律部第6卷（འདུལ་བ་ཆ་བཞུགས་སོ། །）

འདུལ་བ་རྣམ་པར་འབྱེད་པ།

བམ་པོ་ཉི་ཤུ་གཉིས་པ།

དེའི་ཚེ་ན་ཚེ་དང་ལྡན་པ་ཀུན་དགའ་བོ་བཅོམ་ལྡན་འདས་ཀྱི་སྣམ་ལོགས་ན་བསིལ་ཡབ་ཐོགས་ཏེ་བཅོམ་ལྡན་འདས་ལ་བསིལ་ཡབ་ཀྱིས་གཡོབ་ཅིང་འདུག་གོ།

དེ་ནས་བཅོམ་ལྡན་འདས་ཀྱིས་ལྷས་བྱིན་སོང་ནས་རིང་པོ་མ་ལོན་པར་ཐུགས་སུ་ཆུད་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ།

ཀུན་དགའ་བོ་སོང་ལ་འོད་མའི་ཚལ་ཀ་ལན་ད་ཀའི་གནས་ན་དགེ་སློང་ཇི་སྙེད་ཉེ་བར་རྟེན་ཅིང་གནས་པ་དེ་དག་ཐམས་ཅད་དཔོང་སའི་ཁང་པར་སྡུས་ཤིག །

ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས།

འོད་མའི་ཚལ་ཀ་ལན་ད་ཀའི་གནས་ན་དགེ་སློང་ཇི་སྙེད་ཉེ་བར་རྟེན་ཅིང་གནས་པ་དེ་དག་ཐམས་ཅད་དཔོང་སའི་ཁང་པར་བསྡུས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་

འདུག་གོ།

མཐའ་གཅིག་ཏུ་འདུག་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ།

བཙུན་པ་འོད་མའི་ཚལ་ཀ་ལན་ད་ཀའི་གནས་ན་དགེ་སློང་ཇི་སྙེད་ཉེ་བར་རྟེན་ཅིང་གནས་པ་དེ་དག་ཐམས་ཅད་དཔོང་སའི་ཁང་པར་མཆིས་ཤིང་མཐུན་པར་གྱུར་ན་བཅོམ་ལྡན་འདས་ད་དེའི་དུས་ལ་བབ་པར་དགོངས་སུ་གསོལ།

དེ་ནས་བཅོམ་ལྡན་འདས་དཔོང་སའི་ཁང་པ་ག་ལ་བ་དེར་གཤེགས་ཏེ་བྱོན་ནས།

དགེ་སློང་གི་དགེ་འདུན་གྱི་གོང་དུ་གདན་བཤམས་པ་ཉིད་ལ་བཞུགས་སོ།

བཞུགས་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ།

དགེ་སློང་དག་ལྔ་པོ་འདི་དག་ནི་འཇིག་རྟེན་ན་ཡོད་ཅིང་སྲིད་པའི་སྟོན་པ་དག་ཡིན་ཏེ།

ལྔ་གང་ཞེ་ན།

འདི་ན་སྟོན་པ་གཅིག་ནི་ཚུལ་ཁྲིམས་ཡོངས་སུ་མ་དག་བཞིན་དུ་བདག་གི་ཚུལ་ཁྲིམས་ཡོངས་སུ་དག་ཅིང་ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་བྱེད་དེ།

དེ་ལ་ཉན་ཐོས་རྣམས་ཀྱིས་ལྷན་ཅིག་འགྲོགས་པའི་རྒྱུས་སྟོན་པ་ཤེས་ལྡན་འདི་ནི་ཚུལ་ཁྲིམས་ཡོངས་སུ་མ་དག་བཞིན་དུ་བདག་གི་ཚུལ་ཁྲིམས་ཡོངས་སུ་དག་ཅིང་ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་ཤེས་མོད་ཀྱི།

བདག་ཅག་གིས་གལ་ཏེ་སྟོན་པ་འདི་གཞན་ལ་བརྗོད་པར་གྱུར་ན།

དེས་འདི་ཡིད་མི་དགའ་བར་འགྱུར་བས་བདག་ཅག་ལ་གང་གིས་འདི་ཡིད་མི་དགའ་བར་གྱུར་པ་དེས་སྟོན་པ་ལ་ཀུན་དུ་སྤྱད་པས་ཅི་བྱ་སྟེ།

སྟོན་པ་ཤེས་ལྡན་འདི་རང་ཉིད་ཀྱིས་ཤེས་པར་ཟད་དོ།

འདི་བདག་ཅག་ལ་འདི་ལྟ་སྟེ་ཆོས་གོས་དང་།

བསོད་སྙོམས་དང་།

གནས་མལ་དང་།

ན་བའི་རྐྱེན་དང་།

སྨན་གྱི་ཡོ་བྱད་དག་གིས་སེམས་

པར་བྱེད་དོ་སྙམ་པས་ཉན་ཐོས་རྣམས་ཀྱང་དེ་ལ་ཚུལ་ཁྲིམས་ཀྱི་སྒོ་ནས་རྗེས་སུ་བསྲུང་བ་བྱ་བར་སེམས་སོ།

སྟོན་པ་དེ་ལྟ་བུ་ནི་ཉན་ཐོས་རྣམས་ལས་ཚུལ་ཁྲིམས་རྗེས་སུ་སྲུང་བར་རེ་བར་བྱེད་དེ།

འདི་ནི་འཇིག་རྟེན་ན་ཡོད་ཅིང་སྲིད་པའི་སྟོན་པ་དང་པོ་ཡིན་ནོ།

གཞན་ཡང་འདི་ན་སྟོན་པ་གཅིག་ནི་འཚོ་བ་ཡོངས་སུ་མ་དག་བཞིན་དུ་བདག་གི་འཚོ་བ་ཡོངས་སུ་དག་ཅིང་ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་བྱེད་དེ།

དེ་ལ་ཉན་ཐོས་རྣམས་ཀྱིས་ལྷན་ཅིག་འགྲོགས་པའི་རྒྱུས་སྟོན་པ་ཤེས་ལྡན་འདི་ནི་འཚོ་བ་ཡོངས་སུ་མ་དག་བཞིན་དུ་བདག་གི་འཚོ་བ་ཡོངས་སུ་དག་ཅིང་ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་ཤེས་མོད་ཀྱི།

བདག་ཅག་གིས་སྟོན་པ་འདི་གལ་ཏེ་གཞན་ལ་བརྗོད་པར་གྱུར་ན་དེས་འདི་ཡིད་མི་དགའ་བར་འགྱུར་བས་བདག་ཅག་ལ་གང་གིས་འདི་ཡིད་མི་དགའ་བར་གྱུར་པ་དེས་སྟོན་པ་ལ་ཀུན་དུ་སྤྱད་པས་ཅི་བྱ་སྟེ།

སྟོན་པ་ཤེས་ལྡན་འདི་རང་ཉིད་ཤེས་པར་ཟད་དོ།

འདི་བདག་ཅག་ལ་འདི་ལྟ་སྟེ།

ཆོས་གོས་དང་།

བསོད་སྙོམས་དང་།

གནས་མལ་དང་།

ན་བའི་རྐྱེན་དང་།

སྨན་གྱི་ཡོ་བྱད་དག་གིས་སེམས་པར་བྱེད་དོ་སྙམ་པས་ཉན་ཐོས་རྣམས་ཀྱང་དེ་ལ་འཚོ་བའི་སྒོ་ནས་རྗེས་སུ་བསྲུང་བ་བྱ་བར་སེམས་སོ།

སྟོན་པ་དེ་ལྟ་བུ་ནི་ཉན་ཐོས་རྣམས་ལས་འཚོ་བ་རྗེས་སུ་སྲུང་བ་རེ་བར་བྱེད་དེ།

འདི་ནི་འཇིག་རྟེན་ན་ཡོད་ཅིང་སྲིད་པའི་སྟོན་པ་གཉིས་པ་ཡིན་ནོ།

གཞན་ཡང་འདི་ན་སྟོན་པ་གཅིག་ནི་ཤེས་པ་དང་མཐོང་བ་ཡོངས་སུ་མ་དག་བཞིན་དུ་བདག་གི་ཤེས་པ་དང་མཐོང་བ་ཡོངས་སུ་དག་ཅིང་ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་བྱེད་དེ།

དེ་ལ་ཉན་ཐོས་རྣམས་ཀྱིས་ལྷན་ཅིག་འགྲོགས་པའི་རྒྱུས་སྟོན་པ་ཤེས་ལྡན་འདི་ནི་ཤེས་པ་དང་མཐོང་བ་ཡོངས་སུ་མ་དག་བཞིན་དུ་བདག་གི་ཤེས་པ་དང་མཐོང་བ་ཡོངས་སུ་དག་ཅིང་ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་ཤེས་མོད་ཀྱི།

བདག་ཅག་གིས་སྟོན་པ་འདི་གཞན་ལ་བརྗོད་པར་གྱུར་ན་དེས་འདི་ཡིད་མི་དགའ་བར་འགྱུར་བས།

བདག་ཅག་ལ་གང་གིས་འདི་ཡིད་མི་དགའ་བར་གྱུར་པ་དེས་སྟོན་པ་ལ་ཀུན་དུ་སྤྱད་པས་ཅི་བྱ་སྟེ།

སྟོན་པ་ཤེས་ལྡན་འདི་རང་ཉིད་

ཤེས་པར་ཟད་དོ།

འདི་བདག་ཅག་ལ་འདི་ལྟ་སྟེ།

ཆོས་གོས་དང་།

བསོད་སྙོམས་དང་།

གནས་མལ་དང་།

ན་བའི་རྐྱེན་དང་།

སྨན་གྱི་ཡོ་བྱད་དག་གིས་སེམས་པར་བྱེད་དོ་སྙམ་པས་ཉན་ཐོས་རྣམས་ཀྱང་དེ་ལ་ཤེས་པ་དང་མཐོང་བའི་སྒོ་ནས་རྗེས་སུ་བསྲུང་བ་བྱ་བར་སེམས་སོ།

སྟོན་པ་དེ་ལྟ་བུ་ནི་ཉན་ཐོས་རྣམས་ལས་ཤེས་པ་དང་མཐོང་བ་རྗེས་སུ་སྲུང་བ་རེ་བར་བྱེད་དེ།

འདི་ནི་འཇིག་རྟེན་ན་ཡོད་ཅིང་སྲིད་པའི་སྟོན་པ་གསུམ་པ་ཡིན་ནོ།

གཞན་ཡང་འདི་ན་སྟོན་པ་གཅིག་ནི་བརྡ་སྤྲོད་པ་ཕུན་སུམ་ཚོགས་པ་མ་ཡིན་བཞིན་དུ་བདག་ནི་བརྡ་སྤྲོད་པ་ཕུན་སུམ་ཚོགས་ཤིང་།

ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་བྱེད་དེ།

དེ་ལ་ཉན་ཐོས་རྣམས་ཀྱིས་ལྷན་ཅིག་འགྲོགས་པའི་རྒྱུས་སྟོན་པ་ཤེས་ལྡན་འདི་ནི་བརྡ་སྤྲོད་པ་ཕུན་སུམ་ཚོགས་པ་མ་ཡིན་བཞིན་དུ་བདག་ནི་བརྡ་སྤྲོད་པ་ཕུན་སུམ་ཚོགས་ཤིང་ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་ཤེས་མོད་ཀྱི།

བདག་ཅག་གིས་སྟོན་པ་འདི་གཞན་ལ་བརྗོད་པར་གྱུར་ན་དེས་འདི་ཡིད་མི་དགའ་བར་འགྱུར་བས་བདག་ཅག་ལ་གང་གིས་འདི་ཡིད་མི་དགའ་བར་གྱུར་པ་དེས་སྟོན་པ་ལ་ཀུན་དུ་སྤྱད་པས་ཅི་བྱ་སྟེ།

སྟོན་པ་ཤེས་ལྡན་འདི་རང་ཉིད་ཤེས་པར་ཟད་དོ།

འདི་བདག་ཅག་ལ་འདི་ལྟ་སྟེ།

ཆོས་གོས་དང་།

བསོད་སྙོམས་དང་།

གནས་མལ་དང་།

ན་བའི་རྐྱེན་དང་།

སྨན་གྱི་ཡོ་བྱད་དག་གིས་སེམས་པར་བྱེད་དོ་སྙམ་པས་ཉན་ཐོས་རྣམས་ཀྱང་དེ་ལ་བརྡ་སྤྲོད་པ་ཕུན་སུམ་ཚོགས་པའི་སྒོ་ནས་རྗེས་སུ་བསྲུང་བ་བྱ་བར་སེམས་སོ།

སྟོན་པ་དེ་ལྟ་བུ་ནི་ཉན་ཐོས་རྣམས་ལས་བརྡ་སྤྲོད་པ་ཕུན་སུམ་ཚོགས་པ་རྗེས་སུ་སྲུང་བ་རེ་བར་བྱེད་དེ།

འདི་ནི་འཇིག་རྟེན་ན་ཡོད་ཅིང་སྲིད་པའི་སྟོན་པ་བཞི་པ་ཡིན་ནོ།

གཞན་ཡང་འདི་ན་སྟོན་པ་གཅིག་ནི་ཆོས་འདུལ་བ་ཉེས་པར་བཤད་པ་དང་ལྡན་བཞིན་དུ་བདག་ནི་ཆོས་འདུལ་བ་ལེགས་པར་གསུངས་པ་དང་ལྡན་ཞིང་ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་བྱེད་དེ།

དེ་ལ་ཉན་ཐོས་རྣམས་ཀྱིས་ལྷན་ཅིག་འགྲོགས་པའི་རྒྱུས་སྟོན་པ་ཤེས་ལྡན་འདི་ནི་ཆོས་འདུལ་བ་ཉེས་

པར་བཤད་པ་དང་ལྡན་བཞིན་དུ་བདག་ནི་ཆོས་འདུལ་བ་ལེགས་པར་གསུངས་པ་དང་ལྡན་ཞིང་ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་ཤེས་མོད་ཀྱི།

བདག་ཅག་གིས་སྟོན་པ་འདི་གཞན་ལ་བརྗོད་པར་གྱུར་ན།

དེས་འདི་ཡིད་མི་དགའ་བར་འགྱུར་བས་བདག་ཅག་ལ་གང་གིས་འདི་ཡིད་མི་དགའ་བར་གྱུར་པ་དེས་སྟོན་པ་ལ་ཀུན་དུ་སྤྱད་པས་ཅི་བྱ་སྟེ།

སྟོན་པ་ཤེས་ལྡན་འདི་རང་ཉིད་ཤེས་པར་ཟད་དོ།

འདི་བདག་ཅག་ལ་འདི་ལྟ་སྟེ།

ཆོས་གོས་དང་།

བསོད་སྙོམས་དང་།

གནས་མལ་དང་།

ན་བའི་རྐྱེན་དང་།

སྨན་གྱི་ཡོ་བྱད་དག་གིས་སེམས་པར་བྱེད་དོ་སྙམ་པས་ཉན་ཐོས་རྣམས་ཀྱང་དེ་ལ་ཆོས་འདུལ་བ་ལེགས་པར་གསུངས་པའི་སྒོ་ནས་རྗེས་སུ་བསྲུང་བ་བྱ་བར་སེམས་སོ།

སྟོན་པ་དེ་ལྟ་བུ་ནི་ཉན་ཐོས་རྣམས་ལས་ཆོས་འདུལ་བ་ལེགས་པར་བཤད་པ་རྗེས་སུ་སྲུང་བ་རེ་བར་བྱེད་དེ།

འདི་ནི་འཇིག་རྟེན་ན་ཡོད་ཅིང་སྲིད་པའི་སྟོན་པ་ལྔ་པ་ཡིན་ནོ།

དགེ་སློང་དག་ང་ནི་ཚུལ་ཁྲིམས་ཡོངས་སུ་དག་པ་ཁོ་ན་ཡིན་པས་ངའི་ཚུལ་ཁྲིམས་ཡོངས་སུ་དག་ཅིང་ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་བྱེད་དེ།

ང་ལ་ཉན་ཐོས་རྣམས་ཚུལ་ཁྲིམས་ཀྱི་སྒོ་ནས་རྗེས་སུ་བསྲུང་བ་བྱ་བར་མི་སེམས་ཤིང་ང་ཡང་ཉན་ཐོས་རྣམས་ལས་ཚུལ་ཁྲིམས་རྗེས་སུ་སྲུང་བ་རེ་བར་མི་བྱེད་དོ།

དགེ་སློང་དག་ང་ནི་འཚོ་བ་ཡོངས་སུ་དག་པ་ཁོ་ན་ཡིན་པས་ངའི་འཚོ་བ་ཡོངས་སུ་དག་ཅིང་ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་བྱེད་དེ།

ང་ལ་ཉན་ཐོས་རྣམས་འཚོ་བའི་སྒོ་ནས་རྗེས་སུ་བསྲུང་བ་བྱ་བར་མི་སེམས་ཤིང་ང་ཡང་ཉན་ཐོས་རྣམས་ལས་འཚོ་བ་ཡོངས་སུ་སྲུང་བ་རེ་བར་མི་བྱེད་དོ།

དགེ་སློང་དག་ང་ནི་ཤེས་པ་དང་མཐོང་བ་ཡོངས་སུ་དག་པ་ཁོ་ན་ཡིན་པས་ངའི་ཤེས་པ་དང་མཐོང་བ་ཡོངས་སུ་དག་ཅིང་ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་བྱེད་དེ།

ང་ལ་ཉན་ཐོས་རྣམས་ཤེས་པ་དང་མཐོང་བའི་སྒོ་ནས་རྗེས་སུ་བསྲུང་བ་བྱ་བར་མི་སེམས་ཤིང་ང་ཡང་ཉན་ཐོས་རྣམས་ལས་ཤེས་པ་དང་མཐོང་བ་རྗེས་སུ་སྲུང་བ་རེ་བར་མི་བྱེད་དོ།

དགེ་སློང་དག་ང་ནི་བརྡ་སྤྲོད་པ་ཕུན་སུམ་ཚོགས་པ་ཁོ་ན་ཡིན་པས་ངའི་བརྡ་སྤྲོད་པ་ཕུན་སུམ་ཚོགས་

ཤིང་ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་བྱེད་དེ།

ང་ལ་ཉན་ཐོས་རྣམས་བརྡ་སྤྲོད་པ་ཕུན་སུམ་ཚོགས་པའི་སྒོ་ནས་རྗེས་སུ་སྲུང་བ་བྱ་བར་མི་སེམས་ཤིང་།

ང་ཡང་ཉན་ཐོས་རྣམས་ལས་བརྡ་སྤྲོད་པ་ཕུན་སུམ་ཚོགས་པ་རྗེས་སུ་སྲུང་བ་རེ་བར་མི་བྱེད་དོ།

དགེ་སློང་དག་ང་ནི་ཆོས་འདུལ་བ་ལེགས་པར་གསུངས་པ་དང་ལྡན་པ་ཁོ་ན་ཡིན་པས་ངའི་ཆོས་འདུལ་བ་ལེགས་པར་གསུངས་པ་ཡིན་ཞིང་ཀུན་ནས་ཉོན་མོངས་པ་མེད་དོ་ཞེས་དམ་འཆའ་བར་བྱེད་དེ།

ང་ལ་ཉན་ཐོས་རྣམས་ཆོས་འདུལ་བ་ལེགས་པར་གསུངས་པའི་སྒོ་ནས་རྗེས་སུ་བསྲུང་བ་བྱ་བར་མི་སེམས་ཤིང་།

ང་ཡང་ཉན་ཐོས་རྣམས་ལས་ཆོས་འདུལ་བ་ལེགས་པར་བཤད་པ་རྗེས་སུ་སྲུང་བ་རེ་བར་མི་བྱེད་དོ།

དགེ་སློང་དག་ང་ནི་ཁྱེད་ལ་ཚར་བཅད་ཅིང་ཚར་བཅད་ཅིང་སྨྲ་བར་བྱེད་ཟིལ་གྱིས་མནན་ཅིང་ཟིལ་གྱིས་མནན་ཅིང་སྨྲ་བར་བྱེད་དེ།

ཁྱེད་ལ་དབྱིག་ཏུ་མི་འཛིན་ཅིང་རྫ་མཁན་གྱི་སྣོད་སོ་མ་བཏང་བ་དག་བཞིན་དུ་གང་སྙིང་པོ་ཡོད་པ་དེ་འཇོག་པར་བྱེད་ཀྱིས་ངའི་ཚིག་གི་ལམ་དག་ལ་བཟོད་པར་གྱིས་ཤིག །

དེ་ནས་ལྷས་བྱིན་གྱིས་ཀོ་ཀ་ལི་ཀ་དང་།

ཁན་ད་དྲ་བྱ་དང་།

ཀ་ཊ་མོ་ར་ཀ་ཏི་ཥྱ་དང་།

རྒྱ་མཚོས་བྱིན་དག་ལ་སྨྲས་པ།

ཀོ་ཀ་ལི་ཀ །

ཁན་ད་དྲ་བྱ།

ཀ་ཊ་མོ་ར་ཀ་ཏི་ཥྱ།

རྒྱ་མཚོས་བྱིན་དག་ཁྱེད་ཅག་ཚུར་ཤེག །

དགེ་སྦྱོང་གཽ་ཏ་མ་འདུག་བཞིན་དུ་ཉན་ཐོས་ཀྱི་དགེ་འདུན་མཐུན་པ་དབྱེ་བར་བྱ་ཞིང་འཁོར་ལོ་ཡང་དབྱེ་བར་བྱ་སྟེ།

