經部第57卷（མདོ་སྡེ་པ་བཞུགས་སོ། །）

རྒྱ་གར་སྐད་དུ།

ཨཱརྱ་ཨ་བི་ཀལྤ་པྲ་བེ་ཤ་ནཱ་མ་དྷཱ་ར་ཎཱི།

བོད་སྐད་དུ།

འཕགས་པ་རྣམ་པར་མི་རྟོག་པར་འཇུག་པ་ཞེས་བྱ་བའི་གཟུངས།

སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ།

འདི་སྐད་བདག་གིས་ཐོས་པ་དུས་གཅིག་ན།

བཅོམ་ལྡན་འདས་རྒྱལ་པོའི་ཁབ་ན།

ཁམས་གསུམ་པ་ཐམས་ཅད་ལས་ཁྱད་པར་དུ་འཕགས་པ་རྣམ་པར་མི་རྟོག་པའི་ཆོས་ཀྱི་དབྱིངས་ཀྱི་སྙིང་པོའི་ཁང་བཟངས་ན་དགེ་སློང་གི་དགེ་འདུན་ཆེན་པོ་དང་།

བྱང་ཆུབ་སེམས་དཔའི་ཚོགས་ཆེན་པོ་དང་ཐབས་ཅིག་ཏུ་བཞུགས་ཏེ།

འདི་ལྟ་སྟེ།

བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་མི་རྟོག་པ་དང་།

རྣམ་པར་མི་རྟོག་སྣང་བ་དང་།

རྣམ་པར་མི་རྟོག་ཟླ་བ་དང་།

རྣམ་པར་རྟོག་མེད་དཔའ་བོ་དང་།

རྣམ་པར་རྟོག་མེད་ཆོས་སྟོན་མཁས་པ་དང་།

རྣམ་པར་རྟོག་མེད་ངོ་བོ་ཉིད་དང་།

རྣམ་པར་རྟོག་མེད་བློ་གྲོས་དང་།

རྣམ་པར་རྟོག་མེད་ང་རོ་དང་།

རྣམ་པར་རྟོག་མེད་ཁྱབ་བྱེད་དང་།

རྣམ་པར་རྟོག་མེད་དབང་ཕྱུག་དང་།

རྣམ་པར་རྟོག་མེད་དབང་ཕྱུག་

ཆེན་པོ་དང་།

རྣམ་པར་རྟོག་མེད་བྱམས་པ་ཆེན་པོའི་དབང་ཕྱུག་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་དང་ཐབས་ཅིག་གོ།

དེ་ནས་བཅོམ་ལྡན་འདས་འཁོར་བརྒྱ་སྟོང་དུ་མས་ཡོངས་སུ་བསྐོར་ཏེ་མདུན་གྱིས་བལྟས་ནས།

འདི་ལྟ་སྟེ།

ཐེག་པ་ཆེན་པོ་ལ་ཆོས་རྣམས་ཀྱི་རྣམ་པར་མི་རྟོག་པ་ཉིད་ལས་བརྩམས་ཏེ་ཆོས་སྟོན་ཏོ།

དེ་ནས་བཅོམ་ལྡན་འདས་ཀྱིས་ཐམས་ཅད་དང་ལྡན་པའི་བྱང་ཆུབ་སེམས་དཔའི་འཁོར་ལ་ཀུན་ཏུ་གཟིགས་ནས།

བྱང་ཆུབ་སེམས་དཔའ་རྣམས་ལ་བཀའ་སྩལ་པ།

རིགས་ཀྱི་བུ་དག་ཁྱོད་ཀྱིས་རྣམ་པར་མི་རྟོག་པར་འཇུག་པ་ཞེས་བྱ་བའི་གཟུངས་ཟུང་ཤིག །

དེ་བཟུང་ན་བྱང་ཆུབ་སེམས་དཔའ་མྱུར་བ་མྱུར་བར་སངས་རྒྱས་ཀྱི་ཆོས་རྣམས་བསྒྲུབ་ཅིང་རྟག་ཏུ་ཁྱད་པར་དུ་ཡང་འགྲོའོ།

དེ་ནས་འཁོར་དེ་ཉིད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་མི་རྟོག་སྣང་བ་ཞེས་བྱ་བ་སྟན་ལས་ལངས་ཏེ།

བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ།

བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས།

བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོས་གང་ཐོས་ནས་འཛིན་པ་དང་།

ཀློག་པ་དང་།

ཚུལ་བཞིན་ཡིད་ལ་བགྱིད་པ་དང་།

གཞན་དག་ལ་ཡང་རྒྱ་ཆེར་སྟོན་པར་འགྱུར་བར་རྣམ་པར་མི་རྟོག་པར་འཇུག་པའི་གཟུངས་བཤད་དུ་གསོལ།

དེ་སྐད་ཅེས་གསོལ་པ་དང་།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་དག་དེའི་ཕྱིར་ལེགས་པར་ཉོན་ལ་རབ་ཏུ་ཡིད་ལ་ཟུང་ཤིག་དང་།

ངས་རྣམ་པར་མི་རྟོག་པར་འཇུག་པའི་གཟུངས་བཤད་དོ།

བཅོམ་ལྡན་འདས་ལེགས་སོ་ཞེས་

གསོལ་ཏོ།

བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་བཅོམ་ལྡན་འདས་ཀྱི་ལྟར་ཉན་པ་དང་།

བཅོམ་ལྡན་འདས་ཀྱིས་དེ་དག་ལ་འདི་སྐད་ཅེས་བཀའ་སྩལ་ཏོ།

རིགས་ཀྱི་བུ་དེ་དག་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་མི་རྟོག་པའི་དབང་དུ་བྱ་བའི་ཆོས་ཐོས་ཏེ།

རྣམ་པར་མི་རྟོག་པ་ལ་བསམ་པ་བཞག་ནས་རྣམ་པར་རྟོག་པའི་མཚན་མ་ཐམས་ཅད་ཡོངས་སུ་སྤོང་སྟེ།

དེ་ཐོག་མ་ཉིད་དུ་འདི་ལྟ་སྟེ།

གཟུང་བའམ་འཛིན་པའང་རུང་རང་བཞིན་ལ་རྣམ་པར་རྟོག་པའི་མཚན་མ་ཐམས་ཅད་ཡོངས་སུ་སྤོང་ངོ་།

དེ་ལ་གང་ཟག་པ་དང་བཅས་པའི་དངོས་པོའི་མཚན་མ་དེ་ནི་རང་བཞིན་ལ་རྣམ་པར་རྟོག་པའི་མཚན་མའོ།

ཟག་པ་དང་བཅས་པའི་དངོས་པོ་ནི་ཉེ་བར་ལེན་པའི་ཕུང་པོ་ལྔ་པོ་རྣམས་ཏེ།

འདི་ལྟ་སྟེ།

གཟུགས་ཉེ་བར་ལེན་པའི་ཕུང་པོ་དང་།

ཚོར་བ་ཉེ་བར་ལེན་པའི་ཕུང་པོ་དང་།

འདུ་ཤེས་ཉེ་བར་ལེན་པའི་ཕུང་པོ་དང་།

འདུ་བྱེད་ཉེ་བར་ལེན་པའི་ཕུང་པོ་དང་།

རྣམ་པར་ཤེས་པ་ཉེ་བར་ལེན་པའི་ཕུང་པོའོ།

ཇི་ལྟར་རང་བཞིན་ལ་རྣམ་པར་རྟོག་པའི་མཚན་མ་དེ་དག་ཡོངས་སུ་སྤོང་ཞེ་ན།

སྣང་བར་འགྱུར་བའི་ཚུལ་གྱིས་མངོན་དུ་གྱུར་པ་དག་ཡིད་ལ་མི་བྱེད་པས་ཡོངས་སུ་སྤོང་ངོ་།

དེ་རང་བཞིན་ལ་རྣམ་པར་རྟོག་པའི་མཚན་མ་དེ་དག་རིམ་གྱིས་ཡོངས་སུ་སྤོང་བ་ན།

དེ་མ་ཡིན་པ་གཞན་གཉེན་པོ་ལ་དཔྱོད་པ་རྣམ་པར་རྟོག་པའི་མཚན་མ་རྣམས་སྣང་བར་འགྱུར་བའི་ཚུལ་གྱིས་ཀུན་ཏུ་འབྱུང་ཞིང་མངོན་དུ་འགྱུར་ཏེ།

འདི་ལྟ་སྟེ།

སྦྱིན་པ་ལ་དཔྱོད་པ་རྣམ་པར་རྟོག་པའི་མཚན་མ་དང་།

ཚུལ་ཁྲིམས་ལ་དཔྱོད་པ་རྣམ་པར་རྟོག་པའི་མཚན་མ་དང་།

བཟོད་པ་ལ་དཔྱོད་པ་རྣམ་པར་རྟོག་པའི་མཚན་མ་དང་།

བརྩོན་འགྲུས་ལ་དཔྱོད་པ་རྣམ་པར་རྟོག་པའི་མཚན་མ་དང་།

བསམ་གཏན་ལ་དཔྱོད་པ་རྣམ་པར་རྟོག་པའི་མཚན་མ་དང་།

ཤེས་རབ་ལ་དཔྱོད་པ་རྣམ་པར་རྟོག་པའི་མཚན་མ་སྟེ།

འདི་ལྟ་སྟེ།

ངོ་བོ་ཉིད་ལ་དཔྱོད་པའམ།

ཡོན་ཏན་ལ་དཔྱོད་པའམ།

སྙིང་པོ་ལ་དཔྱོད་པའང་རུང་།

དེས་དེ་དག་ཀྱང་ཡིད་ལ་མི་བྱེད་པས་ཡོངས་སུ་སྤོང་ངོ་།

དེས་དེ་དག་ཡོངས་སུ་སྤོང་བ་ན་གཞན་དེ་ཁོ་ན་ལ་དཔྱོད་པའི་རྣམ་པར་རྟོག་པའི་མཚན་མ་རྣམས་སྣང་བར་འགྱུར་བའི་ཚུལ་གྱིས་ཀུན་ཏུ་འབྱུང་ཞིང་

མངོན་དུ་འགྱུར་ཏེ།

འདི་ལྟ་སྟེ།

སྟོང་པ་ཉིད་ལ་དཔྱོད་པ་རྣམ་པར་རྟོག་པའི་མཚན་མ་དང་།

དེ་བཞིན་ཉིད་ལ་དཔྱོད་པ་རྣམ་པར་རྟོག་པའི་མཚན་མ་དང་།

ཡང་དག་པའི་མཐའ་ལ་དཔྱོད་པའི་རྣམ་པར་རྟོག་པའི་མཚན་མ་དང་།

མཚན་མ་མེད་པ་དང་།

དོན་དམ་པ་དང་།

ཆོས་ཀྱི་དབྱིངས་ལ་དཔྱོད་པ་རྣམ་པར་རྟོག་པའི་མཚན་མ་སྟེ།

འདི་ལྟ་སྟེ།

རང་གི་མཚན་ཉིད་ལ་དཔྱོད་པའམ།

ཡོན་ཏན་ལ་དཔྱོད་པའམ།

སྙིང་པོ་ལ་དཔྱོད་པའང་རུང་།

དེས་དེ་ཁོ་ན་ལ་དཔྱོད་པ་རྣམ་པར་རྟོག་པའི་མཚན་མ་དེ་དག་ཀྱང་ཡིད་ལ་མི་བྱེད་པས་ཡོངས་སུ་སྤོང་ངོ་།

དེས་དེ་དག་ཡོངས་སུ་སྤོང་བ་ན་གཞན་ཐོབ་པ་ལ་དཔྱོད་པ་རྣམ་པར་རྟོག་པའི་མཚན་མ་རྣམས་སྣང་བར་འགྱུར་བའི་ཚུལ་གྱིས་ཀུན་ཏུ་འབྱུང་ཞིང་མངོན་དུ་འགྱུར་ཏེ།

འདི་ལྟ་སྟེ།

ས་དང་པོ་ཐོབ་པ་ལ་དཔྱོད་པ་རྣམ་པར་རྟོག་པའི་མཚན་མ་ནས་ས་བཅུ་པའི་བར་དུ་འཐོབ་པ་ལ་དཔྱོད་པ་རྣམ་པར་རྟོག་པའི་མཚན་མ་དང་མི་སྐྱེ་བའི་ཆོས་ལ་བཟོད་པ་ཐོབ་པ་ལ་དཔྱོད་པ་རྣམ་པར་རྟོག་པའི་མཚན་མ་དང་།

ལུང་བསྟན་པ་འཐོབ་པ་ལ་དཔྱོད་པ་རྣམ་པར་རྟོག་པའི་མཚན་མ་དང་།

སངས་རྒྱས་ཀྱི་ཞིང་ཡོངས་སུ་དག་པ་འཐོབ་པ་ལ་དཔྱོད་པ་རྣམ་པར་རྟོག་པའི་མཚན་མ་དང་།

སེམས་ཅན་ཡོངས་སུ་སྨིན་པར་བྱེད་པ་འཐོབ་པ་ལ་དཔྱོད་པ་རྣམ་པར་རྟོག་པའི་མཚན་མ་དང་།

དབང་བསྐུར་བ་འཐོབ་པ་ལ་དཔྱོད་པ་རྣམ་པར་རྟོག་པའི་མཚན་མ་ནས།

རྣམ་པ་ཐམས་ཅད་མཁྱེན་པ་ཉིད་འཐོབ་པའི་བར་ལ་དཔྱོད་པ་རྣམ་པར་རྟོག་པའི་མཚན་མ་སྟེ།

འདི་ལྟ་སྟེ།

རང་གི་མཚན་ཉིད་ལ་དཔྱོད་པའམ།

ཡོན་ཏན་ལ་དཔྱོད་པའམ།

སྙིང་པོ་ལ་དཔྱོད་པའང་རུང་།

དེས་འཐོབ་པ་ལ་དཔྱོད་པ་རྣམ་པར་རྟོག་པའི་མཚན་མ་དེ་དག་ཀྱང་ཡིད་ལ་མི་བྱེད་པས་ཡོངས་སུ་སྤོང་ངོ་།

དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྟོག་པའི་མཚན་མའི་རྣམ་པ་ཐམས་ཅད་ཡིད་ལ་མི་བྱེད་པས་ཡོངས་སུ་སྤོང་བ་ན།

དེ་རྣམ་པར་མི་རྟོག་པའི་དབྱིངས་ལ་ཤིན་ཏུ་བརྩོན་པ་ཡིན་ཏེ།

རེ་ཤིག་རྣམ་པར་མི་རྟོག་པའི་དབྱིངས་ལ་ནི་མ་རེག་མོད་ཀྱི།

རྣམ་པར་མི་རྟོག་པའི་དབྱིངས་ལ་རེག་པར་འགྱུར་བའི་ཚུལ་བཞིན་གྱི་ཏིང་ངེ་འཛིན་ནི་ཡོད་དོ།

དེ་ཡང་དག་པར་

སྦྱོར་བ་དེ་དང་།

བསྟེན་པས་རྗེས་སུ་འགྲོ།

བསྒོམས་པས་རྗེས་སུ་འགྲོ།

མང་དུ་བྱས་པས་རྗེས་སུ་འགྲོ།

ཡང་དག་པར་ཡིད་ལ་བྱ་བས་རྗེས་སུ་འགྲོ་བ་ན།

མངོན་པར་འདུ་བྱ་བ་མེད་ཅིང་ལྷུན་གྱིས་གྲུབ་པ་རྣམ་པར་མི་རྟོག་པའི་དབྱིངས་ལ་རེག་སྟེ་རིམ་གྱིས་ཡོངས་སུ་སྦྱོང་ངོ་།

ཅིའི་ཕྱིར་རྣམ་པར་མི་རྟོག་པའི་དབྱིངས་ལ་རྣམ་པར་མི་རྟོག་པ་ཞེས་བྱ་ཞེ་ན།

དཔྱད་པའི་རྣམ་པར་བརྟག་པ་ཐམས་ཅད་ལས་ཤིན་ཏུ་འདས་པ་དང་།

བསྟན་པ་དང་།

དཔེར་རྣམ་པར་བརྟག་པ་ཐམས་ཅད་ལས་ཤིན་ཏུ་འདས་པ་དང་།

དབང་པོར་རྣམ་པར་བརྟག་པ་ཐམས་ཅད་ལས་ཤིན་ཏུ་འདས་པ་དང་།

ཡུལ་དུ་རྣམ་པར་བརྟག་པ་ཐམས་ཅད་ལས་ཤིན་ཏུ་འདས་པ་དང་།

རྣམ་པར་རིག་པར་རྣམ་པར་བརྟག་པ་ཐམས་ཅད་ལས་ཤིན་ཏུ་འདས་པ་དང་།

ཉོན་མོངས་པ་ཐམས་ཅད་དང་ཤེས་བྱའི་སྒྲིབ་པ་ཐམས་ཅད་ཀྱི་གནས་མེད་པའི་ཕྱིར་ཏེ།

དེའི་ཕྱིར་རྣམ་པར་མི་རྟོག་པའི་དབྱིངས་ལ་རྣམ་པར་མི་རྟོག་པ་ཞེས་བྱའོ།

རྣམ་པར་མི་རྟོག་པ་དེ་ཡང་གང་ཞེ་ན།

རྣམ་པར་མི་རྟོག་པ་ནི་གཟུགས་མེད་པ།

བསྟན་དུ་མེད་པ།

རྟེན་མེད་པ།

སྣང་བ་མེད་པ།

རྣམ་པར་རིག་པ་མ་ཡིན་པ།

གནས་མེད་པའོ།

བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་མི་རྟོག་པའི་དབྱིངས་ལ་རབ་ཏུ་གནས་པས་ནི་ཤེས་བྱ་དང་ཁྱད་པར་མེད་པ་རྣམ་པར་མི་རྟོག་པའི་ཡེ་ཤེས་ཀྱིས་ཆོས་ཐམས་ཅད་ནམ་མཁའི་དཀྱིལ་དང་མཚུངས་པར་མཐོང་ངོ་།

རྣམ་པར་མི་རྟོག་པའི་རྗེས་ལས་ཐོབ་པའི་ཤེས་པས་ནི་ཆོས་ཐམས་ཅད་སྒྱུ་མ་དང་།

སྨིག་རྒྱུ་དང་།

རྨི་ལམ་དང་།

མིག་ཡོར་དང་།

བྲག་ཅ་དང་།

གཟུགས་བརྙན་དང་།

ཆུ་ཟླ་དང་།

སྤྲུལ་པ་དང་མཚུངས་པར་མཐོང་ངོ་།

བདེ་བ་ཆེན་པོ་ལ་གནས་པ་ཤིན་ཏུ་རྒྱས་པ་ཡང་འཐོབ་བོ།

སེམས་ཕུན་སུམ་ཚོགས་པ་ཆེན་པོ་ཤིན་ཏུ་རྒྱས་པ་ཡང་འཐོབ་བོ།

ཤེས་རབ་དང་ཡེ་ཤེས་ཆེ་ཞིང་ཤིན་ཏུ་རྒྱས་པ་ཡང་འཐོབ་བོ།

བཤད་པ་ཆེན་པོ་ལ་དབང་བ་ཤིན་ཏུ་རྒྱས་པ་ཡང་འཐོབ་བོ།

དུས་ཐམས་ཅད་དུ་སེམས་ཅན་ཐམས་ཅད་ཀྱི་དོན་གྱི་རྣམ་པ་ཐམས་ཅད་ཀྱང་བྱེད་ནུས་པར་འགྱུར་ཏེ།

སངས་རྒྱས་ཀྱི་མཛད་པ་ལྷུན་གྱིས་གྲུབ་པ་ཡང་རྒྱུན་མི་གཅོད་

དོ།

རིགས་ཀྱི་བུ་དག་འདི་ལྟ་སྟེ།

དཔེར་ན་བྲག་གཅིག་ཏུ་མཁྲེགས་ཤིང་སྲ་བའི་འོག་ན་ཡིད་བཞིན་གྱི་ནོར་བུ་རིན་པོ་ཆེ་ཆེན་པོ་སྣ་ཚོགས་འོད་གསལ་བ་འདི་ལྟ་སྟེ།

དངུལ་རིན་པོ་ཆེ་དང་།

གསེར་རིན་པོ་ཆེ་དང་།

རྡོའི་སྙིང་པོ་རིན་པོ་ཆེ་སྣ་ཚོགས་ཀྱི་རིན་པོ་ཆེ་ཐ་དད་པས་ཡོངས་སུ་གང་བའི་གཏེར་ཆེན་པོ་ཞིག་ཡོད་ལ།

དེ་ནས་གཏེར་ཆེན་པོ་འདོད་པའི་མི་ལ་ལ་ཞིག་འོངས་པ་དེ་ལ་གཏེར་ཆེན་པོ་མངོན་པར་ཤེས་པའི་མིས་འདི་སྐད་དུ།

ཀྱེ་སྐྱེས་བུ་བྲག་གཅིག་ཏུ་མཁྲེགས་ཤིང་སྲ་བ་དེའི་འོག་ན་རིན་པོ་ཆེ་འོད་གསལ་བས་ཡོངས་སུ་གང་བའི་རིན་པོ་ཆེའི་གཏེར་ཆེན་པོ་ཡོད་དེ།

དེའི་འོག་ན་ཡིད་བཞིན་གྱི་ནོར་བུ་རིན་པོ་ཆེའི་གཏེར་ཡོད་ཀྱིས།

ཁྱོད་ཀྱིས་ཐོག་མ་ཁོ་ནར་རྡོའི་རང་བཞིན་ཐམས་ཅད་རྐོས་ཤིག །

དེ་བརྐོས་པ་དང་དངུལ་དུ་སྣང་བའི་རྡོ་ཁྱོད་ལ་སྣང་བར་འགྱུར་རོ།

དེ་ལ་ཁྱོད་ཀྱིས་གཏེར་ཆེན་པོར་འདུ་ཤེས་མི་བྱའི།

དེ་ཡོངས་སུ་ཤེས་པར་བྱོས་ཏེ་རྐོས་ཤིག །

དེ་བརྐོས་པ་དང་གསེར་དུ་སྣང་བའི་རྡོ་སྣང་བར་འགྱུར་ཏེ།

དེ་ལ་ཡང་ཁྱོད་ཀྱིས་གཏེར་ཆེན་པོར་འདུ་ཤེས་མི་བྱའི།

དེ་ཡང་ཡོངས་སུ་ཤེས་པར་བྱོས་ཏེ་རྐོས་ཤིག །

དེ་བརྐོས་པ་དང་རིན་པོ་ཆེ་སྣ་ཚོགས་སུ་སྣང་བའི་རྡོ་སྣང་བར་འགྱུར་ཏེ།

དེ་ལ་ཡང་ཁྱོད་ཀྱིས་གཏེར་ཆེན་པོར་འདུ་ཤེས་མི་བྱའི།

དེ་ཡང་ཡོངས་སུ་ཤེས་པར་བྱོས་ཏེ་རྐོས་ཤིག །

ཀྱེ་སྐྱེས་བུ་ཁྱེད་ཀྱིས་དེ་ལྟར་བརྩོན་པར་བྱས་ན་བརྐོ་བའི་མངོན་པར་འདུ་བྱ་བ་མེད་ཅིང་འབད་མི་དགོས་པར་ཡིད་བཞིན་གྱི་ནོར་བུ་རིན་པོ་ཆེའི་གཏེར་ཆེན་པོ་མཐོང་བར་འགྱུར་རོ།

ཡིད་བཞིན་གྱི་ནོར་བུ་རིན་པོ་ཆེའི་གཏེར་ཆེན་པོ་དེ་རྙེད་ན་ཁྱོད་ཕྱུག་ཅིང་ནོར་ཆེ་ལ་ལོངས་སྤྱོད་ཆེ་བར་འགྱུར་ཏེ།

བདག་དང་གཞན་གྱི་དོན་ལ་མཐུ་ཡོད་པར་འགྱུར་རོ་ཞེས་སྨྲས་པ་ལྟར་རིགས་ཀྱི་བུ་དག་ཇི་ཙམ་དུ་དོན་འདི་ཤེས་པར་བྱ་བའི་ཕྱིར་འདི་དཔེར་བྱས་པ་སྟེ།

བྲག་གཅིག་ཏུ་མཁྲེགས་ཤིང་སྲ་བ་ཞེས་བྱ་བ་དེ་ནི་འདུ་བྱེད་ཀྱི་རྣམ་པ་ཀུན་ནས་ཉོན་མོངས་པ་དང་།

གཉིས་ལ་སོ་སོར་ཉེ་བར་གནས་པའི་ཚིག་བླ་དགས་སོ།

འོག་ན་ཡིད་བཞིན་གྱི་ནོར་བུ་རིན་པོ་ཆེའི་གཏེར་ཆེན་པོ་ཞེས་བྱ་བ་དེ་ནི་རྣམ་པར་མི་རྟོག་པའི་དབྱིངས་ཀྱི་ཚིག་བླ་དགས་སོ།

ཡིད་བཞིན་གྱི་ནོར་བུ་རིན་པོ་ཆེའི་གཏེར་ཆེན་པོ་འདོད་

པའི་མི་ཞེས་བྱ་བ་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་ཚིག་བླ་དགས་སོ།

གཏེར་ཆེན་པོ་མངོན་པར་ཤེས་པའི་མི་ཞེས་བྱ་བ་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཚིག་བླ་དགས་སོ།

བྲག་ཅེས་བྱ་བ་དེ་ནི་རང་བཞིན་ལ་རྣམ་པར་རྟོག་པའི་མཚན་མ་རྣམས་ཀྱི་ཚིག་བླ་དགས་སོ།

རྐོས་ཤིག་ཅེས་བྱ་བ་དེ་ནི་ཡིད་ལ་མི་བྱེད་ཅེས་བྱ་བའི་ཚིག་བླ་དགས་སོ།

དངུལ་དུ་སྣང་བའི་རྡོ་ཞེས་བྱ་བ་དེ་ནི་གཉེན་པོ་ལ་རྣམ་པར་རྟོག་པའི་མཚན་མ་རྣམས་ཀྱི་ཚིག་བླ་དགས་སོ།

