律部第2卷（འདུལ་བ་ཁ་བཞུགས་སོ། །）

འདུལ་བ་གཞི།

བམ་པོ་ཉི་ཤུ་ལྔ་པ།

དེ་ནས་བཅོམ་ལྡན་འདས་དུལ་བ་འཁོར་དུལ་བ།

ཞི་བ་འཁོར་ཞི་བ་དགྲ་བཅོམ་པ་ལྔ་བརྒྱ་དང་ཐབས་ཅིག་ཏུ་སློ་མ་ལྟ་བུར་གཤེགས་སོ།

དེ་ནས་རྒྱལ་བུ་རྒྱལ་བྱེད་ཀྱི་ཚལ་ན་གནས་པའི་ལྷ་དེས་བ་ཀུ་ལའི་ཡལ་ག་ཞིག་བླངས་ཏེ།

བཅོམ་ལྡན་འདས་ལ་གྲིབ་མ་བྱེད་ཅིང་རྗེས་བཞིན་རྗེས་བཞིན་དུ་སོང་བ་དང་།

བཅོམ་ལྡན་འདས་ཀྱིས་དེའི་བསམ་པ་དང་།

བག་ལ་ཉལ་དང་།

ཁམས་དང་།

རང་བཞིན་མཁྱེན་ནས་དེ་དང་མཐུན་པའི་འཕགས་པའི་བདེན་པ་བཞི་རྟོགས་པར་འགྱུར་བའི་ཆོས་བཤད་པ་མཛད་དེ།

ཐོས་ནས་ལྷ་དེས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་པར་གྱུར་ཏོ།

ཇི་ཙམ་ན་ཕྱོགས་གཞན་ཞིག་ན་ཡུགས་ས་མོ་ལྔ་བརྒྱ་ཙམ་གནས་པ་དེ་དག་གིས་སངས་རྒྱས་བཅོམ་ལྡན་འདས་སྐུ་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ཀུན་ནས་བརྒྱན་པ།

དཔེ་བྱད་བཟང་པོ་བརྒྱད་བཅུས་

མཛེས་པར་བྱས་པ།

འོད་འདོམ་གང་གིས་བརྒྱན་པ།

ཉི་མ་སྟོང་བས་ལྷག་པའི་འོད་མངའ་བ།

རིན་པོ་ཆེའི་རི་བོ་འགྲོ་བ་ལྟ་བུར་ཀུན་ནས་བཟང་བར་མཐོང་ངོ་།

མཐོང་མ་ཐག་ཏུ་ཡང་དེ་རྣམས་བཅོམ་ལྡན་འདས་ལ་སེམས་དང་བ་ཆེན་པོ་སྐྱེས་སོ།

འདི་ནི་ཆོས་ཉིད་ཡིན་ཏེ།

ཇི་ལྟར་དགེ་བའི་རྩ་བ་བསགས་པའི་རྒྱུ་ཅན་གྱི་སེམས་ཅན་གྱིས་དང་པོར་སངས་རྒྱས་མཐོང་བ་ལྟར་ལོ་བཅུ་གཉིས་སུ་ཞི་གནས་ཀྱི་སེམས་གོམས་པར་བྱས་པ་དང་།

བུ་མེད་པས་བུ་རྙེད་པ་དང་།

དབུལ་པོས་གཏེར་མཐོང་བ་དང་།

རྒྱལ་སྲིད་ལ་མངོན་པར་དགའ་བ་རྒྱལ་སྲིད་ཀྱི་དབང་བསྐུར་བ་ནི་དེ་ལྟར་ཉམས་དགའ་བ་སྐྱེད་པ་མ་ཡིན་ནོ།

དེ་ནས་བཅོམ་ལྡན་འདས་ཀྱིས་དེ་རྣམས་ཀྱི་གདུལ་བའི་དུས་ལ་གཟིགས་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ།

དེ་རྣམས་ཀྱིས་ཀྱང་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འཁོད་དོ།

དེ་ནས་བཅོམ་ལྡན་འདས་ཀྱིས་དེ་རྣམས་ཀྱི་བསམ་པ་དང་།

བག་ལ་ཉལ་དང་།

ཁམས་དང་།

རང་བཞིན་མཁྱེན་ནས་ཞེས་བྱ་བ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་སོ་ཞེས་བྱ་བའི་བར་གོང་མ་བཞིན་དུའོ།

དེ་རྣམས་ཀྱིས་བདེན་པ་མཐོང་ནས་ལན་གསུམ་དུ་ཆེད་དུ་བརྗོད་པས་ཆེད་དུ་བརྗོད་པ།

བཙུན་པ་བདག་ཅག་ལ་འདི་ལྟ་བུ་ནི་མས་མ་བགྱིས་ཏེ་ཕས་མ་ལགས།

རྒྱལ་པོས་མ་ལགས།

ལྷས་མ་ལགས།

སྡུག་པས་མ་ལགས།

རང་གི་སྐྱེ་བོ་དང་གཉེན་གྱི་ཚོགས་ཀྱིས་མ་ལགས།

སྔོན་གྱི་འདས་པས་མ་ལགས།

དགེ་སྦྱོང་དང་།

བྲམ་ཟེས་མ་ལགས་པ་གང་ལགས་པ་བཅོམ་ལྡན་འདས་ཀྱིས་བདག་ཅག་ལ་

མཛད་དེ།

ཁྲག་དང་མཆི་མའི་རྒྱ་མཚོ་ནི་བསྐམས།

རུས་པའི་རི་བོ་ལས་ནི་བསྒྲལ།

ངན་སོང་གི་སྒོ་ནི་བཀུམ།

ཐར་པ་དང་མཐོ་རིས་ཀྱི་སྒོ་ནི་ཕྱེ་ནས་བདག་ཅག་ལྷ་དང་མི་རྣམས་སུ་ནི་བཀོད་དེ།

བཙུན་པ་བདག་ཅག་འཕགས་སོ།

མངོན་པར་འཕགས་སོ།

བདག་ཅག་བཅོམ་ལྡན་འདས་དང་།

ཆོས་དང་།

དགེ་སློང་གི་དགེ་འདུན་ལ་སྐྱབས་སུ་མཆི་ལགས་ཀྱིས།

བཅོམ་ལྡན་འདས་ཀྱིས་བདག་ཅག་དགེ་བསྙེན་དུ་གཟུང་དུ་གསོལ།

དེ་དག་སྟན་ལས་ལངས་ཏེ།

བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།

ཀྱེ་མ་བཅོམ་ལྡན་འདས་བདག་ཅག་ལ་ཅུང་ཟད་ཅིག་སྩོལ་ཅིག་དང་།

དེ་ལ་བདག་ཅག་བགྱི་བ་དག་བགྱིའོ།

དེ་ནས་བཅོམ་ལྡན་འདས་ཀྱི་རྫུ་འཕྲུལ་གྱིས་དབུ་སྐྲ་དང་སེན་མོ་བྲེགས་ཏེ་བྱིན་ནོ།

དེ་དག་གིས་བཅོམ་ལྡན་འདས་ཀྱི་དབུ་སྐྲ་དང་སེན་མོའི་མཆོད་རྟེན་ཞིག་བརྩིགས་སོ།

དེ་ནས་རྒྱལ་བུ་རྒྱལ་བྱེད་ཀྱི་ཚལ་ན་གནས་པའི་ལྷ་གང་ཡིན་པ་དེས་མཆོད་རྟེན་དེའི་འཁོར་སར་བ་ཀུ་ལའི་ཡལ་ག་དེ་བསྐྱེད་དེ།

བཅོམ་ལྡན་འདས་ལ་གསོལ་པ།

བཅོམ་ལྡན་འདས་བདག་ནི་མཆོད་རྟེན་འདི་ལ་བགྱི་བ་བགྱིད་ཅིང་མཆིས་སོ་ཞེས་དེ་དེ་ཉིད་ན་གནས་སོ།

དེ་ལ་ཁ་ཅིག་གིས་ནི་ཡུགས་ས་མོའི་མཆོད་རྟེན་ནོ་ཞེས་བྱ་བར་ཤེས་སོ།

ཁ་ཅིག་གིས་ནི་བ་ཀུ་ལའི་འཁོར་ས་ཞེས་བྱ་བར་ཤེས་ཏེ།

མཆོད་རྟེན་ལ་ཕྱག་བྱེད་པའི་དགེ་སློང་དག་ད་དུང་ཡང་ཕྱག་བྱེད་དོ།

བཅོམ་ལྡན་འདས་གཤེགས་པ་དང་།

ཇི་ཙམ་ན་བསྟི་གནས་གཞན་ཞིག་ན་དྲང་སྲོང་ལྔ་བརྒྱ་གནས་ཏེ།

དེ་དག་གི་བསྟི་གནས་དེ་ནི་མེ་ཏོག་དང་འབྲས་བུ་དང་ཆུ་ཕུན་སུམ་ཚོགས་པས་དེ་དག་དེས་རྒྱགས་ནས་ཅི་ཡང་མི་སེམས་སོ།

དེ་ནས་བཅོམ་ལྡན་འདས་ཀྱིས་དེ་རྣམས་ཀྱི་གདུལ་བའི་དུས་ལ་གཟིགས་ནས་བསྟི་གནས་དེར་གཤེགས་ཏེ་བྱོན་པ་དང་།

རྫུ་འཕྲུལ་གྱིས་བསྟི་གནས་དེའི་མེ་ཏོག་དང་འབྲས་བུ་ནི་བརླག །

ཆུ་ནི་བསྐམས།

ནེའུ་གསིང་རྣམས་ནི་སློགས།

འདུག་གནས་དག་ནི་བརྟིབ་བོ།

དེ་ནས་དྲང་སྲོང་དེ་དག་ལག་པ་འགྲམ་པ་ལ་གཏད་ནས་སེམས་ཁོང་དུ་ཆུད་ཅིང་

འདུག་གོ།

དེ་ནས་བཅོམ་ལྡན་འདས་ཀྱིས་བཀའ་སྩལ་པ།

ཅིའི་ཕྱིར་སེམས་ཁོང་དུ་ཆུད་ཅིང་འདུག །

དེ་རྣམས་ཀྱིས་གསོལ་པ།

བཅོམ་ལྡན་འདས་བསོད་ནམས་ཀྱི་ཞིང་རྐང་གཉིས་ཁྱེད་འདིར་གཤེགས་ནས་བདག་ཅག་ནི་གནས་སྐབས་འདི་འདྲ་བར་གྱུར་ཏོ།

བཅོམ་ལྡན་འདས་ཀྱིས་བཀའ་སྩལ་པ།

དྲང་སྲོང་དག་བསྟི་གནས་མེ་ཏོག་དང་འབྲས་བུ་དང་ཆུ་ཕུན་སུམ་ཚོགས་པ་ཅི་སྟེ་མ་རུང་།

ཇི་སྔོན་གྱི་ཇི་ལྟ་བ་དེ་བཞིན་དུ་བྱའམ།

བཅོམ་ལྡན་འདས་མཛད་དུ་གསོལ།

དེ་ནས་བཅོམ་ལྡན་འདས་ཀྱིས་རྫུ་འཕྲུལ་བརྟུལ་བ་དང་སྔོན་གྱི་ཇི་ལྟ་བ་བཞིན་དུ་གྱུར་ཏོ།

དེ་ནས་དེ་དག་མཆོག་ཏུ་ཡ་མཚན་དུ་གྱུར་ནས།

བཅོམ་ལྡན་འདས་ལ་སེམས་མངོན་པར་དད་པ་བསྐྱེད་དོ།

དེ་ནས་བཅོམ་ལྡན་འདས་ཀྱིས་དྲང་སྲོང་ལྔ་བརྒྱ་པོ་དེ་དག་གི་བསམ་པ་དང་བག་ལ་ཉལ་དང་།

ཁམས་དང་།

རང་བཞིན་མཁྱེན་ནས་དེ་དང་མཐུན་པའི་ཆོས་བཤད་པ་མཛད་དེ།

དེ་ཐོས་ནས་དེ་དག་གིས་ཕྱིར་མི་འོང་བའི་འབྲས་བུ་མངོན་སུམ་དུ་བྱས་ཏེ་རྫུ་འཕྲུལ་མངོན་པར་བསྒྲུབས་ནས།

དེ་ནས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ།

བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཙུན་པ་བདག་ཅག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་འཐོབ་པ་ལྟ་ན།

བཅོམ་ལྡན་འདས་ཀྱི་སྤྱན་སྔར་བདག་ཅག་ཚངས་པར་སྤྱོད་པ་སྤྱད་པར་བགྱིའོ།

དེ་ནས་བཅོམ་ལྡན་འདས་ཀྱིས་དེ་དག་ལ་དགེ་སློང་ཚུར་ཤོག་ཅེས་བྱ་བས་དགེ་སློང་དག་ཚུར་ཤོག་ཚངས་པར་སྤྱད་པ་སྤྱོད་ཅིག་ཅེས་བཅོམ་ལྡན་འདས་ཀྱིས་བཀའ་སྩལ་པའི་མོད་ལ་སྐྲ་དང་ཁ་སྤུ་བྱི་བ་དང་སྣམ་སྦྱར་གྱོན་པར་གྱུར་ཏེ།

ལག་ན་ལྷུང་བཟེད་དང་།

བྱ་མ་བུམ་ཐོགས་པ་དང་།

སྐྲ་དང་ཁ་སྤུ་ཞག་བདུན་སྐྱེས་པ་ཙམ་དང་།

དགེ་སློང་བསྙེན་པར་རྫོགས་ནས་ལོ་བརྒྱ་ལོན་པའི་སྤྱོད་ལམ་ལྟ་བུར་གནས་པར་གྱུར་ཏོ།

དེ་བཞིན་གཤེགས་པས་ཚུར་ཤོག་བཀའ་སྩལ་པས།

སྐྲ་བྱི་སྣམ་སྦྱར་གྱོན་པའི་ལུས་ལྡན་ཞིང་།

མོད་ལ་དབང་པོ་རབ་ཞིར་གནས་གྱུར་ཏེ།

སངས་རྒྱས་དགོངས་པས་ལུས་གཟུགས་བཀབ་

པར་གྱུར།

དེ་དག་གིས་འབད་པ་དང་བརྩལ་བས་བརྩོན་འགྲུས་བརྩམས་པས་འཁོར་བའི་འཁོར་ལོ་ཆ་ལྔ་པ་གཡོ་བ་དང་མི་གཡོ་བ་འདི་ཉིད་རིག་སྟེ།

འདུ་བྱེད་ཀྱི་རྣམ་པ་ཐམས་ཅད་ཅེས་བྱ་བ་ནས་མངོན་དུ་སྨྲ་བར་བྱ་བར་གྱུར་ཏོ་ཞེས་བྱ་བའི་བར་གོང་མ་བཞིན་དུའོ།

དེ་དག་ལ་འདོམས་པར་བྱེད་པའི་དྲང་སྲོང་གང་ཡིན་པ་དེས་གསོལ་པ།

བཅོམ་ལྡན་འདས་བདག་གིས་ཆ་བྱད་འདིས་སྐྱེ་བོའི་ཚོགས་ཆེན་པོ་བསླུས་པ་དེ་དག་ཇེ་དད་པ་སྐྱེས་པར་བགྱིས་ལ་སླད་ཀྱིས་རབ་ཏུ་དབྱུང་བར་བགྱིའོ།

དེ་ནས་བཅོམ་ལྡན་འདས་དྲང་སྲོང་ལྔ་བརྒྱ་དང་སྔོན་གྱི་དགེ་སློང་རྣམས་ཀྱིས་ཟླ་བ་ཁམ་པ་ལྟ་བུར་བསྐོར་ནས་དེ་ཉིད་ནས་རྫུ་འཕྲུལ་གྱིས་སྟེང་གི་ནམ་མཁའ་ལས་གཤེགས་ཏེ་རིམ་གྱིས་གཏུན་རི་ལ་བྱོན་ཏོ།

དེའི་ཚེ་གཏུན་རིལ་དྲང་སྲོང་ཤིང་གོས་ཅན་ཞེས་བྱ་བ་ཞིག་གནས་ཏེ།

དྲང་སྲོང་དེས་བཅོམ་ལྡན་འདས་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ཀུན་ནས་བརྒྱན་པ་ཞེས་བྱ་བ་ནས།

ཀུན་ནས་མཛེས་པ་རྒྱང་རིང་པོ་ཁོ་ན་ནས་མཐོང་ངོ་ཞེས་བྱ་བའི་བར་གོང་མ་བཞིན་དུའོ།

མཐོང་མ་ཐག་ཏུ་དེ་བཅོམ་ལྡན་འདས་ལ་སེམས་མངོན་པར་དད་པར་གྱུར་ཏེ།

དེ་དད་པ་སྐྱེས་ནས་བསམས་པ།

མ་ལ་བདག་རི་ལས་བབས་ཏེ།

བཅོམ་ལྡན་འདས་བལྟ་ཞིང་འགྲོར་ནི་བཅོམ་ལྡན་འདས་གདུལ་བ་ལ་གཟིགས་པས་འདས་པར་འགྱུར་གྱིས།

མ་ལ་བདག་ཉིད་མཆོང་བར་བྱའོ་སྙམ་ནས།

དེས་རི་ལས་བདག་ཉིད་མཆོངས་པ་དང་།

སངས་རྒྱས་བཅོམ་ལྡན་འདས་རྣམས་ནི་བསྙེལ་བ་མི་མངའ་བའི་ཆོས་ཅན་ཡིན་པས་བཅོམ་ལྡན་འདས་ཀྱི་རྫུ་འཕྲུལ་གྱིས་བླངས་སོ།

དེ་ནས་བཅོམ་ལྡན་འདས་ཀྱིས་དེའི་བསམ་པ་དང་།

བག་ལ་ཉལ་དང་།

ཁམས་དང་།

རང་བཞིན་མཁྱེན་ནས་དེ་དང་མཐུན་པའི་ཆོས་བཤད་པ་མཛད་དེ།

དེ་ཐོས་ནས་ཤིང་གོས་ཅན་གྱིས་ཕྱིར་མི་འོང་བའི་འབྲས་བུ་མངོན་སུམ་དུ་བྱས་ཏེ་རྫུ་འཕྲུལ་མངོན་པར་བསྒྲུབས་ནས།

དེ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཙུན་པ་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་འཐོབ་

པ་ལྟ་ན་ཞེས་བྱ་བ་ནས།

བཅོམ་ལྡན་འདས་ཀྱིས་དགེ་སློང་ཚུར་ཤོག་ཅེས་བྱ་བས་རབ་ཏུ་ཕྱུང་ངོ་ཞེས་བྱ་བ་དང་།

སངས་རྒྱས་དགོངས་པས་ལུས་གཟུགས་བཀབ་པར་གྱུར་ཅེས་བྱ་བའི་བར་གོང་མ་བཞིན་དུའོ།

དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ།

དགེ་སློང་དག་ངའི་དགེ་སློང་དད་པས་རྣམ་པར་གྲོལ་བ་རྣམས་ཀྱི་མཆོག་ནི་འདི་ཡིན་ཏེ།

འདི་ལྟ་སྟེ་དགེ་སློང་ཤིང་གོས་ཅན་ནོ།

དེ་ནས་བཅོམ་ལྡན་འདས་དགེ་སློང་སྟོང་གིས་ཡོངས་སུ་བསྐོར་ཏེ།

ཆོ་འཕྲུལ་རྣམ་པ་སྣ་ཚོགས་མཛད་ཅིང་གྲོང་ཁྱེར་སློ་མ་ལྟ་བུར་གཤེགས་སོ།

བཅོམ་ལྡན་འདས་ཀྱིས་དགོངས་པ།

གལ་ཏེ་སྒོ་གཅིག་ནས་ཞུགས་ན་གཞན་དག་གཞན་དུ་སེམས་པར་འགྱུར་བས་མ་ལ་ང་རྫུ་འཕྲུལ་ཁོ་ནས་འཇུག་པར་བྱའོ་སྙམ་ནས།

དེ་ནས་རྫུ་འཕྲུལ་གྱིས་སྟེང་གི་ནམ་མཁའ་ལས་གྲོང་ཁྱེར་སློ་མ་ལྟ་བུའི་དབུས་སུ་གཤེགས་སོ།

དེ་ནས་སློ་མ་ལྟ་བུའི་བདག་པོ་རྒྱལ་པོ་དང་།

ཚེ་དང་ལྡན་པ་གང་པོ་དང་།

ཤིང་གི་རྣ་ཆ་ཅན་དང་།

རྒྱ་སྐེགས་ཀྱི་རྣ་ཆ་ཅན་དང་།

ཞ་ཉེའི་རྣ་ཆ་ཅན་དང་།

རྒྱལ་པོའི་སྲས་བཅུ་བདུན་པོ་དེ་དག་ཀྱང་རང་རང་གི་འཁོར་དང་།

སྲོག་ཆགས་བརྒྱ་སྟོང་ཕྲག་དུ་མ་བཅོམ་ལྡན་འདས་གང་ན་བ་དེར་སོང་ངོ་།

དེ་ནས་བཅོམ་ལྡན་འདས་སྲོག་ཆགས་བརྒྱ་སྟོང་ཕྲག་དུ་མས་ཞམ་རིང་བྱས་ཤིང་ཙན་དན་གྱི་ཕྲེང་བའི་ཁང་བཟངས་གང་ན་བ་དེར་གཤེགས་ཏེ་བྱོན་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་ཏེ།

སྐྱེ་བོའི་ཚོགས་ཆེན་པོ་དེས་བཅོམ་ལྡན་འདས་མཐོང་ངོ་།

ཙན་དན་གྱི་ཕྲེང་བའི་ཁང་བཟངས་ཞིག་ལ་ཐུག་པ་དང་།

བཅོམ་ལྡན་འདས་ཀྱིས་དགོངས་པ།

གལ་ཏེ་ཙན་དན་གྱི་ཕྲེང་བའི་ཁང་བཟངས་ཞིག་པར་གྱུར་ན་སྦྱིན་བདག་རྣམས་ཀྱི་བསོད་ནམས་ཀྱི་བར་ཆད་དུ་འགྱུར་གྱིས།

མ་ལ་ངས་འདི་ཤེལ་གྱི་རང་བཞིན་དུ་སྤྲུལ་པར་བྱའོ་སྙམ་ནས།

བཅོམ་ལྡན་འདས་ཀྱིས་དེ་ཇི་ལྟར་སྐྱེ་བོའི་ཚོགས་དེས་སངས་རྒྱས་ཀྱི་སྐུ་སྒྲིབ་པ་མེད་པར་མཐོང་བར་འགྱུར་བར་ཤེལ་གྱི་རང་བཞིན་དུ་སྤྲུལ་ཏོ།

དེ་ནས་འཁོར་དེ་དག་གི་བསམ་པ་དང་།

བག་ལ་ཉལ་དང་།

ཁམས་དང་།

རང་བཞིན་མཁྱེན་ནས་དེ་དང་འདྲ་བའི་ཆོས་བཤད་པ་མཛད་དེ།

དེ་ཐོས་ནས་སྲོག་ཆགས་བརྒྱ་སྟོང་ཕྲག་དུ་མས་ཁྱད་པར་ཆེན་པོ་དག་རྟོགས་ཏེ།

ཁ་ཅིག་གིས་ནི་ཐར་པའི་ཆ་དང་མཐུན་པའི་དགེ་བའི་རྩ་བ་བསྐྱེད།

ཁ་ཅིག་གིས་ནི་ངེས་པར་འབྱེད་པའི་ཆ་དང་མཐུན་པ།

ཁ་ཅིག་གིས་ནི་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས།

ཁ་ཅིག་གིས་ནི་ལན་གཅིག་ཕྱིར་འོང་བའི་འབྲས་བུ།

ཁ་ཅིག་གིས་ནི་ཕྱིར་མི་འོང་བའི་འབྲས་བུ།

ཁ་ཅིག་གིས་ནི་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་མངོན་སུམ་དུ་བྱས།

ཁ་ཅིག་གིས་ནི་ཉན་ཐོས་ཀྱི་བྱང་ཆུབ་ཏུ་སེམས་བསྐྱེད།

ཁ་ཅིག་གིས་ནི་རང་སངས་རྒྱས་ཀྱི་བྱང་ཆུབ་ཏུ།

ཁ་ཅིག་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུའོ།

འཁོར་དེ་ཕལ་ཆེར་སངས་རྒྱས་ལ་གཞོལ་བ་དང་།

ཆོས་ལ་འབབ་པ་དང་།

དགེ་འདུན་ལ་བབ་པར་བཀོད་དོ།

དེ་ནས་ཤིང་གི་རྣ་ཆ་ཅན་དང་།

རྒྱ་སྐེགས་ཀྱི་རྣ་ཆ་ཅན་དང་།

ཞ་ཉེའི་རྣ་ཆ་ཅན་གྱིས་གཙང་ཞིང་བསོད་པའི་བཟའ་བ་དང་བཅའ་བ་དག་སྟ་གོན་བྱས་ནས་གདན་བཤམས་ཏེ།

