་པར་གྲོལ་བ་ཐོབ་པར་འགྱུར་སྙམ་དུ་སེམས་ཏེ།

བྱང་ཆུབ་སེམས་དཔའ་སྔོན་ཆོས་ཀྱི་དབྱིངས་ལེགས་པར་སོ་སོར་བརྟགས་པར་རྩོལ་བ་མེད་པའི་ཡེ་ཤེས་ཀྱིས་སྙིང་རྗེ་ཆེན་པོ་ལ་གནས་ཏེ།

སེམས་ཅན་དེ་དག་ཆོས་ཀྱི་དབྱིངས་ལ་རྨོངས་པར་གྱུར་པར་རིག་ནས་ཅི་ནུས་ཅི་ལྕོགས་ཀྱིས་ཆོས་བསྟན་ནས་རབ་ཏུ་དུལ་བར་བྱེད་ཀྱང་བདག་གིས་ཆོས་བསྟན་ཏོ།

སྟོན་ཏོ།

སྟོན་པར་འགྱུར་རོ་སྙམ་དུ་སེམས་པ་མེད་དེ།

འོན་ཀྱང་དེའི་སྔོན་གྱི་སྨོན་ལམ་གྱི་མཐུས་རྟེན་ཅིང་འབྲེལ་པར་འབྱུང་བ་ལེགས་

པར་སོ་སོར་བརྟགས་ནས་རང་གི་ངང་གིས་ཆོས་ཀྱི་སྒོ་མོ་བརྒྱ་སྟོང་དུ་མ་བསྟན་ཏེ།

སེམས་ཅན་དེ་དག་གི་མ་རིག་པའི་ལས་ཀྱི་འདུ་བྱེད་བསལ་ནས་རྣམ་པར་གྲོལ་བ་འཐོབ་པར་བྱེད་དོ།

གློག་ཐོབ་འདི་ལྟ་སྟེ་དཔེར་ན་སྨན་པ་བཟང་པོ་ནད་མང་པོ་གསོ་བ་ལ་མཁས་པ།

སྔར་སྨན་དཔྱད་རྣམས་ལ་ཤིན་ཏུ་གོམས་པར་གྱུར་པ་ནི་ནད་ཀྱི་མཚན་མ་མཐོང་མ་ཐག་ཏུ་སྔགས་དང་སྨན་བཏང་བ་ཐམས་ཅད་རབ་ཏུ་རྟོགས་པར་གྱུར་པས་དེས་གསོས་པ་གང་ཡང་མི་སོས་པ་མེད་དོ།

དེ་བཞིན་དུ་བྱང་ཆུབ་སེམས་དཔའ་ཡང་འདི་ལྟར་ཆོས་ཀྱི་དབྱིངས་ཤིན་ཏུ་ལེགས་པར་རྟོགས་པས་རྩོལ་བ་མེད་པའི་ཡེ་ཤེས་ཀྱིས་གཏི་མུག་གི་སྤྱོད་པ་བསགས་པའི་སེམས་ཅན་དེ་དག་གི་དབང་པོ་དང་།

རང་བཞིན་ཇི་ལྟ་བ་བཞིན་དུ་ཆོས་ཀྱི་སྒོ་མོ་བརྒྱ་སྟོང་དུ་མ་བསྟན་ནས་ཐམས་ཅད་རབ་ཏུ་གསལ་བར་རྟོགས་པར་བྱེད་དེ།

གློག་ཐོབ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་གཏི་མུག་སྤྱོད་པའི་གཏེར་ཞེས་བྱའོ།

བྱང་ཆུབ་སེམས་དཔའ་གང་གིས་གཏེར་འདི་ཐོབ་པར་གྱུར་ན་རྟེན་ཅིང་འབྲེལ་པར་འབྱུང་བ་ཤིན་ཏུ་ལེགས་པར་སོ་སོར་བརྟགས་ནས་གཏི་མུག་སྤྱོད་པའི་སེམས་ཅན་དེ་དག་གི་ཆེད་དུ་བསྐལ་པའམ།

བསྐལ་པ་ལས་ལྷག་པར་དེ་དག་གི་རང་བཞིན་དང་།

འདུན་པ་ཇི་ལྟ་བ་བཞིན་དུ་ཚིག་འབྲུ་དང་།

ཡི་གེ་དང་།

བརྗོད་པ་རྣམ་པ་སྣ་ཚོགས་ཀྱི་ཐབས་མཁས་པས་ཆོས་སྟོན་པར་བྱེད་ཀྱང་གཏི་མུག་སྤྱོད་པའི་མཐའ་ཡང་རྙེད་པར་མི་འགྱུར་ལ།

བྱང་ཆུབ་སེམས་དཔའ་དེའི་ཤེས་རབ་དང་སྤོབས་པ་ཡང་གཏུགས་པར་མི་འགྱུར་ཏེ།

འདི་ནི་བྱང་ཆུབ་སེམས་དཔའ་ཆོས་ཐམས་ཅད་དབྱེར་མེད་པའི་མཚན་ཉིད་ལེགས་པར་བཤད་པས་ཐོབ་པའི་གཏི་མུག་སྤྱོད་པའི་གཏེར་ཞེས་བྱའོ།

འདི་ལྟར་གཏི་མུག་གི་སྤྱོད་པ་ཉི་ཁྲི་ཆིག་སྟོང་དང་།

སྤྱོད་པ་གཞན་གཏོགས་པར་བརྒྱད་ཁྲི་བཞི་སྟོང་དུ་གྱུར་པ་དེ་དག་བྱང་ཆུབ་སེམས་དཔས་ཡོངས་སུ་སྤང་བའི་ཕྱིར་ཆོས་ཀྱི་སྒོ་མོ་བརྒྱ་སྟོང་དུ་མ་རབ་ཏུ་ཕྱེ་ནས་ཡང་དག་པར་སྟོན་པ་གང་ཡིན་པ་འདི་ནི་བྱང་ཆུབ་སེམས་དཔའི་གཏི་མུག་སྤྱོད་པའི་གཏེར་ཅེས་བྱའོ།

གཞན་ཡང་གློག་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆ་མཉམ་པའི་སྤྱོད་པའི་གཏེར་ཞེས་བྱ་

བ་ཇི་ལྟ་བུ་ཡིན་ཞེ་ན།

འདི་ལྟ་སྟེ་དཔེར་ན་མེ་ལོང་གི་དཀྱིལ་འཁོར་ཤིན་ཏུ་དག་ཅིང་ཡོངས་སུ་གསལ་བ་དྲི་མ་མེད་པ་ལམ་གྱི་བཞི་མདོར་བཞག་ན་གཟུགས་བརྙན་རྣམས་དེར་སྣང་ཞིང་འཕེལ་བ་དང་འགྲིབ་པ་མེད་ཀྱང་མེ་ལོང་གི་དཀྱིལ་འཁོར་དེ་བདག་གིས་གཟུགས་བརྙན་རྣམ་པ་སྣ་ཚོགས་འདི་དག་སྟོན་པར་བྱེད་དོ་ཞེས་མི་སེམས་མོད་ཀྱི།

འོན་ཀྱང་མེ་ལོང་གི་དཀྱིལ་འཁོར་དེ་ཤིན་ཏུ་ལེགས་པར་བྱི་དོར་བྱས་ན་གཟུགས་བརྙན་གྱི་རྣམ་པ་ཐམས་ཅད་རང་གི་ངང་གིས་རབ་ཏུ་སྣང་བར་འགྱུར་རོ།

དེ་བཞིན་དུ་བྱང་ཆུབ་སེམས་དཔའ་ཡང་ཆོས་ཀྱི་དབྱིངས་ཀྱི་མེ་ལོང་གི་དཀྱིལ་འཁོར་ཤིན་ཏུ་ལེགས་པར་བྱི་དོར་བྱས་པས་རྩོལ་བ་མེད་པའི་ཏིང་ངེ་འཛིན་ལ་གནས་ནས་སེམས་ཅན་རྣམས་ཀྱི་སེམས་ཀྱི་སྤྱོད་པའི་བྱེ་བྲག་ཇི་ལྟ་བ་བཞིན་དུ་ཆོས་ཀྱི་སྒོ་མོ་བརྒྱ་སྟོང་དུ་མ་རྣམ་པར་ཕྱེ་སྟེ་བསྟན་ནས་དེ་དག་ཐམས་ཅད་རབ་ཏུ་རྟོགས་ཤིང་རྣམ་པར་གྲོལ་བ་ཐོབ་པར་བྱས་ཀྱང་ཆོས་ཀྱི་མཚན་མ་དང་སེམས་ཅན་གྱི་མཚན་མ་སྐྱེད་པར་མི་བྱེད་དོ།

དེ་ཅིའི་ཕྱིར་ཞེ་ན།

བྱང་ཆུབ་སེམས་དཔའ་དེས་ཆོས་ཀྱི་དབྱིངས་ཀྱི་མཚན་ཉིད་ཤིན་ཏུ་ལེགས་པར་རྟོགས་པའི་ཕྱིར་དང་།

སྤྱོད་པ་བཞི་པོ་འདི་དག་དང་མཚུངས་པར་ལྡན་པའི་སེམས་ཅན་གང་ཡིན་པ་དེ་དག་ཡང་དག་པ་ཇི་ལྟ་བ་བཞིན་དུ་རབ་ཏུ་རྟོགས་པས་དེ་དག་གི་དབང་པོ་དང་།

རང་བཞིན་ཇི་ལྟ་བ་བཞིན་དུ་ཆོས་སྟོན་པར་བྱེད་ཀྱང་ཆོས་ཀྱི་དབྱིངས་དང་།

སེམས་ཅན་གྱི་ཁམས་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པར་བྱེད་པས་གཉིས་སུ་འགྱུར་བའི་མཚན་ཉིད་ཀྱང་མེད་དེ།

ཆོས་ཀྱི་དབྱིངས་དང་།

སེམས་ཅན་གྱི་ཁམས་ཇི་སྙེད་པ་དེ་དག་གཉིས་སུ་མེད་ཅིང་ཐ་དད་པ་མེད་པར་གསལ་བར་མཐོང་བའི་ཕྱིར་རོ།

གློག་ཐོབ་འདི་ལྟ་སྟེ་དཔེར་ན་ནམ་མཁའ་ལ་ནི་ཐ་དད་པ་རྣམ་པ་སྣ་ཚོགས་ཀྱི་མཚན་མ་ཡང་མེད་ལ་རྣམ་པར་གཞག་པ་ཡང་མེད་དོ།

དེ་བཞིན་དུ་བྱང་ཆུབ་སེམས་དཔའ་ཡང་ཆོས་ཀྱི་དབྱིངས་ཤིན་ཏུ་ལེགས་པར་སོ་སོར་བརྟགས་ནས་ཆོས་ཐམས་ཅད་མཚན་ཉིད་གཅིག་ཏུ་འཇུག་པར་རྟོགས་པ་དང་།

སྔོན་གྱི་སྨོན་ལམ་གྱི་མཐུས་སེམས་ཅན་གྱི་སྤྱོད་པ་ཇི་ལྟ་བ་བཞིན་དུ་ཆོས་རྣམ་པ་སྣ་ཚོགས་སྟོན་པར་བྱེད་ཀྱང་ཆོས་ཀྱི་དབྱིངས་ལ་ནི་ཐ་དད་དུ་གྱུར་པ་མེད་དོ།

གློག་ཐོབ་ཆ་མཉམ་པའི་སྤྱོད་པ་

འདི་ལ་ཉི་ཁྲི་ཆིག་སྟོང་ཡོད་པ་དང་།

སྤྱོད་པ་གཞན་གཏོགས་པ་བརྒྱད་ཁྲི་བཞི་སྟོང་དུ་གྱུར་པ་དེ་དག་ཀྱང་བྱང་ཆུབ་སེམས་དཔས་སོ་སོར་བརྟགས་ནས་ཐམས་ཅད་གསལ་བར་རྟོགས་པར་འགྱུར་ཏེ།

འདི་ལྟ་སྟེ་དཔེར་ན་སྨན་པ་མཁས་པ་ནད་དང་སྨན་གཏོང་བ་རབ་ཏུ་ཤེས་པ་བཞིན་དུ་རྩོལ་བ་མེད་པའི་ཡེ་ཤེས་ཀྱིས་ཆོས་རྣམ་པ་སྣ་ཚོགས་སྟོན་པར་བྱེད་པ་གང་ཡིན་པ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆ་མཉམ་པ་སྤྱོད་པའི་གཏེར་ཞེས་བྱའོ།

བྱང་ཆུབ་སེམས་དཔའ་གང་གིས་གཏེར་འདི་ཐོབ་པར་གྱུར་ན་སེམས་ཅན་རྣམས་ཀྱི་ཆེད་དུ་བསྐལ་པ་འམ།

བསྐལ་པ་ལས་ལྷག་པར་དེ་དག་མོས་པ་ཇི་ལྟ་བ་བཞིན་དུ་བརྗོད་པ་རྣམ་པ་སྣ་ཚོགས་ཀྱི་ཐབས་མཁས་པས་ཆོས་སྟོན་པར་བྱེད་ཀྱང་སྤྱོད་པ་དེ་དག་གི་མཐའ་ཡང་རྙེད་པར་མི་འགྱུར་ལ།

བྱང་ཆུབ་སེམས་དཔའ་དེའི་ཤེས་རབ་དང་སྤོབས་པ་ཡང་གཏུགས་པར་མི་འགྱུར་ཏེ།

འདི་ནི་བྱང་ཆུབ་སེམས་དཔའི་ཆོས་ཀྱི་དབྱིངས་དབྱེར་མེད་པའི་མཚན་ཉིད་ལེགས་པར་བཤད་པས་ཐོབ་པའི་ཆ་མཉམ་པའི་སྤྱོད་པའི་གཏེར་ཞེས་བྱའོ།།

བམ་པོ་གཉིས་པ་སྟེ་ཐ་མ།

གཞན་ཡང་གློག་ཐོབ་བྱང་ཆུབ་སེམས་དཔའ་དེས་དེ་ལྟ་བུའི་ཡེ་ཤེས་ཡོངས་སུ་རྫོགས་པར་གྱུར་པས་སེམས་ཅན་རྣམས་ཀྱི་དབང་པོ་དང་།

སྤྱོད་པ་དང་།

བསམ་པ་ཡང་ཐབས་མཁས་པས་རབ་ཏུ་རྟོགས་པས་གལ་ཏེ་འདོད་ཆགས་མང་བའི་སེམས་ཅན་མཐོང་བར་གྱུར་ན།

དེ་དག་རབ་ཏུ་གདུལ་ཞིང་དེ་དག་གི་ནད་གསོ་བའི་ཕྱིར་སོ་སོའི་སྐྱེ་བོ་དང་འཐུན་པར་འདོད་པ་རྣམས་ལ་ཡོངས་སུ་སྤྱོད་པ་དང་།

བུ་དང་།

ཆུང་མ་དང་།

ཁྱིམ་གྱི་སོ་ཆིས་ཕུན་སུམ་ཚོགས་པ་སྟོན་པར་བྱེད་ཀྱང་པད་མ་བཞིན་དུ་དེས་གོས་ཞིང་མངོན་པར་ཞེན་པར་གྱུར་པ་མེད་དོ།

སེམས་ཅན་གང་གཏི་མུག་ཅིང་བློ་དང་མི་ལྡན་པ་དེ་དག་ནི་བྱང་ཆུབ་སེམས་དཔའ་ཐབས་མཁས་པ་མི་ཤེས་པས་འདི་སྙམ་དུ་བློ་དང་ལྡན་པ་སུ་ཞིག་སོ་སོའི་སྐྱེ་བོ་དང་ཐ་མི་དད་པར་འདོད་པ་རྣམས་ཉམས་སུ་ལེན་པར་བྱེད་ཅེས་བྱང་ཆུབ་སེམས་དཔའ་དེ་ལ་འདི་ནི་བྱང་ཆུབ་སྤངས་པ་ཡིན་ནོ་སྙམ་དུ་སེམས་པར་བྱེད་དོ།

སེམས་ཅན་དེ་ལྟ་བུ་དེ་དག་ནི་སེམས་ཡོངས་སུ་མི་གཙང་བའི་ཕྱིར་ཞེ་སྡང་ཆེན་པོ་སྐྱེས་ནས་གུས་

པར་མི་འགྱུར་བས་ལས་དེའི་དབང་གིས་ལུས་ཞིག་སྟེ་ཤི་བའི་འོག་ཏུ་སེམས་ཅན་དམྱལ་བ་ཆེན་པོར་ལྷུང་བར་གྱུར་ཀྱང་འདི་ལྟར་བྱང་ཆུབ་སེམས་དཔའ་ཤིན་ཏུ་གསང་བས་གདུལ་བའི་རྒྱུ་དང་རྐྱེན་གྱིས་ཁ་ན་མ་ཐོ་བའི་རྣམ་པ་ཡོངས་སུ་ཟད་ནས་གདོན་མི་ཟ་བར་མཉམ་པ་ཉིད་འཐོབ་པ་ལ་རབ་ཏུ་འགོད་པར་བྱེད་དོ།

གློག་ཐོབ་འདི་ལྟ་སྟེ་དཔེར་ན་མེ་རབ་ཏུ་འབར་བ་ནི་རྩྭ་དང་ཤིང་དང་ཕྲད་པར་གྱུར་པ་ན་ཐམས་ཅད་རབ་ཏུ་འབར་ཞིང་མེའི་ཕུང་པོ་ཉིད་དུ་མངོན་པར་འགྲུབ་པར་འགྱུར་རོ།

དེ་བཞིན་དུ་བྱང་ཆུབ་སེམས་དཔའ་ཡང་ཡེ་ཤེས་ཀྱི་མེ་འབར་བར་གྱུར་པ་ན་སེམས་ཅན་རྣམས་ཀྱི་འདོད་ཆགས་དང་།

ཞེ་སྡང་དང་།

གཏི་མུག་དང་།

དགེ་བ་དང་།

མི་དགེ་བ་ཇི་སྙེད་པ་དེ་དག་ཀྱང་བྱང་ཆུབ་སེམས་དཔའ་དང་ལྷན་ཅིག་འགྲོགས་ཤིང་ཐམས་ཅད་རབ་ཏུ་འབར་ནས་ཤེས་རབ་ཉིད་དུ་མངོན་པར་འགྲུབ་པར་འགྱུར་ཏེ།

འདི་ནི་བྱང་ཆུབ་སེམས་དཔའི་མ་འདྲེས་པའི་ཆོས་ཞེས་བྱའོ།།

གཞན་ཡང་འདི་ལྟ་སྟེ།

དཔེར་ན་རིའི་རྒྱལ་པོ་རི་རབ་ཀྱི་མ་འདྲེས་པའི་མཚན་ཉིད་ནི་འདི་ལྟ་སྟེ།

རིན་པོ་ཆེ་སྣ་བཞི་ལས་མངོན་པར་གྲུབ་པ་ཡིན་ཏེ།

སེམས་ཅན་རྣམས་ཀྱང་དེའི་རྗེས་སུ་ཁ་དོག་སྔོན་པོ་དང་།

སེར་པོ་དང་།

དམར་པོ་དང་།

དཀར་པོ་རྣམ་པ་སྣ་ཚོགས་ཀྱི་མཚན་ཉིད་དུ་གྱུར་པར་བྱེད་དེ།

གལ་ཏེ་བཻ་ཌཱུརྱའི་ངོས་སུ་ཕྱིན་ན་ནི་ཐམས་ཅད་ཀྱང་བཻ་ཌཱུརྱའི་ཁ་དོག་གཅིག་པ་ཉིད་དུ་འགྱུར་བར་བྱེད་དོ།

གསེར་གྱི་ཁ་དོག་གི་ངོས་སུ་ཕྱིན་ན་ནི་ཐམས་ཅད་གསེར་གྱི་ཁ་དོག་ཉིད་དུ་འགྱུར་བར་བྱེད་དོ།

དངུལ་དང་།

ཆུ་ཤེལ་གྱི་ཁ་དོག་ཏུ་འགྱུར་བ་ཡང་དེ་བཞིན་ནོ།

དེ་བཞིན་དུ་བྱང་ཆུབ་སེམས་དཔའ་ཡང་མ་འདྲེས་པའི་ཆོས་ཐོབ་པས་སེམས་ཅན་རྣམས་ཀྱི་འདོད་ཆགས་དང་།