གསེར་དུ་སྣང་བའི་རྡོ་ཞེས་བྱ་བ་དེ་ནི་སྟོང་པ་ཉིད་ལ་སོགས་པ་ལ་རྣམ་པར་རྟོག་པའི་མཚན་མ་རྣམས་ཀྱི་ཚིག་བླ་དགས་སོ།

རིན་པོ་ཆེ་སྣ་ཚོགས་སུ་སྣང་བའི་རྡོ་ཞེས་བྱ་བ་དེ་ནི་ཐོབ་པ་ལ་རྣམ་པར་རྟོག་པའི་མཚན་མ་རྣམས་ཀྱི་ཚིག་བླ་དགས་སོ།

ཡིད་བཞིན་གྱི་ནོར་བུ་རིན་པོ་ཆེའི་གཏེར་ཆེན་པོ་རྙེད་ཅེས་བྱ་བ་དེ་ནི་རྣམ་པར་མི་རྟོག་པའི་དབྱིངས་ལ་རེག་པའི་ཚིག་བླ་དགས་སོ།

རིགས་ཀྱི་བུ་དག་དེ་ལྟར་དཔེ་ཉེ་བར་བཀོད་པ་འདིས་རྣམ་པར་མི་རྟོག་པའི་དབྱིངས་སུ་འཇུག་པ་ཁོང་དུ་ཆུད་པར་བྱའོ།

རིགས་ཀྱི་བུ་དག་འདི་ཇི་ལྟར་ན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་རྟོག་པའི་མཚན་མ་ཇི་སྐད་བསྟན་པ་དེ་དག་ལ་ཉེ་བར་རྟོག་ཅིང་རྣམ་པར་མི་རྟོག་པའི་དབྱིངས་སུ་འཇུག་ཅེ་ན།

རིགས་ཀྱི་བུ་དག་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་རྣམ་པར་མི་རྟོག་པའི་དབྱིངས་ལ་རབ་ཏུ་གནས་པ་ནི་གཟུངས་ཀྱི་རང་བཞིན་ལ་རྣམ་པར་རྟོག་པའི་མཚན་མ་མངོན་དུ་གྱུར་ན།

འདི་ལྟར་ཉེ་བར་རྟོག་སྟེ།

གང་བདག་གི་གཟུགས་ཞེས་སྤྱོད་ན་རྣམ་པར་རྟོག་པ་ལ་སྤྱོད་པའོ།

གཞན་དག་གི་གཟུགས་ཞེས་སྤྱོད་ན་རྣམ་པར་རྟོག་པ་ལ་སྤྱོད་པའོ།

གཟུགས་འདི་ཡོད་དོ་ཞེས་སྤྱོད་ན་རྣམ་པར་རྟོག་པ་ལ་སྤྱོད་པའོ།

གཟུགས་སྐྱེའོ།

འགག་གོ།

ཀུན་ནས་ཉོན་མོངས་པའོ།

རྣམ་པར་བྱང་བའོ་ཞེས་སྤྱོད་ན་རྣམ་པར་རྟོག་པ་ལ་སྤྱོད་པའོ།

གཟུགས་མེད་ཅེས་སྤྱོད་ན་རྣམ་པར་རྟོག་པ་ལ་སྤྱོད་པའོ།

གཟུགས་ངོ་བོ་ཉིད་ཀྱིས་ཀྱང་མེད།

རྒྱུར་ཡང་མེད།

འབྲས་བུར་ཡང་མེད།

ལས་སུ་ཡང་མེད།

ལྡན་

པར་ཡང་མེད།

འཇུག་པར་མེད་ཅེས་སྤྱོད་ན་རྣམ་པར་རྟོག་པ་ལ་སྤྱོད་པའོ།

གཟུགས་ནི་རྣམ་པར་རིག་པ་ཙམ་ཞེས་སྤྱོད་ན་རྣམ་པར་རྟོག་པ་ལ་སྤྱོད་པའོ།

ཇི་ལྟར་གཟུགས་མེད་པ་དེ་བཞིན་དུ་གཟུགས་སུ་སྣང་བའི་རྣམ་པར་རིག་པ་ཡང་མེད་དོ་ཞེས་སྤྱོད་ན་རྣམ་པར་རྟོག་པ་ལ་སྤྱོད་པའོ་སྙམ་མོ།

རིགས་ཀྱི་བུ་དག་འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་གཟུགས་ཀྱང་མི་དམིགས།

གཟུགས་སུ་སྣང་བའི་རྣམ་པར་རིག་པ་ཡང་མི་དམིགས་མོད་ཀྱི།

རྣམ་པར་རིག་པ་ཐམས་ཅད་ཀྱི་ཐམས་ཅད་དུ་ཆུད་གཟོན་པ་ནི་མ་ཡིན་ནོ།

རྣམ་པར་རིག་པ་མ་གཏོགས་པར་ཆོས་གང་ཡང་མི་དམིགས་ལ་རྣམ་པར་རིག་པ་དེ་ཡང་དངོས་པོ་མེད་པར་ཡང་ཡང་དག་པར་རྗེས་སུ་མི་མཐོང་།

རྣམ་པར་རིག་པ་མ་གཏོགས་པར་དངོས་པོ་མེད་པར་ཡང་ཡང་དག་པར་རྗེས་སུ་མི་མཐོང་།

གཟུགས་སུ་སྣང་བའི་རྣམ་པར་རིག་པ་མེད་པ་དེ་དང་རྣམ་པར་རིག་པ་དེ་གཅིག་པར་ཡང་ཡང་དག་པར་རྗེས་སུ་མི་མཐོང་།

ཐ་དད་པར་ཡང་ཡང་དག་པར་རྗེས་སུ་མི་མཐོང་།

རྣམ་པར་རིག་པ་དངོས་པོ་མེད་པ་དེ་ལ་དངོས་པོར་ཡང་ཡང་དག་པར་རྗེས་སུ་མི་མཐོང་།

དངོས་པོ་མེད་པར་ཡང་ཡང་དག་པར་རྗེས་སུ་མི་མཐོང་སྟེ།

རིགས་ཀྱི་བུ་དག་རྣམ་པ་ཐམས་ཅད་པའི་རྣམ་པར་རྟོག་པ་ཐམས་ཅད་ཀྱིས་གང་རྣམ་པར་མ་བརྟགས་པ་དེ་རྣམ་པར་མི་རྟོག་པའི་དབྱིངས་སོ་ཞེས་ཀྱང་ཡང་དག་པར་རྗེས་སུ་མི་མཐོང་ངོ་།

རིགས་ཀྱི་བུ་དག་འདི་ནི་རྣམ་པར་མི་རྟོག་པའི་དབྱིངས་སུ་འཇུག་པའི་ཚུལ་ཡིན་ཏེ།

དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་མི་རྟོག་པའི་དབྱིངས་ལ་རབ་ཏུ་གནས་པ་ཡིན་ནོ།

དེ་བཞིན་དུ་ཚོར་བ་དང་།

འདུ་ཤེས་དང་།

འདུ་བྱེད་རྣམས་དང་།

རྣམ་པར་ཤེས་པ་དང་།

དེ་བཞིན་དུ་སྦྱིན་པའི་ཕ་རོལ་ཏུ་ཕྱིན་པ་དང་།

ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་།

བཟོད་པའི་ཕ་རོལ་ཏུ་ཕྱིན་པ་དང་།

བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་།

བསམ་གཏན་གྱི་ཕ་རོལ་ཏུ་ཕྱིན་པ་དང་།

ཤེས་རབ་ཀྱི་ཕ་རོལ་ཏུ་ཕྱིན་པ་དང་།

དེ་བཞིན་དུ་སྟོང་པ་ཉིད་ལ་སོགས་པ་ནས་རྣམ་པ་ཐམས་ཅད་མཁྱེན་པ་ཉིད་ཀྱི་བར་དུ་སྦྱར་རོ།

རིགས་ཀྱི་བུ་དག་འདི་ལ་བྱང་ཆུབ་སེམས་དཔའ་

སེམས་དཔའ་ཆེན་པོ་རྣམ་པ་ཐམས་ཅད་མཁྱེན་པ་ཉིད་ལ་སྤྱོད་པའི་རྣམ་པར་རྟོག་པ་མངོན་དུ་གྱུར་ན།

འདི་ལྟར་ཉེ་བར་རྟོག་སྟེ།

གང་བདག་གི་རྣམ་པ་ཐམས་ཅད་མཁྱེན་པ་ཉིད་ཅེས་སྤྱོད་ན་དེ་རྣམ་པར་རྟོག་པ་ལ་སྤྱོད་པའོ།

གཞན་དག་གི་རྣམ་པ་ཐམས་ཅད་མཁྱེན་པ་ཉིད་ཅེས་སྤྱོད་ན་རྣམ་པར་རྟོག་པ་ལ་སྤྱོད་པའོ།

རྣམ་པ་ཐམས་ཅད་མཁྱེན་པ་ཉིད་ནི་འདིའོ་ཞེས་སྤྱོད་ན་རྣམ་པར་རྟོག་པ་ལ་སྤྱོད་པའོ།

རྣམ་པ་ཐམས་ཅད་མཁྱེན་པ་ཉིད་འཐོབ་ཅེས་སྤྱོད་ན་རྣམ་པར་རྟོག་པ་ལ་སྤྱོད་པའོ།

རྣམ་པ་ཐམས་ཅད་མཁྱེན་པ་ཉིད་ནི་ཉོན་མོངས་པ་དང་།

ཤེས་བྱའི་སྒྲིབ་པ་ཐམས་ཅད་སྦྱོང་བའོ་ཞེས་སྤྱོད་ན་རྣམ་པར་རྟོག་པ་ལ་སྤྱོད་པའོ།

རྣམ་པ་ཐམས་ཅད་མཁྱེན་པ་ཉིད་ནི་ཤིན་ཏུ་རྣམ་པར་བྱང་བའོ་ཞེས་སྤྱོད་ན་རྣམ་པར་རྟོག་པ་ལ་སྤྱོད་པའོ།

རྣམ་པ་ཐམས་ཅད་མཁྱེན་པ་ཉིད་མེད་དོ་ཞེས་སྤྱོད་ན་རྣམ་པར་རྟོག་པ་ལ་སྤྱོད་པའོ།

རྣམ་པ་ཐམས་ཅད་མཁྱེན་པ་ཉིད་ལ་ངོ་བོ་ཉིད་ཀྱིས་ཀྱང་མེད།

རྒྱུར་ཡང་མེད།

འབྲས་བུར་ཡང་མེད།

ལས་སུ་ཡང་མེད།

ལྡན་པར་ཡང་མེད།

འཇུག་པར་ཡང་མེད་ཅེས་སྤྱོད་ན་རྣམ་པར་རྟོག་པ་ལ་སྤྱོད་པའོ།

རྣམ་པ་ཐམས་ཅད་མཁྱེན་པ་ཉིད་རྣམ་པར་རིག་པ་ཙམ་མོ་ཞེས་སྤྱོད་ན་རྣམ་པར་རྟོག་པ་ལ་སྤྱོད་པའོ།

ཇི་ལྟར་ན་རྣམ་པ་ཐམས་ཅད་མཁྱེན་པ་ཉིད་མེད་པ་དེ་བཞིན་དུ་རྣམ་པ་ཐམས་ཅད་མཁྱེན་པ་ཉིད་དུ་སྣང་བའི་རྣམ་པར་རིག་པ་ཡང་མེད་དོ་ཞེས་སྤྱོད་ན་རྣམ་པར་རྟོག་པ་ལ་སྤྱོད་པའོ་སྙམ་མོ།

རིགས་ཀྱི་བུ་དག་འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཇི་ལྟར་རྣམ་པ་ཐམས་ཅད་མཁྱེན་པ་ཉིད་མི་དམིགས་པ་དེ་བཞིན་དུ་དེར་སྣང་བའི་རྣམ་པར་རིག་པའང་མི་དམིགས་མོད་ཀྱི།

རྣམ་པར་རིག་པ་ཐམས་ཅད་ཀྱི་ཐམས་ཅད་དུ་ཆུད་གཟོན་པ་ནི་མ་ཡིན་ནོ།

རྣམ་པར་རིག་པ་མ་གཏོགས་པར་ཆོས་གང་ཡང་མི་དམིགས་ལ།

རྣམ་པར་རིག་པ་དེ་ཡང་དངོས་པོ་མེད་པར་ཡང་དག་པར་རྗེས་སུ་མི་མཐོང་།

རྣམ་པར་རིག་པ་མ་གཏོགས་པར་དངོས་པོ་མེད་པར་ཡང་ཡང་དག་པར་རྗེས་སུ་མི་མཐོང་།

རྣམ་པ་ཐམས་ཅད་མཁྱེན་པ་ཉིད་དུ་སྣང་བའི་རྣམ་པར་རིག་པ་མེད་པ་དེ་དང་།

རྣམ་པར་རིག་པ་དེ་གཅིག་པར་ཡང་ཡང་དག་

པར་རྗེས་སུ་མི་མཐོང་།

ཐ་དད་པར་ཡང་ཡང་དག་པར་རྗེས་སུ་མི་མཐོང་།

རྣམ་པར་རིག་པ་མེད་པ་དེ་ལ་དངོས་པོར་ཡང་ཡང་དག་པར་རྗེས་སུ་མི་མཐོང་ངོ་།

དངོས་པོ་མེད་པར་ཡང་ཡང་དག་པར་རྗེས་སུ་མི་མཐོང་སྟེ།

རིགས་ཀྱི་བུ་དག་རྣམ་པ་ཐམས་ཅད་མཁྱེན་པའི་རྣམ་པར་རྟོག་པ་ཐམས་ཅད་ཀྱིས་གང་རྣམ་པར་མ་བརྟགས་པ་དེ་རྣམ་པར་མི་རྟོག་པའི་ཆོས་ཀྱི་དབྱིངས་སོ་ཞེས་ཀྱང་ཡང་དག་པར་རྗེས་སུ་མི་མཐོང་ངོ་།

དེ་ལྟར་འདི་ནི་རྣམ་པར་མི་རྟོག་པའི་དབྱིངས་ལ་འཇུག་པའི་ཚུལ་ཡིན་ཏེ།

རིགས་ཀྱི་བུ་དག་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་མི་རྟོག་པའི་དབྱིངས་ལ་རབ་ཏུ་གནས་པ་ཡིན་ནོ།

རིགས་ཀྱི་བུ་དག་ཆོས་ཀྱི་རྣམ་གྲངས་འདི་འཛིན་པ་དང་།

ཡི་གེར་འདྲི་བ་དང་།

འཆང་བ་དང་།

ཀློག་པའི་བསོད་ནམས་ནི་རབ་ཏུ་མང་གི་ལུས་གང་གཱའི་ཀླུང་གི་བྱེ་མ་སྙེད་ཡོངས་སུ་བཏང་བ་ནི་དེ་ལྟ་མ་ཡིན་ནོ།

འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་ཡོངས་སུ་གང་བའི་སྦྱིན་པ་བྱིན་པ་དེ་ནི་དེ་ལྟ་མ་ཡིན་ནོ།

དེ་བཞིན་གཤེགས་པའི་གཟུགས་བརྙན་རིན་པོ་ཆེ་ལས་བྱས་ཏེ།

འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་ཡོངས་སུ་བཀང་བའི་བསོད་ནམས་ཀྱི་ཕུང་པོ་ནི་དེ་ལྟ་མ་ཡིན་ནོ།

དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ།

དམ་ཆོས་འདི་ལ་རྒྱལ་བའི་སྲས།

རྣམ་པར་མི་རྟོག་བསམས་གྱུར་ན།

རྣམ་རྟོག་བགྲོད་དཀའ་རྣམས་འདས་ཏེ།

རིམ་གྱིས་མི་རྟོག་ཐོབ་པར་འགྱུར།

དེ་ལས་རབ་ཞི་མི་གཡོ་མཆོག །

དབང་བྱེད་མཉམ་ལ་མི་མཉམ་པ།

རྣམ་པར་མི་རྟོག་བདེ་བ་ནི།

བྱང་ཆུབ་སེམས་དཔས་ཐོབ་པར་འགྱུར།

བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས།

བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་མི་རྟོག་སྣང་བ་དང་།

ཐམས་ཅད་དང་ལྡན་པའི་འཁོར་དེ་དང་།

ལྷ་དང་།

མི་དང་།

ལྷ་མ་ཡིན་དང་།

དྲི་ཟར་བཅས་པའི་འཇིག་རྟེན་ཡི་རངས་ཏེ།

བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།།

འཕགས་པ་རྣམ་པར་མི་རྟོག་པར་འཇུག་པ་ཞེས་བྱ་བའི་གཟུངས་རྫོགས་སོ།།

རྒྱ་གར་གྱི་མཁན་པོ་

ཛི་ན་མི་ཏྲ་དང་།

དཱ་ན་ཤཱི་ལ་དང་།

ཞུ་ཆེན་གྱི་ལོཙྪ་བ་ཀ་བ་དཔལ་བརྩེགས་ཀྱིས་བསྒྱུར་ཏེ་གཏན་ལ་ཕབ་པ།།

རྒྱ་གར་སྐད་དུ།

གཱ་ཐཱ་དྭ་ཡ་དྷཱ་ར་ཎཱི།

བོད་སྐད་དུ།

ཚིགས་སུ་བཅད་པ་གཉིས་པའི་གཟུངས།

འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ།

སངས་རྒྱས་དང་ནི་ཆོས་ལ་བརྙས་པ་དང་།

ལེ་ལོ་དང་ནི་ཅུང་ཟད་ཆོག་པར་འཛིན།

འདོད་ཆགས་དང་ནི་ང་རྒྱལ་སྤྱོད་པ་དང་།

འགྱོད་པ་དང་ནི་མ་ངེས་འབྱེད་པ་རྣམས།

སེམས་ཅན་རྣམས་ཀྱི་སྒྲིབ་པར་གྱུར་པ་སྟེ།

དེ་ཡི་གཉེན་པོར་ཐེག་པ་མཆོག་བསྟན་པ།

དེ་ཡིས་བར་དུ་གཅོད་པ་དེ་དག་གི།

ཉེས་པ་ཐམས་ཅད་རབ་ཏུ་སྤང་བར་འགྱུར་རོ།

ཏདྱ་ཐཱ།

ཨོཾ་བཛྲ་པྲ་ཀཱ་ར།

བཛྲ་པྲ་ཀཱ་ར།

བཛྲ་ཙཀྲ།

དཾཥྚཱ་བྷ་ཡ་ན་ཀེ །

ཨ་མ་ལེ།

བི་མ་ལེ།

ནིར་མ་ཙུ་ལུ་ཀེ །

ཙུ་ལུ་ཀེ །

ཙུ་ལུ་ཙུ་ལུ།

སརྦ་བུད་དྷེ་སྭཱ་ཧཱ།

ཚིགས་སུ་བཅད་པ་གཉིས་པའི་གཟུངས་ལ་ནི།

ཚིག་གམ་དོན་གྱི་སྒོ་ནས་གང་སྦྱོར་བ།

སེམས་ཅན་དམ་པ་བློ་དང་ལྡན་པ་དེས།

ཕན་ཡོན་རྣམ་པ་བཅུ་དག་ཐོབ་པར་འགྱུར།

ཁམས་རྣམས་མཐའ་དག་རྒྱས་པར་འགྱུར་བ་དང་།

འཆི་བའི་ཚེ་ན་མཆོག་དགའ་དམ་པ་འཐོབ།

ཇི་ལྟར་འདོད་པ་བཞིན་དུ་སྐྱེ་བ་དང་།

ཐམས་ཅད་དུ་ནི་ཚེ་རབས་དྲན་པར་འགྱུར།

སངས་རྒྱས་རྣམས་དང་ཕྲད་པར་འགྱུར་བ་དང་།

དེ་བཞིན་དེ་དག་ལས་ནི་ཐེག་མཆོག་ཐོས།

མོས་པར་འགྱུར་བ་བློ་དང་བཅས་པ་དང་།

སྒོ་གཉིས་དང་ནི་བྱང་ཆུབ་མྱུར་དུ་ཐོབ།

ཚིགས་སུ་བཅད་པ་གཉིས་པའི་གཟུངས་རྫོགས་སོ།།

རྒྱ་གར་སྐད་དུ།

ཨཱརྱ་མ་ཧཱ་ཡཱ་ན་པྲ་སཱ་ད་པྲ་བྷཱ་བ་ན་ནཱ་མ་མ་ཧཱ་ཡཱ་ན་སཱུ་ཏྲ།

བོད་སྐད་དུ།

འཕགས་པ་ཐེག་པ་ཆེན་པོ་ལ་དད་པ་རབ་ཏུ་སྒོམ་པ་ཞེས་བྱ་བ་ཐེག་པ་ཆེན་པོའི་མདོ།

བམ་པོ་དང་པོ།

སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ།

འདི་སྐད་བདག་གིས་ཐོས་པ་དུས་གཅིག་ན།

བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་བྱང་ཆུབ་སེམས་དཔའ་

སེམས་དཔའ་ཆེན་པོ་སངས་རྒྱས་ཀྱི་ཞིང་ཐ་དད་པ་ནས་འདུས་པའི་བྱང་ཆུབ་སེམས་དཔའི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་ཏེ།

ཐམས་ཅད་ཀྱང་བདུད་དང་ཕྱིར་རྒོལ་བ་བཅོམ་པ།

ཉོན་མོངས་པ་དང་།

ཉེ་བའི་ཉོན་མོངས་པ་ཐམས་ཅད་ཀྱི་བག་ཆགས་ཀྱི་ཀུན་ཏུ་རྒྱུ་བ་ལས་རིང་དུ་གྱུར་པ།

བསམས་བཞིན་དུ་སྲིད་པར་སྐྱེ་བ་ཀུན་ཏུ་སྟོན་པ་ལ་དབང་ཆེན་པོའི་ས་ཐོབ་པ།

བསྐལ་པ་དཔག་ཏུ་མེད་པར་ལུས་དང་གནས་གཏོང་བའི་དབང་ཐོབ་པ།

བདུད་ཀྱི་ལས་ཚད་མེད་པ་དང་བར་དུ་གཅོད་པ་ཐམས་ཅད་ཤིན་ཏུ་རབ་ཏུ་རྟོགས་པ།

སེམས་ཅན་ཐམས་ཅད་ཀྱི་དོན་ཐམས་ཅད་ཐོབ་པར་བྱ་བའི་ཐབས་ཀྱི་ཆོ་ག་ཤེས་པ།

ངེས་པར་འབྱུང་བ་ཐམས་ཅད་ཤེས་པའི་སྟོབས་ཆེན་པོ་ཐོབ་པ།

མུ་སྟེགས་ཅན་གྱི་སྨྲ་བ་ཐམས་ཅད་བཟློག་པ་ལ་མཁས་པ།

རྫུ་འཕྲུལ་གྱི་རྣམ་པར་འཕྲུལ་པ་ཆེན་པོས་སྐྱེ་བོ་ཕལ་པོ་ཆེ་ཉེ་བར་བསྡུ་བ་ལ་མཁས་པ།

ཕ་རོལ་ཏུ་ཕྱིན་པ་ཆེན་པོ་བསྒོམས་པས་རྣལ་འབྱོར་ཆེན་པོ་རྣམ་པ་ཐམས་ཅད་ཐོབ་པ།

ནམ་མཁའ་ལྟ་བུར་འཇིག་རྟེན་གྱི་ཆོས་ཀྱིས་སེམས་མ་གོས་པ་ཤ་སྟག་ལ་འདི་ལྟ་སྟེ།

བྱང་ཆུབ་སེམས་དཔའ་སེམས་དཔའ་ཆེན་པོ་དད་པ་གསལ་དང་།

བྱང་ཆུབ་སེམས་དཔའ་དད་པ་དྲི་མ་མེད་དང་།

བྱང་ཆུབ་སེམས་དཔའ་དད་པ་མི་སྒུལ་བ་དང་།

བྱང་ཆུབ་སེམས་དཔའ་དད་པས་རབ་ཏུ་འཇུག་པ་དང་།

བྱང་ཆུབ་སེམས་དཔའ་དད་པ་རབ་གནས་དང་།

བྱང་ཆུབ་སེམས་དཔའ་དད་པ་མ་ཉམས་དང་།

བྱང་ཆུབ་སེམས་དཔའ་དད་པ་མི་གཡོ་དང་།

བྱང་ཆུབ་སེམས་དཔའ་དད་པ་རབ་ཚོལ་དང་།

བྱང་ཆུབ་སེམས་དཔའ་དད་པ་མཉམ་དང་།

བྱང་ཆུབ་སེམས་དཔའ་དད་པ་ཆེན་པོ་དང་།

བྱང་ཆུབ་སེམས་དཔའ་རྟག་ཏུ་དད་པའི་རྗེས་འབྲང་དང་།

བྱང་ཆུབ་སེམས་དཔའ་དད་པ་ལ་ཡང་དག་པར་ཞུགས་དང་།

བྱང་ཆུབ་སེམས་དཔའ་དད་པར་འཇུག་བྱེད་དང་།

བྱང་ཆུབ་སེམས་དཔའ་དད་པ་ལ་ཡིད་གཉིས་རྣམ་པར་འཇོམ་དང་།

བྱང་ཆུབ་སེམས་དཔའ་དད་པ་སྟོན་དང་།

བྱང་ཆུབ་སེམས་དཔའ་དད་པ་རབ་ཏུ་འཇོག་བྱེད་དང་།

བྱང་ཆུབ་སེམས་དཔའ་དད་པ་རྣམ་པར་འཕེལ་བྱེད་དང་།

བྱང་ཆུབ་སེམས་དཔའ་

དད་པ་རྣམ་པར་སྦྱོང་དང་།

བྱང་ཆུབ་སེམས་དཔའ་དད་པའི་སྣོད་ཡོངས་སུ་ཚོལ་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་དད་པ་ཐབས་ཆེན་དང་།