ནོར་བུའི་ཆུ་སྣོད་བཞག་ནས་བཅོམ་ལྡན་འདས་ལ་སྤྱན་འདྲེན་གྱིས་དུས་ཚོད་གསོལ་པ།

བཙུན་པ་གདུགས་ཚོད་ལགས་ཤིང་མཆིས་ན།

བཅོམ་ལྡན་འདས་ད་དེའི་དུས་ལ་བབ་པར་དགོངས་སུ་གསོལ།

དེའི་ཚེ་ཀླུའི་རྒྱལ་པོ་ནག་པོ་དང་།

གཽ་ཏ་མ་ཞེས་བྱ་བ་རྒྱ་མཚོ་ཆེན་པོ་ན་གནས་པ་དེ་གཉིས་ཀྱིས་བསམས་པ།

བཅོམ་ལྡན་འདས་གྲོང་ཁྱེར་སློ་མ་ལྟ་བུ་ན་ཆོས་འཆད་ཀྱིས་དོང་ལ་མཉན་པར་བྱའོ་སྙམ་མོ།

དེ་ནས་དེ་གཉིས་ཀླུ་ལྔ་བརྒྱའི་འཁོར་དང་གྲོང་ཁྱེར་སློ་མ་ལྟ་བུར་ཆུ་བོ་ལྔ་བརྒྱ་ཕབ་ནས་ཆས་སོ།

སངས་རྒྱས་བཅོམ་ལྡན་འདས་རྣམས་ནི་བསྙེལ་བ་མི་མངའ་བའི་ཆོས་ཅན་ཡིན་པས་བཅོམ་ལྡན་འདས་ཀྱིས་དགོངས་པ།

ཀླུའི་རྒྱལ་པོ་ནག་པོ་དང་།

གཽ་ཏ་མ་འདི་གཉིས་གལ་ཏེ་གྲོང་ཁྱེར་སློ་མ་ལྟ་བུར་འོངས་པར་གྱུར་ན།

ཡུལ་ཕུང་བར་བྱེད་པར་འགྱུར་རོ་སྙམ་ནས།

དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་པ།

མཽད་གལ་གྱི་བུ་དེ་བཞིན་གཤེགས་པའི་རིངས་པའི་བསོད་སྙོམས་ལོང་ཤིག །

མཽད་གལ་གྱི་བུ་དེ་ཅིའི་ཕྱིར་ཞེ་ན།

རིངས་པའི་བསོད་སྙོམས་ནི་ལྔ་སྟེ།

ལྔ་གང་ཞེ་ན།

གློ་བུར་བ་དང་།

འགྲོ་བར་ཆས་པ་དང་།

ནད་པ་དང་།

ནད་གཡོག་དང་།

དགེ་སྐོས་སོ།

སྐབས་འདིར་ནི་བཅོམ་ལྡན་འདས་དགེ་སྐོས་སུ་དགོངས་ཏེ།

བཅོམ་ལྡན་འདས་རྫུ་འཕྲུལ་གྱིས་དེ་ཉིད་ནས་སྟེང་གི་ནམ་མཁའ་ལས་གཤེགས་སོ།

བཅོམ་ལྡན་འདས་དང་མཽད་གལ་གྱི་བུ་གཉིས་ཀླུའི་རྒྱལ་པོ་ནག་པོ་དང་།

གཽ་ཏ་མ་གང་ན་བ་དེར་གཤེགས་ཏེ་བྱོན་ནས་བཀའ་སྩལ་པ།

ཀླུའི་དབང་པོ་གྲོང་ཁྱེར་སློ་མ་ལྟ་བུ་ལ་སོམས་ལ་ཡུལ་ཕུང་བར་མ་བྱ་ཤིག །

དེ་གཉིས་ཀྱིས་གསོལ་པ།

བཙུན་པ་བདག་ཅག་གང་སྲོག་ཆགས་གྲོག་སྦུར་ལ་ཡང་གནོད་པ་མི་བགྱིད་པ་དེ་ལྟ་བུའི་དད་པས་མཆིས་ན།

སློ་མ་ལྟ་བུ་ན་གནས་པའི་སྐྱེ་བོའི་ཚོགས་ལ་ལྟ་སྨོས་ཀྱང་ཅི་འཚལ།

དེ་ནས་བཅོམ་ལྡན་འདས་ཀྱིས་ཀླུའི་རྒྱལ་པོ་ནག་པོ་དང་།

གཽ་ཏ་མ་ལ་དེ་ལྟ་བུའི་ཆོས་བཤད་པ་མཛད་དེ།

དེ་ཐོས་ནས་སངས་རྒྱས་དང་ཆོས་དང་དགེ་འདུན་ལ་སྐྱབས་སུ་སོང་ཞིང་བསླབ་པའི་གཞི་རྣམས་བཟུང་ངོ་།

བཅོམ་ལྡན་འདས་ཀྱིས་ཞལ་ཟས་གསོལ་བའི་མཛད་པ་བརྩམས་པ་དང་།

ཀླུ་རེ་རེ་ནས་བསམས་པ།

ཀྱེ་མའོ་བཅོམ་ལྡན་འདས་ལ་བདག་གི་ཆུའི་བཏུང་བ་གསོལ་ལོ་སྙམ་མོ།

བཅོམ་ལྡན་འདས་ཀྱིས་དགོངས་པ།

གལ་ཏེ་གཅིག་གི་ཆུ་གསོལ་ན་ནི་དེས་ན་གཞན་དག་གཞན་དུ་སེམས་པར་འགྱུར་བས་ཐབས་ཤིག་བཤམ་པར་བྱའོ་སྙམ་དུ་དགོངས་ནས།

དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་བཀའ་སྩལ་པ།

མཽད་གལ་གྱི་བུ་སོང་ལ་གང་ན་ཆུ་བོ་ལྔ་བརྒྱ་འདྲེས་པ་དེ་ལས་ཆུ་ལྷུང་བཟེད་ཁོང་ལ་ཁྱེར་ཏེ་ཤོག་ཤིག །

བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་མཽད་གལ་གྱི་བུ་ཆེན་པོས།

བཅོམ་ལྡན་འདས་ཀྱི་ལྟར་མཉན་ནས་གང་དུ་ཆུ་བོ་ལྔ་བརྒྱ་འདྲེས་པ་དེ་ནས་ཆུས་ལྷུང་བཟེད་བཀང་ནས་ཁྱེར་ཏེ།

བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས།

བཅོམ་ལྡན་འདས་ལ་ལྷུང་

བཟེད་བཀང་བའི་ཆུ་ཕུལ་བ་དང་།

བཅོམ་ལྡན་འདས་ཀྱིས་བཞེས་ཏེ་གསོལ་ལོ།

ཚེ་དང་ལྡན་པ་མཽད་གལ་གྱི་བུ་ཆེན་པོས་བསམས་པ་བཅོམ་ལྡན་འདས་ཀྱིས་སྔོན་གྱི་བཀའ་སྩལ་པ།

དགེ་སློང་དག་ཕ་དང་མས་ནི་བུ་གསོས།

བསྲིངས་བསྐྱེད་ནུ་མས་བསྣུན།

འཛམ་བུའི་གླིང་གི་སྣ་ཚོགས་སྟོན་པར་བྱེད་པ་ཡིན་པས་ཤིན་ཏུ་དཀའ་བ་བྱེད་པ་སྟེ།

བུས་ཕྲག་པ་གཅིག་ལ་ནི་མ་བཞག་ཅིག་ཤོས་ལ་ནི་ཕ་བཞག་ནས་ལོ་བརྒྱ་ཚང་བར་ཁུར་དུ་ཐོགས་སམ།

ས་ཆེན་པོ་འདིའི་ནོར་བུ་དང་།

མུ་ཏིག་དང་།

བཻ་ཌཱུརྱ་དང་།

མན་ཤེལ་དང་།

བྱི་རུ་དང་།

དངུལ་དང་།

གསེར་དང་།

རྡོའི་སྙིང་པོ་དང་།

སྤུག་དང་།

པད་མ་རཱ་ག་དང་།

དུང་གཡས་སུ་འཁྱིལ་པ་སྟེ།

དེ་ལྟ་བུའི་དབང་ཕྱུག་ལ་བདག་པོར་བཅུག་ཀྱང་།

བུས་ཕ་མ་ལ་དེ་ཙམ་གྱིས་ཕན་ཐོགས་པའམ་ལན་ལོན་པར་མི་འགྱུར་གྱི།

གང་གིས་ཕ་མ་དད་པ་མེད་པ་དད་པ་ཕུན་སུམ་ཚོགས་པ་ཡང་དག་པར་འཛིན་དུ་འཇུག་ལ་འདུལ་ཞིང་འཛུད་དེ་སོ་སོར་འགོད་པར་བྱེད་པ་དང་།

ཚུལ་ཁྲིམས་འཆལ་པ་ཚུལ་ཁྲིམས་ཕུན་སུམ་ཚོགས་པ་དང་།

སེར་སྣ་ཅན་གཏོང་བ་ཕུན་སུམ་ཚོགས་པ་དང་།

ཤེས་རབ་འཆལ་པ།

ཤེས་རབ་ཕུན་སུམ་ཚོགས་པ་ཡང་དག་པར་འཛིན་དུ་འཇུག་ལ་འདུལ་ཞིང་འཛུད་དེ་སོ་སོར་འགོད་པར་བྱེད་ན།

དེ་ཙམ་གྱིས་བུས་ཕ་དང་མ་ལ་ཕན་ཐོགས་པ་དང་ལན་ལོན་པ་ཡིན་ནོ་ཞེས་གསུངས་ན།

བདག་གིས་ནི་མ་ལ་ལན་གཅིག་ཡང་མ་ལོན་གྱིས།

མ་ལ་བདག་གིས་བདག་གི་མ་གང་དུ་སྐྱེས་པ་བསམ་མོ་སྙམ་ནས་བསམ་པ་ལ་ཞུགས་པ་དང་།

འཇིག་རྟེན་གྱི་ཁམས་འོད་ཟེར་ཅན་དུ་སྐྱེས་པར་མཐོང་ངོ་།

དེས་དེ་སུའི་གདུལ་བྱ་ཡིན་པ་བརྟགས་ན།

བཅོམ་ལྡན་འདས་ཀྱི་ཡིན་པར་མཐོང་ནས་དེ་འདི་སྙམ་དུ་སེམས་ཏེ།

བདག་ལམ་རིང་པོ་ནས་འདིར་འོངས་པས་ཅི་ནས་ཀྱང་བདག་གིས་བཅོམ་ལྡན་འདས་ལ་དོན་འདི་གསོལ་ལོ་སྙམ་ནས།

བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཙུན་པ་བཅོམ་ལྡན་འདས་ཀྱིས་སྔོན་དགེ་སློང་དག་ཕ་དང་མ་ནི་བུ་ལ་ཤིན་དུ་དཀའ་བ་བྱེད་པ་ཡིན་ནོ་ཞེས་གསུངས་ན།

བདག་གི་མ་འཇིག་རྟེན་གྱི་ཁམས་འོད་ཟེར་ཅན་དུ་སྐྱེས་ཏེ།

དེ་ཡང་བཅོམ་ལྡན་འདས་ཀྱིས་འདུལ་བར་འགྱུར་ལགས་ན།

བཅོམ་ལྡན་འདས་ཀྱིས་ཐུགས་བརྩེ་བ་ཉེ་བར་བཟུང་སྟེ་གདུལ་བར་གསོལ།

བཅོམ་ལྡན་འདས་ཀྱིས་བཀའ་སྩལ་པ།

མཽད་གལ་གྱི་བུ་སུའི་རྫུ་འཕྲུལ་གྱིས་དོང་།

བཅོམ་ལྡན་འདས་བདག་གིའོ།

དེ་ནས་བཅོམ་ལྡན་འདས་དང་།

ཚེ་དང་ལྡན་པ་མཽད་གལ་གྱི་བུ་ཆེན་པོ་རི་རབ་ཀྱི་རྩེ་མོ་ལ་གོམ་པ་བོར་ཞིང་གཤེགས་པ་དང་།

ཞག་བདུན་གྱིས་འཇིག་རྟེན་གྱི་ཁམས་འོད་ཟེར་ཅན་དུ་བྱོན་ཏོ།

བུ་མོ་བཟང་མོ་དེས་ཚེ་དང་ལྡན་པ་མཽད་གལ་གྱི་བུ་རྒྱང་རིང་པོ་ཁོ་ན་ནས་མཐོང་ངོ་།

མཐོང་ནས་ཀྱང་དགའ་བ་དང་བཅས་པས་དེའི་དྲུང་དུ་སོང་སྟེ་སྨྲས་པ།

ཀྱེ་མའོ་ཡུན་རིང་ཞིག་ལོན་ནས་བུ་མཐོང་ངོ་།

ཀྱེ་མའོ་ཡུན་རིང་མོ་ཞིག་ལོན་ནས་བུ་མཐོང་ངོ་།

དེ་ནས་སྐྱེ་བོའི་ཚོགས་ཆེན་པོས་སྨྲས་པ།

ཤེས་ལྡན་དག་རབ་ཏུ་བྱུང་བ་འདི་ནི་རྒན་ན་ཇི་ལྟར་བུ་མོ་འདི་དེའི་མ་ཡིན།

ཚེ་དང་ལྡན་པ་མཽད་གལ་གྱི་བུ་ཆེན་པོས་སྨྲས་པ།

ཤེས་ལྡན་དག་ཁོ་བོའི་ལུས་འདི་འདིས་བསྐྱེད་དེ།

དེས་ན་ཁོ་བོའི་མ་ཡིན་ནོ།

དེ་ནས་བཅོམ་ལྡན་འདས་ཀྱིས་བུ་མོ་བཟང་མོ་དེའི་བསམ་པ་དང་།

བག་ལ་ཉལ་དང་།

ཁམས་དང་།

རང་བཞིན་མཁྱེན་ནས་དེ་དང་མཐུན་པའི་འཕགས་པའི་བདེན་པ་བཞི་རྟོགས་པར་འགྱུར་བའི་ཆོས་བཤད་པ་མཛད་དེ།

དེ་ཐོས་ནས་བུ་མོ་བཟང་མོ་དེས་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་མཐོ་བ་ཡེ་ཤེས་ཀྱི་རྡོ་རྗེས་བཅོམ་ནས་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱས་ཏེ།

དེས་བདེན་པ་མཐོང་ནས་ལན་གསུམ་དུ་ཆེད་དུ་བརྗོད་པ་ཆེད་དུ་བརྗོད་དོ་ཞེས་བྱ་བ་ནས་ལྷ་དང་མི་རྣམས་སུ་རབ་ཏུ་བཞག་ཅེས་བྱ་བའི་བར་གོང་མ་བཞིན་ནོ།

ཡང་སྨྲས་པ།

ཉེས་པ་མང་པོར་ལྡན་པས་མི་བཟད་པའི།

ངན་སོང་ལམ་ནི་ཁྱོད་ཀྱི་མཐུས་བཅད་དེ།

མཐོ་རིས་འགྲོ་བ་བསོད་ནམས་བཟང་ལྡན་ཕྱེ།

མྱ་ངན་འདས་པའི་ལམ་ཡང་བདག་གིས་ཐོབ།

ཁྱེད་ལ་བརྟེན་ནས་ཤིན་ཏུ་རྣམ་དག་མིག །

ཉེས་དང་བྲལ་བས་དག་པ་དེང་འདིར་ཐོབ།

འཕགས་པ་དགྱེས་པའི་གོ་འཕང་ཞི་ཐོབ་

ནས།

སྡུག་བསྔལ་རྒྱ་མཚོའི་ཕ་རོལ་བདག་གིས་རྒལ།

འགྲོ་བར་ལྷ་མིན་ལྷ་དང་མིས་མཆོད་པ།

སྐྱེ་རྒ་འཆི་དང་ནད་དང་རྣམ་བྲལ་བ།

སྲིད་པ་སྟོང་དུ་མཐོང་བ་རྙེད་དཀའ་བ།

ཐུབ་པ་ཁྱོད་མཐོང་དེང་འདིར་འབྲས་བུར་བཅས།

བཙུན་པ་བདག་ནི་འཕགས་ཤིང་མངོན་པར་འཕགས་ཏེ།

བདག་བཅོམ་ལྡན་འདས་དང་ཆོས་དང་དགེ་འདུན་ལ་སྐྱབས་སུ་མཆི་ལགས་ཀྱིས་དགེ་བསྙེན་དུ་གཟུང་དུ་གསོལ།

དེང་སླན་ཆད་ཇི་སྲིད་འཚོའི་བར་དུ་བསམ་པ་ཐག་པས་སྐྱབས་སུ་མཆི་བར་མངོན་པར་སྤྲོ་ལགས་སོ།

བཅོམ་ལྡན་འདས་མཽད་གལ་གྱི་བུ་ཆེན་པོ་དང་ཐབས་ཅིག་ཏུ་དེང་བསོད་སྙོམས་སྦྱོར་ཞིང་མཆིས་ན་གནང་བར་མཛད་དུ་གསོལ།

བཅོམ་ལྡན་འདས་ཀྱིས་བུ་མོ་བཟང་མོ་དེ་ལ་ཅང་མི་གསུང་བས་གནང་ངོ་།

དེ་ནས་བུ་མོ་བཟང་མོས་བཅོམ་ལྡན་འདས་ཀྱིས་གནང་བར་རིག་སྟེ།

བཅོམ་ལྡན་འདས་དང་ཚེ་དང་ལྡན་པ་མཽད་གལ་གྱི་བུ་ཆེན་པོ་གདན་ལ་བདེ་བར་བཞུགས་པར་རིག་ནས།

གཙང་ཞིང་བསོད་པའི་བཟའ་བ་དང་བཅའ་བ་དག་རང་གི་ལག་ནས་སྟོབས་ཤིང་ཚིམ་པར་བྱེད་དེ།

རྣམ་གྲངས་དུ་མར་གཙང་ཞིང་བསོད་པའི་བཟའ་བ་དང་།

བཅའ་བ་དག་རང་གི་ལག་ནས་བསྟབས་ཤིང་ཚིམ་པར་བྱས་སོ།

བཅོམ་ལྡན་འདས་ཀྱིས་གསོལ་ཟིན་ནས་ཕྱག་གཉིས་བཅབས་ཏེ།

ལྷུང་བཟེད་གྱུ་བར་རིག་ནས་སྟན་དམའ་བ་ཞིག་བླངས་ཏེ།

བཅོམ་ལྡན་འདས་ཀྱི་སྤྱན་སྔར་བཏིང་ནས་ཆོས་མཉན་པའི་ཕྱིར་འདུག་པ་དང་།

དེ་ལ་བཅོམ་ལྡན་འདས་ཀྱིས་ཆོས་བཤད་དོ།

བཅོམ་ལྡན་འདས་ཀྱི་ལྷུང་བཟེད་ཚེ་དང་ལྡན་པ་མཽད་གལ་གྱི་བུ་ཆེན་པོས་བླངས་ཏེ་ལྷུང་བཟེད་འཁྲུ་བར་བྱེད་པ་ན།

བཅོམ་ལྡན་འདས་ཀྱིས་བཀའ་སྩལ་པ།

མཽད་གལ་གྱི་བུ་འདོང་ངམ།

བཅོམ་ལྡན་འདས་གཤེགས་སོ།

སུའི་རྫུ་འཕྲུལ་གྱིས།

བཅོམ་ལྡན་འདས་ཀྱིའོ།

གལ་ཏེ་དེ་ལྟ་ན་རྒྱལ་བུ་རྒྱལ་བྱེད་ཀྱི་ཚལ་སོམས་ཤིག །

བཅོམ་ལྡན་འདས་སྐོལ་བྱོན་ལགས་སམ།

མཽད་གལ་གྱི་བུ་ཡུ་བུ་ཕྱིན་ཟིན་ནོ།

དེ་ནས་ངོ་མཚར་དུ་དད་པའི་ཡིད་ཀྱིས་གསོལ་པ།

བཅོམ་ལྡན་འདས་རྫུ་འཕྲུལ་འདིའི་མིང་ཅི་ལགས།

མཽད་གལ་གྱི་བུ་

ཡིད་མགྱོགས་ཡིན་ནོ།

བཙུན་པ་སངས་རྒྱས་ཀྱི་ཆོས་ཟབ་མོ་དེ་ལྟ་བུ་ནི་བདག་གིས་གློ་བར་མ་ཆུད་དོ།

གལ་ཏེ་བདག་གིས་གློ་བར་ཆུད་པར་གྱུར་ན།

བདག་གི་ལུས་ཏིལ་གྱི་ཕྱེ་མ་ལྟར་བགྱིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སེམས་ལས་མི་ལྡོག་པར་འགྱུར་བ་ཞིག་ན།

ད་ནི་ཤིང་ཚིག་པ་བཞིན་ཅི་བགྱིར་ཡང་མ་མཆིས་སོ།

དགེ་སློང་རྣམས་ཐེ་ཚོམ་སྐྱེས་ཏེ།

ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ།

བཙུན་པ་ཚེ་དང་ལྡན་པ་གང་པོས་ལས་ཅི་ཞིག་བགྱིས་ན།

ལས་དེའི་རྣམ་པར་སྨིན་པས་ཕྱུག་པ་ནོར་མང་བ་ལོངས་སྤྱོད་ཆེ་བའི་རིགས་སུ་སྐྱེས་ལགས།

ཟས་ཅི་ཞིག་བགྱིས་ན་དེས་བྲན་མོའི་མངལ་དུ་སྐྱེས་ཤིང་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་མངོན་སུམ་དུ་བགྱིས་ལགས།

བཅོམ་ལྡན་འདས་ཀྱིས་བཀའ་སྩལ་པ།

དགེ་སློང་དག་གང་པོ་ཉིད་ཀྱིས་ལས་ཚོགས་རྙེད་པ།

རྐྱེན་ཡོངས་སུ་བསྒྱུར་བ།

འོད་པ་བཞིན་དུ་ཉེ་བར་གནས་པ་གདོན་མི་ཟ་བར་འབྱུང་བར་འགྱུར་བ་དག་བྱས་ཤིང་བསགས་པས་གང་པོས་ལས་བྱས་ཤིང་བསགས་པ་དག་གཞན་སུ་ཞིག་གིས་སོ་སོར་མྱོང་བར་འགྱུར།

དགེ་སློང་དག་ལས་བྱས་ཤིང་བསགས་པ་དག་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར།

ཆུའི་ཁམས་ལ་མི་འགྱུར།

མེའི་ཁམས་ལ་མི་འགྱུར།

རླུང་གི་ཁམས་ལ་མི་འགྱུར་གྱི།

འདི་ལྟར་ལས་དགེ་བ་དང་མི་དགེ་བ་བྱས་ཤིང་བསགས་པ་དག་ནི་ཟིན་པའི་ཕུང་པོ་དང་ཁམས་དང་སྐྱེ་མཆེད་དག་ལ་རྣམ་པར་སྨིན་པར་འགྱུར་ཏེ།

ལས་རྣམས་བསྐལ་པ་བརྒྱར་ཡང་ནི།

ཆུད་མི་ཟ་བའང་ཚོགས་དང་དུས།

རྙེད་ནས་ལུས་ཅན་རྣམས་ལ་ནི།

འབྲས་བུ་དག་ཏུ་འགྱུར་བ་ཉིད།

དགེ་སློང་དག་སྔོན་བྱུང་བ་བསྐལ་པ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ།

བདེ་བར་གཤེགས་པ་འཇིག་རྟེན་མཁྱེན་པ་སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ།

ལྷ་དང་མི་རྣམས་

ཀྱི་སྟོན་པ་སངས་རྒྱས་བཅོམ་ལྡན་འདས་འོད་སྲུང་ཞེས་བྱ་བ་འཇིག་རྟེན་དུ་བྱུང་སྟེ།

དེ་གྲོང་ཁྱེར་བཱ་རཱ་ཎ་སཱིར་ཉེ་བར་རྟེན་ཅིང་བཞུགས་སོ།

དེའི་བསྟན་པ་ལ་འདི་རབ་ཏུ་བྱུང་ནས་སྡེ་སྣོད་གསུམ་པར་གྱུར་ཏེ།

ཆོས་བཞིན་གྱིས་དགེ་འདུན་གྱི་ཞལ་ཏ་བ་བྱེད་དོ།

རེ་ཞིག་ཅིག་ན་དགྲ་བཅོམ་པ་ཞིག་ལ་དགེ་སྐོས་བབ་སྟེ།

དེས་གཙུག་ལག་ཁང་ཕྱག་དར་བྱ་བར་བརྩམས་པ་དང་།

རླུང་ལངས་པས་ཕྱག་དར་ཕན་ཚུན་དུ་ཁྱེར་བར་གྱུར་ཏོ།

དེས་བསམས་པ་རེ་ཞིག་རླུང་ཞི་བར་གྱུར་གྱི་བར་དུ་གཞག་གོ་སྙམ་པ་ལས།

ཇི་ཙམ་ན་གཙུག་ལག་ཁང་དེ་མ་ཕྱགས་པ་ཞལ་ཏ་བ་དེས་མཐོང་ནས་དེ་ཀུན་ནས་དཀྲིས་པ་དྲག་པོས།

རྩུབ་པོའི་ངག་ཕྱུང་བ།

བྲན་མོའི་བུ་གང་ཞིག་དགེ་སྐོས་བྱེད།

དགྲ་བཅོམ་པ་དེས་ཐོས་ནས།

དེས་བསམས་པ།

འདི་ཀུན་ནས་དཀྲིས་པ་ཡིན་པས་རེ་ཞིག་བཞག་ལ་ཕྱིས་གོ་བར་བྱའོ་སྙམ་ནས།

གང་གི་ཚེ་ཀུན་ནས་དཀྲིས་པ་དང་བྲལ་བ་དེའི་ཚེ།

དེའི་དྲུང་དུ་སོང་སྟེ་སྨྲས་པ་ཁྱོད་ཀྱིས་ཁོ་བོ་སུ་ཡིན་ཤེས་སམ།

དེས་སྨྲས་པ་ཤེས་ཏེ་ཁྱོད་དང་ཁོ་བོ་ཡང་དག་པར་རྫོགས་པའི་སངས་རྒྱས་འོད་སྲུང་གི་བསྟན་པ་ལ་རབ་ཏུ་བྱུང་བ་ཡིན་ནོ།

