寶積部第44卷（དཀོན་བརྩེགས་ཆ་པ་བཞུགས་སོ། །）

འཕགས་པ་ལྷའི་བུ་བློ་གྲོས་རབ་གནས་ཀྱིས་ཞུས་པ་ལུང་བསྟན་པ།

ཐེག་པ་ཆེན་པོའི་མདོ།

བམ་པོ་གསུམ་པ།

དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ།

བཅོམ་ལྡན་འདས་བྱང་ཆུབ་སེམས་དཔའ་སེམས་དང་པོ་བསྐྱེད་པ་དང་ལྡན་པ་སེམས་དང་པོ་བསྐྱེད་པ་དང་ལྡན་པ་ཞེས་བགྱི་ན།

བཅོམ་ལྡན་འདས་ཅི་ཙམ་གྱིས་ན་བྱང་ཆུབ་སེམས་དཔའ་སེམས་དང་པོ་བསྐྱེད་པ་དང་ལྡན་པ་ཞེས་བགྱི།

བཅོམ་ལྡན་འདས་ཀྱིས་བཀའ་སྩལ་པ།

འཇམ་དཔལ་བྱང་ཆུབ་སེམས་དཔའ་གང་གིས་ཁམས་གསུམ་པ་ཐམས་ཅད་ལས་འདུ་ཤེས་དང་།

ཡིད་ལ་བྱེད་པ་བསྐྱེད་པ་དེ་ནི་སེམས་དང་པོ་བསྐྱེད་པ་དང་ལྡན་པ་ཞེས་བྱའོ།

འཇམ་དཔལ་གྱིས་གསོལ་བ།

བཅོམ་ལྡན་འདས་ཀྱིས་བཀའ་སྩལ་བའི་དོན་བདག་གིས་འཚལ་བ་ལྟར་ན།

བྱང་ཆུབ་སེམས་དཔའ་གང་གིས་འདོད་ཆགས་བསྐྱེད་པ་དང་།

ཞེ་སྡང་བསྐྱེད་པ་དང་།

གཏི་མུག་བསྐྱེད་པ་དེ་ནི་སེམས་དང་པོ་བསྐྱེད་པ་དང་ལྡན་པ་ཞེས་བགྱིའོ།

དེ་ནས་ལྷའི་བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ།

འཇམ་དཔལ་གལ་ཏེ་འདོད་ཆགས་དང་།

ཞེ་སྡང་དང་།

གཏི་མུག་དག་བསྐྱེད་པ་བྱང་ཆུབ་སེམས་དཔའ་སེམས་དང་པོ་བསྐྱེད་པ་ལགས་ན།

དེ་ལྟ་ན་བྱིས་པ་སོ་སོའི་སྐྱེ་བོ་རྣམས་ཀྱང་སེམས་དང་པོ་བསྐྱེད་པ་དང་ལྡན་པ་ལགས་པར་འགྱུར་རོ།

དེ་ཅིའི་སླད་དུ་ཞེ་ན།

འཇམ་དཔལ་འདི་ལྟར་དེ་དག་ནི་འདོད་ཆགས་དང་།

ཞེ་སྡང་དང་།

གཏི་མུག་དག་སྐྱེད་པར་བགྱི་བའི་སླད་དུའོ།

འཇམ་དཔལ་གྱིས་སྨྲས་པ།

ལྷའི་བུ་བྱིས་པ་སོ་སོའི་སྐྱེ་བོ་རྣམས་ཀྱིས་ནི་འདོད་ཆགས་དང་།

ཞེ་སྡང་དང་།

གཏི་མུག་དག་སྐྱེད་པར་མི་ནུས་སོ།

དེ་ཅིའི་ཕྱིར་ཞེ་ན།

ལྷའི་བུ་འདོད་ཆགས་དང་།

ཞེ་སྡང་དང་།

གཏི་མུག་དག་ནི་སངས་རྒྱས་རྣམས་དང་།

རང་སངས་རྒྱས་རྣམས་དང་།

ཉན་ཐོས་རྣམས་དང་།

བྱང་ཆུབ་སེམས་དཔའ་ཕྱིར་མི་ལྡོག་པ་རྣམས་ཀྱིས་བསྐྱེད་པའི་ཕྱིར་རོ།

ལྷའི་བུས་སྨྲས་པ།

འཇམ་དཔལ་འཁོར་འདིས་ཁྱོད་ཀྱིས་དགོངས་པའི་གསུང་མི་རྟོགས་ཤིང་མ་འཚལ་ན།

ཐེ་ཚོམ་འཚལ་བར་འགྱུར་གྱིས་རྣམ་པར་ཕྱེ་སྟེ་བསྟན་དུ་གསོལ།

འཇམ་དཔལ་གྱིས་སྨྲས་པ།

ལྷའི་བུ་འདི་ཇི་སྙམ་དུ་སེམས།

འདབ་ཆགས་བྱ་སྟེང་གི་བར་སྣང་ལ་རྒྱུ་བ་དེ་འཕུར་ཏེ་སོང་ངམ།

འོན་ཏེ་འདུག་སྙམ།

ལྷའི་བུས་སྨྲས་པ།

འཇམ་དཔལ་འཕུར་ཏེ་མཆིས་སོ།

འཇམ་དཔལ་གྱིས་སྨྲས་པ།

ལྷའི་བུ་ཁོ་བོ་ནི་དེ་ལས་བསམས་ནས་དེ་སྐད་ཅེས།

གང་དག་འདོད་ཆགས་དང་།

ཞེ་སྡང་དང་།

གཏི་མུག་དག་སྐྱེད་པར་བྱེད་པ་དེ་དག་ནི་སངས་རྒྱས་རྣམས་དང་།

རང་སངས་རྒྱས་རྣམས་དང་།

ཉན་ཐོས་རྣམས་དང་།

བྱང་ཆུབ་སེམས་དཔའ་ཕྱིར་མི་ལྡོག་པ་རྣམས་ཞེས་བྱའོ་ཞེས་

སྟོན་ཏོ།

ལྷའི་བུ་གང་ལ་རྟེན་མེད་པ་དེ་ནི་སྐྱེ་བ་ཡིན་ནོ།

གང་ལ་ལྷག་པར་ཆགས་པ་མེད་པ་དེ་ནི་སྐྱེ་བ་ཡིན་ནོ།

གང་ལ་མངོན་པར་ཞེན་པ་མེད་པ་དེ་ནི་སྐྱེ་བ་ཡིན་ནོ།

ལྷའི་བུ་གང་ལ་རྟེན་མེད་པ་དང་ལྷག་པར་ཆགས་པ་མེད་པ་དང་།

མངོན་པར་ཞེན་པ་མེད་པ་དེ་ནི་སྐྱེ་བ་ཡིན་ཏེ།

སྐྱེ་བ་ཞེས་བྱ་བ་དེ་ནི་གཞི་མེད་པ་ཡིན་ནོ།

སྐྱེ་བ་ཞེས་བྱ་བ་དེ་ནི་བརྟག་ཏུ་མེད་པའི་གཞི་ཡིན་ནོ།

སྐྱེ་བ་ཞེས་བྱ་བ་དེ་ནི་འབྱུང་བ་མེད་པའི་གཞི་ཡིན་ནོ།

སྐྱེ་བ་ཞེས་བྱ་བ་དེ་ནི་ངོ་བོ་ཉིད་མེད་པའི་གཞི་ཡིན་ནོ།

སྐྱེ་བ་ཞེས་བྱ་བ་དེ་ནི་དངོས་པོ་མེད་པའི་གཞི་ཡིན་ནོ།

སྐྱེ་བ་ཞེས་བྱ་བ་དེ་ནི་འོང་བ་མེད་པའི་གཞི་ཡིན་ནོ།

སྐྱེ་བ་ཞེས་བྱ་བ་དེ་ནི་འགྲོ་བ་མེད་པའི་གཞི་ཡིན་ནོ།

སྐྱེ་བ་ཞེས་བྱ་བ་དེ་ནི་སྐྱེ་བ་མེད་པའི་གཞི་ཡིན་ནོ།

སྐྱེ་བ་ཞེས་བྱ་བ་དེ་ནི་དམིགས་པ་མེད་པའི་གཞི་ཡིན་ནོ།

སྐྱེ་བ་ཞེས་བྱ་བ་དེ་ནི་རྣམ་པར་རིག་པ་མེད་པའི་གཞི་ཡིན་ནོ།

སྐྱེ་བ་ཞེས་བྱ་བ་དེ་ནི་རྡུལ་མེད་པའི་གཞི་ཡིན་ནོ།

སྐྱེ་བ་ཞེས་བྱ་བ་དེ་ནི་རློམ་སེམས་མེད་པའི་གཞི་ཡིན་ནོ།

སྐྱེ་བ་ཞེས་བྱ་བ་དེ་ནི་སྤྱོད་པ་མེད་པའི་གཞི་ཡིན་ནོ།

སྐྱེ་བ་ཞེས་བྱ་བ་དེ་ནི་བརྗོད་དུ་མེད་པའི་གཞི་ཡིན་ནོ།

སྐྱེ་བ་ཞེས་བྱ་བ་དེ་ནི་མི་ཕྱེད་པའི་གཞི་ཡིན་ནོ།

སྐྱེ་བ་ཞེས་བྱ་བ་དེ་ནི་ཡི་གེ་མེད་པའི་གཞི་ཡིན་ནོ།

སྐྱེ་བ་ཞེས་བྱ་བ་དེ་ནི་གཟུང་བ་མེད་པའི་གཞི་ཡིན་ནོ།

སྐྱེ་བ་ཞེས་བྱ་བ་དེ་ནི་གནས་མེད་པའི་གཞི་ཡིན་ནོ།

སྐྱེ་བ་ཞེས་བྱ་བ་དེ་ནི་བླང་བ་མེད་པའི་གཞི་ཡིན་ནོ།

སྐྱེ་བ་ཞེས་བྱ་བ་དེ་ནི་དོར་བ་མེད་པའི་གཞི་ཡིན་ནོ།

སྐྱེ་བ་ཞེས་བྱ་བ་དེ་ནི་ཕྱིར་མི་ཟློགས་པའི་གཞི་ཡིན་ཏེ།

ལྷའི་བུ་ཆོས་དེ་ལ་རློམ་སེམས་སུ་མི་བྱེད།

མངོན་པར་ཞེན་པར་མི་བྱེད།

སེམས་པར་མི་བྱེད།

ཤེས་པར་མི་བྱེད།

ལྟ་བར་མི་བྱེད།

ཉན་པར་མི་བྱེད།

རྣམ་པར་ཤེས་པར་མི་བྱེད།

ལེན་པར་མི་བྱེད།

གཏོང་བར་མི་བྱེད།

སྐྱེད་པར་མི་བྱེད།

འགོག་པར་མི་བྱེད་པ་གང་ཡིན་པ་དེ་ནི་བྱང་ཆུབ་སེམས་དཔའི་སེམས་དང་པོ་བསྐྱེད་པ་ཡིན་ནོ།

ལྷའི་བུ་དེ་ལྟ་བས་ན་བྱང་ཆུབ་སེམས་དཔའ་ཚུལ་དེ་དང་།

ཆོས་ཀྱི་དབྱིངས་དེ་དང་།

མཉམ་པ་ཉིད་དེ་དང་།

མཐའ་དེ་དང་།

ཐབས་ལ་མཁས་པ་དེས་

འདོད་ཆགས་བསྐྱེད་པར་བྱའོ།

ཞེ་སྡང་དང་།

གཏི་མུག་བསྐྱེད་པར་བྱའོ།

མིག་གི་རྟེན་བསྐྱེད་པར་བྱའོ།

ཡིད་ཀྱི་རྟེན་གྱི་བར་དུ་བསྐྱེད་པར་བྱའོ།

གཟུགས་ལ་ལྷག་པར་ཆགས་པ་བསྐྱེད་པར་བྱའོ།

རྣམ་པར་ཤེས་པ་ལ་ལྷག་པར་ཆགས་པའི་བར་དུ་བསྐྱེད་པར་བྱའོ།

མིང་བསྐྱེད་པར་བྱའོ།

གཟུགས་བསྐྱེད་པར་བྱའོ།

རྒྱུ་བསྐྱེད་པར་བྱའོ།

ལྟ་བའི་རྣམ་པ་ཐམས་ཅད་བསྐྱེད་པར་བྱའོ།

མ་རིག་པ་བསྐྱེད་པར་བྱའོ།

སྲིད་པའི་སྲེད་པ་བསྐྱེད་པར་བྱའོ།

རྟེན་ཅིང་འབྲེལ་བར་འབྱུང་བའི་ཡན་ལག་བཅུ་གཉིས་ལ་འཇུག་པའི་བར་དུ་བསྐྱེད་པར་བྱའོ།

འདོད་པའི་ཡོན་ཏན་ལྔ་བསྐྱེད་པར་བྱའོ།

ཁམས་གསུམ་པ་ལ་མངོན་པར་ཞེན་པ་བསྐྱེད་པར་བྱའོ།

ངར་འཛིན་པ་དང་།

ང་ཡིར་འཛིན་པ་བསྐྱེད་པར་བྱའོ།

འཇིག་ཚོགས་བསྐྱེད་པར་བྱའོ།

འཇིག་ཚོགས་ལ་ལྟ་བ་བསྐྱེད་པར་བྱའོ།

ལྟ་བའི་རྣམ་པ་དྲུག་ཅུ་རྩ་གཉིས་བསྐྱེད་པར་བྱའོ།

སངས་རྒྱས་སུ་འདུ་ཤེས་པ་དང་།

ཆོས་སུ་འདུ་ཤེས་པ་དང་།

དགེ་འདུན་དུ་འདུ་ཤེས་པ་བསྐྱེད་པར་བྱའོ།

བདག་ཏུ་འདུ་ཤེས་པ་དང་།

གཞན་དུ་འདུ་ཤེས་པ་བསྐྱེད་པར་བྱའོ།

སར་འདུ་ཤེས་པ་བསྐྱེད་པར་བྱའོ།

ཆུར་འདུ་ཤེས་པ་དང་།

མེར་འདུ་ཤེས་པ་དང་།

རླུང་དུ་འདུ་ཤེས་པ་དང་།

ནམ་མཁར་འདུ་ཤེས་པ་དང་།

རྣམ་པར་ཤེས་པར་འདུ་ཤེས་པ་བསྐྱེད་པར་བྱའོ།

ཕྱིན་ཅི་ལོག་བཞི་བསྐྱེད་པར་བྱའོ།

སྒྲིབ་པ་ལྔ་དང་།

རྣམ་པར་ཤེས་པ་གནས་པ་བཞི་དང་།

ལོག་པ་ཉིད་བརྒྱད་དང་།

མི་དགེ་བ་བཅུའི་ལས་ཀྱི་ལམ་རྣམས་བསྐྱེད་པར་བྱའོ།

ལྷའི་བུ་མདོར་ན་བྱང་ཆུབ་སེམས་དཔས་རྟོག་པ་ཐམས་ཅད་དང་།

ཡོངས་སུ་རྟོག་པ་ཐམས་ཅད་དང་།

རྣམ་པར་རྟོག་པ་ཐམས་ཅད་དང་།

མཚན་མ་ཐམས་ཅད་དང་།

སྤྲོས་པ་ཐམས་ཅད་དང་།

འདོད་པ་ཐམས་ཅད་དང་།

འཛིན་པ་ཐམས་ཅད་དང་།

མངོན་པར་ཞེན་པ་ཐམས་ཅད་དང་།

འདུ་ཤེས་ཐམས་ཅད་དང་།

རློམ་སེམས་ཐམས་ཅད་དང་།

ཆགས་པ་ཐམས་ཅད་བསྐྱེད་པར་བྱ་སྟེ།

ལྷའི་བུ་རྣམ་གྲངས་དེས་ན་ཁྱོད་ཀྱིས་འདི་ལྟར་ཆོས་དེ་ལ་མངོན་པར་

ཞེན་པ་མེད་པ་དང་།

ལྷག་པར་ཆགས་པ་མེད་པ་གང་ཡིན་པ་དེ་ནི་སྐྱེ་བ་ཞེས་བྱ་བ་ཡིན་པར་རིག་པར་བྱའོ།

དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ཏེ།

འཇམ་དཔལ་གང་གི་ཕྱིར་ཁྱོད་ཀྱིས་འདི་ལྟ་སྟེ།

སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་ལ་བསྙེན་བཀུར་བྱས་པའི་ཕྱིར་བྱང་ཆུབ་སེམས་དཔའ་རྣམས་ཀྱི་སེམས་དང་པོ་སྐྱེ་བ་འདི་བསྟན་པ་ལེགས་སོ་ལེགས་སོ།

དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ།

བཅོམ་ལྡན་འདས་དེ་ལྟར་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའི་སེམས་དང་པོ་སྐྱེ་བ་འདི་བསྟན་པའི་སེམས་སྐྱེ་བ་འདི་ནི་མི་སྐྱེ་བའི་ཆོས་ལ་བཟོད་པ་ཐོབ་པ་དང་མཚུངས་སོ།

བཅོམ་ལྡན་འདས་ཀྱིས་བཀའ་སྩལ་པ།

ཤཱ་རིའི་བུ་དེ་དེ་བཞིན་ནོ།

ཇི་སྐད་སྨྲས་པ་དེ་བཞིན་ཏེ།

ཤཱ་རིའི་བུ་གང་གི་ཚེ་དེ་བཞིན་གཤེགས་པ་མར་མེ་མཛད་ཀྱིས་ང་ལ་བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་བསྐལ་པ་གྲངས་མེད་པ་དག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་པ་དེའི་ཚེ་ན་ཤཱ་རིའི་བུ་ང་སེམས་སྐྱེ་བ་འདི་དང་བྲལ་བར་མ་གྱུར་ཏེ།

ཤཱ་རིའི་བུ་དེ་ན་ངས་མི་སྐྱེ་བའི་ཆོས་ལ་བཟོད་པ་ཐོབ་པ་གང་ཡིན་པ་དང་།

བྱང་ཆུབ་སེམས་དཔའི་སེམས་དང་པོ་སྐྱེ་བ་དེ་ནི་འཇམ་དཔལ་གཞོན་ནུར་གྱུར་པས་ཇི་སྐད་བསྟན་པ་འདི་ཡིན་ནོ།

འཇམ་དཔལ་གྱིས་གསོལ་པ།

བཅོམ་ལྡན་འདས་ཀྱིས་བཀའ་སྩལ་པའི་དོན་བདག་གིས་འཚལ་བ་ལྟར་ན།

བྱང་ཆུབ་སེམས་དཔའི་སེམས་སྐྱེ་བ་ཐམས་ཅད་ནི་སེམས་དང་པོ་སྐྱེ་བ་ལགས་སོ།

དེ་ཅིའི་སླད་དུ་ཞེ་ན།

བཅོམ་ལྡན་འདས་འདི་ལྟར་སེམས་སྐྱེ་བ་ཐམས་ཅད་ནི་སྐྱེ་བ་མ་མཆིས་པ་ལགས་ལ།

སྐྱེ་བ་མ་མཆིས་པ་གང་ལགས་པ་དེ་ནི་བྱང་ཆུབ་སེམས་དཔའི་སེམས་དང་པོ་སྐྱེ་བ་ལགས་པའི་སླད་དུའོ།

བསྟན་པ་འདི་བཤད་པ་ན་བྱང་ཆུབ་སེམས་དཔའ་ཉི་ཁྲི་སུམ་སྟོང་གིས་མི་སྐྱེ་བའི་ཆོས་ལ་བཟོད་པ་ཐོབ་བོ།