དེས་ན་བདག་ཅག་ཤི་ཞིང་།

དུས་ལ་བབ་པ་དག་ལ་དགེ་སྦྱོང་གཽ་ཏ་མ་དེ་ཙམ་དུ་རྫུ་འཕྲུལ་ཆེ་བ།

དེ་ཙམ་དུ་མཐུ་ཆེ་བ་འདུག་བཞིན་དུ་ལྷས་བྱིན་དང་།

ཀོ་ཀ་ལི་ཀ་དང་།

ཁན་ད་དྲ་བྱ་དང་།

ཀ་ཊ་མོ་ར་ཀ་ཏི་ཥྱ་དང་།

རྒྱ་མཚོས་བྱིན་གྱིས་ཉན་ཐོས་ཀྱི་དགེ་འདུན་མཐུན་པ་ཕྱེ་ཞིང་འཁོར་ལོ་ཡང་དབྱེ་བ་བྱས་སོ་ཞེས་ཕྱོགས་དང་ཕྱོགས་མཚམས་རྣམས་སུ་སྙན་པའི་སྒྲའི་ཚོགས་རྒྱ་ཆེན་པོ་དགེ་བ་མངོན་པར་གྲགས་པར་འགྱུར་རོ།

ལྷས་བྱིན་བདག་ཅག་གིས་དེ་ལྟར་བྱར་མི་ནུས་ཏེ།

དེ་ཅིའི་ཕྱིར་ཞེ་ན།

བཅོམ་ལྡན་འདས་ཀྱི་ཉན་ཐོས་མཐུ་ཆེ་བ།

རྫུ་འཕྲུལ་ཆེ་བ།

ལྷའི་མིག་དང་ལྡན་པ།

གཞན་གྱི་སེམས་

ཤེས་པ་གང་དག་ཡོད་པ་དེ་དག་ནི་ཐག་རིང་པོ་ཡང་མཐོང་ལ་དྲུང་ན་འདུག་པས་ཀྱང་མི་མཐོང་ཞིང་དེ་དག་གི་སེམས་ཀྱིས་བདག་ཅག་གི་སེམས་ལ་ཁྱབ་པར་བྱ་སྟེ།

ཡིད་ཀྱིས་ཀྱང་བདག་ཅག་རྣམ་པར་ཤེས་པར་བྱེད་པས་དེ་དག་གིས་བདག་ཅག་འཕགས་པ་ཉིད་ཀྱང་ཤེས་པར་འགྱུར་བའི་ཕྱིར་རོ།

ཀོ་ཀ་ལི་ཀ་ཐབས་འགའ་ཞིག་ཡོད་དོ།

ལྷས་བྱིན་ཐབས་དེ་གང་ཡིན།

ཚུར་ཤེག་དང་བདག་ཅག་དགེ་སློང་གནས་བརྟན་གནས་བརྟན་རྣམས་ཀྱི་དྲུང་དུ་དོང་སྟེ།

གནས་བརྟན་དག་ཐུགས་ལས་ཆུང་ངུར་མཛོད་ཅིག་དང་བདག་ཅག་གིས་གནས་བརྟན་རྣམས་ཡོ་བྱད་ཐམས་ཅད་ཀྱིས་མི་བྲེལ་བར་བགྱིའོ་ཞེས་ཡོ་བྱད་ཐམས་ཅད་ཀྱིས་བསྟབ་པར་བྱའོ།

གཞོན་ནུ་རྣམས་ལ་ནི་ལྷུང་བཟེད་དང་ཆོས་གོས་དང་དྲ་བ་དང་ཕོར་བུ་དང་སྐ་རགས་དང་ལུང་དབོག་པ་དང་།

བཀླག་པ་དང་ཁ་ཏོན་དང་།

རྣལ་འབྱོར་དང་ཡིད་ལ་བྱ་བས་བསྙེན་བཀུར་དང་སྟོངས་མོ་བྱའོ།

ལྷས་བྱིན་གལ་ཏེ་ཐབས་དེ་ལྟ་བུ་ཡོད་ན་དེ་ལྟར་བྱའོ།

དེ་ནས་ལྷས་བྱིན་གྱིས་དགེ་འདུན་མཐུན་པ་དབྱེ་བའི་ཕྱིར་བརྟུལ་བ་དང་།

དགེ་སློང་གནས་བརྟན་གནས་བརྟན་རྣམས་ཀྱིས་འཕགས་མ་ཐག་ཏུ་ལྷས་བྱིན་གྱིས་དགེ་འདུན་མཐུན་པ་དབྱེ་བའི་ཕྱིར་བརྟུལ་ཏོ།

ཞེས་རྣམ་པར་ཤེས་པར་གྱུར་ནས།

དགེ་སློང་རྣམས་ཀྱིས་སྐབས་དེ་བཅོམ་ལྡན་འདས་ལ་གསོལ་པ་དང་།

དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ།

དགེ་སློང་དག་ལྷས་བྱིན་དང་གཞན་ཡང་དེ་ལྟ་བུ་གང་ཡིན་པ་ལ་བཞམས་ཏེ་བསྒོ་བར་བྱའོ།

འདི་སྐད་ཅེས་བསྒོ་བར་བྱ་སྟེ།

ཚེ་དང་ལྡན་པ་ལྷས་བྱིན་ཁྱོད་དགེ་འདུན་མཐུན་པ་དབྱེ་བའི་ཕྱིར་རྟུལ་བར་མ་བྱེད་ཅིག །

དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མ་འདུག་ཤིག །

ཚེ་དང་ལྡན་པ་ལྷས་བྱིན་ཁྱོད་དགེ་འདུན་དང་མཐུན་པར་གྱིས་ཤིག །

དགེ་འདུན་མཐུན་མི་ཕྱེད་ཀུན་དུ་དགའ་མི་རྩོད་མཆོག་གཅིག་འདོན་པ་གཅིག་ཅིང་།

ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ།

སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས།

ཚེ་དང་

ལྡན་པ་ལྷས་བྱིན་ཁྱོད་དགེ་འདུན་འབྱེད་པར་བྱེད་པའི་གཞི་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ།

དགེ་སློང་རྣམས་ཀྱིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ལྷས་བྱིན་ལ་ཚེ་དང་ལྡན་པ་ལྷས་བྱིན་ཁྱོད་དགེ་འདུན་མཐུན་པ་དབྱེ་བའི་ཕྱིར་རྟུལ་བར་མ་བྱེད་ཅིག །

དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མ་འདུག་ཤིག །

ཚེ་དང་ལྡན་པ་ལྷས་བྱིན་ཁྱོད་དགེ་འདུན་དང་མཐུན་པར་གྱིས་ཤིག །

དགེ་འདུན་མཐུན་མི་ཕྱེད་ཀུན་དུ་དགའ་མི་རྩོད་མཆོག་གཅིག་འདོན་པ་གཅིག་ཅིང་།

ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ།

སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས།

ཚེ་དང་ལྡན་པ་ལྷས་བྱིན་ཁྱོད་དགེ་འདུན་འབྱེད་པར་བྱེད་པའི་གཞི་འདི་ལྟ་བུ་འདི་ཐོང་ཤིག་ཅེས་བཞམས་ཏེ་བསྒོའོ།

དགེ་སློང་རྣམས་ཀྱིས་དེ་ལ་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་རྒྱས་པར་གསོལ་པ་དང་།

བཅོམ་ལྡན་འདས་ཀྱིས་བཀའ་སྩལ་པ།

དགེ་སློང་དག་ཁྱེད་ཀྱིས་ལྷས་བྱིན་དང་གཞན་ཡང་དེ་ལྟ་བུ་གང་ཡིན་པ་ལ་གསོལ་བ་དང་བཞིའི་ལས་ཀྱིས་བསྒོ་བར་བྱའོ།

འདི་ལྟར་བསྒོ་བར་བྱ་སྟེ།

གནས་མལ་བཤམ་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ།

དགེ་འདུན་བཙུན་པ་རྣམས་གསན་དུ་གསོལ།

དགེ་སློང་ལྷས་བྱིན་འདིས་དགེ་འདུན་མཐུན་པ་དབྱེ་བའི་སླད་དུ་བརྟུལ་ཏེ།

དབྱེན་བགྱིད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མཆིས་ནས།

འདི་ལ་དགེ་སློང་མང་པོས་བཞམས་ཏེ་བསྒོ་ན་འདི་ལ་དགེ་སློང་མང་པོས་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་

སྙད་འདོགས་པར་བགྱིད་ན།

གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་།

དགེ་འདུན་གྱིས་ལྷས་བྱིན་ལ་ཚེ་དང་ལྡན་པ་ལྷས་བྱིན་ཁྱོད་དགེ་འདུན་མཐུན་པ་དབྱེ་བའི་ཕྱིར་རྟུལ་བར་མ་བྱེད་ཅིག །

དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མ་འདུག་ཤིག །

ཚེ་དང་ལྡན་པ་ལྷས་བྱིན་ཁྱོད་དགེ་འདུན་དང་མཐུན་པར་གྱིས་ཤིག །

དགེ་འདུན་མཐུན་མི་ཕྱེད་ཀུན་དུ་དགའ་མི་རྩོད་མཆོག་གཅིག་འདོན་པ་གཅིག་ཅིང་།

ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ།

སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས།

ཚེ་དང་ལྡན་པ་ལྷས་བྱིན་ཁྱོད་དགེ་འདུན་འབྱེད་པར་བྱེད་པའི་གཞི་འདི་ལྟ་བུ་འདི་ཐོང་ཤིག་ཅེས་གསོལ་བ་དང་བཞིའི་ལས་ཀྱིས་བསྒོ་བ་མཛད་དོ།

འདི་ནི་གསོལ་བའོ།

ལས་ནི་འདི་ལྟར་བྱ་སྟེ།

དགེ་འདུན་བཙུན་པ་རྣམས་གསན་དུ་གསོལ།

དགེ་སློང་ལྷས་བྱིན་འདིས་དགེ་འདུན་མཐུན་པ་དབྱེ་བའི་སླད་དུ་བརྟུལ་ཏེ་དབྱེན་བགྱིད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མཆིས་ནས།

འདི་ལ་དགེ་སློང་མང་པོས་བཞམས་ཏེ་བསྒོ་ན་འདི་ལ་དགེ་སློང་མང་པོས་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ནི་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་དེ།

དེའི་སླད་དུ་དགེ་འདུན་གྱིས་ལྷས་བྱིན་ལ་ཚེ་དང་ལྡན་པ་ལྷས་བྱིན་ཁྱོད་དགེ་འདུན་མཐུན་པ་དབྱེ་བའི་ཕྱིར་རྟུལ་བར་མ་བྱེད་ཅིག །

དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མ་འདུག་ཤིག །

ཚེ་དང་ལྡན་པ་ལྷས་བྱིན་ཁྱོད་དགེ་འདུན་དང་མཐུན་པར་གྱིས་ཤིག །

དགེ་འདུན་མཐུན་མི་ཕྱེད་ཀུན་དུ་དགའ་མི་རྩོད་མཆོག་གཅིག་འདོན་པ་གཅིག་ཅིང་།

ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ།

སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས།

ཚེ་དང་ལྡན་པ་ལྷས་བྱིན་ཁྱོད་དགེ་འདུན་འབྱེད་པར་བྱེད་པའི་གཞི་འདི་ལྟ་བུ་འདི་ཐོང་ཤིག་ཅེས་གསོལ་བ་དང་བཞིའི་

ལས་ཀྱིས་བསྒོ་བ་མཛད་ན།

ཚེ་དང་ལྡན་པ་གང་དག་ལྷས་བྱིན་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་པར་བཟོད་པ་དེ་དག་ནི་ཅང་མ་གསུང་ཤིག །

གང་དག་མི་བཟོད་པ་དེ་དག་ནི་གསུང་ཤིག །

འདི་ནི་ལས་བརྗོད་པ་དང་པོ་སྟེ།

དེ་བཞིན་དུ་ལན་གཉིས་ལན་གསུམ་དུ་བཟླས།

དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་ལྷས་བྱིན་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་ལགས་ཏེ།

འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ།

དགེ་སློང་རྣམས་ཀྱིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ལྷས་བྱིན་ལ་གསོལ་བ་དང་བཞིའི་ལས་ཀྱིས་བསྒོའོ།

གསོལ་བ་དང་བཞིའི་ལས་ཀྱིས་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་དོ།

དེའི་གྲོགས་བྱེད་པའི་དགེ་སློང་མི་མཐུན་པར་སྨྲ་བའི་རྗེས་སུ་ཕྱོགས་པ་བཞི་པོ་ཀོ་ཀ་ལི་ཀ་དང་།

ཁན་ད་དྲ་བྱ་དང་།

ཀ་ཊ་མོ་ར་ཀ་ཏི་ཥྱ་དང་།

རྒྱ་མཚོས་བྱིན་དེ་དག་ཀྱང་དགེ་སློང་རྣམས་ལ་འདི་སྐད་ཅེས་ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག །

དེ་ཅིའི་ཕྱིར་ཞེ་ན།

ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ་འདུལ་བ་སྨྲ་བ།

དགེ་སློང་འདི་ནི་ཆོས་དང་འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ་དགེ་སློང་འདི་ནི་ཤེས་བཞིན་དུ་སྨྲའི།

མི་ཤེས་པར་མ་ཡིན་པའི་ཕྱིར་ཏེ།

དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་རྒྱས་པར་གསོལ་པ་དང་།

བཅོམ་ལྡན་འདས་ཀྱིས་བཀའ་སྩལ་པ།

དགེ་སློང་དག་ཀོ་ཀ་ལི་ཀ་དང་།

ཁན་ད་དྲ་བྱ་དང་།

ཀ་ཊ་མོ་ར་ཀ་ཏི་ཥྱ་དང་།

རྒྱ་མཚོས་བྱིན་དང་།

གཞན་ཡང་དེ་ལྟ་བུ་གང་ཡིན་པ་ལ་བཞམས་ཏེ་བསྒོ་བར་བྱའོ།

འདི་སྐད་བསྒོ་བར་བྱ་སྟེ།

ཚེ་དང་ལྡན་པ་ཀོ་ཀ་ལི་ཀ །

ཁན་ད་དྲ་བྱ།

ཀ་ཊ་མོ་ར་ཀ་ཏི་ཥྱ།

རྒྱ་མཚོས་བྱིན་ཁྱེད་ཤེས་

བཞིན་དུ་དགེ་སློང་གང་དགེ་འདུན་མཐུན་པ་དབྱེ་བའི་ཕྱིར་རྟུལ་བར་བྱེད་ཅིང་།

དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་འདུག་པ་དེའི་གྲོགས་བྱེད་ཅིང་མི་མཐུན་པར་སྨྲ་བའི་རྗེས་སུ་ཕྱོགས་པར་མ་བྱེད་ཅིག །

དགེ་སློང་རྣམས་ལ་འདི་སྐད་ཅེས་ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག །

དེ་ཅིའི་ཕྱིར་ཞེ་ན།

ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ།

འདུལ་བ་སྨྲ་བ།

དགེ་སློང་འདི་ནི་ཆོས་དང་འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ།

དགེ་སློང་འདི་ནི་ཤེས་བཞིན་དུ་སྨྲའི།

མི་ཤེས་པར་མ་ཡིན་པའི་ཕྱིར་ཏེ།

དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་མ་ཟེར་ཅིག །

དེ་ཅིའི་ཕྱིར་ཞེ་ན།

ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ་མ་ཡིན།

འདུལ་བ་སྨྲ་བ་མ་ཡིན་གྱི།

ཚེ་དང་ལྡན་པ་དག་དགེ་སློང་འདི་ནི་ཆོས་མ་ཡིན་པ་སྨྲ་བ།

འདུལ་བ་མ་ཡིན་པ་སྨྲ་བ།

དགེ་སློང་འདི་ནི་ཆོས་མ་ཡིན་པ་དང་འདུལ་བ་མ་ཡིན་པ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ།

དགེ་སློང་འདི་ནི་མི་ཤེས་བཞིན་དུ་སྨྲའི་ཤེས་པར་མ་ཡིན་པའི་ཕྱིར་ཏེ།

དགེ་སློང་འདི་གང་ལ་འདོད་ཅིང་བཟོད་པ་དེ་ལ་ཚེ་དང་ལྡན་པ་དག་འདོད་ཅིང་བཟོད་པར་མ་བྱེད་ཅིག །

ཚེ་དང་ལྡན་པ་དག་ཁྱེད་དགེ་འདུན་འབྱེད་འདོད་པར་མ་བྱེད་པར་ཚེ་དང་ལྡན་པ་དག་དགེ་འདུན་མཐུན་པ་ཉིད་དུ་འདོད་པར་གྱིས་ཤིག །

ཚེ་དང་ལྡན་པ་དག་དགེ་འདུན་དང་མཐུན་པར་གྱིས་ཤིག །

དགེ་འདུན་མཐུན་མི་ཕྱེད་ཀུན་དུ་དགའ་མི་རྩོད།

མཆོག་གཅིག་འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ།

སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས།

ཚེ་དང་ལྡན་པ་དག་དགེ་འདུན་འབྱེད་པའི་རྗེས་སུ་ཕྱོགས་ཤིང་མི་མཐུན་པར་སྨྲ་བ་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ།

དགེ་སློང་རྣམས་ཀྱིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་དེའི་གྲོགས་བྱེད་པའི་དགེ་སློང་མི་མཐུན་པར་སྨྲ་བའི་རྗེས་སུ་

ཕྱོགས་པ་བཞི་པོ་ཀོ་ཀ་ལི་ཀ་དང་།

ཁན་ད་དྲ་བྱ་དང་།

ཀ་ཊ་མོ་ར་ཀ་ཏི་ཥྱ་དང་།

རྒྱ་མཚོས་བྱིན་རྣམས་ལ་འདི་སྐད་ཅེས་ཚེ་དང་ལྡན་པ་དག་ཁྱེད་ཤེས་བཞིན་དུ་དགེ་སློང་གང་དགེ་འདུན་མཐུན་པ་དབྱེ་བའི་ཕྱིར་རྟུལ་བར་བྱེད་ཅིང་དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་འདུག་པ་དེའི་གྲོགས་བྱེད་ཅིང་མི་མཐུན་པར་སྨྲ་བའི་རྗེས་སུ་ཕྱོགས་པར་མ་བྱེད་ཅིག །

དགེ་སློང་རྣམས་ལ་འདི་སྐད་ཅེས་ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག །

དེ་ཅིའི་ཕྱིར་ཞེ་ན།

ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ།

འདུལ་བ་སྨྲ་བ།

དགེ་སློང་འདི་ནི་ཆོས་དང་།

འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ།

དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ།

དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་མ་ཟེར་ཅིག །

དེ་ཅིའི་ཕྱིར་ཞེ་ན།

ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ་མ་ཡིན།

འདུལ་བ་སྨྲ་བ་མ་ཡིན་གྱི།

ཚེ་དང་ལྡན་པ་དག་དགེ་སློང་འདི་ནི་ཆོས་མ་ཡིན་པ་སྨྲ་བ།

འདུལ་བ་མ་ཡིན་པ་སྨྲ་བ།

དགེ་སློང་འདི་ནི་ཆོས་མ་ཡིན་པ་དང་།

འདུལ་བ་མ་ཡིན་པ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ།

དགེ་སློང་འདི་ནི་མི་ཤེས་བཞིན་དུ་སྨྲའི་ཤེས་པར་མ་ཡིན་པའི་ཕྱིར་ཏེ།

དགེ་སློང་འདི་གང་ལ་འདོད་ཅིང་བཟོད་པ་དེ་ལ་ཚེ་དང་ལྡན་པ་དག་འདོད་ཅིང་བཟོད་པར་མ་བྱེད་ཅིག །

ཚེ་དང་ལྡན་པ་དག་ཁྱེད་དགེ་འདུན་འབྱེད་འདོད་པར་མ་བྱེད་པར་ཚེ་དང་ལྡན་པ་དག་དགེ་འདུན་མཐུན་པ་ཉིད་དུ་འདོད་པར་གྱིས་ཤིག །

ཚེ་དང་ལྡན་པ་དག་དགེ་འདུན་དང་མཐུན་པར་གྱིས་ཤིག །

དགེ་འདུན་མཐུན་མི་ཕྱེད་ཀུན་དུ་དགའ་མི་རྩོད།

མཆོག་གཅིག་འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ།

སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས།

ཚེ་དང་ལྡན་པ་དག་དགེ་འདུན་འབྱེད་པའི་རྗེས་སུ་ཕྱོགས་

ཤིང་མི་མཐུན་པར་སྨྲ་བ་འདི་ལྟ་བུ་འདི་ཐོང་ཤིག་ཅེས་བསྒོའོ།

དགེ་སློང་རྣམས་ཀྱིས་དེ་དག་ལ་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་རྒྱས་པར་གསོལ་པ་དང་།

བཅོམ་ལྡན་འདས་ཀྱིས་བཀའ་སྩལ་པ།

དགེ་སློང་དག་ཁྱེད་ཀྱིས་ཀོ་ཀ་ལི་ཀ་དང་།

ཁན་ད་དྲ་བྱ་དང་།

ཀ་ཊ་མོ་ར་ཀ་ཏི་ཥྱ་དང་།

རྒྱ་མཚོས་བྱིན་རྣམས་དང་།

གཞན་ཡང་དེ་ལྟ་བུ་གང་ཡིན་པ་ལ་གསོལ་བ་དང་བཞིའི་ལས་ཀྱིས་བསྒོ་བར་བྱའོ།

འདི་ལྟར་བསྒོ་བར་བྱ་སྟེ།

གནས་མལ་བཤམ་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ།

དགེ་འདུན་བཙུན་པ་རྣམས་གསན་དུ་གསོལ།

ཀོ་ཀ་ལི་ཀ་དང་།

ཁན་ད་དྲ་བྱ་དང་།

ཀ་ཊ་མོ་ར་ཀ་ཏི་ཥྱ་དང་།

རྒྱ་མཚོས་བྱིན་འདི་དག་དགེ་སློང་གང་དགེ་འདུན་མཐུན་པ་དབྱེ་བའི་སླད་དུ་རྟུལ་བར་བགྱིད་ཅིང་དབྱེན་བགྱིད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མཆིས་པ་དེའི་གྲོགས་བགྱིད་ཅིང་མི་མཐུན་པར་སྨྲ་ནས།

འདི་དག་ལ་དགེ་སློང་རྣམས་ཀྱིས་བཞམས་ཏེ་བསྒོ་ན་འདི་དག་ལ་དགེ་སློང་རྣམས་ཀྱིས་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་ན།

གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་།

དགེ་འདུན་གྱིས་དགེ་སློང་ཀོ་ཀ་ལི་ཀ་དང་།

ཁན་ད་དྲ་བྱ་དང་།

ཀ་ཊ་མོ་ར་ཀ་ཏི་ཥྱ་དང་།

རྒྱ་མཚོས་བྱིན་རྣམས་ལ་ཚེ་དང་ལྡན་པ་དག་ཁྱེད་ཤེས་བཞིན་དུ་དགེ་སློང་གང་དགེ་འདུན་མཐུན་པ་དབྱེ་བའི་ཕྱིར་རྟུལ་བར་བྱེད་ཅིང་དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་འདུག་པ་དེའི་གྲོགས་བྱེད་ཅིང་མི་མཐུན་

པར་སྨྲ་བའི་རྗེས་སུ་ཕྱོགས་པར་མ་བྱེད་ཅིག །

དགེ་སློང་རྣམས་ལ་འདི་སྐད་ཅེས་ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག །

དེ་ཅིའི་ཕྱིར་ཞེ་ན།

ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ།

འདུལ་བ་སྨྲ་བ།

དགེ་སློང་འདི་ནི་ཆོས་དང་།

འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ།

དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ།

དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་མ་ཟེར་ཅིག །

དེ་ཅིའི་ཕྱིར་ཞེ་ན།

ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ་མ་ཡིན།

འདུལ་བ་སྨྲ་བ་མ་ཡིན་གྱི།

ཚེ་དང་ལྡན་པ་དག་དགེ་སློང་འདི་ནི་ཆོས་མ་ཡིན་པ་སྨྲ་བ།

འདུལ་བ་མ་ཡིན་པ་སྨྲ་བ།

དགེ་སློང་འདི་ནི་ཆོས་མ་ཡིན་པ་དང་།

འདུལ་བ་མ་ཡིན་པ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ།

དགེ་སློང་འདི་ནི་མི་ཤེས་བཞིན་དུ་སྨྲའི་ཤེས་པར་མ་ཡིན་པའི་ཕྱིར་ཏེ།

དགེ་སློང་འདི་གང་ལ་འདོད་ཅིང་བཟོད་པ་དེ་ལ་ཚེ་དང་ལྡན་པ་དག་འདོད་ཅིང་བཟོད་པར་མ་བྱེད་ཅིག །

ཚེ་དང་ལྡན་པ་དག་ཁྱེད་དགེ་འདུན་འབྱེད་འདོད་པར་མ་བྱེད་པར་ཚེ་དང་ལྡན་པ་དག་དགེ་འདུན་མཐུན་པ་ཉིད་དུ་འདོད་པར་གྱིས་ཤིག །

ཚེ་དང་ལྡན་པ་དག་དགེ་འདུན་དང་མཐུན་པར་གྱིས་ཤིག །

དགེ་འདུན་མཐུན་མི་ཕྱེད་ཀུན་དུ་དགའ་མི་རྩོད།

མཆོག་གཅིག་འདོན་པ་གཅིག་ཅིང་།

ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ།

སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས།

ཚེ་དང་ལྡན་པ་དག་དགེ་འདུན་འབྱེད་པའི་རྗེས་སུ་ཕྱོགས་ཤིང་མི་མཐུན་པར་སྨྲ་བ་འདི་ལྟ་བུ་འདི་ཐོང་ཤིག་ཅེས་གསོལ་བ་དང་བཞིའི་ལས་ཀྱིས་བསྒོ་བ་མཛད་དོ།

འདི་ནི་གསོལ་བའོ།

ལས་ནི་འདི་ལྟར་བྱ་སྟེ།

དགེ་འདུན་བཙུན་པ་རྣམས་གསན་དུ་གསོལ།

ཀོ་ཀ་ལི་ཀ་དང་།

ཁན་ད་དྲ་བྱ་དང་།

ཀ་ཊ་མོ་ར་ཀ་ཏི་ཥྱ་དང་།

རྒྱ་མཚོས་བྱིན་འདི་དག་དགེ་སློང་གང་དགེ་འདུན་མཐུན་པ་དབྱེ་བའི་སླད་དུ་རྟུལ་བར་

བགྱིད་ཅིང་དབྱེན་བགྱིད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མཆིས་པ་དེའི་གྲོགས་བགྱིད་ཅིང་མི་མཐུན་པར་སྨྲ་ནས་འདི་དག་ལ་དགེ་སློང་རྣམས་ཀྱིས་བཞམས་ཏེ་བསྒོ་ན།

འདི་དག་ལ་དགེ་སློང་རྣམས་ཀྱིས་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་དེ།

དེའི་སླད་དུ་དགེ་འདུན་གྱིས་ཀོ་ཀ་ལི་ཀ་དང་།

ཁན་ད་དྲ་བྱ་དང་།

ཀ་ཊ་མོ་ར་ཀ་ཏི་ཥྱ་དང་།

རྒྱ་མཚོས་བྱིན་རྣམས་ལ།

ཚེ་དང་ལྡན་པ་དག་ཁྱེད་ཤེས་བཞིན་དུ་དགེ་སློང་གང་དགེ་འདུན་མཐུན་པ་དབྱེ་བའི་ཕྱིར་རྟུལ་བར་བྱེད་ཅིང་དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་འདུག་པ་དེའི་གྲོགས་བྱེད་ཅིང་མི་མཐུན་པར་སྨྲ་བའི་རྗེས་སུ་ཕྱོགས་པར་མ་བྱེད་ཅིག་དགེ་སློང་རྣམས་ལ་འདི་སྐད་ཅེས་ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག །

དེ་ཅིའི་ཕྱིར་ཞེ་ན།

ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ།

འདུལ་བ་སྨྲ་བ།

དགེ་སློང་འདི་ནི་ཆོས་དང་འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ།

དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ།

དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་མ་ཟེར་ཅིག །

དེ་ཅིའི་ཕྱིར་ཞེ་ན།

ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ་མ་ཡིན།

འདུལ་བ་སྨྲ་བ་མ་ཡིན་གྱི།

ཚེ་དང་ལྡན་པ་དག་དགེ་སློང་འདི་ནི་ཆོས་མ་ཡིན་པ་སྨྲ་བ།

འདུལ་བ་མ་ཡིན་པ་སྨྲ་བ།

དགེ་སློང་འདི་ནི་ཆོས་མ་ཡིན་པ་དང་།

འདུལ་བ་མ་ཡིན་པ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ།

དགེ་སློང་འདི་ནི་མི་ཤེས་བཞིན་དུ་སྨྲའི་ཤེས་པར་མ་ཡིན་པའི་ཕྱིར་ཏེ།

དགེ་སློང་འདི་གང་ལ་འདོད་ཅིང་བཟོད་པ་དེ་ལ་ཚེ་དང་ལྡན་པ་དག་འདོད་ཅིང་བཟོད་པར་མ་བྱེད་ཅིག །

ཚེ་དང་ལྡན་པ་དག་ཁྱེད་དགེ་འདུན་འབྱེད་འདོད་པར་མ་བྱེད་པར་ཚེ་དང་ལྡན་པ་དག་དགེ་འདུན་

མཐུན་པ་ཉིད་དུ་འདོད་པར་གྱིས་ཤིག །

ཚེ་དང་ལྡན་པ་དག་དགེ་འདུན་དང་མཐུན་པར་གྱིས་ཤིག །

དགེ་འདུན་མཐུན་མི་ཕྱེད་ཀུན་དུ་དགའ་མི་རྩོད།

མཆོག་གཅིག་འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ།

སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས།

ཚེ་དང་ལྡན་པ་དག་དགེ་འདུན་འབྱེད་པའི་རྗེས་སུ་ཕྱོགས་ཤིང་།

མི་མཐུན་པར་སྨྲ་བ་འདི་ལྟ་བུ་འདི་ཐོང་ཤིག་ཅེས་གསོལ་བ་དང་བཞིའི་ལས་ཀྱིས་བསྒོ་བ་མཛད་ན།

ཚེ་དང་ལྡན་པ་གང་དག་ཀོ་ཀ་ལི་ཀ་དང་།

ཁན་ད་དྲ་བྱ་དང་།

ཀ་ཊ་མོ་ར་ཀ་ཏི་ཥྱ་དང་།

རྒྱ་མཚོས་བྱིན་རྣམས་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་པར་བཟོད་པ་དེ་དག་ནི་ཅང་མ་གསུང་ཤིག །

གང་དག་མི་བཟོད་པ་དེ་དག་ནི་གསུང་ཤིག །

འདི་ནི་ལས་བརྗོད་པ་དང་པོ་སྟེ།

དེ་བཞིན་དུ་ལན་གཉིས་ལན་གསུམ་དུ་བཟླས།

དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་ཀོ་ཀ་ལི་ཀ་དང་།

ཁན་ད་དྲ་བྱ་དང་།

ཀ་ཊ་མོ་ར་ཀ་ཏི་ཥྱ་དང་།

རྒྱ་མཚོས་བྱིན་རྣམས་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་ལགས་ཏེ།

འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ།

དགེ་སློང་རྣམས་ཀྱིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ཀོ་ཀ་ལི་ཀ་དང་།

ཁན་ད་དྲ་བྱ་དང་།

ཀ་ཊ་མོ་ར་ཀ་ཏི་ཥྱ་དང་།

རྒྱ་མཚོས་བྱིན་རྣམས་ལ་གསོལ་བ་དང་བཞིའི་ལས་ཀྱིས་བསྒོའོ།

གསོལ་བ་དང་བཞིའི་ལས་ཀྱིས་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་རྒྱས་པར་གསོལ་ཏོ།

དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ།

དགེ་སློང་དག་ལྷས་བྱིན་གྱིས་ངའི་ཉན་ཐོས་ཀྱི་དགེ་འདུན་མཐུན་པ་དབྱེ་བ་དང་འཁོར་ལོ་ཡང་འབྱེད་པར་ནུས་ཏེ།

འདི་ལྟར་དེའི་གྲོགས་བྱེད་པའི་དགེ་སློང་མི་མཐུན་པར་སྨྲ་བ་ཉིད་ཀྱི་རྗེས་སུ་ཕྱོགས་པ་བཞི་པོ་ཀོ་ཀ་ལི་ཀ་དང་།

ཁན་ད་དྲ་བྱ་དང་།

ཀ་ཊ་མོ་ར་ཀ་ཏི་ཥྱ་དང་།

རྒྱ་མཚོས་བྱིན་དག་ཡོད་པའི་ཕྱིར་རོ།

ལྷས་བྱིན་གྱིས་དགེ་སྦྱོང་གཽ་ཏ་མས་དགེ་སློང་དག་ལྷས་བྱིན་གྱིས་ངའི་ཉན་ཐོས་ཀྱི་དགེ་འདུན་མཐུན་པ་དབྱེ་བ་དང་འཁོར་ལོ་ཡང་འབྱེད་པར་ནུས་ཏེ།

འདི་ལྟར་དེའི་གྲོགས་བྱེད་པའི་དགེ་སློང་མི་མཐུན་པར་སྨྲ་བ་ཉིད་ཀྱི་རྗེས་སུ་ཕྱོགས་པ་བཞི་པོ་ཀོ་ཀ་ལི་ཀ་དང་།

ཁན་ད་དྲ་བྱ་དང་།

ཀ་ཊ་མོ་ར་ཀ་ཏི་ཥྱ་དང་།

རྒྱ་མཚོས་བྱིན་དག་ཡོད་པའི་ཕྱིར་རོ་ཞེས་བདག་ལ་ལུང་བསྟན་ཏོ་ཞེས་ཐོས་སོ།

ཐོས་ནས་ཀྱང་ཀོ་ཀ་ལི་ཀ་དང་།

ཁན་ད་དྲ་བྱ་དང་།

ཀ་ཊ་མོ་ར་ཀ་ཏི་ཥྱ་དང་།

རྒྱ་མཚོས་བྱིན་རྣམས་ལ་སྨྲས་པ།

ཀོ་ཀ་ལི་ཀ་དང་།

ཁན་ད་དྲ་བྱ་དང་།

ཀ་ཊ་མོ་ར་ཀ་ཏི་ཥྱ་དང་།

རྒྱ་མཚོས་བྱིན་དག་ཤེས་པར་གྱིས་ཤིག །

དགེ་སྦྱོང་གཽ་ཏ་མས་ལྷས་བྱིན་གྱིས་ངའི་ཉན་ཐོས་ཀྱི་དགེ་འདུན་མཐུན་པ་དབྱེ་བ་དང་འཁོར་ལོ་ཡང་འབྱེད་པར་ནུས་ཏེ།

འདི་ལྟར་དེའི་གྲོགས་བྱེད་པའི་དགེ་སློང་མི་མཐུན་པར་སྨྲ་བ་ཉིད་ཀྱི་རྗེས་སུ་ཕྱོགས་པ་བཞི་པོ་ཀོ་ཀ་ལི་ཀ་དང་།

ཁན་ད་དྲ་བྱ་དང་།

ཀ་ཊ་མོ་ར་ཀ་ཏི་ཥྱ་དང་།

རྒྱ་མཚོས་བྱིན་དག་ཡོད་པའི་ཕྱིར་རོ་ཞེས་ཁོ་བོ་ལ་ལུང་བསྟན་ཏོ།

དེ་དག་གིས་སྨྲས་པ།

ལྷས་བྱིན་གལ་ཏེ་དེ་ལྟ་ན་ལེགས་སོ།

དེས་རྒྱ་ཆེར་དགེ་འདུན་མཐུན་པ་དབྱེ་བའི་ཕྱིར་བརྟུལ་བར་བརྩམས་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ།

དེ་ནས་བཅོམ་ལྡན་འདས་ཀྱིས་བྱུང་བ་འདི་དང་།

གླེང་གཞི་འདི་དང་།

སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ།

སངས་རྒྱས་བཅོམ་ལྡན་འདས་ཀྱིས་ལྷས་བྱིན་ལ་སྨྲས་པ།

ལྷས་བྱིན་ཁྱོད་ཀྱིས་དགེ་འདུན་མཐུན་པ་དབྱེ་བའི་ཕྱིར་བརྟུལ་ཞིང་དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་འདུག་པ་བདེན་ནམ།

བཙུན་པ་མད་དོ།

སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ།

རྗེས་སུ་མཐུན་པ་མ་ཡིན་པ།

རུང་བ་མ་ཡིན་པ།

ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་བྱ་བ་ལ་སོགས་པས་རྣམ་པར་སྨད་པ་

སྔ་མ་བཞིན་ནོ།

དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ།

དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་རྗེས་སུ་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ།

ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ།

ཡང་དགེ་སློང་གང་དགེ་འདུན་མཐུན་པ་དབྱེ་བའི་ཕྱིར་རྟུལ་བར་བྱེད་ཅིང་དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་འདུག་ན།

དགེ་སློང་དེ་ལ་དགེ་སློང་རྣམས་ཀྱིས་འདི་སྐད་ཅེས་ཚེ་དང་ལྡན་པ་ཁྱེད་དགེ་འདུན་མཐུན་པ་དབྱེ་བའི་ཕྱིར་རྟུལ་བར་མ་བྱེད་ཅིག །

དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་མ་འདུག་ཤིག །

ཚེ་དང་ལྡན་པ་དགེ་འདུན་དང་མཐུན་པར་གྱིས་ཤིག །

དགེ་འདུན་མཐུན་མི་ཕྱེད་ཀུན་དུ་དགའ་མི་རྩོད།

མཆོག་གཅིག་འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ།

སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས།

ཚེ་དང་ལྡན་པ་ཁྱེད་དགེ་འདུན་འབྱེད་པར་བྱེད་པའི་གཞི་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ།

དགེ་སློང་དེ་ལ་དགེ་སློང་རྣམས་ཀྱིས་དེ་སྐད་བསྒོ་བ་ན་གལ་ཏེ་གཞི་དེ་གཏོང་ན་དེ་ལྟ་ན་ལེགས།

གལ་ཏེ་མི་གཏོང་ན་གཞི་དེ་གཏང་བར་བྱ་བའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ།

ཡང་དག་པར་བསྟན་པར་བྱའོ།

ལན་གཉིས་ལན་གསུམ་དུ་ཡང་དག་པར་བསྒོ།

ཡང་དག་པར་བསྟན་པ་ན་གཞི་དེ་གཏོང་ན་དེ་ལྟ་ན་ལེགས།

གལ་ཏེ་མི་གཏོང་ན་དགེ་འདུན་ལྷག་མའོ།

ཡང་དགེ་སློང་གང་ཞེས་བྱ་བ་ནི་ལྷས་བྱིན་ནམ་གཞན་ཡང་དེ་ལྟ་བུ་གང་ཡིན་པའོ།

དགེ་འདུན་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་ནོ།

མཐུན་པ་ཞེས་བྱ་བ་ནི་རོ་གཅིག་པའོ།

དབྱེ་བའི་ཕྱིར་ཞེས་བྱ་བ་ནི་གཉིས་སུ་བྱ་བའི་ཕྱིར་རོ།

རྟུལ་བར་བྱེད་ཅིང་ཞེས་བྱ་བ་ནི་རྩོལ་བར་བྱེད་ཅིང་ངོ་།

དབྱེན་བྱེད་པར་འགྱུར་བའི་རྩོད་པ་ཡང་དག་པར་

བླངས་ནས་རབ་ཏུ་བཟུང་སྟེ་འདུག་ན་ཞེས་བྱ་བ་ནི་ཀོ་ཀ་ལི་ཀ་དང་།

ཁན་ད་དྲ་བྱ་དང་།

ཀ་ཊ་མོ་ར་ཀ་ཏི་ཥྱ་དང་།

རྒྱ་མཚོས་བྱིན་དག་ཡང་དག་པར་བླངས་ནས་རབ་ཏུ་བཟུང་སྟེ་འདུག་ནའོ།

དགེ་སློང་དེ་ལ་ཞེས་བྱ་བ་ནི་ལྷས་བྱིན་ལའོ།

དགེ་སློང་རྣམས་ཀྱིས་ཞེས་བྱ་བ་ནི་ཆོས་འདི་པ་རྣམས་ཀྱིས་སོ།

འདི་སྐད་ཅེས་ཞེས་བྱ་བ་ནི་བཞམས་ཏེ་བསྒོ་བ་ཇི་སྐད་སྔར་བསྟན་པ་ལྟར་བསྒོ་བར་བྱའོ།

དགེ་སློང་དེ་ལ་དགེ་སློང་རྣམས་ཀྱིས་དེ་སྐད་བསྒོ་བ་ན་ཞེས་བྱ་བ་ནི་བཞམས་ཏེ་བསྒོ་བ་ནའོ།

གལ་ཏེ་གཞི་དེ་གཏོང་ན་ཞེས་བྱ་བ་ནི་ལྟ་བ་དེ་ཡོངས་སུ་གཏོང་ནའོ།

དེ་ལྟ་ན་ལེགས་ཞེས་བྱ་བ་ནི་དེ་ལྟ་ན་བཟང་བའོ།

གལ་ཏེ་མི་གཏོང་ན་ཞེས་བྱ་བ་ནི་ཡོངས་སུ་མི་གཏོང་ནའོ།

ལན་གཉིས་ལན་གསུམ་དུ་ཡང་དག་པར་བསྒོ་བར་བྱ།

ཡང་དག་པར་བསྟན་པར་བྱའོ་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་བསྒོ་བ་ཇི་སྐད་སྔར་བསྟན་པ་ལྟར་བསྒོ་བར་བྱ་སྟེ།

ཡང་དག་པར་བསྒོ་བ་དེ་ནི་དེ་ཡིན།

ཡང་དག་པར་བསྟན་པ་དེ་ནི་དེ་ཡིན་ནོ།

དགེ་འདུན་ལྷག་མའོ་ཞེས་བྱ་བ་ནི་སྔ་མ་བཞིན་དུ་ལྟུང་བ་དེ་དགེ་འདུན་ལ་རག་ལས་པ་ཡིན་ཏེ།

དེས་ན་དགེ་འདུན་ལྷག་མའོ་ཞེས་གསུངས་སོ།

དེ་ལ་ལྟུང་བར་ཇི་ལྟར་འགྱུར་ཞེ་ན།

དགེ་སློང་གིས་ཅུང་ཟད་ཇི་ཙམ་དུ་དགེ་འདུན་མཐུན་པ་དབྱེ་བའི་ཕྱིར་རྟུལ་བར་བྱེད་ན་ཐམས་ཅད་དུ་ཉེས་བྱས་སུ་འགྱུར་རོ།

དགེ་སློང་གིས་བཞམས་ཏེ་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས།

གལ་ཏེ་མི་གཏོང་ན་ཉེས་པ་སྦོམ་པོར་འགྱུར་རོ།

གསོལ་བ་དང་བཞིའི་ལས་ཀྱིས་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས།

གལ་ཏེ་མི་གཏོང་ན་གསོལ་བ་བྱས་པ་ན་ཉེས་པ་སྦོམ་པོར་འགྱུར་རོ།

ལས་བརྗོད་པ་དང་པོ་བརྗོད་པ་ན་མ་རྫོགས་པར་གཞི་དེ་གཏོང་ན་དེ་ལྟ་ན་ལེགས།

གལ་ཏེ་མི་གཏོང་ན་རྫོགས་པར་བརྗོད་པ་ན་ཉེས་པ་སྦོམ་པོར་འགྱུར་རོ།

ལས་བརྗོད་པ་གཉིས་པ་བརྗོད་པ་ན་མ་རྫོགས་པར་གཞི་དེ་གཏོང་ན་དེ་ལྟ་ན་ལེགས།

གལ་ཏེ་མི་གཏོང་ན་རྫོགས་པར་བརྗོད་པ་ན་ཉེས་པ་སྦོམ་པོར་འགྱུར་རོ།

ལས་བརྗོད་པ་གསུམ་པ་བརྗོད་པ་ན་མ་རྫོགས་པར་གཞི་དེ་གཏོང་ན་དེ་ལྟ་ན་

ལེགས།

གལ་ཏེ་མི་གཏོང་ན་ཉེས་པ་སྦོམ་པོར་འགྱུར་རོ།

རྫོགས་པར་བརྗོད་པ་ན་གལ་ཏེ་མཐུན་པ་དང་ཆོས་མ་ཡིན་པས་བསྒོ་བར་བྱེད་ན་ལྟུང་བ་མེད་དོ།

མི་མཐུན་པ་དང་ཆོས་ཀྱི་བསྒོ་བར་བྱེད་ན་ལྟུང་བ་མེད་དོ།

མཐུན་པ་དང་ཆོས་ལྟར་བཅོས་པས་བསྒོ་བར་བྱེད་ན་ལྟུང་བ་མེད་དོ།

མི་མཐུན་པ་དང་ཆོས་མ་ཡིན་པ་ལྟར་བཅོས་པས་བསྒོ་བར་བྱེད་ན་ལྟུང་བ་མེད་དོ།

ཆོས་ཇི་ལྟ་བ་དང་།

འདུལ་བ་ཇི་ལྟ་བ་དང་།

སྟོན་པའི་བསྟན་པ་ཇི་ལྟ་བ་དེ་ལྟར་བསྒོ་བར་མི་བྱེད་ན་ལྟུང་བ་མེད་དོ།

ཆོས་ཇི་ལྟ་བ་དང་།

འདུལ་བ་ཇི་ལྟ་བ་དང་།

སྟོན་པའི་བསྟན་པ་ཇི་ལྟ་བ་དེ་ལྟར་མཐུན་པས་བསྒོ་བར་བྱེད་ན་རྫོགས་པར་བརྗོད་པ་ན་དགེ་འདུན་ལྷག་མར་འགྱུར་རོ།