དེས་སྨྲས་པ་གལ་ཏེ་དེ་ལྟ་ཡིན་མོད་ཀྱི་ཁོ་བོས་ནི་རབ་ཏུ་བྱུང་བའི་བྱ་བ་བྱས་ཏེ།

ཁོ་བོ་ནི་འཆིང་བ་མཐའ་དག་ལས་གྲོལ་བ་ཡིན་ལ།

ཁྱོད་ནི་འཆིང་བ་མཐའ་དག་གིས་བཅིངས་པ་ཡིན་པས་ཁྱོད་ཀྱིས་ངག་རྩུབ་པོའི་ལས་ཕྱུང་གིས་ཉེས་པ་ལ་ཉེས་པར་ཤོགས་ཤིག་དང་།

དེས་ན་ལས་དེ་བསྲབས་པ་དང་།

ཡོངས་སུ་ཟད་པ་དང་།

གཏུགས་པར་འགྱུར་རོ།

དེས་ཉེས་པ་ལ་ཉེས་པར་བཤགས་པས་སེམས་ཅན་དམྱལ་བར་སྐྱེ་ཞིང་བྲན་མོའི་བུར་འགྱུར་བ་ལས།

དེ་སེམས་ཅན་དམྱལ་བར་མ་སྐྱེས་པས།

ཚེ་རབས་ལྔ་བརྒྱར་བྲན་མོའི་མངལ་དུ་སྐྱེས་ཏེ་ད་ལྟར་གྱི་བར་དུ་སྲིད་པ་ཐ་མ་ལ་ཡང་བྲན་མོའི་མངལ་དུ་སྐྱེས་པར་གྱུར་ཏོ།

གང་ཡང་དགེ་འདུན་ལ་བསྙེན་བཀུར་བྱས་པ་དེས་ན་ཕྱུག་པ་དང་ནོར་མང་བ་དང་།

ལོངས་སྤྱོད་ཆེ་བའི་རིགས་སུ་སྐྱེས་སོ།

གང་ཡང་དེ་ན་བཀླགས་ཤིང་བཏོན་པས་ཕུང་པོ་ལ་མཁས་པ་དང་།

ཁམས་ལ་མཁས་པ་དང་།

སྐྱེ་མཆེད་ལ་མཁས་པ་དང་།

རྟེན་ཅིང་འབྲེལ་པར་འབྱུང་བ་ལ་མཁས་པར་བྱས་པ་དེས་ན་ངའི་བསྟན་པ་ལ་རབ་ཏུ་བྱུང་སྟེ།

ཉོན་མོངས་པ་ཐམས་ཅད་སྤངས་ནས་དགྲ་བཅོམ་པ་མངོན་སུམ་དུ་བྱས་སོ།

དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་ཀྱི་རྣམ་པར་སྨིན་པ་ནི་གཅིག་ཏུ་གནག་པ་ཡིན།

གཅིག་ཏུ་དཀར་བ་རྣམས་ཀྱི་ནི་གཅིག་ཏུ་དཀར་བ་ཡིན།

འདྲེན་མ་རྣམས་ཀྱི་ནི་འདྲེན་མ་ཡིན་ནོ།

དགེ་སློང་དག་དེ་ལྟ་བས་ན་ལས་གཅིག་ཏུ་གནག་པ་རྣམས་དང་འདྲེན་མ་ནི་སྤངས་ལ་ལས་གཅིག་ཏུ་དཀར་བ་ལ་བརྩལ་བར་བྱ་སྟེ།

དགེ་སློང་དག་ཁྱེད་ཀྱིས་དེ་ལྟ་བུ་ལ་བསླབ་པར་བྱའོ།

བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་དགེ་སློང་དེ་དག་ཡི་རངས་ཏེ།

བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།།

གླེང་གཞི་ནི་རྒྱལ་པོའི་ཁབ་ནའོ།

དེའི་ཚེ་རྒྱལ་པོའི་ཁབ་ན་ཀླུའི་རྒྱལ་པོ་གྲོག་མཁར་དང་རི་བོ་གནས་སོ།

དེ་གཉིས་ཀྱི་མཐུས་དཀའ་ཐུབ་ཀྱི་ཆུ་ལྔ་བརྒྱ་ཡང་རྟག་ཏུ་འབབ་ལ།

ཆུ་མིག་དང་།

མཚོ་དང་།

མཚེའུ་རྣམས་ཀྱང་སྐམ་པར་མི་འགྱུར།

ལྷས་དུས་དུས་སུ་ཆར་གྱི་རྒྱུན་ལེགས་པར་ཕབ་པས་ལོ་ཏོག་རྣམས་ཀྱང་ལྷག་པར་ལེགས་པར་འགྱུར་རོ།

གང་གི་ཚེ་བཅོམ་ལྡན་འདས་ཀྱིས་ཀླུའི་རྒྱལ་པོ་དགའ་བོ་དང་ཉེ་དགའ་བོ་གཉིས་བཏུལ་བ་ན་དེ་གཉིས་རི་རབ་ཀྱི་བང་རིམ་ནས་ཉི་མ་རེ་རེ་ཞིང་བཅོམ་ལྡན་འདས་ལ་བསྙེན་བཀུར་བྱེད་དུ་འོང་ངོ་།

དེ་ནས་ཀླུའི་རྒྱལ་པོ་གྲོག་མཁར་དང་རི་བོ་འདི་སྙམ་དུ་སེམས་ཏེ།

ཀླུའི་རྒྱལ་པོ་དགའ་བོ་དང་ཉེ་དགའ་བོ་འདི་གཉིས་རི་རབ་ཀྱི་བང་རིམ་ནས་ཉི་མ་རེ་རེ་ཞིང་བཅོམ་ལྡན་འདས་ལ་བསྙེན་བཀུར་བྱེད་ཅིང་འོང་ན།

བདག་ཅག་འདི་ཉིད་ན་གནས་བཞིན་དུ་བཅོམ་ལྡན་འདས་ལ་བསྙེན་བཀུར་མི་བྱེད་པ་ནི་བཟང་པོ་མ་ཡིན་གྱིས།

མ་ལ་བདག་ཅག་གིས་ཀྱང་བཅོམ་ལྡན་འདས་ལ་བསྙེན་བཀུར་བྱའོ་སྙམ་ནས།

དེ་གཉིས་བཅོམ་ལྡན་འདས་གང་ན་བ་དེར་དོང་སྟེ་ཕྱིན་ནས།

བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ།

ཕྱོགས་གཅིག་ཏུ་འདུག་གོ།

ཕྱོགས་

གཅིག་ཏུ་འདུག་ནས་བཅོམ་ལྡན་འདས་ཀྱིས་དེ་གཉིས་ལ་དེ་འདྲ་བའི་ཆོས་བཤད་པ་མཛད་དེ།

དེ་ཐོས་ནས་དེ་གཉིས་སངས་རྒྱས་ལ་སྐྱབས་སུ་དོང་ཞིང་།

ཆོས་དང་དགེ་འདུན་ལ་སྐྱབས་སུ་དོང་ནས་བསླབ་པའི་གཞི་རྣམས་བླངས་སོ།

གང་གི་ཚེ་བཅོམ་ལྡན་འདས་ལས་སྐྱབས་སུ་འགྲོ་བ་དང་།

བསླབ་པའི་གཞི་རྣམས་བླངས་པ་དེའི་ཚེ།

ལུས་དང་ལོངས་སྤྱོད་ལྷག་པར་འཕེལ་བར་གྱུར་ཏོ།

དེ་གཉིས་ཀྱིས་བཅོམ་ལྡན་འདས་གང་ན་བ་དེར་དོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས་གསོལ་པ།

བཅོམ་ལྡན་འདས་གང་གི་ཚེ་བདག་ཅག་གིས་བཅོམ་ལྡན་འདས་ལ་སྐྱབས་སུ་མཆིས་ཤིང་།

བསླབ་པའི་གཞི་རྣམས་མནོས་པ་དེའི་ཚེ་ལུས་དང་ལོངས་སྤྱོད་ལྷག་པར་འཕེལ་བར་གྱུར་ལགས་སོ།

བཅོམ་ལྡན་འདས་གལ་ཏེ་བཅོམ་ལྡན་འདས་ཀྱིས་རྗེས་སུ་གནང་ན་བདག་ཅག་རྒྱ་མཚོ་ཆེན་པོར་འཇུག་ལགས་སོ།

བཅོམ་ལྡན་འདས་ཀྱིས་བཀའ་སྩལ་པ།

ཀླུའི་དབང་པོ་དག་ཁྱེད་རྒྱལ་པོའི་ཡུལ་ན་གནས་པ་ཡིན་གྱིས་རྒྱལ་པོ་ལ་རྟོགས་ཤིག །

དེ་གཉིས་ཀྱིས་བསམས་པ་དང་།

དོན་གྱིས་ན་བདག་ཅག་བཅོམ་ལྡན་འདས་ཀྱིས་རྗེས་སུ་མ་གནང་ངོ་ཞེས་སྨྲས་ནས་དེ་ཉིད་ན་གནས་སོ།

ཀླུའི་རྒྱལ་པོ་གྲོག་མཁར་དང་རི་བོའི་ཀུན་དུ་སྤྱོད་པ་ནི།

གལ་ཏེ་ནུབ་མོ་བཅོམ་ལྡན་འདས་ལྟར་འགྲོ་ན་ནི་ལྷའི་བུའི་ཆ་བྱད་ཀྱིས་སོ།

འོན་ཏེ་ཉིན་པར་ན་ནི་ཁྱིམ་བདག་གི་ཆ་བྱད་ཀྱིས་སོ།

དེ་གཉིས་ཁྱིམ་བདག་གི་ཆ་བྱད་དུ་བྱས་ཤིང་ཉིན་རེ་ཞིང་བཅོམ་ལྡན་འདས་ལ་བསྙེན་བཀུར་བྱེད་དོ།

རྒྱལ་པོ་གཟུགས་ཅན་སྙིང་པོ་རྒྱལ་རིགས་ཀྱི་མངོན་པའི་ང་རྒྱལ་ཅན་གྱི་ཀུན་དུ་སྤྱོད་པ་ནི་དེ་གང་གི་ཚེ་བཅོམ་ལྡན་འདས་ལྟ་བར་འགྲོ་བ་དེའི་ཚེ་འགའ་ཞིག་བདག་མཐོང་ན་ལྡང་བར་མི་བྱེད་པ་མེད་གྲང་ཞེས་མི་གནང་ཆེན་གཏོང་བར་བྱེད་དོ།

དེས་མི་གནང་ཆེན་ཞིག་མངགས་ཏེ།

ཀྱེ་ནང་རྗེ་སོང་ལ་བཅོམ་ལྡན་འདས་ལ་སུ་དག་བསྙེན་བཀུར་བྱེད་ལྟོས་ཤིག །

དེ་སོང་བ་ལས་ཇི་ཙམ་ན་ཁྱིམ་བདག་གཉིས་ཤིག་མཐོང་ནས་དེས་བསམས་པ།

འདི་གཉིས་ནི་ལྷའི་ཡུལ་ན་གནས་པས།

ཅིའི་ཕྱིར་ལྡང་

བར་མི་བྱེད་སྙམ་ནས་དེས་རྒྱལ་པོ་ལ་སྨྲས་པ།

ལྷ་ཁྱིམ་བདག་གཉིས་ཤིག་མཆིས་པ་ནི་ལྷའི་ཡུལ་ཉིད་ན་གནས་པ་ལགས་སོ།

རྒྱལ་པོ་གཟུགས་ཅན་སྙིང་པོས་བསམས་པ།

དེ་གཉིས་ཀྱིས་བདག་མཐོང་ན་ཅིའི་ཕྱིར་ལྡང་བར་མི་བྱེད་ཀྱིས་འགྲོའོ་སྙམ་ནས་དེ་ནས་བཅོམ་ལྡན་འདས་གང་ན་བ་དེར་སོང་བ་དང་།

ཀླུའི་རྒྱལ་པོ་གྲོག་མཁར་དང་རི་བོས་རྒྱལ་པོ་གཟུགས་ཅན་སྙིང་པོ་མཐོང་ངོ་།

མཐོང་ནས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་རྒྱལ་པོ་གཟུགས་ཅན་སྙིང་པོ་མཆི་ན་ཅི་རེ་ཞིག་རྒྱལ་པོ་ལ་བསྟི་སྟང་བགྱིའམ།

འོན་ཏེ་ཆོས་ལ་བགྱི།

བཅོམ་ལྡན་འདས་ཀྱིས་བཀའ་སྩལ་པ།

ཀླུའི་དབང་པོ་དག་ཆོས་ལ་བསྟི་སྟང་བྱོས་ཤིག །

དམ་པའི་ཆོས་ལ་ནི་འདི་ལྟར་སངས་རྒྱས་བཅོམ་ལྡན་འདས་རྣམས་ཀྱང་བླ་མར་བྱེད་དོ།

ཆོས་ལ་ནི་དགྲ་བཅོམ་པ་རྣམས་ཀྱང་བླ་མར་བྱེད་དོ།

ཚིགས་སུ་བཅད་དེ་བཀའ་སྩལ་པ།

འདས་པའི་སངས་རྒྱས་གང་ཡིན་དང་།

མ་བྱོན་སངས་རྒྱས་གང་ཡིན་དང་།

ད་ལྟར་སངས་རྒྱས་གང་ཡིན་པ།

མང་པོའི་མྱ་ངན་འཇོམས་མཛད་པ།

བཞུད་དང་བཞུགས་དང་བྱོན་འགྱུར་བ།

ཐམས་ཅད་དམ་ཆོས་བླ་མར་བྱེད།

འདི་ནི་སངས་རྒྱས་ཆོས་ཉིད་ཡིན།

དེ་བས་འདིར་བདག་ཕན་འདོད་པ།

བདག་ཉིད་ཆེན་པོར་འདོད་པ་ཡིས།

སངས་རྒྱས་བསྟན་པ་དྲན་བྱས་ཏེ།

དམ་པའི་ཆོས་ལ་བཀུར་སྟི་བྱ།

དེ་གཉིས་ཀྱིས་ལྡང་བ་མ་བྱས་སོ།

དེ་ནས་རྒྱལ་པོ་མི་བཟོད་པ་སྐྱེས་ཏེ།

དེས་གསོལ་པ་བཅོམ་ལྡན་འདས་ཀྱིས་ཆོས་བཤད་དུ་གསོལ།

བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ།

ཞེ་སྡང་དང་ནི་འཁྲུག་པ་དང་།

མ་དད་པ་ཡི་སེམས་ཀྱིས་ནི།

རྫོགས་སངས་རྒྱས་ཀྱིས་བཤད་པ་ཡི།

དམ་ཆོས་ཤེས་པར་མི་ནུས་སོ།

གང་གིས་ཁྲོ་དང་བག་མེད་པའི།

སེམས་ནི་དུལ་བར་བྱས་པ་དང་།

འདི་ལ་མནར་སེམས་སྤངས་པ་དེས།

ལེགས་པར་གསུངས་པ་ཤེས་པར་ནུས།

རྒྱལ་པོས་བསམས་པ།

ཁྱིམ་བདག་འདི་གཉིས་འོངས་པས་བཅོམ་ལྡན་འདས་ཀྱིས་བདག་

གི་ཆོས་ཉན་པའི་བར་ཡང་ཆད་པར་གྱུར་ཏོ་སྙམ་ནས།

དེ་སྟན་ལས་ལངས་ཏེ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་སོང་ངོ་།

དེ་སོང་ནས་བློན་པོ་རྣམས་ལ་བསྒོ་བ།

ཁྱིམ་བདག་འདི་གཉིས་གང་གི་ཚེ་བཅོམ་ལྡན་འདས་ཀྱི་སྤྱན་སྔ་ནས་དོང་བ་དེའི་ཚེ།

ཁྱེད་གཉིས་ངའི་ཡུལ་ན་མ་འདུག་ཤིག་ཅེས་བསྒོས་ཤིག །

དེ་གཉིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ནས་སོང་བ་དང་།

བློན་པོ་དག་གིས་བསྒོ་བ།

ལྷའི་ཞལ་ནས་ཁྱེད་ཅག་གཉིས་ངའི་ཡུལ་ན་མ་འདུག་ཤིག་ཅེས་གསུང་ངོ་།

དེ་གཉིས་ཀྱིས་སྨྲས་པ།

བཀའ་བཞིན་འཚལ་མཆིའོ།

བསམས་པ་བདག་ཅག་གཉིས་ཀྱིས་ཡུན་རིང་པོ་ཞིག་ནས་བསམས་པ་གང་ཡིན་པ་དེ་ནི་ཚེགས་ཆུང་ངུས་གྲུབ་བོ་སྙམ་མོ།

དེ་ནས་འོད་པའི་ཆུ་ཆེན་པོ་ཕྱུང་ནས་གྲོག་པོ་ཆུང་ངུའི་ནང་དུ་ཞུགས་སོ།

གྲོག་པོ་ཆུང་ངུ་ནས་གྲོག་པོ་ཆེན་པོར་རོ།

གྲོག་པོ་ཆེན་པོ་ནས་ཆུ་བྲན་དུའོ།

ཆུ་བྲན་ནས་ཆུ་ཆེན་པོར་རོ།

ཆུ་ཆེན་པོ་ནས་རྒྱ་མཚོ་ཆེན་པོར་ཏེ།

གང་གི་ཚེ་རྒྱ་མཚོ་ཆེན་པོར་ཞུགས་པ་དེའི་ཚེ་དེ་གཉིས་ཕྱིར་ཞིང་ལུས་དང་ལོངས་སྤྱོད་ཤིན་ཏུ་འཕེལ་བར་གྱུར་ཏོ།

ཇི་ཙམ་དུས་གཞན་ཞིག་ན་རྒྱལ་པོའི་ཁབ་ཀྱི་དཀའ་ཐུབ་ཀྱི་ཆུ་ལྔ་བརྒྱ་དང་།

ཆུ་མིག་དང་མཚོ་དང་།

མཚེའུ་རྣམས་ཀྱང་ཆུང་བ་དང་།

ཡོངས་སུ་ཟད་པ་དང་།

གཏུགས་པར་གྱུར་ལ་ཐུག །

ལྷས་ཀྱང་དུས་དུས་སུ་ཆར་གྱི་རྒྱུན་ལེགས་པར་མ་ཕབ་པས་ལོ་ཉེས་པར་གྱུར་ཏེ།

མུ་གེ་ཉམ་ང་བ་དགོན་པའི་སློང་མོ་པས་ཟས་རྙེད་པར་དཀའ་བ་བྱུང་བར་གྱུར་ཏོ།

རྒྱལ་པོས་བསམས་པ།

རྒྱལ་པོའི་ཁབ་འདི་ན་ཀླུའི་རྒྱལ་པོ་རི་བོ་དང་།

གྲོག་མཁར་གནས་ཏེ།

དེ་གཉིས་ཀྱི་མཐུས་དཀའ་ཐུབ་ཀྱི་ཆུ་ལྔ་བརྒྱ་ཡང་འབབ།

ཆུ་མིག་དང་།

མཚོ་དང་།

མཚེའུ་རྣམས་ཀྱང་ཆུ་ཆེ།

ལྷས་ཀྱང་དུས་དུས་སུ་ཆར་གྱི་རྒྱུན་ལེགས་པར་ཕབ་པ་ཉིད་ཀྱིས་ལོ་ཏོག་ལེགས་པར་གྱུར་ན།

ད་ནི་དཀའ་ཐུབ་ཀྱི་ཆུ་ལྔ་བརྒྱ་དང་།

ཆུ་མིག་དང་མཚོ་དང་།

མཚེའུ་རྣམས་ཀྱང་ཆུང་བ་དང་།

ཡོངས་སུ་ཟད་པ་དང་།

གཏུགས་པར་གྱུར་ལ་ཐུག །

ལྷས་ཀྱང་དུས་དུས་སུ་ཆར་གྱི་རྒྱུན་ལེགས་པར་མ་ཕབ་པས་ལོ་ཉེས་པར་གྱུར་ཏེ།

མུ་གེ་ཉམ་ང་བ་དགོན་པའི་སློང་མོ་པས་ཟས་རྙེད་པར་དཀའ་བ་བྱུང་བར་གྱུར་ན།

ཀླུའི་རྒྱལ་པོ་རི་བོ་དང་།

གྲོག་མཁར་ཤིའམ།

བྱའི་རྒྱལ་པོ་ནམ་མཁའ་ལྡིང་གིས་ཁྱེར་བའམ།

སྦྲུལ་ཁས་སྡིགས་ཀྱིས་བཟུང་བའམ།

དེས་འཇིགས་ནས་བྲོས་པར་མ་གྱུར་གྲང་།

དེ་ལྟ་མོད་ཀྱི་སངས་རྒྱས་བཅོམ་ལྡན་འདས་ནི་ཐམས་ཅད་མཁྱེན་པ་ཐམས་ཅད་གཟིགས་པ་ཡིན་གྱིས།

མ་ལ་བདག་གིས་བཅོམ་ལྡན་འདས་ལ་ཞུའོ་སྙམ་དུ་བསམས་ནས།

བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་།

བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ།

ཕྱོགས་གཅིག་ཏུ་འདུག་གོ།

ཕྱོགས་གཅིག་ཏུ་འདུག་ནས།

རྒྱལ་པོ་གཟུགས་ཅན་སྙིང་པོས་བཅོམ་ལྡན་འདས་ལ་དོན་དེ་རྒྱས་པར་གསོལ་ཏོ།

བཅོམ་ལྡན་འདས་ཀྱིས་བཀའ་སྩལ་པ།

རྒྱལ་པོ་ཆེན་པོ་དེ་གཉིས་ནི་ཤི་བ་ཡང་མ་ཡིན།

བྱའི་རྒྱལ་པོ་ནམ་མཁའ་ལྡིང་གིས་ཀྱང་མ་ཁྱེར།

སྦྲུལ་ཁས་སྡིགས་ཀྱིས་ཀྱང་མ་བཟུང་།

དེས་འཇིགས་པས་ཀྱང་མ་བྲོས་མོད་ཀྱི་རྒྱལ་པོ་ཁྱོད་ཉིད་ཀྱིས་ཡུལ་ནས་བསྐྲད་དོ།

བཅོམ་ལྡན་འདས་བདག་གིས་དེ་གཉིས་མཐོང་བར་ཡང་མི་དྲན་ན་དེ་གཉིས་ཡུལ་ནས་བསྐྲད་པ་ལྟ་སྨོས་ཀྱང་ཅི་འཚལ།

རྒྱལ་པོ་ཆེན་པོ་ངས་ཁྱོད་དྲན་པར་བྱའོ།

རྒྱལ་པོ་ཆེན་པོ་ཁྱོད་ཀྱིས་ཁྱིམ་བདག་གཉིས་ཤིག་ཡུལ་ནས་བསྐྲད་པ་དྲན་ནམ།

བཅོམ་ལྡན་འདས་དྲན་ལགས་སོ།

དེ་གཉིས་ནི་ཀླུའི་རྒྱལ་པོ་རི་བོ་དང་།

གྲོག་མཁར་ཡིན་ནོ།

བཙུན་པ་དེ་གཉིས་གང་དུ་མཆི།

རྒྱ་མཚོ་ཆེན་པོར་དོང་ངོ་།

བདག་གི་ཡུལ་མ་རུང་བར་གྱུར་ལགས་སོ།

རྒྱལ་པོ་ཆེན་པོ་དེ་གཉིས་ལ་བཟོད་པ་བྱིན་ཅིག་དང་མ་རུང་བར་མི་འགྱུར་རོ།

དེ་གཉིས་རྒྱ་མཚོ་ཆེན་པོ་ན་མཆིས་ན་ཇི་ལྟར་བཟོད་པ་སྩལ།

དེ་གཉིས་ཚེས་བརྒྱད་དང་བཅུ་བཞི་ལ་ཁྱིམ་བདག་གི་ཆ་བྱད་དུ་བྱས་ནས།

ངའི་ཞབས་ལ་ཕྱག་འཚལ་དུ་འོངས་པ་དང་ངས་རྟགས་བསྟན་གྱིས་ཁྱོད་ཀྱིས་བཟོད་པ་བྱིན་ཅིག །

བཅོམ་ལྡན་འདས་ཅི་བདག་གིས་རྐང་པ་

གཉིས་ལ་གཏུག་པར་བགྱིའམ།

རྐང་པ་གཉིས་ལ་གཏུག་པར་མི་བྱ་སྟེ།

འོན་ཀྱང་ལག་པ་རྐྱོང་ལ་ཀླུའི་དབང་པོ་བཟོད་པར་གསོལ་ལོ་ཞེས་སྨྲོས་ཤིག་དང་བཟོད་པར་འགྱུར་རོ།

རྒྱལ་པོས་དེ་གཉིས་འོང་བ་ལ་འབད་དེ་སྡོད་ཅིང་འདུག་པ་དང་།

ཇི་ཙམ་ན་དེ་གཉིས་ཁྱིམ་བདག་གི་ཆ་བྱད་དུ་བྱས་ནས་བཅོམ་ལྡན་འདས་ཀྱི་སྤྱན་སྔར་འོངས་པ་དང་དེ་མ་ཐག་ཏུ་རྒྱལ་པོ་ཡང་འོངས་ནས་བཅོམ་ལྡན་འདས་ཀྱིས་རྟགས་བསྟན་པ་དང་རྒྱལ་པོས་ལག་པ་མངོན་དུ་བརྐྱང་ནས་སྨྲས་པ།