དེ་དག་ལ་སོགས་པ་བྱང་ཆུབ་སེམས་དཔའ་ལྔ་སྟོང་དང་།

འོད་སྲུང་ཆེན་པོ་ལ་སོགས་པ་དགེ་སློང་སྟོང་ཉིས་བརྒྱ་ལྔ་བཅུ་དང་ཐབས་ཅིག་ཏུ་བཞུགས་ཏེ།

བཅོམ་ལྡན་འདས་ལྷ་དང་།

ཀླུ་དང་།

གནོད་སྦྱིན་དང་།

དྲི་ཟ་དང་།

ལྷ་མ་ཡིན་དང་།

ནམ་མཁའ་ལྡིང་དང་།

མིའམ་ཅི་དང་།

ལྟོ་འཕྱེ་ཆེན་པོ་དང་།

མི་དང་།

མི་མ་ཡིན་པ་ཚད་མེད་པ་དག་གིས་ཀུན་ནས་བསྐོར་ཅིང་མདུན་གྱིས་བྱས་ཏེ་འཁོར་བརྒྱ་སྟོང་དུ་མའི་ནང་ན་བཞུགས་པར་གྱུར་ཏོ།

དེའི་ཚེ་འཁོར་དེར་བྱང་ཆུབ་སེམས་དཔའ་ལས་དང་པོ་པ་མོས་པ་སྤྱོད་པའི་ས་ལ་གནས་པ་མང་པོ་འདུས་ཏེ་འཁོད་པར་གྱུར་ཏོ།

དེ་ནས་བཅོམ་ལྡན་འདས་བྱང་ཆུབ་སེམས་དཔའ་ལས་དང་པོ་པ་མོས་པས་སྤྱོད་པའི་ས་ལ་གནས་པ་དེ་དག་ལས་བརྩམས་ཏེ་གཏམ་རྩོམ་པ་མཛད་དོ།

རིགས་ཀྱི་བུ་དག་གལ་ཏེ་ཇི་ཙམ་དུ་བྱང་ཆུབ་སེམས་དཔའ་གང་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་ན་དོན་ཆེ་ཞིང་འབྲས་བུ་ཆེ་སྟེ་ཕན་ཡོན་ཆེའོ།

དེ་ལྟ་བས་ན་བྱང་ཆུབ་སེམས་དཔའ་ལས་དང་པོ་པ་མོས་པས་སྤྱོད་པ་ལ་ཞུགས་པས་ཐེག་པ་ཆེན་པོ་ལ་དད་པས་མང་དུ་གནས་པར་བྱའོ།

དེ་ནས་བྱང་ཆུབ་སེམས་དཔའ་དད་པ་ཐབས་ཆེན་སངས་རྒྱས་ཀྱི་མཐུ་དང་སངས་རྒྱས་ཀྱི་བྱིན་གྱི་རླབས་ཀྱིས་སྟན་ལས་ལངས་ཏེ།

བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ།

བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས།

བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པའི་མཚན་ཉིད་དུ་རིག་པར་བགྱི་བ་གང་ལགས།

བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་སྐྱེ་བ་གང་ལགས།

བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་རབ་ཏུ་དབྱེ་བ་རྣམ་པ་དུ་ཞིག་མཆིས།

བྱང་ཆུབ་སེམས་དཔའ་རྣམས་ཀྱི་ཐེག་

པ་ཆེན་པོའི་ཕྱིར་ཐེག་པ་ཆེན་པོ་ལ་དད་པའི་ཕན་ཡོན་རྣམ་པ་དུ་ཞིག་མཆིས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་ཁྱོད་བྱང་ཆུབ་སེམས་དཔའ་ཚད་མེད་པ་དག་གི་དོན་གྱི་ཕྱིར་ཞུགས་ནས་དེ་བཞིན་གཤེགས་པ་ལ་དོན་འདི་ཡོངས་སུ་འདྲི་བར་སེམས་པ་ལེགས་སོ་ལེགས་སོ།

དེའི་ཕྱིར་རིགས་ཀྱི་བུ་ཉོན་ཅིག་དང་དོན་དེ་བསྟན་པར་བྱའོ།

རིགས་ཀྱི་བུ་བཅུ་གཅིག་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པའི་མཚན་ཉིད་དུ་རིག་པར་བྱའོ།

འདི་ལྟ་སྟེ།

གསལ་བའི་མཚན་ཉིད་དང་།

བརླན་པའི་མཚན་ཉིད་དང་།

རྣམ་པའི་མཚན་ཉིད་དང་།

ཡོངས་སུ་བཟུང་བའི་མཚན་ཉིད་དང་།

གནས་ཀྱི་མཚན་ཉིད་དང་།

ཡང་དག་པར་འདའ་བའི་མཚན་ཉིད་དང་།

རྩ་བའི་མཚན་ཉིད་དང་།

སྦེད་པའི་མཚན་ཉིད་དང་།

རྗེས་སུ་འབྲེལ་བའི་མཚན་ཉིད་དང་།

རྒྱུན་གྱི་མཚན་ཉིད་དང་།

ཡོངས་སུ་གྲུབ་པའི་མཚན་ཉིད་དོ།

དད་པ་ཐབས་ཆེན་གྱིས་གསོལ་པ།

བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པའི་གསལ་བའི་མཚན་ཉིད་གང་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་རྙོག་པ་རྣམ་པ་བཞི་དང་བྲལ་ན་ནི་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པའི་གསལ་བའི་མཚན་ཉིད་དོ།

རྙོག་པ་རྣམ་པ་བཞི་གང་ཞེ་ན།

འདི་ལྟ་སྟེ།

ཁོང་ཁྲོ་བའི་རྙོག་པ་དང་།

ཡིད་མི་ཆེས་པའི་རྙོག་པ་དང་།

སྡང་བའི་རྙོག་པ་དང་།

ཐེ་ཚོམ་གྱི་རྙོག་པའོ།

རིགས་ཀྱི་བུ་འདི་ལྟར་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཐོབ་པའི་བྱང་ཆུབ་སེམས་དཔའ་ནི་ཕྱིས་ཐེག་པ་ཆེན་པོ་ལ་ཁོང་ཁྲོ་བའི་སེམས་སྐྱེད་མི་སྲིད་དོ།

ཟབ་ཅིང་རྒྱ་ཆེ་བའི་ཆོས་རྣམས་ལ་ཡིད་མི་ཆེས་པའི་སེམས་སྐྱེད་མི་སྲིད་དོ།

ཟབ་ཅིང་རྒྱ་ཆེ་བའི་ཆོས་རྣམས་ལ་དངང་སྐྲག་ཀུན་ཏུ་དངང་བར་འགྱུར་མི་སྲིད་དོ།

ཟབ་ཅིང་རྒྱ་ཆེ་བའི་ཆོས་རྣམས་ལ་མི་བཟོད་པ་དང་ཐེ་ཙོམ་ཟ་བར་འགྱུར་མི་སྲིད་དོ།

བྱང་ཆུབ་སེམས་དཔའ་དད་པ་ཐབས་ཆེན་གྱིས་གསོལ་པ།

བཅོམ་ལྡན་འདས་ཅིའི་སླད་དུ་ལས་དང་

པོ་པའི་བྱང་ཆུབ་སེམས་དཔའ་མོས་པས་སྤྱོད་པ་ལ་ཞུགས་པ།

ཆོས་ཤེས་པ།

རྟོག་པ་མ་མཆིས་པར་ཐེག་པ་ཆེན་པོའི་ཆོས་ཟབ་ཅིང་རྒྱ་ཆེ་བ་འདི་ལྟ་བུ་དག་ལ་ཐེ་ཚོམ་མ་མཆིས་ཤིང་ཐེ་ཚོམ་གྱི་རྙོག་པ་དང་བྲལ་བ་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་བྱང་ཆུབ་སེམས་དཔའ་ཆོས་ཉིད་མ་རྟོགས་པའི་ཤེས་པ་ཉིད་ཀྱིས་ཐེག་པ་ཆེན་པོའི་ཆོས་ཟབ་ཅིང་རྒྱ་ཆེ་བ་དག་ལ་ཐེ་ཚོམ་མེད་པ་དང་།

ཐེ་ཚོམ་གྱི་རྙོག་པ་དང་བྲལ་བ་མ་ཡིན་གྱི།

བྱང་ཆུབ་སེམས་དཔའ་གཞན་གྱི་དྲིང་ལས་མོས་པའི་སྟོབས་ཀྱིས་ཀྱང་ཐེག་པ་ཆེན་པོའི་ཆོས་ཟབ་ཅིང་རྒྱ་ཆེ་བ་དག་ལ་ཐེ་ཚོམ་མེད་ཅིང་ཐེ་ཚོམ་གྱི་རྙོག་པ་དང་བྲལ་བ་ཡིན་ནོ།

འདི་ལྟར་ལས་དང་པོ་པའི་བྱང་ཆུབ་སེམས་དཔའ་མོས་པས་སྤྱོད་པ་ལ་ཞུགས་པ་ནི་ཐེག་པ་ཆེན་པོའི་ཆོས་ཟབ་ཅིང་རྒྱ་ཆེ་བ་བསྟན་པ་དག་ལ་དེ་བཞིན་གཤེགས་པ་ཉིད་དབང་དུ་བྱས་ནས་ཆོས་འདི་དག་ནི་དེ་བཞིན་གཤེགས་པས་གསུངས་པའོ་ཞེས་དེ་བཞིན་གཤེགས་པས་ཐུགས་སུ་ཆུད་པ་ལ་མོས་པ་བཞག་ནས་ཆོས་རྣམས་ལ་མ་ལོག་པར་མོས་པ་འཇོག་གོ།

གཞན་གྱི་དྲིང་ལས་མོས་པའི་སྟོབས་དེས་དེ་བཞིན་གཤེགས་པས་གསུངས་པ་ཟབ་ཅིང་རྒྱ་ཆེ་བའི་མདོ་སྡེའི་ཆོས་རྣམས་ལ་ཐེ་ཚོམ་མེད་ཅིང་ཐེ་ཙོམ་དང་བྲལ་བ་ཡིན་ཏེ།

རིགས་ཀྱི་བུ་དེ་ལྟ་བུ་ནི་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པའི་གསལ་བའི་མཚན་ཉིད་དུ་བལྟའོ།

བྱང་ཆུབ་སེམས་དཔའ་དད་པ་ཐབས་ཆེན་གྱིས་གསོལ་པ།

བཅོམ་ལྡན་འདས་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པས་བརླན་པའི་མཚན་ཉིད་དུ་རིག་པར་བགྱི་བ་གང་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་དང་ལྡན་པའི་ཡིད་བདེ་བས་ལུས་བརླན་པ་དང་།

སེམས་བརླན་པ་གང་ཡིན་པ་དེ་ནི་དེའི་བརླན་པའི་མཚན་ཉིད་དུ་རིག་པར་བྱའོ།

དེ་ཡང་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་དང་ལྡན་པའི་བདེ་བ་དང་ཡིད་བདེ་བས་ལུས་དང་སེམས་སིམ་པར་བྱེད་པ་ཡིན་གྱི།

འདོད་པ་ལ་ལོངས་

སྤྱོད་པ་རྣམས་ཀྱི་འདོད་པའི་ཡོན་ཏན་ལས་བྱུང་བའི་བདེ་བ་དང་ཡིད་བདེ་བས་ནི་མ་ཡིན་ནོ།

གཟུགས་དང་གཟུགས་མེད་པ་ན་སྤྱོད་པའི་སེམས་ཅན་རྣམས་ཀྱི་བདེ་བ་དང་ཡིད་བདེ་བ་གང་ཡིན་པ་དེས་ནི་འདི་འདྲ་བར་དེ་དག་གི་ལུས་དང་སེམས་སིམ་པར་བྱེད་པ་མ་ཡིན་ནོ།

དེ་ཅིའི་ཕྱིར་ཞེ་ན།

འདི་ལྟར་དེ་དག་གི་བདེ་བ་དང་ཡིད་བདེ་བ་ནི་མ་ཞི་བའོ།

ཅིའི་ཕྱིར་མ་ཞི་བ་ཞེ་ན།

གང་འདོད་པའི་ཡོན་ཏན་ལས་བྱུང་བའི་བདེ་བ་དེ་དང་ཡིད་བདེ་བ་དེ་དང་།

འདོད་པ་ལ་ལོངས་སྤྱོད་པ་རྣམས་ཀྱི་བདེ་བ་དང་ཡིད་བདེ་བ་དེ་ནི་དེ་ཙམ་དུ་འདོད་ཆགས་དང་།

ཁོང་ཁྲོ་བ་དང་ལྡན་པ་མ་ཞི་བའི་མཚན་ཉིད་དོ།

མཐོན་དམན་གྱི་རྒྱུའི་ཕྱིར་མ་ཞི་བའི་མཚན་ཉིད་དོ།

བདེན་པ་རྣམས་ལ་ཡིད་གཉིས་དང་ཐེ་ཚོམ་ཟ་བའི་རྗེས་སུ་སོང་བའི་ཕྱིར་རབ་ཏུ་མ་ཞི་བའི་མཚན་ཉིད་དོ།

ངར་འཛིན་པ་དང་།

ང་ཡིར་འཛིན་པ་དང་།

དེའི་རྩ་བ་ལས་བྱུང་བའི་ལྟ་བར་གྱུར་པ་ཚད་མེད་པ་དང་འབྲེལ་བའི་ཕྱིར་རབ་ཏུ་མ་ཞི་བའི་མཚན་ཉིད་དོ།

ཉེ་བའི་ཉོན་མོངས་པའི་ཕྱིན་ཅི་ལོག་དང་།

གཡེང་བ་དང་།

རྒོད་པ་དང་།

རྨུགས་པ་དང་།

བག་མེད་པ་དང་།

ངོ་ཚ་མེད་པའི་རྩ་བའི་ཕྱིར་རབ་ཏུ་མ་ཞི་བའོ།

འགྲོ་བ་ལྔའི་ལས་སྣ་ཚོགས་མངོན་པར་འདུ་བྱེད་པའི་རྩ་བའི་ཕྱིར་རབ་ཏུ་མ་ཞི་བའོ།

སྡུག་བསྔལ་གྱི་བདེན་པས་བསྡུས་ཤིང་འགྲོ་བའི་ཕྱིར་རབ་ཏུ་མ་ཞི་བའོ།

རིགས་ཀྱི་བུ་འདི་ལྟར་ཉོན་མོངས་པ་དང་།

ལས་དང་།

ཚེའི་ཀུན་ནས་ཉོན་མོངས་པའི་རྒྱུ་དང་འབྲས་བུར་བཅས་པའི་རྒྱུན་ལ་འཇུག་པ་དང་ལྡན་པས་འདོད་པའི་ཡོན་ཏན་ལྔ་ལས་བྱུང་བའི་བདེ་བ་དང་།

ཡིད་བདེ་བ་དེ་ནི་རབ་ཏུ་མ་ཞི་བ་སྟེ།

དེ་བས་ན་དེའི་ལུས་དང་སེམས་སིམ་པར་བྱེད་པ་མ་ཡིན་ནོ།

ཇི་ལྟར་འདོད་པ་ལ་ལོངས་སྤྱོད་པ་རྣམས་ཀྱི་འདོད་པའི་ཡོན་ཏན་ལས་བྱུང་བའི་བདེ་བ་དང་ཡིད་བདེ་བ་མ་ཡིན་པ་དེ་བཞིན་དུ་གཟུགས་དང་།

གཟུགས་མེད་པ་ན་སྤྱོད་པ་རྣམས་ཀྱི་སྙོམས་པར་ཞུགས་པ་ལས་བྱུང་བ་ལ་ཡང་རྣམ་པ་དེ་དག་གིས་ཅི་རིགས་པར་རབ་ཏུ་མ་ཞི་བའི་མཚན་ཉིད་དུ་རིག་པར་བྱའོ།

རབ་ཏུ་མ་ཞི་བས་ན་འཕགས་པའི་ཆོས་འདུལ་བ་ལ་ལུས་དང་སེམས་སིམ་པར་

མི་འགྱུར་རོ།

བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ལས་བྱུང་བའི་བདེ་བ་དང་ཡིད་བདེ་བ་གང་ཡིན་པ་དེ་ནི་འདོད་ཆགས་དང་།

ཁོང་ཁྲོ་བའི་རབ་ཏུ་མ་ཞི་བ་དང་བྲལ་བ་དང་།

མཐོན་དམན་གྱི་རབ་ཏུ་མ་ཞི་བ་དང་བྲལ་བ་དང་།

བདེན་པ་ལ་ཡིད་གཉིས་དང་ཐེ་ཚོམ་ཟ་བའི་རབ་ཏུ་མ་ཞི་བ་དང་བྲལ་བ་དང་།

ངར་འཛིན་པ་དང་།

ང་ཡིར་འཛིན་པ་དང་།

དེའི་རྩ་བ་ལས་བྱུང་བའི་ལྟ་བར་གྱུར་པ་ཚད་མེད་པའི་རབ་ཏུ་མ་ཞི་བ་དང་བྲལ་བ་དང་།

ཉེ་བའི་ཉོན་མོངས་པ་ཕྱིན་ཅི་ལོག་དང་།

གཡེང་བ་དང་།

རྒོད་པ་དང་།

རྨུགས་པ་དང་།

བག་མེད་པ་དང་།

ངོ་ཚ་མེད་པའི་རབ་ཏུ་མ་ཞི་བ་དང་བྲལ་བ་དང་།

འགྲོ་བ་ལྔའི་ལས་སྣ་ཚོགས་མངོན་པར་འདུ་བྱེད་པའི་རབ་ཏུ་མ་ཞི་བ་དང་བྲལ་བ་དང་།

སྡུག་བསྔལ་གྱི་བདེན་པས་བསྡུས་པའི་རབ་ཏུ་མ་ཞི་བ་དང་བྲལ་བ་དང་།

འདི་ལྟར་ཉོན་མོངས་པ་དང་།

ལས་དང་།

ཚེའི་ཀུན་ནས་ཉོན་མོངས་པའི་རྒྱུ་དང་འབྲས་བུར་བཅས་པའི་རྒྱུན་ལས་འཇུག་པའི་རབ་ཏུ་མ་ཞི་བ་དང་བྲལ་བའི་ཕྱིར་རབ་ཏུ་ཞི་བའོ།

རབ་ཏུ་ཞི་བའི་ཕྱིར་འཕགས་པའི་ཆོས་འདུལ་བ་ལ་ལུས་དང་སེམས་སིམ་པར་འགྱུར་ཏེ།

རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པས་བརླན་པའི་མཚན་ཉིད་དོ།

བྱང་ཆུབ་སེམས་དཔའ་དད་པ་ཐབས་ཆེན་གྱིས་གསོལ་པ།

བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་སླད་དུ་ཐེག་པ་ཆེན་པོ་ལ་དད་པས་བརླན་པའི་མཚན་ཉིད་དང་།

བདེ་བ་དང་ཡིད་བདེ་བའི་དོན་འདི་ངོ་མཚར་ཏོ།

བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་སླད་དུ་ཐེག་པ་ཆེན་པོ་ལ་དད་པ་ལས་བྱུང་བའི་བདེ་བ་དང་ཡིད་བདེ་བའི་དོན་ལས་རབ་ཏུ་མོས་པར་བགྱིའོ།

བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་སླད་དུ་ཐེག་པ་ཆེན་པོ་ལ་དད་པའི་རྣམ་པའི་མཚན་ཉིད་གང་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་བྱང་ཆུབ་སེམས་དཔའ་རྣམས་རྣམ་པ་གསུམ་གྱིས་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་འཇུག་སྟེ།

འདི་ལྟ་སྟེ།

ཡིད་

ཆེས་པའི་རྣམ་པ་དང་།

འགྱུར་བའི་རྣམ་པ་དང་།

མངོན་པར་དགའ་བའི་རྣམ་པའོ།

གསོལ་པ།

བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་སླད་དུ་ཐེག་པ་ཆེན་པོ་ལ་དད་པ་ཡིད་ཆེས་པའི་རྣམ་པས་འཇུག་པ་ཇི་ལྟ་བུ་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་བྱང་ཆུབ་སེམས་དཔའ་ཟབ་ཅིང་རྒྱ་ཆེ་བའི་ཆོས་བསྟན་པ་རྣམས་ལ་ཐོག་མ་ཉིད་དུ་ཡོད་པར་མོས་སོ།

དེ་ཅིའི་ཕྱིར་ཞེ་ན།

འདི་ལྟར་ཆོས་འདི་དག་ནི་དེ་བཞིན་གཤེགས་པ་ཉིད་ཀྱི་ཡུལ་དེ་བཞིན་གཤེགས་པ་ཉིད་ཀྱིས་གསུངས་པར་འོས་པའོ།

དེ་བས་ན་དེ་བཞིན་གཤེགས་པ་རྣམས་ཉིད་ཀྱིས་མངོན་པར་རྫོགས་པར་སངས་རྒྱས་ཏེ་རྟོག་གེ་པ་རྣམས་ཀྱི་ཡུལ་མ་ཡིན་ནོ།

འདི་ལྟར་རྟོག་གེ་པ་རྣམས་ནི་ཟབ་ཅིང་རྒྱ་ཆེ་བའི་ཆོས་འདི་ལྟ་བུ་དག་ཐོས་ན་དངང་བར་གྱུར་ཏེ་རྟོགས་པར་ལྟ་བ་ག་ལ་འགྱུར།

དེ་བས་ན་དེ་དག་ནི་རྟོག་གེ་པ་རྣམས་ཀྱི་ཡུལ་མ་ཡིན་ནོ།

སངས་རྒྱས་རྣམས་ཀྱི་བྱང་ཆུབ་ཇི་ལྟར་དེ་དག་གིས་བསྟན་པའི་ཆོས་དེ་དག་ཀྱང་དེ་བཞིན་དུ་ཡོད་དེ།

དེའི་ཕྱིར་སངས་རྒྱས་བཅོམ་ལྡན་འདས་དེ་དག་གི་ཆོས་བསྟན་པ་ཟབ་ཅིང་རྒྱ་ཆེ་བ་འབྲས་བུ་དང་བཅས་པ་ལ་ཡོད་པ་ཉིད་དུ་མོས་ནས་བྱང་ཆུབ་སེམས་དཔའ་ཡིད་ཆེས་པའི་རྣམ་པས་དད་པ་སྐྱེད་དོ།

གསོལ་པ།

བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་སླད་དུ་ཐེག་པ་ཆེན་པོ་ལ་དད་པར་འགྱུར་བའི་རྣམ་པས་འཇུག་པ་ཇི་ལྟ་བུ་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་བྱང་ཆུབ་སེམས་དཔའ་ཟབ་ཅིང་རྒྱ་ཆེ་བའི་ཆོས་ཡོད་པ་ཡོན་ཏན་དང་ལྡན་པ་དག་ལ་རྣམ་པ་དུ་མར་མོས་ཤིང་ལུས་ཀྱི་འགྱུར་བ་དང་།

སེམས་ཀྱི་འགྱུར་བ་དང་བཅས་པར་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་སྐྱེད་དོ།

གསོལ་པ།

བཅོམ་ལྡན་འདས་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ལས་བྱུང་བའི་ལུས་ཀྱི་འགྱུར་བ་ཇི་ལྟ་བུ་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་སྤུ་ལྡང་བ་དང་།

སྤུ་གཡོ་བ་དང་།

མཆི་མ་འཁོར་བ་དང་།

མཆི་མ་ཟག་པ་ནི་བྱང་ཆུབ་སེམས་

དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ལས་བྱུང་བའི་ལུས་ཀྱི་འགྱུར་བའོ།

གསོལ་པ།

བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ལས་བྱུང་བའི་སེམས་ཀྱི་འགྱུར་བ་གང་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་ལུས་ལས་བྱུང་བའི་ཡིད་བདེ་བ་རྒྱ་ཆེ་བ་ཁ་ན་མ་ཐོ་བ་མེད་པ་ནི་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ལས་བྱུང་བའི་སེམས་ཀྱི་འགྱུར་བའོ།

རིགས་ཀྱི་བུ་དེ་ལྟར་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་འགྱུར་བའི་རྣམ་པས་འཇུག་གོ།

གསོལ་པ།

བཅོམ་ལྡན་འདས་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་མངོན་པར་དགའ་བའི་རྣམ་པས་འཇུག་པ་གང་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་འདི་ལ་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཐོབ་པ་འདི་སྙམ་དུ་སེམས་ཏེ།

སྔོན་སེམས་ཅན་ཚད་མེད་པ་མིར་གྱུར་པ་རྣམས་ཀྱིས་བརྩོན་འགྲུས་ཀྱི་སྟོབས་དང་།

ཤེས་པའི་སྟོབས་ཀྱིས་ཟབ་ཅིང་རྒྱ་ཆེ་བའི་ཆོས་འདི་རབ་ཏུ་རྙེད་དོ།

དེ་བཞིན་དུ་མ་འོངས་པའི་དུས་ན་ཡང་རྙེད་པར་འགྱུར་རོ།

དེ་བཞིན་དུ་ད་ལྟར་བྱུང་བའི་དུས་ན་ཡང་སེམས་ཅན་ཚད་མེད་པ་མིར་གྱུར་ནས་བརྩོན་འགྲུས་ཀྱི་སྟོབས་དང་།

ཤེས་པའི་སྟོབས་ཀྱིས་ཟབ་ཅིང་རྒྱ་ཆེ་བའི་ཆོས་འདི་རབ་ཏུ་རྙེད་ན།

བདག་མིར་གྱུར་ལ་རྐྱེན་རྙེད་བཞིན་དུ་ཟབ་ཅིང་རྒྱ་ཆེ་བའི་ཆོས་འདི་ཐོབ་པར་བྱ་བ་ལ་བརྩོན་འགྲུས་ཉམས་པར་ཅིའི་ཕྱིར་བྱ་ཞེས་དེ་ལྟར་ཤེས་ནས།

བྱང་ཆུབ་སེམས་དཔའ་སངས་རྒྱས་ཀྱི་ཞིང་དེ་དང་དེ་དག་ན་རྟག་པར་རྒྱུན་ཏུ་ཟབ་ཅིང་རྒྱ་ཆེ་བ་དག་ལ་དད་པ་དེས་མངོན་པར་དགའ་བ་སྐྱེས་ཤིང་མོས་པ་སྐྱེས་པས་གནས་སོ།

