經部第71卷（མདོ་སྡེ་ཤ་བཞུགས་སོ། །）

གཞན་ཡང་ལས་དང་འབྲས་བུ་རྣམ་པར་སྨིན་པ་ཤེས་པའི་དགེ་སློང་དེ་མཚེ་མ་པའི་ལྷ་རྣམས་ལ་ཕན་པའི་དོན་དུ་ལྷ་རྣམས་ཀྱི་ས་ལ་ལྟ་བར་བྱེད་པ་ན།

དེས་ཐོས་པ་ལས་བྱུང་བའི་རང་བཞིན་གྱི་ཤེས་རབ་ཀྱིས་ལྷ་རྣམས་ཀྱི་ས་བདེ་བ་རབ་ཏུ་འཕེལ་བ་དང་ལྡན་པ་ཞེས་བྱ་བ་ཇི་ལྟར་ཡོད་པ་མཐོང་བར་གྱུར་ཏོ།

ས་དེར་ཡང་ལས་གང་གིས་སེམས་ཅན་རྣམས་སྐྱེ་བར་འགྱུར་བ་ཡང་དེས་མཐོང་སྟེ།

སྐྱེས་བུ་དམ་པ་གང་གིས་དགེ་ལེགས་སུ་གྱུར་པའི་སེམས་ཀྱིས་ཚུལ་ཁྲིམས་དང་ལྡན་པར་གྱུར་པས་སྲོག་གཅོད་པ་དང་།

མ་བྱིན་པར་ལེན་པ་རྣམས་སྤངས་པར་གྱུར་པ་ནི་སྔ་མ་བཞིན་ནོ།

འདོད་པ་ལ་ལོག་པར་གཡེམ་པ་རྣམས་ཀྱང་ཤིན་ཏུ་ཕྲ་བ་ཡང་སྤོང་བར་བྱེད་དེ་དཔེར་ན་ཡུད་ཙམ་ཅིག་ཀྱང་བུད་མེད་སྐྱེས་པ་དང་བཅས་པར་མངོན་པར་བྲིས་པ་རྣམས་ལ་ཡང་ཚུལ་བཞིན་མ་ཡིན་པ་ཡིད་ལ་བྱེད་པས་སྐྱེད་པར་གྱུར་པས་དེ་ལ་འདི་རྟོག་པར་མི་བྱེད།

བརྣབ་སེམས་སུ་མི་བྱེད་དོ།

རོ་མྱོང་བར་མི་བྱེད་ཅིང་ཚུལ་བཞིན་མ་ཡིན་པ་ཡིད་ལ་

བྱེད་པའི་སེམས་རྙོག་པ་ཅན་དུ་བྱེད་པ་ཉོན་མོངས་པར་བྱེད་པ་འཇིགས་པ་དང་བཅས་པར་གྱུར་པ་ཚངས་པར་སྤྱོད་པ་ཀུན་ཏུ་སུན་འབྱིན་པར་བྱེད་པ་རྣམས་ཀྱི་ས་དང་།

གང་ཡང་གཞན་དག་རབ་ཏུ་རྟོག་པར་བྱེད་པའམ།

ལྟ་བར་བྱེད་པ་ཡང་རུང་སྟེ།

ཚུལ་བཞིན་མ་ཡིན་པ་ཡིད་ལ་བྱེད་པས་སེམས་ཀུན་ནས་སུན་འདོན་པར་བྱེད་པ་དེ་དག་རྣམས་འདིས་རབ་ཏུ་འགོག་པར་བྱེད་དོ།

ཕྱིར་ལ་ཟློག་པར་བྱེད་དོ།

ལས་ཀྱི་འབྲས་བུ་རྣམས་ཀྱང་སྟོན་པར་བྱེད་པ་ཡིན་ཏེ།

ཇི་ལྟར་མི་འདོད་པ་དང་མི་དགའ་བ་དང་ཡིད་དུ་མི་འོང་བར་འགྱུར་བ་ནི་འདོད་པ་ལ་ལོག་པར་གཡེམ་པ་སྟེན་པ་འདིའི་འབྲས་བུ་ཡིན་པས་དེས་ན་དེ་ལྟར་མི་བྱའོ།

འདི་དག་ནི་ཞི་བར་འགྱུར་བའི་ལམ་མ་ཡིན་ནོ།

དགའ་བ་མ་ཡིན།

ཡིད་དུ་འོང་བ་མ་ཡིན།

དམ་པ་རྣམས་ཀྱིས་མངོན་པར་འདོད་པ་ཡང་མ་ཡིན་ནོ།

ཤིན་ཏུ་ཕྲ་བའི་འབྲས་བུ་རྣམས་སྟོན་པར་བྱེད་པ།

ཚུལ་ཁྲིམས་དང་ལྡན་པ་ཚངས་པར་སྤྱོད་པ་རྣམ་པར་དག་པ་ཁ་ན་མ་ཐོ་བ་ཕྲ་རབ་ཙམ་ལ་ཡང་འཇིགས་པར་ལྟ་བ་དེ་དག་ནི་ལུས་ཞིག་ནས་ཤི་བའི་འོག་ཏུ་བདེ་འགྲོ་མཐོ་རིས་མཚེ་མའི་ལྷ་རྣམས་ཀྱི་བདེ་བ་རབ་ཏུ་འཕེལ་བ་དང་ལྡན་པའི་ས་འདི་ལ་སྐྱེ་བར་འགྱུར་རོ།

དེ་ལ་སྐྱེས་པ་རྣམས་ནི་ལེགས་པར་བྱས་པའི་ལས་ཀྱི་མཐའ་རྣམས་ལ་སྤྱད་པས་དེ་དག་དགའ་བའི་ལས་ཀྱི་འབྲས་བུ་རྣམས་ལ་སྤྱོད་པར་བྱེད་དོ།

འདི་ལྟ་སྟེ་ནགས་རྣམས་དང་ཉེ་བའི་ནགས་རྣམས་དང་ཁྲུས་ཀྱི་རྫིང་བུ་རྣམས་དང་།

གསེར་གྱི་རིའི་རྩེ་མོ་རྣམས་དང་འབབ་ཆུ་དང་རིན་པོ་ཆེའི་རང་བཞིན་གྱི་འབབ་ཆུ་རྣམས་ལ་བལྟ་བར་སྡུག་པའི་བྱ་རྣམས་ཀྱིས་ཀུན་ནས་སྒྲ་འདོན་པ་དང་།

གཞལ་ཡས་ཁང་གི་རྩེ་མོ་རྣམས་ཀྱང་རིན་པོ་ཆེ་བདུན་གྱི་རང་བཞིན་ལ་ནོར་བུས་ཆ་ཤས་རྣམས་རྣམ་པར་བཀྲ་

བར་བྱས་པ་དང་།

པད་མའི་རྫིང་བུ་རྣམས་ཀྱང་བཻ་ཌཱུརྱ་དང་ཨིན་དྲ་ནཱི་ལ་དང་གསེར་གྱི་རང་བཞིན་རྣམས་ཀྱི་ཆ་ཤས་རྣམ་པ་སྣ་ཚོགས་པ་ལ་གཟུགས་དང་སྒྲ་དང་ཁ་དོག་དང་དབྱིབས་རྣམ་པ་སྣ་ཚོགས་པ་ལ་ལྟ་བར་དགའ་བའི་བུང་བའི་ཚོགས་རྣམས་ཀྱི་སྒྲ་བདེ་བ་སྐྱེད་པ་ཀུན་ཏུ་སྒྲོགས་པ་དང་ལྡན་པ་རྣམས་ལ་མངོན་པར་རྩེ་བར་བྱེད་དོ།

རིག་པ་དང་ལས་རྣམས་ཐམས་ཅད་ཀྱི་བདེ་བ་རབ་ཏུ་འཕེལ་བ་དང་ལྡན་པའི་ནགས་ཚང་ཚིང་རྣམས་དང་གཞན་ཡང་རྡོ་རྗེ་དང་བཻ་ཌཱུརྱ་དང་ཨིན་དྲ་ནཱི་ལ་དང་ཤེལ་གྱི་རང་བཞིན་གྱི་བྲག་རྣམས་ཆ་ཤས་དང་ཆ་ཤས་སུ་ཕྱེ་བའི་འོད་ཟེར་རྣམས་ཀྱིས་རྣམ་པར་བཀྲ་བར་གྱུར་པ་རྣམས་ལ་དགའ་བར་བྱེད་དོ།

འབབ་ཆུ་སྣ་ཚོགས་པའི་སྒྲ་བདེ་བ་སྐྱེ་བར་བྱེད་པའི་སྒྲ་སྙན་པ་དང་ལྡན་པ་རྣམས་ལ་དགའ་བར་བྱེད་དོ།

ཇི་ལྟར་འདོད་པ་བཞིན་དུ་བྱེད་པ་རང་དབང་ཅན་རྣམས་དཔེ་མེད་པར་གྱུར་པའི་ལྷ་རྫས་ཀྱི་འདོད་པ་རྣམས་ལ་སྟེན་པར་བྱེད་དོ།

ལྷའི་བུ་མོའི་ཚོགས་བརྒྱ་སྟོང་ཕྲག་དུ་མ་རྣམས་ཀྱིས་ཡོངས་སུ་བསྐོར་ནས་ཆེས་འཕགས་པར་གྱུར་པའི་བདེ་བ་རྣམས་འཕེལ་བ་དང་ལྡན་པའི་འདོད་པ་རྣམས་ལ་ཉེ་བར་ལོངས་སྤྱོད་པ་ཡིན་ཏེ།

དེ་ཡང་རྣམ་པར་རྟོག་པ་དུ་མ་རྣམས་སུ་དཔེ་མེད་པར་གྱུར་པའི་ལྷ་རྫས་ཀྱི་བདེ་བ་རྣམས་ལ་ལོངས་སྤྱོད་པར་བྱེད་དོ།

རི་དང་རྩེ་མོ་རྣམས་གསེར་གྱི་རང་བཞིན་དང་བཻ་ཌཱུརྱའི་རང་བཞིན་རྣམས་ལ་དེ་དག་ནམ་མཁའ་ལ་ལན་བརྒྱ་ཕྲག་དུ་མར་འགྲོ་བར་བྱེད་པ།

རྣམ་པ་སྣ་ཚོགས་པའི་གཟུགས་དང་ཆ་བྱད་དང་རྒྱན་རྣམས་ཕུན་སུམ་ཚོགས་པ།

སྒྲིན་པོ་རྣམས་ཀྱི་རྒོད་པ་དང་གླུ་དང་གར་གྱིས་ཀུན་ནས་བརྒྱན་པར་གྱུར་པའི་ཞབས་འབྲིང་རྣམས་ཀྱིས་རྣམ་པར་བརྒྱན་ཅིང་རོལ་པའི་གཟུགས་དཔེ་མེད་པ་དང་ལྡན་པའི་ལྷའི་བུ་མོའི་ཚོགས་རྣམས་ཀྱིས་ཡོངས་སུ་བསྐོར་ནས།

ཉེ་འཁོར་ཀུན་ནས་རྩེ་དགའ་བར་གྱུར་པས་རྣམ་པར་རྒྱུ་བར་བྱེད།

རང་གི་འོད་དང་ལྡན་པའི་ལྷའི་བུ་མོ་རྣམས་ཀྱིས་ཡོངས་སུ་བསྐོར་ནས།

དེ་ལྷ་རྫས་ཀྱི་འདོད་པའི་ཡོན་ཏན་གྱི་ཡུལ་ལྔ་ལ་རྣམ་པར་ཆགས་པས།

གཟུགས་གང་དང་གང་ཉིད་མཐོང་བར་གྱུར་པ་དེ་དང་དེ་ཉིད་ཀྱང་རྣམ་པར་རྟོག་པ་དུ་མ་དང་ལྡན་པའི་ལྷ་རྫས་སྙིང་འགུལ་བར་བྱེད་པ་དཔེ་མེད་པའི་བདེ་བ་རྣམས་ལེགས་

པར་སྟོན་པར་བྱེད་པ་མཐོང་ངོ་།

ཇི་ལྟར་འདོད་པ་བཞིན་དུ་སྤྱོད་པར་བྱེད་པ་དེ་ལྟར་མིག་གིས་གཟུགས་རྣམས་མཐོང་བར་འགྱུར་རོ།

དེ་བཞིན་དུ་རྣ་བས་སྒྲ་རྣམས་ཐོས་པར་གྱུར་པ་ཡང་།

ཐོས་ནས་བདེ་བར་འགྱུར་བ་དང་ཇི་ལྟར་འདོད་པ་བཞིན་དུ་རྣམ་པ་དུ་མར་རྣམ་པ་སྣ་ཚོགས་པར་གྱུར་པ་དང་ཀུན་ཏུ་རྟོག་པ་རྣམས་སྐྱེད་པར་བྱེད་པ་དང་མཆོག་ཏུ་གྱུར་པའི་ལྷའི་བུ་མོ་རྣམས་ཀྱིས་ལེགས་པར་བསྐྱེད་པའི་རྒོད་པ་དང་འགྱིང་བག་དང་རྩེད་མོ་རྩེ་བར་བྱེད་པ་རྣམས་སོ།

དེ་བཞིན་དུ་སྣས་ཀྱང་ལྷ་རྫས་ཀྱི་དཔེ་མེད་པ་དང་ལྡན་པའི་དྲི་རྣམས་སྣོམ་པར་བྱེད་དེ།

རྣམ་པར་རྟོག་པ་དུ་མར་དཔེ་མེད་པར་གྱུར་པ་རྣམས་ལ་འདི་ལྟ་སྟེ།

པད་མའི་རྫིང་བུ་རྣམས་ཀྱི་དྲི་ཤིན་ཏུ་ཞིམ་པར་གྱུར་པའི་དྲི་རྣམས་མངོན་པར་འདོད་པའི་རླུང་གིས་ལེགས་པར་བཏབ་པ་རྣམས་ལ་དང་།

དྲི་གཞན་ཡང་དེ་ཁོ་ན་བཞིན་དུ་དྲི་ཤིན་ཏུ་ཞིམ་པ་དཔེ་མེད་པར་གྱུར་པའི་ལྷ་རྫས་རྣམ་པ་དུ་མ་རྣམས་མངོན་པར་འདོད་པའི་རླུང་གིས་རི་དང་སྨན་ལྗོངས་རྣམས་དང་བང་རིམ་རྣམས་དང་།

རི་ཁྲོད་རྣམས་དང་ནགས་ཀྱི་ནང་རྣམས་ནས་བཏབ་པར་གྱུར་པའི་ཤིན་ཏུ་དྲི་ཞིམ་པ་དང་ལྡན་པའི་མེ་ཏོག་དུ་མ་དྲི་བླ་ལྷག་པར་གྱུར་པ་རྣམས་སྣོམ་པར་བྱེད་དོ།

དེ་བཞིན་དུ་ལྕེས་ཀྱང་རོ་རྣམས་མྱོང་བར་བྱེད་དོ།

དེ་ནི་འདོད་པའི་བདེ་བ་རྣམས་ཐམས་ཅད་ཕུན་སུམ་ཚོགས་པ་ཡིན་ཏེ།

ལྷ་རྫས་ཀྱི་རོ་རྣམ་པ་དུ་མར་གྱུར་པ་སྐྱུར་བ་དང་།

ལན་ཚྭ་དང་།

ཚ་བ་དང་།

ཁ་བ་དང་།

བསྐ་བ་དང་།

རྩུབ་པ་རྣམས་དང་།

རྣམ་པ་དུ་མ་རྣམས་དང་།

དཔེ་མེད་པར་གྱུར་པ་རྣམས་དང་།

རྫས་དུ་མ་རྣམས་ལས་སྐྱེས་པ་དང་ཇི་ལྟ་བ་ཉིད་དུ་ཇི་ལྟར་འདོད་པའི་དུས་སུ་མཁོ་བ་རྣམས་དེ་དག་གིས་ཟ་བར་བྱེད་དོ།

དེ་ལྟར་ལྕེས་རོ་རྣམས་མྱོང་བར་བྱེད་དོ།

དེ་བཞིན་དུ་ལུས་ཀྱིས་ཀྱང་རེག་བྱ་རྣམ་པ་དུ་མ་རྣམས་ལ་རེག་པར་བྱེད་པ་ནི།

བདེ་བའི་རེག་པར་བྱ་བ་བརྒྱད་དང་ལྡན་པར་གྱུར་པ་རྣམས་ལ་བསིལ་བར་གྱུར་པ་དང་།

དྲོ་བ་དང་དྲོ་བར་གྱུར་པ་དང་བསིལ་བའི་རེག་བྱ་རྣམས་དང་ལྡན་པ་དང་དེ་བཞིན་དུ་འཇམ་པ་དང་ཕྲ་བ་དང་།

ཚགས་དམ་པ་དང་མ་བཏགས་པ་དང་རྣམས་ཏེ་ཁ་དོག་དུ་མ་དང་ལྡན་པའི་གོས་རྣམས་སོ།

དེ་བཞིན་དུ་མཐོ་རིས་

ཀྱི་རྗེས་སུ་འཐུན་པའི་རྒྱན་གྱི་རྣམ་པ་རྣམས་ཀྱང་སྟེ།

རིན་པོ་ཆེ་དུ་མའི་འོད་ཟེར་སྣང་བ་བྱེད་པ་དང་ལྡན་པ་རྣམས་ལ་དཔག་ཚད་བཅུ་དང་ཉི་ཤུ་དང་སུམ་ཅུ་དང་བཞི་བཅུ་དང་ལྔ་བཅུ་དང་དྲུག་ཅུ་དང་དེ་བཞིན་དུ།

དཔག་ཚད་བརྒྱའི་བར་དུ་འོད་དང་ལྡན་པའི་ནོར་བུ་རྣམས་ཀྱི་རེག་བྱ་རྣམས་ཀྱང་ཉེ་བར་ལོངས་སྤྱོད་པར་བྱེད་དོ།

དེ་བཞིན་དུ་རྒྱན་གྱི་རྣམ་པར་གྱུར་པའི་མེ་ཏོག་བདེ་བའི་རེག་བྱ་དང་དྲི་དང་ལེགས་པར་འབྲེལ་པས་བསྒོས་པར་གྱུར་པ་རྣམ་པ་སྣ་ཚོགས་པ་རྣམས་ལྷ་རྫས་ཀྱི་ནགས་ཀྱི་གསེབ་ནས་རླུང་གིས་བདས་པའི་བདེ་བའི་རེག་བྱ་དང་ལྡན་པ་རྣམས་ཀྱི་རེག་བྱ་ལ་རྗེས་སུ་ལོངས་སྤྱོད་པར་བྱེད་པ་སྟེ།

ལུས་ཀྱི་ལེགས་པར་བྱས་པའི་ལས་ཀྱི་མཐའ་རྣམས་ལ་སྤྱད་པར་གྱུར་པ།

རང་གིས་ལེགས་པར་བྱས་པའི་ལས་རྣམས་ཀྱིས་འདོད་པ་སྡུག་པ་ཡིད་དུ་འོང་བ་འཕགས་པ་དགྱེས་པ་ཡིན་གྱི།

མ་བྱས་པ་རྣམས་ཀུན་ཏུ་འོང་བར་འགྱུར་བ་ནི་མ་ཡིན་ནོ།

འདོད་རྒྱལ་བ་རྣམས་ནི་མ་ཡིན་ནོ།

བྱས་པ་ཆུད་ཟ་བར་འགྱུར་བ་ནི་མ་ཡིན་ནོ།

རྒྱུ་མེད་པ་ནི་མ་ཡིན་ནོ།

གཞན་བག་མེད་པ་རྣམས་ཀྱིས་བྱས་པ་ནི་མ་ཡིན་ནོ།

ལས་དང་འབྲས་བུ་རྣམས་དང་ཆ་མི་འདྲ་བར་གྱུར་པའི་རྒྱུ་རྐྱེན་རྣམས་ཀུན་ཏུ་ཚོགས་པ་ནི་མ་ཡིན་ནོ།

འདི་དག་ནི་འབྲས་བུ་དང་བཅས་པར་སྨིན་པར་ལེགས་པར་མཐོང་བ་རྣམས་དང་ཆ་འདྲ་བའི་ལས་རྣམས་ཀྱི་འབྲས་བུ་ལ་ཉེ་བར་ལོངས་སྤྱོད་པ་ཡིན་ནོ།

ཚུལ་ཁྲིམས་ལ་སྤྱོད་པར་གྱུར་པ་དེ་དེ་བཞིན་དུ་ཡིད་ཀྱིས་ཀྱང་གང་འདོད་པའི་འདོད་པ་རྣམས་ལ་སྟེ།

འདོད་པའི་ཡིད་དུ་འོང་བའི་ལྷ་རྫས་ཀྱི་གཟུགས་མང་ཞིང་རྒྱ་ཆེན་པོར་གྱུར་པ་རྣམས་དང་།

ཕྲ་བ་རྣམས་དང་བར་མ་རྣམས་དང་ཀུན་ནས་འཕེལ་བར་འགྱུར་བའི་དུས་སུ་བྱུང་བ་རྣམས་དང་།

དེ་བཞིན་དུ་མར་འབྲི་བའི་དུས་སུ་དང་བར་མའི་དུས་སུ་ཐོབ་པ་རྣམས་ལོངས་སྤྱོད་པར་བྱེད་པ་ན།

དེ་ལྟར་ཡང་སེམས་བསྐྱེད་པ་ཉིད་ཀྱིས་མངོན་པར་འདོད་པར་གྱུར་པའི་ཉེ་བར་ལོངས་སྤྱད་པར་བྱ་བ་རྣམ་པ་དུ་མའི་བདེ་བའི་ཆོས་རྣམས་ལ་མངོན་པར་འཚལ་བས་ཉེ་བར་ལོངས་སྤྱོད་པར་བྱེད་དོ།

ཚུལ་ཁྲིམས་ལ་སྤྱད་པའི་སྐྱེས་བུ་དེ་དག་རྣམས་དེ་ལྟར་ཁྱད་པར་དུ་ཡང་ལྷ་རྣམས་ནི་ཡུལ་དྲུག་གི་མེ་ལ་རྣམ་པར་

ཆགས་པར་གྱུར་ཅིང་།

འདོད་པའི་ཆུ་བོ་རྣམས་ཀྱིས་ཁྱེར་བར་གྱུར་པས་དེ་དག་ནགས་ནས་ནགས་རྣམས་དང་རིའི་རྩེ་མོ་ནས་རིའི་རྩེ་མོ་རྣམས་ལྷ་རྫས་ཀྱི་རིན་པོ་ཆེའི་ཁམས་རྣམས་ཀྱི་འབྱུང་ཁུངས་དང་ལྡན་པ་རྣམས་ནས་རིན་པོ་ཆེའི་ཁམས་རྣམས་ཀྱི་འབྱུང་ཁུངས་དང་ལྡན་པ་རྣམས་སུ་ཀུན་ཏུ་ཉེ་བར་འགྲོ་བར་བྱེད་ཅིང་།

ནགས་དང་ཉེ་བའི་ནགས་ཀྱི་ཚལ་རྣམས་དང་།

འབབ་ཆུའི་སྒྲ་རྣམས་ཀུན་ནས་ལེགས་པར་གྲག་པ་དང་ཁ་དོག་དང་དབྱིབས་དང་རིགས་དང་།

སྡེ་ཚན་མི་འདྲ་བ་བརྒྱ་ཕྲག་གི་བྱ་རྣམས་ཀྱི་སྒྲ་སྙན་པར་འབྱིན་པས་ཡིད་དགའ་བར་གྱུར་པ་རྣ་བ་དག་ལ་གཏད་པས་དབྱངས་ཀྱིས་ཀུན་ནས་འཁྲིད་པ་དང་རྒྱན་དང་ལེགས་པར་ལྡན་པའི་དགའ་བས་ཡིད་འཕྲོག་པར་གྱུར་པ་རྣམས་དེ་ལྟར་དེ་ལེགས་པར་བྱས་པའི་ལས་ཀྱི་མཐའ་ལ་སྤྱད་པ་རྣམས་དེ་ལེགས་པར་ཉེ་བར་འགྲོའོ།

མང་པོ་རྣམས་ཉིད་ཀྱང་གཟུགས་དང་ཆ་བྱད་དང་།

རྒྱན་དང་ལེགས་པར་གནས་པ་རྣམས་ཀྱི་ཡོན་ཏན་དུ་མ་རྣམས་དང་ལྡན་པའི་ཆ་བྱད་ཅན་རྣམས་བསྒྲིན་པ་དང་།

འགྱིང་བས་འདོད་པའི་མེ་རྣམས་ལེགས་པར་སྐྱེད་པར་བྱེད་པ་རྣམས་ཀྱིས་ཡོངས་སུ་བསྐོར་ནས་གནས་རྣམ་པ་དུ་མ་རྣམས་ཉེ་བར་སྟོན་པར་བྱེད་དོ།

ལྷ་རྫས་ཀྱི་ཕྲེང་བ་མཆོག་རྣམས་ཀྱིས་བརྒྱན་པ་དང་།

མེ་ཏོག་གི་ཕྲེང་བ་དང་ཕྱེ་མ་དང་བྱུག་པ་རྣམས་ཀྱིས་རྣམ་པར་བརྒྱན་པས་གསེར་གྱི་རང་བཞིན་དང་བཻ་ཌཱུརྱ་དང་གསེར་འབར་བའི་རང་བཞིན་གྱི་རྩེ་མོ་རྣམས་ལ་སྟེན་པར་བྱེད་དོ།

སེམས་བསྐྱེད་པ་དང་ལྷན་ཅིག་ཉིད་དུ་འདོད་པ་དུ་མ་རྣམས་ཉེ་བར་བསྟེན་ནས།

ལྷན་ཅིག་སྤྱོད་པ་རྣམས་དང་བཅས་པས།

གལ་ཏེ་ཤེད་ན་ཉེ་བའི་ནགས་གཞན་རྣམས་ཉེ་བར་སྟེན་པར་བྱེད་དོ།

མཉམ་པ་དང་མི་མཉམ་པའི་སའི་ཆ་ཤས་རྣམས་དགའ་བར་གྱུར་པའི་གསེར་དང་བཻ་ཌཱུརྱའི་རང་བཞིན་དང་གསེར་བཟང་པོའི་རང་བཞིན་དང་དངུལ་དང་ཨིན་དྲ་ནཱི་ལ་དང་མུ་ས་རའི་རང་བཞིན་རྣམས་ལ་དྲིལ་བུ་གཡེར་ཀ་སྒྲ་སྒྲོགས་པའི་དྲ་བའི་སྐད་ཕུན་སུམ་ཚོགས་པས་རྣམ་པར་བརྒྱན་པའི་སྒྲ་རྣམས་དང་།

བྱའི་ཚོགས་རྣམ་པ་སྣ་ཚོགས་པ་རྣམས་ཀྱིས་རྣམ་པར་བརྒྱན་པ་རྣམས་ལ།

ལན་བརྒྱ་ཕྲག་རྣམས་སུ་

རྣམ་པར་རྒྱུ་བར་བྱེད་པ་གང་གི་ཚེ།

བག་མེད་པས་བག་མེད་པར་རྣམ་པར་སྤྱོད་པར་བྱེད་པ་དེའི་ཚེ།

དེ་དག་རྣམས་མངོན་པར་ཀུན་ཏུ་མཐོང་ནས་བག་ཡོད་པ་ཞེས་བྱ་བའི་བྱས་རྗེས་སུ་འདོམས་པར་བྱེད་པའི་ཚིགས་སུ་བཅད་པ་འཆད་པ་ཇི་ལྟར།

གསར་པའི་ལས་ཀྱང་ཟད་འགྱུར་ལ།

རྙིངས་པ་ཡོངས་སུ་སྤྱོད་པ་ཡིན།

དེ་ཟད་པས་ནི་རྟག་ཏུ་ལྟུང་།

མཐོ་རིས་ལྷ་ཡི་ཆོས་འདི་དག །

རྟག་ཏུ་ལས་ཀྱིས་ལྷུང་བ་ཡིན།

དེ་བཞིན་འཚོ་བ་སྐད་ཅིག་སྟེ།

འཆི་བདག་མྱུར་བར་འོང་བ་ཡང་།

བྱིས་པ་རྣམས་ཀྱིས་རིག་པའང་མིན།

ཁྱོད་ཀྱིས་འདི་མིན་འདིའི་ཡང་ཁྱོད།

མིན་ཡང་ཆགས་པས་མ་ཤེས་སོ།

དུས་འགྲོ་རྟག་པར་ཤིན་ཏུ་མྱུར།

ལྟུང་འགྱུར་དེ་ཡང་ཉེ་བར་འོང་།

ཐོབ་པ་དང་ནི་འཇིག་པའི་རྒྱུ།

ཡུལ་དུ་མ་ལ་ཆགས་པ་ཡིན།

གནོད་དང་བཅས་པ་དེ་ལ་ཁྱོད།

བློ་ངན་རྟག་ཏུ་ཅི་སྟེ་འགྲོ།

གང་ཕྱིར་ལེགས་པར་བྱས་པའི་ལས།

དེ་ལྟར་ཁྱོད་ཀྱིས་བདེ་ལོངས་སྤྱད།

ཡང་ནི་ཅི་ཕྱིར་ལེགས་བྱས་པའི།

ལས་རྣམས་དག་ནི་ཅིས་མི་བྱེད།

ཡུལ་རྣམས་ལ་ནི་གང་ཆགས་པ།

དེ་ནི་སྲིད་པའི་རྒྱ་མཚོར་ནུབ།

གང་ཡང་དེ་ལས་རྣམ་གྲོལ་བ།

དེ་ནི་སྡུག་བསྔལ་མཚོ་ལས་གྲོལ།

ཡུལ་གྱི་རླབས་ཀྱི་ཤུགས་པོ་ཆེ།

སྲིད་པའི་ཆུ་ཀླུང་ལས་ཀུན་བྱུང་།

མྱང་འདས་གྲོང་ཁྱེར་འགྲོ་བ་ཡིན།

དཔའ་བོས་དེ་ནི་སྤང་བར་གྱིས།

བརྟན་པ་དེ་ཉིད་ཚོལ་རྣམས་ཀྱིས།

ཡུལ་རྣམས་ངེས་པར་བཟློག་པར་གྱིས།

དེས་བསྐྱེད་ཡུལ་གྱི་སྲེད་པ་རྣམས།

སྲིད་པ་གསུམ་དུ་འཇུག་ཅིང་འགྲོ།

ཡུལ་རྣམས་ངེས་པར་བཟློག་པར་གྱིས།

བདག་ཅག་དེ་ཡིད་བྱས་ལ་རེ།

ཀིམ་པ་ཀ་དང་འདྲ་བ་དང་།

ཕྱི་ནས་རྣམ་སྨིན་རྩུབ་པ་ཡིན།

མི་སེམས་བདེ་ལ་ཀུན་ཏུ་ཆགས།

ཡུལ་རྣམས་ལ་ནི་རྒྱུག་པར་བྱེད།

དེས་ནི་མི་དགེའི་ལས་རྣམས་སོག །

བློ་གྲོས་ངན་པས་གང་རྒྱུག་པའི།

གཡོ་བ་མི་བཟད་རྩུབ་པ་ལས།

དེ་ཕྱིར་སེམས་ནི་རྟག་ཏུ་སྲུངས།

རྟག་ཏུ་ཡུལ་ལ་ཀུན་ཆགས་པ།

སྲིད་པའི་ཡུལ་གྱིས་གཡོགས་པ་ཡི།

ཡུལ་རྣམས་ལ་ནི་རྒྱུག་བྱེད་པ།

བྲེལ་ཕོངས་དེ་དག་མ་གོའོ།

ཕྱི་ནས་བྲེལ་ཕོངས་ཐོབ་པས་ཀྱང་།

ལས་ཀྱི་འབྲས་བུ་རིག་པར་གྱུར།

ཤེས་ནས་ཀྱང་ནི་ལས་འདི་དང་།

རྟག་ཏུ་ཡུལ་རྣམས་སྐྱོན་དེ་དང་།

འགྲོ་བ་མ་ལུས་བཅིངས་གྱུར་པའི།

སྐྱོན་གཞན་ཡང་ནི་རྟག་ཏུ་སྤོངས།

དེ་ལྟར་བག་ཡོད་པར་གྱུར་པའི་བྱ་དེས་བག་མེད་པས་བག་མེད་པར་རྣམ་པར་རྒྱུ་བའི་ལྷ་དེ་དག་རྣམས་ལ་ལེགས་པར་སྒྲོགས་སོ།

དེ་གཏན་ཚིགས་ཀྱིས་བརྗོད་ཀྱང་དེ་དག་རྣམས་ཀུན་ནས་རྟོགས་པ་ཡང་མ་ཡིན་ཏེ།

ཡུལ་ལ་ཀུན་ཏུ་འཆུམས་པར་གྱུར་པས་དེས་དེ་དག་ལ་བརྩི་བགྲང་མེད་པར་སླར་ཡང་དེ་ཁོ་ན་བཞིན་དུ་ཡུལ་རྣམས་ལ་རྣམ་པར་ཆགས་པར་གྱུར་པའི་བློས་འཁོར་བའི་དགོན་པ་ལྟ་བུར་གྱུར་པ་དང་།