དགེ་སློང་ལྔ་བརྒྱ་ནི་

ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ།

ལྷའི་བུ་དུང་ཕྱུར་ཕྲག་དྲུག་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ །

དེ་ནས་བཅོམ་ལྡན་འདས་ལ་གནས་བརྟན་འོད་སྲུང་ཆེན་པོས་འདི་སྐད་ཅེས་གསོལ་ཏོ།

བཅོམ་ལྡན་འདས་དེ་ལྟར་འཇམ་དཔལ་གཞོན་ནུར་གྱུར་པས་ཆོས་བསྟན་པས་སེམས་ཅན་འདི་སྙེད་ཀྱི་དོན་བགྱིས་པ་ནི་འཇམ་དཔལ་གཞོན་ནུར་གྱུར་པ་དཀའ་བ་བགྱིད་པ་ལགས་སོ།

འཇམ་དཔལ་གྱིས་སྨྲས་པ།

བཙུན་པ་འོད་སྲུང་ཆེན་པོ་ཁོ་བོ་ནི་དཀའ་བ་བྱེད་པ་མ་ཡིན་ནོ།

དེ་ཅིའི་ཕྱིར་ཞེ་ན།

བཙུན་པ་འོད་སྲུང་ཆེན་པོ་ཆོས་ཐམས་ཅད་བྱེད་པ་མེད་པ།

མ་བྱས་པ།

བྱ་བ་མེད་པ་ཡིན་པས་ཁོ་བོ་ཆོས་འགའ་ཡང་མི་བྱེད།

འཇིག་པར་མི་བྱེད་པའི་ཕྱིར་རོ།

ཁོ་བོ་ནི་སེམས་ཅན་འགའ་ཡང་གྲོལ་བར་མི་བྱེད།

འཆིང་བར་མི་བྱེད་དོ།

དེ་ཅིའི་ཕྱིར་ཞེ་ན།

སེམས་ཅན་མེད་པའི་ཕྱིར་རོ།

བཙུན་པ་འོད་སྲུང་ཆེན་པོ་གཞན་ཡང་དེ་སྐད་ཅེས་དཀའ་བ་བྱེད་པ་ཡིན་ནོ་ཞེས་ཟེར་བ་ནི་བཙུན་པ་འོད་སྲུང་ཆེན་པོ་ཁོ་བོ་ནི་དཀའ་བ་བྱེད་པ་མ་ཡིན་ཏེ།

དེ་བཞིན་གཤེགས་པ་ཡང་མ་ཡིན།

དགྲ་བཅོམ་པ་རྣམས་ཀྱང་མ་ཡིན།

རང་སངས་རྒྱས་རྣམས་ཀྱང་མ་ཡིན་ནོ།

བཙུན་པ་འོད་སྲུང་ཆེན་པོ་གང་དག་བྱིས་པ་སོ་སོའི་སྐྱེ་བོ་རྣམས་དཀའ་བ་བྱེད་པ་ཡིན་ནོ་ཞེས་ཡང་དག་པར་སྨྲ་བརྗོད་པར་གྱུར་ན་དེ་དག་ནི་ཡང་དག་པར་སྨྲ་བརྗོད་པ་ཡིན་ནོ།

དེ་ཅིའི་ཕྱིར་ཞེ་ན།

བཙུན་པ་འོད་སྲུང་ཆེན་པོ་འདི་ལྟར་སངས་རྒྱས་ཐམས་ཅད་ཀྱིས་མ་བརྙེས་མི་བརྙེས་བརྙེས་པར་མི་འགྱུར་བ་གང་ཡིན་པ་དང་།

ཉན་ཐོས་ཐམས་ཅད་དང་།

རང་སངས་རྒྱས་ཐམས་ཅད་ཀྱིས་མ་རྙེད་མི་རྙེད་རྙེད་པར་མི་འགྱུར་བ་གང་ཡིན་པ་དེ་ནི་བྱིས་པ་སོ་སོའི་སྐྱེ་བོ་རྣམས་ཀྱིས་རྙེད་པའི་ཕྱིར་རོ།

འོད་སྲུང་ཆེན་པོས་སྨྲས་པ།

འཇམ་དཔལ་སངས་རྒྱས་ཐམས་ཅད་ཀྱིས་ཅི་ཞིག་མ་བརྙེས།

འཇམ་དཔལ་གྱིས་སྨྲས་པ།

བཙུན་པ་འོད་སྲུང་ཆེན་པོ་བདག་མ་བརྙེས་སོ།

སེམས་ཅན་

མ་བརྙེས་སོ།

སྲོག་མ་བརྙེས་སོ།

གང་ཟག་མ་བརྙེས་སོ།

རྟག་པ་མ་བརྙེས་སོ།

ཆད་པ་མ་བརྙེས་སོ།

ཕུང་པོ་རྣམས་མ་བརྙེས་སོ།

ཁམས་རྣམས་མ་བརྙེས་སོ།

སྐྱེ་མཆེད་རྣམས་མ་བརྙེས་སོ།

མིང་མ་བརྙེས་སོ།

གཟུགས་མ་བརྙེས་སོ།

འདོད་པའི་ཁམས་མ་བརྙེས་སོ།

གཟུགས་ཀྱི་ཁམས་མ་བརྙེས་སོ།

གཟུགས་མེད་པའི་ཁམས་མ་བརྙེས་སོ།

རྟོག་པ་དང་།

ཡོངས་སུ་རྟོག་པ་དང་།

རྣམ་པར་རྟོག་པ་དང་།

རྒྱུ་དང་སྐྱེ་བ་རྣམས་མ་བརྙེས་སོ།

ཕྱིན་ཅི་ལོག་རྣམས་མ་བརྙེས་སོ།

འདོད་ཆགས་དང་།

ཞེ་སྡང་དང་།

གཏི་མུག་དག་མ་བརྙེས་སོ།

འཇིག་རྟེན་འདི་དང་།

འཇིག་རྟེན་ཕ་རོལ་མ་བརྙེས་སོ།

ངར་འཛིན་པ་དང་།

ང་ཡིར་འཛིན་པ་དག་མ་བརྙེས་ཏེ།

བཙུན་པ་འོད་སྲུང་ཆེན་པོ་མདོར་ན་ཆོས་ཐམས་ཅད་མ་བརྙེས།

མ་བཤིག །

མ་བཀྲོལ།

མ་བཟུང་།

མ་བཏང་།

མ་སྦྱར།

མ་ཕྱེའོ།

བཙུན་པ་འོད་སྲུང་ཆེན་པོ་རྣམ་གྲངས་དེས་ན་ཁྱོད་ཀྱིས་འདི་ལྟར་སངས་རྒྱས་ཐམས་ཅད་ཀྱིས་མ་བརྙེས་པ་གང་ཡིན་པ་དེ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་རྣམས་ཀྱིས་རྙེད་པར་རིག་པར་བྱ་སྟེ།

དེའི་ཕྱིར་དེ་དག་ནི་དཀའ་བ་བྱེད་པ་ཡིན་ནོ།

སངས་རྒྱས་རྣམས་ཀྱིས་མ་མཛད་པ་གང་ཡིན་པ་དང་།

ཉན་ཐོས་རྣམས་དང་རང་སངས་རྒྱས་རྣམས་ཀྱིས་མ་བྱས་པ་གང་ཡིན་པ་དེ་ཡང་བྱིས་པ་སོ་སོའི་སྐྱེ་བོ་རྣམས་བྱེད་དོ།

འོད་སྲུང་ཆེན་པོས་སྨྲས་པ།

འཇམ་དཔལ་ཅི་ཞིག་བྱེད།

འཇམ་དཔལ་གྱིས་སྨྲས་པ།

བཙུན་པ་འོད་སྲུང་ཆེན་པོ་རྟག་པ་བྱེད་དོ།

ཆད་པ་བྱེད་དོ།

ཀུན་ཏུ་སྦྱོར་བ་བྱེད་དོ།

མངོན་པར་གནས་པ་བྱེད་དོ།

རློམ་སེམས་བྱེད་དོ།

སེམས་པ་བྱེད་དོ།

སྐྱེ་བ་བྱེད་དོ།

འཇིག་པ་བྱེད་དོ།

ལེན་པ་བྱེད་དོ།

འདོར་བ་བྱེད་དོ།

འཕྲོ་བ་བྱེད་དོ།

རྟོག་པ་བྱེད་དོ།

རྗེས་སུ་ཆགས་པ་བྱེད་དོ།

ཁོང་ཁྲོ་བ་བྱེད་དོ།

ཁེངས་པ་བྱེད་དོ།

འདུད་པ་བྱེད་དེ།

བཙུན་པ་འོད་སྲུང་ཆེན་པོ་སངས་རྒྱས་བཅོམ་ལྡན་འདས་རྣམས་ཀྱིས་མ་མཛད་མི་མཛད་མཛད་པར་མི་འགྱུར་བའི་ཆོས་གང་དག་ཡིན་པ་

དེ་དག་བྱིས་པ་སོ་སོའི་སྐྱེ་བོ་རྣམས་བྱེད་པས་ན་དེའི་ཕྱིར་དེ་དག་ནི་དཀའ་བ་བྱེད་པ་ཡིན་ནོ།

དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ།

བཅོམ་ལྡན་འདས་མི་སྐྱེ་བའི་ཆོས་ལ་བཟོད་པ་མི་སྐྱེ་བའི་ཆོས་ལ་བཟོད་པ་ཞེས་བགྱི་ན་བཅོམ་ལྡན་འདས་བྱང་ཆུབ་སེམས་དཔའ་མི་སྐྱེ་བའི་ཆོས་ལ་བཟོད་པ་ཞེས་བགྱི་བ་དེ་ནི་གང་ལགས།

མི་སྐྱེ་བའི་ཆོས་ལ་བཟོད་པ་ཐོབ་པའི་བྱང་ཆུབ་སེམས་དཔས་ནི་ཅི་ཞིག་འཐོབ།

བཅོམ་ལྡན་འདས་ཀྱིས་བཀའ་སྩལ་པ།

འཇམ་དཔལ་ཐོབ་པ་ཅི་ཡང་མེད་པའི་ཕྱིར་མི་སྐྱེ་བའི་ཆོས་ལ་བཟོད་པ་ཐོབ་པ་ཞེས་བྱའོ།

དེ་ཅིའི་ཕྱིར་ཞེ་ན།

བཟོད་པ་དེ་ནི་འཐོབ་པ་མེད་པ་སྟེ།

ཐོབ་པ་མེད་པས་ཐོབ་པ་དང་བྲལ་བ།

མ་ཐོབ་པ།

མ་བཤིག་པ་ཡིན་པའི་ཕྱིར་རོ།

འཇམ་དཔལ་མི་སྐྱེ་བའི་ཆོས་ལ་བཟོད་པ་ཞེས་བྱ་བ་དེ་ནི་ཆོས་ཐམས་ཅད་སྐྱེ་བ་མེད་པ་ཞེས་བྱ་བ་བཟོད་པ་དང་།

ཆོས་ཐམས་ཅད་འོང་བ་མེད་པ་ཞེས་བྱ་བ་བཟོད་པ་དང་།

ཆོས་ཐམས་ཅད་འགྲོ་བ་མེད་པ་ཞེས་བྱ་བ་བཟོད་པ་དང་།

ཆོས་ཐམས་ཅད་མཉམ་པ་མེད་པ་ཞེས་བྱ་བ་བཟོད་པ་དང་།

ཆོས་ཐམས་ཅད་བདག་པོ་མེད་པ་ཞེས་བྱ་བ་བཟོད་པ་དང་།

ཆོས་ཐམས་ཅད་བླང་བ་མེད་པ་ཞེས་བྱ་བ་བཟོད་པ་དང་།

ཆོས་ཐམས་ཅད་དོར་བ་མེད་པ་ཞེས་བྱ་བ་བཟོད་པ་དང་།

ཆོས་ཐམས་ཅད་དངོས་པོ་མེད་པ་ཞེས་བྱ་བ་བཟོད་པ་དང་།

ཆོས་ཐམས་ཅད་ངོ་བོ་ཉིད་མེད་པ་ཞེས་བྱ་བ་བཟོད་པ་དང་།

ཆོས་ཐམས་ཅད་འདྲ་བ་མེད་པ་ཞེས་བྱ་བ་བཟོད་པ་དང་།

ཆོས་ཐམས་ཅད་རྡུལ་མེད་ཅིང་ནམ་མཁའ་དང་མཚུངས་པ་ཞེས་བྱ་བ་བཟོད་པ་དང་།

ཆོས་ཐམས་ཅད་དབྱེར་མེད་ཅིང་གཅད་དུ་མེད་པ་ཞེས་བྱ་བ་བཟོད་པ་དང་།

ཆོས་ཐམས་ཅད་ཀུན་ནས་ཉོན་མོངས་པ་མེད་པ་ཞེས་བྱ་བ་བཟོད་པ་དང་།

ཆོས་ཐམས་ཅད་རྣམ་པར་བྱང་བ་མེད་པ་ཞེས་བྱ་བ་བཟོད་པ་དང་།

ཆོས་ཐམས་ཅད་སྟོང་པ་དང་།

མཚན་མ་མེད་པ་དང་།

སྨོན་པ་མེད་པ་ཞེས་བྱ་བ་བཟོད་པ་དང་།

ཆོས་ཐམས་ཅད་འདོད་ཆགས་དང་བྲལ་བ་དང་།

ཞེ་སྡང་དང་བྲལ་བ་དང་།

གཏི་

མུག་དང་བྲལ་བ་ཞེས་བྱ་བ་བཟོད་པ་དང་།

ཆོས་ཐམས་ཅད་དེ་བཞིན་ཉིད་དང་།

ཆོས་ཀྱི་དབྱིངས་དང་།

ཡང་དག་པའི་མཐའ་ལ་གནས་པ་ཞེས་བྱ་བ་བཟོད་པ་དང་།

ཆོས་ཐམས་ཅད་མ་བརྟགས་པ་དང་།

རྣམ་པར་མ་བརྟགས་པ་དང་།

མ་རློམས་པ་དང་།

མ་སྤྲོས་པ་དང་།

མ་བསམས་པ་དང་།

མ་བྱས་པ་དང་།

སྟོབས་མེད་པ་དང་།

ཉམ་ཆུང་བ་དང་།

གསོག་དང་།

གསོ་བ་དང་།

སྒྱུ་མ་ལྟ་བུ་དང་།

རྨི་ལམ་ལྟ་བུ་དང་།

བྲག་ཅ་ལྟ་བུ་དང་།

མིག་ཡོར་ལྟ་བུ་དང་།

སྨིག་རྒྱུ་ལྟ་བུ་དང་།

ཆུ་ཤིང་གི་སྙིང་པོ་ལྟ་བུ་དང་།

ཆུ་བུར་ལྟ་བུ་དང་།

དབུ་བ་རྡོས་པ་ལྟ་བུ་ཞེས་བྱ་བ་བཟོད་ཅིང་དེ་དག་ནི་ཆོས་རྣམས་ཀྱང་མ་ཡིན།

ཆོས་མ་ཡིན་པ་རྣམས་ཀྱང་མ་ཡིན་ཏེ།

མིང་གིས་བརྗོད་པ་ཁོ་ན་ཡིན་ཞིང་མིང་དེ་ཡང་གཡོ་བ་མེད་པ།

རང་བཞིན་གྱིས་དབེན་པ་ཡིན་ནོ་ཞེས་བྱ་བ་དེ་ལྟར་བཟོད་པར་བྱེད།

མོས་པར་བྱེད།

ཡིད་ཆེས་པར་བྱེད།

འཇིག་པར་བྱེད།

རྟོག་པར་བྱེད་ཅིང་ནེམ་ནུར་མི་བྱེད།

ཐེ་ཚོམ་མི་ཟ་ལ།

མི་སྐྲག་མི་དངང་ཞིང་དངང་བར་མི་འགྱུར་བར་ལུས་ཀྱིས་རེག་པར་བྱས་ནས་བསྒྲུབས་ཏེ་གནས་ཤིང་ལུས་ཀྱང་མི་དམིགས་ཤིང་གནས་པ་ཡང་མི་དམིགས་པ་དེ་ནི་འཇམ་དཔལ་འདི་ལྟ་སྟེ།

མཚན་མ་ཐམས་ཅད་རབ་ཏུ་མི་རྒྱུ་བའི་ཕྱིར་བྱང་ཆུབ་སེམས་དཔའི་མི་སྐྱེ་བའི་ཆོས་ལ་བཟོད་པ་ཞེས་བྱའོ།

འཇམ་དཔལ་གྱིས་གསོལ་པ།

བཅོམ་ལྡན་འདས་བཟོད་པ་བཟོད་པ་ཞེས་བགྱི་བ་ནི་ཆོས་གང་ཆོས་གང་གིས་ཀྱང་རྨས་པར་བགྱིར་མ་མཆིས་པ་དེ་ནི་བཟོད་པ་ཞེས་བགྱིའོ།

དེ་ནས་ལྷའི་བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ།

འཇམ་དཔལ་ཆོས་གང་ཞིག་ཆོས་གང་གིས་རྨས་པར་བགྱིད།

འཇམ་དཔལ་གྱིས་སྨྲས་པ།

ལྷའི་བུ་མིག་ནི་གཟུགས་ཡིད་དུ་འོང་བ་དང་།

ཡིད་དུ་མི་འོང་བ་དག་གིས་རྨས་པར་བྱེད་དོ།

རྣ་བ་ནི་སྒྲ་དག་གིས་སོ།

སྣ་ནི་དྲི་དག་གིས་སོ།

ལྕེ་ནི་རོ་དག་གིས་སོ།

ལུས་ནི་རེག་བྱ་དག་གིས་སོ།

ལྷའི་བུ་ཡིད་ནི་ཆོས་ཡིད་དུ་འོང་བ་དང་།

ཡིད་དུ་མི་འོང་བ་དག་

གིས་རྨས་པར་བྱེད་དོ།

ལྷའི་བུ་བྱང་ཆུབ་སེམས་དཔའ་ནི་མིག་གིས་གཟུགས་མཐོང་ཡང་མཚན་མར་འཛིན་པར་མི་བྱེད།

མངོན་རྟགས་སུ་འཛིན་པར་མི་བྱེད།

རྟོག་པར་མི་བྱེད།

རྣམ་པར་རྟོག་པར་མི་བྱེད།

རྗེས་སུ་ཆགས་པར་མི་བྱེད།

ཁོང་ཁྲོ་བར་མི་བྱེད་དེ།

གཟུགས་རང་བཞིན་གྱིས་སྟོང་པར་ཤེས་པར་བྱེད་ཅིང་རློམ་སེམས་སུ་མི་བྱེད་ཅིང་རྨས་པར་མི་བྱེད་དོ།