ཞེ་སྡང་དང་།

གཏི་མུག་དང་།

དགེ་བ་དང་།

མི་དགེ་བ་ཇི་སྙེད་པ་དེ་དག་བྱང་ཆུབ་སེམས་དཔའི་ཐད་དུ་ཕྱིན་ཅིང་ལྷན་ཅིག་འགྲོགས་པར་གྱུར་ན་ཐམས་ཅད་བྱང་ཆུབ་སེམས་དཔའི་ཡེ་ཤེས་ལ་འཇུག་པ་ཉིད་དུ་འགྱུར་བར་བྱེད་ཀྱང་།

དེའི་སེམས་མི་གཙང་ཞིང་རང་གི་སྡིག་པའི་ལས་ཀྱི་དབང་གིས་སེམས་ཅན་དམྱལ་བ་དང་།

དུད་འགྲོའི་སྐྱེ་གནས་དང་།

གཤིན་རྗེའི་འཇིག་རྟེན་དུ་ལྷུང་བར་གྱུར་པས་འདི་ལྟར་བྱང་ཆུབ་སེམས་

དཔའི་མ་འདྲེས་པའི་ཡོན་ཏན་དང་སྨོན་ལམ་གྱི་སྟོབས་ཀྱིས་ཁ་ན་མ་ཐོ་བའི་རྣམ་པར་སྨིན་པ་ཟད་པའི་འོག་ཏུ་གདོན་མི་ཟ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འགྱུར་བ་ལ་འགོད་པར་བྱེད་དོ།

གློག་ཐོབ་སྔོན་བྱུང་བ་འདས་པའི་བསྐལ་པ་ཚད་མེད།

དཔག་ཏུ་མེད།

གྲངས་མེད་པ་ན་སྙིགས་མ་ལྔའི་དུས་ཀྱི་ཚེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ།

བདེ་བར་གཤེགས་པ།

འཇིག་རྟེན་མཁྱེན་པ།

བླ་ན་མེད་པ་སྐྱེས་བུ་འདུལ་བའི་ཁ་ལོ་སྒྱུར་བ།

ལྷ་དང་མི་རྣམས་ཀྱི་སྟོན་པ།

སངས་རྒྱས་བཅོམ་ལྡན་འདས་རིན་པོ་ཆེའི་ཕུང་པོ་ཡོན་ཏན་གྱི་སྒྲ་ཞེས་བྱ་བ་བྱུང་སྟེ།

དེའི་ཚེ་སྐྱེ་དགུ་རྣམས་ཚེ་ལོ་བརྒྱ་ཉི་ཤུ་ཐམ་པར་གྱུར་ཏེ།

ད་ལྟར་ང་ཇི་ལྟ་བ་བཞིན་ནོ།

དེའི་ཚེ་སེམས་ཅན་རྣམས་འདོད་ཆགས་དང་།

ཞེ་སྡང་དང་།

གཏི་མུག་ཤིན་ཏུ་ཆེ་སྟེ།

ཉོན་མོངས་པ་རྣམས་ཀྱིས་ཟིལ་གྱིས་ནོན་པས་ཕ་མ་དང་།

ཕུ་ནུ་དང་།

གྲོགས་པོའི་ཡིད་དང་འགལ་བར་བྱེད་པ།

མཁན་པོ་དང་།

སློབ་དཔོན་གྱི་རྗེས་སུ་མི་འབྲང་བ།

བྱས་པ་དྲིན་དུ་མི་གཟོ་བ།

རྟག་པར་གནོད་སེམས་དང་བཅས་པ།

གཡོ་སྒྱུ་དང་རྐུན་བུའི་སེམས་དང་ལྡན་པ།

ཕན་ཚུན་གཅིག་ལ་གཅིག་གནོད་པ་བྱེད་པ།

ཚུལ་བཞིན་མ་ཡིན་པར་སྤྱོད་པ།

སངས་རྒྱས་དང་།

ཆོས་དང་དགེ་འདུན་ལ་གུས་པ་མེད་པ།

སེར་སྣས་ཟིལ་གྱིས་ནོན་པས་ཡི་དགས་ཀྱི་ཆོས་སྤྱོད་པའི་སེམས་ཅན་དེ་ལྟ་བུ་ཤ་སྟག་སངས་རྒྱས་ཀྱི་ཞིང་དེ་ན་གནས་པར་གྱུར་པས་ནི་ཤིན་ཏུ་གདུལ་དཀའ་བར་གྱུར་ཏོ།

དེའི་ཚེ་བཅོམ་ལྡན་འདས་དེ་ཡང་སྔོན་གྱི་སྨོན་ལམ་གྱི་མཐུས་དུས་ངན་པ་དེའི་ཚེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་གྱུར་ཏེ།

བཅོམ་ལྡན་འདས་དེ་ལ་ཉན་ཐོས་ཆེན་པོའི་ཚོགས་ནི་ཉི་ཁྲི་ཉིས་སྟོང་མངའ་བར་གྱུར་ཏོ།

དེའི་ཚེ་དེའི་དུས་ན་རྒྱལ་པོ་རྒྱ་ཆེར་བྱིན་པ་ཞེས་བྱ་བ་འཛམ་བུའི་གླིང་ལ་དབང་བའི་དབང་ཕྱུག་དང་ལྡན་པ།

སངས་རྒྱས་ཀྱི་བསྟན་པ་ལ་སེམས་ཤིན་ཏུ་དང་བར་གྱུར་པ་ཞིག་ཡོད་པ་དེས་དེ་བཞིན་གཤེགས་པ་དེ་ཉན་ཐོས་ཀྱི་དགེ་འདུན་དང་བཅས་པར་དབྱར་

ཟླ་བ་གསུམ་སྤྱན་དྲངས་ཏེ་མཆོད་པ་རྒྱ་ཆེར་བཤམས་ནས་མཆོད་ཅིང་རིམ་གྲོ་བྱས་སོ།

དེའི་ཚེ་དགེ་སློང་དྲི་མ་མེད་པ་ཞེས་བྱ་བ་སྤོབས་པ་ཕུན་སུམ་ཚོགས་པ།

ཆོས་སྟོན་པའི་ཐབས་ལ་མཁས་པས་འཁོར་མང་པོ་རྣམས་ཉན་པར་སྤྲོ་བ།

སེམས་ཅན་ཡོངས་སུ་སྨིན་པར་བྱེད་པ་ལ་རྟག་པར་ངལ་བ་མེད་པ།

རེ་བ་མེད་པར་ཆོས་སྟོན་པ།

མདོག་གསལ་ཞིང་གསོང་པོར་སྨྲ་བ།

གཟུགས་དང་སྟོབས་ཕུན་སུམ་ཚོགས་པ།

བྱད་བཞིན་སྡུག་ཅིང་མཛེས་པ།

སེམས་ཅན་རྣམས་ཀྱིས་མཐོང་བར་མོས་ཤིང་རིམ་གྲོ་དང་།

བཀུར་སྟི་དང་།

བླ་མར་བྱེད་ཅིང་བསྔགས་པ་བརྗོད་པ་ཞིག་ཡོད་དེ།

དགེ་སློང་གསར་བུ་དག་ཀྱང་རྟག་པར་དྲི་མ་མེད་པའི་རྗེས་སུ་འབྲང་ཞིང་རྒྱལ་པོའི་ཕོ་བྲང་འཁོར་དུ་འབྱུང་ཞིང་འཇུག་པ་དག་ལ་ཐོགས་པ་མེད་པར་གྱུར་པས་གོས་དང་།

བཟའ་བ་དང་།

བཏུང་བ་དང་།

མལ་སྟན་དང་།

ན་བའི་གསོས་སྨན་རྣམ་པ་སྣ་ཚོགས་ཀྱིས་ཀྱང་རིམ་གྲོ་བྱས་པར་གྱུར་ཏོ།

དེའི་ཚེ་འཁོར་མང་པོ་དེ་ལས་དགེ་སློང་ཕལ་ཆེར་ལུས་ཀྱི་སྡོམ་པ་དང་།

སེམས་ཀྱི་ཤེས་རབ་བསྒོམ་པ་མི་ཤེས་པ།

སངས་རྒྱས་དང་།

ཆོས་དང་།

དགེ་འདུན་ལ་གུས་པ་མེད་པ།

རྟག་པར་ལྟ་བ་དང་།

ཆད་པར་ལྟ་བ་དང་།

བདག་ཏུ་ལྟ་བ་ལ་སོགས་པ་དང་ལྡན་པ།

སངས་རྒྱས་ཀྱི་ཆོས་ལ་སྐུར་བ་འདེབས་པ།

རྣམ་པར་གཡེང་ཞིང་གདུལ་དཀའ་བ།

དབང་པོ་རྣམས་མི་སྡོམ་པ།

ཆོས་བཞིན་མ་ཡིན་པ་ལ་གནས་པ།

དགེ་སྦྱོང་གི་ཚུལ་མེད་པར་བདག་ཉིད་དགེ་སྦྱོང་དུ་ཁས་འཆེ་བ།

ལུས་དང་ངག་དང་ཡིད་ཀྱི་ལས་ཐམས་ཅད་ལོག་པར་ཞུགས་པ་ཤ་སྟག་གནས་པར་གྱུར་ཏོ།

དེའི་ཚེ་བཅོམ་ལྡན་འདས་དེ་དབྱར་འདས་ནས་ཡོངས་སུ་མྱ་ངན་ལས་འདས་པ་དང་།

རྒྱལ་པོ་རྒྱ་ཆེར་བྱིན་པས་ཙན་དན་དམར་པོས་སྐུ་ཞུགས་ལ་བཞེན་ནས་མཆོད་པ་བྱས་ཏེ་རིང་བསྲེལ་གྱི་མཆོད་རྟེན་ངོས་བཞི་ཀུན་ཏུ་ཙན་དན་དམར་པོའི་མུ་ཁྱུད་ཀྱིས་བསྐོར་བ།

པད་མ་གསེར་གྱི་ཁ་དོག་དང་ལྡན་པ་བྱེ་བ་ཕྲག་བརྒྱད་ཅུ་བརྩིགས་སོ།

དེའི་ཚེ་དགེ་སློང་དྲི་མ་མེད་པ་ནི་བཅོམ་ལྡན་འདས་དེས་མང་དུ་ཐོས་པའི་མཆོག་ཏུ་ལུང་བསྟན་པས་དེ་བཞིན་གཤེགས་པ་དེ་ཡོངས་སུ་མྱ་ངན་ལས་འདས་པའི་འོག་ཏུ་

དམ་པའི་ཆོས་རྒྱ་ཆེར་སྤེལ་ཏེ།

གྲོང་དང་།

གྲོང་ཁྱེར་དང་།

གྲོང་རྡལ་གང་དང་གང་དུ་སོང་བ་དེར་སེམས་ཅན་བརྒྱ་སྟོང་ཚད་མེད་པ་སྙེད་ཡོངས་སུ་བཏུལ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཀོད་པར་གྱུར་ཏོ།

དེའི་ཚེ་དགེ་སློང་སྡིག་ཅན་མང་པོ་རྣམས་རྣལ་འབྱོར་ཁོང་དུ་མ་ཆུད་པ།

རྟག་པར་ཕྲག་དོག་དང་བཅས་པ།

བདུད་ཀྱིས་བསླུས་པ་རྣམས་རྒྱལ་པོ་དེ་ག་ལ་བ་དེར་དོང་སྟེ་འདི་སྐད་དུ་རྒྱལ་པོས་བཀུར་བའི་དགེ་སློང་དྲི་མ་མེད་པ་ནི་རྒྱལ་པོའི་ཕོ་བྲང་དུ་འབྱུང་ཞིང་འཇུག་པ་ལ་ཐགས་ཐོགས་མ་མཆིས་ཏེ།

དགེ་སློང་འདི་འདོད་ཆགས་དང་བྲལ་བ་ཡང་མ་ལགས་ལ།

དུས་མ་ལགས་པར་ཡང་ཟས་འཚལ་ཏེ།

སྤོས་དང་ཕྲེང་བ་དག་གིས་ཀྱང་ལུས་བརྒྱན་པར་བགྱིད་པས་ཡང་དག་པར་ཚངས་པར་སྤྱོད་པ་མ་ལགས་པས་མཆོད་པ་མཛད་པའི་མི་རིགས་སོ།

བདག་ཅག་ནི་དོན་འདིའི་སླད་དུ་འདིར་མཆིས་ནས་རྒྱལ་པོ་ལ་གསོལ་བ་ལགས་ཀྱིས།

སླད་ཀྱིས་འགྱོད་པར་ཡང་མ་མཛད་ཅིག །

སངས་རྒྱས་ཀྱི་ཡང་དག་པའི་བསྟན་པ་ལ་ཐུགས་མི་ཆེས་པ་ཡང་མི་བསྐྱེད་དུ་གསོལ་ཞེས་སྨྲས་སོ།

དེའི་ཚེ་བདུད་སྡིག་ཅན་ཞེས་བྱ་བ་ཞིག་ཀྱང་བདག་ཉིད་དགེ་སློང་གི་གཟུགས་སུ་བསྒྱུར་ནས་རྒྱལ་པོ་དེ་ག་ལ་བ་དེར་སོང་སྟེ་སྔ་མ་བཞིན་དུ་སྨྲས་སོ།

དེའི་ཚེ་རྒྱལ་པོ་རྒྱ་ཆེར་བྱིན་པས་ཡང་དང་ཡང་དུ་དེ་སྐད་སྨྲས་པ་ཐོས་ཀྱང་འདི་སྙམ་དུ་དགེ་སློང་དྲི་མ་མེད་པ་ནི་རབ་ཏུ་བརྩོན་ཞིང་བློ་དང་ལྡན་པས་བདག་གིས་བླ་མར་བཀུར་བ་ཡིན་ཏེ།

དངོས་པོ་འདི་ལྟ་བུ་བྱེད་པ་ནི་གནས་མེད་དོ་སྙམ་མོ།

དེ་ནས་དེའི་ཚེ་བདུད་ཀྱི་འཁོར་རྣམས་པར་སྣང་ལས་ལུས་ཕྱེད་བསྟན་ནས་རྒྱལ་པོ་དེ་ལ་ཚིགས་སུ་བཅད་དེ་སྨྲས་པ།