ཤིན་ཏུ་སྡུག་བསྔལ་སྐྱེད་པར་བྱེད་པའི་རྒྱུར་བྱེད་པ་དེ་ལྟར་སེམས་དང་འགྲོ་བ་དང་རབ་ཏུ་སྤྱོད་པར་བྱེད་པ།

རྟག་ཏུ་ཡང་ཡུལ་གྱི་གནས་སྐབས་རྣམས་ལ་འགྲོས་བྱེད་པར་མཚུངས་པའི་གནས་སྐབས་རྣམས་སུ་རྗེས་སུ་ཆགས་པར་བྱེད་པ་གནས་པ་མེད་པའི་འགྲོས་དང་།

རབ་ཏུ་རྒྱུ་བས་ཀུན་ཏུ་གནས་པར་བྱེད་པ།

རྟག་ཏུ་ཡང་སྐྱེས་པ་གཅིག་ཅིག་ཚོལ་བ་ལ་ཞུགས་པ་དག་དང་།

མཚོན་ཆ་དང་མེ་དང་གཡང་ས་རྣམས་དང་།

ཡིད་མཚུངས་པ་མི་རྣམས་ཐམས་ཅད་སྲེག་པར་བྱེད་པའི་ནགས་ཀྱི་མེར་གྱུར་པ་སྡུག་བསྔལ་རྣམས་ཐམས་ཅད་ཀྱི་རྒྱུ་མཚན་དུ་གྱུར་པའི་ལྷའི་བུ་མོ་དེ་དག་རྣམས་ཉིད་དང་དེ་ལྷན་ཅིག་ཏུ་རྩེ་དགའ་བར་བྱེད་དོ།

གང་ཞིག་བདེ་བ་རྣམས་ཐམས་ཅད་འདོད་པ་དང་བློ་དང་ལྡན་པ་དང་བདེ་བ་རྣམས་རྗེས་སུ་ཚོལ་བར་བྱེད་པ་དང་འཁོར་བའི་འཇིགས་པ་རྣམས་ཀྱིས་འཇིགས་པ་རྣམས་ནི་འདི་དག་རྣམས་ཀྱི་དྲུང་ན་གནས་པ་ནི་འཇིགས་པ་ཡིན་པར་བྱའོ།

ཐམས་ཅད་ཀྱིས་ཀྱང་བརྩོན་པར་བྲོས་པར་བྱའོ།

དེ་དག་ཉིད་ལ་ཀུན་ཏུ་རྨོངས་པའི་ཡིད་ཅན་རྣམས་འདོད་ཆགས་ཀྱིས་དམུས་ལོང་དུ་བྱས་པའི་ཡིད་ཅན་རྣམས་ནི་དེ་དག་རྣམས་ཀྱི་མཐུ་སྟོབས་ལས་བྱུང་བའི་སྡུག་བསྔལ་རྣམས་ཤེས་ཀྱང་དེ་དག་རྣམས་ཉིད་དང་ལྷན་ཅིག་ཏུ་དགའ་བར་བྱེད་དོ།

བྱིས་པ་རྣམས་ཐམས་ཅད་ནི་འཁོར་བའི་འདམ་རྫབ་ཏུ་གྱུར་པའི་མཚན་ཉིད་ཀྱིས་ལོང་བ་འདོད་ཆགས་ཞེ་སྡང་གཏི་མུག་རྣམས་ཀྱིས་

ལོང་བར་གྱུར་པའི་འཆི་བདག་རྣམས་ཐམས་ཅད་དང་རྩེ་དགའོ།

དེ་ལྟར་དེ་དག་རྣམས་དང་དེ་ཡང་ལྷན་ཅིག་ཏུ་སྤྱོད་པར་བྱེད་པ་ལ་ཡང་དེ་བཞིན་དུ་ཡང་མི་རྩིའོ།

གང་རྣམ་པ་དུ་མས་ཕན་པར་གྱུར་པ་དེ་ཁོ་ན་ཉིད་དང་།

ངན་སོང་ལས་ཟློག་པར་བྱེད་པའི་ཚིག་ཡིན་ཡང་དེ་ཁོ་ན་བཞིན་དུ་དེའི་སེམས་ཡོངས་སུ་བསླུས་པས།

དེ་ཁོ་ན་ཉིད་དེ་མངོན་པར་མ་ཤེས་པས་ནགས་དང་ཉེ་བའི་ནགས་དེ་དག་རྣམས་སུ་དགའོ།

སྲེད་པའི་ཞགས་པ་ལེགས་པར་བསྐྱེད་པ་དེ་དག་རྣམས་ཉིད་དང་ལྷན་ཅིག་ཏུ་སྟེ།

འཕགས་པ་མ་ཡིན་པ་རྣམས་དང་ལྷན་ཅིག་ཏུ་དགའ་བར་བྱེད་དོ།

དེ་གསེར་དང་བཻ་ཌཱུརྱ་དང་ཨིན་དྲ་ནཱི་ལ་དང་ནཱི་ལ་ཆེན་པོ་དང་མུ་ས་ར་གལྦ་ལ་སོགས་པའི་རིན་པོ་ཆེ་རྣམས་ཀྱིས་ཡོངས་སུ་གང་བ་རྣམས་ལེགས་པར་རྣམ་པར་ཕྱེ་བའི་ས་གཞིའི་ཆ་ཤས་རྣམ་པ་དུ་མ་རྣམས་ཀུན་ལ་རྣམ་པར་རྒྱུ་བར་གྱུར་པ་ན།

བརྒྱ་ལ་ཞིག་ན་ཆེན་པོར་གྱུར་པའི་སྐད་ཀྱི་གདངས་ཐོས་ན་བདེ་ཞིང་ཡིད་དགའ་བར་བྱེད་པ།

ལྷ་རྫས་ཀྱི་ཡོན་ཏན་རྣམས་དང་ལྡན་པ་ཐོས་པར་འགྱུར་རོ།

དེས་ཐོས་ནས་འདི་སྙམ་དུ་སེམས་ཏེ།

སྒྲ་འདི་དག་གང་གི་ཡིན་སྙམ་ནས།

དེ་ངོ་མཚར་བར་གྱུར་པའི་ཡིད་ཀྱིས་ལྷན་ཅིག་རྗེས་སུ་སྤྱོད་པའི་འཁོར་དང་བཅས་ནས་གང་ན་སྒྲ་འདི་ཡོད་པ་དེར་ལེགས་པར་ཉེ་བར་འགྲོའོ།

དེ་ནས་འགྲོ་བར་བྱེད་པ་ཉིད་ན་གང་ན་ཤིན་ཏུ་ངར་ཆེ་བར་གྱུར་པ་ཡི་གེ་རྣམས་གསལ་བར་གྱུར་པ་གླུའི་སྒྲ་དེ་དང་དེ་དག་རྣམས་ཉིད་ཤིན་ཏུ་སྙན་པའི་མཆོག་ཏུ་ཕྱིན་པ་ཡན་ལག་ལྔ་དང་ལྡན་པའི་རྔ་སྒྲ་རྣམས་ཀྱིས་ཕུན་སུམ་ཚོགས་པ་དེ་དག་རྣམས་ནི་ཤིན་ཏུ་བར་ཡང་ཡོན་ཏན་རྣམས་ཕུན་སུམ་ཚོགས་པ་དཔེ་མེད་པར་གྱུར་པའི་སྔར་ཐོས་མ་མྱོང་བའི་སྒྲ་འདི་དག་དེ་དག་ཏུ་ཐོས་པར་གྱུར་ཏོ།

ལྷ་གསར་དུ་སྐྱེས་པ་དེ་ལྷན་ཅིག་སྤྱོད་པ་རྣམས་དང་བཅས་ནས་ནགས་དེར་ཉེ་བར་རྒྱུག་སྟེ།

རིན་པོ་ཆེའི་རང་བཞིན་གྱི་ཤིང་རྣམ་པ་དུ་མ་རྣམས་ཕུན་སུམ་ཚོགས་པ།

དགའ་བ་ཆེན་པོའི་ནགས་ཚལ་ཞེས་བྱ་བ་རྒྱ་ཁྱོན་དུ་དཔག་ཚད་བརྒྱ་པ་ཞེང་དུ་དཔག་ཚད་ཉི་ཤུ་པ་ནགས་དེ་ན་ནི་ནགས་ཆེན་པོར་གྱུར་པས།

ཤིང་རྣམས་ཕུན་སུམ་ཚོགས་པ་ཡོན་ཏན་ཆེན་པོ་དང་ལྡན་པ་བརྒྱ་ཕྲག་དུ་མ་རྣམས་དང་སྟོང་ཕྲག་དུ་མ་རྣམས་ཀྱི་

ལྷའི་ཚོགས་རྣམས་གནས་པ་ཡང་གླུ་ལེན་པར་བྱེད་པ་དང་།

རྩེ་དགའ་བར་བྱེད་པ་དང་གར་ཡང་བྱེད་དོ།

དེ་ནས་ལྷ་གསར་དུ་སྐྱེས་པ་དེས་ནགས་དེ་མཐོང་བར་གྱུར་ནས་ཞུགས་པར་གྱུར་པ་དང་།

ནགས་རྣམས་ཐམས་ཅད་གསེར་གྱི་རང་བཞིན་གྱི་ཤིང་བཻ་ཌཱུརྱའི་རང་བཞིན་གྱི་ལོ་མ་ལྷའི་རྫས་ལས་རབ་ཏུ་བྱུང་བ་དྲི་དང་མེ་ཏོག་རྣམས་སོ།

དེ་དག་དང་འདྲ་བའི་ཡོན་ཏན་གྱི་ཕྲེང་བ་རྣམས་དང་།

མདོག་དང་དབྱིབས་རྣམ་པ་དུ་མར་གྱུར་པ་དེ་དག་རྣམས་དེས་ཡང་དག་པར་མཐོང་ནས་གཞན་ཡང་གཞན་རྣམས་ལ་ལྟ་བར་བྱེད་དེ།

ཤིང་བཻ་ཌཱུརྱའི་རང་བཞིན་ལ་ཨིན་དྲ་ནཱི་ལའི་ཡལ་ག་རྣམས་དང་།

གསེར་གྱི་རང་བཞིན་གྱི་འདབ་མ་རྣམས་དང་།

དངུལ་གྱི་ཁ་དོག་གི་འབྲས་བུ་རབ་ཏུ་སྨིན་པར་གྱུར་པ་རྣམས་ལྷ་རྫས་ཀྱི་རོའི་ཡོན་ཏན་རྣམས་ཕུན་སུམ་ཚོགས་པའོ།

ཨིན་དྲ་ནཱི་ལའི་མདོག་གི་ཡལ་ག་རྣམས་ཀྱིས་མངོན་པར་བསྐོར་བ་ལ་རྣམ་པ་སྣ་ཚོགས་པའི་ཁ་དོག་དང་ལྡན་པའི་མེ་ཏོག་རྣམས་ཀྱིས་མངོན་པར་བསྐོར་བ་རྣམས་དང་།

ཤིང་གཞན་དག་རྣམས་ཀྱང་མཐོང་བ་ལ་འདི་ལྟ་སྟེ།

ཨིན་དྲ་ནཱི་ལའི་རྩ་བ་གསེར་གྱི་མདོག་གི་ཡལ་ག་བཻ་ཌཱུརྱའི་རང་བཞིན་གྱི་འདབ་མ་དང་ལྡན་པ་རྣམས་ལ་མདོག་དང་དབྱིབས་རྣམ་པ་དུ་མ་རྣམས་དང་ལྡན་པའི་བུང་བའི་ཚོགས་རྣམས་ཀྱིས་ཉེ་བར་མཛེས་པར་གྱུར་པ།

ཤིན་ཏུ་སྙན་པའི་སྒྲ་རྣམས་ཀྱིས་མིག་དང་ཡིད་འཕྲོག་པར་བྱེད་པ་རྣམས་སོ།

དེ་བཞིན་དུ་ལྷ་གསར་དུ་སྐྱེས་པ་དེས་གཞན་དག་རྣམས་ཀྱང་མཐོང་བ་ལ་ལྷ་རྫས་ཀྱི་མེ་ཏོག་ཁ་ཕྱེ་བ་དང་མིག་ཟུམ་པ་རྣམས་ཀྱང་མཐོང་ན་དགའ་བར་འགྱུར་བའི་རིན་པོ་ཆེ་བདུན་གྱི་རང་བཞིན་རྣམ་པར་འདྲེས་པའི་ཆ་ཤས་རབ་ཏུ་རྣམ་པར་ཕྱེ་བ་མཆོག་ཏུ་ངོ་མཚར་བར་གྱུར་པ།

སྒྲའི་རྣམ་པ་ཐོས་པར་དགའ་བ་རྣམས་ཀྱིས་ཡིད་མངོན་པར་དགའ་བར་བྱེད་པ་རྣམས་སོ།

དེ་བཞིན་དུ་གཞན་དག་འཁྲི་ཤིང་གི་ཁང་པ་རྣམས་གསེར་གྱི་འཁྲི་ཤིང་རྣམས་ཀྱི་ལོ་མ་འགུལ་བ་རྣམས་ལ་འདབ་མ་རྣམས་ལེགས་པར་ཁྱབ་པར་གྱུར་པ་བུང་བའི་ཚོགས་ཀྱི་ཁྱད་པར་བརྒྱ་སྟོང་རྣམས་ཀྱི་སྒྲའི་བྱེ་བྲག་སྙན་པར་དགའ་བ་རྣམས་མཐོང་ངོ་།

དེ་བཞིན་དུ་འཁྲི་ཤིང་གི་ཁང་པ་གཞན་དག་ཀྱང་བཻ་ཌཱུརྱའི་རང་བཞིན་གྱི་

ཡལ་ག་རྣམས་ཀྱིས་རྣམ་པར་བརྒྱན་པ།

ཨིན་དྲ་ནཱི་ལ་ཆེན་པོའི་འདབ་མ་རྣམས་ཀྱིས་ལེགས་པར་གཡོགས་པ་རབ་ཀྱི་མཆོག་གི་ནོར་བུ་མདོག་རྣམ་པར་བཀྲ་བ་རྣམས་ཀྱིས་བརྒྱན་པ་ལ་བྱ་རྣམས་ཀྱིས་ཀུན་དུ་སྟེན་པར་བྱེད་པ་རྣམས་ནགས་དེ་འཇམ་པ་མནན་ན་ནེམ་ལ་བཏེག་ན་འཕར་བའི་ས་གཞིའི་ཆ་ཤས་ལེགས་པར་ཕྱེ་བ་རྣམས་དང་།

ལྷ་རྫས་ཀྱི་དྲི་རྣམས་ཀྱིས་བསྒོས་པ་ལྷའི་བུ་མོའི་ཚོགས་རྣམས་དང་བཅས་པ་མཐོང་བར་གྱུར་ཏོ།

དེ་བཞིན་དུ་གནས་གཞན་དག་རྣམས་ཀྱང་མཐོང་བར་གྱུར་པ་ལ་ལྷ་གསར་དུ་སྐྱེས་པ་དེས།

གང་འགའ་ཞིག་སྔར་མ་མཐོང་བ་སའི་རྣམ་པའི་ཆ་ཀུན་ཡང་ཡོངས་སུ་ཚོགས་པ་བཞིན་དུ་ལྷ་རྫས་ཀྱི་ཁ་དོག་གི་རིན་པོ་ཆེ་བདུན་གྱི་རང་བཞིན་རྣམས་ཀྱིས་ལེགས་པར་རྣམ་པར་གཡོགས་པ།

ཤིན་ཏུ་དགའ་བ་དང་ལེགས་པར་མཉམ་པའི་ས་ཕྱོགས་ཀྱི་ཆ་མཆོག་ཏུ་དགའ་བ་རྣམས་ཕྱི་བཞིན་རྗེས་སུ་འབྲང་བའི་འཁོར་དང་བཅས་པ་རྣམས་མཆོག་ཏུ་ངོ་མཚར་བས་རྣམ་པར་གཡེངས་པའི་མིག་གིས་མཐོང་བར་འགྱུར་རོ།

ནགས་དེར་ལྷ་དེས་གང་དག་ཁོ་ན་མཐོང་བར་གྱུར་པ་དེ་དག་ཁོ་ན་འདོད་པ་སྡུག་པ་ཡིད་དུ་འོང་བ་མཐོང་བར་འགྱུར་རོ།

གང་དག་ཁོ་ན་ཐོས་པ་དེ་དག་ཉིད་འདོད་པ་སྡུག་པ་ཡིད་དུ་འོང་བ་ཡིད་མངོན་པར་དགའ་བ་རྣམས་ཐོས་པར་འགྱུར་རོ།

དེས་གང་དང་གང་ཉིད་སྣོམ་པར་བྱེད་པ་ན་དེ་དང་དེ་ཉིད་འདོད་པ་དགའ་བ་ཡིད་དུ་འོང་བ་རྣམས་སྣོམ་པར་བྱེད་དོ།

རྣམ་པ་དུ་མ་དེ་དག་རྣམས་ལས་དེས་གང་ཁོ་ན་སེམས་པར་བྱེད་པ་དེ་དག་ཉིད་འདོད་པ་དགའ་བ་ཡིད་དུ་འོང་བ་རྣམས་མྱོང་བར་བྱེད་པ་ཡིན་ནོ།

རབ་ཀྱི་ཕུལ་གྱི་ལྷ་རྫས་ཀྱི་རོའི་རོ་གཅིག་ཕུན་སུམ་ཚོགས་པ་ལས་ཀྱང་།

དེ་གང་ཁོ་ན་ཉན་པར་བྱེད་པ་དེ་དང་དེ་ཉིད་རྣམ་པ་དུ་མར་དགའ་བ་ཡིད་དུ་འོང་བ་རྣམས་ཐོས་པར་འགྱུར་རོ།

དེ་གང་དང་གང་ལ་རེག་པར་བྱེད་པའམ།

གང་དང་གང་ཉིད་སེམས་པར་བྱེད་པ་དེ་དང་དེ་ཉིད་འདོད་པ་དགའ་བ་ཡིད་དུ་འོང་བ་རྣམས་འདིའི་སེམས་བསྐྱེད་པ་དང་དུས་གཅིག་ཁོ་ནར་འདི་ལ་ཕུན་སུམ་ཚོགས་པར་འགྱུར་རོ།

དེ་ལྟར་འདི་འདོད་པ་རྣམས་ཐམས་ཅད་ཀྱི་འཆིང་བས་བཅིངས་ནས་རབ་ཏུ་རྒྱ་ཆེ་བའི་བདེ་བ་

དང་ལྡན་པ་ནི།

དེ་ལ་ཕྱི་བཞིན་རྗེས་སུ་འགྲོ་བའི་འཁོར་རྣམས་དང་བཅས་ནས་རྣམ་པ་དུ་མ་དང་།

རྣམ་པར་རྟོག་པ་དུ་མའི་སའི་ཆ་རྣམས་ལ་ལྷ་ཡུལ་གྱི་བྱའི་ཚོགས་ཀྱིས་ཁྱད་པར་གྱི་སྒྲ་འདོན་པའི་ནགས་ཚལ་ཆེན་པོ་དེ་ལ་ཞུགས་པར་གྱུར་ཏོ།

དེ་ཞུགས་པར་གྱུར་པ་ན་པད་མའི་རྫིང་བུ་རྣམ་པ་སྣ་ཚོགས་པར་མཛེས་པ་རྣམས་དང་།

ས་གཞིའི་ཆ་ཤས་ལེགས་པར་རྣམ་པར་ཕྱེ་བ་རྣམས་དང་།

དེ་ལས་ཤིན་ཏུ་ཆེས་ལྷག་པར་བསྟར་བའི་ས་ཕྱོགས་ཀྱི་ཆ་གཞན་རྣམས་ཉིད་ཀྱང་རབ་ཏུ་མཐོང་ངོ་།

པད་མའི་རྫིང་བུ་དེ་དག་རྣམས་ཀྱི་མཛེས་པར་གྱུར་པ་རྣམས་ནི།

འདི་ལྟ་སྟེ་པད་མ་ལ་ལ་ནི་བཻ་ཌཱུརྱའི་ཡུ་བ་གསེར་གྱི་འདབ་མ་རྡོ་རྗེའི་རང་བཞིན་གྱི་ཟེ་འབྲུ་དེ་བཞིན་དུ་ཨིན་དྲ་ནཱི་ལའི་རང་བཞིན་གྱི་ལྟེ་བ་རྣམས་ཡིན་ཏེ་ཤིན་ཏུ་འཇམ་པ་རྣམས་ཡིན་ནོ།

དེ་བཞིན་དུ་གཞན་དག་རྣམས་ཀྱང་བཻ་ཌཱུརྱའི་འདབ་མ་དང་།

གསེར་གྱི་རང་བཞིན་གྱི་ཡུ་བ་དང་།

དངུལ་གྱི་རང་བཞིན་གྱི་སྙིང་པོ་དང་།

པད་མ་རཱ་གའི་ཟེ་བ་དང་ལྡན་པ་རྣམས་ལ་རྣམ་པ་སྣ་ཚོགས་པའི་བུང་བའི་ཚོགས་རྣམས་ཀྱི་རྣམ་པར་བརྗོད་པའི་སྒྲ་འབྱིན་པར་ཉན་པར་འོས་པར་སྙན་པས་དགའ་བར་གྱུར་པ་རྣམས་དང་།

འདབ་མ་རྣམ་པར་བཀྲ་བར་གྱུར་པའི་པད་མའི་འདབ་མ་རྣམས་ནི་རིན་པོ་ཆེ་བདུན་གྱིས་རྣམ་པར་སྤྲས་པ་དང་།

གསེར་གྱི་འདབ་མ་རྣམས་ཀྱང་ལེགས་པར་རྣམ་པར་ཕྱེ་བ་དང་།

ལྟེ་བ་རྣམས་ཀྱང་དེ་ཁོ་ན་བཞིན་དུ་སྣ་ཚོགས་པར་ལེགས་པར་རྣམ་པར་ཕྱེ་བ་རྣམས་ཀྱང་འདི་ལྟ་སྟེ།

ཨིན་དྲ་ནཱི་ལ་དང་།

པད་མ་རཱ་ག་དང་།

བཻ་ཌཱུརྱ་དང་།

གསེར་དང་།

མུ་ས་ར་གལ་བ་དང་།

ཤེལ་དང་།

མཧཱ་ནཱི་ལ་རྣམས་ཀྱི་ཁ་དོག་སྣ་ཚོགས་པའི་ཁ་དོག་དེ་དག་རྣམས་དང་ཆ་འདྲ་བའི་འོད་ཟེར་གྱིས་ཉེ་བར་གསལ་བར་བྱས་པའི་བདག་ཉིད་ཅན་རྣམས་ཡིན་ནོ།

དེ་ལ་སྙིང་པོ་རྣམས་ཀྱང་འདི་ལྟ་སྟེ་གཅིག་ཇི་ལྟ་བ་བཞིན་དུ་མ་རྣམས་ཀྱང་དེ་བཞིན་དུ་རྣམ་པ་སྣ་ཚོགས་པའི་ཁ་དོག་དང་དབྱིབས་དང་ལྡན་པའི་ཁ་དོག་ཅན་རྣམས་ཡིན་ནོ།

དེས་པད་མའི་རྫིང་བུ་དེ་དག་རྣམས་མཐོང་བ་དང་།

གཟུགས་དེ་དག་རྣམས་མཐོང་བ་དེ་ལྟ་བར་བྱེད་པ་ཉིད་ཀྱིས་ངོམས་པར་མི་འགྱུར་རོ།

དེས་

ཇི་ལྟ་ཇི་ལྟར་ཡུལ་དེ་དག་རྣམས་མངོན་པར་མཐོང་བར་གྱུར་པ་དེ་ལྟ་དེ་ལྟར་འདིའི་སྲེད་པ་རྣམ་པར་འཕེལ་བར་འགྱུར་ཏེ།

མར་བཏབ་པར་གྱུར་པའི་མེ་བཞིན་དུ་ངོམས་པ་སྐྱེ་བར་འགྱུར་བ་མ་ཡིན་ནོ།

ཚིམ་པ་མེད་པ་རྣམས་ལ་ཡང་བདེ་བ་ག་ལ་ཡོད།

བདེ་བ་དང་བྲལ་བ་རྣམས་ལ་ཡང་ཞི་བ་ག་ལ་ཡོད།

སྲེད་པ་དང་བཅས་པ་རྣམས་ལ་ནི་གར་ཡང་ཞི་བ་སྐྱེ་བར་མི་འགྱུར་རོ།

དེ་ཇི་ལྟ་ཇི་ལྟར་བདེ་བ་རྣམས་ཐོབ་པར་གྱུར་པ་དེ་ལྟ་དེ་ལྟར་འདིའི་སྲེད་པ་རྣམས་རྣམ་པར་འཕེལ་བར་འགྱུར་བ་ཡིན་ཞིང་།

དེ་ལྟ་དེ་ལྟར་སྲེད་པ་རྣམས་གོང་དུ་ཁྱད་པར་དུ་འགྱུར་རོ།

ཇི་ལྟ་ཇི་ལྟར་ཡང་ཚིམ་པ་མེད་པར་གྱུར་པ་དེ་ལྟ་དེ་ལྟར་རྣམ་པར་ངོམས་པ་མེད་པས་ཁྱད་པར་དུ་སྡུག་བསྔལ་བར་འགྱུར་རོ།

དེ་སྡུག་བསྔལ་བ་ལ་བདེ་བར་མངོན་པར་ང་རྒྱལ་བའི་འདོད་པའི་མེ་རྣམས་ཀྱིས་བསྲེགས་པར་གྱུར་པས།

ཕྱིར་ཡང་ནགས་དེ་ཉིད་དུ་འཇུག་པར་བྱེད་པ་ན་ནགས་ཚལ་གྱི་ནང་ན་ཚང་ཚིང་གི་ཁྱད་པར་རབ་ཏུ་མང་པོ་རྣམས་དེས་མཐོང་བར་གྱུར་པ་ལ་རྣམ་པར་འདྲེས་པའི་འོད་ཟེར་ཀུན་ནས་འབར་བར་གྱུར་པ་རྣམས་སོ།

ཁ་ཅིག་ནི་ལྷའི་ཁ་ཅིག་ནི་མེ་ཏོག་གི་འོད་ཀྱིས་ཀུན་ཏུ་གསལ་བར་བྱེད་པ་སྟེ།

ཁ་དོག་རྣམས་མངོན་པར་མཐོང་ནས་ཉེ་འཁོར་ཀུན་ཏུ་མིག་རྒྱང་བསྲིངས་པས་དེ་ཡུལ་ལྔའི་མེ་ཏོག་རྣམས་ཀྱི་ནང་དུ་འགྲོ་བར་བྱེད་དོ།

འདོད་པའི་བདེ་བ་རྣམས་ཀྱིས་ཚིམ་པ་མེད་པར་སླར་ཡང་ནགས་དེ་ཉིད་དུ་འཇུག་པར་བྱེད་པ་ན།

དེས་ནོར་བུའི་རང་བཞིན་གྱི་གཅལ་རྣམས་དང་།

གསེར་དང་།

ཤེལ་གྱི་རང་བཞིན་གྱི་མདོག་དང་།

འཇམ་པ་ཆུ་བལ་དང་།

རྣམ་པར་བྲལ་བའི་མདོག་དང་།

འཇམ་པ་ཤིན་ཏུ་འཇམ་པར་གྱུར་པའི་མྱུ་གུ་ལྔ་འབྱུང་བར་འགྱུར་བའི་ཆུ་ཀླུང་ན་རྣམ་པ་སྣ་ཚོགས་པ་ཟབ་པ་རྣམས་མཐོང་བར་གྱུར་ཏོ།

གཞན་ཡང་ཡུལ་ཕྱོགས་གཞན་དག་རྣམས་ལ་ཡང་མཐོང་སྟེ།

མཚོ་རབ་ཏུ་དང་བར་གྱུར་པ་དངུལ་གྱི་རང་བཞིན་ཉིད་ཀྱི་ཆུས་ཡོངས་སུ་གང་བར་གྱུར་པ་རིན་པོ་ཆེའི་རང་བཞིན་གྱི་གཅལ་རྣམས་ལེགས་པར་བཀྲམ་པ་འོད་ཟེར་རྣམས་ཀྱང་རྟག་ཏུ་འབྱིན་པར་གྱུར་པས་ཉེ་བར་མཛེས་པར་བྱས་པ་དེ་ན་ངང་པ་དང་།

ཀཱ་རཎྜ་བ་དང་ཙཀྲ་བཱ་ཀ་རྣམས་ཀྱིས་ཉེ་བར་མཛེས་པར་བྱས་པ་དང་།

ཉེ་

འཁོར་རྣམས་ན་ཡང་པད་མའི་རྫིང་བུ་རྣམས་ཀྱིས་ཉེ་བར་མཛེས་པ།

འགྲམ་དུ་སྐྱེས་པའི་ལྗོན་ཤིང་རྣམས་ཀྱིས་ཀྱང་ཉེ་འཁོར་རྣམས་རབ་ཏུ་ཁྱབ་པར་གྱུར་པ་ཡང་ནགས་ཀྱི་གསེབ་རྣམས་རྣམ་པར་རྒྱུ་བར་བྱེད་པའི་རྣམ་པ་སྣ་ཚོགས་པའི་རབ་ཀྱི་ཕུལ་དུ་ཕྱིན་པ་སྒྲ་རྣམས་དང་ལྡན་པའི་བྱ་རྣམས་ཀྱིས་ཉེ་བར་མཛེས་པར་བྱས་པས་ཀྱང་མཚོ་འདི་ནི་མཛེས་པར་གྱུར་པ་ཡིན་ནོ།

མཛེས་པར་གྱུར་པ་དེ་དག་རྣམས་མངོན་སུམ་དུ་མཐོང་བར་གྱུར་ནས།

གཞན་ཡང་རབ་ཏུ་ཞུགས་པར་གྱུར་པ་ན་ལྷ་གསར་དུ་སྐྱེས་པས་ནགས་དེ་ན་མཐོང་བ་རྣམས་ལ་ཨུད་པ་ལའི་ཚལ་རྣམས་ལྷའི་བུང་བས་ཉེ་བར་མཛེས་པར་གྱུར་པ་རྣམས་དང་།

རིན་པོ་ཆེ་བདུན་གྱི་རང་བཞིན་གྱི་སྒྲོ་རྣམ་པར་བཀྲ་བ་ཆུ་ལ་རྒྱུ་བ་རྣམ་པ་སྣ་ཚོགས་པའི་བྱ་རྣམས་ཀྱིས་བསྟེན་པར་བྱས་པ་ལེགས་པར་རབ་ཏུ་བརྩོན་པ་རྣམས་ཀྱིས་འདམ་དང་ངེས་པར་བྲལ་བའི་ཆུ་ཡན་ལག་བདུན་གྱི་ཡོན་ཏན་ཕུན་སུམ་ཚོགས་པ་དང་།

ཙཀྲ་བཱ་ཀའི་ཡོན་ཏན་ཕུན་སུམ་ཚོགས་པ་དང་།

ཙཀྲ་བཱ་ཀའི་ཚོགས་རྣམས་ཟུང་དུ་གྱུར་པ་རྣམས་ཀྱིས་ཡོངས་སུ་གང་བ་དང་།

ཉེ་འཁོར་ན་ཡང་ཀླུང་དུ་སྐྱེས་པར་གྱུར་པ་མཆོག་ཏུ་དྲི་ཞིམ་པ་དབྱིབས་སྣ་ཚོགས་རྣམས་སུ་སྐྱེས་པའི་འདབ་མའི་ཤིང་གིས་ཉེ་བར་མཛེས་པ་སྟེ།

དེ་དག་རྣམས་ཀྱིས་ཨུད་པ་ལའི་ཚལ་འདི་དག་རྣམས་མང་པོར་ལྷང་ངེར་གྱུར་པ་ཡིན་ནོ།

གཞན་ཡང་ལྷ་གསར་དུ་སྐྱེས་པ་དེ་ནགས་དེ་ཉིད་དུ་ཞུགས་པར་གྱུར་པ་ན་ལྷ་རྫས་ཀྱི་བདུད་རྩིས་རབ་ཏུ་གང་བའི་ཆུ་བོ་ཉེ་འཁོར་ན་ལེགས་པར་འབབ་པ་མཐོང་བར་གྱུར་ཏེ།

གཞན་ཡང་ཞུགས་པར་གྱུར་པ་ན་ལྷ་གསར་དུ་སྐྱེས་པས་དེ་དག་ཉིད་ལས་གཞན་པ་རྣམས་མཐོང་བ་ལ་དེ་བཞིན་དུ་རྣམ་པ་སྣ་ཚོགས་པའི་ཁ་དོག་གི་བདུད་རྩི་དེ་དག་རྣམས་འདམ་གྱིས་ཤིན་ཏུ་གཙང་བ་སྒྲ་སི་ལི་ལི་སྒྲོགས་པའི་བཏུང་བའི་ཆུ་བོ་བརྒྱ་ཕྲག་རྣམས་དང་ཅི་སྟེ་ན་སྟོང་ཕྲག་རྣམས་ཀྱང་ཉེ་འཁོར་དག་ན་རབ་ཏུ་འབབ་པ་དང་།

