經部第70卷（མདོ་སྡེ་ལ་བཞུགས་སོ། །）

འཕགས་པ་དམ་པའི་ཆོས་དྲན་པ་ཉེ་བར་གཞག་པ།

བམ་པོ་བཞི་བཅུ་རྩ་དྲུག་པ།

གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་འཐབ་བྲལ་བའི་ས་རྣམས་ལ་རྣམ་པར་ལྟ་བར་བྱེད་པ་ན།

དེས་ཐོས་པ་ལས་བྱུང་བའི་ཤེས་རབ་ཀྱིས་མཐོང་བར་གྱུར་པ་ནི་འཐབ་བྲལ་བའི་ལྷ་རྣམས་ཀྱི་ས་ཇི་ལྟ་བ་བཞིན་དུ་ཡོད་པ་བཞོན་པ་རྒྱ་ཆེ་བ་ལ་རྣམ་པར་རྒྱུ་བ་ཞེས་བྱ་བའོ།

དེར་ཡང་ལས་གང་གིས་སེམས་ཅན་སྐྱེ་བར་འགྱུར་བ་ཡང་དེས་ཐོས་པ་ལས་བྱུང་བའི་ཤེས་པས་མཐོང་སྟེ་སྐྱེས་བུ་དམ་པ་གང་དག་གིས་དགེ་བའི་བཤེས་གཉེན་བདག་ཉིད་ལ་བདེ་ལེགས་སྟོན་པར་བྱེད་པས་ནི་དཔེ་མེད་པའི་ཡུལ་གྱི་ཡོན་ཏན་དང་ལྡན་པ་ཡང་གང་ཁོ་ན་བདག་གིས་གཟུགས་མཐོང་བ་དེ་ཉིད་ནི་འདོད་པ་སྡུག་པ་ཡིད་དུ་འོང་བ་གཞན་རྣམས་དང་འདྲ་བ་མ་ཡིན་པ་རྣམས་མཐོང་ངོ་།

གང་ཡང་རྣ་བས་ཐོས་པ་རྣམས་ནི་རྣམ་པ་སྣ་ཚོགས་པའི་གླུ་རྣམས་དང་།

བྱའི་སྒྲ་དང་

ཆུ་ཀླུང་དང་འབབ་ཆུ་དང་།

མཚེའུ་ལ་སོགས་པའི་སྒྲ་རྣམས་ཏེ།

དེ་རྣམས་ནི་འདོད་པ་སྡུག་པ་ཡིད་དུ་འོང་བ་གཞན་རྣམས་དང་མི་འདྲ་བ་མཚུངས་པ་མེད་པར་གྱུར་པས་ཡིད་ཚིམ་པ་མེད་པར་བྱེད་པ་རྣམས་ཡིན་ནོ།

དེ་བཞིན་དུ་བདག་གིས་སྣས་སྣོམ་པ་རྣམས་གང་ཡིན་པ་དེ་རྣམས་ཀྱང་འདོད་པ་སྡུག་པ་ཡིད་དུ་འོང་བ་རྣམ་པ་དུ་མར་གཞན་རྣམས་དང་འདྲ་བ་མ་ཡིན་པར་གྱུར་པ་སྔ་ན་མེད་པ་ཡིད་ཚིམ་པ་མེད་པར་བྱེད་པ་རྣམས་བདག་གིས་སྣོམ་མོ།

གཞན་ཡང་བདག་གི་ལྕེས་རོ་རྣམ་པ་དུ་མ་མྱོང་བར་བྱེད་པ་ན་དེ་རྣམས་ཀྱང་རྣམ་པ་དུ་མར་གཞན་དང་མི་འདྲ་བ་ཡིད་ངོམས་པ་མེད་པར་བྱེད་པ་རྣམས་སོ།

གང་ཡང་བདག་གི་ལུས་ཀྱིས་རེག་བྱ་རྣམས་ལ་རེག་པར་བྱེད་པ་ན་རྣམ་པ་སྣ་ཚོགས་ཤིང་རྣམ་པ་དུ་མར་གཞན་དང་མཚུངས་པ་མ་ཡིན་པ་ཡུལ་གྱི་བདེ་བ་གང་ཅུང་ཟད་ཀྱང་མ་ལུས་པ་ཐམས་ཅད་ནགས་འདི་དག་རྣམས་ན་མེད་པ་མ་ཡིན་ཏེ།

ལྷ་རྫས་ཀྱི་འདོད་པའི་ཡོན་ཏན་ལྔ་པོ་རྣམས་རྣམ་པ་དུ་མར་ཕུན་སུམ་ཚོགས་པ་རྣམ་པར་བརྟག་པར་བྱ་བ་དུ་མར་གཞན་རྣམས་དང་མཚུངས་པ་མ་ཡིན་པའི་ལྷ་རྣམས་སུ་སྐྱེའོ།

ལྷ་རྣམས་ཀྱིས་ནགས་རྣམས་མཐོང་བས་ནི་མ་ཡིན་གྱི་ནགས་འདི་དག་ཏུ་ཞུགས་པ་ཙམ་ཉིད་ན་ལྷ་ཁྱེད་རྣམས་འདིར་ཤིན་ཏུ་ངོ་མཚར་བར་གྱུར་པར་མཐོང་བ་ཡིན་ལ།

གང་ཡང་ལྷ་རྣམས་ཀྱི་མངའ་བདག་མུ་སུ་ལུན་དྷ་སྔོན་དུ་བྱས་ནས་ལྷ་འདི་དག་རྣམས་ནང་རྣམས་སུ་འཇུག་པར་གྱུར་པ་ལྟ་སྨོས་ཀྱང་ཅི་དགོས།

དེ་ལ་ཡང་བྱེ་བ་སྟོང་ཕྲག་ས་ཡ་ཕྲག་དགུའི་རྒྱན་དང་ཆ་བྱད་རྣམ་པ་སྣ་ཚོགས་པའི་གཟུགས་དང་ལང་ཚོ་དང་གླུ་དང་རོལ་མོའི་

ཡོན་ཏན་རྣམས་དང་ལྡན་པའི་ལྷའི་བུ་མོ་རབ་ཏུ་དགའ་བར་གྱུར་པའི་བཞིན་མངོན་དུ་བསྟན་པར་གྱུར་པ་བྱེ་བ་སྟོང་ཕྲག་ས་ཡ་ཕྲག་དགུས་མངོན་པར་མཆོད་པར་བྱེད་པར་གྱུར་པའི་འདོད་པའི་ཡོན་ཏན་ལྔ་ཕུན་སུམ་ཚོགས་པའི་དཔལ་ལ་སྤྱོད་པར་བྱེད་པ་རྣམས་ཡིན་ཞིང་།

ལྷ་དེ་དག་རྣམས་ཀྱིས་མངའ་བདག་མུ་སུ་ལུན་དྷ་དེ་ལ་ནི་ཅི་ནས་ཀྱང་ལྷ་རྣམས་ཀྱིས་ལེགས་པར་ལྟ་བར་བྱེད་པ་ཡིན་ཏེ་རྒྱུ་གང་གིས་ཡིན་ན་ཡུལ་རྣམས་དེའི་ཡིན་པའི་ཕྱིར་དང་།

དེ་ཡང་བདག་ཅག་ཐམས་ཅད་ཀྱི་མངའ་བདག་ཏུ་གྱུར་པ་ཕ་བཞིན་དང་མ་བཞིན་དུ་འཐབ་བྲལ་གྱི་ས་རྣམས་སུ་ལེགས་པ་སློབ་པར་བྱེད་པ་ཡིན་ནོ།

དེ་དག་རྣམས་ཐོས་ནས་ལྷ་གསར་དུ་སྐྱེས་པ་དེ་དག་ཕྱིར་ཡང་ལྷའི་བུ་མོ་དེ་དག་གིས་ཡོངས་སུ་བསྐོར་བའི་ལྷ་ཉིད་ལ་ལྟ་བར་བྱེད་དེ།

དམན་པ་དང་བར་མའི་གཟུགས་དང་ཆ་བྱད་དང་རྒྱན་ཅན་སྐྱེའོ།

རེ་རེ་ཞིང་འདོད་པའི་ཡོན་ཏན་དང་བདེ་བའི་ཟས་ཀྱིས་གནས་པ་འདོད་པའི་ཡོན་ཏན་ལྔའི་ཟས་དང་ལྡན་པ་རྣམས་ཀྱིས་མངོན་པར་མཐོང་ནས་རྩེ་བར་བྱེད་པར་འགྱུར་བ་དང་།

ལྷ་མོ་དེ་དག་རྣམས་དང་ལྷ་གཞན་རྣམས་ཀྱིས་ཀྱང་ངག་སྙན་པས་མཉེས་པར་བྱེད་པར་འགྱུར་ལ།

དེ་ན་ཡོན་ཏན་སྟོང་ཕྲག་དུ་མ་དང་ལྡན་པ་རིན་པོ་ཆེ་བདུན་གྱི་རང་བཞིན་གྱི་ལྗོན་ཤིང་རྣམས་ཀྱིས་ཉེ་བར་མཛེས་པར་གྱུར་པ་ཤིང་གི་ཕྲེང་བ་བརྒྱ་སྟོང་ཕྲག་དུ་མས་ཡོངས་སུ་མཛེས་པར་བྱས་པ་དཔག་བསམ་གྱི་ཤིང་གི་ནགས་ལ་གཞན་རྣམས་ལ་གང་དང་གང་དག་བསམས་པ་དེ་དང་དེ་དག་རྣམས་དཔག་བསམ་གྱི་ཤིང་དེ་རྣམས་ལས་བྱུང་ངོ་།

དེ་ལྟར་ཡོན་ཏན་ཕུན་སུམ་ཚོགས་པའི་ཤིང་དེ་དག་རྣམས་ལ་གསར་དུ་སྐྱེས་པའི་ལྷས་ཤིང་དེ་དག་ཡོན་ཏན་ཕུལ་དུ་བྱུང་བ་རྣམས་དུ་མར་ཕུན་སུམ་ཚོགས་པའི་ཡུལ་གྱི་ལོངས་སྤྱོད་རྣམས་གང་ཡིན་པ་ཁོ་ནས་དགའ་བའི་ནགས་རྣམས་མངོན་པར་མཐོང་ནས་མིག་གི་རྒྱུ་བ་ཕྱིར་མི་ཟློགས་པའི་ཤིན་ཏུ་བར་ཡང་དགའ་བ་འདི་དག་རྣམས་ལ་རྟག་པར་རྒྱུན་མི་ཆད་པར་རབ་ཏུ་ལྟ་བར་གྱུར་པས་དེ་དག་རྣམས་དང་བཅས་པ་ནགས་ཆེན་པོ་དེའི་ནང་དུ་ལེགས་པར་གཞུག་པར་བྱེད་ལ།

བཟའ་བ་དང་བཏུང་བའི་ཆུ་ཀླུང་བརྒྱ་སྟོང་ཕྲག་མང་

པོ་དང་ལྡན་པ་ཁ་དོག་སྣ་ཚོགས་པའི་བྱ་རྣམས་ཀྱིས་ཉེ་འཁོར་ན་ཅ་ཅོའི་སྒྲ་རབ་ཏུ་འབྱིན་པ་དང་ཤིན་ཏུ་མཉན་པར་འོས་པའི་ལྷ་མོའི་ཚོགས་ཀྱིས་གླུ་མཆོག་གི་སྒྲ་རྣམས་ཀྱིས་ཀུན་ཏུ་གང་བར་གྱུར་པའི་བྱའི་སྒྲ་རྣམས་དང་འདྲེས་པས་ཡིད་འཕྲོག་པར་བྱེད་དོ།

གཞན་ཡང་ལྷ་གཞན་རྣམས་ཞུགས་པར་གྱུར་པ་ན་ལྷ་གསར་དུ་སྐྱེས་པ་དེས་མཐོང་བ་ནི་ཤིན་ཏུ་ངོ་མཚར་བར་གྱུར་པའི་པད་མའི་ཚལ་རིང་དུ་ནི་དཔག་ཚད་གསུམ་མོ།

རྒྱར་ནི་དཔག་ཚད་གཉིས་པའི་པད་མ་ཆེན་པོའི་ནགས་རྣམས་ནི་དབྱིབས་དུ་མ་དང་གཟུགས་དུ་མས་ཉེ་བར་མཛེས་པར་གྱུར་པ་ལ་འདི་ལྟ་སྟེ།

སྟོན་ཀའི་དུས་ན་ནམ་མཁའ་དྲི་མ་དང་བྲལ་བ་ལ་རབ་ཏུ་འབར་བའི་གཟའ་དང་སྐར་མས་མཛེས་པ་བཞིན་དུ་དེའི་ཉེ་འཁོར་རྣམས་ན་ཡང་ལྷ་དང་ལྷ་མོའི་ཚོགས་ཕལ་ཆེ་བར་གྱུར་པ་བརྒྱ་སྟོང་གིས་ཡོངས་སུ་གང་བར་གྱུར་པ་དང་།

རབ་ཏུ་དགའ་བའི་ལྷ་དང་ལྷ་མོའི་ཚོགས་རྣམས་ཀྱིས་ནི་གར་རྣམས་དང་།

རྒོད་པར་བྱེད་པ་རྣམས་ཀྱིས་ཀྱང་རྔ་སྒྲ་ཡན་ལག་ལྔ་དང་ལྡན་པས་ཕན་ཚུན་ཐབས་ཅིག་ཏུ་དགའ་བར་གྱུར་ཅིང་།

ཕན་ཚུན་དུ་ལེགས་པར་གཏམ་འདྲེ་བ་འབྱུང་བའི་ཡིད་ཅན་རྣམས་ཕན་ཚུན་དུ་ཡུད་ཙམ་ཅིག་ཀྱང་ཀུན་ཏུ་ཆགས་པ་དང་།

དགའ་བ་དང་ཡང་བྲལ་བར་འགྱུར་བ་མ་ཡིན་ནོ།

དེ་ལྟར་གྱུར་པའི་ཡིད་དེ་ལྟ་བུར་གྱུར་པའི་སེམས་ཀྱིས་ངལ་བར་གྱུར་པ་ཡང་མེད་པ་བློ་ཡང་དེ་དག་སྐྱེ་བའི་ཡིད་དེས་ཀུན་ཏུ་དྲངས་པ་རྣམས་ཀྱི་ཉེ་འཁོར་ན་ཆེས་རབ་ཏུ་དགའ་བའི་ལྷའི་ཚོགས་ཀྱིས་ཡོངས་སུ་བསྐོར་བའོ།

གཞན་ཡང་ལྷ་དེས་མཐོང་བ་ནི་པད་མའི་ནགས་དེ་དག་རྣམས་ན་རྣམ་པ་སྣ་ཚོགས་པའི་བྱ་རྣམས་ཆུ་ལ་རྒྱུ་བ་དག་ཀྱང་ཕན་ཚུན་དུ་དགའ་ཞིང་ཀུན་ཏུ་སྤྱོད་པར་ཡང་བྱེད་དོ།

ཕན་ཚུན་དུ་ཆགས་པའི་ཡིད་ཅན་དེ་དག་རྣམས་ཀྱང་དེ་བཞིན་དུ་ཕན་ཚུན་དུ་གྲོགས་ཀྱི་བྱ་བ་ཡང་རྗེས་སུ་བྱེད་དོ།

དེ་དག་རྣམས་དེ་བཞིན་དུ་ལྷ་རྣམས་ཀྱི་རྗེས་སུ་བྱ་བ་ཡང་བྱེད་ལ།

ལྷ་རྣམས་ཇི་ལྟ་བ་བཞིན་དུ་དེ་དག་རྣམས་དེ་ལྟ་བ་བཞིན་དུ་ངུར་པ་དང་།

བྱ་ཀ་དམ་པ་དང་བྱ་ཀཱ་རཎ་ཌ་བ་པ་དང་།

དེ་དག་རྣམས་ལྷན་ཅིག་ཏུ་པད་

མའི་ནགས་དེ་ལ་རྣམ་པ་དུ་མ་དགའོ།

དེ་མཆོག་ཏུ་དགའ་བའི་དང་བར་གྱུར་པ་ཅན་གྱི་ཆུ་དེ་འཇུག་ངོས་རྣམས་ན་ལྷ་དེ་རྣམས་ལ་ལ་ནི་གསེར་གྱི་འདབ་མ་ཅན་གྱི་པད་མ་བླངས་ནས་བདུད་རྩི་འཐུང་ཞིང་གླུ་ཡང་ལེན་པར་བྱེད་དེ།

ལྷ་མོའི་ཚོགས་རྣམས་ཀྱིས་ཡོངས་སུ་བསྐོར་ནས་རྣམ་པ་སྣ་ཚོགས་པའི་ལྷའི་བདེ་བ་རྣམས་དང་ཡང་དག་པར་ལྡན་ནོ།

ཡང་གཞན་རྣམས་ནི་དངུལ་གྱི་རང་བཞིན་གྱི་བདུད་རྩི་བླངས་ནས་སོ་པད་མ་རཱ་ག་དང་མཚུངས་པའི་མདོག་ཅན་རང་གི་ལས་རྣམས་དང་རྗེས་སུ་འཐུན་པ་རྣམས་འཐུང་བར་བྱེད་དེ།

དགའ་བ་དང་ལྡན་པས་ཇི་སྲིད་དུ་སེར་པོ་རྣམས་ཀྱང་ངོ་།

ཡང་ལྷ་གཞན་ནི་ཤེལ་གྱི་རང་བཞིན་གྱི་པད་མའི་འདབ་མ་རྣམས་ལ་བདུད་རྩི་མཆོག་ཏུ་དྲི་ཞིམ་པ་དང་ལྡན་པ་མཆོག་ཏུ་ཕུན་སུམ་ཚོགས་པ་མཆོག་ཏུ་བསིལ་བར་གྱུར་པ་ལྷན་ཅིག་སྤྱོད་པ་རྣམས་དང་།

ལྷན་ཅིག་ཏུ་རང་གི་ལས་དང་འདྲ་བའི་རྩི་རྣམས་འཐུང་བར་བྱེད་དོ།

ཡང་ལྷ་གཞན་རྣམས་ནི།

པད་མའི་ནགས་དེ་དག་ཉིད་ཁོ་ན་ན་བལྟ་བར་བྱ་བའི་ཆེས་མཆོག་ཏུ་དགའ་བའི་ཡུལ་ལྔའི་ཡོན་ཏན་རྣམས་དང་ཡང་དག་པར་ལྡན་པ་ཨིན་དྲ་ནཱི་ལའི་རང་བཞིན་གྱི་མདོག་དང་ལྡན་པའི་མེ་ཏོག་པད་མའི་འདབ་མ་ལ་གནས་པའི་བདུད་རྩི་བླངས་ནས་འཁོར་དགའ་བ་རྣམས་དང་དགའ་བར་བྱེད་དོ།

ལྷ་གཞན་རྣམས་ཀྱང་ལྷའི་མེ་ཏོག་རྣམས་ཀྱིས་ལེགས་པར་རྒྱས་པ་ལྷའི་བདུད་རྩི་དང་ལྡན་པའི་ཤིང་རྣམས་ཀྱི་ནང་དུ་སོང་བར་གྱུར་པ་དང་།

རྒྱགས་ཤིང་བག་མེད་པས་རྣམ་པར་རྒྱུ་བས་ནགས་གཞན་གྱི་གསེབ་ཏུ་རྣམ་པར་རྒྱུ་བ་རྣམས་སྣ་ཚོགས་པར་དགའ་བའི་འཁོར་རྣམས་དང་བཅས་པའི་ལྷ་རྫས་ཀྱི་རོ་དང་དྲི་དང་ཁ་དོག་དུ་མ་ཕུན་སུམ་ཚོགས་པ་དང་ལྡན་པའི་འབྲས་བུ་གཞིབས་ནས་དེའི་ནང་དུ་སོང་ནས་རོ་གཞན་འཐུང་བར་བྱེད་ཅིང་།

གླུ་ཡང་ལེན་པར་བྱེད་དེ་མཆོག་ཏུ་དགའ་བའི་ཡིད་དང་ལྡན་པས་སོ།

ཡང་ལྷ་གཞན་རྣམས་ནི་གསེར་དང་དངུལ་དང་ཤེལ་དང་ཨིན་དྲ་ནཱི་ལའི་རང་བཞིན་དེ་དག་རྣམས་ལ་རྣམ་པ་སྣ་ཚོགས་པའི་མེ་ཏོག་གིས་གང་བས་གཡོགས་པ་འཁྲི་ཤིང་གི་ཕུག་ཏུ་གྱུར་པ་

ལ།

འཁྲི་ཤིང་གི་བླ་རེ་བྲེས་པའི་ཁང་པ་ལ་འཁོར་དང་བཅས་པ་རྣམས་དགའ་ཞིང་ལྷ་མོ་རྣམས་དང་བཅས་པ་གླུ་ལེན་པར་ཡང་བྱེད་དོ།

ཡང་ལྷ་གཞན་དག་རྣམས་ནི་ཆུ་ཀླུང་གི་འགྲམ་རྣམས་ལ་བརྟེན་ནས་བྱས་ཀུན་ཏུ་སྒྲ་སྒྲོགས་པ་དང་ལྡན་པ་མནན་ན་ནེམ་ལ་བཏེག་ན་འཕར་བའི་ས་གཞིའི་ཆ་རེག་ན་འཇམ་པར་གྱུར་པ་ལ་སྐྱེས་པ་ཤིང་རྣམས་ཀྱི་མེ་ཏོག་ཁ་དོག་ལྔ་དང་ཡང་དག་པར་ལྡན་པའི་ཕྲེང་བར་བྱ་བའི་ཕྲེང་བ་རྣམས་ལེན་ལ།

ཁ་ཅིག་ནི་སིལ་མ་དང་ཡང་དག་པར་ལྡན་པའི་མེ་ཏོག་རྣམས་ཡོངས་སུ་བླངས་ནས་ལྷན་ཅིག་ཏུ་སྤྱོད་པ་རྣམས་དང་།

བདག་ཉིད་ཀྱང་སྣོམ་པར་བྱེད་དོ།

ལྷ་གཞན་རྣམས་ནི་དེ་དང་ཉེ་བ་ན་རོལ་མོའི་སྒྲ་དག་བྱེད་དོ།

ཡང་ལྷ་གཞན་དག་རྣམས་ནི་རྣམ་པ་སྣ་ཚོགས་པའི་རིན་པོ་ཆེའི་རྡོ་བ་སྣ་ཚོགས་པར་གྱུར་པ་རྣམས་ལ་འདི་ལྟ་སྟེ་ཨིན་དྲ་ནཱི་ལ་དང་ཤེལ་དང་།

གསེར་དང་དངུལ་གྱི་རང་བཞིན་རྣམས་ལ་དགའ་བར་བྱེད་ཅིང་ཀུན་ཏུ་སྤྱོད་པར་ཡང་བྱེད་དེ།

ཇི་སྲིད་དུ་འདོད་ཅིང་སྡུག་ལ་ཡིད་དུ་འོང་བར་འགྱུར་བའི་ལས་བྱས་ཤིང་བསགས་པ་རྣམས་ཟད་པར་མ་གྱུར་གྱི་བར་དུའོ།

དེ་དག་རྣམས་ཟད་ནས་སླར་ཡང་དམྱལ་བ་དང་།

ཡི་དགས་དང་།

དུད་འགྲོ་རྣམས་སུ་སྐྱེ་བ་ཡིན་ནོ།

དེ་རྣམས་ནས་འཕོས་ནས་ལན་གྲངས་གཞན་ལ་མྱོང་བར་འགྱུར་བའི་ལས་རྣམས་ཀྱིས་གལ་ཏེ་མི་རྣམས་དང་སྐལ་བ་མཚུངས་པར་གྱུར་པའི་མིར་སྐྱེས་ན་ཡང་དེ་དག་ཏུ་གཞོན་ཤ་ཅན་དང་།

མཆོག་ཏུ་གཟུགས་དང་ལང་ཚོ་དང་ལྡན་པ་དང་།

ཡིད་དགའ་བ་དང་།

ལོངས་སྤྱོད་དང་།

ཡུལ་ལྗོངས་རྣམས་ལ་ཡང་དབང་བར་འགྱུར་བ་ཡིན་ཏེ།

ལས་དེ་རྣམས་ཀྱི་རྒྱུ་འཐུན་པའི་དབང་གིས་སོ།

གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ།

འཐབ་བྲལ་གྱི་ལྷ་རྣམས་ཀྱི་ས་ལ་རྣམ་པར་ལྟ་བར་བྱེད་པ་ན།

དེས་ཐོས་པ་ལས་བྱུང་བའི་ཤེས་རབ་ཀྱིས་འཐབ་བྲལ་བ་རྣམས་ཀྱིས་རྒྱུན་གནས་ན་རྣམ་པར་རྒྱུ་བ་ཞེས་བྱ་བ་ཡོད་པ་ཇི་ལྟ་བ་བཞིན་དུ་མཐོང་ངོ་།

དེར་ཡང་ལས་གང་གིས་སེམས་ཅན་རྣམས་སྐྱེ་བར་འགྱུར་བ་ཡིན་ན།

དེས་ཐོས་པ་ལས་བྱུང་བའི་ཤེས་རབ་

ཀྱིས་མཐོང་བ་གང་དག་དྲང་པོར་གྱུར་ཅིང་དྲང་པོའི་རང་བཞིན་ཅན་དད་པའི་སྟོབས་ཅན་དུ་གྱུར་པས་སྲོག་གཅོད་པ་དང་།

མ་བྱིན་པར་ལེན་པ་རྣམས་རྣམ་པར་སྤངས་ཤིང་ཀུན་ནས་ཡོངས་སུ་དག་པར་གྱུར་ལ།

འདོད་པས་ལོག་པར་གཡེམ་པ་ཡང་མི་སྟེན་ཅིང་།

གོམས་པར་མི་བྱེད་ལ་ལན་མང་དུ་བྱེད་པར་མི་འགྱུར་བ་ནི་འདི་ལྟ་སྟེ།

བུད་མེད་རྣམས་ཀྱི་མིག་ལ་བརྟེན་ནས་མ་ཡིན་ཞིང་།

མིག་གིས་གཟུགས་ལ་ཡང་འདོད་པའི་འདོད་ཆགས་ཀྱིས་ཀུན་ཏུ་ལྟ་བར་མི་བྱེད་དོ།

སེམས་རྒྱུད་ཚུལ་བཞིན་མ་ཡིན་པ་ཡིད་ལ་བྱེད་པས་ཟིལ་གྱིས་ནོན་པར་གྱུར་ན་དེ་ཡང་ཕྱིར་སྤོང་བར་བྱེད་དོ།

ཀུན་ཏུ་རྟོག་པར་མི་བྱེད་དོ།

དུག་བཞིན་དུ་ཡོངས་སུ་སྤོང་བར་བྱེད་དོ།

སྐྱེས་བུ་དམ་པ་དེ་དག་རྣམས་ལུས་ཞིག་ནས་མཐོ་རིས་བདེ་འགྲོའི་འཇིག་རྟེན་རྣམས་ལས་འཐབ་བྲལ་བ་རྣམས་ཀྱི་ནང་གང་ན་རྒྱུན་གནས་ན་རྒྱུ་བ་ཞེས་བྱ་བ་ལྷ་དེའི་སར་སྐྱེ་བའོ།

དེར་སྐྱེས་པ་འདིའི་ཡང་ཉི་མ་དང་མཚུངས་པའི་གཟི་བརྗིད་ཀྱི་དགེ་བ་ཤར་བའི་འབྲས་བུ་ལ་ལོངས་སྤྱོད་པ་དཔེ་མེད་པའི་བདེ་བ་དང་ལྡན་པ་དེ་ལྷ་རྫས་ཀྱི་ཡུལ་དུ་མ་ཉེ་བར་སྟེན་པ་རྣམས་ཏེ།

དང་པོ་ཁོ་ན་ཉིད་དུ་སྐྱེས་པའི་སེམས་ཀུན་ཏུ་དགའ་ཞིང་རབ་ཏུ་དགའ་བའི་ཡིད་ཀྱིས་ཇི་ལྟར་བདག་གཅིག་པུ་གནས་ཞེས་དེའི་སེམས་བསྐྱེད་པ་ཙམ་ཉིད་ན་ནགས་དེ་དག་རྣམས་ཀྱི་ནང་ཀུན་ནས་འོང་བ་ན་རྣམ་པ་དུ་མ་རྣམ་པ་སྣ་ཚོགས་པའི་རྒྱན་དང་ཆ་བྱད་དང་ལྡན་པ་མགོ་ལ་པད་མའི་ཕྲེང་བའི་འོད་རྣམ་པར་འབར་བ་རྣམ་པ་སྣ་ཚོགས་པའི་གོས་ཁ་དོག་སྣ་ཚོགས་པ་ཅན་བགོས་པ་རྣམས་གང་ན་ལྷ་དེ་ཡོད་པ་དེར་མྱུར་བར་འོང་བར་འགྱུར་རོ།

འོངས་ནས་ཀྱང་སྒྲིན་པོར་གྱུར་པ་རྒྱན་དང་ཆ་ལུགས་སྟོང་ཕྲག་བརྒྱས་མངོན་པར་བརྒྱན་པ་རྣམས་ལྷ་གསར་དུ་སྐྱེས་པ་དེ་དང་ཉེ་བར་འོངས་ཏེ།

དེ་ཡོངས་སུ་བསྐོར་ནས་རོལ་མོས་བྲེལ་བའི་ཡིད་ཅན་དང་མཆོག་ཏུ་གླུ་ལ་ཆགས་པའི་ཡིད་ཅན་གྱིས།

ལྷ་དེ་ཉེ་བར་སྒྱུར་ཞིང་རྣམ་པ་དུ་མར་ཡིད་ཀྱི་རྗེས་སུ་འཐུན་པས་ཤིན་ཏུ་ཡོན་ཏན་ཕུན་སུམ་ཚོགས་པ་གཞན་གྱི་སྙིང་དབང་དུ་གྱུར་པའི་ལྷ་མཆོག་ལ་ལྷའི་བུ་མོ་དེ་དག་ཉེ་བར་སྟེན་པར་བྱེད་དོ།

དེས་ཀྱང་ལྷའི་

བུ་མོ་དེ་དག་རྣམས་མཐོང་བ་དང་སྔ་ནས་མ་མཐོང་བའི་ཀུན་ཏུ་འདོད་ཆགས་སྐྱེས་ནས་དཔྱོད་པར་བྱེད་དེ།

འདི་དག་སུ་ཡིན་ཅི་ལས་འོངས་ཞེས་སོ།

དེ་ནས་དེའི་དྲུང་དུ་འོངས་པ་མངོན་པར་མཐོང་ནས།

རྣམ་པ་སྣ་ཚོགས་པའི་རྣམ་པར་འདོད་ཆགས་པའི་བག་ཆགས་སྟོང་ཕྲག་དུ་མའི་རྣམ་པར་རྟོག་པ་དང་།

རྒྱན་རྣམ་པ་སྣ་ཚོགས་པ་རྣམ་པར་གསལ་བའི་རིན་པོ་ཆེས་ལུས་ལ་ལམ་མེར་གྱུར་པ་གསེར་བཙོ་མའི་རྣ་གདུབ་ཀྱིས་འགྲམ་པའི་ངོས་ལ་ཐུག་པར་གྱུར་པ།

རྣམ་པར་རྟོག་པ་དུ་མ་དང་ལྡན་པའི་རོལ་ཆས་ལག་པ་བྲེལ་བ་རྣམས་ཏེ།

དཔེ་རྣམ་པ་དེ་ལྟ་བུ་རྣམས་གང་ཡིན་པ་དེ་སྲིད་ཀྱིས་ནི་སུམ་ཅུ་རྩ་གསུམ་པའི་ལང་ཚོ་ལ་བབ་པའི་གླུ་མཁན་མ་རྣམས་ཀྱང་དཔེ་མེད་པ་ཡིན་ན།

གང་ཡང་ཡོན་ཏན་རྣམ་པ་སུམ་འགྱུར་གྱི་ཡོན་ཏན་དང་ལྡན་པའི་དགེ་བའི་ལས་དུ་མ་ཡོངས་སུ་དག་པ་ལས་ལེགས་པར་སྐྱེས་པའི་འཐབ་བྲལ་གྱི་ལྷ་མོ་རྣམས་ལ་ལྟ་སྨོས་ཀྱང་ཅི་དགོས།

སུམ་ཅུ་རྩ་གསུམ་པའི་ལྷ་མོ་རྣམས་དང་མི་རྣམས་ཀྱི་གླུ་མཁན་གྱི་ཁྱད་པར་གང་ཡིན་པས་ཇི་ལྟར་གླུ་ལེན་པའི་ཁྱད་པར་ཡོད་པ་དེ་ལྟར་གཟུགས་དང་ལང་ཚོ་ལ་བབ་པ་དང་ཚད་དང་རོལ་མོའི་བདེ་བ་རྣམས་དང་།

ནགས་དང་ནགས་འདབ་དང་པད་མའི་བདུད་རྩི་དང་འབབ་ཆུ་དང་ཁང་པ་དང་མཚེའུ་དང་གཞལ་ཡས་ཁང་རྣམས་ཀྱིས་དེ་ལྟར་ཁྱད་པར་གོང་ནས་གོང་དུ་འཕགས་པས།

ཇི་སྲིད་དུ་གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་གོང་དུ་འཕགས་པའི་གཟུགས་དང་།

ལང་ཚོ་དང་སྤྲོ་བས་ཆེས་དགའ་བར་གྱུར་པ་ཡིན་ནོ།

དེ་ཅིའི་ཕྱིར་ཞེ་ན།

ལས་ཀྱི་འབྲས་བུ་ལྕི་བར་གྱུར་པས་དང་།

སེམས་དང་ཚུལ་ཁྲིམས་དྲི་མ་མེད་པའི་ཁྱད་པར་རྣམས་ལས་ཡིན་ནོ།

དེ་ལྟར་ཡིན་དང་འཐབ་བྲལ་གྱི་ལྷ་མོ་རྣམས་ནི་དཔེ་མེད་པ་ཡིན་ནོ།

དེ་རྣམས་ཐམས་ཅད་ཀྱང་འདིར་མི་རྟག་པ་འབའ་ཞིག་གི་དབང་དུ་བྱས་པ་ཡིན་ལ།

འདོད་པ་ལ་སོགས་པ་རྣམས་ཀྱི་དབང་དུ་བྱས་པ་ཡང་དེ་དག་གི་བདེ་བའི་ཕྱོགས་གཅིག་ལ་གནས་པར་བྱ་བའི་དོན་དུ་མངོན་པར་བསྔགས་པ་ཡིན་ཞིང་དེའི་རྒྱུས་ཀྱང་གང་དག་

བློ་གྲོས་དམན་པ་རྣམས་སྲིད་པ་ལ་མངོན་པར་ཞེན་པས་ཚུལ་ཁྲིམས་ལ་སྤྱོད་པར་བྱེད་དེ་རྒྱུ་གང་གིས་གང་དག་སྲིད་པ་ལ་སྲེད་པའི་བློ་དམན་པ་ཚུལ་ཁྲིམས་ལ་སྤྱོད་ལ།

ཇི་ལྟར་ཚུལ་ཁྲིམས་དེས་བདག་ཅག་རྣམས་ལྷར་སྐྱེ་བར་འགྱུར་རོ་ཞེས་སྙམ་པའི་བློ་དེ་བཟློག་པར་བྱ་བའི་དོན་དུ་འདི་དག་རྣམས་མི་རྟག་པ་དང་།

འཕོ་བར་འགྱུར་བ་དང་།

འཐུན་པ་རྣམས་དང་རྣམ་པར་འབྲལ་བར་འགྱུར་བའི་སྐྱོན་རྣམས་བརྗོད་དོ།

སྲིད་པ་ལ་མངོན་པར་སྲེད་པའི་རྒྱུ་ཅུང་ཟད་ཙམ་པོ་གང་ཡིན་པས་ཀྱང་དགེ་བའི་ཆོས་རྣམས་ཐམས་ཅད་ཀྱི་བར་ཆད་བྱེད་པར་འགྱུར་རོ།

སྟེང་དང་འོག་དང་ཐད་ཀར་བསྡུས་པ་ནི་གནས་རྣམས་ན་གང་དག་རྟག་པ་དང་ཐེར་ཟུག་དང་།

རྣམ་པར་མི་རྟོག་པར་འགྱུར་བའི་གོ་སྐབས་དེ་ནི་ཡོད་པ་མ་ཡིན་ནོ།

རྒྱུ་འདིས་ཀྱང་མཐོ་རིས་འདི་དག་རྣམས་ཀྱི་བསྔགས་པ་བརྗོད་ཀྱི་སྲིད་པ་ལ་སྲེད་པ་འབའ་ཞིག་གིས་ནི་མ་ཡིན་ནོ།