རྒྱལ་པོ་བཟོ་ཡི་སྒྱུ་རྩལ་སློབས།

དུས་ཚོད་དག་ལ་མཁས་པར་གྱིས།

རྒྱལ་པོས་དེ་ནི་མ་ཤེས་ན།

མི་རྒྱལ་རྟགས་དང་ལྡན་མ་ཡིན།

སངས་རྒྱས་ཉན་ཐོས་དགྲ་བཅོམ་པ།

ཡེ་ཤེས་ཆེན་པོ་ལྡན་པ་ཡི།

ཚིག་དག་ལ་ནི་མི་རྟེན་པར།

ཅི་ཡི་ཕྱིར་ན་ཆད་པར་ལྟ།

དགེ་སློང་རྣམས་ནི་ཕན་གདགས་ཕྱིར།

ཁྱོད་ལ་བདེན་ཚིག་སྨྲ་བ་ཡིན།

ཆད་སྨྲ་ངན་འགྲོར་འགྲོ་བའི་མི།

ཡང་དག་ཚངས་སྤྱོད་མ་ཡིན་པས།

དེ་ནི་རྒྱལ་པོའི་ཕོ་

བྲང་དུ།

བཙུན་མོ་དག་དང་ལྷན་ཅིག་རྩེ།

རྒྱལ་པོ་འཁོར་དང་བཅས་པ་ཡིས།

ལེགས་པར་རྟོགས་ལ་ཐེ་ཚོམ་སོལ།

རྒྱལ་པོས་དངོས་པོ་འདི་ཐོས་པས།

སེམས་ལ་སྐྲག་ཅིང་མྱ་ངན་སྐྱེས།

འཁོར་རྣམས་དང་ནི་ལྷན་ཅིག་ཏུ།

མྱུར་ཞིང་རིངས་པར་ཕོ་བྲང་དོང་།

དེ་ཚེ་དྲི་མེད་ཕོ་བྲང་ནང་།

ཆོས་རྣམས་རང་བཞིན་སྟོང་པ་དང་།

བདག་དང་སེམས་ཅན་མེད་པ་ཡི།

དམ་པའི་དོན་ནི་སྟོན་པར་བྱེད།

རྒྱལ་པོ་དམག་འཁོར་བཅས་པ་རྣམས།

ཐམས་ཅད་བདུད་ཀྱིས་བསླུས་པས་ན།

ཕོ་བྲང་ནང་གི་བཙུན་མོ་རྣམས།

དགེ་སློང་ཡོངས་བསྐོར་མཐོང་བ་དང་།

ཞེ་སྡང་གླང་ཆེན་མྱོས་འདྲ་བས།

གཤེད་མ་དག་ལ་རབ་བསྒོ་བ།

དགེ་སློང་ང་ཡི་བཙུན་མོ་བསླུས།

སྡུག་བསྔལ་ཆོས་ཀྱི་ཆད་པས་ཆོད།

བློན་པོ་འཁོར་དང་བཅས་པ་རྣམས།

ཐམས་ཅད་བདུད་ཀྱིས་ཟིན་པས་ན།

དགེ་སློང་ཉེས་པ་མེད་པ་ལ།

སེམས་ཀྱིས་གནོད་པ་བྱ་བར་བསམས།

གཤེད་མ་མཚོན་ཐོགས་འོངས་པ་དང་།

དྲི་མེད་སྙིང་བརྩེ་མཆི་མ་བྱུང་།

རྒྱལ་པོས་ཁྱོད་ནི་ཆོས་མིན་ན།

ཅི་ཡི་ཕྱིར་ན་མཆི་མ་བྱུང་།

དྲི་མེད་རྒྱལ་པོ་ལ་སྨྲས་པ།

དངོས་པོ་འདི་ནི་ཡིད་ཆེས་དཀའ།

རེ་ཤིག་སྐད་ཅིག་སྡོད་ཅིག་དང་།

བདག་བསད་པ་ཡི་ལོང་ཡོད་དོ།

རྒྱལ་པོས་དགེ་སློང་ཚིག་ཐོས་ནས།

གཤེད་མ་དག་ལ་སྡོད་ཅིག་བསྒོ།

བདེན་པའི་དངོས་པོ་ཅི་ཞིག་ཡོད།

ཁྱོད་ཀྱིས་མྱུར་དུ་སྨྲ་བའི་རིགས།

ལྷག་པའི་བསམ་པ་ལྡན་གྱུར་ཅིང་།

སྙིང་རྗེས་འཇིག་རྟེན་ཕན་འདོགས་པས།

སོར་མོ་བཅུ་ཡི་ཐལ་སྦྱར་ཏེ།

བདེན་པའི་ཚིག་ནི་འདི་སྐད་སྨྲས།

རྒྱལ་པོ་ཆེན་པོས་མཁྱེན་པར་མཛོད།

གལ་ཏེ་ཡང་དག་ཉེས་མེད་ན།

ས་འདི་རྣམ་པ་དྲུག་ཏུ་གཡོས།

མཁའ་ལས་མེ་ཏོག་ཆར་ཕོབ་ཤིག །

དེ་སྐད་ཚིག་ནི་སྨྲས་མ་ཐག །

ས་ཆེན་རྣམ་པ་དྲུག་ཏུ་གཡོས།

མཁའ་ལས་ལྷ་ཡི་མེ་ཏོག་བབ།

བདུད་འཁོར་མྱ་ངན་སྐྱེས་པར་གྱུར།

དེ་ཚེ་རྒྱལ་པོ་དང་བ་སྐྱེས།

རྐང་ལ་ཕྱག་བྱས་བཟོད་པ་གསོལ།

བདག་ནི་དམྱལ་བར་ལྟུང་འགྱུར་ན།

མགོན་མེད་བདག་ལ་སྐྱབས་མཛོད་ཅིག །

ཀྱི་ཧུད་སྡིག་པའི་གྲོགས་ཕྲད་པས།

གདུག་པའི་སེམས་

ནི་སྐྱེས་པར་གྱུར།

སྡིག་པའི་གྲོགས་པོ་རྗེས་འབྲངས་པས།

མགོན་དང་སྐྱབས་བྱེད་སུ་ཡང་མེད།

སྟོན་པ་ཆེན་པོ་མ་གཏོགས་པར།

ཕྱོགས་བཅུར་བདག་གི་མགོན་བྱེད་མེད།

བདག་གིས་རྒྱལ་སྲིད་སྤངས་ནས་ནི།

ནམ་འཚོའི་བར་དུ་སྐྱབས་སུ་མཆིས།

དགེ་སློང་དེས་ནི་རྒྱལ་པོ་དང་།

གཡོག་འཁོར་བསམ་པ་རིག་གྱུར་ནས།

དམ་པའི་དོན་ནི་རབ་ཏུ་བཤད།

རྒྱལ་པོས་ཐོས་ནས་དང་བ་ཐོབ།

འཁོར་ནི་བྱེ་བ་བརྒྱ་སྟོང་དང་།

རྒྱལ་སྲིད་སྤངས་ནས་རབ་ཏུ་བྱུང་།

སྦྱངས་པའི་སྡོམ་པ་བླངས་པས་ན།

གཞན་གྱིས་འགྲོན་གཉེར་ཡོང་མི་ལེན།

དེ་ཚེ་རྒྱལ་པོའི་ཕོ་བྲང་ནང་།

བཙུན་མོ་འཁོར་བཅས་བརྒྱད་ཁྲི་རྣམས།

དམ་པའི་དོན་ནི་ཐོས་པས་ན།

ཕྱིར་མི་ལྡོག་ལ་གནས་པར་གྱུར།

རྒྱལ་པོས་སངས་རྒྱས་གསུངས་པ་བཞིན།

ལོ་ནི་ཉི་ཤུ་རྩ་བཞིའི་བར།

ཉིན་མཚན་རྟག་པར་སྡིག་བཤགས་ཀྱང་།

འོན་ཀྱང་སྡིག་པའི་ལས་མ་ཟད།

ལོ་ནི་བྱེ་མང་སྡུག་བསྔལ་མྱོང་།

སྡིག་ཟད་དེ་བཞིན་གཤེགས་དང་ཕྲད།

སྔོན་ནི་སྐྲག་པར་བྱས་པའི་རྒྱུས།

རྣམ་སྨིན་ལྷག་མ་རྟག་པར་དམན།

མཐར་གྱིས་རྣལ་འབྱོར་རབ་བསྒོམས་ཏེ།

སངས་རྒྱས་བྱེ་བ་སྟོང་མཆོད་ནས།

སོ་སོར་ཞིང་ཁམས་གཞན་དག་ཏུ།

ཐམས་ཅད་མངོན་པར་རྫོགས་སངས་རྒྱས།

ཐམས་ཅད་ཀུན་ཀྱང་མཚན་འཐུན་པར།

ཡོན་ཏན་གྲགས་པ་ཞེས་བྱར་གྱུར།

དེ་ཚེ་རྒྱལ་པོ་རྒྱ་ཆེར་བྱིན།

དགེ་སྦྱོང་བྱམས་བཟོད་དེ་ལ་ནི།

གདུག་པའི་སེམས་ནི་བསྐྱེད་པས་ན།

ལོ་ནི་བྱེ་བ་མང་པོར་ཡང་།

སྔོན་གྱི་སྡིག་ལས་མངོན་གྱུར་པས།

ངུ་འབོད་ཆེན་པོར་ལྷུང་བར་གྱུར།

རྣམ་སྨིན་དེ་ནི་ཟད་ནས་ཀྱང་།

སླར་ཡང་མི་ལུས་ཐོབ་གྱུར་ཏེ།

དེ་བཞིན་གཤེགས་པ་ཀུན་སྤྱན་ཕྲད།

རྟག་ཏུ་བསྙེན་བཀུར་རིམ་གྲོ་བྱས།

གཞན་ཡང་སངས་རྒྱས་བྱེ་བ་ཕྲག །

བརྒྱད་ཅུ་དག་ལ་རིམ་གྲོ་བྱས།

དེ་ཡི་འོག་ཏུ་སངས་རྒྱས་པ།

དེ་ནི་ང་བདག་ཉིད་ཡིན་ནོ།

ཆོས་སྨྲ་ཉེས་པ་མེད་པ་ལ།

གནོད་པ་བྱས་པའི་དགེ་སློང་ནི།

མ་འོངས་མངོན་པར་འཚང་རྒྱ་བ།

བྱང་ཆུབ་སེམས་དཔའ་བྱམས་པ་ཡིན།

དེ་ཚེ་རྒྱལ་པོ་ཕོ་བྲང་ནང་།

བཙུན་མོའི་འཁོར་ནི་བརྒྱད་ཁྲི་རྣམས།

ཤིན་ཏུ་དང་བས་དགེ་རྩ་བསྐྱེད།

སངས་རྒྱས་ཚད་མེད་རིམ་གྲོ་བྱས།

དེ་ལྟར་སྤྱོད་པ་རབ་བསྐྱེད་ནས།

སེམས་ཅན་ཕན་གདགས་སྨོན་ལམ་བཏབ།

སངས་རྒྱས་བྱེ་བ་སྟོང་མཆོད་ནས།

སོ་སོར་མངོན་པར་འཚང་རྒྱ་ཡང་།

ངས་དེང་ཁྱོད་ལ་བསྒོ་བ་ནི།

ཐམས་ཅད་གནོད་སེམས་མ་སྐྱེད་ཅིག །

གང་ཞིག་བྱམས་བསྒོམས་སངས་རྒྱས་བསྔགས།

མྱུར་དུ་བྱང་ཆུབ་ཆེན་པོ་འཐོབ།

དེ་ལྟ་བས་ན་གློག་ཐོབ་སེམས་ཅན་རྣམས་ཀྱི་དབང་པོ་དང་།

རང་བཞིན་དང་།

བསམ་པ་དག་ལ་མི་མཁས་བ་དག་གིས་དུས་ཐམས་ཅད་དུ་གནོད་སེམས་བསྐྱེད་པར་མི་བྱའོ།

གློག་ཐོབ་འདི་ལྟ་སྟེ་དཔེར་ན་རི་རྣམས་ཀྱི་ནང་ན་རི་རབ་མཆོག་ཏུ་གྱུར་པ་དེ་བཞིན་དུ་དེ་བཞིན་གཤེགས་པའི་ཡེ་ཤེས་ཀྱང་ཡེ་ཤེས་རྣམས་ཀྱི་ནང་ན་མཆོག་དང་གཙོ་བོ་དང་།

བླ་ན་མེད་པར་གྱུར་པ་ཡིན་ནོ།

འདི་ལྟ་སྟེ་དཔེར་ན་ཆུ་བོ་ཐམས་ཅད་ཀྱི་ནང་ན་རྒྱ་མཚོ་མཆོག་ཏུ་གྱུར་པ་དེ་བཞིན་དུ་དེ་བཞིན་གཤེགས་པའི་ཡེ་ཤེས་ཀྱང་ཡེ་ཤེས་རྣམས་ཀྱི་ནང་ན་མཆོག་ཏུ་ཟབ་ཅིང་རྒྱ་ཆེ་བར་གྱུར་པ་ཡིན་ནོ།

གཞན་ཡང་འདི་ལྟ་སྟེ་དཔེར་ན་རྒྱལ་པོ་རྣམས་ཀྱི་ནང་ན་འཁོར་ལོས་སྒྱུར་བའི་རྒྱལ་པོ་མཆོག་དང་།

གཙོ་བོ་དང་།

བླ་མར་གྱུར་པ་དེ་བཞིན་དུ་དེ་བཞིན་གཤེགས་པའི་ཡེ་ཤེས་ཀྱང་ཡེ་ཤེས་རྣམས་ཀྱི་ནང་ན་གོང་ན་མེད་པར་གྱུར་པ་ཡིན་ནོ།

གློག་ཐོབ་དེ་བཞིན་གཤེགས་པ་ནི་དེ་ལྟ་བུའི་མཁྱེན་པ་དང་ལྡན་པའི་ཕྱིར་སེམས་ཅན་ཐམས་ཅད་ཀྱི་འདོད་ཆགས་དང་།

ཞེ་སྡང་དང་།

གཏི་མུག་སྤྱོད་པའི་སེམས་དང་སེམས་ལས་བྱུང་བ་འཇུག་ཅིང་འགྱུར་བ་ཇི་སྙེད་པ་དེ་དག་ཐམས་ཅད་དེ་བཞིན་གཤེགས་པས་རབ་ཏུ་མཁྱེན་ཅིང་སེ་གོལ་གཏོགས་པ་གཅིག་ལ་ཐམས་ཅད་ཡོངས་སུ་སྡུད་པར་མཛད་དོ།

གློག་ཐོབ་དེ་བཞིན་གཤེགས་པ་ནི་རྣམ་པ་ཐམས་ཅད་མཁྱེན་པ་ཉིད་དང་ལྡན་པས་འདི་ལྟ་སྟེ་དཔེར་ན་སྐྱེས་བུ་མིག་དང་ལྡན་པས་རྩོལ་བ་ལ་མི་ལྟོས་པར་རང་གི་ལག་མཐིལ་ན་སྐྱུ་རུ་རའི་འབྲས་བུ་གསལ་བར་མཐོང་ཞིང་ཐེ་ཚོམ་མེད་པ་དེ་བཞིན་དུ་དེ་བཞིན་གཤེགས་པ་ཡང་སེམས་ཅན་ཐམས་ཅད་ཀྱི་སེམས་ཅན་གྱི་སྤྱོད་པ་ཇི་སྙེད་པ་དེ་དག་

ཐམས་ཅད་རབ་ཏུ་མཁྱེན་པས་འཁོར་མང་པོའི་ནང་དུ་ཆོས་རྣམ་པ་སྣ་ཚོགས་ཡང་དག་པར་སྟོན་པར་མཛད་དོ།

སངས་རྒྱས་ཀྱི་ཞིང་འཇིག་རྟེན་གྱི་ཁམས་ཚད་མེད་གྲངས་མེད་པ་དག་ན་འདོད་ཆགས་ཀྱི་སྤྱོད་པ་དང་མཚུངས་པར་ལྡན་པའི་སེམས་ཅན་རྣམས་འདོད་ཆགས་ཀྱིས་ཡོངས་སུ་གདུངས་ནས་ཉིན་མཚན་དུ་ཡིད་ལ་བྱེད་ཅིང་དོན་མེད་པར་དུས་ལས་འདའ་བར་བྱེད་པ་ཡང་ངས་རབ་ཏུ་མཁྱེན་ཅིང་གཟིགས་སོ།

འདོད་ཆགས་ཀྱིས་གདུང་བས།

ལུས་དང་།

ངག་གི་ལས་རྣམ་པ་སྣ་ཚོགས་སློང་བར་བྱེད་པ་དག་ཀྱང་ངས་རབ་ཏུ་མཁྱེན་ཅིང་གཟིགས་སོ།

ཞེ་སྡང་སྤྱོད་པའི་སེམས་ཅན་དེ་དག་ཞེ་སྡང་གི་ཟིལ་གྱིས་ནོན་ནས་གཅིག་ལ་གཅིག་ཞེ་སྡང་གིས་ཕྲག་དོག་བྱེད་པ་དང་།

གནོད་པ་བྱས་པའི་ཕྱིར་མནར་མེད་པའི་གནས་སུ་ལྟུང་བར་འགྱུར་བ་དག་ཀྱང་ངས་རབ་ཏུ་མཁྱེན་ཅིང་གཟིགས་སོ།

གཏི་མུག་སྤྱོད་པ་དང་མཚུངས་པར་ལྡན་པའི་སེམས་ཅན་རྣམས་མ་རིག་པའི་མུན་ནག་གིས་བསྒྲིབས་ཤིང་རྨོངས་པས་མངོན་པར་ཞེན་པ་དང་།

ལོག་པར་ལྟ་བའི་རྗེས་སུ་འབྲང་བ་ལ་མོས་པར་འགྱུར་བ་དག་ཀྱང་ངས་རབ་ཏུ་མཁྱེན་ཏོ།

འོས་སུ་འགྱུར་བ་དང་།

འོས་སུ་མི་འགྱུར་བ་དང་།

འཕེལ་ཞིང་རྩོལ་བ་དང་བཅས་པ་དང་།

ལྡོག་ཅིང་ཉམས་པར་གྱུར་པ་དང་།

དེ་བཞིན་གཤེགས་པའི་ཐེག་པར་དགེ་བའི་རྩ་བ་བསྐྱེད་པ་དང་།

རང་སངས་རྒྱས་ཀྱི་ཐེག་པར་དགེ་བའི་རྩ་བ་བསྐྱེད་པ་དང་།

ཉན་ཐོས་ཀྱི་ཐེག་པར་དགེ་བའི་རྩ་བ་བསྐྱེད་པ་དག་ཀྱང་ངས་རབ་ཏུ་མཁྱེན་ཏོ།

དེ་བཞིན་གཤེགས་པ་ནི་དེ་ལྟ་བུའི་མཁྱེན་པ་དང་ལྡན་པས་འཁོར་མང་པོའི་ནང་དུ་བཞུགས་ནས་སེམས་ཅན་གྱི་སེམས་ཀྱི་སྤྱོད་པའི་བྱེ་བྲག་ཀྱང་རབ་ཏུ་མཁྱེན་པས་གལ་ཏེ་དུས་ལ་མ་བབ་པར་རིག་པར་གྱུར་ན་ནི་ཅང་མི་གསུང་ཞིང་བཏང་སྙོམས་སུ་བཞག་ནས་སེམས་ཅན་འདི་དག་ནི་ཆོས་ལ་རྨོངས་པར་གྱུར་པས།

ཁོང་དུ་ཆུད་པར་མི་འགྱུར་རོ་སྙམ་དུ་དགོངས་སོ།

དེ་བཞིན་གཤེགས་པ་ནི་དབང་པོ་དང་སྟོབས་ཁྱད་པར་དུ་འཕགས་པ་ཕུན་སུམ་ཚོགས་ཤིང་དུས་རབ་ཏུ་མཁྱེན་པའི་ཕྱིར་གདུལ་བའི་འོས་སུ་གྱུར་པ་དང་།

བསམ་པ་མཆོག་ཏུ་གྱུར་པ་དང་།

བཟོད་པར་ནུས་པའི་འོས་སུ་གྱུར་པ་དང་།

ཚིག་ལེགས་པར་ཉན་པར་གྱུར་པ་དག་ཀྱང་ངས་རབ་ཏུ་མཁྱེན་ཏེ།

དེ་ལྟར་མཁྱེན་པར་གྱུར་ནས་ཀྱང་སེམས་ཅན་དེ་དག་ཡོངས་སུ་སྡུད་ཅིང་ཕན་འདོགས་པར་བྱེད་དོ།

དེ་ལྟ་བས་ན་གློག་ཐོབ་བྱང་ཆུབ་སེམས་དཔའ་ལས་དང་པོ་པ་ཡང་དག་པའི་གནས་སྐབས་སུ་མ་ཞུགས་པ་སེམས་ཅན་རྣམས་ཀྱི་ལྷག་པའི་བསམ་པ་ལེགས་པར་ཁོང་དུ་མ་ཆུད་པ་དག་གིས་ཁྱིམ་ན་གནས་པ་འམ།

རབ་ཏུ་བྱུང་བ་ཡང་རུང་སྟེ།

ཐམས་ཅད་ཀུན་ལ་སྨོད་ཅིང་གནོད་སེམས་བསྐྱེད་ནས་ཡུན་རིང་པོར་བདག་ཉིད་ལ་གནོད་པར་འགྱུར་བ་མི་བྱའོ།

དེའི་ཕྱིར་བྱང་ཆུབ་སེམས་དཔའ་སེམས་དང་པོ་བསྐྱེད་པ་ནས་ཐེག་པ་ཆེན་པོ་ལ་གནས་པ་ཐམས་ཅད་ལ་སངས་རྒྱས་ཀྱི་འདུ་ཤེས་བསྐྱེད་པར་བྱའོ།

སེམས་ཅན་གཞན་དག་སྡིག་པ་མི་དགེ་བའི་ལས་བྱེད་པ་མཐོང་ན་ཡང་གནོད་སེམས་བསྐྱེད་པར་མི་བྱའོ།

དེ་ཅིའི་ཕྱིར་ཞེ་ན།

དེ་བཞིན་གཤེགས་པས་རྟག་ཏུ་སེམས་ཅན་གང་རྣམ་པར་དཀར་ཞིང་ཡོངས་སུ་དག་པའི་ཆོས་ལས་ཅུང་ཟད་ཅིག་ཉན་པར་གྱུར་ན་ནམ་ཡང་ཡོངས་སུ་མྱ་ངན་ལས་མི་འདའ་བར་མི་འགྱུར་རོ་ཞེས་གསུངས་པས་སོ།

བྱང་ཆུབ་སེམས་དཔའ་ནི་གལ་ཏེ་འདོད་ཆགས་སྤྱོད་པའི་སེམས་ཅན་མཐོང་བར་གྱུར་ན་སེམས་ཅན་འདི་དག་འདོད་ཆགས་ཀྱིས་གདུང་བས་བསྲེགས་པར་གྱུར་པ་ཡང་བདག་གིས་ཉེས་པ་ཡིན་ནོ་སྙམ་དུ་སེམས་སོ།

ཞེ་སྡང་དང་།

གཏི་མུག་གིས་གདུང་བས་བསྲེགས་པར་གྱུར་པ་དེ་དག་མཐོང་ན་ཡང་འདི་དག་ཐམས་ཅད་ནི་བདག་གིས་ཉེས་པ་ཡིན་ནོ་སྙམ་དུ་སེམས་སོ།

དེ་ཅིའི་ཕྱིར་ཞེ་ན།

བདག་གིས་སེམས་ཅན་ཐམས་ཅད་ན་བའི་སྡུག་བསྔལ་དང་ལྡན་པར་གྱུར་པ་དག་མཐོང་བར་གྱུར་ན་སྨན་ཡོངས་སུ་བཙལ་ཏེ་ཐབས་མཁས་པས་ཡོངས་སུ་གསོ་བའི་རིགས་པ་ལས།

བདག་སྔོན་སེམས་ཅན་གྱི་ནད་བསལ་བར་ཡི་དམ་བཅས་ནས་དེང་ཡལ་བར་བོར་བ་འདི་ཉིད་བདག་གི་ཉེས་པ་ཡིན་ནོ་སྙམ་དུ་སེམས་པས་སོ།

བྱང་ཆུབ་སེམས་དཔའ་ནི་དེ་ལྟ་བུའི་བསམ་པ་དང་ལྡན་པས་བདག་ཉིད་ཀྱི་ཉེས་པ་ལ་ལྟ་ཞིང་སེམས་ཅན་རྣམས་ལ་བྱམས་པའི་སེམས་སྐྱེད་པར་བྱེད་དོ།

གལ་ཏེ་གསོད་

པ་འམ།

ལུས་ཀྱི་ཡན་ལག་དང་ཉིང་ལག་གཅོད་ཅིང་གཏུབ་པ་ཞིག་དང་ཕྲད་པར་གྱུར་ན་ཡང་ཕ་རོལ་གནོད་པ་བྱེད་པ་དེ་དག་ལ་ལན་བྱའོ་སྙམ་པའི་བསམ་པ་མེད་དོ།

གློག་ཐོབ་བྱང་ཆུབ་སེམས་དཔའ་དེ་ལྟར་ཡང་དག་པར་སྒོམ་པ་ན་འདས་པའི་མི་དགེ་བའི་ལས་ཇི་སྙེད་པ་དག་ཀྱང་གཏན་དུ་ཟད་ཅིང་མ་ལུས་པར་འབྱང་བར་འགྱུར་ལ།

མ་འོངས་པའི་མི་དགེ་བ་རྣམས་ནི་ཡང་ལྡང་བར་མི་འགྱུར་རོ།

གློག་ཐོབ་སྔོན་བྱུང་བ་འདས་པའི་བསྐལ་པ་ཚད་མེད་གྲངས་མེད་པ་དེ་བཞིན་གཤེགས་པ་མར་མེ་མཛད་ཀྱི་ཡང་ཆེས་སྔ་རོལ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ།