བཏུང་བ་མྱོས་པར་འགྱུར་བ་རྣམས་ལ་ཀུན་ཏུ་ཆགས་པའི་བྱ་རྣམས་ཀྱིས་ཉེ་བར་མཛེས་པ་རྣམས་ཡིན་ནོ།

གཞན་ཡང་རབ་ཏུ་ཞུགས་པར་གྱུར་པ་ཉིད་ན་ལྷ་གསར་དུ་སྐྱེས་པ་དེ་མ་ཡིན་པ་རྣམས་རབ་ཏུ་མཐོང་བ་ནི།

ཐང་ལ་སྐྱེས་པར་གྱུར་པ་རྣམ་པ་སྣ་ཚོགས་པ་

གཟུགས་དང་།

དབྱིབས་དང་།

འདབ་མ་དང་།

སྙིང་པོ་དང་།

དྲི་དང་ཁ་དོག་རྣམས་དང་ལྡན་པ་བུང་བ་རྣམས་ཀྱིས་ཉེ་བར་མཛེས་པར་བྱས་པའི་མེ་ཏོག་གི་ནགས་ཆེན་པོའི་ཁྱད་པར་དུ་བརྒྱན་པ་ལྟ་བུར་གྱུར་པ་ཡིན་ནོ།

ནགས་དེ་དག་ནི་རང་བཞིན་གྱིས་ཀྱང་ཤིན་ཏུ་དྲི་ཞིམ་པ་ཡིན་པ་དེ་དག་རྣམས་ཀྱི་དྲིས་ཕྱིར་ཞིང་ཤིན་ཏུ་ལྷག་པར་ཡང་དྲི་མཆོག་ཏུ་ཞིམ་པར་བྱེད་དོ།

གཞན་ཡང་ལྷ་གསར་དུ་སྐྱེས་པ་དེ་ལྷན་ཅིག་སྤྱོད་པ་རྣམས་དང་བཅས་པ་རྣམས་ཀྱིས་རབ་ཏུ་མཐོང་བར་གྱུར་པ་དག་ལ།

ནགས་ཀྱི་ནང་དག་ན་མཐོན་པོར་གྱུར་པ་རིའི་རྩེ་མོ་རྣམས་རིན་པོ་ཆེ་སྣ་ཚོགས་པ་རྣམས་ཀྱི་འབྱུང་ཁུངས་རྣམས་ཀྱིས་རྣམ་པར་བཀྲ་བ་འབབ་ཆུ་བརྒྱ་སྟོང་ཕྲག་ལེགས་པར་འབྱུང་བ་རྣམས་ཀྱིས་སྣང་བར་བྱེད་པ་དང་ལྡན་པས་རིའི་རྩེ་མོ་རྣམས་རྟག་པར་ཡང་མཛེས་པར་གྱུར་པ་དང་ཤིང་གེལ་པ་རྣམས་ཀུན་ནས་དུད་པས་རྣམ་པར་གསལ་ཞིང་འབར་བར་བྱེད་དོ།

ཁུ་བྱུག་གི་སྒྲ་དགའ་བར་འགྱུར་བ་རྣམས་དང་རྣམ་པ་སྣ་ཚོགས་པའི་རིན་པོ་ཆེ་མཆོག་ཏུ་འབར་བ་ཀུན་ཏུ་སྣང་བར་བྱེད་པའི་འོད་ཟེར་དང་ལྡན་པའི་བྱ་བརྒྱ་སྟོང་ཕྲག་དུ་མ་རྣམས་བལྟ་བར་སྡུག་ཅིང་རྣམ་པར་བརྗོད་པའི་སྒྲ་མཉན་པར་འོས་པ་རྣམས་དང་།

དེ་བཞིན་དུ་དྲི་དང་ལྡན་པའི་མེ་ཏོག་བརྒྱ་སྟོང་ཕྲག་དུ་མ་རྣམས་དང་ལྡན་པའི་རིའི་ཁྲོད་རྣམས་ཀྱིས་ཀྱང་ཇི་ལྟར་འཛམ་བུའི་གླིང་ན་རང་གི་འོད་ཟེར་གྱི་གཟི་བརྗིད་ཀྱིས་ནམ་མཁའི་དཀྱིལ་བརྟོལ་བ་བཞིན་དུ་ལངས་ནས་གནས་པའི་ཉི་མ་དང་།

ཟླ་བ་འདི་དག་གིས་རྣམ་པར་མཛེས་པར་བྱེད་པ་དེ་བཞིན་དུ་ཀུན་ཏུ་གསལ་བར་བྱེད་དེ།

འོད་ཟེར་རྣམས་ཐམས་ཅད་ཀྱང་དུ་མར་རྣམ་པར་བཀྲ་བའི་འོད་ཟེར་རྣམས་ཡིན་པས་འཐབ་བྲལ་བའི་ས་རྣམས་ལས་འོད་ཟེར་གོང་དུ་འཕེལ་བའི་ཁྱད་པར་གྱིས་ཕྱིར་ཞིང་ཉིད་དུ་ཤིན་ཏུ་ཆེས་ལྷག་པར་གསལ་བར་བྱེད་དོ།

རྣམ་པར་བཀྲ་བའི་འོད་ཟེར་དུ་མ་རྣམས་ཆ་ཤས་སུ་རྣམ་པར་ཕྱེ་བ་དེ་དག་རྣམས་ཀྱང་ལྷ་གསར་དུ་སྐྱེས་པ་དེས་ལེགས་པར་མཐོང་ཞིང་།

རིའི་རྩེ་མོ་དེ་དག་རྣམས་ཀྱང་ལེགས་པར་མཐོང་ནས་ཕྱིར་ཉིད་ཀྱང་ལྷན་ཅིག་སྤྱོད་པ་རྣམས་དང་བཅས་ཏེ་མང་དུ་རྣམ་པར་བཀྲ་བའི་ནགས་དེར་འཇུག་པར་བྱེད་དོ།

དེ་ནགས་དེར་ཇི་ལྟ་ཇི་ལྟར་རབ་ཏུ་འཇུག་པར་བྱེད་པ་དེ་ལྟ་དེ་ལྟར་ཆེས་དགའ་བར་འགྱུར་བ་རྣམས་

མཐོང་བར་འགྱུར་རོ།

དེ་ན་ཡང་དེ་ལས་གཞན་པའི་ཡོན་ཏན་གྱི་ཚོགས་དུ་མ་རྣམས་ཕུན་སུམ་ཚོགས་པ་ལ།

སྒྲ་འཕང་མཐོ་བར་རུང་བ་དང་སྙན་ཞིང་རིང་ལ་འཁྱིམ་པ་དང་མི་ཐོན་པ་ལྟར་བརྒྱལ་བ་ལ་སོགས་པའི་སྒྲ་དབྱངས་མང་པོ་ཕུན་སུམ་ཚོགས་པ་རྣམས་སོ།

ཇི་ལྟར་སྒྲ་འདི་དག་རྣམས་དང་ཉེ་བར་གྱུར་ཅིང་དེས་སྒྲ་དེ་དག་རྣམས་ཐོས་པར་གྱུར་པས་ཤིན་ཏུ་ལྷག་པར་ཡིད་ཆེས་རབ་ཏུ་དགའ་བར་གྱུར་པས་རིངས་པ་ཉིད་དུ་ལེགས་པར་ཞུགས་པ་ན།

ལྷའི་ཚོགས་སྔར་མ་མཐོང་བ་རྣམས་ཀྱི་ཅ་ཅོའི་སྒྲས་མིག་རབ་ཏུ་རྣམ་པར་གདངས་ནས།

དེ་གང་གི་ཚེ་ཉེ་འཁོར་རྣམས་སུ་ལེགས་པར་ཞུགས་པ་དེའི་ཚེ་ན་ཤིན་ཏུ་ལྷག་པར་གྱུར་པའི་ནགས་ཚལ་གྱི་ཕྲེང་བ་མཛེས་པ་རྣམས་མཐོང་བ་ནི་རབ་ཏུ་རྣམ་པར་གྱེས་པའི་བཻ་ཌཱུརྱའི་ལྗོན་ཤིང་མཆོག་ཏུ་འབར་བ་རྣམས་ཀྱིས་ཉེ་བར་མཛེས་པ་དང་།

དེ་བཞིན་དུ་ཨིན་དྲ་ནཱི་ལའི་ཤིང་གི་ཚོགས་རྣམས་ཀྱིས་ཉེ་བར་མཛེས་པར་བྱས་པ་རྣམས་ཀྱིས་ཀྱང་རིའི་ཚོགས་རྣམས་རྣམ་པར་མཛེས་པར་བྱེད་པ་ཡིན་ནོ།

གཞན་ཡང་ལྷ་དེ་ཉིད་ཀྱིས་ལེགས་པར་མཐོང་བ་རྣམས་རིན་པོ་ཆེ་བདུན་གྱིས་རྣམ་པར་བཀྲ་བར་བྱས་པ་པད་མའི་རྫིང་བུ་རྣམས་ཀྱིས་ཉེ་བར་མཛེས་པའི་ནགས་ཀྱི་རྒྱལ་པོ་རྣམ་པར་མཛེས་པ་རྣམས་སོ།

དེ་དག་རྣམས་ཐམས་ཅད་ན་ཡང་རྟག་པར་རྒྱུན་མི་འཆད་པར་ཀུན་ཏུ་རྟོག་པ་རྣམ་པ་སྣ་ཚོགས་པའི་ཆེས་ལྷག་པ་རྣམས་ཀྱི་རྒྱན་དང་ཆ་བྱད་རྣམས་དང་ལྡན་པ་དཔེ་མེད་པར་གཟུགས་དང་ལང་ཚོ་ལ་བབ་ཅིང་རྒྱན་དང་ཆ་བྱད་རྣམས་དང་ལྡན་པའི་ལྷ་དང་ལྷ་མོའི་ཚོགས་བརྒྱ་སྟོང་གིས་ཡོངས་སུ་གང་བས་རྣམ་པར་མཛེས་པའི་ཚོགས་པ་རྣམས་ལ་ལྷ་རྣམས་འགའ་ཞིག་ནི་ཀུན་ནས་གནས་ཏེ་མྱོས་བྱེད་ཀྱི་སྐྱོན་དང་།

རྣམ་པར་བྲལ་བར་གྱུར་པའི་ལྷ་རྫས་ཀྱི་རོ་དང་དྲི་དང་རེག་བྱའི་བདེ་བ་རྣམས་སྐྱེད་པར་བྱེད་པའི་མྱོས་བྱེད་དེ་དག་རྣམས་འཐུང་བར་བྱེད་ཅིང་རྒྱགས་པ་ལ་དོན་གཅིག་པར་གྱུར་པའི་ལྷན་ཅིག་སྤྱོད་པའི་འཁོར་རྣམས་དང་བཅས་ནས་ཁ་དོག་རྣམ་པ་སྣ་ཚོགས་པར་གྱུར་པའི་ནགས་ཀྱི་ཕྲེང་བ་མཛེས་པ་རྣམས་ལ་རྩེ་དགའ་བར་བྱེད་དོ།

ཚོགས་པ་གཞན་རྣམས་ཉིད་ནི་རྣམ་པར་འདྲེས་པའི་འོད་ཟེར་གྱིས་

ལེགས་པར་གསལ་བར་བྱས་པའི་ནགས་མཛེས་པ་ཆ་ཤས་རྣམ་པར་བཀྲ་བ་རྣམས་ལ་འཚེར་བག་དང་ལྡན་པའི་ལུས་ཅན་རྣམས་རྩེ་དགའ་བར་བྱེད་དོ།

ལྷ་གཞན་དག་རྣམས་ཀྱང་དེ་ཁོ་ན་བཞིན་དུ་ལྷན་ཅིག་སྤྱོད་པ་རྣམས་དང་བཅས་པས་རང་དང་གཞན་རྣམས་ལ་ཡང་མཆོག་ཏུ་དགའ་བར་འགྱུར་བའི་ལྗོན་ཤིང་གིས་རབ་ཏུ་གང་བའི་ནགས་ཀྱི་ཕྲེང་བ་མཛེས་པ་རྣམས་ལ་རོལ་མོའི་ཆ་བྱད་རྣམས་དང་གར་དང་རྔ་སྒྲ་དང་བཅས་པའི་ལྷ་རྫས་ཀྱི་འདོད་པའི་ཡོན་ཏན་ལྔ་རྣམས་ཀྱི་ལྷ་རྫས་རྣམས་དང་ཉེ་བར་ལྡན་ནོ།

དེ་བཞིན་དུ་རིན་པོ་ཆེ་བདུན་གྱི་རང་བཞིན་གྱི་ལྗོན་ཤིང་གཞན་དག་རྣམས་ཀྱི་ཚང་ཚིང་རྣམས་དང་བར་རྣམས་སུ་སོང་བར་གྱུར་ནས་དེ་ཁོ་ན་བཞིན་དུ་དགའ་བར་བྱེད་དེ།

རྔ་སྐད་ཡན་ལག་ལྔ་དང་ལྡན་པ་རྣམས་ཀྱིས་དེ་དག་རྣམས་ལ་ཡིད་སོང་བ་དེ་དག་རྣམས་རྗེས་སུ་ཆགས་ཤིང་རྗེས་སུ་འགྲོ་བ་དཔེ་མེད་པའི་ལྷ་རྫས་ཀྱི་བདེ་བ་རྣམས་ལ་ཀུན་ནས་ཆགས་པར་གྱུར་པ་ལྷན་ཅིག་རྒྱུ་བར་བྱེད་པའི་འཁོར་རྣམས་དང་བཅས་པས་རྔ་སྐད་ཡན་ལག་ལྔ་དང་ལྡན་པ་གླུ་དང་སྤྲུགས་པའི་རོལ་མོ་ལ་ཡིད་ཀུན་ནས་ཆགས་པར་གྱུར་པ།

བདེ་བས་སྙིང་ཀུན་ཏུ་གང་བ་ཉིད་ཀྱིས་རྩེ་དགའ་བར་བྱེད་པས་ཀྱང་ཚིམ་པ་མེད་པའི་འབྲས་བུའི་སྲེད་པ་རྣམས་ལ་རྣམ་པར་ཆགས་པའི་ཡིད་ཅན་རྣམས་འཐུན་པས་སྙིང་ཀུན་ཏུ་རྒྱས་པར་རྩེ་དགའ་བར་བྱེད་པའི་འདོད་པ་རྣམས་ཉིད་ཀྱིས་ཀྱང་ངོམས་པ་མེད་པ།

སྲེད་པས་རྣམ་པར་འཆེལ་བའི་ཡིད་ཅན་རྣམས་སྒོ་ལྔ་ལ་རབ་ཏུ་རྟེན་པར་བྱེད་པ་གང་ཡིན་པའི་འདོད་པའི་ཆུ་བོ་རྣམས་སུ་ནུབ་པ་ཡིན་ནོ།

དེ་བཞིན་དུ་པད་མའི་ནགས་གཞན་རྣམས་ལ་ལྷན་ཅིག་ཏུ་སྐྱེས་པར་གྱུར་པའི་པད་མའི་འདབ་མའི་ལྡེབས་རྣམས་སུ་ལེགས་པར་གནས་པར་བྱས་ནས་མྱོས་བྱེད་འཐུང་བར་བྱེད་དེ།

འོན་ཀྱང་མྱོས་བྱེད་ཀྱི་ཉེས་པ་རྣམས་ཀྱིས་ཀྱང་ཀུན་ཏུ་གོས་པར་ནི་མི་འགྱུར་རོ།

དྲི་ཞིམ་པོ་དང་རེག་བྱ་དང་ཁ་དོག་རྣམས་དཔེ་མེད་པར་གྱུར་པའི་བཏུང་བ་དེ་དག་རྣམས་ཀྱིས་ཡིད་ལེགས་པར་ཆགས་པས་བསྒོས་པ་ཡིན་ནོ།

ཡང་གཞན་དག་རྣམས་ནི་སྣ་ཚོགས་པའི་འབབ་ཆུ་རྣམས་ཀྱི་ངོས་གཉིས་སུ་ལྷ་དེ་དག་རྣམས་ཕན་ཚུན་དུ་གྲོགས་སུ་གྱུར་པས་དཔེ་མེད་པའི་

ལྷ་རྫས་ཀྱི་བདེ་བ་རྣམ་པ་དུ་མ་རྣམས་ལ་ཉེ་བར་ལོངས་སྤྱོད་པར་བྱེད་དོ།

གཞན་ཡང་ལྷ་གསར་དུ་སྐྱེས་པ་དེས་མཐོང་བར་གྱུར་པ་རྣམས་ལ།

གསེར་དང་བཻ་ཌཱུརྱའི་རང་བཞིན་རྣམས་ལ་ནོར་བུའི་སྟེགས་བུ་རྣམས་སུ་དང་།

ཁང་བུའི་ཕྲེང་བ་རྣམས་ལ་ཡང་དགའ་བར་བྱེད་དོ།

དགའ་བར་བྱེད་པ་ཡང་ཕན་ཚུན་དུ་གྲོགས་སུ་གྱུར་པ་སྟེ།

འདོད་པ་རྣམས་ལ་དོན་གཅིག་པ་ལེགས་པར་བྱས་པའི་ལས་རྣམས་ཀྱིས་དམན་པ་དང་བར་མ་དང་ཁྱད་པར་དུ་འཕགས་པར་གྱུར་པའི་གཟུགས་དང་ལང་ཚོ་དང་བདེ་བ་རྣམས་ལ་ལས་རྣམས་དབང་པོར་གྱུར་པས་མཆོག་ཏུ་ལེགས་པར་ཞུགས་པ་རྣམས་ཁྱད་པར་མཚུངས་པ་མེད་པའི་ཡན་ལག་ལྔ་པའི་བདེ་བ་རྣམས་ཀྱིས་ཉེ་བར་འཚོ་བར་བྱེད་དོ།

དེ་ནས་ལྷ་དེས་སྔར་མཐོང་མ་མྱོང་བའི་རྣམ་པ་དུ་མར་དགའ་བར་གྱུར་པ་དེ་དག་རྣམས་ནི་སྔར་བཞིན་ནོ།

ཡང་ལྷ་དེ་ཉེ་འཁོར་རྣམས་ན་རྩེ་བར་གྱུར་པ་ལས་མི་མཉམ་པའི་བདེ་བ་ཕུན་སུམ་ཚོགས་པ་རྣམས་དང་ལྡན་པའི་ལྷ་རྣམས་གང་ཡིན་པ་དེའི་ཚོགས་དེར་རབ་ཏུ་དགའ་བར་གྱུར་པའི་ཡིད་ཀྱིས་ལྷན་ཅིག་སྤྱོད་པ་རྣམས་དང་བཅས་པ་མྱུར་བར་འགྲོ་བར་བྱེད་དོ།

ལྷ་རྣམས་ཀྱིས་ཀྱང་ཕུལ་དུ་བྱུང་བའི་རྒྱན་དང་ཆ་ལུགས་དང་གཟུགས་ཕུན་སུམ་ཚོགས་པར་གྱུར་པའི་སྔ་ན་མ་མཐོང་བ་དེ་ལ་ངོ་མཚར་བར་གྱུར་པས་མིག་ཤིན་ཏུ་ཁྱད་པར་དུ་ཧར་ཧར་པོར་བྱེད་དོ།

ལྷ་དེ་ཡང་ལྷ་དེ་དག་རྣམས་ལ་ཉེ་བར་བརྟེན་ནས་ཡིད་ཆེས་རབ་ཏུ་དགའ་བར་འགྱུར་རོ།

དེ་དག་རྣམས་ཀྱིས་ཀྱང་ཕན་ཚུན་དུ་ཉེ་བར་རྟེན་པར་བྱེད་དེ།

ཕན་ཚུན་དུ་ངེས་པར་གནོན་པ་མེད་པར་ཉེ་བར་འགྲོ་བའི་ཡིད་དང་།

ལྷན་ཅིག་རྗེས་སུ་སྤྱོད་པ་དང་བཅས་པ་རྣམས་ཀྱང་རྗེས་སུ་ཆགས་པར་གྱུར་པའི་ཡིད་ཀྱིས།

རྣམ་པར་མཛེས་པའི་ནགས་ཀྱི་རྒྱལ་པོ་རྣམས་ནས་རྣམ་པར་མཛེས་པའི་ནགས་ཀྱི་རྒྱལ་པོ་རྣམས་དང་།

ནགས་ལས་ནགས་རྣམས་སུ་དང་གསེར་གྱི་རང་བཞིན་གྱི་རི་དང་རི་བོའི་རྩེ་མོ་རྣམས་ལ་རི་དང་རི་བོའི་རྩེ་མོ་རྣམས་སུ་དང་པད་མའི་ཚལ་རྣམས་ནས་པད་མའི་ཚལ་རྣམས་སུ་དང་ཟས་ཀྱི་ཆུ་བོ་རྣམས་ནས་ཟས་ཀྱི་ཆུ་བོ་རྣམས་ལ་དང་།

དེ་བཞིན་དུ་འབབ་ཆུ་རྣམས་

ནས་འབབ་ཆུ་རྣམས་ལ་ཆུ་བོ་དག་ཏུ་ཡང་ཀུན་ནས་ཉེ་བར་འགྲོ་བར་བྱེད་དེ།

གཞན་དང་འདྲ་བ་མ་ཡིན་པ་རྣམས་དཔེ་རྣམས་ཀྱིས་ཇི་ལྟ་བ་བཞིན་དུ་བརྗོད་པར་སླ་བ་ཡང་མ་ཡིན་ནོ།

དེ་ལྟར་ལྷའི་ཚོགས་དེ་དག་རྣམས་ཐམས་ཅད་ཀྱང་དགའ་རངས་པར་བྱེད་དོ།

དེ་ལྟར་དེ་དག་ཏུ་དུས་ཤིན་ཏུ་རིང་བར་རྩེས་པར་གྱུར་ནས་གང་ན་ཐམས་ཅད་ཀྱི་སྙིང་པོ་ཞེས་བྱ་བའི་རི་ཡོད་པ་དེར་ཀུན་ཡང་ཉེ་བར་འགྲོ་བར་བྱེད་དོ།

རི་དེ་ཡང་རིའི་ཐམས་ཅད་ནས་གསེར་གྱི་ཁམས་དང་ལྡན་པ་འབབ་ཆུ་དང་པད་མའི་ཚལ་དང་ཁྲུས་ཀྱི་རྫིང་བུ་རྣམ་པ་དུ་མ་རྣམས་ཕུན་སུམ་ཚོགས་པ་ནགས་དང་ཉེ་བའི་ནགས་རྣམས་དང་།

ལྷ་དང་ལྷ་མོའི་ཚོགས་རྣམས་ཀྱིས་ཡོངས་སུ་བསྐོར་ནས་རྟག་ཏུ་ཡང་རོལ་མོ་དང་རྔ་སྒྲ་དང་གླུ་རྣམས་ཀུན་བརྗོད་པའི་སྒྲ་སྒྲོགས་པ་དང་ཐམས་ཅད་ལས་ཀྱང་ཡིད་མངོན་པར་དགའ་བའི་རི་ལ་ཆུ་ཀླུང་བརྒྱ་སྟོང་ཕྲག་དུ་མ་རྣམས་ཀྱིས་ཡོངས་སུ་གང་བ།

ཁང་པའི་ཕྲེང་བ་བརྒྱ་སྟོང་ཕྲག་དུ་མ་རྣམས་ཀྱིས་མངོན་པར་དགའ་བ་དང་།

ཉེ་འཁོར་ཀུན་ནས་པད་མ་རྣམས་ཀྱིས་ཡོངས་སུ་ཁེབས་པར་ལྡན་པ་དང་།

འཇུག་ངོགས་བརྒྱ་སྟོང་གིས་བརྒྱན་པ།

རབ་ཏུ་གསལ་བར་བྱེད་པའི་ལྗོན་ཤིང་རྣམས་བཞིན་དུ་ཉེ་འཁོར་རྣམས་ན་དཔག་བསམ་གྱི་ལྗོན་ཤིང་རྣམས་ཀྱིས་ཉེ་བར་མཛེས་པ་སྐྱེད་པ་རྣམས་ཀྱང་དེ་ལྟ་བུའི་རྣམ་པ་འདི་དག་རྣམས་མཐོང་ན་དགའ་བར་འགྱུར་བ་དང་ཉེ་འཁོར་རྣམས་ན་ཡང་ལྷ་རྣམས་ཀྱི་མཐོང་ན་ཤིན་ཏུ་ངོ་མཚར་བ་སྐྱེ་བའི་ནགས་དང་ཉེ་བའི་ནགས་རྣམས་ཕུན་སུམ་ཚོགས་པ་ཡིན་ནོ།

དེའི་ངོས་གཅིག་ནི་བཻ་ཌཱུརྱའི་རང་བཞིན་ནོ།

གཞན་ཅིག་ནི་གསེར་གྱི་རང་བཞིན་ནོ།

གཞན་ཅིག་ནི་ཨིན་དྲ་ནཱི་ལའི་རང་བཞིན་ནོ།

གཞན་ཅིག་ནི་ནཱི་ལ་ཆེན་པོའི་རང་བཞིན་ནོ།

རིན་པོ་ཆེའི་རང་བཞིན་གྱི་ལོགས་ཆ་ཤས་ལེགས་པར་རྣམ་པར་ཕྱེ་བའི་རིའི་མཆོག་དེའི་ཉེ་འཁོར་རྣམས་ན་ཆེན་པོ་རྣམས་ལ་འོས་པར་གྱུར་པའི་བང་རིམ་རྣམས་དང་།

རིའི་ཕུག་དང་སྨན་ལྗོངས་དང་།

ནགས་ཀྱི་ཕྲེང་བ་ཕུན་སུམ་ཚོགས་པ་རྣམས་ལ་རེག་པར་བྱ་བའི་དོན་དུ་དང་རྩེད་མོ་ལ་རྣམ་པར་རྒྱུ་བས་དང་།

དེ་ཁོ་ནར་དགའ་བར་བྱ་བའི་ཆེད་དུ་ཀུན་ནས་འཛེག་པར་བྱེད་དེ།

ལན་བརྒྱ་ཕྲག་དང་ཅི་སྟེན་སྟོང་

ཕྲག་སུ་ཡང་ཕྱི་བཞིན་རྗེས་སུ་སྤྱོད་པའི་འཁོར་དང་བཅས་པས་ལྷ་རྫས་ཀྱི་རྔ་སྐད་ཡན་ལག་ལྔ་དང་ལྡན་པ་རབ་ཏུ་ཆགས་པ་མཚུངས་པ་དང་རྗེས་སུ་ཆགས་པར་བྱེད་པ་དང་སྙན་པ་དང་རྣམ་པ་དུ་མ་རྣམས་ཡང་དག་པར་ལྡན་པས་དགའ་བར་བྱེད་ཅིང་རྩེ་བར་ཡང་བྱེད་དེ།

ཕལ་ཆེ་བའི་འདུས་པ་རྣམས་ནགས་དང་ཉེ་བའི་ནགས་རྣམས་དང་ཁྲུས་ཀྱི་རྫིང་བུ་དང་འབབ་ཆུ་རྣམས་སུའོ།

དེ་ནས་ལྷ་དེ་དག་རྣམས་ཇི་ལྟ་ཇི་ལྟར་མངོན་པར་འཛེག་པར་བྱེད་པ་དེ་ལྟ་དེ་ལྟར་ཆེས་དགའ་བ་རྣམས་མཐོང་བར་འགྱུར་ཏེ།

ཐམས་ཅད་ལས་ཀྱང་འདོད་པ་ཐམས་ཅད་ཀྱི་བདག་ཉིད་ཀྱི་ལྷ་རྫས་ཀྱི་ཤིང་བརྒྱ་སྟོང་གིས་ཉེ་བར་མཛེས་པར་གྱུར་པ།

འོད་ཟེར་རྣམས་མཆོག་ཏུ་འབར་བའི་རིན་པོ་ཆེའི་རང་བཞིན་གྱི་འོད་ཟེར་དང་ལྡན་པའི་པད་མའི་ཚལ་རྣམས་མཆོག་ཏུ་འབར་བ་དང་པད་མའི་ཚལ་གྱི་ཕྲེང་བས་ཉེ་བར་མཛེས་པར་གྱུར་པ་རྣམས་ཡིན་ནོ།

སྔར་ཇི་སྐད་དུ་བཤད་པ་དེ་དག་རྣམས་བཞིན་དུ་ལྷ་དེ་དག་རྣམས་རྩེ་དགའ་བ་དང་གར་དང་གླུ་ལེན་པར་བྱེད་དོ།

གླུ་ལེན་པར་བྱེད་པ་དང་གར་བྱེད་པར་གྱུར་པས་ཀྱང་དལ་གྱིས་དལ་གྱིས་རི་དེ་ལ་ཀུན་ནས་བགྲོད་པར་བྱེད་དེ།

ཕན་ཚུན་དུ་གྲོགས་སུ་གྱུར་པ་དང་རང་གིས་བྱས་པའི་ལས་རྣམས་གྲོགས་སུ་གྱུར་པ་དེའི་ལམ་ནས་འགྲོ་བར་བྱེད་པ་དང་།

དེས་ལེགས་པར་བྱས་པའི་ལས་རྣམས་ཀྱིས་རང་ཉིད་འོད་དང་ལྡན་པ་དང་།

ཤ་དང་རུས་པ་དང་ཆུ་སེར་རྣམས་ངེས་པར་མེད་པ་དང་ཕན་ཚུན་དུ་གནོད་པ་མེད་པར་ཟས་ཀྱི་ཀླུང་རྣམས་ལ་དང་བཏུང་བའི་ཀླུང་རྣམས་ལ་དང་བདུད་རྩིའི་ཀླུང་ལ་ཡང་རང་གིས་བྱས་པ་རྣམས་དང་།

ཆ་འདྲ་བར་མདོག་དང་རོ་དང་དྲི་དང་རེག་བྱ་ཕུན་སུམ་ཚོགས་པ་རྣམས་སྣོད་བཟང་པོ་ཕུན་སུམ་ཚོགས་པ་རྣམས་ཀྱིས་འོས་སུ་གྱུར་པ་རྣམས་ལ་ཉེ་བར་ལོངས་སྤྱོད་པར་བྱེད་ཅིང་ཡུལ་ལྔ་ལ་རྣམ་པར་ཆགས་པར་གྱུར་པའི་ཡིད་ཅན་རྣམས་ཡིན་ཏེ།

ཕན་ཚུན་རྣམས་ཀྱིས་ཀྱང་ཀུན་ནས་ཆགས་པ་སྐྱེད་པར་བྱེད་པ་དང་།

ཡིད་ཀྱང་དེ་ལ་སོང་བར་གྱུར་པ་དང་རྟག་པར་རྒྱུན་དུ་ཡང་བཞིན་རབ་ཏུ་དང་བར་གྱུར་པས་ཀྱང་རྩེ་དགའ་བར་བྱེད་དོ།

འདོད་པ་རྣམས་ཐམས་ཅད་རྟག་ཏུ་ཡང་ཕུན་སུམ་

ཚོགས་པར་གྱུར་པ།

སྔ་ན་མེད་པ་རྣམས་དང་མཉམ་པ་མེད་པ་རྣམས་དང་རྣམ་པ་དུ་མ་རྣམས་ཀྱི་བདེ་བ་རྣམས་ཀྱིས་ཉེ་བར་འབད་པར་བྱེད་དོ།

རི་དེ་ལ་ཀུན་ཏུ་འཛེག་པར་གྱུར་པ་དེ་དག་རྣམས་ནི་ཤིན་ཏུ་ངོ་མཚར་བར་གྱུར་པའི་དགའ་བ་རྒྱ་ཆེན་པོ་རྣམས་ཀྱིས་དེ་དག་རྣམས་ཡོངས་སུ་རྒྱས་པར་གྱུར་པ་ན།

ལུས་ཀྱི་ཁྱད་པར་རྣམས་མཐོང་བར་གྱུར་པའི་ལྷའི་ཚོགས་རབ་ཏུ་ཆགས་ཤིང་བདེ་བར་གྱུར་པ་རྣམས་ཀྱིས་ཉེ་འཁོར་རྣམས་ཀུན་ན་ཡང་མཚུངས་པ་མེད་པ་རྣམས་མཐོང་བར་གྱུར་པའི་རི་བོའི་མཆོག་དེའི་རྒྱབ་དེ་དག་རྣམས་སུ་ཀུན་ནས་གནས་པར་གྱུར་ནས།

