經部第61卷（མདོ་སྡེ་ཙ་པ་བཞུགས་སོ། །）

རྒྱ་གར་སྐད་དུ།

ཨཱརྱ་པཉྩ་པཱ་ར་མི་ཏཱ་ནིར་དེ་ཤ་ནཱ་མ་མ་ཧཱ་ཡཱ་ན་སཱུ་ཏྲ།

བོད་སྐད་དུ།

འཕགས་པ་ཕ་རོལ་ཏུ་ཕྱིན་པ་ལྔ་བསྟན་པ་ཞེས་བྱ་བ་ཐེག་པ་ཆེན་པོའི་མདོ།

བམ་པོ་དང་པོ།

སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ།

འདི་སྐད་བདག་གིས་ཐོས་པ་དུས་གཅིག་ན།

བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན།

དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་དགྲ་བཅོམ་པ།

ཟག་པ་ཟད་པ།

ཉོན་མོངས་པ་མེད་པ།

དབང་དང་ལྡན་པར་གྱུར་པ།

སེམས་ཤིན་ཏུ་རྣམ་པར་གྲོལ་བ།

ཤེས་རབ་ཤིན་ཏུ་རྣམ་པར་གྲོལ་བ།

ཅང་ཤེས་པ།

གླང་པོ་ཆེན་པོ།

བྱ་བ་བྱས་པ།

བྱེད་པ་བྱས་པ།

ཁུར་བོར་བ།

བདག་གི་དོན་རྗེས་སུ་ཐོབ་པ།

སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ།

ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ།

སེམས་ཅན་ཐམས་ཅད་ལ་དབང་

དམ་པའི་ཕ་རོལ་ཏུ་སོན་པ་ཤ་སྟག་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་ཕལ་ཆེར་གཞོན་ནུར་གྱུར་པ།

སྐྱེ་བ་གཅིག་གིས་ཐོགས་པ།

སེམས་ཅན་གྱི་བསམ་པ་ཇི་ལྟ་བ་བཞིན་དུ་སྲིད་པ་ལས་གྲོལ་བ།

སྲིད་པར་སྐྱེ་བ་ཡོངས་སུ་འཛིན་པ།

ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཤ་སྟག་དང་ཐབས་ཅིག་ཏུ་བཞུགས་སོ།

གཞན་ཡང་ལྷ་དང་།

ཀླུ་དང་།

གནོད་སྦྱིན་དང་།

དྲི་ཟ་དང་།

ལྷ་མ་ཡིན་དང་།

ནམ་མཁའ་ལྡིང་དང་།

མི་འམ་ཅི་དང་།

ལྟོ་འཕྱེ་ཆེན་པོ་དག་གིས་བཅོམ་ལྡན་འདས་ལ་བཀུར་སྟིར་བྱས།

བླ་མར་བྱས།

རི་མོར་བྱས།

མཆོད་པར་བྱས་ནས།

བདེ་བར་གཤེགས་པ།

འཇིག་རྟེན་མཁྱེན་པ།

སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ།

ལྷ་དང་མི་རྣམས་ཀྱི་སྟོན་པ།

སངས་རྒྱས་བཅོམ་ལྡན་འདས་ཀྱིས་འདི་ལྟ་སྟེ།

ཕ་རོལ་ཏུ་ཕྱིན་པ་དྲུག་པོ་འདི་དག་ཉིད་ལས་བརྩམས་ནས་འཁོར་བཞི་པོ་དག་ལ་ཆོས་སྟོན་ཏོ།

དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་བཀའ་སྩལ་པ།

ཤ་ར་དྭ་ཏིའི་བུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་པ་ན་མངོན་པར་འདུ་བྱེད་པ་མེད་པར་སྦྱིན་པ་སྦྱིན་པར་བྱའོ།

དེ་སྐད་ཅེས་བཀའ་སྩལ་པ་དང་།

ཚེ་དང་ལྡན་པ་ཤ་ར་དྭ་ཏིའི་བུས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་བཅོམ་ལྡན་འདས་ནི་ཆོས་ཐམས་ཅད་ཀྱི་རྩ་བར་གྱུར་པ་ལགས།

བཅོམ་ལྡན་འདས་ནི་ཆོས་ཐམས་ཅད་ཀྱི་གཙོ་བོར་གྱུར་པ་ལགས།

བཅོམ་ལྡན་འདས་ནི་ཆོས་ཐམས་ཅད་ཀྱི་སྟོན་པར་གྱུར་པ་ལགས་ཏེ།

དེའི་སླད་དུ་བཅོམ་ལྡན་འདས་ལས་གང་ཐོས་ན་དགེ་སློང་རྣམས་འཛིན་པར་འགྱུར་བ་དེ་བཅོམ་ལྡན་འདས་

ཉིད་ཀྱིས་དགེ་སློང་རྣམས་ལ་བཤད་དུ་གསོལ།

དེ་སྐད་ཅེས་གསོལ་པ་དང་།

བཅོམ་ལྡན་འདས་ཅང་མི་གསུང་བར་གྱུར་ཏེ།

ལན་གཉིས་ཀྱི་བར་དུ་གསོལ་ནས་བཅོམ་ལྡན་འདས་ཀྱིས་བཀའ་སྩལ་པ།

ཤ་ར་དྭ་ཏིའི་བུ་ངས་ཁྱོད་ལ་བཅོལ་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྦྱིན་པའི་ཕ་རོལ་ཏུ་ཕྱིན་པ་ལས་བརྩམས་ཏེ།

ཁྱོད་སྤོབས་པར་གྱིས་ཤིག །

དེ་ནས་ཚེ་དང་ལྡན་པ་ཤ་ར་དྭ་ཏིའི་བུས་བཅོམ་ལྡན་འདས་ལས་གོ་སྐབས་གནང་བ་ཐོབ་ནས་བཅོམ་ལྡན་འདས་ཀྱི་མཐུས་ཐོག་མ་ཉིད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྦྱིན་པའི་ཕ་རོལ་ཏུ་ཕྱིན་པ་ལ་འདོམས་ཤིང་རྗེས་སུ་སྟོན་ཏེ།

བཅོམ་ལྡན་འདས་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་པས་ཐོག་མ་ཉིད་དུ་རྣམ་པ་ཐམས་ཅད་མཁྱེན་པ་ཉིད་ལ་དམིགས་པར་བགྱི་ཞིང་སྦྱིན་པ་སྦྱིན་པར་བགྱིའོ།

གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པ་ཐམས་ཅད་མཁྱེན་པ་ཉིད་ལ་དམིགས་པར་བགྱི་ནས་སྦྱིན་པ་སྦྱིན་ན།

བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་འཛིན་པ་ལགས་སོ།

བྱང་ཆུབ་སེམས་དཔའ་ལྟ་བར་ལྷུང་བས་སྦྱིན་པ་སྦྱིན་པ་ནི་མི་སྔོའི་ཉན་ཐོས་ཀྱིས་འམ།

རང་སངས་རྒྱས་ཀྱི་སར་བསྔོས་པ་ནི་དེ་ལྟ་མ་ལགས་སོ།

དེ་ཅིའི་སླད་དུ་ཞེ་ན།

དེའི་འཇིགས་པ་ནི་དེ་ལགས་པར་འཚལ་བར་བགྱི་བའི་སླད་དུའོ།

དེ་ནས་ཚེ་དང་ལྡན་པ་བྱམས་མའི་བུ་གང་པོས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ།

ཚེ་དང་ལྡན་པ་ཅིའི་ཕྱིར་ན་དེ་བྱང་ཆུབ་སེམས་དཔའ་སེམས་དཔའ་ཆེན་པོའི་འཇིགས་པ་ཡིན་པར་ཤེས་པར་བྱ།

སྨྲས་པ།

ཉན་ཐོས་རྣམས་དང་འབྲས་བུ་མཉམ་པར་འགྱུར་དུ་འོང་བས་ན་དེའི་ཕྱིར་དེའི་འཇིགས་པ་ཡིན་པར་ཤེས་པར་བྱའོ།

དེ་ནས་ཚེ་དང་ལྡན་པ་བྱམས་མའི་བུ་གང་པོས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ།

ཚེ་དང་ལྡན་པ་ཤ་ར་དྭ་ཏིའི་བུ་བྱང་ཆུབ་སེམས་དཔའ་སྦྱིན་པ་སྦྱིན་པ་གང་ཡིན་པ་དང་།

ཉན་ཐོས་དགྲ་བཅོམ་པ་མངོན་སུམ་དུ་བྱ་བར་འདོད་པ་སྦྱིན་པ་སྦྱིན་པ་གང་ཡིན་པ་འདི་ལ་བྱེ་བྲག་ནི་ཅི་ཡོད།

ཐ་དད་དུ་དབྱེ་བ་ནི་གང་ཡིན།

སྨྲས་པ།

ཚེ་དང་ལྡན་པ་གང་པོ་ཐ་དད་

དུ་དབྱེ་བ་ནི་འདི་ཉིད་ཡིན་ཏེ།

གཅིག་ནི་གང་ཉན་ཐོས་ཀྱི་སར་ཡོངས་སུ་སྔོ་བར་བྱེད་ལ་ཅིག་ཤོས་ནི་རྣམ་པ་ཐམས་ཅད་མཁྱེན་པ་ཉིད་དུ་ཡོངས་སུ་སྔོ་བར་བྱེད་པ་ཡིན་ནོ།

དེ་ཅིའི་ཕྱིར་ཞེ་ན།

ཚེ་དང་ལྡན་པ་དཔེར་ན་སྐྱེས་བུ་ལ་ལ་ཞིག་བདག་རྒྱལ་པོར་གྱུར་ཀྱང་ཅི་མ་རུང་སྙམ་དུ་རྒྱལ་པོའི་ས་ལ་དམིགས་ནས་སྦྱིན་པ་སྦྱིན་ལ།

སྐྱེས་བུ་ཅིག་ཤོས་ནི་བདག་རྒྱལ་པོ་དེའི་ཡུལ་ན་གནས་ཀྱང་ཅི་མ་རུང་སྙམ་དུ་མངག་གཞུག་པར་ཁས་ལེན་པར་འདོད་དེ་སྦྱིན་པ་སྦྱིན་ཞིང་དེ་ལྟར་ཡོངས་སུ་སྔོ་ན།

སྐྱེས་བུ་དེས་སྐྱེས་བུ་སྔ་མ་དེས་དམིགས་པའི་རྒྱལ་པོའི་ས་གང་ཡིན་པ་དེ་ཉིད་ནོན་པར་ནུས་སམ།

ཚེ་དང་ལྡན་པ་གང་པོ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་རྣམ་པ་ཐམས་ཅད་མཁྱེན་པ་ཉིད་ལ་དམིགས་ནས་སྦྱིན་པ་སྦྱིན་ཞིང་ཡོངས་སུ་སྔོ་ལ།

ཉན་ཐོས་ཀྱི་ཐེག་པ་པ་ནི་སྦྱིན་པ་གང་སྦྱིན་པ་དེ་ཉན་ཐོས་ཀྱིས་ལ་དགྲ་བཅོམ་པ་ཉིད་དུ་ཡོངས་སུ་སྔོ་བར་བྱེད་དོ།

དེ་ལྟར་འཕགས་པ་ཉན་ཐོས་བྱང་ཆུབ་སེམས་དཔའི་ཉེ་གནས་སུ་འགྱུར་བར་འདོད་ན།

སྐྱེས་བུ་དེས་སྦྱིན་པ་དེ་ཉིད་རྣམ་པ་ཐམས་ཅད་མཁྱེན་པ་ཉིད་དུ་ཡོངས་སུ་སྔོ་བར་བྱེད་པའི་མཐུ་དང་ནུས་པ་ཡོད་དམ།

ཡང་ཚེ་དང་ལྡན་པ་གང་པོ་མོས་པ་གང་དང་ལྡན་པས་སྦྱིན་པ་དེ་རྣམ་པ་ཐམས་ཅད་མཁྱེན་པ་ཉིད་དུ་ཡོངས་སུ་སྔོ་བའི་མོས་པ་དེ་ནི་མེད་ཀྱི།

སྦྱིན་པ་དེ་ཉན་ཐོས་སུ་ཡོངས་སུ་སྔོ་བ་འདི་ནི་བྱང་ཆུབ་སེམས་དཔའི་ཐེག་པ་པ་དང་།

ཉན་ཐོས་ཀྱི་ཐེག་པ་པ་དགྲ་བཅོམ་པའི་ས་ལ་གནས་པའི་ཐ་དད་དུ་དབྱེ་བ་ཡིན་ནོ།

ཚེ་དང་ལྡན་པ་གང་པོ་དཔེར་ན་སྐྱེས་བུ་ལ་ལ་ཞིག་སྦྱིན་པ་འདིས་བདག་ཚོང་དཔོན་ནམ།

ཁྱིམ་བདག་གམ་ཚངས་པར་གྱུར་ཅིག་ཅེས་སྦྱིན་པ་སྦྱིན་པ་དེ་བཞིན་དུ་ཉན་ཐོས་ཀྱི་ཐེག་པ་པའི་སྦྱིན་པར་བལྟའོ།

དེ་ནས་ཚེ་དང་ལྡན་པ་བྱམས་མའི་བུ་གང་པོས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ།

ཚེ་དང་ལྡན་པ་འདི་ནི་ངོ་མཚར་ཆེ་སྟེ།

ཤ་ར་དྭ་ཏིའི་བུས་ཤིན་ཏུ་ལེགས་པར་སྨྲས་སོ།

ཚེ་དང་ལྡན་པ་ཤ་ར་དྭ་ཏིའི་བུ་དཔེར་ན་སྐྱེས་བུ་ལ་ལ་ཞིག་ཀཱར་ཥ་པ་ཎ་འབུམ་ཁྱེར་ཏེ།

ཁྱིམ་བདག་ཕྱུག་པོ་གང་ཡང་རུང་བ་ཞིག་གི་དྲུང་དུ་སོང་ནས་འདི་སྐད་དུ།

ཀཱར་ཥ་པ་ཎ་འབུམ་འདི་དག་ཁྱོད་ལ་འབུལ་ཏེ།

བདག་ཀྱང་ཁྱོད་ཀྱི་ཐད་ན་འདུག་ཅིང་བྱ་བ་དང་།

སྦྱོར་བ་རྣམས་ལ་

གཡོག་བགྱིད་དོ་ཞེས་ཟེར་བ་དེ་བཞིན་དུ།

ཚེ་དང་ལྡན་པ་ཉན་ཐོས་ཀྱི་ཐེག་པ་པའི་གང་ཟག་རྣམས་སྦྱིན་པ་སྦྱིན་ཞིང་།

དེ་བཞིན་གཤེགས་པའི་ཞབས་འབྲིང་དུ་ཁས་ལེན་ཏོ།

བྱང་ཆུབ་སེམས་དཔའ་སེམས་དཔའ་ཆེན་པོ་ནི་དེ་ལྟར་སྦྱིན་པ་སྦྱིན་པར་མི་བྱེད་དེ།

འདི་ནི་བྱང་ཆུབ་སེམས་དཔའི་སྤྱོད་པ་དང་ཉན་ཐོས་ཀྱི་སྦྱིན་པ་སྦྱིན་པའི་ཁྱད་པར་དུ་དབྱེ་བ་ཡིན་ནོ།

ཚེ་དང་ལྡན་པ་ཤ་ར་དྭ་ཏིའི་བུ་དཔེར་ན་རྒྱལ་པོའི་བཙུན་མོའི་འཁོར་གྱི་བུད་མེད་གཅིག་གིས་གསེར་འབུམ་ཁྱེར་ཏེ།

ཚོང་དཔོན་ནམ།

དེད་དཔོན་གང་ཡང་རུང་བའི་དྲུང་དུ་སོང་ནས་འདི་སྐད་དུ།

གསེར་འབུམ་འདི་དག་ཀྱང་ཁྱོད་ལ་འབུལ།

བདག་ཀྱང་ཁྱོད་ཀྱི་གཡོག་བགྱིད་ཅིང་སྔར་ལྡང་བ་དང་།

ཕྱིས་ཉལ་བ་དང་།

ཁྱོད་ཅི་དགྱེས་པ་བཞིན་སྤྱོད་པར་བགྱིད་དོ་ཞེས་ཟེར་བ་དེ་བཞིན་དུ་ཚེ་དང་ལྡན་པ་ཉན་ཐོས་ཀྱི་ཐེག་པ་པའི་གང་ཟག་སྦྱིན་པ་ཡང་སྦྱིན་ཞིང་དེ་བཞིན་གཤེགས་པའི་ཉན་ཐོས་ཉིད་དུ་ཁས་ལེན་ཏོ།

དེ་སྐད་ཅེས་སྨྲས་པ་དང་།

ཚེ་དང་ལྡན་པ་ཤ་ར་དྭ་ཏིའི་བུས་ཚེ་དང་ལྡན་པ་བྱམས་མའི་བུ་གང་པོ་ལ་འདི་སྐད་ཅེས་སྨྲས་སོ།

ཚེ་དང་ལྡན་པ་སྦྱིན་པ་དེ་ཉིད་ཡོངས་སུ་བཏང་དུ་འདྲ་ན།

གཅིག་ནི་ཉན་ཐོས་ཀྱིས་ཡོངས་སུ་འཛིན་པར་གྱུར་ལ།

གཅིག་ནི་རྣམ་པ་ཐམས་ཅད་མཁྱེན་པ་ཉིད་ཡོངས་སུ་འཛིན་པར་གྱུར་པ་འདི་ནི་ངོ་མཚར་ཆེ་སྟེ།

ཚེ་དང་ལྡན་པས་ལེགས་པར་སྨྲས་སོ།

ཚེ་དང་ལྡན་པ་གང་པོ་བྱང་ཆུབ་སེམས་དཔའ་ནི་ཐམས་ཅད་དུ་ཐབས་ལ་མཁས་པར་བལྟ་བར་བྱའོ།

གཞན་ཡང་ཚེ་དང་ལྡན་པ་ཤ་ར་དྭ་ཏིའི་བུས་ཚེ་དང་ལྡན་པ་བྱམས་མའི་བུ་ལ་འདི་སྐད་ཅེས་སྨྲས་སོ།

ཚེ་དང་ལྡན་པ་གང་པོ་འདི་ལ་བྱང་ཆུབ་སེམས་དཔའ་སྦྱིན་པ་སྦྱིན་པར་འདོད་ཅིང་།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་སྦྱིན་པ་ཡོངས་སུ་གཏོང་བ་ན་ཐོག་མ་ཁོ་ནར་འདི་སྐད་དུ་སྦྱིན་པ་འདི་ལས་བྱུང་བའི་བསོད་ནམས་མངོན་པར་འདུ་བྱེད་པ་དང་།

དགེ་བ་མངོན་པར་འདུ་བྱེད་པ་གང་ཡིན་པ་དེས་འཇིག་རྟེན་གྱི་ཁམས་མཐའ་ཡས་མུ་མེད་པ་དག་ན་ཐེག་པ་ལ་གསར་དུ་ཞུགས་པའི་བྱང་ཆུབ་སེམས་དཔའ་གང་དག་གནས་པ་དེ་དག་ནི་ཕྱིར་མི་ལྡོག་པ་ཉིད་དུ་གྱུར་ཅིག །

ཕྱིར་མི་ལྡོག་

པ་གང་དག་གནས་པ་དེ་དག་ནི་མྱུར་དུ་རྣམ་པ་ཐམས་ཅད་མཁྱེན་པ་ཉིད་ཡོངས་སུ་རྫོགས་པར་གྱུར་ཅིག་ཅེས་བརྗོད་པར་བྱ་སྟེ།

དེ་ལྟར་བདག་ཉིད་ཀྱང་དེའི་ཁོངས་སུ་གཏོགས་པར་བྱེད་ཅིང་བྱང་ཆུབ་སེམས་དཔའ་དེ་དག་ཀྱང་དགེ་བའི་རྩ་བ་རྣམས་ཀྱིས་ཡོངས་སུ་འཛིན་པར་བྱེད་དོ།

ཇི་ལྟ་ཇི་ལྟར་བྱང་ཆུབ་སེམས་དཔའ་དགེ་བའི་རྩ་བ་ཡོངས་སུ་འཛིན་ཅིང་རྗེས་སུ་སྲུང་བ་དེ་ལྟ་དེ་ལྟར་རྣམ་པ་ཐམས་ཅད་མཁྱེན་པ་ཉིད་དང་ཉེ་བར་འགྱུར་རོ།

ཇི་ལྟ་ཇི་ལྟར་དགེ་བའི་རྩ་བ་ཡོངས་སུ་སྔོ་བ་དེ་ལྟ་དེ་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་ཡང་ཉེ་བར་འགྱུར་རོ།

ཚེ་དང་ལྡན་པ་གང་པོ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པ་སྦྱིན་པ་ན།

སྦྱིན་པ་དེ་འདི་ལྟར་བདག་གིས་ཁ་ཟས་ཀྱི་སྦྱིན་པ་འདི་ལས་སེམས་ཅན་གང་དག་མིག་ལམ་ན་སྣང་བ་དང་།

གང་དག་མི་སྣང་བ་ཐམས་ཅད་ལས་སེམས་ཅན་གང་དག་ཟ་བ་དང་།

ཅུང་ཟད་ཟ་བར་གྱུར་པའི་སྦྱིན་པ་དེ་ལས་གང་བདག་གིས་དགེ་བའི་རྩ་བ་ཡོངས་སུ་བཟུང་བར་གྱུར་པའི་དགེ་བའི་རྩ་བ་དེས་འཇིག་རྟེན་གྱི་ཁམས་མཐའ་ཡས་མུ་མེད་པ་དག་ན།

ཐེག་པ་ལ་གསར་དུ་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་གནས་པ་དེ་དག་ནི་ཕྱིར་མི་ལྡོག་པ་ཉིད་དུ་གྱུར་ཅིག །

ཕྱིར་མི་ལྡོག་པ་གང་དག་གནས་པ་དེ་དག་ནི་མྱུར་དུ་རྣམ་པ་ཐམས་ཅད་མཁྱེན་པ་ཉིད་ཡོངས་སུ་རྫོགས་པར་གྱུར་ཅིག་ཅེས་ཡོངས་སུ་བསྔོ་བར་བྱའོ།

ཇི་ལྟ་ཇི་ལྟར་བྱང་ཆུབ་སེམས་དཔའ་དགེ་བའི་རྩ་བ་ཡོངས་སུ་སྔོ་བར་བྱེད་པ་དེ་ལྟ་དེ་ལྟར་ཕ་རོལ་ཏུ་ཕྱིན་པ་རྣམས་ཡོངས་སུ་འཛིན་ཅིང་རྣམ་པ་ཐམས་ཅད་མཁྱེན་པ་ཉིད་དང་ཡང་ཉེ་བར་འགྱུར་ཏེ།

གང་གི་ཚེ་སྦྱིན་པ་ཆུང་ངུ་ཡང་དཔག་ཏུ་མེད་པར་བྱེད་པ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་ཐབས་ལ་མཁས་པ་ཡིན་པར་རིག་པར་བྱའོ།

དེ་ཅིའི་ཕྱིར་ཞེ་ན།

རྣམ་པ་ཐམས་ཅད་མཁྱེན་པ་ཉིད་དཔག་ཏུ་མེད་པའི་ཕྱིར་རོ།

ཚེ་དང་ལྡན་པ་གང་པོ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པ་སྦྱིན་པ་ན།

བདག་གི་སྦྱིན་པ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མ་གཏོགས་པ་གཞན་དུ་རྣམ་པར་སྨིན་པར་མ་གྱུར་ཅིག་ཅེས་དེ་ལྟར་སེམས་བསྐྱེད་པར་བྱའོ།

གལ་ཏེ་ཡོངས་སུ་སྔོ་བར་བྱེད་ན་

སྦྱིན་པའི་ཕ་རོལ་ཏུ་ཕྱིན་པ་ཞེས་བྱ་བའི་གྲངས་སུ་འགྲོའོ།

ཅི་སྟེ་ཕྱིས་ཡུན་རིང་མོ་ཞིག་ལོན་ནས་ཡོངས་སུ་སྔོ་བར་བྱེད་ཅིང་།

རྣམ་པ་ཐམས་ཅད་མཁྱེན་པ་ཉིད་ཡིད་ལ་བྱེད་ན་ཡང་དེ་བཞིན་དུ་ཕ་རོལ་ཏུ་ཕྱིན་པའི་གྲངས་སུ་འགྲོའོ།

ཚེ་དང་ལྡན་པ་གང་པོ་གཞན་ཡང་བྱང་ཆུབ་སེམས་དཔའི་སྦྱིན་པ་ནི་ཉུང་ངུ་ཟིན་ཀྱང་མང་བར་རིག་པར་བྱའོ།

དེ་ཅིའི་ཕྱིར་ཞེ་ན།

རྣམ་པ་ཐམས་ཅད་མཁྱེན་པ་ཉིད་དུ་ཡོངས་སུ་བསྔོས་པའི་ཕྱིར་རོ།

སྦྱིན་པ་མང་པོ་ཡང་ཉུང་ངུར་འགྱུར་བ་ཡོད་པར་རིག་པར་བྱ་སྟེ།

དེ་ཅིའི་ཕྱིར་ཞེ་ན།

འདི་ལྟར་རྣམ་པ་ཐམས་ཅད་མཁྱེན་པ་ཉིད་དུ་ཡོངས་སུ་མ་བསྔོས་པའི་ཕྱིར་རོ།

ཚེ་དང་ལྡན་པ་དེ་ཡང་གལ་ཏེ་ཕྱིས་ཡུན་རིང་མོ་ཞིག་ལོན་ནས་ཡོངས་སུ་སྔོ་བར་བྱེད་ན་ཡང་སྦྱིན་པའི་སྒྲ་བོར་ཏེ།

སྦྱིན་པའི་ཕ་རོལ་ཏུ་ཕྱིན་པའི་སྒྲ་ཐོབ་པར་འགྱུར་རོ།

ཚེ་དང་ལྡན་པ་གང་པོ་བྱང་ཆུབ་སེམས་དཔའ་སེམས་དཔའ་ཆེན་པོས་འཁོར་བ་ཐོག་མ་མེད་པ་ནས་འཁོར་བ་ན།