རིགས་ཀྱི་བུ་དེ་ལྟར་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་མངོན་པར་དགའ་བའི་རྣམ་པས་འཇུག་སྟེ།

རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པའི་རྣམ་པའི་མཚན་ཉིད་དོ།

གསོལ་པ།

བཅོམ་

ལྡན་འདས་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཡོངས་སུ་གཟུང་བའི་མཚན་ཉིད་གང་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ནི་བསོད་ནམས་དང་ཡེ་ཤེས་ཚད་མེད་པ་ཡོངས་སུ་བཟུང་ནས་སྐྱེའོ།

དེ་ཅིའི་ཕྱིར་ཞེ་ན།

རིགས་ཀྱི་བུ་སེམས་ཅན་ཐམས་ཅད་ལ་ཕན་པ་དང་།

བདེ་བའི་གནས་ཡིན་པའི་ཕྱིར་འཇིག་རྟེན་པའི་དགེ་བའི་རྩ་བ་ཇི་སྙེད་པ་འདི་ལྟ་སྟེ།

མཐོ་བའི་རིགས་སུ་འགྱུར་བའམ།

གཟུགས་བཟང་པོར་འགྱུར་བའམ།

ཕྱུག་པོའི་རིགས་སུ་འགྱུར་བའམ།

ཡིད་གཞུངས་པ་དང་།

བློ་དང་།

དྲན་པ་དང་ལྡན་པར་འགྱུར་བའམ།

ཕྱོགས་དང་གཡོག་འཁོར་མང་པོར་འགྱུར་བའམ།

ཚེ་རིང་པོར་འགྱུར་བའམ།

དབང་ཆེ་བར་གྲགས་པར་འགྱུར་བའམ།

རྒྱལ་རིགས་ཤིང་སཱ་ལ་ཆེན་པོ་ལྟ་བུའི་རིགས་སུ་འགྱུར་བའམ།

བྲམ་ཟེ་ཤིང་སཱ་ལ་ཆེན་པོ་ལྟ་བུའི་རིགས་སུ་འགྱུར་བའམ།

ཁྱིམ་བདག་ཤིང་སཱ་ལ་ཆེན་པོ་ལྟ་བུའི་རིགས་སུ་འགྱུར་བའམ།

རྒྱལ་ཆེན་བཞིའི་རིགས་སུ་སྐྱེ་བར་འགྱུར་བའམ།

སུམ་ཅུ་རྩ་གསུམ་དང་།

མཚེ་མ་དང་།

དགའ་ལྡན་དང་།

འཕྲུལ་དགའ་དང་།

གཞན་འཕྲུལ་དབང་བྱེད་དུ་སྐྱེ་བར་འགྱུར་བའམ།

འཁོར་ལོས་སྒྱུར་བ་ཉིད་དང་།

འཇིག་རྟེན་སྐྱོང་བ་ཉིད་དང་།

བརྒྱ་བྱིན་ཉིད་དང་།

བདུད་ཉིད་དང་།

ཚངས་པ་ཉིད་དུ་འགྱུར་བའམ།

གཟུགས་ཀྱི་བསམ་གཏན་དུ་སྐྱེ་བར་འགྱུར་བ་ནས།

འདུ་ཤེས་མེད་འདུ་ཤེས་མེད་མིན་སྲིད་པའི་རྩེ་མོའི་བར་དུ་སྐྱེ་བར་འགྱུར་བའི་དགེ་བའི་རྩ་བ་དེ་དག་ནི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པས་བསོད་ནམས་དང་ཡེ་ཤེས་ཡོངས་སུ་བཟུང་བའི་དགེ་བའི་རྩ་བ་དེའི་བརྒྱའི་ཆར་ཡང་ཉེ་བར་མི་འགྲོ་སྟེ།

སྟོང་གི་ཆའམ།

བརྒྱ་སྟོང་གི་ཆའམ།

གྲངས་སམ།

ཆའམ།

བགྲང་བའམ།

བསྒྲུན་པའམ།

ཟླའམ།

དཔེར་ཡང་མི་བཟོད་དོ།

དེ་ཅིའི་ཕྱིར་ཞེ་ན།

འཇིག་རྟེན་པའི་དགེ་བའི་རྩ་བ་དེ་དག་ནི་འདོད་ཆགས་དང་།

ཁོང་ཁྲོ་བ་རབ་ཏུ་མ་ཞི་བ་དང་འབྲེལ་བའོ།

མཐོན་དམན་རབ་ཏུ་མ་ཞི་བ་དང་འབྲེལ་བའོ།

བདེན་པ་རྣམས་ལ་ཡིད་གཉིས་དང་ཐེ་ཚོམ་ཟ་བ་རབ་ཏུ་མ་ཞི་བ་དང་འབྲེལ་བའོ།

ངར་འཛིན་པ་དང་།

ང་ཡིར་འཛིན་པ་དང་།

དེའི་རྩ་བ་ལས་བྱུང་བའི་ལྟ་བར་གྱུར་པ་ཚད་མེད་པ་རབ་ཏུ་མ་ཞི་བ་དང་འབྲེལ་བའོ།

ཉེ་བའི་ཉོན་མོངས་པའི་ཕྱིན་ཅི་ལོག་དང་།

གཡེང་བ་དང་།

རྒོད་པ་དང་།

རྨུགས་པ་དང་།

བག་མེད་པ་དང་།

ངོ་ཚ་མེད་པ་རབ་ཏུ་མ་ཞི་བ་དང་འབྲེལ་བའོ།

འགྲོ་བ་ལྔའི་ལས་སྣ་ཚོགས་མངོན་པར་འདུ་བྱེད་པའི་རྗེས་སུ་འབྲེལ་བ་རབ་ཏུ་མ་ཞི་བ་དང་འབྲེལ་བའོ།

སྡུག་བསྔལ་གྱི་བདེན་པས་བསྡུས་པས་རབ་ཏུ་མ་ཞི་བ་དང་འབྲེལ་བའོ།

རིགས་ཀྱི་བུ་དེ་ལྟར་འཇིག་རྟེན་པའི་དགེ་བའི་རྩ་བ་དེ་དག་ནི་ཉོན་མོངས་པ་དང་།

ལས་དང་།

ཚེའི་ཀུན་ནས་ཉོན་མོངས་པ་རྒྱུ་དང་འབྲས་བུར་བཅས་པའི་རྒྱུན་ལ་འཇུག་པ་རབ་ཏུ་མ་ཞི་བ་དང་འབྲེལ་བ་དག་གོ།

བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་དང་འབྲེལ་བ་བསོད་ནམས་དང་ཡེ་ཤེས་ཡོངས་སུ་བཟུང་བའི་དགེ་བའི་རྩ་བ་རྣམས་ནི་འདོད་ཆགས་དང་ཁོང་ཁྲོ་བ་རབ་ཏུ་མ་ཞི་བ་ལས་རྣམ་པར་གྲོལ་བའོ།

མཐོན་དམན་རབ་ཏུ་མ་ཞི་བ་ལས་རྣམ་པར་གྲོལ་བའོ།

བདེན་པ་རྣམས་ལ་ཡིད་གཉིས་དང་ཐེ་ཚོམ་ཟ་བ་རབ་ཏུ་མ་ཞི་བ་ལས་རྣམ་པར་གྲོལ་བའོ།

ངར་འཛིན་པ་དང་།

ང་ཡིར་འཛིན་པ་དང་།

དེའི་རྩ་བ་ལས་བྱུང་བའི་ལྟ་བར་གྱུར་པ་ཚད་མེད་པ་རབ་ཏུ་མ་ཞི་བ་ལས་རྣམ་པར་གྲོལ་བའོ།

ཉེ་བའི་ཉོན་མོངས་པ་ཕྱིན་ཅི་ལོག་དང་།

གཡེང་བ་དང་།

རྒོད་པ་དང་།

རྨུགས་པ་དང་།

བག་མེད་པ་དང་།

ངོ་ཚ་མེད་པ་རབ་ཏུ་མ་ཞི་བ་ལས་རྣམ་པར་གྲོལ་བའོ།

འགྲོ་བ་ལྔའི་ལས་སྣ་ཚོགས་མངོན་པར་འདུ་བྱེད་པ་རབ་ཏུ་མ་ཞི་བ་ལས་རྣམ་པར་གྲོལ་བའོ།

རིགས་ཀྱི་བུ་དེ་ལྟར་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་དང་འབྲེལ་བ་བསོད་ནམས་དང་ཡེ་ཤེས་ཡོངས་སུ་བཟུང་བའི་དགེ་བའི་རྩ་བ་རྣམས་ནི་ཉོན་མོངས་པ་དང་།

ལས་དང་ཚེའི་ཀུན་ནས་ཉོན་མོངས་པ་རྒྱུ་དང་འབྲས་བུར་བཅས་པའི་རྒྱུན་ལ་འཇུག་པ་རབ་ཏུ་མ་ཞི་བ་ལས་རྣམ་པར་གྲོལ་

བའོ།

དེ་ལྟ་བས་ན་དེ་དག་ནི་འཇིག་རྟེན་པའི་དགེ་བའི་རྩ་བ་ཐམས་ཅད་ལས་ཁྱད་པར་དུ་འཕགས་པར་རིག་པར་བྱའོ།

གང་དག་ཉན་ཐོས་དང་།

རང་སངས་རྒྱས་རྣམས་ཀྱི་མི་སློབ་པའི་ཚུལ་ཁྲིམས་དང་།

ཏིང་ངེ་འཛིན་དང་།

ཤེས་རབ་དང་།

རྣམ་པར་གྲོལ་བ་དང་།

རྣམ་པར་གྲོལ་བའི་ཡེ་ཤེས་མཐོང་བས་ཀུན་ཏུ་བཟུང་བའི་འཇིག་རྟེན་ལས་འདས་པའི་དགེ་བའི་རྩ་བ་དེ་དག་ཀྱང་ཉོན་མོངས་པ་དང་།

ལས་དང་།

ཚེའི་ཀུན་ནས་ཉོན་མོངས་པ་རྒྱུ་དང་འབྲས་བུར་བཅས་པའི་རྒྱུན་ལ་འཇུག་པ་རབ་ཏུ་མ་ཞི་བ་དང་འབྲེལ་བ་མ་ཡིན་མོད་ཀྱི།

འོན་ཀྱང་བདག་ལ་ཕན་པ་འབའ་ཞིག་གི་གནས་ཡིན་པས་དོན་ཆུང་བ་སྟེ།

ཕུང་པོ་མ་ལུས་པའི་མྱ་ངན་ལས་འདས་པའི་དབྱིངས་སུ་ཟད་པར་འགྱུར་རོ།

བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་དང་འབྲེལ་བ་བསོད་ནམས་དང་ཡེ་ཤེས་ཡོངས་སུ་བཟུང་བའི་དགེ་བའི་རྩ་བ་དེ་དག་ནི་སེམས་ཅན་ཐམས་ཅད་ཀྱི་ཕན་པ་དང་བདེ་བའི་གནས་ཡིན་པས་དོན་ཆེ་བ་སྟེ།

ཕུང་པོ་མ་ལུས་པའི་མྱ་ངན་ལས་འདས་པའི་དབྱིངས་སུ་ཟད་པར་འགྱུར་བ་མ་ཡིན་ནོ།

རིགས་ཀྱི་བུ་དེ་ལྟ་བས་ན་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་དང་འབྲེལ་བ་བསོད་ནམས་དང་ཡེ་ཤེས་ཡངས་པ་ཡོངས་སུ་བཟུང་བའི་དགེ་བའི་རྩ་བ་དག་ནི་འཇིག་རྟེན་པའི་དགེ་བའི་རྩ་བ་འབའ་ཞིག་ལས་ཁྱད་པར་དུ་འཕགས་པ་མ་ཡིན་གྱི།

འཇིག་རྟེན་ལས་འདས་པའི་དགེ་བའི་རྩ་བ་དག་ལས་ཀྱང་ཁྱད་པར་དུ་འཕགས་པ་ཡིན་ཏེ།

རིགས་ཀྱི་བུ་འདི་ནི་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཡོངས་སུ་གཟུང་བའི་མཚན་ཉིད་དོ།

བྱང་ཆུབ་སེམས་དཔའ་དད་པ་ཐབས་ཆེན་གྱིས་གསོལ་པ།

བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་དང་འབྲེལ་བ་བསོད་ནམས་དང་ཡེ་ཤེས་ཡོངས་སུ་བཟུང་བའི་དགེ་བའི་རྩ་བ་ནི་མཐུ་ཆེ་བ་བླ་ན་མ་མཆིས་པ་སྟེ་ངོ་མཚར་ཏོ།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་དེ་དེ་བཞིན་ཏེ།

ཇི་ཙམ་དུ་དགེ་བའི་རྩ་བ་དོན་

དུ་གཉེར་བའི་བྱང་ཆུབ་སེམས་དཔའ་དགེ་བའི་རྩ་བ་རྣམ་པ་འདི་ལྟ་བུ་དག་ཡོངས་སུ་གཟུང་བ་ལ་བརྩོན་པར་བྱའོ།

དགེ་བའི་རྩ་བ་དེ་དག་ནི་འཇིག་རྟེན་པ་དང་།

འཇིག་རྟེན་ལས་འདས་པའི་དགེ་བའི་རྩ་བ་ཐམས་ཅད་ཟིལ་གྱིས་མནན་ནས་འཇིག་རྟེན་པའི་ཕུན་སུམ་ཚོགས་པ་ཐམས་ཅད་རྗེས་སུ་སྦྱིན་པའོ།

འབྲས་བུ་རབ་ཏུ་སྦྱིན་པ་དང་།

དེའི་རྒྱུས་ཀྱང་དགོས་པ་ཡིན་ཏེ།

མཐར་ཡང་མི་ཟད་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་སྒྲུབ་བོ།

སེམས་ཅན་ཚད་མེད་པ་དག་ཀྱང་ཐེག་པ་གསུམ་གྱིས་སྡུག་བསྔལ་ཐམས་ཅད་སྤོང་ཞིང་ངེས་པར་འབྱུང་བར་བྱེད་པར་འགྱུར་རོ།

བྱང་ཆུབ་སེམས་དཔའ་དད་པ་ཐབས་ཆེན་གྱིས་གསོལ་པ།

བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པའི་གནས་ཀྱི་མཚན་ཉིད་གང་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ནི་སེམས་ཅན་ཐམས་ཅད་ཀྱི་གནས་སོ།

དེ་ཅིའི་ཕྱིར་ཞེ་ན།

འདི་ལྟར་ཐེག་པ་ཆེན་པོ་བསྟན་པ་སེམས་ཅན་ཐམས་ཅད་ལ་ཕན་པ་དང་།

བདེ་བའི་ཐབས་ཀྱིས་རབ་ཏུ་ཕྱེ་བ་དེ་ལ་དམིགས་ནས་བྱང་ཆུབ་སེམས་དཔའ་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་སྐྱེས་སོ།

དེ་ལྟ་བས་ན་བྱང་ཆུབ་སེམས་དཔའ་དེ་བསྟན་པ་དེ་ལ་དད་པས་གང་བསྟན་པ་ལ་དགའ་བ་གནས་པའི་རྒྱུ་དེས་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ནི་སེམས་ཅན་ཐམས་ཅད་ཀྱི་ཕན་པ་དང་བདེ་བའི་གནས་སུ་རིག་པར་བྱའོ།

རིགས་ཀྱི་བུ་ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཐེག་པ་ཆེན་པོ་ལ་དད་པ་ཐོབ་པ་སེམས་ཅན་ཐམས་ཅད་ལ་ཕན་པ་དང་བདེ་བ་འབྱུང་བ་དེ་ལྟར་ཕ་མ་དང་།

བུ་དང་།

མཛའ་བོ་དང་།

རྩ་ལག་དང་།

གཉེན་གྱི་ཚོགས་ནི་གཉེན་གྱི་ཚོགས་ལ་ཕན་པ་དང་བདེ་བ་འབྱུང་བ་མ་ཡིན་ནོ།

དེ་ཅིའི་ཕྱིར་ཞེ་ན།

ཕ་མ་ལ་སོགས་པ་གཉེན་འདབ་ཀྱི་ཚོགས་དེ་ནི་གཉེན་འདབ་ཀྱི་ཚོགས་ལ་ཕན་པ་མ་ཡིན་པ་ལ་ཕན་པར་འདུ་ཤེས་ཤིང་ཕན་པ་ལ་ནི་ཕན་པ་མ་ཡིན་པར་འདུ་ཤེས་པ་ཡིན།

བདེ་བ་མ་ཡིན་

པ་ལ་བདེ་བར་འདུ་ཤེས་ཤིང་བདེ་བ་ལ་ནི་བདེ་བ་མ་ཡིན་པར་འདུ་ཤེས་པ་ཡིན་ནོ།

ཕན་པ་དང་བདེ་བ་དེ་གཉི་ག་ལ་ཡང་ཕྱིན་ཅི་ལོག་ཏུ་གྱུར་པས་ཕན་པ་མ་ཡིན་པ་ལ་ཕན་པར་སྒྲུབ་ཅིང་ཕན་པ་ལ་ནི་ཕན་པ་མ་ཡིན་པར་བསྒྲུབ་པ་ཡིན།

བདེ་བ་མ་ཡིན་པ་ལ་བདེ་བར་སྒྲུབ་ཅིང་བདེ་བ་ལ་ནི་བདེ་བ་མ་ཡིན་པར་བསྒྲུབ་པ་ཡིན་ནོ།

བྱང་ཆུབ་སེམས་དཔའ་ནི་ཐེག་པ་ཆེན་པོ་ལ་དད་པ་ལ་བརྟེན་ནས་གཉེན་འདབ་ལྟ་བུའི་སེམས་ཅན་ཐམས་ཅད་ལ་དམ་པའི་ཆོས་སྟོན་པས་སེམས་ཅན་དེ་དག་ལ་ཕན་པ་ལའང་ཕན་པར་འདུ་ཤེས་ཤིང་ཕན་པ་མ་ཡིན་པ་ལའང་ཕན་པ་མ་ཡིན་པར་འདུ་ཤེས་པ་ཡིན།

བདེ་བ་ལའང་བདེ་བར་འདུ་ཤེས་ཤིང་སྡུག་བསྔལ་ལ་ཡང་སྡུག་བསྔལ་དུ་འདུ་ཤེས་པ་ཡིན་ནོ།

དེ་ལྟར་ཕན་པ་དང་བདེ་བ་ལ་ཕྱིན་ཅི་མ་ལོག་པའི་བློ་དང་ལྡན་པས་ཕན་པ་གང་ཡིན་པ་དེ་ནི་སྒྲུབ་བོ།

གང་ཕན་པ་མ་ཡིན་པ་དེ་ནི་མི་སྒྲུབ་བོ།

བདེ་བ་གང་ཡིན་པ་དེ་ནི་སྒྲུབ་བོ།

སྡུག་བསྔལ་གང་ཡིན་པ་དེ་ནི་མི་སྒྲུབ་བོ།

དེ་ལྟ་བས་ན་བྱང་ཆུབ་སེམས་དཔའི་ཐེག་པ་ཆེན་པོ་ལ་དད་པ་ནི་སེམས་ཅན་ཐམས་ཅད་ཀྱི་ཕན་པ་དང་བདེ་བའི་གནས་ཡིན་པས་འཇིག་རྟེན་པ་ཐམས་ཅད་ལས་ཁྱད་པར་དུ་འཕགས་པ་ཡིན་ནོ།

རིགས་ཀྱི་བུ་འཇིག་རྟེན་པ་རྣམས་ལས་ཁྱད་པར་དུ་འཕགས་པར་ཡང་མ་ཟད་དེ།

འཇིག་རྟེན་ལས་འདས་པ་རྣམས་ལས་ཀྱང་ཁྱད་པར་དུ་འཕགས་པ་ཡིན་ནོ།

དེ་ཅིའི་ཕྱིར་ཞེ་ན།

འདི་ལྟར་ཉན་ཐོས་དང་རང་སངས་རྒྱས་རྣམས་ནི་བྱང་ཆུབ་སེམས་དཔའི་རྗེས་སུ་འཇུག་ཅིང་སེམས་ཅན་རྣམས་ལ་ཕན་པ་དང་བདེ་བ་བྱེད་ཀྱི།

རང་གི་སྙིང་རྗེས་ནི་མ་ཡིན་ཏེ།

ཤིན་ཏུ་བྱེད་པ་ཡང་མ་ཡིན་ནོ།

བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་སེམས་ཅན་ཐམས་ཅད་ཀྱི་ཕན་པ་དང་བདེ་བའི་གནས་གང་ཡིན་པ་དེ་ནི་རང་གི་སྙིང་རྗེ་དང་ཤིན་ཏུ་བྱེད་པས་ཡིན་ཏེ།

བྱ་དཀའ་བ་ཚད་མེད་པ་ལ་ཇི་མི་སྙམ་པས་འཇུག་གོ།

དེ་ལྟ་བས་ན་བྱང་ཆུབ་སེམས་དཔའ་རྣམས་ཀྱི་ཕན་པ་དང་བདེ་བའི་གནས་ནི་འཇིག་རྟེན་ལས་འདས་པའི་ཕན་པ་དང་བདེ་བའི་གནས་དང་།

འཇིག་རྟེན་པ་རྣམས་ལས་ཀྱང་ཁྱད་པར་དུ་འཕགས་པ་ཡིན་ཏེ།

རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པའི་གནས་ཀྱི་མཚན་ཉིད་དུ་རིག་པར་བྱའོ།

གསོལ་པ།

བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པའི་ཡང་དག་པར་འདའ་བའི་མཚན་ཉིད་གང་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ནི་ངན་འགྲོའི་སེམས་ཅན་དམྱལ་བ་དང་།

དུད་འགྲོ་དང་།

ཡི་དགས་ཐམས་ཅད་ལས་ཡང་དག་པར་འདས་པ་ཡིན་ནོ།

བྱང་ཆུབ་སེམས་དཔའ་དད་པ་ཐབས་ཆེན་གྱིས་གསོལ་པ།

བཅོམ་ལྡན་འདས་ས་ལ་ཞུགས་པ་ལས་རིང་དུ་གནས་པ།

ལས་དང་པོ་པ་མོས་པས་སྤྱོད་པ་ལ་ཞུགས་པའི་བྱང་ཆུབ་སེམས་དཔའ་རྣམས་ཀྱི་ངན་འགྲོ་ཐམས་ཅད་ལས་ཡང་དག་པར་འདའ་བར་འགྱུར་བ་ཇི་ལྟ་བུ་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་བྱང་ཆུབ་སེམས་དཔའ་ས་ལ་ཞུགས་པ་རྣམས་ཉིད་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཐོབ་པས་ངན་འགྲོ་ལས་ཡང་དག་པར་འདའ་བར་འགྱུར་ཞིང་བདེ་འགྲོའི་རྐྱེན་གཅིག་ནས་གཅིག་ཏུ་བརྒྱུད་པ་ཐོབ་པ་མ་ཡིན་གྱི།

མ་ཐོབ་པའི་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཐོབ་པས་ཀྱང་ངན་འགྲོ་ལས་ཡང་དག་པར་འདའ་བར་རིག་པར་བྱའོ།

རིགས་ཀྱི་བུ་འདི་ལྟར་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཐོབ་པའི་བྱང་ཆུབ་སེམས་དཔའ་ནི་གཅིག་ནས་གཅིག་ཏུ་བརྒྱུད་པས་དུས་རིང་པོ་ན་ཚེ་རབས་ཐམས་ཅད་དུ་སངས་རྒྱས་དང་།

བྱང་ཆུབ་སེམས་དཔའ་རྣམས་དང་འགྲོགས་པ་འཐོབ་བོ།

དེ་བས་ན་དམ་པའི་ཆོས་མཉན་པ་དང་།

ཚུལ་བཞིན་ཡིད་ལ་བྱེད་པའི་རྗེས་སུ་འགྲོ་བའི་ཡང་དག་པའི་ནན་ཏན་ལ་ཞུགས་པའི་བྱང་ཆུབ་སེམས་དཔའ་ནི་གང་དུ་རྟག་པར་རྒྱུན་དུ་བྱང་ཆུབ་ཀྱི་ཚོགས་ཡོངས་སུ་རྫོགས་པར་འགྱུར་བ་དེར་སྐྱེ་བར་འགྱུར་ཏེ།

རིགས་ཀྱི་བུ་

རྣམ་གྲངས་འདིས་ན་བྱང་ཆུབ་སེམས་དཔའ་བདེ་འགྲོ་ཐམས་ཅད་ལས་ཀྱང་ཡང་དག་པར་འདའ་བར་འགྱུར་བ་ཡིན་ན་ངན་འགྲོ་ལས་ལྟ་སྨོས་ཀྱང་ཅི་དགོས།

གསོལ་པ།

བཅོམ་ལྡན་འདས་ཅི་ལགས།

བྱང་ཆུབ་སེམས་དཔའ་ངན་འགྲོ་ལས་ཡང་དག་པར་འདས་པ་ཉིད་ཅེས་བགྱིའི།

ཅི་བདེ་འགྲོ་ལས་ཡང་དག་པར་འདས་པ་ཞེས་མི་བགྱི།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་བྱང་ཆུབ་སེམས་དཔའ་ཐེག་པ་ཆེན་པོ་ལ་དད་པ་ཐོབ་པ་ཁ་ཅིག་ནི་བདེ་འགྲོ་ལས་ཀྱང་ཡང་དག་པར་འདས་པར་རིག་པར་བྱའོ།

འདི་ལྟར་ཐེག་པ་ཆེན་པོ་ལ་དད་པ་ཐོབ་པའི་བྱང་ཆུབ་སེམས་དཔའ་ནི་ལས་དང་།

ཉོན་མོངས་པ་དང་།

ལས་ཀྱི་རང་དབང་གིས་སྐྱེ་བ་གང་ཡིན་པ་དང་།

སེམས་ཅན་གྱི་དོན་ཆུང་ངུའི་དོན་གྱིས་སྐྱེ་བ་གང་ཡིན་པ་དེ་དག་ལས་ཀྱང་རིམ་གྱིས་ཡང་དག་པར་འདའོ།