བདེ་བར་གཤེགས་པ།

འཇིག་རྟེན་མཁྱེན་པ།

བླ་ན་མེད་པ་སྐྱེས་བུ་འདུལ་བའི་ཁ་ལོ་སྒྱུར་བ།

ལྷ་དང་མི་རྣམས་ཀྱི་སྟོན་པ།

སངས་རྒྱས་བཅོམ་ལྡན་འདས་མཆོག་ཏུ་སྐྱེས་པ་ཞེས་བྱ་བ་འཇིག་རྟེན་དུ་བྱུང་ངོ་།

འཇིག་རྟེན་གྱི་ཁམས་དེ་ནི་འོད་ཟེར་ཅན་ཞེས་བྱ་སྟེ།

རྒྱལ་པོའི་གྲོང་ཁྱེར་རབ་ཏུ་བདེ་བ་ཞེས་བྱ་བའི་ཚལ་ན་བཞུགས་སོ།

དེའི་ཚེ་ཤན་པ་འཇིགས་སུ་རུང་བ་ཞེས་བྱ་བ་ཁྲོ་གཏུམ་ཆེ་ཞིང་གསོད་པ་ལ་དགའ་བ།

བཟོད་པ་དང་བྱམས་པའི་སེམས་མེད་པ།

ལག་པ་ཁྲག་གིས་བསྐུས་པ།

མཐོང་བ་ཐམས་ཅད་སྐྲག་པར་འགྱུར་བ་ཞིག་ཡོད་དེ།

དེའི་ཚེ་ཤན་པ་དེས་གླང་ཞིག་ཁང་པའི་ནང་དུ་བཅིངས་ཏེ་ནང་དུ་ཞུགས་ནས་གསོད་པར་བྱས་པ་ལས་གླང་དེས་དེ་མཐོང་ནས་ཤིན་ཏུ་སྐྲག་པས་ཐག་པ་བཅད་དེ་བྲོས་ནས་དེ་བཞིན་གཤེགས་པ་མཆོག་ཏུ་སྐྱེས་པ་བཞུགས་པའི་ཚལ་ག་ལ་བ་དེར་སོང་ངོ་།

དེའི་ཚེ་ཤན་པ་དེ་ཡང་མཚོན་ཐོགས་ནས་ཕྱི་བཞིན་དུ་བསྙགས་པས་གླང་དེ་སྐྲག་ནས་གཡང་ས་ཟབ་མོ་ཞིག་ཏུ་ལྷུང་བས་སྲོག་ཆད་ལ་ཐུག་པ་ཙམ་དུ་ན་ཞིང་སྡུག་བསྔལ་བས་སྒྲ་ཕྱུང་ངོ་།

དེའི་ཚེ་ཤན་པས་གླང་དེ་མཐོང་ནས་ཞེ་སྡང་ཆེར་སྐྱེས་ཏེ།

གཡང་ས་ཟབ་མོ་དེ་ཉིད་དུ་ཞུགས་ནས་མཚོན་ཐོགས་ཏེ་བསད་པར་བྱས་པ་ལས་མཚོན་མ་བཏབ་པའི་བར་སྐབས་སུ།

དེའི་ཚེ་དེ་བཞིན་གཤེགས་པ་མཆོག་ཏུ་སྐྱེས་པ་ཚལ་དེར་འཁོར་མང་པོ་བརྒྱ་སྟོང་ཚད་མེད་པས་ཡོངས་སུ་བསྐོར་བ་དག་ལ་རྟེན་ཅིང་འབྲེལ་པར་འབྱུང་བའི་ཆོས་ཀྱི་རྣམ་གྲངས་འདི་

ལྟ་སྟེ།

མ་རིག་པའི་རྐྱེན་གྱིས་འདུ་བྱེད།

འདུ་བྱེད་ཀྱི་རྐྱེན་གྱིས་རྣམ་པར་ཤེས་པ།

རྣམ་པར་ཤེས་པའི་རྐྱེན་གྱིས་མིང་དང་གཟུགས།

མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །

སྐྱེ་མཆེད་དྲུག་གི་རྐྱེན་གྱིས་རེག་པ།

རེག་པའི་རྐྱེན་གྱིས་ཚོར་བ།

ཚོར་བའི་རྐྱེན་གྱིས་སྲེད་པ།

སྲེད་པའི་རྐྱེན་གྱིས་ལེན་པ།

ལེན་པའི་རྐྱེན་གྱིས་སྲིད་པ།

སྲིད་པའི་རྐྱེན་གྱིས་སྐྱེ་བ།

སྐྱེ་བའི་རྐྱེན་གྱིས་རྒ་ཤི་དང་།

མྱ་ངན་དང་།

སྨྲེ་སྔགས་འདོན་པ་དང་།

སྡུག་བསྔལ་བ་དང་།

ཡིད་མི་བདེ་བ་དང་།

འཁྲུག་པ་རྣམས་འབྱུང་བར་འགྱུར་ཏེ།

དེ་ལྟར་ན་རྟེན་ཅིང་འབྲེལ་པར་འབྱུང་བ་འདི་དག་ཐམས་ཅད་ནི་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་གོ་ཞེས་རྒྱ་ཆེར་རྣམ་པར་ཕྱེ་སྟེ་སྟོན་པར་མཛད་པས།

གློག་ཐོབ་རྟེན་ཅིང་འབྲེལ་པར་འབྱུང་བ་འདི་ལ་མ་རིག་པ་ཡང་འདུ་བྱེད་ལ་མི་སེམས་མི་རྟོག་ལ།

འདུ་བྱེད་ཀྱང་མ་རིག་པ་ལ་མི་སེམས་མི་རྟོག་གོ །

དེ་བཞིན་དུ་སྐྱེ་བ་ཡང་རྒ་ཤི་ལ་མི་སེམས་མི་རྟོག་ལ།

རྒ་ཤི་ཡང་སྐྱེ་བ་ལ་མི་སེམས་མི་རྟོག་པས་དེ་ལྟར་ན་ཆོས་ཐམས་ཅད་ནི་རང་བཞིན་དམིགས་སུ་མེད་པས་མངོན་པར་འདུ་བྱ་བ་མེད་པ།

དྲན་པ་མེད་པ།

བདག་དང་བདག་གི་བ་མེད་པ།

རང་བཞིན་གྱིས་རྣམ་པར་དག་པ།

ཕན་ཚུན་གཅིག་གིས་གཅིག་མི་རིག་པ་ཡིན་ནོ།

སོ་སོའི་སྐྱེ་བོ་རྣམས་འདི་ལྟ་བུའི་ཆོས་མ་ཐོས་པའི་ཕྱིར་གཟུགས་ནི་བདག་ཡིན་ནོ།

བདག་ནི་གཟུགས་རྣམས་དང་ལྡན་ནོ།

གཟུགས་ནི་བདག་གི་ཡིན་ནོ་ཞེས་འཛིན་པར་བྱེད་དེ།

ཚོར་བ་དང་།

འདུ་ཤེས་དང་།

འདུ་བྱེད་དང་།

རྣམ་པར་ཤེས་པའི་བར་ལ་ཡང་དེ་བཞིན་ནོ།

བདག་དང་བདག་གིར་འཛིན་པ་ལ་མངོན་པར་ཞེན་པའི་དབང་གིས་མི་རྟག་པ་ལ་རྟག་པར་འཛིན་པར་བྱེད།

སྡུག་བསྔལ་བ་ལ་བདེ་བར་འཛིན་པར་བྱེད།

མི་སྡུག་པ་ལ་སྡུག་པ་ཉིད་དུ་འཛིན་པར་བྱེད།

བདག་མེད་པ་ལ་བདག་ཏུ་འཛིན་ཅིང་ཕྱིན་ཅི་ལོག་བཞི་སྐྱེད་པར་བྱེད་དོ།

ཕྱིན་ཅི་ལོག་ཏུ་ལྟ་བའི་ཕྱིར་མ་རིག་པས་རྨོངས་ནས་ཡང་དག་པར་ཚུལ་བཞིན་དུ་ཡིད་ལ་མི་བྱེད་ཅིང་སེམས་ཀྱི་རྗེས་སུ་མངོན་པར་ཞེན་པར་གྱུར་པས་སྲིད་པའི་སྲེད་པ་འཆིང་བ་གཅོད་པར་མི་ནུས་ཤིང་འཁོར་བའི་འཁོར་བར་རྒྱུན་མི་འཆད་པར་

འཁོར་བར་འགྱུར་བ་ཡིན་ནོ།

མཁས་པ་དག་ནི་ཆོས་ཀྱི་དབྱིངས་ཀྱི་མཚན་ཉིད་ལ་ཤིན་ཏུ་ལེགས་པར་རྟོག་པར་བྱེད་པའི་ཕྱིར་བདག་དང་།

གང་ཟག་དང་།

སེམས་ཅན་ཞེས་བྱ་བ་ནས་སྲོག་ཅེས་བྱ་བའི་བར་དུ་ཅུང་ཟད་ཙམ་ཡོད་པར་ཡང་དག་པར་རྗེས་སུ་མི་མཐོང་ལ།

སྐྱེ་བ་དང་།

རྒ་བ་དང་།

ན་བ་དང་།

འཆི་བ་དང་།

གསོད་པ་དང་།

གནོད་པ་བྱེད་པ་དག་ཀྱང་མི་དམིགས་སོ་ཞེས་གསུངས་པ་དང་།

གློག་ཐོབ་དེའི་ཚེ་ཤན་པ་འཇིགས་སུ་རུངས་པས་རྒྱང་ནས་དེ་བཞིན་གཤེགས་པས་ཆོས་བཤད་པའི་སྒྲ་ཐོས་ནས་གོ་བར་གྱུར་པས་དེ་མ་ཐག་ཏུ་གསོད་པའི་སེམས་ཉེ་བར་ཞི་བར་གྱུར་ནས་མཚོན་ཆ་སྤངས་ཏེ་གཡང་ས་ནས་བྱུང་ནས་བཅོམ་ལྡན་འདས་དེ་ག་ལ་བ་དེར་སོང་སྟེ།

བཅོམ་ལྡན་འདས་ཀྱི་ཞབས་གཉིས་ལ་མགོ་བོས་གཏུགས་ནས་ཕྱག་བྱས་ཏེ་ཕྱོགས་གཅིག་ཏུ་འདུག་ནས་བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་བདག་ནི་དེང་དེ་བཞིན་གཤེགས་པའི་བསྟན་པ་ལ་རབ་ཏུ་བྱུང་ནས་ལམ་བསྒྲུབ་པར་འཚལ་ལོ་ཞེས་གསོལ་པ་དང་།

བཅོམ་ལྡན་འདས་ཀྱིས་བཀའ་སྩལ་པ་དེ་རིགས་སོ།

དགེ་སློང་ལེགས་པར་འོངས་སམ་ཞེས་གསུངས་མ་ཐག་ཏུ་དགེ་སློང་གི་དངོས་པོར་གྱུར་ནས་རྫོགས་པར་བསྙེན་པར་གྱུར་ཏོ།

དེ་ནས་དེ་བཞིན་གཤེགས་པ་མཆོག་ཏུ་སྐྱེས་པས་དེའི་ལྷག་པའི་བསམ་པ་ཐུགས་ཀྱིས་མཁྱེན་ནས་མཐར་གྱིས་ཡོངས་སུ་སྨིན་པར་མཛད་ཅིང་།

བྱང་ཆུབ་སེམས་དཔའི་སྤྱོད་པ་རྣམས་རྒྱ་ཆེར་ཡང་དག་པར་བསྟན་པ་འཇིགས་སུ་རུང་བས་ཐོས་པས་མི་སྐྱེ་བའི་ཆོས་ལ་བཟོད་པ་ཐོབ་ནས་སངས་རྒྱས་ཀྱི་བསྟན་པ་ལ་ཕྱིར་མི་ལྡོག་པ་ཐོབ་པར་གྱུར་ཏོ།

གླང་དེ་ཡང་དེ་བཞིན་གཤེགས་པ་དེས་རྟེན་ཅིང་འབྲེལ་པར་འབྱུང་བའི་ཆོས་ཀྱི་ཚིག་སྟོན་པའི་གསུང་སྒྲ་ཤིན་ཏུ་གྱ་ནོམ་པ་ཐོས་ནས་སེམས་ལ་རབ་ཏུ་དགའ་བ་སྐྱེས་པས་ཤི་འཕོས་པའི་འོག་ཏུ་དགའ་ལྡན་གྱི་ལྷའི་གནས་སུ་སྐྱེས་ནས་ཐ་མར་བྱམས་པ་དང་ཕྲད་དེ་ཡང་དག་པའི་དད་པ་དང་ལྡན་པར་གྱུར་ཏོ།

གློག་ཐོབ་དེ་ལྟར་ན་སེམས་ཅན་རྣམས་ཀྱི་སྤྱོད་པ་ནི་ཤིན་ཏུ་ཟབ་པ་དང་།

རྣམ་པར་རིག་པར་དཀའ་ཞིང་ཤེས་པར་དཀའ་བ་ཡིན་ཏེ།

དེའི་ཕྱིར་གློག་ཐོབ་བྱང་ཆུབ་སེམས་དཔའ་གང་གིས་བླ་ན་

མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་གཉེར་བར་འདོད་པས་སེམས་ཅན་གྱི་དབང་པོ་དང་།

སྤྱོད་པ་དག་ལ་ཤིན་ཏུ་མཁས་པར་བྱས་ནས་སེམས་ཅན་ཐམས་ཅད་ལ་མཉམ་པའི་སེམས་དང་།

ཐོགས་པ་མེད་པའི་སེམས་ལ་རབ་ཏུ་གནས་ཏེ་ཆོས་ཐམས་ཅད་ལ་རྟག་ཏུ་མངོན་པར་ཞེན་པ་མེད་པར་བྱའོ།

ཅི་བདོག་པ་རྣམས་ཡོངས་སུ་སྤངས་ཏེ་ཚུལ་ཁྲིམས་རྣམ་པར་དག་པ་བསྒྲུབ་པར་བྱའོ།

བཟོད་པ་ལ་གནས་པར་བྱའོ།

བརྩོན་འགྲུས་བསྐྱེད་པར་བྱའོ།

བསམ་གཏན་དང་།

ཏིང་ངེ་འཛིན་ལ་མཉམ་པར་གཞག་པར་བྱའོ།

ཡང་དག་པ་ཇི་ལྟ་བ་བཞིན་དུ་ཆོས་ཐམས་ཅད་ཀྱི་ངོ་བོ་ཉིད་ལ་སོ་སོར་བརྟག་པར་བྱའོ།

གློག་ཐོབ་བྱང་ཆུབ་སེམས་དཔའ་གང་ཆོས་དྲུག་པོ་འདི་དག་ཡོངས་སུ་རྫོགས་པར་གྱུར་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ།

ཇི་ལྟར་ཡོངས་སུ་རྫོགས་པར་བྱེད་ཅེ་ན།

འདི་ལྟ་སྟེ།

ཐམས་ཅད་མཁྱེན་པའི་ཡེ་ཤེས་ལ་བརྟེན་ནས་མངོན་པར་སྒྲུབ་པར་བྱེད་པའི་ཕྱིར་རོ།

གློག་ཐོབ་བྱང་ཆུབ་སེམས་དཔའ་རྣམས་ཀྱི་ཆོས་ཀྱི་གཏེར་གང་ཞེ་ན།

འདི་ལྟ་སྟེ།

བྱང་ཆུབ་སེམས་དཔས་གཟུགས་ཐམས་ཅད་ཡང་དག་པ་ཇི་ལྟ་བ་བཞིན་དུ་རབ་ཏུ་རྟོགས་ཤིང་།

གཟོད་མ་ཉིད་ནས་སྐྱེ་བ་མེད་པ་དང་།

རང་བཞིན་གྱིས་རྣམ་པར་དག་པར་མཐོང་བ་གང་ཡིན་པའོ།

བྱང་ཆུབ་སེམས་དཔའ་ནི་གཟུགས་ལ་མཁས་པ་ཐོབ་པའི་ཕྱིར་སོ་སོ་ཡང་དག་པར་རིག་པ་བཞི་དང་ལྡན་པར་འགྱུར་རོ།

བཞི་གང་ཞེ་ན།

འདི་ལྟ་སྟེ།

དོན་སོ་སོ་ཡང་དག་པར་རིག་པ་དང་།

ཆོས་སོ་སོ་ཡང་དག་པར་རིག་པ་དང་།

ངེས་པའི་ཚིག་སོ་སོ་ཡང་དག་པར་རིག་པ་དང་།

སྤོབས་པ་སོ་སོ་ཡང་དག་པར་རིག་པའོ།

དེ་ལ་དོན་སོ་སོ་ཡང་དག་པར་རིག་པ་ནི་གཟུགས་ཀྱི་དོན་རྣམས་ལ་ཐོགས་པ་མེད་པར་གྱུར་པའི་ཕྱིར་རོ།

གཟུགས་ཀྱི་དོན་གང་ཞེ་ན།

འདི་ལྟ་སྟེ།

དོན་དམ་པ་གང་ཡིན་པའོ།

དོན་དམ་པ་གང་ཞེ་ན།

འདི་ལྟ་སྟེ།

གཟུགས་དམིགས་སུ་མེད་པ་གང་ཡིན་པ་སྟེ།

དོན་དམ་པའི་ཡེ་ཤེས་འདི་ལྟ་བུ་དང་ལྡན་པ་གང་ཡིན་པ་དེ་ནི་དོན་སོ་སོ་ཡང་དག་པར་རིག་པ་ཞེས་བྱའོ།

ཆོས་སོ་སོ་ཡང་དག་པར་

རིག་པ་ནི་གཟུགས་ཀྱི་ཆོས་རྣམས་ཡང་དག་པ་ཇི་ལྟ་བ་བཞིན་དུ་སོ་སོར་བརྟགས་ནས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་གང་ཡིན་པ་དེ་ནི་ཆོས་སོ་སོ་ཡང་དག་པར་རིག་པ་ཞེས་བྱའོ།

ངེས་པའི་ཚིག་སོ་སོ་ཡང་དག་པར་རིག་པ་ནི་འདི་ལྟ་སྟེ།

གཟུགས་རྣམས་ལ་ཐོགས་པ་མེད་པའི་ཡེ་ཤེས་ཀྱི་ཐབས་ལ་མཁས་པས་ངེས་པའི་ཚིག་རྣམ་པ་སྣ་ཚོགས་ཀྱིས་རྣམ་པར་འབྱེད་པ་གང་ཡིན་པ་དེ་ནི་ངེས་པའི་ཚིག་སོ་སོ་ཡང་དག་པར་རིག་པ་ཞེས་བྱའོ།

སྤོབས་པ་སོ་སོ་ཡང་དག་པར་རིག་པ་ནི་འདི་ལྟ་སྟེ།

གཟུགས་ཀྱི་ཆོས་རྣམས་སེམས་ཅན་གྱི་དབང་པོ་ཇི་ལྟ་བ་བཞིན་དུ་རྣམ་པར་ཕྱེ་སྟེ་སྟོན་པར་བྱེད་ཀྱང་ཀུན་ནས་ཉོན་མོངས་པ་མེད་ཅིང་མངོན་པར་ཞེན་པ་མེད་པ་གང་ཡིན་པ་དེ་ནི་སྤོབས་པ་སོ་སོ་ཡང་དག་པར་རིག་པ་ཞེས་བྱའོ།

བྱང་ཆུབ་སེམས་དཔའ་ནི་འདི་ལྟ་བུའི་ཡེ་ཤེས་དང་ལྡན་པས་གཟུགས་ཀྱི་ཆོས་ལ་རྨོངས་ཤིང་མངོན་པར་ཞེན་པར་གྱུར་པའི་སེམས་ཅན་ཐམས་ཅད་ཀྱི་རང་བཞིན་དང་།

འདུན་པ་ཇི་ལྟ་བ་བཞིན་དུ་རྩོལ་བ་མེད་པའི་ཡེ་ཤེས་ཀྱིས་ཅི་རིགས་པར་ཆོས་སྟོན་པར་བྱེད་ཀྱང་ཆོས་ཀྱི་དབྱིངས་ལ་མཚན་ཉིད་གཉིས་སུ་གྱུར་པ་མེད་དེ།