དེ་ནས་ཡང་ལྷའི་བུ་མོ་དེ་དག་ལྷ་དེ་དག་ལ་ཉེ་བར་བརྟེན་ནས་རྣམ་པར་རྟོག་པ་དུ་མས་གླུ་ལེན་ཅིང་འཇོ་ཞིང་སྒེག་པར་ཡང་བྱེད་དོ།

དེ་ནས་གསར་དུ་སྐྱེས་པས་སྔར་མ་མཐོང་བ་རྣམས་མཐོང་ནས་འདི་སྙམ་དུ་སེམས་པར་གྱུར་ཏེ།

འདི་རྣམས་ནི་གང་ཡིན་ཅི་ཞིག་རྟོགས་ནས་འདིར་འོངས་ཏེ།

གང་དག་གིས་བདག་ལ་སྟེན་པར་བྱེད།

དེ་ནས་སེམས་བསྐྱེད་པ་ཙམ་ཉིད་ན་དེ་ལྟར་ལེགས་པར་བྱས་པའི་ལས་ཀྱིས་བསྐུལ་ནས་གཞོན་ནུ་མ་དེས་འདི་སྐད་ཅེས་སྨྲས་ཏེ།

ཇི་ལྟར་ཁྱོད་བདག་ཅག་ལ་དབང་ཆེ་བ་དང་།

ཁ་དྲག་པར་ཡང་གྱུར་ཏེ་གསར་པ་ཁྱོད་ལ་ཕན་པ་དང་།

བདེ་བ་ལ་གནས་པར་བྱ་བའི་དོན་དུ་རྗེས་སུ་སྤྱོད་ཅིང་ཞབས་འབྲིང་བྱེད་པ་ཡིན་ལ།

ཁྱོད་ནི་བདག་གི་ཇོ་བོ་ཡིན་ན་བདག་ཅག་ཅིའི་ཕྱིར་སྨྲ་བར་མི་བྱེད།

དེ་ནས་དེས་ཀྱང་དེ་བཞིན་དུ་དེ་དག་རྣམས་གོ་ནས་སྨྲས་པ།

གལ་ཏེ་ཇི་ལྟར་ཁྱེད་རྣམས་ཇི་ལྟ་བ་བཞིན་དུ་གལ་ཏེ་ངའི་ཡིན་པར་གྱུར་ན།

དེ་དག་རྣམས་ཀྱིས་ཅིས་ཀྱང་བདག་ནགས་དང་ཉེ་བའི་ནགས་རྣམས་ཀུན་ཏུ་ལྟ་བའི་དོན་དུ་འབད་པར་བྱེད་པར་འགྱུར་བ་ཡིན་ལ།

ཡིན་པའི་རྒྱུ་མཚན་ཡང་གང་ཡིན་

ན་བདེ་བའི་རྒྱུར་འགྱུར་བས་ན་མཐོ་རིས་ཀྱི་འཇིག་རྟེན་འདིར་སྐྱེས་པ་ཡིན་ནོ།

དེ་ནས་གཞོན་ནུ་མ་དེ་དག་གིས་དེ་ལ་རྗེས་སུ་འཕྱངས་ཤིང་འཁྱུད་དེ།

རྣམ་པ་དུ་མར་ཉེ་བར་བསྐྱོད་ནས་སླར་ཡང་དེས་ལྷ་ལ་འདི་སྐད་སྨྲ་ཞིང་གནས་ཏེ།

གཞོན་ནུ་ནགས་དང་ཉེ་བའི་ནགས་རྣམ་པ་དུ་མ་དག་རྣམས་རྣམ་པ་སྣ་ཚོགས་པའི་ལྷའི་ཚོགས་ཀྱིས་ལེགས་པར་གང་བ་མཐོང་ན།

དགའ་བ་རྣམ་པ་སྣ་ཚོགས་པ་དང་བྱ་རྣམ་པ་སྣ་ཚོགས་པ་རྣམས་ཀྱི་སྒྲ་ཐོས་ན་ཡིད་འཕྲོག་པ་དང་།

སྣ་ཚོགས་པའི་འབབ་ཆུ་དང་།

མཚེའུ་ཕུན་སུམ་ཚོགས་པ་དང་ལྡན་པས་མཛེས་པ།

རིན་པོ་ཆེ་སྣ་བདུན་གྱི་རི་སྣ་ཚོགས་པ་བརྒྱ་སྟོང་གི་ཕུང་པོ་མཐོན་པོ་འབར་བ་དང་།

སྨན་ལྗོངས་དང་རི་ཁྲོད་ཀྱི་ཆ་ཤས་མཛེས་པ་སྣ་ཚོགས་པ་དང་།

བྱ་རྣམ་པ་སྣ་ཚོགས་པའི་སྐད་ཀུན་ཏུ་འབྱིན་པ་དང་།

རྫིང་བུ་རྣམས་ཀྱི་ས་གཞིའི་ཆ་ཤས་ལེགས་པ་རྣམས་དང་དེ་དག་ཡོན་ཏན་དེ་ལྟ་བུ་དང་ལྡན་པ་རྣམས་སུ་ལྷ་ཁྱོད་ཉིད་བདག་ཅག་རྣམས་དང་ལྷན་ཅིག་དགའ་ཞིང་ཀུན་ཏུ་སྤྱོད་པ་དང་།

རྣམ་པ་དུ་མར་རྒྱགས་པས་གནས་ཉེ་བར་བསྟེན་པར་གྱིས་ཤིག །

དེ་ནས་གསར་དུ་སྐྱེས་པའི་ལྷས་དེ་དག་རྣམས་ཀྱི་དྲུང་ནས་དེ་ལྟར་ཐོས་ནས་འདི་སྐད་སྨྲས་ཏེ།

ཇི་ལྟར་འདོད་པར་དེ་དག་རྣམས་བྱ་ལ་རག་མོད་དེ་དེ་སྐད་སྨྲས་ནས་དེའི་རྗེས་ལ་སྟན་ལས་ལངས་ཏེ་བདེ་བ་ཐམས་ཅད་ལ་སྤྱད་པའི་དོན་དུ་རང་དབང་དུ་གྱུར་པའི་ལྷ་མོ་དེ་དག་རྣམས་ནགས་དང་ཉེ་བའི་ནགས་ཐམས་ཅད་དུ་འགྲོ་བར་བྱེད་དེ།

གླུ་དང་རྔ་སྒྲ་དང་རོལ་མོ་སྣ་ཚོགས་པ་ལག་ན་ཐོགས་པ་བག་མེད་པའི་ས་པ་རྣམས་བག་མེད་པའི་སའི་དོན་དུ་ཉེ་བར་ཀུན་ཏུ་འགྲོ་བར་བྱེད་དོ།

དེ་ནས་དེ་དག་ཉིད་ཀྱི་སྔོན་དུ་བདེ་བས་གནས་པའི་དབང་དུ་བྱས་ནས་འགྲོ་བར་གྱུར་པ་རྣམས་དེ་ནས་མཉམ་དུ་འགྲོགས་པའི་ལྷའི་བུ་མོ་རྣམས་ལྷ་མོ་གཞན་དང་ལྷན་ཅིག་རྩེ་བར་བྱེད་ལ།

དེ་དག་ཕན་ཚུན་དུ་བརྔོས་པར་གྱུར་པས་ལྷ་དེ་དང་ཡང་ཕན་ཚུན་དུ་ལེགས་པར་མཐོང་ནས་ལྷ་དེ་དགའ་བ་ཉིད་སྐྱེས་ལ།

འཐུན་པ་ཀུན་ཏུ་སྐྱེ་ཞིང་དེ་དག་རྣམས་ཀྱང་ཕན་ཚུན་

ལྷན་ཅིག་ཏུ་སྟེ།

ལྷ་དང་ལྷ་མོ་དེ་དག་ཀྱང་ཕན་ཚུན་ལྷན་ཅིག་ཏུ་ཡིད་ཀུན་ཏུ་འདྲེས་པའི་ཚོགས་དེ་དག་ཐམས་ཅད་མ་ལུས་པ་རྣམས་གང་ན་རྩེད་མོའི་ནགས་ཞེས་བྱ་བའི་ནགས་དཔག་ཚད་སྟོང་ཕྲག་གསུམ་ཡོད་པ་དེར་འགྲོའོ།

ནགས་དེ་ན་ཡང་བརྒྱ་སྟོང་བྱེ་བ་ཁྲག་ཁྲིག་དུ་མའི་ཚོགས་པ་རྣམས་ཀྱིས་ལེགས་པར་གང་བ།

གང་གི་དགའ་བའི་ཁྱད་པར་གྱི་དབང་དུ་བྱས་ན་ནི་དགའ་བའི་ཚལ་ཞེས་བྱ་བའི་ནགས་ཆེས་འཇིགས་པའི་འབྲོག་དགོན་པ་དང་འདྲ་བ་ཡིན་ནོ།

རྒྱུན་གནས་ན་རྣམ་པར་རྒྱུ་བའི་ལྷ་རྣམས་ཀྱི་སའི་རྩེད་མོའི་ནགས་ནི་དེ་ལྟར་དགའ་བ་ཡིན་ནོ།

དེ་ནས་ལྷ་དེ་སྔ་ནས་མ་མཐོང་བའི་དགའ་བ་དེ་དག་རྣམས་དང་།

སྔར་མ་མཐོང་བ་རྣམས་དང་།

སྔར་མ་ཐོས་པ་རྣམས་རྣམ་པར་རྟག་ཏུ་མེད་པ་དང་དཔེ་མེད་པར་རྗེས་སུ་མངོན་པར་མཐོང་ནས་བཞིན་རབ་ཏུ་དགའ་བའི་མིག་དང་ལྡན་པ་ལ་ལྷ་གསར་དུ་སྐྱེས་པ་དེ་ལ་ལྷ་མོ་དེས་སྨྲས་པ།

ཇི་ལྟར་བདག་ཅག་ལྷན་ཅིག་སྤྱོད་པ་དང་བཅས་པའི་སྔ་ན་མེད་པ་འདི་དག་རྣམས་ཅི་ཡིན།

གཞན་ཡང་ལྷ་དེ་ལྷའི་ཕྲེང་བའི་མཆོག་རྣམས་འཆང་བ་ལྷ་རྫས་ཀྱི་ཙན་དན་གྱི་གཟུགས་ཀྱི་ལུས་ནམ་མཁའ་ལ་ཁང་བུ་ལ་ལྷན་ཅིག་སྤྱོད་པ་དང་བཅས་པས་གླུ་ལེན་པར་བྱེད་པ་དང་།

རྒོད་པར་གྱུར་པ་དང་འགྱིང་བར་གྱུར་པས་གླུ་དང་བཅས་པས་རོལ་མོའི་སྒྲ་རྣམས་བྱེད་པས་གང་ན་རྒྱལ་པོ་མུ་སུ་ལུན་དྷའི་གནས་དེར་སོང་ངོ་།

གཞན་ཡང་ལྷ་གཞན་རྣམས་ནི་ནམ་མཁའི་ཁང་བུའི་སྤྱོད་ཡུལ་ན་ལྷ་རྫས་ཀྱི་པད་མ་ལག་ན་ཐོགས་པ་ལྷ་རྫས་ཀྱི་སྟན་ལ་འདུག་པ།

ནམ་མཁའ་ལ་དགའ་བར་གྱུར་པས་འགྱིང་ཞིང་འགྲོ་བར་བྱེད་དོ།

ལྷ་གཞན་དག་ཀྱང་ལག་ན་པི་བང་ཐོགས་ནས་ཐམས་ཅད་དུ་འགྲོ་བ་དང་།

རྒྱུ་བ་ཤིན་ཏུ་ཕྲ་བ་བརྒྱ་ཕྲག་དུ་མ་རྣམས་བརྟོལ་ཞིང་ཉམས་པ་མེད་པར་དེ་དག་རྣམས་གང་ནས་རྒྱལ་པོ་ཆེན་པོ་མུ་སུ་ལུན་དྷའི་གནས་དེར་རབ་ཏུ་དགའ་བའི་ཡིད་ཀྱིས་ལེགས་པར་ཉེ་བར་འགྲོ་བར་བྱེད་དོ།

ཡང་ལྷ་གཞན་རྣམས་ནི་ནམ་མཁའ་ལ་ལེགས་པར་གནས་ནས་ལྷ་རྫས་ཀྱི་མེ་ཏོག་གི་ཆར་འབེབས་ཤིང་གླུ་ལེན་པ་དང་

ཡང་ལྡན་པས་ལྷན་ཅིག་སྤྱོད་པ་རྣམས་དང་བཅས་པ་གང་ན་མུ་སུ་ལུན་དྷའི་གནས་ཡོད་པ་དེར་ཉེ་བར་བདེ་བར་འགྲོའོ།

དེ་ལྟར་རྣམ་པ་དུ་མར་ཡང་རྣམ་པར་རྟོག་པ་དུ་མ་དག་གིས་དགའ་བ་དུ་མ་རྣམས་ཆེར་ཉེ་བར་སྐྱེས་པ་མཐོང་བ་ན་ལྷ་གསར་དུ་སྐྱེས་པ་དེར་འགྲོ་བར་བྱེད་དེ་ལྷ་མོ་དེ་དག་གི་ཚོགས་དེ་དག་རྣམས་དང་ལྷ་དུ་མས་འཐུན་པ་དང་སྙན་པའི་ཚིག་རྣམ་པ་དུ་མ་རྗོད་པར་བྱེད་ཅིང་འགྲོའོ།

དེ་ནས་ལྷ་གསར་དུ་སྐྱེས་པ་དེས་ཤིན་ཏུ་རིང་བ་ནས་ཉི་མ་བརྒྱ་སྟོང་དང་མཚུངས་པའི་འོད་རྣམས་གང་དག་མཐོང་བ་ནི།

གང་དག་ལྷ་ཡིན་པ་དེ་དག་རྣམས་ཀྱིས་ཀྱང་མིག་དག་གིས་བལྟ་བར་བྱ་མི་ནུས་པ་རྣམས་དང་།

མཉན་པར་བྱ་བ་རྒྱ་ཆེན་པོའི་སྒྲ་རྣམས་ཀྱང་ཐོས་པར་གྱུར་ཏེ་དགའ་བ་དང་།

གསལ་བ་དང་མ་འདྲེས་པ་དང་མཚུངས་པའི་སྒྲ་རྣམས་ཕྱོགས་བཞིར་ཉེ་བར་རྙེད་ནས་ལྷ་དེ་ཡིད་ཆེས་ཤིན་ཏུ་དགའ་བ་དེས་ལྷན་ཅིག་སྤྱོད་པ་རྣམས་ལ་འདི་སྐད་ཅེས་སྨྲས་སོ།

འདིར་ཆེས་ལྷག་པར་དགའ་བར་གྱུར་པའི་གནས་འོད་མངོན་པར་གསལ་བ་དང་ལྡན་པར་མཐོང་བ་འདི་ཅི་ཡིན།

གང་ཡང་འདིར་རྣམ་པ་འདི་ལྟ་བུའི་ཅ་ཅོ་རྒྱ་ཆེན་པོ་སྙན་ཞིང་སྙོམས་ལ་རྣམ་པར་འདྲེས་པའི་སྒྲའི་ཚོགས་རྣམས་དང་གར་ཡང་ཐོས་པར་འགྱུར་རོ།

དེ་ནས་ལྷན་ཅིག་སྤྱོད་པ་དེ་དག་གིས་ལྷ་དེ་ལ་འདི་སྐད་ཅེས་སྨྲས་ཏེ།

ཇི་ལྟར་འཐབ་བྲལ་བའི་ལྷ་རྣམས་ཀྱི་མངའ་བདག་འདི་ནི་མདུན་དུ་བརྒྱ་སྟོང་ཕྲག་དུ་མས་ཡོངས་སུ་བསྐོར་ནས་དགའ་བར་བྱེད་ཅིང་།

པད་མ་བརྒྱ་ཕྲག་དང་ལྷའི་བུ་མོ་དུ་མའི་ཚོགས་ཀྱིས་ཡོངས་སུ་བསྐོར་ནས་ལྷའི་ཚོགས་ཐམས་ཅད་ཀྱིས་མངོན་པར་སྟོད་པར་བྱེད་པ་ནི།

དགའ་ལྡན་གྱི་མངའ་བདག་རབ་ཏུ་ཞི་བ་བཞིན་དུ་རྩེ་ཞིང་དགའ་ལ་ཀུན་ཏུ་སྤྱོད་པར་ཡང་བྱེད་དོ།

དེ་ནས་ཡང་ལྷ་གསར་དུ་སྐྱེས་པ་དེ་ངོ་མཚར་བ་གཞན་ཡིད་ལ་སྐྱེས་ཏེ།

གཞན་རབ་ཏུ་ཞི་བ་ཞེས་བྱ་བ་གཞན་གང་ལ་རྣམ་པ་འདི་ལྟ་བུའི་ས་དག་ཡོད་པར་གྱུར་པའི་དེ་གང་ཡིན་ན་ཞེས་ལྷ་དེས་ལྷན་ཅིག་སྤྱོད་པ་དེ་དག་རྣམས་ལ་སླར་སྨྲས་པ།

གང་ལ་རྣམ་པ་འདི་ལྟ་བུའི་ས་ཡོད་པའི་རབ་ཏུ་ཞི་བ་ཞེས་བྱ་བ་དེ་ནི་གང་ཡིན་ལ་ངེས་པར་དེ་

གང་ན་གནས་པ་ཡིན།

དེས་ནི་བདག་ཅག་རྣམས་འདིར་ཀུན་ནས་མངོན་པར་མཐོང་བ་ཡིན་ལ་བདག་ཅག་གིས་མ་མཐོང་ངོ་།

དེས་ཚིག་དེ་དག་རྣམས་ཐོས་ཞིང་དྲན་པར་ཡང་བྱས་ནས་གསར་དུ་སྐྱེས་པ་འདིས་བདག་ཉིད་ཆེན་པོ་ཇི་ལྟ་བ་བཞིན་དུ་ཀུན་ནས་ཤེས་པར་བྱས་ནས་སྨྲས་པར་གྱུར་པ།

རབ་ཏུ་ཞི་བ་བདག་ཅག་རྣམས་ཀྱིས་བལྟ་བར་བྱའོ།

དེ་ལ་སླར་ཉིད་བོས་ནས་འདི་སྐད་ཅེས་བརྗོད་དེ་ཇི་ལྟར་དགའ་ལྡན་ཞེས་བྱ་བའི་ལྷ་རྣམས་གང་དག་བདག་ཅག་གི་སྟེང་ན་གནས་པ་ཡིན་ཏེ།

གང་དག་གི་ཁྱད་པར་གྱིས་ཀྱང་བདག་ཅག་རྣམས་བརྒྱ་སྟོང་གི་ཆ་ཙམ་དུ་ཡང་མི་འགྱུར་ཞིང་རིམ་པ་ཐམས་ཅད་དང་།

བདེ་བ་རྣམས་ཐམས་ཅད་ལས་དང་འབྲས་བུའི་འབྲེལ་པ་ཐམས་ཅད་ཀྱིས་ཀྱང་དེ་འཐབ་བྲལ་གྱི་ལྷ་དེ་རྣམས་ཅུང་ཟད་ཙམ་ཡང་མ་ཡིན་ནོ།

འདི་དག་རྣམས་ཀྱང་འཐབ་བྲལ་བ་རྣམས་ཀྱི་མངའ་བདག་པས་ཀྱང་ཆེས་ལྷག་པའི་གཟི་བརྗིད་ཅན་ནོ།

དེ་ཡང་བདག་ཅག་རྣམས་ཀྱི་གོང་ན་གནས་སོ།

ལྷ་གང་དག་རྣམས་སམ་དེ་དག་རྣམས་ཀྱིས་ཀྱང་རུང་དེ་ལ་འགྲོ་བར་བྱ་བའི་ཡུལ་མ་ཡིན་གྱི།

ལྷ་གང་དག་གཙོ་བོར་གྱུར་པ།

ཤིན་ཏུ་སྟོབས་ཆེ་བ་དེ་དག་རྣམས་ལས་འགའ་ཞིག་གནས་དེར་འགྲོ་བར་བྱེད་དོ།

ཐམས་ཅད་ཀྱིས་ནི་གནས་དེར་འགྲོ་ནུས་པ་མ་ཡིན་ནོ།

དེ་ནས་ལྷ་གསར་དུ་སྐྱེས་པ་དེ་འདི་སྙམ་དུ་སེམས་པར་གྱུར་ཏེ།

ཨེ་མ་བདག་ཅག་རྣམས་ཀྱི་བདེ་བ་ནི་ཅི་ལྟ་བུ་ཞིག་ཡིན་ན་ལྷ་དེ་དག་རྣམས་ནི་འཐབ་བྲལ་བའི་ལྷ་རྣམས་ཀྱི་མངའ་བདག་གི་དྲུང་ན་ཡང་བླ་ལྷག་པར་གྱུར་ཏོ།

དེ་ནས་དེ་ལྟར་འདི་དག་རྣམས་ཡུད་ཙམ་ཞིག་བསམས་ནས་ཡང་སླར་ཡང་གཡོ་བའི་སེམས་དང་ལྡན་པའི་ཕྱིར་དང་ཡུལ་ལ་ཤིན་ཏུ་ཁ་ཕྱོགས་པས་ཕྲོགས་པའི་ཡིད་ཀྱིས་ཀྱང་དགའ་བ་དེ་དག་རྣམས་ལ་ལྷ་དེ་དག་རྣམས་མངོན་པར་ལྟ་བར་རྩོམ་པར་བྱེད་པ་ན།

ཀུན་ནས་མཆོག་ཏུ་སྙིང་ཆེས་དགའ་བའི་རྣམ་པ་གང་དང་གང་གིས་དེ་དེ་ལྟར་རྣམ་པ་ཐམས་ཅད་མཐོང་བར་གྱུར་པ་ན་དལ་བུས་རིམ་གྱིས་ཡུལ་དེར་ཕྱིན་པར་གྱུར་ཏོ།

ཡུལ་གང་ན་རྒྱལ་པོ་མུ་སུ་ལུན་དྷ་དེ་དགའ་བར་བྱེད་དེ་ལྷ་བརྒྱ་སྟོང་ཕྲག་བྱེ་བ་དུ་མ་རྣམས་

ཀྱིས་ཡོངས་སུ་བསྐོར་བ་པད་མ་བརྒྱ་ཕྲག་དང་ལྷའི་བུ་མོ་མང་པོ་རྣམས་ཀྱིས་ཀྱང་དཔལ་ཤིན་ཏུ་འབར་བར་གྱུར་པ།

མཚུངས་པ་མེད་པའི་གཟུགས་དང་ཆ་བྱད་དགའ་ཞིང་འཚེར་ལ་གཞོན་པ།

གཟི་བརྗིད་ཀྱི་ཡོན་ཏན་ཕུན་སུམ་ཚོགས་པ་དེ་བཞིན་དུ་དཔེ་མེད་པར་རྣམ་པར་འབར་རོ།

ལྷ་དེ་དག་རྣམས་ཐམས་ཅད་ཀྱང་དེའི་འོད་ཀྱིས་མངོན་པར་ཟིལ་གྱིས་གནོན་པར་བྱེད་དེ།

དཔེར་ན་ཉི་མས་གཟའ་དང་སྐར་མ་དང་རྒྱུ་སྐར་ཐམས་ཅད་ཀྱི་འོད་ཟིལ་གྱིས་མནན་ནས་རྣམ་པར་སྣང་བར་བྱེད་དོ།

འཐབ་བྲལ་གྱི་མངའ་བདག་དེ་གཟི་བརྗིད་མཆོག་དང་ལྡན་པའི་སེང་གེའི་ཁྲི་ཆེ་ཞིང་ཤིན་ཏུ་བཟང་བ་རེག་པར་འཇམ་པར་གྱུར་པ་འོད་མཐའ་ཡས་པ་དང་ལྡན་པའི་རིན་པོ་ཆེའི་རང་བཞིན་ལ་འདུག་པར་གྱུར་ནས་ཤིན་ཏུ་ངོ་མཚར་བའི་གཟུགས་དང་ཆ་བྱད་དང་གཟི་བརྗིད་ཕུན་སུམ་ཚོགས་པའི་ཤིན་ཏུ་རྣར་སྙན་པར་གྱུར་པའི་གླུ་རྣམས་དང་རྔ་སྒྲ་རྣམས་དང་འཇོ་སྒེག་གི་ཁྱད་པར་དུ་མས་ཤིན་ཏུ་ལྷག་པར་ཡང་སྙིང་དང་རྣ་བའི་ཁུང་རྒྱས་པས་ཡུལ་དེ་ན་གནས་པ་རྣམས་འདོད་པའི་ཡོན་ཏན་ལྔ་ལ་ལོངས་སྤྱོད་པའི་རྣམ་པ་ཇི་ལྟ་བུ་རྣམས་ནི་འགའ་ལ་ཡང་ཡོད་པ་མ་ཡིན་ནོ།

ཇི་ལྟར་བརྒྱ་བྱིན་གྱི་དཔལ་རྣམས་ཡང་ཅུང་ཟད་ཀྱང་མ་ཡིན་ཏེ།

དེའི་ལུས་གང་ཡིན་པ་ལས་འོད་ཟེར་གྱི་རྒྱལ་པོ་ལྔ་བརྒྱ་ཀུན་ནས་འཕྲོ་བས་མཆོག་ཏུ་གསལ་བར་བྱེད་པ་དང་ལྡན་ལ།

བརྒྱ་བྱིན་གྱི་ནི་ཕྲག་པ་གཉིས་ལས་མཆོག་གཉིས་འཕྲོ་བའོ།

དེའི་དབང་པོ་དྲུག་པོ་རྣམས་ནི་རིས་འཐུན་པ་རྣམས་སུ་སྐལ་བ་མཉམ་པ་ལས་དང་དགེ་བའི་ཆོས་རྣམས་ཀྱི་མཐའ་ལས་བྱུང་བ་ཡིན་པས་བརྒྱ་བྱིན་གྱི་དྲུང་ན་ཡོན་ཏན་རྣམས་བརྒྱ་ལོག་ཏུ་འགྱུར་རོ།

དེས་ན་བརྒྱ་བྱིན་གྱི་དཔེར་མི་བཟོད་དོ།

དེའི་གཟུགས་དང་དེའི་བདེ་བ་དང་།

དེའི་ཡུལ་དང་དེའི་འཁོར་དཔེ་མེད་པ་རྣམས་ཡིན་པའི་གང་དག་གཟི་བརྗིད་དམན་པའི་ལྷ་དེ་དག་ཐམས་ཅད་ཀྱི་ཁྱད་པར་གྱིས་ཀྱང་བརྒྱ་བྱིན་ཅུང་ཟད་ཀྱང་མ་ཡིན་ན་མུ་སུ་ལུན་དྷ་ནི་འོད་ཟེར་གྱི་ཕུང་པོ་རང་གི་ནང་གི་ནང་དང་ཕྱི་རོལ་རྣམས་ཀྱང་མཆོག་ཏུ་གཙང་བར་གྱུར་པ་དེ་ལྟ་བུ་

ལ་ཇི་ལྟར་དཔེར་བྱ་བར་ནུས་ཏེ་མི་ནུས་སོ།

དེ་ནས་ལྷ་གསར་དུ་སྐྱེས་པ་དེའི་གཟུགས་དང་དབང་ཕྱུག་དང་རྒྱགས་པ་དང་འོད་ཀྱི་རང་བཞིན་རྣམས་རྒྱང་རིང་བ་ནས་དང་ལྷན་ཅིག་ཏུ་མཐོང་བ་ཉིད་ཀྱིས་དེ་འདི་ལྟར་ཉམས་དམའ་བར་གྱུར་ཏེ།

ཀྱེ་མ་མ་ལ་བདག་ཅག་རྣམས་ལ་འོད་ཡོད་པ་འདིས་ནི་བརྒྱའི་ཆར་ཡང་སྟོང་གི་ཆར་ཡང་།

བརྒྱ་སྟོང་གི་ཆར་ཡང་མི་ཕོད་དེ་མཆོག་ཏུ་དགེ་བའི་ལས་ཀྱི་མཐའ་ལ་སྤྱད་པ་འདི་ནི་ངེས་པ་ཁོ་ནར་ལྷ་རྣམས་ཀྱི་མངའ་བདག་མུ་སུ་ལུན་དྷ་ཡིན་ནོ།

འདིའི་ཡང་གཟི་བརྗིད་རྣམས་འདི་ཡིན་ན་རབ་ཏུ་ཞི་བ་ཞེས་བྱ་བ་གཞན་གཟི་བརྗིད་མཆོག་དང་ལྡན་པ་གཟུགས་ཕུན་སུམ་ཚོགས་པ་གང་ཡིན་པ་བདག་གིས་ཐོས་པ་ལ་ལྟ་སྨོས་ཀྱང་ཅི་དགོས་ཏེ།

ལྷ་འདི་དག་རྣམས་ཀྱི་ལས་ཀྱི་ལམ་གོང་ནས་གོང་དུ་ཆེས་ཁྱད་པར་དུ་འཕགས་པ་རྣམས་ལ་འཇུག་པའི་ཕྱིར་རོ།

དེ་ནས་དེ་ལྟར་ངེས་པར་བཟུང་ནས་གཞན་ཡང་དལ་བུས་གླུ་དང་རྔ་སྒྲ་དང་རོལ་མོའི་སྒྲ་སྒྲོགས་པ་ལྷག་མ་རྣམས་ཉན་པར་བྱེད་དོ།

དེ་ནས་ལྷ་གསར་དུ་སྐྱེས་པ་དེ་བརྒྱ་ལ་ཅིག་ན་ཡང་འཐབ་བྲལ་གྱི་མངའ་བདག་དེ་དང་ཉེ་བར་རིམ་གྱིས་སླེབ་པར་གྱུར་པ་ན་ཇི་ལྟར་དེ་དག་གཙོ་བོར་གྱུར་པ་རྣམས་དང་།

གཟུགས་དང་ཆ་བྱད་དང་མདངས་དང་འོད་དང་ཚད་དང་ཤིན་ཏུ་མཉན་པ་བླ་ལྷག་པ་ཇི་ལྟ་བུ་དང་ལྡན་པའི་ལྷའི་བུ་མོ་བདུན་སྟོང་གིས་གང་དང་ཐག་ཉེ་བ་ན་ལྷག་པར་སྙན་པའི་གླུ་ལེན་ཅིང་འཇོ་སྒེག་པ་དང་།

བཞད་གད་དང་གཡོག་གི་བྱ་བ་རྣམས་ཀྱང་བྱེད་ལ་ལྷའི་བུ་མོའི་ཚོགས་གཞན་རྣམས་ནི་གྲངས་ཡོད་པ་མ་ཡིན་ནོ།

ཤེས་བཞིན་དུ་ཡང་ཐག་ཉེ་བ་དང་།

རིང་བའི་ཡུལ་དུ་དགའ་ཞིང་བདུད་རྩི་རྣམས་ཀྱང་འཐུང་བར་བྱེད་དོ།

ཕན་ཚུན་ལྷན་ཅིག་ཏུ་རྒྱགས་པ་ལ་དོན་གཅིག་པ་རྣམས་ཐམས་ཅད་ཀྱང་འདི་སྙམ་དུ་སེམས་ཏེ།

བདག་གཅིག་པུ་མུ་སུ་ལུན་དྷ་དང་ལྷན་ཅིག་ཏུ་དགའ་བར་བྱའི་གཞན་རྣམས་དང་ནི་མ་ཡིན་ནོ།

གཞན་རྣམས་འགའ་ཞིག་གིས་ཀྱང་འགལ་བར་མི་བྱེད་པར་བདག་གཅིག་པུ་ཁོ་ན་ཚུལ་ཐམས་ཅད་ཀྱིས་འཐུན་པར་བྱའོ།

ཇི་ལྟར་བདག་གིས་གྲོང་པའི་ཆོས་ཀྱི་ཡང་ཐ་མལ་པའི་

ཀུན་ཏུ་སྦྱོར་བའི་ཆོས་ཀྱིས་འཐབ་བྲལ་བའི་བརྗོད་པ་དང་ལྡན་པས་ཀུན་ཏུ་སྦྱོར་བ་ཐོབ་པར་འགྱུར་ན་ཞེས་རྒྱུ་འདིས་ལྷའི་བུ་མོ་རྣམས་ཀུན་ཏུ་རྟོག་པས་ངེས་པར་འོང་བར་འགྱུར་ཏེ།

རེ་རེ་ཞིང་ཐམས་ཅད་ཀྱང་ཇི་ལྟར་བདག་ཁོ་ནས་ཐམས་ཅད་ཀྱིས་འཐུན་པར་བྱའོ།

བདག་ཉིད་ཐམས་ཅད་ཀྱིས་ངས་ལྷ་ཉིད་དང་ལྷན་ཅིག་ཏུ་དགའ་བར་བྱའོ།

རྒྱུ་འདིས་བདག་མུ་སུ་ལུན་དྷ་དང་ལྷན་ཅིག་ཏུ་དགའ་བར་བྱའི་གཞན་རྣམས་དང་ནི་མ་ཡིན་ལ་བདག་གཅིག་པུས་སྡུག་པར་ལྟའི་གཞན་འགའ་ཞིག་གིས་ཀྱང་དེ་ལྟར་རྗེས་སུ་འཐུན་པས་ནི་མ་ཡིན་ནོ།

བདག་གིས་གྲོང་པའི་ཆོས་ཀྱི་ཡང་ཐ་མལ་པའི་ཀུན་ཏུ་སྦྱོར་བའི་ཆོས་ཀྱིས་འཐབ་བྲལ་བའི་བརྗོད་པ་དང་ལྡན་པས་ཀུན་ནས་སྦྱོར་བ་ཇི་ལྟ་བ་འཐོབ་པར་འགྱུར་བ་ཡིན་ནོ།

རྒྱུ་འདིས་དེ་དག་རྣམས་ཐམས་ཅད་དེ་བཞིན་དུ་ཀུན་ནས་འོང་བར་འགྱུར་རོ།

རེ་རེ་ཞིང་ཐམས་ཅད་ཀྱང་ངས་འདི་ལ་འཐུན་པ་ཐམས་ཅད་བྱའོ།

ངས་བདག་ཉིད་ཐམས་ཅད་ཀྱིས་ལྷ་དང་གཉིས་རྒྱུ་འདིས་ལྷན་ཅིག་ཏུ་དགའ་བར་བྱའོ།

སླར་ཡང་ལྷ་གསར་དུ་སྐྱེས་པ་དེ་གང་ན་མུ་སུ་ལུན་དྷ་ལྷ་རྣམས་ཀྱི་བདག་པོ་ཡོད་པ་དེར་ཉེ་བར་ལེགས་པར་འགྲོའོ།

དེ་དང་ཤིན་ཏུ་ཐག་ཉེ་བར་ཕྱིན་ནས་མཐོང་བ་ལྷ་བརྒྱ་སྟོང་ཕྲག་དུ་མས་ཡོངས་སུ་བསྐོར་བའི་དབུས་ན་ཡང་ཆེས་གསལ་བར་གྱུར་པའི་དཔལ་དང་ལྡན་པ་རྣམ་པ་དུ་མ་ནས་ཡོན་ཏན་ཐམས་ཅད་ཕུན་སུམ་ཚོགས་པའི་ཚིག་རྣམས་ཀྱིས་དགའ་བར་བྱེད་དོ།

དེས་ལྷ་རྣམས་དང་གསར་དུ་སྐྱེས་པ་ཡང་མི་རྟོགས་པ་ནི་འགའ་ཡང་ཡོད་པ་མ་ཡིན་ནོ།

དེས་བརྒྱ་ལ་ཞིག་ན་ལྷ་གསར་དུ་སྐྱེས་པ་དེ་མཐོང་ན་གང་ན་ལྷ་གསར་དུ་སྐྱེས་པ་ཡོད་པ་དེར་བཞིན་མངོན་དུ་བསྒྱུར་ནས་མིག་གཏོད་པར་བྱེད་དོ།

ལྷ་གཞན་རྣམས་ཀྱིས་ཚིག་སྙན་པ་ཇི་ལྟ་བུ་དང་ལྡན་པས་གསར་དུ་སྐྱེས་པའི་ལྷ་དེ་ལ་སྐུལ་བར་བྱེད་དེ།

གཟིགས་པར་མཛད་པ་འདི་ནི་ཇི་ལྟ་བ་བཞིན་དུ་ལྷ་རྣམས་ཀྱི་རྒྱལ་པོ་ཡིན་ནོ།

དེ་ཡིན་པས་ན་ཕྱག་ལེགས་པར་འཚལ་བར་གྱིས་ཤིག །

དེ་ལྟར་དེ་བཞིན་དུ་ལྷ་གསར་དུ་སྐྱེས་པ་དེ་དང་

ཉེ་བར་སོང་ནས་དེའི་སྤྱན་སྔར་རབ་ཏུ་ལེགས་པར་བསྐུལ་བ་དང་ཕྱག་འཚལ་བར་བྱེད་དོ།

དེ་ནས་དེས་དེ་ལྟར་ཤེས་ནས་མུ་སུ་ལུན་དྷས་ཕྱིར་ལ་སྨྲས་པ།

གསར་དུ་སྐྱེས་པ་ཇོ་བོ་ཁྱོད་འཐབ་བྲལ་གྱི་ལྷ་རྣམས་སུ་སོང་དང་འཐབ་བྲལ་གྱི་ལྷ་འདི་རྣམས་ནི་དགའ་བར་འགྱུར་བ་ཡིན་ཏེ།