དེ་ལྟ་མོད་ཀྱིས་འོན་ཀྱང་རིགས་ཀྱི་བུ་རྣམ་གྲངས་འདིས་ན་བྱང་ཆུབ་སེམས་དཔའི་བདེ་འགྲོ་ཡང་ངན་འགྲོ་ཡིན་ལ་ངན་འགྲོ་ཡང་བདེ་འགྲོ་ཡིན་པར་རིག་པར་བྱའོ།

དེ་ཅིའི་ཕྱིར་ཞེ་ན།

རིགས་ཀྱི་བུ་བྱང་ཆུབ་སེམས་དཔའི་གཞན་གྱི་དབང་གང་ཡིན་པ་དང་།

དོན་ཆུང་ངུའི་བདེ་འགྲོའི་གང་ཡིན་པ་དེ་ནི་ངན་འགྲོ་ཡིན་ནོ།

སྨོན་ལམ་གྱི་དབང་གིས་སྙིང་རྗེ་ཆེན་པོ་སྔོན་དུ་འགྲོ་བའི་སེམས་ཀྱིས་སེམས་ཅན་རྣམས་འདུལ་བའི་ཕྱིར་བྱང་ཆུབ་སེམས་དཔའ་སེམས་ཅན་དམྱལ་བ་དང་།

དུད་འགྲོ་དང་།

ཡི་དགས་རྣམས་སུ་སྐྱེ་བ་གང་ཡིན་པ་དེ་ནི་དེའི་བདེ་འགྲོར་རིག་པར་བྱའོ།

གསོལ་པ།

བཅོམ་ལྡན་འདས་ཅི་ལགས།

བྱང་ཆུབ་སེམས་དཔའ་སྨོན་ལམ་གྱི་དབང་གིས་སེམས་ཅན་དམྱལ་བ་དང་།

དུད་འགྲོ་དང་།

ཡི་དགས་རྣམས་སུ་སྐྱེ་བ་ཡང་དེ་བཞིན་དུ་སྡུག་བསྔལ་བའམ་རྨོངས་པ་ལགས་སམ།

བཀའ་སྩལ་པ།

རིགས་ཀྱི་བུ་དེ་ནི་མ་ཡིན་ཏེ་དེ་ལྟར་མི་བལྟའོ།

བྱང་ཆུབ་སེམས་དཔའ་སྨོན་ལམ་གྱི་དབང་གིས་ངན་འགྲོ་རྣམས་སུ་སྐྱེ་བ་ནི་བསམ་གཏན་བཞིའི་ས་པའི་བདེ་བ་ལས་ཤིན་ཏུ་འདས་ནས་བདེ་བ་དང་ལྡན་པར་གནས་ཏེ།

འཇིག་རྟེན་པ་ཐམས་ཅད་དང་།

འཇིག་རྟེན་ལས་

འདས་པ་དམན་པའི་ཤེས་རབ་ལས་ཀྱང་ཤིན་ཏུ་འདས་ནས་ཤེས་རབ་ཀྱི་རྒྱུ་བ་ལ་འཇུག་གོ།

དེ་བས་ན་དེ་དེ་ན་སེམས་ཅན་གྱི་དོན་ལ་བརྩོན་པར་རིག་པར་བྱའོ།

ངས་དེ་ལས་དགོངས་ཏེ་སེམས་ཅན་རྣམས་ཀྱི་ལས་ཀྱི་རྒྱུད་ཀྱང་བསམ་གྱིས་མི་ཁྱབ་ན་བྱང་ཆུབ་སེམས་དཔའ་རྣམས་ཀྱི་ལྟ་སྨོས་ཀྱང་ཅི་དགོས་ཞེས་གསུངས་སོ།

རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པའི་ཡང་དག་པར་འདའ་བའི་མཚན་ཉིད་དོ།

གསོལ་པ།

བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པའི་རྩ་བའི་མཚན་ཉིད་གང་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོ་ལ་དད་པ་དེ་ནི་སངས་རྒྱས་ཀྱི་ཆོས་ཚད་མེད་པ་ཐམས་ཅད་ཀྱི་ས་བོན་ཡིན་པའི་ཕྱིར་སངས་རྒྱས་ཀྱི་ཆོས་ཚད་མེད་པ་ཐམས་ཅད་ཀྱི་རྩ་བ་ཉིད་དུ་རིག་པར་བྱའོ།

དེ་ཅིའི་ཕྱིར་ཞེ་ན།

སངས་རྒྱས་ཀྱི་ཆོས་སྣ་ཚོགས་ཚད་མེད་པ་ཇི་སྙེད་ཐེག་པ་ཆེན་པོ་ལ་སྣང་བ་དང་།

རབ་ཏུ་ཕྱེ་བ་དེ་དག་ཐེག་པ་ཆེན་པོ་ལ་དད་པ་ཐོབ་པའི་བྱང་ཆུབ་སེམས་དཔའ་ཉན་ཏོ།

ཀུན་ཏུ་འཛིན་ཏོ།

དམིགས་པ་དེས་དད་པ་སྐྱེད་དོ།

དེ་ལ་བྱང་ཆུབ་སེམས་དཔའ་དེའི་དད་པ་སྐྱེ་བའི་དམིགས་པ་ཇི་སྙེད་པར་ས་བོན་ཡོངས་སུ་འཛིན་པ་དང་།

ས་བོན་ལ་སོགས་པ་ཡང་དེ་སྙེད་དུ་གནས་སོ།

དེ་བས་ན་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོ་ལ་དད་པ་དེ་ནི་སངས་རྒྱས་ཀྱི་ཆོས་ཚད་མེད་པ་ཐམས་ཅད་ཀྱི་རྩ་བ་ཞེས་བྱ་སྟེ།

རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པའི་རྩ་བའི་མཚན་ཉིད་དོ།

གསོལ་པ།

བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པའི་སྦེད་པའི་མཚན་ཉིད་གང་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་འདི་ལ་བྱང་ཆུབ་སེམས་དཔའ་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་སྐྱེས་ནས་འདི་ལྟ་སྟེ།

སེར་སྣའི་སེམས་ཡོངས་སུ་སྤོང་ཞིང་དང་དུ་མི་ལེན་པས་སྦེད་པ་དང་།

ངན་པའི་ངང་ཚུལ་གྱི་མཚན་མ་ཡོངས་སུ་སྤོང་ཞིང་དང་དུ་མི་ལེན་པས་སྦེད་པ་དང་།

ཁྲོ་བའི་མཚན་མ་ཡོངས་སུ་སྤོང་ཞིང་དང་དུ་མི་ལེན་པས་སྦེད་པ་དང་།

ལེ་ལོའི་མཚན་མ་ཡོངས་སུ་སྤོང་ཞིང་དང་དུ་མི་ལེན་པས་སྦེད་པ་དང་།

རྣམ་པར་གཡེང་བའི་མཚན་མ་ཡོངས་སུ་སྤོང་ཞིང་དང་དུ་མི་ལེན་པས་སྦེད་པ་དང་།

འཆལ་པའི་ཤེས་རབ་ཀྱི་མཚན་མ་ཡོངས་སུ་སྤོང་ཞིང་དང་དུ་མི་ལེན་པས་སྦེད་པའི་ཕྱིར་ཉོན་མོངས་པ་དང་།

ཉེ་བའི་ཉོན་མོངས་པ་དང་།

ཕྱིར་རྒོལ་བའི་ཀུན་ཏུ་རྒྱུ་བ་ཐམས་ཅད་ལས་སེམས་ཤིན་ཏུ་སྲུང་ཞིང་ཤིན་ཏུ་སྦེད་པར་བྱེད་དོ།

རིགས་ཀྱི་བུ་འདི་ལྟ་སྟེ།

དཔེར་ན་འདི་ལྟར་སྐྱེས་བུ་ཞིག་ལུས་མི་སྨས་པར་བྱ་བའི་ཕྱིར་གོ་ཆ་བཟང་པོ་བགོས་པ་ནི་གོ་ཆས་བསྲུངས་ཤིང་གོ་ཆས་སྦས་པའི་ཕྱིར་དགྲ་ཐམས་ཅད་ཀྱིས་མི་ཚུགས་སོ།

རིགས་ཀྱི་བུ་དེ་བཞིན་དུ་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པའི་བྱང་ཆུབ་ཀྱི་སེམས་ཀྱི་གོ་ཆ་བགོས་ཤིང་དེས་ལེགས་པར་བསྲུངས་ཤིང་ལེགས་པར་བཅས་པ་ནི་ཉོན་མོངས་པ་དང་།

ཉེ་བའི་ཉོན་མོངས་པ་དང་།

སྒྲིབ་པའི་དགྲ་ཐམས་ཅད་ཀྱིས་འཇིགས་པར་མི་འགྱུར་ཏེ།

རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པའི་སྦེད་པའི་མཚན་ཉིད་དོ།

གསོལ་པ།

བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པའི་རྗེས་སུ་འབྲེལ་བའི་མཚན་ཉིད་གང་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་འདི་ལ་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པའི་བག་ཆགས་བྱང་ཆུབ་སེམས་དཔའི་གནས་ལ་རྗེས་སུ་འབྲང་བ་དེ་ནི་འདི་ལྟར་རྗེས་སུ་འབྲང་སྟེ།

འདི་ལྟ་སྟེ།

འགྲོའམ་འདུག་གམ་ཉལ་ལམ་མ་ཉལ་ལམ་གཉིད་ཀྱིས་ལོག་གམ།

ར་རོའམ།

སྨྱོས་ཀྱང་རུང་སྟེ།

རྟག་ཏུ་ཐེག་པ་ཆེན་པོ་ལ་དད་པ་དེ་དང་ལྡན་པར་འགྱུར་རོ།

བྱང་ཆུབ་སེམས་དཔའ་ཚེ་རབས་གཞན་དུ་རྗེས་ཏེ།

ཐེག་པ་ཆེན་པོ་ལ་དད་པ་དེ་བརྗེད་དུ་ཟིན་ཀྱང་དམན་པ་སྐལ་བ་མི་མཉམ་པའི་སེམས་བསྐྱེད་

པའི་ཚུལ་ཅན་མ་ཡིན་པས།

བཤེས་གཉེན་ངན་པ་ཉན་ཐོས་དང་རང་སངས་རྒྱས་དང་འདྲེ་བས་ཀྱང་འཕྲོག་པར་མི་འགྱུར་ན།

གཞན་མུ་སྟེགས་ཅན་གྱི་ལྟ་འཕྲོགས་པར་ག་ལ་འགྱུར།

ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པའི་རྐྱེན་ཆུང་ངུ་ཞིག་རྙེད་པས་ཀྱང་མྱུར་བ་དང་།

ཤས་ཆེ་བ་དང་།

རྒྱུན་གྱིས་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་སྐྱེད་དོ།

དེའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པའི་བག་ཆགས་རྗེས་སུ་འབྲེལ་བ་དེ་ཡང་ཚེ་རབས་ཚེ་རབས་སུ་རྣམ་པར་འཕེལ་ཏེ།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་དུ་འགྱུར་རོ།

རིགས་ཀྱི་བུ་འདི་ནི་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པའི་རྗེས་སུ་འབྲེལ་བའི་མཚན་ཉིད་དོ།

གསོལ་པ།

བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པའི་རྒྱུན་གྱི་མཚན་ཉིད་གང་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་འདི་ལ་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཐོབ་པ་ནི་དད་པའི་ཤུགས་དེ་དག་གིས་རྩེ་ཞིང་དུས་དུས་སུ་ཐེག་པ་ཆེན་པོའི་ཆོས་ཀློག་གོ།

ཉན་ཏོ།

འདོན་ཏོ།

ཁ་ཏོན་བྱེད་དོ།

གཞན་དག་ལ་ཡང་རབ་ཏུ་སྟོན་ཏོ།

ཚུལ་བཞིན་སེམས་སོ།

བསྒོམ་པའི་རྣམ་པས་སྦྱོར་རོ།

རིགས་ཀྱི་བུ་ཐོས་པ་དང་།

སེམས་པ་དང་།

བསྒོམ་པ་དེ་དང་དེ་ལ་དེ་ལྟར་སྦྱོར་བའི་བྱང་ཆུབ་སེམས་དཔའ་ནི་འབྲས་བུ་ཡོད་པར་འཆི་བའི་དུས་བྱ་བའི་ཕྱིར་ཀུན་ཏུ་སྦྱོར་བའི་ཚུལ་གྱིས་ཐེག་པ་ཆེན་པོ་ལ་དད་པའི་རྒྱུན་རབ་ཏུ་འཇུག་གོ།

རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པའི་རྒྱུན་གྱི་མཚན་ཉིད་དོ།

གསོལ་པ།

བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཡོངས་སུ་གྲུབ་པའི་མཚན་ཉིད་གང་ལགས།

བཀའ་སྩལ་པ།

རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཡོངས་སུ་གྲུབ་པའི་རྣམ་པ་བཞིར་རིག་པར་བྱ་སྟེ།

སྐྱེ་བ་མཆོག་དང་།

ཚད་མེད་མཆོག་དང་།

ཕན་པ་མཆོག་དང་།

འགྱོད་པ་མེད་པ་མཆོག་གོ།

རིགས་ཀྱི་བུ་འདི་ལྟར་འདི་ལས་ཕྱི་རོལ་པ་འཇིག་རྟེན་པ་རྣམས་ཀྱི་རང་གི་གཙུག་ལག་ལ་དད་པ་གང་ཡིན་པ་དེ་ཡང་དད་པ་ཉིད་དུ་རིག་པར་བྱའོ།

ཉན་ཐོས་དང་རང་སངས་རྒྱས་རྣམས་སངས་རྒྱས་ཀྱི་བསྟན་པ་ལ་དད་པ་གང་ཡིན་པ་དེ་ནི་བདག་ལ་ཕན་པ་གཙོ་བོར་བྱས་པས་ཆུང་ཞིང་ཡོངས་སུ་མ་རྫོགས་པའི་ཕྱིར་བྱང་ཆུབ་སེམས་དཔའི་དད་པའི་མཚན་ཉིད་དང་བྲལ་བའོ།

འདི་ལྟར་ཉན་ཐོས་རྣམས་ནི་ཇི་ལྟར་བཅོམ་ལྡན་འདས་དེ་ནི་བདག་ལ་ཕན་པ་མཛད་ཅིང་གཅེས་སྤྲས་མཛད་པ་སྟེ།

བཅོམ་ལྡན་འདས་དེ་ནི་བདག་གི་སྡུག་བསྔལ་གྱི་ཆོས་མང་པོ་རྣམས་སེལ་བ།

བཅོམ་ལྡན་འདས་དེ་ནི་བདག་ལ་བདེ་བའི་ཆོས་མང་པོ་སྒྲུབ་པ།

བཅོམ་ལྡན་འདས་དེ་ནི་བདག་གི་སྡིག་པ་མི་དགེ་བའི་ཆོས་རྣམ་པ་དུ་མ་སེལ་བ།

བཅོམ་ལྡན་འདས་དེ་ནི་བདག་ལ་དགེ་བའི་ཆོས་རྣམ་པ་དུ་མ་སྒྲུབ་པའོ་ཞེས་བདག་ལ་ཕན་པ་མང་པོ་གཙོ་བོར་བྱེད་པས་སངས་རྒྱས་ལ་དད་པ་སྐྱེད་པ་དེ་ལྟར་བདག་ལ་ཕན་པ་གཙོ་བོར་བྱེད་པས་སངས་རྒྱས་ལ་དད་པ་སྐྱེད་དོ།

བྱང་ཆུབ་སེམས་དཔའ་ནི་དེ་ལྟར་དད་པ་སྐྱེད་པ་མ་ཡིན་ཏེ།

སེམས་ཅན་ཐམས་ཅད་ལ་ཕན་པ་དང་བདེ་བ་གཙོ་བོར་བྱས་ནས་བྱང་ཆུབ་སེམས་དཔའ་སངས་རྒྱས་ལ་དད་པ་སྐྱེད་དོ།

དེ་ལྟ་བས་ན་རིགས་ཉིད་ཀྱིས་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ནི་རྒྱ་ཆེ་བའོ།

རྒྱ་ཆེ་བའི་ཕྱིར་མཆོག་གོ།

མཆོག་གི་ཕྱིར་ཡོངས་སུ་གྲུབ་པའོ།

གཞན་ཡང་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཆུང་ངུས་ནི་དད་པ་འབྲིང་སྐྱེད་དོ།

དད་པ་འབྲིང་གིས་ནི་དད་པ་མཆོག་སྐྱེད་དེ།

དད་པ་མཆོག་གང་ཡིན་པ་དེ་ཡང་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཡོངས་སུ་གྲུབ་པའོ།

གཞན་ཡང་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོ་ལ་དད་པ་ནི་སེམས་ཅན་ཐམས་ཅད་ལ་ཕན་པར་གྱུར་པ་ཡིན་ཏེ།

དེ་ལྟ་བས་ན་ཡང་ཡོངས་སུ་གྲུབ་པའོ།

གཞན་ཡང་

བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ནི་སངས་རྒྱས་ཀྱི་ཆོས་ཚད་མེད་པ་ཟད་མི་ཤེས་པ་ཡང་དག་པར་འགྲུབ་པར་འགྱུར་ཏེ།

དེ་ལྟ་བས་ན་ཡང་ཡོངས་སུ་གྲུབ་པར་རིག་པར་བྱའོ།

རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཡོངས་སུ་གྲུབ་པའི་མཚན་ཉིད་དོ།

རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པའི་མཚན་ཉིད་རྣམ་པ་བཅུ་གཅིག་པོ་ཐམས་ཅད་བསྡུས་པའི་མཚན་ཉིད་དུ་རིག་པར་བྱའོ།

མཚན་ཉིད་རབ་ཏུ་དབྱེ་བའི་ལེའུ་ཞེས་བྱ་སྟེ་དང་པོའོ།།

དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་དད་པ་ཐབས་ཆེན་གྱིས་འདི་སྐད་ཅེས་གསོལ་ཏོ།

བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་སྐྱེ་བ་གང་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་སྐྱེ་བ་དེ་ཡང་རྣམ་པ་བཅུ་གཅིག་ཏུ་རིག་པར་བྱའོ།

འདི་ལྟ་སྟེ།

རྒྱུ་ལས་སྐྱེ་བ་དང་།

གྲོགས་ལས་སྐྱེ་བ་དང་།

ཡིད་ལ་བྱེད་པ་ལས་སྐྱེ་བ་དང་།

སྤྱོད་པ་ལས་སྐྱེ་བ་དང་།

འདྲིས་པ་ལས་སྐྱེ་བ་དང་།

ཡོངས་སུ་མི་སྐྱོ་བ་ལས་སྐྱེ་བ་དང་།

ཡོངས་སུ་བསྐང་བ་ལས་སྐྱེ་བ་དང་།

ཏིང་ངེ་འཛིན་ལས་སྐྱེ་བ་དང་།

ཆོག་མི་ཤེས་པ་ལས་སྐྱེ་བ་དང་།

རབ་ཏུ་དབེན་པ་ལས་སྐྱེ་བ་དང་།

སྟོན་པ་ཚད་མར་བྱས་པ་ལས་སྐྱེ་བའོ།

གསོལ་པ།

བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་རྒྱུ་ལས་སྐྱེ་བ་གང་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་འདི་ལ་བྱང་ཆུབ་སེམས་དཔའ་ཐོག་མའི་གནས་ཉིད་ནས་ཐེག་པ་ཆེན་པོའི་ཆོས་དཀར་པོའི་ས་བོན་དང་ལྡན་པ་ཡིན་ཏེ།

དེ་ཐོག་མ་ནས་ཆོས་དཀར་པོ་ལ་འདྲིས་པའི་སྟོབས་ཀྱིས་རང་བཞིན་ཉིད་ཀྱིས་སྙིང་རྗེ་དང་རབ་ཏུ་ལྡན་པའི་ཐེག་པ་ཆེན་པོའི་ཆོས་བསྟན་པ་ལ་འདོད་པ་ཡང་དག་པར་གནས་སོ།

དེ་འདོད་པ་སྔོན་དུ་འགྲོ་བས་དད་པ་སྐྱེའོ།

རང་བཞིན་གྱིས་ཟབ་ཅིང་རྒྱ་ཆེ་བ་དང་རབ་ཏུ་ལྡན་པའི་ཐེག་པ་ཆེན་པོའི་ཆོས་བསྟན་པ་ལ་མོས་པས་འདོད་པ་ཡང་དག་པར་གནས་ཏེ་དེ་ལས་དེའི་དད་པ་སྐྱེའོ།

དེ་ལྟར་བྱང་ཆུབ་སེམས་དཔའ་རང་བཞིན་ཉིད་ཀྱིས་དཀའ་བ་སྤྱོད་པ་དང་རབ་ཏུ་ལྡན་པའི་ཐེག་པ་ཆེན་པོའི་ཆོས་བསྟན་པ་ལ་བཟོད་པ་ཡང་དག་པར་གནས་ཏེ་དེས་དེའི་དད་པ་སྐྱེའོ།

རང་བཞིན་ཉིད་ཀྱིས་སྦྱིན་པ་དང་རབ་ཏུ་ལྡན་པའི་ཐེག་པ་ཆེན་པོའི་ཆོས་བསྟན་པ་ལ་མོས་པ་ཡང་དག་པར་གནས་ཏེ་དེས་དེའི་དད་པ་སྐྱེའོ།

རང་བཞིན་ཉིད་ཀྱིས་ཚུལ་ཁྲིམས་དང་རབ་ཏུ་ལྡན་པ་དང་།

བཟོད་པ་དང་རབ་ཏུ་ལྡན་པ་དང་།

བརྩོན་འགྲུས་དང་རབ་ཏུ་ལྡན་པ་དང་།

བསམ་གཏན་དང་རབ་ཏུ་ལྡན་པ་དང་།

ཤེས་རབ་དང་རབ་ཏུ་ལྡན་པའི་ཐེག་པ་ཆེན་པོའི་ཆོས་བསྟན་པ་ལ་མོས་པ་ཡང་དག་པར་གནས་ཏེ་དེས་དེའི་དད་པ་སྐྱེའོ།

རིགས་ཀྱི་བུ་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་རྒྱུ་ལས་བྱུང་བ་ནི་དེ་ལྟ་བུའི་ཚུལ་ཅན་དུ་རིག་པར་བྱའོ།

བྱང་ཆུབ་སེམས་དཔའ་དད་པ་ཐབས་ཆེན་གྱིས་གསོལ་པ།

བཅོམ་ལྡན་འདས་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་གྲོགས་ལས་སྐྱེ་བ་གང་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་འདི་ལ་བྱང་ཆུབ་སེམས་དཔའི་དགེ་བའི་བཤེས་གཉེན་ནི་བྱང་ཆུབ་སེམས་དཔའ་ཉིད་འདི་ལྟ་སྟེ།

ལུང་དང་ཐོས་པ་ཕུན་སུམ་ཚོགས་པ།

རབ་ཏུ་ཞི་བ་དང་།

ཚུལ་ཁྲིམས་དང་།

བསླབ་པ་དང་།

སྤྱོད་ལམ་དང་།

སྤྱོད་པ་ཕུན་སུམ་ཚོགས་པ།

ངག་རྣམ་པར་དག་པ་ཕུན་སུམ་ཚོགས་པ།

ཟང་ཟིང་མེད་པའི་སེམས་དང་།

ཡོངས་སུ་མི་སྐྱོ་བ་ཕུན་སུམ་ཚོགས་པ་རྙེད་ནས་མཐུ་ཀུན་ཏུ་བསྟན་པའམ།

ཐེག་པ་ཆེན་པོའི་ཆོས་མ་ནོར་བར་རིག་པས་ཡང་དག་པར་བསྟན་པའམ།

རྟག་པར་རྒྱུན་དུ་འགྲོ་ཞིང་སྙན་པར་བརྗོད་པས་ཐབས་ཀྱིས་སྟོབས་བསྐྱེད་པ་འདྲིས་པས་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་སྐྱེད་དེ།

རིགས་ཀྱི་བུ་འདི་ནི་བྱང་ཆུབ་སེམས་དཔའི་ཐེག་པ་ཆེན་

པོའི་ཕྱིར་ཐེག་པ་ཆེན་པོ་ལ་དད་པ་གྲོགས་ལས་སྐྱེ་བར་རིག་པར་བྱའོ།

གསོལ་པ།

བཅོམ་ལྡན་འདས་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཡིད་ལ་བགྱིད་པ་ལས་སྐྱེ་བ་གང་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་བྱང་ཆུབ་སེམས་དཔའ་སྒྲ་ཇི་བཞིན་དུ་ཚུལ་བཞིན་མ་ཡིན་པར་ཆོས་རབ་ཏུ་རྣམ་པར་འབྱེད་པ་ནི་ཐེག་པ་ཆེན་པོ་ལ་དད་པ་སྐྱེ་བའི་གནས་མ་ཡིན་ནོ།

སྒྲ་ཇི་བཞིན་དུ་མ་ཡིན་གྱི་དགོངས་པ་ལས་བྱུང་བའི་དོན་ཚུལ་བཞིན་ཡིད་ལ་བྱེད་པ་ནི་ཐེག་པ་ཆེན་པོ་ལ་དད་པ་སྐྱེ་བའི་གནས་ཡིན་ནོ།

རིགས་ཀྱི་བུ་འདི་ལྟར་བྱང་ཆུབ་སེམས་དཔའ་སྒྲ་ཇི་བཞིན་དུ་ཚུལ་བཞིན་མ་ཡིན་པར་ཆོས་རབ་ཏུ་རྣམ་པར་འབྱེད་པ་ལ་ཡང་དག་པ་མ་ཡིན་པའི་ལྟ་བ་ཉི་ཤུ་རྩ་བརྒྱད་འབྱུང་ངོ་།