སྒྲ་དང་།

དྲི་དང་།

རོ་དང་།

རེག་བྱ་དང་།

ཆོས་ཀྱི་བར་ལ་ཡང་དེ་བཞིན་དུ་རྒྱས་པར་སྦྱར་ཏེ།

གློག་ཐོབ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཀྱི་གཏེར་ཞེས་བྱའོ།

བྱང་ཆུབ་སེམས་དཔའ་གང་གིས་གཏེར་འདི་ཐོབ་པར་གྱུར་ན་སྤྱོད་ཡུལ་རྣམས་ལ་རྨོངས་པར་གྱུར་པའི་སེམས་ཅན་དེ་ལྟ་བུ་དག་ཡོངས་སུ་གདུལ་བར་འདོད་པའི་ཕྱིར་དེ་དག་གི་མོས་པ་ཇི་ལྟ་བ་བཞིན་དུ་དེ་དག་རེ་རེ་ལ་ཡང་བསྐལ་པ་འམ།

བསྐལ་པ་ལས་ལྷག་པར་ཚིག་རྣམ་པ་སྣ་ཚོགས་ཀྱི་ཐབས་ལ་མཁས་པས་ཆོས་སྟོན་པར་བྱེད་ཀྱང་དེ་དག་གི་མཐའ་ཡང་རྙེད་པར་མི་འགྱུར་ལ།

བྱང་ཆུབ་སེམས་དཔའ་དེའི་ཤེས་རབ་ལ་ཡང་འགྲིབ་པ་མེད་ཅིང་ཆོས་ཀྱི་དབྱིངས་དང་མི་འགལ་བར་གཉིས་སུ་མེད་ཅིང་དབྱེར་མེད་པའི་རྗེས་སུ་འབྲང་བ་གང་ཡིན་པ་འདི་ནི་བྱང་ཆུབ་སེམས་དཔའ་ཐབས་ལ་མཁས་པས་ཆོས་ཐམས་ཅད་དབྱེར་མེད་པའི་མཚན་ཉིད་བསྟན་པས་འཐོབ་པའི་ཆོས་ཀྱི་གཏེར་ཞེས་བྱའོ།

ཆོས་ཀྱི་གཏེར་འདིས་སེམས་ཅན་

དག་ལ་ཅི་རིགས་པར་ཆོས་བསྟན་ནས་ཟད་མི་ཤེས་པའི་ཆོས་ཀྱི་གཏེར་ཕུན་སུམ་ཚོགས་པར་གྱུར་ཏེ།

འཁོར་བའི་རྒུད་པ་གཏན་དུ་སྤོང་བ་གང་ཡིན་པ་འདི་ནི་གློག་ཐོབ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་གཏེར་ཆེན་པོ་དང་།

ཟད་མི་ཤེས་པའི་གཏེར་དང་།

ཀུན་ཏུ་ཟད་མི་ཤེས་པའི་གཏེར་དང་།

མཐའ་མེད་པའི་གཏེར་རྣམ་པ་ལྔ་ཞེས་བྱའོ།

བྱང་ཆུབ་སེམས་དཔའ་གང་གཏེར་འདི་ལྟ་བུ་དང་ལྡན་པར་གྱུར་ན་ཡོན་ཏན་ཁྱད་པར་དུ་འཕགས་པ་རྣམས་ཡོངས་སུ་རྫོགས་པར་འགྱུར་བའི་ཕྱིར་ཚེགས་ཆུང་ངུས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ།

ཆོས་ཀྱི་གཏེར་བསྟན་པའི་ཆོས་ཀྱི་རྣམ་གྲངས་འདི་བསྟན་པའི་ཚེ་བྱང་ཆུབ་སེམས་དཔའ་གློག་ཐོབ་ནི་གཟུངས་རབ་ཏུ་ཐོབ་པར་གྱུར་ཏོ།

བྱང་ཆུབ་སེམས་དཔའ་ལྔ་བརྒྱ་ནི་གློག་གི་འོད་ཟེར་ཞེས་བྱ་བའི་ཏིང་ངེ་འཛིན་ཐོབ་པར་གྱུར་ཏོ།

ལྷའི་བུ་སུམ་ཁྲི་དྲུག་སྟོང་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ།

དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ཟླ་བའི་རྒྱལ་མཚན་གྱིས་འདི་སྐད་ཅེས་གསོལ་ཏོ།

བཅོམ་ལྡན་འདས་ཀྱིས་འདི་སྐད་དུ་རྩོལ་བ་མ་མཆིས་པའི་ཡེ་ཤེས་ཞེས་གང་གསུངས་པ་དེའི་དོན་ཇི་ལྟ་བུ་ལགས།

བཅོམ་ལྡན་འདས་ཀྱིས་བཀའ་སྩལ་པ།

བྱང་ཆུབ་སེམས་དཔའ་གང་གིས་དགེ་བའི་ཆོས་རྣམས་ལ་ལུས་དང་སེམས་ཀྱི་རྗེས་སུ་འཐུན་པས་དམིགས་ཤིང་མངོན་པར་འདུ་བྱེད་པ་གང་ཡིན་པ་དེ་ནི་རྩོལ་བ་དང་བཅས་པ་ཞེས་བྱའོ།

བྱང་ཆུབ་སེམས་དཔའ་གང་ལུས་དང་སེམས་རབ་ཏུ་དུལ་བར་གྱུར་ནས།

དྲན་པ་མེད་པ།

གནས་པ་མེད་པ།

རྣལ་འབྱོར་བསྒོམ་པའི་མཚན་མ་དང་བྲལ་བར་གྱུར་པ་དང་།

དེ་སྔོན་གྱི་སྨོན་ལམ་དང་།

ཡེ་ཤེས་ཡོངས་སུ་རྫོགས་པར་གྱུར་པས་སངས་རྒྱས་ཀྱི་ཞིང་བྱེ་བ་སྟོང་ཕྲག་མང་པོ་རྣམས་སུ་རྣམ་པ་སྣ་ཚོགས་སུ་སྟོན་པར་བྱེད་ཀྱང་ཆོས་ཀྱི་དབྱིངས་ལས་གཡོ་བ་མེད་པ་དང་།

རྟག་ཏུ་ཆོས་སྟོན་པར་བྱེད་ཀྱང་ཆོས་ཀྱི་མཚན་མ་ཅུང་ཟད་ཙམ་ཡང་མེད་པ་དང་།

བསྡུ་བའི་དངོས་པོ་བཞིས་སེམས་ཅན་ཡོངས་སུ་སྨིན་པར་བྱས་ཀྱང་སེམས་ཅན་གང་ཡང་ཡོངས་སུ་བཟླས་པ་མེད་པ་

དང་།

སངས་རྒྱས་ཀྱི་ཞིང་ཐམས་ཅད་ཡོངས་སུ་སྦྱངས་ཀྱང་སངས་རྒྱས་ཀྱི་ཞིང་ཡོངས་སུ་དག་པ་ཡང་དག་པར་རྗེས་སུ་མི་མཐོང་བ་དང་།

རྟག་པར་སངས་རྒྱས་རྣམས་རྗེས་སུ་དྲན་པར་བྱེད་ཀྱང་གཟུགས་ཀྱི་མཚན་ཉིད་དུ་མི་ལྟ་བ་དང་།

སངས་རྒྱས་ཀྱི་ཞིང་ཀུན་ཏུ་རྒྱུ་བར་བྱེད་ཀྱང་ཆོས་ཀྱི་དབྱིངས་དང་མི་འབྲལ་བ་གང་ཡིན་པ་འདི་ནི་བྱང་ཆུབ་སེམས་དཔའི་རྩོལ་བ་མེད་པའི་ཡེ་ཤེས་ཤེས་བྱའོ།

བྱང་ཆུབ་སེམས་དཔའ་རྣམས་ནི་འདི་ལྟ་བུའི་ཡེ་ཤེས་དང་ལྡན་པའི་ཕྱིར་སེམས་ཅན་ཐམས་ཅད་ཀྱི་རེ་བ་ཡོངས་སུ་རྫོགས་པར་བྱས་ཀྱང་གང་བྱས་པ་དེ་དག་ལ་མངོན་པར་ཞེན་པ་ཡང་མེད་དོ།

དེའི་ཚེ་བཅོམ་ལྡན་འདས་ཀྱིས་རྩོལ་བ་མེད་པའི་ཡེ་ཤེས་འདི་བསྟན་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་པར་གྱུར་ཏོ།

བརྒྱ་བྱིན་ལྷའི་དབང་པོ་ཡང་སུམ་ཅུ་རྩ་གསུམ་གྱི་ལྷ་རྣམས་དང་བཅས་པར་སྟེང་གི་བར་སྣང་ལས་མེ་ཏོག་མན་དཱ་ར་བ་དང་།

ཨུད་པ་ལ་དང་།

ཀུ་མུ་ད་དང་།

པད་མ་དང་།

པུན་ད་རི་ཀ་དང་།

ཙན་དན་གྱི་ཕྱེ་མའི་ཆར་མངོན་པར་ཕབ་སྟེ།

བཅོམ་ལྡན་འདས་ལ་མངོན་པར་གཏོར་ཏོ།

ལྷའི་རྔ་རྣམས་ཀྱང་རང་སྒྲ་བྱུང་བར་གྱུར་ཏོ།

ངོ་མཚར་རྨད་དུ་བྱུང་བའི་སྣང་བ་ཆེན་པོས་ཀྱང་ཀུན་ཏུ་སྣང་བར་བྱས་ཏེ།

སེམས་ཅན་གང་ལ་རེག་པར་གྱུར་པ་དེའི་ལུས་ཀྱང་ཤིན་ཏུ་བསིལ་བར་གྱུར་ཏོ།

དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་གློག་ཐོབ་ལ་བཀའ་སྩལ་པ།

གློག་ཐོབ་འདས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཀྱང་གནས་འདིར་ཆོས་ཀྱི་རྣམ་གྲངས་འདི་ལྟ་བུ་གསུངས་སོ།

མ་བྱོན་པའི་དེ་བཞིན་གཤེགས་པ་རྣམས་འཇིག་རྟེན་དུ་འབྱུང་བའི་ཚེ་ཡང་གནས་འདིར་ཆོས་ཀྱི་རྣམ་གྲངས་འདི་ལྟ་བུ་གསུང་བར་འགྱུར་རོ།

འཇིག་རྟེན་གྱི་ཁམས་ཚད་མེད་གྲངས་མེད་པ་དག་ན་ད་ལྟར་བཞུགས་པའི་དེ་བཞིན་གཤེགས་པ་རྣམས་ཀྱང་ཆོས་ཀྱི་རྣམ་གྲངས་འདི་རྒྱུན་མི་འཆད་པར་མཛད་པའི་ཕྱིར་འོད་ཟེར་ཆེན་པོ་འགྱེད་པར་མཛད་དོ།

དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ།

བཅོམ་

ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས།

བདག་གིས་ཇི་ལྟར་ཡོངས་སུ་གཟུང་བར་བགྱི།

བཅོམ་ལྡན་འདས་ཀྱིས་བཀའ་སྩལ་པ།

ཀུན་དགའ་བོ་ཆོས་ཀྱི་རྣམ་གྲངས་འདི་ནི་མི་ཟད་པའི་གཏེར་བསྟན་པ་ཞེས་བྱའོ།

ཆོས་ཐམས་ཅད་དབྱེར་མེད་པའི་མཚན་ཉིད་བསྟན་པ་ཞེས་ཀྱང་བྱ་སྟེ།

ཁྱོད་ཀྱིས་དེ་ལྟར་མིང་ཡོངས་སུ་གཟུང་བར་བྱའོ།

བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས།

བྱང་ཆུབ་སེམས་དཔའ་གློག་ཐོབ་དང་།

ཚེ་དང་ལྡན་པ་ཀུན་དགའ་བོ་དང་།

འཁོར་བཞི་པོ་རྣམས་དང་།

ལྷ་དང་།

མི་དང་།

ལྷ་མ་ཡིན་དང་།

དྲི་ཟར་བཅས་པའི་འཇིག་རྟེན་ཐམས་ཅད་བཅོམ་ལྡན་འདས་ཀྱིས་གསུངས་པ་ལ་ཡི་རངས་ཏེ་མངོན་པར་བསྟོད་དོ།།

འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་མི་ཟད་པའི་གཏེར་བསྟན་པའི་ལེའུ་ཞེས་བྱ་བ་སྟེ་འདུས་པ་ཉི་ཤུ་པ་རྫོགས་སོ།།

འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་ཉི་ཤུ་རྩ་གཅིག་པ་སྟེ་སྒྱུ་མ་མཁན་བཟང་པོ་ལུང་བསྟན་པ།

བམ་པོ་གཅིག་པ།

རྒྱ་གར་སྐད་དུ།

ཨཱརྱ་བྷ་དྲ་མཱ་ཡཱ་ཀ་ར་བྱཱ་ཀ་ར་ཎ་ནཱ་མ་མ་ཧཱ་ཡཱ་ན་སཱུ་ཏྲ།

བོད་སྐད་དུ།

འཕགས་པ་སྒྱུ་མ་མཁན་བཟང་པོ་ལུང་བསྟན་པ་ཞེས་བྱ་བ་ཐེག་པ་ཆེན་པོའི་མདོ།

སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ།

འདི་སྐད་བདག་གིས་ཐོས་པ་དུས་གཅིག་ན།

བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ།

དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་མངོན་པར་གྲགས་པ།

མངོན་པར་གྲགས་པ་མངོན་པར་ཤེས་པ་ཐོབ་པ།

གཟུངས་ཐོབ་པ།

རྫུ་འཕྲུལ་གྱི་ཆོ་འཕྲུལ་ཐོབ་པ།

མི་སྐྱེ་བའི་ཆོས་ལ་བཟོད་པ་ཐོབ་པ་ལྔ་སྟོང་ལ་འདི་ལྟ་སྟེ།

བྱང་ཆུབ་སེམས་དཔའ་སེམས་དཔའ་ཆེན་པོ་སེང་གེ་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་སེང་གེ་བློ་གྲོས་དང་།

བྱང་ཆུབ་

སེམས་དཔའ་སེམས་དཔའ་ཆེན་པོ་ཙན་དན་བཟང་པོ་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་ཁ་ལོ་སྒྱུར་བ་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་ཁ་ལོ་སྒྱུར་བ་ཆེན་པོ་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་འོད་དཔལ་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་འོད་བྱེད་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་འོད་གཟི་བརྗིད་དང་ལྡན་ཞིང་ང་རོ་སྙན་པ་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་འོད་བཀོད་པ་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་བློ་གསལ་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་གྱི་སྙིང་པོ་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཁ་ལོ་སྒྱུར་བ་དུལ་བ་དང་ལྡན་པ་དང་།

བྱམས་པ་ལ་སོགས་པ་བསྐལ་པ་བཟང་པོའི་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་དང་།

འཇམ་དཔལ་གཞོན་ནུར་གྱུར་པ་དང་།

དེ་དག་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ལྔ་སྟོང་དང་ཐབས་ཅིག་ཏུ་བཞུགས་ཏེ།

ལྷ་རྣམས་ཀྱི་དབང་པོ་བརྒྱ་བྱིན་དང་ཡང་ཐབས་ཅིག་གོ །

མི་མཇེད་ཀྱི་བདག་པོ་ཚངས་པ་དང་ཡང་ཐབས་ཅིག་གོ །

རྒྱལ་པོ་ཆེན་པོ་བཞི་དང་ཡང་ཐབས་ཅིག་གོ །

ལྷ་དང་།

ཀླུ་དང་།

གནོད་སྦྱིན་དང་།

ལྷ་མ་ཡིན་དང་།

ནམ་མཁའ་ལྡིང་དང་།

དྲི་ཟ་དང་།

མིའམ་ཅི་དང་།

ལྟོ་འཕྱེ་ཆེན་པོ་དུ་མས་ཀྱང་ཡོངས་སུ་བསྐོར་ཏོ།

དེ་ནས་བཅོམ་ལྡན་འདས་ནི་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ལ་རྟེན་ཅིང་བཞུགས་ཏེ།

རྒྱལ་པོ་དང་།

བློན་པོ་ཆེན་པོ་རྣམས་དང་།

བྲམ་ཟེ་དང་།

ཁྱིམ་བདག་དང་།

གྲོང་རྡལ་དང་།

ལྗོངས་ཀྱི་མི་རྣམས་ཀྱིས་ནི་གུས་པར་བྱས།

བླ་མར་བྱས།

བསྙེན་བཀུར་བྱས།

མཆོད་པ་བྱས་སོ།

བཅོམ་ལྡན་འདས་ཀྱིས་ཆོས་གོས་དང་།

ཞལ་ཟས་དང་།

གཟིམས་ཆ་དང་།

གདན་དང་།

སྙུན་གསོས་དང་།

སྨན་ཟོང་ནི་བརྙེས།

བཅོམ་ལྡན་འདས་ཀྱི་གྲགས་པ་དང་།

སྙན་པ་དང་།

ཚིགས་སུ་བཅད་པ་རྒྱ་ཆེན་པོ་ནི་མངོན་པར་འཕགས་ཏེ།

འདི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ།

བདེ་བར་གཤེགས་པ།

འཇིག་

རྟེན་མཁྱེན་པ།

སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ།

ལྷ་དང་མི་རྣམས་ཀྱི་སྟོན་པ།

སངས་རྒྱས་བཅོམ་ལྡན་འདས་དེ་ནི་ཐམས་ཅད་མཁྱེན་པ།

ཐམས་ཅད་གཟིགས་པ་དང་ལྡན་པ་སྟེ།

ཐམས་ཅད་ནི་མཁྱེན།

ཐམས་ཅད་ནི་གཟིགས།

དེ་བཞིན་གཤེགས་པའི་སྟོབས་བཅུ་དང་ནི་ལྡན།

དེ་བཞིན་གཤེགས་པའི་མི་འཇིགས་པ་བཞི་དང་ནི་ལྡན།

སོ་སོ་ཡང་དག་པར་རིག་པ་བཞི་དང་ནི་ལྡན།

སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་དང་ནི་ལྡན།

བྱམས་པ་ཆེན་པོ་དང་།

སྙིང་རྗེ་ཆེན་པོ་དང་ནི་ལྡན།

སངས་རྒྱས་ཀྱི་སྤྱན་ཉམས་པ་མི་མངའ་བ་དང་ནི་ལྡན།

སྤྱན་ལྔ་དང་ནི་ལྡན།

ཆོ་འཕྲུལ་ཡང་བརྙེས་ཏེ།

ཀུན་རྗོད་པའི་ཆོ་འཕྲུལ་ནི་བརྙེས།

རྗེས་སུ་བསྟན་པའི་ཆོ་འཕྲུལ་ནི་བརྙེས།

རྫུ་འཕྲུལ་གྱི་ཆོ་འཕྲུལ་ནི་བརྙེས་སོ།

བཞེད་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གྲོང་ཁྱེར་དང་བཅས་པ།

གྲོང་རྡལ་དང་བཅས་པ།

ས་དང་བཅས་པ།

འགྲོ་བ་དང་བཅས་པ།

རི་རབ་དང་བཅས་པ།

རྒྱ་མཚོའི་མཐས་གཏུགས་པ།

ལྷའི་གནས་དང་བཅས་པ།

ཁོར་ཡུག་དང་འོབས་སུ་བཅས་པ།

རྩྭ་དང་།

ཤིང་དང་རིར་བཅས་པ་འདི་ནམ་མཁའ་ལ་བསྐལ་པ་འམ།

བསྐལ་པ་བས་ཀྱང་ལྷག་པར་སྐྲའི་རྩེ་མོའི་ཆ་ཤས་ཀྱིས་འཛིན་པར་མཛད་དོ།

ཡང་དེའི་ཚེ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ན་སྒྱུ་མ་མཁན་བཟང་པོ་ཞེས་བྱ་བ་བསྟན་བཅོས་ལ་ཤིན་ཏུ་མཁས་པ།