དེ་བཞིན་དུ་རྣ་བས་སྒྲ་ཐོས་པ་དང་།

སྣས་དྲི་བསྣམས་པ་དང་།

ལྕེས་རོ་མྱང་བ་དང་།

ལུས་ཀྱིས་རེག་བྱ་རེག་པ་དང་།

ཡིད་ཀྱིས་ཆོས་ཤེས་ཀྱང་མཚན་མར་འཛིན་པར་མི་བྱེད།

མངོན་རྟགས་སུ་འཛིན་པར་མི་བྱེད།

རྟོག་པར་མི་བྱེད།

རྣམ་པར་རྟོག་པར་མི་བྱེད།

རྗེས་སུ་ཆགས་པར་མི་བྱེད།

ཁོང་ཁྲོ་བར་མི་བྱེད་དེ།

ཆོས་རང་བཞིན་གྱིས་སྟོང་པར་ཤེས་པར་བྱེད་ཅིང་རློམ་སེམས་སུ་མི་བྱེད།

རྨས་པར་མི་བྱེད་དོ།

ལྷའི་བུ་དེ་ལྟར་སྐྱེ་མཆེད་དྲུག་པོ་དག་ལ་ཆགས་པར་མི་བྱེད་རྨས་པར་མི་བྱེད་དེ།

རྨས་པར་མི་བྱེད་པ་གང་ཡིན་པ་དེ་ནི་བཟོད་པ་ཞེས་བྱའོ།

ལྷའི་བུ་བཟོད་པ་དེ་ལྟ་བུ་ཐོབ་པའི་བྱང་ཆུབ་སེམས་དཔའ་ནི་ཆོས་རྣམས་ལ་སྐྱེ་བའམ།

མི་སྐྱེ་བར་མི་རྟོག་གོ །

ཆོས་རྣམས་ལ་ཟག་པ་དང་བཅས་པའམ།

ཟག་པ་མེད་པའམ།

ཁ་ན་མ་ཐོ་བ་དང་བཅས་པའམ།

ཁ་ན་མ་ཐོ་བ་མེད་པའམ།

འདུས་བྱས་སམ།

འདུས་མ་བྱས་སུ་མི་རྟོག་སྟེ།

གང་གི་ཚེ་མི་རྟོག་པ་དེའི་ཚེ་མི་སྐྱེ་བའི་ཆོས་ལ་བཟོད་པ་ཞེས་བྱའོ།

བསྟན་པ་འདི་བཤད་པ་ན་སྲོག་ཆགས་དྲུག་ཁྲི་ཉིས་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ།

བྱང་ཆུབ་སེམས་དཔའ་ཁྲི་ཉིས་སྟོང་གིས་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ།

དེ་ནས་ལྷའི་བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ།

འཇམ་དཔལ་ས་ནས་སར་འཕར་བས་ནས་སར་འཕར་བ་ཞེས་བགྱི་ན།

ཇི་ལྟར་བྱང་ཆུབ་སེམས་དཔའ་ས་ནས་སར་འཕར་བར་བགྱིད།

འཇམ་དཔལ་གྱིས་སྨྲས་པ།

ལྷའི་བུ་ས་ནས་སར་

འཕར་བར་བྱེད་པ་གང་ཡིན་པ་དེ་ལ་དྲིས་ཤིག །

ལྷའི་བུས་སྨྲས་པ།

འཇམ་དཔལ་བྱང་ཆུབ་སེམས་དཔའ་ས་ནས་སར་འཕར་ཞིང་ས་བཅུ་པའི་བར་དུ་གནོན་པར་མི་བགྱིད་དམ།

འཇམ་དཔལ་གྱིས་སྨྲས་པ།

ལྷའི་བུ་ཁྱོད་བཅོམ་ལྡན་འདས་ཀྱིས་ཆོས་ཐམས་ཅད་སྒྱུ་མ་ལྟ་བུའོ་ཞེས་གསུངས་པ་ལ་མ་མོས་སམ།

ལྷའི་བུས་སྨྲས་པ།

འཇམ་དཔལ་མོས་སོ།

འཇམ་དཔལ་གྱིས་སྨྲས་པ།

ལྷའི་བུ་ཅི་སྒྱུ་མ་དང་སྤྲུལ་པ་ས་ནས་སར་འཕར་ཞིང་ས་བཅུ་པའི་བར་དུ་གནོན་ཏམ།

ལྷའི་བུས་སྨྲས་པ།

འཇམ་དཔལ་དེ་ནི་མ་ལགས་སོ།

འཇམ་དཔལ་གྱིས་སྨྲས་པ།

ལྷའི་བུ་གང་གི་ཚེ་སྒྱུ་མ་དང་སྤྲུལ་པ་ས་ནས་སར་འཕར་བར་གྱུར་པ་དེའི་ཚེ་ཁོ་བོ་ཡང་ས་ནས་སར་འཕར་བར་འགྱུར་རོ།

དེ་ཅིའི་ཕྱིར་ཞེ་ན།

བཅོམ་ལྡན་འདས་ཀྱིས་ཆོས་ཐམས་ཅད་སྒྱུ་མ་ལྟ་བུའོ་ཞེས་གསུངས་པའི་ཕྱིར་རོ།

ལྷའི་བུ་དེ་ལྟ་དེ་ལྟ་མོད་ཀྱི་ས་ནས་སར་འཕར་བ་བསྟན་པ་དེ་ནི་འཕར་བ་མེད་པར་བསྟན་པར་བྱའི་འཕར་བ་ནི་མ་ཡིན་ནོ།

དེ་ཅིའི་ཕྱིར་ཞེ་ན།

ཆོས་ཐམས་ཅད་འཕོ་བ་མེད་པར་ཆོས་རྣམས་ནི་ཆོས་རྣམས་སུ་མི་འཕོ་བའི་ཕྱིར་ཏེ།

གཟུགས་ནི་ཚོར་བར་མི་འཕོ།

ཚོར་བ་ཡང་གཟུགས་སུ་མི་འཕོ།

གཟུགས་ནི་འདུ་ཤེས་སུ་མི་འཕོ།

འདུ་ཤེས་ཀྱང་གཟུགས་སུ་མི་འཕོ།

གཟུགས་ནི་འདུ་བྱེད་རྣམས་སུ་མི་འཕོ།

འདུ་བྱེད་རྣམས་ཀྱང་གཟུགས་སུ་མི་འཕོ།

གཟུགས་ནི་རྣམ་པར་ཤེས་པར་མི་འཕོ།

རྣམ་པར་ཤེས་པ་ཡང་གཟུགས་སུ་མི་འཕོ།

ཚོར་བ་ནི་འདུ་ཤེས་སུ་མི་འཕོ།

འདུ་ཤེས་ཀྱང་ཚོར་བར་མི་འཕོ།

ཚོར་བ་ནི་འདུ་བྱེད་རྣམས་སུ་མི་འཕོ།

འདུ་བྱེད་རྣམས་ཀྱང་ཚོར་བར་མི་འཕོ།

ཚོར་བ་ནི་རྣམ་པར་ཤེས་པར་མི་འཕོ།

རྣམ་པར་ཤེས་པ་ཡང་ཚོར་བར་མི་འཕོ།

འདུ་ཤེས་ནི་འདུ་བྱེད་རྣམས་སུ་མི་འཕོ།

འདུ་བྱེད་རྣམས་ཀྱང་འདུ་ཤེས་སུ་མི་འཕོ།

འདུ་ཤེས་ནི་རྣམ་པར་ཤེས་པར་མི་འཕོ།

རྣམ་པར་ཤེས་པ་ཡང་འདུ་ཤེས་སུ་མི་འཕོ།

འདུ་བྱེད་རྣམས་ནི་རྣམ་པར་ཤེས་པར་མི་འཕོ།

རྣམ་པར་ཤེས་པ་ཡང་འདུ་བྱེད་རྣམས་སུ་མི་འཕོ།

མིག་ནི་རྣ་བར་མི་འཕོ།

རྣ་བ་ཡང་མིག་ཏུ་མི་འཕོ།

མིག་ནི་སྣར་མི་འཕོ།

སྣ་ཡང་མིག་ཏུ་མི་འཕོ།

མིག་ནི་ལྕེར་མི་འཕོ།

ལྕེ་ཡང་མིག་ཏུ་མི་འཕོ།

མིག་ནི་ལུས་སུ་མི་འཕོ།

ལུས་ཀྱང་མིག་ཏུ་མི་འཕོ།

མིག་ནི་ཡིད་དུ་མི་འཕོ།

ཡིད་ཡང་མིག་ཏུ་མི་འཕོ།

རྣ་བ་ནི་སྣར་མི་འཕོ།

སྣ་ཡང་རྣ་བར་མི་འཕོ།

རྣ་བ་ནི་ལྕེར་མི་འཕོ།

ལྕེ་ཡང་རྣ་བར་མི་འཕོ།

རྣ་བ་ནི་ལུས་སུ་མི་འཕོ།

ལུས་ཀྱང་རྣ་བར་མི་འཕོ།

རྣ་བ་ནི་ཡིད་དུ་མི་འཕོ།

ཡིད་ཀྱང་རྣ་བར་མི་འཕོ།

སྣ་ནི་ལྕེར་མི་འཕོ།

ལྕེ་ཡང་སྣར་མི་འཕོ།

སྣ་ནི་ལུས་སུ་མི་འཕོ།

ལུས་ཀྱང་སྣར་མི་འཕོ།

སྣ་ནི་ཡིད་དུ་མི་འཕོ།

ཡིད་ཀྱང་སྣར་མི་འཕོ།

ལྕེ་ནི་ལུས་སུ་མི་འཕོ།

ལུས་ཀྱང་ལྕེར་མི་འཕོ།

ལྕེ་ནི་ཡིད་དུ་མི་འཕོ།

ཡིད་ཀྱང་ལྕེར་མི་འཕོ།

ལུས་ནི་ཡིད་དུ་མི་འཕོ།

ཡིད་ཀྱང་ལུས་སུ་མི་འཕོ་ཞིང་ཆོས་དེ་དག་ནི་སྤྱོད་ཡུལ་ཐ་དད་པ།

ཡུལ་ཐ་དད་པ།

བླུན་པ།

བེམས་པོ།

སེམས་པ་མེད་པ།

གཡོ་བ་མེད་པ།

བྱེད་པ་མེད་པ།

རྩྭ་དང་རྩིག་པ་ལྟ་བུར་སྣང་བ།

སྒྱུ་མ་ལྟ་བུར་རྣམ་པར་རིག་པ་མེད་པ།

མཚན་ཉིད་མེད་པར་མཚན་ཉིད་གཅིག་པ་སྟེ།

དེ་དག་ནི་འཕོ་བར་མི་བྱེད།

འོང་བར་མི་བྱེད།

འགྲོ་བར་མི་བྱེད་པའི་ཕྱིར་རོ།

ལྷའི་བུ་བྱང་ཆུབ་སེམས་དཔའ་གང་དེ་ལྟར་ཤེས་པར་བྱེད་པ་དེ་ནི་ཆོས་གང་ལ་ཡང་འཕོ་བར་མི་བྱེད་ཅིང་སར་ཡང་རྣམ་པར་རྟོག་པར་མི་བྱེད།

སར་འཕར་བར་ཡང་མི་མཐོང་།

ས་ཡོངས་སུ་སྤོང་བར་ཡང་མི་བྱེད་དོ།

འཕོ་བ་མེད་པ་དང་།

འཇིག་པ་མེད་པའི་ཕྱིར་བྱང་ཆུབ་ལས་ལོག་པར་ཡང་མི་འགྱུར་རོ།

དེ་ཅིའི་ཕྱིར་ཞེ་ན།

ཆོས་ཐམས་ཅད་གཟོད་མ་ནས་རྣམ་པར་དག་པའི་ཕྱིར་ཕུང་པོ་དང་།

ཁམས་དང་།

སྐྱེ་མཆེད་ཀྱི་ངོ་བོ་ཉིད་གང་ཡིན་པ་དེ་ནི་འཕོ་བ་མེད་ཅིང་འཇིག་པ་མེད་པའི་ཕྱིར་ཏེ།

ལྷའི་བུ་དེ་ནི་བྱང་ཆུབ་སེམས་དཔའ་རྣམས་ཀྱི་ས་ནས་སར་འཕར་བ་ཡིན་ནོ།

ལྷའི་བུ་འདི་ལྟ་སྟེ།

དཔེར་ན་སྒྱུ་མ་མཁན་ཞིག་གིས་ས་བཅུའི་ཁང་པ་བརྩེགས་པ་ཞིག་མངོན་པར་སྤྲུལ་ནས་དེར་སྒྱུ་མའི་མི་ཞིག་ཞུགས་པར་གྱུར་ན།

ལྷའི་བུ་འདི་ཇི་སྙམ་དུ་

སེམས།

དེར་འགའ་ཡང་ཞུགས་པ་ཡོད་སྙམ་འམ།

ལྷའི་བུས་སྨྲས་པ།

འཇམ་དཔལ་དེ་ནི་མ་མཆིས་སོ།

འཇམ་དཔལ་གྱིས་སྨྲས་པ།

ལྷའི་བུ་བྱང་ཆུབ་སེམས་དཔའི་ས་བཅུར་འཕར་བ་ཡང་དེ་བཞིན་དུ་བལྟ་བར་བྱའོ།

དེ་ནས་ལྷའི་བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ།

འཇམ་དཔལ་ལ་ལ་ཞིག་རབ་ཏུ་འབྱུང་བའི་སླད་དུ་ཁྱོད་ཀྱི་ཐད་དུ་མཆིས་ན་རབ་ཏུ་འབྱུང་བ་དེ་ལ་ཁྱོད་ཇི་སྐད་གསུང་ཞིང་དེ་རབ་ཏུ་ནི་ཇི་ལྟར་འབྱིན།

རྫོགས་པར་བསྙེན་པར་ནི་ཇི་ལྟར་མཛད།

ཚུལ་ཁྲིམས་ཀྱི་ཕུང་པོ་ལ་ནི་ཇི་ལྟར་སྦྱོར།

བསླབ་པའི་ལུང་ནི་ཇི་སྐད་འབོག་པར་མཛད།

འཇམ་དཔལ་གྱིས་སྨྲས་པ།

ལྷའི་བུ་ལ་ལ་ཞིག་རབ་ཏུ་འབྱུང་བའི་ཕྱིར་ཁོ་བོའི་ཐད་དུ་འོང་ན་དེ་ལ་ཁོ་བོ་འདི་སྐད་ཅེས་རིགས་ཀྱི་བུ་གལ་ཏེ་ཁྱོད་རབ་ཏུ་འབྱུང་བའི་སེམས་བསྐྱེད་པར་མི་བྱེད་པ་དེ་ལྟ་ན་ཁོ་བོས་ཁྱོད་རབ་ཏུ་དབྱུང་ངོ་ཞེས་སྨྲའོ།

དེ་ཅིའི་ཕྱིར་ཞེ་ན།

ལྷའི་བུ་གང་རབ་ཏུ་དབྱུང་བ་དེ་ནི་འདོད་པའི་ཁམས་སུ་གནས་པའམ།

གཟུགས་ཀྱི་ཁམས་སུ་གནས་པ་འམ།

གཟུགས་མེད་པའི་ཁམས་སུ་གནས་པ་འམ།

འདོད་པའི་ཡོན་ཏན་ལྔ་ལ་གནས་པ་ཡིན་ལ།

གནས་དགུ་ལ་སྤྱོད་པའི་རིགས་ཀྱི་བུ་ནི་ཆོས་མངོན་སུམ་དུ་བྱེད་པའི་ཕྱིར་ཏེ།

ལྷའི་བུ་དགུ་གང་ཞེ་ན།

གང་ཅི་ལ་ཡང་མི་གནས་པ་དེ་ནི་སེམས་ཉེ་བར་དམིགས་པར་མི་བྱེད་པ་དང་།

གང་སེམས་ཉེ་བར་དམིགས་པར་མི་བྱེད་པ་དེ་ནི་རབ་ཏུ་འབྱུང་བར་མི་འདོད་པ་དང་།

གང་རབ་ཏུ་འབྱུང་བར་མི་འདོད་པ་དེ་ནི་རབ་ཏུ་འབྱུང་བའི་སེམས་སྐྱེད་པར་མི་བྱེད་པ་དང་།

གང་རབ་ཏུ་འབྱུང་བའི་སེམས་སྐྱེད་པར་མི་བྱེད་པ་དེ་ནི་མི་སྐྱེ་བ་དང་།

གང་མི་སྐྱེ་བ་དེ་ནི་སྡུག་བསྔལ་ཟད་པ་དང་།

གང་སྡུག་བསྔལ་ཟད་པ་དེ་ནི་གཏན་ཟད་པ་དང་།

གང་གཏན་ཟད་པ་དེ་ནི་མི་ཟད་པ་དང་།

གང་མི་ཟད་པ་དེ་ནི་ཟད་པར་མི་འགྱུར་བ་དང་།

གང་ཟད་པར་མི་འགྱུར་བ་དེ་ནི་ནམ་མཁའ་ཡིན་པ་སྟེ།

ལྷའི་བུ་ཁོ་བོ་ནི་རིགས་ཀྱི་བུ་དེ་ལ་དེ་སྐད་ཅེས་སྨྲའོ།

ལྷའི་བུ་གཞན་ཡང་ལ་ལ་ཞིག་རབ་ཏུ་འབྱུང་བའི་ཕྱིར་ཁོ་

བོའི་ཐད་དུ་འོངས་ན།

དེ་ལ་ཁོ་བོ་འདི་སྐད་ཅེས་རིགས་ཀྱི་བུ་ཁྱོད་རབ་ཏུ་འབྱུང་བའི་སེམས་མ་སྐྱེད་ཅིག །

དེ་ཅིའི་ཕྱིར་ཞེ་ན།

འདི་ལྟར་སེམས་དེ་ནི་སྐྱེ་བ་མེད་པའི་ཕྱིར་ཏེ།

དེ་རྣམ་པར་མ་དཀྲུགས་ཤིག །

རིགས་ཀྱི་བུ་གལ་ཏེ་ཁྱོད་སྐྲ་འདྲེག་པར་མི་བྱེད་པ་དེ་ལྟ་ན།

ཁྱོད་ལེགས་པར་རབ་ཏུ་བྱུང་བ་ཡིན་ནོ་ཞེས་སྨྲའོ།

ལྷའི་བུས་སྨྲས་པ།

འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན།

འཇམ་དཔལ་གྱིས་སྨྲས་པ།

ལྷའི་བུ་དེ་བཞིན་གཤེགས་པ་ནི་གཅད་དུ་མེད་པ་དང་།

དབྱེར་མེད་པའི་ཕྱིར་ཆོས་སྟོན་པར་མཛད་དོ།

ལྷའི་བུས་སྨྲས་པ།

འཇམ་དཔལ་ཅི་ཞིག་གཅོད་པར་མི་བགྱིད་ཅིང་ཅི་ཞིག་འབྱེད་པར་མི་བགྱིད།

འཇམ་དཔལ་གྱིས་སྨྲས་པ།

ལྷའི་བུ་གཟུགས་ནི་གཅོད་པར་མི་བྱེད་ཅིང་འབྱེད་པར་མི་བྱེད་དོ།

ཚོར་བ་དང་།

འདུ་ཤེས་དང་།

འདུ་བྱེད་རྣམས་དང་།

རྣམ་པར་ཤེས་པ་ནི་གཅོད་པར་མི་བྱེད་ཅིང་འབྱེད་པར་མི་བྱེད་དོ།

ལྷའི་བུ་གང་འདི་སྙམ་དུ་བདག་གི་སྐྲ་བྲེག་གོ་སྙམ་དུ་སེམས་པ་དེ་ནི་ངར་འཛིན་པ་དང་།

ང་ཡིར་འཛིན་པ་ལ་གནས་པ་ཡིན་པས་ངར་འཛིན་པ་དང་།

ང་ཡིར་འཛིན་པ་ལ་སྤྱོད་པ་དག་གིས་ནི་མཉམ་པ་ཉིད་མི་མཐོང་སྟེ།

བདག་ཏུ་དམིགས་པ་ཡོད་ན་སྐྲར་དམིགས་པར་འགྱུར་ལ།

སྐྲར་དམིགས་པ་ཡོད་ན་སེམས་ཅན་དུ་དམིགས་པར་འགྱུར་ཞིང་སེམས་ཅན་དུ་དམིགས་པ་ཡོད་ན་འབྲེག་པའི་འདུ་ཤེས་འབྱུང་བར་འགྱུར་རོ།