རྣམ་པ་ཐམས་ཅད་མཁྱེན་པ་ཉིད་ཡང་དག་པར་མ་བརྗོད་པར་སྦྱིན་པ་བྱིན་པ་གང་ཡིན་པ་དེ་ཡང་བྱང་ཆུབ་སེམས་དཔས་ཐབས་མཁས་པ་ལ་བརྟེན་ནས་ཕ་རོལ་ཏུ་ཕྱིན་པར་ཡོངས་སུ་སྔོ་ཞིང་།

རྣམ་པ་ཐམས་ཅད་མཁྱེན་པ་ཉིད་ལ་དམིགས་པར་བྱེད་ན་བྱང་ཆུབ་སེམས་དཔའི་སྦྱིན་པའི་ཕ་རོལ་ཏུ་ཕྱིན་པ་ཡིན་པར་རིག་པར་བྱའོ།

དེ་ནས་ཚེ་དང་ལྡན་པ་བྱམས་མའི་བུ་གང་པོས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ།

ཚེ་དང་ལྡན་པ་ཅི་འདི་ཁྱོད་ཉིད་ཀྱི་སྤོབས་པ་ཡིན་ནམ་འོན་ཏེ་བཅོམ་ལྡན་འདས་ཀྱི་བྱིན་གྱི་རླབས་ཡིན་སྨྲས་པ།

ཚེ་དང་ལྡན་པ་བདག་གི་སྤོབས་པ་གང་ཡིན་པ་འདི་ནི།

དེ་བཞིན་གཤེགས་པའི་བྱིན་གྱི་རླབས་ཡིན་ནོ།

ཚེ་དང་ལྡན་པ་གང་པོ་འདི་ལ་འཇིག་རྟེན་གྱི་ཁམས་དཔག་ཏུ་མེད།

གྲངས་མེད།

ཚད་མེད་པ་དག་ན་སེམས་ཅན་གང་དག་གནས་པ་དེ་དག་དགྲ་བཅོམ་པའི་འབྲས་བུ་མངོན་སུམ་དུ་བྱ་བར་འདོད་པའི་ཕྱིར་བསྐལ་པ་གང་གཱའི་ཀླུང་གི་བྱེ་མ་སྙེད་དུ་སོ་སོའི་སྐྱེ་བོ་རྣམས་སམ།

ཉན་ཐོས་རྣམས་སམ།

རང་སངས་རྒྱས་རྣམས་ལ་སྦྱིན་པ་བྱིན་ལ།

སྦྱིན་པ་དེ་ཡང་བྱང་ཆུབ་སེམས་དཔས་བསམས་ཏེ།

བསམས་ནས་ཀྱང་འདི་སྐད་དུ་སྦྱིན་པ་འདི་ལ་རྗེས་སུ་ཡི་རང་ངོ་ཞེས་ཟེར་ཞིང་།

དེ་ལྟར་ཡོངས་

སུ་གཏོང་བ་རྣམས་ཀྱི་དེ་ལ་བྱང་ཆུབ་སེམས་དཔའི་རྗེས་སུ་ཡི་རང་བ་དང་ལྡན་པའི་བསོད་ནམས་བྱ་བའི་དངོས་པོ་ཡོད་ལ།

རྗེས་སུ་ཡི་རང་ནས་དགེ་བའི་རྩ་བ་དེ་འདི་ལྟར་ཡོངས་སུ་སྔོ་བར་བྱེད་དེ།

རྗེས་སུ་ཡི་རང་བ་དང་ལྡན་པའི་དགེ་བའི་རྩ་བ་འདིས་འཇིག་རྟེན་གྱི་ཁམས་མཐའ་ཡས་མུ་མེད་པ་དག་ན།

ཐེག་པ་ལ་གསར་དུ་ཞུགས་པའི་བྱང་ཆུབ་སེམས་དཔའ་གང་དག་གནས་པ་དེ་དག་ནི་ཕྱིར་མི་ལྡོག་པ་ཉིད་དུ་གྱུར་ཅིག །

ཕྱིར་མི་ལྡོག་པ་གང་དག་གནས་པ་དེ་དག་ནི་མྱུར་དུ་རྣམ་པ་ཐམས་ཅད་མཁྱེན་པ་ཉིད་ཡོངས་སུ་རྫོགས་པར་གྱུར་ཅིག་ཅེ་ན།

རྗེས་སུ་ཡི་རང་བ་དང་ལྡན་པའི་དགེ་བའི་རྩ་བ་དེ་དེ་ལྟར་ཡོངས་སུ་སྔོ་བར་བྱེད་པའི་བྱང་ཆུབ་སེམས་དཔའ་ནི་མྱུར་དུ་རྣམ་པ་ཐམས་ཅད་མཁྱེན་པ་ཉིད་ཡོངས་སུ་རྫོགས་པར་འགྱུར་ཏེ།

དེ་ལ་སེམས་ཅན་ཡོངས་སུ་གཏོང་བར་བྱེད་པ་དེ་དག་གི་བསོད་ནམས་མངོན་པར་འདུ་བྱེད་པ་གང་ཡིན་པ་དགེ་བའི་རྩ་བ་སྔ་མ་དེ་ནི།

བྱང་ཆུབ་སེམས་དཔའི་རྗེས་སུ་ཡི་རང་བ་དང་ལྡན་པའི་སེམས་ལ་བརྒྱའི་ཆར་ཡང་ཉེ་བར་མི་འགྲོའོ།

སྟོང་གི་ཆ་དང་།

འབུམ་གྱི་ཆ་དང་།

བྱེ་བའི་ཆ་དང་།

བྱེ་བ་འབུམ་གྱི་ཆ་དང་།

གྲངས་དང་།

ཆ་དང་།

བགྲང་བ་དང་།

དཔེ་དང་།

རྒྱུར་ཡང་ཉེ་བར་མི་འགྲོའོ།

དེ་ཅིའི་ཕྱིར་ཞེ་ན།

འདི་ལྟར་བྱང་ཆུབ་སེམས་དཔའི་རྗེས་སུ་ཡི་རང་བ་དང་ལྡན་པའི་སེམས་བསྐྱེད་པ་དེས་ཐམས་ཅད་ཟིལ་གྱིས་ནོན་པའི་ཕྱིར་རོ།

ཚེ་དང་ལྡན་པ་གང་པོ་སངས་རྒྱས་བཅོམ་ལྡན་འདས་འདི་ཉིད་ཀྱིས་འདིར་ཐབས་ལ་མཁས་པ་ཉིད་བཙན་པར་མཛད་དོ།

ཚེ་དང་ལྡན་པ་གང་པོ་གཞན་ཡང་གལ་ཏེ་སེམས་ཅན་དེ་དག་ཐམས་ཅད་བསྐལ་པ་གང་གཱའི་ཀླུང་གི་བྱེ་མ་སྙེད་དུ་གནས་ཤིང་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་སྦྱིན་པ་དག་ཀྱང་སྦྱིན་ཞིང་བསོད་ནམས་དག་ཀྱང་བྱེད་ལ།

དེ་ལ་བྱང་ཆུབ་སེམས་དཔའ་རྗེས་སུ་ཡི་རང་སྟེ།

ཀྱེ་མ་སྦྱིན་པ་འདི་ནི་ལེགས་པར་བྱིན་ནོ།

ལེགས་པར་སྦྱིན་པར་བྱེད་དོ།

བསྟི་སྟང་དུ་བྱས་ཏེ་སྦྱིན་པར་བྱེད་དོ་ཞེ་སར་བྱས་ཏེ་སྦྱིན་པར་བྱེད་དོ།

སྨད་པ་མེད་པར་སྦྱིན་པར་བྱེད་དོ།

སྦྱིན་པ་འདི་ལ་རྗེས་སུ་ཡི་རང་ངོ་ཞེ་ན།

བྱང་ཆུབ་སེམས་དཔའ་དེའི་རྗེས་སུ་ཡི་རང་བ་དང་ལྡན་པའི་སེམས་ལ་སྔ་མའི་སྦྱིན་པ་དང་ལྡན་པའི་བསོད་ནམས་མངོན་པར་འདུ་བྱེད་པ་

དེས་བརྒྱའི་ཆར་ཡང་ཉེ་བར་མི་འགྲོའོ།

སྟོང་གི་ཆ་དང་།

འབུམ་གྱི་ཆ་དང་།

བྱེ་བའི་ཆ་དང་།

བྱེ་བ་འབུམ་གྱི་ཆ་དང་།

གྲངས་དང་།

ཆ་དང་།

བགྲང་བ་དང་།

དཔེ་དང་།

རྒྱུར་ཡང་ཉེ་བར་མི་འགྲོའོ།

དེ་ཅིའི་ཕྱིར་ཞེ་ན།

འདི་ལྟར་བྱང་ཆུབ་སེམས་དཔའ་ནི་རྗེས་སུ་ཡི་རང་བའི་སེམས་ཀྱིས་ཟིལ་གྱིས་གནོན་པར་བྱེད་པར་རིག་པར་བྱའོ།

ཚེ་དང་ལྡན་པ་གང་པོ་དཔེར་ན་ཟླ་བའི་དཀྱིལ་འཁོར་འཆར་བ་ན་སྐར་མའི་གཟུགས་གང་ཇི་སྙེད་ཡོད་པ་དེ་དག་ཐམས་ཅད་ཀྱི་འོད་མེད་པར་བྱེད་དོ།

ཚེ་དང་ལྡན་པ་གང་པོ་དཔེར་ན་ཉི་མའི་དཀྱིལ་འཁོར་འཆར་བ་ན་འཛམ་བུའི་གླིང་འདི་སྲོག་ཆགས་ཀྱི་རིགས་སྲིན་བུ་མེ་ཁྱེར་གྱིས་གང་བར་གྱུར་པ་ཐམས་ཅད་ཟིལ་གྱིས་མནན་ཏེ་འོད་མེད་པར་བྱེད་དོ།

ཚེ་དང་ལྡན་པ་གང་པོ་དཔེར་ན་མཆིང་བུའི་ནོར་བུ་བརྒྱ་འམ།

སྟོང་ངམ།

བྱེ་བའམ།

བྱེ་བ་སྟོང་ཕུང་པོ་ཆེན་པོར་གྱུར་ལ།

དེའི་ནང་དུ་བཻ་དཱུརྱའི་ནོར་བུ་གཅིག་བཞག་ན་མཆིང་བུའི་ནོར་བུ་དེ་ཐམས་ཅད་ནོར་བུ་རིན་པོ་ཆེ་བཻ་དཱུརྱ་གཅིག་པུའི་ཁ་དོག་དང་འོད་ཀྱིས་ཟིལ་གྱིས་གནོན་པར་འགྱུར་ཏེ།

འོད་མི་སྣང་ཞིང་མི་སྤ་བར་འགྱུར་རོ།

ཚེ་དང་ལྡན་པ་གང་པོ་དེ་བཞིན་དུ་སེམས་ཅན་དེ་དག་ཐམས་ཅད་བསྐལ་པ་དཔག་ཏུ་མེད་པ་གང་གཱའི་ཀླུང་གི་བྱེ་མ་སྙེད་དུ་གནས་པའི་སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་ནི་བྱང་ཆུབ་སེམས་དཔའ་དེའི་རྗེས་སུ་ཡི་རང་བ་དང་ལྡན་པའི་སེམས་ཀྱི་བརྒྱའི་ཆར་ཡང་ཉེ་བར་མི་འགྲོ་བ་ནས་རྒྱུའི་བར་དུ་ཡང་ཉེ་བར་མི་འགྲོའོ།

ཚེ་དང་ལྡན་པ་གང་པོ་དཔེར་ན།

རྟ་རིན་པོ་ཆེ་རྟ་སྟོང་གི་ནང་དུ་ཞུགས་ན།

རྟ་ཕལ་དེ་དག་ཐམས་ཅད་གསལ་བ་མ་ཡིན་ཞིང་སྤ་བ་མ་ཡིན་ལ།

རྟའི་རྒོད་པའི་བག་ཀྱང་སྟོན་པར་མི་བྱེད་དེ།

དེ་དག་ཐམས་ཅད་རྟ་རིན་པོ་ཆེ་དེས་ཟིལ་གྱིས་གནོན་པར་འགྱུར་རོ།

ཚེ་དང་ལྡན་པ་གང་པོ་དེ་བཞིན་དུ་བསྐལ་པ་གང་གཱའི་ཀླུང་གི་བྱེ་མ་སྙེད་དུ་གནས་པའི་སེམས་ཅན་དེ་དག་ཐམས་ཅད་ཀྱི་སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་གང་ཡིན་པ་དེ།

བྱང་ཆུབ་སེམས་དཔའི་རྗེས་སུ་ཡི་རང་བ་དང་ལྡན་པའི་སེམས་ཀྱི་བརྒྱའི་ཆར་ཡང་ཉེ་བར་མི་འགྲོ་བ་ནས་རྒྱུའི་བར་དུ་ཡང་ཉེ་བར་མི་འགྲོ་སྟེ།

དེ་དག་ཐམས་ཅད་བྱང་ཆུབ་སེམས་དཔས་རྗེས་སུ་ཡི་རང་

བའི་སེམས་ཀྱིས་ཟིལ་གྱིས་གནོན་པར་འགྱུར་རོ།

ཚེ་དང་ལྡན་པ་གང་པོ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དེས་ཀྱང་རྗེས་སུ་ཡི་རང་བ་དང་ལྡན་པའི་བསོད་ནམས་བྱ་བའི་དངོས་པོ་འཇིག་རྟེན་གྱི་ཁམས་དཔག་ཏུ་མེད་པ་གྲངས་མེད་པ་དག་ན་ཐེག་པ་ལ་གསར་དུ་ཞུགས་པའི་བྱང་ཆུབ་སེམས་དཔའ་གང་དག་གནས་པ་དེ་དག་ནི་ཕྱིར་མི་ལྡོག་པར་གྱུར་ཅིག །

ཕྱིར་མི་ལྡོག་པའི་བྱང་ཆུབ་སེམས་དཔའ་གང་དག་གནས་པ་དེ་དག་ནི་མྱུར་དུ་རྣམ་པ་ཐམས་ཅད་མཁྱེན་པ་ཉིད་ཡོངས་སུ་རྫོགས་པར་གྱུར་ཅིག །

ཅེས་ཡོངས་སུ་བསྔོ་བར་བྱའོ།

ཇི་ལྟ་ཇི་ལྟར་བྱང་ཆུབ་སེམས་དཔའ་དགེ་བའི་རྩ་བ་དེ་ཡོངས་སུ་གཏོང་བ་དེ་ལྟ་དེ་ལྟར་སྣང་བར་འགྱུར་ཞིང་རྣམ་པ་ཐམས་ཅད་མཁྱེན་པ་ཉིད་དང་ཉེ་བར་འགྱུར་རོ།

ཇི་ལྟ་ཇི་ལྟར་དགེ་བའི་རྩ་བ་དེ་དག་བདག་གིར་མི་བྱེད་ཅིང་།

དགེ་བའི་རྩ་བ་འདིས་སེམས་ཅན་ཐམས་ཅད་བདེ་བར་གྱུར་ཅིག་ཅེས་སེམས་བསྐྱེད་པ་དེ་ལྟ་དེ་ལྟར་དགེ་བའི་རྩ་བ་རྣམས་ཀྱིས་འབོགས་པར་འགྱུར་རོ།

ཇི་ལྟ་ཇི་ལྟར་དགེ་བའི་རྩ་བ་རྣམས་ཀྱིས་འབོགས་པ་དེ་ལྟ་དེ་ལྟར་རྣམ་པ་ཐམས་ཅད་མཁྱེན་པ་ཉིད་དང་ཉེ་བར་འགྱུར་རོ།

ཇི་ལྟ་ཇི་ལྟར་དགེ་བའི་རྩ་བ་དེ་དག་ལ་བདག་གི་བར་སེམས་མི་སྐྱེད་པ་དེ་ལྟ་དེ་ལྟར་དགེ་བའི་རྩ་བ་དཔག་ཏུ་མེད་པ་འཛིན་ཏོ།

དེ་ཅིའི་ཕྱིར་ཞེ་ན།

རྣམ་པ་ཐམས་ཅད་མཁྱེན་པ་ཉིད་དཔག་ཏུ་མེད་པའི་ཕྱིར་རོ།

ཚེ་དང་ལྡན་པ་གང་པོ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོའི་རྗེས་སུ་ཡི་རང་བའི་སེམས་ཐབས་ལ་མཁས་པས་ཡོངས་སུ་བསྔོས་ནས་ཐེག་པ་ལ་གསར་དུ་ཞུགས་པའི་བྱང་ཆུབ་སེམས་དཔའ་རྣམས་ལ་ཕན་འདོགས་པར་བྱེད་དེ་རྗེས་སུ་འཛིན་ཅིང་ཕྱིར་མི་ལྡོག་པའི་བྱང་ཆུབ་སེམས་དཔའ་རྣམས་ཀྱང་མངོན་པར་ཤེས་པ་མྱུར་བར་ཡོངས་སུ་སྔོའོ།

དེས་དེ་དག་ལ་ཡང་ཕན་བཏགས་ནས་བདག་ཉིད་ཀྱང་རྣམ་པ་ཐམས་ཅད་མཁྱེན་པ་ཉིད་ཡོངས་སུ་འཛིན་པར་བྱེད་པ་འདི་ནི།

ཚེ་དང་ལྡན་པ་གང་པོ་བྱང་ཆུབ་སེམས་དཔའི་ཐབས་ལ་མཁས་པ་ཡིན་པར་རིག་པར་བྱའོ།

དེ་ཅིའི་ཕྱིར་ཞེ་ན།

འདི་ལྟར་རྣམ་པ་ཐམས་ཅད་མཁྱེན་པ་ཉིད་དུ་ཡོངས་སུ་བསྔོས་པའི་ཕྱིར་ཏེ།

བདག་དང་དེ་ལས་གཞན་པའི་བྱང་ཆུབ་སེམས་

དཔའ་སེམས་དཔའ་ཆེན་པོ་རྣམས་ཀྱང་དོན་ཆེ་བར་བྱེད་དོ།

སྦྱིན་པའི་ཕ་རོལ་ཏུ་ཕྱིན་པ་ལས་རྗེས་སུ་ཡི་རང་བའི་ལེའུ་སྟེ་དང་པོའོ།།

ཚེ་དང་ལྡན་པ་གང་པོ་གཞན་ཡང་བསྐལ་པ་གང་གཱའི་ཀླུང་གི་བྱེ་མ་སྙེད་དུ་གནས་པའི་སེམས་ཅན་དེ་ཐམས་ཅད་ཀྱིས་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་སྦྱིན་པ་སྦྱིན་པ་དང་།

བསོད་ནམས་དག་ཀྱང་བྱེད་པ་གང་ཡིན་པ་དང་།

བྱང་ཆུབ་སེམས་དཔའ་སེམས་དཔའ་ཆེན་པོས་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་བསོད་སྙོམས་ལན་ཅིག་ཙམ་འབུལ་ན་ཡང་།

བསོད་སྙོམས་འབུལ་བ་གང་ཡིན་པ་འདི་ལ་དགེ་བའི་རྩ་བ་སྔ་མས་བརྒྱའི་ཆར་ཡང་ཉེ་བར་མི་འགྲོ་བ་ནས་རྒྱུའི་བར་དུ་ཡང་མི་བཟོད་དོ།

དེ་ཅིའི་ཕྱིར་ཞེ་ན།

ཡོངས་སུ་བསྔོས་པའི་ཕྱིར་རོ།

ཚེ་དང་ལྡན་པ་གང་པོ་བྱང་ཆུབ་སེམས་དཔའ་དང་སེམས་ཅན་དེ་དག་གི་ལེན་པ་པོ་ནི་མཚུངས་ཏེ།

ལེན་པ་པོ་མི་མཚུངས་པ་མ་ཡིན་མོད་ཀྱི།

བསྔོ་བ་དང་བྲལ་བའི་ཕྱིར་སེམས་ཅན་དེ་དག་གི་སྦྱིན་པ་དེ།

བྱང་ཆུབ་སེམས་དཔའི་སྦྱིན་པའི་བརྒྱའི་ཆར་ཡང་ཉེ་བར་མི་འགྲོ་བ་ནས་རྒྱུའི་བར་དུ་ཡང་མི་བཟོད་དོ།

ཚེ་དང་ལྡན་པ་གང་པོ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པ་སྦྱིན་པ་ན།

འདི་ལྟར་བདག་གིས་སྦྱིན་པ་འདི་ལྟར་བྱིན་ཞིང་།

འདི་ལྟར་ཡོངས་སུ་བཏང་བ་ལས་བསོད་ནམས་མངོན་པར་འདུ་བྱེད་པ་གང་ཡིན་པ་དང་།

དགེ་བ་མངོན་པར་འདུ་བྱེད་པ་གང་ཡིན་པའི་དགེ་བ་མངོན་པར་འདུ་བྱེད་པ་དེས་སེམས་ཅན་དམྱལ་བའི་སེམས་ཅན་རྣམས།

སེམས་ཅན་དམྱལ་བ་ནས་འདོན་པར་གྱུར་ཅིག །

དུད་འགྲོའི་སྐྱེ་གནས་སུ་སྐྱེས་པའི་སེམས་ཅན་རྣམས་དུད་འགྲོའི་སྐྱེ་གནས་ནས་འདོན་པར་གྱུར་ཅིག །

གཤིན་རྗེའི་འཇིག་རྟེན་གྱི་སེམས་ཅན་རྣམས།

གཤིན་རྗེའི་འཇིག་རྟེན་ནས་འདོན་པར་གྱུར་ཅིག །

འཇིག་རྟེན་གྱི་ཁམས་མཐའ་ཡས་མུ་མེད་པ་དག་ན་ཐེག་པ་ལ་གསར་དུ་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་གནས་པ་དེ་དག་ནི་ཕྱིར་མི་ལྡོག་པ་ཉིད་དུ་གྱུར་ཅིག །

ཕྱིར་མི་ལྡོག་པའི་བྱང་ཆུབ་སེམས་དཔའ་གང་དག་གནས་པ་དེ་དག་ནི་མྱུར་དུ་རྣམ་པ་ཐམས་ཅད་མཁྱེན་པ་ཉིད་ཡོངས་སུ་རྫོགས་པར་གྱུར་ཅིག་ཅེས་སེམས་བསྐྱེད་པར་བྱ་སྟེ།

ཇི་ལྟ་

ཇི་ལྟར་བྱང་ཆུབ་སེམས་དཔའ་དགེ་བའི་རྩ་བ་དེ་དག་སྐྱེད་པ་དེ་ལྟ་དེ་ལྟར་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་འཛིན་པར་བྱེད་དེ།

དགེ་བའི་རྩ་བ་དཔག་ཏུ་མེད་པ་ཡང་རྣམ་པར་འཕེལ་བར་བྱེད་ཅིང་རྣམ་པ་ཐམས་ཅད་མཁྱེན་པ་ཉིད་དང་ཡང་ཉེ་བར་འགྱུར་ཏེ།

འདི་ཡང་བྱང་ཆུབ་སེམས་དཔའི་ཐབས་ལ་མཁས་པ་ཡིན་པར་རིག་པར་བྱའོ།

ཇི་ལྟ་ཇི་ལྟར་དགེ་བའི་རྩ་བ་རྣམས་ལ་བདག་གི་བར་འདུ་ཤེས་མི་བྱེད་པ་དེ་ལྟ་དེ་ལྟར་བསོད་ནམས་དཔག་ཏུ་མེད་པ་མངོན་པར་འདུ་བྱེད་པ་ཡོངས་སུ་འཛིན་ཏོ།

དེ་ཅིའི་ཕྱིར་ཞེ་ན།

རྣམ་པ་ཐམས་ཅད་མཁྱེན་པ་ཉིད་དཔག་ཏུ་མེད་པའི་ཕྱིར་རོ།

ཚེ་དང་ལྡན་པ་གང་པོ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་བདོག་པ་ཐམས་ཅད་ཡོངས་སུ་གཏོང་བ་ཡིན་ནོ།

དགེ་བའི་རྩ་བ་གཟུགས་མེད་པ་གང་ཡིན་པ་ཡང་ཡོངས་སུ་གཏོང་ན་གཟུགས་ཡོད་པའི་དངོས་པོ་ལྟ་ཅི་སྨོས་ཏེ།

དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་གཟུགས་ཡོད་པ་དང་།

གཟུགས་མེད་པའི་དངོས་པོ་ཐམས་ཅད་ཡོངས་སུ་གཏོང་བ་ཡིན་ཏེ།

ཐམས་ཅད་ཡོངས་སུ་གཏོང་བས་ན།

དེ་ཐམས་ཅད་མཁྱེན་པར་འགྱུར་རོ།

འདི་སྐད་དུ་ནང་གིའམ།

ཕྱི་རོལ་གྱི་འམ།

གཟུགས་ཡོད་པའམ།

གཟུགས་མེད་པ་ཡང་རུང་སྟེ།

གང་བདག་གིས་ཡོངས་སུ་མ་བཏང་བའམ།

མ་བྱིན་པའམ།

མཆོད་སྦྱིན་མ་བྱས་པའི་ཆོས་དེ་ཡང་དག་པར་རྗེས་སུ་མི་མཐོང་།

དངོས་པོ་དེ་ཡང་དག་པར་རྗེས་སུ་མི་མཐོང་ངོ་།

ཞེས་ཀྱང་སེང་གེའི་སྒྲ་སྒྲོག་ཅིང་དེ་ལྟར་དགའ་བ་སྐྱེད་དོ།

ཚེ་དང་ལྡན་པ་གང་པོ་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་ཀྱིས་གཟིགས་ཏེ།

