經部第68卷（མདོ་སྡེ་ཡ་བཞུགས་སོ། །）

དཔང་སྐོང་ཕྱག་བརྒྱ་པ་ཞེས་བྱ་བ།

ཕྱོགས་བཅུའི་འཇིག་རྟེན་གྱི་ཁམས་མཐའ་ཡས་མུ་མེད་པ་དག་ན་དུས་གསུམ་དུ་གཤེགས་ཤིང་བཞུགས་པའི་སངས་རྒྱས་དང་བྱང་ཆུབ་སེམས་དཔའ་འཁོར་དང་བཅས་པ་རབ་འབྱམ་མ་ལུས་པའི་དཀོན་མཆོག་ཐམས་ཅད་ལ་གུས་པས་ཕྱག་འཚལ་ལོ།

ཕྱོགས་བཅུའི་སངས་རྒྱས་ཐམས་ཅད་ལ་ཕྱག་འཚལ་ལོ།

ཤར་ཕྱོགས་ཀྱི་སངས་རྒྱས་རིན་ཆེན་འབྱུང་གནས་དེ་བཞིན་གཤེགས་པ་ལ་ཕྱག་འཚལ་ལོ།

ལྷོ་ཕྱོགས་ཀྱི་སངས་རྒྱས་མྱ་ངན་མེད་པའི་དཔལ་དེ་བཞིན་གཤེགས་པ་ལ་ཕྱག་འཚལ་ལོ།

ནུབ་ཕྱོགས་ཀྱི་སངས་རྒྱས་རིན་ཆེན་འོད་འཕྲོ་དེ་བཞིན་གཤེགས་པ་ལ་ཕྱག་འཚལ་ལོ།

བྱང་ཕྱོགས་ཀྱི་སངས་རྒྱས་རྒྱལ་བའི་དབང་པོ་དེ་བཞིན་གཤེགས་པ་ལ་ཕྱག་འཚལ་ལོ།

བྱང་ཤར་མཚམས་ཀྱི་སངས་རྒྱས་ཏིང་ངེ་འཛིན་གྱི་གླང་པོ་དམ་པའི་དཔལ་དེ་བཞིན་གཤེགས་པ་ལ་ཕྱག་འཚལ་ལོ།

ཤར་ལྷོ་མཚམས་ཀྱི་སངས་རྒྱས་པད་མོ་དམ་པའི་དཔལ་དེ་བཞིན་གཤེགས་པ་ལ་ཕྱག་འཚལ་ལོ།

ལྷོ་ནུབ་མཚམས་ཀྱི་སངས་རྒྱས་ཉི་མའི་དཀྱིལ་འཁོར་སྣང་བ་དམ་པའི་དཔལ་དེ་བཞིན་གཤེགས་པ་ལ་ཕྱག་འཚལ་ལོ།

ནུབ་བྱང་མཚམས་ཀྱི་སངས་རྒྱས་གདུགས་དམ་པའི་དཔལ་དེ་བཞིན་གཤེགས་པ་ལ་ཕྱག་འཚལ་ལོ།

འོག་གི་ཕྱོགས་ཀྱི་སངས་རྒྱས་པད་མོའི་དཔལ་དེ་བཞིན་གཤེགས་པ་ལ་ཕྱག་འཚལ་ལོ།

བླ་མ་ཕྱོགས་ཀྱི་སངས་རྒྱས་དགའ་བའི་དཔལ་དེ་བཞིན་གཤེགས་པ་ལ་ཕྱག་འཚལ་ལོ།

ཡང་ཤར་ཕྱོགས་ཀྱི་སངས་རྒྱས་མི་འཁྲུགས་པ་དེ་བཞིན་གཤེགས་པ་ལ་ཕྱག་འཚལ་ལོ།

ལྷོ་ཕྱོགས་ཀྱི་སངས་རྒྱས་རིན་ཆེན་འབྱུང་ལྡན་དེ་བཞིན་གཤེགས་པ་ལ་ཕྱག་འཚལ་ལོ།

ནུབ་ཕྱོགས་ཀྱི་སངས་རྒྱས་སྣང་བ་མཐའ་ཡས་དེ་བཞིན་གཤེགས་པ་ལ་ཕྱག་འཚལ་ལོ།

བྱང་ཕྱོགས་ཀྱི་སངས་རྒྱས་དོན་ཡོད་གྲུབ་པ་དེ་བཞིན་གཤེགས་པ་ལ་ཕྱག་འཚལ་ལོ།

སངས་རྒྱས་དཔའ་བརྟན་པའི་སྡེ་དགའ་བའི་རྒྱལ་པོ་དེ་བཞིན་གཤེགས་པ་ལ་ཕྱག་འཚལ་ལོ།

སངས་རྒྱས་ཚེ་མཐའ་ཡས་དེ་བཞིན་གཤེགས་པ་ལ་ཕྱག་འཚལ་ལོ།

སངས་རྒྱས་མི་འཁྲུགས་པ་དེ་བཞིན་གཤེགས་པ་ལ་ཕྱག་འཚལ་ལོ།

སངས་རྒྱས་སྨན་གྱི་བླ་བཻ་དཱུརྱའི་འོད་ཀྱི་རྒྱལ་པོ་དེ་བཞིན་གཤེགས་པ་ལ་ཕྱག་འཚལ་ལོ།

སངས་རྒྱས་སཱ་ལའི་མེ་ཏོག་ཀུན་ཏུ་རྒྱས་པའི་དབང་པོའི་རྒྱལ་པོ་དེ་བཞིན་གཤེགས་པ་ལ་ཕྱག་འཚལ་ལོ།

སངས་རྒྱས་ཤཱཀྱ་ཐུབ་པ་དེ་བཞིན་གཤེགས་པ་ལ་ཕྱག་འཚལ་ལོ།

སངས་རྒྱས་རིན་པོ་ཆེའི་དཔལ་གྱི་རྒྱལ་པོ་

དེ་བཞིན་གཤེགས་པ་ལ་ཕྱག་འཚལ་ལོ།

སངས་རྒྱས་ཀུན་ཏུ་བཟང་པོ་དེ་བཞིན་གཤེགས་པ་ལ་ཕྱག་འཚལ་ལོ།

སངས་རྒྱས་རྣམ་པར་སྣང་མཛད་དེ་བཞིན་གཤེགས་པ་ལ་ཕྱག་འཚལ་ལོ།

སངས་རྒྱས་ཨུད་པ་ལ་རྒྱས་པ་བསུང་གི་རྒྱལ་པོ་དེ་བཞིན་གཤེགས་པ་ལ་ཕྱག་འཚལ་ལོ།

ངུར་སྨྲིག་གི་རྒྱལ་མཚན་གྱི་འཇིག་རྟེན་ན།

སངས་རྒྱས་རྡོ་རྗེ་སྙིང་པོས་རབ་ཏུ་འདུལ་བ་དེ་བཞིན་གཤེགས་པ་ལ་ཕྱག་འཚལ་ལོ།

ཕྱིར་མི་ལྡོག་པའི་འཁོར་ལོ་བསྒྲགས་པའི་འཇིག་རྟེན་ན།

སངས་རྒྱས་རབ་ཏུ་གདོན་མི་ཟ་བ་པད་མོ་རྒྱས་པའི་སྐུ་དེ་བཞིན་གཤེགས་པ་ལ་ཕྱག་འཚལ་ལོ།

རྡུལ་མེད་པའི་འཇིག་རྟེན་ན།

སངས་རྒྱས་སེང་གེ་དེ་བཞིན་གཤེགས་པ་ལ་ཕྱག་འཚལ་ལོ།

རབ་ཏུ་སྣང་བའི་འཇིག་རྟེན་ན་སངས་རྒྱས་རིན་པོ་ཆེའི་གཙུག་ཕུད་དེ་བཞིན་གཤེགས་པ་ལ་ཕྱག་འཚལ་ལོ།

འོད་བཟང་པོའི་འཇིག་རྟེན་ན།

སངས་རྒྱས་རྣམ་པར་སྣང་མཛད་དེ་བཞིན་གཤེགས་པ་ལ་ཕྱག་འཚལ་ལོ།

འདའ་བར་དཀའ་བའི་འཇིག་རྟེན་ན།

སངས་རྒྱས་ཆོས་ཀྱི་འོད་ཟེར་རབ་ཏུ་རྒྱས་པའི་སྐུ་དེ་བཞིན་གཤེགས་པ་ལ་ཕྱག་འཚལ་ལོ།

རབ་ཏུ་བཟང་པོའི་འཇིག་རྟེན་ན།

སངས་རྒྱས་ཐམས་ཅད་མཁྱེན་པའི་བློ་གྲོས་འོད་ཟེར་གྱི་རྒྱལ་པོ་དེ་བཞིན་གཤེགས་པ་ལ་ཕྱག་འཚལ་ལོ།

མེ་ལོང་གི་དཀྱིལ་འཁོར་བསྒྲགས་པའི་འཇིག་རྟེན་ན།

སངས་རྒྱས་ཟླ་བའི་ཐུགས་དེ་བཞིན་གཤེགས་པ་ལ་ཕྱག་འཚལ་ལོ།

པད་མོ་དཔལ་གྱི་འཇིག་རྟེན་ན།

སངས་རྒྱས་དཔལ་བཟང་པོ་དེ་བཞིན་གཤེགས་པའི་བར་ཐམས་ཅད་ལ་ཕྱག་འཚལ་ལོ།

སངས་རྒྱས་ཟླ་འོད་དེ་བཞིན་གཤེགས་པ་ལ་ཕྱག་འཚལ་ལོ།

སངས་རྒྱས་མཛེས་ཆེན་དེ་བཞིན་གཤེགས་པ་ལ་ཕྱག་འཚལ་ལོ།

སངས་རྒྱས་འཇིག་རྟེན་གྱི་དཀྱིལ་འཁོར་དབང་པོའི་རྒྱལ་པོ་དེ་བཞིན་གཤེགས་པ་ལ་ཕྱག་འཚལ་ལོ།

སངས་རྒྱས་དགའ་བའི་སྤྱན་དེ་བཞིན་གཤེགས་པ་ལ་ཕྱག་འཚལ་ལོ།

སངས་རྒྱས་རྒྱ་མཚོའི་དཔལ་དེ་བཞིན་

གཤེགས་པ་ལ་ཕྱག་འཚལ་ལོ།

སངས་རྒྱས་གསེར་གྱི་གཟུ་བ་དེ་བཞིན་གཤེགས་པ་ལ་ཕྱག་འཚལ་ལོ།

སངས་རྒྱས་མཐའ་ཡས་པའི་ཡོན་ཏན་གྱི་འོད་ཟེར་དེ་བཞིན་གཤེགས་པ་ལ་ཕྱག་འཚལ་ལོ།

སངས་རྒྱས་སྨོན་ལམ་ཐམས་ཅད་ལས་འབྱུང་བའི་རིན་པོ་ཆེའི་གཟི་བརྗིད་ཤིན་ཏུ་འཕགས་པའི་རྒྱལ་པོ་དེ་བཞིན་གཤེགས་པ་ལ་ཕྱག་འཚལ་ལོ།

སངས་རྒྱས་གྲགས་པའི་སྒྲ་དབྱངས་ཀྱི་རྒྱལ་པོ་དེ་བཞིན་གཤེགས་པ་ལ་ཕྱག་འཚལ་ལོ།

སངས་རྒྱས་ཡེ་ཤེས་རྡོ་རྗེའི་རྒྱ་མཚོའི་དབང་པོ་དེ་བཞིན་གཤེགས་པ་ལ་ཕྱག་འཚལ་ལོ།

སངས་རྒྱས་རྣམ་པར་གཟིགས་དེ་བཞིན་གཤེགས་པ་ལ་ཕྱག་འཚལ་ལོ།

སངས་རྒྱས་གཙུག་ཏོར་ཅན་དེ་བཞིན་གཤེགས་པ་ལ་ཕྱག་འཚལ་ལོ།

སངས་རྒྱས་མ་ལུས་པའི་དབང་པོ་དེ་བཞིན་གཤེགས་པ་ལ་ཕྱག་འཚལ་ལོ།

སངས་རྒྱས་ལོག་པར་དད་སེལ་དེ་བཞིན་གཤེགས་པ་ལ་ཕྱག་འཚལ་ལོ།

སངས་རྒྱས་གསེར་ཐུབ་དེ་བཞིན་གཤེགས་པ་ལ་ཕྱག་འཚལ་ལོ།

སངས་རྒྱས་འོད་སྲུང་དེ་བཞིན་གཤེགས་པ་ལ་ཕྱག་འཚལ་ལོ།

འདས་པའི་སངས་རྒྱས་ཐམས་ཅད་ལ་ཕྱག་འཚལ་ལོ།

ད་ལྟར་བཞུགས་པའི་སངས་རྒྱས་ཐམས་ཅད་ལ་ཕྱག་འཚལ་ལོ།

མ་བྱོན་པའི་སངས་རྒྱས་ཐམས་ཅད་ལ་ཕྱག་འཚལ་ལོ།

བྱང་ཆུབ་སེམས་དཔའི་དཔལ་རྣམ་པར་སྣང་མཛད་ཆེན་པོ་ཐམས་ཅད་ལ་ཕྱག་འཚལ་ལོ།

སངས་རྒྱས་ཆོས་ཀྱི་སྐུ་མུ་མེད་པ་ལ་ཕྱག་འཚལ་ལོ།

འཇིག་རྟེན་གྱི་ཁམས་མཐའ་ཡས་པའི་སྐུ་གཟུགས་ཐམས་ཅད་ལ་ཕྱག་འཚལ་ལོ།

རིང་བསྲེལ་ཐམས་ཅད་ལ་ཕྱག་འཚལ་ལོ།

མཆོད་རྟེན་ཐམས་ཅད་ལ་ཕྱག་འཚལ་ལོ།

དམ་པའི་ཆོས་མདོའི་སྡེ་ལ་ཕྱག་འཚལ་ལོ།

དབྱངས་ཀྱིས་བསྙད་པའི་སྡེ་ལ་ཕྱག་འཚལ་ལོ།

ལུང་དུ་བསྟན་པའི་སྡེ་ལ་ཕྱག་འཚལ་ལོ།

ཚིགས་སུ་བཅད་པའི་སྡེ་ལ་ཕྱག་འཚལ་ལོ།

ཆེད་དུ་བརྗོད་པའི་སྡེ་ལ་ཕྱག་འཚལ་ལོ།

གླེང་གཞིའི་སྡེ་ལ་ཕྱག་འཚལ་ལོ།

རྟོགས་

པ་བརྗོད་པའི་སྡེ་ལ་ཕྱག་འཚལ་ལོ།

འདས་པ་བརྗོད་པའི་སྡེ་ལ་ཕྱག་འཚལ་ལོ།

སྐྱེས་པ་རབས་ཀྱི་སྡེ་ལ་ཕྱག་འཚལ་ལོ།

ཤིན་ཏུ་རྒྱས་པའི་སྡེ་ལ་ཕྱག་འཚལ་ལོ།

རྨད་དུ་བྱུང་བའི་སྡེ་ལ་ཕྱག་འཚལ་ལོ།

ཆོས་རྟོགས་པ་བསྟན་པའི་སྡེ་ལ་ཕྱག་འཚལ་ལོ།

བྱང་ཆུབ་སེམས་དཔའི་སྡེ་སྣོད་ཐེག་པ་ཆེན་པོའི་མཛོད་ཐམས་ཅད་ལ་ཕྱག་འཚལ་ལོ།

ཕྱོགས་བཅུ་དུས་གསུམ་གྱི་གསུང་རབ་ཐམས་ཅད་དང་།

འདུལ་བ་ཐབས་ཀྱི་སྒོ་མོ་མ་ལུས་པ་ཐམས་ཅད་ལ་ཕྱག་འཚལ་ལོ།

ཆོས་ཀྱི་དབྱིངས་ཡང་དག་པའི་མཐའ་བརྗོད་དུ་མེད་པ་ལ་ཕྱག་འཚལ་ལོ།

དེ་བཞིན་གཤེགས་པ་ཐམས་ཅད་ཀྱི་ཡུམ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་ཏེ།

དམ་པའི་ཆོས་ཀྱི་ཡི་གེ་ཐམས་ཅད་ལ་ཕྱག་འཚལ་ལོ།

བྱང་ཆུབ་སེམས་དཔའ་སེམས་དཔའ་ཆེན་པོ་སྣང་མཛད་ལ་ཕྱག་འཚལ་ལོ།

ཤར་ཕྱོགས་ཀྱི་བྱང་ཆུབ་སེམས་དཔའ་འོད་ཟེར་ཀུན་ནས་འབྱུང་བ་ལ་ཕྱག་འཚལ་ལོ།

ལྷོ་ཕྱོགས་ཀྱི་བྱང་ཆུབ་སེམས་དཔའ་མྱ་ངན་མེད་པས་བྱིན་ལ་ཕྱག་འཚལ་ལོ།

ནུབ་ཕྱོགས་ཀྱི་བྱང་ཆུབ་སེམས་དཔའ་སྤྱོད་པའི་བློ་གྲོས་ལ་ཕྱག་འཚལ་ལོ།

བྱང་ཕྱོགས་ཀྱི་བྱང་ཆུབ་སེམས་དཔའ་རྒྱལ་བས་བྱིན་ལ་ཕྱག་འཚལ་ལོ།

བྱང་ཤར་མཚམས་ཀྱི་བྱང་ཆུབ་སེམས་དཔའ་རྣམ་པར་རྒྱལ་བས་རྣམ་པར་གནོན་པ་ལ་ཕྱག་འཚལ་ལོ།

ཤར་ལྷོ་མཚམས་ཀྱི་བྱང་ཆུབ་སེམས་དཔའ་ལག་ན་པད་མོ་ལ་ཕྱག་འཚལ་ལོ།

ལྷོ་ནུབ་མཚམས་ཀྱི་བྱང་ཆུབ་སེམས་དཔའ་ཉི་མ་རབ་ཏུ་སྣང་བ་ལ་ཕྱག་འཚལ་ལོ།

ནུབ་བྱང་མཚམས་ཀྱི་བྱང་ཆུབ་སེམས་དཔའ་རིན་ཆེན་མཆོག་ལ་ཕྱག་འཚལ་ལོ།

འོག་གི་ཕྱོགས་ཀྱི་བྱང་ཆུབ་སེམས་དཔའ་པད་མོ་དམ་པ་ལ་ཕྱག་འཚལ་ལོ།

བླ་མ་ཕྱོགས་ཀྱི་བྱང་ཆུབ་སེམས་དཔའ་དགའ་བས་བྱིན་ལ་ཕྱག་འཚལ་ལོ།

བྱང་ཆུབ་སེམས་དཔའ་ཀུན་ཏུ་སྤྱན་རས་གཟིགས་ཀྱི་དབང་ཕྱུག་ལ་ཕྱག་འཚལ་ལོ།

བྱང་ཆུབ་སེམས་དཔའ་བྱམས་པ་ལ་ཕྱག་འཚལ་ལོ།

བྱང་ཆུབ་སེམས་དཔའ་ནམ་མཁའི་སྙིང་པོ་ལ་ཕྱག་འཚལ་

ལོ།

བྱང་ཆུབ་སེམས་དཔའ་ཀུན་ཏུ་བཟང་པོ་ལ་ཕྱག་འཚལ་ལོ།

བྱང་ཆུབ་སེམས་དཔའ་ཕྱག་ན་རྡོ་རྗེ་ལ་ཕྱག་འཚལ་ལོ།

བྱང་ཆུབ་སེམས་དཔའ་འཇམ་དཔལ་ལ་ཕྱག་འཚལ་ལོ།

བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་ལ་ཕྱག་འཚལ་ལོ།

བྱང་ཆུབ་སེམས་དཔའ་སའི་སྙིང་པོ་ལ་ཕྱག་འཚལ་ལོ།

བྱང་ཆུབ་སེམས་དཔའ་དྲི་མ་མེད་པར་གྲགས་པ་ལ་ཕྱག་འཚལ་ལོ།

བྱང་ཆུབ་སེམས་དཔའ་མཐུ་ཆེན་ཐོབ་པ་ལ་ཕྱག་འཚལ་ལོ།

ཕྱོགས་བཅུ་དུས་གསུམ་གྱི་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ལ་ཕྱག་འཚལ་ལོ།

ཤེས་རབ་ཆེན་པོའི་མཆོག་འཕགས་པ་ཤཱ་རིའི་བུ་ལ་ཕྱག་འཚལ་ལོ།

རྫུ་འཕྲུལ་ཆེན་པོའི་མཆོག་འཕགས་པ་མཽད་གལ་གྱི་བུ་ལ་ཕྱག་འཚལ་ལོ།

མང་དུ་ཐོས་པའི་མཆོག་འཕགས་པ་ཀུན་དགའ་བོ་ལ་ཕྱག་འཚལ་ལོ།

སྦྱངས་པའི་ཡོན་ཏན་གྱི་མཆོག་འཕགས་པ་འོད་སྲུང་ལ་ཕྱག་འཚལ་ལོ།

བསླབ་པ་ལ་གུས་པའི་མཆོག་འཕགས་པ་ནོར་སྦྱིན་འཛིན་ལ་ཕྱག་འཚལ་ལོ།

འདུལ་བ་འཛིན་པའི་མཆོག་འཕགས་པ་ཉེ་བར་འཁོར་ལ་ཕྱག་འཚལ་ལོ།

རྫུ་འཕྲུལ་གྱི་སྤྱན་མངའ་བའི་མཆོག་འཕགས་པ་མ་འགགས་པ་ལ་ཕྱག་འཚལ་ལོ།

འདྲི་ཞིང་ལན་ལྡོན་པའི་མཆོག་འཕགས་པ་རབ་འབྱོར་ལ་ཕྱག་འཚལ་ལོ།

འཕགས་པ་དགྲ་བཅོམ་པའི་དགེ་འདུན་ཐམས་ཅད་ལ་ཕྱག་འཚལ་ལོ།

འཕགས་པ་རང་སངས་རྒྱས་ཐམས་ཅད་ལ་ཕྱག་འཚལ་ལོ།

ཕྱོགས་བཅུའི་དགེ་འདུན་བཞུགས་སོ་འཚལ་ཐམས་ཅད་ལ་ཕྱག་འཚལ་ལོ།

དཀོན་མཆོག་གསུམ་ལ་དད་པས་ཕྱག་འཚལ་ནས།

སྡིག་པ་ཀུན་བྱང་དགེ་ཚོགས་རྣམ་པར་འཕེལ།

བཅོམ་ལྡན་སོ་སོའི་བཀའ་ལས་ཅི་འབྱུང་བ།

ཡོན་ཏན་ཁྱད་པར་ཅན་དེ་གྲུབ་པར་ཤོག །

ཕྱོགས་བཅུའི་དཀོན་མཆོག་གསུམ་ལ་ཕྱག་འཚལ་ལོ།

བསྟོད་ཅིང་བསྔགས་སོ།

བལྟ་ཞིང་བརྟག་གོ།

བྱང་ཆུབ་སེམས་དཔའི་བསོད་ནམས་རབ་འབྱམ་ལས་བྱུང་བ་མི་

མཉམ་པ་དང་མཉམ་པའི་མཆོད་པ་སྣ་ཚོགས་མཆོག །

གཙོ་བོ།

དམ་པ།

ཁྱད་པར་ཅན།

བཟང་པོ།

གྱ་ནོམ་པ།

བླ་ན་མེད་པ།

མི་མཉམ་པ་དང་མཉམ་པས་ཕྱོགས་བཅུའི་སྣོད་ཀྱི་འཇིག་རྟེན་ཐམས་ཅད་བྱུར་བུར་བཀང་སྟེ།

ཆོས་ཀྱི་མཆོད་པ་དང་བཅས་པས་མ་ལུས་མི་ལུས་ལུས་པ་མེད་པའི་དཀོན་མཆོག་གསུམ་ལ་ཕྱི་མའི་མུའི་མཐར་རྟག་ཏུ་རྒྱུན་མི་འཆད་པར་མཆོད་ཅིང་འདོན་ཏོ།