ལྷའི་བུ་གང་ལ་བདག་ཏུ་དམིགས་པ་མེད་པ་དེ་ལ་གཞན་དུ་དམིགས་པ་མེད་དོ།

གང་ལ་གཞན་དུ་དམིགས་པ་མེད་པ་དེ་ལ་ངར་འཛིན་པ་མེད་དོ།

གང་ལ་ངར་འཛིན་པ་མེད་པ་དེས་ང་ཡིར་འཛིན་པ་སྤོང་ངོ་།

གང་གིས་ང་ཡིར་འཛིན་པ་སྤངས་པ་དེ་རྣམ་པར་མི་རྟོག་གོ །

གང་རྣམ་པར་མི་རྟོག་པ་དེ་མི་འགྱུར་རོ།

གང་མི་འགྱུར་བ་དེ་སྤྲོས་པ་མེད་དོ།

གང་སྤྲོས་པ་མེད་པ་དེ་མི་ལེན།

མི་འདོར།

མི་བྱེད།

འཇིག་པར་མི་བྱེད།

མི་གཅོད།

མི་འབྱེད།

མི་སྦྱོར།

མི་འབྲལ།

མི་ནུར།

མི་སྤོང་ཞིང་འབྲི་བར་མི་བྱེད།

གང་བར་མི་བྱེད།

སྡུད་པར་མི་བྱེད།

འཕྲོ་བར་མི་བྱེད།

རློམ་

སེམས་སུ་མི་བྱེད།

སྨྲ་བར་མི་བྱེད།

རྗོད་པར་མི་བྱེད།

རབ་ཏུ་རྗོད་པར་མི་བྱེད་དེ།

དེ་ནི་ཡང་དག་པ་ལ་གནས་པ་ཡིན་ནོ།

ལྷའི་བུས་སྨྲས་པ།

འཇམ་དཔལ་ཡང་དག་པ་ཞེས་བགྱི་བ་ཅི་ལགས།

འཇམ་དཔལ་གྱིས་སྨྲས་པ།

ལྷའི་བུ་ཡང་དག་པ་ཞེས་བྱ་བ་ནི་ནམ་མཁའ་སྟེ།

ནམ་མཁའ་ནི་འགྲིབ་པ་འམ།

འཕེལ་བ་འམ།

འབྱུང་བ་འམ།

འཇིག་པར་མི་འགྱུར་བས་དེའི་ཕྱིར་ནམ་མཁའ་དེ་ནི་ཡང་དག་པའོ།

ཡང་དག་པ་ནི་སྟོང་པ་ཉིད་དོ།

ཡང་དག་པ་ནི་དེ་བཞིན་ཉིད་དོ།

ཡང་དག་པ་ནི་ཆོས་ཀྱི་དབྱིངས་སོ།

ཡང་དག་པ་ནི་ཡང་དག་པའི་མཐའོ།

ཡང་དག་པ་གང་ཡིན་པ་དེ་ནི་མ་བྱུང་བའོ།

དེ་ཅིའི་ཕྱིར་ཞེ་ན།

དེ་ནི་མ་བྱུང་ཞིང་འབྱུང་བར་མི་འགྱུར་བས་དེའི་ཕྱིར་དེ་ནི་མ་བྱུང་བ་ཡིན་ནོ།

ལྷའི་བུ་གཞན་ཡང་ལ་ལ་ཞིག་རབ་ཏུ་འབྱུང་བའི་ཕྱིར་ཁོ་བོའི་ཐད་དུ་འོངས་ན་དེ་ལ་ཁོ་བོ་འདི་སྐད་ཅེས་རིགས་ཀྱི་བུ་གལ་ཏེ་ཁྱོད་ངུར་སྨྲིག་འཛིན་པར་མི་བྱེད་ཅིང་གྱོན་པར་མི་བྱེད་པ་དེ་ལྟ་ན་ཁྱོད་རབ་ཏུ་དབྱུང་ངོ་ཞེས་སྨྲའོ།

ལྷའི་བུས་སྨྲས་པ།

འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན།

འཇམ་དཔལ་གྱིས་སྨྲས་པ།

ལྷའི་བུ་དེ་བཞིན་གཤེགས་པ་ནི་འཛིན་པ་མེད་པའི་ཕྱིར་ཆོས་སྟོན་པར་མཛད་ཀྱི་འཛིན་པའི་ཕྱིར་ནི་མ་ཡིན་ནོ།

ལྷའི་བུས་སྨྲས་པ།

འཇམ་དཔལ་ཅི་ཞིག་མི་འཛིན།

འཇམ་དཔལ་གྱིས་སྨྲས་པ།

ལྷའི་བུ་གཟུགས་རྟག་ཅེས་བྱ་བ་འམ།

མི་རྟག་ཅེས་བྱ་བར་མི་འཛིན་ཏོ།

ཚོར་བ་དང་།

འདུ་ཤེས་དང་།

འདུ་བྱེད་རྣམས་དང་།

རྣམ་པར་ཤེས་པ་རྟག་ཅེས་བྱ་བ་འམ།

མི་རྟག་ཅེས་བྱ་བར་མི་འཛིན་ཏོ།

མིག་མི་འཛིན་ཏོ།

གཟུགས་མི་འཛིན་ཏོ།

རྣ་བ་མི་འཛིན་ཏོ།

སྒྲ་མི་འཛིན་ཏོ།

སྣ་མི་འཛིན་ཏོ།

དྲི་མི་འཛིན་ཏོ།

ལྕེ་མི་འཛིན་ཏོ།

རོ་མི་འཛིན་ཏོ།

ལུས་མི་འཛིན་ཏོ།

རེག་བྱ་མི་འཛིན་ཏོ།

ཡིད་མི་འཛིན་ཏོ།

ཆོས་མི་འཛིན་ཏོ།

འདོད་ཆགས་མི་འཛིན་ཏོ།

ཞེ་སྡང་མི་འཛིན་ཏོ།

གཏི་མུག་མི་འཛིན་ཏོ།

ཕྱིན་ཅི་ལོག་མི་འཛིན་ཏེ།

ལྷའི་བུ་མདོར་ན་ཆོས་ཐམས་ཅད་མི་འཛིན།

མི་གཏོང་།

མི་སྤོང་།

མི་

འདོར་རོ།

ལྷའི་བུ་གང་དུ་ངུར་སྨྲིག་དག་ལ་འཛིན་པའི་འདུ་ཤེས་དང་ལྡན་པ་དེ་ནི་ལྟ་བའི་རྣམ་པ་ཅན་ཡིན་པར་ཁོ་བོ་སྨྲ་སྟེ།

ལྷའི་བུ་ངུར་སྨྲིག་འཛིན་པས་ནི་རྣམ་པར་དག་པ་འམ།

རྣམ་པར་གྲོལ་བར་མི་འགྱུར་རོ།

དེ་ཅིའི་ཕྱིར་ཞེ་ན།

ལྷའི་བུ་སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་ནི་སྙིགས་མ་མེད་པ་ཡིན་པའི་ཕྱིར་རོ།

ལྷའི་བུས་སྨྲས་པ།

འཇམ་དཔལ་སྙིགས་མ་ཞེས་བགྱི་བ་ཅི་ལགས།

འཇམ་དཔལ་གྱིས་སྨྲས་པ།

ལྷའི་བུ་འདོད་ཆགས་ནི་སྙིགས་མའོ།

ཞེ་སྡང་ནི་སྙིགས་མའོ།

གཏི་མུག་ནི་སྙིགས་མའོ།

རྒྱུ་ནི་སྙིགས་མའོ།

ལྟ་བ་ནི་སྙིགས་མའོ།

མིང་ནི་སྙིགས་མའོ།

གཟུགས་ནི་སྙིགས་མའོ།

འདུ་ཤེས་ནི་སྙིགས་མའོ།

ལྷག་པར་འཛིན་པ་ནི་སྙིགས་མའོ།

མཚན་མ་ནི་སྙིགས་མའོ།

སྤྲོས་པ་ནི་སྙིགས་མའོ།

ལྷའི་བུ་གང་མི་དགེ་བའི་ཆོས་དེ་དག་ཡིད་ལ་མི་བྱེད་པ་དེ་ནི་སྙིགས་མ་མེད་པའོ།

གང་སྙིགས་མ་མེད་པ་དེ་ནི་ཅི་ཡང་མེད་པའོ།

གང་ཅི་ཡང་མེད་པ་དེ་ནི་ཉོན་མོངས་པ་མེད་པའོ།

གང་ཉོན་མོངས་པ་མེད་པ་དེ་ནི་ནམ་མཁའ་ཡིན་ནོ།

ལྷའི་བུས་སྨྲས་པ།

འཇམ་དཔལ་ལྷག་པར་བྱ་བ་མེད་པ་ལྷག་པར་བྱ་བ་མེད་པ་ཞེས་བགྱི་ན།

འཇམ་དཔལ་ལྷག་པར་བྱ་བ་མེད་པ་ཞེས་བགྱི་བ་ཅི་ལགས།

འཇམ་དཔལ་གྱིས་སྨྲས་པ།

ལྷའི་བུ་ལྷག་པར་བྱ་བ་མེད་པ།

ལྷག་པར་བྱ་བ་མེད་པ་ཞེས་བྱ་བ་ནི་ཆོས་འགའ་ཡང་ལྷག་པར་མི་བྱ་བ་དེ་ནི་ལྷག་པར་བྱ་བ་མེད་པ་ཞེས་བྱ་སྟེ།

ལྷའི་བུ་གང་དག་ལྷག་པར་བྱེད་པ་དེ་དག་ལ་དེ་བཞིན་གཤེགས་པས་ལྷག་པར་བྱ་བ་མེད་པ་ཞེས་གསུངས་ཏེ།

དེ་ནི་ལྷག་པར་བྱ་བ་མེད་པ་ཞེས་བྱའོ།

ལྷའི་བུས་སྨྲས་པ།

འཇམ་དཔལ་ཅི་ཞིག་ལྷག་པར་བགྱིད།

འཇམ་དཔལ་གྱིས་སྨྲས་པ།

ལྷའི་བུ་མཉམ་པ་ཉིད་ལས་འདའ་བར་བྱེད་ཅིང་མཉམ་པ་ཉིད་ལས་འདས་ནས་ཆོས་གང་མ་རྙེད་མི་རྙེད་རྙེད་པར་མི་འགྱུར་ཞིང་མ་འབྱུང་མི་འབྱུང་འབྱུང་བར་མི་འགྱུར་བའི་ཆོས་དེ་ལ་ལོག་པར་གནས་ཤིང་ལྷག་པར་བྱེད་དེ།

འདི་ལྟ་སྟེ།

བདག་

ཅེས་བྱ་བར་རྟོག་ཅིང་ལྷག་པར་བྱེད་པ་དང་།

སེམས་ཅན་དང་།

སྲོག་དང་།

གང་ཟག་དང་།

ཤེད་ལས་སྐྱེས་དང་།

ཤེད་བུ་དང་།

རྟག་པ་དང་ཆད་པ་ཞེས་བྱ་བར་རྟོག་ཅིང་ལྷག་པར་བྱེད་པ་དང་།

ཕུང་པོ་རྣམས་དང་།

ཁམས་རྣམས་དང་།

སྐྱེ་མཆེད་རྣམས་ཞེས་བྱ་བར་རྟོག་ཅིང་ལྷག་པར་བྱེད་པ་དང་།

སངས་རྒྱས་དང་།

ཆོས་དང་།

དགེ་འདུན་ཞེས་བྱ་བར་རྟོག་ཅིང་ལྷག་པར་བྱེད་པ་དང་།

འདི་ནི་ཚུལ་ཁྲིམས་དང་ལྡན་པའོ།

འདི་ནི་ཚུལ་ཁྲིམས་འཆལ་པའོ་ཞེས་བྱ་བར་རྟོག་ཅིང་ལྷག་པར་བྱེད་པ་དང་།

ཀུན་ནས་ཉོན་མོངས་པ་དང་།

རྣམ་པར་བྱང་བ་དང་།

འཐོབ་པ་དང་།

འབྲས་བུ་དང་།

མངོན་སུམ་དུ་བྱ་བ་ཞེས་བྱ་བར་རྟོག་ཅིང་ལྷག་པར་བྱེད་པ་དང་།

རྒྱུན་དུ་ཞུགས་པའི་འབྲས་བུ་དང་།

ལན་ཅིག་ཕྱིར་འོང་བའི་འབྲས་བུ་དང་།

ཕྱིར་མི་འོང་བའི་འབྲས་བུ་དང་།

དགྲ་བཅོམ་པ་ཉིད་དང་།

རང་སངས་རྒྱས་ཉིད་དང་།

སངས་རྒྱས་ཉིད་ཅེས་བྱ་བར་རྟོག་ཅིང་ལྷག་པར་བྱེད་པ་དང་།

འདི་ནི་སྟོང་པ་ཉིད་དང་།

མཚན་མ་མེད་པ་དང་།

སྨོན་པ་མེད་པ་དང་།

རིག་པ་དང་།

རྣམ་པར་གྲོལ་བ་དང་།

འདོད་ཆགས་དང་བྲལ་བའོ་ཞེས་བྱ་བར་རྟོག་ཅིང་ལྷག་པར་བྱེད་དེ།

ལྷའི་བུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་རྣམས་ནི་ལྷག་པར་བྱ་བ་དེ་ལྟ་བུ་དེ་དག་ལ་རྟོག་ཅིང་ལྷག་པར་བྱེད་དོ།

མི་གཏི་མུག་ཅན་དེ་དག་རྟོག་པར་བྱ་བའི་ཆོས་ལ་སྒྲོ་འདོགས་ཤིང་ཡོངས་སུ་རྟོག་པར་བྱེད་དེ།

དེ་དག་གིས་སྒྲོ་འདོགས་པ་ལ་འདུན་པ་བཟློག་པའི་ཕྱིར་དེ་བཞིན་གཤེགས་པ་ལྷག་པར་བྱ་བ་མེད་པ་སྟོན་པར་མཛད་དོ།

དེ་ནས་ལྷའི་བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ཏེ།

འཇམ་དཔལ་ལེགས་སོ་ལེགས་སོ།

འཇམ་དཔལ་ཁྱོད་ཀྱིས་ལྷག་པར་བྱ་བ་མེད་པ་བསྟན་པ་འདི་བཤད་པ་ལེགས་སོ་ལེགས་སོ།

བཅོམ་ལྡན་འདས་ཀྱིས་ཀྱང་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ཏེ།

འཇམ་དཔལ་ལེགས་སོ་ལེགས་སོ།

གལ་ཏེ་བསྟན་པར་བྱ་ན་དེ་སྐད་བསྟན་

པར་བྱའོ།

གཞན་ཡང་འཇམ་དཔལ་གཞོན་ནུར་གྱུར་པས་ལྷའི་བུ་བློ་གྲོས་རབ་གནས་ལ་འདི་སྐད་ཅེས་སྨྲས་སོ།

ལྷའི་བུ་གང་ལ་ལ་ཞིག་རབ་ཏུ་འབྱུང་བའི་ཕྱིར་ཁོ་བོའི་ཐད་དུ་འོངས་ན་དེ་ལ་ཁོ་བོས་འདི་སྐད་ཅེས་རིགས་ཀྱི་བུ་གལ་ཏེ་ཁྱོད་བསྙེན་པར་རྫོགས་པར་མི་བྱེད་པ་དེ་ལྟ་ན་ཁྱོད་རབ་ཏུ་བྱུང་བ་ཡིན་ནོ་ཞེས་སྨྲའོ།

ལྷའི་བུས་སྨྲས་པ།

འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན།

འཇམ་དཔལ་གྱིས་སྨྲས་པ།

ལྷའི་བུ་བཅོམ་ལྡན་འདས་ཀྱིས་བསྙེན་པར་རྫོགས་པ་ནི་འདི་གཉིས་ཡིན་པར་གསུངས་ཏེ།

གཉིས་གང་ཞེ་ན།

མཉམ་པར་རྫོགས་པར་བསྙེན་པ་དང་།

མི་མཉམ་པར་རྫོགས་པར་བསྙེན་པའོ།

དེ་ལ་མི་མཉམ་པར་རྫོགས་པར་བསྙེན་པ་གང་ཞེ་ན།

གང་མི་མཉམ་པར་ལྟུང་བའོ།

དེ་ལ་མི་མཉམ་པ་གང་ཞེ་ན།

བདག་ཏུ་འཛིན་པ་དང་།

སེམས་ཅན་དུ་འཛིན་པ་དང་།

སྲོག་ཏུ་འཛིན་པ་དང་།

གང་ཟག་ཏུ་འཛིན་པ་དང་།

རྟག་པ་དང་།

ཆད་པ་དང་།

ང་རྒྱལ་དང་།

ལོག་པར་ལྟ་བ་དང་།

ཆགས་པ་དང་།

ཞེ་སྡང་དང་།

གཏི་མུག་ཏུ་ལྟུང་བ་དང་།

འདོད་པའི་ཁམས་དང་།

གཟུགས་ཀྱི་ཁམས་དང་།

གཟུགས་མེད་པའི་ཁམས་སུ་ལྟུང་བ་དང་།

ལྷག་པར་འཛིན་པ་དང་།

རློམ་སེམས་དང་།

ཉེ་བར་ལེན་པར་ལྟུང་བ་སྟེ།

ལྷའི་བུ་མདོར་ན་མི་དགེ་བའི་ཆོས་ཐམས་ཅད་དུ་ལྟུང་བ་དང་།

སྡིག་པའི་གྲོགས་པོ་རྣམས་ཀྱི་ལག་ཏུ་ལྟུང་བ་དང་།

ངེས་པར་འབྱུང་བ་མི་ཤེས་ཤིང་ཡོངས་སུ་འཛིན་པ་ཐམས་ཅད་ཡོངས་སུ་འཛིན་པར་བྱེད་པ་གང་ཡིན་པ་དེ་ནི་ལྷའི་བུ་མི་མཉམ་པར་རྫོགས་པར་བསྙེན་པ་ཡིན་ནོ།

དེ་ལ་མཉམ་པར་རྫོགས་པར་བསྙེན་པ་གང་ཞེ་ན།

གང་མཉམ་པ་ཉིད་དུ་འབབ་པའོ།

དེ་ལ་མཉམ་པ་ཉིད་གང་ཞེ་ན།

སྟོང་པ་ཉིད་མཉམ་པ་ཉིད་དང་།

མཚན་མ་མེད་པ་མཉམ་པ་ཉིད་དང་།

སྨོན་པ་མེད་པ་མཉམ་པ་ཉིད་དེ།

ལྷའི་བུ་རྣམ་པར་ཐར་པའི་སྒོ་གསུམ་པོ་དེ་དག་མངོན་སུམ་དུ་བྱ་བ་ཡང་དག་པ་ཇི་ལྟ་བ་བཞིན་སྒྲུབ་ཅིང་རྟོག་པ་མེད་པ་དང་།