འདི་སྐད་དུ་ནང་གིའམ།

ཕྱི་རོལ་གྱིའམ།

གཟུགས་ཡོད་པའམ།

གཟུགས་མེད་པ་ཡང་རུང་སྟེ།

གང་བདག་གིས་ཡོངས་སུ་མ་བཏང་བའམ།

མ་བྱིན་པའམ།

མཆོད་སྦྱིན་མ་བྱས་པའི་ཆོས་དེ་ཡང་དག་པར་རྗེས་སུ་མི་མཐོང་སྟེ།

གང་གི་ཕྱིར་བདག་གིས་དངོས་པོ་དེ་ཡང་དག་པར་རྗེས་སུ་མི་མཐོང་བ་དེའི་ཕྱིར་བདག་བླ་ན་མེད་པ་ཡང་དག་པར་རྫོགས་པའི་བྱང་

ཆུབ་མངོན་པར་རྫོགས་པར་སངས་རྒྱས་ནས།

གང་བདག་གིས་མངོན་པར་རྫོགས་པར་སངས་མ་རྒྱས་པའམ།

ཡོངས་སུ་མ་ཤེས་པའི་ཆོས་དེ་ཡང་དག་པར་རྗེས་སུ་མི་མཐོང་ངོ་།

ཇི་ལྟར་ཆོས་དེ་ཡང་དག་པར་རྗེས་སུ་མི་མཐོང་བ་དེ་ལྟར་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཆོས་ཐམས་ཅད་ལ་ཕ་རོལ་ཏུ་ཕྱིན་པ་དམ་པ་ཐོབ་སྟེ།

གང་བདག་གིས་མངོན་པར་རྫོགས་པར་སངས་མ་རྒྱས་པའམ།

ཡོངས་སུ་མ་ཤེས་པ་དེ་ཅི་ཡང་མེད་དོ།

ཇི་ལྟར་གང་བདག་གིས་ཡོངས་སུ་མ་བཏང་བའམ།

མ་བྱིན་པ་དེ་ཅི་ཡང་མེད་པ་དེ་ལྟར་བདག་གིས་ཆོས་གང་མངོན་པར་རྫོགས་པར་སངས་མ་རྒྱས་པའམ།

ཡོངས་སུ་མ་ཤེས་པའི་ཆོས་དེ་ཡང་དག་པར་རྗེས་སུ་མི་མཐོང་ངོ་ཞེས་སེང་གེའི་སྒྲ་སྒྲོག་གོ།

ཚེ་དང་ལྡན་པ་གང་པོ་བྱང་ཆུབ་སེམས་དཔའ་སེམས་དཔའ་ཆེན་པོས་དེ་ལྟར་ནང་དང་ཕྱི་རོལ་གྱི་དངོས་པོ་རྣམས་ཡོངས་སུ་བཏང་བས་ན།

ནང་དང་ཕྱིའི་ཆོས་རྣམས་ལ་ཆོས་གང་མངོན་པར་རྫོགས་པར་སངས་མ་རྒྱས་པའམ།

ཡོངས་སུ་མ་ཤེས་པའི་ཆོས་ཅི་ཡང་ཡང་དག་པར་རྗེས་སུ་མ་མཐོང་སྟེ།

ཚེ་དང་ལྡན་པ་གང་པོ་བྱང་ཆུབ་སེམས་དཔའ་སེམས་དཔའ་ཆེན་པོས་སྦྱིན་པའི་ཕ་རོལ་ཏུ་ཕྱིན་པ་ལ་དེ་ལྟར་བསླབ་པར་བྱའོ།

བྱང་ཆུབ་སེམས་དཔའ་དེ་ལྟར་སློབ་ན་བྱང་ཆུབ་སེམས་དཔའ་ཞེས་བྱ་བའི་མིང་ཐོབ་ཅིང་རྣམ་པ་ཐམས་ཅད་མཁྱེན་པ་ཉིད་ཀྱི་སེམས་དང་ཡང་མི་འབྲལ་བར་འགྱུར་རོ།

གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པ་ཐམས་ཅད་མཁྱེན་པ་ཉིད་ཀྱི་སེམས་དང་མི་འབྲལ་བ་དེའི་ཚེ་བྱང་ཆུབ་སེམས་དཔའ་ལ་བདུད་སྡིག་ཅན་གྱིས་ཀྱང་གླགས་མི་རྙེད་ན།

གནོད་སྦྱིན་ནམ་ཤ་ཟས་གླགས་རྙེད་པ་ལྟ་ཅི་སྨོས་ཏེ་འདི་ནི་གནས་མེད་དོ།

ཚེ་དང་ལྡན་པ་གང་པོ་ཕྱོགས་གང་དུ་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་ཀྱི་ཆོས་སེམས་ཤིང་འགྲོ་བའི་ཕྱོགས་དེར་མིའམ།

མི་མ་ཡིན་པ་རྣམས་ཀྱིས་གླགས་མི་རྙེད་དོ།

དེ་ཅིའི་ཕྱིར་ཞེ་ན།

ཡིད་ལ་བྱེད་པ་དེ་དག་ནི་དེ་ལྟར་སྟོབས་དང་ལྡན་པའི་ཕྱིར་རོ།

འདི་ལྟར་ཐམས་ཅད་མཁྱེན་པ་ཉིད་ཡིད་ལ་བྱེད་པ་རྣམས་ནི་དེ་

ལྟར་བསམ་གྱིས་མི་ཁྱབ་ཅིང་དེ་ལྟར་རྒྱ་ཆེའོ།

ཚེ་དང་ལྡན་པ་གང་པོ་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་ཀྱི་ཕྱིར་སྤྱོད་པ་ནི་དེ་ལྟར་སེམས་ཅན་རྣམས་ལ་ཕན་འདོགས་པ་ཡང་ཡིན་ལ་ཉེ་བར་འཚོ་བ་ཡང་ཡིན་ནོ།

ཚེ་དང་ལྡན་པ་གང་པོ་རྣམ་གྲངས་འདིས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་ནི་བྱིས་པ་སོ་སོའི་སྐྱེ་བོ་ཐམས་ཅད་དང་།

ཉན་ཐོས་དང་།

རང་སངས་རྒྱས་ཐམས་ཅད་ཟིལ་གྱིས་གནོན་ཏོ།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཀྱང་ཕན་འདོགས་པར་གྱུར་པ་དང་ཉེ་བར་འཚོ་བ་ཡིན་ནོ།

སེམས་ཅན་རྣམས་ཀྱི་ཉོན་མོངས་པ་སྤངས་པའི་ཕྱིར་ཆོས་ཀྱང་སྟོན་ཏོ།

སེམས་ཅན་དཔག་ཏུ་མེད་པ་ཡང་ཕུང་པོ་གསུམ་དུ་ཡོངས་སུ་མྱ་ངན་ལས་ཟློ་བར་བྱེད་དོ།

ཚེ་དང་ལྡན་པ་གང་པོ་རྣམ་གྲངས་འདིས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་བྱིས་པ་སོ་སོའི་སྐྱེ་བོ་ཐམས་ཅད་དང་།

ཉན་ཐོས་དང་།

རང་སངས་རྒྱས་ཐམས་ཅད་ཀྱི་མཆོག་ཅེས་བྱ།

གཙོ་བོ་དང་།

ཕུལ་དང་།

རབ་དང་།

རབ་མཆོག་དང་།

བླ་ན་མེད་པ་དང་གོང་ན་མེད་པ་ཞེས་བྱའོ།

ཡོངས་སུ་མྱ་ངན་ལས་འདས་ནས་ཀྱང་སེམས་ཅན་རྣམས་ཀྱི་ཕན་འདོགས་པར་གྱུར་པ་དང་ཉེ་བར་འཚོ་བ་ཡིན་ཏེ།

གང་དག་དེ་བཞིན་གཤེགས་པའི་མཆོད་རྟེན་ལ་སྤོས་དང་།

མེ་ཏོག་དང་།

ཕྲེང་བ་དང་།

བྱུག་པ་དང་།

ཕྱེ་མ་དང་།

ན་བཟའ་དང་།

གདུགས་དང་།

རྒྱལ་མཚན་དང་།

བ་དན་རྣམས་ཀྱིས་བཀུར་སྟིར་བྱེད།

བླ་མར་བྱེད།

རི་མོར་བྱེད།

མཆོད་པ་བྱེད་དེ།

དེ་ལྟར་དགེ་བའི་རྩ་བ་བསྐྱེད་ནས་ཡོངས་སུ་མྱ་ངན་ལས་འདའ་བའི་ཆོས་ཅན་དུ་འགྱུར་རོ།

གང་དག་འདོད་ཆགས་དང་བྲལ་བའི་བསམ་པས་དེ་བཞིན་གཤེགས་པའི་མཆོད་རྟེན་ལ་མེ་ཏོག་གཅིག་ཙམ་འབུལ་བ་དེ་དག་ཐམས་ཅད་ཀྱང་བཅོམ་ལྡན་འདས་ཀྱིས་མྱ་ངན་ལས་འདའ་བའི་ཆོས་ཅན་དུ་ལུང་བསྟན་ཏོ།

ཚེ་དང་ལྡན་པ་གང་པོ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ནི་འདུག་ན་ཡང་སེམས་ཅན་རྣམས་ཀྱི་ཕན་འདོགས་

པར་གྱུར་པ་དང་ཉེ་བར་འཚོ་བ་ཡིན་ལ།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དང་།

ཡོངས་སུ་མྱ་ངན་ལས་འདས་ན་ཡང་སེམས་ཅན་རྣམས་ཀྱིས་ཕན་འདོགས་པ་དང་ཉེ་བར་འཚོ་བ་ཡིན་ཏེ།

བྱང་ཆུབ་སེམས་དཔའ་སེམས་དཔའ་ཆེན་པོ་ནི་ནམས་ཀྱང་སེམས་ཅན་རྣམས་ཀྱི་ཉེ་བར་འཚོ་བར་མི་འགྱུར་བ་མ་ཡིན་ནོ།

དེ་བཞིན་གཤེགས་པ་མ་གཏོགས་པར་སེམས་ཅན་གྱི་རིས་ན་བྱང་ཆུབ་སེམས་དཔའི་ཡོན་ཏན་འདི་ལྟ་བུ་དག་དང་ལྡན་པའི་སེམས་ཅན་དེ་གང་ཡང་མི་དམིགས་ཏེ།

ཡོད་ཅེས་བྱ་བ་ནི་གནས་མེད་དོ།

ཚེ་དང་ལྡན་པ་གང་པོ་དཔེར་ན་གསེར་ནི་བསྲེགས་ཀྱང་རུང་།

མ་བསྲེགས་ཀྱང་རུང་སྟེ།

སེམས་ཅན་རྣམས་ཀྱི་ཉེ་བར་འཚོ་བ་ཡིན།

བཞུ་ཡང་རུང་།

མ་བཞུ་ཡང་རུང་།

བརྡུངས་སུ་བྱས་ཀྱང་རུང་།

བརྡུངས་སུ་མ་བྱས་ཀྱང་རུང་སྟེ།

སེམས་ཅན་རྣམས་ཀྱི་ཉེ་བར་འཚོ་བ་ཡིན་ནོ།

ཚེ་དང་ལྡན་པ་གང་པོ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་ཀྱི་ཕྱིར་སྤྱོད་པ་ཡང་སེམས་ཅན་རྣམས་ཀྱི་ཉེ་བར་འཚོ་བ་ཡིན་ལ།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དང་།

ཡོངས་སུ་མྱ་ངན་ལས་འདས་ན་ཡང་སེམས་ཅན་རྣམས་ཀྱི་ཉེ་བར་འཚོ་བ་ཡིན་ནོ།

ཚེ་དང་ལྡན་པ་གང་པོ་དཔེར་ན་ཟླ་བ་དང་ཉི་མ་གཉིས་ནི་གླིང་བཞི་པོ་དག་ཏུ་སེམས་ཅན་རྣམས་ཀྱི་བྱ་བ་བྱེད་ཅིང་གླིང་བཞི་པོ་དག་གི་ཉེ་བར་འཚོ་བ་ཡིན་ཏེ།

འདི་ལྟར་ཟླ་བ་དང་ཉི་མ་འདི་གཉིས་ཡོད་ན་སྣང་ཞིང་གསལ་ལ་ཉིན་མཚན་དང་།

ཟླ་བ་ཕྱེད་དང་།

དུས་ཚིགས་དང་།

ལོ་རྣམས་ཤེས་པར་འགྱུར་རོ།

ཚེ་དང་ལྡན་པ་གང་པོ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་འདུག་ན་ཡང་སེམས་ཅན་རྣམས་ཀྱི་ཉེ་བར་འཚོ་བ་ཡིན་ལ།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དང་ཡོངས་སུ་མྱ་ངན་ལས་འདས་ན་ཡང་སེམས་ཅན་རྣམས་ཀྱི་ཉེ་བར་འཚོ་བ་ཡིན་ནོ།

ཚེ་དང་ལྡན་པ་གང་པོ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་དེ་ལྟར་ཆོས་རྒྱ་ཆེན་པོ་དང་ལྡན་པས་ན་ནམས་ཀྱང་སེམས་ཅན་རྣམས་ཀྱི་ཉེ་བར་འཚོ་བར་མི་འགྱུར་བ་མ་ཡིན་ནོ།

ཚེ་དང་ལྡན་པ་གང་པོ་དཔེར་

ན་དེད་དཔོན་གསེར་འབུམ་དག་གིས་ཉོ་འཚོང་བྱེད་ན།

སེམས་ཅན་ཚད་མེད་དཔག་ཏུ་མེད་པ་དག་བདེ་བར་འགྱུར་ཏེ་དེས་ནོར་གྱི་ཕུང་པོ་བསྡུས་པ་ལ་དེ་དག་ཡོངས་སུ་སྤྱོད་དོ།

ཚེ་དང་ལྡན་པ་གང་པོ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ནི་འདུག་གམ་སྡོད་ཀྱང་རུང་སྟེ།

སེམས་ཅན་དུ་མ་བདེ་བར་འགྱུར་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དང་།

ཡོངས་སུ་མྱ་ངན་ལས་འདས་པ་དེ་ཉིད་ཀྱི་མཐུས་ཉན་ཐོས་རྣམས་བདེ་བར་འགྱུར་བ་ལྟ་ཅི་སྨོས།

ཚེ་དང་ལྡན་པ་གང་པོ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སྤྱོད་པའི་ཚེའམ།

མངོན་པར་རྫོགས་པར་སངས་རྒྱས་པའམ།

ཡོངས་སུ་མྱ་ངན་ལས་འདས་པ་ན་ཡང་རུང་སྟེ་ནམས་ཀྱང་ཉེ་བར་འཚོ་བར་མི་འགྱུར་བ་མ་ཡིན་ནོ།

གང་གི་ཚེ་བདག་ཀྱང་བདེ་ལ།

སེམས་ཅན་གཞན་རྣམས་ཀྱང་བདེ་བར་བྱེད་པ་འདི་ནི་སྐྱེས་བུ་དམ་པའི་མཚན་ཉིད་དོ།

ཚེ་དང་ལྡན་པ་གང་པོ་དཔེར་ན།

རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ནི།

འདུག་པའི་ཚེ་ཡང་བྲམ་ཟེ་དང་ཁྱིམ་བདག་རྣམས་བདེ་བར་བྱེད་ལ།

ཤི་ན་ཡང་སྔོན་གྱི་གཟི་བྱིན་དྲག་པོ་དེས་ཡུལ་དེའི་ཕྱོགས་སུ་རྐུན་པོ་དང་།

ཆོམ་པོ་རྣམས་ཀྱིས་གླགས་མི་རྙེད་དོ།

ཚེ་དང་ལྡན་པ་གང་པོ་དེ་བཞིན་དུ།

བྱང་ཆུབ་སེམས་དཔའ་སེམས་དཔའ་ཆེན་པོ་ནི་འདུག་ན་ཡང་སེམས་ཅན་རྣམས་བདེ་བར་འགྱུར་ལ།

མངོན་པར་རྫོགས་པར་སངས་རྒྱས་པ་དང་།

ཡོངས་སུ་མྱ་ངན་ལས་འདས་ན་ཡང་སེམས་ཅན་དཔག་ཏུ་མེད་པ་དག་བདེ་བར་འགྱུར་ཞིང་།

གང་དག་དེའི་ཚུལ་ཁྲིམས་དྲན་པར་བྱེད་པ་དང་།

ཏིང་ངེ་འཛིན་དང་།

ཤེས་རབ་དང་།

རྣམ་པར་གྲོལ་བ་དང་།

རྣམ་པར་གྲོལ་བའི་ཡེ་ཤེས་མཐོང་བ་དྲན་པར་བྱེད་པའི་སེམས་ཅན་དེ་དག་ཀྱང་བདེ་བར་འགྱུར་ཏེ།

སེམས་ཅན་དེ་དག་ལ་མི་དང་མི་མ་ཡིན་པའི་འཇིགས་པས་དོགས་པར་མི་བྱའོ།

དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ།

ཤ་ར་དྭ་ཏིའི་བུ་ལེགས་སོ་ལེགས་སོ།

ཤ་ར་དྭ་ཏིའི་བུ་དེ་དེ་བཞིན་ཏེ།

སེམས་ཅན་དེ་དག་ལ་འཇིགས་པ་གང་གིས་ཀྱང་དོགས་པར་མི་བྱ་

སྟེ།

གང་དག་དེ་བཞིན་གཤེགས་པ་ལ་ཚུལ་ཁྲིམས་དང་།

ཏིང་ངེ་འཛིན་དང་།

ཤེས་རབ་དང་།

རྣམ་པར་གྲོལ་བ་དང་།

རྣམ་པར་གྲོལ་བའི་ཡེ་ཤེས་མཐོང་བ་ལས་དྲན་པར་བྱེད་ན།

དེ་དག་ལ་འཇིགས་པ་གང་གིས་ཀྱང་དོགས་པར་མི་བྱའོ།

དེ་ནས་ཚེ་དང་ལྡན་པ་ཤ་ར་དྭ་ཏིའི་བུས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་འདི་ལྟར་སངས་རྒྱས་བཅོམ་ལྡན་འདས་ཆོས་རྒྱ་ཆེན་པོ་དང་ལྡན་པ་ནི་ངོ་མཚར་ལགས་སོ།

བཅོམ་ལྡན་འདས་ཀྱིས་བཀའ་སྩལ་པ།

ཤ་ར་དྭ་ཏིའི་བུ་བྱང་ཆུབ་སེམས་དཔའ་རྣམས་ཀྱང་ཆོས་རྒྱ་ཆེན་པོ་དང་ལྡན་པར་བལྟའོ།

གསོལ་པ།

བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་རྒྱ་ཆེ་བ་གང་ལགས།

བཅོམ་ལྡན་འདས་ཀྱིས་བཀའ་སྩལ་པ།

ཤ་ར་དྭ་ཏིའི་བུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་གང་ཡིན་པ་འདི་ཉིད་རྒྱ་ཆེ་བ་ཡིན་ནོ།

དེ་ཅིའི་ཕྱིར་ཞེ་ན།

འདི་ལྟ་སྟེ།

དེ་བཞིན་གཤེགས་པ་ཉིད་སངས་རྒྱས་ཉིད་འདི་ནི་རྒྱ་ཆེ་བའི་གནས་ཡིན་པའི་ཕྱིར་རོ།

སྦྱིན་པའི་ཕ་རོལ་ཏུ་ཕྱིན་པ་ལས།

སྦྱིན་པའི་ཐབས་ལ་མཁས་པའི་ལེའུ་སྟེ།

གཉིས་པའོ།།

དེ་ནས་ཚེ་དང་ལྡན་པ་ཤ་ར་དྭ་ཏིའི་བུས་ཚེ་དང་ལྡན་པ་བྱམས་མའི་བུ་གང་པོ་ལ་འདི་སྐད་ཅེས་སྨྲས་སོ།

ཚེ་དང་ལྡན་པ་གང་པོ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་འདི་ལྟར་སེམས་བསྐྱེད་པར་བྱ་སྟེ།

གལ་ཏེ་བདག་ལ་སློང་བ་འགའ་ཞིག་འོངས་ན་ཕྱིས་སྦྱིན་ནོ་ཞེའམ།

བདག་ལ་མེད་དོ་སྙམ་དུ་སེམས་བསྐྱེད་པར་མི་བྱའོ།

བདག་ནི་སྦྱིན་མི་ཕོད་དོ་སྙམ་དུ་སེམས་བསྐྱེད་པར་མི་བྱའོ།

གཞན་སྦྱིན་པ་བྱེད་པ་དག་ལ་ཡང་རྗེས་སུ་ཡི་རང་བར་བྱ།

ཡང་དག་པར་འཛིན་དུ་གཞུག་པར་བྱ།

ཡང་དག་པར་དགའ་བར་བྱའོ།

ཚེ་དང་ལྡན་པ་གང་པོ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་རྗེས་སུ་ཡི་རང་བ་དང་ལྡན་པའི་བསོད་ནམས་བྱ་བའི་དངོས་པོ་ཐམས་ཅད་མཁྱེན་པ་ཉིད་དུ་ཡོངས་སུ་བསྔོ་བར་བྱའོ།

བྱང་ཆུབ་སེམས་དཔས་ཇི་ལྟར་བྱས་ན་སེམས་ཅན་འདི་དག་སྦྱིན་པ་གཏོང་ཞིང་།

བསོད་ནམས་དག་ཀྱང་བྱེད་པར་འགྱུར་སྙམ་པའི་རྗེས་སུ་ཡི་རང་བའི་དགེ་བའི་སེམས་ཐམས་

ཅད་མཁྱེན་པ་ཉིད་དུ་ཡོངས་སུ་བསྔོས་པ་དེས་ནི།

དེ་དག་གི་སྦྱིན་པ་དང་ལྡན་པའི་སེམས་ཟིལ་གྱིས་གནོན་ཏེ།

སེམས་ཅན་དེ་དག་གི་བསོད་ནམས་མངོན་པར་འདུ་བྱེད་པ་དང་།

དགེ་བའི་རྩ་བ་མངོན་པར་འདུ་བྱེད་པ་གང་ཡིན་པ་དེའི་སྦྱིན་པའི་སེམས་སྔ་མ་དེས་ནི་རྗེས་སུ་ཡི་རང་བའི་སེམས་ཐམས་ཅད་མཁྱེན་པ་ཉིད་དུ་ཡོངས་སུ་བསྔོས་པ་དེའི་བརྒྱའི་ཆར་ཡང་ཉེ་བར་མི་འགྲོའོ།

སྟོང་གི་ཆ་དང་།

འབུམ་གྱི་ཆ་དང་།

བྱེ་བའི་ཆ་དང་།

བྱེ་བ་འབུམ་གྱི་ཆ་དང་།

གྲངས་དང་།

ཆ་དང་།

བགྲང་བ་དང་།

དཔེ་དང་རྒྱུའི་བར་དུ་ཡང་མི་བཟོད་ཅིང་།

བྱང་ཆུབ་སེམས་དཔས་རྗེས་སུ་ཡི་རང་བ་དང་ལྡན་པའི་སེམས་གཅིག་བསྐྱེད་པས་ཟིལ་གྱིས་གནོན་ཏེ།

འདི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་པའི་ཕྱིར་རོ།

ཚེ་དང་ལྡན་པ་གང་པོ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་པ་ན།

ཐབས་ལ་མཁས་པར་བྱ་སྟེ།

དེ་གང་དང་གང་སྦྱིན་པ་དེ་རྣམ་པ་ཐམས་ཅད་མཁྱེན་པ་ཉིད་དུ་ཡོངས་སུ་བསྔོའོ།

ཚེ་དང་ལྡན་པ་གང་པོ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས།

ཐབས་ལ་མཁས་པར་བྱའོ།

གལ་ཏེ་བྱང་ཆུབ་སེམས་དཔའ་ཐབས་ལ་མི་མཁས་པ་བསྐལ་པ་གང་གཱའི་ཀླུང་གི་བྱེ་མ་སྙེད་དུ་གནས་ཏེ།

སྦྱིན་པ་སྦྱིན་ལ་རྣམ་པ་ཐམས་ཅད་མཁྱེན་པ་ཉིད་དུ་ཡོངས་སུ་སྔོ་བར་མི་བྱེད་པའི་བྱང་ཆུབ་སེམས་དཔའ་ནི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་འཛིན་པ་མ་ཡིན་ནོ།

ཚེ་དང་ལྡན་པ་གང་པོ་གཞན་ཡང་སྐབས་འགའ་དག་ཏུ་སྣོད་འཛམ་བུའི་གླིང་གི་ཚད་ཙམ་ཐོགས་པའི་སེམས་ཅན་དག་འོངས་ཏེ།

འདིའི་ནང་དུ་བྱིན་ཅིག་ཅེ་ན།

དེར་བྱང་ཆུབ་སེམས་དཔའ་སེམས་དཔའ་ཆེན་པོས་ངེས་པར་སྦྱིན་པར་བྱའི།

མེད་དོ་སྙམ་དུ་སེམས་བསྐྱེད་པར་མི་བྱའོ།

སྣོད་འདི་དག་ནི་ཧ་ཅང་ཆེས་སོ་སྙམ་དུ་སེམས་བསྐྱེད་པར་མི་བྱའོ།

སྣོད་འདི་དག་ཇི་ལྟར་ཡང་དགང་བར་བྱ་སྙམ་དུ་སེམས་བསྐྱེད་པར་མི་བྱའོ།

ཇི་ལྟར་སེམས་བསྐྱེད་པར་བྱ་ཞེ་ན་སྦྱིན་ནོ།

སྣོད་འདི་དག་དགང་བར་སྤྲོ་བར་བྱའོ།

ཇི་ལྟར་སྣོད་འདི་དག་དགང་བར་བྱ་བ་དེ་ལྟ་དེ་ལྟར་འབད་དོ།

དེ་ལྟ་དེ་ལྟར་བཙལ་ལོ་སྙམ་དུ་སེམས་

བསྐྱེད་པར་བྱའོ།

གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟ་དེ་ལྟར་འབད་ཅིང་རྩོལ་ལ།

བརྩོན་འགྲུས་རྩོམ་སྟེ།

ཡོངས་སུ་གཏོང་ན།

སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་འཛིན་པ་ཡིན་ནོ།

ཚེ་དང་ལྡན་པ་གང་པོ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་སྦྱིན་པའི་ཕ་རོལ་ཏུ་ཕྱིན་པ་ལ་བསླབ་པར་བྱའོ།