དགེ་སློང་དེས་སྟན་དེ་ལ་འདུག་བཞིན་དུ་འདི་སྐད་ཅེས་ཚེ་དང་ལྡན་པ་དག་བདག་ལ་དགེ་འདུན་ལྷག་མའི་ལྟུང་བ་བྱུང་ངོ་ཞེས་བརྗོད་པར་བྱ་སྟེ།

གལ་ཏེ་དེ་སྐད་བརྗོད་ན་དེ་ལྟ་ན་ལེགས།

གལ་ཏེ་མི་བརྗོད་ན་དེ་ཕྱིན་ཆད་ནས་དེ་ལ་འཆབ་པའི་ཉེས་པ་འབྱུང་བར་འགྱུར་རོ།

དེ་བས་ན་དགེ་སློང་གིས་ཇི་ཙམ་དུ་གཞི་དེས་མ་བཤགས་ཤིང་སོ་སོར་མ་བཤགས་པར་གསོལ་བ་དང་།

གསོལ་བ་དང་གཉིས་དང་།

གསོལ་བ་དང་བཞིའི་ལས་ཉམས་སུ་མྱོང་བར་བྱེད་ན་ཐམས་ཅད་དུ་ཉེས་བྱས་སུ་འགྱུར་རོ།

ལས་དང་པོ་པ་དང་།

སྨྱོས་པ་དང་།

སེམས་འཁྲུགས་པ་དང་།

ཚོར་བ་དག་གིས་ཉེན་པ་ལ་ལྟུང་བ་མེད་དོ།

དགེ་འདུན་གྱི་དབྱེན་བྱེད་པའི་དགེ་འདུན་ལྷག་མ་སྟེ་བཅུ་པ་རྫོགས་སྷོ།།

དེ་ནས་བཅོམ་ལྡན་འདས་ཀྱིས་གདན་དེ་ཉིད་ལ་བཞུགས་བཞིན་དུ་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་གཉིས་པ་བཅའ་བར་བཞེད་ནས་དགེ་སློང་རྣམས་ལ་བཀའ་སྩལ་པ།

དགེ་སློང་དག་དགེ་འདུན་གྱིས་བྱ་བ་ཅུང་ཞིག་ཡོད་ཀྱིས་རེ་ཞིག་སྟན་ལས་མ་ལྡང་ཤིག །

སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ།

སངས་རྒྱས་བཅོམ་ལྡན་འདས་ཀྱིས་ཀོ་ཀ་ལི་ཀ་དང་།

ཁན་ད་དྲ་བྱ་དང་།

ཀ་

ཊ་མོ་ར་ཀ་ཏི་ཥྱ་དང་།

རྒྱ་མཚོས་བྱིན་རྣམས་ལ་རྨས་པ།

ཀོ་ཀ་ལི་ཀ །

ཁན་ད་དྲ་བྱ།

ཀ་ཊ་མོ་ར་ཀ་ཏི་ཥྱ།

རྒྱ་མཚོས་བྱིན་ཁྱེད་ཤེས་བཞིན་དུ་དགེ་སློང་གང་དགེ་འདུན་མཐུན་པ་དབྱེ་བའི་ཕྱིར་རྟུལ་བར་བྱེད་ཅིང་དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་འདུག་པ་དེའི་གྲོགས་བྱེད་ཅིང་མི་མཐུན་པར་སྨྲ་བའི་རྗེས་སུ་ཕྱོགས་ནས་དགེ་སློང་རྣམས་ལ་འདི་སྐད་ཅེས་ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག །

དེ་ཅིའི་ཕྱིར་ཞེ་ན།

ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ།

འདུལ་བ་སྨྲ་བ།

དགེ་སློང་འདི་ནི་ཆོས་དང་།

འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ་དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ།

དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་སྨྲས་པ་བདེན་ནམ།

བཙུན་པ་མད་དོ།

སངས་རྒྱས་བཅོམ་ལྡན་འདས་ཀྱིས་དགེ་སློང་གི་ཚུལ་མ་ཡིན་པ།

རྗེས་སུ་མཐུན་པ་མ་ཡིན་པ།

རུང་བ་མ་ཡིན་པ།

ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་བྱ་བ་ལ་སོགས་པས་རྣམ་པར་སྨད་པ་སྔ་མ་བཞིན་ནོ།

དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ།

དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་རྗེས་སུ་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ།

ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ།

དགེ་སློང་དེའི་གྲོགས་བྱེད་པའི་དགེ་སློང་མི་མཐུན་པར་སྨྲ་བ་ཉིད་ཀྱི་རྗེས་སུ་ཕྱོགས་པ་གཅིག་གམ།

གཉིས་སམ།

མང་པོ་དག་ཡོད་ཅིང་།

གལ་ཏེ་དེ་དག་དགེ་སློང་རྣམས་ལ་འདི་སྐད་ཅེས་ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་དགེ་སློང་འདི་ལ་ཅི་ཡང་མ་སྨྲ་ཤིག །

དེ་ཅིའི་ཕྱིར་ཞེ་ན།

ཚེ་དང་ལྡན་པ་དག་དགེ་སློང་འདི་ནི་ཆོས་

སྨྲ་བ།

འདུལ་བ་སྨྲ་བ།

དགེ་སློང་འདི་ནི་ཆོས་དང་འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ་དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ།

དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་ཟེར་ན་དགེ་སློང་དེ་དག་ལ་དགེ་སློང་རྣམས་ཀྱིས་འདི་སྐད་ཅེས་ཚེ་དང་ལྡན་པ་དག་ཁྱེད་ཅག་དེ་སྐད་ཅེས་དགེ་སློང་འདི་ནི་ཆོས་སྨྲ་བ།

འདུལ་བ་སྨྲ་བ།

དགེ་སློང་འདི་ནི་ཆོས་དང་།

འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ།

དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ།

དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ་ཞེས་མ་ཟེར་ཅིག །

དེ་ཅིའི་ཕྱིར་ཞེ་ན།

ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ་མ་ཡིན།

འདུལ་བ་སྨྲ་བ་མ་ཡིན་གྱི།

ཚེ་དང་ལྡན་པ་དག་དགེ་སློང་འདི་ནི་ཆོས་མ་ཡིན་པ་སྨྲ་བ།

འདུལ་བ་མ་ཡིན་པ་སྨྲ་བ།

དགེ་སློང་འདི་ནི་ཆོས་མ་ཡིན་པ་དང་།

འདུལ་བ་མ་ཡིན་པ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ།

དགེ་སློང་འདི་ནི་མི་ཤེས་བཞིན་དུ་སྨྲའི་ཤེས་པར་མ་ཡིན་པའི་ཕྱིར་ཏེ།

དགེ་སློང་འདི་གང་ལ་འདོད་ཅིང་བཟོད་པ་དེ་ལ་ཚེ་དང་ལྡན་པ་དག་འདོད་ཅིང་བཟོད་པར་མ་བྱེད་ཅིག །

ཚེ་དང་ལྡན་པ་དག་ཁྱེད་དགེ་འདུན་འབྱེད་འདོད་པར་མ་བྱེད་པར་ཚེ་དང་ལྡན་པ་དག་དགེ་འདུན་མཐུན་པ་ཉིད་དུ་འདོད་པར་གྱིས་ཤིག །

ཚེ་དང་ལྡན་པ་དག་དགེ་འདུན་དང་མཐུན་པར་གྱིས་ཤིག །

དགེ་འདུན་མཐུན་མི་ཕྱེད་ཀུན་དུ་དགའ་མི་རྩོད།

མཆོག་གཅིག་འདོན་པ་གཅིག་ཅིང་ཆུ་དང་འོ་མ་གཅིག་ཏུ་འདྲེས་པ་ལྟ་བུར་གྱུར་ལ།

སྟོན་པའི་བསྟན་པ་གསལ་བར་བྱེད་ན་བདེ་བ་ལ་རེག་པར་གནས་པར་འགྱུར་གྱིས།

ཚེ་དང་ལྡན་པ་དག་དགེ་འདུན་འབྱེད་པའི་རྗེས་སུ་ཕྱོགས་ཤིང་མི་མཐུན་པར་སྨྲ་བ་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ།

དགེ་སློང་དེ་དག་ལ་དགེ་སློང་རྣམས་

ཀྱིས་དེ་སྐད་བསྒོ་བ་ན་གལ་ཏེ་གཞི་དེ་གཏོང་ན་དེ་ལྟ་ན་ལེགས།

གལ་ཏེ་མི་གཏོང་ན་གཞི་དེ་གཏང་བར་བྱ་བའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ།

ཡང་དག་པར་བསྟན་པར་བྱའོ།

ལན་གཉིས་ལན་གསུམ་དུ་ཡང་དག་པར་བསྒོ།

ཡང་དག་པར་བསྟན་པ་ན་གཞི་དེ་གཏོང་ན་དེ་ལྟ་ན་ལེགས།

གལ་ཏེ་མི་གཏོང་ན་དགེ་འདུན་ལྷག་མའོ།

དགེ་སློང་དེའི་ཞེས་བྱ་བ་ནི་ལྷས་བྱིན་གྱིའོ།

གྲོགས་བྱེད་པའི་དགེ་སློང་ཞེས་བྱ་བ་ནི་ཀོ་ཀ་ལི་ཀ་དང་།

ཁན་ད་དྲ་བྱ་དང་།

ཀ་ཊ་མོ་ར་ཀ་ཏི་ཥྱ་དང་།

རྒྱ་མཚོས་བྱིན་དག་གོ།

མི་མཐུན་པར་སྨྲ་བ་ཉིད་ཀྱི་རྗེས་སུ་ཕྱོགས་པ་ཞེས་བྱ་བ་ནི་ལྟ་བ་དེ་དག་དང་།

འདོད་པ་དེ་དག་དང་།

བསམ་པ་དེ་དག་དང་ལྡན་པའོ།

གཅིག་གམ།

གཉིས་སམ།

མང་པོ་དག་ཡོད་ཅིང་ཞེས་བྱ་བ་ནི་གཉིས་ལས་ལྷག་པ་ནི་མང་བའོ།

གལ་ཏེ་དེ་དག་ཅེས་བྱ་བ་ནི་རྗེས་སུ་ཕྱོགས་པ་དེ་དག་གོ།

དགེ་སློང་རྣམས་ལ་ཞེས་བྱ་བ་ནི་ཆོས་འདི་པ་རྣམས་ལའོ།

འདི་སྐད་ཅེས་ཞེས་བྱ་བ་ནི་འདི་སྐད་ཅེས་ཟེར་ནའོ།

དགེ་ཡང་རུང་ཞེས་བྱ་བ་ནི་དགེ་བ་ལ་སྦྱོར་བར་ཡང་མ་བྱེད་ཅིག་ཅེས་པའོ།

སྡིག་ཀྱང་རུང་ཞེས་བྱ་བ་ནི་སྡིག་པ་ལས་ཟློག་པར་ཡང་མ་བྱེད་ཅིག་ཅེས་བྱ་བའོ།

དགེ་སློང་འདི་ལ་ཞེས་བྱ་བ་ནི་ལྷས་བྱིན་ལའོ།

ཅི་ཡང་མ་སྨྲ་ཤིག་ཅེས་བྱ་བ་ནི་ཅུང་ཟད་ཀྱང་མ་སྨྲ་ཤིག་པའོ།

དེ་ཅིའི་ཕྱིར་ཞེ་ན།

ཚེ་དང་ལྡན་པ་དག་དགེ་སློང་འདི་ནི་ཆོས་སྨྲ་བ།

འདུལ་བ་སྨྲ་བ།

དགེ་སློང་འདི་ནི་ཆོས་དང་།

འདུལ་བ་ཡང་དག་པར་བླངས་ནས་རབ་ཏུ་བཟུང་སྟེ་རྗེས་སུ་ཐ་སྙད་འདོགས་པར་བྱེད་པ་ཞེས་བྱ་བ་ནི་ཆོས་ཇི་ལྟ་བ་དང་།

འདུལ་བ་ཇི་ལྟ་བ་དང་།

སྟོན་པའི་བསྟན་པ་ཇི་ལྟ་བ་དེ་ལྟར་རྗེས་སུ་ཐ་སྙད་འདོགས་པར་བྱེད་པའོ།

དགེ་སློང་འདི་ནི་ཤེས་བཞིན་དུ་སྨྲའི་མི་ཤེས་པར་མ་ཡིན་པའི་ཕྱིར་ཏེ།

ཞེས་བྱ་བ་ནི་དོན་རྟོགས་པ་ཡིན་གྱི།

དོན་མ་རྟོགས་པ་མ་ཡིན་པའི་ཕྱིར་རོ།

དགེ་སློང་འདི་གང་ལ་འདོད་ཅིང་བཟོད་པ་དེ་ལ་བདག་ཅག་ཀྱང་འདོད་ཅིང་བཟོད་དོ།

ཞེས་ཟེར་ན་ཞེས་བྱ་བ་ནི་དགེ་སློང་ལྷས་བྱིན་འདི་གཞི་གང་འདོད་པ་དེ་བདག་ཅག་ཀྱང་འདོད་དོ་ཞེས་ཟེར་ནའོ།

དགེ་སློང་དེ་དག་ལ་ཞེས་བྱ་བ་ནི་ཀོ་ཀ་ལི་ཀ་དང་།

ཁན་ད་དྲ་བྱ་དང་།

ཀ་ཊ་མོ་ར་ཀ་ཏི་ཥྱ་དང་།

རྒྱ་མཚོས་བྱིན་དག་ལའོ།

དགེ་སློང་རྣམས་ཀྱིས་ཞེས་བྱ་བ་ནི་ཆོས་འདི་པ་རྣམས་ཀྱིས་སོ།

འདི་སྐད་ཅེས་ཞེས་བྱ་བ་ནི་བཞམས་ཏེ་བསྒོ་བ་ཇི་སྐད་སྔར་བསྟན་པ་ལྟར་བསྒོ་བར་བྱ་བའོ།

དགེ་སློང་དེ་དག་ལ་དགེ་སློང་རྣམས་ཀྱིས་དེ་སྐད་བསྒོ་བ་ན་ཞེས་བྱ་བ་ནི་བཞམས་ཏེ་བསྒོ་བ་ནའོ།

གལ་ཏེ་གཞི་དེ་གཏོང་ན་ཞེས་བྱ་བ་ནི་ལྟ་བ་དེ་ཡོངས་སུ་གཏོང་ནའོ།

དེ་ལྟ་ན་ལེགས་ཞེས་བྱ་བ་ནི་དེ་ལྟ་ན་བཟང་བའོ།

གལ་ཏེ་མི་གཏོང་ན་ཞེས་བྱ་བ་ནི་ཡོངས་སུ་མི་གཏོང་ནའོ།

ལན་གཉིས་ལན་གསུམ་དུ་ཡང་དག་པར་བསྒོ་བར་བྱ།

ཡང་དག་པར་བསྟན་པར་བྱའོ་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་བསྒོ་བ་ཇི་སྐད་སྔར་བསྟན་པ་ལྟར་བསྒོ་བར་བྱ་བ་སྟེ།

ཡང་དག་པར་བསྒོ་བ་དེ་ནི་དེ་ཡིན།

ཡང་དག་པར་བསྟན་པ་དེ་ནི་དེ་ཡིན་ནོ།

དགེ་འདུན་ལྷག་མའོ་ཞེས་བྱ་བ་ནི་སྔ་མ་བཞིན་དུ་ལྟུང་བ་དེ་དགེ་འདུན་ལ་རག་ལས་པ་ཡིན་ཏེ།

དེས་ན་དགེ་འདུན་ལྷག་མའོ་ཞེས་གསུངས་སོ།

དེ་ལ་ལྟུང་བར་ཇི་ལྟར་འགྱུར་ཞེ་ན།

དགེ་སློང་གིས་ཅུང་ཟད་ཇི་ཙམ་དུ་དགེ་སློང་གང་དགེ་འདུན་མཐུན་པ་དབྱེ་བའི་ཕྱིར་རྟུལ་བར་བྱེད་ཅིང་དབྱེན་བྱེད་པར་འགྱུར་བའི་རྩོད་པ་ཡང་དག་པར་བླངས་ནས་རབ་ཏུ་བཟུང་སྟེ་འདུག་པ་དེའི་གྲོགས་བྱེད་ཅིང་མི་མཐུན་པ་སྨྲ་བའི་རྗེས་སུ་ཕྱོགས་པར་བྱེད་ན་ཐམས་ཅད་དུ་ཉེས་བྱས་སུ་འགྱུར་རོ།

དགེ་སློང་གིས་བཞམས་ཏེ་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས།

གལ་ཏེ་མི་གཏོང་ན་ཉེས་པ་སྦོམ་པོར་འགྱུར་རོ།

གསོལ་བ་དང་བཞིའི་ལས་ཀྱིས་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས།

གལ་ཏེ་མི་གཏོང་ན་གསོལ་བ་བྱས་པ་ན་ཉེས་པ་སྦོམ་པོར་འགྱུར་རོ།

ལས་བརྗོད་པ་དང་པོ་བརྗོད་པ་ན་མ་རྫོགས་པར་གཞི་དེ་གཏོང་ན་དེ་ལྟ་ན་ལེགས།

གལ་ཏེ་མི་གཏོང་ན་རྫོགས་པར་བརྗོད་པ་ན་ཉེས་པ་སྦོམ་པོར་འགྱུར་རོ།

ལས་བརྗོད་པ་གཉིས་པ་བརྗོད་པ་ན་མ་རྫོགས་པར་གཞི་དེ་གཏོང་ན་དེ་ལྟ་ན་ལེགས།

གལ་ཏེ་མི་གཏོང་ན་རྫོགས་པར་བརྗོད་པ་ན་ཉེས་པ་སྦོམ་པོར་

འགྱུར་རོ།

ལས་བརྗོད་པ་གསུམ་པ་བརྗོད་པ་ན་མ་རྫོགས་པར་གཞི་དེ་གཏོང་ན་དེ་ལྟ་ན་ལེགས།

གལ་ཏེ་མི་གཏོང་ན་ཉེས་པ་སྦོམ་པོར་འགྱུར་རོ།

རྫོགས་པར་བརྗོད་པ་ན་གལ་ཏེ་མཐུན་པ་དང་།

ཆོས་མ་ཡིན་པས་བསྒོ་བར་བྱེད་ན་ལྟུང་བ་མེད་དོ།

མི་མཐུན་པ་དང་ཆོས་ཀྱིས་བསྒོ་བར་བྱེད་ན་ལྟུང་བ་མེད་དོ།

མཐུན་པ་དང་།

ཆོས་ལྟར་བཅོས་པས་བསྒོ་བར་བྱེད་ན་ལྟུང་བ་མེད་དོ།

མི་མཐུན་པ་དང་།

ཆོས་མ་ཡིན་པ་ལྟར་བཅོས་པས་བསྒོ་བར་བྱེད་ན་ལྟུང་བ་མེད་དོ།

ཆོས་ཇི་ལྟ་བ་དང་།

འདུལ་བ་ཇི་ལྟ་བ་དང་།

སྟོན་པའི་བསྟན་པ་ཇི་ལྟ་བ་དེ་ལྟར་བསྒོ་བར་མི་བྱེད་ན་ལྟུང་བ་མེད་དོ།

ཆོས་ཇི་ལྟ་བ་དང་།

འདུལ་བ་ཇི་ལྟ་བ་དང་།

སྟོན་པའི་བསྟན་པ་ཇི་ལྟ་བ་དེ་ལྟར་མཐུན་པས་བསྒོ་བར་བྱེད་ན་རྫོགས་པར་བརྗོད་པ་ན་དགེ་འདུན་ལྷག་མར་འགྱུར་རོ།

དགེ་སློང་དེས་སྟན་དེ་ལ་འདུག་བཞིན་དུ་འདི་སྐད་ཅེས་ཚེ་དང་ལྡན་པ་དག་བདག་ལ་དགེ་འདུན་ལྷག་མའི་ལྟུང་བ་བྱུང་ངོ་ཞེས་བརྗོད་པར་བྱ་སྟེ།