རྩེད་མོའི་རི་བོ་ཞེས་བྱ་བའི་རི་དེ་ཡང་ཤིན་ཏུ་ཡང་དགའ་བར་གྱུར་པ་ཡིན་ཏེ།

རིན་པོ་ཆེའི་རང་བཞིན་རྣམ་པ་དུ་མ་སྣ་ཚོགས་པའི་རྩེད་མོའི་རི་ལ་མཐོང་བ་རྣམས་ནི་ལྗོན་ཤིང་དང་ཆུ་ཀླུང་དང་པད་མའི་ཚལ་དང་ཨུད་པ་ལའི་ཚལ་རྣམས་ཀྱིས་ཀུན་ཏུ་གང་བ་ཡིན་ནོ།

དེའི་རྒྱབ་ན་དཔལ་རྣམས་ཀུན་གྱིས་ཡོངས་སུ་གང་བར་གནས་པ་ཡིད་ལ་འདོད་པ་རྣམས་ཐམས་ཅད་ཕུན་སུམ་ཚོགས་པ་ཡིན་ཏེ།

དེར་གང་དང་གང་ཁོ་ན་སེམས་པར་བྱེད་པ་དེ་དང་དེ་དག་རྣམས་ཉིད་ཕུན་སུམ་ཚོགས་པར་འགྱུར་ཏེ་རྣམ་པ་དུ་མར་འདོད་པ་དགའ་བ་ཡིད་དུ་འོང་བ་དང་གཞན་རྣམས་དང་ཐུན་མོང་མ་ཡིན་པ་རྣམས་འབྱུང་བ་ཡིན་ནོ།

ཡིད་ཀྱི་རྗེས་སུ་འཐུན་པ་རྣམས་ཀྱང་རྣམ་པ་དུ་མ་ཉེ་བར་གནས་སོ།

ཡོན་ཏན་ལྷག་མ་རྣམས་ཉིད་ནི་བརྗོད་ཟིན་ཏོ།

བདེ་བ་ལ་ལྷ་རྣམས་དུས་ཤིན་ཏུ་རིང་དུ་རྩེ་བར་བྱེད་དོ།

དེ་ལྟར་དེ་དག་རྣམས་རྩེ་བར་གྱུར་ཅིང་དགའ་བར་ཡང་གྱུར་ལ་རི་དེ་དག་རྣམས་ཀྱང་སོ་སོ་དང་སོ་སོར་ཀུན་ཏུ་ལྟ་བར་བྱེད་པ་ན།

གལ་ཏེ་ནམ་ཞིག་ན་འཁྲི་ཤིང་ལེགས་པར་འཁྲིལ་བ་རྣམས་ཀྱིས་ཀུན་ནས་གཡེངས་པར་གྱུར་པ།

རིན་པོ་ཆེ་རྣམས་ཀྱི་རང་བཞིན་གྱི་འོད་ཟེར་གྱིས་ཀུན་ནས་གསལ་བར་བྱེད་པའི་རི་ལེགས་པར་ལངས་པ་རྣམས་ཀྱིས་ཉེ་འཁོར་རྣམས་ཀུན་ནས་ཡོངས་སུ་བསྐོར་བ།

ས་གཞི་རྣམས་རིན་པོ་ཆེ་བདུན་གྱི་རང་བཞིན་གྱི་རབ་ཀྱི་ཕུལ་དུ་གྱུར་པ་ཞི་བར་གྱུར་པའི་བྱ་རྣམས་ཀྱི་བརྗོད་པའི་ཁྱད་པར་ཆེས་དགའ་བར་འགྱུར་བའི་སྒྲ་རྣམས་དང་ལྡན་པ།

རབ་ཏུ་ཞི་བའི་མཆོག་ཏུ་གྱུར་པའི་ཕུག་རྣམས་ཀྱིས་ཀྱང་ཉེ་

བར་འཁོར་བ་རྣམས་ནས་ཡོངས་སུ་བསྐོར་བར་གྱུར་པའི་མཚོ་རབ་ཏུ་ཞི་བའི་སྤྱོད་པས་རྒྱུ་བ་རྣམས་ཀྱི་གནས་ཞེས་བྱ་བའི་རིའི་ཁྲོད་ན་གནས་པ་ཡིན་ནོ།

མཚོ་དེར་ཡང་གང་དག་གིས་རབ་ཏུ་ཞི་བ་སྐྱེ་བ་གཞན་དུ་སྤྱོད་པར་གྱུར་པ་དང་།

འོན་ཀྱང་ཚུལ་ཁྲིམས་རྣམས་ཡོལ་ཡང་སྤྱད་པ་མ་ཡིན་པ་དང་།

སྙིང་ལ་ཆོས་ལེགས་པར་འཛིན་པར་བྱེད་པའི་བདག་ཉིད་ཅན་ནི་ཡིན་པ་དང་ཁྲོ་བར་གྱུར་པ་དང་།

ཇི་སྐད་སྨྲས་པ་དེ་ལྟར་མི་བྱེད་པ་དང་གར་མཁན་དང་ཆོས་མཚུངས་པར་གྱུར་པའི་ཆོས་སྨྲ་བ་དེ་དག་རྣམས་དམྱལ་བ་དང་ཡི་དགས་རྣམས་ནས་དཀའ་བས་ཤི་འཕོས་པ་རྣམས་ཡིན་ནོ།

གལ་ཏེ་ཞིག་དེ་དག་རྣམས་ལན་གྲངས་གཞན་ལ་མྱོང་བར་གྱུར་པའི་ལས་ཀྱི་རྒྱས་བཅུས་པའི་སྲེད་པས་མཚོ་དེར་སྐྱེ་བར་འགྱུར་ལ་རབ་ཏུ་ཞི་བ་སྐྱེ་བ་གཞན་དང་གཞན་ལ་སྤྱད་པའི་དབང་གིས་མཚོ་དེའི་ཡང་ངང་པ་རྣམས་སུ་ཕལ་ཆེར་སྐྱེ་བར་འགྱུར་ཏེ།

བྱ་དེ་དག་རྣམས་ནི་རིན་པོ་ཆེ་བདུན་གྱི་རང་བཞིན་གྱི་སྒྲོ་དག་དང་ལྡན་པར་འགྱུར་བ་དང་།

སྐྱེ་བ་ཉིད་ཀྱི་མཐུ་སྟོབས་ཀྱིས་སྒྲ་སྙན་པར་འགྱུར་བ་དང་ལྷ་རྫས་ཀྱི་པད་མའི་ཟས་དང་ལྡན་པར་ལྷན་ཅིག་སྤྱོད་པ་རྣམས་དང་བཅས་པ་རྩེ་དགའ་བར་ཡང་བྱེད་དོ།

ངང་པའི་རྒྱལ་པོ་བྱང་ཆུབ་སེམས་དཔའ་དུས་བཟངས་ཞེས་བྱ་བ་ཡང་ཕལ་ཆེར་མཚོ་དེ་ན་གནས་ཏེ།

ཕུག་དེ་དག་ན་འཐབ་བྲལ་བ་རྣམས་ཀྱི་བདག་པོ་མུ་སུ་ལུན་དྷ་དང་ཆོས་དང་ལྡན་པའི་གཏམ་བྱེད་དོ།

བྱའི་ཚོགས་དེ་དག་རྣམས་ཆོས་ཀྱི་གཏམ་དེ་དག་ཉན་པར་བྱེད་དོ།

དེ་ནས་ལྷ་དེ་དག་རྣམས་རྩེ་དགའ་ཞིང་དགའ་དགུར་སྤྱོད་པར་བྱེད་པ་ལས་གལ་ཏེ་ཤེད་ན་ཚོམས་གཉིས་སུ་འགྱུར་ཏེ།

གང་དག་ལེགས་པར་བྱས་པའི་ལས་རྣམས་ཀྱིས་བསྐུལ་བར་གྱུར་ཅིང་སྐྱེ་བ་གཞན་ལ་ཡང་ལེགས་པར་བྱས་པ་རྣམས་སྤྱད་པ་དེ་རྣམས་ནི་གང་ན་མཚོ་དེ་ཡོད་པར་གྱུར་པ་དེར་འགྲོ་བར་བྱེད་དོ།

གང་དག་གིས་མ་སྤྱད་པ་དེ་དག་རྣམས་ནི་གང་ན་བག་མེད་པ་རྣམས་སྤྱོད་པ་ཞེས་བྱ་བའི་ནགས་དེར་སོང་ནས་རྩེ་དགའ་བས་གནས་པར་འགྱུར་རོ།

ཇི་ལྟར་སྐྱེ་བ་གཞན་རྣམས་སུ་རབ་ཏུ་ཞི་བ་སྤྱད་པ་དེ་དག་རྣམས་ནི་མཚོའི་གནས་སུ་སོང་བར་གྱུར་ནས་དེ་དག་རྣམས་དང་ཀུན་ནས་འདྲེ་བར་གྱུར་

པ་ཉིད་ན་ཀུན་བརྗོད་པ་དང་ལྡན་པ་ཞེས་བྱ་བའི་ངང་པ་དེ་དག་གིས་ཚིགས་སུ་བཅད་པ་རྣམས་བརྗོད་པ།

ཇི་ལྟར།

གང་གིས་ཇི་སྐད་སྨྲས་པའི་མིས།

དེ་ཚེ་དེ་ལྟར་མི་བྱེད་པ།

དེ་ནི་རྨོངས་པ་སྟོང་པ་སྨྲ།

སྡུག་བསྔལ་རྣམས་ནི་མཐར་བྱེད་མིན།

གང་ཞིག་གཞན་ལ་ཆོས་སྨྲ་ཞིང་།

ཆོས་ལ་ཡང་ནི་མི་འཇུག་པ།

ཚིག་གི་སྙིང་པོའི་སྐྱེས་བུ་དེ།

རྟག་ཏུ་སེམས་ནི་སྟོང་པར་འདོད།

བག་མེད་ལས་ནི་འདོད་ཆགས་སྐྱེ།

འདོད་ཆགས་ཀྱིས་ནི་ཞེ་སྡང་སྒྲུབ།

དང་པོ་སྐྱོན་དེ་དང་ལྡན་པས།

དམྱལ་བའི་རྗེས་སུ་ཉེ་བར་རྒྱུག །

འདས་པའི་བདེ་བ་གང་ཡིན་དེར།

དེ་ལ་ཁྱོད་ནི་ཀུན་འཇུག་མིན།

མ་འོངས་པ་ཡི་བདེ་གང་ཡང་།

དེས་ནི་ད་ལྟར་བདེ་བ་མིན།

དུས་གཅིག་ལ་ནི་བག་མེད་གང་།

ཀུན་རྨོངས་ལོངས་སྤྱོད་ལ་འཆུམས་པ།

རང་གི་ལས་ཀྱིས་བསླུས་པ་ཡིས།

ལྷ་དེ་དམྱལ་བར་འགྲོ་བ་ཡིན།

སྲེད་པས་དུས་གསུམ་སླུ་བྱེད་ཅིང་།

རྟག་ཏུ་འཐུན་པར་མི་བྱེད་པས།

བློ་ལྡན་དེ་ལ་ཡིད་མ་རྟོན།

དེ་ནི་འཁོར་བའི་འཆིང་བ་ཡིན།

དགྲ་ནི་གཉེན་བཞིན་བྱིས་པས་མཐོང་།

དགྲ་བཞིན་དུ་ཡང་གཅོད་པར་བྱེད།

ཤེས་ལྡན་དེ་ལ་ཡིད་མ་བརྟན།

དེ་ནི་འཇིག་རྟེན་འཆིང་བ་ཡིན།

ལྕགས་དང་ཤིང་གི་འཆིང་བ་ནི།

གཅད་པར་ནུས་པ་དེ་བཞིན་དུ།

རྟག་ཏུ་འདོད་པ་ལ་ཞེན་པའི།

སྲེད་པའི་འཆིང་བ་གཅད་མི་ནུས།

བདེ་བ་ཟད་མེད་འདོད་པ་གང་།

གང་ཞིག་འཆིང་བ་གཞིག་འདོད་འདི།

དེ་ནི་སྲེད་པའི་ཡུལ་ལས་གྲོལ།

ཤེས་རབ་ཡུལ་དུ་འགྲོ་བ་ཡིན།

ཡེ་ཤེས་སྣང་བ་བདེ་བའི་འོད།

སྡུག་བསྔལ་སྲེད་པའི་མུན་པར་བརྗོད།

དེ་ཕྱིར་སྣང་བ་ལ་གནོས་ལ།

མཁས་པས་མུན་པ་རྗེས་སུ་སོལ།

ཤེས་རབ་མཚོན་ཆ་རྣོན་པོ་ཡིས།

སྲེད་པའི་ཤིང་གཅོད་དེ་བཞིན་དུ།

རྩད་ནས་ཤིང་གཅོད་སྐྱེས་བུས་ནི།

བདེ་བ་བླ་ན་མེད་པ་འཐོབ།

རྟག་ཏུ་འབབ་ཆུའི་ཀླུང་གང་བའི།

སྐྱོན་གྱི་ནགས་ནི་གཅད་པར་གྱིས།

སྐྱོན་གྱི་ནགས་དེ་བཅད་པ་ལས།

མཁས་པས་སྲིད་པ་ལས་གྲོལ་འགྱུར།

སྲེད་པའི་ཆུ་བོ་ལམ་གསུམ་འགྲོ།

བག་མེད་སྤྱོད་པས་རྒལ་བར་དཀའ།

ཤེས་རབ་གྲུ་ལ་བརྟེན་ནས་ཀུན།

སྐྱོན་གྱི་ཕ་རོལ་འགྲོ་བར་འགྱུར།

ཤེས་རབ་རི་ཡི་རྩེར་སོང་ནས།

ཚུལ་ཁྲིམས་ཕུག་ནི་མཛེས་པ་ལས།

སྲིད་པའི་སྐྱོན་ནི་འདི་དག་ཀུན།

གཞལ་དུ་མེད་པའི་མིག་གིས་མཐོང་།

སྐྱེས་བུ་ཆོས་སྤངས་པ་དེ་ནི།

ཕྱི་དང་ནང་ཡང་སྟོང་པ་ཡིན།

གང་དག་ཆོས་ནི་མི་འདོད་པ།

དབུ་བ་བཞིན་དུ་སྙིང་པོ་མེད།

ཕྱི་དང་ནང་ཡང་སྙིང་པོ་དེ།

སྐྱེས་བུ་རྡོ་རྗེ་ལྟར་བརྟན་པ།

གང་དག་ཞི་བའི་ཆོས་སྤྱོད་པ།

སེམས་ཅན་གཞན་ལ་ཕན་པ་ཡིན།

བག་མེད་འདམ་དུ་བྱིང་བ་ཡི།

མི་གང་ཡུལ་ལ་སྤྱོད་པ་ནི།

རྨོངས་པ་དེ་ནི་སྲིན་བུས་ཟོས།

བདེ་བ་མཆོག་གི་སྐལ་ལྡན་མིན།

དེ་ཕྱིར་བདེ་དོན་གཉེར་སྐྱེས་བུས།

བག་མེད་རྗེས་སུ་བསྟེན་མི་བྱ།

བག་མེད་འཇིགས་པ་དང་བྲལ་བར།

གནས་པའི་བདེ་བ་དཔག་ཏུ་མེད།

དཔྱོད་པ་པོས་ནི་བག་མེད་ལ།

རྗེས་སུ་ཡིད་བརྟན་མ་བྱེད་ཅིག །

དེས་བལྟས་པ་ཡི་མི་རྣམས་ནི།

འགྲོ་བ་ལྔར་ནི་འཁོར་བ་ཡིན།

དེ་ལྟར་དེ་དག་གིས་ལྷ་དེ་དག་རྣམས་ལ་རྗེས་སུ་གདམས་པར་བྱེད་པའི་ཚིགས་སུ་བཅད་པ་རྣམས་ཀྱིས་རྗེས་སུ་འདོམས་པར་བྱེད་དོ།

དེ་ལྟར་རྟོགས་པར་བྱེད་པར་གྱུར་ན་ཡང་ཀུན་ཏུ་རིག་པ་ཡང་མ་ཡིན་ཏེ།

དེ་དག་འདོད་པའི་བདེ་བ་རྣམས་ཀྱིས་ཀུན་ཏུ་མི་རྟོགས་སོ།

དེ་དག་རྣམས་ཀྱིས་དེ་དག་རྣམས་ལ་བརྩི་བགྲངས་མ་བྱས་པས་ཕྱིར་ཡང་དེ་ཁོ་ན་ལྟར་གར་བྱེད་པར་གྱུར་ཅིང་འདོད་པའི་དགའ་བ་རྣམས་ལ་རྣམ་པར་ཆགས་པར་གྱུར་ཏོ།

དེ་ནས་བློ་རྟག་ཏུ་མཉམ་པར་བཞག་པ་སེམས་ཅན་རྣམས་ཐམས་ཅད་ལ་གཅིག་ཏུ་ཕན་པ་བྱེད་པ།

གཅིག་པུ་ལ་བློ་མཉམ་པར་བཞག་པའི་བྱང་ཆུབ་སེམས་དཔའ་དུས་བཟངས་དེ་ངང་པ་དེ་དག་གི་ནང་དུ་སོང་བར་གྱུར་ཏོ།

དེ་གལ་ཏེ་ན་སྐལ་བ་འཐུན་པར་གྱུར་པ་ཉིད་ཀྱི་ཕྱིར་བྱ་དེ་དག་གི་དབུས་སུ་དགའ་བར་བྱེད་དོ།

གལ་ཏེ་ན་ཕུག་བཟང་པོ་དེར་རང་ཉིད་གཅིག་པུ་ཞིག་བློ་ལེགས་པར་མཉམ་པར་བཞག་པས་ཆོས་སེམས་པར་བྱེད་དོ།

དེ་ལྟར་བྱའི་རྒྱལ་པོ་དུས་བཟངས་འདི་རྩེ་དགའ་བར་བྱེད་པ་ཉིད་དང་ལྷན་ཅིག་རྗེས་སུ་སྤྱོད་པའི་ངང་པ་གཞན་རྣམས་ཆོས་ཀྱི་གཏམ་རྣམས་ཀྱང་བྱེད་དོ།

བྱའི་ཚོགས་དེ་དག་

རྣམས་ཀྱི་ནང་དུ་འོངས་པར་གྱུར་པའི་ལྷ་དེ་དག་རྣམས་རབ་ཏུ་དགའ་བའི་ཡིད་ཀྱིས་ཕན་ཚུན་གྲོགས་སུ་གྱུར་པས་དགའ་བར་བྱ་འདོད་ནས་འོངས་པ་རྣམས་ཀྱིས་མཚོ་དེ་མངོན་པར་མཐོང་བར་གྱུར་པ་ན་ཐམས་ཅད་ལས་ཀྱང་མངོན་པར་དགའ་བར་གྱུར་པ་མཆོག་ཏུ་ཡང་མིག་དང་ཡིད་འཕྲོག་པར་བྱེད་པ་ཀུན་ནས་འཕེལ་བར་བྱེད་པའི་ལྗོན་ཤིང་དང་འབྲས་བུ་རྣམས་ཀྱིས་ཉེ་བར་མཛེས་པར་གྱུར་པ་སྟེ།

དེ་དག་རྣམས་མངོན་པར་མཐོང་ནས་ལྷ་དེ་དག་རབ་ཏུ་དགའ་བར་གྱུར་པའི་ཡིད་ཀྱིས་ཉེ་འཁོར་དེ་དག་རྣམས་ཀྱང་ལྷན་ཅིག་རྗེས་སུ་སྤྱོད་པའི་འཁོར་དང་བཅས་པས་ཡོངས་སུ་བཟུང་ཞིང་གར་དང་གླུ་དང་རྒོད་པ་དང་འགྱིང་བག་གི་བྱ་བ་རྣམས་བཅུ་འགྱུར་ལས་ཀྱང་ལྷག་པར་བྱེད་པར་རྩོམ་མོ།

དེ་ལྟར་མཚོ་དེ་ན་ལྷ་དེ་དག་རྣམས་དགའ་བར་བྱེད་ཅིང་རྩེ་བར་ཡང་བྱེད་དོ།

དེ་ནས་དེ་དག་རྣམས་ཀུན་ཏུ་མཐོང་ནས་བྱང་ཆུབ་སེམས་དཔའ་མཆོག་ཏུ་ཡོངས་སུ་སྨིན་པའི་བློ་དང་ལྡན་པ་དེས་ཚིགས་སུ་བཅད་པ་འདི་དག་འཆད་པར་བྱེད་པ།

ཇི་ལྟར།

བག་མེད་པ་ནི་བག་ཡོད་པས།

གང་ཚེ་མཁས་པས་སྤང་བར་གྱིས།

ཤེས་རབ་ཁང་བཟངས་རྩེར་བྱུང་བ།

བདེ་ལེགས་ཐོབ་པ་བླ་ན་མེད།

གང་ཞིག་བག་མེད་རྣམས་སྤོང་བའི།

ལམ་འདི་དག་ནི་ཞི་བ་མཆོག །

ལམ་འདི་ཡིས་ནི་མྱ་ངན་འདས།

ཆེན་པོར་མཁས་པར་འགྲོ་བ་ཡིན།

ལམ་གྱི་གེགས་ནི་མི་བཟད་པ།

སེམས་རྒྱུད་སུན་འབྱིན་བྱེད་པ་པོ།

ཆོས་ཀྱི་ཟམ་རྣམས་གཅོད་པ་ནི།

བག་མེད་པར་ནི་ཡོངས་སུ་བསྒྲགས།

དྲན་པ་སུན་འབྱིན་མ་བགྲུངས་པ།

ཐར་པའི་ལམ་ནི་འཇིག་པ་པོ།

ཕ་རོལ་ངན་སོང་རྣམས་སུ་ཁྲིད།

བག་མེད་པས་ནི་ཀུན་ཏུ་འཇུག །

འདི་ཡིས་ཡིད་དཀྲུགས་པ་ཡིས་ནི།

བདག་གིས་ཕན་པ་མི་ཤེས་སོ།

ཤི་བ་ཡི་ནི་རོ་བཞིན་དུ།

ཚིག་མིན་དོན་ཡང་རིག་པ་མིན།

དེ་ཕྱིར་འདི་ནི་ཕྱུགས་མཚུངས་པའི།

ལྷ་ཡི་ལུས་ནི་འཛིན་པ་ཡིན།

བག་མེད་པས་ནི་ཉེར་བཅོམ་པའི།

རྨོངས་པ་གར་དང་རྒོད་པ་ཡང་།

སྐྱེ་དང་འཆི་འཕོ་བ་གཞན་གྱིས།

འཇིག་འགྱུར་བ་དང་དངངས་པར་བྱེད།

གང་ཞིག་བག་མེད་རྗེས་སུ་རྒྱུག །

སྲིད་

གསུམ་འབྱུང་པོ་ཐམས་ཅད་རྣམས།

སྐྱོན་རྣམས་ཐམས་ཅད་སྐྱེད་བྱེད་པ།

འཆིང་དང་སྡིག་པའི་ལས་རྣམས་དང་།

ཆོས་ཀུན་དྲན་པ་ཉམས་བྱེད་པར།

བག་མེད་དགྲ་ནི་རབ་ཏུ་འཇུག །

ནང་གི་བདག་ཉིད་ལས་རྣམས་དང་།

ཕྱི་རོལ་ཇི་ལྟར་ཡང་མིན་ཏེ།

བག་མེད་ཉེར་བཅོམ་སྐྱེ་བོ་རྣམས།

ཆུད་ཟོས་ཡིད་ནི་སྐྱེད་པར་བྱེད།

གང་ཡང་འདི་ནི་སུས་འདོན་ལས།

དེ་ནི་བག་མེད་པས་འགོགས་སོ།

ཁྲིམས་བྲལ་ངོ་ཚ་མེད་པ་ཡི།

མིག་ནི་བག་མེད་པས་ཉེར་བཅོམ།

རྩེད་མོ་ཡིས་ནི་ཡིད་བྲེལ་བས།

གར་རོལ་གླུ་སྙན་པ་ཡིས་གཡེངས།

ལྷ་རྫས་ཡུལ་གྱིས་ངོམས་པ་མེད།

མཐོ་རིས་གནས་ནས་ཉམས་པར་འགྱུར།

འཇིགས་པའི་གནས་ལ་དགའ་བ་དེ།

བག་མེད་པས་ནི་རྣམ་རྨོངས་སོ།

ལམ་ལ་ལམ་དུ་མི་རིག་པའི།

མི་ནི་དམུས་ལོང་དང་མཚུངས་སོ།

དེ་ལྟར་གཞན་ལ་ཕན་པ་བྱེད་པའི་དུས་བཟངས་དེས་ལྷ་དེ་དག་རྣམས་མངོན་པར་མཐོང་ནས།

ཀུན་ནས་བརྗོད་པ་དང་ལྡན་པའི་བྱ་དེ་དག་རྣམས་ཀྱི་དབུས་སུ་སོང་ཞིང་མཆོག་ཏུ་མིག་དང་ཡིད་འཕྲོག་པར་བྱེད་པའི་ངང་པ་དེ་དག་རྣམས་ཀྱི་ནང་དུ་ཕྱིན་པར་གྱུར་ནས་ཀྱང་རྗེས་སུ་འདོམས་པར་བྱེད་པའི་ཚིགས་སུ་བཅད་པ་འདི་རྣམས་ཇི་ལྟ་བར་བརྗོད་ཀྱང་འགགས་པའི་ཡིད་བཞིན་དུ་ལྷ་དེ་དག་རྣམས་ཀྱིས་ཐོས་པར་ཡང་མི་འགྱུར་རོ།

དེ་ལྟར་བརྩི་བགྲང་ཡང་མི་བྱེད་པར་གར་དང་རྒོད་པ་དང་བཅས་ནས་རྔ་སྐད་ཡན་ལག་ལྔ་དང་ལྡན་པ་མཚུངས་པ་དང་སྙན་པ་དང་ཐམས་ཅད་ཀྱི་སེམས་དང་ཡིད་འཕྲོག་པར་བྱེད་པ་རྣམས་ཀྱིས་ཀུན་ནས་འཁྲིད་པར་འགྱུར་ཏེ།

ཡུལ་གཞན་ལྔ་པོ་རྣམས་ལ་ཡང་ཡིད་ཤིན་ཏུ་རྣམ་པར་ཆགས་པའི་ཕྱིར་ན་ཐོས་པར་མི་འགྱུར་རོ།

དེ་ལྟར་ཡང་མཚོ་དེ་ཀུན་ཏུ་བསྐོར་ནས་གནས་པར་བྱེད་དོ།

དེ་ཁོ་ན་བཞིན་དུ་ཡུལ་རྣམས་ལ་རྣམ་པར་ཆགས་པའི་ཡིད་ཅན་རྣམས་བག་མེད་པས་བག་མེད་པར་གནས་པའི་འཐབ་བྲལ་བའི་ལྷ་རྣམས་ལ་ཆོས་སྟོན་པར་བྱེད་པ་ནི་དགེ་བ་ཆེན་པོ་རྣམས་དང་ལྡན་པའི་སེམས་ཅན་གསུམ་པོ་འདི་དག་རྣམས་ཡིན་པས་ན།

འདི་ལྟ་སྟེ།

མུ་སུ་ལུན་དྷ་དེ་དང་ངང་པའི་རྒྱལ་པོ་དུས་བཟངས་དང་རྨ་བྱའི་རྒྱལ་པོ་

རྣམ་པར་བཀྲ་བ་གསུམ་པོ་དེ་དག་རྣམས་ནི་གཞན་རྗེས་སུ་འཛིན་པ་ལ་རབ་ཏུ་ཞུགས་པས་ཆོས་སྟོན་པར་བྱེད་པ་ཡིན་ཏེ།

ཁ་ཅིག་ནི་རང་སངས་རྒྱས་ཀྱི་བྱང་ཆུབ་ལ།

ཁ་ཅིག་ནི་ཉན་ཐོས་ཀྱི་བྱང་ཆུབ་ལ་རབ་ཏུ་འགོད་པར་བྱེད་པ་ཡིན་ནོ།

དེ་ལྟར་ངེས་པར་གནས་པ་རྣམས་ནི་དེ་དག་དགེ་ལེགས་དང་ལྡན་པ་རྣམས་ཡིན་ཏེ།

བདུད་ཀྱི་ཡུལ་ལས་བྲོས་པར་འདོད་པ་རྣམས་ཡིན་ནོ།

དེ་ནས་བདུད་སྡིག་ཅན་དེ་ཉིད་འདི་སྙམ་དུ་སེམས་ཏེ།

ཇི་ལྟར་བདག་གནས་པའི་ཡུལ་སྟོངས་པར་བྱེད་པ་རྣམས་ནི་མིའི་འཇིག་རྟེན་ན་དགེ་སྦྱོང་གིས་སོ།

རྒྱལ་ཆེན་རིས་བཞི་ནི་རྒྱལ་པོ་ཆེན་པོ་བཞི་ཡིན་ནོ།

སུམ་ཅུ་རྩ་གསུམ་ན་ནི་ཀཽ་ཤི་ཀ་ཡིན་ནོ།

མཚེ་མ་ན་ནི་མུ་སུ་ལུན་དྷ་དང་དུས་བཟངས་དང་རྣམ་པར་བཀྲ་བ་རྣམས་ཡིན་ནོ།

དགའ་ལྡན་ན་ནི་རབ་ཏུ་ཞི་བ་ཡིན་ནོ།

ལྷན་ཅིག་སྤྱོད་པའི་འཁོར་དེ་དག་རྣམས་གང་ཡིན་པ་ཐམས་ཅད་ཀྱིས་ཀྱང་ཐོས་པར་མི་འགྱུར་བ་ཡུལ་རྣམས་དང་བདག་གི་ལྷ་དང་མི་རྣམས་ཀྱང་གཏི་མུག་གིས་རྨོངས་པར་བྱའོ།

འཕྲུལ་དགའ་བ་ཞེས་བྱ་བ་གང་ཡིན་པ་རྣམས་ནི་མ་གཏོགས་པ་རྣམས་ཀྱིས་མི་ཐོས་པར་བྱའོ།

བདག་གི་ས་པའི་ཤིན་ཏུ་སྟོབས་དང་ལྡན་པ་དེས་ཀྱང་བདག་གིས་ཕྱིར་བཟློག་པའི་བཀོད་པ་བྱ་བ་ནུས་ཀྱིས།

ཐ་མར་གྱུར་ན་ཡང་ངས་གང་ན་འཐབ་བྲལ་བའི་ལྷ་རྣམས་ཡོད་པ་དེར་ཤེས་རབ་དང་ཕ་རོལ་གནོན་པས་མཚུངས་པར་གྱུར་པའི་འཁོར་བཙལ་ལ་གཏང་བར་བྱའོ།

དེ་ནས་དེ་ལྟར་བདུད་སྡིག་ཅན་དེས་རིག་ནས་བློན་པོ་དང་ལྷན་ཅིག་ཏུ་བགྲོས་ནས།

མུ་སུ་ལུན་དྷ་དེ་དང་དུས་བཟངས་དེ་དང་རྣམ་པར་བཀྲ་བ་དེ་དང་ཡང་བརྩད་པར་བྱ་བའི་དོན་དུ་ཕོ་ཉ་བཏང་བ་རྣམས་བློ་གྲོས་མཁས་པ་དང་སྤྲུལ་པ་ལ་མཁས་པ་དང་གཟི་བརྗིད་ཆེ་བ་རྣམས་འདི་ལྟ་སྟེ།

དགའ་བ་དང་བག་མེད་པ་དང་རྣམ་པར་རྨོངས་པར་བྱེད་པ་རྣམས་སོ།

ཀྱེ་ཁྱེད་རྣམས་མཚེ་མའི་ལྷ་རྣམས་ཀྱི་ནང་དུ་སོང་ལ་མུ་སུ་ལུན་དྷ་དང་དུས་བཟངས་དང་རྣམ་པར་བཀྲ་བ་རྣམས་ཆོས་སྟོན་པའི་བར་ཆད་གྱིས་ཤིག །

དེ་ནས་དེའི་ཚིག་ཐོས་པར་གྱུར་ནས་གང་ན་འཐབ་བྲལ་བའི་ལྷའི་རིགས་ཡོད་པ་དེར་ངེས་པར་བབས་པར་འགྱུར་རོ།

ཞུགས་པར་གྱུར་ནས་ཀྱང་གང་ན་

བྱའི་རྒྱལ་པོ་དུས་བཟངས་ཡོད་པ་དེར་ཀུན་ནས་ཉེ་བར་སོང་ངོ་།

ཀུན་ནས་ཉེ་བར་འོངས་པ་ཡང་མཐོང་བར་གྱུར་ནས།

ལྷ་དེ་དག་རྣམས་ལ་བརྟེན་པ་དང་རྣམ་པར་གསལ་བ་དང་རྒྱ་ཆེ་བར་གྱུར་པའི་རྗེས་སུ་བསྔགས་པར་བྱེད་པའི་ཚིགས་སུ་བཅད་པ་རྣམས་བཤད་པ།