ཚེ་དང་ལྡན་པ་གང་པོ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཅན་ལ་སྙིང་བརྩེ་བས་སྦྱིན་པ་སྦྱིན་པར་བྱའོ།

བྱམས་པ་དང་སྙིང་རྗེ་ལ་གནས་པར་བྱ་སྟེ།

སེམས་ཅན་རྣམས་ལ་སྦྱིན་པ་སྦྱིན་པར་བྱའོ།

སྦྱིན་པ་སྦྱིན་པ་ན།

འདི་ལྟར་གང་འདི་ལས་བསོད་ནམས་མངོན་པར་འདུ་བྱེད་པ་དང་།

དགེ་བ་མངོན་པར་འདུ་བྱེད་པ་གང་ཡིན་པའི་བསོད་ནམས་དང་།

དགེ་བ་མངོན་པར་འདུ་བྱེད་པ་དེས་འཇིག་རྟེན་གྱི་ཁམས་མཐའ་ཡས་མུ་མེད་པ་དག་ན་ཐེག་པ་ལ་གསར་དུ་ཞུགས་པའི་བྱང་ཆུབ་སེམས་དཔའ་གང་དག་གནས་པ་དེ་དག་ནི་ཕྱིར་མི་ལྡོག་པ་ཉིད་དུ་གྱུར་ཅིག །

ཕྱིར་མི་ལྡོག་པ་གང་དག་གནས་པ་དེ་དག་ནི་མྱུར་དུ་རྣམ་པ་ཐམས་ཅད་མཁྱེན་པ་ཉིད་ཡོངས་སུ་རྫོགས་པར་གྱུར་ཅིག་ཅེས་སེམས་བསྐྱེད་པར་བྱའོ།

ཇི་ལྟ་ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་རྩ་བ་དེ་དག་ཡོངས་སུ་གཏོང་བ་དེ་ལྟ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་མཁྱེན་པ་ཉིད་དུ་འབོགས་པར་འགྱུར་རོ།

ཚེ་དང་ལྡན་པ་གང་པོ་དཔེར་ན་གསེར་ནི་ཇི་ལྟ་ཇི་ལྟར་བསྲེགས་པ་དང་།

བཞུ་བ་དང་།

བསྐོལ་བ་དང་།

ཚོས་པར་བྱས་པ་དེ་ལྟ་དེ་ལྟར་ཤིན་ཏུ་གསལ་བར་འགྱུར་རོ།

ཚེ་དང་ལྡན་པ་གང་པོ་དེ་བཞིན་དུ།

བྱང་ཆུབ་སེམས་དཔའ་སེམས་དཔའ་ཆེན་པོ་ཡང་ཇི་ལྟ་ཇི་ལྟར་བསོད་ནམས་མངོན་པར་འདུ་བྱེད་པ་དང་།

དགེ་བ་མངོན་པར་འདུ་བྱེད་པ་རྣམ་པ་ཐམས་ཅད་མཁྱེན་པ་ཉིད་དུ་ཡོངས་སུ་སྔོ་བ་དེ་ལྟ་དེ་ལྟར་དགེ་བའི་རྩ་བ་རྣམས་ཀྱིས་འབོགས་སོ།

ཇི་ལྟ་ཇི་ལྟར་དགེ་བའི་རྩ་བ་རྣམས་ཀྱིས་འབོགས་པ་དེ་ལྟ་དེ་ལྟར་སེམས་ཅན་རྣམས་ཀྱིས་བསྙེན་པའི་འོས་སུ་འགྱུར་ཞིང་།

ཁ་དོག་དང་།

འོད་དང་།

གཟི་བརྗིད་ཀྱིས་ཀྱང་ཤིན་ཏུ་གཟི་ཆེ་བར་འགྱུར་རོ།

ཚེ་དང་ལྡན་པ་གང་པོ་དཔེར་ན།

བུད་

མེད་མེ་ལོང་གི་བྱི་དོར་བྱེད་པ་ན་ཇི་ལྟ་ཇི་ལྟར་མེ་ལོང་བྱི་དོར་བྱེད་པ་དེ་ལྟ་དེ་ལྟར་ཤིན་ཏུ་འོད་གསལ་བར་འགྱུར་ལ།

ཇི་ལྟ་ཇི་ལྟར་ཤིན་ཏུ་འོད་གསལ་བར་གྱུར་པ་དེ་ལྟ་དེ་ལྟར་བཞིན་གསལ་བར་རབ་ཏུ་སྣང་ངོ་།

ཚེ་དང་ལྡན་པ་གང་པོ་དེ་བཞིན་དུ།

བྱང་ཆུབ་སེམས་དཔའ་སེམས་དཔའ་ཆེན་པོ་ཡང་ཇི་ལྟ་ཇི་ལྟར་སྦྱིན་པ་ལས་བྱུང་བའི་བསོད་ནམས་བྱ་བའི་དངོས་པོ་རྣམ་པ་ཐམས་ཅད་མཁྱེན་པ་ཉིད་དུ་ཡོངས་སུ་སྔོ་ཞིང་།

དེ་ལས་གཞན་པའི་བྱང་ཆུབ་སེམས་དཔའ་རྣམས་ལ་ཡང་ཡོངས་སུ་གཏོང་སྟེ།

གང་དག་ཐེག་པ་ལ་གསར་དུ་ཞུགས་པ་དེ་དག་ནི་ཕྱིར་མི་ལྡོག་པ་ཉིད་དུ་གྱུར་ཅིག །

ཕྱིར་མི་ལྡོག་པ་གང་དག་ཡིན་པ་དེ་དག་ནི་མྱུར་དུ་རྣམ་པ་ཐམས་ཅད་མཁྱེན་པ་ཉིད་ཡོངས་སུ་རྫོགས་པར་གྱུར་ཅིག་ཅེས་ཇི་ལྟ་ཇི་ལྟར་ཡོངས་སུ་གཏོང་ཞིང་སྦྱིན་པ་དེ་ལྟ་དེ་ལྟར་དགེ་བའི་རྩ་བ་ཤིན་ཏུ་རྒྱ་ཆེ་བར་འགྱུར་རོ།

ཇི་ལྟ་ཇི་ལྟར་དགེ་བའི་རྩ་བ་ཤིན་ཏུ་རྒྱ་ཆེ་བར་འགྱུར་བ་དེ་ལྟ་དེ་ལྟར་རྣམ་པ་ཐམས་ཅད་མཁྱེན་པ་ཉིད་དང་ཉེ་བར་འགྱུར་ཏེ།

བྱང་ཆུབ་སེམས་དཔའ་དེ་ལྟར་ཡོངས་སུ་སྔོ་བ་ནི་ཐབས་ལ་མཁས་པ་ཡིན་པར་རིག་པར་བྱའོ།

ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པ་ཆུང་ངུ་བྱིན་ན་བསོད་ནམས་མང་པོ་སྐྱེད་པར་འགྱུར་ཞེ་ན།

གལ་ཏེ་སྦྱིན་པ་དེ་རྣམ་པ་ཐམས་ཅད་མཁྱེན་པ་ཉིད་དུ་ཡོངས་སུ་སྔོ་ན།

དེ་ལྟར་བྱང་ཆུབ་སེམས་དཔའ་སྦྱིན་པ་ཆུང་ངུ་བྱིན་ལ་བསོད་ནམས་མང་པོ་སྐྱེད་དོ།

ཅི་སྟེ་སྦྱིན་པ་དེ་རྣམ་པ་ཐམས་ཅད་མཁྱེན་པ་ཉིད་དུ་ཡོངས་སུ་སྔོ་བར་མི་བྱེད་ན།

དེ་ལྟར་སྦྱིན་པ་མང་པོ་བྱིན་ལ།

བསོད་ནམས་ཉུང་ངུ་སྐྱེད་པར་འགྱུར་རོ།

གལ་ཏེ་བྱང་ཆུབ་སེམས་དཔའ་བསྐལ་པ་གང་གཱའི་ཀླུང་གི་བྱེ་མ་སྙེད་དུ་གནས་ཏེ།

བདེ་བར་སྦྱར་བའི་ཡོ་བྱད་མང་པོ་ཡོངས་སུ་གཏོང་ལ།

སྦྱིན་པ་དེའང་རྣམ་པ་ཐམས་ཅད་མཁྱེན་པ་ཉིད་དུ་ཡོངས་སུ་སྔོ་བར་བྱེད་ན།

དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པ་མང་པོ་སྦྱིན་ཞིང་།

བསོད་ནམས་མང་པོ་སྐྱེད་དོ།

དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་སྦྱིན་པ་སྦྱིན་པ་ན།

རྣམ་པ་ཐམས་ཅད་མཁྱེན་པ་ཉིད་ཡིད་ལ་བྱེད་པ་དང་མ་བྲལ་བར་བྱའོ།

བྱང་ཆུབ་སེམས་

དཔའ་གང་རྣམ་པ་ཐམས་ཅད་མཁྱེན་པ་ཉིད་ཡིད་ལ་བྱེད་པ་དང་མ་བྲལ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི་བྱང་ཆུབ་དང་ཉེ་བ་ཡིན་ཏེ།

མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ།

དེ་ཅིའི་ཕྱིར་ཞེ་ན།

བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པ་ཐམས་ཅད་མཁྱེན་པ་ཉིད་ལ་དམིགས་པར་བྱེད་པ་ནི་ཐབས་ལ་མཁས་པ་ཡིན་པར་རིག་པར་བྱ་བའི་ཕྱིར་རོ།

ཚེ་དང་ལྡན་པ་གང་པོ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་ཐོག་མ་ཉིད་དུ་སྦྱིན་པའི་ཕ་རོལ་ཏུ་ཕྱིན་པ་ལ་བསླབ་པར་བྱའོ།

དེ་ཅིའི་ཕྱིར་ཞེ་ན།

ཚེ་དང་ལྡན་པ་གང་པོ་གང་གི་ཕྱིར་དེས་འཁོར་བ་ཐོག་མ་མེད་པ་ནས་སེར་སྣ་བསྟེན་ཏེ།

དེ་སྦྱིན་པ་དེ་ཡོངས་སུ་གཏོང་ན།

སེར་སྣ་རྒྱང་རིང་བར་བྱེད་ཅིང་།

རྣམ་པ་ཐམས་ཅད་མཁྱེན་པ་ཉིད་དང་ཉེ་བར་བྱེད་དོ།

ཇི་ལྟ་ཇི་ལྟར་རྣམ་པ་ཐམས་ཅད་མཁྱེན་པ་ཉིད་དང་ཉེ་བར་བྱེད་པ་དེ་ལྟ་དེ་ལྟར་ཉན་ཐོས་ཀྱིས་དང་།

རང་སངས་རྒྱས་ཀྱིས་ལས་ལྡོག་པར་བྱེད་དོ།

ཇི་ལྟ་ཇི་ལྟར་ཉན་ཐོས་ཀྱིས་དང་།

རང་སངས་རྒྱས་ཀྱིས་ལས་ལྡོག་པ་དེ་ལྟ་དེ་ལྟར་རྣམ་པ་ཐམས་ཅད་མཁྱེན་པ་ཉིད་དང་ཉེ་བར་འགྱུར་རོ།

ཚེ་དང་ལྡན་པ་གང་པོ་དཔེར་ན།

ཆར་འབབ་པའི་ཚེ་བླ་གབ་མེད་པར་བུམ་པ་བཞག་པ་དེར་རིམ་གྱིས་ཐིགས་པ་བབ་པས་གང་བར་གྱུར་ན་དང་པོར་ཐིགས་པ་བབ་པ་གང་ཡིན་པ་དང་།

ཐ་མར་ཐིགས་པ་བབ་པ་གང་ཡིན་པ་ཉི་ཚེས་བུམ་པ་དེ་གང་བར་གྱུར་པ་མ་ཡིན་གྱིས།

དེའི་བར་གྱི་ཆུའི་ཐིགས་པ་རྒྱུན་མི་ཆད་པར་རིམ་གྱིས་བབ་པའི་ཆུའི་ཐིགས་པ་རྣམས་ཀྱིས་བུམ་པ་དེ་གང་བ་ཡིན་ནོ།

ཚེ་དང་ལྡན་པ་གང་པོ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོས་དང་པོ་སེམས་བསྐྱེད་པས་རྣམ་པ་ཐམས་ཅད་མཁྱེན་པ་ཉིད་ཐོབ་པ་ཡང་མ་ཡིན།

བྱང་ཆུབ་ཀྱི་སྙིང་པོ་ལ་འདུག་པས་ཀྱང་མ་ཡིན་གྱི།

དང་པོ་སེམས་བསྐྱེད་པ་གང་ཡིན་པ་དང་།

བྱང་ཆུབ་ཀྱི་སྙིང་པོ་ལ་འདུག་པའི་སེམས་བསྐྱེད་པ་ཕྱི་མ་དེའི་བར་གྱི་རྣམ་པ་ཐམས་ཅད་མཁྱེན་པ་ཉིད་དང་ལྡན་པའི་སེམས་ཀྱི་ཁྱད་པར་བསྐྱེད་པ།

ཕན་པར་གྱུར་པ་བསགས་པ་གང་དག་

ཡིན་པ་དེ་དག་ཐམས་ཅད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་རིམ་གྱིས་འབྲས་བུ་བསྐྱེད་པ་ཡིན་ནོ།

ཚེ་དང་ལྡན་པ་གང་པོ་དེ་ལྟར་ན་འདིར་བྱང་ཆུབ་སེམས་དཔའ་སེམས་དཔའ་ཆེན་པོས་མ་འདྲེས་པའི་སེམས་ཀྱིས་རྣམ་པ་ཐམས་ཅད་མཁྱེན་པ་ཉིད་ལ་དམིགས་པར་བྱའོ།

དེ་ནས་ཚེ་དང་ལྡན་པ་བྱམས་མའི་བུ་གང་པོས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ།

ཚེ་དང་ལྡན་པ་ཤ་ར་དྭ་ཏིའི་བུ་ཇི་ཙམ་གྱིས་ན་བྱང་ཆུབ་སེམས་དཔའ་སེམས་མ་འདྲེས་པ་ཡིན།

སྨྲས་པ།

ཚེ་དང་ལྡན་པ་གང་པོ་གང་གི་ཚེ་བྱང་ཆུབ་སེམས་དཔའ་ཚུལ་བཞིན་མ་ཡིན་པ་ཡིད་ལ་བྱེད་པ་བྱུང་ན།

དེ་འང་རྣམ་པ་ཐམས་ཅད་མཁྱེན་པ་ཉིད་ལ་ཕན་པར་གྱུར་པར་མཐོང་ཞིང་།

གལ་ཏེ་འདི་དག་ལས་བདག་གི་ལུས་གྲུབ་པས་ན་ཚུལ་བཞིན་མ་ཡིན་པ་ཡིད་ལ་བྱེད་པ་འདི་ནི་བདག་གི་ཕ་རོལ་ཏུ་ཕྱིན་པའི་དོན་ཡིན་ཏེ།

སྐྱེད་པར་འགྱུར་བའོ་ཞེས་ཤེས་པ་གང་ཡིན་པ་དེ་ནི་སེམས་མ་འདྲེས་པ་ཞེས་བྱའོ།

ཚེ་དང་ལྡན་པ་གང་པོ་གཞན་ཡང་གང་དག་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ཕན་འདོགས་པ་དང་།

གནོད་པ་བྱེད་པ་གང་ཡིན་པ་དེ་དག་ཐམས་ཅད་རྣམ་པ་ཐམས་ཅད་མཁྱེན་པ་ཉིད་ཀྱི་རྒྱུ་ཡིན་པར་མཐོང་སྟེ།

དེ་ལྟར་ཚེ་དང་ལྡན་པ་གང་པོ་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་མ་འདྲེས་པར་བྱའོ།

ཚེ་དང་ལྡན་པ་གང་པོ་དཔེར་ན།

གསད་པར་ཆད་པའི་མི་གསད་པའི་སར་ཁྲིད་པ་ན་བདག་ནི་གསོད་དོ་སྙམ་པའི་ཡིད་ལ་བྱེད་པ་འབའ་ཞིག་འབྱུང་བར་འགྱུར་ཏེ།

དཔེ་དེ་དང་འདྲ་བར་བྱང་ཆུབ་སེམས་དཔའ་སེམས་དཔའ་ཆེན་པོས་རྣམ་པ་ཐམས་ཅད་མཁྱེན་པ་ཉིད་འབའ་ཞིག་ཡིད་ལ་བྱེད་པ་འདི་ནི།

ཚེ་དང་ལྡན་པ་གང་པོ་བྱང་ཆུབ་སེམས་དཔའ་སེམས་དཔའ་ཆེན་པོའི་སེམས་མ་འདྲེས་པ་ཡིན་པར་རིག་པར་བྱའོ།

ཚེ་དང་ལྡན་པ་གང་པོ་དཔེར་ན།

རིན་པོ་ཆེ་ཁྱེར་བའི་མི་འཇིགས་སའམ།

འབྲོག་ཁོང་ཁོང་ཡ་ང་བར་ཞུགས་ནས།

དེ་འཇིགས་ས་དང་འབྲོག་ཁོང་ཁོང་ཡ་ང་བར་འགྲོ་བ་ན།

རྟག་ཏུ་རྒྱུན་མི་ཆད་པར་ཡིད་ལ་བྱེད་པ་འབྱུང་སྟེ།

བདག་ནམ་འབྲོག་ཁོང་ཁོང་ཡ་ང་བ་འདི་ལས་འདའ་བར་

འགྱུར་ཞིང་འཇིགས་ས་འདི་ལས་འདའ་བར་འགྱུར་ཞིག་གུ་སྙམ་པ་འབའ་ཞིག་ཡིད་ལ་བྱེད་དོ།

ཚེ་དང་ལྡན་པ་གང་པོ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོས་རྣམ་པ་ཐམས་ཅད་མཁྱེན་པ་ཉིད་ཡིད་ལ་བྱའི་ཡིད་ལ་བྱེད་པ་གཞན་དག་གི་སྐབས་དབྱེ་བར་མི་བྱ་བ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་སེམས་མ་འདྲེས་པ་ཞེས་བྱའོ།

ཚེ་དང་ལྡན་པ་གང་པོ་དཔེར་ན།

མི་གཡོན་ཅན་གྱི་རང་བཞིན་ཅན་ཚོང་འདུས་ཀྱི་ནང་དུ་ཞུགས་ཏེ་རྐུ་ཞིང་ཆིངས་མ་གཅོད་པ་ན་འདི་ལྟར་བདག་རྐུ་ཞིང་ཆིངས་མ་གཅོད་པ་སུས་ཀྱང་མ་མཐོང་གྲང་སྙམ་དུ་སེམས་ཤིང་།

དེ་ཡིད་ལ་བྱེད་པ་དེ་འབའ་ཞིག་ཀུན་ཏུ་འབྱུང་སྟེ།

དེའི་ཡིད་ལ་བྱེད་པ་གཞན་མི་འབྱུང་ངོ་།

ཚེ་དང་ལྡན་པ་གང་པོ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་མངོན་པར་རྫོགས་པར་འཚང་རྒྱ་བར་འདོད་པས་ཡིད་ལ་བྱེད་པ་གཞན་དག་གི་སྐབས་དབྱེ་བར་མི་བྱའོ།

ཚེ་དང་ལྡན་པ་གང་པོ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་མ་འདྲེས་པར་རིག་པར་བྱའོ།

ཚེ་དང་ལྡན་པ་གང་པོ་དཔེར་ན།

སྐྱེས་བུ་གསེར་མགར་ཞིག་ཡོད་པ་དེའི་ལག་ཏུ་གསེར་གཏད་ལ།

གསེར་དེའང་རྒྱལ་པོའི་ཡིན་ཏེ།

དེ་ལ་འདི་སྐད་དུ་ཀྱེ་མི་ཁྱོད་ཀྱིས་གསེར་འདི་ལས་རྒྱན་གྱི་རྣམ་པ་དག་བྱོས་ལ།

གང་ཁྱོད་ཀྱིས་ལོ་གཅིག་གིས་ཟིན་པའི་ལས་དེ་ཁྱོད་ཀྱིས་ཟླ་བ་གཅིག་གིས་ཟིན་པར་གྱིས་ཤིག །

གལ་ཏེ་ཟླ་བ་གཅིག་གིས་ཟིན་པར་མ་བྱས་ན།

དེའི་ཕྱིར་ཁྱོད་ཀྱི་མགོ་གཅད་དོ་ཞེས་བསྒོ་ན།

དེ་སྐད་དུ་བསྒོ་བའི་མི་དེ་ནི་གསེར་དེ་བསྲེགས་པ་དང་།

བཞུ་བ་དང་།

རྒྱན་དག་ཏུ་བྱ་བ་ལས་ཡིད་ལ་བྱེད་པ་གཞན་མི་འབྱུང་སྟེ།

གཞན་དུ་ན་རྒྱན་འདི་རྣམས་ཇི་ལྟར་ཟིན་པར་འགྱུར་ཞིག་གུ་སྙམ་སྟེ།

དེ་ཟན་ཟ་བའི་ཚེ་ཡང་ཁ་ཟས་ཡིད་ལ་བྱེད་པ་མི་འབྱུང་གི །

གསེར་དང་ལྡན་པའི་ཡིད་ལ་བྱེད་པའི་ཡིད་ལ་བྱེད་པ་འབའ་ཞིག་དང་།

རྒྱན་གྱི་རྣམ་པ་འབའ་ཞིག་ཡིད་ལ་བྱེད་དེ།

སེམས་དང་སེམས་ལས་བྱུང་བ་རྣམས་དེ་ལ་གནས་སོ།

དེ་ཅིའི་ཕྱིར་ཞེ་ན།

དེ་སྲོག་ཕངས་པའི་ཤས་ཆེ་བའི་ཕྱིར་རོ།

དེ་ནས་མི་དེས་ལྷ་རྒྱན་དེ་དག་ནི་འདི་རྣམས་ལགས་སོ་ཞེས་རྒྱན་བྱེད་པ་དེ་

དག་རྒྱལ་པོ་ལ་ཕུལ་ལོ།

དེ་ནས་རྒྱལ་པོ་དགའ་ཞིང་མགུ་སྟེ་རངས་ནས།

འདི་སྐད་དུ་གང་ཁྱོད་ཀྱིས་ཟླ་བ་བཅུ་གཉིས་ཀྱི་ལས་བྱས་པ་དེ་ནི་ཁྱོད་བྱ་དགའ་ཆེན་པོ་དབང་ངོ་ཞེས་སྨྲས་སོ།

ཚེ་དང་ལྡན་པ་གང་པོ་དེ་བཞིན་དུ།

བྱང་ཆུབ་སེམས་དཔའ་སེམས་དཔའ་ཆེན་པོས་དང་པོ་སེམས་བསྐྱེད་པ་ནས།

ཕྱི་མའི་སེམས་བསྐྱེད་པ་དེའི་བར་དུ་སེམས་མ་འདྲེས་པར་བྱའོ།

ཇི་ལྟར་སྐྱེས་བུ་གསེར་མགར་དེ་ཡིད་ལ་བྱེད་པ་གཞན་དང་མ་འདྲེས་པར་རྒྱན་དེ་དག་བྱེད་དེ།

དེ་ཅིའི་ཕྱིར་ཞེ་ན།

སྲོག་ཕངས་པའི་ཤས་ཆེ་བའི་ཕྱིར་ཡིན་པ་དེ་བཞིན་དུ།

ཚེ་དང་ལྡན་པ་གང་པོ་བྱང་ཆུབ་སེམས་དཔའ་སེམས་དཔའ་ཆེན་པོས་རྣམ་པ་ཐམས་ཅད་མཁྱེན་པ་ཉིད་ཡིད་ལ་བྱེད་པ་མ་འདྲེས་པར་བྱ་སྟེ།

ཡིད་ལ་བྱེད་པ་གཞན་དག་གི་སྐབས་དབྱེ་བར་མི་བྱའོ།

གལ་ཏེ་རྣམ་པ་ཐམས་ཅད་མཁྱེན་པ་ཉིད་ལྷུར་ལེན་པའི་སྟོབས་ཆེ་ན།

དེ་ཉིད་སེམས་མ་འདྲེས་པ་ལ་གནས་ཏེ།

བྱང་ཆུབ་སེམས་དཔའ་གཞན་གང་བསྐལ་པ་གྲངས་མེད་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེ།

བྱང་ཆུབ་སེམས་དཔའ་སེམས་དཔའ་ཆེན་པོ་དེས་བསྐལ་པ་བརྒྱར་ཡང་མི་ཐོགས་པར་འགྱུར་རོ།

དེ་ཅིའི་ཕྱིར་ཞེ་ན།

གང་གི་ཕྱིར་དེས་ཡིད་ལ་བྱེད་པ་གཞན་དག་གི་སྐབས་མ་ཕྱེ་བའི་ཕྱིར་ཏེ།

དེའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་མ་འདྲེས་པ་ལ་གནས་པ་དེ་བསྐལ་པ་བརྒྱར་ཡང་མི་ཐོགས་པར་ཡོངས་སུ་རྫོགས་པར་བྱེད་དོ།

ཚེ་དང་ལྡན་པ་གང་པོ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་སེམས་མ་འདྲེས་པར་བྱའོ།

དེ་ལྟར་ན་བདག་ཀྱང་དོན་དེ་ལ་སྦྱོར་ཞིང་།

སེམས་ཅན་དག་ཀྱང་དོན་དེ་ལ་སྦྱོར་ཏེ།

འདི་ལྟར་སངས་རྒྱས་ཀྱི་ཡེ་ཤེས་བླ་ན་མེད་པའི་དོན་ལ་སྦྱོར་རོ།

སྦྱིན་པའི་ཕ་རོལ་ཏུ་ཕྱིན་པ་ལས་དཔེའི་ལེའུ་སྟེ་གསུམ་པའོ།།

དེ་སྐད་ཅེས་སྨྲས་པ་དང་།

ཚེ་དང་ལྡན་པ་བྱམས་མའི་བུ་གང་པོས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ།