དབུལ་ཞིང་གསོལ་ལོ།

བཀུར་སྟིར་བགྱིའོ།

བླ་མར་བགྱིའོ།

རི་མོར་བགྱིའོ།

མཉེས་པར་བགྱིའོ།

བདག་ཅག་གི་སྐྱེ་བ་འདི་དང་སྐྱེ་བ་ཐོག་མ་དང་ཐ་མ་མ་མཆིས་པ་ནས་སྲིད་པ་གསུམ་གྱི་འཁོར་བ་ན་འཁོར་ཞིང་འདོད་ཆགས་དང་།

ཞེ་སྡང་དང་།

གཏི་མུག་གསུམ་གྱི་དབང་གིས་ལུས་དང་།

ངག་དང་།

ཡིད་ཀྱི་སྒོ་ནས་མི་དགེ་བ་བཅུ་དང་།

མཚམས་མེད་པ་ལྔ་ལ་སོགས་ཏེ།

གསུང་རབ་ཀུན་ལས་འགལ་བའི་སྡིག་པ་མི་དགེ་བའི་ལས་བདག་གིས་ཅི་བགྱིས་པ་དང་།

གཞན་ལ་བཅོལ་བ་དང་།

གཞན་བགྱིད་པ་ལ་རྗེས་སུ་ཡི་རང་བ་དེ་དག་རྡུལ་ཙམ་བག་ཙམ་ཡང་མ་ལུས་པར་མཐོལ་ཞིང་བཤགས་སོ།

སྦྱངས་ཤིང་བསལ་ཏོ།

གཞིག་ཅིང་གདོན་ཏོ།

མི་འཆབ་བོ།

མི་སྦེད་དོ།

མི་བསྙེན་མི་བགྱིད་དོ།

དེ་ནས་དེའི་ཚེ་སྡིག་པ་ཐམས་ཅད་ནི་བྱང་།

བསོད་ནམས་ཐམས་ཅད་ནི་རྫོགས་ཏེ།

དུས་འདི་ནས་ནམ་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ།

དགོངས་པའི་དབང་གིས་ཆེད་དུ་སྤྲུལ་པ་མ་གཏོགས་པར་ནམ་ནམ་ཞར་ཞར་ཚེ་ཚེ་རབས་རབས་སུ་ངན་སོང་གསུམ་ལ་སོགས་ཏེ།

བགེགས་རིགས་ཐམས་ཅད་དུ་མི་སྐྱེ་ཞིང་མི་ལྟུང་བར་ཤོག་ཤིག །

ལོག་པ་མི་དགེ་བའི་ལས་ལ་མི་ཕྱོགས་མི་བགྱིད་པར་ཤོག་ཤིག །

ལས་དང་ཉོན་མོངས་པའི་རྒྱུ་ལ་མི་ཕྱོགས་མི་བསོགས་པར་ཤོག་ཤིག །

སྨད་པའི་ལུས་དང་སྡུག་བསྔལ་གྱི་འབྲས་བུ་ཀུན་ལས་ཐར་ནས་ཕྱིན་ཅད་མི་མྱོང་བར་ཤོག་ཤིག །

དུས་འདི་ནས་ནམ་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ་སྒོ་གསུམ་ནས་དགེ་བ་ཆུ་བོའི་རྒྱུན་བཞིན་དུ་རྒྱུན་མི་འཆད་པར་ཤོག་ཤིག །

ཚེ་

རབས་གར་སྐྱེས་ཀྱང་བདེ་སྐྱིད་ཕུན་སུམ་ཚོགས་པ་དང་ལྡན་ཏེ།

སེམས་ཅན་ཐམས་ཅད་ཀྱི་དོན་བྱ་བ་ལ་མཐུ་དང་དབང་ཡོད་པར་ཤོག་ཤིག །

གང་དེ་བཞིན་གཤེགས་པ་འབའ་ཞིག་གི་ཐུགས་སུ་ཆུད་པའི་ཆོས་བླ་ན་མེད་པའི་བྱང་ཆུབ་ཏུ་གདོན་མི་ཟ་བར་འཚང་རྒྱ་བའི་དོན་དེ་ཁོ་ན་ཉིད་གང་ཡིན་པ་དེ་བདག་གིས་ཀྱང་མ་ནོར་བར་ཁོང་དུ་ཆུད་ཅིང་བསྒོམས་ལ།

གཞན་དག་ལ་ཡང་མ་ནོར་བར་སྟོན་ཅིང་འདྲེན་པར་ཤོག་ཤིག །

དུས་འདི་ནས་ནམ་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ་དཀོན་མཆོག་གསུམ་ལ་སྐྱབས་སུ་མཆི་སྟེ།

བདག་ཉིད་ལུས་དབུལ་གྱིས་ཐུགས་རྗེ་ཆེན་པོ་དང་ལྡན་པ་རྣམས་ཀྱིས་སོ་སོ་ནས་རྟག་ཏུ་བཞེས་ཤིག །

ཇི་ལྟར་ན་དུས་གསུམ་གྱི་སངས་རྒྱས་དང་།

བྱང་ཆུབ་སེམས་དཔའ་དངོས་པོ་ཐམས་ཅད་དང་བྲལ་བ།

ཕུང་པོ་དང་།

ཁམས་དང་།

སྐྱེ་མཆེད་ཀྱིས་མ་ཟིན་པའི་ཆོས་བདག་མེད་པ་དང་མཉམ་པ།

ཐོག་མ་ནས་མ་སྐྱེས་པ།

སྟོང་པ་ཉིད་ཀྱི་རང་བཞིན་གྱིས་བྱང་ཆུབ་ཀྱི་སེམས་བསྐྱེད་པ་ལྟར་བདག་མིང་འདི་ཞེས་བགྱི་བས་ཀྱང་།

དུས་འདི་ནས་ནམ་བྱང་ཆུབ་ཀྱི་སྙིང་པོ་ལ་མཆིས་ཀྱི་བར་དུ་བྱང་ཆུབ་ཏུ་སེམས་བསྐྱེད་པར་བགྱིའོ།

བྱང་ཆུབ་ཀྱི་སེམས་ནི་ནམ་གཞར་ཡང་མི་སྟོར་ཞིང་དགེ་བའི་བཤེས་གཉེན་དམ་པ་དེ་དང་ནམ་ཡང་མི་འབྲལ་བར་ཤོག་ཤིག །

ཇི་ལྟར་དུས་གསུམ་གྱི་སངས་རྒྱས་དེ་དག་བླ་ན་མེད་པའི་བསོད་ནམས་ཀྱི་རྗེས་སུ་ཡི་རང་བ་ལྟར།

བདག་མིང་འདི་ཞེས་བགྱི་བས་ཀྱང་འཇིག་རྟེན་དང་འཇིག་རྟེན་ལས་འདས་པའི་བསོད་ནམས་ཐམས་ཅད་ལ་རྗེས་སུ་ཡི་རང་ངོ་།

ནམ་འཆི་བར་ངེས་པའི་དུས་དེ་ན་སངས་རྒྱས་དང་།

བྱང་ཆུབ་སེམས་དཔའ་དེ་དག་ཐམས་ཅད་ཀྱི་ཞལ་མངོན་སུམ་དུ་མཐོང་ནས།

ཕྱག་གཡས་པ་གསེར་གྱི་ཁ་དོག་ཅན་བརྐྱང་སྟེ།

བདག་གི་སྤྱི་བོར་བཞག་ནས་ལུང་ནོད་པར་གྱུར་ཅིག །

བདག་གིས་ཀྱང་ཉོན་མོངས་པས་སེམས་མི་འཁྲུལ་པར་ཆོས་བདག་མེད་པ་དང་འཐུན་པའི་འདུན་པ་ཅན་དང་།

བྱང་ཆུབ་ཀྱི་སེམས་ཚད་མེད་པ་དང་ལྡན་བཞིན་དུ་འཆི་བའི་དུས་བྱེད་པར་ཤོག་ཤིག །

མདོར་ན་

བག་ཆགས་མ་ལུས་ཀུན་བྱང་ནས།

བསོད་ནམས་ཡེ་ཤེས་ཚོགས་གཉིས་ཡོངས་རྫོགས་ཏེ།

འགྲོ་བ་མ་ལུས་བྱིན་གྱིས་བསྒྲལ་བའི་ཕྱིར།

བདག་ཉིད་མྱུར་དུ་མངོན་པར་སངས་རྒྱས་ཤོག །

དཔང་སྐོང་ཕྱག་བརྒྱ་པ་རྫོགས་སོ།།

བོད་དུ་དམ་པའི་ཆོས་འབྱུང་བའི་སྔ་ལྟས་སུ་ལྷ་ཐོ་ཐོ་རི་སྙན་ཤལ་གྱི་སྐུ་རིང་ལ་ཕོ་བྲང་ཡུམ་བུ་བླ་མཁར་དུ་ནམ་མཁའ་ལས་བབས་མི་རབས་ལྔ་ན་འདིའི་དོན་ཤེས་པ་འོང་ཞེས་རྨི་ལམ་དུ་ལུང་བསྟན་ཏེ་ཆོས་ཀྱི་དབུ་བརྙེས་སོ།།

རྒྱ་གར་སྐད་དུ།

ཨཱརྱ་ཨ་ཙིན་ཏྱ་རཱ་ཛ་སཱུ་ཏྲ་ནཱ་མ་མ་ཧཱ་ཡཱ་ན་སཱུ་ཏྲ།

བོད་སྐད་དུ།

འཕགས་པ་བསམ་གྱིས་མི་ཁྱབ་པའི་རྒྱལ་པོའི་མདོ་ཞེས་བྱ་བ་ཐེག་པ་ཆེན་པོའི་མདོ།

སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ།

འདི་སྐད་བདག་གིས་ཐོས་པ་དུས་གཅིག་ན།

བཅོམ་ལྡན་འདས་ཡུལ་མ་ག་དྷཱ་ན་ཆོས་ཀྱི་དབྱེ་དགོན་པ་ན།

བྱང་ཆུབ་ཀྱི་སྙིང་པོ་ན་སེང་གེའི་ཁྲི་རྡོ་རྗེ་དང་ནོར་བུ་རིན་པོ་ཆེས་སྤྲས་པའི་པད་མའི་སྙིང་པོའི་གདན་ལ་བཞུགས་ཏེ།

བྱང་ཆུབ་སེམས་དཔའ་ཆེན་པོའི་དགེ་འདུན་ཕྱོགས་བཅུའི་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པ་བྱེ་བ་ཁྲག་ཁྲིག་ཕྲག་འབུམ་གྱི་རྡུལ་ཕྲ་རབ་སྙེད་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་ཐབས་ཅིག་ཏུ་བཞུགས་སོ།

དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བསམ་གྱིས་མི་ཁྱབ་པའི་རྒྱལ་པོ་ཞེས་བྱ་བས།

བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ལ་སྨྲས་པ།

ཀྱེ་རྒྱལ་བའི་སྲས་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་སངས་རྒྱས་ཀྱི་ཞིང་མི་མཇེད་ཀྱི་འཇིག་རྟེན་གྱི་ཁམས་འདིའི་བསྐལ་པ་གཅིག་གང་ཡིན་པ་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་ཀྱི་སངས་རྒྱས་ཀྱི་ཞིང་བདེ་བ་ཅན་གྱི་འཇིག་རྟེན་གྱི་ཁམས་ཀྱི་ཉིན་ཞག་གཅིག་གོ།

ཀྱེ་རྒྱལ་བའི་སྲས་དག་དེ་བཞིན་གཤེགས་པ་དགྲ་

བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་ཀྱི་སངས་རྒྱས་ཀྱི་ཞིང་བདེ་བ་ཅན་གྱི་འཇིག་རྟེན་གྱི་ཁམས་ཀྱི་བསྐལ་པ་གཅིག་གང་ཡིན་པ་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེ་རབ་ཏུ་འཇོམས་པའི་སངས་རྒྱས་ཀྱི་ཞིང་གི་ཉིན་ཞག་གཅིག་གོ།

ཀྱེ་རྒྱལ་བའི་སྲས་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེ་རབ་ཏུ་འཇོམས་པའི་སངས་རྒྱས་ཀྱི་ཞིང་གི་བསྐལ་པ་གཅིག་གང་ཡིན་པ་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་ཤིན་ཏུ་སྟུག་པོ་པད་མ་རབ་ཏུ་རྒྱས་པའི་སྐུའི་སངས་རྒྱས་ཀྱི་ཞིང་གི་ཉིན་ཞག་གཅིག་གོ།

ཀྱེ་རྒྱལ་བའི་སྲས་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་ཤིན་ཏུ་སྟུག་པོ་པད་མ་རབ་ཏུ་རྒྱས་པའི་སྐུའི་སངས་རྒྱས་ཀྱི་ཞིང་གི་བསྐལ་པ་གཅིག་གང་ཡིན་པ་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་རྒྱལ་མཚན་གྱི་སངས་རྒྱས་ཀྱི་ཞིང་གི་ཉིན་ཞག་གཅིག་གོ།

ཀྱེ་རྒྱལ་བའི་སྲས་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་རྒྱལ་མཚན་གྱི་སངས་རྒྱས་ཀྱི་ཞིང་གི་བསྐལ་པ་གཅིག་གང་ཡིན་པ་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེང་གེའི་སངས་རྒྱས་ཀྱི་ཞིང་གི་ཉིན་ཞག་གཅིག་གོ།

ཀྱེ་རྒྱལ་བའི་སྲས་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེང་གེའི་སངས་རྒྱས་ཀྱི་ཞིང་གི་བསྐལ་པ་གཅིག་གང་ཡིན་པ་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་སྣང་མཛད་ཀྱི་སངས་རྒྱས་ཀྱི་ཞིང་གི་ཉིན་ཞག་གཅིག་གོ།

ཀྱེ་རྒྱལ་བའི་སྲས་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་སྣང་མཛད་ཀྱི་སངས་རྒྱས་ཀྱི་ཞིང་གི་བསྐལ་པ་གཅིག་གང་ཡིན་པ་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་

སངས་རྒྱས་ཆོས་ཀྱི་འོད་ཟེར་མེ་ཏོག་རབ་ཏུ་རྒྱས་པའི་སྐུའི་སངས་རྒྱས་ཀྱི་ཞིང་གི་ཉིན་ཞག་གཅིག་གོ།

ཀྱེ་རྒྱལ་བའི་སྲས་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་འོད་ཟེར་མེ་ཏོག་རབ་ཏུ་རྒྱས་པའི་སྐུའི་སངས་རྒྱས་ཀྱི་ཞིང་གི་བསྐལ་པ་གཅིག་གང་ཡིན་པ་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་འོད་ཟེར་རྒྱལ་པོའི་སངས་རྒྱས་ཀྱི་ཞིང་གི་ཉིན་ཞག་གཅིག་གོ།

ཀྱེ་རྒྱལ་བའི་སྲས་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡེ་ཤེས་འོད་ཟེར་རྒྱལ་པོའི་སངས་རྒྱས་ཀྱི་ཞིང་གི་བསྐལ་པ་གཅིག་གང་ཡིན་པ་དེ་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བའི་བློ་གྲོས་ཀྱི་སངས་རྒྱས་ཀྱི་ཞིང་གི་ཉིན་ཞག་གཅིག་གོ།

ཀྱེ་རྒྱལ་བའི་སྲས་དག་འདི་ལྟར་བསྐལ་པ་བགྲང་བའི་ཐབས་འདི་ལྟ་བུའི་ཚུལ་གྱིས་རྩིས་པའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་བཅུའི་རྒྱ་མཚོའི་རྡུལ་ཕྲ་རབ་སྙེད་ཀྱི་སངས་རྒྱས་ཀྱི་ཞིང་འདས་པའི་ཐ་མ་འཇིག་རྟེན་གྱི་ཁམས་པད་མའི་དཔལ་ཞེས་བྱ་བ་ན།

བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྒྱལ་བ་བཟང་པོའི་དཔལ་བཞུགས་པའི་སངས་རྒྱས་ཀྱི་ཞིང་གི་ཉིན་ཞག་གཅིག་གོ།

ཀྱེ་རྒྱལ་བའི་སྲས་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་མཚན་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོའི་སྤྱོད་པ་ཅན།

དགེ་བའི་བཤེས་གཉེན་གྱིས་ཡོངས་སུ་ཟིན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ཐོས་པར་འགྱུར་གྱི།

གཞན་དག་གིས་ནི་ཐོས་པར་མི་འགྱུར་རོ།

བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས།

བྱང་ཆུབ་སེམས་དཔའ་སེམས་དཔའ་ཆེན་པོ་བསམ་གྱིས་མི་ཁྱབ་པའི་རྒྱལ་པོ་དང་།

ཐམས་ཅད་དང་ལྡན་པའི་འཁོར་དེ་དག་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་།

ལྷ་དང་།

མི་དང་།

ལྷ་མ་ཡིན་དང་།

དྲི་ཟར་བཅས་པའི་འཇིག་རྟེན་ཡི་

རངས་ཏེ།

བཅོམ་ལྡན་འདས་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་བསམ་གྱིས་མི་ཁྱབ་པའི་རྒྱལ་པོས་གསུངས་པ་ལ་མངོན་པར་བསྟོད་དོ།

འཕགས་པ་བསམ་གྱིས་མི་ཁྱབ་པའི་རྒྱལ་པོའི་མདོ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།།

རྒྱ་གར་སྐད་དུ།

ཨཱརྱ་ད་ཤ་དི་ཀ་ཨན་དྷ་ཀཱ་ར་བི་དྷྭན་ས་ན་ནཱ་མ་མ་ཧཱ་ཡཱ་ན་སཱུ་ཏྲ།

བོད་སྐད་དུ།

འཕགས་པ་ཕྱོགས་བཅུའི་མུན་པ་རྣམ་པར་སེལ་བ་ཞེས་བྱ་བ་ཐེག་པ་ཆེན་པོའི་མདོ།

སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ།

འདི་སྐད་བདག་གིས་ཐོས་པ་དུས་གཅིག་ན།

བཅོམ་ལྡན་འདས་ཤཱཀྱ་རྣམས་ཀྱི་ནང་ན།

སེར་སྐྱའི་གནས་ཤིང་ནྱ་གྲོ་དྷའི་ཀུན་དགའ་ར་བ་ན་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་།

བྱམས་པ་དང་།

འཇམ་དཔལ་ལ་སོགས་པ་བྱང་ཆུབ་སེམས་དཔའི་འཁོར་ཆེན་པོ་དང་ཐབས་ཅིག་ཏུ་བཞུགས་སོ།

དེ་ནས་བཅོམ་ལྡན་འདས་སྔ་དྲོའི་དུས་ཀྱི་ཚེ།

ཤམ་ཐབས་གསོལ་ནས།

ལྷུང་བཟེད་དང་།

ཆོས་གོས་བསྣམས་ཏེ།

དགེ་སློང་གི་དགེ་འདུན་གྱིས་ཡོངས་སུ་བསྐོར་ཅིང་།

དགེ་སློང་གི་དགེ་འདུན་གྱིས་མདུན་དུ་བདར་ནས་སེར་སྐྱའི་གནས་ཀྱི་གྲོང་ཁྱེར་ཆེན་པོར་བསོད་སྙོམས་ལ་གཤེགས་སོ།

དེའི་ཚེ་ན་ཤཱཀྱ་གཞོན་ནུ་བཞིན་རབ་གསལ་ཞེས་བྱ་བ་ཞིག་བྱ་བ་འགའ་ཞིག་གི་ཕྱིར་ཤིང་རྟ་ལ་ཞོན་ནས་སེར་སྐྱའི་གནས་གྲོང་ཁྱེར་ཆེན་པོ་ནས་ཕྱིར་བྱུང་བ་དང་།

ཤཱཀྱ་གཞོན་ནུ་བཞིན་རབ་གསལ་གྱིས།

བཅོམ་ལྡན་འདས་ཐག་རིང་པོ་ཁོ་ན་ནས་གཤེགས་པ་མཐོང་ངོ་།

མཐོང་ནས་ཀྱང་ཤིང་རྟ་དེ་ལས་བབས་ནས།

བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས།

བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ།

བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས།

བཅོམ་ལྡན་འདས་ལ་ལན་གསུམ་བསྐོར་བ་བྱས་

ཏེ།

ཐལ་མོ་སྦྱར་ནས་བཅོམ་ལྡན་འདས་ཀྱི་སྤྱན་སྔར་འདུག་གོ།

དེ་ནས་བཅོམ་ལྡན་འདས་ལ་ཤཱཀྱ་གཞོན་ནུ་བཞིན་རབ་གསལ་གྱིས་འདི་སྐད་ཅེས་གསོལ་ཏོ།

བཅོམ་ལྡན་འདས་འདི་ན་བདག་གི་ཕ་མ་གཉིས་གཉིད་ལོག་པ་དང་མ་ལོག་པ་དག་ལ་མི་མ་ལགས་པ་རྣམས་རྣམ་པར་འཚེ་བར་བགྱིད་ལ།

བཅོམ་ལྡན་འདས་བདག་ཀྱང་གང་གི་ཚེ་ལྗོངས་ཀྱི་ཕྱོགས་གཞན་དུ་མཆི་བའི་ཚེ།

བདག་ལ་ཡང་ཆོམ་རྐུན་པ་དག་རྣམ་པར་འཚེ་བར་བགྱིད་ཅིང་།

གཅན་གཟན་དག་ཀྱང་རྣམ་པར་འཚེ་བར་བགྱིད་ན།

དེའི་སླད་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བདག་ལ་ཐུགས་བརྩེ་བའི་སླད་དུ་ཅི་ནས་ཀྱང་བདག་ལ་མིའམ།

མི་མ་ལགས་པ་དང་།

དུད་འགྲོའི་སྐྱེ་གནས་སུ་གཏོགས་པ་འགའ་ཡང་རྣམ་པར་འཚེ་བར་མི་བགྱིད་པ་དེ་ལྟར་བདག་ལ་ལེགས་པར་བསྲུང་བ་མཛད་དུ་གསོལ།