འདི་ལྟ་སྟེ།

བག་མེད་པ་ཡི་དུས་འདི་མིན།

དགའ་བའི་དུས་ནི་ནམ་ཡང་མིན།

རྣམ་རྨོངས་སྐྱེད་པ་འདི་དག་ཀྱང་།

འཆི་བདག་སྟོབས་པོ་ཆེ་ཡི་དུས།

དགའ་བ་དུ་བ་བག་མེད་མེས།

ལྷ་རྣམས་ཀུན་ནི་སྲེག་པ་ཡིན།

ཡུལ་ལ་གཏི་མུག་གིས་རྨོངས་པ།

མིག་མེད་པས་ཀྱང་མ་རིག་གོ།

ལུས་ཅན་རྣམས་ཀྱི་འདུ་བྱེད་ནི།

རྣམ་པར་ཆད་པ་མེད་པར་མཐོང་།

དེ་ལྟར་ཡུལ་ལས་ཀུན་རྨོངས་པས།

གང་ཕན་པ་ནི་རྟོགས་པ་མིན།

དེ་ཡིས་དེའི་ཚིག་རྣམས་ཐོས་ནས་འཐབ་བྲལ་བའི་ལྷ་རྣམས་ཉིད་དང་འདྲ་བར་བྱས་ནས་བག་མེད་པས་སྨྲས་པ།

ཀུན་དགའ་མཆོག་གི་མཐའ་ཡས་པ།

བག་མེད་དགའ་བ་སྐྱེད་བྱེད་པ།

བདེ་ཀུན་རབ་ཏུ་འཕེལ་བྱེད་པ།

དེ་ཁྱོད་ཅི་ཡི་ཕྱིར་མི་འཆད།

དུས་བཟངས་ཀྱིས་རབ་ཏུ་བརྗོད་པ།

ཀུན་དགའ་བག་མེད་པ་འདིས་ནི།

བདེ་བ་ཐམས་ཅད་འཇོམས་པར་བྱེད།

བག་མེད་སྡུག་བསྔལ་སྐྱེད་པ་པོ།

དེ་ཕྱིར་རྟག་ཏུ་དེ་ཁྱོད་འཆད།

བག་མེད་པས་སྨྲས་པ།

བདེ་བ་ཡི་ནི་ཡུལ་རྣམས་དང་།

བག་མེད་ལྷ་ཡི་བུ་མོ་དང་།

དེ་བཞིན་དུ་ནི་གླུ་རྣམས་ཀྱང་།

བག་མེད་བདེ་བ་ཡིན་པར་བཤད།

དུས་བཟངས་ཀྱིས་བརྗོད་པ།

མི་རྣམས་ཡུལ་ནི་གང་སྐྱེས་པ།

སྡུག་བསྔལ་ཡུལ་ནི་སྐྱེས་པ་ཡིན།

དེ་ཡི་རྩ་བ་གཅོད་བྱེད་པ།

གང་གིས་མི་ནི་འོག་ཏུ་འགྲོ།

བག་མེད་པས་སྨྲས་པ།

ནགས་དང་ཉེ་བའི་ནགས་དང་བྲག །

ཁྲུས་ཀྱི་རྫིང་བུ་པད་མའི་ཚལ།

ཁང་བཟངས་རྩེ་དང་ཀུན་དགའ་ཚལ།

བདག་ནི་བག་མེད་པ་ཡིས་དུས།

དུས་བཟངས་ཀྱིས་སྨྲས་པ།

དགོན་པ་དང་ནི་ཞི་བའི་ཚལ།

རི་དང་ནགས་ཀྱི་ནང་དུ་ཡང་།

བག་ཡོད་དགའ་བ་ཞི་བ་ཡིས།

བཅིངས་ལས་ཐར་པར་འགྲོ་བ་ཡིན།

སེམས་རྨོངས་པ་ཡི་མི་གང་དག །

བག་མེད་པས་ནི་དམྱལ་བར་འགྲོ།

དེ་བཞིན་དུ་ནི་

དུད་འགྲོར་ཡང་།

ཡི་དགས་སུ་ཡང་སྐྱེ་འགྱུར་ཏེ།

དེ་ལྟར་དུས་བཟངས་ཀྱིས་བརྗོད་པ་ཡིན་ཏེ།

བདུད་ཀྱི་ཕྱོགས་ཀྱི་བག་མེད་པ་དང་དྲི་བ་དང་ཕྱིར་ལན་འདེབས་པ་རྣམས་བརྗོད་ནས།

ཇི་སྲིད་དུ་རིན་པོ་ཆེའི་འོད་ཀྱིས་ཉེ་བར་གསལ་བའི་ཕུག་གང་ཡིན་པ་དེའི་ནང་དུ་ཞུགས་པའི་བར་དུ་སྟེ།

དེ་ནི་ཡང་ཕལ་ཆེར་ནི་མུ་སུ་ལུན་དྷ་དེ་བག་མེད་པ་སྤང་བར་བྱ་བསྒོམ་པར་བྱེད་དོ།

གང་ཡང་ལྷ་གཞན་དག་དེའི་ལྷན་ཅིག་སྤྱོད་པར་གྱུར་པ་དེ་དག་རྣམས་ནི་རྒྱུ་མཚན་དེ་དག་གིས་ལྷ་ཉིད་ཀྱང་བརྒྱ་སྟོང་ཕྲག་དུ་མ་རྣམས་ཀྱིས་ཡོངས་སུ་བསྐོར་ཅིང་གར་དང་གླུ་དང་རོལ་མོ་རྣམས་ཀྱི་སྒྲ་དང་ལྡན་པས་ནམ་མཁའི་དཀྱིལ་མ་ལུས་པ་རྣམས་ཀུན་ཏུ་གང་བར་གྱུར་པས་མཚོ་ཆེན་པོ་དེར་འོངས་པར་གྱུར་ཏོ།

གང་ཡང་ལྷ་གཞན་དག་རྣམས་ནི་དེ་དག་གི་རྗེས་སུ་འགྲོ་བར་གྱུར་ནས་དེ་དག་རྣམས་དེ་ན་བག་མེད་པ་བྱེད་དོ།

གང་ཡང་སེམས་མཉམ་པར་བཞག་པ་དེ་དག་རྣམས་ཀྱང་ཤིན་ཏུ་མྱུར་བར་འོང་བར་གྱུར་ཏེ།

ཇི་སྲིད་དུ་བྱའི་རྒྱལ་པོ་དུས་བཟངས་དང་བདུད་ཀྱི་ཕྱོགས་ཀྱི་བག་མེད་པ་དག་དྲི་བ་དང་ལན་བྱས་ཟིན་པར་མ་གྱུར་གྱི་བར་དུའོ།

དེ་ནས་མུ་སུ་ལུན་དྷ་དེས་དེ་དག་རྣམས་ཐམས་ཅད་དུས་བཟངས་ལས་ཐོས་པར་གྱུར་ཏེ་སྔ་མ་བཞིན་ནོ།

དེ་ནས་མུ་སུ་ལུན་དྷ་དེའི་ཡིད་ཀྱིས་རིག་པར་གྱུར་ནས་བག་མེད་པ་ལ་འདི་སྐད་བརྗོད་དོ།

ཁྱོད་ནི་གདོན་མི་ཟ་བར་བདུད་སྡིག་ཏོ་ཅན་གྱི་ཕྱོགས་སུ་གྱུར་པའི་བག་མེད་པ་འདི་ཡིན་ཏེ་འོང་གིས་དེའི་ཡང་ཕྱོགས་བྱེད་པའི་འཁོར་གསུམ་ཡིན་པར་བདག་ཅག་གིས་ལྷ་གཞན་དག་གི་དྲུང་ནས་ཐོས་སོ།

འདི་ལྟ་སྟེ་བག་མེད་པ་དང་རྒོད་པ་དང་རྣམ་པར་རྨོངས་པའོ།

འཇིག་རྟེན་རྨོངས་པ་རྣམས་ཕྱིར་ཞིང་ཉིད་དུ་ཆེས་ལྷག་པར་རྨོངས་པར་བྱེད་དོ།

གང་ཆུངས་ཀྱང་བདག་གིས་འདི་དག་དང་རྒོད་པ་དང་མ་བསྡམས་པ་ལ་སོགས་པ་རྣམས་ཀྱི་ལན་དྲི་བ་དང་ཕྱིར་ཞིང་དྲི་བ་དང་ལན་གྱི་ཆོས་ཀྱི་རྣམ་གྲངས་ཆེན་པོ་བཅུ་གཅིག་པ་ཞེས་བྱ་བ་ཆོས་དང་ལྡན་པས་བརྩད་པར་བྱའོ།

དེ་ནས་འཐབ་བྲལ་བ་རྣམས་ཀྱི་མངའ་བདག་གིས་དེ་ལྟར་རིག་ནས་དུས་བཟངས་དེ་དང་ཡང་ལྷན་ཅིག་ཏུ་འགྲོ་བར་བྱས་པར་གྱུར་ཏེ།

ནམ་མཁའི་དཀྱིལ་དུ་འཕགས་ནས་

པད་མའི་སྙིང་པོ་ལ་ཉེ་བར་གནས་ཏེ་བག་མེད་པ་ལ་མངོན་པར་དགའ་བའི་ལྷ་བརྒྱ་ཕྲག་མང་པོ་རྣམས་ཀྱིས་ཡོངས་སུ་བསྐོར་ནས་འདི་སྐད་ཅེས་བརྗོད་དོ།

དྲི་བ་དང་ཕྱིར་ཞིང་དྲི་བ་དང་ལན་ཞེས་བྱ་བའི་ཆོས་ཀྱི་རྣམ་གྲངས་བཅུ་གཅིག་པ་ཞེས་བྱ་བའི་ཆོས་བཤད་པར་བྱ་ཡིས་མཉན་པར་གྱིས་ཤིག །

བག་མེད་པ་གང་བཅོམ་ལྡན་འདས་འོད་སྲུང་གིས་གསུངས་པ་རྣམས་བག་ཡོད་པ་ལ་མངོན་པར་དགའ་བ་བཀྲ་ཤིས་ཞེས་བྱ་བའི་སྔོན་གྱི་ལྷ་ལ་བདག་གིས་ཐོས་པའི་ཆོས་ཀྱི་རྣམ་གྲངས་གང་ཡིན་པ་དེ་ལེགས་པར་རབ་ཏུ་ཡིད་ལ་བྱས་ཏེ་ཉོན་ཅིག །

ལྷ་རྣམས་ཐམས་ཅད་དང་དུས་བཟངས་ཐོག་མར་གྱུར་པའི་ཀུན་ནས་བརྗོད་པ་དང་ལྡན་པའི་བྱ་རྣམས་ཐམས་ཅད་དང་བག་མེད་པར་ཉན་ནོ།

བདུད་ཀྱི་ཕྱོགས་རྣམས་ཀྱང་ཉན་ཏེ།

ཕྱིན་ཅི་ལོག་ཏུ་སྨྲ་བ་འཇིག་རྟེན་པ་རྣམས་ལ་ཕན་པ་མ་ཡིན་པ་བྱེད་པ་བདུད་ཀྱི་ཕྱོགས་རྣམས་ཀུན་ཏུ་གནས་སོ།

དྲི་བ་དང་ཕྱིར་ཞིང་དྲི་བ་དང་ལན་གྱི་ཆོས་ཀྱི་རྣམ་གྲངས་བཅུ་གཅིག་པ་དེ་དག་རྣམས་ཀྱང་གང་ཞེ་ན་འདི་ལྟ་སྟེ།

ཆོས་བཅུ་གཅིག་པོ་འདི་དག་རྣམས་ནི་ཆོས་བཅུ་གཅིག་གིས་རབ་ཏུ་སྤང་བར་བྱ་སྟེ།

ཡང་དག་པ་ཇི་ལྟ་བ་བཞིན་དུ་འདོད་པ་དང་མྱ་ངན་ལས་འདའ་བར་འགྲོ་བར་བྱེད་པ་དང་།

བདུད་ཀྱི་ཡུལ་རྣམས་ལ་གནས་པར་མི་འདོད་པ་དང་།

འཁོར་བའི་འཆིང་བ་རྣམས་ཀྱི་འཇིགས་པས་དང་།

དགོན་པ་ཞི་བ་རྣམས་སུ་གནས་པས་དང་།

གཅིག་ཏུ་དགའ་བ་རྣམས་ཀྱིས་དང་།

ཡང་དག་པ་ཇི་ལྟ་བ་ལ་རེ་བར་གྱུར་པ་དང་།

གཏི་མུག་གཞོམ་པར་འདོད་པ་དེ་དག་རྣམས་ཀྱིས་ཡིན་ནོ།

བཅུ་གཅིག་པོ་རྣམས་ཀྱིས་རབ་ཏུ་སྤོང་བར་བྱེད་པ་དང་།

ཆོས་བཅུ་གཅིག་པོ་དེ་དག་རྣམས་གང་ཡིན་པ་ཡང་གང་དག་ཞེ་ན།

འདི་ལྟ་སྟེ་རྒོད་པ་ནི་འདུལ་བས་སོ།

མ་བསྡམས་པ་ནི་སེམས་རྩེ་གཅིག་པས་སོ།

ཚུལ་ཁྲིམས་འཆལ་པ་ནི་སྐྱེས་བུ་དམ་པ་ལ་རྟེན་པས་སོ།

ལེ་ལོ་ནི་བརྩོན་འགྲུས་བརྩམས་པས་སོ།

གྲོང་དང་གྲོང་ཁྱེར་རྣམས་སུ་རབ་ཏུ་འཇུག་པའི་སྤྱོད་པ་ལ་དགའ་བ་ནི་གཅིག་པུ་དགོན་པར་གནས་པས་སོ།

འདོད་ཆེན་པོ་ནི་ཆོག་ཤེས་པས་སོ།

གཉེན་འདུན་ལྟ་བ་ལ་མངོན་པར་དགའ་བ་རྣམས་ནི་འགྲོན་པོར་ཡུན་རིང་

དུ་གནས་པ་ལ་མངོན་པར་དགའ་བས་སོ།

དོན་མེད་པར་སྨྲ་བ་ནི་ངག་ཡང་དག་པར་བསྡམས་པས་སོ།

རྩབ་ཧྲལ་ཉིད་ནི་བརྟན་པས་སོ།

དབུལ་པོ་རྣམས་ཀྱང་སྦྱིན་པས་སོ།

མི་ཤེས་པ་ནི་ཤེས་པས་སོ།

ཆོས་བཅུ་གཅིག་པོ་དེ་དག་རྣམས་ནི་ཀུན་ནས་ཉོན་མོངས་པ་རྣམས་ཀྱི་དྲི་མ་དང་ཀུན་ནས་ཉོན་མོངས་པ་ཅན་གྱི་འཆིང་བར་གྱུར་པ་བག་མེད་པར་གྱུར་པའི་ལྗོན་ཤིང་རྣམས་ཀྱི་ཡལ་ག་རྒྱས་པར་གྱུར་པ་ཡིན་པས་བདུད་ཀྱི་ཡུལ་ལས་འདའ་བར་འདོད་པ་རྣམས་དང་འཁོར་བའི་འཇིགས་པས་སྐྲག་པ་རྣམས་དང་བག་མེད་པ་ཕམ་པར་བྱ་འདོད་པ་རྣམས་ཀྱིས་སྤང་བར་བྱའོ།

འཁོར་བ་རྣམས་ཐམས་ཅད་ནི་བག་མེད་པའི་རྩ་བ་ལས་ཡིན་ནོ།

བག་ཡོད་པའི་རྩ་བ་ལས་ནི་ཐར་པ་ཡིན་ནོ།

འཁོར་བ་ལས་འབྲོས་པར་འདོད་པ་རྣམས་ཐམས་ཅད་ལ་འདི་ཉིད་བཅོམ་ལྡན་འདས་ཀྱིས་གསུངས་པ་ཡིན་ནོ།

དེ་ལ་འདུལ་བ་ལ་མངོན་པར་དགའ་བ་རྣམས་དང་།

འདུལ་བ་འདོད་པ་རྣམས་དང་།

སེམས་ཅན་རྣམས་ཐམས་ཅད་སྡུག་པ་དང་འཐུན་པ་དང་ཡིད་དུ་འོང་བར་གྱུར་པ་དེ་དག་རྣམས་ཐམས་ཅད་ཀྱིས་ཀྱང་ཞེ་ལྡོག་པར་ལྟ་བའི་ཆོས་རྒོད་པ་ཞེས་བྱ་བ་གང་དག་ཞེ་ན།

འདུལ་བ་ལ་མངོན་པར་དགའ་བ་དེ་དག་དང་དེ་དག་རྣམས་ཀྱིས་ཀྱང་སྡིག་པའི་ཆོས་འདི་དག་རབ་ཏུ་སྤང་བར་བྱའོ།

དེ་ལ་རྒོད་པ་ཡང་རྣམ་པ་ལྔ་ཡིན་ནོ།

འདི་ལྟ་སྟེ་གྲོང་དང་གྲོང་ཁྱེར་དུ་འཇུག་པ་རྣམས་ལ་མགྱོགས་པར་ལམ་དུ་འགྲོ་བ་དང་།

འགྲོ་བར་བྱེད་པ་ན་ཡང་ཀུན་ནས་མ་བསྡམས་པ་དང་།

ཁ་ཅིག་ནི་ལམ་དུ་འགྲོ་བ་ན་གོས་ཚགས་ལྷོད་པ་དང་།

ཁ་ཅིག་ནི་ལམ་ན་གོས་རྣམ་པར་འཕྱར་བར་བྱེད་པ་དང་།

འཁྲུལ་པ་ཡང་དང་ཡང་དུ་འབྱུང་བའམ་སེམས་མཉམ་པར་མ་བཞག་པའོ།

རྣམ་པ་དེ་ལྟ་བུ་དེ་དག་རྣམས་གཞན་གྱིས་མཐོང་བར་གྱུར་ན།

དེ་མ་ཐག་ཏུ་རྣམ་པར་སྡང་བར་འགྱུར་རོ།

དེ་ལྟར་འགྲོ་བར་བྱེད་པ་རྣམས་ཀྱི་ཀུན་ནས་མ་བསྡམས་པའི་འགྲོས་འདི་ཡང་གང་ལས་ཡིན་ན།

ཆུང་དུ་ན་འདི་ནི་རྒྱགས་པའམ་ཡིད་ལ་བྱེད་པ་དང་བྲལ་བ་ཡིན་ཏེ།

དེ་བཞིན་དུ་རྒོད་པ་རྣམས་ནི་རྣམ་པ་དུ་མ་ལས་ཡིན་ནོ།

དེ་དག་རྣམས་ཀྱང་ཀུན་ནས་བསྡམས་པའི་

སྤྱོད་ལམ་གྱི་འགྲོས་ཀྱིས་དང་།

གཉའ་ཤིང་གང་ཙམ་དུ་ལྟ་ཞིང་འགྲོ་བ་དང་།

གོས་རྣམས་ཀྱི་ཚགས་བསྡམས་པ་དང་།

མི་འཕྱར་བས་ཀྱང་སྟེ་པུས་མོ་ལས་སོར་བཞི་ཙམ་གྱིས་ལྷག་པར་བླ་གོས་རིང་བ་ཡིན་པ་དང་།

དཔུང་པ་གཉིས་མི་བསྐྱོད་པས་ལྷའི་འཇིག་རྟེན་གྱི་བག་མེད་པ་རྣམས་ནི་བག་ཡོད་པས་འཇོམས་པར་འགྱུར་རོ།

དགེ་སློང་ངམ་དེ་ལྟ་བུའི་རིགས་ཅན་རྣམས་ཀྱིས་རབ་ཏུ་གཞོམ་པར་བྱ་བའི་བག་མེད་པ་བཞི་ལས་གཞན་ལྷག་པར་གྱུར་པ་ཡང་གང་ཞེ་ན།

གང་ཅུང་ཟད་ཅིག་སྨྲ་བར་གྱུར་པ་ན་ཡང་ལེགས་པར་མ་བརྟགས་པར་བྱེད་པ་ཡིན་ནོ།

གང་གི་ཚོད་ཀར་གྱུར་པ་དེའི་ཚོད་ཀ་རྣམས་ཀྱང་ཀུན་ནས་རིག་པར་མི་འགྱུར་རོ།

དེ་སྦྱིན་པ་པོ་དང་སྦྱིན་བདག་གི་ཁྱིམ་དུ་སྒྲས་ལེགས་པར་འཇུག་པར་བྱེད་པ་རྣམས་ནི་སྡོམ་པར་བྱེད་པ་ཡིན་ཏེ།

སེ་གོལ་གྱི་སྒྲ་མ་བྱས་པར་འཇུག་པར་བྱེད་པ་ཡིན་ནོ།

སྟན་ཡང་ངན་པར་འཛིན་པར་བྱེད་དོ།

བསྡམས་པ་མེད་པ་དུ་མ་རྣམས་སྨྲ་བ་ཡིན་གྱི།

སྨྲ་བ་དང་མི་སྨྲ་བ་རྣམས་ཀྱི་ཚོད་རིག་པར་འགྱུར་བ་ནི་མ་ཡིན་ནོ།

འདུག་པ་ཉིད་ན་སྐད་འཕང་མཐོན་པོས་སྨྲ་བར་འགྱུར་བ་ཡིན་ནོ།

བུད་མེད་རྣམས་ལ་རྟོག་དཔྱོད་འཇུག་པར་བྱེད་དོ།

བབ་ཆོལ་དུ་རྒོད་པར་བྱེད་དོ།

བབ་ཆོལ་དུ་ཁྲོ་བར་བྱེད་དོ།

འཁོར་རྣམས་ལ་ཡང་སྔ་ཕྱིར་ལྟ་བར་མི་བྱེད་དོ།

དེ་ལྟར་རྒོད་བག་ཏུ་སྤྱོད་པ་ཀུན་ནས་མ་བསྡམས་པར་འཇུག་པར་བྱེད་པའི་དགེ་སློང་རྣམས་ནི་མི་སྡུག་པ་དང་།

ཡིད་དུ་མི་འོང་བར་འགྱུར་ཞིང་འདི་དག་རྣམས་ལས་གཞན་པ་རབ་ཏུ་ཞི་བའི་ཆ་བྱད་དང་།

སྤྱོད་ཚུལ་ཅན་ཡོད་དམ་ཞེས་རྗོད་པར་ཡང་བྱེད་དོ།

ཇི་ལྟར་སྐྱེས་པ་རྣམས་སམ་དེ་ལས་གཞན་དེའི་རིགས་ཅན་རྣམས་ཀྱང་རུང་སྟེ།

ཀྱེ་མ་དགེ་སློང་འདི་དག་ནི་རྒོད་བག་ཅན་ཡིན་ནོ།

ཡང་གང་གི་ཚེ་ངག་ཀུན་ནས་ལེགས་པར་བསྡམས་པར་གྱུར་པ་ན་སྔ་ཕྱི་ཚིག་རྣམས་ཀུན་ལེགས་པར་འབྲེལ་པར་རྗོད་པར་བྱེད་དོ།

སྐྱེས་བུ་གཞན་དག་རྣམས་མཐོང་བར་གྱུར་པའམ་དེ་ཉིད་མཐོང་བར་གྱུར་ཀྱང་རུང་།

སྦྱིན་པ་པོ་དང་སྦྱིན་བདག་རྣམས་སམ་དེའི་རིགས་ཅན་གཞན་དག་རྣམས་ཀྱང་རུང་སྟེ།

ཡུལ་དང་དུས་སུ་རིགས་པ་དང་འགལ་

བ་མེད་པར་དལ་བུས་སྨྲ་བར་བྱེད་དོ།

ཞི་བ་དང་གོ་བར་གྱུར་པ་དང་ཆོས་ཉིད་དང་མི་འགལ་བའི་ངག་རྣམས་ཇི་ལྟར་རྗོད་པར་བྱེད་པ་དེ་བཞིན་དུ་སྒྲུབ་པར་ཡང་བྱེད་དོ།

བུད་མེད་རྣམས་ལ་རྟོག་དཔྱོད་མི་བྱེད་དོ།

སེ་གོལ་གྱི་སྒྲ་བྱས་ནས་ལེགས་པར་འཇུག་པར་ཡང་བྱེད་དོ།

དུས་ཀྱང་རིག་པར་འགྱུར་རོ།

ཕྱིར་འབྱུང་བར་འགྱུར་བའི་ངོ་བོ་ཡང་ཤེས་པར་འགྱུར་བ་དང་ཟུར་གྱིས་གོ་བར་ཡང་འགྱུར་རོ།

ཆོས་གོས་རྣམས་ཀྱང་རྣམ་པར་འཕྱར་བར་མི་བྱེད་དོ།

དཔུང་པ་དག་བསྐྱོད་པར་ཡང་མི་བྱེད་དོ།

གློ་དྲག་པོར་ལུ་བར་ཡང་མི་བྱེད་དོ།

ངག་གིས་འཕྱ་བར་ཡང་མི་བྱེད་དོ།

དྲིས་པ་དང་གཞན་དག་གུས་པར་གྱུར་པས་ཕྱི་ནས་ཚིག་རྗོད་པར་བྱེད་དོ།

དལ་བ་དང་སྙན་པ་དང་ཆོས་དང་ལྡན་པ་རྣམས་ཀྱིས་ཀྱང་སྟེ།

དེ་ལྟར་རྒོད་བག་ནི་འདུལ་བས་འཇོམས་པར་བྱེད་དོ།

གཞལ་ཡང་འདུལ་བས་རྒོད་པ་ཀུན་ནས་འཇོམས་པར་བྱེད་དོ།

འདི་ཡང་གང་དག་ཡིན་ཞེ་ན་འདི་ལྟ་སྟེ་ཁྱིམ་རྣམས་སུ་དེ་འཇུག་པར་བྱེད་པ་ན་དེ་ན་གླུ་དང་གར་དང་རོལ་མོའི་སྒྲ་རྣམས་དང་གད་མོ་དང་འགྱིང་བག་དང་ཡོངས་སུ་སྤྱོད་པ་དང་གཞན་དག་གིས་རྗོད་པ་དང་ཕན་ཚུན་དུ་དགོད་པ་རྣམས་ལ་ཉན་པར་མི་བྱེད་དོ།

རོ་མྱོང་བར་ཡང་མི་བྱེད་དོ།

དེ་དག་རྣམས་ལ་སེམས་རབ་ཏུ་སྨོན་པར་མི་བྱེད་དོ།

ཚོགས་པ་འདུས་པ་ལ་མངོན་པར་དགའ་བར་མི་འགྱུར་རོ།

ཁྱིམ་གཞན་དག་རྣམས་ཀྱི་སྤྱོད་ཚུལ་གཞན་དག་ཏུ་རྗོད་པར་མི་བྱེད་དོ།

ཤིན་ཏུ་མྱུར་བར་འགྲོ་བ་དང་འོང་བ་དང་རབ་ཏུ་འཇུག་པ་མང་བ་མ་ཡིན་ནོ།

ཧ་ཅང་སློང་བར་བྱེད་པའི་རང་བཞིན་ཅན་མ་ཡིན་ནོ།

དེ་ལྟ་བུར་ཡང་དགེ་སློང་དེ་གཞན་གྱི་ཁྱིམ་དུ་འཇུག་སྟེ།

སྦྱིན་པ་པོ་དང་སྦྱིན་བདག་དང་གཞན་ཡང་དེ་ལྟ་བུའི་རིགས་ཅན་རྣམས་ཀྱི་ཁྱིམ་དུ་འཇུག་པ་ནི་རྒོད་བག་རྣམས་ནི་འདུལ་བས་ཀུན་ནས་འཇོམས་སོ།

འཇིག་པར་བྱེད་དོ།

རྣམ་པར་འབྱེད་དོ།

གཞན་ཡང་གལ་ཏེ་ཁྱིམ་རྣམས་སུ་ཞུགས་པར་གྱུར་ནས་དགེ་སློང་གིས་སྦྱིན་པ་པོ་དང་སྦྱིན་བདག་རྣམས་དང་གཏམ་ལ་ཞུགས་པར་གྱུར་པ་ན།

ཆོས་དང་ལྡན་པའི་གཏམ་རྣམས་བཞག་ནས་འདོད་པ་རྣམས་ཀྱི་གཏམ་བྱེད་དོ།

ཡུལ་ལྗོངས་ཀྱི་གཏམ་རྣམས་

བྱེད་དོ།

མཐོ་རིས་ཀྱི་གཏམ་བྱེད་དོ།

གར་མཁན་དང་གར་དང་རོལ་མོ་བསྟན་པའི་གླུའི་གཏམ་རྣམས་བྱེད་དོ།

གྲོང་ཁྱེར་རྣམས་སམ་གཞན་གྱི་ཡང་རུང་སྟེ་ཀུན་ནས་ཉོན་མོངས་པ་ཅན་གྱི་གཏམ་རྣམས་བྱེད་དོ།

བུད་མེད་རྣམས་དང་ཀུན་ནས་འདྲེ་བར་གནས་པར་བྱེད་ཅིང་རྣམ་པར་བཀྲ་བར་བྱས་པའི་ཆ་བྱད་ཀྱིས་ཀྱང་ཁྱིམ་རྣམས་སུ་རྒྱུ་བར་བྱེད་དོ།

དགེ་སློང་རྣམས་སམ་གཞན་ཡང་དེའི་རིགས་ཅན་རྣམས་ལ་རྒོད་བག་དེ་ལྟ་བུ་དག་ཀྱང་འབྱུང་བ་ཡིན་ནོ།

རྒོད་བག་དེ་ལྟ་བུས་རབ་ཏུ་ཞུགས་པར་གྱུར་པ་རྣམས་འདུལ་བ་ཇི་ལྟ་བ་རྣམས་ཀྱིས་ཉེ་བར་སྤོང་བ་ཡིན་ན།

འདི་ལྟ་སྟེ་དགེ་སློང་ངམ་གཞན་དག་དེའི་རིགས་ཅན་རྣམས་ཀྱང་རུང་སྟེ།

ཁྱིམ་དུ་ལེགས་པས་ཉེ་བར་ཞུགས་པར་གྱུར་པ་ན་ལེགས་པ་ལ་རྟེན་པའི་གཏམ་རྣམས་བྱེད་པར་འགྱུར་བ་ཡིན་ནོ།

དཔེར་བྱ་ན་སྦྱིན་པའི་གཏམ་དང་།

ཚུལ་ཁྲིམས་ཀྱི་གཏམ་དང་།

ཡེ་ཤེས་རབ་ཏུ་བསྔགས་པར་བྱ་བའི་གཏམ་རྣམས་དང་།

ལོག་པར་ལྟུང་བའི་གཏམ་དང་།

རྒས་པའི་གཏམ་དང་།

ནད་ཀྱི་གཏམ་དང་།

རྣམ་པར་འབྲལ་བར་འགྱུར་བའི་གཏམ་དང་།

ལས་བདག་གིར་བྱ་བའི་གཏམ་དང་།

རྒུད་པར་འགྱུར་བའི་གཏམ་དང་།

འཆི་བའི་གཏམ་རྣམས་དང་།

ཡང་དག་པར་མགུ་བར་བྱ་བའི་གཏམ་དང་།

ལེགས་པ་ལ་བརྟེན་པར་བྱ་བའི་གཏམ་དང་།

སྡུག་བསྔལ་གྱི་གཏམ་དང་།

ཀུན་འབྱུང་བའི་གཏམ་དང་།

འགོག་པའི་གཏམ་དང་།

ལམ་གྱི་གཏམ་རྣམས་དང་།

ས་རྣམས་ཀུན་ཏུ་བགྲོད་པར་བྱ་བའི་གཏམ་རྣམས་དང་།

ཚུལ་ཁྲིམས་རབ་ཏུ་བསྔགས་པ་དང་དང་པོ་བྱུང་བའི་གཏམ་རྣམས་དང་།

འདོད་ཆགས་དང་བྲལ་བའི་གཏམ་རྣམས་དང་།

སེར་སྣ་ཡོངས་སུ་གཞིག་པར་བྱ་བའི་གཏམ་རྣམས་དང་།

གཟུགས་ཀྱི་རྒྱགས་པས་མྱོས་པ་རྣམས་ལ་གཟུགས་ཚད་མེད་པ་བརྗོད་པའི་གཏམ་རྣམས་དང་།

བསླུ་བར་གྱུར་པའི་གཏམ་རྣམས་དང་།

ལང་ཚོ་ལ་བབ་པ་ལ་སོགས་པ་རྣམས་ཀྱང་རྒ་བས་ངེས་པར་སླུ་བར་བྱེད་པའི་གཏམ་རྣམས་ཏེ།

སྦྱིན་པ་པོ་དང་སྦྱིན་བདག་རྣམས་ཀྱི་བསམ་པ་ཀུན་ཏུ་རིག་པར་བྱས་ལ་དེ་ཁོ་ན་བཞིན་དུ་གཏམ་བྱའོ།