ཚེ་དང་ལྡན་པ་གལ་ཏེ་ཡིད་ལ་བྱེད་པ་དེ་དག་བར་མ་དོར་འདྲེས་པ་ཞིག་ན།

དེའི་ངོ་བོ་ཉིད་ནི་གང་ཡིན།

གང་དང་ནི་ལྡན།

དེ་སྐད་

ཅེས་སྨྲས་པ་དང་།

ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་སྨྲས་སོ།

ཚེ་དང་ལྡན་པ་གང་པོ་གང་གི་ཚེ་ཉན་ཐོས་ཀྱིས་དང་ལྡན་ཞིང་།

རང་སངས་རྒྱས་ཀྱིས་དང་ལྡན་པའི་ཡིད་ལ་བྱེད་པ་འབྱུང་བ་དེའི་ཚེ།

བྱང་ཆུབ་སེམས་དཔའ་སེམས་འདྲེས་པ་ཡིན་པར་རིག་པར་བྱ་སྟེ།

འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་ཚུལ་བཞིན་མ་ཡིན་པ་ཡིད་ལ་བྱེད་པ་དག་ཡིན་ནོ།

དེ་ཅིའི་ཕྱིར་ཞེ་ན།

བྱང་ཆུབ་ལ་ནི་ངོ་བོ་ཉིད་མེད་པའི་ཕྱིར་རོ།

གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོའི་ཡིད་ལ་བྱེད་པ་འདོད་ཆགས་དང་ལྡན་པ་འམ།

ཞེ་སྡང་དང་ལྡན་པ་འམ།

གཏི་མུག་དང་ལྡན་པ་འབྱུང་ན།

འབྱུང་བ་དེས་བྱང་ཆུབ་སེམས་དཔའ་སེམས་འདྲེས་པར་རིག་པར་བྱ་བ་མ་ཡིན་ནོ།

དེ་ཅིའི་ཕྱིར་ཞེ་ན།

རྣམ་པར་རྟོག་པ་འདི་དག་ནི་བྱང་ཆུབ་སེམས་དཔའི་སྲིད་པ་མངོན་པར་འགྲུབ་པ་སྟེ།

ཕན་འདོགས་པར་གྱུར་པ།

རྒྱུར་གྱུར་པ་གྲོགས་སུ་གྱུར་པ་ཡིན་པའི་ཕྱིར་རོ།

འདི་དག་ནི་ཐམས་ཅད་མཁྱེན་པ་ཉིད་དུ་འགྱུར་བར་བྱེད་པའོ།

འདི་དག་གིས་ནི་ལུས་ཡོངས་སུ་འཛིན་ཏོ།

ཐབས་ལ་མཁས་པས་ཇི་ལྟར་ཕ་རོལ་ཏུ་ཕྱིན་པ་དྲུག་པོ་རྣམས་ཀྱིས་ཡོངས་སུ་སྔོ་བར་བྱེད་པ་དེ་བཞིན་དུ།

ཉོན་མོངས་པ་གྲོགས་སུ་གྱུར་པ་རྣམས་ཀྱིས་ཀྱང་།

བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ།

ཚེ་དང་ལྡན་པ་གང་པོ་དེ་ལྟ་བས་ན།

ཐམས་ཅད་མཁྱེན་པ་ཉིད་ལ་བར་ཆད་བྱེད་པར་འགྱུར་བའི་ཡིད་ལ་བྱེད་པ་གང་དག་ཡིན་པ་དེ་དག་འབྱུང་བས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་འདྲེས་པ་ཞེས་བྱ་བར་རིག་པར་བྱའོ།

དེ་དག་གང་ཞེ་ན།

འདི་ལྟ་སྟེ།

ཉན་ཐོས་དང་ལྡན་པ་དང་།

རང་སངས་རྒྱས་དང་ལྡན་པར་འབྱུང་བ་དེ་དག་གིས་སེམས་འདྲེས་པར་རིག་པར་བྱའོ།

དེ་ལས་གཞན་པའི་ཡིད་ལ་བྱེད་པ་སྲིད་པའི་རྗེས་སུ་འཐུན་པ་གང་དག་ཡིན་པ་དེ་དག་འབྱུང་བས་ནི།

བྱང་ཆུབ་སེམས་དཔའ་སེམས་དཔའ་ཆེན་པོ་སེམས་འདྲེས་པར་གནས་པ་མ་ཡིན་ནོ།

ཡིད་ལ་བྱེད་པ་དེ་དག་ཅིའི་ཕྱིར་འདོད་པར་བྱ་ཞེ་

ན།

འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དེས་འཁོར་བས་ཡོངས་སུ་མི་སྐྱོ་བའི་གོ་ཆ་བགོས་པའི་ཕྱིར་ཏེ།

དེ་དག་འབྱུང་ན་སྐྱེ་བའི་གནས་རྣམས་ཡོངས་སུ་འཛིན་ལ།

སྐྱེ་བའི་གནས་རྣམས་ཡོངས་སུ་བཟུང་བས་ཡང་སྦྱིན་པའི་ཕ་རོལ་ཏུ་ཕྱིན་པ་ཡང་དག་པར་བླངས་ཏེ་གནས་པར་འགྱུར་རོ།

དེ་བཞིན་དུ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང་།

བཟོད་པའི་ཕ་རོལ་ཏུ་ཕྱིན་པ་དང་།

བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་།

བསམ་གཏན་གྱི་ཕ་རོལ་ཏུ་ཕྱིན་པ་ཡོངས་སུ་འཛིན་ཏེ།

ཡང་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་མོ།

དེ་ལྟར་ན་ཡིད་ལ་བྱེད་པ་གང་དག་གིས་སྲིད་པ་མངོན་པར་འགྲུབ་པར་འགྱུར་བ་དེ་དག་ནི།

བྱང་ཆུབ་སེམས་དཔའ་སེམས་དཔའ་ཆེན་པོས་བྱང་ཆུབ་ཀྱི་སྙིང་པོ་ལ་འདུག་པར་མ་གྱུར་གྱི་བར་དུ་འདོད་པར་བྱའོ།

ཚེ་དང་ལྡན་པ་གང་པོ་དེ་ལྟར་ན་ཉོན་མོངས་པ་རྣམས་ལ་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་ཡོངས་སུ་སྐྱོ་བའི་སེམས་བསྐྱེད་པར་མི་བྱའོ།

བྱང་ཆུབ་སེམས་དཔས་ཅིའི་ཕྱིར་འདོད་པར་བྱ་ཞེ་ན།

འདི་དག་ནི་བདག་ལ་ཕན་འདོགས་པར་གྱུར་པ་དག་སྟེ།

གལ་ཏེ་འདི་དག་གཟུགས་ཅན་ཞིག་ཡིན་དུ་ཟིན་ན།

བདག་གིས་བསྟི་སྟང་ཆེན་པོས་རི་མོ་བྱ་བ་ཞིག་སྟེ།

དེ་ཅིའི་ཕྱིར་ཞེ་ན།

འདི་ལྟར་དེ་དག་ལ་དེའི་ཕན་ཡོན་རྣམས་ཉེ་བར་གནས་པའི་ཕྱིར་རོ།

གལ་ཏེ་ཐབས་ལ་མཁས་པ་གཟུགས་ཅན་ཞིག་ཡིན་དུ་ཟིན་ན་ནི།

དེ་ལ་ཡང་དེ་བཞིན་གཤེགས་པ་བཞིན་དུ་བདག་གིས་བསྟི་སྟང་ཆེན་པོས་རི་མོ་བྱ་བ་ཞིག་སྟེ།

དེ་ཅིའི་ཕྱིར་ཞེ་ན།

འདི་ལྟར་བདག་གི་ཐབས་ལ་མཁས་པ་འདི་ནི་སྲིད་པར་ཀུན་ཏུ་སྦྱོར་བ་མི་གཅོད་ལ།

ཕ་རོལ་ཏུ་ཕྱིན་པ་དྲུག་འཕེལ་བ་དང་།

ཡོངས་སུ་རྫོགས་པར་བྱེད་ཅིང་།

ཐམས་ཅད་མཁྱེན་པ་ཉིད་ཀྱང་སྒྲུབ་པ་ཡིན་པའི་ཕྱིར་རོ།

ཇི་ལྟ་ཇི་ལྟར་ཕ་རོལ་ཏུ་ཕྱིན་པ་དྲུག་འཕེལ་བ་དང་།

ཡོངས་སུ་རྫོགས་པར་བྱེད་ཅིང་།

ཐམས་ཅད་མཁྱེན་པ་ཉིད་སྒྲུབ་པར་བྱེད་པ་དེ་ལྟ་དེ་ལྟར་སྲིད་པར་ཀུན་ཏུ་སྦྱོར་བ་རྣམས་སྲབ་པར་འགྱུར།

ཉམ་དམས་པར་འགྱུར།

ཞན་པར་འགྱུར་རོ།

ཚེ་དང་ལྡན་པ་གང་པོ་དཔེར་ན།

ཤིང་རྟ་ཁལ་ཆེན་པོ་

བཀལ་བ་ནི།

ཇི་ལྟ་ཇི་ལྟར་ཤིང་རྟ་འགྲོ་བ་དེ་ལྟ་དེ་ལྟར་དེའི་སྲོག་ཤིང་ཡོངས་སུ་ཟད་པར་འགྱུར་ཏེ།

སྲོག་ཤིང་དེ་ཡང་ཁལ་དེ་ཉིད་ཀྱིས་ཤིན་ཏུ་ནོན་པ་དང་།

ཁལ་ཁྱེར་བས་ཡོངས་སུ་ཟད་པར་འགྱུར་ཞིང་ཞན་པར་འགྱུར་མོད་ཀྱི།

སྲོག་ཤིང་དེ་གྲོང་ཁྱེར་གྱི་ནང་དུ་ཞུགས་ཏེ།

བྱ་བ་བྱས་ནས་ཆག་པར་འགྱུར་རོ།

ཚེ་དང་ལྡན་པ་གང་པོ་དེ་བཞིན་དུ།

བྱང་ཆུབ་སེམས་དཔའ་སེམས་དཔའ་ཆེན་པོའི་སྲིད་པ་འཐོབ་པར་བྱེད་པའི་ཀུན་ཏུ་སྦྱོར་བ་གང་དག་ཡིན་པ་འདི་དག་ནི་གང་དག་གིས་སྲིད་པ་ཡོངས་སུ་འཛིན་པར་བྱེད་པ་དག་སྟེ།

ཇི་ལྟ་ཇི་ལྟར་བྱང་ཆུབ་སེམས་དཔའ་སྐྱེ་བའི་གནས་རྣམས་མངོན་པར་སྒྲུབ་པར་བྱེད་པ་དེ་ལྟ་དེ་ལྟར་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ།

ཇི་ལྟ་ཇི་ལྟར་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་བ་དེ་ལྟ་དེ་ལྟར་སྲིད་པར་ཀུན་ཏུ་སྦྱོར་བ་རྣམས་སྲབ་པར་འགྱུར་རོ།

ཇི་ལྟ་ཇི་ལྟར་སྲིད་པར་ཀུན་ཏུ་སྦྱོར་བ་རྣམས་སྲབ་པར་འགྱུར་བ་དེ་ལྟ་དེ་ལྟར་ཐམས་ཅད་མཁྱེན་པ་ཉིད་དང་ཉེ་བར་འགྱུར་ཏེ།

གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ།

བྱང་ཆུབ་ཀྱི་སྙིང་པོ་ལ་འདུག་པའི་ཐམས་ཅད་མཁྱེན་པའི་ཡེ་ཤེས་སྐྱེས་པ་དེའི་ཚེ།

ཀུན་ཏུ་སྦྱོར་བ་བྱ་བ་བྱས་པ་དེ་དག་ཕྱིས་དེ་དག་གིས་བྱ་བ་མེད་དེ།

ཇི་ལྟར་སྲོག་ཤིང་དེ་གྲོང་ཁྱེར་དུ་ཞུགས་ནས་བྱ་བ་བྱས་ཏེ།

ཆག་ནས་ཕྱིས་དེས་བྱ་བ་མེད་པ་དེ་བཞིན་དུ།

ཀུན་ཏུ་སྦྱོར་བ་བྱ་བ་བྱས་པ་དེ་དག་གིས།

བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པ་ཐམས་ཅད་མཁྱེན་པ་ཉིད་ཐོབ་པར་གྱུར་པ་ལ།

ཀུན་ཏུ་སྦྱོར་བ་དེ་དག་གིས་ཕྱིས་བྱ་བ་མེད་དོ།

དེ་ཅིའི་ཕྱིར་ཞེ་ན།

འདི་ལྟར་བྱང་ཆུབ་སེམས་དཔའ་དེ་ནི་བྱ་བ་བྱས་པ་ཡིན་པའི་ཕྱིར་རོ།

སེམས་ཅན་གང་དག་བྱང་ཆུབ་སེམས་དཔའ་སེམས་དཔའ་ཆེན་པོ་ལ་གཤེ་ཞིང་བརྒྱད་བཀག་ལ།

གཤེ་ཞིང་བརྒྱད་བཀག་ནས།

བྱང་ཆུབ་སེམས་དཔའ་དེ་ཉིད་ལ་འདི་བདག་ལ་དགོས་སོ་ཞེས་སློང་སྟེ།

དེ་དག་ལ་སྦྱིན་པར་བྱེད་པ་དེ་དག་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་ལ་ཕན་འདོགས་པར་གྱུར་པ་ཡིན་ནོ།

དམིགས་པ་དེས་ཀྱང་ཐམས་ཅད་མཁྱེན་པ་ཉིད་དུ་སེམས་སྐྱེད་པར་བྱེད་དེ།

དམིགས་པ་དེ་དག་

ཐམས་ཅད་ཀྱང་ཐམས་ཅད་མཁྱེན་པ་ཉིད་ལ་ཕན་འདོགས་པར་གྱུར་པ་ཡིན་པར་ཤེས་སོ།

ཚེ་དང་ལྡན་པ་གང་པོ་དེ་ལྟར་འདིར་ཡང་ཉན་ཐོས་ཀྱིས་འམ།

རང་སངས་རྒྱས་ཀྱིས་མ་གཏོགས་པ་དེ་ལས་གཞན་པའི་ཡིད་ལ་བྱེད་པ་གང་དག་ཡིན་པ་དེ་དག་ཐམས་ཅད་ནི།

བྱང་ཆུབ་སེམས་དཔའ་སེམས་དཔའ་ཆེན་པོ་ལ་ཕན་འདོགས་པར་གྱུར་པ་ཡིན་པར་རིག་པར་བྱའོ།

དེ་ནས་ཚེ་དང་ལྡན་པ་བྱམས་མའི་བུ་གང་པོས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ།

ཚེ་དང་ལྡན་པ་ཤ་ར་དྭ་ཏིའི་བུ་ཉན་ཐོས་རྣམས་ཀྱང་དེ་ལ་ཕན་འདོགས་པར་གྱུར་ཅིང་།

རང་སངས་རྒྱས་རྣམས་ཀྱང་དེ་ལ་ཕན་འདོགས་པར་གྱུར་པར་རིག་པར་བྱ་སྟེ།

ཉན་ཐོས་རྣམས་ཕ་རོལ་ཏུ་ཕྱིན་པ་དྲུག་གིས་འདོམས་ཤིང་རྗེས་སུ་སྟོན་ལ།

དེས་ཀྱང་ཕ་རོལ་ཏུ་ཕྱིན་པ་རྣམས་ལ་སྦྱར་བར་བྱ་དགོས་པས།

དེ་དག་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོའི་སྦྱིན་གནས་ཡིན་པའི་ཕྱིར།

དེ་དག་ཀྱང་ཐམས་ཅད་མཁྱེན་པ་ཉིད་ལ་ཕན་འདོགས་པར་གྱུར་པ་ཡིན་ནོ།

རང་སངས་རྒྱས་རྣམས་ཀྱང་དེའི་སྦྱིན་གནས་ཡིན་པའི་ཕྱིར།

ཕན་འདོགས་པར་གྱུར་པ་ཡིན་ནོ།

དེ་སྐད་ཅེས་སྨྲས་པ་དང་།

ཚེ་དང་ལྡན་པ་ཤ་ར་དྭ་ཏིའི་བུས།

ཚེ་དང་ལྡན་པ་བྱམས་མའི་བུ་གང་པོ་ལ་འདི་སྐད་ཅེས་སྨྲས་སོ།

ཚེ་དང་ལྡན་པ་གང་པོ་དེ་དེ་བཞིན་ཏེ།

གང་དག་དེ་ལ་ཕ་རོལ་ཏུ་ཕྱིན་པ་རྣམས་ཀྱིས་འདོམས་ཤིང་རྗེས་སུ་སྟོན་པ་དེ་དག་ཀྱང་དེའི་སྦྱིན་གནས་ཡིན་པའི་ཕྱིར་ཉན་ཐོས་རྣམས་ཀྱང་བྱང་ཆུབ་སེམས་དཔའ་ལ་ཕན་འདོགས་པར་གྱུར་པ་ཡིན་ནོ།

རང་སངས་རྒྱས་རྣམས་ཀྱང་སྦྱིན་གནས་ཡིན་པའི་ཕྱིར།

དེ་དག་ཀྱང་དེའི་ཐམས་ཅད་མཁྱེན་པ་ཉིད་ལ་ཕན་འདོགས་པར་གྱུར་པ་ཡིན་ནོ།

གཞན་ཡང་གང་དག་དམིགས་པར་བྱ་སྟེ།

སྦྱིན་པ་སྦྱིན་པ་དེ་ཡང་རྣམ་པ་ཐམས་ཅད་མཁྱེན་པ་ཉིད་དུ་ཡོངས་སུ་བསྔོ་ན།

དེ་དག་ཐམས་ཅད་ཀྱང་དེ་ལ་ཕན་འདོགས་པར་གྱུར་པ་ཡིན་ཏེ།

ཚེ་དང་ལྡན་པ་གང་པོ་འོན་ཀྱང་ཉན་ཐོས་དང་ལྡན་པའི་ཡིད་ལ་བྱེད་པ་གང་ཡིན་པ་དེ་དག་ནི་དེས་བསྐྱེད་པར་མི་བྱའོ།

དེའི་ས་ལ་ཡང་འདོད་པར་མི་བྱའོ།

དེ་

ཅིའི་ཕྱིར་ཞེ་ན།

དེ་ལས་བྱང་ཆུབ་སེམས་དཔའ་ལྡོག་པར་བྱ་བ་ཡིན་པའི་ཕྱིར་རོ།

རང་སངས་རྒྱས་དང་ལྡན་པའི་ཡིད་ལ་བྱེད་པ་གང་ཡིན་པ་དེ་དག་ཀྱང་དེས་བསྐྱེད་པར་མི་བྱའོ།

དེའི་ས་ལ་ཡང་འདོད་པར་མི་བྱའོ།

དེ་ཅིའི་ཕྱིར་ཞེ་ན།

དེ་ལས་བྱང་ཆུབ་སེམས་དཔའ་ལྡོག་པར་བྱ་བ་ཡིན་པའི་ཕྱིར་ཏེ།

ཚེ་དང་ལྡན་པ་གང་པོ་འོན་ཀྱང་ཉན་ཐོས་རྣམས་དང་།

རང་སངས་རྒྱས་རྣམས་ནི་ཕན་འདོགས་པར་གྱུར་པ་ཡིན་ནོ།

ཚེ་དང་ལྡན་པ་གང་པོ་དེ་ལྟར་ན།

བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པ་ལ་ནི་ཐམས་ཅད་མཁྱེན་པ་ཉིད་ལ་ཕན་པར་མི་འགྱུར་བའི་ཆོས་དེ་གང་ཡང་མི་དམིགས་སོ།

དགྲ་བཅོམ་པའི་སེམས་དེ་དང་།

ཤེས་པ་གང་ཡིན་པ་དེ་ཡང་བྱང་ཆུབ་སེམས་དཔའ་ལ་ཕན་འདོགས་པར་གྱུར་པ་ཡིན་ཏེ།

གལ་ཏེ་དེ་མེད་ན་དེ་ལས་ལྡོག་པ་མེད་པའི་ཕྱིར་རོ།

འདི་ལྟ་བུར་དགྲ་བཅོམ་པའི་སེམས་བསྐྱེད་པར་མི་བྱའི།

ཤེས་པ་གཅིག་པ་ཞེས་བྱ་བར་ནི་མ་ཡིན་ཏེ།

དེས་དེ་སྤངས་ནས་ཐམས་ཅད་མཁྱེན་པ་ཉིད་དུ་འགྱུར་བ་གང་ཡིན་པ་དེར་སེམས་བསྐྱེད་པར་བྱའོ།

དེ་བཞིན་དུ་རང་སངས་རྒྱས་ཀྱི་སེམས་དང་།

རང་སངས་རྒྱས་ཀྱིས་ཤེས་པ་ཡང་བྱང་ཆུབ་སེམས་དཔའ་སེམས་དཔའ་ཆེན་པོའི་ཐམས་ཅད་མཁྱེན་པ་ཉིད་ལ་ཕན་འདོགས་པར་གྱུར་པ་ཡིན་ནོ།

གལ་ཏེ་དགྲ་བཅོམ་པ་གང་ཡིན་པ་དང་།

རང་སངས་རྒྱས་གང་ཡིན་པའི་སེམས་དང་།

ཤེས་པ་ཞེས་བྱ་བ་དེ་མེད་དུ་ཟིན་ན།

ཕན་འདོགས་པར་ཡང་མི་འགྱུར་རོ།

དེ་ཅིའི་ཕྱིར་ཞེ་ན།

འདི་ལྟ་སྟེ།

བྱང་ཆུབ་སེམས་དཔའ་སེམས་དཔའ་ཆེན་པོའི་སེམས་ནི་ཟག་པ་དང་བཅས་པ་དང་།

ཟག་པ་མེད་པའི་སེམས་དང་ཐུན་མོང་མ་ཡིན་པ་སྟེ།

དེ་ལས་གཞན་པའི་སེམས་རྣམས་ལས་དེ་བཞིན་གཤེགས་པའི་སེམས་མ་གཏོགས་པར་བྱང་ཆུབ་སེམས་དཔའི་སེམས་ཉིད་དེ་ལྟར་དེ་དག་གི་མཆོག་ཅེས་བྱ་བ་ནས།

གོང་ན་མེད་པ་ཞེས་བྱ་བའི་བར་དང་།

མི་མཉམ་པ་དང་།

མཉམ་པ་ཞེས་བྱ་བའི་བར་དུ་བརྗོད་དོ།

ཚེ་དང་ལྡན་པ་གང་པོ་དེ་ལྟ་བས་ན།

ས་འདི་གཉིས་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་ཐམས་ཅད་

མཁྱེན་པ་ཉིད་ལ་ཕན་འདོགས་པར་གྱུར་པ་ཡིན་ཏེ།

དེ་ལྟར་ན་འདི་ལ་བྱང་ཆུབ་སེམས་དཔའ་ཐབས་ལ་མཁས་པའི་ཐམས་ཅད་མཁྱེན་པ་ཉིད་ལ་ཕན་པར་མ་གྱུར་པའི་ཆོས་དེ་གང་ཡང་མི་དམིགས་སོ།།

བམ་པོ་གཉིས་པ།

ཚེ་དང་ལྡན་པ་གང་པོ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོས་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་པ་ན།

དངོས་པོ་གང་ཡོངས་སུ་གཏོང་བའི་དངོས་པོ་དེ་ལ་མཚན་མའི་འདུ་ཤེས་མི་བྱའོ།

དེ་ལྟར་མཚན་མ་མེད་པར་ཡོངས་སུ་གཏོང་ཞིང་།

ཐམས་ཅད་མཁྱེན་པ་ཉིད་དུ་ཡོངས་སུ་སྔོ་ན།

ཕན་འདོགས་པར་གྱུར་པ་ཡིན་ནོ།

མཚན་མ་མ་སྤངས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་མི་འགྱུར་ཏེ།

འདི་ལྟ་སྟེ།

ཐམས་ཅད་མཁྱེན་པ་ཉིད་རྙེད་པ་འདི་ནི་རྙེད་པ་ཆེ་བ་ཡིན་ནོ།

བྱ་བ་དག་གིས་གསེར་བྱེ་བའམ།

རིན་པོ་ཆེ་བྱེ་བ་འདུ་བ་གང་ཡིན་པ་དེ་ནི་རྙེད་པ་ཆེ་བ་མ་ཡིན་གྱི།

གང་མཚན་མ་མེད་པར་དངོས་པོ་ཡོངས་སུ་བཏང་ནས།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་འདི་ཉིད་རྙེད་པ་ཁྱད་པར་དུ་འཕགས་པ་ཡིན་ནོ།

གང་མཚན་མ་ཡོངས་སུ་མ་སྤངས་པར་གླིང་ཆེན་པོ་བཞིར་འཁོར་ལོས་སྒྱུར་བའི་རྒྱལ་སྲིད་ཐོབ་པར་གྱུར་དུ་ཟིན་ཀྱང་།

དེ་ནི་རྙེད་པ་ཆེན་པོ་མ་ཡིན་ལ།

མཚན་མ་མ་སྤངས་པར་འདོད་པའི་ཁམས་སུ་བདག་པོའི་བྱ་བ་བྱེད་དུ་འཇུག་པ་འདི་ཡང་རྙེད་པ་ཆེན་པོར་འགྱུར་བ་མ་ཡིན་ནོ།