ཆེས་རབ་ཏུ་སེམས་དགའ་བ་རྣམས་དགེ་བའི་ལས་ཀྱི་ཚོགས་རྣམས་ཀྱི་ལས་ཀྱིས་འདིར་སྐྱེས་པ་ཡིན་པས་ན་དེས་ན་བདེ་བར་འོངས་སམ།

དེ་ལྟར་ཡིན་པ་ཡང་རང་གི་ལས་ཀྱི་འབྲས་བུ་ལ་ལོངས་སྤྱོད་པས་དུས་ཤིན་ཏུ་རིང་པོར་བག་ཡོད་པས་ལྷའི་འཇིག་རྟེན་འདི་ན་གནས་པ་ཡིན་ནོ།

དེ་ནས་དེའི་དུས་ན་འཐབ་བྲལ་གྱི་མངའ་བདག་གིས་ཚིགས་སུ་བཅད་པ་ཇི་ལྟ་བ་བཞིན་དུ་བརྗོད་པ།

ལྷ་ནི་སྐྱེས་པར་འགྱུར་བ་ཡི།

དགའ་བ་གང་ན་སྐྱེས་པ་དེས།

འཆི་འཕོ་བ་ཡི་སྡུག་བསྔལ་གྱི།

བཅུ་དྲུག་ཆར་ཡང་མི་ཆོག་གོ།

མནོག་ཆུང་འབྲས་བུ་དུ་མ་ཡིས།

རྟག་ཏུ་སྐྱེས་བུ་སླུ་བ་པོ།

དྲི་ཟའི་གྲོང་ཁྱེར་དང་འདྲ་བ།

འདོད་པ་མྱང་བ་ཙམ་བཟང་བའི།

གང་དེ་སེམས་ཅན་འཇོམས་དེ་དག །

བློ་ལྡན་གྱིས་ནི་ཡིད་མ་རྟོན།

དེ་ལྟར་འཐབ་བྲལ་གྱི་བདག་པོ་དེས་ལྷ་གསར་དུ་སྐྱེས་པ་དེ་ལ་རྗོད་པར་བྱེད་དོ།

དེ་ནས་ལྷ་གསར་དུ་སྐྱེས་པ་དེས་དེ་ལ་འདི་སྐད་ཅེས་སྨྲས་ཏེ།

ལྷ་ལགས་བདག་གིས་འདིར་ཉེས་དམིགས་ཇི་ལྟ་བར་མི་ཤེས་དོན་དང་ཕན་ཚུན་གྱི་དགོས་པ་ཡང་རིག་ཅིང་ཤེས་པ་མ་ཡིན་པ་འདི་ཇི་ལྟ་བར་ལྷ་རྣམས་ཐམས་ཅད་ལ་འགྱུར་བ་ཡིན་ལ་དེ་ལྟར་བདག་ཀྱང་ཡིན་ནོ།

དེ་ནས་འཐབ་བྲལ་གྱི་བདག་པོ་མུ་སུ་ལུན་དྷས་ཚིགས་སུ་བཅད་པས་འདི་སྐད་ཅེས་སྨྲས་པ།

ཇི་ལྟར།

འཆི་བདག་དུས་ནི་འབྱུང་བ་ན།

འགའ་ཞིག་འགར་ཡང་བདེ་བ་མིན།

དེ་བཞིན་དུ་ནི་འགྲོ་ན་ཡང་།

འགའ་ཞིག་རྗེས་སུ་འགྲོ་བ་མིན།

སེམས་སྣ་ཚོགས་ཤིང་སེམས་ཅན་གཞན།

ཁམས་སྣ་ཚོགས་དང་དེ་བཞིན་གཞན།

དེས་ན་རྣམ་པ་སྣ་ཚོགས་པའི།

སྲིད་པའི་འཆིང་བའི་ལས་རྣམས་བྱེད།

གང་ཚེ་སྐྱེས་པ་དེ་ཚེ་ནས།

མི་ནི་འཆི་བདག་དབང་དུ་འགྲོ།

སྣ་ཚོགས་རྨོངས་

པར་ལྟུང་བ་ཡི།

འཇིགས་པ་དེ་ཡང་མ་རིག་གོ།

གང་ཚེ་འཆི་འཕོ་བྱུང་བ་ནི།

སྲིད་པ་འཇིག་པར་བྱེད་པའི་མཆོག །

འཇིགས་གང་འཆི་བདག་ཆེ་འོངས་པ།

རྨོངས་པ་བདག་གིས་དེ་ཚེ་རྟོགས།

བག་ཡོད་ལ་དགའ་སྐྱེ་བ་ནི།

ཡང་དང་ཡང་དུ་འབྱུང་བ་མིན།

ལྷ་ནི་ཡུལ་རྣམས་ཀྱིས་རྨོངས་པ།

ཡིད་མེད་པས་ཀྱང་རྟོགས་པ་མིན།

ཡུལ་གྱི་ཆགས་པས་ཀུན་ལྟ་བའི།

སྲེད་པའི་དུག་གིས་རྨོངས་བྱས་པ།

རྟོགས་མིན་རྟག་ཏུ་ལྷ་ཡི་ནི།

འཆི་འཕོ་དེ་ནི་འཇིགས་ཆེན་ཡིན།

འཆི་བས་ཐ་མར་དེ་བཞིན་དུ།

སྡུག་བསྔལ་ལུས་ཅན་རྣམས་ལ་སྐྱེད།

ཇི་ལྟར་སྐྱེས་པས་ལྷ་རྣམས་ལ།

འཆི་འཕོ་ཀུན་ཏུ་ངེས་པར་འབྱུང་།

ལས་ཀྱི་རླུང་གིས་ཀུན་ཏུ་འཁོར།

སྦྱོར་བས་ཀྱང་ནི་སྡུག་བསྔལ་ནས།

སྐྱེས་བུ་ལྷུང་བྱེད་འཆི་བདག་སྒྲས།

སེམས་ནི་ཀུན་ཏུ་བསླུས་པ་ཡིན།

ཕ་མེད་མ་ཡང་མེད་པ་དང་།

བཤེས་མེད་གཉེན་འདུན་མེད་པར་ནི།

ལྷན་ཅིག་རང་དབང་མེད་ཅེས་སྨྲ།

དེ་ལྟར་སྐྱེས་བུ་དུས་ཀྱིས་བསྐུལ།

ལྷན་ཅིག་འགྲོགས་མིན་སྐྱེ་བོ་འདི།

སྐྱེ་བོ་ཐ་མལ་པ་ཡིས་བསླུས།

ཡིད་ཀྱི་ཞགས་པ་འབའ་ཞིག་གིས།

སྐྱེ་བོ་སླུ་བར་བྱེད་པ་ཡིན།

སྐྱེ་བོ་རང་གི་སྐྱེ་བོ་འདིར།

སྤུན་ནམ་སྐྱོབ་བྱེད་འགའ་ཡོད་མིན།

འཆི་བདག་དུས་ནི་བྱུང་བ་ན།

རང་སྐྱེའང་ཇི་ལྟར་སྐྱེ་བོ་ཡིན།

ལྷ་རྣམས་གང་གིས་མཐོང་བ་ཡིན།

བདེ་བ་འདི་དག་བདེ་འབྱུང་བ།

དེ་ནི་རབ་ཀྱི་ཤུགས་འགྲོ་བའི།

འཆི་བདག་རྒྱལ་པོས་འཕྲོག་པར་བྱེད།

རྟག་ཏུ་འདོད་པའི་རྗེས་འགྲོ་བ།

ཡུལ་གྱི་འཁྲུལ་པས་བརྐམ་པ་ཡིན།

ངེས་པར་སྡུག་བསྔལ་ཆེ་འབྱུང་བ།

གང་ཡང་རྟོག་པར་འགྱུར་མ་ཡིན།

དེ་ལྟར་ལྷ་གསར་དུ་སྐྱེས་པ་དེ་མུ་སུ་ལུན་དྷ་དེས་ཡང་དག་པ་ཇི་ལྟ་བས་ཆོས་ཉིད་ལ་རྗེས་སུ་བཟུང་ངོ་།

དེ་ནས་ལྷ་དེས་དེ་དག་རྣམས་ཐོས་ནས་ཡུད་ཙམ་ཅིག་སྐྱོ་བས་གནས་པར་གྱུར་ནས།

ཕྱི་ནས་སླར་ཡང་གར་དང་གླུ་དང་རྒོད་པར་བྱེད་པ་དང་རྒྱགས་པ་རྣམས་ཀྱིས་ཀུན་ནས་ཁྲིད་པར་བྱེད་དེ།

རྒྱུ་གང་གི་ཕྱིར་ན་

བྱིས་པ་སོ་སོའི་སྐྱེ་བོ་རྣམས་ཐམས་ཅད་ཀྱི་སྙིང་མི་རྟག་པ་ཡིན་པའི་ཕྱིར་ཏེ།

ཁྱད་པར་དུ་ཡང་གང་གི་ཚེ་བདེ་བར་གྱུར་པ་རྣམས་དང་སྲིད་པ་རྣམས་ཀྱི་དབང་གིས་རྗེས་སུ་འཇུག་པར་འགྱུར་བ་དེའི་བརྒྱ་འགྱུར་གྱིས་ཀྱང་ཆེས་རྩབ་ཧྲལ་ཅན་དུ་འགྱུར་བ་ཡིན་ནོ།

རྒྱུ་འདི་དག་གིས་ན་བག་མེད་པས་གནས་པའི་ལྷ་རྣམས་ཀྱི་སྙིང་ལ་ཆོས་ཀྱི་ཆ་ཤས་ཅུང་ཟད་ཙམ་ཡང་ལེགས་པར་འཇུག་པར་མི་འགྱུར་རོ།

དེ་ནས་ལྷ་གསར་དུ་སྐྱེས་པ་དེ་མུ་སུ་ལུན་དྷའི་གནས་དེ་ལས་ཕྱིར་ཡང་རྩེད་མོའི་ནགས་སུ་བདག་ཉིད་ཀྱི་སྐྱེ་བོ་དེ་དག་རྣམས་ཉིད་ཀུན་དང་བཅས་པ་རྣམས་དང་།

དེ་བཞིན་དུ་གར་བྱེད་པར་འགྱུར་བ་དང་དགའ་བར་གྱུར་པས་འདོད་པའི་ཡོན་ཏན་ལྔ་དང་ལྡན་པའི་ཡུལ་གྱི་བདེ་བ་རྣམས་དང་ཡང་དག་པར་ལྡན་པས་དེ་ཁོ་ན་བཞིན་དུ་ཕྱིར་ཡང་རྒྱུན་གནས་ན་རྣམ་པར་རྒྱུ་བའི་ས་དེ་དག་རྣམས་ཀུན་ཏུ་འགྲོ་བར་བྱེད་དོ།

དེས་བདེ་བའི་ས་དེ་དག་རྣམས་རྗེས་སུ་ཐོབ་ནས་ཀྱང་དེ་དག་ཉིད་དུ་ལྷ་གཞན་དག་རྣམས་དང་ལྷན་ཅིག་དགའ་བར་བྱེད་པ་དང་ཀུན་ཏུ་སྤྱོད་པར་ཡང་བྱེད་དོ།

དེ་ལྷ་གཞན་དེ་དག་རྣམས་དང་ལྷན་ཅིག་དགའ་བར་གྱུར་པ་ལས་ཁྱོགས་ཀྱི་ཁང་བུ་ཡངས་པ་ཞེས་བྱ་བའི་སྐྱེད་མོས་ཚལ་གྱི་ས་ལ་རིམ་གྱིས་འགྲོ་བར་བྱེད་དོ།

དེ་ན་ནི་དགའ་བ་འདི་དག་རྣམས་ཡོད་དེ་ཇི་ལྟར་ཁྲག་ཁྲིག་ཕྲག་ཉི་ཤུར་རྣམ་པ་སྣ་ཚོགས་པ་དང་།

ཁ་དོག་དང་དབྱིབས་སྣ་ཚོགས་པའི་སྐྱེད་མོས་ཚལ་དང་།

པད་མའི་རྫིང་བུ་དང་མཚེའུ་དང་ནགས་དང་ནགས་འདབ་དང་བྱའི་ཚོགས་དང་འབབ་ཆུ་དང་རིའི་རྩེ་མོ་རིན་པོ་ཆེ་སྣ་བདུན་གྱི་རང་བཞིན་དང་།

དེ་འདྲ་བའི་རྣམ་པར་རྟོག་པའི་ཁྱོགས་ཀྱི་ཁང་བུ་རྣམས་ཡིན་ཏེ།

ལྷ་དེ་དག་རྣམས་ཀྱིས་ལེགས་པར་བྱས་པའི་ལས་ཀྱིས་གལ་ཏེ་ལྷ་རྣམས་ཀྱི་ཡིད་ཀྱིས་ཀུན་ཏུ་རྟོག་པར་བྱེད་པ་ནི་ཁྱོགས་ཀྱི་ཁང་བུ་དེ་དག་དང་ནགས་ཚལ་དང་ནགས་འདབ་དང་མཚེའུ་དང་བཅས་པ་རྣམས་ཇི་ལྟ་བ་བཞིན་དུ་ནམ་མཁའི་དཀྱིལ་དུ་འཕགས་ན་ཅི་མ་རུང་དེ་དག་གི་སེམས་བསྐྱེད་པ་ཙམ་ཉིད་ན་ཁང་བུ་དེ་དག་རྣམས་དང་།

ནགས་ཚལ་དང་ནགས་འདབ་དང་མཚེའུ་དང་འབབ་ཆུ་དང་ལྗོན་ཤིང་དང་པད་

མའི་རྫིང་བུ་རྣམས་དང་ཡང་དག་པར་ལྡན་པ་རྣམས་ནམ་མཁའ་ལ་ཀུན་ཀྱང་འཕགས་པ་ནི་བྱ་བཞིན་ནོ།

དེ་ནས་འདི་བཞིན་དུ་ལྷ་རྣམས་ཡིད་ལ་ཀུན་ཏུ་སེམས་པར་བྱེད་དེ།

ཇི་ལྟར་ཁྱོགས་ཀྱི་ཁང་པ་ཆེན་པོ་འདི་དག་རྣམས་བདག་ཅག་བདེ་བས་གནས་པའི་དོན་དུ་མི་གཡོ་བར་གནས་པར་གྱུར་མོད།

དེ་དག་གི་སེམས་བསྐྱེད་པ་ཙམ་ཉིད་ཀྱིས་དེ་བཞིན་དུ་འགྱུར་རོ།

གལ་ཏེ་གཞན་ཡང་འདི་ལྟར་སོ་སོར་ཀུན་ཏུ་རྟོག་པར་བྱེད་དེ།

ཟས་དང་སྐོམ་གྱི་ཆུ་བོ་རྣམ་པ་དུ་མ་རབ་ཏུ་འབབ་པར་གྱུར་ལ་རག་དེས་དེ་བཞིན་དུ་སེམས་བསྐྱེད་པ་ཙམ་ཉིད་ཀྱིས་རོ་དང་ཁ་དོག་དང་དྲི་ཡོངས་སུ་གང་བ་ལྷ་དེ་དག་རྣམས་ཀྱིས་ལེགས་པར་བྱས་པའི་ལས་ཀྱི་དབང་གིས་འབབ་པར་གྱུར་ཏེ་ལེགས་པར་བྱས་པའི་ལས་རྣམས་ཡུལ་དུ་གྱུར་པའི་མི་རྣམས་ཀྱང་རྟོགས་པར་འགྱུར་བ་ནི་མ་ཡིན་ནོ།

གཞན་ཡང་གལ་ཏེ་ལྷ་དེ་དག་རྣམས་འདི་སྙམ་དུ་སེམས་པར་འགྱུར་ཏེ།

ཇི་ལྟར་དཔག་ཚད་བརྒྱར་ཡང་གཞལ་ཡས་ཁང་དེ་དག་རྣམས་ཁ་འབྱེ་བར་འགྱུར་གྲང་།

དེ་དག་རྣམས་ཀྱི་སེམས་བསྐྱེད་པ་ཙམ་ཁོ་ནས་ཁ་འབྱེད་པར་འགྱུར་ཏེ།

རྣམ་པ་དུ་མར་དགའ་བའི་མཚེའུ་སྤྲོ་བ་དང་འབབ་ཆུ་དང་ཆུ་ཀླུང་དང་ཚང་ཚིང་དང་ཁང་པ་དང་སྟེང་ཁང་དང་བཅས་པའི་ཁང་པས་ཀྱང་ཕུན་སུམ་ཚོགས་པར་གྱུར་པ་དང་སྣ་ཚོགས་པའི་ནགས་ཚལ་དང་ནགས་འདབ་དང་པད་མའི་ཚལ་རྣམས་དང་ལྗོན་ཤིང་ཕུན་སུམ་ཚོགས་པ་ཡང་དེ་བཞིན་དུ་ཁ་འབྱེ་བར་འགྱུར་ལ།

ལྷ་དེ་དག་རྣམས་ཀྱང་ཇི་ལྟ་བ་བཞིན་དུ་ཡིད་ཆེས་མཆོག་གི་རབ་ཏུ་དགའ་བར་འགྱུར་ཏེ།

ཇི་ལྟར་བདེ་བར་གནས་པ་རྣམས་ཀྱིས་བདག་ཅག་རྣམས་ཀྱང་ཇི་ལྟ་བ་བཞིན་དུ་ཡིད་ཆེས་མཆོག་གི་རབ་ཏུ་དགའ་བར་འགྱུར་བ།

དེ་ནི་ཇི་ལྟར་བདེ་བར་གནས་པ་རྣམས་ཀྱིས་བདག་ཅག་རྣམས་གནས་པར་བྱའོ་ཞེས་མཆོག་ཏུ་ཡིད་རབ་ཏུ་དགའ་བ་རྣམས་ལྷ་གཞན་རྣམས་དང་ལྷན་ཅིག་ཏུ་གང་ན་ཁང་བུ་དེ་དག་རྣམས་ཡོད་པ་ལ་རྣམ་པ་དུ་མས་བདག་ཅག་རྣམས་དང་ཐབས་ཅིག་ཏུ་དགའ་བར་བྱའོ།

འདིར་ནི་རྣམ་པ་དུ་མར་ལྷ་གང་ཡིན་པ་འཐབ་

བྲལ་གྱི་མངའ་བདག་མུ་སུ་ལུན་དྷ་དེའི་སྲིད་པར་རྩེད་མོའི་ནགས་སུ་རྣམ་པ་དུ་མར་དགའ་བར་བྱེད་པར་འགྱུར་བའི་ལྷ་དེ་དག་རྣམས་ཐམས་ཅད་ཀྱང་འདིར་ནི་ཁང་བུ་འདི་དག་རྣམས་སུ་ཞུགས་པར་གྱུར་ན་ཅི་མ་རུང་།

དེ་ནས་སེམས་བསྐྱེད་པ་ཙམ་ཁོ་ནས་རྒྱུན་གྱི་ནགས་ན་རྣམ་པར་རྒྱུ་བའི་ལྷ་དེ་དག་རྣམས་ནམ་མཁའ་ལ་རྣམ་པ་སྣ་ཚོགས་པའི་བཞོན་པ་རྣམས་ཀྱིས་འགྲོ་བར་བྱེད་པ་ལ་འདི་ལྟ་སྟེ།

ངང་པའི་བཞོན་པ་དང་རྨ་བྱའི་བཞོན་པ་དང་ཁུ་བྱུག་གི་བཞོན་པ་དང་མེ་ཏོག་གི་བཞོན་པ་དང་ངང་ངུར་གྱི་བཞོན་པ་དང་ཤང་ཤང་ཏེའུའི་བཞོན་པ་དང་།

ལྗོན་ཤིང་གི་བཞོན་པ་རྣམས་ཏེ་རྣམ་པ་དེ་ལྟ་བུའི་བཞོན་པས་གང་ན་ཁང་བུ་དེ་དག་རྣམས་ཡོད་པ་དེར་འགྲོ་བར་འགྱུར་ཏེ།

མཆོག་ཏུ་རབ་ཏུ་དགའ་བའི་ཡིད་ཀྱིས་རོལ་མོ་དང་རྔ་སྒྲ་དང་གླུ་རྣམས་ཀྱིས་དགའ་བར་གྱུར་པ་རྣམ་པ་སྣ་ཚོགས་པའི་ཆ་བྱད་ཅན་གྱི་ལྷའི་བུ་མོ་སྒྲིན་པ་རྣམས་ཀྱིས་རྗེས་སུ་འབྲང་བར་བྱེད་པའི་རྒོད་པར་བྱེད་པ་དང་།

འགྱིང་བར་བྱེད་པ་དང་དོ་ཤལ་དང་པད་མ་འཕྱང་བ་རྣམས་ཀྱི་མཆན་ཁུང་ལྕོང་བ་དང་བཅས་པས་ཕྱི་བཞིན་འབྲང་བར་གྱུར་པ་མཆོག་ཏུ་གཞོན་ཤ་ཅན་མཆོག་ཏུ་དགའ་བ་དང་ལྡན་པས་གར་དང་རྔ་སྒྲ་དང་རོལ་ཆ་དང་གླུ་མཆོག་ལེན་པ་དང་ལྡན་པའི་ལྷའི་ས་བས་མངོན་པར་བསྟོད་པ་དང་ལྡན་པས་གང་ན་ཁྱོགས་ཀྱི་ཁང་བུ་ཡོད་པ་དེར་ལེགས་པར་ཉེ་བར་འགྲོ་བའོ།

ནམ་མཁའི་དཀྱིལ་དུ་མངོན་པར་བྱུང་ནས་གང་ན་རྩེ་དགའ་ཆེན་པོའི་ཁང་བུ་རྣམས་ལེགས་པར་གནས་ནས་ལྷ་རྣམས་རྩེ་དགའ་བར་བྱེད་པ་དེར་འོངས་པར་གྱུར་ཏོ།

དེ་ནས་དེ་དག་ཕན་ཚུན་དུ་རབ་ཏུ་དགའ་བའི་ཡིད་ཅན་རྣམས་དེ་ལྟར་རྩེ་བར་གྱུར་པ་རྣམས་བག་མེད་པར་གནས་པ་རྣམས་སེམས་རྣལ་དུ་མི་གནས་པ་རྣམས་ནི་བག་མེད་པས་གནས་པ་རྣམས་ལ་འཐབ་བྲལ་གྱི་མངའ་བདག་མུ་སུ་ལུན་དྷ་འདི་ལྟར་ཀུན་ཏུ་ལྟ་བར་བྱེད་དེ།

ལྷ་བག་མེད་པས་བག་མེད་པར་གནས་པ་རྣམས་ལ་ཇི་ལྟ་བ་བཞིན་གྱི་ཐབས་སུ་གྱུར་པ་ཅི་ཞིག་ཡོད་ན་གང་བདག་གིས་དམན་པ་ལ་ཁ་ཕྱོགས་པ་བག་མེད་པས་གནས་པའི་ལྷ་དེ་དག་རྣམས་

ལ་རྗེས་སུ་འཐུན་པའི་ཐབས་གང་ཡིན་པ་བདག་གིས་བྱའོ།

དེ་ནས་བརྟགས་པའི་བློ་དང་ལྡན་པ་དེས་རྣམ་པར་དཔྱད་ནས་ལྷ་གཞན་རྣམས་ལས་གང་དག་དེ་དང་ལྷན་ཅིག་རྗེས་སུ་སྤྱོད་པའི་རྒྱུན་དུ་ཞུགས་པ་དེ་དག་རྣམས་དང་ལྷན་ཅིག་ཏུ་ལེགས་པར་འགྲོ་བར་བྱེད་དེ།

ཇི་ལྟར་ལྷ་རྒྱུན་གྱི་གནས་ན་རྒྱུ་བ་འདི་དག་རྣམས་ལ་ཇི་ལྟ་བ་བཞིན་དུ་ཇི་ལྟར་ཕན་པར་འགྱུར་བ་ཡིན།

བླ་ན་མེད་པའི་དགེ་བའི་ཆོས་རྣམས་ཀྱིས་ཇི་ལྟར་བདག་དང་གཞན་ལ་ཕན་པ་བྱས་པར་འགྱུར་བ་ཡིན་པ་དང་།

གང་ཡང་བདག་གིས་བར་ཆད་དུ་མི་འགྱུར་བ་དང་།

གལ་ཏེ་ཡང་ལྷ་དེ་དག་རྣམས་གྲོགས་པོའི་མཆོག་ཏུ་འགྱུར་བ་ནི་གང་དག་གིས་སྒྲོལ་བ་ལ་ངེས་པར་སྦྱོར་བའོ།

ཡང་གང་དག་གིས་སྡིག་པ་ཉེ་བར་སྟོན་པ་དེ་དག་རྣམས་ནི་དགྲ་བོ་ཡིན་ཏེ།

གང་གིས་དམྱལ་བ་ཀུན་ནས་སྒྲུབ་པའི་ལས་རྣམས་བྱེད་པའི་ཕྱིར་རོ།

ལྷ་དེ་ཉིད་ཀྱིས་དེ་ལྟར་རྒྱུན་དུ་ཞུགས་པ་རྣམས་དང་ལྷན་ཅིག་ཏུ་གྲོས་བྱས་ནས་གང་ན་ཁྱོགས་ཀྱི་ཁང་བུ་ཡོད་པ་དེར་ཉེ་བར་ལེགས་པར་འགྲོ་བར་བྱེད་དེ།

རྫུ་འཕྲུལ་གྱི་རང་བཞིན་གྱི་གཞལ་ཡས་ཁང་གཞན་ཞིག་བཟུང་བ་ན་ནི་ཆུ་ཀླུང་དང་མཚེའུ་དང་ལྗོན་ཤིང་དང་འབབ་ཆུ་དང་ནགས་དང་ཉེ་བའི་ནགས་རྣམས་མཆོག་ཏུ་ཕུན་སུམ་ཚོགས་པ་དགའ་བ་དུ་མ་ཉིད་དང་ཡང་དག་པར་ལྡན་པ་དེ་འདྲ་བའི་དགའ་བའི་ཁྱད་པར་གྱིས་རྒྱུན་གྱི་གནས་ན་སྤྱོད་པ་རྣམས་ཀྱི་རྣམ་པར་གསལ་བ་གང་དག་ཡིན་པ་དེ་དག་རྣམས་ནི་བརྒྱའི་ཆ་དང་སྟོང་གི་ཆར་ཡང་མི་ཕོད་དོ།

དེ་ཅིའི་ཕྱིར་ཞེ་ན།

ལེགས་པར་བྱས་པའི་ལས་ཅན་རྣམས་ཀྱི་མངའ་བདག་ཡིན་པའི་ཕྱིར་ཏེ།

ལེགས་པར་སྤྱོད་པའི་ལས་ཀྱི་མཐའ་ལ་སྤྱོད་པའི་འཐབ་བྲལ་བའི་ལྷ་རྣམས་ཐམས་ཅད་ཀྱི་ནང་ན་གང་ཡང་འཐབ་བྲལ་གྱི་མངའ་བདག་མུ་སུ་ལུན་དྷ་ནི་ལེགས་པར་བྱས་པའི་ལས་ཀྱི་མངའ་བདག་ཡིན་པའི་ཕྱིར་དང་།

གང་ཡང་ལེགས་པར་བྱས་པའི་ལས་རྣམས་ཆེས་བླ་ལྷག་པར་གྱུར་པ་ཡིན་པའི་ཕྱིར་རོ།

དེའི་རྫུ་འཕྲུལ་རྣམས་ཀྱང་ལྷག་པ་ཡིན་ནོ།

རྒྱུ་འདི་དག་རྣམས་ཀྱི་ཕྱིར་ན་འཐབ་བྲལ་བའི་གཞལ་ཡས་ཁང་ཐམས་ཅད་ལས་

ཁང་བུ་དེའི་སྟེང་ན་དགའ་བས་རྣམ་པར་གསལ་ཏེ་ལྷམ་མེའོ།

དཔེར་ན་ཉི་མའི་དྲུང་དུ་ནི་གཞལ་ཡས་ཁང་ཐམས་ཅད་ཀྱིས་ཆར་མི་ཕོད་ཅིང་མཛེས་པ་ཡང་མ་ཡིན་ནོ།

ཁང་བུ་དེའི་ཁྱད་པར་རྣམས་ལས་ནི་ཁང་པ་གཞན་དེ་དག་རྣམས་ཀྱིས་ཆར་ཡང་མི་ཆོག་གོ།

དེ་སྣ་ཚོགས་པའི་ཡོན་ཏན་གྱི་རྣམ་པ་ཕུན་སུམ་ཚོགས་པ་དེ་སྲིད་དང་ལྡན་པའི་ཁང་པ་དེས་ནམ་མཁའི་དབྱིངས་གང་ན་རྒྱུན་གྱི་གནས་ན་རྣམ་པར་རྒྱུ་བའི་ལྷ་དག་དགའ་བར་བྱེད་པ་དེར་ཉེ་བར་ལེགས་པར་འགྲོ་བར་བྱེད་པ་ན་ལྷ་གང་དག་རྒྱུན་དུ་ཞུགས་པ་ཡིན་པ་དེ་དག་རྣམས་ནི་འཐབ་བྲལ་བའི་མངའ་བདག་ལེགས་པར་མངོན་སུམ་དུ་མཐོང་ནས།

བག་མེད་པ་རྣམས་དགའ་བ་དམན་པར་འགྱུར་རོ།

ལྷ་གང་དག་བག་མེད་པས་བག་མེད་པར་རྒྱུ་བ་དེ་དག་རྣམས་ནི་ཁང་པ་དེ་དག་རྣམས་སུ་ཀུན་ནས་རིངས་ཕབ་པར་ཞུགས་ནས་དེ་དག་རྣམས་གང་རྒྱལ་པོ་མུ་སུ་ལུན་དྷ་ཡོད་པ་དེར་ཉེ་བར་ལེགས་པར་འགྲོ་བའོ།

དེ་ནས་སྟོང་ཕྲག་བརྒྱར་ཡང་དེ་རྫུ་འཕྲུལ་བྱེད་པར་གྱུར་ཏེ།

དེ་ཇི་ལྟར་ལྷ་གང་དག་ཁང་བུ་ན་ཞུགས་པ་རྣམས་ཁོ་ནས་ཐམས་ཅད་དུ་མི་མཐོང་བ་ཉིད་དུ་བྱས་ཏེ།

དེ་ཁོ་ན་གཞལ་ཡས་ཁང་ན་གནས་པ་ཐམས་ཅད་དུ་ཡང་མི་མཐོང་བར་གྱུར་ཏོ།

ལྷ་ཉིད་ཀྱིས་རང་གི་རྫུ་འཕྲུལ་རྣམས་ཀྱིས་དེ་དག་རྣམས་དེ་ལྟར་བཀག་ནས་ཕན་ཚུན་དུ་མི་མཐོང་ངོ་།

བགད་པ་དང་འཇོ་སྒེག་དང་རྩེད་མོ་རྩེ་བ་རྣམས་ལས་ཅུང་ཟད་ཙམ་ཡང་ཐོས་པར་མི་འགྱུར་ཏེ།

རྫུ་འཕྲུལ་དེ་དག་རྣམས་ཀྱི་མཐུ་སྟོབས་ཀྱིས་དེ་དག་རང་བཞིན་དེ་བཞིན་དུ་གྱུར་ནས་ཕན་ཚུན་དུ་དེ་དག་རྣམས་དེ་ལྟ་བུར་གྱུར་ཏེ།

དེ་དག་ཐམས་ཅད་ཇི་ལྟར་ཁང་བུ་གང་ཡིན་པ་འདིར་སུ་དག་ལྷ་དེ་དག་རྣམས་ཇི་ལྟ་བར་ཐག་ཉེ་བར་གྱུར་པ་རྣམས་དང་།

གང་ཡང་བདག་ཅག་དང་ལྷན་ཅིག་ཏུ་གཞལ་ཡས་ཁང་འདིར་ཞུགས་པར་གྱུར་པ་དེ་དག་ཐམས་ཅད་གང་དུ་སོང་བར་གྱུར་པ་ཞེས་ཐམས་ཅད་དུ་བྱས་ཀྱང་མཐོང་བར་མི་འགྱུར་བ།

དེ་ལྟར་གོང་ནས་ལྷ་དེ་གང་ན་འཐབ་བྲལ་གྱི་བདག་པོ་མུ་སུ་ལུན་དྷ་ཡོད་པ་དེར་ལེགས་པར་ཉེ་བར་སོང་བ་ན་དེ་གཅིག་པུ་ཞིག་མཐོང་

བར་གྱུར་ཏོ།

གང་ཡང་ལྷ་དེས་རྒྱུན་དུ་ཞུགས་པར་གྱུར་པ་དེ་རྣམས་མཐོང་བར་འགྱུར་གྱི་ལྷ་གཞན་རྒྱུན་དུ་ཞུགས་པ་མ་ཡིན་པ་རྣམས་ཕན་ཚུན་དུ་མི་མཐོང་ངོ་།

དེ་ལྟར་རྫུ་འཕྲུལ་གྱིས་བཀབ་པས་དེ་ངོ་མཚར་བ་དང་བཅས་ཤིང་འཇིགས་པ་དང་ཡང་བཅས་པར་གྱུར་ནས་མུ་སུ་ལུན་དྷ་ལ་འདི་སྐད་སྨྲས་སོ།

ལྷ་ཇི་ལྟར་གང་དག་གཞལ་ཡས་ཁང་དུ་ཞུགས་པའི་ལྷ་དེ་དག་རྣམས་ཐམས་ཅད་འཁོར་དང་བཅས་པ་མ་མཐོང་བ་དེ་དག་རྣམས་གར་སོང་།

དེ་ནས་མུ་སུ་ལུན་དྷས་དེ་ལ་འདི་སྐད་ཅེས་སྨྲས་ཏེ།

ལྷ་གང་དག་བག་མེད་པས་བག་མེད་པར་རྒྱུ་བ་དེ་དག་རྣམས་ཐམས་ཅད་ལས་ཀྱི་བྱ་བས་ཤི་འཕོས་ནས་ཇི་ལྟར་ལས་ཀྱིས་ཉེ་བར་འགྲོ་བ་ཀུན་ཏུ་འབྱུང་སྟེ།

དམྱལ་བ་དང་ཡི་དགས་དང་དུད་འགྲོ་དང་མིའི་འགྲོ་བ་རྣམས་སུ་སྐྱེས་སོ།

གཞན་ཡང་གང་དག་བག་མེད་པར་གྱུར་པ་རྣམས་དང་བག་མེད་པས་གནས་པ་རྣམས་ཀྱང་རུང་སྟེ།

དེ་དག་རྣམས་ནི་ཕྱིར་ཞིང་ཡང་བག་མེད་པས་ཉེ་བར་བཅོམ་པ་དང་།

ཡུལ་རྣམས་ཀྱི་སྲེད་པས་ཀྱང་ཉེ་བར་བརླག་པར་འགྱུར་རོ།

གང་དག་འདོད་པའི་ཡོན་ཏན་ལྔ་ལ་རབ་ཏུ་ཞེན་པར་གྱུར་པ་རྣམས་ནི་ཀུན་ཏུ་རྟོག་པའི་རྩེད་མོ་ཅན་གྱི་ཡུལ་གྱི་མི་རྣམས་རང་གི་སེམས་ཀྱི་སྲུབ་ཤིང་ལས་ཀུན་ཏུ་བྱུང་བ་ལས་ཀྱི་རླུང་གིས་བཏབ་ནས།

སྲིད་པའི་རྩེ་མོ་ལྔ་འབར་བས་འཐབ་བྲལ་གྱི་སྲིད་པ་རྣམས་སུ་བསགས་ནས་ཕྱི་ནས་ནི་རྣམ་པ་སྣ་ཚོགས་པའི་ཟེར་ཟུག་གིས་དམྱལ་བ་རྣམས་སུ་སྲེག་པར་བྱེད་དེ་བཟང་པོ་མ་ཡིན་པའི་སེམས་ཀྱིས་ཡོངས་སུ་བསླུས་པ་ཤིན་ཏུ་རྣམ་པར་ཉམས་པ་རྣམས་ལུས་ཞིག་ནས་དེར་སྐྱེའོ།

དེས་ན་དེ་ལྟར་བག་མེད་པའི་སྐྱོན་རྣམས་ནི་སྐྱོན་ཐམས་ཅད་ཀྱི་སྟེང་ན་བླ་ལྷག་པ་ཡིན་ནོ།

བག་མེད་པའི་སྐྱོན་གྱིས་རྣམ་པར་ཉམས་པའི་རྒྱུ་གང་གིས་དགེ་བའི་ཆོས་ཐམས་ཅད་མི་མཐོང་བའི་ལྷ་གང་དག་རྣམས་ཀྱིས་སེམས་བཟང་པོས་བདག་ཉིད་ཀྱིས་བདག་ཉིད་འདུལ་བར་མི་བྱེད་པ་དེ་དག་རྣམས་ནི་རང་གི་སེམས་ཀྱིས་བསླུ་ནས་ཕྱི་ནས་དེ་ནི་གདུང་བར་འགྱུར་བ་ཁོ་ན་ཡིན་ནོ།