གལ་ཏེ་དེ་སྐད་བརྗོད་ན་དེ་ལྟ་ན་ལེགས།

གལ་ཏེ་མི་བརྗོད་ན་དེ་ཕྱིན་ཅད་ནས་དེ་ལ་འཆབ་པའི་ཉེས་པ་འབྱུང་བར་འགྱུར་རོ།

དེ་བས་ན་དགེ་སློང་གིས་ཇི་ཙམ་དུ་གཞི་དེས་མ་བཤགས་ཤིང་སོ་སོར་མ་བཤགས་པར་གསོལ་བ་དང་།

གསོལ་བ་དང་གཉིས་དང་།

གསོལ་བ་དང་བཞིའི་ལས་ཉམས་སུ་མྱོང་བར་བྱེད་ན་ཐམས་ཅད་དུ་ཉེས་བྱས་སུ་འགྱུར་རོ།

ལས་དང་པོ་པ་དང་།

སྨྱོས་པ་དང་།

སེམས་འཁྲུགས་པ་དང་།

ཚོར་བ་དག་གིས་ཉེན་པ་ལ་ལྟུང་བ་མེད་དོ།

རྗེས་སུ་ཕྱོགས་པའི་དགེ་འདུན་ལྷག་མ་སྟེ་བཅུ་གཅིག་པ་རྫོགས་སོ།།

སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ།

དེའི་ཚེ་ན་རེ་ལྡེ་རི་ལ་དགེ་སློང་འགྲོ་མགྱོགས་དང་།

ནབ་སོ་གཉིས་དང་།

དགེ་སློང་དམར་སེར་ཅན་ཁྱིམ་སུན་འབྱིན་པ།

སྡིག་པའི་ཆོས་ཀུན་དུ་སྤྱོད་པ་དག་འཁོད་དོ།

དེ་དག་བུད་མེད་ཀྱི་ཡུལ་དང་ལྷན་ཅིག་ཐོ་འཚམ་པར་བྱེད།

ཀུན་དུ་རྩེ་བར་བྱེད།

ཀུན་ཏུ་ཅ་ཅོ་འདོན་པར་བྱེད།

རྒོད་པ་དང་།

དྲེགས་པ་དང་།

ལུས་སྒྱུར་བར་བྱེད།

སྟན་གཅིག་ལ་འདུག་པར་བྱེད།

སྣོད་གཅིག་ཏུ་ཟ་བར་བྱེད།

ཕོར་བུ་གཅིག་ཏུ་མྱོས་པར་འགྱུར་བའི་བཏུང་བ་སྣ་ཚོགས་དག་འཐུང་བར་བྱེད།

མེ་ཏོག་དག་འཐོག་པར་བྱེད།

འཐོག་ཏུ་འཇུད་པར་བྱེད།

ཕྲེང་བ་དག་རྒྱུད་པར་བྱེད།

རྒྱུད་དུ་འཇུད་པར་བྱེད།

མེ་ཏོག་རྣ་རྒྱན་དག་ཐོགས་པར་བྱེད།

ཐོགས་སུ་འཇུད་པར་བྱེད།

བྲོ་རྡུང་བར་བྱེད།

བྲོ་རྡུང་དུ་འཇུད་པར་བྱེད།

གླུ་ལེན་པར་བྱེད།

གླུ་ལེན་དུ་འཇུད་པར་བྱེད།

རོལ་མོའི་སྒྲ་འབྱིན་པར་བྱེད།

རོལ་མོའི་སྒྲ་འབྱིན་དུ་འཇུད་པར་བྱེད།

བྲོ་མཁས་པ་དང་།

གླུ་མཁས་པ་དང་།

རོལ་མོའི་སྒྲ་འབྱིན་པ་མཁས་པ་ལ་ངོ་སོ་ལས་བྱུང་བ་སྦྱིན་པར་བྱེད།

ཆོས་གོས་དག་བརྫེས་ཏེ་རྒྱུག་པར་བྱེད།

མཆོང་བར་བྱེད།

རབ་ཏུ་མཆོང་བར་བྱེད།

བརླ་སྐོར་བར་བྱེད།

ལག་པ་སྐོར་བར་བྱེད།

ཉ་ལྟར་སྐོར་བར་བྱེད།

ཆུར་འཕྱོ་བ་འཕེན་པར་བྱེད།

ཆུ་ལ་རྔ་མ་དུ་ཀ་ལྟར་རྡུང་བར་བྱེད།

གླང་པོ་ཆེའི་སྐད་ཀྱི་སྒྲ་འབྱིན་པར་བྱེད།

རྟའི་སྐད་ཀྱི་སྒྲ་འབྱིན་པར་བྱེད།

ཁྱུ་མཆོག་གི་སྐད་ཀྱི་སྒྲ་འབྱིན་པར་བྱེད།

རྨ་བྱའི་སྐད་ཀྱི་སྒྲ་འབྱིན་པར་བྱེད།

ཁུ་བྱུག་གི་སྐད་ཀྱི་སྒྲ་འབྱིན་པར་བྱེད།

ཁས་རྫ་རྔའི་སྒྲ་འབྱིན་པར་བྱེད།

ཁས་དུང་གི་སྒྲ་འབྱིན་པར་བྱེད།

ཁས་རྔ་བོ་ཆེའི་སྒྲ་འབྱིན་པར་བྱེད།

གླང་པོ་ཆེའི་ཐབ་མོ་ཡང་བྱེད།

གླང་པོ་ཆེའི་ཐབ་མོ་བྱེད་དུ་འཇུད་པར་ཡང་བྱེད།

རྟའི་ཐབ་མོ་དང་།

ཁྱུ་མཆོག་གི་ཐབ་མོ་དང་།

མ་ཧེའི་ཐབ་མོ་དང་།

རའི་ཐབ་མོ་དང་།

ལུག་གི་ཐབ་མོ་དང་།

བུད་མེད་ཀྱི་ཐབ་མོ་དང་།

སྐྱེས་པའི་ཐབ་མོ་དང་།

གཞོན་ནུའི་ཐབ་མོ་དང་།

གཞོན་ནུ་མའི་ཐབ་མོ་དང་།

བྱ་གག་གི་ཐབ་མོ་དང་།

ཐི་བའི་ཐབ་མོ་དང་།

ངུར་པའི་ཐབ་མོ་ཡང་བྱེད།

བྱེད་དུ་འཇུད་པར་ཡང་བྱེད་དེ།

དེ་དག་དང་གཞན་ཡང་དགེ་སློང་གི་ལས་མ་ཡིན་པ་དག་བྱེད་ཅིང་བྱེད་དུ་འཇུད་དེ།

དེ་དག་གི་སྤྱོད་ཚུལ་དང་།

སྤྱོད་པ་དང་།

ལོག་པར་སྒྲུབ་པ་དེས་རེ་ལྡེའི་རི་ལ་དགེ་སློང་མ་འོངས་པ་དག་ཀྱང་མི་འོང་ལ།

འོངས་པ་དག་ཀྱང་མངོན་པར་མི་

དགའ་ཞིང་རེ་ལྡེའི་རིའི་གནས་སྤོང་བར་བྱེད་དོ།

རེ་ལྡེའི་རི་ལ་གནས་པའི་བྲམ་ཟེ་དང་།

ཁྱིམ་བདག་དག་ཀྱང་ཡིད་མི་དགའ་ཞིང་ཞེ་བཅིལ་བར་གྱུར་ནས་དགེ་སློང་གཉུག་མར་གནས་པ་དག་ལ་ཡང་བསོད་སྙོམས་དབུལ་བ་དང་།

བྱ་བར་སེམས་པ་དཀའ་ན།

བློ་བུར་དུ་ལྷགས་པ་རྣམས་ལ་ལྟ་སྨོས་ཀྱང་ཅི་དགོས་པར་གྱུར་ཏོ།

ཇི་ཙམ་དུས་གཞན་ཞིག་ན་ཚེ་དང་ལྡན་པ་ཀུན་དགའ་བོ་ཡུལ་ཀ་ཤི་ཀ་དག་ཏུ་ལྗོངས་རྒྱུ་ཞིང་འགྲོ་བ་ན་རེ་ལྡེ་རིར་ཕྱིན་ནས་རེ་ལྡེ་རིའི་ནགས་ན་འདུག་གོ།

དེ་ནས་ཚེ་དང་ལྡན་པ་ཀུན་དགའ་བོ་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་རེ་ལྡེ་རི་ལ་བསོད་སྙོམས་ལ་ཞུགས་པ་དང་།

དེ་ཇི་ལྟར་ལྷུང་བཟེད་བཀྲུས་པ་ཁོ་ནས་རེ་ལྡེ་རི་ལ་བསོད་སྙོམས་ལ་ཞུགས་པ་དེ་ལྟར་ལྷུང་བཟེད་བཀྲུས་པ་ཁོ་ནས་ཐ་ན་སློང་མོ་གཅིག་སྦྱིན་པ་ཡང་མ་ཐོབ།

ཕྱིར་གཏོང་བ་ཡང་མ་ཐོབ་པར་ཕྱིར་བྱུང་ངོ་།

དེ་ནས་ཚེ་དང་ལྡན་པ་ཀུན་དགའ་བོ་འདི་སྙམ་དུ་སེམས་ཏེ།

སྔོན་ནི་རེ་ལྡེ་རི་འདི་འབྱོར་པ་དང་།

རྒྱས་པ་དང་།

བདེ་བ་དང་།

ལོ་ལེགས་པ་དང་།

སྐྱེ་བོ་དང་།

མི་མང་པོས་ཀྱང་གང་བར་གྱུར་ལ།

འདིར་སློང་མོ་བས་ཀྱང་བསོད་སྙོམས་རྙེད་སླ་བར་གྱུར་ན།

ད་ལྟར་ཡང་རེ་ལྡེ་རི་འདི་འབྱོར་པ་དང་།

རྒྱས་པ་དང་།

བདེ་བ་དང་།

ལོ་ལེགས་པ་དང་།

སྐྱེ་བོ་དང་།

མི་མང་པོས་ཀྱང་གང་བ་ནི་ཡིན་ན།

འོན་ཀྱང་བདག་ཇི་ལྟར་ལྷུང་བཟེད་བཀྲུས་པ་ཁོ་ནས་རེ་ལྡེ་རི་ལ་བསོད་སྙོམས་ལ་ཞུགས་པ་དེ་ལྟར་ལྷུང་བཟེད་བཀྲུས་པ་ཁོ་ནས་ཐ་ན་སློང་མོ་གཅིག་སྦྱིན་པ་ཡང་མ་ཐོབ།

ཕྱིར་གཏོང་བ་ཡང་མ་ཐོབ་པར་ཕྱིར་བྱུང་བ་ལས་ན་འདིར་བཅོམ་ལྡན་འདས་ཀྱི་ཉན་ཐོས་བྱིས་པ།

བླུན་པ།

མི་གསལ་བ།

མི་མཁས་པ་འགའ་ཞིག་གིས་ཉོན་མོངས་པའི་དབང་དུ་གྱུར་པས་སྤྱོད་ཡུལ་ལམ་སྤྱོད་ཡུལ་གྱི་གྲོང་ངམ་རིགས་ཀྱི་བུད་མེད་དམ།

རིགས་ཀྱི་གཞོན་ནུ་མ་དག་ལ་ཀུན་དུ་སྨྲས་པའམ།

ནོམ་པའམ།

ཉུག་པ་བྱས་པར་མ་གྱུར་ཏམ་སྙམ་མོ།

དེའི་ཚེ་ན་རེ་ལྡེ་རི་པའི་བྲམ་ཟེ་དང་།

ཁྱིམ་བདག་རྣམས་ཀྱི་

དཔོང་སའི་གནས་ན་བྲམ་ཟེ་དང་།

ཁྱིམ་བདག་ལྔ་བརྒྱ་ཙམ་བྱ་བ་ཞིག་གི་ཕྱིར་འདུག་སྟེ་མཐུན་པར་གྱུར་ཏོ།

དེ་ནས་ཚེ་དང་ལྡན་པ་ཀུན་དགའ་བོ་རེ་ལྡེ་རི་པའི་བྲམ་ཟེ་དང་།

ཁྱིམ་བདག་རྣམས་ཀྱི་དཔོང་སའི་གནས་ག་ལ་བ་དེར་སོང་སྟེ་ཕྱིན་ནས་རེ་ལྡེ་རི་པའི་བྲམ་ཟེ་དང་།

ཁྱིམ་བདག་རྣམས་ལ་འདི་སྐད་ཅེས་སྨྲས་སོ།

ཤེས་ལྡན་དག་སྔོན་ནི་རེ་ལྡེ་རི་འདི་འབྱོར་པ་དང་།

རྒྱས་པ་དང་།

བདེ་བ་དང་།

ལོ་ལེགས་པ་དང་།

སྐྱེ་བོ་དང་།

མི་མང་པོས་ཀྱང་གང་བར་གྱུར་ལ།

འདིར་སློང་མོ་བས་ཀྱང་བསོད་སྙོམས་རྙེད་སླ་བར་གྱུར་ན།

ད་ལྟར་ཡང་རེ་ལྡེ་རི་འདི་འབྱོར་པ་དང་།

རྒྱས་པ་དང་།

བདེ་བ་དང་།

ལོ་ལེགས་པ་དང་།

སྐྱེ་བོ་དང་།

མི་མང་པོས་གང་བ་ནི་ཡིན་ན།

འོན་ཀྱང་བདག་ཇི་ལྟར་ལྷུང་བཟེད་བཀྲུས་པ་ཁོ་ནས་རེ་ལྡེ་རི་ལ་བསོད་སྙོམས་ལ་ཞུགས་པ་དེ་ལྟར་ལྷུང་བཟེད་བཀྲུས་པ་ཁོ་ནས་ཐ་ན་སློང་མོ་གཅིག་སྦྱིན་པ་ཡང་མ་ཐོབ།

ཕྱིར་གཏོང་བ་ཡང་མ་ཐོབ་པར་ཕྱིར་བྱུང་བར་གྱུར་ཏོ།

དེ་སྐད་ཅེས་སྨྲས་པ་དང་།

རེ་ལྡེ་རི་པའི་བྲམ་ཟེ་དང་།

ཁྱིམ་བདག་དེ་དག་དབང་པོ་རྣམས་ཕྱིར་བླན་ཏེ་འཁོད་དོ།

དེའི་ཚེ་ན་དགེ་བསྙེན་ཆུ་རྒྱུན་ཅན་འཁོར་དེ་ཉིད་དུ་འདུག་ཅིང་མཐུན་པར་གྱུར་ཏོ།

དེ་ནས་དགེ་བསྙེན་ཆུ་རྒྱུན་ཅན་གྱིས་ཚེ་དང་ལྡན་པ་ཀུན་དགའ་བོའི་ལག་པ་གཉིས་ནས་བཟུང་སྟེ་མཐའ་གཅིག་ཏུ་ཁྲིད་ནས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ།

བཙུན་པ་ཀུན་དགའ་བོ་མཁྱེན་པར་མཛོད་ཅིག །

རེ་ལྡེ་རི་འདི་ལ་དགེ་སློང་འགྲོ་མགྱོགས་དང་།

ནབ་སོ་གཉིས་དང་།

དགེ་སློང་དམར་སེར་ཅན་ཁྱིམ་སུན་འབྱིན་པ།

སྡིག་པའི་ཆོས་ཀུན་དུ་སྤྱོད་པ་དག་མཆིས་ཏེ།

དེ་དག་བུད་མེད་ཀྱི་ཡུལ་དང་ལྷན་ཅིག་ཐོ་འཚམ་པར་བགྱིད།

ཀུན་དུ་རྩེ་བར་བགྱིད།

ཀུན་དུ་ཅ་ཅོ་འདོན་པར་བགྱིད།

རྒོད་པ་དང་།

དྲེགས་པ་དང་།

ལུས་སྒྱུར་བར་བགྱིད།

སྟན་གཅིག་ལ་མཆིས་པར་བགྱིད།

སྣོད་གཅིག་ཏུ་འཚལ་བར་བགྱིད།

ཕོར་བུ་གཅིག་ཏུ་མྱོས་པར་འགྱུར་བའི་བཏུང་བ་སྣ་ཚོགས་དག་འཚལ་བར་བགྱིད།

མེ་ཏོག་དག་འཐོག་པར་བགྱིད།

འཐོག་ཏུ་སྩོལ་བར་བགྱིད།

ཕྲེང་བ་དག་རྒྱུད་པར་བགྱིད།

རྒྱུད་དུ་སྩལ་བར་བགྱིད།

མེ་ཏོག་རྣ་རྒྱན་དག་ཐོགས་པར་བགྱིད།

ཐོགས་སུ་སྩལ་བར་བགྱིད།

བྲོ་རྡུང་བར་བགྱིད།

བྲོ་རྡུང་དུ་སྩལ་བར་བགྱིད།

མཆིད་མཆི་བར་བགྱིད།

མཆིད་མཆིར་སྩོལ་བར་བགྱིད།

རོལ་མོའི་སྒྲ་འབྱིན་པར་བགྱིད།

རོལ་མོའི་སྒྲ་འབྱིན་དུ་སྩལ་བར་བགྱིད།

བྲོ་མཁས་པ་དང་།

གླུ་མཁས་པ་དང་།

རོལ་མོའི་སྒྲ་འབྱིན་མཁས་པ་ལ་ངོ་སོ་ལས་བྱུང་བ་སྩོལ་བར་བགྱིད།

ཆོས་གོས་དག་བརྫེས་ཏེ་རྒྱུག་པར་བགྱིད།

མཆོང་བར་བགྱིད།

རབ་ཏུ་མཆོང་བར་བགྱིད།

བརླ་སྐོར་བར་བགྱིད།

ལག་པ་སྐོར་བར་བགྱིད།

ཉ་ལྟར་སྐོར་བར་བགྱིད།

ཆབ་ཏུ་འཕྱོ་བ་འཕེན་པར་བགྱིད།

ཆབ་ལ་རྔ་མ་དུ་ཀ་ལྟར་རྡུང་བར་བགྱིད།

ཆབ་ལ་རྔ་བོ་ཆེ་ལྟར་རྡུང་བར་བགྱིད།

གླང་པོ་ཆེའི་སྐད་ཀྱི་སྒྲ་འབྱིན་པར་བགྱིད།

རྟའི་སྐད་ཀྱི་སྒྲ་འབྱིན་པར་བགྱིད།

ཁྱུ་མཆོག་གི་སྐད་ཀྱི་སྒྲ་འབྱིན་པར་བགྱིད།

རྨ་བྱའི་སྐད་ཀྱི་སྒྲ་འབྱིན་པར་བགྱིད།

ཁུ་བྱུག་གི་སྐད་ཀྱི་སྒྲ་འབྱིན་པར་བགྱིད།

ཁས་རྫ་རྔའི་སྒྲ་འབྱིན་པར་བགྱིད།

ཁས་དུང་གི་སྒྲ་འབྱིན་པར་བགྱིད།

ཁས་རྔ་བོ་ཆེའི་སྒྲ་འབྱིན་པར་བགྱིད།

གླང་པོ་ཆེའི་ཐབ་མོ་ཡང་བགྱིད།

གླང་པོ་ཆེའི་ཐབ་མོ་བགྱིད་དུ་སྩོལ་བར་ཡང་བགྱིད།

རྟའི་ཐབ་མོ་དང་།

ཁྱུ་མཆོག་གི་ཐབ་མོ་དང་།

མ་ཧེའི་ཐབ་མོ་དང་།

རའི་ཐབ་མོ་དང་།

ལུག་གི་ཐབ་མོ་དང་།

བུད་མེད་ཀྱི་ཐབ་མོ་དང་།

སྐྱེས་པའི་ཐབ་མོ་དང་།

གཞོན་ནུའི་ཐབ་མོ་དང་།

གཞོན་ནུ་མའི་ཐབ་མོ་དང་།

བྱ་གག་གི་ཐབ་མོ་དང་།

ཐི་བའི་ཐབ་མོ་དང་།

ངུར་པའི་ཐབ་མོ་ཡང་བགྱིད།

བགྱིད་དུ་སྩལ་བར་ཡང་བགྱིད་དེ།

དེ་དག་དང་གཞན་ཡང་དགེ་སྦྱོང་གི་ལས་མ་ལགས་པ་དག་བགྱིད་ཅིང་བགྱིད་དུ་སྩལ་ཏོ།

དེ་དག་གི་སྤྱོད་ཚུལ་དང་།

སྤྱོད་པ་དང་།

ལོག་པར་སྒྲུབ་པ་དེས་རེ་ལྡེ་རི་ལ་དགེ་སློང་མ་མཆིས་པ་དག་ཀྱང་མི་མཆིས་ལ།

མཆིས་པ་དག་ཀྱང་མངོན་པར་མི་དགའ་ཞིང་རེ་ལྡེ་རིའི་གནས་སྤོང་བར་བགྱིད་དོ།

རེ་ལྡེ་རི་ལ་གནས་པའི་བྲམ་ཟེ་དང་།

ཁྱིམ་བདག་དག་ཀྱང་ཡིད་མི་

དགའ་ཞིང་།

ཞེ་བཅིལ་བར་གྱུར་ནས་དགེ་སློང་གཉུག་མར་གནས་པ་དག་ལ་ཡང་བསོད་སྙོམས་དབུལ་བ་དང་བགྱི་བར་སེམས་པ་དཀའ་ན།

གློ་བུར་དུ་ལྷགས་པ་རྣམས་ལ་ལྟ་སྨོས་ཀྱང་ཅི་འཚལ་བར་གྱུར་གྱིས་བཙུན་པ་ཀུན་དགའ་བོ་གལ་ཏེ་ཁྱོད་མི་དཀའ་ན་ཁྱོད་ཀྱིས་ཐུགས་བརྩེ་བའི་སླད་དུ་དོན་འདི་བཅོམ་ལྡན་འདས་ལ་རྒྱས་པར་གསོལ་ཅིག །

ཚེ་དང་ལྡན་པ་ཀུན་དགའ་བོས་དགེ་བསྙེན་ཆུ་རྒྱུན་ཅན་ལ་ཅང་མི་སྨྲ་བས་དང་དུ་བླངས་སོ།

དེ་ནས་དགེ་བསྙེན་ཆུ་རྒྱུན་ཅན་གྱིས་ཚེ་དང་ལྡན་པ་ཀུན་དགའ་བོས་ཅང་མི་སྨྲ་བས་དང་དུ་བླངས་པར་རིག་ནས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ།