རྣམ་པར་རྟོག་པ་མེད་པ་དང་།

ཀུན་ཏུ་རྟོག་པ་མེད་པ་དང་།

ཕྱིར་མི་ལྡོག་པ་གང་ཡིན་པ་

དེ་ནི་ལྷའི་བུ་མཉམ་པར་རྫོགས་པར་བསྙེན་པ་ཡིན་ནོ།

ལྷའི་བུ་གཞན་ཡང་འདོད་ཆགས་སེལ་བར་བྱེད་པ་དང་།

ཞེ་སྡང་སེལ་བར་བྱེད་པ་དང་།

གཏི་མུག་སེལ་བར་བྱེད་པ་དང་།

སྲེད་པ་དང་།

མ་རིག་པ་དང་།

འཇིག་ཚོགས་དང་།

འཇིག་ཚོགས་ཀྱི་རྩ་བ་ལས་བྱུང་བའི་ལྟ་བའི་རྣམ་པ་དྲུག་ཅུ་རྩ་གཉིས་སེལ་བར་བྱེད་པ་དང་།

ཕྱིན་ཅི་ལོག་རྣམས་སེལ་བར་བྱེད་པ་དང་།

ཉེས་པ་སྤྱོད་པ་གསུམ་དང་།

ལོག་པ་ཉིད་བརྒྱད་དང་།

ཀུན་ནས་མནར་སེམས་ཀྱི་དངོས་པོ་དགུ་དང་།

མི་དགེ་བ་བཅུའི་ལས་ཀྱི་ལམ་སེལ་བར་བྱེད་པ་གང་ཡིན་པ་དེ་ནི་ཡང་དག་པར་རྫོགས་པར་བསྙེན་པ་ཞེས་བྱའོ།

ལྷའི་བུ་འདི་ལྟ་སྟེ།

དཔེར་ན་ས་གཞི་ལ་བརྟེན་ནས་ས་བོན་ཐམས་ཅད་སྐྱེ་ཞིང་རྩྭ་དང་།

ཤིང་གེལ་པ་དང་།

སྨན་དང་།

ནགས་ཚལ་ཐམས་ཅད་ཀྱང་སྐྱེ་ལ་དེ་དག་འཕེལ་བ་ན་རྫོགས་པ་ཞེས་བྱའོ།

ལྷའི་བུ་དེ་བཞིན་དུ་གང་དག་བསྟན་པ་འདི་ལ་རྫོགས་པར་བྱེད་པ་དེ་དག་ཀྱང་རྫོགས་པར་བསྙེན་པ་ཞེས་བྱའོ།

ལྷའི་བུ་འདི་ལྟ་སྟེ།

དཔེར་ན་ས་ཆེན་པོ་ནི་ས་བོན་ཐམས་ཅད་ཀྱི་རྟེན་ཡིན་ཏེ།

ཚུལ་ཁྲིམས་ཕུན་སུམ་ཚོགས་པ་ཡང་དེ་བཞིན་དུ་བལྟ་བར་བྱའོ།

དེ་ཅིའི་ཕྱིར་ཞེ་ན།

ཚུལ་ཁྲིམས་ལ་བརྟེན་ནས་ཆོས་མངོན་པར་རྟོགས་པར་འགྱུར་བའི་ཕྱིར་རོ།

ཇི་ལྟར་ས་བོན་རྣམས་དང་།

ཇི་ལྟར་སྨན་རྣམས་རྣམ་པར་འཕེལ་བ་ལ་རྫོགས་པ་ཞེས་བྱ་བ་དེ་བཞིན་དུ་ཚུལ་ཁྲིམས་དང་།

དད་པ་ལ་རྟེན་པའི་བྱང་ཆུབ་ཀྱི་ཕྱོགས་དང་འཐུན་པའི་ཆོས་ཐམས་ཅད་སྐྱེ་ཞིང་རྫོགས་པར་འགྱུར་ཏེ།

ལྷའི་བུ་རྣམ་པར་ཐར་པའི་སྒོ་གསུམ་པོ་དེ་དག་རྟོགས་ཤིང་སྤྲོས་པ་ཐམས་ཅད་ཡང་དག་པར་ཆད་པ་གང་ཡིན་པ་དེ་ནི་འདས་པ་དང་།

མ་འོངས་པ་དང་།

ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་ཉན་ཐོས་ཐམས་ཅད་ཀྱི་རྫོགས་པར་བསྙེན་པ་ཡིན་ནོ།

ལྷའི་བུ་གང་དེ་ལྟར་རྫོགས་པར་བསྙེན་པར་བྱེད་པ་དེ་ནི་ཡང་དག་པར་རྫོགས་པར་བསྙེན་པར་བྱེད་པ་ཡིན་གྱི་མི་མཉམ་པར་ནི་མ་ཡིན་ནོ།

ལྷའི་བུ་གཞན་ཡང་དེ་ལྟར་རབ་ཏུ་བྱུང་ཞིང་དེ་ལྟར་རྫོགས་པར་བསྙེན་པ་དེ་ལ་ཁོ་བོས་འདི་སྐད་ཅེས་རིགས་ཀྱི་བུ་གལ་ཏེ་ཁྱོད་བསླབ་པ་

ལེན་པར་མི་བྱེད་པ་དེ་ལྟར་ན་ཁྱོད་བསླབ་པ་འདོད་པ་ཡིན་ནོ་ཞེས་རྗེས་སུ་བསྟན་པ་སྦྱིན་པར་བྱའོ།

ལྷའི་བུས་སྨྲས་པ།

འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན།

འཇམ་དཔལ་གྱིས་སྨྲས་པ།

ལྷའི་བུ་ཆོས་ཐམས་ཅད་ནི་མ་བླངས་པ་ཡིན་པས་ལྷའི་བུ་གང་ཚུལ་ཁྲིམས་ལེན་པ་དེ་ནི་ཁམས་གསུམ་ལེན་པ་ཡིན་ནོ།

ལྷའི་བུ་འདི་ཇི་སྙམ་དུ་སེམས།

བསླབ་པ་དེ་གང་ཡིན་སྙམ།

ལྷའི་བུས་སྨྲས་པ།

འཇམ་དཔལ་སོ་སོར་ཐར་པའི་སྡོམ་པ་གང་ལགས་པའོ།

འཇམ་དཔལ་གྱིས་སྨྲས་པ།

ལྷའི་བུ་སོ་སོར་ཐར་པའི་སྡོམ་པ་ཡང་གང་ཡིན།

ལྷའི་བུས་སྨྲས་པ།

འཇམ་དཔལ་སྡོམ་པ་ཞེས་བགྱི་བ་ནི་ལུས་སྡོམ་པ་དང་།

ངག་སྡོམ་པ་དང་།

ཡིད་སྡོམ་པ་སྟེ།

དེ་ནི་སོ་སོར་ཐར་པའི་སྡོམ་པ་ཞེས་བགྱིའོ།

འཇམ་དཔལ་གྱིས་སྨྲས་པ།

ལྷའི་བུ་འདི་ཇི་སྙམ་དུ་སེམས།

ལུས་དང་།

ངག་དང་།

ཡིད་ཀྱིས་མ་བྱས་མི་བྱེད་བྱེད་པར་མི་འགྱུར་བའི་ལས་གང་ཡིན་པ་དེ་སྔོན་པོ་འམ།

སེར་པོ་འམ།

དམར་པོ་འམ།

དཀར་པོ་འམ།

བཙོད་ཁ་འམ།

ཤེལ་གྱི་ཁ་དོག་ལྟ་བུའོ་ཞེས་གདགས་པར་ནུས་སྙམ་འམ།

ལྷའི་བུས་སྨྲས་པ།

འཇམ་དཔལ་དེ་ནི་མ་ལགས་སོ།

འཇམ་དཔལ་གྱིས་སྨྲས་པ།

ལྷའི་བུ་འོ་ན་ཇི་སྐད་བརྗོད་པར་བྱ།

ལྷའི་བུས་སྨྲས་པ།

འཇམ་དཔལ་མངོན་པར་འདུ་བགྱིད་པ་མ་མཆིས་པ་ཞེས་བརྗོད་པར་བགྱི་སྟེ།

དེ་ནི་ལུས་ཀྱི་ལས་སམ།

ངག་གི་ལས་སམ།

ཡིད་ཀྱི་ལས་ཞེས་གདགས་པར་རྔོ་མི་ཐོག་གོ །

འཇམ་དཔལ་གྱིས་སྨྲས་པ།

ལྷའི་བུ་འདི་ཅི་སྙམ་དུ་སེམས།

གང་མངོན་པར་འདུ་བྱེད་པ་མེད་པ་དེ་བླང་བར་ནུས་སྙམ་འམ།

ལྷའི་བུས་སྨྲས་པ།

འཇམ་དཔལ་དེ་ནི་མ་ལགས་སོ།

འཇམ་དཔལ་གྱིས་སྨྲས་པ།

ལྷའི་བུ་དེའི་ཕྱིར་ཁོ་བོ་ནི་དེ་ལས་བསམས་ནས་དེ་སྐུད་ཅེས་གང་བསླབ་པ་ལེན་པར་མི་བྱེད་པ་དེ་བསླབ་པ་འདོད་པ་ཡིན་ནོ་ཞེས་སྟོན་ཏོ།

ལྷའི་བུ་ལྷག་པའི་ཚུལ་ཁྲིམས་ཀྱི་བསླབ་པ་དང་།

ལྷག་པའི་སེམས་ཀྱི་བསླབ་པ་དང་།

ལྷག་པའི་ཤེས་རབ་ཀྱི་བསླབ་པ་ཞེས་བྱ་བ་གང་

ཡིན་པ་དེ་ཡང་མཐའ་དེ་ཉིད་ཀྱིས་རྟོགས་པར་བྱ་སྟེ།

ཚུལ་ཁྲིམས་མི་དམིགས་པས་ལྷག་པའི་ཚུལ་ཁྲིམས་ཀྱི་བསླབ་པ་ཞེས་བྱའོ།

སེམས་མི་དམིགས་པས་ལྷག་པའི་སེམས་ཀྱི་བསླབ་པ་ཞེས་བྱའོ།

ཤེས་རབ་མི་དམིགས་པས་ལྷག་པའི་ཤེས་རབ་ཀྱི་བསླབ་པ་ཞེས་བྱའོ།

སེམས་རྟོག་པ་མེད་པ་དང་།

རློམ་སེམས་མེད་པ་དང་།

རྣམ་པར་རྟོག་པ་མེད་པ་དང་།

སྐྱེ་བ་མེད་པས་ལྷག་པའི་སེམས་ཀྱི་བསླབ་པ་ཞེས་བྱའོ།

ཚུལ་ཁྲིམས་རྟོག་པ་མེད་པ་དང་།

རློམ་སེམས་མེད་པ་དང་།

རྣམ་པར་རྟོག་པ་མེད་པ་དང་།

སྐྱེ་བ་མེད་པས་ལྷག་པའི་ཚུལ་ཁྲིམས་ཀྱི་བསླབ་པ་ཞེས་བྱའོ།

ཤེས་རབ་རྟོག་པ་མེད་པ་དང་།

རློམ་སེམས་མེད་པ་དང་།

རྣམ་པར་རྟོག་པ་མེད་པ་དང་།

སྐྱེ་བ་མེད་པས་ལྷག་པའི་ཤེས་རབ་ཀྱི་བསླབ་པ་ཞེས་བྱའོ།

ལྷའི་བུ་གང་གིས་སེམས་མ་རྙེད་པ་དེ་ཚུལ་ཁྲིམས་སུ་རློམ་སེམས་མི་བྱེད་དོ།

གང་ཚུལ་ཁྲིམས་སུ་རློམ་སེམས་མི་བྱེད་པ་དེས་ཏིང་ངེ་འཛིན་མི་དམིགས་སོ།

གང་གིས་ཏིང་ངེ་འཛིན་མི་དམིགས་པ་དེས་ཤེས་རབ་མི་དམིགས་སོ།

གང་གིས་ཤེས་རབ་མི་དམིགས་པ་དེ་ལ་ཐེ་ཚོམ་ཐམས་ཅད་མི་འབྱུང་ངོ་།

གང་ལ་ཐེ་ཚོམ་ཐམས་ཅད་མི་འབྱུང་བ་དེ་བསླབ་པ་མི་ལེན་ཏོ།

གང་བསླབ་པ་མི་ལེན་པ་དེ་བསླབ་པ་འདོད་པ་ཞེས་བྱའོ།

གང་བསླབ་པ་འདོད་པ་དེ་ཕྱིར་མི་འོང་བའོ།

གང་ཕྱིར་མི་འོང་བ་དེ་རྣམ་པར་དག་པའོ།

གང་རྣམ་པར་དག་པ་དེ་བྲལ་བའོ།

གང་བྲལ་བ་དེ་ཟག་པ་མེད་པའོ།

གང་ཟག་པ་མེད་པ་དེ་ཡང་དག་པར་ཞུགས་པའོ།

གང་ཡང་དག་པར་ཞུགས་པ་དེ་ལ་བཅོས་པ་མེད་དོ།

གང་ལ་བཅོས་པ་མེད་པ་དེ་ནམ་མཁའོ།

དེ་ཅིའི་ཕྱིར་ཞེ་ན།

ནམ་མཁའ་ནི་བཅོས་པ་མེད་པའི་ཕྱིར་རོ།

ལྷའི་བུ་གང་དེ་ལྟར་སློབ་པ་དེ་ནི་སློབ་པར་མི་བྱེད་དོ།

གང་སློབ་པར་མི་བྱེད་པ་དེ་ནི་སློབ་པར་བྱེད་དོ།

གང་ལ་སློབ་ཅེ་ན།

ཅི་ལ་ཡང་མི་སློབ་སྟེ།

གང་གི་ཚེ་ཅི་ལ་ཡང་མི་སློབ་པ་དེ་ནི་ཡང་དག་པའི་བསླབ་པ་ལ་གནས་པ་ཞེས་བྱའོ།

གཞན་ཡང་འཇམ་དཔལ་གཞོན་ནུར་གྱུར་པས་ལྷའི་བུ་བློ་གྲོས་རབ་གནས་ལ་འདི་སྐད་ཅེས་

སྨྲས་སོ།

ལྷའི་བུ་དེ་ལྟར་རབ་ཏུ་བྱུང་ཞིང་དེ་ལྟར་རྫོགས་པར་བསྙེན་པ་དེ་ལ་ཁོ་བོ་འདི་སྐད་ཅེས་རིགས་ཀྱི་བུ་གལ་ཏེ་ཁྱོད་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཀྱི་དད་པས་བྱིན་པ་ཡོངས་སུ་ལོངས་སྤྱོད་པར་བྱེད་ཅིང་ཡོངས་སུ་སྦྱོང་བར་མི་བྱེད་པ་དེ་ལྟ་ན་ཁྱོད་ཚུལ་ཁྲིམས་ཡོངས་སུ་དག་པ་ཡིན་ནོ་ཞེས་སྨྲའོ།

ལྷའི་བུས་སྨྲས་པ།

འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན།

འཇམ་དཔལ་གྱིས་སྨྲས་པ།

ལྷའི་བུ་གང་ལེན་པར་བྱེད་པ་དང་།

བདེ་བར་བྱེད་པ་དེ་ནི་སྦྱོང་བར་བྱེད་དོ།

གང་དམིགས་པར་བྱེད་པ་དེ་ནི་སྦྱོང་བར་བྱེད་དོ།

གང་རློམ་སེམས་སུ་བྱེད་པ་དེ་ནི་སྦྱོང་བར་བྱེད་དོ།

གང་རྟོག་པར་བྱེད་པ་དེ་ནི་སྦྱོང་བར་བྱེད་དོ།

ལྷའི་བུ་གང་ལེན་པར་མི་བྱེད་པ་དང་།

བདེ་བར་མི་བྱེད་པ་དང་།

དམིགས་པར་མི་བྱེད་པ་དང་།

རློམ་སེམས་སུ་མི་བྱེད་པ་དང་།

རྟོག་པར་མི་བྱེད་པ་དེ་ནི་ཅི་ཡང་སྦྱོང་བར་མི་བྱེད་དོ།

དེ་ཅིའི་ཕྱིར་ཞེ་ན།

དེ་ནི་གཏན་དག་པ་ཡིན་པའི་ཕྱིར་རོ།

ལྷའི་བུ་དེ་ལྟ་བས་ན་སོ་སོའི་སྐྱེ་བོ་རྣམས་ནི་དད་པས་བྱིན་པ་སྦྱོང་བར་བྱེད་ཀྱི་དགྲ་བཅོམ་པ་དག་ནི་མ་ཡིན་ནོ།

དེ་ཅིའི་ཕྱིར་ཞེ་ན།

སོ་སོའི་སྐྱེ་བོ་རྣམས་ནི་ལེན་པར་བྱེད།

བདེ་བར་བྱེད།

དམིགས་པར་བྱེད།

རློམ་སེམས་སུ་བྱེད།

རྟོག་པར་བྱེད་ཅིང་བདག་ནི་ལེན་པ་ཡིན་ནོ་སྙམ་དུ་རྟོག་པར་བྱེད།

འདི་ནི་སྦྱིན་པར་བྱེད་པ་ཡིན་ནོ་སྙམ་དུ་རྟོག་པར་བྱེད་པས་དེ་དག་ནི་སྦྱོང་བར་བྱེད་པ་ཡིན་པའི་ཕྱིར་ཏེ།

ཇི་ལྟར་སྦྱོང་བར་བྱེད་ཅེ་ན།

སྲིད་པའི་འགྲོ་བར་སྐྱེ་བ་འགྲུབ་པར་བྱེད་ཅིང་དེར་སྦྱོང་བར་བྱེད་དོ།

ལྷའི་བུ་དགྲ་བཅོམ་པ་དག་ནི་སྲིད་པ་གཞན་དུ་གཏོགས་པའི་ལུས་གཞན་འགའ་ཡང་འགྲུབ་པར་མི་བྱེད་པས་དེ་དག་ནི་ཅི་ཡང་སྦྱོང་བར་མི་བྱེད་དོ།

དེ་དག་བསོད་སྙོམས་དེ་ལེན་པ་ན་ཡང་འཁོར་གསུམ་ཡོངས་སུ་དག་པས་ལེན་ཏོ།

ལྷའི་བུ་འཁོར་གསུམ་ཡོངས་སུ་དག་པ་དེ་ཡང་གང་ཞེ་ན།

ལེན་པར་བྱེད་པའི་བདག་གང་ཡིན་པ་ཡང་མི་དམིགས།

སྦྱིན་པར་བྱེད་པའི་སྦྱིན་པ་པོ་གང་ཡིན་པ་ཡང་མི་དམིགས།

བླང་བར་བྱ་བའི་བསོད་སྙོམས་གང་ཡིན་པ་ཡང་མི་དམིགས་པ་

སྟེ།

ལྷའི་བུ་དེ་ནི་འཁོར་གསུམ་ཡོངས་སུ་དག་པ་ཞེས་བྱའོ།

ལྷའི་བུ་གང་དེ་ལྟར་དག་པ་དེ་ནི་ཡང་སྦྱོང་བར་མི་བྱེད་པས་ན་ཁོ་བོ་ནི་དེ་ལས་བསམས་ནས་དེ་སྐད་ཅེས་གང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཀྱི་དད་པས་བྱིན་པ་ཡོངས་སུ་ལོངས་སྤྱོད་པར་བྱེད་ཅིང་ཡོངས་སུ་སྦྱོང་བར་མི་བྱེད་པ་དེ་ནི་འཇིག་རྟེན་ན་སྦྱིན་གནས་ཀྱི་འོས་ཡིན་ཏེ།