དེ་ནས་འཐབ་བྲལ་གྱི་མངའ་བདག་མུ་སུ་

ལུན་དྷ་དེའི་སྤྱན་སྔར་དེས་གཏམ་དེ་དག་རྣམས་རྙེད་ནས་ལྷ་དེ་དག་ཕན་ཚུན་དུ་སྐྱོ་བ་དང་བཅས་པ་དང་འཇིགས་པ་དང་ལྡན་པས་འདི་སྐད་ཅེས་སྨྲས་ཏེ།

ལྷ་དབང་སྐད་ཅིག་ཁོ་ན་ལ་ཇི་ལྟར་ལྷ་དེ་དག་དང་བྲལ་ཞིང་ཐམས་ཅད་འཆི་འཕོས་ཏེ།

ལྷ་དེ་དག་རྣམས་ཐམས་ཅད་ལ་འདིར་ཅི་ཞིག་བྱུང་ནས་མེད་པར་གྱུར་ནས་རྒྱུན་གྱི་གནས་ན་རྣམ་པར་རྒྱུ་བའི་ལྷ་རྣམས་ཀྱི་ས་འདི་དག་ཐམས་ཅད་ཀུན་ཏུ་སྟོངས་པར་གྱུར།

སྡུག་བསྔལ་རྣམས་ལས་འཆི་འཕོ་བ་ཞེས་བྱ་བའི་སྡུག་བསྔལ་རྣམས་ནི་ཆེན་པོ་ཡིན་པས་ཐབས་མ་ཡིན་པར་མི་འགྱུར་བ་གང་ཡིན་པ་དང་།

བདག་ཅག་རྣམས་སྡུག་བསྔལ་གྱི་སྐལ་བ་ཅན་དུ་མི་འགྱུར་བ་དང་།

སྡུག་པ་རྣམས་དང་བྲལ་བ་ལས་བྱུང་བའི་སྡུག་བསྔལ་གྱིས་ཀྱང་བདག་ཅག་རྣམས་ལ་གནོད་པར་མི་འགྱུར་བ་དང་།

དམྱལ་བ་རྣམས་དང་།

ཡི་དགས་རྣམས་དང་།

དུད་འགྲོ་རྣམས་སུ་ཡང་བདག་ཅག་རྣམས་སྐྱེ་བར་མི་འགྱུར་བ་དེ་སྐལ་བ་ཆེན་པོ་དང་ལྡན་པས་ཉེ་བར་བསྟན་དུ་གསོལ།

དེ་ནས་དེའི་ཚེ་ལྷ་རྣམས་ཀྱི་བདག་པོས་ཇི་ལྟ་བ་བཞིན་དུ་ཚིགས་སུ་བཅད་པས་བརྗོད་པ།

ཀྱོག་པོའི་ལམ་ལ་སྤྱོད་པ་ཡི།

མིས་ནི་བཟང་པོ་མཐོང་བ་མིན།

ཆུ་ནི་བསྲུབས་པར་གྱུར་ན་ཡང་།

མེ་ནི་ནམ་ཡང་སྲིད་པ་མིན།

རྒྱུ་མེད་དེ་ལ་འབྲས་བུ་ནི།

ནམ་ཡང་ཅུང་ཟད་འབྱུང་བ་མིན།

བག་མེད་ཡོན་ཏན་གྱིས་འགའ་ཞིག །

མཐར་ཐུག་ལེགས་པར་འཇུག་པ་མིན།

ལྷ་གང་སྐྱེ་བ་བག་མེད་པས།

ཉེ་བར་འཇོམས་པར་འཇུག་བྱེད་པ།

དེ་ནི་ལེགས་བྱས་ཟད་ནས་ནི།

རྨོངས་པ་ལོག་པར་ལྟུང་བར་སྐྱེ།

དགའ་བར་གྱུར་པའི་འདོད་པ་ལ།

གང་ཞིག་དེ་ལྟའི་བློ་སྐྱེ་བ།

ཕྱིས་དེ་སྡུག་བསྔལ་དང་ཕྲད་ནས།

རྨོངས་པ་སེམས་ནི་གདུང་བར་བྱེད།

འདོད་པའི་མེ་ཡིས་བསྲེགས་པ་དང་།

ཡུལ་རྣམས་ཀྱིས་ནི་རྨོངས་པས་ཀྱང་།

གང་ཞིག་བདེ་རྣམས་བླ་མེད་པ།

མཐར་ཐུག་བདེ་བར་འགྱུར་བ་མིན།

འཇིག་རྟེན་འདོད་པས་བདེ་གང་དང་།

གང་ཡང་སྲེད་བྱུང་བདེ་བས་ནི།

ནང་གི་བདག་ཉིད་འདི་གཅིག་གི།

བཅུ་དྲུག་ཆར་ཡང་མི་ཆོག་སྟེ།

ཆུ་ཆེན་ཤིན་ཏུ་སྦྱངས་ལས་སྐྱེ།

དཀར་ཞིང་འཁོར་བ་ལས་ཐར་བྱེད།

སྲེད་ཟད་བདེ་བ་མཐོང་བ་པོ།

དཔག་མེད་བདེ་བ་སྒྲུབ་བྱེད་ཡིན།

བདེ་བ་དོགས་པ་མེད་པ་ཡི།

སྐྱོན་མེད་ངེས་པར་སྦྱར་ལྡན་པ།

བདེ་གང་བསམ་གཏན་ལས་སྐྱེས་ཡིན།

གང་ཡང་སྲེད་པས་མི་འཆིང་ཞིང་།

རྟོག་པ་ཡིས་ཀྱང་མི་འཚེ་བར།

དེ་ཡི་མིང་གིས་སྨོས་ཅི་དགོས།

དེ་ཐོབ་སྲིད་པའི་ཕ་རོལ་ཏུ།

རྟག་ཏུ་བདེ་བར་འགྱུར་བ་ཡིན།

གང་གི་སྙིང་ལ་འདོད་གནས་པས།

དེ་སྲིད་བདེ་བར་འགྱུར་མིན་ཏེ།

དེ་ནི་སྡུག་བསྔལ་ཀུན་སྐལ་འོས།

དམྱལ་བར་ཉེ་བར་རྒྱུག་པ་ཡིན།

ལས་ཀྱི་ཞགས་པས་དེ་དྲངས་ནས།

ལྷན་ཅིག་སྦྱོར་བར་བྱེད་པ་ཡི།

སྡུག་བསྔལ་དེ་ལས་རྣམ་གྲོལ་དུ།

སྐྱེ་བོ་འགས་ཀྱང་ནུས་མ་ཡིན།

འཁོར་བར་འགྲོ་དང་འོང་བ་རྣམས།

མཐོང་བ་ལས་ཀྱི་རྒྱུ་ལས་བྱུང་།

འགྲོ་དང་འོང་བ་རྟག་ཏུ་ཡང་།

ལས་སྐྱེས་རྒྱུ་ལས་བྱུང་བ་ཡིན།

འདོད་པ་ལ་ནི་ཆགས་བྱེད་པའི།

བྱིས་པས་འཆི་འཕོ་ལེགས་རྟོགས་མིན།

སྐྱེ་བ་ལས་ཀུན་འབྱུང་བ་ཡི།

འཆི་འཕོའི་མཐར་དེ་དམ་པས་གཟིགས།

བདེ་བ་རྗེས་སུ་བསྟེན་པ་ཡིས།

བྱིས་པ་རྣམས་ནི་ངོམས་པ་མེད།

བྱིས་པ་རྟག་ཏུ་ངོམས་མེད་པས།

རྟག་ཏུ་རང་ཉིད་འཇོམས་སུ་འགྲོ།

ཐོག་མ་བར་དང་མཐར་དགེ་མིན།

འཇིག་རྟེན་འདི་དང་ཕྱི་མར་མིན།

སྐྱོན་རྣམས་སྟེན་པ་མ་རིག་ལས།

ཀུན་ནས་རབ་ཏུ་འཇུག་པར་མཐོང་།

གང་ཚེ་ལས་ཟད་མི་མཐོང་བས།

འཇིག་རྟེན་འདི་ནས་འོག་ལྟུང་བ།

རྨོངས་པའི་བདག་ཉིད་བག་མེད་པས།

ཡུལ་རྣམས་སྟེན་པས་དེ་ཚེ་རིག །

ཚེ་འདི་ཤིན་ཏུ་མྱུར་འགྲོ་བ།

བྱིས་པ་རྣམས་ཀྱིས་རྟོགས་པ་མིན།

ཕྱི་ནས་སྡུག་བསྔལ་བྱུང་བ་ཡིས།

སོ་སོར་རེག་འགྱུར་སྡུག་བསྔལ་བས།

གལ་ཏེ་སྡུག་བསྔལ་ལ་ཁྱོད་འཇིགས།

གལ་ཏེ་འཆི་བདག་ལ་འཇིགས་ནའང་།

བློ་ལྡན་རྟག་ཏུ་དམ་ཆོས་ཀྱིས།

དེ་བཞིན་བདེ་བའང་འཐོབ་པར་འགྱུར།

དེ་ལྟར་མུ་སུ་ལུན་དྷའི་ཁ་ནས་བརྗོད་

པ་རྣམས་ལྷ་དེ་དག་རྣམས་ཀྱིས་ཐོས་ནས་བག་མེད་པས་གནས་པར་གྱུར་པའི་དུས་དེ་དག་ཀྱང་འདས་པ་དང་།

གཞན་ཡང་མུ་སུ་ལུན་དྷ་ལ་དེ་དག་རྣམས་ཀྱིས་འདི་སྐད་ཅེས་སླར་བརྗོད་དེ་ལྷའི་དབང་པོ་ཇི་ལྟར་རྣམ་པ་ཐམས་ཅད་དུ་ཡང་མ་ཡིན་པར་ལྷ་རྣམས་ཉིད་ཐམས་ཅད་མཐོང་བར་མ་གྱུར་ལགས་ན་དེ་དག་རྣམས་སྐད་ཅིག་གཅིག་ལ་ཐམས་ཅད་ཀྱང་འཆི་འཕོས་སམ་ཤི་བར་གྱུར་ཏམ།

གཞན་དག་ཏུ་སོང་བར་གྱུར་པ་དེ་ཅི་ནས་ཀྱང་བདག་ཅག་རྣམས་ལ་ལྷའི་དབང་པོ་བཤད་དུ་གསོལ།

དེ་ནས་གཞན་ཡང་ལྷ་དེ་དག་རྣམས་ལ་མུ་སུ་ལུན་དྷས་ཕྱིར་ལ་སྨྲས་པ།

ཇི་ལྟ་བ་བཞིན་དུ་འདིར་ལས་ཀྱི་དབང་གིས་འོང་བ་དེ་ལྟ་བ་བཞིན་དུ་ཅིས་ཀྱང་སླར་འགྲོ་བར་བྱ་དགོས་སོ།

ལས་ཟད་པ་ན་ངེས་པར་མྱང་བར་བྱ་བའི་དོན་ཡིན་པས་ན་སྲོག་ཆགས་སུ་གཏོགས་པ་ཐམས་ཅད་ཀྱིས་ཕན་ཚུན་དུ་འདུས་པ་དང་འབྲལ་བ་ལས་བྱུང་བའི་སྡུག་བསྔལ་ནི་ངེས་པར་མྱོང་བར་འགྱུར་བ་རྒ་བ་དང་ནད་རྣམས་དང་།

འཆི་བ་དང་གསུམ་པོ་དེ་དག་རྣམས་རེ་རེ་ཞིང་ཡང་ཕུན་སུམ་ཚོགས་པར་འགྱུར་བ་རྣམས་འབྱུང་བར་འགྱུར་ཏེ།

གསོན་པ་རྣམས་ཀྱི་སྲོག་དང་ནད་མེད་པ་དང་ལང་ཚོ་ལ་བབ་པ་རྣམས་ལའོ།

དེ་ལ་གང་དག་སྐྱེས་བུའམ་ལྷ་རྣམས་ཀྱང་རུང་སྟེ་བག་མེད་པར་མ་གྱུར་པ་དང་།

བག་མེད་པས་གནས་པ་མ་ཡིན་པ་དང་།

གང་དག་དང་པོ་ནས་བག་མེད་པ་དེ་དག་གིས་གནས་པ་མ་ཡིན་པ་དང་།

གང་དག་དང་པོ་ཉིད་ནས་འཇིགས་པ་དེ་དག་རྣམས་སོ་སོར་རིག་པར་བྱའོ།

ཇི་ལྟར་དེ་དག་རྣམས་ཀྱིས་གསོན་པ་དང་ནད་མེད་པ་དང་ལང་ཚོ་རྣམས་འཇོམས་པར་བྱེད་པ་ངེས་པ་ཁོ་ནར་འབྱུང་བར་འགྱུར་རོ།

མ་འོངས་པ་ན་འཆི་བདག་གི་དུས་དེ་བྱུང་བར་གྱུར་པ་ན།

བཟློག་པའི་ཐབས་ནི་རྣམ་པ་གསུམ་ཡིན་པ་ལས་འདི་ལྟ་སྟེ།

སྦྱིན་པས་དང་ཚུལ་ཁྲིམས་ཀྱིས་དང་ཤེས་རབ་ཀྱིས་དང་སྟེ།

བཟློག་པའི་ཐབས་ནི་གསུམ་པོ་དེ་དག་རྣམས་ཡིན་ནོ།

འཇིགས་པ་ཆེན་པོ་རྣམ་པ་གསུམ་པོ་དེ་དག་རྣམས་ནི་རྣམ་པར་རྟོག་པ་དུ་མའི་རྣམ་པར་རྟོག་པའི་རང་བཞིན་རྣམས་རྟག་པར་རྒྱུན་དུ་

ཕྱི་བཞིན་རྗེས་སུ་འབྲང་བ་རྣམས་གང་དག་གིས་མི་སྤོང་བ་དེ་དག་རྣམས་ཕྱིས་འཆི་བའི་དུས་སུ་ཕྱིན་པ་ན་ཡོངས་སུ་དག་པའི་དབང་པོ་ཐམས་ཅད་བཞིན་དང་།

མིག་ར་ར་པོར་གྱུར་པས་རང་གི་སྐྱེ་བོ་དང་གཉེན་དང་འཁོར་དང་སྡེ་ཚན་ཐམས་ཅད་ཡོངས་སུ་སྤངས་ནས་འཆི་འཕོ་བར་འགྱུར་བ་ན།

སྡུག་པ་རྣམ་པ་དུ་མ་དང་འབྲལ་བའི་མེས་སྲེག་པར་གྱུར་པས་མཆོག་ཏུ་སྡུག་བསྔལ་བར་འཆི་བདག་གིས་ངེས་པར་འཁྲིད་པར་བྱེད་དོ།

གང་གི་ཚེ་འདོད་པའི་ཡོན་ཏན་ལྔ་ཀུན་ཏུ་འབྱུང་བའི་རྣམ་པར་རྟོག་པ་དུ་མ་དེ་དང་དེ་དག་རྣམས་ཀྱིས་རབ་ཏུ་གར་བྱེད་པ་དང་རྒོད་པ་དང་འགྱིང་བག་དང་ཀུན་ཏུ་སྤྱོད་པ་དང་ནགས་ཚལ་དང་།

སྐྱེད་མོས་ཚལ་རྣམས་ཀྱི་ལོངས་སྤྱོད་བག་མེད་པ་དུག་གི་གྲོགས་པོའི་བདེ་བ་རྣམས་ཀྱིས་དེ་དག་གི་ཚེ་དགྲ་བཞིན་དུ་འབིགས་པར་བྱེད་དོ།

གང་དག་གི་འབྲས་བུ་དེས་ཕྱིས་འགྱོད་པའི་མེས་གདུང་བར་བྱེད་དེ།

ཅི་ཞིག་བདག་གིས་བསྒྲུབས་པར་གྱུར་ན་གང་ཡང་ཤེས་རབ་དང་སྦྱིན་པ་དཀའ་ཐུབ་ཀྱི་ཚུལ་ཁྲིམས་རྣམས་ཀྱིས་ནི་རྗེས་སུ་མ་བསྒྲུབས་ཤིང་བག་མེད་པས་བདག་བག་མེད་པར་གནས་པར་གྱུར་པས་མཆོག་རྣམས་ནི་རྗེས་སུ་མ་བསྒྲུབས་སོ།

རང་གི་སྐྱེ་བོ་དང་གཉེན་བཤེས་ཀྱི་ཚོགས་རྣམས་ཀྱིས་ང་གཅིག་པུ་ཞིག་སྤངས་ཤིང་མཆོག་ཏུ་དགའ་བར་གྱུར་པ།

བདག་ཅག་གི་ལྷའི་འཇིག་རྟེན་གྱི་དགའ་བར་གྱུར་པའི་ཡུལ་དུ་མ་དེ་དག་རྣམས་དང་བདག་འབྲལ་བར་འགྱུར་བ་ཞེས་དེ་དེ་ལྟར་རྗེས་སུ་གདུང་བར་བྱེད་དོ།

ཕྱི་ནས་ཇི་སྲིད་དུ་སྟོབས་དང་ལྡན་པའི་འཆི་བདག་རྒྱལ་པོ་གཞན་འདིས་ལྷ་རྣམས་ཐམས་ཅད་རབ་ཏུ་མ་བཅོམ་ཞིང་དུས་དེ་མ་ཡིན་པ་དེ་སྲིད་དུ་ནད་རྣམས་དང་རྒུད་པ་དུ་མ་རྣམས་ངེས་པར་རྟོགས་པར་བྱས་ལ་ཅི་ནས་ཀྱང་བག་མེད་པ་གཞོམ་པར་བྱ་སྟེ།

དེ་ལྟར་བག་མེད་པ་སྤངས་པ་རྣམས་ནི་བདེ་ལེགས་ཀྱི་མཆོག་ཏུ་འགྱུར་རོ།

ཕྱི་ནས་འཆི་བདག་གི་དུས་ན་གདུང་བའི་མེས་སྲེག་པར་ཡང་མི་འགྱུར་ཏེ།

རྒུད་པ་ཐམས་ཅད་འབྱུང་བའི་དུས་སུ་ལམ་འདི་དག་ནི་མཆོག་ཏུ་མཛེས་པའོ།

འདི་ལྟ་

སྟེ།

སྦྱིན་པ་དང་ཚུལ་ཁྲིམས་དང་ཤེས་རབ་ཀྱང་གཞན་དུ་བསྟེན་ཅིང་བསྒོམས་ལ་ལན་མང་དུ་བྱས་པ་རྣམས་ནི་དུས་དེའི་ཚེ་ན་སྐྱབས་སུ་འགྱུར་རོ།

ཇི་སྲིད་དུ་འདི་སླུ་བར་མི་བྱེད་པ་ཡིན་པ་དང་བསྲན་མི་ནུས་པ་དང་ཐབས་མེད་པར་གྱུར་པ་ནི་སྐྱེ་བོ་ཐམས་ཅད་ཀྱི་སྲོག་འཕྲོག་པའི་འཆི་བདག་ཡིན་ལ།

ཅིའི་ཕྱིར་ན་དེ་བཟློག་པ་ལ་ལྷ་དག་བརྩོན་པར་མི་བྱེད་པ་ཡིན།

གང་དག་ཕན་པ་མ་ཡིན་པ་བྱེད་པས་བཟུང་བ་གཡང་ས་དང་དུག་ཆེན་པོ་དང་མེ་དང་མཚུངས་པ་ཡང་གང་བག་མེད་པ་རྣམས་ཡིན་ནོ།

དེ་ནས་ལྷ་གཞན་ཡང་ལྷ་གང་དག་བག་མེད་པའི་དབང་གིས་འགྲོ་བའི་ལྷ་དེ་དག་རྣམས་ནི་བག་མེད་པའི་དགྲ་དེས་ཤིན་ཏུ་ལེགས་པའི་བུད་མེད་ལ་ལྟ་བ་ལ་ཆེད་ཆེར་བྱེད་པས་ནགས་ཚལ་དང་ནགས་འདབ་དང་།

མཚེའུ་རྣམས་ལ་རྩེ་བ་ལ་ཆེས་དགའ་བ་རིའི་རྩེ་མོ་ལ་རྣམ་པར་རྒྱུ་བར་བྱེད་པ་རྣམས་ནི་དངོས་པོ་ཐམས་ཅད་མི་རྟག་པ་ལ་རྟག་པའི་བློ་སྐྱེད་པར་བྱེད་དེ།

ཇི་ལྟར་རྟག་པར་བདག་ཅག་ལྷའི་བུ་མོ་འདི་དག་རྣམས་དང་ལྷན་ཅིག་ཏུ་དགའ་བར་བདག་གིས་བྱའོ།

རྟག་ཏུ་ཡང་ལང་ཚོ་འདི་དག་འབྱུང་བར་འགྱུར་ཞིང་བདག་ཅག་རྣམས་ལ་ནམ་ཡང་འབྲལ་བ་འབྱུང་བར་མི་འགྱུར་རོ།

དེ་དེ་ལྟར་ཡུལ་རྣམས་ཀྱི་བདེ་བ་ལ་ཤིན་ཏུ་འཆུམས་པ་ལ་རྟག་པར་རབ་ཏུ་འཇོམས་པར་བྱེད་པ་རྣམས་ཀྱི་མཆོག་ཐོགས་པ་མེད་པའི་འགྲོས་དང་ལྡན་པ་བཟློག་ཏུ་མེད་པའི་འཆི་བདག་ལྷན་ཅིག་ཏུ་འབྱུང་བར་འགྱུར་བ་ལ་དེའི་ཚེ་ལྷའི་བུ་མོ་རྣམས་ཀྱིས་ཡོངས་སུ་སྐྱོབ་པར་འགྱུར་བ་མ་ཡིན་ནོ།

གང་ཡང་འདི་དག་རྣམས་བློས་ཡོངས་སུ་མ་བརྟགས་པར་རྟག་ཏུ་མཉམ་པར་བགྲོད་པར་བྱེད་ལ།

དེའི་ཚེ་གང་རྗེས་སུ་སྤྱད་པར་འགྱུར་བ་དེ་དག་ཐམས་ཅད་ནི་གསོག་དང་གསོབ་དང་སྙིང་པོ་མེད་པ་ཡིན་ནོ།

དེ་བག་མེད་པས་རྣམ་པར་བཅོམ་ནས་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེ་བའོ།

གཞན་ཡང་གཏི་མུག་གིས་བཅོམ་པའི་ལྷ་རྣམས་ཐོག་མ་མེད་པ་ནས་འཇུག་པའི་འཆི་འཕོ་བ་དང་སྐྱེ་བའི་སྡུག་བསྔལ་གྱིས་ལན་ཅིག་མ་ཡིན་པར་རབ་ཏུ་བཅོམ་ཡང་བློ་གྲོས་

མེད་པས་འདོད་ཆགས་དང་བྲལ་བར་ཡང་མི་འགྱུར་རོ།

དེ་ནས་ལྷའི་བདག་པོ་མུ་སུ་ལུན་དྷས་དེ་སྐད་ཅེས་ལྷ་རྣམས་ལ་ཆོས་ཀྱི་དོན་དང་ཡང་དག་པར་ལྡན་པའི་ཚིག་བརྗོད་པས་དེ་ལ་ལྷ་གང་དག་རང་གི་བློ་སྐྱོན་མེད་པས་དེ་དག་རྣམས་ཚིག་གི་བདུད་རྩིའི་རོ་དེ་ལ་དམིགས་པས་ཀྱང་ཆགས་པ་དང་བྲལ་བའི་བློ་སྐྱེས་པར་གྱུར་ནས་དེ་དག་གིས་ལྷའི་རྒྱལ་པོ་དེ་ལ་འདི་སྐད་ཅེས་གསོལ་པ་ནི་ཇི་ལྟར།

ཕན་པ་གང་ཡང་དེ་བཞིན་ཡང་།

གང་ཡང་རྣམ་གསུམ་དང་ལྡན་པ།

དེ་ཁོ་ན་ཡི་ཚིག་གང་ནི།

ཕན་པ་མཛད་པའི་ལྷ་ཡིས་གསུངས།

གང་ཞིག་ཞི་བདག་འཛིན་བྱེད་པ།

བདེ་བ་དམ་པ་རབ་ཏུ་འཐོབ།

བདེ་བ་ལས་ཀྱང་ཆེས་བདེ་བ།

ངེས་པར་རྟག་ཏུ་འགྲུབ་པར་འགྱུར།

གང་དག་དེ་ལས་བཟློག་པ་ཡང་།

བག་མེད་པ་ཡིས་ཉེར་བཅོམ་ལྷ།

རྨོངས་པ་ཡི་ནི་བདག་ཉིད་དེ།

དམྱལ་བར་སྐྱེ་བར་འགྱུར་བ་ཡིན།

དེ་ལྟར་ལྷ་དེས་ལྷ་གཞན་ལ་བརྗོད་ནས་གཞན་ཡང་ལྷ་དེ་ཀུན་ནས་སྐྱོ་བའི་ཡིད་ཀྱིས་ལྷའི་རྒྱལ་པོ་དེ་ལ་འདི་སྐད་ཅེས་སྨྲས་པ།

ཇི་ལྟར་ལྷ་དབང་རྣམ་པ་ཐམས་ཅད་དུ་བདག་ཅག་ཐེ་ཚོམ་དུ་གྱུར་ཏེ་ཁང་བུར་ཞུགས་པའི་ལྷ་དེ་རྣམས་ཅི་ཞིག་ནོངས།

དེ་ལྟར་ཀུན་ནས་སྐྱོ་བའི་ཡིད་མངོན་པར་མཐོང་བ་དང་།

བག་ཡོད་པར་གནས་པ་ཡང་ཡིད་ཀྱིས་ཀུན་ཏུ་མཐོང་ནས་དེ་བཞིན་དུ་རྟོགས་པས་དེའི་དབང་དུ་བྱས་པ་སྤངས་ཏེ།

སླར་ཡང་ལྷ་དེ་དེ་དག་ཉིད་ཕན་ཚུན་དུ་ལེགས་པར་སྟོན་པར་བྱེད་དོ།

དེ་ནས་དེ་དག་རྣམས་ཕན་ཚུན་དུ་མངོན་པར་མཐོང་ནས་རྗེས་སུ་འཐུན་པར་སྤྱོད་པའི་ཚོགས་ཀུན་དང་མཆོག་ཏུ་དགའ་བ་དང་ལྡན་པར་གྱུར་ཏོ།

དེ་ནས་དེ་དག་ཉིད་ཁོ་ན་ཡིད་རབ་ཏུ་དགའ་བ་རྣམས་ལ་གཞན་ཡང་མུ་སུ་ལུན་དྷས་བརྗོད་པ།

ཇི་ལྟར་ལྷ་རྣམས་ཕན་ཚུན་དུ་མ་མཐོང་བ་ནི་ངའི་རྫུ་འཕྲུལ་གང་དག་གི་སྟོབས་ཀྱིས་བཀབ་པར་གྱུར་པ་ཡིན་ལ།

ཡང་གང་གི་ཚེ་ཤུགས་ཆེན་པོ་དང་ལྡན་པ་རབ་ཏུ་འཇིགས་པ་རབ་ཏུ་འཇོམས་པའི་འཆི་བདག་རྒྱལ་པོ་དེ་འོང་བར་གྱུར་ནས་དམྱལ་བ་དང་ཡི་དགས་དང་དུད་འགྲོར་སྐྱེས་པར་གྱུར་པ་དེའི་ཚེ་

འགའ་ཞིག་ཀྱང་ཕན་ཚུན་དུ་བསྐལ་པ་བྱེ་བ་ཕྲག་བརྒྱ་སྟོང་དུ་ཡང་མི་མཐོང་ངོ་།

དེས་ན་དེ་དག་རྣམས་རྟོགས་པར་གྱིས་ལ་བདག་ཉིད་བག་མེད་པར་གནས་པར་མ་བྱེད།

སེམས་བྲེལ་དོག་ཅན་དུ་མ་བྱེད།

བག་ཡོད་པར་གནས་པར་གྱིས།

ཡུལ་རྣམས་ལ་ཡིད་མཆོག་ཏུ་སོང་བར་མ་བྱེད་པར་དེ་ལྟ་བུའི་བློས་རྗེས་སུ་བསྒྲུབ་པར་གྱིས་ཤིག །

དེ་བཞིན་དུ་ཇི་ལྟ་བར་བཤད་པ་དང་ལྷ་རབ་ཏུ་མང་པོ་རྣམས་ཡིད་མཆོག་ཏུ་སྐྱོ་བའི་དབང་གིས་རྒྱུན་དུ་ཞུགས་པ་ཐོབ་པར་གྱུར་ཏོ།

དེ་ནས་མུ་སུ་ལུན་དྷ་དེ་ལྟར་རིག་ནས་རབ་ཏུ་དགའ་བའི་ཡིད་ཀྱིས་བྱ་བ་ནི་བྱས་སོ་ཞེས་ཡིད་ལ་བསམ་པ་ཡོངས་སུ་རྫོགས་ནས་སླར་ཡང་རྩེད་མོའི་ནགས་གང་ན་ཡོད་པ་དེར་ཉེ་བར་ལེགས་པར་འགྲོ་བར་བྱེད་དོ།

གང་ལ་རྒྱུན་གནས་ན་རྣམ་པར་རྒྱུ་བ་ཞེས་བྱ་བའི་ལྷ་མཆོག་ཏུ་བག་མེད་པས་གནས་པ་རྣམས་ཏེ།

མཆོག་ཏུ་དགེ་བའི་ཡིད་ཅན་ནི་གང་དག་དེ་ན་རྒྱུན་དུ་ཞུགས་པ་རྣམས་གནས་སོ།

གང་ཡང་རྣམ་པ་ཐམས་ཅད་དུ་སེམས་ཡང་བར་གྱུར་པ་བག་མེད་པས་མཆོག་ཏུ་བག་མེད་པ་ལ་རྗེས་སུ་ཆགས་པ་བག་མེད་པས་མྱོས་པ་རྣམས་དེ་བཞིན་དུ་ནགས་དང་།

ཉེ་བའི་ནགས་དང་མཚེའུ་དང་སྐྱེད་མོས་ཚལ་དང་ནགས་ཁྲོད་རྣམས་སུ་ལྷན་ཅིག་སྤྱོད་པ་དང་བཅས་པ་རྣམས་དགའ་བར་བྱེད་དོ།

འཆི་བདག་གི་འཇིགས་པ་རྣམས་མི་འགྲང་བར་དེ་དག་རྣམས་དེ་སྲིད་དུ་དགའ་བར་བྱེད་ཅིང་རྩེ་བར་ཡང་བྱེད་དོ།

པད་མའི་ཚལ་ནས་པད་མའི་ཚལ།

རིའི་རྩེ་མོ་གནས་རྣམས་ནས་གནས་རྣམས་སུ་དགའ་ཞིང་རྩེ་བར་ཡང་བྱེད་དེ།

ཕན་ཚུན་ལྷན་ཅིག་ཏུ་རྒྱགས་པ་ལ་དོན་འཐུན་པས་ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པའི་དགེ་བའི་ལས་རྣམས་ཟད་པར་མ་གྱུར་གྱི་བར་དེ་སྲིད་དུའོ།

དེས་དེ་དག་རྣམས་ཟད་པ་དང་གཞན་ཡང་དོན་བྱས་པ་མ་ཡིན་པའི་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེའོ།

གལ་ཏེ་ཡང་ལས་གཞན་གྱིས་མི་རྣམས་དང་སྐལ་བ་འཐུན་པར་མིར་སྐྱེ་བར་གྱུར་ན་ཡང་དེ་རྟག་ཏུ་སྐྱིད་ཅིང་དོན་ཆེན་པོར་འགྱུར་རོ།

མཆོག་ཏུ་གཟུགས་བཟང་བ་མཆོག་ཏུ་ལོངས་

སྤྱོད་ཆེ་བ་སྐྱེ་བོ་ཐམས་ཅད་དགའ་ཞིང་སྙིང་དུ་སྡུག་ལ་ཡིད་དུ་འོང་བ་རང་བཞིན་གྱིས་ཆོས་ལ་དགའ་བ་ཡིད་གར་དང་གླུ་དང་འཇོ་སྒེག་དང་སྐྱེ་བོ་རྣམས་ལ་དགའ་བར་གྱུར་པས་ལྷ་ཁང་དང་སྐྱེད་མོས་ཚལ་དང་མཚེའུ་དང་པད་མའི་ཚལ་རྣམས་ལ་སྤྱོད་ཅིང་རྒྱུ་བར་འགྱུར་རོ།

རྒྱལ་པོར་གྱུར་པའམ་དེ་དག་དང་འདྲ་བའི་ཕུན་སུམ་ཚོགས་པ་དང་ལྡན་པ་དང་འཚེ་བ་མེད་པ་དང་ཐམས་ཅད་དུ་གྲོགས་པོ་དང་གཉེན་བཤེས་དང་རང་གི་སྐྱེ་བོ་རྣམས་བྱམས་པར་ཡང་འགྱུར་རོ།

རྟག་ཏུ་བདེན་པར་སྨྲ་བ་དང་རྟག་ཏུ་སེམས་ཀྱི་རྒྱུད་དྲང་བ་དང་རྟག་པར་ཡང་དགའ་བའི་སྐྱེས་བུ་དེ་རྣམས་དང་ལྷན་ཅིག་ཏུ་དགའ་བར་འགྱུར་ཞིང་སེམས་དྲང་པོས་སྤྱོད་པ་ཐམས་ཅད་མ་ཉམས་པར་འགྱུར་རོ།

ཡོན་ཏན་ཐམས་ཅད་ཕུན་སུམ་ཚོགས་པ་དེ་ལྟར་དེ་སྐལ་བ་འཐུན་པ་རྣམས་སུ་འགྲོ་བ་ནི་དེའི་རྒྱུ་འཐུན་པའི་ལས་ཀྱིས་ཡིན་ནོ།

གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་རྣམས་འཐབ་བྲལ་བ་རྣམས་ཀྱི་ས་རྣམས་ལ་ཀུན་ཏུ་ལྟ་བར་བྱེད་དེ་ཇི་ལྟར་ཡོད་པ་དེས་ཐོས་པ་ལས་བྱུང་བའི་ཤེས་རབ་ཀྱིས་མཐོང་བ་འཐབ་བྲལ་བ་རྣམས་ཀྱིས་བརྩེགས་པ་རྒྱུ་བ་ཞེས་བྱ་བའོ།

དེར་ལས་གང་གིས་སེམས་ཅན་སྐྱེ་བར་འགྱུར་བ་ཡང་ཐོས་པ་ལས་བྱུང་བའི་ཤེས་རབ་ཀྱིས་དེ་མཐོང་སྟེ།

ཇི་ལྟར་སྐྱེས་བུ་དམ་པ་གང་དག་རྟག་ཏུ་ཡང་ལས་ཀྱི་འབྲས་བུས་འཇིགས་པར་གྱུར་པ་དྲང་པོར་གྱུར་པ་དྲང་པོའི་རང་བཞིན་ཅན།

ཡང་དག་པའི་ལྟ་བས་ཡང་དག་པའི་ལས་བྱེད་པ་སྡིག་པའི་གྲོགས་པོ་ཡོངས་སུ་སྤོང་བས་རྟག་ཏུ་ཡང་སངས་རྒྱས་དང་ཆོས་དང་དགེ་འདུན་རྣམས་རྗེས་སུ་དྲན་པ།

ཁ་ན་མ་ཐོ་བ་ཅུང་ཟད་ཙམ་ལ་ཡང་འཇིགས་པར་ལྟ་བས་སྲོག་གཅོད་པ་དང་མ་བྱིན་པར་ལེན་པ་རྣམ་པར་སྤངས་པར་གྱུར་པ་རྣམས་ཀྱིས་འདོད་པ་ལ་ལོག་པར་གཡེམ་པ་ཡང་སྤངས་པ་ཡིན་ཏེ།

དེ་བཞིན་དུ་ཡང་ཇི་ལྟར་འགྲོ་བར་གྱུར་པ་ན་བུད་མེད་རྣམས་ཀྱི་གར་དང་གླུའམ་རྒྱན་ནམ་སྒྲ་རྣམས་ཐོས་ནས་མྱོང་བར་བྱེད་ཅིང་ཚུལ་བཞིན་མ་ཡིན་པའི་ཡིད་ལ་བྱེད་པས་དེ་ལ་བློ་རྗེས་སུ་སོང་ནས་ཡང་དག་པའི་སེམས་མ་ཡིན་པའི་སྐྱོན་དེ་དག་རྣམས་དེས་དེ་བཞིན་དུ་