བཙུན་པ་ཀུན་དགའ་བོ་བདག་གི་སྡུམ་པར་བསོད་སྙོམས་གཅིག་གསོལ་བར་ཅི་གནང་།

ཚེ་དང་ལྡན་པ་ཀུན་དགའ་བོས་དགེ་བསྙེན་ཆུ་རྒྱུན་ཅན་ལ་ཅང་མི་སྨྲ་བས་དང་དུ་བླངས་སོ།

དེ་ནས་དགེ་བསྙེན་ཆུ་རྒྱུན་ཅན་གྱིས་ཚེ་དང་ལྡན་པ་ཀུན་དགའ་བོས་ཅང་མི་སྨྲ་བས་དང་དུ་བླངས་པར་རིག་ནས་ཚེ་དང་ལྡན་པ་ཀུན་དགའ་བོ་བདེ་བར་འདུག་པ་ལ་རང་གི་ལག་ནས་བཅའ་བ་དང་བཟའ་བ་གཙང་ཞིང་བསོད་པས་ཚིམ་པར་བྱེད།

སྟོབས་པར་བྱེད་ཅིང་།

རང་གི་ལག་ནས་བཅའ་བ་དང་བཟའ་བ་གཙང་ཞིང་བསོད་པ་རྣམ་གྲངས་དུ་མས་ཚིམ་པར་བྱས་ཤིང་བསྟབས་ནས་ཚེ་དང་ལྡན་པ་ཀུན་དགའ་བོས་ཟོས་ཤིང་ལག་པ་བསྙལ་ལྷུང་བཟེད་བཞག་པར་རིག་ནས་སྟན་ཆེས་དམའ་བ་ཞིག་ཁྱེར་ཏེ།

ཚེ་དང་ལྡན་པ་ཀུན་དགའ་བོའི་མདུན་དུ་ཆོས་མཉན་པའི་ཕྱིར་འདུག་གོ།

དེ་ནས་ཚེ་དང་ལྡན་པ་ཀུན་དགའ་བོ་དགེ་བསྙེན་ཆུ་རྒྱུན་ཅན་ལ་ཆོས་དང་ལྡན་པའི་གཏམ་ཡང་དག་པར་སྟོན།

ཡང་དག་པར་འཛིན་དུ་འཇུག །

ཡང་དག་པར་གཟེངས་སྟོད།

ཡང་དག་པར་རབ་ཏུ་དགའ་བར་བྱེད་ཅིང་ཆོས་དང་ལྡན་པའི་གཏམ་ཡང་དག་པར་བསྟན།

ཡང་དག་པར་འཛིན་དུ་བཅུག །

ཡང་དག་པར་གཟེངས་བསྟོད།

ཡང་དག་པར་རབ་ཏུ་དགའ་བར་བྱས་ནས་སྟན་ལས་ལངས་ཏེ་སོང་ངོ་།།

འདུལ་བ་རྣམ་པར་འབྱེད་པ།

བམ་པོ་ཉི་ཤུ་གསུམ་པ།

དེ་ནས་ཚེ་

དང་ལྡན་པ་ཀུན་དགའ་བོས་ཇི་ལྟར་ཡོངས་སུ་སྤྱད་པའི་གནས་མལ་མཁོས་སུ་ཕབ་ནས་ལྷུང་བཟེད་དང་།

ཆོས་གོས་ཐོགས་ཏེ་མཉན་ཡོད་ག་ལ་བ་དེར་རྒྱུ་ཞིང་སོང་ནས་མཐར་གྱིས་རྒྱུ་ཞིང་འགྲོ་བ་ན་མཉན་ཡོད་དུ་ཕྱིན་ཏོ།

དེ་ནས་ཚེ་དང་ལྡན་པ་ཀུན་དགའ་བོས་ལྷུང་བཟེད་དང་།

ཆོས་གོས་མཁོས་སུ་ཕབ་སྟེ་རྐང་པ་གཉིས་བཀྲུས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ།

མཐའ་གཅིག་ཏུ་འདུག་ནས་ཚེ་དང་ལྡན་པ་ཀུན་དགའ་བོས་དེ་ལ་དགེ་བསྙེན་ཆུ་རྒྱུན་ཅན་དང་ལྷན་ཅིག་སྐབས་སུ་གཏམ་བརྗོད་པ་ཇི་སྙེད་བྱུང་བར་གྱུར་པ་དེ་དག་ཐམས་ཅད་བཅོམ་ལྡན་འདས་ལ་རྒྱས་པར་གསོལ་ཏོ།

དེ་སྐད་ཅེས་གསོལ་པ་དང་།

བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ།

ཀུན་དགའ་བོ་ཁྱོད་དགེ་སློང་གནས་བརྟན་གནས་བརྟན་རྣམས་དང་ལྷན་ཅིག་རེ་ལྡེའི་རི་ལ་སོང་ལ་དགེ་སློང་འགྲོ་མགྱོགས་དང་།

ནབ་སོ་གཉིས་བསྐྲད་པའི་ལས་གྱིས་ཤིག །

འདི་ལྟར་བྱ་སྟེ།

ལམ་གྱི་བར་དུ་འདུག་ལ་དགེ་སློང་གླེང་བ་པོ་བསྐོ་བར་བྱ་སྟེ།

དགེ་སློང་གླེང་བ་པོ་ཆོས་ལྔ་དང་ལྡན་པ་ནི་མ་བསྐོས་པ་ཡང་བསྐོ་བར་མི་བྱ་ཞིང་བསྐོས་པ་ཡང་དབྱུང་བར་བྱ་སྟེ།

ལྔ་གང་ཞེ་ན།

འདུན་པས་འགྲོ་བ་དང་།

ཞེ་སྡང་གིས་འགྲོ་བ་དང་།

གཏི་མུག་གིས་འགྲོ་བ་དང་།

འཇིགས་པས་འགྲོ་བ་དང་།

གླེངས་པ་དང་མ་གླེངས་པ་མི་ཤེས་པ་སྟེ།

དགེ་སློང་གླེང་བ་པོ་ཆོས་ལྔ་པོ་དེ་དག་དང་ལྡན་པ་ནི་མ་བསྐོས་པ་ཡང་བསྐོ་བར་མི་བྱ་ཞིང་།

བསྐོས་པ་ཡང་དབྱུང་བར་བྱའོ།

དགེ་སློང་གླེང་བ་པོ་ཆོས་ལྔ་དང་ལྡན་པ་ནི་མ་བསྐོས་པ་ཡང་བསྐོ་བར་བྱ་ཞིང་བསྐོས་པ་ཡང་དབྱུང་བར་མི་བྱ་སྟེ།

ལྔ་གང་ཞེ་ན།

འདུན་པས་མི་འགྲོ་བ་དང་།

ཞེ་སྡང་གིས་མི་འགྲོ་བ་དང་།

གཏི་མུག་གིས་མི་འགྲོ་བ་དང་།

འཇིགས་པས་མི་འགྲོ་བ་དང་།

གླེངས་པ་དང་མ་གླེངས་པ་ཤེས་པ་སྟེ།

དགེ་སློང་གླེང་བ་པོ་ཆོས་ལྔ་པོ་དེ་དག་དང་ལྡན་པ་ནི་མ་བསྐོས་པ་ཡང་བསྐོ་བར་བྱ་ཞིང་བསྐོས་པ་ཡང་

དབྱུང་བར་མི་བྱའོ།

འདི་ལྟར་བསྐོ་བར་བྱ་སྟེ།

གནས་མལ་བཤམ་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལ་ཇེ་དང་པོ་སྤྲོ་བར་བྱ་སྟེ།

ཚེ་དང་ལྡན་པ་མིང་འདི་ཞེས་བྱ་བ་ཁྱོད་རེ་ལྡེ་རི་ལ་སོང་སྟེ།

དགེ་སློང་འགྲོ་མགྱོགས་དང་།

ནབ་སོ་ལ་དགེ་སྦྱོང་གི་ཆོས་མ་ཡིན་པ་རྣམ་པ་མང་པོས་གླེང་བར་སྤྲོའམ།

གལ་ཏེ་སྤྲོ་ན་དེས་སྤྲོའོ་ཞེས་བརྗོད་པར་བྱའོ།

དེའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ།

དགེ་འདུན་བཙུན་པ་རྣམས་གསན་དུ་གསོལ།

དགེ་སློང་གླེང་བ་པོ་མིང་འདི་ཞེས་བགྱི་བ་འདི་རེ་ལྡེ་རི་ལ་མཆིས་ཏེ་དགེ་སློང་འགྲོ་མགྱོགས་དང་།

ནབ་སོ་ལ་དགེ་སྦྱོང་གི་ཆོས་མ་ལགས་པ་རྣམ་པ་མང་པོས་གླེང་བར་སྤྲོ་ན།

གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་།

དགེ་འདུན་གྱིས་དགེ་སློང་གླེང་བ་པོ་མིང་འདི་ཞེས་བགྱི་བ་དགེ་སློང་འགྲོ་མགྱོགས་དང་།

ནབ་སོ་ལ་གླེང་བར་བསྐོའོ།

འདི་ནི་གསོལ་བའོ།

ལས་ནི་འདི་ལྟར་བྱ་སྟེ།

དགེ་འདུན་བཙུན་པ་རྣམས་གསན་དུ་གསོལ།

དགེ་སློང་གླེང་བ་པོ་མིང་འདི་ཞེས་བགྱི་བ་འདི་རེ་ལྡེ་རི་ལ་མཆིས་ནས་དགེ་སློང་འགྲོ་མགྱོགས་དང་།

ནབ་སོ་ལ་དགེ་སྦྱོང་གི་ཆོས་མ་ལགས་པ་རྣམ་པ་མང་པོས་གླེང་བར་སྤྲོ་སྟེ།

དེའི་སླད་དུ་དགེ་འདུན་གྱིས་དགེ་སློང་གླེང་བ་པོ་མིང་འདི་ཞེས་བགྱི་བ་དགེ་སློང་འགྲོ་མགྱོགས་དང་།

ནབ་སོ་ལ་གླེང་བར་བསྐོ་ན།

ཚེ་དང་ལྡན་པ་གང་དགེ་སློང་གླེང་བ་པོ་མིང་འདི་ཞེས་བགྱི་བ་དགེ་སློང་འགྲོ་མགྱོགས་དང་།

ནབ་སོ་ལ་གླེང་བར་བསྐོ་བར་མཛད་པར་བཟོད་པ་དེ་དག་ནི་ཅང་མ་གསུང་ཤིག །

གང་དག་མི་བཟོད་པ་དེ་དག་ནི་གསུང་ཤིག །

དགེ་འདུན་གྱིས་བཟོད་ཅིང་གནང་ནས།

དགེ་འདུན་གྱིས་དགེ་སློང་གླེང་བ་པོ་མིང་འདི་ཞེས་བགྱི་བ་དགེ་སློང་འགྲོ་མགྱོགས་དང་།

ནབ་སོ་ལ་གླེང་བར་བསྐོས་ལགས་ཏེ།

འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ།

དགེ་

སློང་དག་ངས་དགེ་སློང་གླེང་བ་པོའི་ཀུན་དུ་སྤྱོད་པའི་ཆོས་བཅའ་བར་བྱ་སྟེ།

དགེ་སློང་གླེང་བ་པོས་སྲིན་བུ་ཅན་གྱི་རིལ་སོང་སྟེ་གནས་མལ་བཤམ་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ན་དགེ་སློང་འགྲོ་མགྱོགས་དང་།

ནབ་སོ་གཉིས་ལ་གླེང་བར་བྱའོ།

གལ་ཏེ་མཐུན་པ་མི་སྦྱིན་ན་མ་གུས་པ་དེ་ཉིད་ཀྱིས་གནས་ནས་བསྐྲད་པའི་ལས་བྱའོ།

གལ་ཏེ་མཐུན་པ་སྟེར་ན་སྐབས་འབྱེད་དུ་གཞུག་པར་བྱའོ།

གལ་ཏེ་སྐབས་མི་འབྱེད་ན་མ་གུས་པ་དེ་ཉིད་ཀྱིས་བསྐྲད་པའི་ལས་བྱའོ།

གལ་ཏེ་སྐབས་འབྱེད་ན་གླེང་བར་བྱའོ།

གལ་ཏེ་ལྟུང་བ་མ་མཐོང་ངོ་ཞེས་ཟེར་ན་མ་གུས་པ་དེ་ཉིད་ཀྱིས་བསྐྲད་པའི་ལས་བྱའོ།

གལ་ཏེ་ལྟུང་བ་མཐོང་ངོ་ཞེས་ཟེར་ན་འདི་སྐད་ཅེས་དེ་ཁོ་ནའི་ཕྱིར་དགེ་འདུན་གྱིས་ཁྱེད་གཉིས་ལ་བསྐྲད་པའི་ཕྲིན་ལས་མཛད་དོ་ཞེས་བརྗོད་པར་བྱའོ་དགེ་སློང་གླེང་བ་པོས་གླེང་བ་པོའི་ཆོས་ཇི་ལྟར་བཅས་པ་ཡང་དག་པར་བླངས་ཏེ་འཇུག་པར་མི་བྱེད་ན་འགལ་ཚབས་ཅན་དུ་འགྱུར་རོ།

ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་དགེ་སློང་གནས་བརྟན་གནས་བརྟན་རྣམས་དང་ལྷན་ཅིག་རེ་ལྡེ་རི་ལ་སོང་སྟེ།

ལམ་གྱི་བར་དུ་འདུག་ནས་དགེ་སློང་གླེང་བ་པོ་བསྐོས་སོ།

དེ་ན་དགེ་སློང་དམར་སེར་ཅན་གང་དག་དགེ་སློང་འགྲོ་མགྱོགས་དང་།

ནབ་སོ་གཉིས་དང་མཚུངས་པར་བྱེད་པ་དེ་དག་གིས་ཚེ་དང་ལྡན་པ་ཀུན་དགའ་བོ་དགེ་སློང་གནས་བརྟན་གནས་བརྟན་རྣམས་དང་ལྷན་ཅིག་འདིར་འོངས་ཏེ་ལམ་གྱི་བར་དུ་འདུག་ནས།

དགེ་སློང་གླེང་བ་པོ་བསྐོས་ཏེ་དགེ་སློང་འགྲོ་མགྱོགས་དང་།

ནབ་སོ་གཉིས་སྐྲོད་པའི་ལས་བྱེད་པར་འགྱུར་རོ་ཞེས་ཐོས་སོ།

ཐོས་ནས་ཀྱང་དེ་དག་འདི་སྙམ་དུ་སེམས་ཏེ།

ཚེ་དང་ལྡན་པ་འདི་གཉིས་ཀྱིས་ཀུན་དུ་སྤྱད་པ་དང་།

སྨྲས་པ་དང་།

བརྟུལ་བ་གང་ཡིན་པ་དག་ལས་བདག་ཅག་གིས་ཀུན་དུ་མ་སྤྱད་པ་དང་།

མ་སྨྲས་པ་དང་།

མ་བརྟུལ་བ་ཅི་ཡང་མེད་པས་དེའི་ཕྱིར་འདི་གཉིས་ལ་

སྐྲོད་པའི་ལས་བྱེད་ན་བདག་ཅག་ལ་ཡང་ཅིའི་ཕྱིར་མི་བྱེད་དེ།

གང་གི་ཚེ་ཚེ་དང་ལྡན་པ་ཀུན་དགའ་བོ་དང་དགེ་སློང་གནས་བརྟན་གནས་བརྟན་རྣམས་འདིར་འོངས་ཏེ་དང་པོར་འགྲོ་མགྱོགས་དང་།

ནབ་སོ་གཉིས་བསྐྲད་པའི་ལས་བྱས་ནས་དེའི་འོག་ཏུ་བདག་ཅག་ལ་ཡང་སྐྲོད་པའི་ལས་བྱེད་པར་འགྱུར་བའི་གནས་ཡོད་པར་འགྱུར་བས་བདག་ཅག་གཏུར་བུའི་ཁུར་དྲགས་ཏེ་ཉན་རྣ་བ་བཞག་ཅིང་འཁོད་ནས།

ཚེ་དང་ལྡན་པ་ཀུན་དགའ་བོ་དང་།

དགེ་སློང་གནས་བརྟན་གནས་བརྟན་རྣམས་སྒོ་གཅིག་ནས་འཇུག་པར་འགྱུར་བ་ན།

བདག་ཅག་གཏུར་བུའི་ཁུར་དག་ཐོགས་ཏེ་སྒོ་གཅིག་ནས་འབྱུང་ཞིང་མཉན་ཡོད་དུ་འདོང་བར་བྱ་གོར་མ་ཆག་སྙམ་མོ།

དེ་ནས་དགེ་སློང་གླེང་བ་པོ་རེ་ལྡེ་རི་ལ་སོང་སྟེ་གནས་མལ་བཤམ་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ན་དགེ་སློང་འགྲོ་མགྱོགས་དང་།

ནབ་སོ་གཉིས་ཀྱིས་མཐུན་པ་བྱིན་ཏེ་སྐབས་ཕྱེ་ནས་དགེ་སློང་གླེང་བ་པོས་གླེངས་པ་དང་།

དེ་གཉིས་ཀྱིས་སྨྲས་པ།

ཚེ་དང་ལྡན་པ་ལྟུང་བ་མཐོང་ངོ་།

གླེང་བ་པོས་སྨྲས་པ།

དེ་ཁོ་ནའི་ཕྱིར་དགེ་འདུན་གྱིས་ཁྱེད་གཉིས་ལ་བསྐྲད་པའི་ཕྲིན་ལས་མཛད་དོ།

དེ་ནས་ཚེ་དང་ལྡན་པ་ཀུན་དགའ་བོ་དང་།

དགེ་སློང་གནས་བརྟན་གནས་བརྟན་རྣམས་སྒོ་གཅིག་ནས་ཞུགས་པར་གྱུར་པ་ན།

དགེ་སློང་དམར་སེར་ཅན་དག་གཏུར་བུའི་ཁུར་དག་ཐོགས་ཏེ་སྒོ་གཅིག་ནས་བྱུང་ཞིང་མཉན་ཡོད་དུ་དོང་ནས་དེ་དག་གིས་ལྟུང་བ་བཤགས་པར་བྱ་བ་གང་དག་ཡིན་པ་དེ་དག་ཀྱང་བཤགས་ཤིང་།

སེམས་ཀྱི་རྣམ་པར་རྟོག་པ་སྣ་ཚོགས་བསྡམ་པར་བྱ་བ་དག་ཀྱང་སེམས་ཀྱིས་བསྡམས་ཏེ།

དགེ་སློང་རང་བཞིན་དུ་གནས་པ་དག་དང་ལྷན་ཅིག་གནས་ཤིང་དགེ་འདུན་གྱི་བྱ་བ་ཡང་རྗེས་སུ་སྲུང་བར་བྱེད་དོ།

དེ་ནས་ཚེ་དང་ལྡན་པ་ཀུན་དགའ་བོ་དང་།

དགེ་སློང་གནས་བརྟན་གནས་བརྟན་རྣམས་ཀྱིས་དགེ་སློང་འགྲོ་མགྱོགས་དང་།

ནབ་སོ་གཉིས་ལ་བསྐྲད་པའི་ལས་བྱས་ནས་

མཉན་ཡོད་ག་ལ་བ་དེར་སོང་སྟེ།

མཐར་གྱིས་རྒྱུ་ཞིང་འདོང་བ་ན་མཉན་ཡོད་དུ་ཕྱིན་ཏོ།

འགྲོ་མགྱོགས་དང་།

ནབ་སོ་གཉིས་ཀྱིས་བསམས་པ།

གང་ས་ལ་སྒྱེལ་བ་དེ་ནི་ས་ཉིད་ལས་བརྟེན་ཏེ་ལྡང་བ་ཡིན་པས་བདག་ཅག་གཉིས་ཀྱང་མཉན་ཡོད་ཉིད་དུ་སོང་སྟེ།

བཅོམ་ལྡན་འདས་དང་དགེ་སློང་གི་དགེ་འདུན་ལ་བཟོད་པ་གསོལ་བར་བྱའོ་སྙམ་ནས་འགྲོ་མགྱོགས་ཀྱིས་སྨྲས་པ།

ནབ་སོ་གང་ས་ལ་སྒྱེལ་བ་དེ་ནི་ས་ཉིད་ལས་བརྟེན་ཏེ་ལྡང་བ་ཡིན་པས་བདག་ཅག་གཉིས་ཀྱང་མཉན་ཡོད་ཉིད་དུ་སོང་སྟེ།

བཅོམ་ལྡན་འདས་དང་དགེ་སློང་གི་དགེ་འདུན་ལ་བཟོད་པ་གསོལ་བར་བྱས་འདོང་ངོ་།

ནབ་སོས་སྨྲས་པ།

མ་ཉེས་ཀྱིས་ཚུར་ཤོག་བཟོད་པ་གསོལ་དུ་འདོང་ངོ་།

དེ་གཉིས་ཀྱིས་གྲོས་བྱས་ནས་དེ་ཉིད་ཀྱི་མཚན་མོ་འདས་པ་དང་སྔ་དྲོ་ཤམ་ཐབས་བགོས་ལྷུང་བཟེད་དང་ཆོས་གོས་ཐོགས་ཏེ་རེ་ལྡེ་རི་ལ་བསོད་སྙོམས་ལ་ཞུགས་ནས།

རེ་ལྡེ་རི་ལ་བསོད་སྙོམས་བརྒྱུས་ཏེ་ཟས་ཀྱི་བྱ་བ་བྱས་ནས་ཕྱི་མའི་ཟས་ཀྱི་བསོད་སྙོམས་ལས་ཕྱིར་ལོག་པས་ཇི་ལྟར་སྤྱད་པའི་གནས་མལ་མཁོས་སུ་ཕབ་སྟེ་ལྷུང་བཟེད་དང་ཆོས་གོས་ཐོགས་ནས་མཉན་ཡོད་ག་ལ་བ་དེར་རྒྱུ་ཞིང་དོང་སྟེ་མཐར་གྱིས་རྒྱུ་ཞིང་དོང་བ་ན་མཉན་ཡོད་དུ་ཕྱིན་ནས་དགེ་སློང་གནས་བརྟན་གནས་བརྟན་རྣམས་ཀྱིས་དེ་གཉིས་མཐོང་བ་དང་།