དེ་ནི་ལེགས་པར་རབ་ཏུ་བྱུང་བ་ཡིན་ནོ་ཞེས་སྟོན་ཏོ།

གཞན་ཡང་འཇམ་དཔལ་གཞོན་ནུར་གྱུར་པས་ལྷའི་བུ་བློ་གྲོས་རབ་གནས་ལ་འདི་སྐད་ཅེས་སྨྲས་སོ།

ལྷའི་བུ་དེ་ལྟར་རབ་ཏུ་བྱུང་ཞིང་དེ་ལྟར་རྫོགས་པར་བསྙེན་པ་དེ་ལ་ཁོ་བོ་འདི་སྐད་ཅེས་རིགས་ཀྱི་བུ་གལ་ཏེ་ཁྱོད་དགོན་པར་མི་གནས་ཤིང་གྲོང་དུ་མ་ཡིན།

ཐག་ཉེ་བར་མ་ཡིན།

ཐག་རིང་བར་མ་ཡིན།

ལམ་གོལ་བར་མ་ཡིན།

གཅིག་པུ་མ་ཡིན།

སྐྱེ་བོ་མང་པོའི་དབུས་སུ་མ་ཡིན།

འདུ་འཛིའི་ནང་དུ་མ་ཡིན།

དབེན་པར་མ་ཡིན།

བསོད་སྙོམས་སྤྱོད་པར་ཡང་མི་བྱེད།

འགྲོན་དུ་ཡང་མི་འགྲོ།

ཕྱག་དར་ཁྲོད་པར་ཡང་མི་བྱེད།

སྨད་པའི་ལྷུང་བཟེད་དང་།

ཆོས་གོས་ཀྱང་མི་འཆང་།

བླ་གབ་མེད་པ་ཡང་མི་བྱེད།

འདོད་པ་ཆུང་བར་ཡང་མི་བྱེད།

འདོད་པ་ཆེ་བར་ཡང་མི་བྱེད།

ཆོག་ཤེས་པར་ཡང་མི་བྱེད།

ཆོག་མི་ཤེས་པར་ཡང་མི་བྱེད།

རབ་ཏུ་དབེན་པར་ཡང་མི་བྱེད།

རབ་ཏུ་མི་དབེན་པ་ཡང་མི་བྱེད།

ཤིང་དྲུང་པ་ཡང་མི་བྱེད།

གནས་ཁང་དུ་ཡང་མི་གནས།

སྨན་བསྐུས་ཏེ་བོར་བ་ཡང་མི་སྟེན།

མར་སར་དང་།

སྦྲང་རྩི་ཡང་མི་སྟེན་ཅིང་རིགས་ཀྱི་བུ་གལ་ཏེ་ཁྱོད་སྦྱངས་པའི་ཡོན་ཏན་གྱི་ཆོས་དེ་ལྟ་བུ་ཐམས་ཅད་ཡང་དག་པར་བླངས་ཏེ་འཇུག་པར་མི་བྱེད་པ་དེ་ལྟ་ན་ཁྱོད་སྦྱངས་པ་དང་ལྡན་པ་ཡིན་ནོ་ཞེས་སྨྲའོ།

དེ་ཅིའི་ཕྱིར་ཞེ་ན།

ལྷའི་བུ་གང་འདི་སྙམ་དུ་བདག་ནི་ཕྱག་དར་ཁྲོད་པའོ།

བསོད་སྙོམས་པའོ།

ཤིང་དྲུང་པའོ།

བདག་ནི་སྨན་བསྐུས་ཏེ་བོར་བས་ཆོག་ཤེས་པའོ།

བདག་ནི་འདོད་པ་ཆུང་བའོ།

བདག་ནི་ཆོག་ཤེས་པའོ།

བདག་ནི་དགོན་པ་པའོ།

བདག་ནི་བླ་གབ་མེད་པའོ།

བདག་ནི་སྦྱངས་པ་

དང་ལྡན་པའོ་སྙམ་དུ་སེམས་པ་དེ་དག་ནི་མངོན་པའི་ང་རྒྱལ་ཅན་གྱི་རྣམ་པར་གཡོ་བ་ཡིན་པའི་ཕྱིར་རོ།

ལྷའི་བུ་ཡང་དག་པར་ཞུགས་པ་ལ་ནི་ལྷག་པར་གཡོ་བ་དང་བྲལ་བར་གཡོ་བ་དེ་དག་མི་འབྱུང་ངོ་།

དེ་ཅིའི་ཕྱིར་ཞེ་ན།

འདི་ལྟར་དེ་ལ་རྣམ་པར་རྟོག་པ་མེད་པས་བདག་ཉིད་ཀྱང་མི་དམིགས་ན་སྦྱངས་པའི་ཡོན་ཏན་རྣམས་སུ་དམིགས་པ་ལྟ་ཅི་སྨོས་ཏེ།

དེ་ནི་གནས་མེད་པའི་ཕྱིར་རོ།

ལྷའི་བུ་དེ་ལྟ་བས་ན་གང་སྦྱངས་པའི་ཡོན་ཏན་དེ་དག་ཡང་དག་པར་བླངས་ཏེ་འཇུག་ཅིང་རློམ་སེམས་སུ་མི་བྱེད།

རྣམ་པར་རྟོག་པར་མི་བྱེད་པ་དེ་ནི་སྦྱངས་པ་དང་ལྡན་པ་ཡིན་ནོ་ཞེས་ཁོ་བོ་སྨྲའོ།

དེ་ཅིའི་ཕྱིར་ཞེ་ན།

ལྷའི་བུ་དགེ་སློང་གང་འདོད་ཆགས་སྦྱོང་བ་དང་།

ཞེ་སྡང་སྦྱོང་བ་དང་།

གཏི་མུག་སྦྱོང་བ་དང་།

ཁམས་གསུམ་སྦྱོང་བ་དང་།

ཕུང་པོ་རྣམས་སྦྱོང་བ་དང་།

ཁམས་རྣམས་སྦྱོང་བ་དང་།

ནང་གི་སྐྱེ་མཆེད་དྲུག་དང་།

ཕྱིའི་སྐྱེ་མཆེད་དྲུག་པོ་དག་སྦྱོང་བར་བྱེད་ཅིང་ཅི་ནས་ཀྱང་མི་ལེན།

མི་འདོར།

མི་སྒོམ།

མི་སེལ།

རྣམ་པར་མི་སེལ་བ་དེ་ལྟར་སྦྱོང་བར་བྱེད་པ་དེ་ནི་སྦྱངས་པ་དང་ལྡན་པ་ཡིན་ནོ་ཞེས་ཁོ་བོ་སྨྲ་བའི་ཕྱིར་རོ།

ལྷའི་བུ་གཞན་ཡང་དེ་ལྟར་རབ་ཏུ་བྱུང་ཞིང་དེ་ལྟར་རྫོགས་པར་བསྙེན་པ་དེ་ལ་ཁོ་བོ་འདི་སྐད་ཅེས་རིགས་ཀྱི་བུ་གལ་ཏེ་ཁྱོད་བདེན་པ་བཞི་རྟོགས་པར་མི་བྱེད།

དྲན་པ་ཉེ་བར་གཞག་པ་བཞི་ཡང་མི་སྒོམ།

ཡང་དག་པར་སྤོང་བ་བཞི་ཡང་མ་ཡིན།

རྫུ་འཕྲུལ་གྱི་རྐང་པ་བཞི་ཡང་མ་ཡིན།

དབང་པོ་ལྔ་ཡང་མ་ཡིན།

སྟོབས་ལྔ་ཡང་མི་ཡིན།

བྱང་ཆུབ་ཀྱི་ཡན་ལག་བདུན་ཡང་མ་ཡིན།

འཕགས་པའི་ལམ་ཡན་ལག་བརྒྱད་པ་ཡང་མི་སྒོམ་ཞིང་བྱང་ཆུབ་ཀྱི་ཕྱོགས་དང་མཐུན་པའི་ཆོས་སུམ་ཅུ་རྩ་བདུན་ཡང་མི་སྒོམ།

མངོན་སུམ་དུ་མི་བྱེད།

རྣམ་པར་ཐར་པའི་སྒོ་གསུམ་ཡང་མི་སྒོམ།

མངོན་སུམ་དུ་མི་བྱེད་པ་དེ་ལྟ་ན་ཁྱོད་བྱང་ཆུབ་ཀྱི་ཕྱོགས་དང་འཐུན་པའི་ཆོས་རྣམས་སྒོམ་པ་ཡིན་ནོ་ཞེས་སྨྲའོ།

དེ་ཅིའི་ཕྱིར་ཞེ་ན།

ལྷའི་བུ་དེ་ནི་མི་སྐྱེ་བའི་མཚན་ཉིད་རྟོགས་པ་ཞེས་བྱ་སྟེ།

དེ་ནི་བསྒོམ་པར་བྱར་མེད་ཅིང་མངོན་སུམ་དུ་བྱར་མེད་པའི་ཕྱིར་རོ།

དེ་ཅིའི་ཕྱིར་ཞེ་ན།

མི་སྐྱེ་བ་ནི་མངོན་སུམ་དུ་བྱར་མི་ནུས་པའི་ཕྱིར་རོ།

ལྷའི་བུ་དྲན་པ་ཉེ་བར་གཞག་པ་རྣམས་ཞེས་བྱ་བ་ནི་ཆོས་ཐམས་ཅད་དྲན་པ་མེད་ཅིང་ཡིད་ལ་བྱེད་པ་མེད་པས་དེའི་ཕྱིར་དྲན་པ་ཉེ་བར་གཞག་པ་རྣམས་ཞེས་བྱའོ།

ལྷའི་བུ་དགེ་སློང་གང་འདོད་པའི་ཁམས་ལ་ཡང་མི་གནས།

གཟུགས་ཀྱི་ཁམས་ལ་ཡང་མི་གནས།

གཟུགས་མེད་པའི་ཁམས་ལ་ཡང་མི་གནས་པ་དེ་ནི་གནས་མེད་པ་ལ་གནས་པའི་དགེ་སློང་དྲན་པ་ཉེ་བར་གཞག་པ་རྣམས་སྒོམ་པ་ཞེས་བྱའོ།

ཇི་ལྟར་སྒོམ་ཞེ་ན།

ཅི་ནས་ཀྱང་སྒོམ་པར་མི་བྱེད།

འཇིག་པར་མི་བྱེད་པ་དེ་ལྟར་སྒོམ་པར་བྱེད་པས་དེའི་ཕྱིར་སྒོམ་པར་བྱེད་པ་ཞེས་བྱ་སྟེ།

བྱང་ཆུབ་ཀྱི་ཕྱོགས་དང་འཐུན་པའི་ཆོས་སུམ་ཅུ་རྩ་བདུན་པོ་ཐམས་ཅད་ལ་ཡང་དེ་བཞིན་དུ་སྦྱར་རོ།

ལྷའི་བུ་གང་གི་ཚེ་དགེ་སློང་རྣལ་འབྱོར་པ་རྣལ་འབྱོར་སྤྱོད་པས་ཆོས་ཐམས་ཅད་མི་དམིགས་པ་དེའི་ཚེ་ན་རློམ་སེམས་སུ་མི་བྱེད་དོ།

གང་གི་ཚེ་རློམ་སེམས་སུ་མི་བྱེད་པ་དེའི་ཚེ་སྒོམ་པར་མི་བྱེད་དོ།

གང་གི་ཚེ་སྒོམ་པར་མི་བྱེད་པ་དེའི་ཚེ་མངོན་སུམ་དུ་མི་བྱེད་དོ།

དེ་ཅིའི་ཕྱིར་ཞེ་ན།

ལྷའི་བུ་བྱང་ཆུབ་ཀྱི་ཕྱོགས་དང་འཐུན་པའི་ཆོས་སུམ་ཅུ་རྩ་བདུན་ཞེས་བྱ་བ་གང་ཡིན་པ་དེ་ནི་མིང་ཙམ་སྟེ།

མིང་དེ་ཡང་གཡོ་བ་མེད་པ།

རྐྱེན་ལས་སྐྱེས་པ།

མཚན་ཉིད་མེད་པར་མཚན་ཉིད་གཅིག་པ།

བརྗོད་ཀྱང་རུང་།

མ་བརྗོད་ཀྱང་རུང་།

མིང་གི་ཡོངས་སུ་ཤེས་པ་གང་ཡིན་པ་དེ་དམིགས་སུ་མེད་པའི་ཕྱིར་ཏེ།

བྱང་ཆུབ་ཀྱི་ཕྱོགས་དང་འཐུན་པའི་ཆོས་སུམ་ཅུ་རྩ་བདུན་ཡོངས་སུ་ཤེས་པ་གང་ཡིན་པ་དེ་ནི་བདེན་པ་མཐོང་བ་ཡིན་ནོ།

ལྷའི་བུས་སྨྲས་པ།

འཇམ་དཔལ་རྣལ་འབྱོར་སྤྱོད་པ་རྣལ་འབྱོར་སྤྱོད་པ་ཞེས་བགྱི་ན་ཇི་ལྟར་ན་དགེ་སློང་རྣལ་འབྱོར་སྤྱོད་པ་ལགས།

འཇམ་དཔལ་གྱིས་སྨྲས་པ།

ལྷའི་བུ་གང་གི་ཚེ་རྣལ་འབྱོར་སྤྱོད་པ་འདི་ལྟ་སྟེ།

ཆོས་ཐམས་ཅད་སྐྱེ་བ་མེད་པའི་ཚུལ་གྱིས་ཚུལ་གཅིག་ཏུ་སྦྱོར་བར་བྱེད་ན་དེའི་ཕྱིར་རྣལ་འབྱོར་སྤྱོད་པ་ཞེས་བྱའོ།

གང་གི་ཚེ་ཅི་ལ་ཡང་མི་སྤྱོད་ན་དེའི་ཕྱིར་རྣལ་འབྱོར་སྤྱོད་པ་ཞེས་བྱའོ།

ཅི་ལ་མི་སྤྱོད་ཅེ་ན།

འདི་ལྟ་སྟེ།

ཆོས་

ཐམས་ཅད་ཡོད་པ་མ་ཡིན་པའི་ཕྱིར་འཇིག་རྟེན་འདི་ལ་མི་སྤྱོད།

འཇིག་རྟེན་ཕ་རོལ་ལ་མི་སྤྱོད།

ཁམས་གསུམ་ལ་མི་སྤྱོད་དེ།

དེའི་ཕྱིར་རྣལ་འབྱོར་སྤྱོད་པ་ཞེས་བྱའོ།

ལྷའི་བུ་གང་གི་ཚེ་རྣལ་འབྱོར་སྤྱོད་པ་ཆོས་འགའ་ཡང་སྦྱོར་བར་མི་བྱེད།

འབྱེད་པར་མི་བྱེད་ན་དེའི་ཕྱིར་རྣལ་འབྱོར་སྤྱོད་པ་ཞེས་བྱའོ།

དེ་ནས་འཁོར་དེ་ལས་དགེ་སློང་སྟོང་ཕྲག་མང་པོ་དག་འདི་སྙམ་དུ་བཅོམ་ལྡན་འདས་དེ་བཞིན་གཤེགས་པས་རྣམ་པར་ཐར་པའི་སྒོ་གསུམ་རྟོགས་པས་མྱ་ངན་ལས་འདའ་བ་དང་།

བྱང་ཆུབ་ཀྱི་ཕྱོགས་དང་འཐུན་པའི་ཆོས་སུམ་ཅུ་རྩ་བདུན་མངོན་སུམ་དུ་བྱས་པས་མྱ་ངན་ལས་འདའ་བར་འགྱུར་རོ་ཞེས་གསུངས་པ་དེ་འཇམ་དཔལ་གཞོན་ནུར་གྱུར་པ་འདིས་བཀག་པར་གྱུར་ན།

འཇམ་དཔལ་གཞོན་ནུར་གྱུར་པས་བསྟན་པ་འདི་ཇི་ལྟར་རུང་སྟེ།

ཆོས་བསྟན་པ་འདི་འགལ་བའམ་གཅིག་ཏུ་མ་གྱུར་གྲང་སྙམ་དུ་ཐེ་ཚོམ་གྱི་སེམས་སྐྱེས་པར་གྱུར་ཏོ།

དེ་ནས་འཇམ་དཔལ་གཞོན་ནུར་གྱུར་པས་དགེ་སློང་དེ་དག་གི་སེམས་ཀྱི་ཡོངས་སུ་རྟོག་པ་སེམས་ཀྱིས་ཤེས་ནས་གནས་བརྟན་ཤཱ་རིའི་བུ་ལ་སྨྲས་པ།

བཙུན་པ་ཤཱ་རིའི་བུ་ཁྱོད་ནི་དེ་བཞིན་གཤེགས་པས་ཡིད་ཆེས་པ་དད་པ་དང་ལྡན་པ་ཤེས་རབ་ཆེན་པོ་རྣམས་ཀྱི་མཆོག་ཏུ་བསྟན་པ་ཡིན་ན།

ཤཱ་རིའི་བུ་གང་གི་ཚེ་ཁྱོད་ཀྱིས་འདོད་ཆགས་དང་བྲལ་བའི་ཆོས་རྣམས་མངོན་སུམ་དུ་བྱས་པའི་ཚེ་བཙུན་པས་བདེན་པ་བཞི་པོ་དག་དམིགས་པའམ།

མངོན་སུམ་དུ་བྱས་པའམ།

བསྒོམས་པ་འམ།

བྱང་ཆུབ་ཀྱི་ཕྱོགས་དང་འཐུན་པའི་ཆོས་སུམ་ཅུ་རྩ་བདུན་དང་།

རྣམ་པར་ཐར་པའི་སྒོ་གསུམ་པོ་དག་དམིགས་པའམ།

མངོན་སུམ་དུ་བྱས་པ་འམ།

བསྒོམས་པ་ཅི་ཡང་ཡོད་དམ།

ཤཱ་རིའི་བུས་སྨྲས་པ།

འཇམ་དཔལ་དེ་ནི་མེད་དེ།

གང་མངོན་སུམ་དུ་བྱ་བ་འམ།

བསྒོམ་པར་བྱ་བ་འམ།

རྟོགས་པར་བྱ་བའི་ཆོས་དེ་ནི་འགའ་ཡང་དམིགས་སུ་མེད་དོ།

དེ་ཅིའི་ཕྱིར་ཞེ་ན།

ཆོས་ཐམས་ཅད་ནི་བླང་དུ་མེད་པ།

མ་སྐྱེས་པ།

རྣམ་པར་རིག་པ་མེད་པ།

སྟོང་པ་ཡིན་པས་སྟོང་པས་སྟོང་པ་ཉིད་མངོན་སུམ་དུ་མི་བྱེད་པའི་ཕྱིར་རོ།

བསྟན་པ་འདི་བཤད་

པ་ན་དགེ་སློང་སུམ་སྟོང་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ།།

བམ་པོ་བཞི་པ་སྟེ་ཐ་མ།

དེ་ནས་ལྷའི་བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ཏེ།

འཇམ་དཔལ་དེ་ནི་འདི་ལྟ་སྟེ།

ཕྱེ་བས་གོ་བ་ཟབ་མོ་ལ་བཟོད་པ་སྟོང་པ་ཉིད་ལ་གནས་པས་བསྟན་པ་ལགས་ཏེ།

ལེགས་སོ་ལེགས་སོ།

འཇམ་དཔལ་གྱིས་སྨྲས་པ།

ལྷའི་བུ་ཁོ་བོ་ནི་ཕྱེ་བས་གོ་བ་མ་ཡིན་གྱི་བྱིས་པ་སོ་སོའི་སྐྱེ་བོ་ཐམས་ཅད་ནི་ཕྱེ་བས་གོ་བ་ཡིན་ནོ།