དེ་ལྟར་ན་དགེ་སློང་གིས་

རྒོད་བག་རྣམས་འདུལ་བས་ཉེ་བར་སྤོང་བ་ཡིན་ནོ།

གཞན་ཡང་རྒོད་པ་རྣམས་ནི་འདུལ་བས་ཉེ་བར་འཇོམས་པར་བྱེད་དེ།

གང་ལ་ཟས་དང་སྐོམ་མང་བར་གྱུར་པ་དེ་དག་གིས་ཕེའུ་བཏབ་པར་གྱུར་ལ་དེར་ཡང་ལེགས་པར་ཉེ་བར་ཕྱིན་པ་ཡིན་ནོ།

གཞན་ཡང་གང་དག་འདོད་པ་ཆེ་བར་གྱུར་པ་རྣམས་ཀྱང་རོ་ལ་མངོན་པར་དགའ་བའི་ཕྱིར་ན་ཕལ་ཆེ་བ་རྣམས་སུ་རབ་ཏུ་འཇུག་པར་བྱེད་དེ།

བསྟེན་གྲོགས་པ་དེ་དག་ཏུ་ཉེ་བར་འགྲོ་བར་བྱེད་ལ།

བསྟེན་གྲོགས་བྱ་བའི་དོན་དུ་ཡང་གང་དག་གིས་ཉེ་བར་སྒྲུབ་པར་བྱེད་དོ།

རྣམ་པ་གང་དག་གིས་ཉེ་བར་སྒྲུབ་པར་བྱེད་པ་དང་ཇི་སྲིད་དུ་ཉེ་བར་སྒྲུབ་པར་བྱེད་པ་དེ་སྲིད་དུ་ཆོས་གོས་དང་བསོད་སྙོམས་དང་གནས་མལ་དང་ནད་ཀྱི་རྐྱེན་སྨན་དང་ཡོ་བྱད་རྣམས་ཀྱིས་ཀུན་ནས་དགའ་བར་བྱེད་དོ།

གང་གིས་འདིའི་བདེ་བ་རྣམས་ལ་ཀུན་ཏུ་དྲན་པར་མི་བྱེད་ཅིང་རོ་མྱོང་བར་ཡང་མི་བྱེད་དོ།

རྣམ་པར་རྟོག་པར་ཡང་མི་བྱེད་དེ་ཡང་དེ་ལྟར་གཅིག་ཏུ་རྣམ་པར་རྒྱུ་བ་དང་ལེགས་པ་ལ་བརྟེན་ནས་རྣམ་པར་རྒྱུ་བ་དང་ཀུན་ནས་བསྡམས་ནས་རྣམ་པར་རྒྱུ་བ་ནི་འདུལ་བ་དང་ལྡན་པ་ཡིན་ནོ།

དགེ་སློང་ངམ་དེའི་རིགས་ཅན་གཞན་དག་རྣམས་ཀྱང་རུང་སྟེ།

དེ་ལྟར་རྒོད་པ་རྣམས་འདུལ་བས་ཉེ་བར་འཇོམས་པ་ཡིན་ནོ།

རྒོད་པ་རྣམས་ཐམས་ཅད་ཀྱང་བག་མེད་པ་ལས་རབ་ཏུ་འཕེལ་བར་འགྱུར་བ་ཡིན་ནོ།

དོན་མ་ཡིན་པའི་ཚོགས་རྣམས་ཐམས་ཅད་ཀྱང་བག་མེད་པའི་རྩ་བ་ལས་ཡིན་ནོ།

དེའི་ཕྱིར་ན་མྱ་ངན་ལས་འདས་པ་ཚོལ་བར་བྱེད་པ་རྣམས་ཐམས་ཅད་ཀྱིས་བག་མེད་པ་ཁོ་ན་གཞོམ་པར་བྱ་བ་ཡིན་ནོ།

དེ་ལྟར་མུ་སུ་ལུན་དྷ་འདིས་སྔོན་གྱི་ལྷའི་དྲུང་དུ་ཐོས་པ་གང་ཡིན་པའི་ཆོས་དེ་དག་དང་ངང་པའི་རྒྱལ་པོ་དུས་བཟངས་དེ་དང་བདུད་ཀྱི་ཕྱོགས་སུ་གྱུར་པའི་བག་མེད་པ་དེ་དག་གི་མདུན་དུ་སྟོན་པར་བྱེད་དོ།

བཅོམ་ལྡན་འདས་འོད་སྲུང་གིས་གསུངས་པ་དྲི་བ་བཅུ་གཅིག་པའི་མདོ་ལས་དྲི་བ་གཅིག་རྫོགས་སོ།།

ཇི་ལྟར་དྲི་བ་གཉིས་པ་ཡིན་ན།

འདི་ལྟ་སྟེ།

མ་བསྡམས་པ་རྣམས་ནི་སེམས་རྩེ་གཅིག་པ་ཉིད་ཀྱིས་ཏེ་མ་བསྡམས་པ་རྣམས་ཀྱང་རྣམ་པ་གཉིས་ཡིན་ཏེ།

འཇིག་རྟེན་པ་དང་།

འཇིག་རྟེན་ལས་འདས་པའོ།

བསྡམས་པ་ཡང་མདོར་བསྡུ་ན་སེམས་རྩེ་གཅིག་པས་འཛིན་པར་བྱེད་པའོ།

དེ་ལ་སྡོམ་པ་ཡང་རྣམ་པ་དུ་མ་ཡིན་ནོ།

མདོར་བསྡུ་ན་ནི་རྣམ་པ་གཉིས་ཡིན་ཏེ།

རང་བཞིན་གྱི་ཁ་ན་མ་ཐོ་བ་དང་བཅས་པའི་ཁ་ན་མ་ཐོ་བའོ།

དེ་ལ་རང་བཞིན་གྱི་ཁ་ན་མ་ཐོ་བ་ཉམས་པ་རྣམས་ནི་དགེ་སློང་མ་ཡིན་ཞིང་འོད་སྲུང་བ་ཡང་མ་ཡིན་ཏེ།

སྲོག་གཅོད་པ་དང་།

མི་ཚངས་པར་སྤྱོད་པ་དང་།

མ་བྱིན་པར་ལེན་པ་ཡང་ཡོངས་སུ་རྫོགས་པ་ནི་ཀཱར་ཥཱ་པ་ཎ་གསུམ་གྱི་བློར་གྱུར་པས་ཆོས་དང་ལྡན་ན་ཡང་རུང་སྟེ་ཕྲོགས་ནས་ཡོངས་སུ་ལོངས་སྤྱོད་ན་ནི།

ཡུལ་གྱིས་དང་གཉེན་འབྲེལ་གྱི་མ་ཡིན་པ་དང་གནད་ལ་བསྒོ་བས་ཀྱང་རུང་སྟེ།

དགེ་སློང་མ་ཡིན་ཞིང་འོད་སྲུང་བའི་མ་ཡིན་ནོ།

རུལ་པར་གྱུར་པ་མ་རུངས་པ་རྫུན་པ་རྟགས་འབའ་ཞིག་འཛིན་པར་བྱེད་པ་ཡིན་ནོ།

དེ་ལྟར་རང་བཞིན་གྱི་ཁ་ན་མ་ཐོ་བ་ཚུལ་ཁྲིམས་འཆལ་པར་གྱུར་པ་དེ་ཡང་བག་མེད་པས་བྱས་པ་ཡིན་ནོ།

དེའི་ཕྱིར་ན་འོད་སྲུང་རབ་ཏུ་བརྩོན་པ་རྣམས་ཀྱིས་ཀྱང་བག་མེད་པ་ཡོངས་སུ་སྤང་བར་གྱིས་ཤིག །

དེ་ལྟར་འཐབ་བྲལ་བ་རྣམས་ཀྱི་མངའ་བདག་མུ་སུ་ལུན་དྷ་འོད་སྲུང་གིས་གསུངས་པའི་མདོ།

བྱང་ཆུབ་སེམས་དཔའ་དུས་བཟངས་དང་སྨྲ་བ་པོར་གྱུར་པའི་ངང་པ་རྣམས་དང་།

བདུད་ཀྱི་ཕྱོགས་ཀྱི་བག་མེད་པ་རྣམས་ལ་ཆོས་སྟོན་པར་བྱེད་ཅིང་པད་མའི་སྙིང་པོ་ལ་ཡང་དག་པར་གནས་ནས་བཤད་དོ།

གཞན་ཡང་བཅས་པའི་ཁ་ན་མ་ཐོ་བ་རྣམས་ནི་མདོར་བསྡུ་ན་རྣམ་པ་དགུ་ཡིན་ནོ།

མི་གཙང་བ་རྣམ་པ་དགུ་པོ་རྣམས་ཀྱང་གང་ཞེ་ན།

གཅིག་སྤྱོད་པ་དང་།

བཤགས་པས་ལྡང་བ་སྤྱོད་པ་དང་།

བག་མེད་པས་བག་མེད་པ་སྤྱོད་པ་དང་།

ཕྱེད་སྤྱོད་པ་དང་།

ཕལ་ཆེར་སྤྱོད་པ་དང་།

བཤགས་པ་དང་ལྡང་བ་ཡང་བར་སྤྱོད་པ་དང་།

ལམ་སྟོན་པར་བྱེད་པ་དང་བསྒྲགས་པས་སྤྱོད་པ་དང་།

རླག་པར་སྤྱོད་པ་དང་ཐམས་ཅད་སྤྱོད་པའོ།

དེ་ལྟར་དགེ་སྦྱོང་རྣམས་སམ་གཞན་དག་དེའི་རིགས་ཅན་རྣམས་ཀྱང་རུང་སྟེ།

བག་མེད་པའི་དབང་གིས་བྱིས་པའི་སྐྱེ་བོ་རྣམས་ཐམས་ཅད་བློ་ཉམས་པར་གྱུར་པ་དང་།

ཇི་སྲིད་དུ་ཆོས་འདུལ་བ་མ་བསླབས་པ་རྣམས་ཀྱི་མདོར་

བསྡུ་ན་ཁ་ན་མ་ཐོ་བ་རྣམ་པ་དགུ་ཡིན་ནོ།

ཁ་ཅིག་སྤྱོད་པ་ཇི་ལྟ་བུ་ཡིན་ཞིང་ཇི་ལྟར་ན་བཅས་པའི་ཁ་ན་མ་ཐོ་བ་ཡིན་ན།

འདི་ན་བསླབ་པ་གང་དག་ཡང་མོར་གྱུར་པ་རྣམས་དང་ལྡང་བ་ཡང་བར་གྱུར་པ་དེ་དག་རྣམས་འདིས་ཁྱད་དུ་བསད་པར་གྱུར་ནས་བག་མེད་པའི་དབང་གིས་རྒལ་བར་བྱེད་དེ།

ཇི་ལྟར་བདག་གིས་འདི་དག་ལས་རྒལ་བར་བྱས་ལ་ཕྱི་ནས་ནི་བདག་གིས་ཀུན་ནས་ལྡང་བར་བྱའོ་སྙམ་པའོ།

དཔེར་ན་ས་རྐོ་བར་བྱེད་པ་དང་རྩྭ་གཅོད་པར་བྱེད་པའོ།

འདི་ནི་གཅིག་སྤྱོད་པ་ཞེས་བརྗོད་དེ།

དགེ་སྦྱོང་ངམ་གཞན་ཡང་དེའི་རིགས་ཅན་རྣམས་ཀྱང་རུང་ངོ་།

ཡང་ཇི་ལྟར་ན་བག་མེད་པ་སྤྱོད་པ་རྣམས་བཤགས་པས་ལྡང་བ་སྤྱོད་པ་ཡིན་ན།

འདི་ན་དགེ་སྦྱོང་དག་བསླབ་པའི་གཞི་གཅིག་གམ་བསླབ་པའི་གཞི་གཉིས་སམ་གསུམ་ལ་སྤྱོད་པ་ལས་འདའ་བར་བྱེད་དོ།

ཇི་ལྟར་དེ་སྙེད་ཅིག་ལས་འདས་པར་བྱེད་ཅིང་།

འདའ་བར་བྱས་ནས་ཀྱང་ཁོ་བོས་ཕྱིས་ཡང་ལྡང་བར་བྱའོ་ཞེས་པ་སྟེ།

དེ་རིམ་པ་དེ་ཉིད་ཀྱིས་དང་དེ་ཁྱད་དུ་གསོད་པར་བྱེད་པས་ཀྱང་རྟག་ཏུ་བཅས་པའི་ཁ་ན་མ་ཐོ་བ་རྣམས་བྱེད་དོ།

དེ་དག་ནི་ཆོས་ལ་གུས་པར་སྤྱོད་པ་ཉིད་ཀྱང་མ་ཡིན་ནོ།

བག་དང་ལྡན་པ་ཡང་མ་ཡིན་ནོ།

རྟག་ཏུ་ཡང་རྣམ་པར་གཡེངས་པ་དང་བཅས་པའི་སེམས་སུ་འགྱུར་རོ།

འདི་ལ་ནི་བཤགས་པས་ལྡང་བར་སྤྱོད་པ་ཞེས་བྱའོ།

ཇི་ལྟར་ན་བག་མེད་པས་བག་མེད་པ་ཡོངས་སུ་འཕེལ་བར་སྤྱོད་པ་ཡིན་ན།

འདི་ན་སེམས་ཡང་བར་འགྱུར་ཞིང་སེམས་སྟོབས་ཀྱང་ཡང་བ་རྣམས་ཀྱིས་བསླབ་པའི་གཞི་རྣམས་ཀྱི་བཤགས་པར་བྱ་བ་རྣམས་ཀྱང་མངོན་པར་ཤེས་པར་འགྱུར་བ་མ་ཡིན་ནོ།

སྙིང་པོ་དང་སྙིང་པོ་མེད་པ་རྣམས་བཤགས་པར་བྱ་བ་དང་།

ལྡང་བ་ཡང་མངོན་པར་མི་ཤེས་པ་ཡིན་ནོ།

དེ་ལ་ནི་བསླབ་པའི་གཞི་བཅས་པའི་ཁ་ན་མ་ཐོ་བ་རྣམས་གང་ཡིན་པ་རྣམས་ཤིན་ཏུ་ཡང་མང་བར་འགྱུར་རོ།

དེ་དག་རྣམས་ཀྱང་འཛིན་པར་བྱེད་ཅིང་ཡང་གང་དག་དུས་ཤིན་ཏུ་རིང་བ་ན་དཀའ་བླས་ཆེན་པོས་ལྡང་བར་འགྱུར་ཏེ།

དེ་དག་ཀྱང་འཛིན་པར་བྱེད་པ་ཡིན་ནོ།

ཡང་གང་དག་ཁ་ན་མ་ཐོ་བ་ཆུང་བར་གྱུར་པ་དེ་དག་ནི་

ལེགས་པར་འཛིན་པ་ཡང་མ་ཡིན་ནོ།

ཆོས་ལ་གུས་པར་གནས་པའི་རང་བཞིན་ཅན་མ་ཡིན་ནོ།

དགེ་སྦྱོང་རྣམས་སམ་རྣམ་པ་དེ་ལྟ་བུ་གཞན་དག་རྣམས་ཀྱང་རུང་སྟེ།

འདི་དག་ནི་བག་མེད་པས་བག་མེད་པ་རབ་ཏུ་འཕེལ་བར་སྤྱོད་པར་བརྗོད་པ་ཡིན་ནོ།

ཡང་ཇི་ལྟར་ན་ཕྱེད་ལ་སྤྱོད་པ་ཡིན་ནོ།

འདི་ལ་བསླབ་པའི་གཞི་གང་དག་ཡང་བ་རྣམས་སམ་ལྕི་བར་གྱུར་པ་རྣམས་ཀྱང་རུང་སྟེ།

དགེ་སློང་གིས་ཀུན་ནས་ལྡང་བ་འབའ་ཞིག་བྱེད་དུ་འགྲོ་བ་འམ།

གལ་ཏེ་ན་འཛིན་པར་བྱེད་པ་འམ།

གལ་ཏེ་ན་ཤིན་ཏུ་བསྲབས་པར་གྱུར་ཏེ་ལྡང་བར་འགྱུར་བ་ཡིད་ལ་བྱས་ནས།

དེ་རིགས་འཐུན་པའི་ཆ་རྣམས་མ་ལུས་པ་ཁོ་ན་ཕྱིར་ཟློག་པར་བྱེད་དེ།

འདི་ནི་ཕྱེད་ལ་སྤྱོད་པ་ཞེས་བརྗོད་དོ།

གང་གི་ཕྱིར་ཕྱེད་ལ་ནི་སྤྱོད་པར་བྱེད་ལ་ཕྱེད་ལ་ནི་སྤྱོད་པར་བྱེད་པ་ཉིད་ཀྱང་མ་ཡིན་ཏེ་རིམ་པ་འདི་དག་གིས་ན་ཕྱེད་ལ་སྤྱོད་པ་བྱ་བ་ཡིན་ནོ།

བག་མེད་པ་རྣམས་ཀྱིས་བག་མེད་པར་རྣམ་པར་རྒྱུ་བ་བག་མེད་པའི་དབང་གིས་འགྲོ་བ་བག་མེད་པའི་ཡུལ་ལ་གནས་པ་འདི་ནི་དགེ་སྦྱོང་དང་རྣམ་པ་དེ་ལྟ་བུ་གཞན་དག་རྣམས་ཀྱང་རུང་སྟེ།

ཕལ་ཆེར་སྤྱོད་པར་བྱེད་པ་ཡིན་ནོ།

བསླབ་པའི་གཞི་རྣམས་ཡོངས་སུ་རྫོགས་པར་འཛིན་པར་བྱེད་པ་དགེ་སྦྱོང་མ་དང་།

དགེ་ཚུལ་དང་།

དགེ་བསྙེན་རྣམས་ཀྱང་རུང་སྟེ།

ཤིན་ཏུ་མྱུར་བར་མྱ་ངན་ལས་འདས་པར་འགྲོ་བར་འགྱུར་བ་འདི་དག་དང་།

རྣམ་པ་དེ་ལྟ་བུ་རྣམས་དང་།

ཚུལ་མི་འཐུན་པ་དེ་དང་དེ་དག་ལ་རྒྱབ་ཀྱིས་ཕྱོགས་པར་གྱུར་པའི་ཕལ་ཆེར་སྤྱོད་པ་རྣམས་ཇི་ལྟ་བུ་ཞེ་ན།

འདི་ན་བཅས་པའི་ཁ་ན་མ་ཐོ་བའི་བསླབ་པའི་གཞི་རྣམས་ཤིན་ཏུ་ཕལ་ཆེར་འཛིན་པར་བྱེད་པ་རྣམས་མ་ཉམས་པ་དང་།

མ་རལ་བ་དང་།

མ་ཟགས་པ་དང་།

མི་བརྟན་པ་དང་།

སྙིང་པོ་མེད་པ་དང་།

གཅིག་ཏུ་ལྷག་མ་མེད་པ་མ་ཡིན་པར་གལ་ཏེ་ཤེད་ན་འཛིན་པར་བྱེད་དོ།

གལ་ཏེ་ཤེད་ན་མི་འཛིན་པར་བྱེད་དོ།

དགེ་སྦྱོང་དང་རྣམ་པ་དེ་ལྟ་བུ་གཞན་དག་རྣམས་ཀྱང་རུང་སྟེ།

འདི་ནི་ཕལ་ཆེར་སྤྱོད་པ་ཞེས་བརྗོད་དོ།

ཡང་ཇི་ལྟར་ན་བཤགས་པ་དང་ལྡང་བ་ཡང་བར་སྤྱོད་པ་ཡིན་ན།

འདི་ན་བག་མེད་པའི་དབང་གིས་སམ།

སྡིག་པའི་གྲོགས་པོ་ལ་རྟེན་པའི་དབང་གིས་

ཀྱང་གལ་ཏེ་ན་བསླབ་པའི་གཞི་རྣམས་ཉམས་པར་བྱེད་དོ།

དེ་མྱུར་བར་སོ་སོར་རིག་ནས་འགྱོད་པར་འགྱུར་བ་དང་།

སེམས་རབ་ཏུ་དང་བར་གྱུར་པས་སམ།

དམྱལ་བའི་འཇིགས་པས་འཇིགས་པར་གྱུར་པས་ཀྱང་རུང་སྟེ།

བཤགས་པར་བྱེད།

དགེ་འདུན་ལ་ཡང་མཐོལ་བར་བྱེད་དོ།

ཇི་ལྟར་ན་བདག་གི་བསླབ་པའི་གཞི་ཉམས་པར་བྱས་པ་ནི་བདག་གིས་མཛེས་པ་མ་བྱས་ཀྱིས་དགེ་འདུན་རྣམས་ཀྱིས་དེ་ལས་ལྡང་བར་མཛད་དུ་གསོལ་ཞེས་བཤགས་པ་ལ་འཁོད་པར་བྱ་བ་དང་།

གཉེན་པོས་ཀྱང་མཐོལ་ཞིང་བཤགས་པར་བྱེད་པ་དང་ལྡང་བར་བྱེད་པ་ཞེས་བྱ་བས་ཀྱང་འཇིགས་པ་ཡིན་ནོ།

དེའི་ཕྱིར་དགེ་སློང་འདི་ནི་བཤགས་པ་དང་ལྡང་བ་ཡང་བར་སྤྱོད་པ་ཞེས་བརྗོད་པ་ཡིན་ནོ།

ཇི་ལྟར་ན་དགེ་སློང་ལམ་སྟོན་པར་བྱེད་པ་དང་བསྒྲགས་པས་སྤྱོད་པ་ཡིན་ན།

འདི་ན་དགེ་སློང་ངམ་རྣམ་པ་དེ་ལྟ་བུ་གཞན་དག་རྣམས་ཀྱང་རུང་སྟེ།

བརྒྱ་ལ་ཞིག་ན་བག་མེད་པའི་དབང་གིས་ཁ་ན་མ་ཐོ་བ་མང་པོར་གྱུར་པ།

སྡུག་བསྔལ་གྱི་རྩ་བ་གཅོད་པར་བྱེད་པའི་བསླབ་པའི་གཞི་རྣམས་ལས་འདའ་བར་བྱེད་པའམ།

ཉམས་དམས་པར་བྱས་པར་གྱུར་ན་ཡང་དེ་དག་བླ་མ་རྣམས་ལ་རྗོད་པར་བྱེད་དོ།

དགེ་འདུན་རྣམས་ལ་ཡང་གསོ་སྦྱོང་གི་དུས་ཀྱི་ཚེ་ནའོ།

དེ་ལ་དགེ་འདུན་རྣམས་ཀྱིས་ལམ་འདོམས་པར་མཛད་ཅིང་དཀའ་བླས་རྣམས་ཀྱང་ཉེ་བར་སྟོན་པར་མཛད་ལ་ལྡང་བའི་འཇིགས་པ་རྣམས་ཀྱང་འགྲོ་བར་བྱེད་དོ།

དེ་དག་རྣམས་ཀྱང་ཐོས་ཤིང་གོ་བར་བྱས་ཏེ་ལངས་པ་ཡིན་ནོ་ཞེ་ནས།

ཕྱི་ནས་ཡང་ནི་བསླབ་པའི་གཞི་རྣམས་ལས་འདའ་བར་མི་བྱེད་དེ།

དམྱལ་བ་དང་།

ཡི་དགས་དང་།

དུད་འགྲོ་རྣམས་ཀྱིས་འཇིགས་པའི་ཕྱིར་རོ།

དུས་བཟངས་འདི་ནི་ལམ་སྟོན་པར་བྱེད་པ་དང་བསྒྲགས་པས་སྤྱོད་པ་ཞེས་བརྗོད་དོ།

ཡང་ཇི་ལྟར་ན་བརླག་པར་སྤྱོད་པ་ཡིན་ན།

རྒ་བ་དང་།

འཆི་བའི་དབང་དུ་སོང་བའོ།

འདི་ན་ཆོས་འདུལ་བ་རྣམས་བསླབས་པར་གྱུར་པ།

བསམ་གཏན་གྱིས་བསམ་གཏན་དུ་མི་བྱེད་པར།

བྱ་བ་དང་བྱེད་པ་རྣམས་ལ་མངོན་པར་དགའ་བར་གྱུར་ནས།

རྟག་ཏུ་ཡང་ཁྱིམ་ནས་ཁྱིམ་རྣམས་སུ་དང་།

གནས་ནས་གནས་རྣམས་སུ་དང་།

སྦྱིན་བདག་གི་ཁྱིམ་རྣམས་ནས་སྦྱིན་བདག་གི་ཁྱིམ་རྣམས་སུ་ཟས་དང་གོས་ཀྱི་དོན་ཁོ་ནར་རྒྱུ་བར་བྱེད་དོ།

ལེགས་པར་འགྲོ་ལ་ཞབས་འབྲིང་ཡང་བྱེད་དོ།

ཁྱིམ་པ་རྣམས་ཉིད་ཉེ་བར་སྟེན་པར་བྱེད་དོ།

འདི་ནི་བརླག་པར་སྤྱོད་པ་ཞེས་བརྗོད་དོ།

རྐུན་མ་དེ་ནི་ཤི་བའི་འོག་ཏུ་དམྱལ་བའི་མཐར་ཐུག་པར་འགྱུར་རོ།

དུས་བཟངས་ཡང་ཇི་ལྟར་ན་ཐམས་ཅད་སྤྱོད་པ་ཡིན་ན།

ཆོས་འདུལ་བ་རྣམས་ཐམས་ཅད་ལ་དད་པར་བྱེད་དོ།

རྗོད་དོ།

བྱེད་པར་འགྱུར་རོ།

གལ་ཏེ་ཤེད་ན་བསླབ་པའི་གཞི་གཅིག་གམ་གཉིས་ཀྱི་ཡང་རུང་སྟེ།

ཁ་ན་མ་ཐོ་བ་ཅུང་ཟད་ཅིག་བྱུང་ན་ཡང་གོམས་པ་མེད་པ་དང་།

ཆོས་ལ་གུས་པའི་དབང་གིས་འཛིན་པར་བྱེད་མི་ནུས་པར་གྱུར་ནས།

དེ་དག་ལས་ལྡང་བར་བྱེད་པ་ཡིན་ནོ།

དུས་བཟངས་འདི་ནི་ཐམས་ཅད་བཤགས་ཤིང་སྤྱོད་པ་ཞེས་བརྗོད་དོ།

དགེ་སློང་ངམ་རྣམ་པ་དེ་ལྟ་བུ་གཞན་དག་རྣམས་ཀྱང་རུང་སྟེ།

ཁ་ན་མ་ཐོ་བ་ཉུང་བ་རྣམས་ཀྱང་ཕྱི་ནས་འདི་དག་བསླབ་པའི་གཞི་གང་དག་ལས་འདའ་བར་བྱེད་པ་འདི་དག་ཀྱང་བག་མེད་པའི་ཉེས་པ་ཡིན་ནོ།

དེ་ལྟར་འཐབ་བྲལ་བ་རྣམས་ཀྱི་མངའ་བདག་དེ་པད་མའི་སྙིང་པོ་ལ་ལེགས་པར་གནས་ནས།

སྨྲ་བ་པོའི་ངང་པ་དེ་དག་རྣམས་དང་བདུད་ཀྱི་རིགས་ཀྱི་བག་མེད་པ་དེ་ལ་ཡང་ཆོས་བསྟན་ཏོ།

དེ་ནས་དེའི་དུས་ན་མུ་སུ་ལུན་དྷ་དེས་ཚིགས་སུ་བཅད་པ་བརྗོད་པ།

ཇི་ལྟར།

སྐྱེས་བུ་བག་མེད་པས་ལོང་བ།

བག་མེད་དུག་ནི་སྟེན་པ་པོ།

བག་མེད་ཞགས་པས་བཟུང་ནས་ནི།

དམྱལ་བར་རྗེས་སུ་ཉེ་བར་འཁྲིད།

བག་མེད་སྐྱེས་བུ་འཇིག་རྟེན་པའི།

གཤེ་བ་ཐམས་ཅད་ཐོབ་པར་འགྱུར།

ངག་རྣམས་དོན་མེད་འགྱུར་བ་དང་།

དམྱལ་བར་ཡང་ནི་འདྲེ་བར་བྱེད།

རྨོངས་པ་ཉིན་མེད་མཚན་མེད་དང་།

ལམ་དུ་འགྲོ་དང་བརྗོད་པ་ནའང་།

བག་མེད་སྐྱེས་བུ་སྐད་ཅིག་ཀྱང་།

བདེ་བའི་སྐལ་བ་ཡོད་མ་ཡིན།

འཁོར་ལོ་བཞིན་དུ་འགྲོ་བ་ལྔར།

གང་དག་འདོད་པའི་ཁམས་ན་འཁོར།

གང་ཡང་བསམ་གཏན་ལས་ལྟུང་བ།

དེ་ཡང་བག་མེད་པས་བྱས་སོ།

གཟུགས་མེད་པ་ཡི་གནས་བཞི་ཡང་།

འཇིག་རྟེན་པ་ནི་གང་ཐོབ་པ།

སྲིད་ན་འཕྱང་ཉུག་འཁོར་བ་ནི།

དེ་ཡང་བག་མེད་པས་བྱས་སོ།

ཁམས་གསུམ་འདི་དག་མ་ལུས་པ།

བག་མེད་འཆིང་བས་བཅིངས་པ་ཡི།

སྲིད་པའི་ཞགས་པས་བསྡམས་བྱས་པ།

བློ་མེད་པས་ཀྱང་མི་རིག་གོ།

དེ་ལྟར་མུ་སུ་ལུན་དྷ་དེས་སྔོན་གྱི་ལྷ་རྣམས་ཀྱི་དྲུང་ནས།

བཅོམ་ལྡན་འདས་འོད་སྲུང་གིས་གསུངས་པའི་མདོ་བཤད་པར་བྱ་བའི་གནས་སྐབས་སུ་བབ་པས།

ངང་པའི་རྒྱལ་པོ་དུས་བཟངས་དེ་དང་།

སྨྲ་བ་པོར་གྱུར་པའི་ངང་པ་དེ་དག་རྣམས་དང་།

བག་མེད་པ་དང་།

རྒོད་པ་དང་།

རྒྱགས་པ་དང་བཅས་པའི་བདུད་ཀྱི་རིགས་དེ་དག་རྣམས་ལ་ཆོས་བཅུ་གཅིག་པོ་རྣམས་ལས་ཆོས་གསུམ་པ་བསྟན་ཏོ།

དེ་རྣམས་གང་དག་ཞེ་ན།

འདི་ལྟ་སྟེ།

རྒོད་པ་ན་འདུལ་བས་རབ་ཏུ་འཇོམས་པར་བྱེད་དོ།

མ་བསྡམས་པ་ནི་སེམས་རྩེ་གཅིག་པས་ཡིན་ལ།

ཚུལ་ཁྲིམས་འཆལ་པ་རྣམ་པ་སྣ་ཚོགས་པ་རྣམས་ལས་རང་བཞིན་གྱི་ཁ་ན་མ་ཐོ་བ་ནི་སྐྱེས་བུ་དམ་པ་ལ་བསྟེན་ནས་ཕྱི་ནས་དགེ་བའི་རྩ་བ་རྣམས་ཀྱིས་ཏེ།

ཚུལ་ཁྲིམས་འཆལ་པར་བརྗོད་པར་བྱ་བའི་རང་བཞིན་གྱི་ཁ་ན་མ་ཐོ་བ་རྣམས་ཀྱང་སྐྱེས་བུ་དམ་པ་ལ་ལེགས་པར་བསྟེན་གྲོགས་བྱས་པས་འཁོར་བ་ལས་གྲོལ་བར་འགྱུར་ན།

བཅས་པའི་ཁ་ན་མ་ཐོ་བ་རྣམས་ལྟ་སྨྲོས་ཀྱང་ཅི་དགོས།

དེས་ན་རབ་ཏུ་བརྩོན་པས་ཀྱང་སྐྱེས་བུ་དམ་པ་ལ་བསྟེན་པར་བྱ་བ་ཡིན་ནོ།

སྤང་བར་བྱ་བ་གང་དག་ཞེ་ན།

འདི་ལྟ་སྟེ།

ལེ་ལོ་ནི་བརྩོན་འགྲུས་བསྐྱེད་པས་སོ།

ལེ་ལོ་རྣམས་ཐམས་ཅད་ཀྱང་བརྩོན་འགྲུས་བསྐྱེད་པས་སྤོང་བར་འགྱུར་ཏེ།

ཡང་ཇི་ལྟར་བག་མེད་པ་ནི་དོན་མ་ཡིན་པ་རྣམས་ཐམས་ཅད་ཀྱི་དང་དགེ་བའི་བཤེས་གཉེན་སྟེན་པ་ནི་ཆོས་འདུལ་བ་རྣམས་ཀྱི་ཕུལ་དུ་ཕྱིན་པའི་རྩ་བ་ཡིན་ནོ།