འདི་ལྟ་སྟེ།

མཚན་མར་ལྟ་བ་དང་།

ལྟ་བ་ལ་ལྟ་བ་མ་ཡིན་པར་ལྟ་བ་དང་།

ཐ་སྙད་ལ་སྐུར་པ་འདེབས་པའི་ལྟ་བ་དང་།

ཀུན་ནས་ཉོན་མོངས་པ་ལ་སྐུར་པ་འདེབས་པའི་ལྟ་བ་དང་།

དེ་ཁོ་ན་ལ་སྐུར་པ་འདེབས་པའི་ལྟ་བ་དང་།

སྦྱོར་བ་སེལ་བའི་ལྟ་བ་དང་།

ཡོངས་སུ་འཛིན་པའི་ལྟ་བ་དང་།

སྒྱུར་བའི་ལྟ་བ་དང་།

ངེས་པར་འབྱུང་བ་མ་ཡིན་པའི་ལྟ་བ་དང་།

ཁ་ན་མ་ཐོ་བ་མེད་པར་ལྟ་བ་དང་།

འབྱུང་བར་ལྟ་བ་དང་།

སྒྲིབ་པ་སོགས་པའི་ལྟ་བ་དང་།

བརྙས་པའི་ལྟ་བ་དང་།

རབ་ཏུ་འཁྲུགས་པའི་ལྟ་བ་དང་།

བསོད་ནམས་མ་ཡིན་པ་འཕེལ་བའི་ལྟ་བ་དང་།

ལོག་པར་ལྟ་བ་དང་།

ངལ་བ་འབྲས་བུ་མེད་པའི་ལྟ་བ་དང་།

འཕེལ་བར་ལྟ་བ་དང་།

བསླུ་བའི་ལྟ་བ་དང་།

ཁས་མི་ལེན་པར་ལྟ་བ་དང་།

གཡོའི་ལྟ་བ་དང་།

ཆད་པས་བཅད་པའི་ལྟ་བ་དང་།

བཀུར་སྟི་བྱེད་པར་ལྟ་བ་དང་།

སྐུར་བའི་ལྟ་བ་དང་།

རྨོངས་པ་བརྟན་པའི་ལྟ་བ་དང་།

མི་སྨྲ་བའི་ལྟ་བ་དང་།

ལྟ་བ་ཆེན་པོ་དང་།

མངོན་པའི་ང་རྒྱལ་གྱི་ལྟ་བའོ།

རིགས་ཀྱི་བུ་མཚན་མར་ལྟ་བ་གང་ཞེ་ན།

གང་ངས་འདུས་པ་ལས་བྱུང་བའི་ངོ་བོ་ཉིད་ལས་དགོངས་ཏེ་ཆོས་རྣམས་མེད་དོ་ཞེས་བསྟན་པ་དེ་ལ་སྒྲ་ཇི་བཞིན་དུ་མངོན་པར་ཞེན་ནས་ཀུན་ནས་ཉོན་མོངས་པ་ལས་བྱུང་བའི་ཆོས་རྣམས་དང་།

རྣམ་པར་བྱང་བ་ལས་བྱུང་བའི་ཆོས་རྣམས་ལ་

ཡང་མེད་པ་ཉིད་དུ་མངོན་པར་ཞེན་ཅིང་མེད་པ་ཉིད་མཚན་མར་འཛིན་ཏེ།

དེ་མཚན་མར་བཟུང་བས་མེད་པར་ལྟ་བར་འགྱུར་ཏེ།

དེའི་ཕྱིར་མཚན་མར་ལྟ་བ་ཞེས་བྱའོ།

དེ་ལ་ལྟ་བ་ལ་ལྟ་བ་མ་ཡིན་པར་ལྟ་བ་ནི་མེད་པར་ལྟ་བ་དེ་ལ་བྱང་ཆུབ་སེམས་དཔའ་དེ་སྒྲ་ཇི་བཞིན་དུ་མངོན་པར་ཞེན་པས་ལྟ་བ་མ་ཡིན་པར་འདུ་ཤེས་པར་འགྱུར་རོ།

གང་མེད་པར་ལྟ་བ་དེ་ནི་དེའི་ལྟ་བ་ཆེན་པོ་སྟེ།

དེའི་ཕྱིར་ལྟ་བ་ལ་ལྟ་བ་མ་ཡིན་པར་ལྟ་བ་ཞེས་བྱའོ།

དེ་ལ་ཐ་སྙད་ལ་སྐུར་པ་འདེབས་པའི་ལྟ་བ་དང་།

ཀུན་ནས་ཉོན་མོངས་པ་ལ་སྐུར་པ་འདེབས་པའི་ལྟ་བ་དང་།

དེ་ཁོ་ན་ལ་སྐུར་པ་འདེབས་པའི་ལྟ་བ་ནི་མཚན་མར་ལྟ་བ་དེས་ཐམས་ཅད་ལ་སྐུར་པ་བཏབ་པས་ཐ་སྙད་ལ་སྐུར་པ་འདེབས་པའི་ལྟ་བ་ལ་ཡང་མངོན་པར་ཞེན།

ཀུན་ནས་ཉོན་མོངས་པ་ལ་སྐུར་པ་འདེབས་པའི་ལྟ་བ་ལ་ཡང་མངོན་པར་ཞེན།

དེ་ཁོ་ན་ལ་སྐུར་པ་འདེབས་པའི་ལྟ་བ་ལ་ཡང་མངོན་པར་ཞེན་ཏེ།

དེའི་ཕྱིར་ཐ་སྙད་ལ་སྐུར་པ་འདེབས་པའི་ལྟ་བ་ཞེས་ཀྱང་བྱ།

ཀུན་ནས་ཉོན་མོངས་པ་ལ་སྐུར་པ་འདེབས་པའི་ལྟ་བ་ཞེས་ཀྱང་བྱ།

དེ་ཁོ་ན་ལ་སྐུར་པ་འདེབས་པའི་ལྟ་བ་ཞེས་ཀྱང་བྱའོ།

དེ་ལ་སྦྱོར་བ་སེལ་བའི་ལྟ་བ་ནི་སྐུར་པ་འདེབས་པའི་ལྟ་བ་ཅན་དེ་ཉིད་གོང་དུ་རབ་ཏུ་རྣམ་པར་འབྱེད་པ་ལ་སྦྱོར་བ་སེལ་བར་བྱེད་པ་སྟེ།

དེས་ན་ཁྱད་པར་དུ་འགྲོ་བ་ལས་ཡོངས་སུ་འཛིན་པ་ཉམས་སོ།

དེ་ལ་ཡོངས་སུ་འཛིན་པའི་ལྟ་བ་ནི་ལྟ་བ་ལ་ལྟ་བ་མ་ཡིན་པར་ལྟ་བ་དང་།

སྐུར་བ་འདེབས་པའི་ལྟ་བ་དང་།

སྦྱོར་བ་སེལ་བའི་ལྟ་བ་ཅན་དེ་ཉིད་གཞན་དག་དང་།

ཆོས་ཀྱི་མཚན་ཉིད་རྣམ་པར་གདོན་མི་ཟ་བར་བྱེད་པ་ན་མེད་པའི་ཕྱོགས་ཉིད་ཡོངས་སུ་འཛིན་ཏེ།

དེའི་ཕྱིར་ཡོངས་སུ་འཛིན་པའི་ལྟ་བ་ཞེས་བྱའོ།

དེ་ལ་སྒྱུར་བའི་ལྟ་བ་ནི་གལ་ཏེ་ཐེག་པ་ཆེན་པོའི་མདོ་སྡེའི་དོན་རྗོད་ཅིང་ཆོས་འདི་དག་ཐམས་ཅད་ནི་མེད་པའི་དོན་དུ་མངོན་པར་སྨྲའོ་ཞེས་དོན་དེ་དག་མེད་པར་ལྟ་བ་དེ་ཉིད་ལ་སྒྱུར་བ་སྟེ།

དེའི་ཕྱིར་སྒྱུར་བའི་ལྟ་བ་ཞེས་བྱའོ།

དེ་ལ་ངེས་པར་འབྱུང་བ་མ་ཡིན་པའི་ལྟ་བ་ནི།

རིགས་ཀྱི་བུ་བདག་དང་གཞན་ཡོངས་སུ་འཛིན་པའི་ལྟ་བ་གང་ཡིན་པ་དང་།

སྒྱུར་བའི་ལྟ་བ་གང་ཡིན་

པ་ལ་རྟེན་པས་དེ་ཐེག་པ་དམན་པས་ཀྱང་བྱང་ཆུབ་ཏུ་ངེས་པར་མི་འབྱུང་ན།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལྟ་ཅི་སྨོས།

དེའི་ཕྱིར་ངེས་པར་འབྱུང་བ་མ་ཡིན་པའི་ལྟ་བ་ཞེས་བྱའོ།

དེ་ལ་ཁ་ན་མ་ཐོ་བ་མེད་པར་ལྟ་བ་ནི་དེ་མེད་པའི་མཚན་མ་ལ་ལྟ་བར་གྱུར་ནས་འདི་ལྟར་གང་ལྟ་བ་འདི་དང་ལྡན་ན་དེ་གང་ཅུང་ཟད་འཁྲུལ་པའི་ཉེས་བྱས་ལ་སྤྱོད་ཀྱང་བྱང་ཆུབ་སེམས་དཔའ་དེ་ཐམས་ཅད་དུ་ཁ་ན་མ་ཐོ་བ་མེད་པར་འགྱུར་རོ་སྙམ་དུ་ལྟ་བར་འགྱུར་ཏེ།

དེའི་ཕྱིར་ཁ་ན་མ་ཐོ་བ་མེད་པར་ལྟ་བ་ཞེས་བྱའོ།

དེ་ལ་འབྱུང་བར་ལྟ་བ་ནི་གང་མེད་པའི་མཚན་མར་ལྟ་བའི་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ།

མེད་པའི་མཚན་མར་ལྟ་བ་འདི་ནི་ཉེས་བྱས་ཀྱི་ཁ་ན་མ་ཐོ་བ་ཐམས་ཅད་ཀྱི་འབྱུང་བའོ་སྙམ་དུ་སེམས་ལ་དེ་ནི་འབྱུང་བ་མ་ཡིན་ཏེ།

དེའི་ཕྱིར་འབྱུང་བར་ལྟ་བ་ཞེས་བྱའོ།

དེ་ལ་སྒྲིབ་པ་སོགས་པའི་ལྟ་བ་ནི་ཁ་ན་མ་ཐོ་བ་མེད་པར་ལྟ་བ་དང་འབྱུང་བར་ལྟ་བ་ཉིད་དེ།

སྒྲིབ་པའི་རྒྱུ་ལ་དེའི་གཉེན་པོ་ཡིན་པའི་བློ་འབྱུང་བའི་ཕྱིར་རོ།

དེ་ལ་བརྙས་པའི་ལྟ་བ་ནི་གང་མེད་པའི་མཚན་མ་ལ་ལྟ་བའི་བྱང་ཆུབ་སེམས་དཔའ་དེ་ཉན་ཐོས་ཀྱི་ཐེག་པ་ལ་བརྙས་པའི་སེམས་སྐྱེད་དེ།

ཆོས་འདི་དག་ནི་ཆུང་བའི་ཕྱིར་བྱང་ཆུབ་སེམས་དཔས་ཆོས་དེ་དག་གོམས་པར་མི་བྱ།

བྱང་ཆུབ་སེམས་དཔས་ཆོས་དེ་དག་ལ་མཁས་པར་མི་བྱའི།

བྱང་ཆུབ་སེམས་དཔས་ཆོས་དེ་དག་རིང་དུ་ཡོངས་སུ་སྤང་བར་བྱའོ་སྙམ་སྟེ།

དེའི་ཕྱིར་བརྙས་པའི་ལྟ་བ་ཞེས་བྱའོ།

དེ་ལ་རབ་ཏུ་འཁྲུགས་པའི་ལྟ་བ་ནི་གང་མེད་པའི་མཚན་མ་ལ་ལྟ་བའི་བྱང་ཆུབ་སེམས་དཔའ་དེ་ཉན་ཐོས་ཀྱི་ཐེག་པའི་གང་ཟག་དེ་དག་ལ་ཁོང་ཁྲོ་བའི་སེམས་སྐྱེད་དེ།

འདི་དག་དང་ལྷན་ཅིག་གནས་པར་མི་བྱ།

སྨྲ་བ་དང་།

ཀུན་དུ་སྨྲ་བ་དང་།

ཀུན་བརྗོད་པ་དང་།

ཆོས་གོས་ལ་སོགས་པ་ཡོངས་སུ་སྤྱད་པ་ཀུན་སྤྱད་པར་མི་བྱའོ་སྙམ་སྟེ།

དེའི་ཕྱིར་རབ་ཏུ་འཁྲུགས་པའི་ལྟ་བ་ཞེས་བྱའོ།

དེ་ལ་བསོད་ནམས་མ་ཡིན་པ་འཕེལ་བའི་ལྟ་བ་ནི་བརྙས་པའི་ལྟ་བ་དང་།

རབ་ཏུ་འཁྲུགས་པའི་ལྟ་བ་ཅན་གྱི་བྱང་ཆུབ་སེམས་དཔའ་དེ་ཉིད་བསོད་ནམས་མ་ཡིན་པ་མང་དུ་སྐྱེད་དེ།

དེའི་ཕྱིར་བསོད་ནམས་མ་ཡིན་པ་འཕེལ་བའི་ལྟ་བ་ཞེས་བྱའོ།

དེ་ལ་ལོག་པར་ལྟ་བ་ནི་གང་མེད་པའི་མཚན་མ་ལ་ལྟ་བའི་བྱང་ཆུབ་སེམས་དཔའ་དེ་སྟོང་པ་ཉིད་ལ་སྟོང་པ་ཉིད་དུ་མི་རྟོག །

མཚན་མ་མེད་པ་ལ་མཚན་མ་མེད་པར་མི་རྟོག །

སྨོན་པ་མེད་པ་ལ་སྨོན་པ་མེད་པར་མི་རྟོག་སྟེ།

དེས་ན་དེ་སྒོམ་པའི་ཏིང་ངེ་འཛིན་རྣམ་པ་གསུམ་པོ་འདི་མི་སྒྲུབ་སྟེ།

དེའི་ཕྱིར་ལོག་པར་ལྟ་བ་ཞེས་བྱའོ།

དེ་ལ་ངལ་བ་འབྲས་བུ་མེད་པའི་ལྟ་བ་ནི་གང་ལོག་པར་ལྟ་བའི་བྱང་ཆུབ་སེམས་དཔའ་དེ་ཏིང་ངེ་འཛིན་བསྒོམ་པའི་ངལ་བ་འབྲས་བུ་མེད་པར་འགྱུར་ཏེ།

དེའི་ཕྱིར་ངལ་བ་འབྲས་བུ་མེད་པའི་ལྟ་བ་ཞེས་བྱའོ།

དེ་ལ་འཕེལ་བར་ལྟ་བ་ནི་གང་མེད་པའི་མཚན་མ་ལ་ལྟ་བའི་བྱང་ཆུབ་སེམས་དཔའ་དེ་འདི་ལྟར་བྱང་ཆུབ་སེམས་དཔའ་གང་སྐྱེ་བོའི་ཚོགས་ཆེན་པོ་ལྟ་བ་འདི་ལ་འཛུད་ཅིང་སྐྱེ་བོའི་ཚོགས་ཆེན་པོ་དད་པར་བྱེད་པ་དེ་བསོད་ནམས་མང་དུ་སྐྱེད་དོ་སྙམ་དུ་ལྟ་བར་འགྱུར་ཏེ།

དེའི་ཕྱིར་འཕེལ་བར་ལྟ་བ་ཞེས་བྱའོ།

དེ་ལ་སླུ་བའི་ལྟ་བ་ནི་གང་འཕེལ་བར་ལྟ་བའི་བྱང་ཆུབ་སེམས་དཔའ་དེ་བདག་དང་གཞན་ལ་བསོད་ནམས་ཀྱི་བསམ་པས་བསོད་ནམས་བསླུས་པར་འགྱུར་ཏེ།

དེའི་ཕྱིར་སླུ་བའི་ལྟ་བ་ཞེས་བྱའོ།

དེ་ལ་ཁས་མི་ལེན་པར་ལྟ་བ་ནི་གང་མེད་པའི་མཚན་མ་ལ་ལྟ་བའི་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ།

ཆོས་ཐམས་ཅད་མེད་པ་ཉིད་འདི་ལ་གཞན་དང་རྩོད་པར་གྱུར་ན།

བདག་གི་ཕྱོགས་གང་ཡང་ཁས་མི་བླང་སྟེ།

བདག་གིས་མི་གཟུགས་པ་འབའ་ཞིག་ཏུ་བྱའོ་སྙམ་མོ།

དེའི་ཕྱིར་ཁས་མི་ལེན་པར་ལྟ་བ་ཞེས་བྱའོ།

དེ་ལ་གཡོའི་ལྟ་བ་ནི་གང་མེད་པའི་མཚན་མ་ལ་ལྟ་བའི་བྱང་ཆུབ་སེམས་དཔའ་དེ་ཉིད་ཕྱོགས་ཁས་མི་ལེན་ཏེ།

སྒྲ་ཇི་བཞིན་དུ་མེད་པ་དེ་རྣམ་པར་འཇོག་པ་ན་མགབ་ཟུངས་དང་ལྟག་ཅོད་ཀྱི་སྦྱོར་བར་བྱེད་དེ།

མགབ་ཟུངས་དང་ལྟག་ཅོད་ཀྱི་སྦྱོར་བ་ནི་གཡོ་སྨྲ་བ་ཞེས་བྱ་སྟེ།

དེའི་ཕྱིར་གཡོའི་ལྟ་བ་ཞེས་བྱའོ།

དེ་ལ་ཆད་པས་བཅད་པའི་ལྟ་བ་ནི་བྱང་ཆུབ་སེམས་དཔའ་གང་ཁས་མི་ལེན་པར་ལྟ་བ་དང་།

གཡོའི་ལྟ་བ་སྨྲ་བ་དེ་ཉིད་སྨྲ་བ་སྙིང་པོ་མེད་པའི་ཕྱིར་མཁས་པ་རྣམས་ཀྱིས་

དུས་ཐམས་ཅད་དུ་ཆད་པས་བཅད་པར་འགྱུར་ཏེ།

དེའི་ཕྱིར་ཆད་པས་བཅད་པའི་ལྟ་བ་ཞེས་བྱའོ།

དེ་ལ་བཀུར་སྟི་བྱེད་པར་ལྟ་བ་ནི་གང་མེད་པའི་མཚན་མ་ལྟ་བའི་བྱང་ཆུབ་སེམས་དཔའ་དེ་ཉིད་འདི་ལྟར་གང་དེ་བཞིན་གཤེགས་པས་གསུངས་པའི་ལྟ་བ་དེ་ལྟ་བུ་འདི་དག་ལ་སྟེན་པ་དེ་ནི་སྟོན་པ་ལ་བསྟི་སྟང་བྱེད།

བླ་མར་བྱེད།

རི་མོར་བྱེད་པ་ཡིན་པར་ལྟ་བ་དེ་ནི་རིམ་གྲོ་བྱེད་པ་མ་ཡིན་ཏེ།

དེའི་ཕྱིར་བཀུར་སྟི་བྱེད་པར་ལྟ་བ་ཞེས་བྱའོ།

དེ་ལ་སྐུར་པའི་ལྟ་བ་ནི་གང་བཀུར་སྟི་བྱེད་པར་ལྟ་བའི་བྱང་ཆུབ་སེམས་དཔའ་དེ་ཉིད་དེ་བཞིན་གཤེགས་པ་ལ་སྐུར་པར་བྱེད་དེ།

བསྟི་སྟང་མི་བྱེད་པ་འབའ་ཞིག་ནི་མ་ཡིན་ནོ།

དེའི་ཕྱིར་སྐུར་པའི་ལྟ་བ་ཞེས་བྱའོ།

དེ་ལ་རྨོངས་པ་བརྟན་པའི་ལྟ་བ་ནི་གང་མེད་པའི་མཚན་མ་ལྟ་བའི་བྱང་ཆུབ་སེམས་དཔའ་དེ་སྒྲ་ཇི་བཞིན་དུ་མངོན་པར་མ་ཞེན་པ་ཕྱིན་ཅི་མ་ལོག་པར་ལྟ་བའི་བྱང་ཆུབ་སེམས་དཔའ་གཞན་དག་གིས་རིགས་པར་བསྟན་ཅིང་རྣམ་པ་དུ་མར་བཟློག་པ་བྱས་ཀྱང་ལྟ་བ་དེ་ལས་བསྐྱོད་པར་མི་ནུས་ཏེ།

དེའི་ཕྱིར་རྨོངས་པ་བརྟན་པའི་ལྟ་བ་ཞེས་བྱའོ།

དེ་ལ་མི་སྨྲ་བའི་ལྟ་བ་ནི་ཉོན་མོངས་པ་བརྟན་པའི་ལྟ་བ་ཅན་གྱི་བྱང་ཆུབ་སེམས་དཔའ་དེ་ཉིད་མི་སྨྲ་བའི་ལྟ་བ་ཞེས་བྱའོ།

དེ་ལ་ལྟ་བ་ཆེན་པོ་ནི་ལྟ་བ་ཉི་ཤུ་རྩ་དྲུག་པོ་དེ་དག་ཐམས་ཅད་ལ་ལྟ་བ་ཆེན་པོ་ཞེས་བྱའོ།

དེ་ཅིའི་ཕྱིར་ཞེ་ན།

ལྟ་བ་འདི་ཇི་ལྟ་བ་བཞིན་དུ་འཇིག་ཚོགས་ལ་ལྟ་བའི་རྩ་བ་ལས་བྱུང་བ་ལྟ་བར་གྱུར་པ་དྲུག་ཅུ་རྩ་གཉིས་ནི་དེ་ལྟར་ཁ་ན་མ་ཐོ་བ་ཆེ་བ་མ་ཡིན་ཏེ།

དེའི་ཕྱིར་ལྟ་བ་ཆེན་པོ་ཞེས་བྱའོ།

ཇི་ལྟར་བྱང་ཆུབ་སེམས་དཔའ་ཆོས་མ་ཡིན་པ་ལ་ཆོས་སུ་འདུ་ཤེས་ཤིང་དོན་མ་ཡིན་པ་ལ་དོན་དུ་འདུ་ཤེས་ནས་དེ་ལྟར་ལྟ་བ་མེད་པར་ལྟ་བ་ཡོངས་སུ་རྗོད་པས་དུས་ཚད་མེད་པར་ལས་ཀྱི་སྒྲིབ་པ་ཡོངས་སུ་འཛིན་པ་ཆོས་ཀྱིས་ཕོངས་པར་འགྱུར་བའི་ལས་ཀྱིས་འཇིག་རྟེན་ཀུན་ཏུ་སྦྱོར་བ་ལྟར་འཇིག་ཚོགས་ལ་ལྟ་བའི་རྩ་བ་ལས་བྱུང་བའི་ལྟ་བར་གྱུར་པ་རྣམས་ནི་དེ་ལྟར་ཆོས་ཀྱིས་ཕོངས་པར་འགྱུར་བའི་ལས་ཀྱིས་འཇིག་རྟེན་ཀུན་ཏུ་སྦྱོར་བ་མ་ཡིན་ནོ།

དེ་ལ་མངོན་པའི་ང་རྒྱལ་གྱི་ལྟ་བ་ནི་ལྟ་བ་ཆེན་

པོ་ཉིད་མངོན་པའི་ང་རྒྱལ་གྱི་ལྟ་བ་ཞེས་བྱའོ།

ཐེག་པ་ཆེན་པོའི་ཆོས་ཀྱི་དོན་ལ་སྒྲ་ཇི་བཞིན་དུ་མངོན་པར་རློམ་སེམས་སུ་བྱེད་པས་ལོག་པར་ལྟ་བ་འདི་འབྱུང་སྟེ།

དེའི་ཕྱིར་མངོན་པའི་ང་རྒྱལ་གྱི་ལྟ་བ་ཞེས་བྱའོ།

འདི་ལ་བྱང་ཆུབ་སེམས་དཔའ་ཐེག་པ་ཆེན་པོ་ལ་སྒྲ་ཇི་བཞིན་དུ་མ་ཡིན་པར་དགོངས་པ་ལས་བྱུང་བའི་དོན་ལ་ཚུལ་བཞིན་དུ་སོ་སོར་རྟོག་པ་ལ་ནི་འཕགས་པའི་ལྟ་བ་རྣམས་མེད་པར་ཡང་ལྟ་བ་འདི་དག་མི་འབྱུང་སྟེ།

ཐེག་པ་ཆེན་པོ་ལ་དད་ཅིང་ཡིད་ལ་མངོན་དུ་འགྱུར་རོ།

དེའི་ཚུལ་བཞིན་ཡིད་ལ་བྱེད་པའི་རྗེས་སུ་འགྲོ་བའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་སྐྱེ་བ་ནི་དོན་ཆེན་པོ་ཡིན་ནོ།

ཆོས་ལ་ཡང་ཆོས་སུ་འདུ་ཤེས་ཤིང་དོན་ལ་ཡང་དོན་དུ་འདུ་ཤེས་པ་ཡིན་ཏེ།

འདི་ནི་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཡིད་ལ་བྱེད་པ་ལས་སྐྱེ་བའོ།།

བམ་པོ་གཉིས་པ་སྟེ་ཐ་མ།

བྱང་ཆུབ་སེམས་དཔའ་དད་པ་ཐབས་ཆེན་གྱིས་གསོལ་པ།

བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་སྤྱོད་པ་ལས་སྐྱེ་བ་གང་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་འདི་ལ་བྱང་ཆུབ་སེམས་དཔས་ཇི་ལྟ་ཇི་ལྟ་བུར་ཐེག་པ་ཆེན་པོའི་ཆོས་བྲིས་ནས་འཆང་བ་དང་།