དེ་ཅིའི་ཕྱིར་ཞེ་ན།

འདི་ལྟར་དེ་དག་ནི་འབྱེད་པར་བྱེད་པ་ཡིན་པའི་ཕྱིར་རོ།

ཅི་ཞིག་འབྱེད་པར་བྱེད་ཅེ་ན།

སེམས་ཅན་དམྱལ་བ་འབྱེད་པར་བྱེད་དོ།

དུད་འགྲོའི་སྐྱེ་གནས་འབྱེད་པར་བྱེད་དོ།

གཤིན་རྗེའི་འཇིག་རྟེན་འབྱེད་པར་བྱེད་དོ།

ཁམས་གསུམ་པ་འབྱེད་པར་བྱེད་དེ།

དེ་ལྟར་ན་འབྱེད་པ་རྣམས་དང་།

ཀུན་ཏུ་འབྱེད་པ་རྣམས་ཀྱི་འཁོར་བའི་སྔོན་གྱི་མཐའ་མི་མངོན་ནོ།

ལྷའི་བུ་བྱིས་པ་རྣམས་ནི་འདོད་ཆགས་ཀུན་ཏུ་འབྱེད་པར་བྱེད་དོ།

ཞེ་སྡང་ཀུན་ཏུ་འབྱེད་པར་བྱེད་དོ།

གཏི་མུག་ཀུན་ཏུ་འབྱེད་པར་བྱེད་དོ།

ལྟ་བ་ཀུན་ཏུ་འབྱེད་པར་བྱེད་དོ།

མིང་དང་གཟུགས་ཀུན་ཏུ་འབྱེད་པར་བྱེད་དོ།

ལྷའི་བུ་སངས་རྒྱས་རྣམས་ནི་ཕྱེ་བས་གོ་བ་མ་ཡིན་ནོ།

ཉན་ཐོས་རྣམས་ཀྱང་མ་ཡིན།

རང་སངས་རྒྱས་རྣམས་ཀྱང་མ་ཡིན།

བྱང་ཆུབ་སེམས་དཔའ་བཟོད་པ་ཐོབ་པ་རྣམས་ཀྱང་མ་ཡིན་གྱི་ལྷའི་བུ་བྱིས་པ་རྣམས་ནི་ཕྱེ་བས་གོ་བ་ཡིན་ནོ།

ལྷའི་བུས་སྨྲས་པ།

འཇམ་དཔལ་འོ་ན་ཅི་ཁྱོད་རྣམ་པར་སྤྲོས་ན་གོ་བ་ལགས་སམ།

འཇམ་དཔལ་གྱིས་སྨྲས་པ།

ལྷའི་བུ་དེ་ནི་མ་ཡིན་ནོ།

ལྷའི་བུས་སྨྲས་པ།

འཇམ་དཔལ་འོ་ན་བཀྲི་དགོས་པ་ལགས་སམ།

འཇམ་དཔལ་གྱིས་སྨྲས་པ།

ལྷའི་བུ་དེ་ནི་མ་ཡིན་ནོ།

ལྷའི་བུས་སྨྲས་པ།

འཇམ་དཔལ་འོ་ན་ཚིག་ལྷུར་ལེན་པ་ལགས་སམ།

འཇམ་དཔལ་གྱིས་སྨྲས་པ།

ལྷའི་བུ་དེ་དེ་བཞིན་ཏེ།

ཁོ་བོ་ནི་ཚིག་ལྷུར་ལེན་པ་ཡིན་ནོ།

ལྷའི་བུས་སྨྲས་པ།

འཇམ་དཔལ་ཁྱོད་ཅི་ལས་

དགོངས་ཏེ་དེ་སྐད་སྟོན།

འཇམ་དཔལ་གྱིས་སྨྲས་པ།

ལྷའི་བུ་གང་བྱང་ཆུབ་སེམས་དཔའ་ནི་ཡི་གེ་གཅིག་དང་ཚིག་གཅིག་ལས་ཀྱང་མི་གཡོ་ལ།

ཡི་གེ་དེ་ཉིད་དང་།

ཚིག་དེ་ཉིད་ཀྱི་དོན་དང་།

ཚུལ་དང་།

སྒོ་དང་།

ལམ་ཡང་ཡང་དག་པ་ཇི་ལྟ་བ་བཞིན་རབ་ཏུ་ཤེས་པར་བྱེད་དེ།

འདི་ནི་སྟོང་པའོ་ཞེས་བྱ་བར་ཤེས་པར་བྱེད་དོ།

འདི་ནི་དབེན་པའོ་ཞེས་བྱ་བར་ཤེས་པར་བྱེད་དོ།

འདི་ནི་དངོས་པོ་མེད་པའོ་ཞེས་བྱ་བར་ཤེས་པར་བྱེད་དོ།

འདི་ནི་སྐྱེ་བ་མེད་པའོ་ཞེས་བྱ་བར་ཤེས་པར་བྱེད་ཅིང་།

ཅི་ནས་ཀྱང་རྣམ་པར་ཤེས་པར་མི་བྱེད།

རིག་པར་མི་བྱེད།

ཚོར་བར་མི་བྱེད་པ་དེ་ལྟར་ཤེས་པར་བྱེད་པས་དེའི་ཕྱིར་ཚིག་ལྷུར་ལེན་པ་ཞེས་བྱའོ།

དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ཏེ།

འཇམ་དཔལ་དེ་ནི་འདི་ལྟ་སྟེ།

གཟུངས་ཐོབ་པས་བསྟན་པ་ཡིན་ཏེ།

ལེགས་སོ་ལེགས་སོ།

འཇམ་དཔལ་གྱིས་གསོལ་པ།

བཅོམ་ལྡན་འདས་བདག་ནི་གཟུངས་ཐོབ་པ་མ་ལགས་སོ།

དེ་ཅིའི་སླད་དུ་ཞེ་ན།

བཅོམ་ལྡན་འདས་བྱིས་པ་རྣམས་ནི་གཟུངས་ཐོབ་པ་ལགས་ཀྱི།

སངས་རྒྱས་རྣམས་དང་།

བྱང་ཆུབ་སེམས་དཔའ་རྣམས་ནི་གཟུངས་ཐོབ་པ་མ་ལགས་པའི་སླད་དུའོ།

དེ་ཅིའི་སླད་དུ་ཞེ་ན།

བཅོམ་ལྡན་འདས་བྱིས་པ་རྣམས་ནི་འཛིན་པར་བགྱིད་པའི་སླད་དུ་སྟེ།

ཅི་ཞིག་འཛིན་པར་བགྱིད་ཅེ་ན།

བདག་ཏུ་འཛིན་པ་འཛིན་པར་བགྱིད་དོ།

སེམས་ཅན་དུ་འཛིན་པ་དང་།

སྲོག་ཏུ་འཛིན་པ་དང་།

གང་ཟག་ཏུ་འཛིན་པ་འཛིན་པར་བགྱིད་དོ།

ཆད་པར་འཛིན་པ་དང་།

རྟག་པར་འཛིན་པ་དང་།

འདོད་ཆགས་དང་།

ཞེ་སྡང་དང་།

གཏི་མུག་འཛིན་པར་བགྱིད་དོ།

མ་རིག་པ་དང་།

སྲིད་པའི་སྲེད་པ་དང་།

ཕུང་པོ་ལྔ་དང་།

འཇིག་ཚོགས་དང་།

ཁམས་བཅོ་བརྒྱད་དང་།

ནང་གི་སྐྱེ་མཆེད་དྲུག་དང་།

ཕྱིའི་སྐྱེ་མཆེད་དྲུག་འཛིན་པར་བགྱིད་དོ།

རྟོག་པ་དང་།

རྣམ་པར་རྟོག་པ་དང་།

ཡོངས་སུ་རྟོག་པ་དང་།

ལྟ་བའི་རྣམ་པ་དག་འཛིན་པར་བགྱིད་དེ།

བཅོམ་ལྡན་འདས་དེ་ལྟ་ལགས་པས་

བྱིས་པ་རྣམས་ནི་གཟུངས་ཐོབ་པ་ལགས་སོ།

རྟོག་གེ་བ་རྣམས་ནི་རྟོག་པ་དང་རྣམ་པར་རྟོག་པ་དང་ཡོངས་སུ་རྟོག་པ་དང་ལྟ་བའི་རྣམ་པ་དག་འཛིན་པར་བགྱིད་པས།

བཅོམ་ལྡན་འདས་དེའི་སླད་དུ་བྱིས་པ་རྣམས་ནི་གཟུངས་ཐོབ་པ་ལགས་སོ།

དེ་ཅིའི་སླད་དུ་ཞེ་ན།

བྱིས་པ་རྣམས་ཆོས་གང་དག་འཛིན་པར་བགྱིད་པ་དེ་དག་ནི་སངས་རྒྱས་རྣམས་འཛིན་པར་མི་མཛད།

ཉན་ཐོས་རྣམས་ཀྱང་མི་བགྱིད།

རང་སངས་རྒྱས་རྣམས་ཀྱང་མི་བགྱིད་དེ།

བྱང་ཆུབ་སེམས་དཔའ་རྣམས་ཀྱང་མི་བགྱིད་པས།

དེའི་སླད་དུ་བྱིས་པ་རྣམས་ནི་གཟུངས་ཐོབ་པ་ལགས་སོ།

དེ་ཅིའི་སླད་དུ་ཞེ་ན།

འདི་ལྟར་བྱིས་པ་རྣམས་ནི་ལེགས་པར་འཛིན་པ་མ་ལགས་པ་འཛིན་པར་བགྱིད་ཀྱི།

སངས་རྒྱས་རྣམས་ནི་མི་མཛད།

ཉན་ཐོས་རྣམས་ཀྱང་མི་བགྱིད།

རང་སངས་རྒྱས་རྣམས་ཀྱང་མི་བགྱིད།

བྱང་ཆུབ་སེམས་དཔའ་རྣམས་ཀྱང་མི་བགྱིད་པའི་སླད་དུའོ།

དེ་ནས་ལྷའི་བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ།

འཇམ་དཔལ་གལ་ཏེ་ཁྱོད་གཟུངས་ཐོབ་པ་མ་ལགས་ན་འོ་ན་ཅི་ཁྱོད་རྟོགས་པ་བུལ་བ་ལགས་སམ།

འཇམ་དཔལ་གྱིས་སྨྲས་པ།

ལྷའི་བུ་དེ་དེ་བཞིན་ཏེ།

ཁོ་བོ་ནི་རྟོགས་པ་བུལ་བ་ཡིན་ནོ།

དེ་ཅིའི་ཕྱིར་ཞེ་ན།

ལྷའི་བུ་ཁོ་བོ་ནི་རྟོགས་པ་གང་སངས་རྒྱས་རྣམས་དང་།

ཉན་ཐོས་རྣམས་དང་།

རང་སངས་རྒྱས་རྣམས་དང་།

བྱང་ཆུབ་སེམས་དཔའ་རྣམས་ཀྱིས་ཀྱང་མི་མཁྱེན་པ་དེ་ཙམ་དུ་བུལ་བའི་རྟོགས་པ་དང་ལྡན་པ་ཡིན་པའི་ཕྱིར་རོ།

ལྷའི་བུ་བྱིས་པ་སོ་སོའི་སྐྱེ་བོ་གང་དག་ཡིན་པ་དེ་དག་ནི་རྟོགས་པ་བུལ་བ་མ་ཡིན་ནོ།

དེ་ཅིའི་ཕྱིར་ཞེ་ན།

བྱིས་པ་སོ་སོའི་སྐྱེ་བོ་རྣམས་ནི་མངོན་པར་ཆགས་པའི་རྟོགས་པ་ཅན་ཡིན་ལ།

མཁས་པ་རྣམས་ནི་རྟོགས་པ་བུལ་བ་དང་ལྡན་པའི་ཕྱིར་རོ།

རྒྱུན་དུ་ཞུགས་པ་རྣམས་ཀྱང་རེ་ཤིག་མངོན་པར་ཆགས་པའི་རྟོགས་པ་ཅན་དུ་སྟོན་ན་བྱིས་པ་སོ་སོའི་སྐྱེ་བོ་གཞན་དག་ལྟ་སྨོས་ཀྱང་ཅི་དགོས་ཏེ།

ལྷའི་བུ་དེ་ལྟ་བས་ན་ཁོ་བོ་ནི་རྟོགས་པ་བུལ་བ་ཡིན་གྱི་གཟུངས་ཐོབ་པ་མ་ཡིན་ནོ།

དེ་ཅིའི་ཕྱིར་ཞེ་

ན།

ཁོ་བོས་ནི་གང་གཟུང་བར་བྱ་བ་ཅུང་ཟད་ཀྱང་མ་རྙེད་པའི་ཕྱིར་རོ།

བསྟན་པ་འདི་བཤད་པ་ན་འཁོར་དེ་ལས་དགེ་སློང་ལྔ་བརྒྱ་ཙམ་ཆོས་ཀྱི་རྣམ་གྲངས་འདི་མ་རྟོགས་ཏེ།

སྤངས་ཤིང་འགལ་བར་བྱས་ནས་རང་རང་གི་ལུས་དེ་དག་ཉིད་ཀྱིས་སེམས་ཅན་དམྱལ་བ་ཆེན་པོ་རྣམས་སུ་ལྷུང་བར་གྱུར་ཏོ།

དེ་ནས་ཚེ་དང་ལྡན་པ་ཤཱ་རིའི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ།

འཇམ་དཔལ་དགེ་སློང་ལྔ་བརྒྱ་ཙམ་པོ་དེ་དག་ཆོས་ཀྱི་རྣམ་གྲངས་འདི་མ་རྟོགས་ཏེ།

སྤངས་ཤིང་འགལ་བར་བྱས་ནས་རང་རང་གི་ལུས་དེ་དག་ཉིད་ཀྱིས་སེམས་ཅན་དམྱལ་བ་ཆེན་པོ་རྣམས་སུ་ལྟུང་བར་གྱུར་གྱིས།

དེ་ལྟ་བུའི་གནས་ཟབ་མོ་དག་མ་སྟོན་པར་སོ་སོར་རྟོགས་ཏེ་སྟོན་ཅིག །

འཇམ་དཔལ་གྱིས་སྨྲས་པ།

བཙུན་པ་ཤཱ་རིའི་བུ་ཁྱོད་མ་རྟོག་ཤིག །

གང་སེམས་ཅན་དམྱལ་བར་འགྲོ་བའི་ཆོས་དེ་ལྟ་བུ་འགའ་ཡང་དམིགས་སུ་མེད་དོ།

དེ་ཅིའི་ཕྱིར་ཞེ་ན།

ཆོས་ཐམས་ཅད་སྐྱེ་བ་མེད་པའི་ཕྱིར་རོ།

བཙུན་པ་ཤཱ་རིའི་བུ་གཞན་ཡང་དེ་སྐད་ཅེས་སོ་སོར་རྟོགས་ཏེ་སྟོན་ཅིག་ཅེས་ཟེར་བ་ནི་བཙུན་པ་ཤཱ་རིའི་བུ་རིགས་ཀྱི་བུའམ།

རིགས་ཀྱི་བུ་མོ་བདག་ཏུ་ལྟ་བ་ལ་རྟེན་པ་འམ།

སེམས་ཅན་དུ་ལྟ་བ་ལ་རྟེན་པ་འམ།

སྲོག་ཏུ་ལྟ་བ་ལ་རྟེན་པ་འམ།

གང་ཟག་ཏུ་ལྟ་བ་ལ་རྟེན་པ་གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགེ་སློང་གི་དགེ་འདུན་དང་བཅས་པ་གང་གཱའི་ཀླུང་གི་བྱེ་མ་སྙེད་ཅིག་ལ་ཇི་སྲིད་འཚོའི་བར་དུ་བདེ་བའི་ཡོ་བྱད་ཐམས་ཅད་ཀྱིས་བསྙེན་བཀུར་བྱས་པ་དང་།

གང་གིས་ཆོས་ཟབ་མོ་ཤེས་པར་དཀའ་བ་འཇིག་རྟེན་ཐམས་ཅད་དང་མི་འཐུན་པ་འདི་ལྟ་བུ་འདི་ཐོས་ཤིང་ཆོས་སྟོང་པ་དང་།

མཚན་མ་མེད་པ་དང་།

སྨོན་པ་མེད་པ་དང་།

ཞི་བ་དང་།

དབེན་པ་དང་།

སྐྱེ་བ་མེད་པ་དང་།

སེམས་ཅན་མེད་པ་དང་།

སྲོག་མེད་པ་དང་།

གང་ཟག་མེད་པ་དང་།

མི་རྟག་པ་དང་།

སྡུག་བསྔལ་བ་དང་།

བདག་མེད་པ་འདི་ལྟ་བུ་འདི་ཐོས་ནས་སྤངས་ཏེ་སེམས་ཅན་དམྱལ་བ་རྣམས་སུ་ལྷུང་བར་གྱུར་པ་ནི་བཙུན་པ་ཤཱ་རིའི་བུ་

རིགས་ཀྱི་བུ་འམ།

རིགས་ཀྱི་བུ་མོ་ཆོས་ཟབ་མོ་འདི་ཐོས་ནས་སྤངས་ཏེ་སེམས་ཅན་དམྱལ་བ་རྣམས་སུ་ལྷུང་བ་དེ་ཆེས་མྱུར་བར་དེ་དག་ནས་ལྡང་ཞིང་རྣམ་པར་ཐར་པར་འགྱུར་གྱི།

རིགས་ཀྱི་བུའམ།

རིགས་ཀྱི་བུ་མོ་བདག་ཏུ་ལྟ་བ་ལ་རྟེན་པ་ཆོས་འདི་མ་ཐོས་པར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་གི་བྱེ་མ་སྙེད་ལ་བསྙེན་བཀུར་བྱས་པ་དེ་ནི་དེ་ལྟ་མ་ཡིན་ནོ།

དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ཏེ།

འཇམ་དཔལ་ལེགས་སོ་ལེགས་སོ།

ཇི་སྐད་སྨྲས་པ་དེ་བཞིན་ཏེ།

ཐོས་པ་འདི་ནི་སངས་རྒྱས་བྱུང་བ་དང་འདྲའོ།

ཐོས་པ་འདི་ནི་རྒྱུན་དུ་ཞུགས་པའི་འབྲས་བུ་དང་འདྲའོ།

ཐོས་པ་འདི་ནི་ལན་ཅིག་ཕྱིར་འོང་བའི་འབྲས་བུ་དང་འདྲའོ།

ཐོས་པ་འདི་ནི་ཕྱིར་མི་འོང་བའི་འབྲས་བུ་དང་འདྲའོ།

ཐོས་པ་འདི་ནི་དགྲ་བཅོམ་པ་ཉིད་དང་འདྲའོ།

དེ་ཅིའི་ཕྱིར་ཞེ་ན།

བདག་ཏུ་ལྟ་བ་ལ་རྟེན་པ་དང་།

དམིགས་པ་ཅན་ལ་ནི་ཐོབ་པའམ།

མངོན་པར་རྟོགས་པ་མེད་པའི་ཕྱིར་རོ།

དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ།

ཤཱ་རིའི་བུ་དགེ་སློང་དེ་དག་ནི་སེམས་ཅན་དམྱལ་བ་དེ་དག་ནས་ཆེས་མྱུར་བར་ལྡང་ཞིང་ཡོངས་སུ་མྱ་ངན་ལས་འདའ་བར་འགྱུར་གྱི།