རྟོགས་ནས་རྣམ་པ་ཐམས་ཅད་དུ་ཀུན་ཏུ་རྟོག་པར་མི་བྱེད་དོ།

དེ་དེ་བཞིན་དུ་འདོད་པ་ལ་ལོག་པར་གཡེམ་པ་ཡོངས་སུ་སྤོང་བ་ལ་ཞུགས་པ་རྣམས་ནི་ལུས་ཞིག་ནས་མཐོ་རིས་བདེ་འགྲོའི་འཇིག་རྟེན་ལས་བརྩེགས་པ་རྒྱུ་བའི་ལྷ་རྣམས་ཀྱི་ནང་དུ་སྐྱེའོ།

དེར་སྐྱེས་པ་ན་ཡང་འདིའི་ལེགས་པར་བྱས་པའི་ལས་ལ་སྤྱད་པས་བདེ་བ་རྒྱ་ཆེན་པོ་མྱོང་བའི་སྐལ་བ་ཅན་རང་གི་འོད་དང་ལྡན་པ་ཡུལ་ལྔའི་འདོད་པའི་བདེ་བ་ལ་རྣམ་པར་ཆགས་པའི་ཀླུང་ན་བརྩེགས་པ་ཞེས་བྱ་བའི་རི་ནི་རིན་པོ་ཆེ་སྣ་བདུན་གྱི་རང་བཞིན་གྱི་ལྗོན་ཤིང་རྣམས་ཀྱི་གནས་ལ་མཆོག་ཏུ་དགའ་བས་གང་བ་ནི།

བྱའི་ཚོགས་རྩེ་ཞིང་ལེགས་པར་རྒྱུ་བའི་རྐང་པ་བསྟེན་པར་འོས་པ།

སྤྱོད་པ་དང་ཆ་བྱད་དང་དབྱིབས་དུ་མ་དང་ལྡན་པ།

བརྒྱ་སྟོང་གིས་ཀུན་ཏུ་གང་བ་མཆོག་ཏུ་བལྟ་བར་དགའ་བ།

རྣམ་པ་དུ་མར་ཁ་དོག་དུ་མ་སྤྱོད་ཡུལ་དུ་མ་དབྱིབས་དུ་མའི་རི་དགས་རྣམས་ཀྱིས་ཡོངས་སུ་གང་བའི་རི་དེ་མཆོག་ཏུ་དགའ་བའི་འབབ་ཆུ་དང་ཆུ་ཀླུང་དང་མཚེའུ་དང་ཚང་ཚིང་དང་འཁྲི་ཤིང་གི་ཁང་བུ་དང་འབྲས་བུ་དང་།

མེ་ཏོག་གི་ཤིང་གིས་ཀུན་ཏུ་གང་ཞིང་དཔག་བསམ་གྱི་ཤིང་གིས་ཉེ་བར་མཛེས་པར་གྱུར་པ་ཉེ་འཁོར་དུ་དཔག་ཚད་སུམ་བརྒྱ་པ།

ལྷ་དང་ལྷ་མོའི་ཚོགས་རྣམས་ཀྱིས་ཉེ་འཁོར་ཀུན་ཏུ་གང་བ་ཉེ་འཁོར་ན་མཆོག་ཏུ་ཡིད་འཕྲོག་པའི་ལྷ་མཆོག་གི་ཚོགས་རྣམས་གནས་པའི་རི་དེ་ལ་ཀུན་ཏུ་རྟོག་པ་ན།

ནགས་དང་ཉེ་བའི་ནགས་རྣམས་ནི་ཆ་ཤས་རྣམ་པར་ཕྱེ་ཞིང་རྣམ་པར་བཀྲ་བའོ།

རི་དེའི་ཉེ་འཁོར་ན་རིན་པོ་ཆེ་སྣ་བདུན་གྱི་གཞི་རབ་ཏུ་རྣམ་པར་ཕྱེ་བ་ངོས་གཅིག་ནི་ཨིན་དྲ་ནཱི་ལའི་རང་བཞིན་ཏེ་ཉེ་འཁོར་དེ་ལས་བྱུང་བའི་འོད་རྣམས་ནི་དཔག་ཚད་སྟོང་ཕྲག་དྲུག་ཅུར་ངེས་པར་འཕྲོའོ།

ཇི་ལྟར་འོད་འབྱིན་པས་ནམ་མཁའ་ཐམས་ཅད་སྔོན་པོར་མངོན་པར་འགྱུར་རོ།

ལྷ་གང་དག་རྒྱན་དང་ཆ་བྱད་རྣམ་པ་སྣ་ཚོགས་པ།

རྣམ་པ་སྣ་ཚོགས་པའི་རིན་པོ་ཆེ་ལ་སོགས་པའི་ཆ་ཤས་རྣམ་པར་བཀྲ་བའི་ལུས་དང་ལྡན་པ་ཡིན་ཏེ།

དེ་དག་རྣམས་ནམ་མཁའ་ལས་ཀླུང་ན་བརྩེགས་པའི་རིའི་ངོས་ལ་འགྲོ་བར་བྱེད་དེ།

དེའི་ཚེ་དེ་དག་རྣམས་ཐམས་

ཅད་ཟིལ་གྱིས་མནན་པའི་ཕྱིར་ན་རྣམ་པ་སྣ་ཚོགས་པར་མི་འགྱུར་རོ།

ལྷ་དེ་དག་རྣམས་ཐམས་ཅད་ཁ་དོག་གཅིག་པ་མཆོག་ཏུ་སྔོ་བའི་མདོག་ཏུ་འགྱུར་རོ།

རི་དེའི་ངོས་གཅིག་དེ་ལྟ་བུར་འགྱུར་རོ།

གཞན་ཡང་ཀླུང་ན་བརྩེགས་པའི་རི་དེའི་ངོས་གཞན་གཉིས་པ་ནི་འདི་ལྟ་སྟེ་ཤེལ་གྱི་རང་བཞིན་ནོ།

དེ་དག་རྣམས་ཐམས་ཅད་ལ་ཡང་རྣམ་པ་སྣ་ཚོགས་པའི་རྒྱན་དང་ལྡན་པའི་ལྷ་རྣམས་ཡོད་དེ་ཆ་ཤས་རྣམ་པར་བཀྲ་བ་རྣམས་གང་གི་ཚེ་རི་དེའི་ལོགས་ལ་འགྲོ་བར་འགྱུར་རོ།

དེའི་ཚེ་ཐམས་ཅད་ཀྱང་ཤེལ་གྱི་ཁ་དོག་ཏུ་འགྱུར་ཏེ་དེ་དག་འཐུན་པའི་གཟུགས་རྣམས་དང་དེ་དང་མཉམ་པའི་ཆ་ཤས་རྣམས་སུ་འགྱུར་རོ།

ཡང་ཀླུང་ན་བརྩེགས་པའི་རི་དེའི་ལོགས་གཞན་གསུམ་པ་ནི་དངུལ་གྱི་རང་བཞིན་ཡིན་ཏེ།

དེའི་འོད་རྣམས་ནི་དཔག་ཚད་ལྔ་བརྒྱར་ངེས་པར་འཕྲོ་བའོ།

མཆོག་ཏུ་དཀར་བ་དང་མཆོག་ཏུ་འབར་བ་དང་ལྡན་པ་བལྟ་བར་མཆོག་ཏུ་སྡུག་པའི་ལོགས་དེ་ལ་ཡང་ལྷ་གང་དག་ཉེ་བར་འགྲོ་བ་རྣམས་དེ་ཁོ་ན་བཞིན་དུ་རྣམ་པར་བཀྲ་བའི་རྒྱན་དང་ཆ་བྱད་དུ་གྱུར་པ་ལས་ཁ་དོག་གཅིག་ཏུ་འབར་ཏེ་མཆོག་ཏུ་དཀར་བ་དང་མདོག་མཆོག་ཏུ་འོད་གསལ་བའི་རི་དེ་དང་ཁ་དོག་མཚུངས་པར་འགྱུར་རོ།

ཡང་རི་དེའི་ལོགས་གཞན་བཞི་པ་ནི་འཛམ་བུའི་ཆུ་བོའི་གསེར་གྱི་རང་བཞིན་ཉེ་འཁོར་ན་ཉི་མ་ལྟར་སྣང་བ་ཤིན་ཏུ་ཡང་གཟི་བརྗིད་དང་ལྡན་པར་དེའི་འོད་དཔག་ཚད་སྟོང་དུ་འཕྲོ་བ་ནི་གཅིག་ཏུ་འབར་ཞིང་འཁྲིགས་པ་བཞིན་དུ་སྟེ་དེས་ནམ་མཁའ་རྣམ་པར་གསལ་བར་བྱེད་དོ།

ལྷ་གང་ཡང་དེའི་ངོས་ཀྱི་ནམ་མཁའ་ལ་ཀུན་ནས་གནས་ནས་འགྲོ་བར་བྱེད་པ་དེ་དག་ཐམས་ཅད་དེའི་འོད་ཀྱིས་གསེར་བཙོ་མའི་རང་བཞིན་གྱི་མདོག་ཅན་དུ་འགྱུར་རོ།

གཞན་ཡང་ཀླུང་ན་བརྩེགས་པའི་རི་དེའི་ངོས་ལྔ་པ་ནི་པད་མ་རཱ་གའི་འོད་དང་མཚུངས་པར་སྣང་བ་སྟེ།

ལོགས་དེའི་ཉེ་འཁོར་རྣམས་ནི་མཆོག་ཏུ་དམར་བ་རྣམ་པར་སྣང་བར་བྱེད་པས་དེའི་འོད་ཟེར་རྣམས་ནི་དཔག་ཚད་སྟོང་དུ་ངེས་པར་འཕྲོ་བའོ།

ངོས་དེ་ལ་ཡང་ལྷ་གང་དག་འགྲོ་བར་བྱེད་པ་དེ་དག་ཐམས་ཅད་རྣམ་པ་སྣ་ཚོགས་པའི་

གཟུགས་སུ་ཡང་གྱུར་ནས་ཁ་དོག་ཤིན་ཏུ་དམར་པོར་སྣང་བར་འགྱུར་རོ།

གང་ཡང་རིན་པོ་ཆེ་དམར་པོ་གང་དག་ལུས་ལ་ལེགས་པར་བཏགས་པར་གྱུར་པ་དེ་དག་རྣམས་ནི་བརྒྱ་འགྱུར་གྱིས་ཀྱང་ཆེས་ལྷག་པའི་རིན་པོ་ཆེ་རྣམས་སུ་འགྱུར་ཏེ།

རི་དེའི་ལོགས་ཀྱི་འོད་ཀྱི་ཁྱད་པར་གྱིས་ཡིན་ནོ།

གཞན་ཡང་རི་དེའི་ངོས་དྲུག་པ་ནི་རྡོ་རྗེ་དང་མཚུངས་པའི་ཁ་དོག་རྣམས་ཏེ་དེའི་འོད་རྣམས་ཀྱང་དཔག་ཚད་སྟོང་དུ་ཁྱབ་པར་འགྲོ་བའོ།

ཉེ་འཁོར་ཀུན་ནས་ཀྱང་འཇའ་ཚོན་ལྟ་བུའི་འོད་བྱེ་བ་ཕྲག་འཕྲོ་བར་འགྱུར་རོ།

ངོས་དེ་ལ་ལྷ་གང་ཞིག་འགྲོ་བར་བྱེད་པ་དེ་དག་ཀྱང་དེ་བཞིན་དུ་འཇའ་ཚོན་དང་མཚུངས་པའི་ཁ་དོག་ཏུ་འགྱུར་ཏེ་ཀླུང་ན་བརྩེགས་པའི་རི་དེའི་གཟི་བརྗིད་ཀྱིས་ཡིན་ནོ།

གཞན་ཡང་རི་དེའི་ངོས་བདུན་པ་ནི་རིན་པོ་ཆེ་བདུན་གྱི་རང་བཞིན་ཡིན་ཏེ།

སྣ་བདུན་ཉིད་ཁོ་ནའི་རིན་པོ་ཆེས་རྣམ་པར་བཀྲ་བའི་ངོས་དེར་ལྷ་གང་དག་འགྲོ་བར་བྱེད་པ་དེ་དག་ཐམས་ཅད་རྣམ་པ་སྣ་ཚོགས་པ་རྣམས་ཀྱིས་ལུས་བརྒྱན་པར་འགྱུར་རོ།

གོས་རྣམས་ཀྱང་རྣམ་པ་སྣ་ཚོགས་པར་འགྱུར་རོ།

ངོས་དེའི་འོད་རྣམས་ཀྱང་དཔག་ཚད་སྟོང་དུ་ཡིན་ཏེ།

དེ་ལྟར་ན་ཀླུང་ན་བརྩེགས་པའི་རི་དེའི་ཉེ་འཁོར་ན་དཔལ་གྱིས་རྣམ་པར་གསལ་བ་ཡིན་ནོ།

དེ་བཞིན་དུ་རི་རྣམས་ཀྱི་རྒྱལ་པོ་སྟེང་གི་རི་རབ་ལྷུན་པོ་ཡང་དེ་ལྟར་ཡིན་ལ།

རི་རྣམས་ཀྱི་རྒྱལ་པོ་རི་རབ་ལྷུན་པོ་དེས་ཀྱང་རི་ཀླུང་ན་བརྩེགས་པའི་འོད་ཟེར་རྣམས་སམ་དགའ་བར་འགྱུར་བའམ།

རིན་པོ་ཆེའི་འོད་རྣམས་སམ།

དགའ་བར་གྱུར་པ་རིན་པོ་ཆེའི་འོད་རྣམས་ཀྱང་རུང་སྟེ།

བརྒྱའི་ཆར་ཡང་མི་ཕོད་ལ་སྟོང་གི་ཆར་ཡང་མི་ཕོད་དོ།

རི་དེ་ནི་དེ་སྲིད་དུ་དགའ་བ་ཡིན་ནོ།

དེ་ཅིའི་ཕྱིར་ཞེ་ན།

དགེ་བའི་ལས་ཀྱི་སྟོབས་ཀྱི་སྟེ་འཐབ་བྲལ་བ་རྣམས་ལེགས་པར་བྱས་པ་ཆེས་ལྷག་པ་དང་ཡོངས་སུ་དག་པའི་ལས་ཅན་ཡིན་པའི་ཕྱིར་ཏེ་རྒྱུ་འདིས་ན་ཐམས་ཅད་ལས་ཉེ་འཁོར་ཀུན་ཏུ་ཆེས་དགའ་བ་ཡིན་ནོ།

གཞན་ཡང་རི་དེའི་ཉེ་འཁོར་ན་མཆོག་ཏུ་རྣམ་པར་དག་པའི་གཟི་བརྗིད་མཆོག་དང་ལྡན་པ་ཐམས་ཅད་དང་།

བཅས་པས་མུ་ཏིག་མཆོག་གི་དྲ་བས་ཡོངས་སུ་གཡོགས་པའི་རི་དེ་ནི་ལེགས་པར་བྱས་པའི་ལས་ལས་ཀུན་ཏུ་བྱུང་བས་མུ་ཏིག་གི་ཕྲེང་བའི་ཚོགས་བྲེས་པས་དེ་བཞིན་དུ་རྣམ་པར་མཛེས་པ་ནི་ཇི་ལྟར་ཡིད་སྨོན་གྱིས་ཀུན་ནས་བསམས་པའི་གྲོང་ཁྱེར་ཆེན་པོ་མུ་ཏིག་གི་ཕྲེང་བས་བྲེས་པས་དེ་བཞིན་དུ་སྒྲ་འབྱིན་ཏོ།

དྲ་བ་དེ་རྒྱ་ཆེན་པོར་གྱུར་པའི་ལོགས་ལ་ཡང་རྣམ་པ་སྣ་ཚོགས་པའི་བྱའི་ཚོགས་བརྒྱ་སྟོང་གནས་ལ་ལོགས་དེ་ལ་གནས་པའི་བྱ་རྣམས་ཀྱིས་ཀྱང་ལྷ་གང་དག་བག་མེད་པར་གྱུར་པ་དང་།

བག་མེད་པར་སྤྱོད་པའི་ལྷ་དེ་རྣམས་ལ་བྱ་དེས་འབོད་པར་བྱེད་དེ།

བྱ་དེ་རྣམས་ཀྱང་བརྗོད་པ་རྣམ་པ་སྣ་ཚོགས་པ་ཞེས་བྱ་བའི་ཚིགས་སུ་བཅད་པ་ལྷ་དེ་དག་རྣམས་ལ་རྗོད་པ་བྱེད་པ།

ཇི་ལྟར།

རྣམ་པ་སྣ་ཚོགས་ལས་དབང་གིས།

འགྲོ་བའི་སྐྱེ་བ་འདི་ལྷས་ཐོབ།

དེ་ཐོབ་གང་ཞིག་ཆོས་མི་ཤེས།

ཕྱིས་ནས་དེ་ནི་གདུང་བར་འགྱུར།

ཚལ་དང་སྐྱེད་ཚལ་དགའ་བ་འདིར།

འཁྲི་ཤིང་སྟེགས་བུ་དཀྱིལ་འཁོར་དུ།

གང་འདི་འཇིག་རྟེན་རྣམ་བཀྲ་བ།

དེ་ཀུན་དགེ་བ་ལས་སྐྱེས་འབྲས།

གང་དང་གང་གིས་ཇི་ལྟར་ཡང་།

མཛེས་པར་འགྱུར་བའི་ལས་བྱས་པ།

དེ་དང་དེ་ཡིས་དེ་བཞིན་དུ།

འབྲས་རྣམས་དེ་རྗེས་འཇུག་པར་མཐོང་།

ལྷ་རྣམས་ལ་ནི་སོ་སོར་ཡང་།

དམན་པར་མཆོག་གི་བདེ་བ་མཐོང་།

གང་དང་གང་གིས་བྱས་ཅི་ལྟར།

དེ་དང་དེ་འབྲས་དེ་བཞིན་ནོ།

གཏི་མུག་དབང་གིས་འགྲོ་བའི་ལྷ།

རྨོངས་པ་སྣ་ཚོགས་ཆ་བྱད་ཅན།

ཡིད་ནི་ཤིན་ཏུ་འཁྲུལ་པ་ཡི།

རྨོངས་པས་འཇིག་ཆེན་མ་མཐོང་ངོ་།

རྣམ་རྨོངས་བག་མེད་པ་ཡིས་གང་།

རང་ལ་ཕན་པ་བྱེད་མ་ཡིན།

འདོད་དགའ་རྣམ་པ་སྣ་ཚོགས་པའི།

རྣམ་པ་སྣ་ཚོགས་འབྲས་འདོད་པ།

ལས་རྣམས་ཀྱང་ནི་མི་བྱེད་པའི།

ལྷ་དེའི་སེམས་ནི་རྨོངས་པ་ཡིན།

འབྲས་བུ་གང་དག་ཡིད་འོང་བའི།

སྣ་ཚོགས་ངེས་པར་འབྱུང་འགྱུར་གང་།

དེ་ཡིས་མར་མེ་སྤངས་ནས་ནི།

འོད་ལ་མཆོག་ཏུ་ལྟ་བར་བྱེད།

གང་ཡང་འབྲས་བུ་དང་འདྲ་བར།

འདོད་པའི་ལྷ་ནི་དམ་པ་མཆོག །

གང་ཡང་རྒྱུ་

འབྲས་དེ་ཉིད་ཤེས།

བདེ་བ་ཡི་ནི་སྐལ་ལྡན་ཡིན།

ས་བོན་མེད་པའི་འབྲས་བུ་མིན།

མར་མེ་མེད་པར་གང་ལ་འོད།

ཚུལ་ཁྲིམས་མེད་ལ་མཐོ་རིས་མེད།

ཤེས་རབ་མེད་ལ་གྲོལ་ལམ་ཅི།

གལ་ཏེ་གྲོལ་ན་དེ་བདེ་ཡིན།

འདོད་པ་སྤངས་པ་སྐྱོབ་པ་ཡིན།

འདོད་པའི་སྲེད་ལས་རྣམ་གྲོལ་དང་།

ང་ཡི་མེད་པའང་བློ་ལྡན་ཡིན།

གལ་ཏེ་ལས་སྐྱེས་བདེ་འདི་རྣམས།

དེ་ཀུན་རྙོག་དང་བཅས་པ་ཡིན།

མཐར་ཐུག་པ་ནི་གང་ཡིན་པ།

དེ་ཀུན་དྲི་མ་མེད་པར་དྲན།

མི་རྣམས་བསྐལ་པ་བརྒྱར་ཡང་ནི།

ཡུལ་གྱིས་ངོམས་པ་ཡོད་མ་ཡིན།

བདེ་བ་གང་ཡིན་དེ་རྣམས་ལ།

ཡུལ་རྣམས་སྟེན་ལ་ངོམས་ཡོད་མིན།

བསྟེན་པར་གྱུར་ན་རྟག་པར་འདོད།

ཕྱིར་ཞིང་ཕྱིར་ཞིང་འཕེལ་བར་འགྱུར།

དེ་འཕེལ་བ་ནི་དུག་དང་མཚུངས།

ལོག་པར་ལྟ་བར་གྱུར་པ་ཡིན།

རྒུད་པ་ལ་མཁས་འཇིགས་རུང་བ།

རྟག་པར་ལྟུང་བའི་རྒྱུ་དུ་མ།

དེ་དག་ཡོངས་སུ་མ་སྤངས་ནའང་།

མིག་བྲལ་ཕལ་ཆེར་ལྟུང་བ་ཡིན།

སྐྱོན་དང་ཡོན་ཏན་ཡོངས་ཤེས་པ།

དེ་དག་མཁས་པའི་མཚན་ཉིད་ཡིན།

སྐྱོན་ཡོན་ཡོངས་སུ་མི་ཤེས་པ།

དེ་དག་རྨོངས་པའི་བྱེད་པ་ཡིན།

ཡོན་ཏན་ལ་ནི་ཡོན་ཏན་བློ།

སྐྱོན་རྣམས་ལ་ཡང་དེ་བཞིན་ནོ།

སྐྱོན་ཡོན་དེ་ཉིད་ཤེས་པ་དེ།

རྟག་ཏུ་བདེ་བའི་སྐལ་ལྡན་ཡིན།

དེ་ལ་དེ་དག་ཡུལ་རྣམས་ཀྱི།

སྐྱོན་ཡོན་ཤེས་པར་དེ་འདིར་འདོད།

ཤེས་རབ་ཡོངས་སུ་སྤངས་ནས་ནི།

ཡུལ་རྣམས་ལྷ་ཡིས་ཇི་ལྟར་སྟེན།

དེ་ལྟར་བྱ་དེ་དག་རྣམས་མུ་ཏིག་གི་དྲ་བའི་གསེབ་ཏུ་སོང་ནས་ཕན་པའི་དོན་དུ་རྗོད་པར་བྱེད་དེ་ལྷ་དེ་དག་རྣམས་ཉིད་ལ་ཕན་པའི་དོན་དུའོ།

གཞན་ཡང་རི་དེ་ཉིད་ཀྱི་ཉེ་འཁོར་གྱི་སྟེང་ན་འོད་ཀྱི་ཕྲེང་བ་རྣམ་པར་བཀྲ་བའི་ཆུན་པོ་སྦྲེལ་བར་གྱུར་པ་རྣམས་ནི་དུ་མར་མཛེས་པ་དང་།

ཉེ་འཁོར་ན་འབར་བ་དེ་བཞིན་དུ་སྟེང་དུ་ཡང་གསལ་བར་བྱེད་དེ་ཇི་ལྟར་འཛམ་བུའི་གླིང་པས་ཁ་དོག་གསུམ་པ་རྣམས་དབང་པོའི་གཞུ་ཞེས་མངོན་པར་བརྗོད་པ་ཡིན་ལ་དེའི་ལོགས་རྣམས་ལ་ཡང་གལ་ཏེ་ལྷ་རྣམས་ལྟ་བར་བྱེད་ན་རིན་པོ་ཆེ་

རྣམ་པ་སྣ་ཚོགས་པའི་འོད་ཀྱི་གཟི་བརྗིད་ཀྱིས་དེ་ལ་ཡང་རབ་ཏུ་དགའ་བར་འགྱུར་རོ།

དེ་ནས་ལོགས་དེ་དག་ལས་ལྷ་གང་དག་གིས་རི་དེའི་ལོགས་རེ་རེ་ཞིང་བལྟས་པ་ན་རིན་པོ་ཆེ་དུ་མ་འོད་འབྱིན་པ་ཤིན་ཏུ་དགའ་བ་ངོ་མཚར་ཤིན་ཏུ་ཆེ་བ་རྣམས་མཐོང་ངོ་།

ལོགས་རེ་རེར་ལྷ་དེ་དག་རྣམས་ལོགས་རེ་རེར་ཞིང་ཡང་དགའ་བར་བྱེད་དེ་རྣམ་པ་དུ་མར་ལས་སྣ་ཚོགས་པ་བྱས་པའི་བདེ་བ་ཆེན་པོ་ཉམས་སུ་མྱོང་བར་བྱེད་དོ།

རི་དེ་ན་རི་རབ་ལྷུན་པོ་བཞིན་དུ་གཞན་ཡང་ནགས་འདི་དག་རྣམས་ཡོད་དེ་འདི་ལྟ་སྟེ།

མཛེས་པའི་རྒྱན་ཞེས་བྱ་བའི་ནགས་ཚལ་དང་།

རྩེད་མོ་དགའ་བ་ཞེས་བྱ་བའི་ནགས་ཚལ་དང་།

ཉིན་མོར་བྱེད་པས་དགའ་བ་ཞེས་བྱ་བའི་ནགས་ཚལ་དང་།

བདུད་རྩིས་མཛེས་པ་ཞེས་བྱ་བའི་ནགས་ཚལ་དང་།

ནགས་བཞི་པོ་དེ་རྣམས་དང་ཉེ་བའི་ནགས་དང་།

འབབ་ཆུ་དང་མཚེའུ་དང་།

པད་མའི་ཚལ་དང་ཆུ་ཀླུང་དང་ཚང་ཚིང་དང་།

ཁྲད་ཁྲོད་རྣམས་ན་བྱ་རྣམ་པར་སྒྲ་འདོན་པ་དང་རྣམ་པར་བཀྲ་བའི་མེ་ཏོག་ལེགས་པར་བཀྲམ་པ་ལྗོན་ཤིང་ལ་བྱའི་ཚོགས་རྣམ་པར་སྒྲོགས་པ་དང་།

ཁང་བཟངས་དང་ཁྱོགས་ཀྱི་ཁང་བུའི་ཕྲེང་བ་རྣམས་དང་ཀུན་ལྡན་པ་ཡིན་ནོ།

རི་དེ་དང་ནགས་དེ་དག་རྣམས་སུ་རྒྱུན་གནས་ན་རྒྱུ་བའི་ལྷ་དེ་དག་རྣམས་ཅི་ནས་ཀྱང་སོང་ནས་འཁོར་དང་བཅས་པ་རྣམས་རྟག་པར་ལྷ་རྫས་ཀྱི་འདོད་པའི་ཡོན་ཏན་ལྔ་དཔེ་མེད་པ་རྣམས་ལ་དགའ་ཞིང་མགུ་བར་ཀུན་ཏུ་སྤྱོད་དེ།

ནགས་བཞི་པོ་དེ་དག་གི་ཉེ་འཁོར་རྣམས་ནི་མཆོག་ཏུ་དགའ་བར་གྱུར་པའོ།

དེ་ལ་ནགས་གཅིག་ནི་འཛམ་བུའི་ཆུ་བོའི་གསེར་གྱི་རང་བཞིན་ཏེ།

ནགས་དེའི་འདབ་མ་རྣམས་ནི་བཻ་ཌཱུརྱའི་རང་བཞིན་ལ་མེ་ཏོག་རྣམས་ཀྱང་པད་མ་རཱ་གའི་མདོག་དང་འདྲ་བའོ།

ཡང་ནགས་གཞན་འདི་ནི་དངུལ་གྱི་རང་བཞིན་ཡིན་ལ་དེའི་འདབ་མ་རྣམས་ནི་གསེར་བཟང་པོའི་མདོག་ཅན་ཡིན་ཞིང་མེ་ཏོག་ཀྱང་རྣམ་པ་དུ་མར་མཆོག་ཏུ་དྲི་ཞིམ་པོར་གྱུར་པ་གང་དག་དཔག་ཚད་བརྒྱར་དྲི་རྣམས་འགྲོ་བར་འགྱུར་ཏེ།

དྲི་རྣམས་གང་དག་བསྣམས་པར་གྱུར་པའི་ལྷ་དེ་དག་རྣམས་དེ་ཤིན་ཏུ་ཆེ་བའི་མཆོག་

ཏུ་རབ་ཏུ་དགའ་བ་ལྷག་པར་འགྱུར་རོ།

ནགས་གསུམ་པ་ནི་བཻ་ཌཱུརྱའི་རང་བཞིན་ནོ།

དེའི་ལོ་མ་རྣམས་ནི་དངུལ་གྱི་རང་བཞིན་ཡིན་ལ་མེ་ཏོག་ཀྱང་དྲི་དུ་མ་དང་ལྡན་པ་རྣམ་པ་སྣ་ཚོགས་པའི་ཁ་དོག་གོ།

ནགས་བཞི་པ་ན་རྣམ་པ་དུ་མར་འབབ་ཆུ་དང་ཆུ་ཀླུང་དང་རྫིང་བུ་དང་བྱ་རྣམ་པར་སྒྲ་འབྱིན་པ་སྟོང་ཕྲག་བརྒྱའི་ཡོན་ཏན་ཕུན་སུམ་ཚོགས་པའི་ནགས་དེ་རྣམས་ན་ཡང་སྣ་ཚོགས་པའི་བྱ་རྣམ་པར་བཀྲ་བ་རྣམས་ཀུན་ནས་སྒྲ་སྒྲོགས་པ་ནི་ཇི་ལྟར་སུམ་ཅུ་རྩ་གསུམ་པ་རྣམས་ཀྱི་དབུས་ཀྱི་བརྒྱ་བྱིན་བཞིན་ཏེ།

དེ་ལྟར་ཡང་ཤིན་ཏུ་འཐབ་བྲལ་ཞེས་བྱ་བ་ཆེས་ལྷག་པའི་མདོག་དང་སྟོབས་དང་གཟི་བརྗིད་ཀྱི་ཡོན་ཏན་ཕུན་སུམ་ཚོགས་པ་དགེ་བའི་ལས་ཀྱི་མཐའ་དུ་མ་ལ་སྤྱད་པའི་ཕྱིར་མཆོག་ཏུ་གཟི་བརྗིད་ཆེ་བ་དང་ལྡན་པ་རི་དེ་ཉིད་ལྷ་བརྒྱ་སྟོང་དུ་མས་ཡོངས་སུ་བསྐོར་ནས།

ཡུལ་མང་པོའི་ཡོན་ཏན་ཕུན་སུམ་ཚོགས་པ་རྣམས་ལ་རྣམ་པ་དུ་མར་དགའ་བར་བྱེད་དེ།

ལྷ་ཤིན་ཏུ་འཐབ་བྲལ་ནི་མཆོག་ཏུ་རྫུ་འཕྲུལ་ཆེ་བ་དང་མཐུ་སྟོབས་མཆོག་དང་ལྡན་པ་ཡིན་ནོ།

དེ་རང་གི་ལས་ཀྱིས་སྤྲུལ་པའི་འདོད་པའི་ཡོན་ཏན་ལྔ་ཕུན་སུམ་ཚོགས་པ་དགའ་བར་གྱུར་པའི་ཡུལ་ལྔ་པོ་དེ་རྣམས་ཀྱི་དབང་པོ་དྲུག་གི་བདེ་བ་ལས་དེ་ཉེ་བར་ལོངས་སྤྱོད་དོ།

ཤིན་ཏུ་འཐབ་བྲལ་གྱི་ལྷ་རྣམས་ནི་ཆེས་ཆེ་བ་ཡིན་ཏེ་དེའི་ལེགས་པར་བྱས་པའི་ལས་རྣམས་ཀྱིས་རི་དེ་རྣམ་པ་དེ་སྲིད་དུ་དགའ་བར་འགྱུར་བ་ཡིན་ནོ།

དགའ་བར་འགྱུར་བ་དེ་དག་རྣམས་མངོན་པར་མཐོང་ནས་ཀྱང་དུས་ཐམས་ཅད་དུ་རབ་ཏུ་དགའ་བ་ཞེས་བྱ་བའི་བྱའི་ཚོགས་རྣམས་ཀྱིས་དེ་དག་དང་ལྷན་ཅིག་སྐྱེས་པའི་དབྱངས་ལས་ཀྱིས་བྱས་པའི་མངོན་པར་དགའ་བར་འགྱུར་བའི་ཚིགས་སུ་བཅད་པ་དང་ལྡན་པས་ཚིགས་སུ་བཅད་པ་རྣམས་བརྗོད་པ་ནི།