གལ་ཏེ་མཚན་མ་ཡོངས་སུ་སྤངས་ནས།

རྒྱུན་དུ་ཞུགས་པའི་འབྲས་བུ་ཐོབ་པ་འམ།

ལན་ཅིག་ཕྱིར་འོང་བའི་འབྲས་བུ་དང་།

ཕྱིར་མི་འོང་བའི་འབྲས་བུ་དང་།

དགྲ་བཅོམ་པ་ཉིད་དང་།

རང་བྱང་ཆུབ་ཐོབ་པར་གྱུར་ན།

འདི་ནི་རྙེད་པ་ཤིན་ཏུ་ཆེ་བ་ཡིན་པར་རིག་པར་བྱའོ།

གང་མཚན་མ་ཡོངས་སུ་སྤངས་ནས།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པ་འདི་ཡང་རྙེད་པ་ཆེ་བ་ཡིན་ཏེ།

འདི་ནི་རྙེད་པ་སྔ་མ་དེ་བས་རྙེད་པ་ཤིན་ཏུ་ཆེ་བ་སྟེ།

བྱང་ཆུབ་སེམས་དཔའ་སེམས་དཔའ་ཆེན་པོའི་རྙེད་པ་འདི་ནི་མཉམ་པའི་ཟླ་མེད་དེ།

འདི་ལྟ་སྟེ།

དེ་བཞིན་གཤེགས་

པ་རྙེད་པ་ཡིན་ནོ།

གང་གོས་དང་།

ཁ་ཟས་དང་།

མལ་ཆ་དང་།

སྟན་དང་།

ན་བའི་གསོས་སྨན་དང་།

ཡོ་བྱད་མཚན་མར་ཡོངས་སུ་གཟུང་བའི་དངོས་པོ་ནི་བསྐྱེད་པར་མི་བྱའོ།

དེ་ཅིའི་ཕྱིར་ཞེ་ན།

དེ་ནི་མཚན་མའི་གྲངས་སུ་གཏོགས་པའི་ཕྱིར་རོ།

གང་ཡང་གོས་དང་།

ཁ་ཟས་དང་།

མལ་ཆ་དང་།

སྟན་དང་།

ན་བའི་གསོས་སྨན་དང་།

ཡོ་བྱད་དེ་ཡང་ཡོངས་སུ་བཏང་ལ།

ཐབས་ལ་མཁས་པས་ཡོངས་སུ་བསྔོས་ན།

ཐམས་ཅད་མཁྱེན་པ་ཉིད་འཐོབ་བོ།

དེ་ལྟ་བས་ན་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་རྙེད་པ་མཆོག་ཡིན་པར་རིག་པར་བྱའོ།

བྱང་ཆུབ་སེམས་དཔའ་ལ་འདི་སྐད་དུ།

ཁྱོད་ཀྱིས་ཐམས་ཅད་མཁྱེན་པ་ཉིད་ནི་ཐོབ་པར་འགྱུར་རོ།

དེ་ཅིའི་ཕྱིར་ཞེ་ན།

ཁྱོད་ཀྱིས་གང་ལ་མཚན་མར་བཟུང་བའི་དངོས་པོ་འདི་ནི་རྙེད་པར་དཀའ་བ་སྟེ།

ནང་དང་ཕྱི་རོལ་གྱི་དངོས་པོ་ཐམས་ཅད་ནི་རང་བཞིན་གྱིས་དབེན་པའི་ཕྱིར་རོ།

དེ་ལྟར་ན་ཁྱོད་ཀྱིས་ཐམས་ཅད་མཁྱེན་པ་ཉིད་ནི་ཐོབ་པར་འགྱུར་རོ།

གང་དག་གིས་ཐོབ་པ་དང་།

གང་དག་འཐོབ་པ་དང་།

འཐོབ་པར་འགྱུར་བ་དེ་དག་ཐམས་ཅད་ཀྱིས་ཀྱང་།

ཐམས་ཅད་མཁྱེན་པ་ཉིད་ཀྱི་ན་ཐོབ་བོ།

འཐོབ་བོ།

འཐོབ་པར་འགྱུར་རོ་ཞེས་སྨྲ་བར་བྱའོ།

དེ་སྐད་ཅེས་སྨྲས་པ་དང་།

ཚེ་དང་ལྡན་པ་བྱམས་མའི་བུ་གང་པོ་ལ།

ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་སྨྲས་སོ།

ཚེ་དང་ལྡན་པ་བགྲང་བ་འདི་བྱང་ཆུབ་སེམས་དཔའ་གང་གི་ཡིན་སྨྲས་པ།

འདི་ནི་བྱང་ཆུབ་སེམས་དཔའ་ཐབས་ལ་མཁས་པའི་བགྲང་བ་ཡིན་ནོ།

དེ་ཅིའི་ཕྱིར་ཞེ་ན།

སེམས་ཅན་འདི་དག་གིས་ཐམས་ཅད་མཁྱེན་པ་ཉིད་ཀྱི་ན་འཐོབ་པར་དེ་ལྟར་ཤེས་སུ་ཟིན་ན་ནི།

སེམས་ཅན་ཐམས་ཅད་ཀྱི་ཐམས་ཅད་མཁྱེན་པ་ཉིད་ཐོབ་པར་འགྱུར་བ་ཞིག་ན།

གང་གི་ཕྱིར་འདི་ལྟར་དེ་དག་ཐམས་ཅད་མཁྱེན་པ་ཉིད་ལ་མ་མོས་ཤིང་།

སེམས་མི་སྐྱེད་པའི་ཕྱིར་ཏེ།

གང་དག་ཐམས་ཅད་མཁྱེན་པ་ཉིད་དུ་སེམས་མི་སྐྱེད་པ་དེ་དག་ནི་ཐམས་ཅད་མཁྱེན་པ་ཉིད་ཐོབ་པར་མི་འགྱུར་རོ།

གང་དག་འདི་ལྟར་ཐམས་ཅད་མཁྱེན་པ་ཉིད་ལ་མོས་ཤིང་སེམས་

བསྐྱེད་པ་དག་ནི།

ཐམས་ཅད་མཁྱེན་པ་ཉིད་ཐོབ་པར་འགྱུར་ཏེ།

སེམས་དེ་བསྐྱེད་ནས།

དངོས་པོ་གང་དང་གང་ཡོངས་སུ་གཏོང་བ་དེ་དང་དེ་དངོས་པོ་མེད་པར་མཐོང་ངོ་།

དངོས་པོ་གང་དང་གང་ཤེས་པ་ལ་འདི་དག་ནི་སྒྱུ་མ་ལྟ་བུ་སྟེ།

འདི་ནི་ཇི་ལྟར་བདག་གིས་མཚན་མར་བཟུང་བ་ལྟར་མ་ཡིན་ནོ་སྙམ་ནས་དེ་གཏོང་བའི་བློ་ཤས་ཆེ་བར་འགྱུར་ཞིང་།

སྦྱིན་པའི་བློ་དང་ལྡན་པར་འགྱུར་ཏེ།

འཛིན་པའི་སེམས་མི་སྐྱེད་དོ།

འདི་ལྟར་དངོས་པོ་འདི་ནི་སྒྱུ་མ་ལྟ་བུར་སེམས་ཅན་རྣམས་ཀྱིས་དེ་ལྟར་མི་ཤེས་པས།

དངོས་པོ་དེ་དག་ལ་ཤས་ཆེར་མངོན་པར་ཞེན་པར་འགྱུར་ཏེ།

ཡོངས་སུ་མི་གཏོང་བའི་བློར་འགྱུར་རོ།

ཡོངས་སུ་མི་གཏོང་བས་སེར་སྣ་ཡོངས་སུ་འཛིན་ཏོ།

སེར་སྣ་དེས་ཀྱང་ངན་སོང་རྣམས་སུ་སྐྱེ་བར་འགྱུར་ལ།

དངོས་པོ་དེ་དང་ཡང་འབྲལ་བར་འགྱུར་རོ།

དེ་ལྟར་དངོས་པོ་དེ་ཡང་ཡོངས་སུ་མི་གཏོང་ཞིང་ཡོངས་སུ་མ་སྤྱད་ལ།

དངོས་པོ་དེ་ལས་བརྟེན་ནས་སེར་སྣ་བསྐྱེད་དེ།

ངན་སོང་རྣམས་སུ་ཡང་སྐྱེ་བར་འགྱུར་རོ།

གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པས་འདི་ལྟར་ཤེས་ཏེ།

དངོས་པོ་འདི་ནི་སྒྱུ་མ་ལྟ་བུ་སྟེ།

ཡོངས་སུ་གཏོང་བ་ཡང་སྒྱུ་མ་ལྟ་བུ་ཡིན་པས་ན།

སྒྱུ་མ་ལྟ་བུ་གང་ཡིན་པ་དེ་ནི་བདག་གི་ཡང་མ་ཡིན་ཡོངས་སུ་གཏོང་བ་ཡང་མ་ཡིན་ནོ།

དེ་ཅིའི་ཕྱིར་ཞེ་ན།

འདི་ལྟར་དེ་སྒྱུ་མ་ལྟ་བུ་ཡིན་པའི་ཕྱིར།

དེ་དངོས་པོ་དེ་རྒྱ་ཆེར་ཡོངས་སུ་གཏོང་ངོ་སྙམ་དུ་སེམས་སོ།

དེ་དེ་ཡོངས་སུ་གཏོང་བས་སངས་རྒྱས་བཅོམ་ལྡན་འདས་རྣམས་ལ་འདོད་པ་སྐྱེད་དེ།

བཅོམ་ལྡན་འདས་སངས་རྒྱས་བཅོམ་ལྡན་འདས་རྣམས་ནི་ལེགས་པར་གསུང་བ།

ཕྱིན་ཅི་མ་ལོག་པར་གསུང་བ་ཁོ་ན་སྟེ།

སྒྱུ་མ་ལྟ་བུའི་དངོས་པོ་ཡོངས་སུ་བཏང་བས།

ཡོད་པའི་མཚན་ཉིད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་འདི་ནི་ངོ་མཚར་ཏོ།

དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོས་འདི་ལྟར་སངས་རྒྱས་བཅོམ་ལྡན་འདས་གང་དག་ཇི་ལྟར་བྱས་ན་བྱང་ཆུབ་སེམས་དཔའ་དངོས་པོ་དེ་དག་

ལ་མངོན་པར་ཞེན་པ་མི་སྐྱེད་ཅིང་།

འདི་ལྟར་དེ་ཡོངས་སུ་གཏོང་བའི་བློར་འགྱུར་སྙམ་སྟེ།

བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དངོས་པོ་དེ་དག་དང་།

རྐྱེན་དེ་དག་མཚན་ཉིད་མེད་པར་སྟོན་པ་འདི་དག་ནི་དཀའ་བ་མཛད་པའོ་སྙམ་དུ་རིག་པར་བྱའོ།

ཚེ་དང་ལྡན་པ་གང་པོ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་ཐམས་ཅད་མཁྱེན་པ་ཉིད་ཀྱིས་ཐོབ་པར་འགྱུར་རོ་ཞེས་དེ་ལྟར་རིག་པར་བྱའོ།

ཚེ་དང་ལྡན་པ་གང་པོ་གལ་ཏེ་འདི་ནི་ཤ་ར་དྭ་ཏིའི་བུའི་སྤོབས་པ་ཡིན་ནོ་སྙམ་དུ་ཁྱོད་ཀྱིས་ཤེས་ན་དེ་ལྟར་མི་བལྟའི།

འདི་ནི་དེ་བཞིན་གཤེགས་པའི་བྱིན་གྱི་རླབས་ཀྱིས་ཤ་ར་དྭ་ཏིའི་བུ་སྨྲ་བར་ཟད་དོ།

དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ།

ཀུན་དགའ་བོ་ཁྱོད་ཀྱིས་གནས་བརྟན་ཤ་ར་དྭ་ཏིའི་བུས་ཇི་སྐད་སྨྲས་པ་བཞིན་དུ་ཟུང་ཤིག །

ཆོངས་ཤིག །

ལྷོགས་ཤིག །

ཀུན་ཆུབ་པར་གྱིས་ཤིག །

སྦྱིན་པའི་ཕ་རོལ་ཏུ་ཕྱིན་པ་ལས་མཚན་མ་མེད་པའི་ལེའུ་སྟེ་བཞི་པའོ།།

དེ་ནས་བཅོམ་ལྡན་འདས་ལ་ཚེ་དང་ལྡན་པ་བྱམས་མའི་བུ་གང་པོས་འདི་སྐད་ཅེས་གསོལ་ཏོ།

བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་ཡོངས་སུ་གཏོང་བ་དེས་ཅི་ཞིག་ཡོངས་སུ་བཏང་བ་ལགས།

བཅོམ་ལྡན་འདས་ཀྱིས་བཀའ་སྩལ་པ།

གང་པོ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་ཡོངས་སུ་གཏོང་བ་དེས་ཅི་ཡང་ཡོངས་སུ་བཏང་བ་མེད་དོ།

ཇི་ལྟར་ཡོངས་སུ་བཏང་བ་མེད་པ་དེ་བཞིན་དུ་ཆོས་ཅི་ཡང་ཐོབ་པ་མེད་དོ།

བཅོམ་ལྡན་འདས་ཀྱིས་བཀའ་སྩལ་པ།

གང་པོ་ཇི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་དངོས་པོ་ཅི་ཡང་ཡོངས་སུ་བཏང་བ་མེད་པ་དེ་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པས་ཀྱང་ཆོས་ཅི་ཡང་ཐོབ་པ་མེད་དོ།

གང་པོ་བྱང་ཆུབ་སེམས་དཔའ་སེམས་དཔའ་ཆེན་པོའི་དགོད་པ་ཅི་འདྲ་བ་དེ་བཞིན་དུ།

ཆོས་ཀྱི་འདུ་བའི་སྒོ་ཡང་

དེ་ཁོ་ན་དང་འདྲ་བར་འགྱུར་རོ།

གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་འགའ་ཞིག་ཡོངས་སུ་བཏང་བར་གྱུར་ན་ནི་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་ཆོས་ཀྱང་ཡོད་པ་ཞིག་ཐོབ་པར་འགྱུར་ན་གང་པོ་གང་གི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་ཡོངས་སུ་གཏོང་བ་བྱེད་པ་ན་དངོས་པོ་ཡོད་པ་ཅི་ཡང་ཡོངས་སུ་བཏང་བ་མེད་པས་དེའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཡོད་པའི་ཆོས་ཅི་ཡང་ཐོབ་པ་མེད་དོ།

གང་པོ་དཔེར་ན།

སྒྱུ་མ་མཁན་ནམ།

སྒྱུ་མ་མཁན་གྱི་སློབ་མས་སྒྱུ་མ་མཁན་གྱི་ལག་ཏུ་ལ་དུ་ཞིག་བཙོངས་ལ།

དེ་ལ་སྒྱུ་མ་མཁན་གྱིས་ཀཱར་ཥ་པ་ཎ་དག་གཅིག་མངོན་པར་སྤྲུལ་ཏེ་བྱིན་ན།

གང་པོ་དེ་ལྟར་ན།

རིན་ཇི་ལྟ་བ་དེ་བཞིན་དུ་ལ་དུ་ཡང་དེ་དང་འདྲའོ།

དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོས་སྦྱིན་པ་ཇི་ལྟ་བུ་ཡོངས་སུ་བཏང་བ་དེ་བཞིན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ཡང་དེ་ཁོ་ན་དང་འདྲའོ།

གང་པོ་དེ་ལྟ་བས་ན་འདུ་བ་ཅི་འདྲ་བ་དེ་བཞིན་དུ།

དགོད་པ་ཡང་དེ་ཁོ་ན་དང་འདྲ་སྟེ།

དེ་ལྟར་ན་བྱང་ཆུབ་སེམས་དཔའི་རིན་ཅི་འདྲ་བ་དེ་བཞིན་དུ་རྙེད་པ་ཡང་དེ་ཁོ་ན་དང་འདྲ་བ་ཡིན་ནོ།

གང་པོ་དཔེར་ན།

སྐྱེས་བུ་སྒྱུ་མ་མཁན་གྱིས་ཤིང་ལྗོན་པ་ཞིག་མངོན་པར་སྤྲུལ་ལ།

ཤིང་ལྗོན་པ་དེའི་དྲུང་དུ་ཡང་སྲོག་ཆགས་འབུམ་སྤྲུལ་ཏེ།

སྲོག་ཆགས་དེ་དག་ཀྱང་ཤིང་ལྗོན་པ་དེའི་འབྲས་བུ་རྣམས་ཟ་ན།

གང་པོ་དེ་ནི་འབྲས་བུ་ཇི་ལྟ་བ་བཞིན་དུ་ཟབ་པོ་རྣམས་ཀྱང་དེ་ཁོ་ན་དང་འདྲའོ།

དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོའི་ཡོངས་སུ་གཏོང་བ་ཇི་ལྟ་བ་བཞིན་དུ་ཆོས་ཀྱི་འདུ་བའི་སྒོ་ཡང་དེ་ཁོ་ན་དང་འདྲའོ།

གང་པོ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཡོངས་སུ་གཏོང་བ་ན་རིན་དང་།

རྙེད་པ་དང་།

རྙེད་པ་དང་རིན་དུ་མཉམ་པར་འགྱུར་རོ།

གང་པོ་འདི་ལྟ་སྟེ་དཔེར་ན།

སྒྱུ་མ་མཁན་ནམ།

སྒྱུ་མ་མཁན་གྱི་སློབ་མ་མཁས་པ་ཞིག་གིས་ལམ་གྱི་བཞི་མདོ་ཆེན་པོར་སྐྱེ་བོ་ཕལ་པོ་ཆེའི་མདུན་དུ་བུད་མེད་གཅིག་མངོན་པར་སྤྲུལ་ལ།

བུད་མེད་དེ་ཡང་སྦྲུམ་མར་མངོན་པར་སྤྲུལ་ཏེ་བུ་བྱུང་བར་བསྟན་ནས།

བུད་མེད་དེའི་བུ་བཙས་ལ།

ཁྱེའུ་ཞིག་ཏུ་བཙས་ནས།

ཁྱེའུ་དེ་ཡང་ཤི་བར་བསྟན་ན།

གང་པོ་འདི་ཇི་སྙམ་དུ་སེམས།

ཅི་ཁྱེའུ་ཤི་བ་དེའི་ཚེ་ན་བུད་མེད་དེ་ལ་བདག་གི་བུ་ཤིའོ་སྙམ་པའི་སེམས་སྐྱེ་འམ།

གསོལ་པ།

བཅོམ་ལྡན་འདས་དེ་ནི་མ་ལགས་སོ།

བཅོམ་ལྡན་འདས་ཀྱིས་བཀའ་སྩལ་པ།

གང་པོ་དེ་ལྟ་ན།

མ་ཇི་ལྟ་བ་དེ་བཞིན་དུ་བུ་ཡང་དེ་ཁོ་ན་དང་འདྲ་སྟེ།

དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོའི་སྦྱིན་པ་ཇི་ལྟ་བ་བཞིན་དུ།

ཐམས་ཅད་མཁྱེན་པ་ཉིད་ཀྱང་དེ་ཁོ་ན་དང་འདྲའོ།

གང་པོ་དེ་ལྟར་ན་འདིར་ཡང་ཆོས་དེ་དག་གི་འདུ་བའི་སྒོ་གཉི་ག་མེད་དོ།

གང་པོ་འདི་ཇི་སྙམ་དུ་སེམས།

ཅི་ཁྱོད་ཀྱིས་ང་ཆོས་འགའ་ཞིག་ལ་འདོད་པ་ཆེ་བར་མཐོང་ངམ།

གསོལ་པ།

བཅོམ་ལྡན་འདས་དེ་ནི་མ་ལགས་སོ།

དེ་ཅིའི་སླད་དུ་ཞེ་ན།

བཅོམ་ལྡན་འདས་དེ་བཞིན་གཤེགས་པས་ནི་ཆོས་དེ་དག་སྟོང་པར་མངོན་པར་རྫོགས་པར་སངས་རྒྱས་པའི་སླད་དུ་ལགས་སོ།

བཅོམ་ལྡན་འདས་ཀྱིས་བཀའ་སྩལ་པ།

གང་པོ་དེ་བཞིན་དུ་ཇི་ལྟར་དེ་བཞིན་གཤེགས་པ་ཆོས་གང་ལ་ཡང་འདོད་པ་ཆེ་བ་མེད་པ་དེ་བཞིན་དུ་ང་བྱང་ཆུབ་སེམས་དཔར་གྱུར་པའི་ཚེ་ཆོས་གང་ལ་ལ་ཞིག་ཡོངས་སུ་མ་བཏང་བ་དེ་མེད་དོ།

དེ་བས་ན་སངས་རྒྱས་བཅོམ་ལྡན་འདས་རྣམས་ལ་ནི་ཆགས་པའམ།

ཁོང་ཁྲོ་བ་འགའ་ཡང་མི་སྐྱེའོ།

དེ་ཅིའི་ཕྱིར་ཞེ་ན།

འདི་ལྟར་སངས་རྒྱས་བཅོམ་ལྡན་འདས་ནི་ཆགས་པ་དང་ཁོང་ཁྲོ་བ་སྤངས་པ་ཡིན་པའི་ཕྱིར་རོ།

གང་པོས་གསོལ་པ།

བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་དངོས་པོ་གང་དང་གང་ཡོངས་སུ་གཏོང་བ་དེ་དང་དེ་ཉིད་སྟོང་པའམ།

ཡ་མ་བརླ་འམ།

གསོབ་བམ།

གསོག་ཏུ་མཐོང་བ་ནི་ངོ་མཚར་ལགས་སོ།

བཅོམ་ལྡན་འདས་ཀྱིས་བཀའ་སྩལ་པའི་དོན་བདག་གིས་འཚལ་བ་ལྟར་ན།

གལ་ཏེ་བྱང་ཆུབ་སེམས་དཔས་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དབྱིག་དང་།

གསེར་གྱིས་བཀང་སྟེ་སློང་བ་རྣམས་ལ་སྩལ་ཀྱང་།

བྱང་ཆུབ་སེམས་དཔས་ཇི་ལྟར་ཡོངས་སུ་གཏོང་བའི་ཐབས་མ་འཚལ་ན།

དེ་ལྟ་ན་དེས་ནི་སྦྱིན་པ་ཉི་ཚེར་འགྱུར་གྱི།

སྦྱིན་པའི་ཕ་རོལ་ཏུ་ཕྱིན་པ་ནི་མ་ལགས་སོ།

བྱང་ཆུབ་སེམས་དཔའ་སེམས་དཔའ་ཆེན་པོ་ཡོངས་སུ་གཏོང་བ་ན།

འདི་ལྟར་ཡང་བདག་གིས་བདོག་པ་ཐམས་ཅད་ཡོངས་སུ་གཏང་བར་བྱའོ་སྙམ་དུ་ཡང་སེམས་བསྐྱེད་པར་བགྱིའོ།

བཅོམ་ལྡན་འདས་ཀྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་བཀའ་སྩལ་པ།

བསྟན་པ་འདིའི་དོན་བཤད་པའི་ཕྱིར་སྤོབས་པར་གྱིས་ཤིག །

ངས་བཤད་པའི་དུས་ལ་བབ་པ་ན་ཡང་བཤད་པར་བྱའོ།

དེ་ནས་ཚེ་དང་ལྡན་པ་ཤ་ར་དྭ་ཏིའི་བུས་ཚེ་དང་ལྡན་པ་བྱམས་མའི་བུ་གང་པོ་ལ་འདི་སྐད་ཅེས་སྨྲས་སོ།

ཚེ་དང་ལྡན་པ་གང་པོ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་ཆོས་ཐམས་ཅད་སྟོང་པར་ཡིད་ལ་བྱེད་ཅིང་སྦྱིན་པ་སྦྱིན་པར་བྱའོ།

ཐམས་ཅད་མཁྱེན་པ་ཉིད་ལ་དམིགས་པར་བྱས་ནས།

བདོག་པ་ཐམས་ཅད་ཡོངས་སུ་གཏང་བར་བྱའོ།

ཟིན་པ་དང་མ་ཟིན་པའི་དངོས་པོ་རྣམས་ཡོངས་སུ་མ་བཏང་བའམ།

མ་བྱིན་པའམ།

མཆོད་སྦྱིན་མ་བྱས་པ་ཅི་ཡང་མེད་པར་བྱའོ།

ཚེ་དང་ལྡན་པ་གང་པོ་དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོས་ཐམས་ཅད་མཁྱེན་པ་ཉིད་ཀྱི་སེམས་ཀྱིས་སྦྱིན་པ་སྦྱིན་པར་བྱའོ།

སྦྱིན་པའི་ཕ་རོལ་ཏུ་ཕྱིན་པ་ལས་སྒྱུ་མ་ལྟ་བུར་བསྟན་པའི་ལེའུ་སྟེ་ལྔ་པའོ།།

དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་བཀའ་སྩལ་པ།

ཤ་ར་དྭ་ཏིའི་བུ་ལེགས་སོ་ལེགས་སོ།

ཤ་ར་དྭ་ཏིའི་བུ་དེ་དེ་བཞིན་ཏེ།

བྱང་ཆུབ་སེམས་དཔའ་སེམས་དཔའ་ཆེན་པོས་ཐམས་ཅད་མཁྱེན་པ་ཉིད་ལ་དམིགས་པ་བྱས་ལ་སྦྱིན་པ་སྦྱིན་པར་བྱའོ།

ཤ་ར་དྭ་ཏིའི་བུ་ཁྱོད་ཤར་ཕྱོགས་ཀྱི་འཇིག་རྟེན་གྱི་ཁམས་ཐམས་ཅད་ན་བྱང་ཆུབ་སེམས་དཔའ་

སེམས་དཔའ་ཆེན་པོ་དག་སྦྱིན་པ་སྦྱིན་པར་བྱེད་པ་མཐོང་བར་འདོད་དམ།

གསོལ་པ།

བཅོམ་ལྡན་འདས་ཤར་ཕྱོགས་ཀྱི་འཇིག་རྟེན་གྱི་ཁམས་ཐམས་ཅད་ན།

བྱང་ཆུབ་སེམས་དཔའ་སེམས་དཔའ་ཆེན་པོ་དག་ཇི་ལྟར་སྦྱིན་པ་སྦྱིན་པར་བགྱིད་པ་མཐོང་བར་འཚལ་ལོ།