ཀླུའི་དབང་པོ་གཉིས་བཟོད་པར་གསོལ་ལོ།

རྒྱལ་པོ་ཆེན་པོ་བཟོད་པར་བགྱིའོ།

གལ་ཏེ་བཟོད་པར་གྱུར་ན་ནི་འདིར་སྤྱོན་ཅིག །

རྒྱལ་པོ་ཆེན་པོ་གང་གི་ཚེ་བཅོམ་ལྡན་འདས་ལས་བདག་ཅག་གིས་སྐྱབས་སུ་འགྲོ་བ་དང་།

བསླབ་པའི་གཞི་རྣམས་བླངས་པས་དེ་ཉིད་ཀྱི་ཚེ་བདག་ཅག་གི་ལུས་དང་ལོངས་སྤྱོད་སྐྱེས་ཏེ།

གལ་ཏེ་ད་ཆེ་བཞིན་དུ་འདིར་འོངས་ན་ཡུལ་མ་ག་དྷཱར་ཡང་མི་ཤོང་བར་འགྱུར་རོ།

འོ་ན་ཡུལ་མ་ག་དྷཱ་མ་རུང་བར་འགྱུར་མོད།

མ་རུང་བར་མི་འགྱུར་རོ།

ཇི་ལྟར་མི་འགྱུར།

ཁྱོད་ཀྱིས་ཁོ་བོ་ཅག་གི་ཁང་བཟངས་གཉིས་རྩིགས་ལ་ཟླ་བ་དྲུག་ཅིང་དུས་མཆོད་གྱིས་ཤིག་དང་།

ཁོ་བོ་ཅག་གི་འཁོར་བཞག་ལ་དུས་མཆོད་ཀྱི་ཚེ་ཡང་འདུ་བར་བྱའོ།

རྒྱལ་པོས་དེ་བཞིན་དུ་བྱས་པ་དང་།

དེ་གཉིས་ཀྱིས་འཁོར་དག་ཀྱང་བཞག་ལ་དུས་མཆོད་ཀྱང་རང་ཉིད་ཉམས་སུ་མྱོང་བར་བྱེད་དོ།

ཇི་ཙམ་དུས་གཞན་ཞིག་ན་དེ་དག་གི་འཁོར་བག་མེད་པར་གནས་པ་ན་ཀླུ་གདུག་པ་དག་གིས་གླགས་རྙེད་ནས།

དེ་དག་གིས་སེར་བ་དབབ་པར་བརྩམས་སོ།

རྒྱལ་པོའི་ཁབ་ན་བྲམ་ཟེ་སེར་བའི་སྔགས་ལ་མཁས་པ་གཞན་ཞིག་ཡོད་དེ།

དེས་དེ་བབ་ཅིང་བབ་པ་དག་བཅད་པ་དང་།

དེ་ལ་ཡུལ་མ་ག་དྷཱ་ན་གནས་པའི་སྐྱེ་བོའི་ཚོགས་ཀྱིས་དབང་ཐང་བྱིན་ནོ།

ལྷོ་ཕྱོགས་ན་བྲམ་ཟེ་མེས་བྱིན་ཞེས་བྱ་བ་སེར་བའི་སྔགས་ལ་མཁས་པ་ཞིག་ཡོད་པ་དེས་བྱང་ཕྱོགས་ན་ཡུལ་ནུས་པ་ཅན་ཞེས་བྱ་བ་ཞིག་ཡོད་དེ།

དེ་ན་རྒྱལ་པོ་སྡེ་མཆོག་ཅེས་བྱ་བ་རྒྱལ་སྲིད་བྱེད་དུ་འཇུག་གོ།

དེའི་ཡུལ་ན་ཀླུའི་རྒྱལ་པོ་རབ་མཛེས་ཀྱི་

གནས་ཡོད་དེ།

དེ་ན་སྨན་མཐུ་ཆེ་བ་ཕ་རོལ་གནོན་པ་ཡོད་པར་ཐོས་ནས་དེའི་ཆེད་དུ་འགྲོའོ་ཞེས་དེ་ཆས་ཏེ་རིམ་གྱིས་རྒྱལ་པོའི་ཁབ་ཏུ་ཕྱིན་ནས་བྲམ་ཟེ་སེར་བའི་སྔགས་འཆང་བ་དེའི་གནས་སུ་ཞུགས་པ་དང་།

ཇི་ཙམ་ན་སེར་བ་ཆེན་པོ་བབ་པ་བྲམ་ཟེ་གཉུག་མར་གནས་པ་དེས་གཅད་པར་མ་ནུས་ནས་དེ་ཕྱིར་བྱུང་ནང་དུ་ཞུགས་བྱེད་པ་དང་བྲམ་ཟེ་མེས་བྱིན་གྱིས་དྲིས་པ།

མཁན་པོ་ཅིའི་སླད་དུ་མཁན་པོ་འདི་ཕྱིར་བྱུང་ནང་དུ་ཞུགས་པར་མཛད།

དེས་སྨྲས་པ།

བུ་སེར་བ་ཆེན་པོ་བབ་པ་གཅད་པར་མ་ནུས་པར་བས་མོད།

བདག་གིས་དགུམ་མོ།

བུ་ལེགས་སོ།

དེས་ཆུ་ཉུང་ཞིག་ལ་བཟླས་ཏེ་གཏོར་བས་ཚལ་པ་བརྒྱར་གྱེས་སོ།

རྒྱལ་པོའི་ཁབ་ཀྱི་བྲམ་ཟེ་དང་ཁྱིམ་བདག་རྣམས་མཆོག་ཏུ་ངོ་མཚར་དུ་གྱུར་ནས།

རྔན་པ་ཐོགས་ཏེ་བྲམ་ཟེ་དེའི་ཁྱིམ་དུ་སོང་ནས་སྨྲས་པ།

མཁན་པོ་རྒྱལ་པོའི་ཁབ་ཀྱི་སྐྱེ་བོའི་ཚོགས་མངོན་པར་དགའ་བར་གྱུར་གྱིས་རྔན་པ་ལོང་ཤིག །

ཅིའི་ཕྱིར།

ཁྱོད་ཀྱིས་སེར་བ་ཆེན་པོ་ཁུམས་པའི་སླད་དུའོ།

དེས་སྨྲས་པ།

ཁོ་བོས་ནི་མ་བཅད་དེ།

འོན་ཀྱང་བྲམ་ཟེ་འདིས་བཅད་དོ།

དེ་དག་བྲམ་ཟེ་དེའི་དྲུང་དུ་དོང་ནས་བྲམ་ཟེའི་ཁྱེའུ་འདི་ཉིད་དུ་འདུག་ཤིག་དང་དབང་ཐང་སྦྱིན་ནོ།

དེ་བཞིན་དུ་གནས་པར་བྱའོ་ཞེས་དེ་གནས་སོ།

དེས་སེར་བ་དེ་དུས་ཐ་གི་ཙམ་ཞིག་གི་བར་དུ་སྔགས་ཀྱིས་བགགས་ཏེ་མི་འབབ་པར་གྱུར་ཏོ།

རྒྱལ་པོའི་ཁབ་ཀྱི་བྲམ་ཟེ་དང་ཁྱིམ་བདག་རྣམས་ཀྱིས་སྨྲས་པ།

ཤེས་ལྡན་དག་བདག་ཅག་ཉིད་ཀྱི་བསོད་ནམས་ཀྱིས་སེར་བ་མི་འབབ་ན་ཅིའི་ཕྱིར་དེ་ལ་དབང་ཐང་སྦྱིན་ཞེས་དེ་རྣམས་ཀྱིས་བཅད་དོ།

བྲམ་ཟེ་དེས་སྔགས་བརྟུལ་ནས་ཡུལ་ནུས་པ་ཅན་དུ་སོང་བ་དང་ཕྱིར་ཡང་སེར་བ་བབ་པར་གྱུར་ཏོ།

དེ་རྣམས་བྲམ་ཟེ་དེའི་དྲུང་དུ་སོང་སྟེ་སྨྲས་པ།

མཁན་པོ་བྲམ་ཟེའི་ཁྱེའུ་དེ་གར་མཆིས།

དེས་སྨྲས་པ།

ཁྱེད་ཅག་གིས་དེ་ལ་བཀུར་སྟི་མ་བྱས་པས་དེ་སོང་ངོ་།

མཁན་པོ་གལ་ཏེ་མཆིས་ན་བདག་ཅག་ལ་སྦྲོན་ཅིག །

དེ་བཞིན་དུ་བྱའོ།

དེ་ཡང་རིམ་གྱིས་རྒྱལ་པོ་སྡེ་མཆོག་གང་ན་བ་དེར་སོང་སྟེ་ཕྱིན་ནས།

རྒྱལ་པོ་སྡེ་མཆོག་ལ་རྒྱལ་བ་དང་

ཚེ་སྤེལ་བ་དག་བྱས་ནས་སྨྲས་པ།

ལྷ་ཁྱོད་ཀྱི་ཡུལ་ན་ཀླུའི་རྒྱལ་པོ་རབ་མཛེས་ཞེས་བགྱི་བ་མཆིས་པ་དེའི་གནས་ན་མོད་ལ་མཐུ་སྐྱེད་པ་ཞེས་བགྱི་བའི་སྨན་མཆིས་ཀྱིས་ལྷ་དེ་སྟོན་ཅིག །

ལྷའི་སྐལ་བ་ཡང་དབུལ་བར་བགྱིའོ།

རྒྱལ་པོས་སྨྲས་པ།

ཀྱེ་བྲམ་ཟེ་ཀླུའི་རྒྱལ་པོ་རབ་མཛེས་ནི་གཏུམ་པོ་ཡིན་པས་དེས་ཁྱོད་བརླག་པར་མི་བྱེད་གྲང་།

ལྷ་རེ་ཞིག་བདག་ལ་སྔགས་ཀྱི་མཐུ་དང་སྨན་གྱི་མཐུ་མཆིས་ཏེ།

གལ་ཏེ་ཀླུའི་རྒྱལ་པོ་རབ་མཛེས་དང་འདྲ་བའི་ཀླུ་རྣམས་ཀྱིས་འཛམ་བུའི་གླིང་འདི་ལྟ་སྟེ།

བུ་རམ་ཤིང་གི་ཚལ་ལམ།

འདམ་བུའི་ཚལ་བཞིན་གང་བར་གྱུར་ཀྱང་བདག་གི་བ་སྤུ་གཅིག་ཀྱང་བསྐྱོད་པར་རྔོ་མི་ཐོག་ན་ཀླུའི་རྒྱལ་པོ་རབ་མཛེས་ཀྱིས་ལྟ་སྨོས་ཀྱང་ཅི་འཚལ།

འོན་ཀྱང་ལྷའི་མི་དགུམ་པ་ལ་ཐུག་པ་འགའ་མཆིས་སམ།

བྲམ་ཟེ་ཡོད་དོ།

ལྷ་དེ་བཀྲི་ཤིག་དང་དེས་དེའི་གནས་སྟོན་པར་འགྱུར་རོ།

དེ་ནས་རྒྱལ་པོས་མི་དེ་ལ་བོས་ཏེ་བསྒོ་བ།

ཀྱེ་ནང་རྗེ་བྲམ་ཟེ་འདི་ལ་ཀླུའི་རྒྱལ་པོ་རབ་མཛེས་ཀྱི་གནས་སྟོན་ཅིག །

ལྷ་བཀའ་བཞིན་འཚལ་ཞེས་མི་དེས་རྒྱལ་པོའི་ལྟར་མཉན་ནས་བྲམ་ཟེ་དེ་ཁྲིད་དེ་ཆས་སོ།

ཇི་ཙམ་ན་མི་རིང་བ་ཞིག་ཏུ་བསྡད་ནས་དེ་ལ་སྨྲས་པ།

བྲམ་ཟེ་ཚལ་སྔོ་ཞིང་སྔོ་བ་དག་བསྒྲེངས་པ་ཕ་བི་མཐོང་ངམ།

མཐོང་ངོ་།

དེ་ནི་ཀླུའི་རྒྱལ་པོ་རབ་མཛེས་ཀྱི་གནས་ཡིན་ནོ།

དེ་སོང་སྟེ་དེས་དེར་མོད་ལ་མཐུ་སྐྱེད་པ་ཞེས་བྱ་བའི་སྨན་ལས་ཁུར་དུ་གྲགས་ནས།

དེས་དེ་ཐོགས་ཏེ་ཡུལ་ནུས་པ་ཅན་དུ་སོང་ནས་རྒྱལ་པོ་སྡེ་མཆོག་གི་སྐལ་བ་བྱིན་ཏེ།

རིམ་གྱིས་རྒྱལ་པོའི་ཁབ་ཏུ་ཕྱིན་ནས་བྲམ་ཟེ་དེ་ཉིད་ཀྱི་ཁྱིམ་དུ་ཞུགས་སོ།

དེ་ནས་དེས་རྒྱལ་པོའི་ཁབ་ཀྱི་བྲམ་ཟེ་དང་ཁྱིམ་བདག་རྣམས་ལ་སྦྲན་པ་དང་།

དེ་དག་མཆོད་ཡོན་ཐོགས་ཏེ་ལྷགས་ནས་བྲམ་ཟེའི་ཁྱེའུ་འདི་ཉིད་དུ་འདུག་ཤིག་དབང་ཐང་སྦྱིན་ནོ།

དེས་སྨྲས་པ།

ཁྱེད་ཅག་གིས་བཀུར་སྟི་མ་བྱས་པས་ཁོ་བོ་མི་འདུག་གོ།

དེ་རྣམས་ཀྱིས་དེ་གཞག་པར་གལ་གྱིས་གཅུ་བར་བརྩམས་ཏེ་གསོལ་བ་བཏབ་པ་དང་ཁས་བླངས་ནས་དེ་དག་གིས་འཚོ་བའི་རིས་བཅད་དོ།

འཇིག་རྟེན་ནི་ཕུན་སུམ་ཚོགས་པ་འདོད་ཀྱི་རྒུད་པ་དང་མི་མཐུན་པས།

དེས་

རིགས་མཉམ་པ་ལས་ཆུང་མ་བླངས་ཏེ།

དེ་དེ་དང་ལྷན་ཅིག་རྩེ་བར་བྱེད།

དགའ་བར་བྱེད།

དགའ་མགུར་སྤྱོད་པར་བྱེད་དོ།

དེ་རྩེ་བར་བྱེད་དགའ་བར་བྱེད།

དགའ་མགུར་སྤྱོད་པར་བྱེད་པ་ན་ཁྱེའུ་ཞིག་བཙས་ཏེ།

དེས་དེའི་མིང་རི་བོ་ཅན་ཞེས་བྱ་བར་བཏགས་སོ།

དེ་ཡང་རྩེ་བར་བྱེད་དགའ་བར་བྱེད།

དགའ་མགུར་སྤྱོད་པར་བྱེད་པ་ན་བུ་མོ་ཞིག་བཙས་ཏེ།

དེའི་མིང་ནི་སེར་བ་ཞེས་བྱ་བར་བཏགས་སོ།

བྲམ་ཟེ་མོ་ནི་འཁོར་བྲལ་ཞེས་བྱའོ།

མནའ་མ་ནི་གློག་ཅེས་བྱའོ།

དེས་བསམས་པ།

ཡང་དང་ཡང་དུ་སེར་བ་གཅོད་ཅིང་ཅི་ལས་མེད།

ཡུན་རིང་རབ་ཏུ་སྔགས་ཀྱིས་དགག་པར་བྱའོ་ཞེས་དེས་ཡུན་རིང་པོར་སྔགས་ཀྱིས་དགག་པ་བྱས་ཏེ་བཞག་པས་སེར་བ་མི་འབབ་པར་གྱུར་ཏོ།

རྒྱལ་པོའི་ཁབ་ཀྱི་བྲམ་ཟེ་དང་ཁྱིམ་བདག་རྣམས་ཀྱིས་སྨྲས་པ།

བདག་ཅག་ཁོ་ནའི་བསོད་ནམས་ཀྱི་མཐུས་སེར་བ་མི་འབབ་ན།

ཅིའི་ཕྱིར་དབང་ཐང་སྦྱིན་ཞེས་དེ་རྣམས་ཀྱིས་བཅད་དོ།

བྲམ་ཟེ་དེ་ཕྲག་དོག་གི་ཟིལ་གྱིས་ནོན་པས་བུ་ཡང་སྔགས་ཀྱི་ཚིག་རྣམས་འཛིན་དུ་མ་བཅུག་གོ།

བདེ་བ་ལ་ཆགས་པས་ཁ་ཏོན་ཡང་མ་བྱས་ལ་སྨན་ཡང་སྐམ་དུ་མ་བཅུག་གོ།

དེས་སྔགས་ཀྱི་ཚིག་རྣམས་ནི་བསམས་ན་བརྗེད་སྨན་ནི་མ་བསྐམས་པས་རུལ་བར་གྱུར་ཏོ།

དེ་རྒྱལ་པོའི་ཁབ་ཀྱི་བྲམ་ཟེ་དང་ཁྱིམ་བདག་རྣམས་ལ་སྙིང་ན་ཆེས་ནས།

དེ་རྣམས་ལ་ཀླན་ཀ་བཙལ་བའི་ཕྱིར་མུ་སྟེགས་ཀྱི་གནས་དང་དཀའ་ཐུབ་ཀྱི་ཚལ་དེ་དང་དེ་དག་ཏུ་སོང་ནས་དྲིས་པ།

ཤེས་ལྡན་དག་གང་གིས་གང་བསམས་པ་དང་།

གང་དོན་དུ་གཉེར་བ་དེ་ལ་ཐམས་ཅད་འགྲུབ་པར་འགྱུར་བའི་ཐབས་ལྟ་ཅི་ཡོད།

དེ་ན་ཁ་ཅིག་གིས་སྨྲས་པ།

མེར་ཞུགས་ཤིག །

ཁ་ཅིག་གིས་སྨྲས་པ།

དུག་ཟོ་ཤིག །

ཁ་ཅིག་གིས་སྨྲས་པ།

གཡང་ས་ནས་བདག་ཉིད་མཆོངས་ཤིག །

ཁ་ཅིག་གིས་སྨྲས་པ།

བདག་རང་གི་སྐེ་ལ་ཐག་པ་ཐོགས་ཏེ་ཤིང་གི་ཡལ་ག་ལས་འཕྱང་དུ་ཆུག་ཤིག་ཅེས་ཐམས་ཅད་ཀྱིས་འཆི་བའི་ཐབས་བསྟན་གྱི།

ངེས་པར་འབྱུང་བའི་ཐབས་ནི་མ་ཡིན་པས་དེ་རིམ་གྱིས་འོད་མའི་ཚལ་དུ་སོང་ངོ་།

དེས་དགེ་སློང་ཞིག་མཐོང་ནས་

དྲིས་པ།

འཕགས་པ་གང་གིས་གང་བསམས་པ་དང་།

གང་དོན་དུ་གཉེར་བ་དེ་ཐམས་ཅད་འགྲུབ་པར་འགྱུར་བའི་ཐབས་ལྟ་འགའ་མཆིས་སམ།

དེས་སྨྲས་པ།

བཅོམ་ལྡན་འདས་ལས་རབ་ཏུ་བྱུང་ཤིག །

དེར་ཅི་ཞིག་བགྱི།

དེར་ཇི་སྲིད་འཚོའི་བར་དུ་ཚངས་པར་སྤྱོད་པ་ཡང་སྤྱད་པར་བྱ།

བསམ་གཏན་དང་གདོན་པ་དང་ལྡན་པར་ཡང་གནས་པར་བྱ་སྟེ།

གལ་ཏེ་རེ་ཞིག་མཐོང་བའི་ཆོས་ཉིད་ལ་ཀུན་ཤེས་པ་ཐོབ་ན།

དེ་ནས་དེ་ཉིད་ཁྱོད་ཀྱི་སྡུག་བསྔལ་གྱི་མཐར་ཕྱིན་པ་ཡིན་ནོ།

འོན་ཏེ་སྦྱོར་བའི་ལྷག་མ་དང་བཅས་བཞིན་དུས་བྱེད་ན་གང་བསམས་པ་དང་།

གང་དོན་དུ་གཉེར་བ་དེ་ཐམས་ཅད་འགྲུབ་པར་འགྱུར་རོ།

འཕགས་པ་དེ་ནི་རྔོ་མི་ཐོག་ན།

གཞན་ཡང་ཅུང་ཟད་ཅི་མཆིས།

སངས་རྒྱས་ལ་སོགས་པ་དགེ་སློང་གི་དགེ་འདུན་སྤྱན་དྲོངས་ལ་གདུགས་ཚོད་གསོལ་ཅིག །

དེ་ཡང་རྔོ་མི་ཐོག་ན་གཞན་བསྟན་དུ་གསོལ།

བུམ་པ་བཟང་པོ་ལྟ་བུའི་ཉན་ཐོས་ཆེན་པོ་བཞི་སྤྱན་དྲོངས་ལ་གདུགས་ཚོད་གསོལ་ཏེ་སྨོན་ལམ་ཐོབ་ཤིག་དང་གང་བསམས་པ་དང་།

གང་དོན་དུ་གཉེར་བ་དེ་ཐམས་ཅད་འགྲུབ་བོ།

འཕགས་པ་དེ་ནི་རྔོ་ཐོག་གིས་བགྱིའོ་ཞེས་དེས་བུམ་པ་བཟང་པོ་ལྟ་བུའི་ཉན་ཐོས་ཆེན་པོ་བཞི་སྤྱན་དྲངས་ཏེ།

གདུགས་ཚོད་གསོལ་ནས་སྨོན་ལམ་བཏབ་པ།

དགེ་བའི་རྩ་བ་འདིས་རབ་མཛེས་ཀླུའི་གནས་ནས་བསད་ལ་བདག་དེར་སྐྱེ་ཞིང་དེ་ནས་རྒྱལ་པོའི་ཁབ་ཀྱི་མི་རྣམས་ལ་གནོད་པ་བྱེད་པར་གྱུར་ཅིག་ཅེས་སྨོན་ལམ་བཏབ་བོ།

དེ་ལ་ཆུང་མས་དྲིས་པ།

རྗེའི་སྲས་སྨོན་ལམ་ཇི་ཞིག་བཏབ།

དགེ་བའི་རྩ་བ་འདིས་རབ་མཛེས་ཀླུའི་གནས་ནས་བསད་ལ་བདག་དེར་སྐྱེ་ཞིང་དེ་ནས་རྒྱལ་པོའི་ཁབ་ཀྱི་མི་རྣམས་ལ་གནོད་པ་བྱེད་པར་གྱུར་ཅིག་ཅེས་སྨོན་ལམ་བཏབ་བོ།

ལེགས་ཏེ་བདག་ཀྱང་ཁྱོད་ཀྱི་ཆུང་མར་གྱུར་ཅིག །

བུས་སྨྲས་པ་བདག་ཀྱང་ཁྱོད་ཀྱི་བུར་གྱུར་ཅིག །

དེ་བཞིན་དུ་བུ་མོས་སྨྲས་པ།

བདག་ཀྱང་ཁྱོད་ཀྱི་བུ་མོར་གྱུར་ཅིག །

དེ་བཞིན་དུ་མནའ་མས་སྨྲས་པ།

བདག་ཀྱང་མནའ་མར་གྱུར་ཅིག་ཅེས་བྱས་ནས་དེ་རྣམས་ཁྱིམ་རྙིང་པ་ཞིག་ཏུ་ཞུགས་

ཏེ་ཉལ་བ་དང་སྤྲིན་ཁ་དོག་ལྔ་པ་ལས་ཆར་པ་བབ་སྟེ།

རྩིག་པ་འགྱེལ་བས་ནོན་ཏེ་ཁ་དག་གོ།

ཀླུ་རབ་མཛེས་ཤི་འཕོས་ནས་འཁོར་ཀླུ་དྲུག་ཁྲི་དང་དེར་སྐྱེས་ནས་དེ་ཡང་རབ་མཛེས་ཞེས་བྱ་བར་གྲགས་སོ།

ཆུང་མ་ནི་འཁོར་བྲལ་ཞེས་བྱའོ།

བུ་ནི་རི་བོ་ཅན་ཞེས་བྱའོ།

བུ་མོ་ནི་སེར་བ་ཞེས་བྱའོ།

མནའ་མ་ནི་གློག་ཅེས་བྱའོ།

ཆོས་ཉིད་ཀྱིས་ཀླུའམ་ཀླུའི་བུ་མོ་སྐྱེས་ནས་རིང་པོ་མ་ལོན་པར་གསུམ་དྲན་པར་འགྱུར་ཏེ།

གང་ནས་ཤི་འཕོས་པ་དང་།

གང་དུ་སྐྱེས་པ་དང་།

ལས་གང་གིས་ཡིན་པའོ།

དེས་བལྟས་ན་མི་ལས་ཤི་འཕོས་སོ།

གང་དུ་སྐྱེས་ཤེ་ན།

ཀླུ་རྣམས་སུའོ།

ལས་གང་གིས་ཤེ་ན།

སྨོན་ལམ་གྱི་དབང་གིས་སོ།

ཅིའི་ཕྱིར་སྙམ་ན།

རྒྱལ་པོའི་ཁབ་ཀྱི་མི་རྣམས་ལ་གནོད་པར་བྱ་བའི་ཕྱིར་རོ།

དེས་བསམས་པ།

ཅི་ལོ་ཏོག་ཅི་ལྟ་བ་བཞིན་དུ་སྐྱེས་པ་ལ་བྱས་ན་མི་རྣམས་ཀྱི་སྡུག་བསྔལ་སྐྱེ་བར་འགྱུར་རམ།