བསྲུང་བའི་ཆོ་ག་ཡང་བཤད་དུ་གསོལ།

དེ་སྐད་ཅེས་གསོལ་པ་དང་།

བཅོམ་ལྡན་འདས་ཀྱིས་ཤཱཀྱ་གཞོན་ནུ་བཞིན་རབ་གསལ་ལ་འདི་སྐད་ཅེས་བཀའ་སྩལ་ཏོ།

གཞོན་ནུ་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ།

བཅོམ་ལྡན་འདས་དེ་ལྟར་འཚལ་ལོ་ཞེས་གསོལ་ནས།

ཤཱཀྱ་གཞོན་ནུ་བཞིན་རབ་གསལ་བཅོམ་ལྡན་འདས་ལ་ཉན་པ་དང་།

བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ།

གཞོན་ནུ་ཤར་ཕྱོགས་ལོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་བརྒྱད་ཁྲི་འདས་པ་ན་འཇིག་རྟེན་གྱི་ཁམས་ཉོན་མོངས་པ་ཐམས་ཅད་བསྐྱོད་པ་ཞེས་བྱ་བ་ཞིག་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྗེས་སྤྱོད་ཅེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་སོ།

གཞོན་ནུ་ཁྱོད་གང་གི་ཚེ་བྱ་བ་འགའ་ཞིག་གི་ཕྱིར་ཤར་ཕྱོགས་སུ་འགྲོ་ན།

དེའི་ཚེ་ཁྱོད་ཀྱིས་དེ་བཞིན་གཤེགས་པ་དེ་ལ་ཕྱག་འཚལ་ཏེ་དྲན་པར་བྱས་ཤིང་མདུན་དུ་བྱས་ཏེ།

སེམས་ཀྱི་རྒྱུན་གྱིས་དེ་མངོན་དུ་བྱེད་ཅིང་སོང་ན་ཁྱོད་ལ་འཇིགས་པ་འབྱུང་བར་

མི་འགྱུར་རོ།

དེའི་ཚེ་མ་གཡེངས་པར་དེ་ཡིད་ལ་བྱས་ན་ཁྱོད་བྱ་བ་གང་གི་ཕྱིར་འགྲོ་བའི་བྱ་བ་དེ་འགྲུབ་པར་འགྱུར་རོ།

དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་བཀའ་སྩལ་ཏོ།

རྫོགས་པའི་སངས་རྒྱས་ཐུབ་པ་ཆེ།

རྗེ་ལ་རབ་ཏུ་ཕྱག་འཚལ་ཏེ།

རྟག་ཏུ་དེ་ནི་མངོན་བྱེད་ཅིང་།

འགྲོ་ན་ཁྱོད་ལ་འཇིགས་མི་འབྱུང་།

གཞོན་ནུ་ལྷོ་ཕྱོགས་ལོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་དགུ་ཁྲི་འདས་པ་ན།

འཇིག་རྟེན་གྱི་ཁམས་མུན་པ་དང་མུན་ནག་གི་ཚོགས་བཅོམ་ཞེས་བྱ་བ་ཞིག་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེམས་དང་པོ་བསྐྱེད་པ་ཡིད་ལ་མཛད་པ་རྣམ་གྲངས་བསྙེངས་པ་དང་བག་ཚ་བ་དང་བྲལ་བས་མངོན་པར་འཕགས་པའི་རྒྱལ་པོ་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་སོ།

གཞོན་ནུ་ཁྱོད་གང་གི་ཚེ་བྱ་བ་འགའ་ཞིག་གི་ཕྱིར་ལྷོ་ཕྱོགས་སུ་འགྲོ་ན།

དེའི་ཚེ་ཁྱོད་ཀྱིས་དེ་བཞིན་གཤེགས་པ་དེ་ལ་ཕྱག་འཚལ་ཏེ་དྲན་པར་བྱས་ཤིང་མདུན་དུ་བྱས་ཏེ།

སེམས་ཀྱི་རྒྱུན་གྱིས་དེ་མངོན་དུ་བྱེད་ཅིང་།

ཁྱིམ་ལ་སོགས་པའི་ཡིད་ལ་བྱེད་པ་དང་བྲལ་བ་རྣམ་པར་མ་གཡེངས་པ་ཡིད་ལ་བྱེད་པས་སོང་ན།

ཁྱོད་བྱ་བ་གང་གི་ཕྱིར་འགྲོ་བའི་བྱ་བ་དེ་འགྲུབ་པར་འགྱུར་ཞིང་།

ཁྱོད་ལ་འཇིགས་པ་གང་ནས་ཀྱང་འབྱུང་བར་མི་འགྱུར་རོ།

དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་བཀའ་སྩལ་ཏོ།

ཁྱིམ་གྱི་བསམ་པ་རྣམས་དང་ནི།

ཀུན་ནས་ལྡང་བ་ཀུན་བྲལ་ཞིང་།

ལྷོ་ཕྱོགས་སུ་ནི་འགྲོ་བ་ན།

ཁྱོད་ལ་འཇིགས་པ་འབྱུང་མི་འགྱུར།

གཞོན་ནུ་ནུབ་ཕྱོགས་ལོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་འདས་པ་ན་འཇིག་རྟེན་གྱི་ཁམས་ཡུལ་ཕེབས་པ་ཞེས་བྱ་བ་ཞིག་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཁོན་དང་རྒྱགས་པ་རྣམ་པར་གནོན་པ་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་སོ།

གཞོན་ནུ་ཁྱོད་གང་གི་ཚེ་བྱ་བ་འགའ་ཞིག་གི་ཕྱིར་ནུབ་

ཕྱོགས་སུ་འགྲོ་ན་དེའི་ཚེ་ཁྱོད་ཀྱིས་དེ་བཞིན་གཤེགས་པ་དེ་ལ་ཕྱག་འཚལ་ཏེ།

དྲན་པར་བྱས་ཤིང་མདུན་དུ་བྱས་ནས་སེམས་ཀྱི་རྒྱུན་གྱིས་དེ་མངོན་དུ་བྱེད་ཅིང་ཟག་པ་མེད་པ་དང་།

རྣམ་པར་མ་གཡེངས་པ་དང་དྲན་པས་སོང་ན་ཁྱོད་ལ་འཇིགས་པ་གང་ནས་ཀྱང་འབྱུང་བར་མི་འགྱུར་རོ།

དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་བཀའ་སྩལ་ཏོ།

ཆོས་འགའ་སྐྱེས་པ་ཡོད་མིན་ཞིང་།

འགའ་ཡང་འགག་པར་མི་འགྱུར་ཏེ།

གང་གིས་ཆོས་རྣམས་དེ་ལྟར་ཤེས།

དེ་ལ་འཇིགས་པ་ཅི་ཡང་མེད།

གཞོན་ནུ་བྱང་ཕྱོགས་ལོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་བྱེ་བ་ཕྲག་སྟོང་འདས་པ་ན་འཇིག་རྟེན་གྱི་ཁམས་སངས་རྒྱས་ཀྱི་སྤོབས་པ་ཅན་ཞེས་བྱ་བ་ཞིག་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་གཟུགས་བཀོད་འོད་གནོན་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་སོ།

གཞོན་ནུ་ཁྱོད་གང་གི་ཚེ་བྱ་བ་འགའ་ཞིག་གི་ཕྱིར་བྱང་ཕྱོགས་སུ་འགྲོ་ན།

དེའི་ཚེ་ཁྱོད་ཀྱིས་དེ་བཞིན་གཤེགས་པ་དེ་ལ་ཕྱག་འཚལ་ཏེ་དྲན་པར་བྱས་ཤིང་མདུན་དུ་བྱས་ཏེ།

སེམས་ཀྱི་རྒྱུན་གྱིས་དེ་མངོན་དུ་བྱེད་ཅིང་རྣམ་པར་མ་གཡེངས་པར་ཡིད་ལ་བྱེད་པས་སོང་ན།

ཁྱོད་བྱ་བ་གང་གི་ཕྱིར་འགྲོ་བའི་བྱ་བ་དེ་འགྲུབ་པར་འགྱུར་ཞིང་ཁྱོད་ལ་འཇིགས་པ་གང་ནས་ཀྱང་འབྱུང་བར་མི་འགྱུར་རོ།

དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་བཀའ་སྩལ་ཏོ།

རྟག་ཏུ་སེམས་ཅན་ཐམས་ཅད་ལ།

མཉམ་པ་ཉིད་ཀྱི་སེམས་བྱོས་ལ།

སེམས་ཅན་དེ་ལ་མ་བརྙས་དང་།

ཁྱོད་ལ་འཇིགས་པར་འབྱུང་མི་འགྱུར།

གཞོན་ནུ་བྱང་ཤར་གྱི་ཕྱོགས་ལོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་བརྒྱད་ཁྲི་འདས་པ་ན་འཇིག་རྟེན་གྱི་ཁམས་བདུད་ཀྱི་སྡེ་བཅོམ་པ་ཞེས་བྱ་བ་ཞིག་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདུད་དང་ཡིད་གཉིས་ཀུན་འཇོམས་རྣམ་གནོན་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་སོ།

དེ་བཞིན་གཤེགས་པ་དེ་བྱང་ཆུབ་ཀྱི་ཤིང་དྲུང་དུ་

བཞུགས་པ་ཙམ་གྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན།

བདུད་ཀྱི་རིས་ཀྱི་ལྷ་ཇི་སྙེད་ཡོད་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་མཛད་དེ།

གཞོན་ནུ་དེ་ནི་དེ་བཞིན་གཤེགས་པ་དེ་བྱང་ཆུབ་ཀྱི་ཤིང་དྲུང་དུ་བཞུགས་པའི་སྐྱེས་བུའི་རྩལ་དེ་ལྟ་བུ་བྱུང་བ་ཡིན་ནོ།

གཞོན་ནུ་ཁྱོད་གང་གི་ཚེ་བྱ་བ་འགའ་ཞིག་གི་ཕྱིར་བྱང་ཤར་གྱི་ཕྱོགས་སུ་འགྲོ་ན་དེའི་ཚེ་ཁྱོད་ཀྱིས་དེ་བཞིན་གཤེགས་པ་དེ།

ཕྱག་འཚལ་ཏེ་དྲན་པར་བྱས་ཤིང་མདུན་དུ་བྱས་ཏེ།

སེམས་ཀྱི་རྒྱུན་གྱིས་དེ་མངོན་དུ་བྱེད་ཅིང་རྣམ་པར་མ་གཡེངས་པས་སོང་ན་ཁྱོད་བྱ་བ་གང་གི་ཕྱིར་འགྲོ་བའི་བྱ་བ་དེ་འགྲུབ་པར་འགྱུར་ཞིང་ཁྱོད་ལ་འཇིགས་པ་གང་ནས་ཀྱང་འབྱུང་བར་མི་འགྱུར་རོ།

དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་བཀའ་སྩལ་ཏོ།

གང་གིས་དང་པོའི་ཐུགས་ཀྱིས་ནི།

བདུད་རྣམས་ཕམ་མཛད་སངས་རྒྱས་དེ།

དྲན་བཞིན་དུ་ནི་ཁྱོད་སོང་ན།

ཁྱོད་ལ་འཇིགས་པ་འབྱུང་མི་འགྱུར།

གཞོན་ནུ་ཤར་ལྷོའི་ཕྱོགས་ལོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་ཉི་ཁྲི་འདས་པ་ན་འཇིག་རྟེན་གྱི་ཁམས་རྟག་ཏུ་སྣང་བ་ཞེས་བྱ་བ་ཞིག་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེམས་དང་པོ་བསྐྱེད་པས་ཕྱིར་མི་ལྡོག་པའི་འཁོར་ལོ་འབྱུང་བའི་དཔལ་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་སོ།

གཞོན་ནུ་དེ་བཞིན་གཤེགས་པ་དེས་དང་པོ་ཐུགས་བསྐྱེད་པ་ནས་བཟུང་སྟེ།

སངས་རྒྱས་པ་ཉིད་ཀྱི་བར་དུ་བར་ཆད་མེད་པར་སྦྱིན་པ་བྱིན།

ཚུལ་ཁྲིམས་བསྲུངས།

བཟོད་པ་ཀུན་ཏུ་བསྟེན།

བརྩོན་འགྲུས་བརྩམས།

བསམ་གཏན་བསྒྲུབས།

ཤེས་རབ་སྤྱད་དེ།

གཞོན་ནུ་དེ་ནི་དེ་བཞིན་གཤེགས་པ་དེའི་སྐྱེས་བུའི་རྩལ་དེ་ལྟ་བུ་བྱུང་བ་ཡིན་ནོ།

གཞོན་ནུ་ཁྱོད་གང་གི་ཚེ་བྱ་བ་འགའ་ཞིག་གི་ཕྱིར་ཤར་ལྷོའི་ཕྱོགས་སུ་འགྲོ་ན།

དེའི་ཚེ་ཁྱོད་ཀྱིས་དེ་བཞིན་གཤེགས་པ་དེ་ལ་ཡན་ལག་ལྔས་ཕྱག་འཚལ་ཏེ།

ཕྱིས་ཁྱིམ་ནས་སོང་ཤིག་དང་།

ཁྱོད་ལ་ཕྱིས་

འགྱོད་པའམ་འཇིགས་པ་གང་ནས་ཀྱང་འབྱུང་བར་མི་འགྱུར་རོ།

རྣམ་པར་མ་གཡེངས་པས་ཡིད་ལ་བྱེད་ན།

ཁྱོད་བྱ་བ་གང་གི་ཕྱིར་འགྲོ་བའི་བྱ་བ་དེ་འགྲུབ་པར་འགྱུར་རོ།

དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་བཀའ་སྩལ་ཏོ།

ཡན་ལག་ལྔས་ནི་ཕྱག་འཚལ་ཏེ།

ཕྱི་ནས་ཁྱིམ་ནས་སོང་ཤིག་དང་།

ཆོམ་རྐུན་རྣམས་ཀྱིས་ཁྱོད་ཀུན་ཏུ།

ཟིལ་གྱིས་མི་ནོན་འགྲོ་བར་འགྱུར།

གཞོན་ནུ་ལྷོ་ནུབ་ཀྱི་ཕྱོགས་ལོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་སུམ་ཁྲི་འདས་པ་ན་འཇིག་རྟེན་གྱི་ཁམས་གསེར་གྱི་དྲ་བས་གཡོགས་པ་ཞེས་བྱ་བ་ཞིག་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་གདུགས་འཕགས་སྣང་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་སོ།

གཞོན་ནུ་ཁྱོད་གང་གི་ཚེ་བྱ་བ་འགའ་ཞིག་གི་ཕྱིར་ལྷོ་ནུབ་ཀྱི་ཕྱོགས་སུ་འགྲོ་ན་དེའི་ཚེ་ཁྱོད་ཀྱིས་དེ་བཞིན་གཤེགས་པ་དེ་ལ་ཕྱག་འཚལ་ཏེ་དྲན་པར་བྱས་ཤིང་མདུན་དུ་བྱས་ཏེ།

སེམས་ཀྱི་རྒྱུན་གྱིས་དེ་མངོན་དུ་བྱེད་ཅིང་རྣམ་པར་མ་གཡེངས་པའི་ཡིད་ལ་བྱེད་པས་སོང་ན་ཁྱོད་ལ་འཇིགས་པ་གང་ནས་ཀྱང་འབྱུང་བར་མི་འགྱུར་ཞིང་ཁྱོད་བྱ་བ་གང་གི་ཕྱིར་འགྲོ་བའི་བྱ་བ་དེ་འགྲུབ་པར་འགྱུར་རོ།

དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་བཀའ་སྩལ་ཏོ།

རྫོགས་སངས་རྒྱས་ལ་ཕྱག་འཚལ་ནས།

མེ་ཏོག་སིལ་མས་གཏོར་ཅིག་དང་།

ཁྱོད་ནི་ལྷོ་ནུབ་འགྲོ་བ་ན།

འཇིགས་པ་འབྱུང་བར་མི་འགྱུར་རོ།

གཞོན་ནུ་ནུབ་བྱང་གི་ཕྱོགས་ལོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གང་གཱའི་ཀླུང་དྲུག་གི་བྱེ་མ་སྙེད་འདས་པ་ན་འཇིག་རྟེན་གྱི་ཁམས་ཡོངས་དག་རབ་གནས་མངོན་པར་འཕགས་ཞེས་བྱ་བ་ཞིག་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱང་ཆུབ་སེམས་དཔའ་འདུལ་བ་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་སོ།

གཞོན་ནུ་དེ་བཞིན་གཤེགས་པ་དེའི་སངས་རྒྱས་ཀྱི་ཞིང་ནི་མི་གཙང་བ་མེད་པ།

འཁྲིག་པ་མེད་པ།

བུད་མེད་མེད་

པ།

ཚེར་མ་དང་།

གསེག་མ་དང་།

གྱོ་མོ་མེད་པ།

སྙིགས་མ་ལྔ་མེད་པ་ཡིན་ནོ།

གཞོན་ནུ་ཁྱོད་གང་གི་ཚེ་བྱ་བ་འགའ་ཞིག་གི་ཕྱིར་ནུབ་བྱང་གི་ཕྱོགས་སུ་འགྲོ་ན་ཚངས་པར་སྤྱོད་པ་ཡང་དག་པར་བླངས་ནས་ཕྱིས་ཁྱིམ་ནས་རྣམ་པར་མ་གཡེངས་པའི་ཡིད་ལ་བྱེད་པས་སོང་ཤིག་དང་།

གཞོན་ནུ་ཁྱོད་བྱ་བ་གང་གི་ཕྱིར་འགྲོ་བའི་བྱ་བ་དེ་འགྲུབ་པར་འགྱུར་ཞིང་ཁྱོད་ལ་འཇིགས་པ་གང་ནས་ཀྱང་འབྱུང་བར་མི་འགྱུར་རོ།

དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་བཀའ་སྩལ་ཏོ།

ཚངས་སྤྱོད་ཡང་དག་བླངས་བྱས་ཏེ།

ཕྱི་ནས་ཁྱིམ་ནས་སོང་ཤིག་དང་།

ཁྱོད་ནི་གང་དང་གར་འགྲོ་ཡང་།

ཆོམ་རྐུན་རྣམས་ཀྱིས་ཟིལ་མི་ནོན།

གཞོན་ནུ་སྟེང་གི་ཕྱོགས་ལོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གང་གཱའི་ཀླུང་དྲུག་ཅུའི་བྱེ་མ་སྙེད་འདས་པ་ན་འཇིག་རྟེན་གྱི་ཁམས་དམིགས་པ་མེད་པ་ཡིད་ལ་བྱེད་པ་ཅན་ཞེས་བྱ་བ་ཞིག་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྐྲག་མེད་མུན་བྲལ་ཏིང་ངེ་འཛིན་མངོན་འཕགས་རྒྱལ་པོ་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་སོ།

གཞོན་ནུ་ཁྱོད་ཀྱིས་དེ་བཞིན་གཤེགས་པ་དེ་ལ་ཕྱག་འཚལ་ཏེ་དྲན་པར་བྱས་ཤིང་མདུན་དུ་བྱས་ཏེ་འདུག་ཀྱང་རུང་།

འགྲེང་ཡང་རུང་།

སེམས་ཅན་ཐམས་ཅད་ལ་བྱམས་པས་ཁྱབ་པར་བྱས་ནས་རྫོགས་པར་བྱས་ཤིང་གནས་ན་ཁྱོད་ལ་འཇིགས་པ་གང་ནས་ཀྱང་འབྱུང་བར་མི་འགྱུར་རོ།

དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་བཀའ་སྩལ་ཏོ།

ཁྱོད་ཀྱིས་མ་གཡེངས་ཡིད་བྱེད་ཀྱིས།

རྟག་ཏུ་རྒྱལ་བ་དེ་དྲན་ཞིང་།

རྟག་ཏུ་བྱམས་པའི་སེམས་བྱོས་དང་།

ཁྱོད་ལ་འཇིགས་པ་འབྱུང་མི་འགྱུར།

གཞོན་ནུ་འོག་གི་ཕྱོགས་ལོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་དགུ་ཁྲི་ཉིས་སྟོང་འདས་པ་ན་འཇིག་རྟེན་གྱི་ཁམས་ཡོན་ཏན་ཐམས་ཅད་ཀྱིས་བརྒྱན་པ་ཞེས་བྱ་བ་ཞིག་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དང་པོ་སེམས་བསྐྱེད་ཐེ་

ཙོམ་གཅོད་མཛད་ཉོན་མོངས་བསྐྱོད་ཅེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་སོ།

གཞོན་ནུ་ཁྱོད་ཀྱིས་དེ་བཞིན་གཤེགས་པ་དེ་ལ་བྱ་བ་རྩོམ་པ་ཐམས་ཅད་དང་།

འགྲེང་ཡང་རུང་།

འདུག་ཀྱང་རུང་།

འཆག་ཀྱང་རུང་སྟེ།

སྤྱོད་ལམ་ཐམས་ཅད་དུ་ཕྱག་འཚོལ་ཅིག །

ཡིད་ལ་བྱོས་ཤིག་དང་།

སེམས་ཅན་རྣམས་ལ་བྱམས་པའི་སེམས་དང་།

ཕན་པའི་སེམས་སྒྲུབས་ཤིག་དང་།

གཞོན་ནུ་ཁྱོད་ལ་འཇིགས་པ་འབྱུང་བར་མི་འགྱུར་ཞིང་།

དགོས་པ་ཐམས་ཅད་ཀྱང་འབད་མི་དགོས་པར་འགྲུབ་པར་འགྱུར་རོ།

དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་བཀའ་སྩལ་ཏོ།

བྱ་བ་ཀུན་ལ་ཉིན་མཚན་དུ།

སངས་རྒྱས་དེ་ནི་དྲན་བྱ་ཞིང་།

བྱང་ཆུབ་སེམས་ཀྱང་མ་གཏང་དང་།

ཁྱོད་ལ་འཇིགས་པ་འབྱུང་མི་འགྱུར།

གཞོན་ནུ་ཁྱོད་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གི་མཚན་ལེགས་པར་བཟུང་བར་གྱིས་ཤིག །

ལེགས་པར་བཅང་བར་གྱིས་ཤིག །

ལེགས་པར་ཀུན་ཆུབ་པར་གྱིས་ཤིག་དང་།

འཇིགས་པའམ།

བག་ཚ་བའམ།

སྤུ་ཟིང་ཞེས་བྱེད་པ་གང་ཅི་ཡང་རུང་བ་དེ་དག་ཐམས་ཅད་ཁྱོད་ལ་འབྱུང་བར་མི་འགྱུར་རོ།

དེ་སྐད་ཅེས་བཀའ་སྩལ་པ་དང་།

བཅོམ་ལྡན་འདས་ལ་ཤཱཀྱ་གཞོན་ནུ་བཞིན་རབ་གསལ་གྱིས་འདི་སྐད་ཅེས་གསོལ་ཏོ།

བཅོམ་ལྡན་འདས་བདག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གི་མཚན་རྣམས་བཟུང་ལགས་ཏེ།