དེ་ནས་སངས་རྒྱས་ཀྱི་མཐུས་ཚེ་དང་ལྡན་པ་ཤ་ར་དྭ་ཏིའི་བུ་དང་།

དེ་ལས་གཞན་པའི་ཉན་ཐོས་ཆེན་པོ་རྣམས་དང་།

ཐམས་ཅད་དང་ལྡན་པའི་འཁོར་གྱིས་འདི་ནས་ཐད་ཀའི་ཕྱོགས་སུ་འཇིག་རྟེན་གྱི་ཁམས་སྒྱུ་མ་ཞེས་བྱ་བ་ན།

དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཕུང་པོ་ཆེན་པོ་ཞེས་བྱ་བ་ཉན་ཐོས་རྣམས་ལ་ཆོས་སྟོན་ཏེ།

དེ་ན་བྱང་ཆུབ་སེམས་དཔའ་ཐོགས་པ་མེད་པ་ཞེས་བྱ་བ་ཁྱིམ་ན་འདུག་ཅིང་ཁྱིམ་ན་འདུག་བཞིན་དུ་དབྱིག་དང་།

གསེར་གྱི་ཕུང་པོ་རི་ཙམ་སྦྱིན་པ་སྦྱིན་ཞིང་ཡོངས་སུ་གཏོང་སྟེ།

འདི་ལས་ཁྱེར་བའི་སེམས་ཅན་དེ་དག་ལ་སྦྱིན་པ་བྱིན་པར་གྱུར་ཅིག་ཅེས་སྒྲོགས་སོ།

གོས་ཀྱི་ཕུང་པོ་རི་ཙམ་དག་སྦྱིན་པར་བྱེད་དོ།

བཟའ་བ་དང་།

བཅའ་བའི་ཕུང་པོ་རི་ཙམ་དག་སྦྱིན་པ་སྦྱིན་པར་བྱེད་དེ།

སེམས་ཅན་གང་དག་གིས་ཕ་བི་ལས་ཁྱེར་བ་དེ་དག་ལ་སྦྱིན་པ་བྱིན་པར་གྱུར་ཅིག་ཅེས་སྒྲོགས་སོ།

གཞན་ཡང་བཅོམ་ལྡན་འདས་ཀྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་བཀའ་སྩལ་པ།

བྱང་ཆུབ་སེམས་དཔའ་ཐོགས་པ་མེད་པས་རིན་པོ་ཆེ་སྣ་བདུན་གྱི་ཤིང་རྟ་འབུམ་ཕྲག་མང་པོ་བཀྲམ་སྟེ་ཤིང་རྟ་རེ་རེ་ལ་ཡང་བུད་མེད་ཁ་དོག་སྟོང་གིས་བརྒྱན་པ་དག་བསྐྱོན་ནས།

ཚོང་འདུས་ཀྱི་སྲང་དུ་སྦྱིན་པར་བྱེད་དེ།

ཚིག་འདི་སྐད་དུ་གང་ཤིང་རྟ་འདི་དག་དང་།

བུད་མེད་འདི་དག་འདོད་པ་དེས་ཁྱེར་ཅིག་ཅེས་ཀྱང་ཟེར་རོ།

བུད་མེད་དེ་དག་རེ་རེ་ཡང་བུད་མེད་བརྒྱ་བརྒྱའི་འཁོར་དང་ལྡན་ཏེ།

ཤིང་རྟ་དབྱིག་དང་བཅས་པ་བུད་མེད་ཀྱི་འཁོར་དང་བཅས་པ་དེ་བུད་མེད་དེ་དག་ལ་སྦྱིན་པར་བྱེད་ཅིང་ཡོངས་སུ་གཏོང་ངོ་།

ཤ་ར་དྭ་ཏིའི་བུ་ཁྱོད་ཀྱིས་བྱང་ཆུབ་སེམས་དཔའ་ཐོགས་པ་མེད་པ་སྦྱིན་པ་སྦྱིན་པ་མཐོང་ངམ།

གསོལ་པ།

བཅོམ་ལྡན་འདས་མཐོང་ལགས་སོ།

བདེ་བར་གཤེགས་པ་མཐོང་ལགས་

སོ།

བཅོམ་ལྡན་འདས་ཀྱིས་བཀའ་སྩལ་པ།

ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་སྦྱིན་པ་སྦྱིན་པར་བྱའོ།

དེ་ནས་ཉན་ཐོས་ཆེན་པོ་དེ་དག་གིས་ཀྱང་སངས་རྒྱས་ཀྱི་མཐུས་སྦྱིན་པ་སྦྱིན་པ་དེ་མཐོང་ངོ་།

དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་བཀའ་སྩལ་པ།

ཤ་ར་དྭ་ཏིའི་བུ་འདི་ཇི་སྙམ་དུ་སེམས།

སྦྱིན་པ་འདི་རྒྱ་ཆེ་བ་ཡིན་ནམ།

གསོལ་པ།

ཨ་ལ་ལ་བཅོམ་ལྡན་འདས་རྒྱ་ཆེ་བ་ལགས་སོ།

བཅོམ་ལྡན་འདས་ཀྱིས་བཀའ་སྩལ་པ།

ཤ་ར་དྭ་ཏིའི་བུ་སྦྱིན་པ་འདི་ལྟར་བྱིན་ཞིང་ཡོངས་སུ་བཏང་བ་འདི་ལ་དེ་ལས་གཞན་པའི་སྦྱིན་པ་རྣམས་ནི་བརྒྱའི་ཆར་ཡང་ཉེ་བར་མི་འགྲོ་བ་ནས།

རྒྱུའི་བར་དུ་ཡང་མི་བཟོད་དོ།

དེ་ནས་སངས་རྒྱས་ཀྱི་མཐུས་ཚེ་དང་ལྡན་པ་ཤ་ར་དྭ་ཏིའི་བུས་སྦྱིན་པ་དེ་བྱིན་ནས།

འདི་སྐད་དུ་དགེ་བའི་རྩ་བ་འདིས་ཐེག་པ་ལ་གསར་དུ་ཞུགས་པའི་བྱང་ཆུབ་སེམས་དཔའ་ཐམས་ཅད་ནི་ཕྱིར་མི་ལྡོག་པ་ཉིད་དུ་གྱུར་ཅིག །

ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་ཡིན་པ་དེ་དག་ནི་མྱུར་དུ་ཐམས་ཅད་མཁྱེན་པ་ཉིད་ཡོངས་སུ་རྫོགས་པར་གྱུར་ཅིག་ཅེས་ཡོངས་སུ་སྔོ་བར་བྱེད་པ་ཡང་མཐོང་ངོ་།

དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ།

བཅོམ་ལྡན་འདས་འདི་ལ་ཐེག་པ་ལ་གསར་དུ་ཞུགས་པའི་བྱང་ཆུབ་སེམས་དཔའ་གང་ལ་བགྱི།

བཅོམ་ལྡན་འདས་ཀྱིས་བཀའ་སྩལ་པ།

ཤ་ར་དྭ་ཏིའི་བུ་འདི་ལ་བྱང་ཆུབ་སེམས་དཔའ་སེམས་དང་པོ་བསྐྱེད་པ།

སེམས་དང་པོ་བསྐྱེད་པ་ལ་གནས་པ་ནི་དགྲ་བཅོམ་པའི་སེམས་ལས་འདའོ།

སེམས་གཉིས་པ་བསྐྱེད་པ་ནི་རང་སངས་རྒྱས་ཀྱི་སེམས་ལས་འདའོ།

ཕྱིར་མི་ལྡོག་པའི་སེམས་ལ་གནས་པ་ནི་བྱང་ཆུབ་སེམས་དཔའ་མ་ངེས་ཤིང་ལུང་མ་བསྟན་པའི་སེམས་ལས་འདའོ།

བྱང་ཆུབ་སེམས་དཔའ་བྱང་ཆུབ་ཀྱི་སྙིང་པོ་ལ་འདུག་པ་ནི་ཐམས་ཅད་མཁྱེན་པ་ཞེས་བྱའོ།

ཤ་ར་དྭ་ཏིའི་བུ་གང་བྱང་ཆུབ་ཀྱི་སྙིང་པོ་ལ་འདུག་ལ།

ཐམས་ཅད་མཁྱེན་པ་མ་ཐོབ་པར་དེ་ལས་ལྡང་བ་འདི་ནི་མི་སྲིད་དེ།

གོ་སྐབས་མ་ཡིན་ཞིང་གནས་མེད་

དེ།

མ་བྱུང་འབྱུང་བར་མི་འགྱུར་རོ།

ཤ་ར་དྭ་ཏིའི་བུ་གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་ཀྱི་སྙིང་པོ་ལ་འདུག་པ་དེའི་ཚེ།

ལྷ་དང་བཅས་པའི་འཇིག་རྟེན་དང་།

བདུད་དང་བཅས།

ཚངས་པ་དང་བཅས།

ལྷ་དང་མི་དང་།

ལྷ་མ་ཡིན་དང་བཅས་པའི་འཇིག་རྟེན་གྱིས་འདི་ལྟར་དེ་བཞིན་གཤེགས་པ་བྱང་ཆུབ་ཀྱི་སྙིང་པོ་ལ་བཞུགས་སོ་ཞེས་རིག་པར་བྱའོ།

དེ་ཅིའི་ཕྱིར་ཞེ་ན།

འདི་ལྟར་དེའི་ཚེ།

བྱང་ཆུབ་སེམས་དཔའ་སེམས་དཔའ་ཆེན་པོ་བརྣག་པ་ཡོངས་སུ་རྫོགས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་སྐལ་བ་ཅན་དུ་གྱུར་པའི་ཕྱིར་རོ།

དེ་ནས་སངས་རྒྱས་ཀྱི་མཐུས་ཚེ་དང་ལྡན་པ་ཤ་ར་དྭ་ཏིའི་བུ་དང་།

ཉན་ཐོས་དེ་དག་གིས་ཤར་ཕྱོགས་ཀྱི་འཇིག་རྟེན་གྱི་ཁམས་ཐམས་ཅད་ན།

བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་པ་གང་དག་བྱང་ཆུབ་ཀྱི་སྙིང་པོ་ལ་འདུག་ཅིང་།

བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་དེ་དག་ཀྱང་མཐོང་ངོ་།

བྱང་ཆུབ་སེམས་དཔའ་གྲངས་མེད་པ་གང་དག་རབ་ཏུ་འབྱུང་བའི་ཕྱིར་མངོན་པར་འབྱུང་བ་དག་ཀྱང་མཐོང་ངོ་།

བྱང་ཆུབ་སེམས་དཔའ་གྲངས་མེད་པ་གང་དག་ཁྱིམ་ན་གནས་ཤིང་སྦྱིན་པ་གཏོང་བ་དག་ཀྱང་མཐོང་ངོ་།

བྱང་ཆུབ་སེམས་དཔའ་གྲངས་མེད་པ་གང་དག་སློང་བ་རྣམས་སློང་བ་ན།

མགོ་ཡོངས་སུ་གཏོང་བ་དག་ཀྱང་མཐོང་ངོ་།

བྱང་ཆུབ་སེམས་དཔའ་གྲངས་མེད་པ་གང་དག་སློང་བ་རྣམས་སློང་བ་ན།

ལུས་འབིགས་སུ་བཅུག་སྟེ།

ཁྲག་སྦྱིན་པ་དག་ཀྱང་མཐོང་ངོ་།

བྱང་ཆུབ་སེམས་དཔའ་གྲངས་མེད་པ་གང་དག་བུ་དང་ཆུང་མ་ཡོངས་སུ་གཏོང་བ་དང་།

ཁྱིམ་གྱི་དངོས་པོ་དང་།

ཞིང་གི་དངོས་པོ་དང་།

རྟ་དང་།

བ་ལང་དང་།

བྲན་དང་།

བྲན་མོ་དང་།

ལས་བྱེད་པ་དང་།

ཞོ་ཤས་འཚོ་བ་རྣམས་ཡོངས་སུ་གཏོང་བ་དག་ཀྱང་མཐོང་ངོ་།

བྱང་ཆུབ་སེམས་དཔའ་གྲངས་མེད་པ་གང་དག་ལྷ་རྣམས་ཀྱི་དབང་པོ་བརྒྱ་བྱིན་བྱེད་པ་དག་ཀྱང་མཐོང་ངོ་།

བྱང་ཆུབ་སེམས་དཔའ་གྲངས་མེད་པ་གང་དག་དགའ་ལྡན་གྱི་ལྷའི་རིས་སུ་སྐྱེ་བ་དག་ཀྱང་

མཐོང་ངོ་།

བྱང་ཆུབ་སེམས་དཔའ་གྲངས་མེད་པ་གང་དག་དགའ་ལྡན་གྱི་གནས་ནས་ཤི་འཕོས་ཏེ།

མའི་མངལ་དུ་སྐྱེ་བ་དག་ཀྱང་མཐོང་ངོ་།

བྱང་ཆུབ་སེམས་དཔའ་གྲངས་མེད་པ་གང་དག་བཙའ་བ་དང་ཆོས་སྟོན་པ་དག་ཀྱང་མཐོང་ངོ་།

བྱང་ཆུབ་སེམས་དཔའ་གྲངས་མེད་པ་གང་དག་སེམས་ཅན་རྣམས་ཀྱི་ཆེད་དུ་སྡུག་བསྔལ་རྣམས་ཡང་དང་ཡང་མྱོང་བ་དག་ཀྱང་མཐོང་ངོ་།

བྱང་ཆུབ་སེམས་དཔའ་གྲངས་མེད་པ་གང་དག་སེམས་ཅན་རྣམས་ཀྱི་ཆེད་དུ་དཔག་ཚད་བརྒྱར་ཡང་འགྲོ་ཞིང་།

ཉིས་བརྒྱའམ།

སུམ་བརྒྱའམ།

བཞི་བརྒྱའམ།

ལྔ་བརྒྱའམ།

དཔག་ཚད་སྟོང་ངམ།

དེ་ལས་ལྷག་པར་ཡང་འགྲོ་བ་དང་།

སེམས་ཅན་རྣམས་ཀྱི་ཆེད་དུ་ཇི་ལྟར་བྱས་ན།

སེམས་ཅན་འགའ་ཡང་དགེ་བ་བཅུའི་ལས་ཀྱི་ལམ་དག་ལ་གནས་པར་འགྱུར་བར་ཡང་དག་པར་འཛིན་དུ་འཇུག་པ་དང་།

ཡང་ན་གསུམ་ལ་སྐྱབས་སུ་འགྲོ་བར་འགྱུར་བར་འདི་ལ་ཡང་དག་པར་འཛིན་དུ་འཇུག་པར་བྱ་བ་དང་།

ཡང་ན་བསླབ་པའི་གཞི་གཅིག་འཛིན་པར་འགྱུར་བའམ།

ཡང་ན་བསླབ་པའི་གཞི་གཉིས་སམ།

གསུམ་མམ།

བཞིའམ།

ལྔ་འཛིན་པར་འགྱུར་བའམ།

ཡང་ན་སེམས་ཅན་འགའ་ཡང་བྱང་ཆུབ་ལ་གནས་པར་འགྱུར་བར་ཡང་དག་པར་འཛིན་དུ་འཇུག་པར་བྱ་བའི་ཕྱིར་འཇིག་རྟེན་གྱི་ཁམས་གྲངས་མེད་པ་དག་ཏུ་འགྲོ་བ་ཡང་མཐོང་ངོ་།

བྱང་ཆུབ་སེམས་དཔའ་གྲངས་མེད་པ་གང་དག་གཞན་མུ་སྟེགས་ཅན་ཀུན་ཏུ་རྒྱུ་དག་གི་ནང་དུ་བྱུང་ནས།

ཕ་རོལ་ཏུ་ཕྱིན་པ་རྣམས་མི་ཐོས་མི་མཐོང་བ་དག་ལ་བྱང་ཆུབ་སེམས་དཔའ་འདི་དག་ནི་ཕ་རོལ་ཏུ་ཕྱིན་པ་རྣམས་མི་ཐོས་ཤིང་མི་མཐོང་བས་བསྐལ་པ་འབུམ་དག་ཏུ་འཁྱམ་ཞིང་འཁོར་ཏེ།

ཡུན་རིང་པོས་ཐམས་ཅད་མཁྱེན་པ་ཉིད་འཐོབ་པ་དག་ཀྱང་མཐོང་ངོ་།

བྱང་ཆུབ་སེམས་དཔའ་གྲངས་མེད་པ་གང་དག་བྱང་ཆུབ་སེམས་དཔའ་རྣམས་ལ་ཕ་རོལ་ཏུ་ཕྱིན་པ་རྣམས་སྟོན་པ་ཡང་མཐོང་ངོ་།

བྱང་ཆུབ་སེམས་དཔའ་གྲངས་མེད་པ་གང་དག་ཕ་རོལ་ཏུ་ཕྱིན་པ་རྣམས་ཚོལ་ན་ཡང་མི་རྙེད་པ་དག་ཀྱང་མཐོང་ངོ་།

བྱང་ཆུབ་སེམས་དཔའ་གྲངས་མེད་པ་གང་དག་ཕ་རོལ་ཏུ་ཕྱིན་པ་རྣམས་

ཚོལ་ཞིང་དེ་དག་གིས་རྙེད་པ་ཡང་མཐོང་ངོ་།

བྱང་ཆུབ་སེམས་དཔའ་གྲངས་མེད་པ་གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་དག་ཀྱང་མཐོང་ངོ་།

སངས་རྒྱས་བཅོམ་ལྡན་འདས་གྲངས་མེད་པ་ཆོས་སྟོན་པ་དག་ཀྱང་མཐོང་ངོ་།

སངས་རྒྱས་བཅོམ་ལྡན་འདས་གྲངས་མེད་པ་གང་དག་བྱང་ཆུབ་སེམས་དཔའ་རྣམས་ཀྱི་ཆེད་དུ།

བསྐལ་པ་བྱེ་བ་ཁྲག་ཁྲིག་འབུམ་ཕྲག་མང་པོར་བྱང་ཆུབ་ཏུ་སེམས་སྐྱེད་དུ་འཇུག་པར་མཛད་པ་དག་ཀྱང་མཐོང་ངོ་།

སངས་རྒྱས་བཅོམ་ལྡན་འདས་གྲངས་མེད་པ་གང་དག་སེམས་ཅན་རྣམས་ཡོངས་སུ་སྨིན་པར་མཛད་པ་དང་།

གང་དག་བྱང་ཆུབ་ཏུ་སེམས་སྐྱེད་དུ་འཇུག་པར་མཛད་པ་དག་ཀྱང་མཐོང་ངོ་།

སངས་རྒྱས་བཅོམ་ལྡན་འདས་གྲངས་མེད་པ་གང་དག་སེམས་ཅན་གང་གཱའི་ཀླུང་གི་བྱེ་མ་སྙེད་ཡོངས་སུ་སྨིན་པར་མཛད་པ་དག་ཀྱང་མཐོང་ངོ་།

སངས་རྒྱས་བཅོམ་ལྡན་འདས་གྲངས་མེད་པ་གང་དག་འཇིག་རྟེན་གྱི་ཁམས་གྲངས་མེད་པ་དག་ཏུ་གཤེགས་ནས།

སེམས་ཅན་རྣམས་ཀྱི་ཆེད་དུ་ཆོས་སྟོན་པ་དག་ཀྱང་མཐོང་ངོ་།

དེ་ལྟར་ན་སངས་རྒྱས་བཅོམ་ལྡན་འདས་རྣམས་ནི་དཀའ་བ་མཛད་པའོ།

དེ་ནས་སངས་རྒྱས་ཀྱི་མཐུས་ཚེ་དང་ལྡན་པ་ཤ་ར་དྭ་ཏིའི་བུ་དང་།

དགེ་སློང་གི་དགེ་འདུན་གྱིས་ཤར་ཕྱོགས་ཀྱི་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དེ་དག་ན།

བྱང་ཆུབ་སེམས་དཔའ་གང་དག་གནས་པ་དེ་དག་ཀྱང་མཐོང་།

ཤར་ཕྱོགས་ཀྱི་འཇིག་རྟེན་གྱི་ཁམས་དེ་དག་ཐམས་ཅད་ན།

སངས་རྒྱས་བཅོམ་ལྡན་འདས་གང་དག་བཞུགས་པ་དེ་དག་ཀྱང་མཐོང་།

ལྷོ་ཕྱོགས་དང་།

ནུབ་དང་།

བྱང་དང་།

ཕྱོགས་མཚམས་དང་།

འོག་དང་།

སྟེང་དུ་ཡང་དེ་བཞིན་དུ་སྦྱར་ཏེ།

དེ་ལྟར་ཁོ་ར་ཁོར་ཡུག་ཏུ་ཕྱོགས་བཅུའི་བར་དུ་བྱང་ཆུབ་སེམས་དཔའ་སེམས་དཔའ་ཆེན་པོ་དག་དང་།

སངས་རྒྱས་བཅོམ་ལྡན་འདས་གང་དག་བཞུགས་པ་དེ་དག་མཐོང་ངོ་།

དེ་ནས་ཚེ་དང་ལྡན་པ་ཤ་ར་དྭ་ཏིའི་བུས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་འདི་ལྟར་སངས་རྒྱས་བཅོམ་ལྡན་འདས་རྣམས་ཆོས་རྒྱ་ཆེན་པོ་དང་ལྡན་ཏེ།

ཇི་ལྟ་ཞེ་ན།

ཤར་ཕྱོགས་

ཀྱི་འཇིག་རྟེན་གྱི་ཁམས་དཔག་ཏུ་མ་མཆིས་པ་དག་ན།

བྱང་ཆུབ་སེམས་དཔའ་གྲངས་མ་མཆིས་པ་དག་དང་།

སངས་རྒྱས་བཅོམ་ལྡན་འདས་གྲངས་མ་མཆིས་པ་དག་མཐོང་བ་དང་།

དེ་བཞིན་དུ་ལྷོ་དང་།

ནུབ་དང་།

བྱང་དང་།

འོག་དང་།

སྟེང་དང་།

ཕྱོགས་མཚམས་ཀྱི་འཇིག་རྟེན་གྱི་ཁམས་གྲངས་མ་མཆིས་པ་དག་ཏུ་བྱང་ཆུབ་སེམས་དཔའ་དཔག་ཏུ་མ་མཆིས་པ་དང་།

སངས་རྒྱས་བཅོམ་ལྡན་འདས་དཔག་ཏུ་མ་མཆིས་པ་དག་མཐོང་བ་ནི་ངོ་མཚར་ལགས་སོ།

དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ།

བཅོམ་ལྡན་འདས་འདི་ལྟར་སངས་རྒྱས་བཅོམ་ལྡན་འདས་རྣམས་དང་།

བྱང་ཆུབ་སེམས་དཔའ་རྣམས་ཆོས་རྒྱ་ཆེན་པོ་དང་ལྡན་ཏེ།

གང་དག་གིས་རྒྱ་ཆེན་པོའི་གནས་བླ་ན་མེད་པའི་བྱང་ཆུབ་ཏུ་སེམས་བསྐྱེད་པ་ནི་ངོ་མཚར་ལགས་སོ།

བཅོམ་ལྡན་འདས་ཀྱིས་བཀའ་སྩལ་པ།

ཤ་ར་དྭ་ཏིའི་བུ་དེ་དེ་བཞིན་ཏེ།

བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་འདི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་རྒྱ་ཆེན་པོ་བསྐྱེད་པར་བྱའོ།

གསོལ་པ་བཅོམ་ལྡན་འདས་མི་འགྱུར་བར་འཚལ་བས་ནི།

དཔེར་ན་འཁོར་ལོས་སྒྱུར་བའི་རྒྱལ་པོ་ལྟར་བགྱིའོ།

ལྷར་འགྱུར་བར་འཚལ་བས་ནི།

དཔེར་ན་ལྷ་རྣམས་ཀྱི་དབང་པོ་བརྒྱ་བྱིན་ལྟར་བགྱིའོ།

ཚེ་རིང་བ་ཡོངས་སུ་འཛིན་པར་འཚལ་བས་ནི།

དཔེར་ན་འདུ་ཤེས་མེད་འདུ་ཤེས་མེད་མིན་སྐྱེ་མཆེད་དུ་ཉེ་བར་འགྲོ་བའི་ལྷ་རྣམས་ལྟར་བགྱིའོ།

བཅོམ་ལྡན་འདས་དེ་བཞིན་དུ་འཇིག་རྟེན་གྱི་སྦྱིན་གནས་སུ་འགྱུར་བར་འཚལ་བ་དང་།

སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་འབེལ་བའི་ཆོས་ཀྱི་གཏམ་བགྱི་བར་འཚལ་བ་དང་།

སངས་རྒྱས་འཚལ་བས་ནི་ཐམས་ཅད་མཁྱེན་པ་ཉིད་དུ་སེམས་བསྐྱེད་པར་བགྱིའོ།

དེ་སྐད་ཅེས་གསོལ་པ་དང་།

བཅོམ་ལྡན་འདས་ཀྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ།

ཤ་ར་དྭ་ཏིའི་བུ་དེ་དེ་བཞིན་ནོ།

དེ་དེ་བཞིན་ཏེ།

འཇིག་རྟེན་གྱི་སྦྱིན་གནས་ཀྱི་མཆོག་ཏུ་འགྱུར་བར་འདོད་པས།

ཐམས་ཅད་མཁྱེན་པ་ཉིད་དུ་སེམས་བསྐྱེད་པར་བྱའོ།

དེ་སྐད་ཅེས་བཀའ་སྩལ་པ་དང་།

ཚེ་དང་ལྡན་པ་ཤ་ར་དྭ་ཏིའི་བུས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་དང་པོ་སེམས་བསྐྱེད་པ་འདི་ལས་གུད་ན།