དེ་དག་དེ་གཉིས་ལ་གཏམ་འདྲེ་བར་མི་བྱེད།

ཕེབས་པར་སྨྲ་བར་མི་བྱེད་དོ།

དགེ་སློང་དམར་སེར་ཅན་དག་གིས་ཀྱང་དེ་གཉིས་མཐོང་བ་དང་།

དེ་དག་ཀྱང་དེ་གཉིས་ལ་གཏམ་འདྲེ་བར་མི་བྱེད།

ཕེབས་པར་སྨྲ་བར་མི་བྱེད་དོ།

དེ་ནས་དགེ་སློང་འགྲོ་མགྱོགས་དང་།

ནབ་སོ་གཉིས་ཀྱིས་དགེ་སློང་དམར་སེར་ཅན་དག་ལ་སྨྲས་པ།

ཚེ་དང་ལྡན་པ་དག་དགེ་སློང་གནས་བརྟན་གནས་བརྟན་དག་ཁོ་བོ་ཅག་གཉིས་ལ་གཏམ་འདྲེ་བར་མི་བྱེད།

ཕེབས་པར་སྨྲ་བར་མི་བྱེད་པ་ནི་རིགས་ན།

ཁྱེད་ཅག་ཅིའི་ཕྱིར།

ཁོ་བོ་ཅག་གཉིས་ལ་གཏམ་འདྲེ་བར་མི་བྱེད།

ཕེབས་པར་སྨྲ་བར་མི་བྱེད།

ཁོ་བོ་ཅག་གཉིས་ཀྱིས་ཀུན་དུ་སྤྱད་པ་དང་།

སྨྲས་པ་དང་།

བརྟུལ་བ་གང་ཡིན་པ་དག་ལས་ཁྱེད་ཅག་གིས་ཀུན་དུ་མ་སྤྱད་པ་དང་།

མ་སྨྲས་པ་དང་།

མ་བརྟུལ་བ་ཅི་ཞིག་ཡོད།

དེ་དག་གིས་སྨྲས་པ།

ཚེ་དང་ལྡན་པ་གཉིས་དེ་ཡང་བདེན་མོད་ཀྱི།

འོན་ཀྱང་ཁོ་བོ་ཅག་གིས་ལྟུང་བ་བཤགས་པར་བྱ་བ་གང་དག་ཡིན་པ་དེ་དག་ཀྱང་བཤགས་ཤིང་སེམས་ཀྱི་རྣམ་པར་རྟོག་པ་སྣ་ཚོགས་བསྡམ་པར་བྱ་བ་དག་ཀྱང་སེམས་ཀྱིས་བསྡམས་ཏེ།

ད་ལྟར་དགེ་སློང་རང་བཞིན་དུ་གནས་པ་དག་དང་ལྷན་ཅིག་གནས་ཤིང་དགེ་འདུན་གྱི་བྱ་བ་ཡང་རྗེས་སུ་སྲུང་བར་བྱེད་པས་ཁོ་བོ་ཅག་ཕྱིན་ཅད་གནས་ངན་ལེན་ཀུན་དུ་སྤྱོད་པ་དག་དང་ལྷན་ཅིག་ལོངས་སྤྱོད་པར་མི་བྱེད་དོ།

དེ་གཉིས་ཀྱིས་ཚེ་དང་ལྡན་པ་དག་འདི་ན་དགེ་སློང་ཁ་ཅིག་འདུན་པས་འགྲོ་བ།

ཞེ་སྡང་གིས་འགྲོ་བ།

གཏི་མུག་གིས་འགྲོ་བ།

འཇིགས་པས་འགྲོ་བ་དག་ཡིན་ཏེ།

འདི་ལྟར་ལྟུང་བ་འདྲ་བ་ཁོ་ན་ལས་དགེ་སློང་ཁ་ཅིག་ནི་སྐྲོད་པར་བྱེད།

ཁ་ཅིག་ནི་སྐྲོད་པར་མི་བྱེད་དོ་ཞེས་འཕྱ་བར་བརྩམས་པ་དང་།

དགེ་སློང་རྣམས་ཀྱིས་དེ་གཉིས་ལ་སྨྲས་པ།

ཚེ་དང་ལྡན་པ་གཉིས་ཁྱེད་ཅག་གཉིས་སུ་ལ་འདུན་པས་འགྲོ་བ་ཞེས་ཟེར།

ཞེ་སྡང་གིས་འགྲོ་བ།

གཏི་མུག་གིས་འགྲོ་བ།

འཇིགས་པས་འགྲོ་བ་ཞེས་ཟེར།

ཚེ་དང་ལྡན་པ་དག་དགེ་སློང་ཚེ་དང་ལྡན་པ་ཀུན་དགའ་བོ་དང་།

གནས་བརྟན་གནས་བརྟན་གང་དག་རེ་ལྡེ་རི་ལ་དོང་ནས་བདག་ཅག་བསྐྲད་པའི་ལས་བྱས་པ་དག་ལའོ།

དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་ཚེ་དང་ལྡན་པ་ཀུན་དགའ་བོ་དང་།

གནས་བརྟན་གནས་བརྟན་གང་དག་རེ་ལྡེ་རི་ལ་དོང་ནས་བདག་ཅག་བསྐྲད་པའི་ལས་བྱས་པར་ཤེས་བཞིན་དུ་དེ་དག་ལ་འདུན་པས་འགྲོ་བ་ཞེས་ཟེར།

ཞེ་སྡང་གིས་འགྲོ་བ།

གཏི་མུག་གིས་འགྲོ་བ།

འཇིགས་པས་འགྲོ་བ་ཞེས་ཟེར་ཞིང་།

དགེ་སློང་རྣམས་ལ་ཡང་དེ་སྐད་ཅེས་ཚེ་དང་ལྡན་པ་དག་འདི་ན་དགེ་སློང་ཁ་ཅིག་འདུན་པས་འགྲོ་བ།

ཞེ་སྡང་གིས་འགྲོ་བ།

གཏི་མུག་གིས་འགྲོ་བ།

འཇིགས་པས་འགྲོ་བ་དག་ཡིན་ཏེ།

འདི་ལྟར་ལྟུང་བ་འདྲ་

བ་ཁོ་ན་ལས་དགེ་སློང་ཁ་ཅིག་ནི་སྐྲོད་པར་བྱེད།

ཁ་ཅིག་ནི་སྐྲོད་པར་མི་བྱེད་དོ།

ཞེས་སྨོད་པར་བྱེད།

ཕྱར་ཀ་གཏོང་བར་བྱེད།

ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་།

བཅོམ་ལྡན་འདས་ཀྱིས་བཀའ་སྩལ་པ།

དགེ་སློང་དག་ཁྱེད་ཀྱིས་དགེ་སློང་འགྲོ་མགྱོགས་དང་།

ནབ་སོ་གཉིས་དང་།

གཞན་ཡང་དེ་ལྟ་བུ་གང་ཡིན་པ་ལ་བཞམས་ཏེ་བསྒོ་བར་བྱའོ།

འདི་སྐད་བསྒོ་བར་བྱ་སྟེ།

ཚེ་དང་ལྡན་པ་འགྲོ་མགྱོགས་དང་།

ནབ་སོ་གཉིས་ཁྱེད་དགེ་སློང་ཚེ་དང་ལྡན་པ་ཀུན་དགའ་བོ་དང་།

གནས་བརྟན་གནས་བརྟན་གང་དག་རེ་ལྡེ་རི་ལ་དོང་ནས་ཁྱེད་བསྐྲད་པའི་ལས་བྱས་པར་ཤེས་བཞིན་དུ་དེ་དག་ལ་འདུན་པས་འགྲོ་བ་ཞེས་མ་ཟེར་ཅིག །

ཞེ་སྡང་གིས་འགྲོ་བ།

གཏི་མུག་གིས་འགྲོ་བ།

འཇིགས་པས་འགྲོ་བ་ཞེས་མ་ཟེར་ཅིག །

དགེ་སློང་རྣམས་ལ་ཡང་འདི་སྐད་ཅེས་ཚེ་དང་ལྡན་པ་དག་འདི་ན་དགེ་སློང་ཁ་ཅིག་འདུན་པས་འགྲོ་བ།

ཞེ་སྡང་གིས་འགྲོ་བ།

གཏི་མུག་གིས་འགྲོ་བ།

འཇིགས་པས་འགྲོ་བ་དག་ཡིན་ཏེ།

འདི་ལྟར་ལྟུང་བ་འདྲ་བ་ཁོ་ན་ལས་དགེ་སློང་ཁ་ཅིག་ནི་སྐྲོད་པར་བྱེད།

ཁ་ཅིག་ནི་སྐྲོད་པར་མི་བྱེད་དོ།

ཞེས་མ་ཟེར་ཅིག །

དེ་ཅིའི་ཕྱིར་ཞེ་ན།

དགེ་སློང་དེ་དག་ནི་འདུན་པས་འགྲོ་བ་མ་ཡིན།

ཞེ་སྡང་གིས་འགྲོ་བ་མ་ཡིན།

གཏི་མུག་གིས་འགྲོ་བ་མ་ཡིན།

འཇིགས་པས་འགྲོ་བ་མ་ཡིན་གྱི།

འདི་ལྟར་ཚེ་དང་ལྡན་པ་དག་ཉིད་ཁྱིམ་སུན་འབྱིན་པ།

སྡིག་པའི་ཆོས་ཀུན་དུ་སྤྱོད་པ་དག་ཡིན་ཏེ།

ཁྱེད་ཉིད་ཀྱིས་ཁྱིམ་དག་སུན་ཕྱུང་བར་ཡང་མཐོང་ཞིང་ཐོས་ལ་རབ་ཏུ་ཤེས།

ཁྱེད་སྡིག་པ་ཀུན་དུ་སྤྱོད་པར་ཡང་མཐོང་ཞིང་ཐོས་ལ་རབ་ཏུ་ཤེས་པའི་ཕྱིར་ཏེ།

ཚེ་དང་ལྡན་པ་དག་འདུན་པས་འགྲོ་བ་ཞེས་བྱ་བའི་ཚིག་གི་ལམ་དང་།

ཞེ་སྡང་གིས་འགྲོ་བ།

གཏི་མུག་གིས་འགྲོ་བ།

འཇིགས་པས་འགྲོ་བ་ཞེས་བྱ་བའི་ཚིག་གི་ལམ་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ།

དགེ་སློང་རྣམས་ཀྱིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་

མཉན་ནས་དགེ་སློང་འགྲོ་མགྱོགས་དང་།

ནབ་སོ་གཉིས་ལ་ཚེ་དང་ལྡན་པ་འགྲོ་མགྱོགས་དང་།

ནབ་སོ་གཉིས་ཁྱེད་དགེ་སློང་ཚེ་དང་ལྡན་པ་ཀུན་དགའ་བོ་དང་།

གནས་བརྟན་གནས་བརྟན་གང་དག་རེ་ལྡེ་རི་ལ་དོང་ནས་ཁྱེད་བསྐྲད་པའི་ལས་བྱས་པར་ཤེས་བཞིན་དུ་དེ་དག་ལ་འདུན་པས་འགྲོ་བ་ཞེས་མ་ཟེར་ཅིག །

ཞེ་སྡང་གིས་འགྲོ་བ།

གཏི་མུག་གིས་འགྲོ་བ།

འཇིགས་པས་འགྲོ་བ་ཞེས་མ་ཟེར་ཅིག །

དགེ་སློང་རྣམས་ལ་ཡང་འདི་སྐད་ཅེས་ཚེ་དང་ལྡན་པ་དག་འདི་ན་དགེ་སློང་ཁ་ཅིག་འདུན་པས་འགྲོ་བ།

ཞེ་སྡང་གིས་འགྲོ་བ།

གཏི་མུག་གིས་འགྲོ་བ།

འཇིགས་པས་འགྲོ་བ་དག་ཡིན་ཏེ།

འདི་ལྟར་ལྟུང་བ་འདྲ་བ་ཁོ་ན་ལས་དགེ་སློང་ཁ་ཅིག་ནི་སྐྲོད་པར་བྱེད།

ཁ་ཅིག་ནི་སྐྲོད་པར་མི་བྱེད་དོ།

ཞེས་མ་ཟེར་ཅིག །

དེ་ཅིའི་ཕྱིར་ཞེ་ན།

དགེ་སློང་དེ་དག་ནི་འདུན་པས་འགྲོ་བ་མ་ཡིན།

ཞེ་སྡང་གིས་འགྲོ་བ་མ་ཡིན།

གཏི་མུག་གིས་འགྲོ་བ་མ་ཡིན།

འཇིགས་པས་འགྲོ་བ་མ་ཡིན་གྱི།

འདི་ལྟར་ཚེ་དང་ལྡན་པ་དག་ཉིད་ཁྱིམ་སུན་འབྱིན་པ་སྡིག་པའི་ཆོས་ཀུན་དུ་སྤྱོད་པ་དག་ཡིན་ཏེ།

ཁྱེད་ཉིད་ཀྱིས་ཁྱིམ་དག་སུན་ཕྱུང་བར་མཐོང་ཞིང་ཐོས་ལ་རབ་ཏུ་ཤེས།

ཁྱེད་སྡིག་པ་ཀུན་དུ་སྤྱོད་པར་ཡང་མཐོང་ཞིང་ཐོས་ལ་རབ་ཏུ་ཤེས་པའི་ཕྱིར་ཏེ།

ཚེ་དང་ལྡན་པ་དག་འདུན་པས་འགྲོ་བ་ཞེས་བྱ་བའི་ཚིག་གི་ལམ་དང་།

ཞེ་སྡང་གིས་འགྲོ་བ།

གཏི་མུག་གིས་འགྲོ་བ།

འཇིགས་པས་འགྲོ་བ་ཞེས་བྱ་བའི་ཚིག་གི་ལམ་འདི་ལྟ་བུ་འདི་ཐོང་ཤིག་ཅེས་བཞམས་ཏེ་བསྒོའོ།

དགེ་སློང་རྣམས་ཀྱིས་དེ་གཉིས་ལ་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་།

བཅོམ་ལྡན་འདས་ཀྱིས་བཀའ་སྩལ་པ།

དགེ་སློང་དག་ཁྱེད་ཀྱིས་དགེ་སློང་འགྲོ་མགྱོགས་དང་།

ནབ་སོ་གཉིས་དང་།

གཞན་ཡང་དེ་ལྟ་བུ་གང་ཡིན་པ་ལ་གསོལ་བ་དང་བཞིའི་

ལས་ཀྱིས་བསྒོ་བར་བྱའོ།

འདི་ལྟར་བསྒོ་བར་བྱ་སྟེ།

གནས་མལ་བཤམ་པ་བྱས་ནས་གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ལ་དགེ་སློང་གཅིག་གིས་གསོལ་བ་བྱས་ཏེ་ལས་བྱའོ།

དགེ་འདུན་བཙུན་པ་རྣམས་གསན་དུ་གསོལ།

དགེ་སློང་འགྲོ་མགྱོགས་དང་།

ནབ་སོ་འདི་གཉིས་དགེ་སློང་ཚེ་དང་ལྡན་པ་ཀུན་དགའ་བོ་དང་།

གནས་བརྟན་གནས་བརྟན་གང་དག་རེ་ལྡེ་རི་ལ་མཆིས་ནས་འདི་གཉིས་བསྐྲད་པའི་ལས་བགྱིད་པར་འཚལ་བཞིན་དུ་དེ་དག་ལ་འདུན་པས་འགྲོ་བ་ཞེས་མཆི།

ཞེ་སྡང་གིས་འགྲོ་བ།

གཏི་མུག་གིས་འགྲོ་བ།

འཇིགས་པས་འགྲོ་བ་ཞེས་མཆི་ཞིང་།

དགེ་སློང་རྣམས་ལ་ཡང་འདི་སྐད་ཅེས་ཚེ་དང་ལྡན་པ་དག་འདི་ན་དགེ་སློང་ཁ་ཅིག་འདུན་པས་འགྲོ་བ།

ཞེ་སྡང་གིས་འགྲོ་བ།

གཏི་མུག་གིས་འགྲོ་བ།

འཇིགས་པས་འགྲོ་བ་དག་ཡིན་ཏེ།

འདི་ལྟར་ལྟུང་བ་འདྲ་བ་ཁོ་ན་ལས་དགེ་སློང་ཁ་ཅིག་ནི་སྐྲོད་པར་བྱེད།

ཁ་ཅིག་ནི་སྐྲོད་པར་མི་བྱེད་དོ།

ཞེས་མཆི་ནས།

འདི་གཉིས་ལ་དགེ་སློང་མང་པོས་བཞམས་ཏེ་བསྒོ་ན།

འདི་གཉིས་ལ་དགེ་སློང་མང་པོས་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་ན།

གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་།

དགེ་འདུན་གྱིས་དགེ་སློང་འགྲོ་མགྱོགས་དང་།

ནབ་སོ་གཉིས་ལ་ཚེ་དང་ལྡན་པ་འགྲོ་མགྱོགས་དང་།

ནབ་སོ་གཉིས་ཁྱེད་དགེ་སློང་ཚེ་དང་ལྡན་པ་ཀུན་དགའ་བོ་དང་།

གནས་བརྟན་གནས་བརྟན་གང་དག་རེ་ལྡེ་རི་ལ་དོང་ནས་ཁྱེད་བསྐྲད་པའི་ལས་བྱས་པར་ཤེས་བཞིན་དུ་དེ་དག་ལ་འདུན་པས་འགྲོ་བ་ཞེས་མ་ཟེར་ཅིག །

ཞེ་སྡང་གིས་འགྲོ་བ།

གཏི་མུག་གིས་འགྲོ་བ།

འཇིགས་པས་འགྲོ་བ་ཞེས་མ་ཟེར་ཅིག །

དགེ་སློང་རྣམས་ལ་ཡང་འདི་སྐད་ཅེས་ཚེ་དང་ལྡན་པ་དག་འདི་

ན་དགེ་སློང་ཁ་ཅིག་འདུན་པས་འགྲོ་བ།

ཞེ་སྡང་གིས་འགྲོ་བ།

གཏི་མུག་གིས་འགྲོ་བ།

འཇིགས་པས་འགྲོ་བ་དག་ཡིན་ཏེ།

འདི་ལྟར་ལྟུང་བ་འདྲ་བ་ཁོ་ན་ལས་དགེ་སློང་ཁ་ཅིག་ནི་སྐྲོད་པར་བྱེད།

ཁ་ཅིག་ནི་སྐྲོད་པར་མི་བྱེད་དོ་ཞེས་མ་ཟེར་ཅིག །

དེ་ཅིའི་ཕྱིར་ཞེ་ན།

དགེ་སློང་དེ་དག་ནི་འདུན་པས་འགྲོ་བ་མ་ཡིན།

ཞེ་སྡང་གིས་འགྲོ་བ་མ་ཡིན།

གཏི་མུག་གིས་འགྲོ་བ་མ་ཡིན།

འཇིགས་པས་འགྲོ་བ་མ་ཡིན་གྱི།

འདི་ལྟར་ཚེ་དང་ལྡན་པ་དག་ཉིད་ཁྱིམ་སུན་འབྱིན་པ་སྡིག་པའི་ཆོས་ཀུན་དུ་སྤྱོད་པ་དག་ཡིན་ཏེ།

ཁྱེད་ཉིད་ཀྱིས་ཁྱིམ་དག་སུན་ཕྱུང་བར་ཡང་མཐོང་ཞིང་ཐོས་ལ་རབ་ཏུ་ཤེས།

ཁྱེད་སྡིག་པ་ཀུན་དུ་སྤྱོད་པར་ཡང་མཐོང་ཞིང་ཐོས་ལ་རབ་ཏུ་ཤེས་པའི་ཕྱིར་ཏེ།

ཚེ་དང་ལྡན་པ་དག་འདུན་པས་འགྲོ་བ་ཞེས་བྱ་བའི་ཚིག་གི་ལམ་དང་།

ཞེ་སྡང་གིས་འགྲོ་བ།

གཏི་མུག་གིས་འགྲོ་བ།

འཇིགས་པས་འགྲོ་བ་ཞེས་བྱ་བའི་ཚིག་གི་ལམ་འདི་ལྟ་བུ་འདི་ཐོང་ཤིག་ཅེས་གསོལ་བ་དང་བཞིའི་ལས་ཀྱིས་བསྒོ་བ་མཛད་དོ།

འདི་ནི་གསོལ་བའོ།

ལས་ནི་འདི་ལྟར་བྱ་སྟེ།

དགེ་འདུན་བཙུན་པ་རྣམས་གསན་དུ་གསོལ།

དགེ་སློང་འགྲོ་མགྱོགས་དང་།

ནབ་སོ་འདི་གཉིས་དགེ་སློང་ཚེ་དང་ལྡན་པ་ཀུན་དགའ་བོ་དང་།

གནས་བརྟན་གནས་བརྟན་གང་དག་རེ་ལྡེ་རི་ལ་མཆིས་ནས་འདི་གཉིས་བསྐྲད་པའི་ལས་བགྱིས་པར་འཚལ་བཞིན་དུ།

དེ་དག་ལ་འདུན་པས་འགྲོ་བ་ཞེས་མཆི།

ཞེ་སྡང་གིས་འགྲོ་བ།

གཏི་མུག་གིས་འགྲོ་བ།

འཇིགས་པས་འགྲོ་བ་ཞེས་མཆི་ཞིང་།

དགེ་སློང་རྣམས་ལ་ཡང་འདི་སྐད་ཅེས་ཚེ་དང་ལྡན་པ་དག་འདི་ན་དགེ་སློང་ཁ་ཅིག་འདུན་པས་འགྲོ་བ།