དྲན་པར་བྱེད་པ་དང་།

མཆོད་པ་དང་།

གཞན་ལ་བགེད་པར་བྱེད་པ་དང་།

ཀློག་པ་དང་།

ཉན་པ་དང་།

འདོན་པ་དང་།

ཁ་ཏོན་བྱེད་པ་དང་།

གཞན་དག་ལ་ཡང་རྒྱ་ཆེར་རབ་ཏུ་སྟོན་པ་དང་།

ཚུལ་བཞིན་སེམས་པ་དང་།

དེ་ཇི་ལྟ་ཇི་ལྟ་བུར་བསྒོམ་པའི་རྣམ་པའི་བར་དུ་སྦྱོར་ཞིང་དེ་ལྟ་དེ་ལྟར་སྦྱོར་བ་དེ་ཙམ་དུ་འདི་ལྟ་སྟེ།

སྔོན་མ་ཐོས་པ་དང་།

སྔོན་ཐོས་པ་བརྟན་པར་བྱ་བའི་ཕྱིར་གུས་པའི་དད་པ་སྒོ་མང་པོ་ནས་སྐྱེ་སྟེ།

རིགས་ཀྱི་བུ་འདི་ནི་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་སྤྱོད་པ་ལས་སྐྱེ་བའོ།

གསོལ་པ།

བཅོམ་ལྡན་འདས་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་འདྲིས་པ་ལས་སྐྱེ་བ་གང་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་འདི་ལ་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་འདི་ལྟར་མང་དུ་བྱེད་པ་ནི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཆུང་ངུ་ལ་བརྟེན་ནས་འབྲིང་ཐོབ་པར་འགྱུར།

ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་འབྲིང་བ་ལ་བརྟེན་ནས་ཆེན་པོ་ཐོབ་པར་འགྱུར་ཏེ།

དད་པ་དེས་དད་པའི་ཤས་ཆེན་པོ་ཐོབ་ནས་དད་པ་མང་དུ་གནས་པ་འདི་ནི་རིགས་ཀྱི་བུ་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་འདྲིས་པ་ལས་སྐྱེ་བའོ།

གསོལ་པ།

བཅོམ་ལྡན་འདས་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཡོངས་སུ་མི་སྐྱོ་བ་ལས་སྐྱེ་བ་གང་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་འདི་ལ་བྱང་ཆུབ་སེམས་དཔའ་དེ་ལྟར་དད་པ་ཤས་ཆེན་པོ་རྙེད་ནས་ཡོངས་སུ་སྐྱོ་བར་མི་འགྱུར་ཏེ།

རྒྱུན་མི་འཆད་པར་དགེ་བའི་ཕྱོགས་ལ་སྦྱོར་བའི་བར་དུ་ཡོངས་སུ་མི་སྐྱོ།

འཁོར་བའི་སྡུག་བསྔལ་གྱིས་ཡོངས་སུ་མི་སྐྱོ།

སེམས་ཅན་ལོག་པར་ཞུགས་པ་ཐམས་ཅད་ཀྱིས་ཡོངས་སུ་མི་སྐྱོ།

བྱང་ཆུབ་སེམས་དཔའི་དཀའ་བ་སྤྱོད་པས་ཡོངས་སུ་མི་སྐྱོའོ།

དེ་དེ་ལྟར་ཡོངས་སུ་མི་སྐྱོ་བས་སངས་རྒྱས་དང་བྱང་ཆུབ་སེམས་དཔའ་དང་དགེ་བའི་བཤེས་གཉེན་རྣམས་མཉེས་པར་བྱེད་དེ།

ཐེག་པ་ཆེན་པོ་ལ་དད་པའི་རྐྱེན་ཀྱང་རྙེད་དོ།

དེའི་ཕྱིར་ཐེག་པ་ཆེན་པོ་ལ་དད་པ་སྐྱེད་ཅིང་སྦྱོར་བ་རྒྱུན་མི་གཅོད་དེ་སྦྱོར་བ་མ་བཏང་བ་ཡིན་ནོ།

དེས་ན་དེ་རྒྱུན་མི་ཆད་པར་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་དེ་འཇུག་སྟེ།

རིགས་ཀྱི་བུ་འདི་ནི་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཡོངས་སུ་མི་སྐྱོ་བ་ལས་སྐྱེ་བའོ།

གསོལ་པ།

བཅོམ་ལྡན་འདས་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཡོངས་སུ་བསྐང་བ་ལས་སྐྱེ་བ་གང་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་འདི་ལྟར་ཡོངས་སུ་མི་སྐྱོ་བར་སྦྱོར་བའི་བྱང་ཆུབ་སེམས་དཔའ་རྒྱུན་དུ་ཐེག་པ་ཆེན་པོ་ལ་དད་པ་ཐོབ་པས་མྱུར་དུ་བསོད་ནམས་

ཀྱི་ཚོགས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པར་འགྱུར་རོ།

དེ་བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་ཤིང་དགེ་བའི་རྩ་བས་ལེགས་པར་བརྟན་པས་ཐེག་པ་ཆེན་པོ་ལ་དད་པའི་རྐྱེན་ཆུང་ངུས་ཀྱང་ཐེག་པ་ཆེན་པོ་ལ་དད་པ་རྒྱ་ཆེན་པོ་སྐྱེ་ན།

ཐེག་པ་ཆེན་པོ་ལ་དད་པའི་རྐྱེན་རྒྱ་ཆེན་པོས་ལྟ་ཅི་སྨོས་ཏེ།

དེ་ཉིན་མོའམ།

མཚན་མོའམ།

ཉལ་ལམ།

མི་ཉལ་ཡང་རུང་།

ཐེག་པ་ཆེན་པོ་ལ་དད་པའི་ཤུགས་ཀྱིས་དོན་མེད་པར་མི་འགྱུར་ཏེ།

རིགས་ཀྱི་བུ་འདི་ནི་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཡོངས་སུ་བསྐང་བ་ལས་སྐྱེ་བའོ།

གསོལ་པ།

བཅོམ་ལྡན་འདས་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་གནས་ལས་སྐྱེ་བ་གང་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་འདི་ལ་བྱང་ཆུབ་སེམས་དཔའ་འདི་ལྟར་བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པ་ནི་མྱུར་བ་མྱུར་བར་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དམིགས་ནས་དད་པ་དང་།

མཆོག་ཏུ་དགའ་བ་ལས་བྱུང་བའི་སེམས་ཀྱི་ཏིང་ངེ་འཛིན་འཐོབ་སྟེ།

མཉམ་པར་བཞག་པའི་སེམས་དེས་ཐེག་པ་ཆེན་པོའི་ཆོས་ཡང་དག་པ་ཇི་ལྟ་བ་བཞིན་དུ་སྟོན་ཏོ།

དེའི་ཕྱིར་དེ་མ་ལོག་པའི་རྣམ་པས་དང་བ་སྐྱེ་ཞིང་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཆེས་ཁྱད་པར་དུ་འཕགས་པ་སྐྱེའོ།

བྱང་ཆུབ་སེམས་དཔའ་དེའི་སེམས་ཀྱི་ཏིང་ངེ་འཛིན་སྔ་མ་དང་ལྷག་མཐོང་འདི་ནི་ཞི་གནས་དང་།

ལྷག་མཐོང་གིས་ཡོངས་སུ་ཟིན་པའི་རྣལ་འབྱོར་གྱི་ལམ་དུ་འགྱུར་རོ།

བྱང་ཆུབ་སེམས་དཔའ་རྣལ་འབྱོར་གྱི་ལམ་འདི་ལ་བརྟེན་ནས་རིམ་གྱིས་སངས་རྒྱས་ཀྱི་ཆོས་རྣམས་ཡང་དག་པར་སྒྲུབ་པར་འགྱུར་ཏེ།

རིགས་ཀྱི་བུ་འདི་ནི་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་གནས་ལས་སྐྱེ་བའོ།

བྱང་ཆུབ་སེམས་དཔའ་དང་བ་ཐབས་ཆེན་གྱིས་གསོལ་པ།

བཅོམ་ལྡན་འདས་ཅི་ལགས།

ཞི་གནས་དང་ལྷག་མཐོང་གི་ལམ་འདི་བྱང་ཆུབ་སེམས་དཔའ་ཚོགས་བསགས་པ་རྣམས་ཀྱི་ལགས་

སམ།

འོན་ཏེ་ཚོགས་མ་བསགས་པ་རྣམས་ཀྱི་ཡང་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་ཞི་གནས་དང་ལྷག་མཐོང་གི་ལམ་ནི་བྱང་ཆུབ་སེམས་དཔའ་ཚོགས་མ་བསགས་པ་རྣམས་ཀྱི་ཡང་ཡིན་པར་ངས་བཤད་དོ།

རིགས་ཀྱི་བུ་འདི་ལྟར་སེམས་མཉམ་པར་བཞག་པ་ནི་མངོན་པར་རྟོགས་པ་དང་འཐུན་པ་བྱང་ཆུབ་སེམས་དཔའི་སྐྱོན་མེད་པ་ལ་འཇུག་པའི་ཕྱོགས་ཀྱི་ས་ལ་འཇུག་པ་ལ་ཉེ་བར་འགྱུར་ཏེ།

རིགས་ཀྱི་བུ་འདི་ནི་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་གནས་ལས་སྐྱེ་བ་སྟེ།

གནས་ནི་ཏིང་ངེ་འཛིན་ཅེས་བྱའོ།

བྱང་ཆུབ་སེམས་དཔའ་དད་པ་ཐབས་ཆེན་གྱིས་གསོལ་པ།

བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཆོག་མི་ཤེས་པ་ལས་སྐྱེ་བ་གང་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་ཏིང་ངེ་འཛིན་ཐོབ་པའི་བྱང་ཆུབ་སེམས་དཔའ་ཞི་གནས་ཙམ་དང་།

ཏིང་ངེ་འཛིན་གྱི་རོ་དེ་ཙམ་གྱིས་ཆོག་པར་མི་འཛིན་གྱི།

ཏིང་ངེ་འཛིན་དེ་ཉིད་ལ་གནས་ནས་དེ་ཐེག་པ་ཆེན་པོའི་ཆོས་དེ་དག་ལ་བགྲང་ཞིང་འཇལ་ལ་དཔྱོད་ཅིང་སོ་སོར་རྟོག་སྟེ།

དེ་ལ་བགྲང་ཞིང་འཇལ་ལ་དཔྱོད་ཅིང་སོ་སོར་རྟོག་པའི་རྣམ་པའི་ལྷག་མཐོང་རབ་ཏུ་སྐྱེའོ།

དེས་ན་དེ་ལྷག་མཐོང་དང་ལྷན་ཅིག་སོང་བའི་རྒྱུན་ཆུ་བོ་ལྟར་འབབ་ཅིང་རླབས་འབྱུང་བ།

མངོན་པར་རྟོགས་པ་དང་ཆེས་འཐུན་པ།

བྱང་ཆུབ་སེམས་དཔའི་སྐྱོན་མེད་པ་ལ་འཇུག་པའི་ཕྱོགས་ཀྱི་མཆོག་གི་ས་ལ་འཇུག་པ།

རབ་ཏུ་འདོད་དོ།

ཤེས་རབ་ལ་ཉེ་བར་མི་གནས་ན་རིགས་ཀྱི་བུ་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཇི་ལྟར་ཡང་མི་སྐྱེའོ་ཞེས་ང་སྨྲའོ།

རིགས་ཀྱི་བུ་བྱང་ཆུབ་སེམས་དཔའ་ཚོགས་མ་བསགས་ཀྱང་ཐེག་པ་ཆེན་པོའི་ཆོས་ཉན་ཏམ།

སེམས་ཀྱང་རུང་སྟེ།

ཞི་གནས་དང་ལྷག་མཐོང་ལ་གནས་ན་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་སྐྱེའོ།

སེམས་རྩེ་གཅིག་ཏུ་མི་བྱེད་ཅིང་ཐེག་པ་ཆེན་པོའི་ཆོས་མི་འཛིན་ན་ཐེག་པ་ཆེན་པོ་ལ་དད་པ་མི་སྐྱེའི།

རིགས་ཀྱི་བུ་

བྱང་ཆུབ་སེམས་དཔའ་གང་ལ་ལ་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་སྐྱེ་བ་དེ་ཐམས་ཅད་ནི་མི་གཡེང་བའི་སེམས་ཀྱིས་ཆོས་ཀྱི་དོན་ལ་རྟོག་པ་ལས་སྐྱེ་བར་རྣམ་གྲངས་འདིས་དེ་ལྟར་རིག་པར་བྱའོ།

གསོལ་པ།

བཅོམ་ལྡན་འདས་ཚོགས་བསགས་པའི་ས་པའི་རྣལ་འབྱོར་གྱི་ལམ་དང་།

ཚོགས་མ་བསགས་པའི་ས་པའི་རྣལ་འབྱོར་གྱི་ལམ་ཁྱད་པར་ཅི་མཆིས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་ཚོགས་མ་བསགས་པའི་ས་པའི་རྣལ་འབྱོར་གྱི་ལམ་ནི་ས་དང་མི་ཉེ་བ་སྟེ།

ཇི་ལྟར་ཚོགས་བསགས་པའི་ས་པ་ལྟར་དེ་དེ་ལྟར་རྫོགས་པ་མ་ཡིན་ནོ།

རིགས་ཀྱི་བུ་བྱང་ཆུབ་སེམས་དཔའ་ཚོགས་བསགས་པའི་ས་པའི་རྣལ་འབྱོར་གྱི་ལམ་གང་ཡིན་པ་ནི་ས་ལ་འཇུག་པ་དང་ཉེ་ཞིང་རྫོགས་པ་ཡིན་ཏེ།

རིགས་ཀྱི་བུ་འདི་ནི་བྱང་ཆུབ་སེམས་དཔའི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཆོག་མི་ཤེས་པ་ལས་སྐྱེ་བའོ།

གསོལ་པ།

བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་རབ་ཏུ་དབེན་པ་ལས་སྐྱེ་བ་གང་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་རྫོགས་པའི་རྣལ་འབྱོར་གྱི་ལམ་ཐོབ་པའི་བྱང་ཆུབ་སེམས་དཔའ་ནི་ཁྱིམ་ན་གནས་པ་དང་རབ་ཏུ་བྱུང་བ་རྣམས་དང་འདྲེ་ཞིང་མི་གནས་ཀྱི།

བས་མཐར་གནས་འཆའ་ཞིང་གནས་ཏེ།

དེ་དག་ན་གཅིག་པུ་རྒྱང་བསྲིངས་ཏེ་བག་ཡོད་པ་དང་།

རྟུན་པ་དང་།

རྒྱུན་དུ་གནས་སོ།

དེ་ལྟར་རབ་ཏུ་དབེན་པར་གནས་པ་དེ་རྣལ་འབྱོར་གྱི་ལམ་དེ་ཉིད་ལ་གནས་ནས་ཐེག་པ་ཆེན་པོའི་ཆོས་རྣམས་ཡིད་ལ་བྱེད་པས་བར་ཆད་མེད་པར་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་རབ་ཏུ་སྐྱེད་དོ།

ཇི་ཙམ་དུ་ཉིན་མོ་དང་།

མཚན་མོ་དེ་དང་།

དེ་དག་འདས་པ་དང་།

སྐད་ཅིག་ཐང་ཅིག་ཡུད་ཙམ་དེ་དང་དེ་དག་འདས་ཤིང་བྱང་ཆུབ་ཀྱི་ཕྱོགས་ཀྱི་ཆོས་ཁྱད་པར་དུ་འགྲོའོ།

དེ་དེ་ལྟར་རབ་ཏུ་དབེན་པའི་རྣལ་འབྱོར་གྱི་ལམ་ལ་གནས་ནས་རིམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་

བར་དུ་འགྱུར་ཏེ།

དེ་གང་དུ་ཐབས་ཀྱི་ཁྱད་པར་གཞན་བཙལ་བར་བྱ་བ་མེད་དོ།

རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་རབ་ཏུ་དབེན་པ་ལས་སྐྱེ་བའོ།

བྱང་ཆུབ་སེམས་དཔའ་དད་པ་ཐབས་ཆེན་གྱིས་གསོལ་པ།

བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་སྟོན་པ་ཚད་མར་བགྱིས་པ་ལས་སྐྱེ་བ་གང་ལགས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་དེ་ལྟར་རབ་ཏུ་དབེན་པའི་རྣལ་འབྱོར་གྱི་ལམ་ལ་གནས་པའི་བྱང་ཆུབ་སེམས་དཔའ་དེ་ཐེག་པ་ཆེན་པོའི་ཆོས་རྣམས་ཡིད་ལ་བྱེད་པས་གང་ཐེག་པ་ཆེན་པོའི་ཆོས་ཟབ་ཅིང་གསང་བ་བློས་མི་ཆུད་པ་དེ་ལ་སྟོན་པ་ཉིད་ཚད་མར་བྱེད་དོ།

སྟོན་པ་ཉིད་ཚད་མར་བྱས་ནས་ཆོས་དེ་དག་ལ་མོས་སོ།

དེ་ལྟར་ཚུལ་བཞིན་དུ་རབ་ཏུ་རྣམ་པར་འབྱེད་པས་བདག་གང་གི་ཚེ་སྟོན་པ་ལ་མོས་པར་མ་གྱུར་པ་དེའི་ཚེ་བདག་སྟོན་པས་བཤད་པའི་ཆོས་རྣམས་ལ་མོས་པར་མི་འགྱུར་ཏེ།

སྟོན་པའི་ཆེ་བ་ཉིད་ལ་མོས་པ་ཤིན་ཏུ་མ་རུང་བར་མ་བྱས་པར་རིག་ནས་སྟོན་པ་ལ་མོས་པ་འཇུག་པ་ཐེག་པ་ཆེན་པོའི་ཆོས་གསང་བ་དག་ལ་མོས་པ་འཇུག་གོ།

བྱང་ཆུབ་སེམས་དཔའ་ཇི་ལྟ་ཇི་ལྟར་ཁོང་དུ་ཆུད་ཅིང་རྟོགས་ནས་ཐེག་པ་ཆེན་པོའི་ཆོས་ཟབ་ཅིང་གསང་བ་དེ་དག་ལ་དད་པ་ཐོབ་པ་དེ་ལྟར་ཁོང་དུ་མ་ཆུད་ཅིང་མ་རྟོགས་ཀྱང་བྱང་ཆུབ་སེམས་དཔའ་མོས་པའི་སྟོབས་བསྐྱེད་པས་ཆོས་དེ་དག་ལ་དད་པ་ཐོབ་སྟེ།

རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་སྟོན་པ་ཚད་མར་བྱས་པ་ལས་སྐྱེ་བའོ།

བྱང་ཆུབ་སེམས་དཔའ་དད་པ་ཐབས་ཆེན་གྱིས་གསོལ་པ།

དེ་ལྟར་སྐྱེ་བ་སྣ་ཚོགས་འདི་དག་གིས་ཐེག་པ་ཆེན་པོ་ལ་དད་པ་ཐོབ་པའི་བྱང་ཆུབ་སེམས་དཔས་ཐེག་པ་ཆེན་པོའི་ཆོས་གང་ཡིད་ལ་བགྱིས་ཏེ།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་བསྒྲུབ་པར་བགྱི།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་ཐེག་པ་ཆེན་པོ་ལ་དད་པ་ཐོབ་པའི་བྱང་ཆུབ་སེམས་དཔས་དཔག་ཏུ་མེད་པ་བཅུ་ཡིད་ལ་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བསྒྲུབ་པར་བྱའོ།

བཅུ་གང་ཞེ་ན།

ཆོས་དཔག་ཏུ་མེད་པ་དང་།

ཟབ་པ་དཔག་ཏུ་མེད་པ་དང་།

བརྗོད་པ་དཔག་ཏུ་མེད་པ་དང་།

ཚིག་རབ་ཏུ་དབྱེ་བ་དཔག་ཏུ་མེད་པ་དང་།

སེམས་ཅན་དཔག་ཏུ་མེད་པ་དང་།

རྗེས་སུ་གཟུང་བ་དཔག་ཏུ་མེད་པ་དང་།

ཐབས་ལ་མཁས་པ་དཔག་ཏུ་མེད་པ་དང་།

དཀོན་མཆོག་གི་ཆེ་བ་ཉིད་དཔག་ཏུ་མེད་པ་དང་།

ཞིང་དཔག་ཏུ་མེད་པ་དང་།

ལས་དཔག་ཏུ་མེད་པའོ།

རིགས་ཀྱི་བུ་དེ་ལ་ཆོས་དཔག་ཏུ་མེད་པ་ནི་གང་མདོ་དང་།

དབྱངས་ཀྱི་བསྙད་པ་དང་།

ལུང་བསྟན་པ་ལ་སོགས་པ་བསྟན་པའི་ཆོས་རྣམས་ཀྱི་སྡེ་སྣོད་དུ་གཏོགས་པ་དང་།

དེའི་ཡན་ལག་ཏུ་གཏོགས་པ་རྣམས་ཀྱི་ཆོས་དཔག་ཏུ་མེད་པའོ།

དེ་ལ་ཟབ་པ་དཔག་ཏུ་མེད་པ་ནི་གང་ཐེག་པ་ཆེན་པོ་ལ་གང་ཟག་ལ་བདག་མེད་པ་དང་།

ཆོས་ལ་བདག་མེད་པ་དང་།

སྟོང་པ་ཉིད་དང་།

དེ་བཞིན་ཉིད་དང་།

ཡང་དག་པའི་མཐའ་དང་།

མཚན་མ་མེད་པ་དང་།

དོན་དམ་པ་དང་།

ཆོས་ཀྱི་དབྱིངས་ཀྱི་རྣམ་གྲངས་རྣམས་ཀྱིས་བསྟན་པ་ཚད་མེད་པ་དང་།

དགོངས་པ་ལས་བྱུང་བ་དང་།

ཟབ་པ་བསྟན་པ་དཔག་ཏུ་མེད་པའོ།

དེ་ལ་བརྗོད་པ་དཔག་ཏུ་མེད་པ་ནི་རིགས་ཀྱི་བུ་བརྗོད་པ་གང་དང་གང་གིས་སེམས་ཅན་དང་ཆོས་དང་།

དོན་རྟོགས་པར་འགྱུར་བ་ཐ་ན་དུད་འགྲོའི་སྐྱེ་གནས་སུ་སོང་བའི་སེམས་ཅན་རྣམས་ལ་ཡང་ཇི་ཙམ་དུ་ཚིག་བརྗོད་པ་དེ་དང་།

དེས་དོན་ཁོང་དུ་ཆུད་པར་བྱ་བའི་ཕྱིར་དེ་བཞིན་གཤེགས་པ་རྣམས་ཀྱི་གསུང་བརྗོད་པ་རྣམས་དཔག་ཏུ་མེད་པར་འབྱུང་བའོ།

རིགས་ཀྱི་བུ་དེ་ལ་ཚིག་རབ་ཏུ་དབྱེ་བ་དཔག་ཏུ་མེད་པ་ནི་རིགས་ཀྱི་བུ་སེམས་ཅན་རྣམས་ལ་འདུལ་བའི་དབང་གི་ཕྱིར་དེ་བཞིན་གཤེགས་པས་ཚིག་རབ་ཏུ་དབྱེ་བའི་སྒོ་མང་པོ་ཉེ་བར་སྟོན་ཅིང་།

དོན་རེ་རེ་ལ་ཡང་ཚིག་རབ་ཏུ་དབྱེ་བ་ཚད་མེད་པ་དག་གིས་རྣམ་གྲངས་སུ་ཕྱེ་སྟེ་རབ་ཏུ་སྟོན་པའོ།

དེ་ལ་སེམས་ཅན་དཔག་ཏུ་མེད་པ་ནི་གང་སྐྱེ་བའི་འཁོར་བ་ཐོག་མ་དང་།

ཐ་མ་མེད་པ་དང་།

ཀུན་ཏུ་རྒྱུག་པ་དང་།

འཁོར་བའི་སྡུག་བསྔལ་གྱི་སྔོན་གྱི་མཐའ་མི་མངོན་པས་སེམས་ཅན་དཔག་ཏུ་མེད་དོ།

དེ་ལ་རྗེས་སུ་གཟུང་བ་དཔག་ཏུ་མེད་པ་ནི་རིགས་ཀྱི་བུ་དེ་བཞིན་གཤེགས་པ་འདི་ལྟ་སྟེ།

གནོད་པ་ལས་ཡོངས་སུ་བསྐྱབ་པའི་རྗེས་སུ་གཟུང་བ་དང་།

ངན་སོང་ལས་ཡོངས་སུ་བསྐྱབ་པའི་རྗེས་སུ་གཟུང་བ་དང་།

འཇིག་ཚོགས་ལས་ཡོངས་སུ་བསྐྱབ་པའི་རྗེས་སུ་གཟུང་བ་དང་།

ཐེག་པས་ཡོངས་སུ་བསྐྱབ་པའི་རྗེས་སུ་གཟུང་བ་དང་།

རྗེས་སུ་གཟུང་བ་ཚད་མེད་པས་སེམས་ཅན་ཚད་མེད་པ་དག་ལ་དུས་ཐམས་ཅད་དུ་ཉེ་བར་གནས་པའོ།

དེ་ལ་ཐབས་ལ་མཁས་པ་དཔག་ཏུ་མེད་པ་ནི་ཐབས་ལ་མཁས་པ་གང་དང་གང་གིས་སེམས་ཅན་ཚད་མེད་པ་དག་འདུལ་བར་འགྱུར་བ་སྟེ།