འོན་ཏེ་མ་སྐྱེས་པ་རྣམས་ལ་འགྱུར་སྙམ་ན།

དེས་ཇི་ལྟར་སྐྱེས་པ་ལ་བྱས་པ་ལྟར་མ་སྐྱེས་པ་ལ་ནི་དེ་ལྟ་མ་ཡིན་པར་མཐོང་ནས།

དེས་འཁོར་རྣམས་ལ་བསྒོ་བ་ཤེས་ལྡན་དག་ཚུར་ཤེག །

ཡུལ་མ་ག་དྷཱར་དེང་ལ་ཆར་པས་ལོ་ཏོག་ཐམས་ཅད་བསྐྲུན་ཅིག །

དེ་རྣམས་ཀྱིས་ལོ་ཏོག་ཐམས་ཅད་བསྐྲུན་པ་དང་།

དེ་ནས་དྲུག་སྟོང་གི་འཁོར་དང་གཤོལ་མདའ་ཙམ་གྱི་ཆར་གྱི་རྒྱུན་གྱིས་ཇི་ལྟར་ཡུལ་མ་ག་དྷཱར་སོག་མ་ཡང་ཁྱེར་བ་དེ་ལྟ་བུའི་ཆར་གྱི་རྒྱུན་དབབ་པར་བརྩམས་སོ།

དེ་ནས་དེ་དག་ཕན་ཚུན་དུ་སྨྲས་པ།

སོག་མ་ཡང་ཀླུ་འདིས་ཕྲོགས་སོ་ཞེས་དེའི་མིང་སོག་མ་མེད་ཅེས་བྱ་བར་ཐོགས་སོ།།

སྡོམ་ལ།

རྒྱལ་པོའི་ཁབ་དང་ན་ལན་ད།

འོད་མའི་དབྱུག་པ་དམར་བུའི་གྲོང་།

ཆུ་བོ་གང་གཱ་སྤྲིན་བརྩེགས་དང་།

སྒྲ་ཆེན་ཡངས་པ་ཐ་མ་ཡིན།

སངས་རྒྱས་བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ།

གང་གི་ཚེ་གཞོན་ནུ་མ་སྐྱེས་དགྲ་ལྷ་སྦྱིན་གྱིས་སྦད་ནས་ཕ་ཆོས་ཀྱི་རྒྱལ་པོ་ཆོས་དང་ལྡན་པ་བསད་དེ་རང་ཉིད་ཀྱིས་ཅོད་པན་བཅིངས་ནས་རྒྱལ་པོར་ཞུགས་པ་དེའི་ཚེ་དེ་བཅོམ་ལྡན་འདས་ལ་བཀུར་སྟི་མ་ཡིན་

པ་མང་པོ་བྱ་བར་བརྩམས་ཏེ།

དགྲོངས་པ་མན་ཆད་བྱ་བའི་ཕྱིར་གླང་པོ་ཆེ་ནོར་སྐྱོང་དང་ཁྱི་གཏུམ་པོ་ཟ་བ་དག་སྦད་པ་དང་།

དེའི་མ་ལུས་འཕགས་མས་སྨྲས་པ།

བུ་བཅོམ་ལྡན་འདས་ལ་བཀུར་སྟི་མ་ཡིན་པ་མ་བྱེད་ཅིག །

སངས་རྒྱས་བཅོམ་ལྡན་འདས་རྣམས་ནི་བཀུར་སྟི་མ་ཡིན་པས་བསྙེངས་པ་ཡིན་གྱིས།

རྒྱལ་པོའི་ཁབ་ནས་བཞུད་དེ་གནོད་པར་གྱུར་ཏ་རེ།

བཅོམ་ལྡན་འདས་ཀྱི་མཐུས་ཡུལ་ཨང་ག་དང་།

མ་ག་དྷཱ་རྣམས་འབྱོར་ཅིང་ཉམས་དགའ་བ་ཡིན་ནོ།

སྙིང་རྙོག་པ་ཅན་དེས་སྨྲས་པ།

ཅི་གང་ན་བཅོམ་ལྡན་འདས་མེད་པའི་ཡུལ་དེ་དག་ཞིག་པ་དང་སྟོངས་པར་གྱུར་ཏམ།

དེ་མས་ཐམས་ཅད་ཀྱི་ཐམས་ཅད་དུ་བཟློག་ཀྱང་མ་བཏུབ་ནས་བཅོམ་ལྡན་འདས་ཀྱིས་དགོངས་པ།

གཞོན་ནུ་མ་སྐྱེས་དགྲ་འདི་བསོད་ནམས་མ་ཡིན་པ་མང་དུ་སོགས་ཀྱིས་ངས་འདི་གཞི་མེད་པའི་དད་པ་ལ་གཞག་ཏུ་རེ་ཞིག་དེའི་དུས་ལ་མ་བབ་པས་མཉན་ཡོད་དུ་གཤེགས་སོ་སྙམ་ནས།

དེ་ནས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་ཐབས་ཅིག་ཏུ་མཉན་ཡོད་གང་ན་བ་དེར་རྒྱུ་ཞིང་གཤེགས་ཏེ་རིམ་གྱིས་རྒྱུ་ཞིང་གཤེགས་པ་ན་མཉན་ཡོད་དུ་བྱོན་ནས།

མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ།

མཐའི་རྒྱལ་ཕྲན་དག་གིས་བཅོམ་ལྡན་འདས་ལ་མ་སྐྱེས་དགྲས་བཀུར་སྟི་མ་ཡིན་པ་བྱས་པས་དེ་བཀུར་སྟི་མ་ཡིན་པས་བསྙེངས་ནས་རྒྱལ་པོའི་ཁབ་ནས་གཤེགས་ཏེ་མཉན་ཡོད་དུ་བྱོན་ཏོ་ཞེས་ཐོས་ནས།

དེ་དག་འདི་སྙམ་དུ་སེམས་ཏེ།

རེ་ཞིག་རྒྱལ་པོ་སྡིག་ཅན་དེས་ཕ་ཆོས་ཀྱི་རྒྱལ་པོ་ཆོས་དང་ལྡན་པ་བསད་ན།

དེས་ཀྱང་མ་ཆོག་ནས་བཅོམ་ལྡན་འདས་ལྷ་དང་ལྷ་མ་ཡིན་དང་།

མི་རྣམས་ཀྱིས་མཆོད་པ་དེ་ལ་ཡང་བཀུར་སྟི་མ་ཡིན་པ་བྱས་ཏེ།

སངས་རྒྱས་བཅོམ་ལྡན་འདས་རྣམས་ནི་བཀུར་སྟི་མ་ཡིན་པས་བསྙེངས་པ་ཡིན་པས།

དེས་ན་བཅོམ་ལྡན་འདས་རྒྱལ་པོའི་ཁབ་ནས་གཤེགས་ཏེ་མཉན་ཡོད་དུ་བྱོན་པར་གྱུར་པས་དེ་ཡོང་ཡེ་རྒྱལ་སྲིད་ལས་དབྱུང་བར་བྱའོ་སྙམ་ནས་དེ་དག་གིས་ཕན་ཚུན་ཕོ་ཉས་བཟླུགས་ནས་བློ་གྲོས་གཅིག་ཏུ་བྱས་ཏེ་དཔུང་གི་ཚོགས་ཡན་ལག་བཞི་པ་གོ་བསྐོན་པ་གླང་པོ་ཆེའི་ཚོགས་དང་།

རྟ་པའི་ཚོགས་དང་།

ཤིང་རྟའི་ཚོགས་དང་།

དཔུང་བུ་ཆུང་གི་ཚོགས་དང་།

རྒྱལ་པོའི་ཁབ་ཏུ་དོང་སྟེ།

ལོ་བཅོམ་ནས་ཕྲུ་མར་བསྐོར་ཏེ་འཁོད་དོ།

ཀླུའི་རྒྱལ་པོ་སོག་མ་མེད་ཀྱིས་ཀྱང་སེར་བའི་རྒྱུན་ཕབ་པས་ལོ་ཏོག་ལྷག་མ་རྣམས་མ་རུང་བར་བྱས་སོ།

དཀའ་ཐུབ་ཀྱི་ཆུ་ལྔ་བརྒྱ་དང་།

ཆུ་མིག་དང་།

མཚོ་དང་།

མཚེའུ་རྣམས་སྐམས་ལ་ཐུག་པས་མུ་གེ་བྱུང་བར་གྱུར་ཏོ།

ཆུ་ལྷག་མ་གཞན་དག་ཀྱང་མཐའི་རྒྱལ་ཕྲན་དག་གིས་མ་རུང་བར་བྱས་སོ།

དེ་ནས་མ་སྐྱེས་དགྲ་སྡུག་བསྔལ་མི་བཟད་པ་ཉམ་ང་བར་གྱུར་པ་ལ་མི་མ་ཡིན་པ་དག་གིས་གླགས་རྙེད་དེ།

རྨ་ལ་ཐལ་བ་བཏབ་པ་ལྟར་མི་ངས་བྱུང་སྟེ།

ཁྱོགས་དང་ཁྱོགས་འདྲུད་པར་གྱུར་ཏོ།

དེ་ནས་རྒྱལ་པོ་མ་སྐྱེས་དགྲ་གནོད་པ་བརྒྱ་ཕྲག་དུ་མས་སྙིང་དཀྲུགས་པས་ལག་པ་འགྲམ་པ་ལ་གཏད་དེ་སེམས་ཁོང་དུ་ཆུད་ཅིང་འདུག་གོ།

དེ་ནས་ལུས་འཕགས་མས་སྨྲས་པ།

བུ་ཅིའི་ཕྱིར་སེམས་ཁོང་དུ་ཆུད།

ཡུམ་གནོད་པ་བརྒྱ་ཕྲག་དུ་མ་དག་བྱུང་བར་གྱུར་ཏོ།

བུ་ཁོ་མོས་སྔར་ཁྱོད་ལ་བཅོམ་ལྡན་འདས་ལ་བཀུར་སྟི་མ་ཡིན་པ་མ་བྱེད་ཅིག།

འདུལ་བ་གཞི།

བམ་པོ་ཉི་ཤུ་དྲུག་པ།

སངས་རྒྱས་བཅོམ་ལྡན་འདས་རྣམས་ནི་བཀུར་སྟི་མ་ཡིན་པས་བསྙེངས་པ་ཡིན་གྱིས།

བཅོམ་ལྡན་འདས་རྒྱལ་པོའི་ཁབ་ནས་བཞུད་དེ་གནོད་པར་གྱུར་ཏ་རེ་ཞེས་མ་སྨྲས་སམ།

དེ་ནི་འདི་ཡིན་ནོ།

ཡུམ་དེ་ལ་ཇི་ལྟར་བསྒྲུབ་པར་བགྱི།

བུ་བཅོམ་ལྡན་འདས་ལ་བཟོད་པར་གསོལ་ཅིག །

ཡུམ་བཅོམ་ལྡན་འདས་ཀྱི་སྤྱན་སྔར་མཆིས་པའི་རྔོ་མི་ཐོག་ལགས་སོ།

བུ་ཁྱོད་ཀྱིས་སངས་རྒྱས་བཅོམ་ལྡན་འདས་རྣམས་ནི་ཙན་དན་དང་སྟེའུར་མཉམ་པ་ཁོང་ཁྲོ་བ་དང་རྗེས་སུ་ཆགས་པ་སྤངས་པ་ཡིན་ནོ་ཞེས་མ་ཐོས་སམ།

གལ་ཏེ་འགའ་ཞིག་གིས་བཅོམ་ལྡན་འདས་ཀྱི་ཕྱག་དཔུང་པ་གཅིག་ལ་སྟེའུ་ཡིས་བཞོག་པར་བྱེད་ལ།

ཅིག་ཤོས་ལ་ཙན་དན་ས་མཆོག་གིས་ཉུག་པར་བྱེད་ན།

དེ་ལ་བཅོམ་ལྡན་འདས་རྗེས་སུ་ཆགས་པ་ཡང་མི་མངའ།

ཁོང་ཁྲོ་བ་ཡང་མི་མངའོ།

དེ་ནས་ལུས་འཕགས་མའི་བུ་རྒྱལ་པོ་མ་སྐྱེས་དགྲས་

མི་ཞིག་ལ་སྨྲས་པ།

ཀྱེ་ནང་རྗེ་ཚུར་ཤོག །

ཁྱོད་བཅོམ་ལྡན་འདས་གང་ན་བ་དེར་སོང་ལ།

སོན་ནས་ཁོ་བོའི་ཚིག་གིས་བཅོམ་ལྡན་འདས་ཀྱི་ཞབས་གཉིས་ལ་སྤྱི་བོས་ཕྱག་བྱས་ཏེ་གནོད་པ་ཆུང་ངམ།

ཉམ་ང་བ་ཉུང་ངམ།

བསྐྱོད་པ་ཡང་ངམ།

འཚོའམ།

གནོད་པ་མི་མངའ་འམ།

སྟོབས་དང་བདེ་བ་ལ་རེག་པར་བཞུགས་སམ་ཞེས་སྙུན་གསོལ་ལ་འདི་སྐད་ཅེས་ཀྱང་གསོལ་ཅིག །

བཙུན་པ་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲའི་མཆིད་ནས་བཙུན་པ་བུ་ངན་པ་ནི་མཆིས་ཀྱི་ཕ་ངན་པ་ནི་མ་མཆིས་པས་བཅོམ་ལྡན་འདས་ཐུགས་བརྩེ་བ་ཉེ་བར་བཟུང་སྟེ་རྒྱལ་པོའི་ཁབ་ཏུ་གཤེགས་པར་གསོལ།

གལ་ཏེ་བཅོམ་ལྡན་འདས་མ་གཤེགས་ན་རིང་པོ་མི་ཐོགས་པ་ཁོ་ནར་རྒྱལ་པོའི་ཁབ་ཀྱི་གྲོང་ཁྱེར་སྟོངས་ཏེ་མིང་ལུས་པར་འགྱུར་རོ་ཞེས་གསོལ་ཅིག །

ལྷ་བཀའ་བཞིན་འཚལ་ཞེས་མི་དེས་མ་ག་དྷཱའི་རྒྱལ་པོ་མ་སྐྱེས་དགྲའི་ལྟར་མཉན་ནས་ཆས་ཏེ་རིམ་གྱིས་མཉན་ཡོད་དུ་ཕྱིན་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་།

བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ།

ཕྱོགས་གཅིག་ཏུ་འདུག་ནས་མི་དེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཙུན་པ་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ།

གནོད་པ་ཆུང་ངམ།

ཉམ་ང་བ་ཉུང་ངམ་ཞེས་བྱ་བ་ནས་རེག་པར་བཞུགས་སམ་ཞེས་སྙུན་གསོལ་ལགས་སོ་ཞེས་བྱ་བའི་བར་གོང་མ་བཞིན་དུའོ།

ཀྱེ་མི་ཁྱོད་དང་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་བདེ་བར་གྱུར་ཅིག །

བཙུན་པ་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲའི་མཆིད་ནས་བཙུན་པ་བུ་ངན་པ་ནི་མཆིས་ཀྱི་ཕ་ངན་པ་ནི་མ་མཆིས་པས་བཅོམ་ལྡན་འདས་ཐུགས་བརྩེ་བ་ཉེ་བར་བཟུང་སྟེ་རྒྱལ་པོའི་ཁབ་ཏུ་གཤེགས་སུ་གསོལ།

གལ་ཏེ་བཅོམ་ལྡན་འདས་མ་གཤེགས་ན་ཞེས་བྱ་བ་ནས་མིང་ལུས་པར་འགྱུར་རོ།

ཞེས་བྱ་བའི་བར་གོང་མ་བཞིན་དུའོ།

བཅོམ་ལྡན་འདས་ཅང་མི་གསུང་བས་མི་དེ་ལ་གནང་ངོ་།

དེ་ནས་མི་དེས་བཅོམ་ལྡན་འདས་ཅང་

མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་།

དེ་ནས་བཅོམ་ལྡན་འདས་ཇི་སྲིད་བཞེད་ཀྱི་བར་དུ་མཉན་ཡོད་དུ་བཞུགས་ནས་ཉན་ཐོས་ཀྱི་དགེ་འདུན་དང་ཐབས་ཅིག་ཏུ་རྒྱལ་པོའི་ཁབ་གང་ན་བ་དེར་རྒྱུ་ཞིང་གཤེགས་ཏེ།

རིམ་གྱིས་རྒྱུ་ཞིང་གཤེགས་པ་ན་ཡུལ་མ་ག་དྷཱར་བྱོན་ཏོ།

བཅོམ་ལྡན་འདས་ཀྱི་མཐུས་རླུང་གཏོང་བའི་ལྷའི་བུ་རྣམས་ཀྱིས་ནི་དུག་གིས་མ་རུང་བར་བྱས་པའི་ཆུ་དེ་དག་བསྐམས་སོ།

ཆར་པ་འབེབས་པའི་ལྷའི་བུ་རྣམས་ཀྱིས་ནི་ཡན་ལག་བརྒྱད་དང་ལྡན་པའི་ཆུས་བཀང་ངོ་།

ལྷ་རྣམས་ནི་ཆར་པ་འབེབས་པ་ལ་ཞུགས་སོ།

སངས་རྒྱས་ལ་མངོན་པར་དད་པའི་ལྷ་རྣམས་ཀྱིས་ནི་རྒྱལ་པོའི་ཁབ་ནས་མི་མ་ཡིན་པ་རྣམས་བསྐྲད་ནས་མི་ངས་ཞི་བར་གྱུར་ཏོ།

མཐའི་རྒྱལ་ཕྲན་དག་གིས་ནི་བཅོམ་ལྡན་འདས་གཤེགས་པ་མཐོང་ནས་གྲོང་ཁྱེར་བསྐོར་བ་བཏང་སྟེ་དོང་ངོ་།

ཚོང་པ་རྣམས་ཀྱིས་ནི་ཟོང་དག་བཀྲམ་མོ།

བཟོ་ཕལ་པ་གཞན་དག་གིས་ནི་རང་རང་བྱེད་པར་བརྩམས་སོ།

ཡུལ་སོ་སོ་ན་གནས་པའི་ཚོང་པ་རྣམས་དང་།

དེད་དཔོན་རྣམས་ནི་ཟོང་དང་འཇུག་པར་བརྩམས་སོ།

ལོ་ནི་ལེགས་པར་གྱུར་ཏོ།

ལམ་པོ་ཆེ་དང་སྲང་དང་།

སུམ་མདོ་དང་།

བཞི་མདོ་རྣམས་སུ་ནི་བཅོམ་ལྡན་འདས་ཀྱི་བདག་ཉིད་ཆེན་པོ་སྒྲོགས་པར་གྱུར་ཏོ།

མུ་སྟེགས་པ་རྣམས་ནི་བག་འཁུམས་པར་གྱུར་ཏོ།

སྐྱེ་བོའི་ཚོགས་རྣམས་ནི་རབ་ཏུ་དགའ་བར་གྱུར་ཏོ།

ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲས་བཅོམ་ལྡན་འདས་ཡུལ་མ་ག་དྷཱར་གཤེགས་སོ་ཞེས་ཐོས་སོ།

ཐོས་ནས་ཀྱང་སྙིང་དགའ་བ་དང་།

མགུ་བ་དང་།

རབ་ཏུ་དགའ་བ་དང་།

དགའ་བ་རྒྱ་ཆེན་པོ་དང་།

ཡིད་བདེ་བ་སྐྱེས་ནས་བློན་པོ་རྣམས་ལ་སྨྲས་པ།

ཤེས་ལྡན་དག་དེང་ལ་བཅོམ་ལྡན་འདས་ཀྱི་ཕྱིར་དཔག་ཚད་ཕྱེད་དང་གསུམ་གྱི་ལམ་བསྟར་བ་དང་།

གྲོང་ཁྱེར་དག་བཟང་པོར་བྱོས་ཤིག །

རྒྱལ་པོའི་ཁབ་ཀྱི་གྲོང་ཁྱེར་ཐམས་ཅད་ཀྱང་རྡོ་བ་དང་།

གསེག་མ་དང་།

གྱོ་མོ་སོལ་ཏེ་ཙན་དན་གྱི་ཆུས་ཆག་ཆག་ཐོབ་ལ་དར་གྱི་ཆུན་འཕྱང་མང་པོ་དཔྱོངས་ཤིག །

དྲི་ཞིམ་པོའི་པོག་ཕོར་དག་ཤོམས་ལ།

གདུགས་དང་།

རྒྱལ་མཚན་དག་ཚུགས་ཤིག །

བར་བར་དུ་མེ་ཏོག་གི་གཞལ་མེད་ཁང་མཛེས་པ་དག་བྱོས་ཤིག །

ལྷ་བཀའ་བཞིན་འཚལ་ཞེས་བློན་པོ་རྣམས་ཀྱིས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲའི་ལྟར་མཉན་ནས་ཐམས་ཅད་རྒྱས་པར་བྱེད་དུ་བཅུག་གོ།

དེ་ནས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་རྒྱལ་པོ་ཆེན་པོའི་འབྱོར་པ་དང་།

རྒྱལ་པོ་ཆེན་པོའི་མཐུས་བདག་ཉིད་དཔུང་གི་ཚོགས་ཡན་ལག་བཞི་དང་བསུར་སོང་ངོ་།

དེ་ནས་བཅོམ་ལྡན་འདས་དུལ་བ་འཁོར་དུལ་བ།

ཞི་བ་འཁོར་ཞི་བ་གྲོལ་བ་འཁོར་གྲོལ་བ།

དབུགས་ཕྱིན་པ་འཁོར་དབུགས་ཕྱིན་པ།

རྣམ་པར་དུལ་བ་འཁོར་རྣམ་པར་དུལ་བ།

དགྲ་བཅོམ་པ་འཁོར་དགྲ་བཅོམ་པ།

འདོད་ཆགས་དང་བྲལ་བ་འཁོར་འདོད་ཆགས་དང་བྲལ་བ།

མཛེས་པ་འཁོར་མཛེས་པ།

ཁྱུ་མཆོག་བ་གླང་གི་ཚོགས་ཀྱིས་བསྐོར་བ་ལྟ་བུ།

གླང་པོ་ཆེ་གླང་པོ་ཆེའི་ཕྲུ་གུའི་ཚོགས་ཀྱིས་བསྐོར་བ་ལྟ་བུ།

སེང་གེ་མཆེ་བ་ཅན་གྱི་ཚོགས་ཀྱིས་བསྐོར་བ་ལྟ་བུ།

ངང་པའི་རྒྱལ་པོ་ངང་པའི་ཚོགས་ཀྱིས་བསྐོར་བ་ལྟ་བུ།

ནམ་མཁའ་ལྡིང་འདབ་ཆགས་ཀྱི་ཚོགས་ཀྱིས་བསྐོར་བ་ལྟ་བུ།

བྲམ་ཟེ་སློབ་མའི་ཚོགས་ཀྱིས་བསྐོར་བ་ལྟ་བུ།

སྨན་པ་མཁས་པ་ནད་པའི་ཚོགས་ཀྱིས་བསྐོར་བ་ལྟ་བུ།

དཔའ་བོ་དམག་མིའི་ཚོགས་ཀྱིས་བསྐོར་བ་ལྟ་བུ།

ལམ་མཁན་འགྲོན་པོའི་ཚོགས་ཀྱིས་བསྐོར་བ་ལྟ་བུ།

དེད་དཔོན་ཚོང་པའི་ཚོགས་ཀྱིས་བསྐོར་བ་ལྟ་བུ།

ཚོང་དཔོན་རང་གི་སྐྱེ་བོས་བསྐོར་བ་ལྟ་བུ།

རྒྱལ་ཕྲན་བློན་པོའི་ཚོགས་ཀྱིས་བསྐོར་བ་ལྟ་བུ།

འཁོར་ལོས་སྒྱུར་བ་བུ་སྟོང་གིས་བསྐོར་བ་ལྟ་བུ།

ཟླ་བ་རྒྱུ་སྐར་གྱི་ཚོགས་ཀྱིས་བསྐོར་བ་ལྟ་བུ།

ཉི་མ་འོད་ཟེར་སྟོང་གིས་བསྐོར་བ་ལྟ་བུ།

ཡུལ་འཁོར་སྐྱོང་དྲི་ཟའི་ཚོགས་ཀྱིས་བསྐོར་བ་ལྟ་བུ།

ལུས་འཕགས་པོ་གྲུལ་བུམ་གྱི་ཚོགས་ཀྱིས་བསྐོར་བ་ལྟ་བུ།

མིག་མི་བཟད་ཀླུའི་ཚོགས་ཀྱིས་བསྐོར་བ་ལྟ་བུ།

ནོར་སྦྱིན་གནོད་སྦྱིན་གྱི་ཚོགས་ཀྱིས་བསྐོར་བ་ལྟ་བུ།

ཐགས་ཟངས་རིས་ལྷ་མ་ཡིན་གྱི་ཚོགས་ཀྱིས་བསྐོར་བ་ལྟ་བུ།

བརྒྱ་བྱིན་སུམ་བཅུ་རྩ་གསུམ་པའི་ཚོགས་ཀྱིས་

བསྐོར་བ་ལྟ་བུ།

ཚངས་པ་ཚངས་རིས་ཀྱི་ཚོགས་ཀྱིས་བསྐོར་བ་ལྟ་བུ།

རྒྱ་མཚོ་མི་གཡོ་བ་ལྟ་བུ།

སྤྲིན་ཆུ་དང་བཅས་པ་ལྟ་བུ།

གླང་པོ་ཆེ་དམ་པ་རྒྱགས་པ་དང་བྲལ་བ་ལྟར་དབང་པོ་རྣམས་ཤིན་ཏུ་དུལ་བས་མ་གཡེངས་པའི་སྤྱོད་ལམ་གྱི་སྤྱོད་པ་ཅན།