གསང་སྔགས་ལ་ཤིན་ཏུ་མཁས་པ།

བཟོ་དང་རིག་པ་ལ་འབྱམ་པ།

ལས་ཀྱི་མཐའ་བྱས་ཟིན་པ།

རབ་ཏུ་བྱེད་པ་བྱས་པ།

སྒྲ་གྲགས་པ།

ཡུལ་མ་ག་དྷ་ན་སྒྱུ་མ་མཁན་ནམ།

སྒྱུ་མ་མཁན་གྱི་སློབ་མ་ཇི་སྙེད་པ་དེ་དག་གི་མཆོག་ཏུ་གྲགས་པ།

ཕུལ་དུ་གྲགས་པ་ཞིག་གནས་ཏེ།

དེས་ཡུལ་མ་ག་དྷ་རིལ་གྱི་སྐྱེ་བོའི་ཚོགས་ཐམས་ཅད་འདུན་པར་བྱས།

རྨོངས་པར་བྱས།

མགོ་འཁོར་བར་བྱས་ནས་ཡ་མཚན་གྱི་ཆོས་ལ་བཀོད་དེ།

བདེན་པ་མཐོང་བ་རྣམས་དང་།

དད་པ་དང་།

ཆོས་ཀྱི་རྗེས་སུ་འབྲང་བ་རྣམས་དང་།

དགེ་བསྙེན་དང་།

དགེ་བསྙེན་མ་རྣམས་ནི་མ་གཏོགས་སོ།

དེས་སྒྱུ་མས་རྨོངས་པར་བྱེད་པའི་རིག་པའི་སྟོབས་བསྐྱེད་པས་རྙེད་པ་དང་།

བཀུར་སྟི་དང་།

ཚིགས་སུ་བཅད་པ་ཡང་ལྷག་

པར་རྙེད་དོ།

སྒྱུ་མ་མཁན་བཟང་པོས་བཅོམ་ལྡན་འདས་ཀྱི་གྲགས་པ་དང་།

སྙན་པ་དང་།

ཚིགས་སུ་བཅད་པ་ལྷག་པར་མངོན་པར་འཕགས་ཏེ།

འདི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ།

བདེ་བར་གཤེགས་པ།

འཇིག་རྟེན་མཁྱེན་པ།

སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ།

ལྷ་དང་མི་རྣམས་ཀྱི་སྟོན་པ།

སངས་རྒྱས་བཅོམ་ལྡན་འདས་དེ་ནི་ཐམས་ཅད་མཁྱེན་པ།

ཐམས་ཅད་གཟིགས་པ་སྟེ།

ཐམས་ཅད་ནི་མཁྱེན།

ཐམས་ཅད་ནི་གཟིགས།

དེ་བཞིན་གཤེགས་པའི་སྟོབས་བཅུ་དང་ནི་ལྡན།

དེ་བཞིན་གཤེགས་པའི་མི་འཇིགས་པ་བཞི་དང་ནི་ལྡན།

སོ་སོ་ཡང་དག་པར་རིག་པ་བཞི་དང་ནི་ལྡན།

སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་དང་ནི་ལྡན།

བྱམས་པ་ཆེན་པོ་དང་།

སྙིང་རྗེ་ཆེན་པོ་དང་ནི་ལྡན།

སངས་རྒྱས་ཀྱི་སྤྱན་ཉམས་པ་མི་མངའ་བ་དང་ནི་ལྡན།

སྤྱན་ལྔ་དང་ནི་ལྡན།

ཆོ་འཕྲུལ་ཡང་བརྙེས་ཏེ།

ཀུན་རྗོད་པའི་ཆོ་འཕྲུལ་ནི་བརྙེས།

རྗེས་སུ་བསྟན་པའི་ཆོ་འཕྲུལ་ནི་བརྙེས།

རྫུ་འཕྲུལ་གྱི་ཆོ་འཕྲུལ་ནི་བརྙེས་སོ།

བཞེད་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གྲོང་ཁྱེར་དང་བཅས་པ།

གྲོང་རྡལ་དང་བཅས་པ།

ས་དང་བཅས་པ།

འགྲོ་བ་དང་བཅས་པ།

རི་རབ་དང་བཅས་པ།

རྒྱ་མཚོའི་མཐས་གཏུགས་པ།

ལྷའི་གནས་དང་བཅས་པ།

ཁོར་ཡུག་དང་འོབས་སུ་བཅས་པ།

རྩྭ་དང་ཤིང་དང་རིར་བཅས་པ་འདི་ནམ་མཁའ་ལ་བསྐལ་པའམ།

བསྐལ་པ་བས་ལྷག་པར་སྐྲའི་རྩེ་མོའི་ཆ་ཤས་ཙམ་ལ་འཛིན་པར་མཛད་དོ་ཞེས་ཐོས་སོ།

ཐོས་ནས་ཀྱང་ཡང་དེ་འདི་སྙམ་དུ་སེམས་ཏེ།

ཡུལ་མ་ག་དྷ་རིལ་གྱི་སྐྱེ་བོ་ཐམས་ཅད་བདག་གིས་འདུན་པར་བྱས།

རྨོངས་པར་བྱས།

མགོ་འཁོར་བར་བྱས་ནས་ཡ་མཚན་གྱི་ཆོས་ལ་བཀོད་དེ།

བྲམ་ཟེ་དང་།

ཁྱིམ་བདག་ཆེན་པོ་གང་དག་ཡིན་པ་དེ་དག་ཀྱང་བདག་གི་མིང་གིས་རབ་ཏུ་མགུ་བར་གྱུར་ན།

དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་གཅིག་པུ་ད་དུང་མ་བགམས།

རྨོངས་པར་མ་བྱས།

མགོ་འཁོར་བར་མ་བྱས་ཀྱིས་མ་ལ་བདག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ག་ལ་བ་

དེར་འགྲོ་བར་བྱའོ།

སོང་ནས་ཀྱང་བགམ་པར་བྱ་སྟེ།

གལ་ཏེ་རྨོངས་པའམ།

མགོ་འཁོར་བ་བྱ་ནུས་པ་ལྟ་ན།

དེ་ལྟ་ན་ཡུལ་མ་ག་དྷ་ཐམས་ཅད་བདག་ལ་གཅིག་ཏུ་འདུ་ལ།

བདག་གི་རྙེད་པ་དང་།

བཀུར་སྟི་ཡང་ཆེས་སྟོབས་དང་ལྡན་པར་འགྱུར་རོ་སྙམ་མོ།

དེ་ནས་ཡང་སྒྱུ་མ་མཁན་བཟང་པོ་སྔོན་གྱི་དགེ་བའི་རྩ་བས་བསྐུལ་བ་དང་།

སངས་རྒྱས་ཀྱི་མཐུས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་བྱུང་སྟེ།

བྱ་རྒོད་ཀྱི་ཕུང་པོའི་རི་ག་ལ་བ་དང་།

བཅོམ་ལྡན་འདས་ག་ལ་བ་དེར་སོང་ངོ་།

སོང་ནས་ཀྱང་སྒྱུ་མ་མཁན་བཟང་པོས་དེ་བཞིན་གཤེགས་པ་ཉི་མ་བྱེ་བ་ཕྲག་འབུམ་པས་ལྷག་པའི་འོད་ཟེར་འབར་བ།

ཞལ་ཟླ་བ་བྱེ་བ་ཕྲག་འབུམ་པས་ལྷག་པར་དྲི་མ་མེད་པ།

སྐུ་ཤིང་ནྱ་གྲོ་དྷའི་རྒྱལ་པོ་ལྟར་ཆུ་ཞེང་གབ་པ།

མཛོད་སྤུ་ནོར་བུ་དྲི་མ་མེད་པའི་འོད་དག་པ་ལྟར་གསལ་བ།

སྤྱན་པད་མ་དང་།

ཨུད་པ་ལ་སྔོན་པོ་ཁ་ཕྱེ་བ་ལྟ་བུའི་བཀྲག་ཡོད་པ།

སྤྱི་གཙུག་ཚངས་པས་ཀྱང་བལྟར་མི་མཐོང་བ།

འཁོར་གྱི་ནང་ན་གསུང་དབྱངས་ཡན་ལག་དྲུག་ཅུ་དང་ལྡན་པས་ཆོས་སྟོན་པ་མཐོང་ངོ་།

མཐོང་ནས་ཀྱང་དེའི་སྐུ་དེ་ལྟ་བུ་མཐོང་།

གསུང་གི་ཕྲིན་ལས་དེ་ལྟ་བུ་ཐོས་ནས་སེམས་དང་བར་གྱུར་ཅིང་དེ་འདི་སྙམ་དུ་སེམས་ཏེ།

མ་ལ་བདག་གིས་འདི་ཅི་ཐམས་ཅད་མཁྱེན་ལ་ཐམས་ཅད་གཟིགས་པ་དང་ལྡན་པ་ཞིག་ཡིན་ནམ།

འོན་ཏེ་མ་ཡིན་པ་བགམ་པར་བྱ་གོར་མ་ཆག་སྙམ་མོ།

དེ་ནས་ཡང་སྒྱུ་མ་མཁན་བཟང་པོས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བགམ་པའི་བསམ་པས་སང་གི་གདུགས་ཚོད་ལ་སྤྱན་འདྲེན་ཏོ་ཞེས་གསོལ་ཏོ།

འདི་སྙམ་དུ་ཡང་སེམས་ཏེ།

ཅི་འདིས་བདག་གི་སེམས་ཤེས་སམ་འོན་ཏེ་མི་ཤེས་ཞིག་གུ།

གལ་ཏེ་ཤེས་ན་ནི་དེར་འོང་བར་མི་འགྱུར་རོ།

ཅི་སྟེ་མི་ཤེས་ན་ནི་དེས་ན་འོང་བར་འགྱུར་རོ་སྙམ་མོ།

དེ་ནས་བཅོམ་ལྡན་འདས་ཀྱིས་སྒྱུ་མ་མཁན་བཟང་པོ་གདུལ་བའི་དབང་དུ་ཡང་མཛད།

རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་སྐྱེ་བོ་ཕལ་པོ་ཆེ་གདུལ་བའི་དབང་དུ་ཡང་མཛད་ནས་མཁྱེན་བཞིན་དུ་སྒྱུ་མ་མཁན་བཟང་པོ་ལ་དགེ་སློང་གི་དགེ་འདུན་དང་བཅས་ཏེ་ཅང་མི་གསུང་བས་གནང་བར་མཛད་དོ།

དེ་ནས་ཡང་སྒྱུ་མ་མཁན་བཟང་པོ་འདི་སྙམ་དུ་སེམས་ཏེ།

འདི་བདག་རྣམ་པར་མཐོ་འཚམ་པའི་

བསམ་པ་དང་ལྡན་པ་ལ་འདིར་ཁས་ལེན་པ་དང་སྦྱར་ན་འདི་ནི་ཐམས་ཅད་མཁྱེན་པ་ཡང་མ་ཡིན་ལ་ཐམས་ཅད་གཟིགས་པ་དང་ལྡན་པ་ཡང་མ་ཡིན་ནོ་སྙམ་ནས་དེ་ནས་སྒྱུ་མ་མཁན་བཟང་པོ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ཀྱི་ཐད་ནས་སོང་ངོ་།

དེ་ནས་བཅོམ་ལྡན་འདས་ལ་ཚེ་དང་ལྡན་པ་མཽད་གལ་གྱི་བུ་ཆེན་པོས་འདི་སྐད་ཅེས་གསོལ་ཏོ།

སྒྱུ་མ་མཁན་བཟང་པོས་ནི་སྒྱུ་མའི་ཟ་མ་ཏོག་གིས་དགེ་སློང་གི་དགེ་འདུན་འདི་ལ་མཐོ་འཚམ་པར་འགྱུར་ལགས་སོ།

བཅོམ་ལྡན་འདས་ཀྱིས་བཀའ་སྩལ་པ།

མཽད་གལ་གྱི་བུ་ཁྱོད་སྙིང་ལས་ཆུང་བར་གྱིས་ཤིག་དང་།

ངས་ཡུན་རིང་པོ་ནས་སྤྱད་པ་བསྒྲུབས་པས་ན་དེ་བཞིན་གཤེགས་པ་ནི་འདིར་དུས་མཁྱེན་པ་ཡིན་ཏེ།

དེ་བཞིན་གཤེགས་པ་ལ་ནི་ལྟ་དང་བཅས་པའི་འཇིག་རྟེན་གྱིས་ཀྱང་ཐོ་བཙམ་པར་མི་ནུས་སོ།

མཽད་གལ་གྱི་བུ་གཞན་ཡང་འདོད་ཆགས་ནི་མཐོ་འཚམ་པར་བྱེད་པ་ཡིན།

ཞེ་སྡང་ནི་མཐོ་འཚམ་པར་བྱེད་པ་ཡིན།

གཏི་མུག་ནི་མཐོ་འཚམ་པར་བྱེད་པ་ཡིན་ན།

དེ་དག་ནི་དེ་བཞིན་གཤེགས་པ་ལ་བག་ལ་ཉལ་དང་བཅས་ཏེ་ཟད་བྲལ་ཡོངས་སུ་གྱུར།

གཟོད་མ་ནས་མ་སྐྱེས་པའི་ཆོས་ཅན་ཡིན་ཏེ།

དེས་ན་དེ་བཞིན་གཤེགས་པ་ལ་ལྷ་དང་བཅས་པའི་འཇིག་རྟེན་གྱིས་ཀྱང་ཐོ་བཙམ་པར་མི་ནུས་སོ།

མཽད་གལ་གྱི་བུ་གཞན་ཡང་སྒྱུ་མ་མཁན་བཟང་པོའི་སྒྱུ་མ་ནི་ཕྱོགས་གཅིག་པ་ཡིན་པས་སྒྱུ་མ་ཡང་དག་པ་མ་ཡིན་གྱི།

དེ་བཞིན་གཤེགས་པའི་སྒྱུ་མ་ནི་ཡང་དག་པ་ཡིན་ཏེ།

དེས་ན་ཆོས་ཐམས་ཅད་སྒྱུ་མ་ལྟ་བུར་མངོན་པར་རྫོགས་པར་སངས་རྒྱས་སོ།

མཽད་གལ་གྱི་བུ་སེམས་ཅན་གྱི་ཁམས་སུ་གདགས་པར་འདོགས་པ་ཇི་སྙེད་པ་དེ་དག་ཐམས་ཅད་འདི་ལྟ་སྟེ།

སྒྱུ་མ་མཁན་བཟང་པོའི་སྒྱུ་མ་འདི་ལྟ་བུ་དང་ལྡན་པར་གྱུར་ཀྱང་དེ་དག་ཐམས་ཅད་ཀྱིས་དེ་བཞིན་གཤེགས་པའི་སྒྱུ་མ་ལ་བརྒྱའི་ཆར་ཡང་ཉེ་བར་མི་འགྲོ།

སྟོང་གི་ཆར་ཡང་ཉེ་བར་མི་འགྲོ།

བྱེ་བ་འབུམ་གྱི་ཆར་ཡང་།

གྲངས་སུ་ཡང་།

ཆར་ཡང་།

བགྲང་བར་ཡང་།

དཔེར་ཡང་ཉེ་བར་མི་འགྲོའོ།

མཽད་གལ་གྱི་བུ་འདི་ཇི་སྙམ་དུ་སེམས།

སྒྱུ་མ་མཁན་བཟང་པོས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྒྱན་ཐམས་ཅད་ཀྱིས་

བརྒྱན་པར་ཀུན་ཏུ་སྟོན་ནུས་སམ།

གསོལ་པ།

མ་ལགས་སོ།

བཅོམ་ལྡན་འདས་ཀྱིས་བཀའ་སྩལ་པ།

དེ་བཞིན་གཤེགས་པ་ནི་བཞེད་ན་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་བརྒྱན་ཅིང་དེ་ཐམས་ཅད་ཀྱང་སྐྲའི་རྩེ་མོའི་ཆ་ཤས་ཙམ་ལ་ཀུན་ཏུ་སྟོན་པར་མཛད་ཀྱང་།

དེ་བཞིན་གཤེགས་པའི་སྒྱུ་མ་རིལ་གྱིས་བསྟན་པར་ནི་མི་འགྱུར་རོ།

མཽད་གལ་གྱི་བུ་ཕྱོགས་བཅུ་ན་རླུང་གི་དཀྱིལ་འཁོར་གང་དག་ཡོད་པ་འདི་ལྟ་སྟེ།

རླུང་གི་དཀྱིལ་འཁོར་རྣམ་པར་འཐོར་བྱེད་ཅེས་བྱ་བ་དང་།

རླུང་གི་དཀྱིལ་འཁོར་ཡོངས་སུ་གཅོད་བྱེད་ཅེས་བྱ་བ་གང་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡོངས་སུ་གཅོད་པར་བྱེད་ཅིང་ཡོངས་སུ་བཅད་ནས་ཀྱང་འཇིག་པར་བྱེད་པ་དང་།

རླུང་གི་དཀྱིལ་འཁོར་ཀུན་ཏུ་འཐོར་བྱེད་དང་།

རྣམ་པར་འཐོར་བྱེད་ཅེས་བྱ་བ་འཇིག་རྟེན་གྱི་བར་ན་རྒྱུ་བ་གང་དག་ཡིན་པ་དང་།

རླུང་གི་དཀྱིལ་འཁོར་ཀུན་ནས་ཡོངས་སུ་འཇོག་པ་ཞེས་བྱ་བ་སྲིད་པའི་རྩེ་མོ་ན་རྒྱུ་བ་གང་དག་ཡིན་པ་དང་།

རླུང་གི་དཀྱིལ་འཁོར་རྣམ་པར་འཇིག་པ་ཞེས་བྱ་བ་རིའི་རྒྱལ་པོ་རི་རབ་ཀྱང་རྣམ་པར་འཇིག་པར་བྱེད་ན།

རི་ཕལ་པ་ལྟ་སྨོས་ཀྱང་ཅི་དགོས་པ་གང་དག་ཡིན་པ་དང་།

རླུང་གི་དཀྱིལ་འཁོར་འབར་བྱེད་ཅེས་བྱ་བ་སྲེག་པའི་བསྐལ་པའི་ཚེ་ལྡང་ཞིང་གང་གིས་ན་མེ་ལྕེ་དེ་དག་ཚངས་པའི་འཇིག་རྟེན་གྱི་བར་དུ་འཕེན་པར་བྱེད་པ་དང་།

རླུང་གི་དཀྱིལ་འཁོར་རྣམ་པར་སྒྲུབ་བྱེད་ཅེས་བྱ་བ་གང་གིས་སྲེག་པའི་བསྐལ་པའི་མེ་དེ་ཞི་བར་བྱེད་པ་དང་།

རླུང་གི་དཀྱིལ་འཁོར་རབ་ཏུ་ཚིམ་བྱེད་ཅེས་བྱ་བ་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྤྲིན་གྱི་དྲ་བ་གཅིག་གིས་ཀུན་ཏུ་ཁེབས་པར་བྱེད་པ་དང་།

རླུང་གི་དཀྱིལ་འཁོར་ཆུས་འདེབས་ཞེས་བྱ་བ་གང་གིས་ན་སྲེག་པའི་བསྐལ་པའི་ཚེ་ཆར་འབེབས་པར་བྱེད་པ་དང་།

རླུང་གི་དཀྱིལ་འཁོར་ལྷག་པར་སྐེམས་ཞེས་བྱ་བ་གང་གིས་ན་ཆུས་འཇིག་པ་དེ་ལྷག་པར་སྐེམས་པར་བྱེད་པ་ཡོད་དོ།

མཽད་གལ་གྱི་བུ་ངས་རླུང་གི་དཀྱིལ་འཁོར་ལས་བརྩམས་ཏེ་བསྐལ་པ་འམ།

བསྐལ་པ་ལས་ལྷག་པར་ཆོས་བསྟན་ཀྱང་དེ་བཞིན་གཤེགས་པས་རླུང་གི་དཀྱིལ་འཁོར་ལས་བརྩམས་ཏེ་ཆོས་བསྟན་པ་ལ་མཐའ་ཐུག་པ་མེད་དོ།