བཅོམ་ལྡན་འདས་བདག་ལ་འཇིག་རྟེན་གྱི་ཁམས་དེ་དག་མུན་པ་མ་མཆིས་ཤིང་།

བཅོམ་ལྡན་འདས་བདག་གིས་འཇིག་རྟེན་གྱི་ཁམས་དེ་དག་དང་།

དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ཀྱང་དཔེར་ན་དེ་བཞིན་གཤེགས་པ་ད་ལྟར་འཁོར་རྣམས་ལ་ཆོས་སྟོན་པ་བཞིན་དུ་མཐོང་ངོ་།

དེ་ནས་འཁོར་དེ་ལས་ཤཱཀྱ་གཞོན་ནུ་བཞིན་རབ་གསལ་ལ་སོགས་པ་སྐྱེ་བོ་ཕལ་པོ་ཆེའི་ཚོགས་

བཅོམ་ལྡན་འདས་ལ་བལྟ་བ་དང་།

ཕྱག་འཚལ་བ་དང་།

མཆོད་པ་དང་།

རིམ་གྲོ་བྱ་བ་དང་།

ཆོས་ཀྱི་རྣམ་གྲངས་འདི་མཉན་པའི་ཕྱིར་འཁོར་དེར་འདུས་པར་གྱུར་པའི་སྲོག་ཆགས་སྟོང་ཚང་བ་དེ་དག་ཐམས་ཅད་སྟན་ལས་ལངས་ཏེ།

བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ།

བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས།

བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་བདག་ཅག་གི་དོན་གྱི་སླད་དུ་དེ་བཞིན་གཤེགས་པས་ཆོས་ཀྱི་རྣམ་གྲངས་འདི་བཤད་པས་བཅོམ་ལྡན་འདས་བདག་ཅག་ལ་ཕྱོགས་དེ་དག་དང་འཇིག་རྟེན་གྱི་ཁམས་དེ་དག་ཀྱང་མུན་པ་མ་མཆིས་པར་གདའ་ལ།

བཅོམ་ལྡན་འདས་འཇིག་རྟེན་གྱི་ཁམས་དེ་དག་དང་སངས་རྒྱས་བཅོམ་ལྡན་འདས་དེ་དག་ཀྱང་དཔེར་ན།

ད་ལྟར་དེ་བཞིན་གཤེགས་པ་ཆོས་སྟོན་པ་འདི་བཞིན་དུ་གདའོ།

དེ་ནས་སངས་རྒྱས་ཀྱི་མཐུས་ཚེ་དང་ལྡན་པ་ཤཱ་རིའི་བུ་སྟན་ལས་ལངས་ཏེ།

བླ་གོས་ཕྲག་པ་གཅིག་ཏུ་བྱས་ནས།

པུས་མོ་གཡས་པའི་ལྷ་ང་ས་ལ་བཙུགས་ཏེ།

བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས།

བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་རིགས་ཀྱི་བུའམ་རིགས་ཀྱི་བུ་མོ་གང་དག་ཆོས་ཀྱི་རྣམ་གྲངས་འདི་བཤད་པ་ན།

སངས་རྒྱས་བཅོམ་ལྡན་འདས་དེ་དག་གི་མཚན་རྣམས་ཐོས་ནས་མིག་རྣམ་པར་དག་ཅིང་ཕྱོགས་བཅུ་དག་ན་འཇིག་རྟེན་གྱི་ཁམས་གང་དག་མཆིས་པ་དེ་དག་དང་།

སངས་རྒྱས་བཅོམ་ལྡན་འདས་དེ་དག་མཐོང་བ་དེ་དག་གི་མིག་རྣམ་པར་དག་པའི་བསོད་ནམས་དེ་དག་བཅོམ་ལྡན་འདས་ཅི་ལགས།

ཚེ་རབས་གཞན་དུ་ཚེ་འཕོས་ན་ཡང་འབྲལ་བར་འགྱུར་རམ།

འོན་ཏེ་མི་འགྱུར།

བཅོམ་ལྡན་འདས་ཀྱིས་བཀའ་སྩལ་པ།

ཤཱ་རིའི་བུ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པའི་རིགས་ཀྱི་བུའམ་རིགས་ཀྱི་བུ་མོ་གང་དག་འདི་ལྟར་མིག་རྣམ་པར་དག་པ་དེ་དག་ནི་སྒྲིབ་པ་མེད་པའི་

ཚུལ་གྱིས་ཤིན་ཏུ་རྣམ་པར་དག་པ་ཉིད་དུ་འགྱུར་རོ།

ཤཱ་རིའི་བུ་ཁྱོད་ཀྱིས་སྲོག་ཆགས་སྟོང་ཚང་བ་འདི་མཐོང་ངམ།

ཤཱ་རིའི་བུ་འདི་དག་ཐམས་ཅད་ནི་སངས་རྒྱས་རྣམས་ཀྱི་མཚན་བཟུང་བའི་དགེ་བའི་རྩ་བ་འདིས་རེ་རེས་ཀྱང་འཁོར་ལོས་སྒྱུར་བའི་རྒྱལ་སྲིད་གང་གཱའི་ཀླུང་གི་བྱེ་མ་སྙེད་དག་བྱེད་དུ་བཅུག་ནས་སྲིད་པ་ཐ་མ་དང་།

ལུས་ཐ་མ་ལ་བྱང་ཆུབ་ཀྱི་ཚོགས་ཐམས་ཅད་རྫོགས་པར་བྱས་ཏེ།

བསྐལ་པ་གཅིག་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྱན་དག་པས་བརྒྱན་པ་ཞེས་བྱ་བར་མཚན་འཐུན་པ་ཤ་སྟག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ།

བཅོམ་ལྡན་འདས་ཀྱིས་རིགས་ཀྱི་བུ་དེ་རྣམས་ལུང་བསྟན་པ་བཤད་པ་འདི་བཀའ་སྩལ་མ་ཐག་ཏུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་པར་གྱུར་ཏེ།

འགུལ་རབ་ཏུ་འགུལ།

ཀུན་ཏུ་རབ་ཏུ་འགུལ།

གཡོས་རབ་ཏུ་གཡོས།

ཀུན་ཏུ་རབ་ཏུ་གཡོས།

འུར་འུར་རབ་ཏུ་འུར་འུར།

ཀུན་ཏུ་རབ་ཏུ་འུར་འུར།

ལྡེག་རབ་ཏུ་ལྡེག །

ཀུན་ཏུ་རབ་ཏུ་ལྡེག །

ཆེམ་ཆེམ་རབ་ཏུ་ཆེམ་ཆེམ།

ཀུན་ཏུ་རབ་ཏུ་ཆེམ་ཆེམ།

འཁྲུགས་རབ་ཏུ་འཁྲུགས།

ཀུན་ཏུ་རབ་ཏུ་འཁྲུགས་སོ།

ས་བླའི་ལྷ་རྣམས་ཀྱིས་ཀྱང་ཀྱེ་མ་གྲོགས་པོ་དག་འདི་ལྟར་རིགས་ཀྱི་བུ་འདི་རྣམས་ཀྱིས་དེ་བཞིན་གཤེགས་པའི་མཚན་བཟུང་བ་ཙམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་བཟུང་ཞིང་ཆོས་ཐམས་ཅད་ཇི་ལྟ་བ་བཞིན་དུ་མཁྱེན་པས་དོན་ཐམས་ཅད་ཐུགས་སུ་ཆུད་པའི་དེ་བཞིན་གཤེགས་པར་འགྱུར་བ་ནི་ངོ་མཚར་ཆེ་སྟེ།

སུ་ཞིག་སངས་རྒྱས་ལ་དད་པར་མི་འགྱུར་ཞེས་སྒྲ་བསྒྲགས་སོ།

རྒྱལ་ཆེན་བཞིའི་རིས་ཀྱི་ལྷ་རྣམས་དང་།

སུམ་ཅུ་རྩ་གསུམ་པ་རྣམས་དང་།

འཐབ་བྲལ་བ་རྣམས་དང་།

དགའ་ལྡན་པ་རྣམས་དང་།

འཕྲུལ་དགའ་བ་རྣམས་དང་།

གཞན་འཕྲུལ་དབང་བྱེད་ཀྱི་བདུད་ཀྱི་རིས་རྣམས་དང་།

ཚངས་རིས་རྣམས་དང་།

ཚངས་པའི་མདུན་ན་འདོན་རྣམས་དང་།

ཚངས་པ་ཆེན་པོ་རྣམས་ནས་འོག་

མིན་གྱི་ལྷ་རྣམས་ཀྱི་བར་གྱིས་ས་བླའི་ལྷ་རྣམས་ཀྱིས་སྒྲ་དེ་ཐོས་ནས་ཡི་རངས་ཤིང་རབ་ཏུ་དགའ་ལ་དགའ་བ་དང་ཡིད་བདེ་བ་སྐྱེས་ནས་ཚིག་འདི་སྐད་ཅེས་ཀྱེ་མ་གྲོགས་པོ་དག་འདི་ལྟར་རིགས་ཀྱི་བུ་འདི་རྣམས་ཀྱིས་དེ་བཞིན་གཤེགས་པའི་མཚན་བཟུང་བ་ཙམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་བཟུང་ཞིང་ཆོས་ཐམས་ཅད་ཇི་ལྟ་བ་བཞིན་དུ་མཁྱེན་པས་དོན་ཐམས་ཅད་ཐུགས་སུ་ཆུད་པའི་དེ་བཞིན་གཤེགས་པར་འགྱུར་བ་ནི་ངོ་མཚར་ཆེ་སྟེ།

སུ་ཞིག་སངས་རྒྱས་ལ་དད་པར་མི་འགྱུར་ཞེས་སྨྲས་སོ།

དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ།

ཀུན་དགའ་བོ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པའི་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཆོས་ཀྱི་རྣམ་གྲངས་འདི་ཐོས་ནས་འཛིན་པར་བྱེད།

འཆང་བར་བྱེད།

ཀློག་པར་བྱེད།

ཀུན་ཆུབ་པར་བྱེད་ཅིང་།

གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པར་བྱེད་པ་དང་།

ཐ་ན་གླེགས་བམ་ལ་བྲིས་ཏེ་འཆང་བར་བྱེད་ན།

རིགས་ཀྱི་བུའམ་རིགས་ཀྱི་བུ་མོ་དེ་དག་སངས་རྒྱས་ཀྱིས་བྱིན་གྱིས་བརླབས་པ་དང་།

སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ་ཡིན་པར་རིག་པར་བྱའོ།

དེ་དག་ལ་འཆི་བའི་འཇིགས་པ་མི་འབྱུང་བར་རིག་པར་བྱའོ།

དེ་དག་གཤིས་ངན་དུ་འཆི་བར་མི་འགྱུར་རོ།

དེ་དག་ཕ་རོལ་གྱི་གནོད་པས་འཆི་བར་མི་འགྱུར་རོ།

དེ་དག་ལ་ཆུ་དང་།

ཆོམ་རྐུན་དང་།

དུག་དང་།

མཚོན་གྱིས་འཇིགས་པ་མི་འབྱུང་བར་ཡིད་ཆེས་པར་བྱའོ།

དེ་ནས་ལྷའི་དབང་པོ་བརྒྱ་བྱིན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བསྲུང་བ་ལུང་བསྟན་པ་འདི་ལྟ་བུ་འདི་ཤེས་ནས་ཆོས་ཀྱི་རྣམ་གྲངས་འདི་གཟུང་བའི་ཕྱིར་ལྷའི་བུ་སྟོང་ཚང་བས་ཡོངས་སུ་བསྐོར་ཅིང་མདུན་དུ་བདར་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང་།

བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ།

བཅོམ་ལྡན་འདས་ལ་ལན་གསུམ་བསྐོར་བ་བྱས་ནས།

བཅོམ་ལྡན་འདས་དང་སྲོག་ཆགས་སྟོང་ཚང་བ་གང་དག་བཅོམ་ལྡན་འདས་

ཀྱིས་མ་འོངས་པའི་དུས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་དེ་དག་ལ་ལྷའི་ཙན་དན་གྱི་ཕྱེ་མ་དང་།

ལྷའི་མེ་ཏོག་མན་དཱ་ར་བ་དང་།

མན་དཱ་ར་བ་ཆེན་པོ་རྣམས་ཀྱིས་མངོན་པར་གཏོར་ནས་ཐལ་མོ་སྦྱར་ཏེ་ཕྱོགས་གཅིག་ཏུ་འདུག་ནས་འདི་སྐད་ཅེས་ཀྱང་གསོལ་ཏོ།

བཅོམ་ལྡན་འདས་བདག་གིས་རིགས་ཀྱི་བུའམ་རིགས་ཀྱི་བུ་མོ་གང་ཆོས་ཀྱི་རྣམ་གྲངས་འདི་འཛིན་པར་བགྱིད་པ་དང་།

འཆང་བར་བགྱིད་པ་དང་།

ཀློག་པར་བགྱིད་པ་དང་།

ཀུན་ཆུབ་པར་བགྱིད་པ་དེ་དག་བསྲུང་བར་བགྱིའོ།

བཅོམ་ལྡན་འདས་རིགས་ཀྱི་བུའམ་རིགས་ཀྱི་བུ་མོ་དེ་དག་ཁྱིམ་ན་མཆིས་སམ།

དགོན་པ་ན་མཆིས་སམ།

ཤིང་དྲུང་ན་མཆིས་སམ།

ཁྱིམ་སྟོང་པ་ན་མཆིས་སམ།

འབྲོག་དགོན་པ་ན་མཆིས་སམ།

ལམ་དང་ལམ་གོལ་བ་ན་མཆིས་སམ།

གཉིད་ལོག་གམ་གཉིད་མ་ལོག་པ་དག་ན་ཡང་དེ་དག་ལ་ཕ་རོལ་གྱི་གནོད་པས་འགུམ་པར་མི་འགྱུར་བར་བདག་གིས་བསྲུང་བར་བགྱིའོ།

དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ།

ཀུན་དགའ་བོ་ད་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཞུགས་ཏེ།

འཚོ་ཞིང་གཞེས་པ་ལ་རིགས་ཀྱི་བུའམ་རིགས་ཀྱི་བུ་མོ་གང་ཞིག་གིས་ཇི་སྲིད་འཚོའི་བར་དུ་ཆོས་གོས་དང་།

བསོད་སྙོམས་དང་།

གནས་མལ་དང་།

སྙུན་གྱི་གསོས་སྨན་དང་།

ཡོ་བྱད་རྣམས་ཀྱིས་བསྙེན་བཀུར་བྱེད་ན།

ཀུན་དགའ་བོ་དེ་ཙམ་གྱིས་ནི་དེ་བཞིན་གཤེགས་པ་ལ་བཀུར་སྟི་བྱས་པར་མི་འགྱུར།

བླ་མར་བྱས་པར་མི་འགྱུར།

རི་མོར་བྱས་པར་མི་འགྱུར།

མཆོད་པ་བྱས་པར་མི་འགྱུར་གྱི།

བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པའི་རིགས་ཀྱི་བུའམ་རིགས་ཀྱི་བུ་མོ་གང་ཞིག་ཆོས་ཀྱི་རྣམ་གྲངས་འདི་ཐོས་ནས་འཛིན་པར་བྱེད་དམ།

འཆང་བར་བྱེད་དམ།

ཀློག་པར་བྱེད་དམ།

ཀུན་ཆུབ་པར་བྱེད་དམ།

གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་ཏམ།

ཐ་ན་གླེགས་བམ་ལ་བྲིས་ཏེ་འཆང་ན།

ཀུན་དགའ་བོ་

དེ་ཙམ་གྱིས་ནི་དེ་བཞིན་གཤེགས་པ་ལ་བཀུར་སྟི་དམ་པ་དང་།

བླ་མར་བྱ་བ་དམ་པ་དང་།

རི་མོར་བྱ་བ་དམ་པ་དང་།

མཆོད་པ་དམ་པས་བཀུར་སྟི་བྱས་པ་ཡིན།

བླ་མར་བྱས་པ་ཡིན།

རི་མོར་བྱས་པ་ཡིན།

མཆོད་པ་བྱས་པ་ཡིན་ནོ།

དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ།

བླ་གོས་ཕྲག་པ་གཅིག་ཏུ་བྱས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ།

བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས།

འདི་ཇི་ལྟར་གཟུང་བར་བགྱི།

དེ་སྐད་ཅེས་གསོལ་པ་དང་།

བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ།

ཀུན་དགའ་བོ་དེའི་ཕྱིར་ཁྱོད་ཀྱིས་ཆོས་ཀྱི་རྣམ་གྲངས་འདི་ཕྱོགས་བཅུའི་མུན་པ་རྣམ་པར་སེལ་བ་ཞེས་བྱ་བར་ཟུང་ཤིག །

འདི་དེ་བཞིན་གཤེགས་པའི་མཚན་ཡང་དག་པར་བརྗོད་པ་ཞེས་བྱ་བ་དང་།

དངོས་པོ་མེད་པར་རྟོགས་པ་ཞེས་བྱ་བ་དང་།

མཚན་ཉིད་མེད་པར་རྟོགས་པ་ཞེས་བྱ་བར་ཡང་ཟུང་ཤིག །

བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས།

ཚེ་དང་ལྡན་པ་ཀུན་དགའ་བོ་དང་།

ཚེ་དང་ལྡན་པ་ཤཱ་རིའི་བུ་དང་།

ཤཱཀྱ་གཞོན་ནུ་བཞིན་རབ་གསལ་དང་།

སྲོག་ཆགས་སྟོང་ཚང་བ་དེ་དང་།

ལྷའི་དབང་པོ་བརྒྱ་བྱིན་དང་།

དགེ་སློང་དེ་དག་དང་།

བྱང་ཆུབ་སེམས་དཔའ་དེ་དག་དང་།

ལྷ་དང་།

མི་དང་།

ལྷ་མ་ཡིན་དང་།

དྲི་ཟར་བཅས་པའི་འཇིག་རྟེན་ཡི་རངས་ཏེ།

བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།

འཕགས་པ་ཕྱོགས་བཅུའི་མུན་པ་རྣམ་པར་སེལ་བ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།།

རྒྱ་གར་གྱི་མཁན་པོ་བི་ཤུད་དྷ་སིང་ཧ་དང་།

ལོཙྪ་བ་བན་དེ་རྩངས་དེ་བེན་དྲ་རཀྵི་ཏས་བསྒྱུར།

ཞུ་ཆེན་གྱི་ལོཙྪ་བ་བན་དེ་ཀླུའི་རྒྱལ་མཚན་གྱིས་ཞུ་ཆེན་བགྱིས་ཏེ་གཏན་ལ་ཕབ་པ།།

རྒྱ་གར་སྐད་དུ།

ཨཱརྱ་སཔྟ་བུད་དྷ་ཀ་ན་ནཱ་མ་མ་ཧཱ་ཡཱ་ན་སཱུ་ཏྲ།

བོད་སྐད་དུ།

འཕགས་པ་སངས་རྒྱས་བདུན་པ་ཞེས་བྱ་བ་ཐེག་པ་ཆེན་པོའི་མདོ།

སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ།

འདི་སྐད་བདག་གིས་ཐོས་པ་དུས་གཅིག་ན།

བཅོམ་ལྡན་འདས་ཏི་སེའི་རིའི་རྩེ་མོ་ལྷའི་གནས་ན་དྲང་སྲོང་གི་སྤྱོད་པ་དང་ཧ་ཅང་ཡང་མི་རིང་བ་ཞིག་ན།

དགེ་སློང་ལྔ་བརྒྱ་ཙམ་གྱི་དགེ་སློང་གི་དགེ་འདུན་ཆེན་པོ་དང་བྱང་ཆུབ་སེམས་དཔའ་ལྔ་བརྒྱ་ལ་འདི་ལྟ་སྟེ།

བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་དང་།

ཀུན་ཏུ་བཟང་པོ་དང་།

མཐའ་ཡས་མེ་ཏོག་དང་།

ཀུན་ནས་མེ་ཏོག་དང་།

དེ་དག་ལ་སོགས་པ་བྱང་ཆུབ་སེམས་དཔའ་སྐྱེ་བ་གཅིག་གིས་ཐོགས་པ་ཤ་སྟག་དང་ཐབས་ཅིག་ཏུ་བཞུགས་སོ།

དེ་ནས་བཅོམ་ལྡན་འདས་ཀྱིས་རིའི་རྩེ་མོའི་ནགས་ཁྲོད་དེ་ཉིད་ན་དགེ་སློང་ཞིག་འབྱུང་པོས་ཟིན་ནས་བརྡོལ་ཅིང་གཅེར་བུ་གོས་མེད་ལ་ལག་པ་བསྒྲེང་སྟེ་ངུ་ཞིང་འདུག་པ་གཟིགས་སོ།

དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོས་བླ་གོས་ཕྲག་པ་གཅིག་ཏུ་གཟར་ཏེ།

པུས་མོ་གཡས་པའི་ལྷ་ང་ས་ལ་བཙུགས་ནས།

བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་ནམ་མཁའི་དཀྱིལ་ན་ཀྱི་ཧུད་ཅེས་སྒྲ་འབྱིན་པ་འདི་དང་།

དགེ་སློང་གཅེར་བུ་གོས་མ་མཆིས་པ།

ལག་པ་སྟོང་པ་ཅིག་ཤོས་འདི་ཡང་སུ་ཞིག་ལགས།

དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་འདི་སྐད་ཅེས་བཀའ་སྩལ་ཏོ།

ནམ་མཁའི་སྙིང་པོ་འདི་ནི་ནད་ཀྱིས་བཏབ་པ་ཡིན་ནོ།

ཅིག་ཤོས་འདི་ཡང་ནད་ཀྱིས་བཏབ་པ་ཡིན་ནོ།

དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོས་འདི་སྐད་ཅེས་གསོལ་ཏོ།

ནད་ཐམས་

ཅད་རབ་ཏུ་ཞི་བར་བགྱིད་པ་དང་།

འབྱུང་པོ་ཐམས་ཅད་བཟློག་པའི་རིག་སྔགས་བཅོམ་ལྡན་འདས་ཀྱིས་བསྟན་དུ་གསོལ།

བཀའ་སྩལ་དུ་གསོལ།

དེ་ནས་བཅོམ་ལྡན་འདས་ཀྱིས་སངས་རྒྱས་སྤྲུལ་པ་མཛད་དེ།

དེ་ནས་ནམ་མཁའ་ལ་དེ་བཞིན་གཤེགས་པ་དྲུག་བྱུང་ངོ་།

བདུན་པ་ནི་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པའོ།

དེ་ནས་དེ་བཞིན་གཤེགས་པ་རྣམ་པར་གཟིགས་སྟེང་གི་ནམ་མཁའ་ལ་བཞུགས་ཏེ།

སེམས་ཅན་ཐམས་ཅད་ལ་ཕན་པའི་དོན་དང་།

ནད་ཐམས་ཅད་རབ་ཏུ་ཞི་བར་བྱ་བ་དང་།

འབྱུང་པོ་ཐམས་ཅད་བཟློག་པའི་ཕྱིར་གསང་སྔགས་ཀྱི་གཞི་འདི་དག་བཀའ་སྩལ་ཏོ།

ན་མོ་བུདྡྷཱ་ཡ།

ན་མོ་དྷརྨཱ་ཡ།

ན་མཿསཾ་གྷཱ་ཡ།

ཏདྱ་ཐཱ།

ཨོཾ་ཧུ་ལུ་ཧུ་ལུ།

ཧི་ལ་ཧི་ལི་ཡ།

ན་མོ་ཛ་ཀ།

ན་མ་ཤྩནཱ་ཡ།

ན་མོ་ན་མཿསྭཱ་ཧཱ།

དེ་ནས་དེ་བཞིན་གཤེགས་པ་རྣམ་པར་གཟིགས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་འདི་སྐད་ཅེས་བཀའ་སྩལ་ཏོ།