སྐུ་སྐྱེས་བུ་ཆེན་པོའི་མཚན་སུམ་བཅུ་རྩ་གཉིས་ཀྱིས་ཀུན་ནས་བརྒྱན་པ།

དཔེ་བྱད་བཟང་པོ་བརྒྱད་བཅུས་མཛེས་པར་བྱས་པ།

སྐུ་འོད་འདོམ་གང་གིས་བརྒྱན་པ།

ཉི་མ་སྟོང་གི་འོད་ཟེར་བས་ལྷག་པ།

རིན་པོ་ཆེའི་རི་བོ་འགྲོ་བ་ལྟར་ཀུན་ནས་མཛེས་པ།

སྟོབས་བཅུ་དང་།

མི་འཇིགས་པ་བཞི་དང་།

མ་འདྲེས་པ་གསུམ་དང་།

དྲན་པ་ཉེ་བར་གཞག་པ་དང་།

ཐུགས་རྗེ་ཆེན་པོ་དང་ལྡན་པ།

དགེ་སློང་གི་དགེ་འདུན་རབ་ཏུ་མང་པོ་དང་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་དང་།

ལྷ་བརྒྱ་སྟོང་ཕྲག་དུ་མས་ཞམ་རིང་བྱས་ཏེ་རྒྱལ་པོའི་ཁབ་ཀྱི་གྲོང་ཁྱེར་དུ་གཤེགས་སོ།

གང་གི་ཚེ་བཅོམ་ལྡན་འདས་རྒྱལ་པོའི་ཁབ་ཏུ་ཞུགས་ཏེ།

མངོན་པར་འདུ་བྱེད་པ་དང་བཅས་པས་གྲོང་ཁྱེར་གྱི་སྒོའི་ཐེམ་པ་ལ་ཞབས་གཡས་པས་མནན་པ་དེའི་ཚེས་རྣམ་པ་དྲུག་ཏུ་གཡོས་པར་གྱུར་ཏེ།

ས་ཆེན་པོ་འདི་གཡོས།

རབ་ཏུ་གཡོས།

ཀུན་དུ་རབ་ཏུ་གཡོས།

ལྡེག་རབ་ཏུ་ལྡེག །

ཀུན་དུ་རབ་ཏུ་ལྡེག་ཅིང་།

ཤར་ཕྱོགས་མཐོ་ན་ནུབ་ཕྱོགས་དམའ།

ནུབ་ཕྱོགས་མཐོ་ན་ཤར་ཕྱོགས་དམའ།

ལྷོ་ཕྱོགས་མཐོ་ན་བྱང་ཕྱོགས་དམའ།

བྱང་ཕྱོགས་མཐོ་ན་ལྷོ་ཕྱོགས་དམའ།

མཐའ་མཐོ་ན་དབུས་དམའ།

དབུས་མཐོ་ན་མཐའ་དམའ་བར་གྱུར་ཏོ།

འཇིག་རྟེན་འདི་འཇིག་རྟེན་གྱི་བར་དང་བཅས་པ་ཐམས་ཅད་ཀྱང་སྣང་བ་རྒྱ་ཆེན་པོས་གསལ་བར་གྱུར་ཏོ།

ལྷས་ཀྱང་བར་སྣང་ལ་རྔ་དག་བརྡུངས་སོ།

ནམ་མཁའ་ལ་གནས་པའི་ལྷ་རྣམས་ཀྱིས་ནི་བཅོམ་ལྡན་འདས་ཀྱི་སྟེང་ནས་ལྷའི་མེ་ཏོག་ཨུཏྤ་ལ་དང་།

པད་མ་དང་།

ཀུ་མུ་ད་དང་།

པད་མ་དཀར་པོ་དང་།

ཨ་ག་རུའི་ཕྱེ་མ་དང་།

རྒྱ་སྤོས་ཀྱི་ཕྱེ་མ་དང་།

གུར་ཀུམ་གྱི་ཕྱེ་མ་དང་།

ཏ་མ་ལའི་ལོ་མའི་ཕྱེ་མ་དང་།

ལྷའི་མེ་ཏོག་མན་དཱ་ར་བ་

དང་།

གོས་དག་འཐོར་བར་བྱེད་དེ།

བཅོམ་ལྡན་འདས་གྲོང་ཁྱེར་དུ་གཤེགས་པ་ན་དེ་ལྟ་བུའི་ཡ་མཚན་དག་བྱུང་བར་གྱུར་ཏོ།

གཞན་ཡང་དོག་པ་དག་ནི་ཡངས་པར་གྱུར་ཏོ།

དམའ་བ་དག་ནི་མཐོ་བར་གྱུར་ཏོ།

མཐོ་བ་དག་ནི་ཕྱ་ལེ་བར་གྱུར་ཏོ།

གླང་པོ་ཆེ་དག་ནི་སྐད་འབྱིན་པར་གྱུར་ཏོ།

རྟ་དག་ཀྱང་སྐད་འབྱིན་པར་གྱུར་ཏོ།

ཁྱུ་མཆོག་དག་ཀྱང་སྐད་འབྱིན་པར་གྱུར་ཏོ།

ཁྱིམ་གྱི་ནང་ན་བཞག་པའི་སྣོད་སྣ་ཚོགས་དག་ནི་མ་བརྡུངས་པར་རང་སྒྲ་འབྱིན་པར་གྱུར་ཏོ།

ལོང་བ་རྣམས་ཀྱིས་ནི་མིག་ཐོབ་པར་གྱུར་ཏོ།

འོན་པ་རྣམས་ནི་རྣ་བས་ཐོས།

ལྐུགས་པ་རྣམས་ནི་སྨྲ་ནུས་པར་གྱུར་ཏོ།

དབང་པོ་ལྷག་མ་མ་ཚང་བ་རྣམས་ནི་དབང་པོ་སོ་སོར་ཐོབ་པར་གྱུར་ཏོ།

ཆང་གིས་མྱོས་པ་རྣམས་ནི་མྱོས་པ་དང་བྲལ་བར་གྱུར་ཏོ།

དུག་འཐུངས་པ་དག་ནི་དུག་ཞི་བར་གྱུར་ཏོ།

ཕན་ཚུན་ཁོན་བྱུང་བ་རྣམས་ནི་མཛའ་བར་གྱུར་ཏོ།

སྦྲུམ་པ་དག་ནི་བདེ་བར་བཙས་པར་གྱུར་ཏོ།

བཙོན་དུ་བཅིངས་པ་དག་ནི་ཐར་བར་གྱུར་ཏོ།

ནོར་མེད་པ་དག་ནི་ནོར་རྙེད་པར་གྱུར་ཏོ།

དེ་ལྟ་བུའི་འབྱོར་པ་དེ་མཐོང་ནས་དགེ་བསྙེན་ཞིག་གིས་ཚིགས་སུ་བཅད་དེ་སྨྲས་པ།

ཡུལ་གང་ཞིག་ཏུ་འཇིག་རྟེན་གཙོ་བོ་གཤེགས་པ་དེར།

ལོ་ཉེས་མི་ངས་དང་ནི་ཕྱི་དགྲའི་འཇིགས་པ་མེད།

ལྷ་རྣམས་ཆར་འབེབས་སྐྱེ་བོ་བསོད་ནམས་རབ་ཏུ་བྱེད།

དེར་ནི་ཡ་མཚན་བརྒྱ་ཕྲག་གཞན་ཡང་འབྱུང་བར་འགྱུར།

དེ་ནས་བཅོམ་ལྡན་འདས་རྒྱལ་པོའི་ཁབ་ཏུ་ཞུགས་ཏེ།

སྐྱེ་བོའི་ཚོགས་དབུགས་ཕྱུང་ནས་རྒྱལ་པོའི་ཁབ་ནས་བྱུང་སྟེ་འོད་མའི་ཚལ་དུ་གཤེགས་སོ།

དེ་ནས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས།

བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ།

ཕྱོགས་གཅིག་ཏུ་འདུག་པ་དང་།

བཅོམ་ལྡན་འདས་ཀྱིས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད།

ཡང་དག་པར་འཛིན་དུ་འཇུག་པར་མཛད།

ཡང་དག་པར་གཟེངས་སྟོད་པར་མཛད་ཅེས་བྱ་བ་

ནས་ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་ཞེས་བྱ་བའི་བར་གོང་མ་བཞིན་དུའོ།

དེ་ནས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་བསྟོད་དེ་རྗེས་སུ་ཡི་རངས་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས།

བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ།

བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ལ་བདག་གིས་དགུང་ཟླ་གསུམ་དུ་ན་བཟའ་ཆོས་གོས་དང་།

བསོད་སྙོམས་དང་།

གཟིམས་ཆ་དང་།

སྙུན་དཔྱད་ཀྱི་རྐྱེན་སྨན་དང་།

ཡོ་བྱད་རྣམས་འདུལ་ཞིང་མཆིས་ན་གནང་བར་མཛད་དུ་གསོལ།

བཅོམ་ལྡན་འདས་ཀྱིས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་ལ་ཅང་མི་གསུང་བས་གནང་ངོ་།

དེ་ནས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲས་བཅོམ་ལྡན་འདས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་སྟན་ལས་ལངས་ཏེ་སོང་ངོ་།

བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲས་ཟླ་བ་གསུམ་དུ་ན་བཟའ་ཆོས་གོས་དང་།

བསོད་སྙོམས་དང་།

གཟིམས་ཆ་དང་།

སྙུན་དཔྱད་ཀྱི་རྐྱེན་སྨན་དང་།

ཡོ་བྱད་རྣམས་ཀྱིས་བསྙེན་བཀུར་བྱས་སོ།

དེ་ནས་སངས་རྒྱས་ལ་མངོན་པར་དགའ་བའི་ལྷ་རྣམས་ཀྱིས་མི་ངས་དེ་བསྐྲད་ནས་རྒྱལ་པོའི་ཁབ་ནས་བྱུང་ནས་སྒྲ་སྒྲོགས་ཞེས་བྱ་བའི་ནང་དུ་བྱུང་སྟེ།

ཡངས་པ་ཅན་དུ་འདུག་ནས།

ཡངས་པ་ཅན་གྱི་སྐྱེ་བོའི་ཚོགས་ལ་མི་ངས་བྱུང་བར་གྱུར་ཏེ།

ཁྱོགས་དང་ཁྱོགས་འདྲུད་པར་གྱུར་ཏོ།

ཡངས་པ་ཅན་ན་བྲམ་ཟེ་མདུན་ན་འདོན་མདའ་བོ་ཆེ་ཞེས་བྱ་བ་ཞིག་གནས་པ་དེའི་རྨི་ལམ་ན་ཡངས་པ་ཅན་ན་གནས་པའི་ལྷ་ཞིག་གིས་སྨྲས་པ།

གལ་ཏེ་མི་འདུལ་ཁ་ལོ་སྒྱུར་བའི་མཆོག །

ཤཱཀྱའི་རིགས་དག་པ་ཡི་བཅོམ་ལྡན་འདས།

ཡངས་པ་ཅན་དུ་གཤེགས་པར་གྱུར་ན་ནི།

གནོད་པ་རྣམས་ནི་རྣམ་པར་འཇིག་པར་འགྱུར།

དེས་ནམ་ནངས་ནས་ཡངས་པ་ཅན་གྱི་ལིཙྪ་བཱི་རྣམས་ལ་སྨྲས་པ།

ཤེས་ལྡན་དག་བདག་གིས་རྨི་ལམ་འདི་འདྲ་བ་ཞིག་མཐོང་ངོ་།

དེ་རྣམས་ཀྱིས་སྨྲས་པ།

ཤེས་ལྡན་དག་དེ་ལ་ཇི་ལྟར་བསྒྲུབ་པར་བྱ།

བཅོམ་ལྡན་འདས་ཀྱི་སྤྱན་སྔར་ཕོ་ཉ་སུ་ཞིག་གཏང་ཞེས་ཕན་ཚུན་བགྲོ་བར་བརྩམས་པ་དང་།

མདུན་ན་འདོན་མདའ་བོ་ཆེ་འདི་ཉིད་ཐམས་ཅད་དུ་ནུས་པ་ཡིན་ལ།

བདག་ཅག་ལ་ཡང་བྱམས་པ་ཡིན་གྱིས་གཏང་ངོ་།

དེ་ལ་དེ་དག་གིས་སྨྲས་པ།

བཅོམ་ལྡན་འདས་གང་ན་བ་དེར་སོང་ལ་ཕྱིན་ནས་བདག་ཅག་གི་ཚིག་གིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱོས་ལ།

གནོད་པ་ཆུང་ངམ།

ཉམ་ང་བ་ཉུང་ངམ་ཞེས་བྱ་བ་ནས་སྙུན་གསོལ་ལ་ཞེས་བྱ་བའི་བར་གོང་མ་བཞིན་དུའོ།

འདི་སྐད་ཅེས་ཀྱང་གསོལ་ཅིག །

བཙུན་པ་ཡངས་པ་ཅན་གྱི་ཚོགས་ཀྱི་མཆིད་ནས་བཅོམ་ལྡན་འདས་ཡངས་པ་ཅན་དུ་གཤེགས་སུ་གསོལ།

གལ་ཏེ་བཅོམ་ལྡན་འདས་ཡངས་པ་ཅན་དུ་མ་གཤེགས་ན་རིང་པོར་མི་ཐོགས་པ་ཁོ་ནར་ཡངས་པ་ཅན་སྟོངས་ཤིང་མིང་ལུས་པར་འགྱུར་རོ་ཞེས་གསོལ་ཅིག །

དེས་སྨྲས་པ།

ཤེས་ལྡན་དག་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་ནི་ཁྱེད་ལ་ཡུན་རིང་དུ་གནོད་པ་བྱེད་པ་ཕྱིར་རྒལ་བ་དགྲ་བོར་གྱུར་པ་ཡིན་པས་བདག་ལ་གནོད་པ་བྱེད་པར་མི་འགྱུར་གྲང་།

དེ་དག་གིས་ཚིགས་སུ་བཅད་དེ་སྨྲས་པ།

ཡུལ་འཁོར་གཞན་ཡང་འགྱེད་པར་ཡང་།

ཕོ་ཉ་མི་གསོད་ཅེས་གྲག་ན།

ཁྱོད་ནི་རྒྱལ་བའི་ཕོ་ཉ་ཡིན།

ཀུན་གྱིས་མི་གསོད་སྨོས་ཅི་དགོས།

དེ་ནས་མདུན་ན་འདོན་མདའ་བོ་ཆེ་དགེ་མཚན་དང་བཀྲ་ཤིས་དང་བདེ་ལེགས་སུ་འགྱུར་བ་དག་བྱས་ཏེ།

རིམ་གྱིས་རྒྱལ་པོའི་ཁབ་ཏུ་ཕྱིན་ནས་དེ་ལམ་གྱིས་དུབ་པ་བསལ་ཏེ།

བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས།

བཅོམ་ལྡན་འདས་དང་ལྷན་ཅིག་མངོན་དུ་ཡང་དག་པར་དགའ་བར་འགྱུར་བ་དང་།

ཡང་དག་པར་མགུ་བར་འགྱུར་བའི་གཏམ་རྣམ་པ་སྣ་ཚོགས་བྱས་ནས་ཕྱོགས་གཅིག་ཏུ་འདུག་གོ།

ཕྱོགས་གཅིག་ཏུ་འདུག་ནས་མདུན་ན་འདོན་མདའ་བོ་ཆེས་

བཅོམ་ལྡན་འདས་ལ་འདི་སྐད་ཅེས་གསོལ་ཏོ།

ཀྱེ་གཽ་ཏ་མ་ཡངས་པ་ཅན་གྱི་ཚོགས་བཅོམ་ལྡན་འདས་གཽ་ཏ་མའི་ཞབས་གཉིས་ལ་མགོ་བོས་ཕྱག་འཚལ་ཏེ།

གནོད་པ་ཆུང་ངམ།

ཉམ་ང་བ་ཉུང་ངམ།

བསྐྱོད་པ་ཡང་ངམ།

འཚོ་འམ།

གནོད་པ་མ་མཆིས་སམ།

སྟོབས་དང་བདེ་བ་ལ་རེག་པར་སྤྱོད་དམ་ཞེས་སྙུན་གསོལ་ལགས་སོ།

མདའ་བོ་ཆེ་ཁྱོད་དང་ཡངས་པ་ཅན་གྱི་ཚོགས་བདེ་བར་གྱུར་ཅིག །

ཀྱེ་གཽ་ཏ་མ་ཡངས་པ་ཅན་གྱི་ཚོགས་ཀྱི་མཆིད་ནས་བཅོམ་ལྡན་འདས་ཡངས་པ་ཅན་དུ་གཤེགས་སུ་གསོལ།

གལ་ཏེ་བཅོམ་ལྡན་འདས་ཡངས་པ་ཅན་དུ་མ་གཤེགས་ན་རིང་པོ་མི་ཐོགས་པ་ཁོ་ནར་ཡངས་པ་ཅན་སྟོངས་ཤིང་མིང་ཙམ་ལུས་པར་འགྱུར་རོ་ཞེས་མཆིའོ།

བཅོམ་ལྡན་འདས་ཀྱིས་བཀའ་སྩལ་པ།

མདའ་བོ་ཆེ་འདིར་ང་ཉན་ཐོས་ཀྱི་དགེ་འདུན་དང་ཐབས་ཅིག་ལ་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲས་ཟླ་བ་གསུམ་དུ་ཡོ་བྱད་ཐམས་ཅད་ཀྱིས་བསྟབས་པས་རྒྱལ་པོ་ལ་རྟོགས་ཤིག །

གལ་ཏེ་རྒྱལ་པོས་གནང་ན་ང་དེ་བཞིན་དུ་གཤེགས་པར་བྱའོ།

དེས་ཡངས་པ་ཅན་དུ་བཅོམ་ལྡན་འདས་ནི་འདི་སྐད་ཅེས་གསུང་ངོ་ཞེས་སྤྲིང་ངོ་།

དེ་རྣམས་ཀྱིས་ཀྱང་སྤྲིང་བ་དེ་ཉིད་ཀྱི་ཕྱིར་ཁྱོད་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་གང་ན་བ་དེར་སོང་ལ་སོན་ནས།

བདག་ཅག་གི་ཚིག་གིས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་ལ་གནོད་པ་ཆུང་ངམ།

ཉམ་ང་བ་ཉུང་ངམ།

བསྐྱོད་པ་ཡང་ངམ།

འཚོ་འམ།

གནོད་པ་མ་མཆིས་སམ།

སྟོབས་དང་བདེ་བ་ལ་རེག་པར་གནས་སམ་ཞེས་ཀྱང་དྲིས་ལ་འདི་སྐད་ཅེས།

ལྷ་བཅོམ་ལྡན་འདས་ཡངས་པ་ཅན་དུ་གཤེགས་པར་བཅོམ་ལྡན་འདས་ལ་རྗེས་སུ་གནང་བར་མཛད་དུ་གསོལ།

ལྷས་གལ་ཏེ་བཅོམ་ལྡན་འདས་ལ་རྗེས་སུ་མ་གནང་ན་རིང་པོ་མི་ཐོགས་པ་ཁོ་ནར་ཡངས་པ་ཅན་སྟོངས་ཤིང་མིང་ལུས་པར་འགྱུར་རོ་ཞེས་སྨྲོས་ཤིག །

དེ་ནས་མདུན་ན་འདོན་མདའ་བོ་ཆེས་བསམས་པ།

ཅི་རེ་ཞིག་རྒྱལ་པོ་ལ་བསྙེན་པར་བྱའམ།

འོན་ཏེ་བློན་པོ་རྣམས་

ལ་བྱ་སྙམ་དུ་བསམས་པ་དང་།

དེ་འདི་སྙམ་དུ་སེམས་ཏེ།

འགའ་ཞིག་གི་དངགས་ལས་བསྙེན་པར་མི་བྱ་སྟེ།

འོན་ཀྱང་བསྙེན་པ་བྱེད་པ་ལ་བསྙེན་པར་བྱའོ་ཞེས་འབྱུང་བས།

མདོར་ན་བློན་པོ་རྣམས་ལ་བསྙེན་པར་བྱའོ་སྙམ་ནས།

དེས་བློན་པོ་རྣམས་ལ་བསྙེན་པར་བྱ་བར་བརྩམས་སོ།

དེ་ནས་བློན་པོ་རྣམས་ཀྱིས་སྨྲས་པ།

མདུན་ན་འདོན་དགོས་པ་ཅི་ཞིག་ལ་འོངས།

དེས་སྨྲས་པ།

ཤེས་ལྡན་དག་ཁོ་བོ་ནི་བཅོམ་ལྡན་འདས་ཀྱི་ཕྱིར་ལྷ་ལ་གསོལ་བ་འདེབས་སུ་མཆིས་ཀྱིས་ཁྱེད་ཅག་གིས་གྲོགས་མཛོད་ཅིག །

དེ་རྣམས་ཀྱིས་སྨྲས་པ།

དེ་བཞིན་དུ་བྱས་ཁོ་བོ་ཅག་གིས་ཇི་ཙམ་ན་བོས་པ་དེའི་ཚེ་ཁྱོད་ཤོག་ཅིག །

དེ་ནས་དེ་དག་གིས་སྐབས་ཤེས་ནས་བོས་པ་དང་དེ་ནས་མདུན་ན་འདོན་མདའ་བོ་ཆེ་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་གང་ན་བ་དེར་སོང་སྟེ་སོང་ནས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་ལ་རྒྱལ་བ་དང་ཚེ་སྤེལ་བ་དག་བྱས་ནས་ཕྱོགས་གཅིག་ཏུ་འདུག་གོ།

ཕྱོགས་གཅིག་ཏུ་འདུག་ནས་མདུན་ན་འདོན་མདའ་བོ་ཆེས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ།

ལྷ་ཡངས་པ་ཅན་གྱི་ཚོགས་ཀྱི་མཆིད་ནས་ལྷ་ལ་གནོད་པ་ཆུང་ངམ།

རེག་པར་གནས་སམ་ཞེས་བྱ་བ་རྒྱས་པར་སྙུན་གསོལ་ལོ།

མདའ་བོ་ཆེ་ཁྱོད་དང་།

ཡངས་པ་ཅན་གྱི་ཚོགས་བདེ་བར་གྱུར་ཅིག །

ལྷ་ཡངས་པ་ཅན་གྱི་ཚོགས་ཀྱི་མཆིད་ནས་འདི་སྐད་ཅེས།

ལྷ་བཅོམ་ལྡན་འདས་ཡངས་པ་ཅན་དུ་གཤེགས་པར་བཅོམ་ལྡན་འདས་ལ་རྗེས་སུ་གནང་བར་མཛད་དུ་གསོལ།

ལྷས་གལ་ཏེ་བཅོམ་ལྡན་འདས་ལ་རྗེས་སུ་མ་གནང་ན་རིང་པོ་མི་ཐོགས་པ་ཁོ་ནར་ཡངས་པ་ཅན་སྟོངས་ཤིང་མིང་ལུས་པར་འགྱུར་རོ་ཞེས་མཆིའོ།

རྒྱལ་པོས་སྨྲས་པ།

མདའ་བོ་ཆེ་ཁོ་བོས་ཡུན་རིང་མོ་ཞིག་ནས་ཀྱེ་མ་ཡངས་པ་ཅན་གྱི་གནས་སྟོངས་ཀྱང་ཅི་མ་རུང་སྙམ་དུ་བསམས་པ་དེ་གལ་ཏེ་ཡངས་པ་ཅན་གྱི་གནས་སྟོངས་པར་གྱུར་ན་ཁོ་བོ་ཡིད་ལ་བསམ་པ་ཚེགས་ཆུང་ངུས་རྫོགས་པར་མ་གྱུར་ཏམ།

དེ་སྐད་ཅེས་སྨྲས་པ་དང་།

མདའ་བོ་ཆེ་སོང་ངོ་།

བློན་

པོ་རྣམས་ཀྱིས་སྨྲས་པ།

ལྷ་བཅོམ་ལྡན་འདས་ཀྱིས་སེམས་ཅན་གཅིག་ཀྱང་ཡོངས་སུ་བཏང་བ་ལྟ་མཆིས་སམ།

ཤེས་ལྡན་དག་མེད་དོ།

དེ་ལྟ་ན་ལྷས་བཅོམ་ལྡན་འདས་ལ་བཀུར་སྟི་མ་ལགས་པ་བགྱིས་སོ།

ལྷས་བཅོམ་ལྡན་འདས་ལ་རྗེས་སུ་གནང་ཡང་རུང་།

མ་གནང་ཡང་རུང་སྟེ།

བཅོམ་ལྡན་འདས་ནི་ཡངས་པ་ཅན་གྱི་སེམས་ཅན་ལ་ཐུགས་བརྩེ་བའི་ཕྱིར་གཤེགས་པར་འགྱུར་བ་ཉིད་དོ།

རྒྱལ་པོས་སྨྲས་པ།

ཤེས་ལྡན་དག་ཁོ་བོས་མ་ཤེས་ཀྱིས་གལ་ཏེ་དེ་ལྟ་ན་ཁུག་ཤིག །

དེ་དག་གིས་མདའ་བོ་ཆེ་བཀུག་ནས་རྒྱལ་པོས་སྨྲས་པ།

མདའ་བོ་ཆེ་ཁོ་བོས་དམ་བཅས་ཏེ་བཅོམ་ལྡན་འདས་རྗེས་སུ་གནང་བར་བྱའོ།

གལ་ཏེ་ཁོ་བོས་བཅོམ་ལྡན་འདས་ལ་མཆོད་པ་དང་བསྙེན་བཀུར་ཅི་འདྲ་བ་བྱས་པ་དེ་ཁོ་ན་འདྲ་བར་ཡངས་པ་ཅན་གྱི་ཚོགས་ཀྱིས་བྱ་ན།