ཇི་ལྟར།

སེམས་ལྡན་མི་ཡི་ཤེས་རབ་ཀྱིས།

ཡིད་ལ་སྨོན་དགུ་བརྒྱ་ཡིས་ཀྱང་།

བདེ་དེ་བྱ་བར་མི་ནུས་ཏེ།

ཇི་ལྟར་ལས་བྱུང་བདག་ཉིད་ཆེ།

ཤིན་ཏུ་ཆེ་དང་མཆོག་ཏུ་ཆེ།

དགའ་བ་ལས་ཀྱང་མཆོག་དགའ་དེ།

རྙེད་པ་སྐྱེས་བུ་བྱེད་འབྲས་ཏེ།

དེ་ནི་ཚུལ་ཁྲིམས་མཛེས་པ་ཡིན།

ཆུ་བོ་འགྱུར་ལྡོག་འགྲོ་བ་ཡི།

ཡུལ་གྱི་སྒོ་ཡི་འགྱུར་ལྡོག་ལས།

གང་དག་འདི་ལས་སེམས་འདུལ་བའི།

ལྷ་དེ་བདེ་བའི་སྐལ་ལྡན་ཡིན།

བསོད་ནམས་བདག་ཉིད་ཀྱིས་བྱས་པ།

བདག་ཉིད་ལ་ནི་སྒྲུབ་པར་བྱེད།

བདེ་བའམ་གལ་ཏེ་སྡུག་བསྔལ་གང་།

བདག་ཉིད་ཁོ་ནས་ཉེར་ལོངས་སྤྱོད།

སྐྱེས་བུ་རྟག་ཏུ་སྡིག་བྱེད་པ།

དགྲ་བཞིན་དུ་ཡང་བདག་ཉིད་གནས།

དགེ་བ་བྱེད་པ་དེ་བཞིན་དུ།

བདག་ལ་གྲོགས་བཞིན་རབ་ཏུ་སྒྲུབ།

ཆུ་བོ་ཡི་ནི་རྒྱུན་བཞིན་དུ།

སྐྱེ་བས་སྐྱེས་བུ་ལ་རབ་འཇུག །

གང་ཡིད་ཚུལ་ཁྲིམས་ལ་དགའ་བ།

བསོད་ནམས་གཟི་བརྗིད་དྲི་མེད་ལྡན།

མུན་ཚོགས་ཕལ་ཆེན་ལ་གནས་ནས།

དོན་མིན་པ་ནི་རབ་སྒྲུབ་པ།

གང་ཞིག་སྡིག་ལ་དགའ་བའི་བློས།

རྟག་ཏུ་ཡུལ་ལ་ཆེད་ཆེར་འཛིན།

ཡུལ་ན་དགའ་བའི་འགྱུར་ལྡོག་གིས།

རྟག་ཏུ་ཆགས་པའི་རྗེས་སུ་འབྲང་།

གང་བློ་ཆོས་ལ་མི་གནས་པ།

མི་དེ་སྡུག་བསྔལ་སྐལ་ལྡན་ཡིན།

གང་ཕྱིར་བདེ་ཆོས་ཉེ་འཁོར་ལས།

སྡུག་བསྔལ་བདུད་ཀྱི་ཆོས་འདི་ཡིན།

སྐྱེ་བོ་དེ་ཉིད་ཤེས་པ་ཡིས།

བདེ་སྡུག་མཚན་ཉིད་དེར་ཤེས་བྱ།

གང་ཡང་བདེ་བ་དེ་འདོད་པས།

དམ་ཆོས་རྗེས་སུ་སྤྱད་པར་གྱིས།

སྡུག་བསྔལ་གང་ཞིག་མངོན་ཞེན་འདིས།

ཆོས་དེ་བྱེད་ལས་ཡིན་པར་འདོད།

སྡུག་བསྔལ་རྣམ་པ་སྣ་ཚོགས་དང་།

རྒྱུ་མེད་བདེ་བ་མཐོང་བ་མིན།

བདེ་སྡུག་ཐ་དད་གྱུར་ཏེ་ལྟར།

རྩོལ་བས་རང་ཕན་ཆོས་ལ་སྤྱོད།

གང་གི་རྣམ་རྟོག་དུ་མ་དང་།

གང་ཡང་རྣམ་པ་དུ་མ་ཡི།

སྐྱེ་བ་རབ་ཏུ་ཐོབ་པ་འདི།

དེ་ཀུན་ལས་ལས་སྐྱེས་པའི་འབྲས།

གང་ཞིག་ཆོས་རྣམས་མི་འདོད་པ།

སྐྱེ་བ་འབྲས་བུས་སྟོང་པ་ཡིན།

ཆོས་ཀྱི་མཐོ་རིས་དག་ཏུ་འབབ།

ཆོས་སྤྱོད་པ་ནི་བདེ་དང་ལྡན།

དེ་ལྟར་དེ་ཀུན་འཐོབ་ནུས་པ།

དམ་ཆོས་དབང་བྱས་འབྲས་བུ་ཡིན།

སྐྱེས་བུ་ངན་པ་ཆོས་མི་འཛིན།

དམྱལ་བར་ཉེ་བར་འགྲོ་བ་ཡིན།

ཤི་བར་གྱུར་པ་མཆོག་ཡིན་གྱི།

ལུས་ལ་སྨོན་པ་དེ་ལྟར་མིན།

ཆོས་སྤངས་པ་ཡི་སྐྱེས་བུ་ནི།

རྟག་ཏུ་འཁོར་བར་འཁྱམ་པར་འགྱུར།

ཆོས་ཀྱི་མིག་དང་མི་ལྡན་པའི།

གཏི་མུག་གིས་ཀྱང་ནོན་པའི་སེམས།

ས་སྒྲེན་ལ་འབབ་ཆར་ཇི་བཞིན།

བདེ་བར་མཐོང་བ་འདི་དོན་མེད།

ཆོས་ཀྱི་མྱུ་གུ་ཡིད་ཞིང་ལ།

སྐྱེ་བ་མིན་ཏེ་སེམས་མེད་པས།

གང་གི་རང་བཞིན་བླུན་པའི་བློ།

ཆོས་མིན་སྤྱོད་པ་ལ་དགའ་བོ།

ཆོས་མིན་ལམ་ལ་བརྟེན་ནས་ནི།

སྐྱེ་བོ་སྡིག་དབང་རྗེས་སུ་འགྲོ།

སེམས་ཀྱིས་ཡོངས་སུ་དེད་པ་ནི།

ཡུན་རིངས་འཁོར་བར་འཁྱམ་པ་ཡིན།

སེམས་འདི་སྐད་ཅིག་སྐད་ཅིག་ལ།

རྣམ་པ་དུ་མར་ཡོངས་སུ་འཇུག །

ཡང་མོའི་རང་བཞིན་རྩབ་ཧྲལ་ཅན།

སྒྱུ་མ་དྲི་ཟ་ལྟར་སྣང་བ།

སེམས་དང་རྣམ་ཤེས་ལེགས་བསྡམས་པས།

གང་ཉིད་འཆིང་བ་ཡིན་པར་འདོད།

འཆིང་བ་ངན་པ་ཤུགས་ཆེན་དེ།

རྣམ་པ་དུ་མར་ཡོངས་སུ་རྒྱུག །

འདོད་པ་དང་བཅས་ཡུལ་ལ་ཡང་།

སྲེད་པའི་དབང་དང་ལྡན་དེས་ཀྱང་།

ལྷ་དེ་རྣམས་ནི་དེ་བསླུས་སོ།

བག་མེད་དབང་དུ་གྱུར་པ་ཡིས།

གསོན་པ་རྣམ་པར་བཅོམ་ནས་ཀྱང་།

ལོག་པར་ལྟུང་བའང་མ་རྟོགས་སོ།

རྣམ་པར་འཇོམས་དང་ཟད་པ་དང་།

བདེ་བ་མི་རྟག་གཡོ་བར་ནི།

བདེ་ཉིད་ཐམས་ཅད་གྱུར་པ་ཡང་།

རྨོངས་པས་རིག་པ་མ་ཡིན་ནོ།

སྲེད་པ་རྨོངས་པ་བག་མེད་གང་།

རོ་བདེ་རྣམས་ཀྱང་དེ་བཞིན་དུ།

ལྷ་ཡི་ཚོགས་ནི་རྣམ་རྨོངས་པས།

སྲིད་ནས་སྲིད་པར་འཁྱམ་པ་ཡིན།

མེད་གྱུར་ནས་ནི་ཡོད་པར་འགྱུར།

ཡོད་པ་ངེས་པར་གཡོ་བའང་ཡིན།

ལྷ་རྣམས་ལྟུང་བར་གྱུར་པ་ཡི།

ཆོས་དེ་འདི་ལ་རྣམ་པར་གནས།

ཞེས་བྱ་བའོ།

དེ་ལྟར་བྱ་དེ་དག་གིས་རི་དེ་ལ་རྒྱུ་བ་རྣམས་ལ་དམ་པའི་ཆོས་དང་ལྡན་པ་རྣམ་པ་དུ་མར་རྗོད་པར་བྱེད་དོ།

དེ་ནས་ལྷ་གང་དག་སྔོན་ལེགས་པར་བྱས་པའི་ལས་ལ་སྤྱད་པར་གྱུར་པ་དེ་དག་རྣམས་ནི་བྱ་དེ་དག་གིས་རྣམ་པར་བརྗོད་པ་ཉེ་བར་འཛིན་ཏོ།

ཉེ་བར་བཟུང་ནས་ཀྱང་ཡིད་ལ་བྱེད་དོ།

གང་དག་ཆོས་རྣམས་ལ་རྗེས་སུ་མ་སྤྱད་པ་དེ་དག་རྣམས་ཀྱིས་ནི་ཚིག་གཅིག་ཀྱང་མི་གོའོ།

དེའི་ཕྱིར་ན་རང་ལ་ཕན་པ་དང་གཞན་རྣམས་ལ་ཕན་པར་འདོད་པས་བརྩོན་པ་དུ་མས་ཀྱང་ཡེ་ཤེས་ཀྱི་སྣང་བ་ལ་ཆེད་ཆེར་འགྱུར་བར་བྱའི་སྐྱབས་ཀྱི་རྣམ་པ་དེ་ལྟ་བུ་སྨན་རྣམས་སམ་ངན་

འགྲོ་ཐམས་ཅད་ལས་ངེས་པར་སྒྲོལ་བར་འགྱུར་བ་གཞན་ནི་ཡོད་པ་མ་ཡིན་ནོ།

ཡེ་ཤེས་ཀྱིས་ནི་ཇི་ལྟ་བ་བཞིན་དུ་བདེ་བ་མཆོག་གི་ས་བོན་དུ་འགྱུར་ཏེ་བསྟེན་པ་དང་བསམས་པ་དང་བསྙེན་བཀུར་བྱས་པ་དེ་དག་གིས་ཤེས་རབ་དེ་ལྟ་ཡོན་ཏན་དང་ལྡན་པས་ན་ངེས་པ་ཁོ་ནར་མྱ་ངན་ལས་འདས་པ་མཐར་བྱེད་པར་འགྱུར་རོ།

ལྷ་གང་དག་བག་མེད་པར་རྣམ་པར་རྒྱུ་བ་རྣམས་ཀྱིས་བྱ་དེ་དག་རྣམས་ཀྱི་རྣམ་པར་བརྗོད་པ་ཉེ་བར་བཟུང་ནས་དེ་དག་རྣམས་ཡུད་ཙམ་ཞིག་བག་མེད་པ་ཉེ་བར་ཞི་བར་འགྱུར་རོ།

གཞན་ཡང་ལྷ་དེ་དག་རྣམས་དེ་ཉིད་ཀྱིས་ནགས་དང་ཉེ་བའི་ནགས་དགའ་བ་དེ་ན་རིན་པོ་ཆེ་དུ་མས་རྣམ་པར་གསལ་བའི་རྩེ་མོར་ལྷ་དེ་དག་འདོད་པའི་ཡོན་ཏན་ལྔ་ཡང་དག་པར་ལྡན་པར་གྱུར་པས་རྣམ་པ་དུ་མར་དགའ་ཞིང་ཀུན་ཏུ་ཡང་སྤྱོད་དེ་ཇི་སྲིད་དུ་འདོད་པ་དང་སྡུག་པ་དང་ཡིད་དུ་འོང་བ་བྱས་ཤིང་བསགས་པའི་ལས་རྣམས་ཟད་པར་མ་གྱུར་བར་དུའོ།

དེས་དེ་དག་རྣམས་ཟད་ནས་གཞན་ཡང་རྣམ་པར་འཇུག་ཅིང་རབ་ཏུ་ཡང་ལྟུང་སྟེ་ཇི་ལྟར་ལས་རྣམས་ཀྱིས་ཉེ་བར་འགྲོ་བ་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེའོ།

ལྷག་མ་རྣམས་ཀྱིས་གལ་ཏེ་མི་རྣམས་དང་སྐལ་བ་མཉམ་པར་མིར་སྐྱེས་ན་དེ་རྟག་ཏུ་སྐྱིད་པའི་མཆོག་ཏུ་འགྱུར་རོ།

སྐྱེས་པ་ནས་བཟུང་ནས་གཞན་རྣམས་ཀྱིས་ཀྱང་བཀའ་མི་སྒོ་བ་དང་།

རང་ཅི་འདོད་པ་བཞིན་དུ་བྱེད་པ་དང་མཆོག་ཏུ་ལོངས་སྤྱོད་དང་ལྡན་པ་དང་ཤེས་རབ་ལ་མཆོག་ཏུ་དགའ་བ་དང་མཆོག་ཏུ་ཡོན་ཏན་དང་གཟུགས་ཕུན་སུམ་ཚོགས་པ་དང་།

སྐྱེ་བོ་ཐམས་ཅད་ཀྱིས་བྱམས་ཤིང་སྙིང་དུ་སྡུག་ལ་ཡིད་དུ་འོང་ཞིང་འཐུན་པར་འཛིན་པ་དང་སྐྱེ་བོ་ཐམས་ཅད་ཀྱིས་མཆོད་པར་བྱེད་པ་དང་དགའ་ཞིང་འདོད་པའི་ཡུལ་རྣམས་སམ་ཚོང་འདུས་དང་གྲོང་ཁྱེར་རྣམས་སུ་སྐྱེ་བར་འགྱུར་རོ།

རང་གི་སྐྱེ་བོ་དང་གྲོགས་དང་གཉེན་འདུན་རྣམས་ཀྱིས་ཀྱང་མཆོད་པར་འགྱུར་རོ།

རྒྱལ་པོའམ་རྒྱལ་པོའི་བློན་པོ་རྣམས་སུའམ་སེམས་དྲང་པོའི་རང་བཞིན་ཅན་ཆོས་དང་ལྡན་པ་ཆོས་ཀྱི་རྗེས་སུ་འཇུག་པའི་ཡང་དག་པའི་ལྟ་བ་ཅན་དུ་ལས་དེའི་རྒྱུ་འཐུན་པར་འགྱུར་རོ།།

འཕགས་པ་དམ་པའི་ཆོས་དྲན་

པ་ཉེ་བར་གཞག་པ།

བཞི་བཅུ་རྩ་བདུན་པ།

གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་འཐབ་བྲལ་གྱི་ལྷ་རྣམས་ཀྱི་ས་ལ་རྣམ་པར་ལྟ་བར་བྱེད་པ་ན་ཇི་ལྟར་ཡོད་པ་དེས་ཐོས་པ་ལས་བྱུང་བའི་ཤེས་རབ་ཀྱིས་ཤེས་པ་ནི་འཐབ་བྲལ་བའི་ལྷ་རྣམས་ཀྱིས་བརྩེགས་པ་རྒྱུ་བ་ཞེས་བྱའོ།

ས་དེར་ལས་གང་གིས་སེམས་ཅན་རྣམས་སྐྱེ་བར་འགྱུར་བ་ཡང་དེས་ཐོས་པ་ལས་བྱུང་བའི་ཤེས་རབ་ཀྱིས་མཐོང་བ་ནི་ཇི་ལྟར་གང་དག་གིས་ལེགས་པར་བྱས་པའི་ལས་ཀྱི་མཐའ་ལ་སྤྱོད་པ་རྣམས་མཆོག་ཏུ་ཚུལ་ཁྲིམས་དང་ལྡན་པར་གྱུར་ནས་རྟག་ཏུ་གཞན་ལ་གདུང་བར་མི་བྱེད་པར་གྱུར་ཅིང་འཕགས་པས་བཞེད་པའི་ཚུལ་ཁྲིམས་ཀྱི་མཆོག་བྱས་ཤིང་བསགས་པར་གྱུར་པ།

མ་ཉམས་པ།

སྐྱོན་མེད་པ།

མ་སྨས་པ།

བརྟན་པ།

བདེ་འགྲོ་ཐམས་ཅད་ཀྱི་སྒོ་འབྱེད་པར་བྱེད་ཅིང་ངན་སོང་གི་སྒོ་ཐམས་ཅད་གཅོད་པས་མཆོག་ཏུ་བསིལ་བའི་རྣམ་པར་སྨིན་པ་ཅན་ཕ་དང་མ་ལྟ་བུར་གྱུར་པས་ཤིན་ཏུ་བར་ཡང་སྐྱབས་འོས་སུ་གྱུར་པ་མཆོག་ཏུ་འཇིག་རྟེན་ལ་ཕན་པར་གྱུར་པའི་ཡོན་ཏན་གསུམ་དང་ལྡན་པས་སྐྱེ་བར་འགྱུར་རོ།

ཡོན་ཏན་གསུམ་པོ་རྣམས་གང་ཞེ་ན།

འདི་ལྟ་སྟེ།

སྲོག་གཅོད་པ་དང་མ་བྱིན་པར་ལེན་པ་དང་འདོད་པས་ལོག་པར་གཡེམ་པ་སྤོང་བའོ།

དེ་ལ་སྲོག་གཅོད་པ་དང་མ་བྱིན་པར་ལེན་པ་ནི་བཤད་ཟིན་ནོ།

འདོད་པས་ལོག་པར་གཡེམ་པ་རྣམ་པ་འདི་ལྟ་བུ་རྣམས་ཀྱང་སྤོང་སྟེ།

དཔེར་ན་ཡང་ཇི་ལྟར་རིངས་པ་རིངས་པར་འགྲོ་བར་འགྱུར་བ་ན་རྩིག་པའི་ཕག་གམ་རབ་ཏུ་རྒྱུ་བ་མཐོང་བ་ན་ཡང་རུང་སྟེ།

བུད་མེད་ཀྱི་གར་རམ་རྒྱན་རྣམས་ཀྱི་སྒྲ་ཐོས་ནས་ཀྱང་རོ་མྱོང་བར་མི་བྱེད་དོ།

ཀུན་ཏུ་རྟོག་པར་མི་བྱེད་དོ།

དེ་ལ་ཡིད་ཀྱིས་རབ་ཏུ་སྨོན་པར་མི་བྱེད་དོ།

གཞན་དག་རྣམས་བྱེད་པ་ན་ཡང་རྗེས་སུ་ཡི་རང་བར་མི་བྱེད་དོ།

བྱེད་པ་རྣམས་ཀྱང་རབ་ཏུ་འགོགས་པར་བྱེད་དེ་བཤགས་སུ་འཇུག་གོ།

ཉེས་དམིགས་རྣམས་སྟོན་པར་བྱེད་དོ།

ཉེས་དམིགས་རྣམས་ཀྱི་ཞིང་ཇི་ལྟ་བ་འདི་ནི་འདི་ལྟ་སྟེ།

འདོད་པ་ལ་ལོག་པར་གཡེམ་པའོ།

རྒྱུ་དེས་ནི་སེམས་ཅན་རྣམས་དམྱལ་བར་རྗེས་སུ་རྒྱུག་པར་བྱེད་དོ་ཞེས་དེ་ལྟར་གཞན་

རྣམས་ལེགས་པར་འགོགས་པར་བྱེད་ཅིང་སོ་སོར་གོ་བར་བྱེད་དོ།

དགེ་བའི་ལས་རྣམས་ཀྱི་མཐའ་ལ་སྤྱོད་པ་དེ་དེ་ལྟར་བྱེད་པར་འགྱུར་ཞིང་དེ་ལྟ་བུའི་ཚུལ་ཁྲིམས་ལ་རབ་ཏུ་གནས་པས་དེ་ལྟར་ཡང་ཡོངས་སུ་དག་པར་ཚངས་པར་སྤྱད་པ་སྤྱོད་པ་དེ་དག་རྣམས་ནི་ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་ལས་འཐབ་བྲལ་གྱི་ལྷའི་ས་བརྩེགས་པ་རྒྱུ་བ་ཞེས་བྱ་བ་དེར་སྐྱེའོ།

དེར་ངེས་པར་སྐྱེས་པ་འདིས་དགེ་བའི་ལས་ཀྱི་མཐའ་ལ་སྤྱད་པས་བདེ་བ་འདི་དག་རྣམས་འབྱུང་སྟེ།

འདི་ལྟ་སྟེ།

བརྩེགས་པ་རྒྱུ་བའི་རི་ནི་ཉེ་འཁོར་དུ་དཔག་ཚད་ལྔ་བརྒྱའོ།

བྱའི་སྒྲ་ཡིད་དུ་འོང་བ་རྣམ་པར་སྒྲོགས་པ་དགའ་བར་འགྱུར་བ་བརྒྱ་ཕྲག་གིས་ཉེ་འཁོར་ཀུན་ཏུ་གང་བ་གཏིང་དུ་སོང་བ་དང་ལྡན་པའི་ནང་གི་གདངས་ཀྱི་སྒྲས་ཁྱབ་པས་གླུ་སྙན་པ་དང་འདྲ་བ་ཉེ་འཁོར་ན་རྣམ་པར་གསལ་བར་བྱེད་དོ།

དེ་ཡང་གང་གི་ཚེ་དང་པོ་ཁོ་ན་སྐྱེ་བར་གྱུར་པ་ན་དེ་རིན་པོ་ཆེ་སྣ་བདུན་གྱི་རང་བཞིན་གྱི་ལྗོན་ཤིང་དང་ཉེ་བར་སྐྱེའོ།

དེ་ཇི་ལྟར་མི་རྣམས་གཉིད་ལོག་པ་ཉིད་ན་ཐོ་རངས་ཀྱི་གླུ་དབྱངས་ཀྱིས་རབ་ཏུ་སད་པར་བྱེད་པ་དེ་བཞིན་དུ་དེ་བྱའི་སྒྲ་ཐོས་ན་ཡིད་འཕྲོག་པས་རབ་ཏུ་སད་པར་བྱེད་དོ།

ཇི་ལྟར་རི་རྣམས་ཀྱི་རྩེ་མོ་ལ་སྟོན་ཀའི་ཉི་མ་དང་པོ་ཤར་བར་གྱུར་པ་དེ་བཞིན་དུ་དེའི་བདག་ཉིད་ཀྱི་དངོས་པོ་རྣམ་པར་གསལ་བ་ཡིན་ནོ།

དེ་ལྟར་ཅུང་ཟད་ཀྱང་འདྲ་བ་ཙམ་ཅིག་དཔེར་བྱས་པར་ཟད་དོ།

གང་གི་ཚེ་དེ་རྣམ་པ་ཐམས་ཅད་དུ་བློ་རྙེད་པར་འགྱུར་བ་དེའི་ཚེ།

དེའི་ལེགས་པར་བྱས་པའི་ལས་བྱས་པའི་ལས་ཀྱི་བྱ་དེས་དྲན་པར་བྱ་བའི་དོན་དུ་ལེགས་པར་བྱས་པའི་ལས་ཁོ་ནའི་ཚིགས་སུ་བཅད་པ་བརྗོད་པ་ནི།

ཇི་ལྟར།

འཁྲུལ་འཁོར་རྒྱུས་པས་སྦྲེལ་བྱས་ཤིང་།

བཤང་གཅི་མཆིལ་མའི་ས་གཞི་གང་།

བུད་མེད་ལས་ཁྱོད་འདི་ནས་ནི།

ཕ་རོལ་འགྲོ་བས་མི་ནུས་པས།

སླུ་བྱེད་ཐང་གི་རི་བོ་སྟེ།

ཤིན་ཏུ་བརྩོན་པའི་ཁྱད་པར་གྱིས།

རྩབ་ཧྲལ་ཤིན་ཏུ་སེམས་འཁྲུལ་བའི།

བུད་མེད་ངན་ལ་ཁྱོད་མ་འཁྲུལ།

རྒྱན་རྣམས་དང་ནི་དེ་བཞིན་སྒྲས།

རྣམ་འཁྲུལ་ཤིན་ཏུ་འཁྲུལ་པར་བརྗོད།

བུད་མེད་བརྗོད་པའི་ཐབས་ལག་གིས།

སྐྱེས་བུ་མྱུར་དུ་འཕྲོག་པར་བྱེད།

རྣམ་པ་སྣ་ཚོགས་མེ་ཏོག་ལ།

རྐང་དྲུག་ཇི་ལྟར་རྒྱུ་བྱེད་པ།

དེ་བཞིན་དེ་ནི་མི་རྣམས་ལ།

བུད་མེད་རྣམ་པ་དུ་མས་རྒྱུ།

ཇི་ལྟར་མེ་ཏོག་རྩི་འཐུངས་ནས།

མེ་ཏོག་གཞན་ལ་འགྲོ་བར་འགྱུར།

དེ་བཞིན་སྐྱེས་པ་འཐུངས་ནས་ནི།

བུད་མེད་མྱུར་དུ་འགྲོ་བར་འགྱུར།

ནོར་དང་སྐོམ་ལ་སྤྱད་པ་དང་།

ཁྲོན་པ་རྟག་ཏུ་བསྟེན་དཀའ་བ།

མི་ནི་བསླུས་ནས་མྱུར་བར་ཡང་།

གཞན་དུ་ཡང་ནི་འགྲོ་བ་ཡིན།

གཡོ་དང་སྒྱུ་དང་རི་དང་ནི།

ཀཱ་ལ་ཀུ་ཊའི་དུག་དང་མཚུངས།

བུད་མེད་སྐྱེས་པའི་འཇོམས་བྱེད་ཡིན།

དོན་མིན་བྱེད་པར་རྣམ་པར་གནས།

ཇི་ལྟར་རླུང་དང་ནམ་མཁའ་དང་།

མེ་རྣམས་མི་ཡིས་སྦྲེལ་མི་ནུས།

དེ་བཞིན་ཐབས་བརྒྱས་བུད་མེད་རྣམས།

མི་ཡིས་བསྲུང་བར་ནུས་པ་མིན།

དོན་མིན་ནད་དང་འཆི་བདག་དང་།

ཉེས་པར་བྱས་པའི་ལས་རྣམས་ཀྱིའང་།

རྒྱུར་འགྱུར་མཆོག་ནི་བུད་མེད་ཡིན།

ཐར་པའི་སྤྱོད་ལས་འཆིང་བ་ཡང་།

གང་ཡང་རྣམ་པ་དུ་མར་ཡང་།

འཇིགས་པའི་གཡང་ས་དག་ཏུ་ཡང་།

མི་ཡི་འཇིག་རྟེན་འཁྲིད་བྱེད་པའི།

དེ་རྒྱུ་མཆོག་ཀྱང་བུད་མེད་ཡིན།

སྟོབས་མིན་ལང་ཚོས་ཀྱང་མ་ཡིན།

མཁས་པས་ཀྱང་ནི་ཞི་མི་ནུས།

ཉི་མའི་འོད་ཟེར་ཇི་ལྟ་བར།

མོ་རྣམས་རྩབ་ཧྲལ་ལྷན་ཅིག་སྐྱེས།

མར་མེའི་འོད་རྣམས་ཇི་ལྟར་འདིར།

དེ་དག་རྣམས་ཀྱི་སྙིང་མི་རྟག །

དེ་རྣམས་ཞེ་སྡང་རྟག་པར་ཡང་།

རྟ་རྣམས་འཐབ་མོ་ཇི་བཞིན་ནོ།

ནོར་ཟད་ནས་ནི་ཆགས་དང་བྲལ།

ནོར་ཟོས་ནས་ནི་འཇོམས་པར་བྱེད།

ཅི་སྲིད་ནོར་ཡོད་དེ་སྲིད་མོ།

ནོར་ཉམས་བུད་མེད་ག་ལ་རྙེད།

སྟེན་དང་སྦྱིན་དང་ཉེར་ལོངས་སྤྱོད།

རྣམ་པ་ཐ་དད་ཐབས་ཀྱིས་ཀྱང་།

སེམས་ནི་འབར་བ་དང་མཚུངས་པའི།

བུད་མེད་གཟུང་བར་ནུས་མིན་ཏེ།

ཇི་ལྟར་སྐྱེས་བུས་རྗེས་འཐུན་པར།

ཇི་ལྟ་ཇི་ལྟར་འདུ་བྱེད་པ།

དེ་ལྟ་དེ་ལྟར་བུད་མེད་ཀྱིས།

མི་དེ་རྣམས་ནི་རྟག་ཏུ་སླུ།

ཇི་ལྟར་མི་ལ་མེ་ཏོག་བརྒྱན།

དེ་བཞིན་གཟུགས་ཀྱིས་བརྒྱན་པ་ཡི།

བུད་མེད་རྣམས་ཀྱི་སེམས་འདི་ཡིན།

དུག་གི་མེ་ཏོག་མཐོང་ཇི་བཞིན།

བལྟ་དགའ་ཞི་བྱེད་མ་ཡིན་ནོ།

བུད་མེད་དུག་གི་མེ་ཏོག་མཚུངས།

རབ་ཏུ་བརྩོན་པས་ཡོངས་སུ་སྤངས།

མི་རྣམས་བལྟ་བར་འདོད་པ་དང་།

ཡུལ་རྣམས་ལ་ཡང་ཆེད་ཆེར་འཛིན།

འཇིག་རྟེན་འདི་དང་གཞན་དུ་ཡང་།

མི་ནི་བདེ་བའི་སྐལ་ལྡན་མིན།

བདེ་ལ་ཆགས་དང་བག་མེད་གང་།

ལེ་ལོ་དང་ནི་རྩབ་ཧྲལ་གཡོ།

སྡིག་པ་སྟེན་བྱེད་ཞིམ་པོ་ཟ།

མིས་ནི་བཟང་པོ་མཐོང་བ་མིན།

སྦྱོར་ལྡན་བརྟན་པོ་བརྩོན་འགྲུས་ཅན།

ཆོས་པ་བུད་མེད་རྣམ་སྤངས་པ།

མཁས་པ་རྒྱུ་འབྲས་ལ་དད་པའི།

མིས་ནི་བཟང་པོ་འཐོབ་པ་ཡིན།

སྐྱོན་གྱི་དྲ་བ་འདི་དག་ཀུན།

བུད་མེད་སྒྱུ་ཡིས་ས་འདིར་སྤྱོད།

ཐོས་ལྡན་བུད་མེད་རྣམ་སྤངས་པ།

འཐབ་བྲལ་འཇིག་རྟེན་མངའ་བདག་ཆེ།

དེ་ལྟར་ལྷ་དེས་རྨི་ལམ་གྱི་ནང་བཞིན་དུ་གཉིད་སད་པ་ན་ཐོས་སོ།

བྱ་དེའི་སྒྲ་རྣམ་པར་སྒྲོགས་པའི་བྱ་དེ་དག་ནི་རྣམ་པ་དུ་མར་ཡོན་ཏན་ཤིན་ཏུ་ཕུན་སུམ་ཚོགས་པ་གཤོག་པ་གཉིས་ཕན་པར་འགྱུར་བའི་ལས་བྱས་པའི་བྱ་བ་དེ་དག་གིས་བསྟན་པར་གྱུར་པ་ན།

ལྷ་གསར་དུ་སྐྱེས་པ་དེས་ཐོས་པར་གྱུར་ལ་ཐོས་ནས་ཀྱང་ལྷ་དེ་དག་རྣམས་ཡིད་ཆེས་པ་སྐྱེ་བའོ།

ཤེས་རབ་དེས་སྐྱེ་བ་གཞན་དུ་རྗེས་སུ་ཞུགས་པའི་ཤེས་པ་རྣམས་དྲན་པར་འགྱུར་བས་གང་ཡང་ཡོན་ཏན་གསུམ་དང་ལྡན་པའི་འདོད་པ་སྡུག་པ་ཡིད་དུ་འོང་བའི་ཚུལ་ཁྲིམས་བསྲུངས་པ་དེ་རྗེས་སུ་དྲན་ནོ།

རྗེས་སུ་དྲན་ནས་ཀྱང་ཚིགས་སུ་བཅད་པ་བརྗོད་པ།

ཇི་ལྟར།

གང་ཕྱིར་བུད་མེད་རྣམ་སྤངས་པ།

གཅིག་ལས་ཚུལ་ཁྲིམས་ཐམས་ཅད་ཡིན།

བུད་མེད་རྣམ་སྤངས་བློ་ལྡན་རྣམས།

མྱ་ངན་འདས་གྲོང་འགྲོ་བ་རྣམས།

མེས་མིན་མཚོན་ཆས་ཀྱང་མ་ཡིན།

སྟོབས་མིན་སྲོག་ཆགས་དག་གིས་ཀྱང་།

བུད་མེད་རྒྱུ་ཡིས་འཆིང་བ་ནི།

གཅད་པར་མི་ནུས་སྒྲུབ་དཀའ་དེ།

དེ་རྒྱུ་རྟག་ཏུ་སྤང་བ་དང་།

སྨད་པར་ཡང་ནི་བརྩོན་པར་གྱིས།

དེ་སྤངས་པས་ནི་འཐབ་བྲལ་གྱི།

བདེ་བ་བླ་ན་མེད་འདི་འཐོབ།

བདེ་བ་གཞན་ལས་ཆེས་བདེ་བ།

འགྱུར་མེད་གོ་འཕང་ང་ཡིས་ཐོབ།

དེ་ལྟར་བྱ་དེ་དག་རྣམས་ཀྱི་

གཟུགས་དང་རྩེ་དགའ་བ་མངོན་པར་མཐོང་ཞིང་སྒྲ་རྣམ་པར་བརྗོད་པ་རྣམས་ཀྱང་ཐོས་ནས་རབ་ཏུ་དགའ་བའི་ཡིད་ཀྱིས་དེ་ལྷའི་འཇིག་རྟེན་རྣམས་ལ་མངོན་པར་ལྟ་བར་བྱེད་པ་ན་དེས་མཐོང་བ་ནི་བརྩེགས་པ་རྒྱུ་བའི་རི་དེ་ཀུན་ཏུ་ཁྱབ་པར་ལྗོན་ཤིང་བརྒྱ་སྟོང་ཕྲག་དུ་མ་རྣམས་འོད་ཀྱི་ཕྲེང་བ་དང་ལྡན་པ་རྣམས་མཐོང་བ་དང་།

འབབ་ཆུ་བརྒྱ་སྟོང་དང་རབ་ཏུ་ལྡན་པ་བྱའི་ཚོགས་རྣམས་ཀྱིས་སྒྲ་ཀུན་ནས་སྒྲོགས་པའི་སྒྲ་རྣམས་ཐོས་པར་འགྱུར་རོ།

རྣམ་པ་སྣ་ཚོགས་པའི་རིན་པོ་ཆེའི་སྒྲོས་སྤྲས་པ་རྣམ་པ་སྣ་ཚོགས་པར་དགའ་བར་འགྱུར་བའི་པད་མའི་རྫིང་བུ་བརྒྱ་སྟོང་དང་ལྡན་པ་ལ་བུང་བའི་ཚོགས་སྒྲ་འབྱིན་པས་ཉེ་བར་མཛེས་པར་གྱུར་པ་སྔ་ན་མ་མཐོང་བ་ཤིན་ཏུ་དགའ་བར་གྱུར་པའི་རི་གཞན་དང་མི་འདྲ་བ་འཐབ་བྲལ་གྱི་འཇིག་རྟེན་རྣམས་དེས་མངོན་པར་མཐོང་ནས་དེ་དང་འདྲ་བའི་ངོ་བོའི་དགའ་བ་ཐོབ་པར་གྱུར་ཏོ།

དེ་ཤིང་གི་དྲུང་དེ་ལས་ལངས་ནས་དེ་རང་གི་ལུས་ལ་ཀུན་ཏུ་ལྟའོ།

དེས་ལེགས་པར་མངོན་པར་མཐོང་བ་ནི་རང་གི་འོད་རྣམས་ཀྱིས་གསལ་བར་གྱུར་པ།

འོད་ཟེར་བརྒྱ་ཕྲག་དུ་མ་རྣམས་ཀྱིས་རབ་ཏུ་གསལ་བར་བྱེད་པ་མཆོག་ཏུ་གྱུར་པའི་དཔལ་གྱིས་ཆོས་སྣང་བར་གྱུར་པས་མཐོང་ན་ཤིན་ཏུ་ངོ་མཚར་བར་རང་གི་ལུས་མངོན་པར་མཐོང་ནས་གཟུགས་ཀྱི་རྒྱགས་པས་དྲེགས་པར་འགྱུར་རོ།

དེའི་རྗེས་ལ་རྒྱགས་པ་གཉིས་པ་འདི་དེའི་སྙིང་ལ་འཇུག་པར་འགྱུར་བ་ནི་འདི་ལྟ་སྟེ་དེ་འདི་སྙམ་དུ་སེམས་པར་འགྱུར་རོ།

ང་ལྟ་བུ་འགའ་ཞིག་ཡོད་པ་མ་ཡིན་ཞེས་དེའི་སེམས་སྐྱེད་པ་ཙམ་ཉིད་ན་ལྷ་གང་དག་གིས་གང་དག་རྣམས་ལས་སེམས་པར་བྱེད་པ་དེ་དག་རྣམས་ཉིད་ཕུན་སུམ་ཚོགས་པར་འགྱུར་རོ།

དེའི་ནང་དུ་ཡང་རྒྱགས་པ་གསུམ་པ་སྙིང་ལ་འཇུག་པར་འགྱུར་ཏེ།

དེའི་རྗེས་ལ་འདིའི་དབང་པོ་ལྔ་ཡུལ་ལྔ་པོ་རྣམས་ལ་དེའི་སྙིང་དང་སེམས་དགའ་བར་འགྱུར་རོ།

དེ་དེ་ལྟར་རྣམ་པ་བདུན་དུ་ཡིད་འཕྲོག་པ་གང་ཡིན་པ་དེའི་དགེ་བའི་ཆོས་ལ་བརྩོན་པར་བྱ་བ་དེ་དག་རྣམས་ཐམས་ཅད་ཀྱང་དེ་བཞིན་དུ་བརྗེད་པར་འགྱུར་ཏེ་སེམས་ཡང་བར་གྱུར་པའི་ཕྱིར་དང་།

བག་མེད་པ་མང་བར་གྱུར་པའི་ཕྱིར་དང་།

རྟག་ཏུ་བག་མེད་པས་བག་མེད་པར་གནས་པའི་ཕྱིར་ཡང་སྟེ།

ཡུལ་ལྔའི་ཞགས་པས་བཅིངས་ཤིང་སྲིད་པའི་འཆུམས་

རྡུལ་རྣམས་ཀྱིས་ཀྱང་འགུལ་བར་ཆགས་པར་གྱུར་པས་དེ་བརྩེགས་པ་རྒྱུ་བའི་རི་དེ་ལ་འཁོད་དེ་བདེ་བས་གནས་པར་བྱ་བའི་ཕྱིར་རོ།

རི་དེ་ལ་ཡང་ས་གསུམ་ཡོད་དེ་འོག་གི་ས་དང་སྟེང་གི་ས་སྟེ།

དེ་ལ་འོག་གི་ས་ལ་ནགས་ཚལ་ལྔ་ཡོད་པ་རྣམས་ལ་འདི་ལྟ་སྟེ།

དྲི་རྒྱུ་བ་དང་འོད་ཟེར་གྱི་རྩེ་མོ་དང་འོད་འཕྲོ་བ་དང་རྟག་ཏུ་མངོན་པར་དགའ་བ་དང་།

མཐོ་བར་བརྩེགས་པའོ།

དེ་ལ་དྲི་རྒྱུ་བའི་ནགས་ན་ནི་གང་ཅུང་ཟད་ཅིག་སྐྱེ་བ་དེ་དག་ཐམས་ཅད་དྲི་ཆེས་ལྷག་པར་འགྱུར་རོ།

དྲི་དེ་དག་ཀྱང་དཔག་ཚད་ལྔ་སྟོང་དུ་འགྲོ་བར་འགྱུར་རོ།

འོད་ཟེར་གྱི་རྩེ་མོའི་ནགས་ན་ནི་མཚུངས་པ་མེད་པའི་རྣམ་པ་དུ་མའི་འོད་ཟེར་རིན་པོ་ཆེ་ལས་བྱུང་བའི་རྣམས་ཀྱིས་མངོན་པར་གསལ་བར་གྱུར་པའོ།

ཉི་མ་བརྒྱ་སྟོང་བས་ལྷག་པའི་འོད་འཕྲོ་བའི་ནགས་ན་ནི་ཤིན་ཏུ་བར་ཡང་འོད་འབར་བ་དང་ལྡན་པའི་ལྷ་རྣམས་གནས་སོ།