ནམ་མཁའི་སྙིང་པོ་གང་ལ་ལ་ཞིག་རིག་སྔགས་འདི་འཆང་ངམ།

ཀློག་གམ།

ཀུན་ཆུབ་པར་བྱེད་ན།

དེའི་ལུས་ལ་མཚོན་གྱིས་མི་ཚུགས།

ཆུ་དང་།

སྡུག་བསྔལ་བའི་ནད་ཀྱིས་འཆི་བའི་དུས་བྱེད་པར་མི་འགྱུར།

དུས་མ་ཡིན་པར་འཆི་བས་འཆི་བའི་དུས་བྱེད་པར་མི་འགྱུར་རོ།

དེ་དུག་ཟོས་ཀྱང་ཟས་བཞིན་དུ་འགྱུར་རོ།

ཟས་དང་སྐོམ་ལ་ལན་བདུན་བཟླས་བརྗོད་བྱས་ཏེ་ཟོས་ན་ཕ་རོལ་གྱི་གནོད་པ་མི་འབྱུང་ངོ་།

ནད་ཐམས་ཅད་ཀྱིས་བཏབ་པར་མི་འགྱུར་རོ།

རིང་དུ་འཚོ་བར་འགྱུར་རོ།

ཐོས་པ་འཛིན་པར་འགྱུར་རོ།

དེ་བཞིན་གཤེགས་པ་བདུན་གྱི་གཟུགས་མཐོང་བར་འགྱུར་རོ།

མཚོན་བཏབ་པའི་རྣ་བར་བཟླས་བརྗོད་བྱས་ལ་སྣ་མའི་མར་སྦྱིན་ནོ།

མཛེ་དང་སྐྲངས་ནད་ཀྱིས་བཏབ་པ་རྣམས་ལ་སྣ་མའི་མར་དང་།

ཨུད་པ་ལ་སྔོན་པོ་དང་།

ཤུ་ཏི་དང་།

ཉེའུ་ཤིང་རྣམས་བསྲེས་པའི་མར་བྱིན་ན་ནད་ཐམས་ཅད་སོས་པར་འགྱུར་རོ།

ལས་ཐམས་ཅད་ལ་ཡང་སྦྱར་བར་བྱའོ།

དེ་ནས་དེ་བཞིན་གཤེགས་པ་གཙུག་ཏོར་ཅན་སྟེང་གི་ནམ་

མཁའ་ལ་བཞུགས་ཏེ།

སེམས་ཅན་ཐམས་ཅད་ལ་ཕན་པའི་དོན་དང་།

ནད་ཐམས་ཅད་རབ་ཏུ་ཞི་བར་བྱ་བ་དང་།

འབྱུང་པོ་ཐམས་ཅད་བཟློག་པའི་ཕྱིར་གསང་སྔགས་ཀྱི་གཞི་འདི་དག་བཀའ་སྩལ་ཏོ།

ན་མོ་བུད་དྷཱ་ཡ།

ན་མོ་དྷརྨཱ་ཡ།

ན་མཿསཾ་གྷཱ་ཡ།

ཨོཾ་པ་ཙ་པ་ཙ་པཱ་ཙ་ཡ་པཱ་ཙ་ཡ་སརྦ་བྷཱུ་ཏཱ་ནཱཾ།

ཙྪིན་དྷ་ཡ་ཀཱི་ལ་ཡ་པ་ར་བིདྱཱ་ནཱཾ་སྭཱ་ཧཱ།

ནམ་མཁའི་སྙིང་པོ་སེམས་ཅན་ཐམས་ཅད་ལ་ཕན་པའི་དོན་དང་།

ནད་ཐམས་ཅད་རབ་ཏུ་ཞི་བར་བྱ་བ་དང་།

བསྒོམ་ཉེས་པ་དང་།

རྨི་ལམ་ངན་པ་ཐམས་ཅད་བཟློག་པ་དང་།

དུས་མ་ཡིན་པར་འཆི་བ་དགག་པའི་ཕྱིར་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་གསུངས་ཤིང་།

ངས་ཀྱང་ད་ལྟར་བཤད་པའི་སྙིང་པོ་འདི་ཟུང་ཤིག །

ནམ་མཁའི་སྙིང་པོ་གང་ལ་ལ་ཞིག་ངའི་སྙིང་པོ་འདི་ཉིན་ལན་གསུམ་ཡིད་ལ་བྱེད་ན།

དེ་ལ་ཕ་རོལ་གྱི་གནོད་པ་འབྱུང་བར་མི་འགྱུར་རོ།

གཉིད་ཀྱིས་ལོག་པའི་རྨི་ལམ་ན་དེ་བཞིན་གཤེགས་པའི་གཟུགས་མཐོང་བར་འགྱུར་རོ།

གཤིས་ངན་དུ་འཆི་བར་མི་འགྱུར་རོ།

འདི་ནས་ཤི་འཕོས་ནས་དེ་བཞིན་གཤེགས་པ་དང་ཕྲད་པར་འགྱུར་ཞིང་མཉེས་པར་བྱེད་པར་འགྱུར་རོ།

དེ་ནས་འདིའི་ཆོ་ག་གཞན་ནི་ནད་ཐམས་ཅད་ལ་སྐུད་པས་བཅིང་བར་བྱའོ།

འདུས་པ་ལས་གྱུར་པ་ལ་ནི་སྣ་མའི་མར་ལ་བཟླས་བརྗོད་བྱས་ཏེ་སྦྱིན་ནོ།

ཆུས་ཕྱོགས་བཅིང་བར་བྱའོ།

སྐུད་པས་བདག་ལ་བསྲུང་ངོ་།

བྱིས་པ་རྣམས་ཀྱི་གདོན་དག་ལ་སྐུད་པ་སྔོན་པོ་གདགས་སོ།

མཚོན་བཏབ་པའི་རྣ་བར་ལན་བདུན་བཟླས་བརྗོད་བྱའོ།

གཞན་དག་ལ་ཡང་རང་གི་བློས་སྦྱར་བར་བྱའོ།

དེ་ནས་དེ་བཞིན་གཤེགས་པ་ཐམས་ཅད་སྐྱོབ་སྟེང་གི་ནམ་མཁའ་ལ་བཞུགས་ཏེ།

སེམས་ཅན་ཐམས་ཅད་ལ་ཕན་པའི་དོན་དང་།

ནད་ཐམས་ཅད་རབ་ཏུ་ཞི་བར་བྱ་བ་དང་།

འབྱུང་པོ་ཐམས་ཅད་བཟློག་པའི་ཕྱིར་གསང་སྔགས་ཀྱི་གཞི་འདི་དག་བཀའ་སྩལ་ཏོ།

ན་མོ་བུད་དྷཱ་ཡ།

ན་མོ་དྷརྨཱ་ཡ།

ན་མཿསཾ་གྷཱ་ཡ།

ཨོཾ་ཀ་ལ་ཀ་ལ།

ཀི་ལི་ཀི་ལི།

ཀུ་ལུ་ཀུ་ལུ།

ཀུ་ལ་ཨུད་ས་དྷ་ནཾ་སཱ་དྷ་ནཱཾ་ཀུ་རུ།

སརྦ་

གྲ་ཧཱ་ཎཱཾ་སྭཱ་ཧཱ།

ནམ་མཁའི་སྙིང་པོ་གསང་སྔགས་ཀྱི་གཞི་འདི་དག་ནི་བསྐལ་པ་བཟང་པོའི་དེ་བཞིན་གཤེགས་པ་འདས་པ་དང་།

མ་བྱོན་པ་དང་།

ད་ལྟར་བྱུང་བ་ཐམས་ཅད་ཀྱིས་གསུངས་ཤིང་།

ངས་ཀྱང་ད་ལྟར་བཤད་པ་སྟེ།

ནམ་མཁའི་སྙིང་པོ་ཁྱོད་ཀྱིས་གསང་སྔགས་ཀྱི་གཞི་འདི་དག་ཟུང་ཤིག །

གང་ལ་ལ་ཞིག་འཛིན་ཏམ།

ཀློག་གམ།

ཀུན་ཆུབ་པར་བྱེད་ན།

དེའི་ལུས་ལ་མཚོན་གྱིས་མི་ཚུགས།

དུག་གིས་མི་ཚུགས།

དབྱིག་དུག་གིས་མི་ཚུགས།

རིམས་ནད་ཀྱིས་མི་འདེབས་ཤིང་ཆུ་དང་།

དུས་མ་ཡིན་པར་འཆི་བ་དང་།

གཤིས་ངན་དུ་འཆི་བར་མི་འགྱུར་ཏེ།

སྔོན་གྱི་ལས་ཀྱི་སྒྲིབ་པ་ནི་མ་གཏོགས་སོ།

དགེ་སློང་ངམ།

དགེ་སློང་མའམ།

དགེ་བསྙེན་ནམ།

དགེ་བསྙེན་མ་གང་ལ་ལ་ཞིག་ནང་པར་ལངས་ནས་མགོ་བཀྲུས་ཏེ།

དེ་བཞིན་གཤེགས་པའི་སྤྱན་སྔར་ལན་བརྒྱ་རྩ་བརྒྱད་བརྗོད་ན་དེའི་ལས་ཀྱི་སྒྲིབ་པ་ཐམས་ཅད་བྱང་བར་འགྱུར་རོ།

དེ་ལ་སེམས་ཅན་སྡང་བ་གང་དག་དང་།

རྒྱལ་པོ་རྣམས་ཐོག་མར་སྨྲ་བར་འགྱུར་རོ།

སེམས་ཅན་ཐམས་ཅད་དེའི་དབང་དུ་འགྱུར་རོ།

འཇིགས་པ་ཐམས་ཅད་ཀྱི་ནང་དུ་ཡིད་ལ་བྱའོ།

འཐབ་པ་དང་།

འཐབ་མོ་དང་།

རྩོད་པ་དང་།

འགྱེད་པ་ཐམས་ཅད་ལ་སྐུད་པ་དཀར་པོ་གདགས་སོ།

མིག་ནད་ལ་ཤིང་འོ་མ་ཅན་ལས་སྐུད་པ་བྱས་ཏེ་རྣ་བ་ལ་གདགས་སོ།

དམག་རེངས་པར་བྱེད་པར་འདོད་པས་ཞོ་དང་སྦྲང་རྩི་ལ་སྦགས་པའི་འབྲས་ཡོས་ལ་ལན་བརྒྱ་རྩ་བརྒྱད་སྦྱིན་སྲེག་བྱའོ།

རཱ་ཛ་ནཱཾ་རཱ་ཛ་མཱ་ཏྲཾ་བཱ་བ་ཤཱི་ཀ་རོ་ཏུ་ཀཱ་མེ་ན།

འོ་མ་ཅན་གྱི་ཤིང་གི་སྦར་ཤིང་གིས་མེ་བུས་ལ་བསྲེག་བྱ་ཏིལ་དག་ལན་སྟོང་སྦྱིན་སྲེག་བྱའོ།

བདག་དང་སེམས་ཅན་ཐམས་ཅད་ཀྱི་སྒྲིབ་པ་ཐམས་ཅད་དང་།

སྡིག་པ་བྱང་ཞིང་།

དཔལ་ཆེན་པོ་དང་།

ནོར་གྱི་ཕུང་པོ་ཆེན་པོ་སྒྲུབ་པར་འདོད་ན།

འོ་མ་ཅན་གྱི་ཤིང་གི་སྦར་ཤིང་གིས་མེ་བུས་ལ་བསྲེག་བྱ་ཏིལ་དག་ལན་སྟོང་སྦྱིན་སྲེག་བྱའོ།

སྡིག་པ་ཇི་སྙེད་པ་ཐམས་ཅད་སྦྱང་བར་འདོད་པ་དང་།

རིག་

སྔགས་ཐམས་ཅད་གྲུབ་པར་འདོད་པ་དང་།

བདག་བཀྲུ་བར་འདོད་པས།

ཤུ་ཏི་དང་།

ན་ལ་ད་དང་།

ཁྲེ་དང་།

ཤི་རི་ཤ་དང་།

རྒྱ་སྤོས་དང་།

གུར་གུམ་དང་།

གླ་སྒང་དང་།

ཨིན་དྲ་བ་རུ་ན་དང་།

བྱང་ཆུབ་ཀྱི་ཤིང་དང་།

ཨ་མྲའི་མགོ་ལྕོགས་དང་།

འདི་རྣམས་ཀྱིས་བཀྲུ་བར་བྱ་སྟེ།

སངས་རྒྱས་ཀྱི་སྤྱན་སྔར་ཉིན་ཞག་གཅིག་སྨྱུང་བར་བྱ་ཞིང་བུམ་པ་སར་པ་བཞག་སྟེ།

ཟླ་བ་ཉ་བ་ལ་སངས་རྒྱས་ཀྱི་གཟུགས་ཀྱི་སྤྱན་སྔར་སྙིང་པོ་ལན་སྟོང་རྩ་བརྒྱད་སྔགས་ལ་ཁྲུས་བྱའོ།

དུག་མི་གདུག་པར་བྱེད་པར་འདོད་པས་སངས་རྒྱས་ཀྱི་སྤྱན་སྔར་སེང་ལྡེང་གི་ཐུར་མ་བའི་ལྕི་བར་སྨྱུགས་པ་བརྒྱ་རྩ་བརྒྱད་མིང་ནས་སྨོས་ཏེ་སྦྱིན་སྲེག་བྱས་ན་དུག་མི་གདུག་པར་འགྱུར་རོ།

གདོན་བསྲུང་བ་དང་།

འབྱུང་པོ་ལ་སོགས་པའི་ལས་ཐམས་ཅད་ལ་ཡང་སྦྱར་བར་བྱས་ན་བདེ་བར་གནས་པར་འགྱུར་རོ།

དེ་ནས་དེ་བཞིན་གཤེགས་པ་ལོག་པར་དད་སེལ་སྟེང་གི་ནམ་མཁའ་ལ་བཞུགས་ཏེ།

སེམས་ཅན་ཐམས་ཅད་ལ་ཕན་པའི་དོན་དང་།

ནད་ཐམས་ཅད་རབ་ཏུ་ཞི་བར་བྱ་བའི་ཕྱིར་དང་།

འབྱུང་པོ་ཐམས་ཅད་བཟློག་པའི་ཕྱིར་གསང་སྔགས་ཀྱི་གཞི་འདི་དག་བཀའ་སྩལ་ཏོ།

ན་མོ་བུད་དྷཱ་ཡ།

ན་མོ་དྷརྨཱ་ཡ།

ན་མོཿསཾ་གྷཱ་ཡ།

ན་མཿཀྲ་ཀུ་ཙྪན་དཱ་ཡ།

ཏ་ཐཱ་ག་ཏཱ་ཡ།

ཨར་ཧ་ཏེ་སཾ་མྱཀ་སཾ་བུད་དྷཱ་ཡ།

ཨོཾ་ཀ་ཊ་ཀ་ཊ།

ཀ་ཋ་ཀ་ཋ།

ཀི་ཊི་ཀི་ཊི།

ཀི་ཋི་ཀི་ཋི།།

ཀི་ཏཱ་པ་ཡ་ན་མཿསྭཱ་ཧཱ།

ནམ་མཁའི་སྙིང་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལོག་པར་དད་སེལ་ཅེས་བྱ་བ་གང་གཱའི་ཀླུང་གི་བྱེ་མ་སྙེད་དག་གིས་གསུངས་ཤིང་རྗེས་སུ་ཡི་རངས་པའི་སྙིང་པོ་འདི་ཁྱོད་ཀྱིས་ཟུང་ཤིག །

བླངས་ཤིང་བཟུང་སྟེ་ཀུན་ཆུབ་པར་བྱས་ན་ཕྱི་མའི་ཚེ་དགེ་སློང་དང་།

དགེ་སློང་མ་དང་།

དགེ་བསྙེན་དང་།

དགེ་བསྙེན་མ་དག་དེའི་ཚེ་དཀོན་མཆོག་གསུམ་ལ་དད་པ་རྙེད་ནས་ཁྲུས་བྱས་ཏེ།

བཅོམ་ལྡན་འདས་ལ་མེ་ཏོག་དང་།

བདུག་པ་དང་།

སྤོས་དག་གིས་མཆོད་པ་བྱས་ནས་གསང་སྔགས་འདི་ལན་བརྒྱ་རྩ་བརྒྱད་བརྗོད་པར་གྱུར་ན།

ཚེ་རབས་བདུན་

དུ་ཚེ་རབས་དྲན་པར་འགྱུར་རོ།

ལྷ་རྣམས་ཀྱི་ནང་དུ་ལྷའི་ཆེ་བ་ཉིད་ཐོབ་པར་འགྱུར་རོ།

ཡང་མི་རྣམས་ཀྱི་ནང་དུ་འཁོར་ལོས་སྒྱུར་བའི་རྒྱལ་པོར་འགྱུར་རོ།

ཡང་ན་ཆོ་ག་བཞིན་དུ་བསྒྲུབས་ན་དེ་མིར་སྐྱེ་བ་ཐ་མ་ཐོབ་པར་འགྱུར་ཏེ།

འདི་ནས་ཤི་འཕོས་ནས་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་ཏེ།

ཚེ་འདི་ལ་ཡང་རྟག་ཏུ་བརྗོད་ན་ནད་ཐམས་ཅད་ལས་ཐར་བར་འགྱུར་རོ།

ཐོས་པ་འཛིན་པར་འགྱུར་རོ།

ཟས་དང་སྐོམ་གྱི་རྣམ་པ་ལ་ལན་བདུན་བསྔགས་ཏེ།

ཟོས་འཐུངས་ན་ནད་ཐམས་ཅད་ལས་ཐར་བར་འགྱུར་རོ།

ཇི་སྟེ་སྐོམ་ཞི་བར་འདོད་ན་བཟའ་བ་ཐམས་ཅད་ལ་ལན་སྟོང་རྩ་བརྒྱད་ཀྱིས་བཀྲུ་བར་བྱའོ།

ལྷོག་རྒལ་གཅོད་ན་ཟངས་ཁབ་ཀྱིས་བྱའོ།

འཐབ་པ་དང་།

རྩོད་པ་དང་།

འཆིང་བ་ཐམས་ཅད་ལས་ཐར་བར་བྱ་ན་ལན་བདུན་བཟླས་བརྗོད་བྱ་སྟེ།

རྟག་ཏུ་ནོར་ཡང་འཕེལ་བར་འགྱུར།

བགེགས་དང་ལོག་འདྲེན་ཐམས་ཅད་ལས་ཀྱང་ཐར་བར་འགྱུར་རོ།

ཇི་སྟེ་དེ་བཞིན་གཤེགས་པ་མཐོང་བར་འདོད་ན་དེས་ཕྱོགས་གཙང་མར་མཆོད་རྟེན་གྱི་འཁོར་སར་དཀྱིལ་འཁོར་བསྐུས་ལ།

ཨ་ག་རུས་བདུགས་ཏེ།

ལན་སྟོང་རྩ་བརྒྱད་བཟླས་བརྗོད་བྱས་ན།

དེའི་དྲུང་དུ་སྔས་ཤར་ཕྱོགས་སུ་བསྟན་ཏེ་ཉལ་ན་དེ་བཞིན་གཤེགས་པ་མཐོང་བར་འགྱུར་རོ།

ཡིད་ལ་ཅི་སྨོན་པ་དེ་ཐམས་ཅད་སྟོན་ཏོ།

ཚེའམ་སྟོབས་སམ་ཕམ་རྒྱལ་ཐམས་ཅད་ཀྱང་སྟོན་ཏོ།

དེ་ནས་དེ་བཞིན་གཤེགས་པ་གསེར་ཐུབ་སྟེང་གི་ནམ་མཁའ་ལ་བཞུགས་ཏེ།

སེམས་ཅན་ཐམས་ཅད་ལ་ཕན་པའི་དོན་དང་།

ནད་ཐམས་ཅད་རབ་ཏུ་ཞི་བར་བྱ་བ་དང་།

འབྱུང་པོ་ཐམས་ཅད་བཟློག་པའི་ཕྱིར་གསང་སྔགས་ཀྱི་གཞི་འདི་དག་བཀའ་སྩལ་ཏོ།

ན་མོ་བུད་དྷཱ་ཡ།

ན་མོ་དྷརྨཱ་ཡ།

ན་མཿསཾ་གྷཱ་ཡ།

ན་མཿཀ་ན་ཀ་མུ་ན་ཡེ།

ཏ་ཐཱ་ག་ཏཱ་ཡ།

ཨརྷ་ཏེ་སཾ་མྱཀ་སཾ་བུད་དྷཱ་ཡ།

ཏདྱ་ཐཱ།

ཨོཾ་ས་ར་ས་ར་ས་ར་ས་ར།

སི་རི་སི་རི་སི་རི་སི་རི།

སཱི་རཱ་ཡ།

དྷ་མ་དྷ་མ་དྷ་མ་དྷ་མ།

དྷུ་མ་དྷུ་མ་དྷུ་མ་དྷུ་མ།

དྷུ་མཱ་ཡ།

ན་མོ་ན་མཿཀ་ན་ཀ་མུ་ན་ཡེ།

ཏ་ཐཱ་ག་ཏཱ་ཡ་ཨརྷ་ཏེ་སཾ་མྱཀ་

སཾ་བུད་དྷཱ་ཡ་སྭཱ་ཧཱ།

དེ་ནས་དེ་བཞིན་གཤེགས་པ་གསེར་ཐུབ་ཀྱིས་བྱང་ཆུབ་སེམས་དཔའ་ནམ་མཁའི་སྙིང་པོ་ལ་འདི་སྐད་ཅེས་བཀའ་སྩལ་ཏོ།

ནམ་མཁའི་སྙིང་པོ་གང་ལ་ལ་ཞིག་སྙིང་པོ་འདི་འཛིན་ཅིང་རྟག་ཏུ་བཟླས་བརྗོད་བྱེད་པ་དེ་ལ་མཚོན་གྱི་འཇིགས་པ་མི་འབྱུང་།