དེ་ལྟ་ན་ཁོ་བོས་རྗེས་སུ་གནང་ངོ་།

དེས་ཡངས་པ་ཅན་རྣམས་ལ་རྒྱལ་པོ་འདི་སྐད་ཅེས་གསུང་ངོ་ཞེས་སྤྲིང་ངོ་།

དེ་རྣམས་ཀྱིས་སྨྲས་པ།

རྒྱལ་པོ་མི་གཅིག་པུར་གྱུར་པས་བཅོམ་ལྡན་འདས་ལ་མཆོད་པ་དང་བཀུར་སྟི་བྱེད་ན།

བདག་ཅག་ཚོགས་སུ་གྱུར་པས་ཅི་སྟེ་མི་བྱ་ཞེས་དེ་དག་གིས་བཅོམ་ལྡན་འདས་གཤེགས་སུ་གསོལ་ཅིག་དང་།

བདག་ཅག་གིས་བཅོམ་ལྡན་འདས་ལ་དེ་བས་ཀྱང་ཆེས་ཁྱད་པར་དུ་འཕགས་པའི་མཆོད་པ་དང་བཀུར་སྟི་བགྱིའོ་ཞེས་སྤྲིང་ངོ་།

དེ་ནས་མདའ་བོ་ཆེས་དོན་དེ་དག་རྒྱལ་པོ་ལ་རིག་པར་བྱས་སོ།

དེ་ནས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས།

བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ།

ཕྱོགས་གཅིག་ཏུ་འདུག་ནས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཙུན་པ་བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ལ་བདག་ཇི་སྲིད་འཚོའི་བར་དུ་ན་བཟའ་ཆོས་གོས་དང་།

བསོད་སྙོམས་དང་།

གཟིམས་ཆ་དང་།

སྙུན་དཔྱད་ཀྱི་རྐྱེན་སྨན་དང་།

ཡོ་བྱད་རྣམས་ཀྱིས་བསྙེན་

བཀུར་བགྱིད་པར་སྤྲོ་ལགས་མོད་ཀྱི།

བཅོམ་ལྡན་འདས་སེམས་ཅན་རྣམས་ལ་ཐུགས་བརྩེ་བས་གནང་བར་མི་འགྱུར་ལགས་ན།

བཅོམ་ལྡན་འདས་བདག་གི་གདུགས་ཚོད་གསོལ་བར་གནང་བར་མཛད་དུ་གསོལ།

བཅོམ་ལྡན་འདས་ཀྱི་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་ལ་ཅང་མི་གསུང་བས་གནང་ངོ་།

དེ་ནས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲས་བཅོམ་ལྡན་འདས་ཅང་མི་གསུང་བས་གནང་བར་རིག་ནས་སྟན་ལས་ལངས་ཏེ།

བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་སོང་ངོ་།

དེ་ནས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲས་དེ་ཉིད་ཀྱི་མཚན་མོ་ནས་ཞེས་བྱ་བ་ནས།

བཅོམ་ལྡན་འདས་ཀྱིས་གསོལ་ཟིན་ནས་ཕྱག་བཅབས་ཏེ་ལྷུང་བཟེད་གྱུ་བར་རིག་ནས་ཞེས་བྱ་བའི་བར་གོང་མ་བཞིན་དུའོ།

གསེར་གྱི་བྱ་མ་བུམ་བླངས་ཏེ་བཅོམ་ལྡན་འདས་ལ་གསོལ་བ་འདེབས་པ་ལ་ཞུགས་པ།

བཙུན་པ་བཅོམ་ལྡན་འདས་ཀྱིས་ཀླུ་གདུག་པ་དང་།

གནོད་སྦྱིན་གདུག་པ་དེ་དང་དེ་རྣམས་ནི་བཏུལ་ལགས་ན།

བཙུན་པ་ཀླུའི་རྒྱལ་པོ་སོག་མ་མེད་འདི་ཡུན་རིང་པོ་ཞིག་ནས་བདག་ཅག་ལ་ཤ་ཁོན་མ་མཆིས་པར་ནི་ཤ་ཁོན་བགྱིད།

འགྲན་ཟླ་མ་མཆིས་པར་ནི་འགྲན་ཟླར་གྱུར།

གནོད་པ་མ་མཆིས་པར་ནི་གནོད་པར་བགྱིད་པར་གྱུར་ཏེ།

ལོ་ཏོག་གང་དག་སྐྱེས་ཤིང་སྐྱེས་པ་རྣམས་ཆུད་གཟོན་པར་བགྱིད་ལགས་ན།

བཅོམ་ལྡན་འདས་ཐུགས་བརྩེ་བ་ཉེ་བར་བཟུང་སྟེ་ཀླུའི་རྒྱལ་པོ་སོག་མ་མེད་ལེགས་པར་གདུལ་བར་གསོལ།

བཅོམ་ལྡན་འདས་ཀྱིས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་ལ་ཅང་མི་གསུང་བས་གནང་ངོ་།

དེ་ནས་བཅོམ་ལྡན་འདས་ཀྱིས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲ་ལ་ཡོན་བསྔོ་བ་མཛད་ནས་གཤེགས་ཏེ།

གཙུག་ལག་ཁང་དུ་བྱོན་ནས་དགེ་སློང་གི་དགེ་འདུན་གྱི་གུང་ལ་གདན་བཤམས་པ་ཉིད་ལ་བཞུགས་སོ།

བཞུགས་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ།

ཀུན་དགའ་བོ་བྱང་ཕྱོགས་སུ་ཀླུའི་

རྒྱལ་པོ་སོག་མ་མེད་འདུལ་དུ་འདོང་ངོ་།

བྱང་ཕྱོགས་ན་ནི་ཕན་ཡོན་ལྔ་ཡོད་དེ།

ལྔ་གང་ཞེ་ན།

མེ་ཏོག་ཕུན་སུམ་ཚོགས་པ་དང་།

འབྲས་བུ་ཕུན་སུམ་ཚོགས་པ་དང་།

ཆུ་ཕུན་སུམ་ཚོགས་པ་དང་།

བསོད་སྙོམས་མོད་པ་དང་།

སྐྱེ་བོའི་ཚོགས་དྲང་པོ་ཡོད་དོ་ཞེས་གསུངས་ནས་བཅོམ་ལྡན་འདས་ནང་དུ་ཡང་དག་འཇོག་གི་ཕྱིར་གཙུག་ལག་ཁང་དུ་ཞུགས་སོ།

དེ་ནས་ལུས་འཕགས་མའི་བུ་ཡུལ་མ་ག་དྷཱའི་རྒྱལ་པོ་མ་སྐྱེས་དགྲས་རྒྱལ་པོའི་ཁབ་ནས་ཆུ་བོ་གང་གཱའི་བར་གྱི་ལམ་དང་གྲོང་ཁྱེར་དག་ཆེ་ཐང་དུ་སྟོར་དུ་བཅུག་སྟེ་ལམ་རྡོ་བ་དང་།

གསེག་མ་དང་།

གྱོ་མོ་ཐམས་ཅད་བསལ་ནས་ཙན་དན་གྱི་ཆུས་ཆག་ཆག་བཏབ་དྲི་ཞིམ་པོ་སྣ་ཚོགས་ཀྱི་པོག་ཕོར་དག་བཤམས།

དར་གྱི་ཆུན་འཕྱང་མང་པོ་དཔྱངས།

བར་བར་དུ་མེ་ཏོག་གི་གཞལ་མེད་ཁང་དག་བྱས་སོ།

ཡངས་པ་ཅན་གྱི་ལིཙྪ་བཱི་རྣམས་ཀྱིས་ནི་ཆུ་བོ་གང་གཱ་ནས་ཡངས་པ་ཅན་གྱི་བར་དུ་དེ་བས་ལྷག་པར་ཁྱད་པར་དུ་འཕགས་པར་ལམ་དང་གྲོང་ཁྱེར་དག་སྟོར་དུ་བཅུག་གོ།

དེ་ནས་བཅོམ་ལྡན་འདས་དགོངས་ཀ་ནང་དུ་ཡང་དག་འཇོག་ལས་བཞེངས་ཏེ་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ།

ཀུན་དགའ་བོ་ན་ལན་ད་གང་ན་བ་དེར་འདོང་ངོ་།

བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ནས།

དེ་ནས་བཅོམ་ལྡན་འདས་དང་ཡུལ་མ་ག་དྷཱའི་ལྗོངས་རྒྱུ་ཞིང་གཤེགས་པ་ན།

ན་ལན་དར་བྱོན་ནས་ན་ལན་ད་ན་ཨ་མྲའི་ཚལ་དགག་དབྱེ་ཅན་ཞེས་བྱ་བ་ན་བཞུགས་སོ།

དེའི་ཚེ་ན་ལན་ད་ན་ཀུན་དུ་རྒྱུ་འདམ་བུའི་ཚོང་པ་ཞེས་བྱ་བ་རྒས་པ།

འཁོགས་པ།

གཏུགས་པ་བཙས་ནས་ལོ་བརྒྱ་ཉི་ཤུ་ལོན་པ་ཞིག་གནས་པ་ལ།

ན་ལན་དའི་བྲམ་ཟེ་དང་ཁྱིམ་བདག་རྣམས་བཀུར་སྟི་བྱེད།

བླ་མར་བྱེད།

རི་མོར་བྱེད།

མཆོད་པར་བྱེད་དེ།

དགྲ་བཅོམ་པར་བཀུར་རོ།

དེ་ནས་ཀུན་དུ་རྒྱུ་འདམ་བུའི་ཚོང་པའི་སྔོན་གྱི་གྲོགས་པོ་དང་།

བློན་པོ་དང་།

གཉེན་དང་།

སྣག་གི་གཉེན་མཚམས་སུ་གྱུར་པའི་ལྷ་གང་ཡིན་པ་དེ་འདི་སྙམ་དུ་སེམས་ཏེ།

གལ་ཏེ་བདག་གིས་ཀུན་དུ་རྒྱུ་འདམ་བུའི་

ཚོང་པ་ལ་འདི་སྐད་ཅེས།

དྲང་སྲོང་ཁྱོད་ཚུར་ཤོག །

བཅོམ་ལྡན་འདས་ཀྱི་སྤྱན་སྔར་ཚངས་པར་སྤྱད་པ་སྤྱོད་ཅིག་ཅེས་སྨྲས་ན།

གང་ཡང་བདག་གི་ཚིག་མི་ཉན་པ་དེ་སྲིད་པས།

མ་ལ་བདག་དེའི་དྲུང་དུ་སོང་སྟེ་ཡིད་ཀྱི་དྲི་བ་འཛིན་དུ་གཞུག་གོ་སྙམ་ནས།

དེ་ནས་ལྷ་དེ་ཀུན་དུ་རྒྱུ་འདམ་བུའི་ཚོང་པ་གང་ན་བ་དེར་སོང་སྟེ་ཕྱིན་ནས།

ཀུན་དུ་རྒྱུ་འདམ་བུའི་ཚོང་པ་ལ་འདི་སྐད་ཅེས་སྨྲས་སོ།

དྲང་སྲོང་ཚུར་ཤོག །

ཁོ་བོ་ལས་ཡིད་ཀྱི་དྲི་བ་ལོང་ལ་ཀུན་ཆུབ་པར་གྱིས་ཤིག །

ཇི་ལྟར་མཛའ་བོ་མ་ཡིན་པ་ལ་མཛའ་བོ་ལྟར་བཅོས་པ་ཡིན་པར་བལྟ་བར་བྱ།

ཇི་ལྟར་བདག་དང་འདྲ་བའི་མཛའ་བོ་ཡིན་པར་རིག་པར་བྱ།

ཅིའི་ཕྱིར་སྤོང་།

ཇི་ལྟར་ནད་མེད་པ་འཐོབ།

དྲང་སྲོང་གང་ཞིག་ཁྱོད་ཀྱི་ཡིད་ཀྱི་དྲི་བ་ཡིད་ཀྱིས་མངོན་པར་འདུས་བྱས་པ་འདི་དག་ཚིག་གིས་ལུང་བསྟན་པས་སེམས་རངས་པར་བྱེད་པ་དེའི་ཐད་དུ་ཁྱོད་ཚངས་པར་སྤྱད་པ་སྤྱོད་ཅིག་ཅེས་སྨྲས་ནས་དེ་ཉིད་དུ་མི་སྣང་བར་གྱུར་ཏོ།

དེ་ནས་ཀུན་དུ་རྒྱུ་འདམ་བུའི་ཚོང་པས་ལྷ་དེ་ལས་ཡིད་ཀྱི་དྲི་བ་བཟུང་སྟེ་ཀུན་ཆུབ་པར་བྱས་ནས་འོད་སྲུང་རྫོགས་བྱེད་གང་ན་བ་དེར་སོང་སྟེ་ཕྱིན་ནས་འོད་སྲུང་རྫོགས་བྱེད་ཀྱི་དྲུང་དུ་ཡིད་ཀྱི་དྲི་བ་ཡིད་ཀྱིས་མངོན་པར་འདུས་བྱས་པ།

ཇི་ལྟར་མཛའ་བོ་མ་ཡིན་པ་ལ་མཛའ་བོ་ལྟར་བཅོས་པ་ཡིན་པར་བལྟ་བར་བྱ་ཞེས་བྱ་བ་ནས་ཇི་ལྟར་ནད་མེད་པ་འཐོབ་པར་འགྱུར་ཞེས་བྱ་བའི་བར་གོང་མ་བཞིན་དུའོ།

འོད་སྲུང་རྫོགས་བྱེད་ཀྱིས་དེའི་ཡིད་ཀྱི་དྲི་བ་ཡིད་ཀྱིས་མངོན་པར་འདུས་བྱས་པ་རྣམས་ཀྱང་མི་ཤེས་རྣམ་པར་མི་ཤེས་ན་ལན་གླན་པ་ལྟ་སྨོས་ཀྱང་ཅི་དགོས།

དེ་ནས་ཀུན་དུ་རྒྱུ་འདམ་བུའི་ཚོང་པ་འདི་སྙམ་དུ་སེམས་ཏེ།

འོད་སྲུང་རྫོགས་བྱེད་ཀྱིས་བདག་གི་ཡིད་ཀྱི་དྲི་བ་ཡིད་ཀྱིས་མངོན་པར་འདུས་བྱས་པ་རྣམས་ཀྱང་མི་ཤེས་རྣམ་པར་མི་ཤེས་ན་ལན་གླན་པ་ལྟ་སྨོས་ཀྱང་ཅི་དགོས་སྙམ་ནས།

དེ་ཀུན་དུ་རྒྱུ་གནག་ལྷས་ཀྱི་བུ་དང་།

སྨྲ་འདོད་ཀྱི་བུ་མོའི་བུ་ཡང་དག་རྒྱལ་བ་ཅན་དང་།

མི་ཕམ་སྐྲའི་ལ་བ་ཅན་དང་།

ཀ་ཏྱའི་བུ་ནོག་ཅན་དང་།

གཅེར་བུ་པ་གཉེན་གྱི་བུ་གང་ན་བ་དེར་སོང་སྟེ་ཕྱིན་ནས་གཅེར་བུ་པ་གཉེན་གྱི་བུའི་མདུན་དུ་ཡིད་ཀྱི་དྲི་བ་ཡིད་ཀྱིས་མངོན་པར་འདུས་

བྱས་པ།

ཇི་ལྟར་མཛའ་བོ་མ་ཡིན་པ་ལ་མཛའ་བོ་ལྟར་བཅོས་པ་ཡིན་པར་བལྟ་བར་བྱ་ཞེས་བྱ་བ་ནས་གཅེར་བུ་པ་གཉེན་གྱི་བུའི་བར་གྱིས་ཀྱང་བདག་གི་ཡིད་ཀྱི་དྲི་བ་ཡིད་ཀྱིས་མངོན་པར་འདུས་བྱས་པ་རྣམས་ཀྱང་མི་ཤེས།

རྣམ་པར་མི་ཤེས་ན་ལན་གླན་པ་ལྟ་སྨོས་ཀྱང་ཅི་དགོས་སྙམ་མོ་ཞེས་བྱ་བའི་བར་གོང་མ་བཞིན་དུའོ།

དེ་ནས་ཀུན་དུ་རྒྱུ་འདམ་བུའི་ཚོང་པ་འདི་སྙམ་དུ་སེམས་ཏེ།

གང་ལ་ཡིད་ཀྱི་དྲི་བ་ཡིད་ཀྱིས་མངོན་པར་འདུས་བྱས་པའི་ཚིག་གིས་ལུང་བསྟན་པ་མི་ཐོབ་པ་དེ་འདྲ་བའི་རབ་ཏུ་བྱུང་བས་བདག་ལ་ཅི་ཞིག་བྱ།

བདག་གི་ཉེ་དུ་རྣམས་ལ་ལོངས་སྤྱོད་རྒྱ་ཆེར་ཡོད་པས།

མ་ལ་བདག་འདུག་ལ་འདོད་པ་ཡང་ལོངས་སྤྱད་ཅིང་སྦྱིན་པ་ཡང་བཏང་།

བསོད་ནམས་ཀྱང་བྱའོ་སྙམ་མོ།

ཡང་དེའི་བློ་སྐྱེས་པ།

མ་ལ་བདག་དགེ་སྦྱོང་གཽ་ཏ་མ་གང་ན་བ་དེར་འགྲོ་བར་བྱའོ་སྙམ་ནས་དེ་ཆས་པ་ན་ཡང་བསམས་པ།

རེ་ཞིག་དགེ་སྦྱོང་དང་བྲམ་ཟེ་རྒན་རབས་གང་དག་ཡིན་པ་འདི་ལྟ་སྟེ།

འོད་སྲུང་རྫོགས་བྱེད་ནས་གཅེར་བུ་པ་གཉེན་གྱི་བུའི་བར་གོང་མ་བཞིན་ཏེ།

དེ་རྣམས་ཀྱིས་རེ་ཞིག་ཡིད་ཀྱི་དྲི་བ་ཡིད་ཀྱིས་མངོན་པར་འདུས་བྱས་པ་རྣམས་ཀྱང་མི་ཤེས་རྣམ་པར་མི་ཤེས་ན་དགེ་སྦྱོང་གཽ་ཏ་མ་ནས་གཞོན་པ་གསར་དུ་རབ་ཏུ་བྱུང་བས་ལྟ་སྨོས་ཀྱང་ཅི་དགོས་སྙམ་དུ་བསམས་ཏེ་སླར་ལྡོག་པར་འདོད་པ་ལས།

ཡང་དེ་འདི་སྙམ་དུ་སེམས་ཏེ།

སྔོན་གྱི་ཀུན་དུ་རྒྱུ་རྙིང་པ་རྒན་པོ་འཁོགས་པ་སྤྱོད་པའི་སློབ་དཔོན་དག་ལས་བདག་གིས་དགེ་སློང་གཞོན་ནུ་ལ་བརྙས་པར་མི་བྱ།

དགེ་སློང་གཞོན་ནུ་ལ་ཟིལ་གྱིས་མནན་པར་མི་བྱ་སྟེ།

དགེ་སློང་གཞོན་ནུ་ཡང་དེ་ནི་དབང་ཆེ་བ་མཐུ་ཆེ་བར་གྱུར་པ་ཡིན་ནོ་ཞེས་ཐོས་སོ་སྙམ་དུ་བསམས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་།

བཅོམ་ལྡན་འདས་ཀྱི་སྤྱན་སྔར་ཡིད་ཀྱི་ཞུ་བ་ཡིད་ཀྱིས་མངོན་པར་འདུས་བྱས་པ།

ཇི་ལྟར་མཛའ་བོ་མ་ཡིན་པ་ལ་མཛའ་བོ་ལྟར་བཅོས་པ་ཡིན་པར་བལྟ་བར་བྱ་ཞེས་བྱ་བ་ནས་ཇི་ལྟར་ནད་མེད་པ་འཐོབ་ཅེས་བྱ་བའི་བར་གོང་མ་བཞིན་དུའོ།

དེ་ནས་བཅོམ་ལྡན་འདས་ཀྱི་ཐུགས་ཀྱིས་ཀུན་དུ་རྒྱུ་འདམ་བུའི་ཚོང་

པའི་བསམ་པ་མཁྱེན་ནས་དེའི་ཚེ་ཚིགས་སུ་བཅད་དེ་བཀའ་སྩལ་པ།

མཛའ་བོ་གཞན་ལ་རྣམ་པར་སྨོད་བྱེད་ཅིང་།

དེ་ནི་བདག་ཏུ་ཟད་དོ་ཞེས་སྨྲ་ལ།

ལས་ཀྱང་སླ་དགུ་འདམ་ཞིང་བྱེད་པ་དེ།

བདག་གི་བཤེས་མ་ཡིན་པར་ཤེས་པར་བྱ།

གང་ཞིག་བདེན་པ་མ་ཡིན་ཚིག །

མཛའ་བོ་དག་ལ་སྨྲ་བྱེད་ཅིང་།

སྨྲ་ལ་ལས་སུ་མི་བྱེད་པའང་།

མཁས་པ་རྣམས་ཀྱིས་ཡོངས་ཤེས་ཏེ།

དེ་ལྟ་བུ་ནི་མཛའ་བོ་མ་ཡིན་པ་ལ་མཛའ་བོ་ལྟར་བཅོས་པ་ཡིན་པར་ཤེས་པར་བྱའོ།

ཇི་ལྟར་བདག་དང་འདྲ་བའི་མཛའ་བོ་ཡིན་པར་རིག་པར་བྱ་ཞེ་ན།

གང་ཞིག་རྟག་ཏུ་བག་མེད་དབྱེ་བ་ཡི།

བསམ་པས་གླགས་ལྟ་དེ་ནི་མཛའ་མིན་གྱི།

གང་ཞིག་འདིར་ནི་སྙིང་དང་འདྲར་གྱུར་པར།

གཞན་གྱིས་མི་ཕྱེད་དེ་ནི་མཛའ་བོ་ཡིན།

དེ་ལྟ་བུ་ནི་བདག་དང་འདྲ་བའི་མཛའ་བོ་ཡིན་པར་རིག་པར་བྱའོ།

ཅིའི་ཕྱིར་སྤོང་ཞེ་ན།

སྐྱེས་བུ་གཅེས་པ་མཐར་འབྱིན་ཅིང་།

འབྲས་བུ་ལྟ་བར་བྱེད་པ་ནི།

རབ་ཏུ་དགའ་བ་སྐྱེད་པའི་གནས།

རབ་བསྔགས་འདྲེན་པའི་ཞི་བ་སྒོམ།

དེ་དོན་དུ་གཉེར་བར་བསྒོམ་མོ།

ཇི་ལྟར་ནད་མེད་པ་འཐོབ་ཅེ་ན།

རབ་ཏུ་དབེན་པའི་རོ་དང་ནི།

ཉེ་བར་ཞི་བའི་རོ་ཤེས་ནས།

ཆོས་ལ་དགའ་བའི་རོ་འཐུང་བ།

ནད་མེད་སྡིག་པ་མེད་པར་འགྱུར།

དེ་ལྟར་ན་ནད་མེད་པ་འཐོབ་བོ།

དེ་ནས་ཀུན་དུ་རྒྱུ་འདམ་བུའི་ཚོང་པ་འདི་སྙམ་དུ་སེམས་ཏེ།

དགེ་སྦྱོང་གཽ་ཏ་མའི་ཐུགས་ཀྱིས་ནི་བདག་གི་བསམ་པ་མཁྱེན་ནོ་སྙམ་དུ་རིག་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།

གཽ་ཏ་མ་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་བ་དང་བསྙེན་པར་རྫོགས་པ་དགེ་སློང་གི་དངོས་པོ་འཐོབ་པ་ལྟ་ན།

བཅོམ་ལྡན་འདས་དགེ་སྦྱོང་གཽ་ཏ་མའི་སྤྱན་སྔར་བདག་གིས་ཚངས་པར་སྤྱོད་པ་སྤྱད་པར་བགྱིའོ།

ཀུན་དུ་རྒྱུ་འདམ་བུའི་ཚོང་པ་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ཞིང་བསྙེན་པར་རྫོགས་པ་དགེ་སློང་གི་དངོས་པོ་ཐོབ་སྟེ།

དེ་ལྟར་རབ་ཏུ་བྱུང་ནས་ཚེ་དང་ལྡན་པ་དེས་ཞེས་བྱ་བ་ནས་དེ་སེམས་ཤིན་ཏུ་རྣམ་པར་གྲོལ་བའི་དགྲ་བཅོམ་པར་གྱུར་ཏོ་ཞེས་བྱ་

བའི་བར་གོང་མ་བཞིན་དུའོ།

དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ།

ཀུན་དགའ་བོ་དམར་བུ་ཅན་གྱི་གྲོང་དུ་འདོང་ངོ་།

བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ཏོ།

དེ་ནས་བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་དམར་བུ་ཅན་གྱི་གྲོང་ཁྱེར་དང་རྒྱལ་པོའི་ཁབ་ཀྱི་བར་གྱི་དབུས་ན་རྒྱལ་པོའི་གནས་འོད་མའི་དབྱུག་པ་ཅན་དུ་ནུབ་མོ་ཉེ་བར་རྟེན་ཅིང་བཞུགས་སོ།

དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ།

དགེ་སློང་དག་ང་དང་ཁྱེད་ཅག་ཁོ་ནས་འཕགས་པའི་བདེན་པ་བཞི་པོ་དག་མ་ཤེས།

མ་མཐོང་།

ཁོང་དུ་མ་ཆུད།

སོ་སོར་མ་རྟོགས་པས་ལམ་རིང་པོ་འདིར་རྒྱུག་ཅིང་འཁོར་བར་གྱུར་ཏོ།

བཞི་པོ་དེ་དག་གང་ཞེ་ན།

ང་དང་ཁྱེད་ཅག་ཁོ་ནས་ཞེས་བྱ་བ་ནས།

སྡུག་བསྔལ་འཕགས་པའི་བདེན་པ་མ་ཤེས་མ་མཐོང་ཞེས་བྱ་བའི་བར་གོང་མ་བཞིན་དུའོ།

ང་དང་ཁྱེད་ཅག་ཁོ་ནས་ཞེས་པ་ནས།

སྡུག་བསྔལ་ཀུན་འབྱུང་བ་དང་།

སྡུག་བསྔལ་འགོག་པར་འགྲོ་བའི་ལམ་མ་ཤེས་མ་མཐོང་ཞེས་བྱ་བའི་བར་གོང་མ་བཞིན་དུའོ།

ངས་སྡུག་བསྔལ་འཕགས་པའི་བདེན་པ་རྗེས་སུ་རྟོགས་ཤིང་སོ་སོར་རྟོགས་པས་སྲིད་པའི་སྲེད་པ་བཅད་པས་འཁོར་བའི་སྐྱེ་བ་ཟད་དེ།

ད་ནི་སྲིད་པ་གཞན་མེད་དོ།

ངས་སྡུག་བསྔལ་ཀུན་འབྱུང་བ་དང་།

སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་རྗེས་སུ་རྟོགས་ཤིང་སོ་སོར་རྟོགས་པས་སྲིད་པའི་སྲེད་པ་བཅད་པས་འཁོར་བའི་སྐྱེ་བ་ཟད་དེ།

ད་ནི་སྲིད་པ་གཞན་མེད་དོ།

བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ།

བདེ་བར་གཤེགས་པས་དེ་སྐད་གསུངས་ནས་སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ།

ང་དང་ཁྱེད་ཅག་ཁོ་ན་ཡིས།

འཕགས་པའི་བདེན་པ་བཞི་པོ་དག །

ཇི་ལྟ་བ་བཞིན་མ་མཐོང་བས།

ལམ་ནི་རིང་དུ་འཁོར་བར་གྱུར།

བདེན་པ་དེ་དག་མཐོང་ནས་ནི།

སྲིད་པའི་སྲེད་པ་བཅད་ནས་སུ།

འཁོར་བའི་སྐྱེ་བ་ཟད་པས་ན།

ད་ནི་སྲིད་པ་གཞན་མེད་དོ།

བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས།

དགེ་སློང་དེ་དག་ཡི་རངས་ཏེ།

བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།།

དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ།

ཀུན་དགའ་བོ་དམར་བུ་ཅན་གྱི་གྲོང་གང་ན་བ་དེར་འདོང་ངོ་།

བཙུན་པ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱི་ལྟར་མཉན་ཏོ།

དེ་ནས་བཅོམ་ལྡན་འདས་དང་ཡུལ་མ་ག་དྷཱའི་ལྗོངས་རྒྱུ་ཞིང་གཤེགས་པ་ན་དམར་བུ་ཅན་གྱི་གྲོང་དུ་བྱོན་ཏོ།

དམར་བུ་ཅན་གྱི་གྲོང་གི་དམར་བུ་ཅན་གྱི་མཆོད་རྟེན་ན་བཞུགས་སོ།

དམར་བུ་ཅན་གྱི་གྲོང་གི་བྲམ་ཟེ་དང་ཁྱིམ་བདག་རྣམས་ཀྱིས་བཅོམ་ལྡན་འདས་ཡུལ་མ་ག་དྷཱའི་ལྗོངས་རྒྱུ་ཞིང་གཤེགས་ནས་དམར་བུ་ཅན་གྱི་གྲོང་དུ་བྱོན་ཏེ།

དམར་བུ་ཅན་གྱི་མཆོད་རྟེན་ན་བཞུགས་སོ་ཞེས་ཐོས་སོ།

ཐོས་ནས་ཀྱང་ཚོགས་ནས་ཚོགས་དང་།

ཁྱུ་ནས་ཁྱུར་ཕྲད་ཅིང་འདུག་ནས་དམར་བུ་ཅན་གྱི་གྲོང་ནས་བྱུང་སྟེ་བཅོམ་ལྡན་འདས་གང་ན་བ་དེར་དོང་སྟེ་ལྷགས་ནས།

བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས་ཕྱོགས་གཅིག་ཏུ་འདུག་གོ།

ཕྱོགས་གཅིག་ཏུ་འདུག་ནས་བཅོམ་ལྡན་འདས་ཀྱིས་དམར་བུ་ཅན་གྱི་གྲོང་གི་བྲམ་ཟེ་དང་ཁྱིམ་བདག་རྣམས་ལ་འདི་སྐད་ཅེས་བཀའ་སྩལ་ཏོ།

བྲམ་ཟེ་དང་ཁྱིམ་བདག་དག་ལྔ་པོ་འདི་དག་ནི་བག་མེད་པའི་ཉེས་དམིགས་དག་ཡིན་ཏེ།

ལྔ་གང་ཞེ་ན།

བྲམ་ཟེ་དང་ཁྱིམ་བདག་དག་འདི་ལ་བག་མེད་པ་བག་མེད་པ་ལ་གནས་པའི་རྒྱུས་ལོངས་སྤྱོད་ཆེན་པོ་ལས་ཉམས་པར་འགྱུར་ཏེ།

བྲམ་ཟེ་དང་ཁྱིམ་བདག་དག་བག་མེད་པ་བག་མེད་པ་ལ་གནས་པའི་རྒྱུས་ལོངས་སྤྱོད་ཆེན་པོ་ལས་ཉམས་པར་འགྱུར་བ་གང་ཡིན་པ་འདི་ནི་བག་མེད་པའི་ཉེས་དམིགས་དང་པོ་ཡིན་ནོ།

བྲམ་ཟེ་དང་ཁྱིམ་བདག་དག་གཞན་ཡང་བག་མེད་པ་བག་མེད་པ་ལ་གནས་པའི་རྒྱུས་ཕྱོགས་དང་ཕྱོགས་མཚམས་སུ་སྡིག་པ་དང་།

བསྔགས་པ་མ་ཡིན་པ་དང་།

གྲགས་པ་མ་ཡིན་པའི་སྒྲ་དང་ཚིགས་སུ་བཅད་པ་གྲགས་པར་འགྱུར་ཏེ།

བྲམ་ཟེ་དང་ཁྱིམ་བདག་དག་བག་མེད་པ་

བག་མེད་པ་ལ་གནས་པའི་རྒྱུས་ཕྱོགས་དང་ཕྱོགས་མཚམས་སུ་སྡིག་པ་དང་།

བསྔགས་པ་མ་ཡིན་པ་དང་།

གྲགས་པ་མ་ཡིན་པའི་སྒྲ་དང་ཚིགས་སུ་བཅད་པ་གྲགས་པར་འགྱུར་བ་གང་ཡིན་པ་འདི་ནི།

བག་མེད་པའི་ཉེས་དམིགས་གཉིས་པ་ཡིན་ནོ།

བྲམ་ཟེ་དང་ཁྱིམ་བདག་དག་གཞན་ཡང་བག་མེད་པ་བག་མེད་པ་ལ་གནས་པའི་རྒྱུས་རྒྱལ་རིགས་ཀྱི་འཁོར་དུའང་རུང་།

བྲམ་ཟེའི་འཁོར་དུའང་རུང་།

ཁྱིམ་བདག་གི་འཁོར་དུའང་རུང་།

དགེ་སྦྱོང་གི་འཁོར་དུའང་རུང་།

འཁོར་གང་དང་གང་དུ་འགྲོ་བའི་འཁོར་དེ་དང་དེར་ཞུམ་ཞུམ་པོར་གྱུར་ནས་དགའ་བ་མེད་པ་དང་།

བག་ཚ་བས་འགྲོ་བར་འགྱུར་ཏེ།

བྲམ་ཟེ་དང་ཁྱིམ་བདག་དག་བག་མེད་པ་བག་མེད་པ་ལ་གནས་པའི་རྒྱུས་གང་དང་གང་དུ་ཞེས་བྱ་བ་ནས་བག་ཚ་བས་ཞེས་བྱ་བའི་བར་གོང་མ་བཞིན་དུའོ།

འདི་ནི་བག་མེད་པའི་ཉེས་དམིགས་གསུམ་པ་ཡིན་ནོ།

བྲམ་ཟེ་དང་ཁྱིམ་བདག་དག་གཞན་ཡང་བག་མེད་པ་བག་མེད་པ་ལ་གནས་པའི་རྒྱུས་གང་དང་གང་དུ་ཞེས་བྱ་བ་ནས་བག་མེད་པའི་རྒྱུས་ཡིད་ལ་གཅགས་བཞིན་འཆི་བར་འགྱུར་ཏེ།

བྲམ་ཟེ་དང་ཁྱིམ་བདག་དག་བག་མེད་པ་བག་མེད་པ་ལ་གནས་པའི་རྒྱུས་ཡིད་ལ་གཅགས་བཞིན་འཆི་བར་འགྱུར་བ་གང་ཡིན་པ་འདི་ནི་བག་མེད་པའི་ཉེས་དམིགས་བཞི་པ་ཡིན་ནོ།

བྲམ་ཟེ་དང་ཁྱིམ་བདག་དག་གཞན་ཡང་བག་མེད་པ་བག་མེད་པ་ལ་གནས་པའི་རྒྱུས་ལུས་ཞིག་ནས་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་ཏེ།

བྲམ་ཟེ་དང་ཁྱིམ་བདག་དག་བག་མེད་པ་བག་མེད་པ་ལ་གནས་པའི་རྒྱུས་ལུས་ཞིག་ནས་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་བ་གང་ཡིན་པ་འདི་ནི་བག་མེད་པའི་ཉེས་དམིགས་ལྔ་པ་ཡིན་ནོ།

བྲམ་ཟེ་དང་ཁྱིམ་བདག་དག་ལྔ་པོ་འདི་དག་ནི་བག་ཡོད་པའི་ཕན་ཡོན་ཡིན་ཏེ།

ལྔ་གང་ཞེ་ན།

བྲམ་ཟེ་དང་ཁྱིམ་བདག་དག་བག་ཡོད་པ་བག་ཡོད་པ་ལ་གནས་པའི་རྒྱུས་ལོངས་སྤྱོད་ཆེན་པོ་ལས་ཉམས་པར་མི་

འགྱུར་ཏེ།

བྲམ་ཟེ་དང་ཁྱིམ་བདག་དག་བག་ཡོད་པ་བག་ཡོད་པ་ལ་གནས་པའི་རྒྱུས་ལོངས་སྤྱོད་ཆེན་པོ་ལས་ཉམས་པར་མི་འགྱུར་བ་གང་ཡིན་པ་འདི་ནི་བག་ཡོད་པའི་ཕན་ཡོན་དང་པོ་ཡིན་ནོ།

བྲམ་ཟེ་དང་ཁྱིམ་བདག་དག་གཞན་ཡང་བག་ཡོད་པ་བག་ཡོད་པ་ལ་གནས་པའི་རྒྱུས་ཕྱོགས་དང་ཕྱོགས་མཚམས་སུ་དགེ་བ་དང་།

གྲགས་པ་དང་།

སྒྲ་དང་།

ཚིགས་སུ་བཅད་པ་རྒྱ་ཆེན་པོ་གྲགས་པར་འགྱུར་ཏེ།

བྲམ་ཟེ་དང་ཁྱིམ་བདག་དག་བག་ཡོད་པ་བག་ཡོད་པ་ལ་གནས་པའི་རྒྱུས་ཕྱོགས་དང་ཕྱོགས་མཚམས་སུ་དགེ་བ་དང་།

གྲགས་པ་དང་།

སྒྲ་དང་།

ཚིགས་སུ་བཅད་པ་རྒྱ་ཆེན་པོ་གྲགས་པར་འགྱུར་བ་གང་ཡིན་པ་འདི་ནི་བག་ཡོད་པའི་ཕན་ཡོན་གཉིས་པ་ཡིན་ནོ།

བྲམ་ཟེ་དང་ཁྱིམ་བདག་དག་གཞན་ཡང་བག་ཡོད་པ་བག་ཡོད་པ་ལ་གནས་པའི་རྒྱུས་རྒྱལ་རིགས་ཀྱི་འཁོར་དུའང་རུང་།

བྲམ་ཟེའི་འཁོར་དུའང་རུང་།

ཁྱིམ་བདག་གི་འཁོར་དུའང་རུང་།

དགེ་སྦྱོང་གི་འཁོར་དུའང་རུང་།

འཁོར་གང་དང་གང་དུ་འགྲོ་བའི་འཁོར་དེ་དང་དེར་ཞུམ་ཞུམ་པོ་མ་ཡིན་པ་དང་།

དགའ་བ་དང་བག་ཚ་བ་མེད་པས་འགྲོ་བར་འགྱུར་ཏེ།

བྲམ་ཟེ་དང་ཁྱིམ་བདག་དག་བག་ཡོད་པ་བག་ཡོད་པ་ལ་གནས་པའི་རྒྱུས་ཞེས་བྱ་བ་ནས།

བག་ཚ་བ་མེད་པ་ཞེས་བྱ་བའི་བར་གོང་མ་བཞིན་དུ་གང་ཡིན་པ་འདི་ནི་བག་ཡོད་པའི་ཕན་ཡོན་གསུམ་པ་ཡིན་ནོ།

བྲམ་ཟེ་དང་ཁྱིམ་བདག་དག་གཞན་ཡང་བག་ཡོད་པ་བག་ཡོད་པ་ལ་གནས་པའི་རྒྱུས་ཡིད་ལ་གཅགས་པ་མེད་པར་འཆི་བར་འགྱུར་ཏེ།

བྲམ་ཟེ་དང་ཁྱིམ་བདག་དག་བག་ཡོད་པ་བག་ཡོད་པ་ལ་གནས་པའི་རྒྱུས་ཡིད་ལ་གཅགས་པ་མེད་པར་འཆི་བར་འགྱུར་བ་གང་ཡིན་པ་འདི་ནི་བག་ཡོད་པའི་ཕན་ཡོན་བཞི་པ་ཡིན་ནོ།

བྲམ་ཟེ་དང་ཁྱིམ་བདག་དག་གཞན་ཡང་བག་ཡོད་པ་བག་ཡོད་པ་ལ་གནས་པའི་རྒྱུས་ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་ལྷ་རྣམས་སུ་སྐྱེ་བར་འགྱུར་ཏེ།

བྲམ་ཟེ་དང་ཁྱིམ་བདག་དག་བག་ཡོད་པ་བག་ཡོད་པ་ལ་གནས་པའི་རྒྱུས་ལུས་ཞིག་ནས་བདེ་འགྲོ་མཐོ་རིས་ཀྱི་འཇིག་རྟེན་ལྷ་རྣམས་སུ་

སྐྱེ་བར་འགྱུར་བ་གང་ཡིན་པ་འདི་ནི་བག་ཡོད་པའི་ཕན་ཡོན་ལྔ་པ་ཡིན་ནོ།

དེ་ནས་དམར་བུ་ཅན་གྱི་གྲོང་གི་བྲམ་ཟེ་དང་ཁྱིམ་བདག་རྣམས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ།

བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་བདག་ཅག་གི་གནས་སུ་དོ་མོད་བཞུགས་པར་གསོལ།

བཅོམ་ལྡན་འདས་ཀྱིས་དམར་བུ་ཅན་གྱི་གྲོང་གི་བྲམ་ཟེ་དང་ཁྱིམ་བདག་རྣམས་ལ་ཅང་མི་གསུང་བས་གནང་ངོ་།

དེ་ནས་དམར་བུ་ཅན་གྱི་བྲམ་ཟེ་དང་ཁྱིམ་བདག་རྣམས་ཀྱིས་བཅོམ་ལྡན་འདས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ཀྱི་སྤྱན་སྔ་ནས་དོང་ངོ་།

མ་ག་དྷཱའི་སྣ་ཆེན་པོ་ལ་གཏོགས་པ་བྲམ་ཟེ་དབྱར་བྱེད་ཀྱིས་དགེ་སྦྱོང་གཽ་ཏ་མ་མ་ག་དྷཱའི་ལྗོངས་རྒྱུ་ཞིང་གཤེགས་པ་ན་དམར་བུ་ཅན་གྱི་གྲོང་དུ་གཤེགས་ནས་དམར་བུ་ཅན་གྱི་གྲོང་གི་དམར་བུ་ཅན་གྱི་མཆོད་རྟེན་ན་བཞུགས་ཏེ།

དེ་ལ་དམར་བུ་ཅན་གྱི་གྲོང་གི་བྲམ་ཟེ་དང་ཁྱིམ་བདག་རྣམས་ཀྱིས་བཀུར་སྟི་བྱས་སོ་ཞེས་ཐོས་སོ།

ཐོས་ནས་ཀྱང་རྟ་རྒོད་མ་དང་ལྡན་པའི་ཤིང་རྟ་ཐམས་ཅད་ནས་དཀར་བའི་ནང་དུ་ཞུགས་ནས་གསེར་གྱི་ཁར་བ་དང་རིལ་བ་སྤྱི་བླུགས་ཐོགས་ཏེ་བྲམ་ཟེའི་ཁྱེའུའི་ཚོགས་ཀྱིས་ཡོངས་སུ་བསྐོར་ཅིང་།

བྲམ་ཟེའི་ཁྱེའུའི་ཚོགས་ཀྱིས་མདུན་གྱིས་བལྟས་ནས་དམར་བུ་ཅན་གྱི་གྲོང་ནས་བྱུང་སྟེ།

བཅོམ་ལྡན་འདས་ལ་བལྟ་བ་དང་བསྙེན་བཀུར་བྱ་བའི་ཕྱིར་སོང་ངོ་།

དེ་ཇི་ཙམ་བཞོན་པའི་སའི་བར་དུ་བཞོན་པས་སོང་ནས་བཞོན་པ་ལས་བབས་ཏེ་རྐང་པས་ཀུན་དགའ་ར་བར་ཞུགས་ནས་བཅོམ་ལྡན་འདས་གང་ན་བ་དེར་སོང་སྟེ་ཕྱིན་ནས།

བཅོམ་ལྡན་འདས་དང་ལྷན་ཅིག་མངོན་དུ་ཡང་དག་པར་དགའ་བ་དང་།

ཡང་དག་པར་མགུ་བར་འགྱུར་བའི་གཏམ་རྣམ་པ་སྣ་ཚོགས་བྱས་ནས་ཕྱོགས་གཅིག་ཏུ་འདུག་གོ།

ཕྱོགས་གཅིག་ཏུ་འདུག་ནས་བཅོམ་ལྡན་འདས་ཀྱིས་མ་ག་དྷཱའི་སྣ་ཆེན་པོ་ལ་གཏོགས་པ་བྲམ་ཟེ་དབྱར་

བྱེད་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད།

ཡང་དག་པར་གཟེངས་སྟོད་པར་མཛད།

ཡང་དག་པར་འཛིན་དུ་འཇུག་པར་མཛད།

ཡང་དག་པར་རབ་ཏུ་དགའ་བར་མཛད་དེ།

རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན།

ཡང་དག་པར་འཛིན་དུ་བཅུག །

ཡང་དག་པར་གཟེངས་བསྟོད།

ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་།

དེ་ནས་མ་ག་དྷཱའི་སྣ་ཆེན་པོ་ལ་གཏོགས་པ་བྲམ་ཟེ་དབྱར་བྱེད་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བཏུད་དེ།

བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་གཽ་ཏ་མ་དགེ་སློང་གི་དགེ་འདུན་དང་ཐབས་ཅིག་ཏུ་སང་བདག་གི་སྡུམ་པར་གདུགས་ཚོད་སྦྱོར་ཞིང་མཆིས་ན་གནང་བར་མཛད་དུ་གསོལ།

བཅོམ་ལྡན་འདས་ཀྱིས་མ་ག་དྷཱའི་སྣ་ཆེན་པོ་ལ་གཏོགས་པ་བྲམ་ཟེ་དབྱར་བྱེད་ལ་ཅང་མི་གསུང་བས་གནང་ངོ་།

དེ་ནས་མ་ག་དྷཱའི་སྣ་ཆེན་པོ་ལ་གཏོགས་པ་བྲམ་ཟེ་དབྱར་བྱེད་ཀྱིས་བཅོམ་ལྡན་འདས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་སྤྱན་སྔ་ནས་སོང་ངོ་།

དེ་ནས་བཅོམ་ལྡན་འདས་ཀྱིས་མ་ག་དྷཱའི་སྣ་ཆེན་པོ་ལ་གཏོགས་པ་བྲམ་ཟེ་དབྱར་བྱེད་སོང་ནས་རིང་པོ་མ་ལོན་པར་ཐུགས་སུ་ཆུད་ནས་འདུག་གནས་གང་ན་བ་དེར་གཤེགས་ཏེ་བྱོན་ནས།

འདུག་གནས་ཀྱི་ཕྱི་རོལ་དུ་ཞབས་གཉིས་བཀྲུས་ཏེ་འདུག་གནས་སུ་ཞུགས་ནས་གདན་བཤམས་པ་ཉིད་ལ་བཞུགས་ཏེ།

སྐྱིལ་མོ་ཀྲུང་བཅས་ནས་སྐུ་དྲང་པོར་བསྲང་སྟེ་དགོངས་པ་མངོན་དུ་ཕྱོགས་པར་བཞག་གོ།

བཅོམ་ལྡན་འདས་འདུག་གནས་ན་ཉིན་པར་གྱི་གནས་པས་བཞུགས་པ་ན་ལྷའི་སྤྱན་རྣམ་པར་དག་པ་མིའི་ལས་འཕགས་པས་དམར་བུ་ཅན་གྱི་གྲོང་ན་མཐུ་ཆེ་བ་མཐུ་ཆེ་བའི་ལྷ་རྣམས་གནས་ཀྱིས་འབྲེ་བ་གཟིགས་སོ།

གཟིགས་ནས་ཀྱང་དགོངས་ཀ་ནང་དུ་ཡང་དག་འཇོག་ལས་བཞེངས་ཏེ་འདུག་གནས་ནས་བྱུང་ནས།

འདུག་གནས་ཀྱི་གྲིབ་མ་ལ་དགེ་སློང་གི་དགེ་འདུན་

གྱི་གུང་ལ་གདན་བཤམས་པ་ཉིད་ལ་བཞུགས་སོ།

བཞུགས་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ།

ཀུན་དགའ་བོ་ཁྱོད་ཀྱིས་དམར་བུ་ཅན་གྱི་གྲོང་གི་གྲོང་ཁྱེར་རྩིག་པར་བརྩོན་པ་སུ་ཡིན་ཅི་ཐོས།

བཙུན་པ་བདག་གིས་མ་ག་དྷཱའི་སྣ་ཆེན་པོ་ལ་གཏོགས་པ་བྲམ་ཟེ་དབྱར་བྱེད་ལགས་པར་ཐོས་སོ།

ཀུན་དགའ་བོ་ལེགས་སོ།

ལེགས་སོ།

མ་ག་དྷཱའི་སྣ་ཆེན་པོ་ལ་གཏོགས་པ་བྲམ་ཟེ་དབྱར་བྱེད་ནི་མཁས་པ་ཡིན་ཏེ།

འདི་ལྟར་སུམ་བཅུ་རྩ་གསུམ་པའི་ལྷ་རྣམས་དང་ལྷན་ཅིག་བགྲོས་པ་ལྟ་ཞིག །

ཀུན་དགའ་བོ་འདི་ང་འདུག་གནས་ན་ཉིན་པར་གྱི་གནས་པས་བཞུགས་པ་ན་ལྷའི་སྤྱན་རྣམ་པར་དག་པ་མིའི་ལས་འདས་པས་དམར་བུ་ཅན་གྱི་གྲོང་ན་མཐུ་ཆེ་བ་མཐུ་ཆེ་བའི་ལྷ་རྣམས་གནས་ཀྱིས་འབྲེ་བ་གཟིགས་སོ།

ཀུན་དགའ་བོ་ཕྱོགས་གང་དུ་མཐུ་ཆེ་བ་མཐུ་ཆེ་བའི་ལྷ་རྣམས་ཀྱིས་གནས་ཀྱིས་བྲེས་པའི་ཕྱོགས་དེར་འདི་ལྟ་སྟེ།

གནས་ཀྱི་ཕྱིར་མཐུ་ཆེ་བ་མཐུ་ཆེ་བའི་མི་རྣམས་ཀྱི་སེམས་གཞོལ་བར་འགྱུར་རོ།

ཕྱོགས་གང་དུ་ལྷ་བར་མ་དང་ཕལ་པས་གནས་ཀྱིས་བྲེས་པའི་ཕྱོགས་དེར་ནི་འདི་ལྟ་སྟེ།

གནས་ཀྱི་ཕྱིར་མི་བར་མ་དང་ཕལ་པ་རྣམས་ཀྱི་སེམས་གཞོལ་བར་འགྱུར་རོ།

ཀུན་དགའ་བོ་ཕྱོགས་འདིར་ནི་མཐུ་ཆེ་བ་མཐུ་ཆེ་བའི་ལྷ་རྣམས་ཀྱིས་གནས་ཀྱིས་བྲེས་པས་ཕྱོགས་འདིར་འདི་ལྟ་སྟེ།

གནས་ཀྱི་ཕྱིར་དབང་ཆེ་བ་དབང་ཆེ་བར་གྲགས་པའི་མི་རྣམས་ཀྱི་སེམས་གཞོལ་བར་གྱུར་ཏེ།