མཽད་

གལ་གྱི་བུ་འདི་ཇི་སྙམ་དུ་སེམས།

སྒྱུ་མ་མཁན་བཟང་པོས་རླུང་གི་དཀྱིལ་འཁོར་དེ་དག་གི་ནང་དུ་འདུག་པར་ནུས་སམ།

གསོལ་པ།

མ་ལགས་སོ།

བཅོམ་ལྡན་འདས་ཀྱིས་བཀའ་སྩལ་པ།

མཽད་གལ་གྱི་བུ་ང་ནི་རླུང་གི་དཀྱིལ་འཁོར་དེ་དག་ཐམས་ཅད་ཀྱི་ནང་དུ་སྤྱོད་ལམ་བཞིས་གནས་པར་བྱེད་དོ།

དེ་བཞིན་གཤེགས་པ་ནི་བཞེད་ན་རླུང་གི་དཀྱིལ་འཁོར་ཐམས་ཅད་ཡུངས་འབྲུ་གཅིག་གི་ནང་དུ་འཇོག་པར་མཛད།

འཇུག་པར་མཛད་ལ།

ཡུངས་འབྲུ་དེ་ཡང་རྣམ་པར་འཇིག་པར་མི་འགྱུར་ཞིང་།

ཡུངས་འབྲུ་དེའི་ནང་དུ་རླུང་གི་དཀྱིལ་འཁོར་དེ་དག་ཐམས་ཅད་ཀྱི་བྱ་བ་ཐམས་ཅད་ཀྱང་ཉེ་བར་སྟོན་པར་མཛད་ལ།

རླུང་དེ་དག་ཕན་ཚུན་ཐུག་པར་ཡང་མི་འགྱུར།

ལྟུང་བར་ཡང་མི་འགྱུར་རོ།

མཽད་གལ་གྱི་བུ་ང་ནི་སྒྱུ་མའི་ཆོས་ཉིད་དེ་ལྟ་བུ་དང་དེ་མ་ཡིན་པ་གཞན་ཡང་ཚད་མེད་པ་དང་ལྡན་ནོ།

དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་དང་།

ཐམས་ཅད་དང་ལྡན་པའི་འཁོར་དེ་ངོ་མཚར་དུ་གྱུར་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ངག་འཐུན་པར་ཚིག་ཏུ་སྨྲས་པ།

བཅོམ་ལྡན་འདས་བདག་ཅག་གིས་རྙེད་པ་ལེགས་པར་རྙེད་དེ།

སྟོན་པ་འདི་ལྟར་རྫུ་འཕྲུལ་ཆེ་བ།

འདི་ལྟར་དབང་ཆེ་བར་གྲགས་པ།

འདི་ལྟར་མཐུ་ཆེ་བ་ནི་བདག་ཅག་གིས་རྙེད་པ་ལེགས་པར་རྙེད་ལགས་སོ།

བཅོམ་ལྡན་འདས་གང་དག་དེ་བཞིན་གཤེགས་པའི་ཆོ་འཕྲུལ་འདི་ཐོས་ནས་མོས་པར་བགྱིད་ཅིང་མོས་པར་བགྱིས་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིད་པ་དེ་དག་ཀྱང་རྙེད་པ་ལེགས་པར་རྙེད་པ་ལགས་སོ།

དེ་ནས་སྒྱུ་མ་མཁན་བཟང་པོ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དེར་སོང་སྟེ།

དེ་ཉིད་ཀྱི་ནུབ་མོ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོའི་ཕྱོགས་གང་ན་གྲོང་ཁྱེར་ཐམས་ཅད་ཀྱི་བཙོག་དགུ་དང་།

མི་འཐུན་པ་ཐམས་ཅད་འབབ་པ་དང་།

འབྱུང་བའི་ས་ཕྱོགས་དེར་འཁོར་གྱི་ཁྱམས་ཆེན་པོ་དར་གྱི་ལྡ་ལྡི་དང་།

གདུགས་དང་།

རྒྱལ་མཚན་དང་།

བ་དན་བསྒྲེང་བས་བརྒྱན་པ།

གཞི་ལག་མཐིལ་ལྟར་མཉམ་པ།

མེ་ཏོག་བཀྲམ་པ།

སྤོས་བཟང་པོ་མཆོག་གིས་བདུགས་པ།

སྟེང་དུ་བླ་རེ་བྲེས་པ་ཞིག་མངོན་པར་སྤྲུལ་ཏོ།

འཁོར་གྱི་ཁྱམས་དེའི་ནང་དུ་ཡང་རིན་པོ་ཆེའི་ཤིང་ལྗོན་པ་མེ་ཏོག་དང་འབྲས་བུར་བཅས་པ་བརྒྱད་སྟོང་མངོན་པར་སྤྲུལ་ཏོ།

རིན་པོ་ཆེའི་ཤིང་ལྗོན་པ་ཐམས་ཅད་ཀྱི་དྲུང་དུ་ཡང་སེང་གེའི་ཁྲི་རས་བཅོས་བུ་དུ་མས་གཡོགས་པ་རིན་པོ་ཆེའི་བ་དན་ཐམས་ཅད་ཀྱིས་བརྒྱན་པ་མངོན་པར་སྤྲུལ་ཏོ།

སེང་གེའི་ཁྲིའི་གཡས་གཡོན་དུ་ཡང་རིན་པོ་ཆེའི་ཤིང་ལྗོན་པ་མེ་ཏོག་དང་འབྲས་བུར་བཅས་པ་བཞི་བཞི་མངོན་པར་སྤྲུལ་ཏོ།

བཅོམ་ལྡན་འདས་དང་དགེ་སློང་གི་དགེ་འདུན་གྱིས་ཡོངས་སུ་ལོངས་སྤྱད་པར་བྱ་བའི་ཞལ་ཟས་རོ་བརྒྱ་དང་ལྡན་པ་ཡང་མངོན་པར་སྤྲུལ་ཏོ།

རིམ་གྲོ་བྱེད་པ་གོས་དཀར་པོ་བགོས་པ།

རྒྱན་ཐམས་ཅད་ཀྱིས་བརྒྱན་པ་ལྔ་བརྒྱ་ཡང་མངོན་པར་སྤྲུལ་ཏོ།

སྒྱུ་མ་མཁན་བཟང་པོས་བཀོད་པ་དེ་ལྟ་བུ་སྤྲུལ་མ་ཐག་ཏུ་དེ་ནས་དེའི་མོད་ལ་རྒྱལ་པོ་ཆེན་པོ་བཞི་ལུས་ཆེན་པོར་སྤྲུལ་ནས་སྒྱུ་མ་མཁན་བཟང་པོའི་འཁོར་གྱི་ཁྱམས་ཀྱི་བཀོད་པ་ག་ལ་བ་དེར་སོང་ནས་སྒྱུ་མ་མཁན་བཟང་པོ་ལ་འདི་སྐད་ཅེས་སྨྲས་སོ།

བཟང་པོ་ཁྱོད་ཀྱིས་དེ་བཞིན་གཤེགས་པ་སང་གདུགས་ཚོད་ལ་སྤྱན་དྲངས་པ་དང་།

ཁྱོད་ཀྱིས་དེ་བཞིན་གཤེགས་པས་ཡོངས་སུ་ལོངས་སྤྱད་པར་བྱ་བའི་འཁོར་གྱི་ཁྱམས་ཀྱི་བཀོད་པ་འདི་ལྟ་བུ་འདི་མངོན་པར་སྤྲུལ་པ་ནི་རྙེད་པ་ལེགས་པར་རྙེད་དོ།

བཟང་པོ་གཞན་ཡང་ཁོ་བོ་ཅག་ཀྱང་དེ་བཞིན་གཤེགས་པ་ལ་མཆོད་པ་བྱ་བའི་ལས་བྱ་བ་ལ་བཅོམ་ལྡན་འདས་ཀྱིས་ཡོངས་སུ་ལོངས་སྤྱད་པ་དང་།

ཁྱོད་ལ་བསྟང་བའི་ཕྱིར་འཁོར་གྱི་ཁྱམས་ཀྱི་བཀོད་པ་འདི་ལྟ་བུ་གཉིས་པ་ཅུང་ཞིག་སྟོན་པར་བྱེད་ན་ཁོ་བོ་ཅག་ལ་གནང་བར་གྱིས་ཤིག །

དེ་ནས་སྒྱུ་མ་མཁན་བཟང་པོ་ཤིན་ཏུ་ངོ་མཚར་དུ་གྱུར་ནས་རྒྱལ་པོ་ཆེན་པོ་བཞི་ལ་གནང་བ་དང་།

དེ་ནས་རྒྱལ་པོ་ཆེན་པོ་བཞིས་བཅོམ་ལྡན་འདས་ཀྱིས་ཡོངས་སུ་ལོངས་སྤྱད་པར་བྱ་བའི་འཁོར་གྱི་ཁྱམས་དེ་ལྟ་བུ་ཞིག་མངོན་པར་སྤྲུལ་ཏོ།

དེ་ནས་ཡང་ལྷ་རྣམས་ཀྱི་དབང་པོ་བརྒྱ་བྱིན་ལྷའི་བུ་སུམ་ཁྲི་དང་ལྷན་ཅིག་བཟང་པོའི་འཁོར་གྱི་ཁྱམས་ཀྱི་བཀོད་པ་ག་ལ་བ་དེར་སོང་ནས་སྒྱུ་མ་མཁན་བཟང་པོ་ལ་འདི་སྐད་ཅེས་སྨྲས་སོ།

བཟང་པོ་ཁྱོད་ཀྱིས་དེ་བཞིན་གཤེགས་པས་ང་གདུགས་ཚོད་ལ་སྤྱན་དྲངས་པ་དང་།

དེ་བཞིན་གཤེགས་པས་ཡོངས་སུ་ལོངས་སྤྱད་

པར་བྱ་བའི་འཁོར་གྱི་ཁྱམས་ཀྱི་བཀོད་པ་འདི་ལྟ་བུ་འདི་མངོན་པར་སྤྲུལ་པ་ནི་རྙེད་པ་ལེགས་པར་རྙེད་དོ།

བཟང་པོ་ཁོ་བོ་ཅག་ཀྱང་།

དེ་བཞིན་གཤེགས་པ་ལ་མཆོད་པའི་ལས་བྱ་ཞིང་བཅོམ་ལྡན་འདས་ཀྱིས་ཡོངས་སུ་ལོངས་སྤྱད་པ་དང་།

ཁྱོད་ལ་བསྟང་བའི་ཕྱིར་འཁོར་གྱི་ཁྱམས་ཀྱི་བཀོད་པ་འདི་ལྟ་བུ་གཉིས་པ་ཅུང་ཞིག་སྟོན་པར་བྱེད་ན་ཁོ་བོ་ཅག་ལ་གནང་བར་གྱིས་ཤིག །

དེ་ནས་སྒྱུ་མ་མཁན་བཟང་པོ་ཤིན་ཏུ་ངོ་མཚར་དུ་གྱུར་ནས་ལྷ་རྣམས་ཀྱི་དབང་པོ་བརྒྱ་བྱིན་ལ་གནང་བ་དང་།

དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བཅོམ་ལྡན་འདས་ཀྱིས་ཡོངས་སུ་ལོངས་སྤྱད་པར་བྱ་བ་སུམ་ཅུ་རྩ་གསུམ་པའི་ལྷ་རྣམས་ཀྱི་ཁང་བཟངས་རྣམ་པར་རྒྱལ་བ་དང་།

ཡོངས་འདུ་ས་བརྟོལ་བས་ཆེས་ཁྱད་པར་དུ་འཕགས་པའི་འཁོར་གྱི་ཁྱམས་ཞིག་མངོན་པར་སྤྲུལ་ཏེ།

འཁོར་གྱི་ཁྱམས་དེས་སྒྱུ་མ་མཁན་བཟང་པོའི་བཀོད་པ་དང་།

རྒྱལ་པོ་ཆེན་པོ་བཞིའི་བཀོད་པ་ཡང་མོག་མོག་པོར་བྱས་པར་གྱུར་ཏོ།

དེ་ནས་སྒྱུ་མ་མཁན་བཟང་པོ་འདི་སྙམ་དུ་སེམས་ཏེ།

ལྷའི་བུ་འདི་ལྟ་བུ་འདི་དག་ཀྱང་བཅོམ་ལྡན་འདས་ལ་རིམ་གྲོ་བྱ་བ་དང་།

མཆོད་པའི་ལས་བྱ་བའི་ཕྱིར་མངོན་པར་བརྩོན་ཏེ་ལྷགས་པ་དང་སྦྱར་ན།

སེམས་ཅན་འདི་ནི་ཐ་མལ་པ་མ་ཡིན་པས་བདག་གིས་སེམས་ཅན་མཆོག་དེ་ལྟ་བུ་ལ་ཐོ་བཙམས་པར་གྱུར་ན་མི་རུང་གིས་བྱ་བ་འདི་ལྟ་བུ་འདི་དག་དོར་གོར་མ་ཆག་སྙམ་མོ།

དེ་ནས་སྒྱུ་མ་མཁན་བཟང་པོ་སྤྲུལ་པའི་བྱ་བ་དེ་དག་འདོར་བར་བྱེད།

དེ་དག་མེད་པར་བྱེད་དེ།

གསང་སྔགས་དང་རིག་སྔགས་ཀྱི་སྟོབས་བསྐྱེད་པ་ཐམས་ཅད་ཀྱིས་མེད་པར་བྱེད་ཅིང་མི་སྣང་བར་བྱ་བར་བརྒལ་ཀྱང་ཞལ་ཟས་དང་།

རིམ་གྲོ་བ་དང་།

འཁོར་གྱི་ཁྱམས་ཀྱི་བཀོད་པ་དང་།

སེང་གེའི་ཁྲི་ཡང་དེ་ཁོ་ན་བཞིན་དུ་སྣང་སྟེ།

གསང་སྔགས་དང་།

རིག་སྔགས་ཀྱི་སྟོབས་བསྐྱེད་པ་ཐམས་ཅད་ཀྱིས་མེད་པར་བྱ་མ་ནུས་པ་དང་།

དེ་ཤིན་ཏུ་ངོ་མཚར་དུ་གྱུར་ནས་འདི་སྙམ་དུ་སེམས་ཏེ།

བདག་སྔོན་ཆད་ནི་འདོད་ན་སྒྱུ་མ་སྟོན་པར་ཡང་བྱེད།

འདོད་ན་སྒྱུ་མ་མེད་པར་ཡང་བྱེད་ན།

ད་ནི་དེ་བཞིན་གཤེགས་པའི་ཆེད་དུ་གནས་ཀྱི་བཀོད་པ་བྱས་པ་མེད་པར་བྱེད་མ་ནུས་སོ་སྙམ་མོ།

དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་སྒྱུ་མ་མཁན་བཟང་པོའི་སེམས་ཀྱི་རྣམ་པར་རྟོག་པ་སེམས་ཀྱིས་ཡོངས་སུ་ཤེས་ནས་སྒྱུ་མ་མཁན་བཟང་པོ་ལ་འདི་སྐད་ཅེས་སྨྲས་སོ།

བཟང་པོ་ཇི་ལྟར་ཁྱོད་ཀྱིས་དེ་བཞིན་གཤེགས་པའི་ཕྱིར་གནས་ཀྱི་བཀོད་པ་བྱས་པ་འདི་མེད་པར་བྱ་མི་ནུས་པ་དེ་བཞིན་དུ་བཟང་པོ་གང་དག་དེ་བཞིན་གཤེགས་པ་ལ་སེམས་བསྐྱེད་པ་འགའ་ཙམ་ཐོབ་པ་དེ་དག་གི་སེམས་བསྐྱེད་པ་དེ་ཡང་མེད་པར་མི་འགྱུར་ཏེ།

དེ་དག་གི་དེ་ནི་ཡོངས་སུ་མྱ་ངན་ལས་འདས་པའི་བར་གྱི་རྒྱུར་འགྱུར་རོ།

དེ་ནས་སྒྱུ་མ་མཁན་བཟང་པོ་དགའ་མགུ་ཡི་རངས་ཏེ།

རབ་ཏུ་དགའ་ཞིང་ཡིད་བདེ་བར་གྱུར་ནས་དེ་ཉིད་ཀྱི་མཚན་མོ་འདས་པ་དང་།

བཅོམ་ལྡན་འདས་ལ་གདུགས་ཚོད་ལ་བབ་པ་སྐུལ་བར་བྱེད་དེ།

བཅོམ་ལྡན་འདས་གདུགས་ཚོད་ལགས་པའི་དུས་དང་ཚོད་ལ་བབ་ན་ད་གདུགས་ཚོད་ལ་བབ་པར་དགོངས་སུ་གསོལ་ཞེས་གསོལ་ཏོ།

དེ་ནས་བཅོམ་ལྡན་འདས་སྔ་དྲོའི་དུས་ཀྱི་ཚེ་ཤམ་ཐབས་མནབས།

ཆོས་གོས་གསོལ།

ལྷུང་བཟེད་ཐོགས་ཏེ།

དགེ་སློང་གི་དགེ་འདུན་གྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱི་དང་ལ་གཤེགས་ཏེ།

རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་གཤེགས་ནས།

སྒྱུ་མ་མཁན་བཟང་པོའི་འཁོར་གྱི་ཁྱམས་ག་ལ་བ་དེར་གཤེགས་ཏེ།

གང་གིས་ན་སྒྱུ་མ་མཁན་བཟང་པོ་ཡང་དེ་བཞིན་གཤེགས་པ་ནི་བདག་གིས་སྤྲུལ་པའི་བཀོད་པ་ན་བཞུགས་སོ་སྙམ་དུ་ཤེས།

རྒྱལ་པོ་ཆེན་པོ་བཞི་ཡང་དེ་བཞིན་གཤེགས་པ་ནི་བདག་ཅག་གིས་སྤྲུལ་པའི་བཀོད་པ་ན་བཞུགས་སོ་སྙམ་དུ་ཤེས།

ལྷ་རྣམས་ཀྱི་དབང་པོ་བརྒྱ་བྱིན་ཡང་དེ་བཞིན་གཤེགས་པ་ནི་བདག་གིས་སྤྲུལ་པའི་བཀོད་པ་ན་བཞུགས་སོ་སྙམ་དུ་ཤེས་པར་འགྱུར་བ་དེ་ལྟ་བུའི་རྫུ་འཕྲུལ་མངོན་པར་འདུ་མཛད་པ་མངོན་པར་འདུ་མཛད་དོ།

རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་དེ་ན་གཞན་མུ་སྟེགས་ཅན་དང་།

སྤྱོད་པ་བ་དང་།

ཀུན་ཏུ་རྒྱུ་དང་།

བྲམ་ཟེ་དང་།

ཁྱིམ་བདག་གང་དག་གིས་ཐོས་པ་དེ་དག་ནི་ངོ་མཚར་དུ་གྱུར་ནས་འཁོར་གྱི་ཁྱམས་དེར་དོང་སྟེ།

དེ་རིང་དགེ་སྦྱོང་གཽ་ཏམ་ལམ་ཐོ་འཚམ་པ་བལྟ་བར་བྱའོ་སྙམ་མོ།

རྒྱལ་པོའི་

ཁབ་ཀྱི་གྲོང་ཁྱེར་ཆེན་པོ་དེ་ན་དད་པའི་དགེ་སློང་དང་།

དགེ་སློང་མ་དང་།

དགེ་བསྙེན་དང་།

དགེ་བསྙེན་མ་གང་དག་འཁོད་པ་དེ་དག་ནི་འཁོར་གྱི་དཀྱིལ་འཁོར་དེར་དོང་ནས་དེ་རིང་དེ་བཞིན་གཤེགས་པ་ལ་བགམ་པ་ཡང་མཉན་པར་བྱ།

ཆོ་འཕྲུལ་ཆེན་པོ་ཡང་བལྟ་བར་བྱའོ་སྙམ་མོ།

དེ་ནས་སྒྱུ་མ་མཁན་བཟང་པོས་ང་རྒྱལ་དང་།

རྒྱགས་པ་དང་།

ཁེངས་པ་ངེས་པར་བཅོམ་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།

བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་རྣམ་པར་ཐོ་བཙམ་པའི་བསམ་པ་ཆེན་པོས་དེ་བཞིན་གཤེགས་པ་འདིར་གཤེགས་སུ་གསོལ་བ་གང་ལགས་པའི་ནོངས་པ་འཆགས་སོ།