མེ་དང་།

ཆུ་དང་།

ལྕེ་འབབ་པས་འཆི་བའི་དུས་བྱེད་པར་མི་འགྱུར།

དུག་ཐམས་ཅད་ཀྱང་ཟས་དང་འདྲ་བར་ཐུབ་པར་འགྱུར།

དུས་མ་ཡིན་པར་འཆི་བས་འཆི་བའི་དུས་བྱེད་པར་མི་འགྱུར།

གཤིས་ངན་དུ་འཆི་བར་མི་འགྱུར།

ཚེ་རིང་བར་འགྱུར།

ལོངས་སྤྱོད་ཆེ་བར་འགྱུར།

རྟག་ཏུ་དེ་བཞིན་གཤེགས་པ་དང་ལྡན་པར་འགྱུར།

དེ་བཞིན་གཤེགས་པས་བྱིན་གྱིས་བརླབ་པར་འགྱུར་རོ།

དུས་གསུམ་དུ་བཟླས་བརྗོད་བྱས་ན།

སྔོན་གྱི་ལས་ཀྱི་སྒྲིབ་པར་གྱུར་པ་ཐམས་ཅད་བྱང་བར་འགྱུར་རོ།

ཅི་སྟེ་ཕ་རོལ་ནད་ལས་ཐར་བར་བྱེད་པར་འདོད་ན་ཅི་ནུས་སུ་གཏོར་མ་གཏོང་ཞིང་པོག་གམ།

ཨ་ག་རུའི་བདུག་པས་བདུགས་ལ་གཟའ་ཐམས་ཅད་ལ་ཁྲུས་བྱའོ།

མཛེ་དང་སྐྲངས་ནད་དང་མཆིན་སྐྲན་ལ་ཤུ་དག་འཇམ་པོ་བཏགས་པ་སྦྲང་རྩི་དང་བསྲེས་ཏེ།

སངས་རྒྱས་བཅོམ་ལྡན་འདས་ཀྱི་སྤྱན་སྔར་ལན་སྟོང་རྩ་བརྒྱད་བསྔགས་ཏེ་བསྐུས་ན་མཛེ་ནད་ཐམས་ཅད་སོས་པར་འགྱུར་རོ།

ཞག་བཞི་པ་ལ་སངས་རྒྱས་བཅོམ་ལྡན་འདས་ཀྱི་སྤྱན་སྔར་སྣ་མའི་མེ་ཏོག་གི་ཕྲེང་བ་ལ་ལན་སྟོང་རྩ་བརྒྱད་བསྔགས་ཏེ།

མིའི་མགོ་ལ་བཅིངས་ན་ཞག་བཞི་པའི་རིམས་སོས་པར་འགྱུར་རོ།

མཚོན་བཏབ་པའི་རྣ་བར་བཟླས་བརྗོད་བྱས་ན་བརྗེད་བྱེད་ལས་ཐར་བར་འགྱུར་རོ།

ལུས་སྲུལ་པོས་ཟིན་པ་རྣམས་ལ་སངས་རྒྱས་ལ་ཕུལ་བའི་མེ་ཏོག་གིས་བདུག་གོ།

དེ་ལ་སོགས་པའི་ལས་རྣམས་བྱེད་དེ།

ལས་ཐམས་ཅད་བྱེད་པ་ཞེས་བྱའོ།

དེ་ནས་དེ་བཞིན་གཤེགས་པ་འོད་སྲུང་སྟེང་གི་ནམ་མཁའ་ལ་བཞུགས་ཏེ།

སེམས་ཅན་ཐམས་ཅད་ལ་ཕན་པའི་དོན་དང་།

ནད་ཐམས་ཅད་རབ་ཏུ་ཞི་བར་བྱ་བ་དང་།

འབྱུང་པོ་ཐམས་ཅད་བཟློག་པའི་ཕྱིར་གསང་སྔགས་ཀྱི་གཞི་འདི་དག་བཀའ་སྩལ་ཏོ།

ན་མོ་བུད་དྷཱ་ཡ།

ན་

མོ་དྷརྨཱ་ཡ།

ན་མཿསཾ་གྷཱ་ཡ།

ཨོཾ་ཧ་ར་ཧ་ར་ཧ་ར།

ཧ་ཧ་ཧ།

ན་མཿཀཱ་ཤྱ་པཱ་ཡ།

ཏ་ཐཱ་ག་ཏཱ་ཡ།

ཨརྷ་ཏེ་སཾ་མྱཀ་སཾ་བུད་དྷཱ་ཡ།

སིདྷྱན་ཏུ་མན་ཏྲ་པ་དཻཿསྭཱ་ཧཱ།

དེ་ནས་དེ་བཞིན་གཤེགས་པ་འོད་སྲུང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་འདི་སྐད་ཅེས་བཀའ་སྩལ་ཏོ།

ནམ་མཁའི་སྙིང་པོ་སྙིང་པོ་འདི་ནི་སངས་རྒྱས་བཅོམ་ལྡན་འདས་གང་གཱའི་ཀླུང་སུམ་ཅུ་རྩ་གཉིས་ཀྱི་བྱེ་མ་སྙེད་དག་གིས་གསུངས་པ་སྟེ།

ནམ་མཁའི་སྙིང་པོ་སྙིང་པོ་འདི་ཁྱོད་ཀྱིས་ཟུང་ཤིག །

ཀུན་ཆུབ་པར་གྱིས་ཤིག །

གང་ལ་ལ་ཞིག་འཛིན་ཏམ།

ཀློག་གམ།

ཀུན་ཆུབ་པར་བྱེད་དམ།

ཉིན་མོའམ།

མཚན་མོ་ལན་གསུམ་གསུམ་བཟླས་རྗོད་བྱེད་ན་མདོར་ན་རྨི་ལམ་ན་དེ་བཞིན་གཤེགས་པ་མཐོང་བར་འགྱུར་རོ།

དེའི་ལས་ཀྱི་སྒྲིབ་པ་ཐམས་ཅད་ཀྱང་བྱང་བར་འགྱུར་ཏེ།

སྔོན་གྱི་ལས་ནི་མ་གཏོགས་སོ།

ལས་ཐམས་ཅད་ལ་ཡང་སྦྱར་བར་བྱའོ།

མཛེ་དང་ཤ་བཀྲ་ལ་སོགས་པ་ལ་སངས་རྒྱས་ལ་ཕུལ་བའི་མེ་ཏོག་ལ་སངས་རྒྱས་ཀྱི་སྤྱན་སྔར་ལན་སྟོང་རྩ་བརྒྱད་བསྔགས་ཏེ་བཀླགས་ཤིང་བཀྲུས་ན་སོས་པར་འགྱུར་རོ།

ཀླད་པ་ན་བ་ལ་སངས་རྒྱས་ལ་ཕུལ་བའི་མེ་ཏོག་སངས་རྒྱས་ཀྱི་སྤྱན་སྔར་བཞག་སྟེ།

སངས་རྒྱས་ཀྱི་སྤྱན་སྔར་ལན་སྟོང་རྩ་བརྒྱད་བཟླས་བརྗོད་བྱའོ།

ཐམས་ཅད་དུ་ཡང་སྦྱར་བར་བྱའོ།

དེ་ནས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་སྟེང་གི་ནམ་མཁའ་ལ་བཞུགས་ཏེ།

སེམས་ཅན་ཐམས་ཅད་ལ་ཕན་པའི་དོན་གྱི་ཕྱིར་རིག་སྔགས་འདི་དག་བཀའ་སྩལ་ཏོ།

ན་མོ་བུད་དྷཱ་ཡ།

ན་མོ་དྷརྨཱ་ཡ།

ན་མཿསཾ་གྷཱ་ཡ།

ཏདྱ་ཐཱ།

གྷུ་མེ་གྷུ་མེ་མ་ཧཱ་གྷུ་མེ།

ཏ་ལེ་ཏ་ལེ་མ་ཧཱ་ཏ་ལེ།

ཙ་ལེ་ཙ་ལེ་མ་ཧཱ་ཙ་ལེ།

དྷུ་རེ་དྷུ་རེ་མ་ཧཱ་དྷུ་རེ།

ཏི་རི་ཏི་རི་མ་ཧཱ་ཏི་རི།

ཀི་ལི་ཀི་ལི་མ་ཧཱ་ཀི་ལི།

ཙུ་རུ་ཙུ་རུ་མ་ཧཱ་ཙུ་རུ།

མི་ལི་མི་ལི་མ་ཧཱ་མི་ལི།

ཏི་ལི་ཏི་ལི་མ་ཧཱ་ཏི་ལི།

དྷུ་མེ་དྷུ་མེ་མ་ཧཱ་དྷུ་མེ།

ཙ་ལེ་ཙ་ལེ་མ་ཧཱ་ཙ་ལེ།

ཁི་རི་ཁི་རི་མ་ཧཱ་ཁི་རི།

ཙི་ལི་ཙི་ལི་མ་ཧཱ་ཙི་ལི་སྭཱ་ཧཱ།

དེ་ནས་དེ་བཞིན་གཤེགས་པ་ཤཱཀྱ་ཐུབ་པས་བྱང་ཆུབ་སེམས་

དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་འདི་སྐད་ཅེས་བཀའ་སྩལ་ཏོ།

ནམ་མཁའི་སྙིང་པོ་ཀླད་པའི་ནད་བསལ་ན་མཚོན་དང་ལག་མཐིལ་གྱིས་བྱའོ།

སྤྲིན་བཟློག་ན་ཤིང་ཀ་ར་བཱི་རའི་ལྕུག་མས་བྱའོ།

དུག་སྤོ་ན་ཆུས་བྱའོ།

ལས་གཞན་རྣམས་ཀྱང་བྱའོ།

ཁྲུས་ཀྱི་ཆོ་གས་སྦྱར་བར་བྱའོ།

ཆོ་ག་ཐམས་ཅད་ཀྱིས་དུས་ཐམས་ཅད་དུ་སྦྱར་བར་བྱའོ།

བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས།

བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ཡི་རངས་ཏེ།

བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།

འཕགས་པ་སངས་རྒྱས་བདུན་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།།

རྒྱ་གར་སྐད་དུ།

ཨཱརྱ་ཨཥྚ་བུད་དྷ་ཀཾ་ནཱ་མ་མ་ཧཱ་ཡཱ་ན་སཱུ་ཏྲ།

བོད་སྐད་དུ།

འཕགས་པ་སངས་རྒྱས་བརྒྱད་པ་ཞེས་བྱ་བ་ཐེག་པ་ཆེན་པོའི་མདོ།

སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ།

འདི་སྐད་བདག་གིས་ཐོས་པ་དུས་གཅིག་ན།

བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན།

དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་ཏེ།

ཐམས་ཅད་ཀྱང་དགྲ་བཅོམ་པ།

ཟག་པ་ཟད་པ།

ཉོན་མོངས་པ་མེད་པ།

དབང་དང་ལྡན་པར་གྱུར་པ།

སེམས་ཤིན་ཏུ་རྣམ་པར་གྲོལ་བ།

ཤེས་རབ་ཤིན་ཏུ་རྣམ་པར་གྲོལ་བ།

ཅང་ཤེས་པ།

གླང་པོ་ཆེན་པོ་བྱ་བ་བྱས་པ།

བྱེད་པ་བྱས་པ།

ཁུར་བོར་བ།

རང་གི་དོན་རྗེས་སུ་ཐོབ་པ།

སྲིད་པ་ཀུན་ཏུ་སྦྱོར་བ་ཡོངས་སུ་ཟད་པ།

ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ།

སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་སོན་པ་ཤ་སྟག་སྟེ།

གང་ཟག་གཅིག་མ་གཏོགས་པ་ནི་འདི་ལྟ་སྟེ།

ཚེ་དང་ལྡན་པ་ཀུན་དགའ་བོའོ།

དེའི་ཚེ་ཚེ་དང་ལྡན་པ་ཤཱ་རིའི་བུ་འཁོར་དེ་ཉིད་དུ་འདུས་པར་གྱུར་ཏེ་འདུག་གོ།

དེ་ནས་དེའི་མོད་ལ་སྟོང་གསུམ་གྱི་སྟོང་ཆེན་པོའི་

འཇིག་རྟེན་གྱི་ཁམས་འདི་ཡང་རྣམ་པ་དྲུག་ཏུ་གཡོས།

མ་དཀྲོལ་བར་བར་སྣང་ལས་སིལ་སྙན་བྱེ་བ་ཁྲག་ཁྲིག་བརྒྱ་སྟོང་གི་སྒྲ་དག་ཀྱང་བྱུང་།

ལྷའི་མེ་ཏོག་མན་དཱ་ར་བ་དང་།

མན་དཱ་ར་བ་ཆེན་པོ་དང་།

མན་ཛུ་ཤ་ཀ་དང་།

མན་ཛུ་ཤ་ཀ་ཆེན་པོའི་མེ་ཏོག་གི་ཆར་ཡང་བབ་སྟེ།

རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ཐམས་ཅད་རིན་པོ་ཆེའི་མེ་ཏོག་གི་ཆལ་པས་གང་བར་གྱུར་ཏོ།

དེ་ནས་དེའི་མོད་ལ་ཐམས་ཅད་དང་ལྡན་པའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་གསེར་གྱི་ཁ་དོག་གི་སྣང་བ་ཆེན་པོས་ཁྱབ་པར་གྱུར་ཏོ།

དེ་ནས་དེའི་མོད་ལ་ཤར་ཕྱོགས་ནས་པད་མ་སྡོང་པོ་ནི་གསེར།

འདབ་མ་ནི་དངུལ།

ཟེའུ་འབྲུ་ནི་བཻ་དཱུརྱ།

སྙིང་པོ་ནི་རྡོའི་སྙིང་པོ་ལས་གྲུབ་པ་བརྒྱད་ཅིག་བྱུང་བར་གྱུར་ཏོ།

པད་མའི་སྙིང་པོ་ཐམས་ཅད་ཀྱི་སྟེང་ན་སེང་གེའི་ཁྲི་གྲུ་བཞི་པ།

རྩ་བ་བཞི་ཟུག་པ།

བཀྲ་བ།

བལྟ་ན་སྡུག་པ།

དྲི་དང་ལྡན་པ།

ཡིད་དུ་འོང་བ།

དར་གྱི་ལྡ་ལྡི་སྦྱངས་པ།

པོག་པོར་ནས་སྤོས་ཀྱི་དྲིས་ཤིན་ཏུ་བདུགས་པ།

རིན་པོ་ཆེ་སྣ་ཚོགས་དུ་མ་དག་གིས་ལེགས་པར་བརྒྱན་པ།

དྲིལ་བུ་གཡེར་ཀའི་དྲ་བ་དུ་མ་འཁྲོལ་བ།

རིན་པོ་ཆེ་དུ་མའི་བླ་རེ་བྲེས་པ་དག་བྱུང་བར་གྱུར་ཏོ།

སེང་གེའི་ཁྲི་ཐམས་ཅད་ཀྱི་སྟེང་ན་དེ་བཞིན་གཤེགས་པའི་སྐུ་དག་ཀྱང་བཞུགས་པར་ཡང་སྣང་སྟེ།

མཛེས་པ།

བལྟ་ན་སྡུག་པ།

དབང་པོ་ཞི་བ།

ཐུགས་ཞི་བ།

དུལ་བ་དང་ཞི་གནས་མཆོག་བརྙེས་པ།

དུལ་བ་དང་ཞི་གནས་དམ་པ་བརྙེས་པ།

དབང་པོ་བསྲུངས་ཤིང་ཐུལ་བ།

གླང་པོ་ཤིན་ཏུ་དུལ་བ་ལྟ་བུ།

མཚོ་ལྟར་དངས་ཤིང་རྙོག་པ་མེད་ལ་གསལ་བ།

སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་པོ་དེ་དག་གིས་སྐུ་ལེགས་པར་བརྒྱན་པ།

གསེར་གྱི་ཁ་དོག་ལྟ་བུའི་སྐུས་ཉི་མ་དང་ཟླ་བའི་གཟི་བརྗིད་ཟིལ་གྱིས་མནན་ཏེ་བཞུགས་པ།

སྤྱོད་ལམ་བརྒྱ་སྟོང་དུ་མ་དང་ལྡན་པ།

སྐུ་མདོག་བལྟ་བས་ཆོག་མི་ཤེས་པ་དག་སྣང་ངོ་།

དེ་ནས་སངས་རྒྱས་ཀྱི་མཐུས་ཚེ་དང་ལྡན་པ་ཤཱ་རིའི་བུ་སྟན་

ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས།

པུས་མོ་གཡས་པའི་ལྷ་ང་ས་ལ་བཙུགས་ཏེ།

བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་ཤར་ཕྱོགས་ནས་པད་མ་སྡོང་པོ་ནི་གསེར།

འདབ་མ་ནི་དངུལ།

ཟེའུ་འབྲུ་ནི་བཻ་དཱུརྱ།

སྙིང་པོ་ནི་རྡོའི་སྙིང་པོ་ལས་གྲུབ་པ་བརྒྱད་པོ་འདི་དག་བྱུང་བར་གྱུར་ཏེ།

པད་མའི་སྙིང་པོ་ཐམས་ཅད་ཀྱི་སྟེང་ན་སེང་གེའི་ཁྲི་གྲུ་བཞི་པ།

རྩ་བ་བཞི་ཟུག་པ།

བཀྲ་བ།

བལྟ་ན་སྡུག་པ།

དྲི་དང་ལྡན་པ།

ཡིད་དུ་མཆི་བ།

དར་གྱི་ལྡ་ལྡི་སྤྱངས་པ།

པོག་པོར་ནས་སྤོས་ཀྱི་དྲིས་ཤིན་ཏུ་བདུགས་པ།

རིན་པོ་ཆེ་སྣ་ཚོགས་དུ་མས་ལེགས་པར་བརྒྱན་པ།

དྲིལ་བུ་གཡེར་ཀའི་དྲ་བ་དུ་མ་འཁྲོལ་བ།

རིན་པོ་ཆེ་དུ་མའི་བླ་རེ་བྲེས་པ་དག་བྱུང་བར་གྱུར་པ།

སེང་གེའི་ཁྲི་ཐམས་ཅད་ཀྱི་སྟེང་ན།

དེ་བཞིན་གཤེགས་པའི་སྐུ་དག་བཞུགས་པར་ཡང་གདའ་སྟེ།

མཛེས་པ།

བལྟ་ན་སྡུག་པ།

དབང་པོ་ཞི་བ།

ཐུགས་ཞི་བ།

དུལ་བ་དང་ཞི་གནས་མཆོག་བརྙེས་པ།

དུལ་བ་དང་ཞི་གནས་དམ་པ་བརྙེས་པ།

དབང་པོ་བསྲུངས་ཤིང་ཐུལ་བ།

གླང་པོ་ཆེ་ཤིན་ཏུ་དུལ་བ་ལྟ་བུ།

མཚོ་ལྟར་དངས་ཤིང་རྙོག་པ་མེད་ལ་གསལ་བ།

སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་པོ་དག་གིས་སྐུ་ལེགས་པར་བརྒྱན་པ།

གསེར་གྱི་ཁ་དོག་ལྟ་བུའི་སྐུས་ཉི་མ་དང་ཟླ་བའི་གཟི་བརྗིད་ཟིལ་གྱིས་མནན་ཏེ་བཞུགས་པ།

སྤྱོད་ལམ་བརྒྱ་སྟོང་དུ་མ་དང་ལྡན་པ།

སྐུ་མདོག་བལྟ་བས་ཆོག་མི་ཤེས་པ་དག་གདའ་བའི་རྒྱུ་གང་ལགས་རྐྱེན་གང་ལགས།

དེ་སྐད་ཅེས་གསོལ་པ་དང་།

བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ།

ཤཱ་རིའི་བུ་ཁྱོད་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་བཤད་དོ།

ཚེ་དང་ལྡན་པ་ཤཱ་རིའི་བུས་བཅོམ་ལྡན་འདས་དེ་བཞིན་ནོ་ཞེས་གསོལ་ནས།

བཅོམ་ལྡན་འདས་ཀྱི་ལྟར་ཉན་པ་དང་།

བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ།

ཤཱ་རིའི་བུ་སངས་རྒྱས་ཀྱི་ཞིང་འདི་ནས་

ཤར་ཕྱོགས་ལོགས་སུ་སངས་རྒྱས་ཀྱི་ཞིང་གང་གཱའི་ཀླུང་གཅིག་གི་བྱེ་མ་སྙེད་འདས་པ་ན་འཇིག་རྟེན་གྱི་ཁམས་གཞན་གྱིས་མི་ཐུབ་པ་ཞེས་བྱ་བ་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤིན་ཏུ་ཡོངས་བསྒྲགས་དཔལ་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ།

ཤཱ་རིའི་བུ་སངས་རྒྱས་ཀྱི་ཞིང་འདི་ནས་ཤར་ཕྱོགས་ལོགས་སུ་སངས་རྒྱས་ཀྱི་ཞིང་གང་གཱའི་ཀླུང་གཉིས་ཀྱི་བྱེ་མ་སྙེད་འདས་པ་ན་འཇིག་རྟེན་གྱི་ཁམས་ཡིད་འོང་དགའ་ཞེས་བྱ་བ་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབང་པོའི་ཏོག་གི་རྒྱལ་མཚན་གྱི་རྒྱལ་པོ་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ།

ཤཱ་རིའི་བུ་སངས་རྒྱས་ཀྱི་ཞིང་འདི་ནས་ཤར་ཕྱོགས་ལོགས་སུ་སངས་རྒྱས་ཀྱི་ཞིང་གང་གཱའི་ཀླུང་གསུམ་གྱི་བྱེ་མ་སྙེད་འདས་པ་ན་འཇིག་རྟེན་གྱི་ཁམས་སྡུག་དགའ་ཞེས་བྱ་བ་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤིན་ཏུ་རྣམ་པར་གནོན་པ་གྲགས་མཆོག་དཔལ་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ།

ཤཱ་རིའི་བུ་སངས་རྒྱས་ཀྱི་ཞིང་འདི་ནས་ཤར་ཕྱོགས་ལོགས་སུ་སངས་རྒྱས་ཀྱི་ཞིང་གང་གཱའི་ཀླུང་བཞིའི་བྱེ་མ་སྙེད་འདས་པ་ན་འཇིག་རྟེན་གྱི་ཁམས་སྒོ་ཀུན་ནས་འཇུག་པ་ཞེས་བྱ་བ་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཡུལ་ལས་ཤིན་ཏུ་རྣམ་པར་རྒྱལ་བའི་རྩལ་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ།

ཤཱ་རིའི་བུ་སངས་རྒྱས་ཀྱི་ཞིང་འདི་ནས་ཤར་ཕྱོགས་ལོགས་སུ་སངས་རྒྱས་ཀྱི་ཞིང་གང་གཱའི་ཀླུང་ལྔའི་བྱེ་མ་སྙེད་འདས་པ་ན་འཇིག་རྟེན་གྱི་ཁམས་རྣམ་དག་བརྩེགས་པ་ཞེས་བྱ་བ་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་བཀོད་པའི་དཔལ་ཀུན་ཏུ་སྣང་བ་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་