གཞན་ཡང་ཆོས་བཞི་པ་ཆོས་བཞི་པས་ངེས་པར་འཇོམས་ཤིང་སྤོང་ལ་སྤང་བར་བྱ་བ་རྣམས་གང་ཞེ་ན།

དེ་ནི་འདི་ལྟ་སྟེ།

ལེ་ལོ་ནི་བརྩོན་འགྲུས་བསྐྱེད་པས་ཏེ།

ལེ་ལོ་རྣམས་ནི་ཐམས་ཅད་ཀྱང་བརྩོན་འགྲུས་བསྐྱེད་པས་འཇོམས་པར་འགྱུར་རོ།

དཔེར་ན་སྣང་བས་མུན་པ་འཇོམས་པར་བྱེད་པ་དེ་བཞིན་དུ།

ལེ་ལོ་རྣམས་ཐམས་ཅད་ཀྱང་བརྩོན་འགྲུས་བསྐྱེད་པས་སྤོང་བ་ཡིན་ནོ།

དེ་ལ་ལེ་ལོས་ནི་ཆོས་རྣམས་ཐམས་ཅད་ཀྱི་བར་

ཆད་བྱེད་པ་པོ་ཡིན་ཏེ།

དཔེར་ན་ཇི་ལྟར་བྱས་པ་དེ་ལྟ་དེ་ལྟར་མངོན་པར་འཕེལ་བ་ཡིན་ཞིང་འཇིག་རྟེན་པ་དང་འཇིག་རྟེན་ལས་འདས་པའི་ཆོས་རྣམས་ཀྱི་བར་ཆད་བྱེད་པར་འགྱུར་རོ།

འཇིག་རྟེན་འདི་དང་འཇིག་རྟེན་ཕ་རོལ་རྣམས་སུ་ཡང་བདེ་བར་འགྱུར་བ་མ་ཡིན་པ་མང་པོ་དེ་དག་རྣམས་ཀྱི་མིང་ཡང་གཟུང་བར་སླ་བ་མ་ཡིན་ནོ།

ལེ་ལོ་ཅན་ཞེས་བྱ་བ་ནི་བརྩོན་འགྲུས་ཞན་པ་སྟེ།

གཞན་གྱིས་ཉེ་བར་འཇོམས་པར་བྱེད་དོ།

གཞན་རྣམས་ཀྱི་ཞེ་ཟློགས་པར་འགྱུར་རོ།

གཞན་གྱིས་ཕམ་པར་བྱེད་ཅིང་ཚར་གཅོད་པར་འགྱུར་ཏེ།

ལེ་ལོ་ཅན་རྣམས་ནི་ཤིན་ཏུ་ཉེ་བར་འཇོམས་པས་ཤིན་ཏུ་དབུལ་བར་འགྱུར་རོ།

ལས་ཀྱི་མཐའ་རྣམས་ལ་སྒྲུབ་པར་མི་བྱེད་དོ།

ཁེ་སྤོགས་རྣམས་མི་བྱེད་དོ།

ཞིང་ལས་མི་བྱེད་དོ།

ཁྱིམ་གྱི་གཞིའི་བྱ་བ་གཞན་རྣམས་ཀྱང་མི་བྱེད་དོ།

སྐྱེས་བུ་ལ་སྟེན་པར་མི་བྱེད་ཀྱི་སྙོམ་ལས་ཀྱི་བསམ་གཏན་གྱིས་བཟུང་བ་ཡིན་ནོ།

སྐྱེ་བོ་རྣམས་ཐམས་ཅད་ཀྱིས་མཚོན་པར་འགྱུར་རོ།

ཡེ་ཤེས་ལ་སྦྱོར་བར་མི་བྱེད་དོ།

དེ་ནི་མཁས་པ་མ་ཡིན་ནོ།

མཁས་པའི་རང་བཞིན་ཅན་རྣམས་ཀྱང་མ་ཡིན་ནོ།

ཡུལ་དང་དུས་ཤེས་པ་མ་ཡིན་ནོ།

བདག་དང་གཞན་རྣམས་ཀྱི་ཁྱད་པར་ཤེས་པ་མ་ཡིན་ནོ།

རང་གི་སྟོབས་རྣམས་དང་གཞན་གྱི་སྟོབས་རྣམས་ཀྱི་ཁྱད་པར་ཤེས་པ་མ་ཡིན་ནོ།

དུས་སུ་ལེགས་པར་དགོས་པ་རྣམས་སྒྲུབ་པ་མ་ཡིན་ཏེ།

དེའི་བྱ་བ་རྣམས་ཐམས་ཅད་ལ་བར་ཆད་འབྱུང་བར་འགྱུར་རོ།

གང་གི་ཚེ་འཇིག་རྟེན་འདི་དང་འཇིག་རྟེན་ཕྱི་མ་རྣམས་ཀྱི་ཡང་ལེ་ལོ་དེ་དག་རྣམས་ཉིད་བརྩོན་འགྲུས་བསྐྱེད་པས་བཅོམ་པར་གྱུར་པ་དེའི་ཚེ་འདི་ལ་འཇིག་རྟེན་པ་རྣམས་ཀྱིས་མངོན་པར་བགྲོད་པར་བྱ་བར་འགྱུར་རོ།

སྔ་བར་ལངས་པར་བྱེད་པ་དང་།

ངལ་དུབ་ལས་བརྒྱལ་བ་དང་།

གཉིད་ལས་བརྒྱལ་ཞིང་ལེགས་པར་སད་པ་དང་།

དུས་སུ་ལངས་པ་དང་།

དུས་སུ་སྐྱོ་བ་སྐྱེ་བ་དང་།

ལྟོས་པ་དང་བྲལ་བས་བྱ་བ་རྣམས་རྩོམ་པར་བྱེད་དོ།

དེ་ལུས་ཀྱི་བརྩོན་འགྲུས་བརྟན་པ་དང་ལྡན་པས་ལེ་ལོའི་དྲི་མ་དེ་དག་རྣམས་དག་པར་བཀྲུས་པའི་བརྩོན་འགྲུས་ལེགས་པར་རྩོམ་པ་དེ་ནི་དོན་རྣམས་

ཐམས་ཅད་དྲི་མ་དང་ཀུན་ནས་བྲལ་བར་སྒྲུབ་པར་བྱེད་དོ།

དོན་རྣམས་ལ་བགེགས་བྱུང་བར་གྱུར་ན་ཡང་སྐྲག་པར་མི་འགྱུར་ལ་སྐྱོ་བ་སྐྱེ་བར་མི་འགྱུར་རོ།

གཞན་རྣམས་ཀྱིས་བར་ཆད་བྱེད་པ་ཡང་མ་ཡིན་ནོ།

རབ་ཏུ་བརྟན་པས་བྱ་བ་རྣམས་ཀྱང་རྩོམ་པར་བྱེད་དོ།

བརྩོན་འགྲུས་དང་ལྡན་པས་གང་དག་སྒྲུབ་པར་བྱེད་པ་རྣམས་ནི་ཀུན་ནས་ཉམས་པར་ཡང་མི་འགྱུར་རོ།

གཞན་གྱི་དབང་གིས་བྱ་བ་རྣམས་ཀུན་ཏུ་རྩོམ་པ་ཡང་མ་ཡིན་ནོ།

མི་རྣམས་ཀྱི་ཁྱད་པར་ཡང་ཤེས་པར་འགྱུར་རོ།

བདག་གི་དཔུང་དང་གཞན་གྱི་དཔུང་རྣམས་ཀྱི་ཁྱད་པར་ཤེས་པར་འགྱུར་རོ།

དེ་དེ་དག་རྣམས་ཀྱིས་ཀྱང་བསྔགས་པར་འགྱུར་རོ།

སྐྱེ་བོའི་ཚོགས་ཆེན་པོ་རྣམས་ཀྱིས་མཆོད་པར་ཡང་འགྱུར་རོ།

རྒྱལ་པོ་དང་རྒྱལ་པོའི་བློན་པོ་དག་གིས་ཀྱང་མཆོད་པར་བྱེད་དོ།

རྟག་ཏུ་ནོར་དང་ལྡན་པར་ཡང་འགྱུར་རོ།

སེམས་སྟོབས་དང་སྟོབས་རྣམས་ཀྱང་ཉམས་པ་མེད་པར་འགྱུར་རོ།

གང་དག་དང་ལྷན་ཅིག་ཏུ་འགལ་བར་གྱུར་པ་དེ་དག་རྣམ་པར་ཕམ་པར་འགྱུར་རོ།

གང་གི་ཕྱིར་བརྩོན་འགྲུས་དང་ལྡན་པ་རྣམས་དང་ནི་ལྷན་ཅིག་ཏུ་འགལ་བར་བྱ་བར་མི་ནུས་སོ།

མཛའ་བོ་དག་ཀྱང་རྗེས་སུ་སྒྲུབ་པར་བྱེད་ལ།

དེས་ཀྱང་འདིའི་མཛའ་བོ་རྣམས་མངོན་པར་འཕེལ་བར་འགྱུར་རོ།

དེ་གྲོགས་པོ་མང་བ་དང་མཆོག་ཏུ་བདེ་བ་དང་མཆོག་ཏུ་སྟོབས་དང་ལྡན་པར་ཡང་འགྱུར་རོ།

གྲོང་ཁྱེར་གཞན་དག་ན་ཡང་མངོན་པར་དགའོ།

བྱེས་ན་ཡང་སྐྱེ་བོ་མང་པོ་རྣམས་ཀྱིས་མངོན་པར་ཤེས་པར་འགྱུར་རོ།

དེ་དེའི་ཕྱིར་གང་དག་དང་བསྟེན་གྲོགས་བྱེད་པར་གྱུར་པ་དེ་དག་རྣམས་ཀྱིས་མཆོད་པར་བྱེད་དོ།

འཇིག་རྟེན་དག་ན་ཡང་འདི་ཀུན་གྱིས་ཤེས་པར་འགྱུར་རོ།

ལེ་ལོ་རྩ་བ་ནས་རྣམ་པར་སྤངས་པའི་སྐྱེས་བུ་རྣམས་ཀྱིས་ནི་ཡོན་ཏན་དུ་མ་ཐོབ་པར་འགྱུར་རོ།

དེ་ནས་བདག་ཉིད་ཆེན་པོ་དེ་ཉིད་ཀྱིས་ཀྱང་གོ་ཆ་བརྟན་པོ་དེ་ལྟ་བུ་རྣམས་དང་།

རྙོག་པ་དང་རྣམ་པར་བྲལ་བས་བདུད་ཀྱི་དཔུང་རྣམས་ངེས་པར་འཇོམས་པར་བྱེད་དོ།

འཁོར་བ་ཕྱིར་ཟློག་པའི་གཡུལ་ཤོམ་པ་སྐྱེ་བོ་དམ་པ་རྣམས་ཐམས་ཅད་དགའ་བ་དང་།

བརྩོན་འགྲུས་རྩོམ་པ་དང་བཅས་པ་གང་གིས།

འཇིག་

རྟེན་ལས་འདས་པ་ཟག་པ་མེད་པ་ཁ་ན་མ་ཐོ་བ་མེད་པ་མྱ་ངན་ལས་འདས་པའི་ནམ་མཁའ་ལེགས་པར་འཐོབ་པའི་དགོས་པ་ཀུན་ནས་རྩོམ་པར་བྱེད་དོ།

དེ་དང་པོ་ཁོ་ནར་རེ་ཞིག་ཤིན་ཏུ་བརྟན་པས་མཆོག་ཏུ་དཀའ་བར་གྱུར་པ།

ཁྱད་པར་དུ་རོའི་གནས་དམན་པ་རྣམས་ལས་དཀའ་བས་དགྲོལ་བ་འདི་ནི་འཁོར་བ་པ་རྣམས་ཐམས་ཅད་ཀྱི་འཆིང་བ་ཡིན་ཏེ།

ཁྱིམ་ན་གནས་པ་བུ་དང་།

ཆུང་མ་དང་།

སྲིང་མོ་དང་།

བྲན་ཕོ་དང་།

བྲན་མོ་དང་།

ཞིང་དང་།

འབྲུ་དང་བང་མཛོད་རྣམས་ཀྱིས་གང་བའི་སྲེད་པའི་ཆུ་བོའོ།

བརྩོན་འགྲུས་བརྩམས་པའི་གྲོགས་དང་ལྡན་པ་གང་དག་གིས་འཁོར་བའི་འཇིགས་པས་འཇིགས་པ་རབ་ཏུ་འཇོམས་པ་དེ་དག་གིས་ནི།

རྣམ་པ་དེ་ལྟ་བུའི་ཁྱིམ་གྱི་གནས་རྣམས་བཏང་ནས་གོས་རྣམས་ངུར་སྨྲིག་ཏུ་བགོས་ཏེ།

བརྩོན་འགྲུས་དང་ལྡན་པ་གང་ཡིན་པ་དེ་ཁྱིམ་གྱི་གནས་ནས་ངེས་པར་བྱུང་ངོ་།

ཁྱིམ་གྱི་གནས་ཀྱི་འཆིང་བ་རྣམས་ལས་གྲོལ་བས།

ཐར་པ་མཐར་ཕྱིན་པའི་ལམ་ཐོབ་ནས་བསམ་གཏན་དང་།

ཁ་ཏོན་དག་ལ་བརྩོན་པ་དང་ལྡན་པ།

བརྩོན་འགྲུས་ཕ་རོལ་གནོན་པ་རྣམས་མོས་པ་ཇི་ལྟ་བ་བཞིན་དུ་ཐར་པ་ལ་འཇུག་པར་བྱེད་དོ།

དེ་ལ་ལེགས་པར་སྟོན་པ་བརྩོན་འགྲུས་དང་ལྡན་པ་དུས་རབ་ཏུ་ཤེས་པ་ལུས་དང་ངག་གི་དེ་ཁོ་ན་ཉིད་ཀྱི་མཚན་ཉིད་དང་སྐྱེ་བ་དང་འཇིག་པའི་དེ་ཁོ་ན་ཉིད་ཤེས་པ།

རང་གི་མཚན་ཉིད་ཀྱི་དེ་ཁོ་ན་ཉིད་ཤེས་པ།

ཕུང་པོ་རྣམས་ཀྱི་སྐྱེ་བ་དང་འཇིག་པའི་དེ་ཁོ་ན་ཉིད་ཤེས་པ།

ཉིན་དང་མཚན་དུ་ཡང་བརྩོན་པ་མི་འདོར་བ་དེས་རབ་ཏུ་བརྩོན་པས་ཀྱང་སློབ་དཔོན་ལ་ལེགས་པར་རྟེན་པས་དང་།

ཡེ་ཤེས་མང་དུ་སྤེལ་བས་ཀྱང་ཀུན་ནས་རྩོམ་པར་བྱེད་དོ།

བརྟུན་པར་བྱེད།

རབ་ཏུ་འབད་པར་བྱེད།

ལམ་གོམས་པར་བྱེད།

སྐྱོན་སྤོང་བར་བྱེད་དེ།

ཐོག་མ་མེད་པའི་དུས་ནས་ཞུགས་པར་གྱུར་པ་འཁོར་བའི་འཆིང་བར་གྱུར་པ།

དོན་མེད་པ་རྣམས་ཐམས་ཅད་བྱེད་པ།

མུན་པར་བྱེད་པའི་འོས་སུ་གྱུར་པ།

དོན་མ་ཡིན་པ་རྣམས་ཐམས་ཅད་ཀྱི་རྒྱུར་གྱུར་པ།

སྲོག་ཆགས་རྣམས་ལ་ཤིན་ཏུ་འཐས་པར་གྱུར་པ།

དེ་དག་རྣམས་ཀུན་ནས་བརྩམས་པའི་བརྩོན་འགྲུས་

ཀྱིས་སྤོང་བར་བྱེད་དོ།

དེ་ཇི་ལྟ་ཇི་ལྟར་ལམ་རྣམས་ཐོབ་པར་གྱུར་པ་དེ་ལྟ་དེ་ལྟར་ཕྱིར་ཞིང་ཉིད་ཀྱང་སྤྲོ་བ་སྐྱེ་བར་བྱེད་པ་ཡིན་ནོ།

བརྩོན་འགྲུས་ཤིན་ཏུ་བརྩམས་པས་བྲལ་བའི་འབྲས་བུ་རྣམས་ཅི་ནས་ཀྱང་འབྱུང་བར་བྱེད་དོ།

ཀུན་ནས་ཉོན་མོངས་པའི་ཆོས་འཆིང་བར་གྱུར་པ།

བྱིས་པའི་སྐྱེ་བོ་རྣམས་ཐམས་ཅད་ཀྱི་ཡིད་ཀུན་ནས་འཕྲོག་པར་བྱེད་པའི་ཡུལ་རྣམས་ལ་ཆགས་པར་མི་བྱེད་དོ།

འདི་ལྟ་སྟེ།

འདོད་པའི་རྗེས་སུ་འཐུན་པར་གྱུར་པ་སྒྲ་དང་།

རེག་བྱ་དང་རོ་དང་།

གཟུགས་དང་དྲི་རྣམས་ཀྱིས་དགེ་བའི་རྫས་གང་ཡིན་པ་རྣམས་རྐུ་བ་འདྲིད་པའི་ཆོས་ཅན་རྣམ་པར་སླུ་བའི་ཆོས་ཅན་དོན་མ་ཡིན་པ་རྣམས་ཐམས་ཅད་བྱེད་པ་མི་འདོད་པའི་རྣམ་པར་སྨིན་པར་འགྱུར་བ་མི་འདོད་པའི་འཆིང་བའི་ཆོས་སུ་གྱུར་པའི་བྱིས་པ་སོ་སོའི་སྐྱེ་བོ་ཡོངས་སུ་མ་སྦས་པ་རྣམས་ཐམས་ཅད་ཀྱི་སེམས་རྣམ་པར་གཡེང་བར་བྱེད་པ་དང་།

རྣམ་པར་རྨོངས་པར་བྱེད་པའི་ཡུལ་གྱི་དགྲ་དེ་དག་རྣམས་ཐམས་ཅད་སྤོང་བར་བྱེད་དོ།

རོ་མྱོང་བར་མི་བྱེད་པ་དང་།

ཐར་པའི་ལམ་སྒོམ་པར་བྱེད་དོ།

སེམས་དྲི་མ་མེད་པར་བྱེད་དོ།

དེ་ཇི་ལྟ་ཇི་ལྟར་དྲི་མ་རྣམས་མེད་པར་བྱེད་པ།

དེ་ལྟ་དེ་ལྟར་བརྩོན་འགྲུས་དང་ལྡན་པ་དང་དྲན་པ་དང་ལྡན་པ་དང་།

ངོ་མཚར་བར་གྱུར་པ་ཤེས་བཞིན་ཅན་དགྲ་རབ་ཏུ་བཅོམ་པར་འགྱུར་རོ།

གཞན་ཡང་བརྩོན་འགྲུས་དེ་ཉིད་ཀྱིས་སྤྲོ་བ་དང་བཅས་པ་གང་ཡིན་པས་འདོད་ཆགས་ཞེ་སྡང་གཏི་མུག་རྣམས་རབ་ཏུ་འཇོམས་པར་བྱེད་དོ།

རྣམ་པར་བྲལ་བར་བྱེད་དོ།

རྒྱལ་བར་བྱེད་དོ།

ཡང་སྲིད་པ་མི་འབྱུང་ངོ་།

དགྲ་རྣམས་ལས་རྒྱལ་བ་མི་འཐུན་པ་རྣམས་ལས་རྒྱལ་བ་དེ་ནི་དྲི་མ་མེད་པའི་ནམ་མཁའ་བཞིན་དུ་དང་རབ་ཏུ་དང་བའི་ཆུ་བཞིན་དུ་དང་སྤྲིན་གྱི་ཚོགས་རྣམས་དང་བྲལ་བར་གྱུར་པས།

དྲི་མ་མེད་པའི་ཟླ་བ་བཞིན་དུ་དང་།

ན་བུན་དང་བྲལ་བའི་འཛམ་བུའི་གླིང་གི་ཉི་མ་བཞིན་དུ་སྟེ་དེ་ལྟ་དེ་ལྟར་རྣམ་པར་སྣང་ངོ་།

ཇི་ལྟ་ཇི་ལྟར་ནད་པ་ནད་རྣམས་ལས་གྲོལ་བ་བཞིན་དུ་དང་།

དབུལ་པོ་རྣམས་ཀྱིས་རབ་ཏུ་ནོར་རྙེད་པ་བཞིན་དུ་དང་།

མིག་མེད་པ་རྣམས་ལམ་སྟོར་ནས་ནགས་ཁྲོད་དུ་ཞུགས་པ་ལས་ལམ་དུ་བགྲོད་པར་བྱེད་པ་དེ་དག་རྣམས་བཞིན་དུ་འདིས་མཐར་

ཐུག་པའི་ཚུལ་ཁྲིམས་ཤིས་པ་གང་ཡིན་པ་ཉེ་བར་ཐོབ་པའི་དབང་དུ་བྱས་ནས་བསྙེན་པར་རྫོགས་པར་བྱས་ཏེ་གནས་སོ།

ཇི་ལྟར་བདག་གི་སྐྱེ་བ་རྣམས་ནི་ཟད་དོ།

ཚངས་པར་སྤྱོད་པ་ནི་སྤྱད་དོ།

བདག་གི་འདི་ལས་སྲིད་པ་གཞན་ནི་མི་ཤེས་སོ།

དེ་ལྟར་འདིའི་སྡིག་པ་རྣམས་རྣམ་པར་བྲལ་བ།

འཆིང་བའི་ཞགས་པ་རྣམས་ཐམས་ཅད་ལས་གྲོལ་བ།

ཆུ་ཀླུང་གི་ཕ་རོལ་ཏུ་ཕྱིན་པར་གྱུར་ནས་རྣམ་པར་རྒྱལ་ཞིང་མཛེས་སོ།

བརྩོན་འགྲུས་བརྩམས་པ་དང་ལྡན་པ་གང་གིས་བརྟན་པ་རྣམས་ཀྱི་དེ་དག་རྣམས་ཐམས་ཅད་ཡིན་ནོ།

དེའི་ཕྱིར་ན་ཐམས་ཅད་ཀྱིས་ཀྱང་རབ་ཏུ་འབད་པས་བརྩོན་འགྲུས་བརྩམ་པར་བྱའོ།

འཁོར་བའི་འཆིང་བར་གྱུར་པའི་ལེ་ལོ་དང་བག་མེད་པ་རྣམས་ཀྱང་སྤང་བར་གྱིས་ཤིག །

དེ་ནས་དེའི་ཚེ་ན་མུ་སུ་ལུན་དྷས་བཅོམ་ལྡན་འདས་འོད་སྲུང་གིས་གསུངས་པའི་ཚིགས་སུ་བཅད་པ་བརྗོད་པ།

ཇི་ལྟར།

བརྩོན་འགྲུས་བརྩམས་པ་དྲན་ལྡན་པ།

དེ་ཚེ་གཅིག་ཏུ་མངོན་པར་དགའ།

སྡིག་པའི་ཆོས་ལས་རྣམ་པར་གྲོལ།

མཁས་པས་ཐར་པ་ཐོབ་པར་འགྱུར།

བརྩོན་འགྲུས་རྩོམ་པ་དང་ལྡན་པ།

གང་གིས་ལེ་ལོའི་དྲི་མ་སྤོང་།

ངན་འགྲོ་འཇིགས་ལས་རྣམ་པར་གྲོལ།

སྐྱེ་བོ་དེ་ནི་མཐོ་རིས་འགྲོ།

ལེ་ལོ་ཆོས་རྣམས་ཐམས་ཅད་ཀྱི།

བར་ཆད་བྱེད་པ་ཡིན་པར་འདོད།

སྐྱོན་དེས་ཉེ་བར་བཅོམ་པ་ཡི།

མི་ནི་སྡུག་བསྔལ་སྐལ་ལྡན་ཡིན།

འདི་དང་ཕ་རོལ་བདེ་དོན་གཉེར།

དེ་ཡིས་དེ་ནི་སྤང་བར་གྱིས།

དེ་ཕྱིར་དེས་ཟིན་སྐྱེས་བུ་དེ།

བཀྲ་ཤིས་དང་ཡང་དེ་མཚུངས་འདོད།

དེ་ལྟར་འཐབ་བྲལ་བ་རྣམས་ཀྱི་མངའ་བདག་དེས་སྨྲ་བ་པོའི་ངང་པ་དེ་དག་རྣམས་དང་།

ངང་པའི་རྒྱལ་པོ་དུས་བཟངས་དེ་དང་བདུད་ཀྱི་རིགས་ཀྱི་བག་མེད་པ་དེ་དག་རྣམས་ལ་བཅོམ་ལྡན་འདས་འོད་སྲུང་གིས་གསུངས་པའི་མདོ་གང་ཡིན་པ་སྔོན་གྱི་ལྷ་ལས་དེས་ཐོས་པ་རྣམས་སྟོན་པ་ཡིན་ནོ།

གཞན་ཡང་ཉོན་མོངས་པ་དྲི་མ་ཅན་གྱི་ཆོས་རྣམས་དཀར་པོའི་ཆོས་ཀྱིས་རབ་ཏུ་གཞོམ་པར་བྱའོ།

འདི་ཡང་གང་ཞེ་ན།

འདི་ལྟ་སྟེ།

གྲོང་དང་གྲོང་ཁྱེར་དུ་འཇུག་པ་ལ་དགའ་བའི་སྤྱོད་པ་རྣམས་སྤོང་བ་ནི་ཐམས་

ཅད་གཅིག་ཏུ་དགོན་པ་ན་གནས་པས་སོ།

གྲོང་དང་གྲོང་ཁྱེར་ན་སྤྱོད་པ་ལ་དགའ་བར་བྱེད་པ་གཅིག་ཏུ་གོམས་པར་གྱུར་པ་ནི།

དགེ་སློང་ལ་གཅིག་ཏུ་བར་ཆད་བྱེད་པར་འགྱུར་རོ།

ཇི་ལྟར་གྱུར་པས་ཞེ་ན།

དགེ་སློང་གི་བྱ་བ་ཉིད་དུ་གྱུར་པ་བསམ་གཏན་དང་ཁ་ཏོན་ཡོངས་སུ་སྤངས་ནས་གྲོང་ངམ་གྲོང་ཁྱེར་དུ་འཇུག་པར་བྱེད་ཅིང་གནས་པར་ཡང་བྱེད་དོ།

ཁྱིམ་དེ་དང་དེ་དག་རྣམས་ལ་བློ་ཤིན་ཏུ་ལྷག་པར་ཆགས་པར་གྱུར་ནས།

བུད་མེད་རྣམས་དང་ངམ་སྐྱེས་པ་དང་བཅས་པ་དང་ཡང་རུང་སྟེ།

རྒྱུན་མི་འཆད་པར་འདུ་འཚོག་ཡང་བྱེད་པར་འགྱུར་རོ།

དེ་གལ་ཏེ་བུད་མེད་དང་ལྷན་ཅིག་ཏུ་འཆིང་བར་འགྱུར་བ་རྣམས་ཐམས་ཅད་བྱེད་དོ།

དོན་ཐམས་ཅད་ལས་ཡོངས་སུ་ཉམས་པར་འགྱུར་ཞིང་།

ཡིད་འདོད་ཆགས་ཀྱི་དབང་དུ་འགྱུར་བར་ཀུན་ནས་སྐྱེད་པར་བྱེད་དོ།

རྒྱུ་གང་གིས་བུད་མེད་ནི་མེ་དང་འདྲ་བ་ཡིན་ཏེ།

ཇི་ལྟར་གང་མེ་ལ་ཉེ་བ་ཉིད་དུ་གནས་པ་དེ་ནི་ཉེ་བར་སྲེག་པར་འགྱུར་རོ།

དེ་བཞིན་དུ་ཡང་གང་བུད་མེད་རྣམས་དང་ཉེ་བར་གནས་པར་བྱེད་པ་དེའི་སེམས་རྣམ་པར་འཁྲུལ་བར་འགྱུར་རོ།

རྒྱུ་མཚན་དེའི་ཕྱིར་ན་དགེ་སློང་གིས་གྲོང་དང་གྲོང་ཁྱེར་རྣམས་སུ་འཇུག་པར་མི་བྱའོ།

གལ་ཏེ་སྐྱེས་པ་དག་དང་ལྷན་ཅིག་ཏུ་འདུ་འཚོག་པའམ་གཞན་རྣམས་དང་ཡང་ཀུན་རྗོད་པར་བྱེད་པ་དེ་དག་ནི་བྱ་བ་རྣམས་ཐམས་ཅད་ལས་ཡོངས་སུ་ཉམས་པར་འགྱུར་རོ།

འདིའི་སེམས་ཟག་པ་མེད་པའི་ཆོས་རྣམས་ལ་ཡང་དག་པར་རབ་ཏུ་དང་བར་འགྱུར་བ་ཡང་མ་ཡིན་ནོ།

དགེ་སློང་གྲོང་དང་གྲོང་ཁྱེར་རྣམས་སུ་འཇུག་པ་ལ་དགའ་བའི་སྤྱོད་པའི་དབང་གིས་བར་ཆད་ཆེན་པོར་གྱུར་པ་གཞན་རྣམས་ཉིད་ཀྱང་འབྱུང་བར་འགྱུར་ཏེ།

དེ་ལ་འདི་དག་རྣམས་ཀྱང་གང་ཞེ་ན།

འདི་ལྟ་སྟེ།

ཁྱིམ་ནས་ཁྱིམ་རྣམས་སུ་འཇུག་པའི་དགེ་སློང་ནི་སེམས་རྣམ་པར་གཡོས་པར་འགྱུར་རོ།

ཁྱིམ་རྣམས་ཀྱི་ཉེ་བར་སྤྱོད་པར་བྱ་བ་རྣམས་ཡོངས་སུ་རྟོགས་ཤིང་ཟས་དང་སྐོམ་གྱི་ལོངས་སྤྱོད་དག་མངོན་པར་མཐོང་ནས་སྤངས་ཀྱང་དེ་ནམ་ཞིག་ན་སླར་ཡང་མི་མཉམ་པ་རྣམས་ལ་འཇུག་པར་རྩོམ་སྟེ།

ནགས་ཀྱི་ནང་ནས་ཅི་ནས་ཀྱང་ཁྱིམ་པར་འགྱུར་རོ།

ནགས་ན་གནས་པའི་དགའ་བ་

ལས་ཡོངས་སུ་ཉམས་པར་གྱུར་ནས།

དེ་ཕྱིར་ཡང་ཁྱིམ་གྱི་གནས་ཀྱི་འཆིང་བའི་སྐྱོན་དེ་ཉིད་ཀྱིས་ཀུན་ནས་བཅིངས་པར་གྱུར་ནས།

འདོད་ཆགས་དང་ཞེ་སྡང་དང་གཏི་མུག་རྣམས་ལ་སྤྱོད་དོ།

དེ་ཉེས་པ་དེ་དག་རྣམས་ཀྱི་སྐྱོན་གྱིས་ཕྱིར་ཡང་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེ་བ་ཡིན་ནོ།

སྡུག་བསྔལ་དེ་དག་རྣམས་ཀྱི་རྩ་བ་ཡང་གྲོང་དང་གྲོང་ཁྱེར་དུ་འཇུག་པའི་སྤྱོད་པ་ལ་དགའ་བ་ཡིན་ནོ།

དེའི་ཕྱིར་ཡང་དག་པའི་དགེ་སློང་ཡིན་པར་འདོད་པས་དེ་དག་རྣམས་ཡོངས་སུ་སྤོངས་ཤིག །

རྣམ་པ་དེ་ལྟ་བུའི་སྐྱོན་དེ་དག་རྣམས་ཀྱང་གང་གིས་སྤོང་ན།

གཅིག་ཏུ་དགོན་པ་ན་གནས་པས་སོ།

དགོན་པ་ན་གནས་པ་དེ་ཡང་མཐར་ཐུག་པའི་ཡོན་ཏན་རྣམས་ཐམས་ཅད་ཀྱི་རྟེན་དུ་གྱུར་པ་མཆོག་ཏུ་བཟང་བ་ཡིན་ནོ།

གཅིག་པུ་དགོན་པ་ན་གནས་པར་དགའ་བའི་དགེ་སློང་ནི་དབང་པོ་རྣམས་ཞི་བ་དང་སེམས་ཤིན་ཏུ་རབ་ཏུ་དང་བ་དང་།

བློ་ལེགས་པར་བཏུལ་བའི་གསེར་དང་མཚུངས་པ་དང་།

མཆོག་ཏུ་ཞི་བ་དང་དབང་པོ་རྣམས་མཆོག་ཏུ་བསྡམས་པ་དང་འཇིགས་པའི་དྲི་མ་རྣམས་དང་རྣམ་པར་བྲལ་བ་དང་།

མཆོག་ཏུ་གཙང་བར་གྱུར་པའི་ཟག་པ་མེད་པའི་བདེ་བ་རྣམས་གང་ཡིན་པ་འཐོབ་པར་བྱེད་དོ།

བདེ་བ་དེའི་ཁྱད་པར་རྣམས་ཀྱིས་ན་འདོད་པ་ན་སྤྱོད་པའི་ལྷའི་རིགས་དྲུག་པོ་འདི་དག་རྣམས་ཐམས་ཅད་ཀྱིས་ཀྱང་ཡང་དག་པའི་ལེགས་པ་དང་ལྡན་པར་གྱུར་ཅིང་ཀུན་གྱིས་ཀྱང་གང་སྔོན་ལས་རྣམས་གཅིག་ཏུ་བྱས་པར་གྱུར་ལ།