འདོད་པའི་ཡོན་ཏན་ལྔ་ཕུན་སུམ་ཚོགས་པའི་རྟག་ཏུ་མངོན་པར་དགའ་བའི་ནགས་ན་ནི་མཚོ་བྲན་དང་འབབ་ཆུ་རྣམས་ཀྱང་བརྒྱ་སྟོང་ཕྲག་དུ་མར་ལྷ་རྫས་ཀྱི་རོ་དང་དྲི་དང་ཁ་དོག་རྣམས་ཕུན་སུམ་ཚོགས་པ་རྣམ་པ་དུ་མ་རྣམས་སོ།

མཐོ་བར་བརྩེགས་པའི་ནགས་ན་ནི་མཆོག་ཏུ་མཐོ་བའི་རྩེ་མོ་རིན་པོ་ཆེ་སྣ་བདུན་གྱི་རང་བཞིན་གསལ་བར་གྱུར་པའི་རྩེ་མོ་རྣམས་ཡིན་ནོ།

ས་གཉིས་པ་འདི་དག་རྣམས་ན་ཡང་རིན་པོ་ཆེ་བདུན་གྱི་རང་བཞིན་དུ་གྱུར་པའི་སྟེང་ཁང་བརྒྱ་སྟོང་དུ་མ་ཡོད་དོ།

པད་མའི་རྫིང་བུ་ན་བྱའི་ཚོགས་དགའ་བར་འགྱུར་བ་བརྒྱ་སྟོང་དང་གཞན་ཡང་སྒྲ་དང་རེག་བྱ་དང་རོ་དང་གཟུགས་དང་།

དྲི་རྣམས་འདོད་པ་སྡུག་པ་ཡིད་དུ་འོང་བ་འཐུན་པ།

ཡིད་རྟག་ཏུ་འདྲེ་བར་བྱེད་པ་རྣམས་ཀྱིས་ཀུན་ཏུ་གང་བའོ།

སྟེང་གི་ས་འདིའི་ས་གཞི་དེའི་གཞི་ལ་དཔག་ཚད་བརྒྱར་ལྷ་མཐུ་སྟོབས་ཆེ་བས་ཀུན་ཏུ་གང་བའོ།

གཞི་དེ་དག་ལ་ཡང་རིན་པོ་ཆེའི་ནགས་ཞེས་བྱ་བ་རྣམ་པ་སྣ་ཚོགས་པའི་འབབ་ཆུ་དང་ཟས་ཀྱི་ཆུ་ཀླུང་དང་སྐོམ་གྱི་ཆུ་ཀླུང་དང་ལྗོན་ཤིང་དང་མཚེའུ་དང་པད་མའི་རྫིང་དང་ཚལ་དང་སྐྱེད་མོས་ཚལ་དང་དཔག་བསམ་གྱི་ཤིང་དང་ལྷ་རྫས་ཀྱི་མེ་ཏོག་དང་འབྲས་བུའི་ཡོན་ཏན་ལྷག་པ་བརྒྱ་སྟོང་དང་ལྡན་པར་གྱུར་པ་རབ་ཏུ་དགའ་བའི་ལྷ་དང་

ལྷ་མོ་བརྒྱ་སྟོང་ཕྲག་གིས་ཀུན་ཏུ་གང་བ་དེ་དག་ལ་སོང་ནས་ཀྱང་ཤིན་ཏུ་འཐབ་བྲལ་ནི་མུ་སུ་ལུན་དྷ་དང་ལྷན་ཅིག་འོངས་ནས་ལྷ་རྫས་ཀྱི་འདོད་པའི་ཡོན་ཏན་ལྔ་པོ་འདོད་པའི་སྒྲ་དང་རེག་བྱ་དང་རོ་དང་གཟུགས་དང་དྲི་དང་ཡང་དག་པར་ལྡན་པ་སྲེད་པའི་མེ་རྣམས་སྐྱེད་པར་བྱེད་པ་ལ་དགའ་ཞིང་ཀུན་ཏུ་སྤྱོད་པར་ཡང་བྱེད་དོ།

དེ་ལྟར་ལྷ་དེ་བརྩེགས་པ་རྒྱུ་བའི་རི་དེ་ལ་རྣམ་པ་སྣ་ཚོགས་པའི་ཡུལ་གྱི་བདེ་བའི་རྒྱུ་འབྲས་སོ་སོར་རྣམ་པ་ཐ་དད་པ་རྣམས་ལ་དགའ་བཞིན་དུ་ཀུན་ཏུ་སྤྱོད་པར་བྱེད་དོ།

དེ་ནས་ལྷ་གསར་དུ་སྐྱེས་པ་དེ་ཡུལ་གྱི་བདེ་བས་ངེས་པར་བསྐུལ་ནས་གང་ན་རི་ཡོད་པ་དེ་དག་ཉིད་དུ་ཕལ་ཆེ་བ་ཁོ་ནར་ཉེ་བར་འགྲོ་བ་ན་དེ་གཅིག་པུར་མཐོང་ནས་ལྷ་གཞན་དེ་དང་ཉེ་བར་བསྙེན་ནས་འགྲོ་བར་བྱེད་དེ་མིག་དགའ་བས་ཀུན་ཏུ་རྒྱས་པས་དེའི་དྲུང་དུ་ཉེ་བར་འགྲོ་ན་ཇི་ལྟར་ལྷ་འདི་ནི་གསར་དུ་སྐྱེས་པ་ཡིན་ནོ་ཞེས་སོ།

དེ་བཞིན་དུ་ལྷ་གཞན་གྱིས་ཀྱང་ལྷ་དེ་ལ་འདི་སྐད་ཅེས་སྨྲ་སྟེ།

ཇི་ལྟར་གསར་དུ་སྐྱེས་པ་ཡིན་ནོ་ཞེས་བྱ་བ་ཇི་ལྟ་བ་བཞིན་དུ་འདིའི་སྲིད་པ་ཇི་ལྟར་ཤེས།

དེ་ནས་ལྷ་དེས་འདི་སྐད་ཅེས་སྨྲ་སྟེ་ཇི་ལྟར་རྟགས་ལྔ་པོ་དེ་དག་ནི་ལྷ་གསར་དུ་སྐྱེས་པ་དེའི་ཡིན་པ་ལ་འདི་ལྟ་སྟེ་འོད་རྣམས་འཕྲོ་བར་འགྱུར་རོ།

གོས་རྣམས་ནི་རང་གི་ལུས་ལས་འཕྲོས་པའི་འོད་ཟེར་གྱིས་ལུས་རྣམས་རབ་ཏུ་འགེབས་པར་འགྱུར་གྱི་འདི་ལ་གོས་ནི་ཡོད་པ་ཡང་མ་ཡིན་ནོ།

འདི་ནི་ལྷའི་རྟགས་དང་པོ་ཡིན་ནོ།

གཞན་ཡང་ལྷ་གསར་དུ་སྐྱེས་པའི་རྟགས་འདི་ལྟ་སྟེ།

ངོ་མཚར་བར་གྱུར་པས་མིག་གི་རྒྱུ་བ་ཀུན་ཏུ་གཏོད་པར་བྱེད་དེ་དེ་ཤིན་ཏུ་ངོ་མཚར་བར་གྱུར་པས་ནགས་དང་ཉེ་བའི་ནགས་སྔར་མ་མཐོང་བ་རྣམས་ལ་ལྟ་བར་བྱེད་པ་འདི་ནི་གསར་དུ་སྐྱེས་པའི་རྒྱུ་མཚན་གཉིས་པའོ།

གཞན་ཡང་གསར་དུ་སྐྱེས་པའི་རྒྱུ་མཚན་འདི་ལྟ་སྟེ།

བུད་མེད་རྣམས་མཐོང་ནས་ངོ་ཚ་བ་དང་བཅས་པར་འགྱུར་རོ།

ཤེས་ཆུང་བ་དང་དོགས་པ་དང་བཅས་པར་འགྱུར་རོ།

གཞན་ཡང་གསར་དུ་སྐྱེས་པའི་ལྷའི་རྒྱུ་མཚན་ནི་སྔ་ན་མེད་པའི་ལྷ་མཐོང་ནས་དོགས་པ་དང་བཅས་པས་རྩར་སྙེན་ནོ།

གཞན་ཡང་གསར་དུ་སྐྱེས་པའི་རྟགས་ནི་ཇི་ལྟར་ནམ་མཁའ་ལ་འཕགས་ན་འཇིགས་པར་འགྱུར་ཞིང་ཉམ་ང་བར་འགྱུར་རོ།

དེ་ཡང་ཅུང་ཟད་དང་ཐུང་ངུ་ན་དང་དལ་བུས་ཀྱི་

དབང་གིས་ས་གཞི་དང་ཐག་ཉེ་བར་གྱུར་པས་ཕན་ཚུན་ལ་བརྟེན་ནས་འགྲོའོ།

རྒྱུ་མཚན་ལྔ་པོ་དེ་དག་ནི་གསར་དུ་སྐྱེས་པ་རྣམས་ཀྱི་ཡིན་ནོ།

དེ་ལ་འདིར་ནི་རྟགས་འདི་དག་རྣམས་ཐམས་ཅད་ཀྱིས་ཀྱང་གསར་དུ་སྐྱེས་པ་དེ་མངོན་པར་མཚོན་པར་བྱེད་དོ།

གསར་དུ་སྐྱེས་པ་དེ་བདག་གིས་འདིར་བསྟེན་པར་བྱའོ།

དེ་ནས་ལྷ་དེ་ལྷ་དེ་དག་རྣམས་ཀྱིས་ཉེ་བར་བསྙེན་ཅིང་ཡོངས་སུ་བསྐོར་ནས་བརྗོད་པ་ཇི་ལྟ་བ་བཞིན་དུ་ལྟོས་དང་སྐལ་བ་ཆེན་པོ་དང་ལྡན་པ་ཁྱོད་ཉེ་བར་སྐྱེས་པ་ནི་རང་གིས་བྱས་པའི་མཛེས་པའི་ལས་དུ་མའི་ཚུལ་ཁྲིམས་རབ་ཏུ་བསྲུངས་ཤིང་བསྒོམས་ཏེ་ཉམས་ཤིང་སྨྲས་པ་དང་ཐུན་ཚགས་མ་ཡིན་པས་ཁྱོད་འདིར་སྐྱེས་སོ།

དེ་ལྟར་ལྷ་གང་དག་ཤིན་ཏུ་བག་མེད་པའི་ཡིད་ཅན་མ་ཡིན་པ་དེས་ལྷ་དེ་ལ་དེ་སྐད་ཅེས་ཐམས་ཅད་སྨྲས་ནས་གང་ན་བརྩེགས་པ་རྒྱུ་བ་དེའི་ས་ཉེ་བར་འཕེལ་བ་དེར་འཁོད་དོ།

སྲིད་པའི་གཞི་ལ་འདུག་ནས་ཀྱང་སྣ་ཚོགས་པའི་གླུ་དང་རོལ་མོའི་སྒྲ་ཡིད་རབ་ཏུ་དགའ་བ་ཕན་ཚུན་ལྷན་ཅིག་ཏུ་རྒྱགས་པ་ལ་དོན་གཅིག་པ་དེ་དག་མངོན་པར་མཐོང་ནས་ལྷ་གསར་དུ་སྐྱེས་པ་དེ་རབ་ཏུ་དཔྱོད་པར་བྱེད་དེ་ཇི་ལྟར་བདག་གཅིག་པུ་རིའི་གསེབ་དེ་དག་ཏུ་ཞུགས་པར་བྱའོ་ཞེས་ས་དེ་དག་རྣམས་སུ་ཡང་བརྒྱུས་པར་གྱུར་ནས་གང་ན་བརྩེགས་པ་རྒྱུ་བའི་རི་ཡོད་པ་དེར་ཞུགས་སོ།

དེ་ནས་དེས་ལྷའི་བུ་མོའི་ཚོགས་ཆེས་ཆེ་བ་རྣམས་རྒྱན་དང་ཆ་བྱད་དུ་མ་དང་།

བཅའ་བདར་དུ་མས་ཉེ་བར་བརྒྱན་པ་རྣམ་པ་དུ་མའི་རོལ་མོ་དང་རྔ་སྒྲ་དང་གླུ་དབྱངས་ཀྱིས་རབ་ཏུ་དགའ་བར་གྱུར་པ་རྣམས་མཐོང་ངོ་།

དེ་ནས་ལྷ་མོ་དེ་དག་རྣམས་ཀྱིས་ལྷ་དེ་མངོན་པར་གསལ་བར་མཐོང་ནས་ཀུན་ཏུ་བསྐོར་ནས་མཆོག་ཏུ་རབ་ཏུ་དགའ་བ་མཆོག་ཏུ་རྒྱ་ཆེ་བའི་ཆ་བྱད་དང་རྒྱན་ཅན་ངོ་མཚར་བར་གྱུར་པའི་མིག་དག་གིས་ལྷ་དེ་མཆོད་པར་བྱའོ་ཞེས་བྱས་ནས་ཉེ་བར་གནས་པར་གྱུར་ཏོ།

དེ་ནས་ཐག་ཉེ་བར་བསྙེན་ཏེ་ཕྱིན་ནས་ཀྱང་ལྷ་མོ་དེ་དག་རྣམས་དེ་དང་པོར་མཐོང་བས་ཚིམ་ཞིང་མཆོག་ཏུ་དགའ་བའི་ཡིད་ཀྱིས་ལྷ་དེ་ལ་འདི་སྐད་ཅེས་སྨྲས་སོ།

ཇི་ལྟར་ལྷ་ཁྱོད་ཉིད་མཐོང་བས་ཆེད་དུ་བྱས་ཏེ་ངེད་འདིར་འོངས་ཀྱིས་རང་གི་ལས་ཀྱི་འབྲས་བུ་དགེ་བའི་འབྲས་བུ་ནགས་དང་ཉེ་བའི་ནགས་རྣམས་དང་རྣམ་པ་སྣ་ཚོགས་པའི་

རིའི་སུལ་དང་གད་ལོགས་དང་རི་ཞོལ་རྣམས་སུ་དགའ་བར་མཛོད་གཞན་ཡང་མཐོ་རིས་ཀྱི་གནས་རིན་པོ་ཆེ་བདུན་གྱི་རང་བཞིན་རྣམ་པ་སྣ་ཚོགས་པའི་འོད་ཟེར་གྱི་ཕྲེང་བ་རྣམས་དང་རི་དུ་མ་རྣམས་ལ་རྣམ་པ་སྣ་ཚོགས་པའི་མེ་ཏོག་གི་ཤིང་གི་ཚོགས་ཀུན་ནས་འདུད་པ་མི་གཡོ་བ་རྣམས་དང་རི་རྣམས་ཀྱི་ནགས་ཁྲོད་རྣམས་ལ་འཁྲི་ཤིང་གི་ཁང་བུ་རྣམས་དང་།

གཞན་ཡང་མཐོ་རིས་རྣམས་ཀྱི་ས་ཕྱོགས་རྣམས་ལ་ཡང་རྣམ་པ་སྣ་ཚོགས་པའི་རོལ་མོའི་སྒྲ་དང་རྔ་སྒྲ་དང་གླུ་སྒྲ་ཀུན་ནས་བསྒྲགས་པ་རྣམས་དང་འཚེར་བའི་གསེར་བདུན་སྤྲས་པས་རྣམ་པར་གསལ་བ་རྣམས་དང་གཞན་ཡང་ཡུལ་ཕྱོགས་གཞན་རྣམས་ལ་འབབ་ཆུ་དང་ཆུ་ཀླུང་དང་ཚང་ཚིང་དང་པད་མའི་ཚལ་རྣམ་པ་དུ་མ་རྣམས་དང་གཞན་ཡང་ནམ་མཁའི་དཀྱིལ་ན་གཞལ་ཡས་ཁང་བརྒྱ་སྟོང་དང་རབ་ཏུ་ལྡན་པར་མཆོག་ཏུ་དགའ་བ་རྣམས་ལ་བདག་ཅག་རྣམས་དང་ལྷན་ཅིག་ཏུ་ལྷ་དགའ་བར་མཛོད།

དེ་ནས་དགེ་བའི་ལས་རྣམས་ཐམས་ཅད་ལས་བྱུང་བར་གྱུར་པའི་ལྷ་དེས་དེ་དག་རྣམས་ལ་འདི་སྐད་ཅེས་སྨྲས་སོ།

འདོད་པ་ཐམས་ཅད་ཀྱིས་ངོམས་པར་བྱེད་པའི་མཐོ་རིས་ཀྱི་ས་རྣམས་སུ་བདག་ཅག་རྣམས་ཇི་ལྟ་བ་བཞིན་དུ་དགའ་བར་བྱའོ།

དེ་ནས་ཕན་ཚུན་ལྷན་ཅིག་ཏུ་སྣ་ཚོགས་པའི་རྔ་སྒྲ་སྒྲོགས་པར་གྱུར་པས་རབ་ཏུ་དགའ་བ་དང་ལྡན་པའི་ཡིད་ཅན་རྣམས་ལེགས་པར་བྱས་པའི་ལས་མ་ལུས་པའི་འབྲས་བུ་ལ་ཉེ་བར་ལོངས་སྤྱོད་པར་གྱུར་པས་གཞན་གང་དང་གང་ན་གཞན་ན་ཤིང་རྟ་སྣ་ཚོགས་པ་ཞེས་བྱ་བའི་ནགས་ཡོད་པ་དེར་ལེགས་པར་ཉེ་བར་འགྲོ་བར་བྱེད་ལ་ནགས་དེ་ན་ནི་བལྟ་བར་སྡུག་པའི་གཟུགས་དུ་མའི་ཡུལ་རྣམས་དང་།

དེ་བཞིན་དུ་རོ་རྣམ་པ་སྣ་ཚོགས་པའི་དགའ་བར་འགྱུར་བའི་རོ་དུ་མ་རྣམས་དང་དེ་བཞིན་དུ་དགའ་བར་འགྱུར་བའི་དྲི་དུ་མ་རྣམ་པ་སྣ་ཚོགས་པའི་དྲི་རྣམས་དང་།

དེ་བཞིན་དུ་དགའ་བར་འགྱུར་བའི་རེག་བྱ་དུ་མ་རྣམ་པ་སྣ་ཚོགས་པ་མནན་ན་ནེམ་ལ་བཏེག་ན་འཕར་བའི་ས་ཕྱོགས་དང་།

མ་བཏགས་པའི་གོས་འཇམ་ཞིང་སྲབ་ལ་ཚགས་དམ་པ་དུ་མ་རྣམས་དང་།

དེ་བཞིན་དུ་དགའ་བ་རྣམ་པ་དུ་མ་སྣ་ཚོགས་པའི་བྱ་རྣམས་ཀྱི་སྒྲ་དང་།

གླུ་དང་ཕེག་རྡོབ་པའི་གླུ་མཁན་གྱི་སྒྲ་ཆགས་པར་འགྱུར་བའི་དབྱངས་

ཀྱི་སྒྲ་དུ་མ་རྣམས་སོ།

དེ་ལམ་དེ་ཉིད་ནས་ཡུལ་རྣམས་ལ་ཉེ་བར་སྤྱོད་པར་བྱེད་ཅིང་རྒྱན་དང་ཆ་བྱད་སྣ་ཚོགས་པའི་ལྷའི་བུ་མོ་རྣམས་དང་།

རྣམ་པ་དུ་མར་ལྷན་ཅིག་ཏུ་དགའ་བར་བྱེད་དོ།

དེ་ནས་ནགས་དེ་དག་ན་ཡོན་ཏན་དེ་དག་རྣམས་ཤིན་ཏུ་ཕུན་སུམ་ཚོགས་པ་ལྷ་དང་ལྷ་མོ་དུ་མས་ཀུན་ཏུ་གང་བ་ཡིད་ཤིན་ཏུ་ངོ་མཚར་ཆེ་བ་རྣམས་ཀྱི་དབང་དུ་གྱུར་པས་ལེགས་པར་མཐོང་བ་དང་རྣམ་པ་དུ་མར་ཡང་མིག་གི་རྒྱུ་བ་ལེགས་པར་གཏོད་པར་བྱེད་དོ།

ནགས་དང་ཉེ་བའི་ནགས་དེ་དག་རྣམས་ཀྱི་ཡུལ་ཕྱོགས་རྣམས་ལ་མར་ག་ཏའི་སྡོང་བུ་རྣམས་ཀྱི་རྩེ་མོ་སྔོན་པོའི་ཕྲེང་བ་རྣམས་དང་།

ས་གཞི་རྣམས་ལ་ཡང་ཐང་ལ་རྒྱུ་བའི་བྱ་རྣམ་པ་སྣ་ཚོགས་པ་རྣམ་པར་བཀྲ་བ་རིན་པོ་ཆེ་སྣ་བདུན་གྱི་རང་བཞིན་གྱི་ཐིག་ལེས་རྣམ་པར་བཀྲ་བར་བྱས་པའི་བྱ་རྣམས་ཕན་ཚུན་ལྷན་ཅིག་ཏུ་ཚིག་གདངས་སྙན་པ་རྣམས་ཀྱིས་ལྷན་ཅིག་ཏུ་དགའ་བར་བྱེད་པར་མཐོང་ངོ་།

དེ་ལྟར་ཐང་རྣམས་ལ་རྣམ་པར་མཐོང་བར་གྱུར་ནས་དེ་དག་རྣམས་མཐོང་ནས་ཆུ་རྣམས་ལ་ཡང་མཐོང་བ་ནི་རྒྱགས་པའི་ཀཱ་རཎྜ་བ་དང་།

ངུར་པ་དང་ངང་པའི་སྒྲའི་ཁྱད་པར་ཅན་མཆོག་ཏུ་རྒྱ་ཆེ་བའི་ཆ་ཤས་རྣམ་པ་སྣ་ཚོགས་པ་སྔོན་པོའི་ནགས་ཀྱི་ཕྲེང་བ་རྣམས་སུ་མིག་རིག་རིག་པོར་གྱུར་པས་རྣམ་པར་བཀྲ་བའི་གཟུགས་རྣམས་ཉེ་བར་འཛིན་ནོ།

གཞན་ཡང་འདིས་རྣམ་པ་སྣ་ཚོགས་པའི་འདོད་པའི་བདེ་བ་དང་ལྡན་པས་ནམ་མཁའི་དཀྱིལ་དུ་རྣམ་པར་ལྟ་བར་བྱེད་པ་ན་ལྷ་མོའི་ཚོགས་བརྒྱ་སྟོང་དུ་མས་ཀུན་ཏུ་གང་བ་དང་མཆོག་ཏུ་རྣམ་པར་བཀྲ་བའི་རྒྱན་དང་ཆ་བྱད་ཅན་གྱི་ལྷའི་བུ་མོའི་ཚོགས་རྣམས་ཀྱིས་ཉེ་འཁོར་ཀུན་ཏུ་གང་བའི་དེ་ལྟར་རྣམ་པར་བཀྲ་བ་རྣམས་དེས་མཐོང་བ་ཡིན་ཏེ་ཇི་ལྟར་ཁ་དོག་རྣམ་པར་བཀྲ་བའམ།

རྩིག་པའི་ལོགས་སམ།

ཚོན་གྱིས་བྲིས་པའི་ཐང་ཀ་བཞིན་དུ་ནམ་མཁའི་དཀྱིལ་འཁོར་དེ་དག་དེ་བཞིན་དུ་རྣམ་པར་བཀྲ་བ་རྣམས་མཐོང་བར་འགྱུར་རོ།

གླུ་དང་གར་དང་རྔའི་སྒྲ་ཀུན་ནས་སྒྲོགས་པ་དེ་དག་རྣམས་དེས་མཐོང་ནས་མཐོང་བའི་སྐྱོན་རྣམས་རྩོམ་པར་འགྱུར་ཏེ།

ནམ་མཁའ་ནས་ནམ་མཁར་རྣམ་པར་རྟོག་པ་རྣམ་པ་དུ་མར་གཡོ་ཞིང་འགྱུར་བའི་སྐྱེ་གནས་བརྒྱས་ཀྱང་ནམ་མཁའི་དཀྱིལ་དུ་བལྟས་ནས་ཕྱིར་ཡང་གང་ན་པད་མའི་ཚལ་མེ་ཏོག་གི་

ཚོགས་རྣམས་ཀྱིས་རྣམ་པར་བཀྲ་བར་བྱས་པ་ཨིན་དྲ་ནཱི་ལ་དང་སེར་པོ་དང་དམར་པོ་རྣམས་ཀྱིས་དབྱིབས་སྣ་ཚོགས་པ་གསལ་བར་བྱས་པས་རྣམ་པར་བཀྲ་བར་གྱུར་པའི་བྱ་ཆུ་ལ་རྒྱུ་བ་རྣམས་ཀྱིས་ཀྱང་ཐེན་ཀོར་རྣམས་ཡོངས་སུ་སྐོར་བ་དེ་དག་རྣམས་ཀྱང་ལྷ་དེས་མཆོག་ཏུ་དགའ་བའི་ཡིད་ཀྱིས་ལྟ་བར་བྱེད་དོ།

དེ་ནས་ཐམས་ཅད་དུ་ལྷའི་ཚོགས་རྣམས་མཐོང་བ་ནི་རྒྱུན་མི་འཆད་པར་ཆུ་ལ་འཇུག་པ་རྣམས་དང་རྒྱུན་མི་འཆད་པར་ནམ་མཁའ་ལ་རྒྱུ་བ་རྣམས་དང་།

རྟག་ཏུ་ཆུ་ལ་རྒྱུ་བའི་བྱ་རྣམས་དང་ལྷའི་ཚོགས་རྣམས་དང་ཆུའི་ནང་ན་རྒྱུ་བ་མཆོག་ཏུ་དཔེ་མེད་པའི་གཟུགས་རྣམས་ལ་ལྟ་བར་བྱེད་པ་དང་སྔོན་གྱི་དགེ་བའི་འབྲས་བུ་རྣམས་ཡིན་པར་རྗོད་པར་ཡང་བྱེད་དེ།

དེ་ཡང་ཇི་ལྟར།

ལྟ་བྱེད་རྒྱ་མཚོ་འདི་ལ་ནི།

གཟུགས་ཀྱིས་ངོམས་པ་ཡོད་མ་ཡིན།

དེ་བཞིན་ཡིད་དུ་འོང་བའི་རོ།

རོས་ཀྱང་ངོམས་པ་ཡོད་མ་ཡིན།

སྣ་ཡང་རྟག་ཏུ་དྲི་ཡིས་ནི།

ངོམས་པར་འགྲོ་བ་མ་ཡིན་ནོ།

རེག་བྱ་བདེ་དང་ལྡན་པ་ཡི།

རེག་བྱས་ལུས་གང་ངོམས་ཡོད་མིན།

ཤིན་ཏུ་སྙན་ཅིང་དགའ་བའི་སྒྲས།

འདི་ཡི་རྣ་བ་ངོམས་ལྡན་མིན།

ཡིད་ཀྱང་ངོམས་པར་མཐོང་མིན་ཏེ།

དེ་བཞིན་ཆོས་ཀྱིས་ཀྱང་ངོམས་མིན།

དབང་པོ་དྲུག་ཀྱང་འགྱུར་ལྡོག་གི།

ཐག་པས་བཟུང་ཞིང་དཀྲིས་ནས་ནི།

འདོད་པའི་ས་ལ་རྣམ་མང་དུ།

རྟག་ཏུ་སྐྲག་ཅིང་འཁོར་བར་བྱེད།

འབར་བ་ལ་ནི་རྩྭ་བཞིན་དུ།

ལྷ་རྣམས་ལ་ནི་ངོམས་ཡོད་མིན།

མི་རྣམས་ཀྱི་ནི་རང་བཞིན་འདི།

གང་ཞིག་ངོམས་པ་མེད་པ་ཡི།

དབང་པོ་དྲུག་མེ་གདུག་པ་ནི།

རྣམ་རྟོག་རླུང་གིས་བརྒྱལ་བ་ཡིན།

གང་ཡང་འཇིག་རྟེན་འདི་ཚིག་པ།

བློ་གྲོས་མེད་པས་མ་རིག་གོ།

བག་མེད་རྣམས་ཀྱི་ས་འདི་ན།

ཆོས་ཀྱི་ལམ་ལ་མི་སྟེན་རྣམས།

དགའ་བའི་ཡུལ་གྱི་སྤྱོད་ཡུལ་ལས།

རང་ཉིད་བག་མེད་ཆགས་བྲལ་གྱིས།

དེ་ལྟར་ལྷ་དེ་དག་རྣམས་ཀྱིས་སྔོན་བྱས་པའི་རྣམས་དྲན་པས་སྐྱེ་བ་གཞན་དྲན་ནས་ཅི་ལྟ་བ་བཞིན་དུ་ཚིགས་སུ་བཅད་པ་བརྗོད་པ་ཡིན་ནོ།

སླར་ཡང་རང་བཞིན་གྱིས་ཡུལ་རྣམས་ལ་སྲེད་པས་འཁྲིད་པར་འགྱུར་ཏེ།

འདོད་པའི་ཡུལ་རྣམས་ཤིན་ཏུ་གཡོ་བར་གྱུར་པའི་སྒྲ་དང་།

རེག་

བྱ་དང་རོ་དང་གཟུགས་དང་དྲི་རྣམས་ཡོན་ཏན་དུ་མ་དང་ལེགས་པར་ལྡན་པ་ཉིད་ཉི་མ་རེ་རེ་ཞིང་རབ་ཏུ་འཕེལ་བར་གྱུར་པ་བརྒྱ་ཕྲག་རྣམས་ཀྱིས་འཁྲིད་པར་འགྱུར་ལ།

གཞན་ཡང་ལྷ་དེ་དག་ཉིད་དང་ལྷན་ཅིག་ཏུ་དགའ་བར་བྱེད་ཅིང་འདོད་པའི་ཡོན་ཏན་ལྔ་ལ་རྣམ་པ་དུ་མ་དང་རྣམ་པར་རྟོག་པ་དུ་མས་ཡོངས་སུ་ཕྲོགས་ནས་ཀུན་ཏུ་སྤྱོད་པར་བྱེད་དོ།

གཞན་ཡང་ལྷ་དུ་མ་རྣམས་དང་ལྷན་ཅིག་ཏུ་ནགས་དང་ཉེ་བའི་ནགས་ཁྲོད་དང་ཆུ་བཤལ་ལ་བྱའི་ཚོགས་བརྒྱ་སྟོང་སྒྲ་འབྱིན་པ་རིན་པོ་ཆེ་བདུན་གྱི་ཁྱམས་དང་ལྡན་པ་དེ་ལ་དགའ་བར་བྱེད་དོ།

གཞན་ཡང་དགའ་བར་གྱུར་པ་དེ་དག་རྣམས་གང་ལ་ལྷ་ལྷག་མ་དེ་དག་རྣམས་དགའ་བར་བྱེད་པ་དེར་ལྷའི་ཚོགས་རྣམས་དང་བཅས་པ་དགའ་བས་གནས་པར་བྱ་བའི་དོན་དུ་ལེགས་པར་ཉེ་བར་འགྲོ་བའོ།

དེ་དག་རྣམས་དེར་ལེགས་པར་ཉེ་བར་སོང་ནས་དེ་དག་ཕན་ཚུན་དུ་ཡང་མཆོག་ཏུ་སྙན་པ་ཐོས་ན་དགའ་བ་དང་ཡང་དག་པར་ལྡན་པ་སྨྲས་པར་གྱུར་ཅིང་དུས་ཡུན་རིང་པོར་ཡང་བརྗོད་ནས་དེ་དག་ལ་སོང་བའི་ཡིད་ཅན་རྣམས་ཇི་ལྟར་གནོད་པ་མེད་པ་དང་ཕན་ཚུན་གྲོགས་སུ་ཡང་གྱུར་པས་རྩེ་ཞིང་འཇོ་སྒེག་གོ།

རིམ་པ་འདི་དག་གིས་ལྷ་གང་དག་ཐམས་ཅད་པས་ཉུང་བ་དེ་དག་ལ་ཡང་ལྷའི་བུ་མོ་ཕྱིར་འབྲང་བར་བྱེད་པ་ནི་སྟོང་ཕྲག་བཅུ་ཡིན་ཏེ།

རྟག་ཏུ་འདོད་པ་ལ་རྣམ་པར་ཆགས་པའི་སེམས་རྟག་ཏུ་འདོད་པའི་ཡོན་ཏན་རྣམས་ཀྱིས་མི་ངོམས་པར་རྟག་ཏུ་འཇོ་སྒེག་གིས་རྒྱུ་བ་བརྒྱ་སྟོང་དུ་མས་རྟག་ཏུ་སེམས་ཀུན་ཏུ་ཆགས་པ་དེ་ལྟར་རྟག་ཏུ་བུད་མེད་རྣམས་ཡུལ་དེ་ལ་མཆོག་ཏུ་དགའ་བར་བྱེད་པ་དེའི་རྒྱུ་གང་ཡིན་རྐྱེན་གང་ཡིན།

གང་ཡང་མཐོ་རིས་ཀྱི་འཇིག་རྟེན་ན་མོ་རྣམས་ཕལ་ཆེ་བར་གྱུར་གྱི་དེ་ན་སྐྱེས་པ་དེ་དག་རྣམས་དེ་ན་ལྷག་མ་ཡིན་ཞེ་ན།

རྒྱུ་ཡོད་པ་ཡིན་ཏེ།

འདི་ལྟར་འདོད་ཆགས་ཆེས་སྟོབས་ཆེ་བ་དང་བར་མ་རྣམས་ཞེ་སྡང་བར་མ་རྣམས་དང་ཆུང་བ་རྣམས་ལྷའི་འཇིག་རྟེན་དུ་ཡིན་པས་ཏེ།

དེ་ལ་གང་དག་ལྷའི་འཇིག་རྟེན་དུ་སྐྱེ་བར་འགྱུར་བ་ན་སྲིད་པ་བར་མ་དོ་བ་དེས་སྲིད་པ་བར་མ་དོ་ལ་གནས་པ་ན་འདོད་པ་ཕུན་སུམ་ཚོགས་པའི་བུད་མེད་རྣམས་མཐོང་བར་གྱུར་ལ་དེས་ཀྱང་འདོད་ཆགས་བླ་ལྷག་པར་འགྱུར་ཞིང་དེ་བུད་མེད་རྣམས་

གཙོར་བྱེད་པར་འགྱུར་རོ།

བདེ་བ་ལ་མངོན་པར་ཞེན་པའི་དབང་གིས་དེ་སྲིད་པ་བར་མ་དོ་བར་གྱུར་པ་ན་ཡང་དེ་བུད་མེད་རྣམས་ཉེ་བར་ལེན་པར་བྱེད་དོ།

རྒྱུ་འདི་དག་གིས་ན་མཐོ་རིས་ན་བུད་མེད་རྣམས་ཆེས་ཕལ་ཆེའི་སྐྱེས་པ་ནི་མ་ཡིན་ནོ།

དེ་དག་རྣམས་ལྷ་འགའ་ཞིག་ལ་ནི་སྟོང་ཕྲག་བཅུ་ཡོད་དོ།

འགའ་ཞིག་ལ་ནི་ཉི་ཤུའོ།

འགའ་ཞིག་ལ་ནི་སུམ་ཅུའོ།

འགའ་ཞིག་ལ་ནི་བཞི་བཅུའོ།

འགའ་ཞིག་ལ་ནི་ལྔ་བཅུའོ།

འགའ་ཞིག་ལ་ནི་དྲུག་ཅུ་ནས་དེ་ལྟར་ཅི་སྲིད་དུ་རིམ་པས་སྟོང་ཕྲག་བརྒྱའམ།

ཕལ་ཆེ་ལ་ལྷག་པར་འགྱུར་རོ།

བུད་མེད་དེ་རྣམས་འདོད་པ་བསྟེན་པ་རྣམས་ཀྱིས་ངོམས་པ་མེད་པའི་ས་ལ་སྐྱེས་པ་ཡིན་ཏེ་གྲོང་པའི་ཆོས་རྣམས་ཀྱི་རིམ་པ་ལ་རྒྱལ་ཆེན་རིས་བཞི་པ་རྣམས་ནི་མི་རྣམས་བཞིན་ནོ།