ཡང་ན་རིགས་པ་ཡང་དག་པར་བསྟན་པས་སམ།

ཡང་ན་བག་མེད་པ་ཡང་དག་པར་བསྐུལ་བས་སམ།

ཡང་ན་ཞུམ་པ་གཟེངས་བསྟོད་པས་སམ།

ཡང་ན་ཡང་དག་པར་བསྒྲུབ་པ་ཡང་དག་པར་དགའ་བར་བྱ་བས་སམ།

ཡང་ན་ཚིག་དྲག་པོའི་སྦྱོར་བས་སམ།

ཡང་ན་ཚིག་འཇམ་པོའི་སྦྱོར་བས་སམ།

ཡང་ན་བཟོའི་གནས་དང་།

ལས་ཀྱི་གནས་ཀྱིས་ཆོས་དང་འཐུན་པ་ཉིད་ཀུན་ཏུ་བསྟན་པས་སམ།

ཡང་ན་རྣམ་པར་དག་པར་སྐྱེ་བའི་ལུས་ཀུན་ཏུ་བསྟན་པས་སམ།

ཡང་ན་རྫུ་འཕྲུལ་རྣམ་པར་འཕྲུལ་པའི་ཆོ་འཕྲུལ་ཀུན་ཏུ་བསྟན་པས་སམ།

ཡང་ན་ཀུན་བསྟན་པའི་ཆོ་འཕྲུལ་གྱིས་སམ།

ཡང་ན་རྗེས་སུ་བསྟན་པའི་ཆོ་འཕྲུལ་ཀུན་ཏུ་བསྟན་པས་སམ།

དེ་ལྟ་བུའི་ཚུལ་གྱི་ཐབས་ལ་མཁས་པའི་སྦྱོར་བ་ཚད་མེད་པ་དག་གིས་སེམས་ཅན་ཚད་མེད་པ་དག་འདུལ་བའོ།

རིགས་ཀྱི་བུ་དེ་ལ་དཀོན་མཆོག་གི་ཆེ་བ་ཉིད་དཔག་ཏུ་མེད་པ་ནི་རྣམ་པ་གསུམ་སྟེ།

སངས་རྒྱས་དཀོན་མཆོག་གི་ཆེ་བ་ཉིད་དཔག་ཏུ་མེད་པ་དང་།

ཆོས་དཀོན་མཆོག་གི་ཆེ་བ་ཉིད་དཔག་ཏུ་མེད་པ་དང་།

དགེ་འདུན་དཀོན་མཆོག་གི་ཆེ་བ་ཉིད་དཔག་ཏུ་མེད་པའོ།

དེ་ལ་སངས་རྒྱས་དཀོན་མཆོག་གི་ཆེ་བ་ཉིད་དཔག་ཏུ་མེད་པ་ནི་རྣམ་པ་བདུན་དུ་ཁོང་དུ་ཆུད་པར་བྱ་སྟེ།

མངོན་པར་ཤེས་པ་ཆེན་པོ་བརྙེས་པའི་ཕྱིར་དེ་བཞིན་གཤེགས་པ་ཆོས་ཐམས་ཅད་ལ་དབང་སྒྱུར་བ་དང་།

མི་གནས་པའི་མྱ་ངན་ལས་འདས་པ་དང་།

རྣམ་པར་གྲོལ་བའི་སྐུ་བསམ་གྱིས་མི་ཁྱབ་པ་དང་།

ཆོས་ཀྱི་སྐུ་རྟག་པ་ཉིད་ཀྱི་ཕྱིར་དེ་བཞིན་གཤེགས་པའི་སྐུ་ཟད་མི་ཤེས་པ་དང་།

ཉོན་མོངས་པ་དང་ཤེས་བྱའི་སྒྲིབ་པ་སྤངས་པ་དང་།

ཁ་ན་མ་ཐོ་བ་མེད་པའི་ཕྱིར་དེ་བཞིན་གཤེགས་པ་མཆོག་ཏུ་ཁ་ན་མ་ཐོ་བ་མེད་པ་དང་།

སངས་རྒྱས་ཀྱི་མཛད་པ་བརྩམས་པ་རྒྱུན་མ་བཅད་པའི་ཕྱིར་དེ་བཞིན་གཤེགས་པ་ལྷུན་གྱིས་གྲུབ་པ་དང་།

སངས་རྒྱས་ཀྱི་ཞིང་ཡོངས་སུ་དག་པ་དང་ཆོས་ཀྱི་ལོངས་

སྤྱོད་ཆེན་པོ་ལ་ལོངས་སྤྱོད་པའི་ཕྱིར་དེ་བཞིན་གཤེགས་པ་ལོངས་སྤྱོད་ཆེ་བ་དང་།

འཇིག་རྟེན་དུ་བྱུང་ཡང་འཇིག་རྟེན་གྱི་ཆོས་ཀྱིས་མི་གོས་པའི་ཕྱིར་དེ་བཞིན་གཤེགས་པ་གོས་པ་མེད་པ་དང་།

རྟག་ཏུ་རྒྱུན་མི་འཆད་པར་སེམས་ཅན་གྱི་ཁམས་ཚད་མེད་པ་ཡོངས་སུ་སྨིན་པར་མཛད་ཅིང་རྣམ་པར་གྲོལ་བར་མཛད་པའི་ཕྱིར་དེ་བཞིན་གཤེགས་པ་དོན་ཆེ་བའོ།

དེ་ལ་ཆོས་དཀོན་མཆོག་གི་ཆེ་བ་ཉིད་དཔག་ཏུ་མེད་པ་ནི་རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་ཆོས་ཞེས་བྱ་བ་ནི་གང་ཆོས་ཀྱང་མ་ཡིན་ལ་ཆོས་མེད་པའང་མ་ཡིན་པ་དང་།

འདོད་ཆགས་ཀྱང་མ་ཡིན་ལ་འདོད་ཆགས་དང་བྲལ་བའང་མ་ཡིན་པ་དང་།

འཁོར་བའང་མ་ཡིན་ལ་མྱ་ངན་ལས་འདའ་བའང་མ་ཡིན་པའོ།

བྱང་ཆུབ་སེམས་དཔའ་རྣམས་ཀྱི་ཆོས་དེ་ནི་འཁོར་བར་སྣང་བའི་ཆོས་ཡོངས་སུ་མི་གཏོང་བ་དང་།

དེ་ན་ཡང་ཀུན་ནས་ཉོན་མོངས་པ་ཤིན་ཏུ་མེད་པ་དང་།

ནམ་མཁའ་དང་མཚུངས་ཤིང་སེམས་ཅན་གྱི་ཁམས་དང་ཡང་དག་པའི་མཐའ་དང་མཚུངས་ཏེ་མི་ཟད་པ་དང་།

སེམས་ཅན་ཐམས་ཅད་ལ་ཤིན་ཏུ་ཕན་པ་དང་།

བདེ་བའི་གནས་ལ་ཉེ་བར་གནས་པའི་ཕྱིར་འཁོར་བའམ།

མྱ་ངན་ལས་འདས་པ་གང་ལ་ཡང་མི་གནས་པའོ།

དེ་ལ་དགེ་འདུན་དཀོན་མཆོག་གི་ཆེ་བ་ཉིད་དཔག་ཏུ་མེད་པ་ལ་བྱང་ཆུབ་སེམས་དཔའི་དགེ་འདུན་ནི་བྱང་ཆུབ་སེམས་དཔའ་རྣམས་ཀྱི་དགེ་འདུན་དཀོན་མཆོག་སྟེ།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི་བྱང་ཆུབ་སེམས་དཔའི་དགེ་འདུན་གྱི་རབ་ཏུ་ཆེ་བའོ།

དེ་བས་ན་རྣམ་གྲངས་འདིས་སངས་རྒྱས་དཀོན་མཆོག་གི་ཆེ་བ་ཉིད་དང་།

བྱང་ཆུབ་སེམས་དཔའི་དགེ་འདུན་དཀོན་མཆོག་དང་མཉམ་པར་བལྟའོ།

དེ་ལ་ལས་དང་པོ་པའི་བྱང་ཆུབ་སེམས་དཔའ་འདི་སྙམ་དུ་སེམས་ཏེ།

གང་སངས་རྒྱས་དཀོན་མཆོག་གི་ཆེ་བ་ཉིད་འདི་འདྲ་བ་ལས་བརྩམས་ཏེ་བདག་དད་པ་སྐྱེས་པ་དང་།

ཆོས་དཀོན་མཆོག་གི་ཆེ་བ་ཉིད་འདི་འདྲ་བ་ལས་བརྩམས་ཏེ་བདག་དད་པ་སྐྱེས་པ་དང་།

དགེ་འདུན་དཀོན་མཆོག་གི་ཆེ་བ་ཉིད་འདི་འདྲ་བ་ལས་བརྩམས་ཏེ་བདག་དད་པ་སྐྱེས་པ་ནི་བདག་གིས་རྙེད་པ་ལེགས་པར་རྙེད་དོ།

བདག་ལ་ནི་སངས་རྒྱས་དཀོན་མཆོག་གི་ཆེ་བ་ཉིད་འདི་ལྟ་བུ་ཐོབ་པར་བྱ་བའི་སྐལ་བ་ཡོད་དོ།

བདག་ལ་ནི་ཆོས་དཀོན་མཆོག་

གི་ཆེ་བ་ཉིད་འདི་ལྟ་བུ་ཐོབ་པར་བྱ་བའི་སྐལ་བ་ཡོད་དོ།

བདག་གང་ས་ཆེན་པོ་ལ་ཞུགས་པ་བསམ་པ་དག་པའི་བྱང་ཆུབ་སེམས་དཔའ་དེ་དག་དང་ལྷན་ཅིག་ཏུ་བྱང་ཆུབ་སེམས་དཔའི་གྲངས་སུ་འགྲོ་བ་ནི་བདག་གིས་རྙེད་པ་ལེགས་པར་རྙེད་དོ།

བདག་ལ་ནི་དེ་དག་དང་བསམ་པ་དང་སྦྱོར་བ་མཚུངས་པའི་སྐལ་བ་ཡོད་དོ་སྙམ་མོ།

དེ་ལ་ཞིང་དཔག་ཏུ་མེད་པ་ནི་རིགས་ཀྱི་བུ་ཞིང་འདི་གཉིས་ཏེ་སངས་རྒྱས་ཀྱི་ཞིང་ཡོངས་སུ་མ་དག་པ་དང་།

ཡོངས་སུ་དག་པའོ།

དེ་ལ་ཡོངས་སུ་མ་དག་པའི་སངས་རྒྱས་ཀྱི་ཞིང་དང་ཡོངས་སུ་དག་པ་དག་ཀྱང་དཔག་ཏུ་མེད་དོ།

དེ་ལ་ཡོངས་སུ་དག་པའི་སངས་རྒྱས་ཀྱི་ཞིང་རྣམས་ལ་གནས་ནས་དེ་བཞིན་གཤེགས་པ་རྣམས་གཅིག་ཏུ་དགེ་བ་དང་གཅིག་ཏུ་བདེ་བ་དང་གཅིག་ཏུ་ཁ་ན་མ་ཐོ་བ་མེད་པ་དང་།

གཅིག་ཏུ་དབང་སྒྱུར་ཞིང་སངས་རྒྱས་ཀྱི་ཞིང་དེ་དག་རབ་ཏུ་མྱོང་ངོ་།

རྒྱུན་མི་འཆད་པར་ཆོས་ཀྱི་ལོངས་སྤྱོད་ཆེན་པོ་རབ་ཏུ་མྱོང་ངོ་།

ཡོངས་སུ་མ་དག་པའི་སངས་རྒྱས་ཀྱི་ཞིང་རྣམས་སུ་ཡང་རྣམ་པ་ཐམས་ཅད་དུ་བྱང་ཆུབ་ཡང་དག་པར་སྟོན་ཅིང་ཡོངས་སུ་མ་སྨིན་པའི་སེམས་ཅན་རྣམས་ནི་ཡོངས་སུ་སྨིན་པར་མཛད།

ཡོངས་སུ་སྨིན་པ་རྣམས་ནི་རྣམ་པར་གྲོལ་བར་མཛད་དེ།

འདི་དག་ནི་སངས་རྒྱས་བཅོམ་ལྡན་འདས་དེ་དག་གི་ལས་དཔག་ཏུ་མེད་པར་རིག་པར་བྱའོ།

སྐྱེ་བའི་ལེའུ་ཞེས་བྱ་སྟེ་གཉིས་པའོ།།

བྱང་ཆུབ་སེམས་དཔའ་དད་པ་ཐབས་ཆེན་གྱིས་གསོལ་པ།

བཅོམ་ལྡན་འདས་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་རྣམ་པ་དུ་ཞིག་མཆིས།

བཅོམ་ལྡན་འདས་ཀྱིས་བཀའ་སྩལ་པ།

རིགས་ཀྱི་བུ་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ནི་བཞི་པོ་འདི་དག་གོ།

བཞི་གང་ཞེ་ན།

འདི་ལྟ་སྟེ།

གནས་པའི་དད་པ་དང་།

སྐྱེ་བ་ན་དད་པ་དང་།

དུས་གཞན་ན་དད་པ་དང་།

རང་བཞིན་གྱིས་དད་པའོ།

དེ་ལ་གནས་པའི་དད་པ་ནི་རིགས་ཀྱི་བུ་འདི་ལྟ་སྟེ།

དཔེར་ན་བ་ལང་གི་རྗེས་ཀྱི་ཆུ་དཀྲུགས་པ་ལས་མ་དཀྲུགས་མ་བསྐྱོད་པར་བཞག་ན་སྔོན་བཞིན་དུ་དང་བར་འགྱུར་རོ།

དེ་བཞིན་དུ་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཐོབ་པའི་བྱང་ཆུབ་སེམས་དཔའ་འཕྲལ་གྱི་བྱ་བ་མང་པོ་ལ་ཆགས་པས་ཐེག་པ་ཆེན་པོ་ལ་དད་པ་དཀྲུགས་པ་ལས་

གང་གི་ཚེ་ཆགས་པ་ལས་རྣམ་པར་བཀྲོལ་ནས་ཆགས་པ་དེ་དག་གིས་མི་འཁྲུགས་ཏེ།

ཐེག་པ་ཆེན་པོའི་ཆོས་ལ་རྩེ་གཅིག་ཏུ་གྱུར་པ་དེའི་ཚེ་སྔོན་བཞིན་དུ་མངོན་སུམ་དུ་འགྱུར་རོ།

དེ་ལ་སྐྱེ་བ་ན་དད་པ་ནི་རིགས་ཀྱི་བུ་འདི་ལྟ་སྟེ།

དཔེར་ན་ཆང་ལ་སོགས་པ་འགྱུར་བ་ན་དང་བར་འགྱུར་རོ།

དེ་བཞིན་དུ་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཐོབ་པའི་བྱང་ཆུབ་སེམས་དཔའ་སྐྱེ་བ་དེ་དང་དེར་སྐྱེ་བ་ན་ཐེག་པ་ཆེན་པོ་ལ་དད་པ་སྐྱེས་ནས་ཐོབ་པ་སྐྱེད་དོ།

དེ་ལ་དུས་གཞན་ན་དད་པ་ནི་རིགས་ཀྱི་བུ་འདི་ལྟ་སྟེ།

དཔེར་ན་སྟོན་གྱི་དུས་ཀྱི་ཚེ་ཆུ་ཀླུང་དང་བར་འགྱུར་རོ།

དེ་བཞིན་དུ་བྱང་ཆུབ་སེམས་དཔའ་ཐེག་པ་ཆེན་པོའི་ཕྱིར་ཐེག་པ་ཆེན་པོ་ལ་དད་པ་ཐོབ་པ་དང་།

སེམས་པ་དང་སྒོམ་པ་དུས་གཞན་ན་སྦྱོར་བས་སྦྱོར་བ་ལས་བྱང་བས་གྲུབ་པར་འགྱུར་རོ།

དེ་ལ་རང་བཞིན་གྱིས་དང་བ་ནི་རིགས་ཀྱི་བུ་འདི་ལྟ་སྟེ།

དཔེར་ན་བཻ་དཱུརྱ་དང་།

ནོར་བུ་རིན་པོ་ཆེ་ལ་སོགས་པ་ནི་རང་བཞིན་གྱིས་དང་བའི་རྗེས་སུ་འཇུག་པའོ།

དེ་བཞིན་དུ་བྱང་ཆུབ་སེམས་དཔའི་རྣམ་པར་མི་རྟོག་པ་འཇིག་རྟེན་ལས་འདས་པའི་ཐེག་པ་ཆེན་པོ་ལ་དད་པ་ཡང་ངོ་བོ་ཉིད་ཀྱིས་རྗེས་སུ་འཇུག་གོ།

རིགས་ཀྱི་བུ་གཞན་ཡང་དད་པ་བཞི་སྟེ།

བཞི་གང་ཞེ་ན།

འདི་ལྟ་སྟེ།

རྒྱ་ཆེ་བའི་དད་པ་དང་།

གསལ་བའི་དད་པ་དང་།

རབ་ཏུ་ཞི་བའི་དད་པ་དང་།

རྣམ་པར་དག་པའི་དད་པའོ།

དེ་ལ་རྒྱ་ཆེ་བའི་དད་པ་ནི་བྱང་ཆུབ་སེམས་དཔའ་ཐེག་པ་ཆེན་པོའི་ཆོས་ལ་གུས་པར་བྱས་ཏེ་སྤྱོད་པ་དང་ལྡན་པ་རྣམས་ཀྱིའོ།

དེ་ལ་གསལ་བའི་དད་པ་ནི་བྱང་ཆུབ་སེམས་དཔའ་རྟག་ཏུ་ཐེག་པ་ཆེན་པོའི་ཆོས་སྤྱོད་པ་དང་ལྡན་པ་རྣམས་ཀྱིའོ།

དེ་ལ་རབ་ཏུ་ཞི་བའི་དད་པ་ནི་བྱང་ཆུབ་སེམས་དཔའ་ང་དང་ང་ཡིར་འཛིན་པ་དང་བྲལ་ཞིང་ཆོས་ཉིད་རབ་ཏུ་རྟོགས་པ་ཐོབ་པ་རྣམས་ཀྱིའོ།

དེ་ལ་རྣམ་པར་དག་པའི་དད་པ་ནི་བྱང་ཆུབ་སེམས་དཔའ་སྒྲིབ་པ་མེད་པའི་ཡེ་ཤེས་ཐོབ་པ་རྣམས་ཀྱིའོ།

རིགས་ཀྱི་བུ་གཞན་ཡང་དད་པ་བཞི་སྟེ།

བཞི་གང་ཞེ་ན།

འདི་ལྟ་སྟེ།

འཕེན་པའི་དད་པ་དང་།

རྩོམ་པའི་དད་པ་དང་།

རྗེས་སུ་འཛིན་ཅིང་གུས་པར་བྱེད་པའི་དད་པ་དང་།

མོས་པའི་དད་པའོ།

དེ་ལ་འཕེན་པའི་དད་པ་ནི་སྔོན་ནས་རང་བཞིན་གྱིས་དགེ་བའི་རྩ་བ་མངོན་པར་འདུས་བྱས་ཤིང་ཡོངས་སུ་བསྒོམས་པ་རྣམས་ཀྱི་ཐེག་པ་ཆེན་པོ་ལ་དད་

པ་གང་ཡིན་པའོ།

དེ་ལ་རྩོམ་པའི་དད་པ་ནི་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དང་།

སེམས་བསྐྱེད་པ་རྣམས་ཀྱི་སེམས་བསྐྱེད་པ་རྗེས་སུ་དྲན་པས་ཐེག་པ་ཆེན་པོ་ལ་དད་པ་གང་ཡིན་པའོ།

དེ་ལ་རྗེས་སུ་འཛིན་ཅིང་གུས་པར་བྱེད་པའི་དད་པ་ནི་རྗེས་སུ་འཛིན་པའི་བྱང་ཆུབ་སེམས་དཔའ་རྣམས་ཀྱི་སེམས་ཅན་རྗེས་སུ་འཛིན་ཅིང་ལས་གུས་པར་བྱེད་པས་ཐེག་པ་ཆེན་པོ་ལ་དད་པ་གང་ཡིན་པའོ།

དེ་ལ་མོས་པའི་དད་པ་ནི་ཆོས་ཀྱི་དབྱིངས་ཟབ་མོ་བསྟན་པ་ལ་མོས་པའི་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོ་ལ་དད་པ་གང་ཡིན་པའོ།

གཞན་ཡང་དད་པ་བཞི་སྟེ།

བཞི་གང་ཞེ་ན།

འདི་ལྟ་སྟེ།

མཐོང་བ་དང་།

ཐོས་པས་དད་པ་དང་།

བསྟན་པ་འཕེལ་བ་རྗེས་སུ་དྲན་པའི་དད་པ་དང་།

དགེ་བའི་ཕྱོགས་འཕེལ་བ་རྗེས་སུ་དྲན་པའི་དད་པ་དང་།

རེ་བ་དང་འདོད་པ་རྗེས་སུ་དྲན་པའི་དད་པའོ།

དེ་ལ་མཐོང་བ་དང་ཐོས་པས་དད་པ་ནི་གང་སངས་རྒྱས་དང་བྱང་ཆུབ་སེམས་དཔའི་གཟུགས་སམ་འོད་མཐོང་ཞིང་ཐོས་ན་ཐེག་པ་ཆེན་པོ་ལ་དད་པའོ།

དེ་ལ་བསྟན་པ་འཕེལ་བ་རྗེས་སུ་དྲན་པའི་དད་པ་ནི་གང་སེམས་ཅན་ཡོངས་སུ་སྨིན་པར་བྱ་བ་རྗེས་སུ་དྲན་པས་ཐེག་པ་ཆེན་པོ་ལ་དད་པའོ།

དེ་ལ་དགེ་བའི་ཕྱོགས་འཕེལ་བ་རྗེས་སུ་དྲན་པའི་དད་པ་ནི་གང་བདག་ཉིད་རྟག་པར་རྒྱུན་ཏུ་བྱང་ཆུབ་ཀྱི་ཕྱོགས་ཀྱི་ཆོས་དང་།

དགེ་བའི་ཕྱོགས་འཕེལ་བ་རྗེས་སུ་དྲན་པས་བྱང་ཆུབ་སེམས་དཔའ་ཐེག་པ་ཆེན་པོ་ལ་དད་པའོ།

དེ་ལ་རེ་བ་དང་འདོད་པ་རྗེས་སུ་དྲན་པའི་དད་པ་ནི་གང་དགེ་བའི་ཕྱོགས་འཕེལ་བ་དེས་སངས་རྒྱས་ཀྱི་ཞིང་ཡོངས་སུ་དག་ཅིང་སངས་རྒྱས་ཀྱི་ཆོས་ཐམས་ཅད་བསྒྲུབས་པས་རེ་ཞིང་འདོད་དེ།

བྱང་ཆུབ་སེམས་དཔའ་རེ་བ་དང་འདོད་པ་རྗེས་སུ་དྲན་པས་ཐེག་པ་ཆེན་པོ་ལ་དད་པའོ།

གཞན་ཡང་དད་པ་བཞི་སྟེ།

བཞི་གང་ཞེ་ན།

བརྗོད་པ་རྗེས་སུ་དྲན་པའི་དད་པ་དང་།

གཅོད་ནུས་པ་རྗེས་སུ་དྲན་པའི་དད་པ་དང་།

བསྐྲུན་པ་རྗེས་སུ་དྲན་པའི་དད་པ་དང་།

སྒྲུབ་པ་རྗེས་སུ་དྲན་པའི་དད་པའོ།

དེ་ལ་བརྗོད་པ་རྗེས་སུ་དྲན་པའི་དད་པ་ནི་གང་ཐེག་པ་ཆེན་པོའི་སྒོ་ཐམས་ཅད་ལ་མོས་པའི་བྱང་ཆུབ་སེམས་དཔའ་རྣམས་མོས་པའི་རྗེས་སུ་དྲན་པས་ཐེག་པ་ཆེན་པོ་ལ་དད་པའོ།

དེ་ལ་གཅོད་ནུས་པ་རྗེས་སུ་དྲན་པའི་དད་པ་ནི་གང་བྱང་ཆུབ་སེམས་དཔའ་

མང་དུ་ཐོས་པ་ཐོས་པ་འཛིན་པ་ཐོས་པ་བསགས་པ་རྣམས་ཐེ་ཚོམ་གཅོད་ནུས་པ་རྗེས་སུ་དྲན་པས་ཐེག་པ་ཆེན་པོ་ལ་དད་པའོ།

དེ་ལ་བསྐྲུན་པ་རྗེས་སུ་དྲན་པའི་དད་པ་ནི་གང་ཕ་རོལ་གྱི་རྒྱུད་ལ་ཐེག་པ་ཆེན་པོའི་ཆོས་ཀློག་པ་དང་།

ཁ་ཏོན་བྱེད་པ་དང་།

དོན་འཛིན་པ་དང་།

འདོན་པ་ལ་སོགས་པས་བསྐྲུན་ཏེ།

གཞན་གྱི་རྒྱུད་ལ་དམ་པའི་ཆོས་བསྐྲུན་པ་དེ་རྗེས་སུ་དྲན་པས་ཐེག་པ་ཆེན་པོ་ལ་དད་པའོ།

དེ་ལ་སྒྲུབ་པ་རྗེས་སུ་དྲན་པའི་དད་པ་ནི་གང་བྱང་ཆུབ་སེམས་དཔའ་ཐེག་པ་ཆེན་པོའི་ཆོས་དེ་ཉིད་ནན་ཏན་གྱིས་བསྒྲུབ་སྟེ།

ནན་ཏན་གྱིས་སྒྲུབ་པ་དེ་རྗེས་སུ་དྲན་པས་ཐེག་པ་ཆེན་པོ་ལ་དད་པའོ།

རིགས་ཀྱི་བུ་གཞན་ཡང་དད་པ་བཞི་སྟེ།

བཞི་གང་ཞེ་ན།

རྣལ་འབྱོར་ཐོབ་པའི་དད་པ་དང་།

ཐབས་ཀྱིས་ཡོངས་སུ་ཟིན་པའི་ལུས་ཀྱི་ལས་སྦྱོར་བའི་དད་པ་དང་།

ཐབས་ཀྱིས་ཡོངས་སུ་ཟིན་པའི་ངག་གི་ལས་སྦྱོར་བའི་དད་པ་དང་།

ཐབས་ཀྱིས་ཡོངས་སུ་ཟིན་པའི་ཡིད་ཀྱི་ལས་སྦྱོར་བའི་དད་པའོ།

དེ་ལ་རྣལ་འབྱོར་ཐོབ་པའི་དད་པ་ནི་གང་ཐེག་པ་ཆེན་པོའི་ཆོས་ལ་དམིགས་པའི་ཞི་གནས་དང་ལྷག་མཐོང་ཐོབ་པའི་བྱང་ཆུབ་སེམས་དཔའ་རྣམས་དེ་ལ་དམིགས་ནས་དད་པའོ།