སྟོན་ཏོ།

ཤཱ་རིའི་བུ་སངས་རྒྱས་ཀྱི་ཞིང་འདི་ནས་ཤར་ཕྱོགས་ལོགས་སུ་སངས་རྒྱས་ཀྱི་ཞིང་གང་གཱའི་ཀླུང་དྲུག་གི་བྱེ་མ་སྙེད་འདས་པ་ན་འཇིག་རྟེན་གྱི་ཁམས་འགྱུར་མེད་ལྡན་ཞེས་བྱ་བ་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་གྱི་རྒྱལ་པོ་དཔལ་ཐོགས་པ་མེད་པ་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ།

ཤཱ་རིའི་བུ་སངས་རྒྱས་ཀྱི་ཞིང་འདི་ནས་ཤར་ཕྱོགས་ལོགས་སུ་སངས་རྒྱས་ཀྱི་ཞིང་གང་གཱའི་ཀླུང་བདུན་གྱི་བྱེ་མ་སྙེད་འདས་པ་ན་འཇིག་རྟེན་གྱི་ཁམས་སྤོབས་པ་བརྩེགས་པ་གང་བ་ཞེས་བྱ་བ་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་པད་མ་ལས་རྣམ་པར་གནོན་པས་བཞུད་པ་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ།

ཤཱ་རིའི་བུ་སངས་རྒྱས་ཀྱི་ཞིང་འདི་ནས་ཤར་ཕྱོགས་ལོགས་སུ་སངས་རྒྱས་ཀྱི་ཞིང་གང་གཱའི་ཀླུང་བརྒྱད་ཀྱི་བྱེ་མ་སྙེད་འདས་པ་ན་འཇིག་རྟེན་གྱི་ཁམས་སྒྲ་དབྱངས་སྙན་པ་ཞེས་བྱ་བ་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་པད་མ་ལ་རབ་ཏུ་གནས་པ་སཱ་ལའི་རྒྱལ་པོ་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ།

ཤཱ་རིའི་བུ་སངས་རྒྱས་བཅོམ་ལྡན་འདས་དེ་དག་གི་སངས་རྒྱས་ཀྱི་ཞིང་དག་ནི་ཡོངས་སུ་དག་པ་སྟེ།

སྙིགས་མ་ལྔ་མེད་དོ།

ཡ་མཚན་ཅན་ཐམས་ཅད་མེད་དོ།

གསེག་མ་དང་གྱོ་མོ་དག་མེད་དོ།

ཉེ་བའི་ཉོན་མོངས་པ་མེད་དོ།

བུད་མེད་མེད་དོ།

དུད་འགྲོ་དང་གཤིན་རྗེའི་འཇིག་རྟེན་ཡང་མེད་དོ།

སྦྲང་བུ་དང་།

ཤ་སྦྲང་དང་།

སྡིག་སྦྲུལ་གྱིས་རེག་པ་རྣམས་མེད་དོ།

ཤཱ་རིའི་བུ་རིགས་ཀྱི་བུའམ་རིགས་ཀྱི་བུ་མོ་གང་དག་སངས་རྒྱས་བཅོམ་ལྡན་འདས་དེ་དག་གི་མཚན་ཉན་པ་དང་།

འཛིན་པ་དང་།

འཆང་བ་དང་།

ཀློག་པ་དང་།

སྟོན་པ་དང་།

རབ་ཏུ་འདོན་པ་དང་།

ཀུན་ཆུབ་པར་བྱེད་པ་དེ་དག་ངན་སོང་གསུམ་དུ་འགྲོ་བ་དེ་ནི་གནས་མ་ཡིན་ཞིང་གོ་སྐབས་

མེད་དེ།

ཤཱ་རིའི་བུ་དེ་དག་སེམས་ཅན་དམྱལ་བའམ།

དུད་འགྲོའི་སྐྱེ་གནས་སམ།

གཤིན་རྗེའི་འཇིག་རྟེན་དུ་འགྲོ་བ་དེ་ནི་གནས་མེད་དེ།

མཚམས་མེད་པ་བྱེད་པ་དང་།

དམ་པའི་ཆོས་སྤོང་བའི་གང་ཟག་ནི་མ་གཏོགས་ཏེ།

དེ་ཡང་ཆུང་ངུ་མྱོང་ཞིང་མང་དུ་མྱོང་བར་མི་འགྱུར་རོ།

ཤཱ་རིའི་བུ་རིགས་ཀྱི་བུའམ་རིགས་ཀྱི་བུ་མོ་གང་སངས་རྒྱས་བཅོམ་ལྡན་འདས་དེ་དག་གི་མཚན་ཉན་པ་དང་།

འཛིན་པ་དང་།

འཆང་བ་དང་།

ཀློག་པ་དང་།

སྟོན་པ་དང་།

རབ་ཏུ་འདོན་པ་དང་།

ཀུན་ཆུབ་པར་བྱེད་པ་དེ་བྱང་ཆུབ་ཀྱི་སྙིང་པོ་ལ་ཐུག་གི་བར་དུ་ནམ་ཡང་མངོན་པར་ཤེས་པ་དང་བྲལ་བར་མི་འགྱུར།

ནམ་ཡང་མཚན་དང་བྲལ་བར་མི་འགྱུར།

ནམ་ཡང་གཟུངས་དང་བྲལ་བར་མི་འགྱུར།

ནམ་ཡང་དབང་པོ་མ་ཚང་བར་མི་འགྱུར།

ནམ་ཡང་སྒྲ་དབྱངས་ཤིན་ཏུ་རྒྱས་པ་དང་བྲལ་བར་མི་འགྱུར།

ནམ་ཡང་རྔ་སྒྲའི་དབྱངས་དང་བྲལ་བར་མི་འགྱུར།

ནམ་ཡང་སྦྱིན་གནས་དང་ཕྱིར་མི་ལྡོག་པ་དང་བྲལ་བར་མི་འགྱུར།

ནམ་ཡང་བྱང་ཆུབ་ཀྱི་ཡན་ལག་གི་མེ་ཏོག་དང་བྲལ་བར་མི་འགྱུར།

ནམ་ཡང་ཐེག་པ་ཆེན་པོའི་མདོ་སྡེ་ཤིན་ཏུ་རྒྱས་པ་དང་བྲལ་བར་མི་འགྱུར་རོ།

ཤཱ་རིའི་བུ་གནས་མ་ཡིན་ཞིང་གོ་སྐབས་མེད་དེ།

ཤཱ་རིའི་བུ་བུད་མེད་གང་སངས་རྒྱས་བཅོམ་ལྡན་འདས་དེ་དག་གི་མཚན་ཉན་པ་དང་།

འཛིན་པ་དང་།

འཆང་བ་དང་།

ཀློག་པ་དང་།

སྟོན་པ་དང་།

རབ་ཏུ་འདོན་པ་དང་།

ཀུན་ཆུབ་པར་བྱེད་པ་དེ་བུད་མེད་ཀྱི་དངོས་པོ་ལན་གཉིས་ཐོབ་པར་འགྱུར་བ་དེ་ནི་གནས་མེད་དོ།

སྨོན་ལམ་གྱི་དབང་གིས་ལེན་པ་ནི་མ་གཏོགས་སོ།

ཤཱ་རིའི་བུ་གནས་མ་ཡིན་ཞིང་གོ་སྐབས་མེད་དེ།

ཤཱ་རིའི་བུ་རིགས་ཀྱི་བུའམ།

རིགས་ཀྱི་བུ་མོ་སངས་རྒྱས་བཅོམ་ལྡན་འདས་དེ་དག་གི་མཚན་ཉན་པ་དང་།

འཛིན་པ་དང་།

འཆང་བ་དང་།

ཀློག་པ་དང་།

སྟོན་པ་དང་།

རབ་ཏུ་འདོན་པ་དང་།

ཀུན་ཆུབ་པར་བྱེད་ན་རིགས་ཀྱི་བུའམ།

རིགས་ཀྱི་བུ་མོ་དེ་རྒྱལ་པོས་འཇིགས་པར་འགྱུར་བའམ།

རྐུན་པོས་སམ།

མེས་སམ།

ཆུས་སམ།

མ་རུངས་

པས་སམ།

ཀླུས་སམ།

གནོད་སྦྱིན་གྱིས་སམ།

དྲི་ཟས་སམ།

ལྷ་མ་ཡིན་གྱིས་སམ།

མིས་སམ།

མི་མ་ཡིན་པས་འཇིགས་པར་འགྱུར་བའམ།

གང་གིས་ཀྱང་གླགས་རྙེད་པར་འགྱུར་བ་དེ་ནི་གནས་མེད་དོ།

ལས་ཀྱི་རྣམ་པར་སྨིན་པ་དྲག་པོ་ནི་མ་གཏོགས་ཏེ།

དེ་ཡང་ཆུང་ངུ་མྱོང་ཞིང་མང་དུ་མྱོང་བར་མི་འགྱུར་རོ།

དེ་འཇིག་རྟེན་པའམ།

འཇིག་རྟེན་ལས་འདས་པའི་དོན་གང་ཅི་རྩོམ་ཡང་རུང་སྟེ།

དེ་དགེ་བའི་ཆོས་རྣམས་འཕེལ་བ་ཉིད་དུ་འགྱུར་གྱི།

འགྲིབ་པར་མི་འགྱུར་བར་རེ་བར་བྱའོ།

དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ།

འཇིག་རྟེན་མགོན་པོ་དེ་དག་གི།

མཚན་རྣམས་འཛིན་པར་བྱེད་པ་ནི།

མི་ཁོམ་ཐམས་ཅད་ཡོངས་སྤངས་ནས།

མྱུར་དུ་བཟང་འགྲོར་འགྲོ་བར་འགྱུར།

སངས་རྒྱས་འབྱུང་བ་མཉེས་བྱས་ནས།

སྟོན་པ་དེ་མཐོང་དད་བྱེད་ཅིང་།

འཇིག་རྟེན་སྒྲོན་མ་མཐོང་ནས་ཀྱང་།

མཆོད་པ་བཟང་པོ་བྱེད་པར་འགྱུར།

བསྐལ་པ་བྱེ་བ་གྲངས་མེད་དུ།

འཁོར་བ་རྣམ་པར་སྤོང་བར་བྱེད།

གང་གིས་འདྲེན་རྣམས་མཐོང་འགྱུར་བའི།

དྲི་མེད་མིག་ཀྱང་རྣམ་པར་སྦྱོང་།

འཇིག་རྟེན་མགོན་པོ་དེ་དག་གི།

མཚན་རྣམས་སུ་ཞིག་འཛིན་བྱེད་པ།

དེ་ནི་གང་དང་གར་སྐྱེས་པར།

འཇིག་རྟེན་ཕྱག་བྱའི་འོས་སུ་འགྱུར།

དེ་ཡི་གཟུགས་མཚན་ཕུན་སུམ་ཚོགས།

ཕྱུག་པོའི་ཁྱིམ་དུ་སྐྱེ་བར་འགྱུར།

དཔའ་ཞིང་སྦྱིན་པའི་བདག་པོར་འགྱུར།

སེར་སྣ་མེད་ཅིང་ལྷུག་པར་གཏོང་།

མཚན་རྣམས་འདི་དག་སུ་འཛིན་པ།

བསྐལ་པ་བྱེ་བ་མང་པོར་ནི།

ལྷ་ཡི་ཙན་དན་དམར་པོ་ཡི།

དྲི་ངད་ཁ་ནས་འབྱུང་བར་འགྱུར།

དྲང་སྲོང་ཆེན་པོ་དེ་དག་གི།

མཚན་རྣམས་བུད་མེད་ཐོས་གྱུར་ན།

བུད་མེད་དངོས་པོ་རྣམ་སྤངས་ཏེ།

སྐྱེས་བུ་མཁས་པར་རེད་པར་འགྱུར།

མཚན་རྣམས་འདི་དག་སུ་འཛིན་པ།

ཕ་དང་མ་དང་སྤུན་རྣམས་དང་།

མཛའ་བཤེས་ཉེ་དུའི་ཚོགས་རྣམས་ཀྱི།

སྡུག་བསྔལ་ནམ་ཡང་མཐོང་མི་འགྱུར།

མཚན་རྣམས་འདི་དག་སུ་འཛིན་པ།

དེ་

དང་དེ་དག་འཇིག་རྟེན་ན།

འདབ་མ་སྟོང་ཕྲག་བྱེ་ལྡན་པའི།

རིན་ཆེན་པད་མར་སྐྱེ་བར་འགྱུར།

མཚན་རྣམས་འདི་དག་སུ་འཛིན་པ།

སངས་རྒྱས་ཞིང་རྣམས་ཐམས་ཅད་དུ།

ནམ་མཁའ་ལས་ནི་འགྲོ་བྱེད་ཅིང་།

འཇིག་རྟེན་མགོན་པོ་སངས་རྒྱས་ཞིང་།

རྣམ་པར་དག་པ་མཐོང་བར་འགྱུར།

འཇིག་རྟེན་མགོན་པོའི་དྲུང་དག་ཏུ།

ཟབ་མོའི་ཆོས་ནི་ཉན་བྱེད་ཅིང་།

ཇི་ལྟར་ཐོས་པ་ཆུད་མི་གསོན།

མཚན་རྣམས་འདི་དག་སུ་འཛིན་པ།

དེ་དག་ལ་ནི་སྡིག་ཅན་བདུད།

ནག་པོའི་རྩ་ལག་སྡེར་བཅས་པས།

ནམ་ཡང་གླགས་རྙེད་མི་འགྱུར་རོ།

མཚན་རྣམས་འདི་དག་སུ་འཛིན་པ།

དེ་དག་མཚོན་གྱིས་མི་གསོད་ཅིང་།

དུག་དང་མེས་ཀྱང་མ་ཡིན་ལ།

རྒྱལ་པོ་དང་ནི་རྐུན་པོ་ཡིས།

དེ་དག་གཙེ་བར་བྱེད་མི་འགྱུར།

ལྷ་དང་ཀླུ་དང་གནོད་སྦྱིན་དང་།

དྲི་ཟ་ལྟོ་འཕྱེ་ཆེ་རྣམས་ཀྱིས།

གླགས་ཀྱང་རྙེད་པར་མི་འགྱུར་རོ།

སངས་རྒྱས་འདི་དག་མི་མཆོག་སྟེ།

དཔལ་གྱི་སྙིང་པོ་འབྲུག་གི་རྒྱལ།

མཛངས་པ་བག་ཡོད་གྱུར་ནས་ནི།

མཁས་མི་སུ་ཞིག་མཚན་མི་འཛིན།

འཇིག་རྟེན་མགོན་པོ་ཐམས་ཅད་ཀྱི།

མཚན་རྣམས་འདི་དག་སུ་ཉན་པ།

མི་དེ་དག་ནི་ཆོ་གས་ཉན།

གྲགས་ལྡན་རྣམས་ཀྱི་མཚན་ཐོས་ནས།

དེ་དག་དཔའ་ཞིང་ཤེས་རབ་ཆེ།

འཇིག་རྟེན་མི་མཆོག་སངས་རྒྱས་འགྱུར།

བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས།

ཚེ་དང་ལྡན་པ་ཤཱ་རིའི་བུ་དང་།

ཐམས་ཅད་དང་ལྡན་པའི་འཁོར་དེ་དག་དང་།

ལྷ་དང་།

མི་དང་།

ལྷ་མ་ཡིན་དང་།

དྲི་ཟར་བཅས་པའི་འཇིག་རྟེན་ཡི་རངས་ཏེ།

བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།

འཕགས་པ་སངས་རྒྱས་བརྒྱད་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།།

རྒྱ་གར་གྱི་མཁན་པོ་ཛི་ན་མི་ཏྲ་དང་།

སུ་རེནྡྲ་བོ་དྷི་དང་།

ཞུ་ཆེན་གྱི་ལོ་ཙཱ་བ་བན་དེ་ཡེ་ཤེས་སྡེས་ཞུས་ཏེ་གཏན་ལ་ཕབ་པ།།

ཤློ་ཀ་དགུ་བཅུ་རྩ་གཅིག།

རྒྱ་གར་སྐད་དུ།

ད་ཤ་བུད་དྷ་ཀཾ་ནཱ་མ་མ་ཧཱ་ཡཱ་ན་སཱུ་ཏྲ།

བོད་སྐད་དུ།

སངས་རྒྱས་བཅུ་པ་ཞེས་བྱ་བ་ཐེག་པ་ཆེན་པོའི་མདོ།

སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ།

འདི་སྐད་བདག་གིས་ཐོས་པ་དུས་གཅིག་ན།

བཅོམ་ལྡན་འདས་རྒྱལ་པོའི་ཁབ་བྱ་རྒོད་ཀྱི་ཕུང་པོའི་རི་ལ་དགེ་སློང་གི་དགེ་འདུན་སྟོང་ཉིས་བརྒྱ་ལྔ་བཅུ་དང་།

བྱང་ཆུབ་སེམས་དཔའ་སེམས་དཔའ་ཆེན་པོ་སྟོང་ཕྲག་རབ་ཏུ་མང་པོ་དང་ཐབས་ཅིག་ཏུ་བཞུགས་སོ།

དེའི་ཚེ་འཁོར་དེ་ཉིད་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡུལ་ཡངས་པའི་ལི་ཙྪ་བཱི་གཞོན་ནུ་ཡོན་ཏན་རིན་ཆེན་མེ་ཏོག་རྒྱས་པ་ཞེས་བྱ་བ་འདུས་པར་གྱུར་ཏེ་འདུག་གོ།

དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་རིན་ཆེན་མེ་ཏོག་རྒྱས་པ་སྟན་ལས་ལངས་ཏེ།

བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ།

བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།

གལ་ཏེ་བདག་ཅག་གིས་ཞུ་བ་ཞུས་པས་བཅོམ་ལྡན་འདས་ཀྱི་ཐུགས་རངས་པ་ལྟ་ན།

བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ཞུའོ།

དེ་སྐད་ཅེས་གསོལ་པ་དང་།

བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་རིན་ཆེན་མེ་ཏོག་རྒྱས་པ་ལ་འདི་སྐད་ཅེས་བཀའ་སྩལ་ཏོ།

ཡོན་ཏན་རིན་ཆེན་མེ་ཏོག་རྒྱས་པ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་གང་དང་གང་འདོད་པ་དྲིས་ཤིག་དང་།

ངས་དྲིས་པ་དེ་དང་དེའི་ལུང་བསྟན་པས་ཁྱོད་ཀྱི་སེམས་རངས་པར་བྱའོ།

དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་རིན་ཆེན་མེ་ཏོག་རྒྱས་པས་འདི་སྐད་ཅེས་གསོལ་ཏོ།

བཅོམ་ལྡན་འདས་རིགས་ཀྱི་བུའམ་རིགས་ཀྱི་བུ་མོ་ལ་ལས་འཇིག་རྟེན་གྱི་ཁམས་གཞན་དག་ན་ད་ལྟར་བཅོམ་ལྡན་འདས་བཞུགས་ཏེ་འཚོ་ལ་གཞེས་

ཤིང་ཆོས་ཀྱང་སྟོན་པ་གང་དག་གི་མཚན་བཟུང་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བ་མཆིས་སམ།

དེ་སྐད་ཅེས་གསོལ་པ་དང་།

བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་རིན་ཆེན་མེ་ཏོག་རྒྱས་པ་ལ་འདི་སྐད་ཅེས་བཀའ་སྩལ་ཏོ།

ཡོན་ཏན་རིན་ཆེན་མེ་ཏོག་རྒྱས་པ་ལེགས་སོ་ལེགས་སོ།

ཡོན་ཏན་རིན་ཆེན་མེ་ཏོག་རྒྱས་པ་ཁྱོད་འདི་ལྟར་འདིར་ལྷགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་།

ལྷ་དང་།

མི་དང་།

སྐྱེ་བོ་མང་པོ་རྣམས་ཀྱི་དོན་དང་།

ཕན་པ་དང་།

བདེ་བ་དང་།

འཇིག་རྟེན་ལ་སྙིང་བརྩེ་བའི་ཕྱིར་ཞུགས་ཏེ།

དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་དོན་འདི་ཡོངས་སུ་འདྲི་བར་སེམས་པ་ཡོན་ཏན་རིན་ཆེན་མེ་ཏོག་རྒྱས་པ་ཁྱོད་ཀྱང་ལེགས་སོ།

ཡོན་ཏན་རིན་ཆེན་མེ་ཏོག་རྒྱས་པ་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་པར་བྱའོ།

བཅོམ་ལྡན་འདས་དེ་ལྟར་འཚལ་ལོ་ཞེས་གསོལ་ནས།

བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་རིན་ཆེན་མེ་ཏོག་རྒྱས་པས་བཅོམ་ལྡན་འདས་ཀྱི་ལྟར་ཉན་པ་དང་།

བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ།

ཡོན་ཏན་རིན་ཆེན་མེ་ཏོག་རྒྱས་པ་ཤར་ཕྱོགས་ལོགས་ན་ཡོན་ཏན་ཐམས་ཅད་རྣམ་པར་དག་པ་ཞེས་བྱ་བའི་འཇིག་རྟེན་གྱི་ཁམས་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་བསྐལ་པ་དཔག་ཏུ་མེད་པ་ལས་འདས་པ་ཞེས་བྱ་བ་ད་ལྟར་བཞུགས་ཏེ་འཚོ་ལ་གཞེས་ཤིང་ཆོས་ཀྱང་སྟོན་ཏོ།

བསྐལ་པ་དེ་ནི་ཐམས་ཅད་ཉེ་བར་བསགས་ཤིང་བརྩེགས་པ་ཞེས་བྱའོ།

དེ་ན་སེམས་ཅན་རྣམས་ཀྱི་ཚེ་ཡང་དཔག་ཏུ་མེད་དོ།

བཅོམ་ལྡན་འདས་ཡོན་ཏན་བསྐལ་པ་དཔག་ཏུ་མེད་པ་ལས་འདས་པ་དེའི་འཁོར་ཐམས་ཅད་ཀྱང་ཐེག་པ་ཆེན་པོ་ལ་ཡང་དག་པར་ཞུགས་པ་ཤ་སྟག་སྟེ།

རིགས་ཀྱི་བུའམ་རིགས་ཀྱི་བུ་མོས་དེ་བཞིན་གཤེགས་པ་དགྲ་བཅོམ་

པ་ཡང་དག་པར་རྫོགས་པའི་སངས་རྒྱས་ཡོན་ཏན་བསྐལ་པ་དཔག་ཏུ་མེད་པ་ལས་འདས་པ་ཞེས་བྱ་བ་དེའི་མཚན་བཟུང་ན་བསྐལ་པ་སྟོང་ཕྲག་དྲུག་ཅུར་འཁོར་བ་ལ་རྒྱབ་ཀྱིས་ཕྱོགས་པར་བྱེད་དོ།