འཁྲིག་པ་མི་རྣམས་དང་མཚུངས་པ་ནི་སུམ་ཅུ་རྩ་གསུམ་པ་རྣམས་སོ།

འཐབ་བྲལ་བ་རྣམས་ནི་རེག་པས་སོ།

དགའ་ལྡན་པ་རྣམས་ནི་སྨྲས་པས་སོ།

འཕྲུལ་དགའ་བ་རྣམས་ཀྱིས་ནི་བལྟས་པས་སོ།

དྲི་དང་བརྗོད་པ་རྣམས་ཉན་པས་ཏེ་གལ་ཏེ་རིང་བ་ནས་དྲི་རྣམས་འཛིན་པར་བྱེད་དམ།

གལ་ཏེ་ཡང་མཉན་པར་གྱུར་ན་གཞན་འཕྲུལ་དབང་བྱེད་པ་རྣམས་ངོམས་པར་མི་འགྱུར་རོ།

རིམ་པ་འདི་དག་གིས་ལྷ་གཅིག་ཀྱང་ལྷ་མོ་རྣམས་ཐམས་ཅད་དང་འཐུན་པར་འགྱུར་རོ།

མང་པོ་རྣམས་བློ་འཐུན་པ་དང་མིག་སྔར་སྡུག་པ་དང་ལྷ་རྣམས་ནི་ཤ་དང་རུས་པ་དང་སྲིན་རྣམས་དང་ཤིན་ཏུ་བྲལ་བ་དང་ལྷ་རྣམས་ནི་རིང་བ་དང་ཐུང་བ་རྣམ་པར་སྤངས་ཤིང་སྟོབས་དང་ལྡན་པ་ཡིན་ནོ།

དེ་རྟག་ཏུ་ཡང་སྟོབས་ཉམས་པ་མེད་པ་དང་ཕ་རོལ་གནོན་པ་དང་གཟི་བརྗིད་ཆེ་བར་ཡང་འགྱུར་རོ།

རིམ་པ་འདིས་ལྷ་གཅིག་ཀྱང་ལྷའི་བུ་མོ་བརྒྱ་སྟོང་མང་པོ་རྣམས་དང་ཡང་འཐུན་པར་འགྱུར་རོ།

མདངས་གསལ་བ་རྣམས་ཀྱིས་ཀྱང་རྟག་ཏུ་ཀུན་ནས་གང་བས་ལེགས་པར་རྒྱུ་བས་དང་སྙིང་ལ་བདེ་བ་རྒྱ་ཆེན་པོ་དང་ལྡན་པས་ཀྱང་དེ་དག་རྣམས་མཐོ་རིས་དེར་འཇུག་སྟེ་ཇི་ལྟར་འདོད་པར་འགྲོ་བ་དང་འོང་བ་རྒྱུ་བར་བྱེད་དོ།

རིམ་པ་འདིས་མཐོ་རིས་ཀྱི་ལྷ་མོ་རྣམས་ཐམས་ཅད་མཆོག་ཏུ་གྱུར་པ་གཞན་དང་གཞན་རྣམས་ལ་དགའ་བར་བྱེད་དེ།

དེ་བཞིན་དུ་སེམས་འདོད་པ་ལ་དགའ་བར་འགྱུར་བ་

ཡིན་ནོ།

གཞན་ཡང་ལྷ་དེ་ལྷན་ཅིག་སྤྱོད་པ་རྣམས་དང་འདོད་པའི་འདོད་པ་རྣམས་ལ་ཇི་ལྟར་འདོད་པ་བཞིན་དུ་དགའ་མགུར་ཀུན་ཏུ་སྤྱོད་པར་བྱེད་དེ་རྣམ་པ་མང་པོ་དང་རྣམ་པར་རྟོག་པ་དུ་མར་མཐོ་རིས་དང་རྗེས་སུ་འཐུན་པ་རྣམས་དང་།

རང་གི་ལས་དང་འདྲ་བ་རྣམས་ཀྱིས་བརྩེགས་པ་རྒྱུ་བའི་འཐབ་བྲལ་གྱི་ས་ལ་དུས་ཤིན་ཏུ་རིང་པོར་རྣམ་པ་དུ་མར་འདོད་པའི་ཡོན་ཏན་ལྔ་ལ་དགའ་བར་བྱེད་དོ།

ལྷ་དང་ལྷ་མོའི་ཚོགས་ཀྱིས་གང་བ་དེ་ག་ཤེད་ན་ཀུན་ཏུ་རྒྱུ་བ་ན་རླུང་གཏུམ་པོས་གཡོས་པ་ཞེས་བྱ་བའི་ནགས་དེར་རིམ་གྱིས་ཕྱིན་པ་དང་དགའ་བས་གནས་པའི་དོན་དུ་རྩེ་བར་གྱུར་ཏེ་ཇི་སྲིད་དུ་སྔོན་གྱི་ལས་ཀྱི་རྒྱུ་རྣམས་ཀྱིས་སོ།

དེ་ལ་ལས་རྣམས་གཅིག་ཀྱང་མ་མཐོང་ནས་ལྷ་མོའི་ཚོགས་རྣམས་ཀྱིས་ཡོངས་སུ་བསྐོར་བ་ལས་ཕྱིར་ལ་སྤངས་པར་འགྱུར་ཞིང་ལྷ་མོ་རྣམས་ཀྱིས་བོར་བར་གྱུར་པ་དང་དེ་འཆི་འཕོ་བར་འགྱུར་བ་ནད་ཀྱི་གཟུགས་སུ་རྟགས་འདི་དག་རྣམས་འབྱུང་སྟེ།

འདི་ལྟ་སྟེ།

པད་མ་རྣམས་གང་གི་རྩར་ཉེ་བར་ཕྱིན་པའི་པད་མ་ཁ་བྱེ་བ་དང་བཅས་པ་རྣམས་ཁ་འཛུམ་པར་འགྱུར་ཏེ།

དེ་ནི་སྔ་ལྟས་རྣམས་ཀྱི་དང་པོ་ཡིན་ནོ།

གཞན་ཡང་འཆི་འཕོ་བའི་རྟགས་ནི་པད་མའི་རྫིང་བུའི་ཡུལ་ཕྱོགས་དེ་དག་རྣམས་སམ་ཤིང་རྣམས་ཀྱི་གསེབ་ཏུ་ཉེ་བར་ཕྱིན་པ་ན་ཡུལ་དེ་བུང་བ་རྣམས་ཀྱིས་ཡོངས་སུ་བོར་ནས་ཡུལ་གཞན་དུ་འགྲོ་བར་འགྱུར་བ་ནི་རྟགས་གཉིས་པའོ།

གཞན་ཡང་རྟགས་གསུམ་པ་ནི་གང་དག་ལྷ་མོ་རྣམས་དང་ལྷན་ཅིག་ཏུ་རྩེ་བ་དེ་དག་གི་རོལ་མོ་དེ་དག་རྣམས་ལ་དེ་འདོད་ཆགས་དང་བྲལ་བར་འགྱུར་རོ།

གཞན་ཡང་རྟགས་ནི་ལྗོན་ཤིང་གང་ལ་སྙེན་པའི་ལྗོན་ཤིང་དེའི་མེ་ཏོག་ཐམས་ཅད་རྙིངས་པར་གྱུར་ཏེ་དེ་དག་ནི་རྟགས་བཞི་པའོ།

གཞན་ཡང་རྟགས་ལྔ་པ་ནི་ཤིང་རྟ་གང་གིས་སྐྱེད་མོས་ཚལ་གྱི་ལྟད་མོ་ལ་ནམ་མཁའ་ནས་འགྲོ་བར་བྱེད་པ་ན་ནམ་མཁའ་ལ་འཕགས་པར་མི་ནུས་སོ།

རྟགས་དེ་དག་རྣམས་ནི་འཐབ་བྲལ་བ་རྣམས་ཀྱི་ཡིན་ནོ།

ཇི་ལྟར་སུམ་ཅུ་རྩ་གསུམ་པ་རྣམས་ཀྱི་ནི་མཆན་ཁུང་ལ་སོགས་པ་རྣམས་ནས་རྔུལ་རྒྱ་ཆེན་པོར་འབྱུང་བ་རྣམས་ཡིན་ཏེ།

དེ་ལས་ཀྱང་ངེས་པར་འཆི་འཕོ་བར་འགྱུར་བའི་རྟགས་ཀྱི་ཐ་མ་

དགེ་བའི་ལས་ཡོངས་སུ་ཟད་པའི་རྗེས་ཐོགས་སུ་སྡིག་པ་གང་གིས་འཆི་བའི་དུས་བྱེད་པར་འགྱུར་བ་རྣམས་ཡིན་ནོ།

དེ་དག་རྣམས་ཀྱང་འཆི་བའི་རྟགས་ཆེན་པོ་བཅུ་གཉིས་ཡིན་ལ་དེའི་སྐད་ཅིག་ལ་འཆི་བའི་རྟགས་རྣམས་རིམ་གྱིས་མཐོང་བར་འགྱུར་ཏེ།

སྔོན་གྱི་རྒྱུ་དང་བཅས་པའི་ལྷ་དེ་མི་ཉིད་དུ་འཆི་འཕོ་བར་འགྱུར་བའི་ལྷ་དེ་མྱུར་དུ་འཆི་འཕོ་བའི་རྟགས་ནི་འདི་ལྟ་སྟེ།

གང་གིས་ལུས་ལས་འོད་རྣམས་འབྱུང་བར་འགྱུར་བ་དེ་རང་གི་ལུས་ཀྱི་རྗེས་སུ་འཇུག་སྟེ་ཇི་ལྟར་ནུབ་པར་འགྱུར་བའི་ཉི་མ་བཞིན་ནོ།

གཞན་ཡང་འཆི་འཕོ་བའི་ལྟས་ཡོད་པ་ནི་ཇི་ལྟར་མེ་ཏོག་གི་ཕྲེང་བ་དང་འབྲས་བུ་རྣམས་རབ་ཏུ་མི་སྡུག་པར་འགྱུར་རོ།

གཞན་ཡང་དེ་ཁོ་ན་འཆི་འཕོ་བའི་རྟགས་སུ་གྱུར་པ་ནི་འདི་ལྟ་སྟེ།

མགོ་བོ་ལ་མེ་ཏོག་གང་དག་བཏགས་པར་གྱུར་པ་དེ་ནས་རབ་ཏུ་ཉིལ་ནས་འགྲོའོ།

གཞན་ཡང་དེའི་དུས་ན་འཆི་འཕོ་བར་འགྱུར་བའི་ལྟས་ཡོད་པ་ནི་འདི་ལྟ་སྟེ།

ཆུའི་ནང་དུ་སོང་བའི་བདག་གི་གཟུགས་བརྙན་གང་དང་གང་དུ་སྐྱེ་བར་འགྱུར་བ་དེ་དག་ཉིད་ཀྱི་ལུས་ཀྱི་གཟུགས་བརྙན་མཐོང་བར་འགྱུར་དེ་དམྱལ་བ་དང་ཡི་དགས་དང་དུད་འགྲོ་དང་མི་རྣམས་ཀྱི་གཟུགས་ཀྱི་རྣམ་པ་དེ་སྲིད་ཁོ་ནས་ནང་དུ་སོང་བར་བདག་ཉིད་ཀྱི་གཟུགས་བརྙན་མཐོང་བར་འགྱུར་རོ།

མཐོང་བ་འདི་དག་ནི་དེའི་རྗེས་ལ་འཆི་འཕོ་བའི་རྟགས་ལྔ་པ་ཡིན་ཏེ།

གང་དག་གིས་དེའི་གཟུགས་བརྙན་ཅན་རྣམས་སམ་རྣམ་པ་དེ་འདྲ་བ་ཉིད་མཐོང་ནས་ཀྱང་ཤིན་ཏུ་སྐྲག་པར་འགྱུར་རོ།

དེའི་བ་སྤུ་རྣམས་ཀྱང་ཚེར་མ་ལྟར་ལྡང་ངོ་།

གཞན་ཡང་དེའི་སྐད་ཅིག་ལ་འཆི་འཕོ་བའི་རྟགས་སུ་གྱུར་པ་ནི་འདི་ལྟ་སྟེ།

གནས་ལ་རྣམ་པར་འགྱུར་བ་འབྱུང་བར་འགྱུར་ཏེ་གལ་ཏེ་བཻ་ཌཱུརྱའི་རང་བཞིན་གྱི་སྟན་ལ་གནས་པར་འགྱུར་རམ།

གལ་ཏེ་ན་དངུལ་གྱི་རང་བཞིན་ནམ།

གལ་ཏེ་ན་གསེར་གྱི་རང་བཞིན་ནམ།

གལ་ཏེ་ན་ཨིན་དྲ་ནཱི་ལའི་རང་བཞིན་གྱི་སྟན་དེ་དག་རྣམས་ཐམས་ཅད་ཀྱང་ཟངས་མར་འགྱུར་རོ།

གཞན་ཡང་དེ་དང་འབྲེལ་ནས་འཆི་འཕོ་བར་འགྱུར་བའི་ལྟས་ལ་འདི་ལྟ་སྟེ།

རླུང་གིས་འདིའི་གོས་ཀུན་ཏུ་སྐྱོད་པར་བྱེད་དོ།

རེག་བྱ་ཚ་མོ་རྣམས་ཀྱིས་སྟན་ལས་རྡོ་རྗེ་བབ་པ་བཞིན་དུ་ཚོར་རོ།

དེ་དག་རྣམས་ཀྱིས་འདིའི་ཡིད་རྣམ་པར་འགྱུར་བ་སྐྱེད་དོ།

དེ་ཡིད་རྣམ་པར་འགྱུར་བར་གྱུར་པས་སྒྲ་དང་རེག་བྱ་དང་རོ་དང་གཟུགས་དང་དྲི་འདོད་པ་མ་ཡིན་པ་རྣམས་ལ་སྒྲུབ་པར་བྱེད་དོ།

དེའི་རྗེས་ལ་འདིའི་མི་རྟག་པའི་མེ་རྣམས་ཉེ་བར་འོང་བར་འགྱུར་རོ།

དེའི་རྗེས་ཐོགས་སུ་ཕན་ཚུན་དུ་འཆི་འཕོ་བའི་རྟགས་རབ་ཏུ་འབྱུང་བར་འགྱུར་ཏེ།

བཻ་ཌཱུརྱའི་རང་བཞིན་གྱི་རྡོ་ལ་ཇི་ལྟ་བ་བཞིན་དུ་གཞན་རྣམས་ལ་ཡང་མི་མཐོང་ངོ་།

མགོ་བོ་མ་ལུས་པར་ལྷུང་བར་མཐོང་ངོ་།

དེའི་རྗེས་ཐོགས་ལ་འདི་མྱུར་བར་འབྱུང་བར་འགྱུར་ཏེ།

རྣམ་པ་དེ་སྲིད་ཀྱི་འཆི་བའི་རྟགས་དེ་རྣམས་ཀྱིས་འཆི་བ་དེ་རབ་ཏུ་རྟོགས་ནས་བུད་མེད་རྣམས་ཀྱིས་དེ་ཡོངས་སུ་སྤང་ངོ་།

ཁ་དྲག་པར་ཡང་འགྱུར་བས་དེའི་སེམས་ལ་མྱ་ངན་ཀུན་ཏུ་འབྱུང་བར་འགྱུར་རོ།

འདུས་པ་དང་བྲལ་བས་བསྐྱེད་པའི་མྱ་ངན་གྱི་རྣམ་པ་འདི་ལྟ་བུ་དག་སྐྱེ་སྟེ།

གང་དག་གི་ཁྱད་པར་གྱིས་གང་དག་དེས་ཉེ་བར་ལོངས་སྤྱོད་པ་དེ་དག་རྣམས་ཐམས་ཅད་ཀྱིས་བཅུ་དྲུག་ཆར་ཡང་མི་ཕོད་པར་རོ།

དེའི་རྗེས་ཐོགས་ལ་འདིའི་དེ་དང་འབྲེལ་པར་འཆི་འཕོ་བའི་རྟགས་བཅུ་ལས་འབྱུང་སྟེ།

འདི་ལྟར་དབང་པོ་ཐམས་ཅད་ཉམས་པར་འགྱུར་རོ།

མིག་ལ་སོགས་པ་རྣམས་ཀྱིས་ཀུན་ནས་འཁོར་བ་བཞིན་སྐྱེས་བུའི་གཟུགས་མཐོང་ངོ་།

དེའི་རྗེས་ལ་འཆི་འཕོ་བའི་རྟགས་བཅུ་གཅིག་པ་ཡིན་ཏེ།

འདི་ལྟ་སྟེ།

ཡིད་ཀྱང་གནས་པ་མེད་པ་ཉིད་དུ་འབྱུང་བར་འགྱུར་ཏེ་ཟོ་ཆུན་གྱི་འཁོར་ལོ་བཞིན་དུ་དེ་གཅིག་ཏུ་ཡང་གནས་པ་མི་འཐོབ་བོ།

འཆི་འཕོ་བའི་རང་བཞིན་གྱི་སྡུག་བསྔལ་རྣམས་མཐོང་ནས་མཆོག་ཏུ་གཡོ་བའི་ཡིད་ཅན་དུ་འགྱུར་རོ།

དེའི་རྗེས་ཐོགས་ལ་འདིའི་སྲོག་གི་དབང་པོ་འགགས་པར་འགྲོ་བར་འགྱུར་ཏེ།

དེ་ནི་སྡོང་བུ་ཟད་པ་དང་སྣུམ་མེད་པ་དང་འོད་ཉམས་ནས་འགག་པར་འགྱུར་བ་བཞིན་དུ་དེ་ལྟར་འགགས་ནས་འགྲོ་བར་འགྱུར་བར་ལྷ་དེས་མཐོང་ངོ་།

འཆི་མ་འཕོས་ན་ཡང་གང་ལ་དེ་རྗེས་སུ་སྤྱོད་པའི་ལྗོན་ཤིང་དེ་ཉིད་ཚིག་པར་འགྱུར་བར་མངོན་པར་མཐོང་ངོ་།

ཇི་ལྟར་བྱ་རྣམས་ཀྱིས་ཀྱང་བཏང་ནས་ནགས་གཞན་དག་ཏུ་འགྲོ་བར་བྱེད་དོ།

ཕྱི་ནས་ཀྱང་སྔར་གྱི་ཡོན་ཏན་རྣམས་མཐོང་

བར་འགྱུར་རོ།

དེ་བཞིན་དུ་ལྷ་མོ་དེས་ལྷ་དེ་བཏང་ནས་གཞན་དུ་འགྲོ་བའོ།

དེ་ནས་ལྷ་དེའི་སེམས་ཀྱི་ཐ་མས་རང་རང་གི་རྒུད་པ་ཆེན་པོ་མངོན་པར་མཐོང་ནས་ཤིན་ཏུ་མི་བཟོད་པའི་ཡིད་ཀྱིས་ཚིགས་སུ་བཅད་པ་ཇི་ལྟར།

ཇི་ལྟར་གྱུར་པའི་མི་རྣམས་ཀྱི།

རང་གི་ལས་ཀྱི་གནས་རྣམས་དང་།

ཡུལ་ལ་གནས་པ་གཏོང་བ་དང་།

དེ་ཚེ་བུད་མེད་རྣམས་ཆགས་བྲལ།

འགྲོ་བས་འབྱོར་པ་ཤིན་ཏུ་གཏོང་།

རང་གི་ལས་ཀྱིས་སྤངས་པ་ཡི།

ལྷ་མཐོང་ནས་ནི་རྩབ་ཧྲལ་ཅན།

བུད་མེད་རྣམས་ནི་གཞན་དུ་རྒྱུག །

བདེ་བ་བཙོག་པ་མི་གཙང་བ།

རྩབ་ཧྲལ་སེམས་ནི་མི་གནས་པ།

བུད་མེད་རྣམས་བཙོག་འདོད་པ་འདི།

གནས་པ་མེད་པའི་གྲོགས་དེ་བཙོག །

སྡུག་བསྔལ་བཞི་པོ་འདི་དག་ནི།

མི་ཡིས་རྟག་ཏུ་བསྟེན་པ་ཡིན།

གང་ཕྱིར་ཡུལ་ནི་མི་འདྲར་ངེས།

དེ་ཕྱིར་ངེས་པར་རྣམ་པར་སྤོངས།

ལས་རྣམས་ཀྱིས་ནི་བདེ་བ་དང་།

སྡུག་བསྔལ་བར་ཡང་འགྱུར་བ་ཡིན།

ལས་རྣམས་ཀྱིས་ནི་སྲོག་ཆགས་ཁྲིད།

ལས་རྣམས་ཀྱིས་ནི་ཉམ་ཐག་བྱེད།

གང་ལ་ཡོན་ཏན་ལྔས་གཏད་པའི།

ལྷ་རྣམས་བདེ་བ་མཆོག་ཐོབ་པ།

ཕྱི་ནས་ལྟུང་འགྱུར་རྒུད་དབང་གིས།

ལྷ་གནས་སྐལ་བ་ཉམས་པ་ཡིན།

སངས་རྒྱས་དེ་ཉིད་ལེགས་སྟོན་པ།

ཐར་པའི་ལམ་ནི་སྟོན་པ་པོ།

ལས་རྣམས་སྒྱུ་མས་ཀུན་བསླང་འདི།

འཁོར་བ་ཡིན་པར་ཡོངས་སུ་བསྒྲགས།

གང་ཞིག་རྩབ་ཧྲལ་གྱུར་པ་དང་།

གང་ཚེ་གང་ཡང་སྐྱོན་སྒྲུབ་པ།

བུད་མེད་དགོས་པས་མཉེས་གཤིན་རྣམས།

དེ་ཡི་སྟེང་ན་ལེགས་པར་གནས།

མུན་པ་རྣམས་རྒྱུ་ཉི་མ་མིན།

མེ་ནི་གྲང་བའི་རྒྱུ་མ་ཡིན།

སྙིང་བདེ་སྙིང་ལ་གནས་པ་ཡང་།

ཅུང་ཟད་བུད་མེད་རྣམས་ལ་མེད།

ཇི་ལྟར་བཞིན་དུ་ས་འདི་བརྟན།

རླུང་ནི་ཇི་བཞིན་རྟག་ཏུ་གཡོ།

དེ་བཞིན་བུད་མེད་བྱས་ཤེས་མིན།

སྐྱོན་རྣམས་བུད་མེད་ལ་རྟག་ཡོད།

སྐྱེས་པས་དུས་རིང་རབ་བརྩོན་པས།

བུད་མེད་བསྒྱུར་བཟློག་མང་བྱས་པ།

སྡུག་བསྔལ་བྱུང་ནས་སྤོང་བྱེད་དེ།

སྐམ་པོའི་མཚོ་ལ་སྒོང་སྐྱེས་བཞིན།

གྱེན་ལ་ཆུ་འགྲོ་མཐོང་བ་མེད།

ལྷ་རྒྱལ་རྟག་ཏུ་འདོད་པ་མིན།

རི་རྣམས་

འགྲོ་བ་ཡོད་པ་མིན།

སྙིང་ཡང་མེ་ཡི་བདེ་བྱེད་མིན།

མི་རྣམས་ཆོས་ནོར་སྙན་པ་ཡི།

རྟག་ཏུ་གེགས་བྱེད་པར་ཡང་དྲན།

དོན་མིན་དྲ་བ་སྐྱེ་གནས་དང་།

སྐྱོན་རྣམས་འབྱུང་བར་འགྱུར་བ་ཡང་།

རྡོ་རྗེ་ཡང་ནི་འཇམ་འགྱུར་རམ།

མེས་ཀྱང་ཚ་བ་འདོར་རམ་ཅི།

དེ་ཡི་རང་བཞིན་ཁྱད་པར་ཅན།

གཡོ་ནི་བུད་མེད་ཀྱིས་སྤོང་མིན།

སྤྱོད་པ་དང་ནི་ཁྲིམས་ཀྱིས་མིན།

སྦྱིན་པ་ངག་སྙན་བསྒྱུར་བཟློག་གིས།

སེམས་ནི་འབར་བ་ལྟ་བུ་ཡི།

བུད་མེད་དང་དུ་བླང་མི་ནུས།

བདེ་བ་ན་ནི་མཚུངས་པར་འགྲོ།

སྡུག་བསྔལ་བ་ནི་སྤོང་བར་བྱེད།

ཕན་པ་རྣམས་ནི་བརྗེད་གྱུར་ནས།

སྐྱོན་གཅིག་པུ་ནི་དྲན་པ་ཡིན།

ནགས་དང་ཉེ་ནགས་རི་ཡི་རྩེ།

བདེ་བ་དུ་མ་ཀུན་སྤྱད་ནས།

ཉམ་ང་དྲག་པོ་ཀུན་བྱུང་ནས།

བུད་མེད་རྣམས་ཀྱིས་ཡོངས་སུ་འདོར།

དེ་ལྟར་ན་ལྷ་དེས་ལྷ་མོ་དེ་དག་རྣམས་མངོན་པར་མཐོང་ནས་ལྷ་དེ་ཡོངས་སུ་སྤངས་པར་གྱུར་པ་ན་འཇིག་རྟེན་ལ་དཔྱོད་པའི་རྣམ་པར་དཔྱོད་པས་དེ་ལྟར་ཚིགས་སུ་བཅད་པ་བརྗོད་དོ།

དེ་ཡང་ཁྲོན་མའི་རང་བཞིན་ཡིན་པས་དེའི་དུས་ཉིད་ན་དེ་བརྗེད་ནས་ལྷ་གཞན་ལ་ཉེ་བར་སྟེན་པར་བྱེད་དེ།

ཇི་ལྟར་སྦྲང་རྩི་འདྲེན་བྱེད་ཀྱིས་བ་མོ་དང་ལྷགས་པས་བཅོམ་པའི་པད་མ་འདབ་མ་རྙིངས་པ་ཡོངས་སུ་སྤངས་ནས་མཚོ་སྐྱེས་གཞན་རྣམས་ལ་སྟེན་པར་བྱེད་པ་དེ་བཞིན་དུ་ལྷ་མོ་དེ་དག་ལྷ་དེ་ཡོངས་སུ་སྤངས་ནས་གཞན་ལ་བསྟེན་ནས་དེ་སླར་ཡང་ཡན་ལག་ལྔ་དང་ལྡན་པའི་རྔ་སྒྲ་དང་ཡང་དག་པར་ལྡན་པས་དགའ་དགུར་ཀུན་ཏུ་སྤྱོད་དེ་ནགས་ཚལ་དང་སྐྱེད་མོས་ཚལ་དང་མཚེའུ་དང་པད་མའི་ཚལ་རྣམས་ལ་རྣམ་པ་སྣ་ཚོགས་པར་རྣམ་པར་བཀྲ་བའི་གཟུགས་དང་།

རྣམ་པ་སྣ་ཚོགས་པའི་བྱ་སྐད་རྣམ་པ་སྣ་ཚོགས་པ་ཀུན་ཏུ་སྒྲོགས་པ་དཔག་བསམ་གྱི་ཤིང་བརྒྱ་སྟོང་དང་ལྡན་པ་རྣམས་ལ་དེ་ལྟར་དེས་མངོན་དུ་བརྒྱུས་པའི་ལྷ་དྲན་ནས་བདེ་བ་ཉམས་སུ་མྱོང་བར་འགྱུར་རོ།

ཅི་ལྟར་སྐྱེ་བ་བརྒྱ་སྟོང་རྣམ་པར་བརྗེད་ཅིང་སྐད་ཅིག་ལ་མིག་ལྟ་བ་དེ་ལྟར་སྔོན་གྱི་ཡོན་ཏན་དྲན་པའི་བྱས་པ་ཤེས་པ་རྣམས་འཇོམས་པར་བྱེད་པ་བུད་མེད་འདི་དག་རྣམས་ཐམས་ཅད་ལ་འཐུན་པ་ཞེས་བྱ་

བའི་མིང་ཅན་ནི་ངེས་པར་འགའ་ཞིག་ཀྱང་མེད་ཀྱི་རྫས་ཀྱི་རྒྱུའི་དོན་འགའ་ཞིག་གམ།

དགོས་པ་གཞན་གྱིས་ཀྱང་སོ་སོ་ལ་ཉེ་བར་གནས་པ་དང་སྐྱེས་བུ་འཇོམས་པར་བྱེད་པ་ཡང་ཡིན་ནོ།

ངོ་བོ་ཉིད་ཀྱིས་ཀྱང་འགའ་ཞིག་ལ་ཡང་མཐར་ཐུག་པར་གནས་པ་མ་ཡིན་ཏེ།

གང་ཡང་འདི་དག་གི་རང་བཞིན་ཡང་སྔོན་གྱི་བྱས་པ་འདི་དག་འགའ་ཞིག་ཀྱང་ཤེས་པ་མ་ཡིན་ནོ།

དེ་ཅིའི་ཕྱིར་ཞེ་ན།

སེམས་གཡོ་བའི་རང་བཞིན་ཡིན་པའི་ཕྱིར་ཟོ་ཆུན་འཁོར་མོ་དང་དྲི་ཟའི་གྲོང་ཁྱེར་དང་སྨིག་རྒྱུ་དང་མཚུངས་པའི་ངོ་བོ་ནི་བུད་མེད་ཐམས་ཅད་ཡིན་ཏེ་འདི་དག་གི་རང་བཞིན་ནོ།

དེ་ནས་ལྷ་དེས་དེ་ལྟར་མངོན་སུམ་ཉིད་དུ་ལྷ་གཞན་གྱི་འཆི་འཕོ་མཐོང་ནས་སྔོན་བསྒོམས་པའི་སེམས་ཀྱི་གཞན་ཡང་ཚིགས་སུ་བཅད་པ་བརྗོད་པ་ཇི་ལྟར།

ལྷ་གང་གཡོ་བའི་ཡིད་ཀྱིས་ནི།

འདོད་ལ་ལོངས་སྤྱོད་བག་མེད་པས།

འཆི་འཕོའི་སྲོག་གི་ཐ་མ་ཡི།

འཇིགས་པ་དྲག་པོ་མ་མཐོང་ངོ་།

གང་ཚེ་ཁོ་ན་ལྷ་འགྲོ་བ།

དེ་ཚེ་འཆི་བའི་ངལ་བ་ཉིད།

ཉིན་མོ་ཟད་པ་ཇི་བཞིན་དུ།

མཚན་མོ་ངེས་པར་འབྱུང་བ་ཡིན།

ཉིན་མོ་གསོན་པར་ཤེས་པར་བྱ།

མཚན་མོ་འཆི་བ་དང་མཚུངས་སོ།

དེ་ཕྱིར་དེ་གཉིས་རྟོགས་བྱས་ལ།

ཡིད་ཀྱིས་ངེས་པར་ལེགས་པ་གྱིས།

དེ་ལྟར་ལྷ་དེས་སྔོན་གྱི་སྐྱེ་བ་དྲན་པས་དྲན་པར་གྱུར་ནས་མིའི་དུས་རྩི་བས་འཇལ་བར་བྱེད་དེ།

དེ་ལ་ལྷ་རྣམས་ཀྱི་གནས་ན་ནི་རྟག་ཏུ་ཉིན་མོ་ཉིད་ཡིན་གྱི་ལྷ་རྣམས་རང་གི་འོད་ཀྱི་མཐུས་མཚན་མོ་ཡོད་པ་མ་ཡིན་པའི་རྒྱུ་གང་གིས་ལྷ་རྣམས་དུས་འགྲང་བར་བྱེད་པ་ཡིན་ནོ།

དེ་ནས་ལྷ་དེས་རྣམ་པ་དེ་ལྟ་བུ་རྣམས་རིག་ནས་སླར་ཡང་ལྷ་རྣམས་ཀྱི་རང་བཞིན་ཡིན་པའི་ཕྱིར་དང་།

ལས་བྱས་པ་རྣམས་ཀྱི་འབྲས་བུ་ལ་ཉེ་བར་ལོངས་སྤྱད་པར་བྱ་བ་ཡིན་པའི་གནས་ཉིད་ནི་ངེས་པར་མི་སླུ་བ་ཡིན་པར་འདོད་དགོས་པར་བྱས་ནས་ཕྱིས་ཡང་དེ་ནགས་ཚལ་དང་ཉེ་བའི་ནགས་ཚལ་དུ་རྩེ་དགའ་བ་དང་ཀུན་ཏུ་ཡང་སྤྱོད་དོ།

རྔ་སྐད་ཡན་ལག་ལྔ་དང་ལྡན་པས་ཆུ་ཀླུང་དང་ཚང་ཚིང་དང་པད་མའི་ཚལ་དང་རི་རྣམས་ཀྱི་ཁྲོད་རྣམས་ལ་ཡང་ལྷའི་ཚོགས་གཞན་རྣམས་དང་ལྷན་ཅིག་ཏུ་དགའ་བར་བྱེད་དེ་ལྷ་དེ་དག་རྣམས་ཀྱི་ཡང་རྣམ་པ་དུ་མར་གཅིག་ནས་གཅིག་ཏུ་བརྒྱུད་

པའི་འཇིག་རྟེན་པའི་གཏམ་གྱི་བདེ་བ་ཉེ་བར་སྟོན་པར་བྱེད་དོ།

ཆོས་རྣམས་ཀྱི་རང་བཞིན་ཡང་རྗེས་སུ་འཇུག་པར་བྱེད་དོ།

ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པའི་ལས་རྣམས་ཟད་པར་མ་གྱུར་གྱི་བར་དེ་སྲིད་དུ་སྟེ།

དེ་དག་རྣམས་ཟད་ནས་ཀྱང་ལྷའི་རིས་དེ་དག་རྣམས་ནས་འཆི་འཕོ་བར་འགྱུར་རོ།

ཤི་འཕོས་ནས་ཀྱང་ཇི་ལྟར་ལས་ཀྱིས་ཉེ་བར་འགྲོ་བའི་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེའོ།

གང་ཡང་གཞན་རྣམས་སུ་མི་རྣམས་དང་སྐལ་བ་མཚུངས་པའི་མིར་སྐྱེས་པར་གྱུར་ན་ཡང་དེ་རྟག་ཏུ་སྐྱིད་དེ་བར་འགྱུར་རོ།

ཆོས་དང་ལྡན་པའི་ཡུལ་དང་ལྷར་ཡང་སྐྱེའོ།

རིག་པས་སྦྱངས་པའི་བློ་རྒྱས་པ་དང་སྐྱེ་བོ་ཐམས་ཅད་བྱམས་པར་ཡང་འགྱུར་རོ།

རྒྱལ་པོ་དག་ཏུ་ཡང་འགྱུར་རོ།

དེས་བརྒྱ་ལ་ཕ་རོལ་གྱི་དཔུང་རྣམས་དང་གཡུལ་འགྱེད་པར་བྱེད་ན་ཡང་འདིའི་ཡུལ་རྣམས་སུ་ནམ་ཡང་ཕ་རོལ་གྱི་དཔུང་གིས་འཇིགས་པར་མི་འགྱུར་རོ།

མཆོག་ཏུ་སྐྱིད་པ་དང་འདི་རྗེས་སུ་སྒོམ་པའི་རང་བཞིན་ཅན་དུ་ཡང་འགྱུར་རོ།

དེའི་རྗེས་སུ་བསྒོམས་པས་ཅི་སྟེ་ན་རྒྱལ་པོའམ་རྒྱལ་པོའི་བློན་པོར་ཡང་འགྱུར་རོ།

ལས་འདིའི་རྒྱུ་འཐུན་པས་རྟག་ཏུ་སྐྱིད་པའི་མཆོག་ཏུ་ཡང་འགྱུར་རོ།

གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་རྣམས་ཤེས་པ་དེས་འཐབ་བྲལ་བའི་ལྷ་རྣམས་ཀྱི་ས་ལ་ལྟ་བར་བྱེད་པ་ལས།

དེས་ཐོས་པ་ལས་བྱུང་བའི་ཤེས་རབ་ཀྱིས་འཐབ་བྲལ་བ་རྣམས་ཀྱི་ས་ཡིད་ཀྱི་རྒྱན་ཞེས་བྱ་བ་ཡོད་པ་ཇི་ལྟ་བ་བཞིན་དུ་མཐོང་ངོ་།

དེ་ལས་གང་གི་སེམས་ཅན་རྣམས་སྐྱེ་བར་འགྱུར་བ་ཡང་དེས་ཐོས་པ་ལས་བྱུང་བའི་ཤེས་རབ་ཀྱིས་མཐོང་བ་ཇི་ལྟར་དགེ་བའི་སྐྱེས་བུ་གང་གིས་དེ་བློ་དང་ལྡན་པར་འགྱུར་ཞིང་དྲང་པོ་དྲང་པོའི་རང་བཞིན་ཅན་ཡང་དག་པའི་ལྟ་བ་ཅན་རྟག་ཏུ་ལས་དང་འབྲས་བུའི་དེ་ཁོ་ན་ཉིད་ཤེས་པས་སྲོག་གཅོད་པ་དང་མ་བྱིན་པར་ལེན་པ་ཕྱིན་ཅད་རབ་ཏུ་བསྡམས་པར་གྱུར་ལ་སྔར་བཞིན་དུ་འདོད་པ་ལ་ལོག་པར་གཡེམ་པ་ཡང་མི་བྱེད་པར་འགྱུར་ཞིང་ཡིད་ཀྱིས་ཀྱང་དེ་རྣམ་པར་རྟོག་པར་མི་བྱེད་ལ་རྗེས་སུ་ཡི་རང་བར་མི་འགྱུར་བ་ནི་འདི་ལྟ་སྟེ་ཅུང་ཟད་ཅིག་ཙམ་ཡང་བུད་མེད་རྣམས་ལ་ཚུལ་བཞིན་མ་ཡིན་པའི་ཡིད་ལ་བྱེད་པས་ལྟ་