བཅོམ་ལྡན་འདས་གཞན་ཡང་ཞལ་ཟས་སྤྲུལ་པ་དང་།

རིམ་གྲོ་བགྱིད་པ་སྤྲུལ་པ་དང་།

སེང་གེའི་ཁྲི་སྤྲུལ་པ་དང་།

འཁོར་གྱི་ཁྱམས་སྤྲུལ་པ་དེ་ལ་བདག་འདི་སྙམ་དུ་སེམས་ཅན་མཆོག་དེ་ལྟ་བུ་དེ་ལ་བསླུས་པར་གྱུར་ན་མི་རུང་གིས་བྱ་བ་འདི་མ་མཆིས་པར་བགྱི་སྙམ་སྟེ་ཤིན་ཏུ་སྤངས་ཀྱང་མ་མཆིས་པར་མ་བཏུབ།

གསང་སྔགས་དང་རིག་སྔགས་ཀྱི་སྟོབས་བསྐྱེད་པ་ཐམས་ཅད་ཀྱིས་ཀྱང་མ་མཆིས་པར་བགྱི་རྔོ་མ་ཐོག་ནས་ཞལ་ཟས་དང་།

རིམ་གྲོ་བགྱིད་པ་དང་།

སེང་གེའི་ཁྲི་དང་།

འཁོར་གྱི་ཁྱམས་ཀྱི་བཀོད་པ་ཡང་དེ་ཁོ་ན་བཞིན་དུ་གདའོ།

དེ་སྐད་ཅེས་གསོལ་བ་དང་།

བཅོམ་ལྡན་འདས་ཀྱིས་སྒྱུ་མ་མཁན་བཟང་པོ་ལ་འདི་སྐད་ཅེས་བཀའ་སྩལ་ཏོ།

བཟང་པོ་སེམས་ཅན་ཐམས་ཅད་ཀྱི་ཉེ་བར་སྤྱད་པ་དང་།

ཡོངས་སུ་སྤྱད་པ་ཡང་འདི་ལྟ་སྟེ།

ལས་ཀྱི་སྒྱུ་མས་སྤྲུལ་པ་ཡིན་ནོ།

བཟང་པོ་དགེ་སློང་གི་དགེ་འདུན་འདི་ཡང་འདི་ལྟ་སྟེ།

ཆོས་ཀྱི་སྒྱུ་མས་སྤྲུལ་པ་ཡིན་ནོ།

བཟང་པོ་ང་ཡང་འདི་ལྟ་སྟེ།

ཡེ་ཤེས་ཀྱི་སྒྱུ་མས་སྤྲུལ་པ་ཡིན་ནོ།

བཟང་པོ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་འདི་ལྟ་སྟེ།

སྣ་ཚོགས་མངོན་པར་འགྲུབ་པར་བྱེད་པའི་སྒྱུ་མས་སྤྲུལ་པ་ཡིན་ནོ།

བཟང་པོ་ཆོས་ཐམས་ཅད་ཀྱང་འདི་ལྟ་སྟེ།

རྐྱེན་ཚོགས་པའི་སྒྱུ་མས་སྤྲུལ་པ་ཡིན་ནོ།

བཟང་པོ་འོན་ཀྱང་ད་དེའི་དུས་ལ་

བབ་པར་ཤེས་ན་ཇི་ལྟར་སྤྲུལ་པའི་བཟའ་བ་དང་།

བཅའ་བ་དང་།

མྱང་བ་དང་།

བལྡག་པ་དག་ཁྱོད་ཀྱིས་ཕུལ་ཅིག །

དེ་ནས་སྒྱུ་མ་མཁན་བཟང་པོས་སྤྲུལ་པའི་རིམ་གྲོ་བ་དེ་དག་དང་།

རྒྱལ་པོ་ཆེན་པོ་བཞི་དག་དང་།

ལྷའི་དབང་པོ་བརྒྱ་བྱིན་འཁོར་དང་བཅས་པ་དང་ལྷན་ཅིག་སྤྲུལ་པའི་བཟའ་བ་དང་།

བཅའ་བ་དང་།

མྱང་བ་དང་།

བལྡག་པ་དེས་བཅོམ་ལྡན་འདས་དང་།

དགེ་སློང་གི་དགེ་འདུན་ཡང་དག་པར་ཚིམ་པར་བྱེད་དོ།

དེ་ནས་དེའི་ཚེ་གནས་བརྟན་འོད་སྲུང་ཆེན་པོས་ཚིགས་སུ་བཅད་པ་འདི་སྨྲས་སོ།

སྦྱིན་པ་འདི་ནི་ཅི་འདྲ་དང་།

ལེན་པར་བྱེད་པ་ཅི་འདྲ་བ།

དེ་འདྲའི་ཆོས་ཉིད་ཐོབ་འགྱུར་བར།

ཡོན་ནི་རྣམ་པར་སྦྱོང་གྱུར་ཅིག །

མཽད་གལ་གྱི་བུ་ཆེན་པོས་སྨྲས་པ།

གདན་ནི་ཇི་ལྟར་བཤམས་པ་དང་།

དེ་ལ་གང་དག་བཞུགས་པ་རྣམས།

མི་མཉམ་མ་མཆིས་མཚུངས་པ་སྟེ།

མཆོད་སྦྱིན་དགེ་བ་བླ་ན་མེད།

ཤཱ་རིའི་བུས་སྨྲས་པ།

རིམ་གྲོ་བྱེད་པའི་སེམས་གང་དང་།

ལེན་པར་བྱེད་པའི་སེམས་གང་དང་།

སྦྱིན་པར་བྱེད་པ་ཇི་ལྟ་བར།

ཡོན་ནི་མྱུར་དུ་སྦྱོང་བར་ཤོག །

རབ་འབྱོར་གྱིས་སྨྲས་པ།

གཏོང་མེད་སྦྱིན་པ་འདི་བཏང་བ།

ལེན་པ་མེད་པ་རྣམས་ཀྱིས་བླངས།

གང་དག་འདིར་ནི་གཤེགས་པ་རྣམས།

དེ་དག་ཡོན་སྦྱོང་བྱེད་པ་ཡིན།

ཀུན་དགའ་བོས་སྨྲས་པ།

འདི་ནི་ནམ་མཁའི་སྦྱིན་པ་སྟེ།

བསམ་གྱིས་མི་ཁྱབ་རྣམས་ཀྱིས་སྤྱད།

གང་དག་སེམས་ལུས་གྲོལ་བ་དེ།

འཇིག་རྟེན་དག་ན་ཡོན་སྦྱོང་མཆོག །

བྱང་ཆུབ་སེམས་དཔའ་འོད་ཏོག་གིས་སྨྲས་པ།

ཇི་ལྟ་བུར་ན་སྒྱུ་མའི་མཁན།

བཟང་པོས་བཀོད་པ་སྤྲུལ་བྱས་པ།

དངོས་ཀུན་དེ་དང་འདྲ་བ་སྟེ།

བྱིས་པས་དེ་ནི་མི་རྟོགས་སོ།

བྱང་ཆུབ་སེམས་དཔའ་འོད་བཀོད་པས་སྨྲས་པ།

ཇི་ལྟར་གདན་དང་ལྗོན་ཤིང་དག །

དུ་མ་མངོན་པར་སྤྲུལ་བྱས་པ།

ཡིད་ཀྱི་སྒྱུ་མ་ལྟ་བུར་སྟོང་།

འདི་ལ་ཁྱད་པར་འགའ་ཡང་མེད།

བྱང་ཆུབ་སེམས་དཔའ་སེང་གེས་སྨྲས་པ།

སེང་གེའི་སྒྲ་ནི་མ་ཐོས་ན།

ཝ་ནི་ནགས་ཚལ་ནང་ན་སྒྲོགས།

དེ་ཡིས་སེང་གེའི་སྒྲ་ཐོས་ནས།

ཕྱོགས་བཅུ་དག་ཏུ་འབྲོས་པར་འགྱུར།

དེ་བཞིན་སྒྱུ་མཁན་བཟང་

པོ་ཡང་།

དེ་བཞིན་གཤེགས་པ་མ་མཐོང་ན།

མུ་སྟེགས་ནང་དུ་རྒྱལ་བ་བས།

བདག་ཉིད་མཆོག་ཅེས་སྒྲོགས་པར་བྱེད།

བཟང་པོ་དེ་བཞིན་གཤེགས་པ་ཡི།

སྒྱུ་མས་སྒྱུ་མར་རྟོགས་བྱེད་པ།

ཚད་མར་གྱུར་པ་གསུངས་ནས་ནི།

དེ་ལ་བདུད་ཀྱི་གཏིང་མི་དཔོགས།

བྱང་ཆུབ་སེམས་དཔའ་སེང་གེའི་བློ་གྲོས་ཀྱིས་སྨྲས་པ།

ཞལ་ཟས་འདི་ནི་སྤྲུལ་པ་སྟེ།

བསྙེན་བཀུར་བྱེད་པའང་སྤྲུལ་པ་ཡིན།

སྤྱོད་པར་བྱེད་པའང་སྤྲུལ་པ་སྟེ།

སྦྱིན་པ་དགེ་བ་བླ་ན་མེད།

བྱང་ཆུབ་སེམས་དཔའ་བྱམས་པས་སྨྲས་པ།

མེ་ནི་མར་དང་ཏིལ་མར་གྱིས།

ཕྱི་ཕྱིར་ཞིང་ནི་རབ་ཏུ་མཆེད།

དེ་བཞིན་བཟང་པོའི་སྒྱུ་མ་ཡིས།

སངས་རྒྱས་སྒྱུ་མ་ངེས་པར་བསྟན།

འཇམ་དཔལ་གཞོན་ནུར་གྱུར་པས་སྨྲས་པ།

ཇི་ལྟར་འདི་ནི་སྔོན་གནས་པ།

ཐམས་ཅད་བྱེད་པ་མེད་པ་ལྟར།

དེ་བཞིན་ཆོས་རྣམས་ཐམས་ཅད་ནི།

སྔོན་གྱི་མཐའ་ནས་རྟག་ཏུ་མཉམ།

དེ་ནས་བཅོམ་ལྡན་འདས་ཀྱིས་སྒྱུ་མ་མཁན་བཟང་པོ་ཤིན་ཏུ་གདུལ་བའི་དབང་དུ་མཛད་ནས་ཁྱིམ་བདག་ཅིག་སྤྲུལ་ཏེ།

འཁོར་གྱི་ཁྱམས་དེའི་ནང་དུ་ཞུགས་ནས་སྒྱུ་མ་མཁན་བཟང་པོ་ལ་འདི་སྐད་ཅེས་སྨྲས་སོ།

བཟང་པོ་ཅི་བྱེད་སྨྲས་པ།

དགེ་སྦྱོང་གཽ་ཏ་མ་འདི་གདུགས་ཚོད་གསོལ་བར་བྱེད་དོ།

དེས་སྨྲས་པ།

བཟང་པོ་ཐོང་དེ་སྐད་མ་ཟེར།

དེ་བཞིན་གཤེགས་པ་དེ་ནི་དགེ་སློང་གི་དགེ་འདུན་དང་ཐབས་ཅིག་ཏུ་རྒྱལ་པོ་མ་སྐྱེས་དགྲའི་ཁབ་ན་གདུགས་ཚོད་གསོལ་ཞིང་བཞུགས་སོ།

སྒྱུ་མ་མཁན་བཟང་པོས་ཀྱང་སངས་རྒྱས་ཀྱི་མཐུས་དེ་བཞིན་གཤེགས་པ་དགེ་སློང་གི་དགེ་འདུན་དང་ཐབས་ཅིག་ཏུ་རྒྱལ་པོ་མ་སྐྱེས་དགྲའི་ཁབ་ན་གདུགས་ཚོད་གསོལ་བར་མཐོང་ངོ་།

དེ་ནས་ཡང་བཅོམ་ལྡན་འདས་ཀྱིས་ཁྱིམ་བདག་གཉིས་པ་ཞིག་མངོན་པར་སྤྲུལ་ནས་དེ་ནང་དུ་ཞུགས་ཏེ།

སྒྱུ་མ་མཁན་བཟང་པོ་ལ་འདི་སྐད་ཅེས་སྨྲས་སོ།

བཟང་པོ་ཅི་བྱེད་སྨྲས་པ།

དགེ་སྦྱོང་གཽ་ཏ་མ་འདི་གདུགས་ཚོད་གསོལ་བར་བྱེད་དོ།

དེས་སྨྲས་པ།

ཐོང་དེ་སྐད་མ་ཟེར།

དེ་བཞིན་གཤེགས་པ་དེ་ནི་དགེ་སློང་གི་དགེ་འདུན་དང་ཐབས་ཅིག་ཏུ་ཀུན་ཏུ་རྒྱུའི་སྲང་ན་བསོད་སྙོམས་ཀྱི་ཕྱིར་རྒྱུ་ཞིང་བཞུགས་སོ།

སྒྱུ་མ་

མཁན་བཟང་པོས་ཀྱང་།

སངས་རྒྱས་ཀྱི་མཐུས་དེ་བཞིན་གཤེགས་པ་དགེ་སློང་གི་དགེ་འདུན་དང་ཐབས་ཅིག་ཏུ་ཀུན་ཏུ་རྒྱུའི་སྲང་ན་བསོད་སྙོམས་ཀྱི་ཕྱིར་རྒྱུ་བར་མཐོང་ངོ་།

དེ་ནས་ཡང་བཅོམ་ལྡན་འདས་ཀྱིས་ཁྱིམ་བདག་གཞན་ཞིག་སྤྲུལ་ཏེ།

དེ་ནང་དུ་ཞུགས་ནས་སྒྱུ་མ་མཁན་བཟང་པོ་ལ་འདི་སྐད་ཅེས་སྨྲས་སོ།

བཟང་པོ་ཅི་བྱེད།

སྨྲས་པ།

དེ་བཞིན་གཤེགས་པ་ནི་གདུགས་ཚོད་གསོལ་བར་བྱེད་དོ།

དེས་སྨྲས་པ།

བཟང་པོ་ཐོང་དེ་སྐད་མ་ཟེར།

དེ་བཞིན་གཤེགས་པ་དེ་ནི་འཚོ་བྱེད་ཀྱི་སྐྱེད་མོས་ཚལ་ན་འཁོར་བཞི་ལ་ཆོས་སྟོན་ཅིང་བཞུགས་སོ།

སྒྱུ་མ་མཁན་བཟང་པོས་ཀྱང་སངས་རྒྱས་ཀྱི་མཐུས་དེ་བཞིན་གཤེགས་པ་འཚོ་བྱེད་ཀྱི་སྐྱེད་མོས་ཚལ་ན་འཁོར་བཞི་ལ་ཆོས་སྟོན་པར་མཐོང་ངོ་།

དེ་ནས་ལྷ་རྣམས་ཀྱི་དབང་པོ་བརྒྱ་བྱིན་སྒྱུ་མ་མཁན་བཟང་པོ་ག་ལ་བ་དེར་སོང་སྟེ་ཕྱིན་ནས་སྒྱུ་མ་མཁན་བཟང་པོ་ལ་འདི་སྐད་ཅེས་སྨྲས་སོ།

བཟང་པོ་ཅི་བྱེད།

སྨྲས་པ།

དགེ་སྦྱོང་གཽ་ཏ་མ་འདི་གདུགས་ཚོད་གསོལ་བར་བྱེད་དོ།

དེས་སྨྲས་པ།

བཟང་པོ་ཐོང་དེ་སྐད་མ་ཟེར།

དེ་བཞིན་གཤེགས་པ་དེ་ནི་སུམ་ཅུ་རྩ་གསུམ་པའི་གནས་ན་ཤིང་ཡོངས་འདུའི་དྲུང་ན་སུམ་ཅུ་རྩ་གསུམ་པའི་ལྷ་རྣམས་ལ་ཆོས་སྟོན་ཅིང་བཞུགས་སོ།

བཟང་པོས་ཀྱང་དེ་བཞིན་གཤེགས་པ་སུམ་ཅུ་རྩ་གསུམ་པའི་གནས་ན་ཤིང་ཡོངས་འདུའི་དྲུང་ན་ཆོས་སྟོན་པར་མཐོང་ངོ་།

དེ་ནས་སྒྱུ་མ་མཁན་བཟང་པོས་ཤིང་ལྗོན་པ་སྤྲུལ་པ་ཇི་སྙེད་པ་དེ་ཐམས་ཅད་ཀྱི་ལོ་མ་ཐམས་ཅད་དང་།

མེ་ཏོག་ཐམས་ཅད་ལ་དེ་བཞིན་གཤེགས་པའི་སྐུ་མཚན་གྱིས་བརྒྱན་པ།

དགེ་སློང་གི་དགེ་འདུན་གྱིས་ཡོངས་སུ་བསྐོར་བ་མཐོང་ངོ་།

སྒྱུ་མ་མཁན་བཟང་པོས་སེང་གེའི་ཁྲི་སྤྲུལ་པ་གང་དག་ཡིན་པ་དང་།

རྒྱལ་པོ་ཆེན་པོ་བཞིས་སེང་གེའི་ཁྲི་སྤྲུལ་པ་གང་དག་ཡིན་པ་དེ་དག་ཐམས་ཅད་ལ་ཡང་དེ་བཞིན་གཤེགས་པའི་སྐུ་མཚན་གྱིས་བརྒྱན་པ།

དགེ་སློང་གི་དགེ་འདུན་གྱིས་ཡོངས་སུ་བསྐོར་བ་མཐོང་ངོ་།

རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ན་རྩིག་པའམ།

ཁྱིམ་མམ།

ཁང་བཟངས་སམ།

སྲང་ངམ།

ལམ་པོ་ཆེ་ཇི་སྙེད་ཡོད་པ་དེ་དག་ཐམས་ཅད་ན་ཡང་

དེ་བཞིན་གཤེགས་པའི་སྐུ་མཚན་གྱིས་བརྒྱན་པ་མཐོང་ངོ་།

དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ཐམས་ཅད་ཀྱི་སྤྱན་སྔ་ན་ཡང་སྒྱུ་མ་མཁན་བཟང་པོ་བདག་ཉིད་ཕྱག་འཚལ་ནས་ཉེས་པ་འཆགས་པར་མཐོང་ཞིང་།

དེ་ནས་སྒྱུ་མ་མཁན་བཟང་པོའི་མིག་ལམ་ན་གང་ཅུང་ཟད་ཅི་སྣང་བ་དེ་ཐམས་ཅད་དེ་བཞིན་གཤེགས་པ་མ་གཏོགས་པ་གཞན་ཅུང་ཟད་ཀྱང་མ་མཐོང་ནས་དེ་ཚིམ་ཞིང་མགུ་ལ་ཡི་རངས་ཏེ།

རབ་ཏུ་དགའ་ཞིང་དགའ་བ་དང་ཡིད་བདེ་བར་གྱུར་ཏོ།

དེ་དགའ་བ་དང་ཡིད་བདེ་བ་དེ་ཉིད་ཀྱིས་དད་པ་རྗེས་སུ་དྲན་པའི་ཏིང་ངེ་འཛིན་ཐོབ་བོ།

དེ་ཏིང་ངེ་འཛིན་དེ་ལས་ལངས་མ་ཐག་ཏུ་ཐལ་མོ་སྦྱར་ཏེ་བཅོམ་ལྡན་འདས་ཀྱི་སྤྱན་སྔར་འདུག་ནས་ཚིགས་སུ་བཅད་པ་འདི་དག་གསོལ་ཏོ།

བཞེད་ན་བརྒྱ་ཕྲག་སྟོང་ལས་ལྷག་གྱུར་ཅིང་།

དཔེར་ན་གང་གཱའི་ཀླུང་གི་བྱེ་སྙེད་ཀྱི།

སངས་རྒྱས་མང་པོ་སྤྲུལ་པར་མཛད་པ་ཡི།

དེ་བཞིན་གཤེགས་པའི་རྫུ་འཕྲུལ་དེ་ལ་མོས།

བདག་གིས་སྔོན་བསླབས་སྒྱུ་མའི་ས་མ་ལགས།

འཛམ་བུའི་གླིང་ན་བདག་འདྲ་མེད་སྙམ་ན།