འདི་ན་མི་གཏི་མུག་ཅན་དམིགས་པའི་ལྟ་བ་དང་ལྡན་པ།

ཐེ་ཚོམ་དུ་གྱུར་པ་གང་དག་དེ་བཞིན་གཤེགས་པ་ལ་མཆོད་པ་བྱེད་པ་དེ་དག་ནི་དེ་ལྟ་མ་ཡིན་ནོ།

ཤཱ་རིའི་བུ་དེ་ལྟ་མོད་ཀྱི།

དེ་ནི་དེ་དག་ཡོངས་སུ་མྱ་ངན་ལས་འདའ་བའི་རྒྱུར་འགྱུར་བ་ཡིན་ཏེ།

མྱུར་དུ་རྣམ་པར་ཐར་པར་ནི་མི་འགྱུར་རོ།

དེ་ཅིའི་ཕྱིར་ཞེ་ན།

འདི་ལྟར་ཆོས་ཟབ་མོ་དག་མ་ཐོས་པའི་ཕྱིར་རོ།

ཤཱ་རིའི་བུ་གཞན་ཡང་རིགས་ཀྱི་བུ་འམ།

རིགས་ཀྱི་བུ་མོ་གང་དག་རྣ་བླགས་ཏེ་ཆོས་ཟབ་མོ་འདི་མཉན་ནས་མ་རྟོགས་ཤིང་སྤངས་ཏེ་སེམས་ཅན་དམྱལ་བར་འགྲོ་བ་དེ་དག་ནི་ཆེས་མྱུར་བར་རྣམ་པར་ཐར་པར་འགྱུར་གྱི་དམིགས་པ་ཅན་ཐེ་ཚོམ་དུ་གྱུར་པ་གཞན་དག་ནི་དེ་ལྟ་མ་ཡིན་ནོ།

དེ་ནས་ལྷའི་

བུ་བློ་གྲོས་རབ་གནས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ།

འཇམ་དཔལ་ཁྱོད་བདག་དང་ཚངས་པ་མཚུངས་པར་སྤྱོད་བཞེད་དམ།

འཇམ་དཔལ་གྱིས་སྨྲས་པ།

ལྷའི་བུ་གལ་ཏེ་ཁྱོད་ཚངས་པར་སྤྱོད་པ་མི་ལེན་ཅིང་ཚངས་པར་སྤྱད་པ་སྤྱོད་པར་མི་བྱེད་པ་དེ་ལྟ་ན་ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ།

ལྷའི་བུས་སྨྲས་པ།

འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན།

འཇམ་དཔལ་གྱིས་སྨྲས་པ།

ལྷའི་བུ་གང་ལེན་པར་བྱེད་པ་དེ་ནི་སྤྱོད་པར་བྱེད་ཀྱི་གང་ལེན་པར་མི་བྱེད་པ་དེ་ནི་ཅི་ཡང་སྤྱོད་པར་མི་བྱེད་དོ།

ལྷའི་བུ་གང་ཚངས་པར་སྤྱོད་པ་དམིགས་པར་བྱེད་པ་དེ་ནི་སྤྱོད་པར་བྱེད་ཀྱི་གང་དམིགས་པར་མི་བྱེད་པ་དེ་ནི་ཅི་ཡང་སྤྱོད་པར་མི་བྱེད་དོ།

ལྷའི་བུས་སྨྲས་པ།

འཇམ་དཔལ་འོ་ན་ཅི་ཁྱོད་ཚངས་པར་མི་སྤྱོད་ལགས་སམ།

འཇམ་དཔལ་གྱིས་སྨྲས་པ།

ལྷའི་བུ་དེ་དེ་བཞིན་ཏེ།

ཁོ་བོ་ནི་ཚངས་པར་མི་སྤྱོད་དོ།

དེ་ཅིའི་ཕྱིར་ཞེ་ན།

ཁོ་བོ་ནི་ཚངས་པ་ཡང་མ་ཡིན་ལ་སྤྱོད་པ་ཡང་མ་ཡིན་པས་དེའི་ཕྱིར་ཁོ་བོ་ཚངས་པར་མི་སྤྱོད་དོ།

ལྷའི་བུས་སྨྲས་པ།

འཇམ་དཔལ་དེ་ནི་འདི་ལྟ་སྟེ།

ཐོགས་པ་མེད་པའི་སྤོབས་པ་དང་ལྡན་པས་བསྟན་པ་ལགས་ཏེ།

ལེགས་སོ་ལེགས་སོ།

འཇམ་དཔལ་གྱིས་སྨྲས་པ།

ལྷའི་བུ་གལ་ཏེ་ཁོ་བོ་ཐོགས་པ་མེད་པའི་སྤོབས་པ་དང་ལྡན་པ་ཡིན་པར་གྱུར་ན་ནི་དེ་ལྟར་ན་ཐོགས་པར་ཡང་འགྱུར་རོ།

དེ་ཅིའི་ཕྱིར་ཞེ་ན།

ཇི་ཙམ་དུ་བདག་གི་ཡོད་པ་དང་།

ཇི་ཙམ་དུ་མངོན་པར་ཞེན་པ་ཡོད་པ་དེ་ཙམ་དུ་ཐོགས་པར་འགྱུར་བའི་ཕྱིར་རོ།

གཞན་ཡང་འཇམ་དཔལ་གཞོན་ནུར་གྱུར་པས་ལྷའི་བུ་བློ་གྲོས་རབ་གནས་ལ་འདི་སྐད་ཅེས་སྨྲས་སོ།

ལྷའི་བུ་གལ་ཏེ་ཁྱོད་སེམས་ཅན་ཐམས་ཅད་སྲོག་དང་བྲལ་བར་བྱེད་ཅིང་མཚོན་ཆ་ཡང་ཐོགས་པར་མི་བྱེད།

རལ་གྲི་ཡང་མ་ཡིན།

བོང་བ་ཡང་མ་ཡིན།

དབྱུག་པ་ཡང་ཐོགས་པར་མི་བྱེད་པ་དེ་ལྟ་ན་ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ།

ལྷའི་བུས་སྨྲས་པ།

འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན།

འཇམ་

དཔལ་གྱིས་སྨྲས་པ།

ལྷའི་བུ་སེམས་ཅན་སེམས་ཅན་ཞེས་བྱ་བ་ཅི་ཞིག་ཡིན་པར་ཤེས།

ལྷའི་བུས་སྨྲས་པ།

འཇམ་དཔལ་སེམས་ཅན་སེམས་ཅན་ཞེས་བགྱི་བ་ནི་འདི་ལྟ་སྟེ།

མིང་ཙམ་དང་།

འཛིན་པའི་འདུ་ཤེས་ཙམ་ལགས་སོ།

འཇམ་དཔལ་གྱིས་སྨྲས་པ།

ལྷའི་བུ་དེ་ལྟ་བས་ན་བདག་ཏུ་འཛིན་པའི་འདུ་ཤེས་གསད་པར་བྱའོ།

སེམས་ཅན་དུ་འཛིན་པའི་འདུ་ཤེས་གསད་པར་བྱའོ།

སྲོག་ཏུ་འཛིན་པའི་འདུ་ཤེས་གསད་པར་བྱའོ།

གང་ཟག་ཏུ་འཛིན་པའི་འདུ་ཤེས་གསད་པར་བྱའོ།

མིང་དུ་འཛིན་པའི་འདུ་ཤེས་གསད་པར་བྱའོ།

ལྷའི་བུས་སྨྲས་པ།

འཇམ་དཔལ་ཅིས་དགུམ་པར་བགྱི།

འཇམ་དཔལ་གྱིས་སྨྲས་པ།

ལྷའི་བུ་ཤེས་རབ་ཀྱི་མཚོན་གྱིས་གསད་པར་བྱའོ།

ཤེས་རབ་ཀྱི་མཚོན་དེས་ཀྱང་ཅི་ནས་ཀྱང་འཛིན་པ་མེད་པ་དང་།

གཅོད་པ་མེད་པ་དེ་ལྟར་གཟུང་བར་བྱ་ཞིང་དེ་ལྟར་གསད་པར་བྱའོ།

ལྷའི་བུ་རྣམ་གྲངས་དེས་ན་ཁྱོད་ཀྱིས་འདི་ལྟར་གང་གིས་བདག་གི་འདུ་ཤེས་དང་།

སེམས་ཅན་གྱི་འདུ་ཤེས་གསད་པ་དེས་སེམས་ཅན་ཐམས་ཅད་གསད་པ་ཡིན་པར་རིག་པར་བྱའོ།

གཞན་ཡང་འཇམ་དཔལ་གཞོན་ནུར་གྱུར་པས་ལྷའི་བུ་བློ་གྲོས་རབ་གནས་ལ་འདི་སྐད་ཅེས་སྨྲས་སོ།

ལྷའི་བུ་གལ་ཏེ་ཁྱོད་མི་དགེ་བ་བཅུའི་ལས་ཀྱི་ལམ་རྣམས་ཡང་དག་པར་བླངས་ཏེ་འཇུག་ཅིང་ནག་པོའི་ཕྱོགས་ཐམས་ཅད་ཀྱི་མཉམ་པ་ཉིད་ཀྱིས་དཀར་པོའི་ཕྱོགས་ཐམས་ཅད་ཡང་དག་པར་བླངས་ཏེ་འཇུག་པར་བྱེད་པ་དེ་ལྟ་ན་ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ།

ལྷའི་བུས་སྨྲས་པ།

འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན།

འཇམ་དཔལ་གྱིས་སྨྲས་པ།

ལྷའི་བུ་ནག་པོའི་ཕྱོགས་ཀྱི་མཉམ་པ་ཉིད་གང་ཡིན་པ་དེས་དེ་མཉམ་པ་ཉིད་ཡིན་པས་མཉམ་པ་ཉིད་དུ་འཇུག་པར་བྱེད་པ་དེ་ལྟ་ན་ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ།

ལྷའི་བུ་འདི་ཇི་སྙམ་དུ་སེམས།

ནག་པོའི་ཕྱོགས་ཀྱི་མཉམ་པ་ཉིད་གང་ཡིན་སྙམ།

ལྷའི་བུས་སྨྲས་པ།

འཇམ་དཔལ་བྱ་བ་མ་མཆིས་པ་དང་།

ལྷག་པར་བྱ་བ་མི་བགྱིད་པ་ལགས་སོ།

འཇམ་

དཔལ་གྱིས་སྨྲས་པ།

ལྷའི་བུ་དཀར་པོའི་ཕྱོགས་ཞེས་བྱ་བ་གང་ཡིན་སྙམ།

ལྷའི་བུས་སྨྲས་པ།

འཇམ་དཔལ་ཆོས་ཀྱི་དབྱིངས་དང་།

དེ་བཞིན་ཉིད་དང་།

ཡང་དག་པའི་མཐའ་དང་།

རྣམ་པར་ཐར་པའི་སྒོ་གསུམ་སྟེ།

དེ་ནི་དཀར་པོའི་ཕྱོགས་ལགས་སོ།

འཇམ་དཔལ་གྱིས་སྨྲས་པ།

ལྷའི་བུ་ཆོས་ཀྱི་དབྱིངས་ཀྱིས་སྒྲིབ་པར་ནུས་སམ།

ལྷའི་བུས་སྨྲས་པ།

འཇམ་དཔལ་དེ་ནི་མ་ལགས་སོ།

འཇམ་དཔལ་གྱིས་སྨྲས་པ།

ལྷའི་བུ་དེའི་ཕྱིར་ཁོ་བོ་ནི་དེ་ལས་བསམས་ནས་དེ་སྐད་ཅེས་གལ་ཏེ་ཁྱོད་ནག་པོའི་ཕྱོགས་ཐམས་ཅད་ཀྱི་མཉམ་པ་ཉིད་ཀྱིས་དཀར་པོའི་ཕྱོགས་ཐམས་ཅད་ཡང་དག་པར་བླངས་ཏེ་འཇུག་པར་བྱེད་པ་དེ་ལྟ་ན་ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ་ཞེས་སྟོན་ཏོ།

གཞན་ཡང་འཇམ་དཔལ་གཞོན་ནུར་གྱུར་པས་ལྷའི་བུ་བློ་གྲོས་རབ་གནས་ལ་འདི་སྐད་ཅེས་སྨྲས་སོ།

ལྷའི་བུ་གལ་ཏེ་ཁྱོད་གསད་པ་དང་པོ་ཕྱིར་ཕྱུང་བ་དེའི་མགོ་ལ་མཚོན་གྱིས་འདེབས་པར་བྱེད་པ་དེ་ལྟ་ན་ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ།

ལྷའི་བུས་སྨྲས་པ།

འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན།

འཇམ་དཔལ་གྱིས་སྨྲས་པ།

ལྷའི་བུ་གསད་པ་གསད་པ་ཞེས་བྱ་བ་དེ་གང་ཞེ་ན།

ལྷའི་བུ་འདོད་ཆགས་ནི་གསད་པ་ཞེས་བྱའོ།

ཞེ་སྡང་དང་།

གཏི་མུག་ནི་གསད་པ་ཞེས་བྱའོ།

ང་རྒྱལ་དང་།

ཁྲོ་བ་དང་།

འཆབ་པ་དང་།

ཕྲག་དོག་དང་།

སྒྱུ་དང་།

གཡོ་དང་།

སེར་སྣ་དང་།

ལྷག་པར་འཛིན་པ་དང་།

མཚན་མ་དང་།

ཉེ་བར་ལེན་པ་དང་།

འདུ་ཤེས་དང་།

ཚོར་བ་ནི་གསད་པ་ཞེས་བྱ་སྟེ།

ལྷའི་བུ་དེ་དག་ནི་གསད་པ་ཡིན་པར་གསུངས་སོ།

ལྷའི་བུ་རྣལ་འབྱོར་པ་རྣལ་འབྱོར་སྤྱོད་པ་གང་འདོད་ཆགས་ཀྱི་སེམས་སྐྱེས་པ་སེལ་བར་བྱེད།

ཞི་བར་བྱེད།

རབ་ཏུ་ཞི་བར་བྱེད་པ་དེ་ལ་ནི་སྟོང་པར་སྣང་བས་མི་སྡུག་པ་ལ་འཇུག་པར་མི་བྱེད་པར་སེམས་འདི་གང་ལས་སྐྱེས།

གང་དུ་འགག །

ཡུལ་གང་ལ་ཆགས་པར་འགྱུར།

གང་གིས་ཆགས་པར་འགྱུར་ཞེས་འདོད་ཆགས་ཀྱི་སེམས་དེ་ཉིད་ཀྱི་

འབྱུང་བ་དང་འཇིག་པ་ལ་སོ་སོར་རྟོག་པར་བྱེད་དེ།

དེ་དེ་ལྟར་སོ་སོར་རྟོག་པར་བྱེད་པ་ན་འདོད་ཆགས་ཀྱང་མི་དམིགས།

གང་ལ་ཆགས་པར་འགྱུར་བ་དང་།

གང་གིས་ཆགས་པར་འགྱུར་བ་དེ་ཡང་མི་དམིགས་སོ།

གང་གི་ཚེ་མི་དམིགས་པ་དེའི་ཚེ་མི་ལེན་ཏོ།

གང་གི་ཚེ་མི་ལེན་པ་དེའི་ཚེ་མི་འདོར་རོ།

གང་གི་ཚེ་མི་འདོར་བ་དེའི་ཚེ་མི་འཛིན་མི་སྤོང་སྟེ།

དེ་ནི་མྱ་ངན་ལས་འདས་པ་ཞེས་བྱའོ།

ཞེ་སྡང་དང་།

གཏི་མུག་དང་།

ང་རྒྱལ་དང་།

ཁྲོ་བ་དང་།

འཆབ་པ་དང་།

ཕྲག་དོག་དང་།

སྒྱུ་དང་།

གཡོ་དང་།

སེར་སྣ་དང་།

ལྷག་པར་འཛིན་པ་དང་།

མཚན་མ་དང་།

ཉེ་བར་ལེན་པ་དང་།

འདུ་ཤེས་དང་།

ཚོར་བའི་སེམས་ལ་ཡང་དེ་བཞིན་དུ་སྦྱར་ཏེ།

ལྷའི་བུ་གང་གསད་པ་དེ་ལྟ་བུ་སྐྱེས་མ་ཐག་ཏུ་གསོད་པར་བྱེད་པ་དེ་ནི་གསད་པ་དང་པོའི་ཕྱིར་ཕྱུང་བ་དེའི་མགོ་ལ་མཚོན་གྱིས་འདེབས་པ་ཞེས་བྱ་སྟེ།

དེའི་ཕྱིར་ཁོ་བོ་ནི་དེ་ལས་བསམས་ནས་དེ་སྐད་ཅེས་སྟོན་ཏོ།

གཞན་ཡང་འཇམ་དཔལ་གཞོན་ནུར་གྱུར་པས་ལྷའི་བུ་བློ་གྲོས་རབ་གནས་ལ་འདི་སྐད་ཅེས་སྨྲས་སོ།

ལྷའི་བུ་གལ་ཏེ་ཁྱོད་སངས་རྒྱས་མཉེས་པར་མི་བྱེད།

ཆོས་མཉེས་པར་མི་བྱེད།

དགེ་འདུན་མཉེས་པར་མི་བྱེད་པ་དེ་ལྟ་ན་ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ།

ལྷའི་བུས་སྨྲས་པ།

འཇམ་དཔལ་ཁྱོད་ཅི་ལས་དགོངས་ཏེ་དེ་སྐད་སྟོན།

འཇམ་དཔལ་གྱིས་སྨྲས་པ།

ལྷའི་བུ་སངས་རྒྱས་སངས་རྒྱས་ཞེས་བྱ་བ་ཅི་ཞིག་ཡིན་པར་ཤེས།

ལྷའི་བུས་སྨྲས་པ།

འཇམ་དཔལ་དེ་བཞིན་ཉིད་དང་།

ཆོས་ཀྱི་དབྱིངས་ལགས་སོ།

འཇམ་དཔལ་གྱིས་སྨྲས་པ།

ལྷའི་བུ་འདི་ཇི་སྙམ་དུ་སེམས།

དེ་བཞིན་ཉིད་དང་།

ཆོས་ཀྱི་དབྱིངས་མཉེས་པར་བྱར་ནུས་སྙམ་འམ།

ལྷའི་བུས་སྨྲས་པ།

འཇམ་དཔལ་དེ་ནི་མ་ལགས་སོ།

འཇམ་དཔལ་གྱིས་སྨྲས་པ།

ལྷའི་བུ་ཁོ་བོ་ནི་དེ་ལས་བསམས་ནས་དེ་སྐད་ཅེས་གལ་ཏེ་ཁྱོད་སངས་རྒྱས་མཉེས་པར་མི་བྱེད་པ་དེ་ལྟ་ན་ཁོ་བོ་ཁྱོད་དང་ཚངས་པ་མཚུངས་པར་སྤྱོད་འདོད་དོ་ཞེས་སྟོན་ཏོ།

ལྷའི་བུ་ཆོས་ཆོས་ཞེས་བྱ་བ་ཅི་

ཞིག་ཡིན་པར་ཤེས།

ལྷའི་བུས་སྨྲས་པ།

འཇམ་དཔལ་ཆོས་ཞེས་བགྱི་བ་ནི་འདོད་ཆགས་དང་བྲལ་བ་ཉིད་དང་།

ཆོས་ཉིད་ལགས་སོ།

འཇམ་དཔལ་གྱིས་སྨྲས་པ།

ལྷའི་བུ་འདི་ཇི་སྙམ་དུ་སེམས།

འདོད་ཆགས་དང་བྲལ་བ་ཉིད་དང་།