བྱང་ཆུབ་སེམས་དཔའ་སེམས་དཔའ་ཆེན་པོའི་སེམས་བསྐྱེད་པ་ཆེས་བཟང་བའམ།

ཆེས་རྒྱ་ཆེ་བ་འགའ་ལྟ་མཆིས་ལགས་སམ།

བཅོམ་ལྡན་འདས་ཀྱིས་བཀའ་སྩལ་པ།

ཤ་ར་དྭ་ཏིའི་བུ་ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཡོངས་སུ་འདྲི་བར་སེམས་པ་ལེགས་སོ་ལེགས་སོ།

ཤ་ར་དྭ་ཏིའི་བུ་དགྲ་བཅོམ་པའི་ཟག་པ་མེད་པའི་སེམས་གང་ཡིན་པ་དེ་ནི་སྤོང་བའི་སེམས་ཀྱིས་རང་གི་རྒྱུད་དང་ལྡན་པའི་ཉོན་མོངས་པ་རྣམས་སྤང་བར་ཟད་ཀྱི།

སེམས་དེ་སེམས་ཅན་དཔག་ཏུ་མེད་པ་རྣམས་ཀྱི་ཆེད་དུ་བསྐྱེད་པ་མ་ཡིན་ནོ།

ཤ་ར་དྭ་ཏིའི་བུ་བྱང་ཆུབ་ཀྱི་སེམས་ནི་སེམས་ཅན་དཔག་ཏུ་མེད་པའི་ཆེད་དུ་བསྐྱེད་པ་ཡིན་གྱི།

ཉི་ཚེའི་སེམས་ཅན་རྣམས་ཀྱི་ཕྱིར་ནི་མ་ཡིན་ནོ།

ཤ་ར་དྭ་ཏིའི་བུ་རང་སངས་རྒྱས་ཀྱི་སེམས་ཀྱང་རང་གི་རྒྱུད་དང་ལྡན་པའི་ཉོན་མོངས་པ་རྣམས་ཟློག་པར་ཟད་ཀྱི།

བྱང་ཆུབ་ཀྱི་སེམས་ནི་སེམས་ཅན་དཔག་ཏུ་མེད་པའི་ཉོན་མོངས་པ་རྣམས་ཟློག་པ་ཡིན་ནོ།

ཤ་ར་དྭ་ཏིའི་བུ་ཡང་བྱང་ཆུབ་ཀྱི་སེམས་ནི་བསྟེན་ཅིང་བསྙེན་ཏེ་བསྒོམས་ལ་མང་དུ་བྱས་ན།

ཕ་རོལ་ཏུ་ཕྱིན་པ་དྲུག་པོ་རྣམས་ཀྱིས་ཐམས་ཅད་མཁྱེན་པ་ཉིད་འཐོབ་བོ།

ཐམས་ཅད་མཁྱེན་པའི་ཡེ་ཤེས་ཐོབ་ན།

དེས་ཉན་ཐོས་རྣམས་དང་།

རང་སངས་རྒྱས་རྣམས་རབ་ཏུ་ཕྱེའོ།

གང་དག་འདི་ལ་དགེ་བའི་རྩ་བ་སྐྱེད་དེ།

འདི་ལྟ་སྟེ།

རང་བྱང་ཆུབ་ལ་སེམས་ཤིང་སྒོམ་ན།

དེ་དག་ལ་སངས་རྒྱས་བཅོམ་ལྡན་འདས་རྣམས་ཁྱེད་ནི་རང་སངས་རྒྱས་སུ་འགྱུར་ཏེ།

བསྐལ་པ་འདི་སྙེད་ཅིག་ན་ལྷ་རྣམས་དང་།

མི་རྣམས་ཀྱི་ནང་དུ་མཚམས་སྦྱར་ཏེ་འཁོད་ནས་རང་སངས་རྒྱས་ཐོབ་པར་འགྱུར་རོ་ཞེས་ལུང་སྟོན་གྱི།

ཤ་ར་དྭ་ཏིའི་བུ་རང་སངས་རྒྱས་རྣམས་ནི་བྱང་ཆུབ་སེམས་དཔའ་ལ་མ་འོངས་པའི་དུས་ན་ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་རོ།

ཞེས་ལུང་མི་སྟོན་

ཏོ།

ཉན་ཐོས་རྣམས་ཀྱང་བྱང་ཆུབ་སེམས་དཔའ་ལ་ལུང་མི་སྟོན་ཏོ།

གལ་ཏེ་ཉན་ཐོས་ལུང་སྟོན་ན་ཡང་།

དེ་བཞིན་གཤེགས་པ་ལས་ཐོས་ནས་ལུང་སྟོན་ཏོ།

ཤ་ར་དྭ་ཏིའི་བུ་གང་གིས་སེམས་ཅན་ཐམས་ཅད་དགྲ་བཅོམ་པ་ཉིད་ལ་བཀོད་ཀྱང་།

དེས་ནི་ཐམས་ཅད་མཁྱེན་པ་ཉིད་ཡོངས་སུ་བཟུང་བ་མ་ཡིན་གྱི།

ཤ་ར་དྭ་ཏིའི་བུ་གང་བྱང་ཆུབ་སེམས་དཔའ་ལ་ཕ་རོལ་ཏུ་ཕྱིན་པ་དྲུག་པོ་རྣམས་ཀྱི་འདོམས་ཤིང་རྗེས་སུ་སྟོན་ན།

འདི་ལྟར་དེས་ནི་ཐམས་ཅད་མཁྱེན་པ་ཉིད་ཡོངས་སུ་བཟུང་བ་ཡིན་ནོ།

དེ་ཅིའི་ཕྱིར་ཞེ་ན།

ཤ་ར་དྭ་ཏིའི་བུ་ཉན་ཐོས་ལས་ནི་སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་བྱུང་བ་མ་ཡིན་གྱི་བྱང་ཆུབ་སེམས་དཔའ་ལས་དེ་བཞིན་གཤེགས་པ་རྣམས་ཀྱི་བྱང་ཆུབ་བྱུང་བའི་ཕྱིར་རོ།

སྦྱིན་པའི་ཕ་རོལ་ཏུ་ཕྱིན་པ་ལས་འཇིག་རྟེན་གྱི་ཁམས་གྲངས་མེད་པར་བྱང་ཆུབ་སེམས་དཔའི་སྤྱོད་པ་དང་།

སངས་རྒྱས་བསྟན་པ་ཞེས་བྱ་བའི་ལེའུ་སྟེ་དྲུག་པའོ།།

དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ།

བཅོམ་ལྡན་འདས་ཇི་ལྟར་ན་བྱང་ཆུབ་སེམས་དཔར་རིག་པར་བགྱི།

བཅོམ་ལྡན་འདས་ཀྱིས་བཀའ་སྩལ་པ།

ཤ་ར་དྭ་ཏིའི་བུ་བྱང་ཆུབ་སེམས་དཔའ་གང་ཕ་རོལ་ཏུ་ཕྱིན་པ་དྲུག་པོ་དག་ལ་སྤྱོད་པའི་བྱང་ཆུབ་སེམས་དཔའ་འདི་ནི་བྱང་ཆུབ་སེམས་དཔའ་ཞེས་བྱ་བའི་མིང་འཐོབ་བོ།

གསོལ་པ་བཅོམ་ལྡན་འདས་ཟག་པ་མ་མཆིས་པའི་སེམས་ལས་བྱང་ཆུབ་ཀྱི་སེམས་ཁྱད་པར་དུ་འཕགས་པར་བཤད་པ་འདིའི་དོན་ཇི་ལྟར་འཚལ་བར་བགྱི།

བཅོམ་ལྡན་འདས་ཀྱིས་ཇི་ལྟར་ལུང་བསྟན་པ་བཞིན་དུ་ཡང་དག་པར་གཟུང་བར་འཚལ་ལོ།

བཅོམ་ལྡན་འདས་ཀྱིས་བཀའ་སྩལ་པ།

ཤ་ར་དྭ་ཏིའི་བུ་འདི་ཇི་སྙམ་དུ་སེམས།

བྱང་ཆུབ་སེམས་དཔའི་སེམས་འདོད་ཆགས་དང་བཅས་པ།

ཞེ་སྡང་དང་བཅས་པ།

གཏི་མུག་དང་བཅས་པ་ཡིན་ནམ།

གསོལ་པ་བཅོམ་ལྡན་འདས་འདོད་ཆགས་དང་བཅས་པ།

ཞེ་སྡང་དང་བཅས་པ།

གཏི་མུག་དང་བཅས་པ་ལགས་སོ།

བཅོམ་ལྡན་འདས་ཀྱིས་བཀའ་སྩལ་པ།

ཤ་ར་དྭ་ཏིའི་བུ་འདི་ཇི་སྙམ་དུ་སེམས།

དགྲ་བཅོམ་པའི་

སེམས་འདོད་ཆགས་དང་བྲལ་བ།

ཞེ་སྡང་དང་བྲལ་བ།

གཏི་མུག་དང་བྲལ་བ་ཡིན་ནམ།

གསོལ་པ།

བཅོམ་ལྡན་འདས་དེ་དེ་ལྟ་ལགས་ཏེ།

དགྲ་བཅོམ་པའི་སེམས་འདོད་ཆགས་དང་བྲལ་བ།

ཞེ་སྡང་དང་བྲལ་བ།

གཏི་མུག་དང་བྲལ་བ་ལགས་སོ།

བཅོམ་ལྡན་འདས་ཀྱིས་བཀའ་སྩལ་པ།

ཤ་ར་དྭ་ཏིའི་བུ་འདི་ཇི་སྙམ་དུ་སེམས།

གལ་ཏེ་དགྲ་བཅོམ་པ་ཟག་པ་ཟད་པས་སེམས་ཅན་དཔག་ཏུ་མེད་པ་རྣམས་ལ་བྱམས་པ་དང་།

སྙིང་རྗེས་ཁྱབ་པར་བྱས་ཀྱང་།

དེའི་ཚེ་སེམས་ཅན་དེ་དག་བདེ་བས་ཚིམ་པར་འགྱུར་རམ།

གསོལ་པ།

བཅོམ་ལྡན་འདས་དེ་ལྟར་དགྲ་བཅོམ་པ་ནི་ཐབས་ལ་མཁས་པ་མ་མཆིས་ན།

སེམས་ཅན་དཔག་ཏུ་མ་མཆིས་པ་རྣམས་ལ་བྱམས་པས་ཇི་ལྟར་ཁྱབ་པར་བགྱི།

བཅོམ་ལྡན་འདས་འདི་ལྟར་ཇི་སྲིད་དུ་མཉམ་པར་གཞག་པ་དེ་སྲིད་ཀྱི་བར་དེར་བྱམས་པ་དེས་ཁ་ཅིག་ནི་བདེ་བར་འགྱུར།

ཁ་ཅིག་ནི་སྡུག་བསྔལ་བར་འགྱུར་ལགས་སོ།

བཅོམ་ལྡན་འདས་གང་གི་ཚེ་བྱང་ཆུབ་སེམས་དཔའ་ཐམས་ཅད་མཁྱེན་པ་ཉིད་འཐོབ་པ་དེའི་ཚེ་སེམས་ཀྱི་སྐད་ཅིག་ལ།

བྱམས་པ་ལ་གནས་ཤིང་བྱམས་པ་མངོན་པར་སྒྲུབ་པ་མ་ལགས་མོད་ཀྱི།

བཅོམ་ལྡན་འདས་གནས་མ་མཆིས་པ་ནན་གྱིས་དཔེར་བགྱིས་ཏེ་བཤད་པར་བགྱི་ན།

བཅོམ་ལྡན་འདས་གལ་ཏེ་འཛམ་བུའི་གླིང་འདིར་བདག་དང་འདྲ་བ།

རྣམ་པར་ཐར་པ་བརྒྱད་ལ་བསམ་གཏན་པ་ཤ་སྟག་གིས་གང་བར་གྱུར་ལ།

དེ་དག་ཀྱང་བྱམས་པ་ལ་སྙོམས་པར་ཞུགས་སམ།

གལ་ཏེ་སྙོམས་པར་འཇུག་པར་འཚལ་ན་ཡང་སྙོམས་པར་འཇུག་པའི་འོས་མ་ལགས་སོ།

བཅོམ་ལྡན་འདས་ཀྱིས་བཀའ་སྩལ་པ།

ཤ་ར་དྭ་ཏིའི་བུ་རྣམ་གྲངས་འདིས་ཀྱང་ཟག་པ་མེད་པའི་སེམས་ལས་བྱང་ཆུབ་སེམས་དཔའི་སེམས་མཆོག་ཅེས་བྱ་བ་ནས།

གོང་ན་མེད་པ་ཞེས་བྱ་བའི་བར་དུའོ།

ཤ་ར་དྭ་ཏིའི་བུ་གཞན་ཡང་གལ་ཏེ་སེམས་ཅན་ཐམས་ཅད་དགྲ་བཅོམ་པ་མངོན་པར་ཤེས་པ་དྲུག་དང་ལྡན་པ་ཤ་སྟག་ཏུ་གྱུར་ལ།

དགྲ་བཅོམ་པ་རེ་རེས་ཀྱང་བདུད་ཀྱི་སྡེ་འཁྲུགས་མེད་འཁྲུགས་མེད་སྙེད་མངོན་པར་སྤྲུལ་ན།

ཤ་ར་དྭ་ཏིའི་བུ་འདི་ཇི་སྙམ་དུ་སེམས།

འཁྲུགས་མེད་དེ་དག་མང་བ་ཡིན་ནམ།

གསོལ་པ།

བཅོམ་ལྡན་འདས་མང་ལགས་སོ།

བདེ་བར་གཤེགས་པ་མང་ལགས་སོ།

བཅོམ་ལྡན་འདས་ཀྱིས་བཀའ་སྩལ་པ།

ཤ་ར་དྭ་ཏིའི་བུ་འདི་ཇི་སྙམ་དུ་སེམས།

དགྲ་བཅོམ་པ་དེ་དག་དང་།

དཔུང་དེ་དག་གིས་ཕྱིར་མི་ལྡོག་པའི་བྱང་ཆུབ་སེམས་དཔའི་བྱང་ཆུབ་ཀྱི་སེམས་དེ་བཟློག་པར་ནུས་སམ།

གསོལ་པ།

བཅོམ་ལྡན་འདས་དེ་ནི་མ་ལགས་སོ།

བཅོམ་ལྡན་འདས་ཀྱིས་བཀའ་སྩལ་པ།

ཤ་ར་དྭ་ཏིའི་བུ་འདི་ཇི་སྙམ་དུ་སེམས།

སེམས་དེ་གཉིས་ཀྱི་ནང་ན་གང་མཐུ་ཆེ།

སེམས་ཅན་ཐམས་ཅད་ཟག་པ་ཟད་པར་གྱུར་པ་རྣམས་ཀྱི་ཟག་པ་མེད་པའི་སེམས་གང་ཡིན་པ་མཐུ་ཆེའམ།

ཕྱིར་མི་ལྡོག་པའི་བྱང་ཆུབ་སེམས་དཔའི་སེམས་མཐུ་ཆེ།

གསོལ་པ།

བཅོམ་ལྡན་འདས་བྱང་ཆུབ་སེམས་དཔའི་སེམས་ཆེས་མཐུ་ཆེ་ལགས་སོ།

བཅོམ་ལྡན་འདས་ཀྱིས་བཀའ་སྩལ་པ།

ཕྱིར་མི་ལྡོག་པའི་བྱང་ཆུབ་སེམས་དཔའི་བྱང་ཆུབ་ཀྱི་སེམས་ཆེས་མཐུ་ཆེ་བ་ཡིན་ཏེ།

ཤ་ར་དྭ་ཏིའི་བུ་ཟག་པ་མེད་པའི་སེམས་ཀྱིས་བདུད་ཀྱི་སྡེ་འཁྲུགས་མེད་དཔག་ཏུ་མེད་པ་རྫུ་འཕྲུལ་གྱིས་མངོན་པར་སྤྲུལ་ན་ཡང་འདོད་ཆགས་དང་བྲལ་བའི་སེམས་ཀྱིས།

འདོད་ཆགས་དང་བཅས་པ།

ཞེ་སྡང་དང་བཅས་པ།

གཏི་མུག་དང་བཅས་པའི་སེམས་ཡོངས་སུ་གཏུགས་པར་མི་ནུས་སོ།

ཤ་ར་དྭ་ཏིའི་བུ་འདི་ཇི་སྙམ་དུ་སེམས།

སེམས་འདི་དག་གི་ནང་ན་སེམས་གང་མཆོག་ཅེས་བྱ་བ་ནས།

གོང་ན་མེད་པ་ཞེས་བྱ་བའི་བར་དུ་གང་ཡིན།

གསོལ་པ།

བཅོམ་ལྡན་འདས་ཕྱིར་མི་ལྡོག་པའི་བྱང་ཆུབ་སེམས་དཔའི་སེམས་མཆོག་ཅེས་བགྱི་བ་ནས།

གོང་ན་མ་མཆིས་པ་ཞེས་བགྱི་བའི་བར་དུ་ལགས་སོ།

དེ་ཅིའི་སླད་དུ་ཞེ་ན།

འདི་ལྟར་ཟག་པ་མ་མཆིས་པའི་སེམས་ཀྱིས་གཏུགས་པར་བགྱིར་རྔོ་མི་ཐོགས་པའི་སླད་དུའོ།

ཤ་ར་དྭ་ཏིའི་བུ་གཞན་ཡང་ཁྱོད་ཉིད་ལ་ཡོངས་སུ་དྲི་བར་བྱས།

ཁྱོད་ཀྱིས་ཇི་ལྟར་བཟོད་པ་དེ་བཞིན་དུ་ལན་ཐོབ་ཤིག །

ཤ་ར་དྭ་ཏིའི་བུ་འདི་ཇི་སྙམ་དུ་སེམས།

གལ་ཏེ་མཆིང་བུའི་ནོར་བུ་དག་གི་ནང་དུ།

ནོར་བུ་རིན་པོ་ཆེ་བཻ་དཱུརྱ་བཞག་ན།

ཅི་མཆིང་བུའི་ནོར་བུ་དེ་དག་གིས་ནོར་བུ་རིན་པོ་ཆེ་བཻ་དཱུརྱ་ལ་གསལ་བ་དང་།

རིན་ཐང་གིས་ཐུབ་བམ།

གསོལ་པ།

བཅོམ་ལྡན་འདས་དེ་ནི་མ་ལགས་སོ།

མཆིང་བུའི་ནོར་བུ་དག་གི་ཕུང་པོ་ཆེན་པོས་ནོར་བུ་རིན་པོ་ཆེ་བཻ་དཱུརྱ་གཅིག་ཀྱང་ཟིལ་གྱིས་གནོན་པར་རྔོ་མི་ཐོགས་ལགས་སོ།

བཅོམ་ལྡན་འདས་ཀྱིས་བཀའ་སྩལ་པ།

དེ་ཅིའི་ཕྱིར།

གསོལ་པ།

བཅོམ་ལྡན་འདས་མཆིང་བུའི་ནོར་བུ་དེ་དག་ནི་ཡོངས་སུ་དག་པ་ཡང་མ་ལགས།

ཁ་དོག་བཟང་བ་ཡང་མ་ལགས།

རིན་ཐང་ཡང་ཆུང་ལ།

བརྗོད་པར་ཡང་ནུས་པ་ལགས་ཏེ།

བཅོམ་ལྡན་འདས་མཆིང་བུའི་ནོར་བུ་ནི་གནས་རྒྱ་ཆེན་པོ་ནས་བྱུང་བ་ཡང་མ་ལགས་སོ།

བཅོམ་ལྡན་འདས་ནོར་བུ་རིན་པོ་ཆེ་བཻ་དཱུརྱ་ནི་རིགས་ཀྱིས་འཕགས་པ་ལགས་ཏེ།

སེམས་ཅན་རྣམས་ཀྱི་ལས་ཀྱི་རྣམ་པར་སྨིན་པས་རྒྱ་མཚོ་ཆེན་པོའི་ནང་ནས་བྱུང་བ་ལགས་ཏེ།

དེ་ནི་མཆིང་བུའི་ནོར་བུ་མང་པོས་ཟིལ་གྱིས་གནོན་པར་རྔོ་མི་ཐོགས་སོ།

བཅོམ་ལྡན་འདས་ཀྱིས་བཀའ་སྩལ་པ།

ཤ་ར་དྭ་ཏིའི་བུ་དེ་དེ་བཞིན་ཏེ།

ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་སེམས་ནི་ཉན་ཐོས་ཐམས་ཅད་ཀྱི་སེམས་ཟིལ་གྱིས་གནོན་པར་འདུག་སྟེ།

དེ་བཞིན་གཤེགས་པས་དོན་གྱི་དབང་འདི་ཡང་དག་པར་གཟིགས་ནས།

ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་སེམས་མཆོག་ཉིད་དུ་བཞག་པ་ནས།

གོང་ན་མེད་པ་ཉིད་ཀྱི་བར་དུ་བཞག་པ་ཡིན་ནོ།

ཉན་ཐོས་དགྲ་བཅོམ་པ་ཐམས་ཅད་ཀྱིས་ནི་བྱང་ཆུབ་སེམས་དཔའི་སེམས་གང་བྱམས་པ་དང་ལྡན་པ་དང་།

སྙིང་རྗེ་དང་ལྡན་པ་ཡང་ཟད་པར་བྱེད་མི་ནུས་སོ།

ཤ་ར་དྭ་ཏིའི་བུ་དགྲ་བཅོམ་པ་ཟག་པ་ཟད་པ་མངོན་པར་ཤེས་པ་དྲུག་དང་ལྡན་པ་དེ་དག་གིས་ཀྱང་།

འཇིག་རྟེན་གྱི་ཁམས་འདི་འཇིག་རྟེན་གྱི་ཁམས་གཞན་དུ་རྫུ་འཕྲུལ་གྱིས་འཕང་བར་ནུས་མོད་ཀྱི།

ཕྱིར་མི་ལྡོག་པའི་བྱང་ཆུབ་སེམས་དཔའི་སེམས་ནི་ཟད་པར་བྱེད་མི་ནུས་སོ།

ཤ་ར་དྭ་ཏིའི་བུ་དགྲ་བཅོམ་པ་ཟག་པ་ཟད་པ།

མངོན་པར་ཤེས་པ་དྲུག་དང་ལྡན་པ་དེ་དག་གིས་ཀྱང་།

རྒྱ་མཚོ་ཆེན་པོ་ཁའི་དབུགས་ཀྱིས་སྐམ་པར་ནུས་མོད་ཀྱི།

ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་སེམས་ནི་ཟིལ་གྱིས་མནན་པའམ།

ཟད་པར་བྱེད་མི་ནུས་སོ།

ཤ་ར་དྭ་ཏིའི་བུ་དགྲ་བཅོམ་པ་ཟག་པ་ཟད་པ།

མངོན་པར་ཤེས་པ་

དྲུག་དང་ལྡན་པ་དེ་དག་གིས་ཀྱང་།

འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་སྲེག་པའི་མེའི་ཕུང་པོ་ཆེན་པོ་དེ་ཡང་ཁའི་དབུགས་ཀྱིས་གསད་པར་ནུས་མོད་ཀྱི།

ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་སེམས་ནི་ཟིལ་གྱིས་མནན་པའམ།

ཟད་པར་བྱེད་མི་ནུས་སོ།

ཤ་ར་དྭ་ཏིའི་བུ་རྣམ་གྲངས་འདིས་ན།

ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་སེམས་མཆོག་ཅེས་བྱ།

གཙོ་བོ་དང་།

ཕུལ་དང་།

ར་བ་དང་།

རབ་མཆོག་དང་།

བླ་ན་མེད་པ་ནས་གོང་ན་མེད་པ་ཞེས་བྱ་བའི་བར་དུ་བརྗོད་དོ།

དེ་སྐད་ཅེས་བཀའ་སྩལ་པ་དང་།

ཚེ་དང་ལྡན་པ་ཤ་ར་དྭ་ཏིའི་བུས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་ཇི་ཙམ་དུ་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་སེམས་རྒྱ་ཆེ་ཞིང་ཟད་པར་བགྱི་བའམ།

བཟློག་པར་མི་ནུས་པ་ངོ་མཚར་ལགས་སོ།

བཅོམ་ལྡན་འདས་ཀྱིས་བཀའ་སྩལ་པ།

ཤ་ར་དྭ་ཏིའི་བུ་དེ་དེ་བཞིན་ནོ།

དེ་ཅིའི་ཕྱིར་ཞེ་ན།

ཤ་ར་དྭ་ཏིའི་བུ་སངས་རྒྱས་བཅོམ་ལྡན་འདས་རྣམས་ནི་གཉིས་སུ་མི་གསུང་སྟེ།

དེ་བཞིན་གཤེགས་པ་རྣམས་ནི་གཉིས་སུ་མེད་པར་གསུང་ཞིང་།

དེ་བཞིན་ཁོ་ན་སྟེ་གཞན་དུ་མ་ཡིན་ནོ།

ཤ་ར་དྭ་ཏིའི་བུ་གལ་ཏེ་འཇིག་རྟེན་གྱི་ཁམས་མཐའ་ཡས་མུ་མེད་པའི་གང་གཱའི་ཀླུང་གི་བྱེ་མ་ཇི་སྙེད་པ་དེ་སྙེད་ཀྱི་སེམས་ཅན་གཞན་དག་བྱུང་བར་གྱུར་ལ།

སའི་ཁམས་ཇི་སྙེད་པ་དང་།

ཆུའི་ཁམས་ཇི་སྙེད་པ་དང་།

མེའི་ཁམས་ཇི་སྙེད་པ་དང་།

རླུང་གི་ཁམས་ཇི་སྙེད་པ་དེ་སྙེད་ཀྱི་སེམས་ཅན་གཞན་དག་བྱུང་བར་གྱུར་ན།

ཤ་ར་དྭ་ཏིའི་བུ་འདི་ཇི་སྙམ་དུ་སེམས།

སེམས་ཅན་དེ་དག་མང་བ་ཡིན་ནམ།

གསོལ་པ།

བཅོམ་ལྡན་འདས་མང་ལགས་སོ།

བདེ་བར་གཤེགས་པ་མང་ལགས་སོ།

བཅོམ་ལྡན་འདས་ཀྱིས་བཀའ་སྩལ་པ།