ཤི་འཕོས་ནས་ཀྱང་སྒྲིབ་པ་མེད་པའི་གཟུངས་ཞེས་བྱ་བ་འཐོབ་པར་འགྱུར་རོ།

སངས་རྒྱས་ཀྱི་ཞིང་བྱེ་བ་ཕྲག་བཅུའི་སངས་རྒྱས་བཅོམ་ལྡན་འདས་རྣམས་ཀྱིས་ཀྱང་སྤོབས་པ་ཡང་དག་པར་བསྐྱེད་དོ།

ཆོས་སྟོན་པ་ན་ཡང་ཁེངས་པར་མི་འགྱུར་རོ།

དེ་ལ་འདི་སྐད་ཅེས་བྱ་སྟེ།

གང་གིས་སྐྱོབ་པའི་མཚན་ནི་བཟུང་བྱས་ན།

དེ་ལ་བྱང་ཆུབ་དམ་པ་རྙེད་སླ་ཞིང་།

བདེ་བར་གཤེགས་པའི་ཡོན་ཏན་གཞན་རྣམས་དང་།

ཡོན་ཏན་དྲི་མེད་འདི་དག་མིས་འཐོབ་འགྱུར།

ཡོན་ཏན་རིན་ཆེན་མེ་ཏོག་རྒྱས་པ་ལྷོ་ཕྱོགས་ལོགས་ན་ཡོན་ཏན་རིན་ཆེན་བཀོད་པ་ཞེས་བྱ་བའི་འཇིག་རྟེན་གྱི་ཁམས་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་རིན་ཆེན་བཀོད་པའི་དཔལ་གཟི་བརྗིད་ཀྱི་ཕུང་པོའི་བསྐལ་པ་ཞེས་བྱ་བ་ད་ལྟར་བཞུགས་ཏེ་འཚོ་ལ་གཞེས་ཤིང་ཆོས་ཀྱང་སྟོན་ཏོ།

བསྐལ་པ་དེ་ནི་ཡོན་ཏན་རྒྱ་ཆེ་བ་ཞེས་བྱའོ།

རིགས་ཀྱི་བུའམ།

རིགས་ཀྱི་བུ་མོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་རིན་ཆེན་བཀོད་པའི་དཔལ་གཟི་བརྗིད་ཀྱི་ཕུང་པོའི་བསྐལ་པ་ཞེས་བྱ་བ་དེའི་མཚན་བཟུང་ན་ཤི་འཕོས་ནས་ཉི་མའི་དཀྱིལ་འཁོར་འོད་ཀྱིས་མཐས་ཀླས་པ་ཞེས་བྱ་བའི་ཏིང་ངེ་འཛིན་འཐོབ་པར་འགྱུར་རོ།

སངས་རྒྱས་ཀྱི་ཞིང་བཀོད་པ་དཔག་ཏུ་མེད་པ་རྣམས་ཡོངས་སུ་འཛིན་པར་འགྱུར་རོ།

སངས་རྒྱས་ཀྱི་ཞིང་གང་དང་གང་དུ་སྨོན་ལམ་བཏབ་པ་དེ་དང་དེར་སྐྱེ་བར་འགྱུར་རོ།

བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱང་སྐྱེ་བ་གཅིག་གིས་ཐོགས་སོ།

ཤི་འཕོས་ནས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱང་འཐོབ་པར་འགྱུར་རོ།

དེ་ལ་འདི་སྐད་ཅེས་བྱ་སྟེ།

ཁྱབ་བདག་མཚན་འདི་སུས་བཟུང་བ།

མཐའ་ཀླས་པ་ཡི་ཏིང་ངེ་འཛིན།

འོད་ནི་ཉི་མའི་དཀྱིལ་འཁོར་

ཅན།

མཚན་རྣམས་བཅས་ཏེ་ཤི་བས་འཐོབ།

ཡོན་ཏན་རིན་ཆེན་མེ་ཏོག་རྒྱས་པ་ནུབ་ཕྱོགས་ལོགས་ན་སྦྱོར་བས་མུན་པ་ཐམས་ཅད་དང་བྲལ་བ་ཞེས་བྱ་བའི་འཇིག་རྟེན་གྱི་ཁམས་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཐམས་ཅད་ལ་སྤོབས་པ་བཀོད་པའི་དཔལ་ད་ལྟར་བཞུགས་ཏེ་འཚོ་ལ་གཞེས་ཤིང་ཆོས་ཀྱང་སྟོན་ཏོ།

བསྐལ་པ་དེ་ནི་ཤཱཀྱའི་རྒྱལ་པོ་བཀོད་པ་ཞེས་བྱའོ།

རིགས་ཀྱི་བུའམ་རིགས་ཀྱི་བུ་མོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཐམས་ཅད་ལ་སྤོབས་པ་བཀོད་པའི་དཔལ་ཞེས་བྱ་བ་དེའི་མཚན་བཟུང་ན་མཚོན་ཆ་དང་།

མེ་དང་།

ཆུ་དང་།

དུག་གིས་འཆི་བའི་དུས་བྱེད་པར་མི་འགྱུར་ཞིང་རྫུས་ཏེ་སྐྱེ་བར་འགྱུར་རོ།

ཤི་འཕོས་ནས་ཤུགས་བརྒྱ་པ་ཞེས་བྱ་བའི་ཏིང་ངེ་འཛིན་འཐོབ་པར་འགྱུར་རོ།

དེ་ལ་འདི་སྐད་ཅེས་བྱ་སྟེ།

རྒྱལ་བ་དེ་ཡི་མཚན་ནི་སུས་བཟུང་བ།

མེ་དང་ཆུ་དང་དུག་གིས་མི་འཆི་ཞིང་།

འདི་ལ་མཚོན་གྱིས་མི་ཚུགས་མཁས་པ་དང་།

མངལ་དུ་མི་སྐྱེ་གཟུངས་རྣམས་མི་དེས་འཐོབ།

ཡོན་ཏན་རིན་ཆེན་མེ་ཏོག་རྒྱས་པ་བྱང་ཕྱོགས་ལོགས་ན་མུན་པ་དང་རྡུལ་དང་བྲལ་བ་ཞེས་བྱ་བའི་འཇིག་རྟེན་གྱི་ཁམས་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤོབས་པ་དཔག་ཏུ་མེད་པ་བཀོད་པ་ཡང་དག་པར་སྤྱོད་པ་ཞེས་བྱ་བ་ད་ལྟར་བཞུགས་ཏེ་འཚོ་ལ་གཞེས་ཤིང་ཆོས་ཀྱང་སྟོན་ཏོ།

བསྐལ་པ་དེ་ནི་རིན་ཆེ་བ་ཞེས་བྱའོ།

རིགས་ཀྱི་བུའམ་རིགས་ཀྱི་བུ་མོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤོབས་པ་དཔག་ཏུ་མེད་པ་བཀོད་པ་ཡང་དག་པར་སྤྱོད་པ་ཞེས་བྱ་བ་དེའི་མཚན་བཟུང་ན་སངས་རྒྱས་བྱེ་བ་ཁྲག་ཁྲིག་ཕྲག་དྲུག་ཅུ་མཉེས་པར་བྱེད་དོ།

ཐམས་ཅད་ཀྱི་རྗེས་སུ་སོང་བ་ཞེས་བྱ་བའི་གཟུངས་འཐོབ་པར་འགྱུར་རོ།

སྒྱུ་མ་ལྟ་བུ་ལས་ངེས་པར་འབྱུང་བ་ཞེས་བྱ་བའི་ཏིང་ངེ་འཛིན་འཐོབ་པར་འགྱུར་རོ།

མི་ཟད་པའི་ཟ་མ་ཏོག་ཅེས་བྱ་བའི་ཏིང་ངེ་འཛིན་འཐོབ་པར་འགྱུར་རོ།

བླ་ན་མེད་པ་ཡང་

དག་པར་རྫོགས་པའི་སངས་རྒྱས་སུ་མ་གྱུར་གྱི་བར་དུ་ནམ་ཡང་ངན་སོང་གསུམ་དུ་མི་སྐྱེ་ཞིང་མི་སྤྱོད་པར་འགྱུར་རོ།

སངས་རྒྱས་ཀྱི་ཞིང་གང་དང་གང་དུ་སྐྱེས་པ་དེ་དང་དེར་སེམས་ཅན་ངན་སོང་དུ་སོང་བ་ཐམས་ཅད་ཡོངས་སུ་གྲོལ་བར་བྱེད་ཅིང་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་བྱེད་དོ།

དེ་ལ་འདི་སྐད་ཅེས་བྱ་སྟེ།

བདེ་གཤེགས་དེ་ཡི་མཚན་ནི་སུས་བཟུང་བ།

སེམས་ཅན་མཐའ་ཡས་བྱང་ཆུབ་བསྐྱེད་པ་དང་།

གཟུངས་དང་ཏིང་ངེ་འཛིན་རྣམས་ཐོབ་པ་དང་།

ངན་འགྲོར་སྐྱེ་བས་འཇིགས་པར་མི་འགྱུར་རོ།

ཡོན་ཏན་རིན་ཆེན་མེ་ཏོག་རྒྱས་པ་ཤར་ལྷོའི་ཕྱོགས་མཚམས་ལོགས་ན་ཡུན་རིང་པོར་བདེ་བ་བཀོད་པ་ཞེས་བྱ་བའི་འཇིག་རྟེན་གྱི་ཁམས་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྲིན་གྱི་འབྲུག་སྒྲ་སྒྲ་དབྱངས་སྟོང་པ་ཞེས་བྱ་བ་ད་ལྟར་བཞུགས་ཏེ་འཚོ་ལ་གཞེས་ཤིང་ཆོས་ཀྱང་སྟོན་ཏོ།

བསྐལ་པ་དེ་ནི་ཡོན་ཏན་འབྱུང་བ་ཞེས་བྱའོ།

རིགས་ཀྱི་བུའམ་རིགས་ཀྱི་བུ་མོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྲིན་གྱི་འབྲུག་སྒྲ་སྒྲ་དབྱངས་སྟོང་པ་ཞེས་བྱ་བ་དེའི་མཚན་བཟུང་ན།

དེ་ཤི་འཕོས་ནས་སོ་སོ་ཡང་དག་པར་རིག་པ་བཞི་འཐོབ་པར་འགྱུར་རོ།

མི་འཇིགས་པ་བཞི་འཐོབ་པར་འགྱུར་རོ།

བྱམས་པ་ཆེན་པོ་དང་སྙིང་རྗེ་ཆེན་པོ་འཐོབ་པར་འགྱུར་རོ།

སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་འཐོབ་པར་འགྱུར་རོ།

ཇི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་ཀྱི་འཇིག་རྟེན་གྱི་ཁམས་བདེ་བ་ཅན་དེ་འདྲ་བའི་སངས་རྒྱས་ཀྱི་ཞིང་ཡོན་ཏན་བཀོད་པ་རྣམས་འཐོབ་པར་འགྱུར་རོ།

བུད་མེད་ཀྱང་ཤི་འཕོས་ནས་སྐྱེས་པའི་དངོས་པོ་འཐོབ་ཅིང་སངས་རྒྱས་བཅོམ་ལྡན་འདས་ཀྱི་ཞལ་མཐོང་བར་སྐྱེ་བར་འགྱུར་རོ།

དེ་ལ་འདི་སྐད་ཅེས་བྱ་སྟེ།

གང་གིས་མཚན་འདི་དག་ནི་བཟུང་བྱས་ན།

འོད་དཔག་མེད་འདྲའི་ཞིང་དག་འཐོབ་པ་དང་།

བུད་མེད་ཕོར་འགྱུར་བསམ་

གྱིས་མི་ཁྱབ་པའི།

ཡོན་ཏན་འདི་དང་གཞན་ཡང་འཐོབ་པར་འགྱུར།

ཡོན་ཏན་རིན་ཆེན་མེ་ཏོག་རྒྱས་པ་ལྷོ་ནུབ་ཀྱི་ཕྱོགས་མཚམས་ལོགས་ན་ཡོན་ཏན་དཔག་ཏུ་མེད་པ་བཀོད་པ་ཞེས་བྱ་བའི་འཇིག་རྟེན་གྱི་ཁམས་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་མའི་འོད་དམ་པ་དཔལ་གྱི་གཟི་བརྗིད་འབྱུང་བ་ཞེས་བྱ་བ་ད་ལྟར་བཞུགས་ཏེ་འཚོ་ལ་གཞེས་ཤིང་ཆོས་ཀྱང་སྟོན་ཏོ།

བསྐལ་པ་དེ་ནི་ཡིད་བདེ་བ་ཡང་དག་པར་སྐྱེད་པ་ཞེས་བྱའོ།

རིགས་ཀྱི་བུའམ་རིགས་ཀྱི་བུ་མོས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་མའི་འོད་དམ་པའི་དཔལ་གྱི་གཟི་བརྗིད་འབྱུང་བ་ཞེས་བྱ་བ་དེའི་མཚན་ཐོས་ན་མཚན་དེ་དག་ཐོས་པ་ཙམ་གྱིས་སངས་རྒྱས་བྱེ་བ་མཉེས་པར་འགྱུར་རོ།

ཐམས་ཅད་དུ་མདངས་ལྟ་བུ་ཞེས་བྱ་བའི་ཏིང་ངེ་འཛིན་ཐོབ་པར་འགྱུར་རོ།

རིགས་ཀྱི་བུའམ་རིགས་ཀྱི་བུ་མོས་མཚན་དེ་དག་རྒྱུན་དུ་བཟུང་བ་བྱས་ན་ཤི་འཕོས་ནས་སེམས་ཅན་ཐམས་ཅད་མདངས་ལྟ་བུ་ཞེས་བྱ་བའི་ཏིང་ངེ་འཛིན་ལ་འཇོག་པར་བྱེད་ཅིང་།

ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་རོ།

རྒྱུ་གང་དང་རྐྱེན་གང་གིས་སེམས་ཅན་ཐམས་ཅད་མདངས་ལྟ་བུ་ཞེས་བྱ་བའི་ཏིང་ངེ་འཛིན་ཐོབ་པར་བྱེད་ཅིང་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་ཞེ་ན།

རིགས་ཀྱི་བུའམ་རིགས་ཀྱི་བུ་མོ་གང་ལ་ལས་ཏིང་ངེ་འཛིན་འདི་ལ་གནས་ཤིང་ཆོས་བསྟན་ན་དེ་ལྟར་ཆོས་བསྟན་པས་ཏིང་ངེ་འཛིན་འདི་འཐོབ་པར་འགྱུར་ཞིང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེའི་སེམས་ཅན་ཇི་སྙེད་པ་དེ་དག་ཐམས་ཅད་ཀྱང་བདེ་བར་འགྱུར་རོ།

དཔེར་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡིད་དུ་འོང་བ་ཞེས་བྱ་བའི་ཞིང་ན་སེམས་ཅན་རྣམས་བདེ་བ་ལ་གཅིག་ཏུ་བཀོད་པ་དང་།

ངན་སོང་དུ་སོང་བའི་སེམས་ཅན་རྣམས་ཀྱང་ཡོངས་སུ་གྲོལ་བར་བྱེད་ཅིང་ལྷ་དང་མིའི་ངོ་བོ་ཉིད་

ཐོབ་པར་བྱེད་པ་དང་།

དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་བྱེད་པ་བཞིན་ནོ།

དེ་ལ་འདི་སྐད་ཅེས་བྱ་སྟེ།

གང་གིས་མགོན་དེའི་མཚན་ནི་བཟུང་བྱས་ན།

ཕྱི་རོལ་མ་ཡིན་རྟོག་པར་བྱེད་པ་དང་།

མདངས་ལྟ་བུ་ཡི་ཏིང་འཛིན་ཐོབ་བྱེད་ཅིང་།

དེ་དང་གཞན་དུ་མང་པོ་སྐྱེད་པར་བྱེད།

ཡོན་ཏན་རིན་ཆེན་མེ་ཏོག་རྒྱས་པ་ནུབ་བྱང་གི་ཕྱོགས་མཚམས་ལོགས་ན་ངན་སོང་སྤངས་པ་ཞེས་བྱ་བའི་འཇིག་རྟེན་གྱི་ཁམས་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པ་མང་པོའི་གཟི་བརྗིད་ཀྱི་རྒྱལ་པོ་དཔལ་འབྱུང་བ་ཞེས་བྱ་བ་ད་ལྟར་བཞུགས་ཏེ་འཚོ་ལ་གཞེས་ཤིང་ཆོས་ཀྱང་སྟོན་ཏོ།

བསྐལ་པ་དེ་ནི་དགེ་བ་རྒྱ་ཆེ་བ་ཞེས་བྱའོ།

རིགས་ཀྱི་བུའམ།

རིགས་ཀྱི་བུ་མོས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པ་མང་པོའི་གཟི་བརྗིད་ཀྱི་རྒྱལ་པོ་དཔལ་འབྱུང་བ་ཞེས་བྱ་བ་དེའི་མཚན་བཟུང་ན་ཤི་འཕོས་ནས་སྤོབས་པ་དཔག་ཏུ་མེད་པ་བཀོད་པ་ཞེས་བྱ་བའི་གཟུངས་འཐོབ་པར་འགྱུར་རོ།

ཚེགས་ཆུང་ངུས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་ཀྱི་སངས་རྒྱས་ཀྱི་ཞིང་གི་ཡོན་ཏན་ཕུན་སུམ་ཚོགས་པ་བཀོད་པ་ཡོངས་སུ་འཛིན་པར་འགྱུར་རོ།

སྐྱེ་བ་གཅིག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འགྲུབ་པར་འགྱུར་རོ།

སངས་རྒྱས་བྱེ་བ་ཕྲག་དགུ་བཅུས་ཆོས་བསྟན་པ་ཡང་ཐོས་པར་འགྱུར་རོ།

དེ་ལ་འདི་སྐད་ཅེས་བྱ་སྟེ།

གང་གིས་རྒྱལ་བའི་མཚན་དེ་བཟུང་བྱས་ན།

སྐྱེ་བ་གཅིག་གིས་བྱང་ཆུབ་འཐོབ་པ་དང་།

འོད་དཔག་མེད་དང་མཉམ་པའི་ཞིང་དག་དང་།

གཟུངས་ཀྱང་སེམས་ཅན་དེ་ཡིས་འཐོབ་པར་འགྱུར།

ཡོན་ཏན་རིན་ཆེན་མེ་ཏོག་རྒྱས་པ་བྱང་ཤར་གྱི་ཕྱོགས་མཚམས་ལོགས་ན་མྱ་ངན་གྱི་གནོད་པ་ཐམས་ཅད་དང་བྲལ་བ་ཞེས་བྱ་བའི་འཇིག་རྟེན་གྱི་ཁམས་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བསྐལ་པ་

བྱེ་བ་གྲངས་མེད་པར་ཀུན་ཏུ་འབྱུང་བ་ཞེས་བྱ་བ་ད་ལྟར་བཞུགས་ཏེ་འཚོ་ལ་གཞེས་ཤིང་ཆོས་ཀྱང་སྟོན་ཏོ།

བསྐལ་པ་དེ་ནི་སྤོབས་པ་བཀོད་པ་ཞེས་བྱའོ།

རིགས་ཀྱི་བུའམ་རིགས་ཀྱི་བུ་མོས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བསྐལ་པ་བྱེ་བ་གྲངས་མེད་པར་ཀུན་ཏུ་འབྱུང་བ་ཞེས་བྱ་བ་དེའི་མཚན་བཟུང་ན་ཤི་འཕོས་ནས་སྒྲ་དབྱངས་ཡན་ལག་དྲུག་ཅུ་དང་ལྡན་པའི་སྤོབས་པ་ཕུན་སུམ་ཚོགས་པ་འཐོབ་པར་འགྱུར་རོ།

སངས་རྒྱས་བྱེ་བ་ཕྲག་བརྒྱད་ཅུ་ལས་དགེ་བའི་རྩ་བ་བསྐྱེད་པར་འགྱུར་རོ།

དེ་ལ་འདི་སྐད་ཅེས་བྱ་སྟེ།

གང་གིས་རྒྱལ་བའི་མཚན་དེ་དག་ནི་བཟུང་བྱས་ན།

རྒྱལ་བ་བྱེ་བ་ཁྲག་ཁྲིག་བརྒྱད་ཅུ་མཆོད་པ་ཡི།

བསོད་ནམས་དེ་དག་དེ་ལ་ཆུང་བར་མི་འགྱུར་ཞིང་།

སྒྲ་དབྱངས་ཕུན་ཚོགས་ཡན་ལག་དྲུག་ཅུར་ལྡན་པ་འཐོབ།

ཡོན་ཏན་རིན་ཆེན་མེ་ཏོག་རྒྱས་པ་སྟེང་གི་ཕྱོགས་ལོགས་ན་གཟི་བརྗིད་དཔག་ཏུ་མེད་པ་བཀོད་པ་ཞེས་བྱ་བའི་འཇིག་རྟེན་གྱི་ཁམས་ཡོད་དེ།

དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགེ་བ་གསེར་གྱི་ནམ་མཁའ་ངེས་པར་སྒྲོགས་པ་བཀོད་པ་དཔལ་གྱི་གཟི་བརྗིད་འབྱུང་བ་ཞེས་བྱ་བ་ད་ལྟར་བཞུགས་ཏེ་འཚོ་ལ་གཞེས་ཤིང་ཆོས་ཀྱང་སྟོན་ཏོ།

བསྐལ་པ་དེ་ནི་སྣང་བ་ཤིན་ཏུ་གསལ་བ་ཞེས་བྱའོ།

རིགས་ཀྱི་བུའམ་རིགས་ཀྱི་བུ་མོས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགེ་བ་གསེར་གྱི་ནམ་མཁའ་ངེས་པར་སྒྲོགས་པ་བཀོད་པ་དཔལ་གྱི་གཟི་བརྗིད་འབྱུང་བ་ཞེས་བྱ་བ་དེའི་མཚན་བཟུང་ན་ཚུལ་ཁྲིམས་ཀྱི་ཕུང་པོ་དཔག་ཏུ་མེད་པ་ཡོངས་སུ་དག་པ་དང་།

ཏིང་ངེ་འཛིན་གྱི་ཕུང་པོ་དཔག་ཏུ་མེད་པ་དང་།

ཤེས་རབ་ཀྱི་ཕུང་པོ་དཔག་ཏུ་མེད་པ་དང་།

རྣམ་པར་གྲོལ་བའི་ཕུང་པོ་དཔག་ཏུ་མེད་པ་དང་།

རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དཔག་ཏུ་མེད་པ་ཡོངས་སུ་དག་པར་བྱེད་དོ།

ས་ནས་ས་འཐོབ་པར་འགྱུར་རོ།

འཇིག་རྟེན་དང་འཇིག་རྟེན་ལས་འདས་པའི་ཡེ་ཤེས་མཆོག་

འཐོབ་པར་འགྱུར་རོ།

གཉེན་གྱི་སྟོབས་དང་།

རྒྱལ་སྲིད་འཐོབ་པར་འགྱུར་རོ།

སྤོབས་པ་མི་བུལ་བ་འཐོབ་པར་འགྱུར་རོ།