དེ་ཡང་འདོད་པ་སྡུག་པ་ཡིད་དུ་འོང་བ་མཆོག་ཏུ་མཚུངས་པ་མེད་པའི་ལྷ་གཅིག་གི་རྣམ་པར་སྨིན་པའི་འབྲས་བུར་གྱུར་ཅིང་འདོད་པ་ན་སྤྱོད་པ་འདི་དག་རྣམས་ཀྱི་བདེ་བ་རྣམས་དང་ཀུན་ནས་ལྡན་པར་གྱུར་པ་གང་ཡིན་པ་དེས་ཀྱང་།

ཟག་པ་ཟད་པའི་བདེ་བ་གཅིག་གི་ཆར་ཡང་མི་ཕོད་ཅིང་དཔེར་ཡང་མི་བཟོད་དོ།

དཔྱད་པར་གྱུར་པ་ན་ཐམས་ཅད་དུ་དཔེར་ཡང་མི་ཆོག་གོ།

དེའི་ཕྱིར་གང་འགའ་ཞིག་དོན་དམ་པའི་བདེ་བ་འདོད་པ་དེས་གྲོང་དང་གྲོང་ཁྱེར་དུ་འཇུག་པ་ལ་དགའ་བའི་བདེ་བ་དེ་དག་རྣམས་མཐོང་ལ་བསམ་གཏན་དང་སྙོམས་པར་འཇུག་པའི་བདེ་བ་རྣམས་དོན་དུ་གཉེར་ཞིང་རྟག་ཏུ་གཅིག་པུ་ཉིད་

མངོན་པར་དགའ་བས་རི་ཁྲོད་དང་རིའི་ཕུག་དང་དགོན་པ་རྣམས་སུ་རྩྭ་སོག་གི་སྟན་ལ་གཅིག་ཏུ་གནས་པར་འགྱུར་བར་གྱིས་ཤིག །

ཟག་པ་མེད་པའི་བདེ་བ་ལ་མངོན་པར་དགའ་བས་གནས་པའི་དགེ་སློང་རྣམས་ནི་གྲོགས་པོ་དང་གཉེན་འབྲེལ་དང་རང་གི་སྐྱེ་བོ་རྣམས་ལྟ་བར་བྱེད་པས་རྣམ་པར་རྒྱུ་བ་སྟེན་པར་འགྱུར་བ་ནི་མ་ཡིན་ནོ།

དེ་རང་གི་སྐྱེ་བོ་དང་གྲོགས་པོ་དང་གཉེན་འབྲེལ་རྣམས་ལ་ལྟ་བས་རྣམ་པར་རྒྱུ་བ་བསྟེན་པར་གྱུར་ན།

དེ་རང་གི་སྐྱེ་བོ་དང་གྲོགས་པོ་དང་གཉེན་འབྲེལ་རྣམས་དང་འཕྲད་པ་ལས་བྱུང་བའི་བདེ་བ་རྣམས་ནི་འཇིག་པ་དང་མི་བརྟན་པ་དང་མི་རྟག་པ་དང་མཐར་རྣམ་པར་འབྲལ་བ་དེ་དག་རྣམས་ནི་མཆོག་ཏུ་མཐར་ཕྱིན་པ་མ་ཡིན་ནོ།

ཉོན་མོངས་པ་རྣམས་དང་བཅས་པ་དང་དེ་ནི་དྲི་མ་དང་སྐྱོན་དང་གནོད་པ་དང་བཅས་པ་དང་གཅིག་ཏུ་ངེས་པ་མ་ཡིན་པ་འཇིགས་པ་དང་བཅས་པར་གཅིག་ཏུ་ངེས་པ་དཔེ་མེད་པ་རྣམས་ལས་རྣམ་པར་མ་གྲོལ་བ་ཡིན་ནོ།

དེའི་ཕྱིར་ན་བློ་གྲོས་དམན་པར་གྱུར་པ་གང་འགའ་ཞིག་གིས་དོན་དམ་པའི་བདེ་བ་རྣམས་ཀུན་ནས་དོར་ནས་ཟག་པ་དང་བཅས་པའི་བདེ་བ་ཚུལ་དང་འཐུན་པ་མ་ཡིན་པ་སྡུག་བསྔལ་རྣམས་ཚོལ་བར་བྱེད་དོ།

དེ་ནི་འོད་བོར་བར་གྱུར་ནས་མུན་པ་ཚོལ་བར་བྱེད་པ་ཡིན་ནོ།

དེ་ལས་ཀྱང་འཁྱམ་པར་གྱུར་ཏེ།

བློ་དང་མི་ལྡན་ཞིང་ཡོན་ཏན་དང་ཡོན་ཏན་མ་ཡིན་པ་དང་སྐྱོན་གྱི་མཚན་ཉིད་ལ་བློ་གྲོས་ལྡོངས་པའི་ཕྱིར་རོ།

དེའི་ཕྱིར་གྲོང་དང་གྲོང་ཁྱེར་དུ་འཇུག་པར་དགའ་བའི་སྤྱོད་པ་རྣམས་སྤོངས་ལ།

རྟག་པར་གཅིག་པུ་དགོན་པ་ན་གནས་པ་ལ་མངོན་པར་དགའ་བར་འགྱུར་བར་གྱིས་ཤིག །

དེ་ལྟར་ན་ཀུན་ནས་ཉོན་མོངས་པ་རྣམས་སྤངས་པ་ཤིན་ཏུ་མཐར་ཕྱིན་པའི་བདེ་བ་རྣམས་འཐོབ་པ་ཡིན་ནོ།

ཆོས་ལྔ་པ་དྲི་མ་དང་བཅས་པ་འདི་ནི་དྲི་མ་མེད་པའི་ཆོས་ཀྱིས་རབ་ཏུ་གཞོམ་པར་བྱའོ།

བདེ་བ་འདོད་པ་རྣམས་དང་བདུད་ཀྱི་ཡུལ་ལ་མངོན་པར་མི་དགའ་བ་རྣམས་དང་དེའི་ས་ལ་འདུག་པར་མི་འདོད་པ་ཉིད་ཀྱིས་དེ་ལྟར་དྲི་མ་དང་བཅས་པའི་ཆོས་དེ་དྲི་མ་མེད་པའི་ཆོས་ཀྱིས་རབ་ཏུ་གཞོམ་པར་བྱའོ།

དེ་ལྟར་མུ་སུ་ལུན་དྷ་འདིས་ཀུན་ནས་བརྗོད་པ་དང་ལྡན་པའི་ངང་པ་དེ་དག་རྣམས་ཀྱི་བློ་ཡང་རྟོགས་པས་

དང་དགེ་བའི་མཐའ་དང་ལྡན་པ་མཆོག་ཏུ་རྒྱ་ཆེ་བའི་བློ་གྲོས་ཅན་གྱི་བྱང་ཆུབ་སེམས་དཔའ་དུས་བཟངས་གཞན་ལ་ཕན་པ་ལ་རབ་ཏུ་ཞུགས་པ་དེ་དང་།

བདུད་ཀྱི་ཕྱོགས་སུ་གྱུར་པའི་བག་མེད་པ་དེ་འཁོར་རྒྱགས་པ་དང་སྨྱོ་བ་དང་བཅས་པ་རྣམས་དང་།

དེ་དག་རྣམས་ཀྱི་བསམ་པ་རིག་ནས་བཅོམ་ལྡན་འདས་འོད་སྲུང་གིས་གསུངས་པའི་མདོ་འདི་ཡུལ་དང་དུས་སུ་རིགས་པར་བསྟན་ནོ།

དེ་ལ་ཆོས་བཅུ་གཅིག་པོ་རྣམས་ལས་ཆོས་ལྔ་པ་བསྟན་པ་ཡིན་ནོ།

ལྷག་མ་དྲུག་པ་དེ་ཡང་ཡུལ་དང་དུས་སུ་འོས་པར་ངས་བསྟན་པར་བྱ་ཡིས་ཁྱེད་རྣམས་ཡིད་རྩེ་གཅིག་པ་དང་ཡང་དག་པར་ལྡན་པར་གྱིས་ཤིག །

གང་གི་ཕྱིར་དལ་འབྱོར་ཕུན་སུམ་ཚོགས་པ་ཐོབ་པར་གྱུར་ནས།

གང་དག་ཆོས་སྟོན་པར་མི་བྱེད་པ་དང་གང་ཡང་ཉན་པར་མི་བྱེད་པ་དེ་དག་ནི་ཤིན་ཏུ་མི་ཁོམ་པ་ཐོབ་པ་ཡིན་ནོ།

དེའི་ཕྱིར་ན་ཇི་སྲིད་དུ་དལ་འབྱོར་ཕུན་སུམ་ཚོགས་པ་དང་དབང་པོ་ཀུན་ཚང་བར་གྱུར་པ་དེ་སྲིད་དུ་ཆོས་བསྟན་པར་བྱའོ།

གང་གི་ཕྱིར་ངན་སོང་གི་ས་གསུམ་པོ་དམྱལ་བ་དང་ཡི་དགས་དང་དུད་འགྲོ་རྣམས་ནི་ཤིན་ཏུ་སྡུག་བསྔལ་བའི་ཕྱིར་རོ།

དམྱལ་བ་ནི་ཇི་ལྟར་ཆོས་ཉན་པར་འགྱུར།

དེ་བཞིན་དུ་ཡི་དགས་དང་དུད་འགྲོ་རྣམས་ན་ཇི་ལྟར་ཆོས་འདུལ་བ་རྣམས་ཡོད།

ཕན་ཚུན་དུ་གསོད་པར་བྱེད་པ་དང་སྐོམ་པ་དང་ལྟོགས་པའི་སྐྱོན་དང་ལྡན་པའི་ཕྱིར་རོ།

ལྷ་དང་མི་རྣམས་ཁོ་ན་ནི་ཆོས་སྒྲོགས་པ་ཡོད་པ་ཡིན་ཏེ།

གང་དག་བག་མེད་པ་མ་ཡིན་ཞིང་བག་མེད་པར་རྒྱུ་བ་མ་ཡིན་པ་རྣམས་ཀྱིས་སོ།

དེ་ལ་བདག་གིས་བག་མེད་པ་སྤངས་ལ།

ཁྱེད་དད་པའི་མོས་པ་དང་ལྡན་པ་དགེ་བའི་བསམ་པ་ཅན་རྣམས་ཉིད་ལ་ངས་ཆོས་བསྟན་པར་བྱ་ཡིས།

དེ་ཁྱེད་རྣམས་ཀྱིས་རབ་ཏུ་གུས་པར་གྱིས་ལ་མཉན་པར་གྱིས་ཤིག །

དེ་ལྟར་ཆོས་འདུལ་བ་ནི་ཤིན་ཏུ་དཀོན་པ་དང་དལ་འབྱོར་ཕུན་སུམ་ཚོགས་པ་ཡང་ཤིན་ཏུ་རྙེད་པར་དཀའ་བ་ཡིན་ནོ།

གཞན་ཡང་ཆོས་དྲི་མ་ཅན་མི་གཙང་བ་དང་བཅས་པ་གཞན་རྣམས་སླུ་བར་བྱེད་པ་ཡང་གང་ཞེ་ན།

འདི་ལྟ་སྟེ་འདོད་པ་ཆེ་བའོ།

ཆོས་དེ་ཡང་མཆོག་ཏུ་དྲི་མ་ཅན་དུ་གྱུར་པ་འདོད་པ་ཆེ་བས་བྱིན་གྱིས་བརླབས་པ་གང་གིས་གཞོམ་པར་

བྱ་ན།

འདི་ལྟ་སྟེ་ཆོག་ཤེས་པས་སོ།

འདོད་པ་ཆེ་བ་ཞེས་བྱ་བ་ནི་ཁྱིམ་པ་རྣམས་དང་རབ་ཏུ་བྱུང་བ་རྣམས་ཀྱང་བདེ་བར་རྒྱུ་བ་མ་ཡིན་ཏེ།

གང་གི་ཕྱིར་འདོད་པ་ཆེ་བར་གྱུར་པ་རྣམས་ནི་ཁྱིམ་པའམ་རབ་ཏུ་བྱུང་བ་ཡང་རུང་སྟེ།

ཉིན་མོ་དང་མཚན་མོར་ཡང་དེ་དག་རྣམས་བདེ་བར་མི་འགྱུར་རོ།

རྫས་རྣམས་ཐོབ་པར་གྱུར་པས་ཀྱང་ཞི་བ་ཐོབ་པར་མི་འགྱུར་རོ།

ནོར་གང་རྙེད་པར་གྱུར་ཡང་དེས་མཐར་ཐུག་པའི་ཚིམ་པ་འབྱུང་བར་མི་འགྱུར་རོ།

འདོད་པ་ཆེ་བར་གྱུར་པ་དེ་ཡང་ཁྱིམ་གྱི་གནས་ནས་ངེས་པར་འབྱུང་བའི་རབ་ཏུ་བྱུང་བ་རྣམས་ལ་ཇི་ལྟ་བར།

དེ་ལྟར་ཁྱིམ་པ་རྣམས་ཀྱི་བར་ཆད་བྱེད་པར་ནི་མི་འགྱུར་རོ།

གང་གི་ཕྱིར་རབ་ཏུ་བྱུང་བ་འདོད་པ་ཆེ་བར་གྱུར་པ་གང་ཡིན་པ་དེ་ནི་ཁྱིམ་པ་ཡིན་གྱི་རབ་ཏུ་བྱུང་བ་ནི་མ་ཡིན་ནོ།

རབ་ཏུ་བྱུང་བ་ཞེས་བྱ་བ་ནི་རྒྱགས་པ་དང་ང་རྒྱལ་དང་འགྱིང་བ་དང་རྨོངས་པ་དང་ཕྲག་དོག་རྣམས་བཅོམ་པ་དང་འདོད་པ་ཆེ་བ་དང་ཡང་རྣམ་པར་བྲལ་བ་ཡིན་ནོ།

སྤྱིར་སྐྱོན་དེ་དག་རྣམས་ཉིད་ལས་ཀྱང་དགེ་སློང་འདོད་པ་ཆེ་བའི་མིང་ཅན་རྣམས་ལ་ནི་གཞན་ཐམས་ཅད་འཕྱ་བར་འགྱུར་རོ།

གང་ཡང་འདོད་པ་ཆེ་བའི་བློ་ཅན་གྱི་དགེ་སློང་ནི།

རྟག་ཏུ་བློ་ནོར་ལ་སོང་བར་གྱུར་པས་ཉིན་མཚན་མེད་པར་དེའི་སེམས་དགེ་བའི་ཆོས་རྣམས་ལ་ལེགས་པར་རབ་ཏུ་དང་བར་མི་འགྱུར་རོ།

དེའི་བློ་རབ་ཏུ་མ་དང་བ་དང་དབང་པོ་རབ་ཏུ་མ་དང་བ་དང་བྱ་བ་རྣམས་རབ་ཏུ་མ་དང་བ་གང་ཡིན་པའི་གོམ་པ་འབོར་བར་གྱུར་པའམ་དགེ་འདུན་གྱི་ས་ལ་འཆག་པར་བྱེད་ཀྱང་དེར་དམྱལ་བར་ཉེ་བར་འགྱུར་ན།

གནས་མལ་དང་ནད་ཀྱི་རྐྱེན་སྨན་དང་ཡོ་བྱད་རྣམས་ཀྱིས་ནི་དང་པོ་ཁོ་ནར་བར་ཆད་བྱེད་པ་འབྱུང་བར་འགྱུར་བ་ཡིན་ནོ།

དེ་དམྱལ་བ་འབའ་ཞིག་ཏུ་འཚེད་པར་བྱེད་དེ།

གང་ཚུལ་ཁྲིམས་འཆལ་བར་གྱུར་པ་འདོད་པ་ཆེ་བ་སྡིག་པའི་ཆོས་ཅན།

དགེ་སྦྱོང་མ་ཡིན་པར་དགེ་སྦྱོང་དུ་ཁས་འཆེས་པ།

སེང་གེའི་པགས་པ་ཀུན་ནས་གྱོན་པའི་ཅེ་སྤྱང་སྒྱུ་མའི་ཟོང་དང་མཚུངས་པ།

དུང་གི་སྒྲ་དང་མཚུངས་པར་སྤྱོད་པ་མཆོག་ཏུ་སྟོང་པ་ཤིན་ཏུ་སླུ་བ་ཤིན་ཏུ་ཆད་པར་གྱུར་པ་ཡིན་ནོ།

གང་འགའ་ཞིག་འདོད་པ་ཆེ་བར་གྱུར་པ་ཇི་ལྟར་ང་ནི་

དགེ་སློང་ཡིན་ཏེ་འོད་སྲུང་བ་ཡིན་ནོ།

འོད་སྲུང་གི་ཆོས་འདུལ་བ་ལ་རབ་ཏུ་བྱུང་བ་ཡིན་ནོ་ཞེས་དེ་ལྟར་དམ་འཆའ་བརྗོད་པར་བྱེད་པ་ན།

འདོད་པ་ཆེ་བར་གྱུར་པ་དེ་ལྟར་མེས་ནི་མི་སྲེག་གོ།

ཇི་ལྟར་འདོད་པ་ཆེ་བས་བློ་གྲོས་ཆུང་བ་རྣམས་ན་བར་བྱེད་པ་དེ་ལྟར་དུག་གིས་ལྷང་ཀྱོག་མི་བྱེད་དོ།

ཇི་ལྟར་འདོད་པ་ཆེ་བའི་རྒས་པས་རྒས་པར་བྱེད་པ་དེ་ལྟར་རྒ་བས་རྒས་པར་མི་བྱེད་དོ།

ཇི་ལྟར་དགེ་བའི་ལྗོན་ཤིང་རྣམས་འདོད་པ་ཆེ་བའི་མཚོན་གྱིས་རྩ་བ་ནས་གཅོད་པར་བྱེད་པ་དེ་ལྟར་མཚོན་གྱིས་ནི་རྩ་བ་ནས་མི་གཅོད་དོ།

ཇི་ལྟར་འདོད་པ་ཆེ་བའི་ནད་རྣམས་ཀྱིས་ཉེ་བར་འཇོམས་པར་བྱེད་པ་དེ་ལྟར་ནད་རྣམས་ཀྱིས་ནི་ཉེ་བར་འཇོམས་པར་མི་བྱེད་དོ།

ཇི་ལྟར་འདོད་པ་ཆེ་བའི་དགྲས་ནང་དུ་གསེབ་ཏུ་ཉེ་བར་སོང་ནས་སྙིང་ལ་ཀུན་ཏུ་གནས་ཏེ་སྲོག་འཇིག་པར་བྱེད་པ་དེ་ལྟར་དགྲ་བོ་གླགས་ཚོལ་བ་རྣམས་ནང་གི་གསེབ་ཏུ་ཞུགས་ཏེ།

རྟག་ཏུ་ཉེ་བར་གླགས་སྐབས་ཚོལ་བ་རྣམས་ཀྱང་སྲོག་གཅོད་པར་མི་བྱེད་དོ།

དེའི་ཕྱིར་སྐྱོན་དེ་དག་རྟོགས་པར་གྱིས་ལ་གཉིས་འཇིག་པར་བྱེད་པའི་སྐྱོན་ཅན་དགེ་སློང་འདོད་པ་ཆེ་བ་རྣམས་ཀྱིས་འཇིག་རྟེན་གཉི་ག་འཇིག་པར་བྱེད་པ་དང་།

དྲི་མ་རྣམས་དང་ལྡན་པ་དང་སྡིག་པའི་རྩེ་མོར་གྱུར་པ་ཡིན་པས་རྣམ་པར་སྤང་བར་གྱིས་ཤིག །

དེ་སྤྱད་པར་གྱུར་པ་ན་ཡང་ཉིན་མོའམ་མཚན་མོ་ཡང་རུང་སྟེ་འགའ་ཞིག་ཀྱང་བདེ་བར་མི་འགྱུར་རོ།

དེ་ནས་དེའི་ཚེ་ན་འཐབ་བྲལ་བ་རྣམས་ཀྱི་མངའ་བདག་མུ་སུ་ལུན་དྷ་དེས་བཅོམ་ལྡན་འདས་འོད་སྲུང་གིས་གསུངས་པའི་ཚིགས་སུ་བཅད་པར་བརྗོད་པ།

ཇི་ལྟར།

འདོད་པ་ཆེ་བའི་མཚོན་ཆེན་ནི།

གང་གིས་གཏུབ་པ་བྱིས་པ་རྣམས།

དེ་ཕྱིར་མཚོན་ཆ་བཞིན་དེ་སྤོངས།

མིག་མེད་པ་ནི་དེས་བཅིངས་ནས།

འདོད་ཆེན་རྨ་ནི་མི་བཟད་པ།

གང་གི་སྙིང་ལ་སྐྱེ་བར་འགྱུར།

ཉིན་དང་མཚན་མོ་མེད་པར་ཡང་།

འདོད་ལྡན་དེ་ནི་བདེར་མི་འགྱུར།

ཀུན་རྟོག་བུད་ཤིང་ལས་བྱུང་བའི།

སྲེད་པའི་རླུང་གིས་ཀུན་ཏུ་སྤར།

འདོད་ཆེན་རང་བཞིན་མེ་ཡིས་ནི།

མི་རྣམས་སྙིང་ནི་སྲེག་པར་བྱེད།

འདོད་པ་ཡིས་ནི་བསྐོར་བའི་ཡིད།

སེམས་ནི་ཡང་མོའི་

སྐྱེས་བུ་ནི།

ནོར་ལ་སྲེད་པར་གྱུར་པ་ཡིས།

གསོན་པའི་སྙིང་པོ་འཇོམས་པར་བྱེད།

གང་ཡང་སྡིག་པའི་ལས་རྣམས་ནི།

སྐྱེས་བུ་ཐ་ཤལ་གྱིས་བྱེད་དོ།

དེ་ཀུན་ནོར་སྲེད་ལས་ཡིན་པར།

མཁས་པས་རབ་ཏུ་བརྗོད་པ་ཡིན།

འབར་བ་གང་དུ་རྣམ་པར་འཇུག །

གང་གིས་མི་རིགས་པར་བྱེད་པ།

དེ་ཀུན་འདོད་པའི་སྐྱོན་གྱིས་ནི།

བདག་ལ་ཕན་མིན་བྱེད་པ་ཡིན།

འཁྲུག་པ་རྣམ་པ་སྣ་ཚོགས་དང་།

མཚོན་ཆའི་སྡུག་བསྔལ་ཤིན་ཏུ་ཡང་།

བསྟེན་པའི་སྐྱེས་བུ་རྨོངས་པ་གང་།

དེ་ཡི་རྒྱུ་ཡང་འདི་ཡིན་ནོ།

འདོད་པའི་སྐྱོན་ལས་ཀུན་བྱུང་བའི།

ཉེར་འཚེ་འདི་དག་གོ་བར་གྱིས།

དེ་བསྟེན་ཕན་པ་བྱེད་མིན་པར།

ལམ་རིག་པས་ནི་ཡོངས་སུ་གསུངས།

དེ་ལྟར་མུ་སུ་ལུན་དྷ་དེས་སྨྲ་བ་པོའི་ངང་པ་དེ་དག་དང་ངང་པའི་རྒྱལ་པོ་དུས་བཟངས་དེ་དང་བག་མེད་པས་མགོ་དྲངས་པའི་བདུད་ཀྱི་རིགས་སུ་གྱུར་པ་གསུམ་པོ་རྒྱགས་པ་དང་སྨྱོ་བ་དང་དེ་དག་རྣམས་ལ་བཤད་དོ།

རྣམ་པ་དེ་ལྟ་བུའི་སྐྱོན་ཆེན་པོ་རྣམས་དགེ་བའི་ཆོས་གང་དག་གིས་རབ་ཏུ་གཞོམ་པར་བྱ་བ་ཡིན་ན།

འདི་ལྟ་སྟེ་འདོད་པ་ཆུང་བ་ཞེས་བྱ་བས་སོ།

འདོད་པ་ཆུང་བ་ཞེས་བྱ་བ་ནི་འདི་ལྟ་སྟེ།

བདེ་བ་རྣམས་ཐམས་ཅད་འབྱུང་བའོ།

དེ་གང་ལ་ཡོད་པའི་སྐྱེས་བུ་དེ་ནི་རྟག་ཏུ་བདེ་བའི་མཆོག་རྣམས་དང་ལྡན་པ་ཡིན་ལ།

དེ་ལ་མེ་དང་རྒྱལ་པོ་དང་ཆོམ་རྐུན་དང་ཆུ་ལ་སོགས་པ་རྣམས་ཀྱི་འཇིགས་པ་མེད་དོ།

འདི་ནོར་གྱི་སྲེད་པ་རྣམས་ཀྱིས་རྣམ་པར་བསྲེགས་ནས་ཁྱིམ་ནས་ཁྱིམ་དག་ཏུ་བསྟེན་པར་བྱ་བའི་དོན་དུ་སྨྲ་བར་མི་བྱེད་དོ།

བསྟེན་གྲོགས་རྣམས་ནི་རྐུན་མའི་བསྟེན་གྲོགས་ཡིན་ནོ།

དམན་པའི་གནས་རྣམས་ཀྱི་ཁྱིམ་སྒོར་གནས་པ་ཡང་མ་ཡིན་ནོ།

རྫུན་གྱིས་བསྟེན་གྲོགས་ཀྱི་ཚིག་དག་ཀྱང་སྨྲ་བར་མི་བྱེད་དོ།

གར་དང་རྒོད་པ་དང་འགྱིང་བག་རྣམས་ཞབས་འབྲིང་གི་དོན་དུ་བྱེད་པ་ཡང་མ་ཡིན་ནོ།

ཚིག་རྣམས་སྨྲ་བར་མི་བྱེད་ཅིང་དོན་དག་ཀྱང་མི་བྱེད་དོ།

ནོར་གྱི་འདོད་པའི་མེ་རྣམས་ཀྱིས་མི་སྲེག་གོ།

གཞན་དག་དང་མཉམ་དུ་འགྲོགས་པ་ལ་སྤྲོ་བར་གྱུར་པ་རྣམས་ཀྱི་དབུགས་འབྱིན་པ་མེད་པའི་སྡུག་བསྔལ་མང་པོར་མི་འགྱུར་

རོ།

ནོར་གྱི་འདོད་པས་སྡིག་པའི་གྲོགས་པོ་རྣམས་སྟེན་པར་མི་བྱེད་དོ།

རྟག་ཏུ་དོགས་པ་དང་བཅས་པར་མི་འགྱུར་ཞིང་ལམ་དུ་འགྲོ་བར་གྱུར་པ་ན་ཆོམ་རྐུན་པའི་འཇིགས་པ་མེད་དོ།

གྲོགས་པོ་མ་ཡིན་པ་རྣམས་མང་བར་མི་འགྱུར་ཞིང་།

སྐྱེ་བོ་རྣམས་ཐམས་ཅད་ཀྱིས་རྟོག་དཔྱོད་བྱེད་པར་མི་འགྱུར་རོ།

ཆད་པའི་འཇིགས་པས་ཀྱང་རྣམ་པར་མི་འཇིགས་སོ།

དེ་ལྟར་ཁྱིམ་པར་གྱུར་ཀྱང་འཇིགས་པ་རྣམས་མེད་པར་འགྱུར་རོ།

སྐྱོན་གྱི་འཇིགས་པ་རྣམས་ཀུན་ཏུ་འགགས་པ་དང་ཐམས་ཅད་དུ་སོ་གསོད་པར་གནས་པ་དང་གང་ཡང་ཁྱིམ་པ་རྣམས་ཀྱང་སྐྱོན་ལས་ཀུན་ཏུ་རྒལ་བ་ཡིན་ན་ནགས་ན་གནས་པ་རྣམས་ལ་ལྟ་ཅི་སྨོས།

དེ་ཉིད་སླར་ཡང་འདོད་པ་ཆེ་བར་བྱེད་ན་ནི་དེ་སྐྱུགས་པ་ཟ་བ་དང་མཚུངས་པར་འགྱུར་རོ།

དགེ་སྦྱོང་གི་མཆོད་པའི་མཆོག་རྣམས་ནི་འདི་ལྟ་སྟེ།

འདོད་པ་ཆུང་བ་ཞེས་བྱ་བ་ཡིན་ནོ།

འདོད་པ་ཆུང་ཞིང་ཆོག་ཤེས་པའི་དགེ་སློང་རྣམས་ནི་གང་གི་ཕྱིར་ཤིན་ཏུ་ཡང་མཛེས་ཤིང་གསལ་ལ་རྣམ་པར་སྣང་ངོ་།

གདན་གཅིག་པ་འབའ་ཞིག་དང་།

ཕྱག་དར་ཁྲོད་པ་འབའ་ཞིག་དང་།

གཅིག་པུ་ཁོ་ན་རྒྱུ་བ་དང་།

རིའི་ཁྲོད་དང་ཕུག་དག་དང་རྩྭའི་ཕུང་པོ་དང་།

དུར་ཁྲོད་འབའ་ཞིག་དུ་གནས་པ་དང་།

གསུས་པའི་སུམ་ཆ་འབའ་ཞིག་གིས་ཆོག་ཤེས་པ་དང་།

སུ་ཡང་མི་ཤེས་པ་འབའ་ཞིག་གིས་ཡུལ་ལྗོངས་རྒྱུ་བར་བྱེད་པ་དང་།

གཉེན་བཤེས་དང་གྲོགས་པོ་དང་རང་གི་སྐྱེ་བོ་རྣམས་ལ་ཡང་བསོད་སྙོམས་འབའ་ཞིག་པ་དང་།

ལྷུང་བཟེད་གོག་པོ་ཅིག་འབའ་ཞིག་འཆང་བར་བྱེད་པ་དང་།

ཤེས་རབ་ཀྱིས་ཕྱིན་ཅི་ལོག་འབའ་ཞིག་ཡོངས་སུ་སྤོང་བར་བྱེད་པ་དང་།

ཡུལ་གང་ན་མཆོད་པར་བྱེད་པའི་ཡུལ་དེ་ཡོངས་སུ་སྤོང་བར་བྱེད་པ་དང་།

ལམ་འབའ་ཞིག་ལ་ལེགས་པར་ལྟ་བ་དང་།

གཉའ་ཤིང་གང་ཙམ་དུ་ལྟ་བ་དང་།

གཞན་དུ་མིག་མི་གཡེང་བ་དང་།

རོ་ཞིམ་པོ་འབའ་ཞིག་ཟ་བ་ལ་སྟེན་པ་སྤོང་བ་དང་།

ཆུ་ཞག་དུ་མ་བསྒྲངས་པ་འབའ་ཞིག་གི་བཏུང་བ་འཐུང་བ་དང་།

ཡུལ་ལྗོངས་དང་གྲོང་དག་ཏུ་ཞག་གསུམ་དང་ཞག་བདུན་འབའ་ཞིག་གནས་པར་བྱེད་པ་དང་།

གསེར་དང་འཁར་བ་དང་དངུལ་

གྱིས་མཛེས་པར་བྱས་པའི་ཉལ་ཁྲི་འཛིན་པར་མི་བྱེད་པ་ཁོ་ན་དང་།

སྔོན་གྱི་ཁྱིམ་དང་གྲོགས་པོ་དང་གཉེན་བཤེས་ཀྱི་ལམ་ཀུན་ཏུ་ལྟ་བར་བྱེད་པ་སྤོང་བར་བྱེད་པ་འབའ་ཞིག་དང་།

མཆོག་ཏུ་གྱུར་པའི་རྒྱལ་པོའི་བསོད་སྙོམས་དང་མལ་སྟན་དང་རྒྱལ་པོའི་སྒོར་སྟེན་པར་བྱེད་པ་རྣམས་སྤོང་བ་ཁོ་ནར་སྤྱོད་པ་དང་།

རིགས་ཀྱིས་ཆོག་ལས་རབ་ཏུ་བྱུང་བར་ཀུན་ནས་སྒྲོགས་པ་རྣམས་སྤོང་བ་ཁོ་ནར་བྱེད་པ་དང་།

དེ་དང་རང་བཞིན་མཚུངས་པ་འབའ་ཞིག་དང་བརྗོད་པ་དང་གསོང་གསལ་དང་ཀུན་རྗོད་པར་བྱེད་པ་ཡིན་ནོ།

རྣམ་པ་དེ་ལྟ་བུར་གྱུར་པའི་དགེ་སློང་གི་སྡོམ་པ་དང་དཀའ་ཐུབ་ནི་རྙོག་པ་རྣམ་པར་སྤངས་པ་མཆོག་ཏུ་ཆོག་ཤེས་པ།

མཆོག་ཏུ་འདོད་པ་ཆུང་བས་ནི་བདུད་ཀྱི་འཆིང་བ་རྣམས་གཅོད་པར་ནུས་སོ།