ཞེ་སྡང་གིས་འགྲོ་བ།

གཏི་མུག་གིས་འགྲོ་བ།

འཇིགས་པས་འགྲོ་བ་དག་ཡིན་ཏེ།

འདི་ལྟར་ལྟུང་བ་འདྲ་བ་ཁོ་ན་ལས་དགེ་སློང་ཁ་ཅིག་ནི་སྐྲོད་པར་བྱེད།

ཁ་ཅིག་ནི་སྐྲོད་པར་མི་བྱེད་དོ་ཞེས་མཆི་ནས།

འདི་གཉིས་ལ་དགེ་སློང་མང་པོས་བཞམས་ཏེ་བསྒོ་ན་འདི་གཉིས་ལ་དགེ་སློང་མང་པོས་བཞམས་ཏེ་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་

གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བགྱིད་དེ།

དེའི་སླད་དུ་དགེ་འདུན་གྱིས་དགེ་སློང་འགྲོ་མགྱོགས་དང་།

ནབ་སོ་གཉིས་ལ་ཚེ་དང་ལྡན་པ་འགྲོ་མགྱོགས་དང་།

ནབ་སོ་གཉིས་ཁྱེད་དགེ་སློང་ཚེ་དང་ལྡན་པ་ཀུན་དགའ་བོ་དང་།

གནས་བརྟན་གནས་བརྟན་གང་དག་རེ་ལྡེ་རི་ལ་དོང་ནས་ཁྱེད་བསྐྲད་པའི་ལས་བྱས་པར་ཤེས་བཞིན་དུ་དེ་དག་ལ་འདུན་པས་འགྲོ་བ་ཞེས་མ་ཟེར་ཅིག །

ཞེ་སྡང་གིས་འགྲོ་བ།

གཏི་མུག་གིས་འགྲོ་བ།

འཇིགས་པས་འགྲོ་བ་ཞེས་མ་ཟེར་ཅིག །

དགེ་སློང་རྣམས་ལ་ཡང་འདི་སྐད་ཅེས་ཚེ་དང་ལྡན་པ་དག་འདི་ན་དགེ་སློང་ཁ་ཅིག་འདུན་པས་འགྲོ་བ།

ཞེ་སྡང་གིས་འགྲོ་བ།

གཏི་མུག་གིས་འགྲོ་བ།

འཇིགས་པས་འགྲོ་བ་དག་ཡིན་ཏེ།

འདི་ལྟར་ལྟུང་བ་འདྲ་བ་ཁོ་ན་ལས་དགེ་སློང་ཁ་ཅིག་ནི་སྐྲོད་པར་བྱེད།

ཁ་ཅིག་ནི་སྐྲོད་པར་མི་བྱེད་དོ་ཞེས་མ་ཟེར་ཅིག །

དེ་ཅིའི་ཕྱིར་ཞེ་ན།

དགེ་སློང་དེ་དག་ནི་འདུན་པས་འགྲོ་བ་མ་ཡིན།

ཞེ་སྡང་གིས་འགྲོ་བ་མ་ཡིན།

གཏི་མུག་གིས་འགྲོ་བ་མ་ཡིན།

འཇིགས་པས་འགྲོ་བ་མ་ཡིན་གྱི།

འདི་ལྟར་ཚེ་དང་ལྡན་པ་དག་ཉིད་ཁྱིམ་སུན་འབྱིན་པ།

སྡིག་པའི་ཆོས་ཀུན་དུ་སྤྱོད་པ་དག་ཡིན་ཏེ།

ཁྱེད་ཉིད་ཀྱིས་ཁྱིམ་དག་སུན་ཕྱུང་བར་ཡང་མཐོང་ཞིང་ཐོས་ལ་རབ་ཏུ་ཤེས།

ཁྱེད་སྡིག་པ་ཀུན་དུ་སྤྱོད་པར་ཡང་མཐོང་ཞིང་ཐོས་ལ་རབ་ཏུ་ཤེས་པའི་ཕྱིར་ཏེ།

ཚེ་དང་ལྡན་པ་དག་འདུན་པས་འགྲོ་བ་ཞེས་བྱ་བའི་ཚིག་གི་ལམ་དང་།

ཞེ་སྡང་གིས་འགྲོ་བ།

གཏི་མུག་གིས་འགྲོ་བ།

འཇིགས་པས་འགྲོ་བ་ཞེས་བྱ་བའི་ཚིག་གི་ལམ་འདི་ལྟ་བུ་འདི་ཐོང་ཤིག་ཅེས་གསོལ་བ་དང་བཞིའི་ལས་ཀྱིས་བསྒོ་བ་མཛད་ན།

ཚེ་དང་ལྡན་པ་གང་དག་དགེ་སློང་འགྲོ་མགྱོགས་དང་།

ནབ་སོ་གཉིས་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་པར་བཟོད་པ་དེ་དག་ནི་ཅང་མ་གསུང་ཤིག །

གང་དག་མི་བཟོད་པ་དེ་དག་ནི་གསུང་ཤིག །

འདི་ནི་ལས་བརྗོད་པ་དང་པོ་སྟེ།

དེ་བཞིན་དུ་ལན་གཉིས་ལན་གསུམ་དུ་བཟླས།

དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་དགེ་སློང་འགྲོ་

མགྱོགས་དང་།

ནབ་སོ་གཉིས་ལ་གསོལ་པ་དང་བཞིའི་ལས་ཀྱིས་བསྒོ་བ་མཛད་ལགས་ཏེ།

འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ།

དགེ་སློང་རྣམས་ཀྱིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་དགེ་སློང་འགྲོ་མགྱོགས་དང་།

ནབ་སོ་གཉིས་ལ་གསོལ་བ་དང་བཞིའི་ལས་ཀྱིས་བསྒོའོ།

གསོལ་བ་དང་བཞིའི་ལས་ཀྱིས་བསྒོ་ཡང་གཞི་དེ་ཉིད་ལ་ནན་གྱིས་མཆོག་ཏུ་བཟུང་ཞིང་མངོན་པར་ཞེན་ནས་འདི་ཉིད་བདེན་གྱི་གཞན་ནི་བརྫུན་པའོ་ཞེས་རྗེས་སུ་ཐ་སྙད་འདོགས་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ།

དེ་ནས་བཅོམ་ལྡན་འདས་ཀྱིས་བྱུང་བ་འདི་དང་གླེང་གཞི་འདི་དང་།

སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ།

སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ནོ།

ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ།

དགེ་སློང་རབ་ཏུ་མང་པོ་དག་གྲོང་ངམ།

གྲོང་རྡལ་ཞིག་ན་ཉེ་བར་རྟེན་ཅིང་གནས་པར་གྱུར་ལ་དེ་དག་ཀྱང་ཁྱིམ་སུན་འབྱིན་པ་སྡིག་པའི་ཆོས་ཀུན་དུ་སྤྱོད་པར་གྱུར་ཅིང་།

དེ་དག་གིས་ཁྱིམ་དག་སུན་ཕྱུང་བར་མཐོང་ངམ།

ཐོས་སམ།

རབ་ཏུ་ཤེས་སམ།

དེ་དག་སྡིག་པ་ཀུན་དུ་སྤྱོད་པར་མཐོང་ངམ།

ཐོས་སམ།

རབ་ཏུ་ཤེས་ན་དགེ་སློང་དེ་དག་ལ་དགེ་སློང་རྣམས་ཀྱིས་འདི་སྐད་ཅེས་ཚེ་དང་ལྡན་པ་དག་ཁྱིམ་སུན་འབྱིན་པ་སྡིག་པའི་ཆོས་ཀུན་དུ་སྤྱོད་པ་དག་ཡིན་ཏེ།

ཁྱེད་ཀྱིས་ཁྱིམ་དག་སུན་ཕྱུང་བར་ཡང་མཐོང་ཞིང་ཐོས་ལ་རབ་ཏུ་ཤེས།

ཁྱེད་སྡིག་པ་ཀུན་དུ་སྤྱོད་པར་ཡང་མཐོང་ཞིང་ཐོས་ལ་རབ་ཏུ་ཤེས་ཀྱིས།

ཚེ་དང་ལྡན་པ་དག་ཁྱེད་འདི་ན་གནས་པས་ཆོག་གིས་གནས་འདི་ནས་དེངས་ཤིག་ཅེས་བསྒོ་བར་བྱའོ།

གལ་ཏེ་དེ་དག་དགེ་སློང་རྣམས་ལ་འདི་སྐད་ཅེས་ཚེ་དང་ལྡན་པ་དག་འདི་ན་དགེ་སློང་ཁ་ཅིག་འདུན་པས་འགྲོ་བ།

ཞེ་སྡང་གིས་འགྲོ་བ།

གཏི་

མུག་གིས་འགྲོ་བ།

འཇིགས་པས་འགྲོ་བ་དག་ཡིན་ཏེ།

འདི་ལྟར་ལྟུང་བ་འདྲ་བ་ཁོ་ན་ལས་དགེ་སློང་ཁ་ཅིག་ནི་སྐྲོད་པར་བྱེད།

ཁ་ཅིག་ནི་སྐྲོད་པར་མི་བྱེད་དོ་ཞེས་ཟེར་ན་དགེ་སློང་དེ་དག་ལ་དགེ་སློང་རྣམས་ཀྱིས་འདི་སྐད་ཅེས་ཚེ་དང་ལྡན་པ་དག་ཁྱེད་དེ་སྐད་ཅེས་ཚེ་དང་ལྡན་པ་དག་འདི་ན་དགེ་སློང་ཁ་ཅིག་འདུན་པས་འགྲོ་བ།

ཞེ་སྡང་གིས་འགྲོ་བ།

གཏི་མུག་གིས་འགྲོ་བ།

འཇིགས་པས་འགྲོ་བ་དག་ཡིན་ཏེ།

འདི་ལྟར་ལྟུང་བ་འདྲ་བ་ཁོ་ན་ལས་དགེ་སློང་ཁ་ཅིག་ནི་སྐྲོད་པར་བྱེད།

ཁ་ཅིག་ནི་སྐྲོད་པར་མི་བྱེད་དོ་ཞེས་མ་ཟེར་ཅིག །

དེ་ཅིའི་ཕྱིར་ཞེ་ན།

དགེ་སློང་དེ་དག་ནི་འདུན་པས་འགྲོ་བ་མ་ཡིན།

ཞེ་སྡང་གིས་འགྲོ་བ་མ་ཡིན།

གཏི་མུག་གིས་འགྲོ་བ་མ་ཡིན།

འཇིགས་པས་འགྲོ་བ་མ་ཡིན་གྱི།

འདི་ལྟར་ཚེ་དང་ལྡན་པ་དག་ཉིད་ཁྱིམ་སུན་འབྱིན་པ་སྡིག་པའི་ཆོས་ཀུན་དུ་སྤྱོད་པ་དག་ཡིན་ཏེ།

ཁྱེད་ཉིད་ཀྱིས་ཁྱིམ་དག་སུན་ཕྱུང་བར་ཡང་མཐོང་ཞིང་ཐོས་ལ་རབ་ཏུ་ཤེས།

ཁྱེད་སྡིག་པ་ཀུན་དུ་སྤྱོད་པར་ཡང་མཐོང་ཞིང་ཐོས་ལ་རབ་ཏུ་ཤེས་པའི་ཕྱིར་ཏེ།

ཚེ་དང་ལྡན་པ་དག་འདུན་པས་འགྲོ་བ་ཞེས་བྱ་བའི་ཚིག་གི་ལམ་དང་།

ཞེ་སྡང་གིས་འགྲོ་བ།

གཏི་མུག་གིས་འགྲོ་བ།

འཇིགས་པས་འགྲོ་བ་ཞེས་བྱ་བའི་ཚིག་གི་ལམ་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ།

དགེ་སློང་དེ་དག་ལ་དགེ་སློང་རྣམས་ཀྱིས་དེ་སྐད་བསྒོ་བ་ན།

གལ་ཏེ་གཞི་དེ་གཏོང་ན་དེ་ལྟ་ན་ལེགས།

གལ་ཏེ་མི་གཏོང་ན་གཞི་དེ་གཏང་བར་བྱ་བའི་ཕྱིར་ལན་གཉིས་ལན་གསུམ་དུ་ཡང་དག་པར་བསྒོ་བར་བྱ།

ཡང་དག་པར་བསྟན་པར་བྱའོ།

ལན་གཉིས་ལན་གསུམ་དུ་ཡང་དག་པར་བསྒོ།

ཡང་དག་པར་བསྟན་པ་ན་གཞི་དེ་གཏོང་ན་དེ་ལྟ་ན་ལེགས།

གལ་ཏེ་མི་གཏོང་ན་དགེ་འདུན་ལྷག་མའོ།

དགེ་སློང་ཞེས་བྱ་བ་ནི་འགྲོ་མགྱོགས་དང་།

ནབ་སོ་དག་གམ།

གཞན་ཡང་དེ་ལྟ་བུ་གང་ཡིན་པའོ།

རབ་ཏུ་མང་པོ་དག་ཅེས་བྱ་བ་ནི་གཉིས་ལས་ལྷག་པ་ནི་རབ་ཏུ་མང་པོ་དག་གོ།

གྲོང་ངམ།

གྲོང་རྡལ་ཞིག་ན་ཞེས་བྱ་བ་ནི་རེ་ལྡེ་རི་ལའོ།

དེ་དག་ཀྱང་ཁྱིམ་སུན་འབྱིན་པ་ཞེས་བྱ་བ་ལ།

ཁྱིམ་ཞེས་བྱ་བ་ནི་བྲམ་ཟེ་དང་།

ཁྱིམ་བདག་གི་ཁྱིམ་དག་གོ།

དེ་དག་ནི་རྒྱུ་གཉིས་ཀྱིས་སུན་འབྱིན་པར་བྱེད་དེ།

འགྲོགས་པ་དང་ལོངས་སྤྱོད་པས་སོ།

ཇི་ལྟར་འགྲོགས་པས་ཞེ་ན།

བུད་མེད་ཀྱི་ཡུལ་དང་ལྷན་ཅིག་སྟན་གཅིག་ལ་འདུག་པར་བྱེད།

སྣོད་གཅིག་ཏུ་ཟ་བར་བྱེད།

ཕོར་བུ་གཅིག་ཏུ་མྱོས་པར་འགྱུར་བའི་བཏུང་བ་སྣ་ཚོགས་དག་འཐུང་བར་བྱེད་པ་སྟེ།

དེ་ལྟར་འགྲོགས་པས་སོ།

ཇི་ལྟར་ལོངས་སྤྱོད་པས་ཞེ་ན།

ཟས་ཀྱིས་དང་།

སྐོམ་གྱིས་དང་།

གོས་ཀྱིས་དང་།

མེ་ཏོག་གིས་དང་།

འབྲས་བུས་དང་།

སོ་ཤིང་གིས་ཏེ།

དེ་ལྟར་ལོངས་སྤྱོད་པས་སོ།

སྡིག་པའི་ཆོས་ཀུན་དུ་སྤྱོད་པར་གྱུར་ཅིང་ཞེས་བྱ་བ་ནི་གནས་ངན་ལེན་ཀུན་དུ་སྤྱོད་པར་གྱུར་ཅིང་ངོ་།

དེ་དག་གིས་ཁྱིམ་དག་ཅེས་བྱ་བ་ནི་བྲམ་ཟེ་དང་།

ཁྱིམ་བདག་གི་ཁྱིམ་དག་གོ།

མཐོང་ངམ་ཞེས་བྱ་བ་ནི་མིག་གི་རྣམ་པར་ཤེས་པས་སོ།

ཐོས་སམ་ཞེས་བྱ་བ་ནི་རྣ་བའི་རྣམ་པར་ཤེས་པས་སོ།

རབ་ཏུ་ཤེས་སམ་ཞེས་བྱ་བ་ནི་དེ་ལས་གཞན་པའི་རྣམ་པར་ཤེས་པའི་ཚོགས་དག་གིས་སོ།

དེ་དག་སྡིག་པ་ཀུན་དུ་སྤྱོད་པར་ཞེས་བྱ་བ་ནི་གནས་ངན་ལེན་ཀུན་དུ་སྤྱོད་པར་རོ།

དགེ་སློང་དེ་དག་ལ་དགེ་སློང་རྣམས་ཀྱིས་ཞེས་བྱ་བ་ནི་ཆོས་འདི་པ་རྣམས་ཀྱིས་སོ།

འདི་སྐད་ཅེས་ཞེས་བྱ་བ་ནི་བཞམས་ཏེ་བསྒོ་བ་ཇི་སྐད་སྔར་བསྟན་པ་ལྟར་བསྒོ་བར་བྱའོ།

དགེ་སློང་དེ་དག་ལ་དགེ་སློང་རྣམས་ཀྱིས་དེ་སྐད་བསྒོ་བ་ན་ཞེས་བྱ་བ་ནི་བཞམས་ཏེ་བསྒོ་བ་ནའོ།

གལ་ཏེ་གཞི་དེ་གཏོང་ན་ཞེས་བྱ་བ་ནི་ལྟ་བ་དེ་ཡོངས་སུ་གཏོང་ནའོ།

དེ་ལྟ་ན་ལེགས་ཞེས་བྱ་བ་ནི་དེ་ལྟ་ན་བཟང་བའོ།

གལ་ཏེ་མི་གཏོང་ན་ཞེས་བྱ་བ་ནི་ཡོངས་སུ་མི་གཏོང་ནའོ།

ལན་གཉིས་ལན་གསུམ་དུ་ཡང་དག་པར་བསྒོ་བར་བྱ།

ཡང་དག་པར་བསྟན་པར་བྱའོ་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་བསྒོ་བ་ཇི་སྐད་སྔར་བསྟན་པ་ལྟར་བསྒོ་བར་བྱ་བ་སྟེ།

ཡང་དག་པར་བསྒོ་བ་དེ་ནི་དེ་

ཡིན།

ཡང་དག་པར་བསྟན་པ་དེ་ནི་དེ་ཡིན་ནོ།

དགེ་འདུན་ལྷག་མའོ་ཞེས་བྱ་བ་ནི་སྔ་མ་བཞིན་དུ་ལྟུང་བ་དེ་དགེ་འདུན་ལ་རག་ལས་པ་ཡིན་ཏེ།

དེས་ན་དགེ་འདུན་ལྷག་མའོ་ཞེས་གསུངས་སོ།

དེ་ལ་ལྟུང་བར་ཇི་ལྟར་འགྱུར་ཞེ་ན།

དགེ་སློང་གིས་ཅུང་ཟད་ཇི་ཙམ་དུ་དགེ་སློང་གང་དག་གིས་བདག་ཉིད་བསྐྲད་པའི་ལས་བྱས་པར་ཤེས་བཞིན་དུ་དེ་དག་ལ་འདུན་པས་འགྲོ་བ།

ཞེ་སྡང་གིས་འགྲོ་བ།

གཏི་མུག་གིས་འགྲོ་བ།

འཇིགས་པས་འགྲོ་བ་ཞེས་ཟེར་ན་ཐམས་ཅད་དུ་ཉེས་བྱས་སུ་འགྱུར་རོ།

དགེ་སློང་གིས་བཞམས་ཏེ་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས།

གལ་ཏེ་མི་གཏོང་ན་ཉེས་པ་སྦོམ་པོར་འགྱུར་རོ།

གསོལ་བ་དང་བཞིའི་ལས་ཀྱིས་བསྒོ་བ་ན་གཞི་དེ་གཏོང་ན་དེ་ལྟ་ན་ལེགས།

གལ་ཏེ་མི་གཏོང་ན་གསོལ་བ་བྱས་པ་ན་ཉེས་པ་སྦོམ་པོར་འགྱུར་རོ།

ལས་བརྗོད་པ་དང་པོ་བརྗོད་པ་ན་མ་རྫོགས་པར་གཞི་དེ་གཏོང་ན་དེ་ལྟ་ན་ལེགས།

གལ་ཏེ་མི་གཏོང་ན་རྫོགས་པར་བརྗོད་པ་ན་ཉེས་པ་སྦོམ་པོར་འགྱུར་རོ།

ལས་བརྗོད་པ་གཉིས་པ་བརྗོད་པ་ན་མ་རྫོགས་པར་གཞི་དེ་གཏོང་ན་དེ་ལྟ་ན་ལེགས།

གལ་ཏེ་མི་གཏོང་ན་རྫོགས་པར་བརྗོད་པ་ན་ཉེས་པ་སྦོམ་པོར་འགྱུར་རོ།

ལས་བརྗོད་པ་གསུམ་པ་བརྗོད་པ་ན་མ་རྫོགས་པར་གཞི་དེ་གཏོང་ན་དེ་ལྟ་ན་ལེགས།

གལ་ཏེ་མི་གཏོང་ན་ཉེས་པ་སྦོམ་པོར་འགྱུར་རོ།

རྫོགས་པར་བརྗོད་པ་ན་གལ་ཏེ་མཐུན་པ་དང་ཆོས་མ་ཡིན་པས་བསྒོ་བར་བྱེད་ན་ལྟུང་བ་མེད་དོ།

མི་མཐུན་པ་དང་ཆོས་ཀྱིས་བསྒོ་བར་བྱེད་ན་ལྟུང་བ་མེད་དོ།

མཐུན་པ་དང་ཆོས་ལྟར་བཅོས་པས་བསྒོ་བར་བྱེད་ན་ལྟུང་བ་མེད་དོ།

མི་མཐུན་པ་དང་ཆོས་མ་ཡིན་པ་ལྟར་བཅོས་པས་བསྒོ་བར་བྱེད་ན་ལྟུང་བ་མེད་དོ།

ཆོས་ཇི་ལྟ་བ་དང་།

འདུལ་བ་ཇི་ལྟ་བ་དང་།

སྟོན་པའི་བསྟན་པ་ཇི་ལྟ་བ་དེ་ལྟར་བསྒོ་བར་མི་བྱེད་ན་ལྟུང་བ་མེད་དོ།

ཆོས་ཇི་ལྟ་བ་དང་།

འདུལ་བ་ཇི་ལྟ་བ་དང་།

སྟོན་པའི་བསྟན་པ་ཇི་ལྟ་བ་དེ་ལྟར་མཐུན་པས་བསྒོ་བར་བྱེད་ན་རྫོགས་པར་བརྗོད་ན་དགེ་འདུན་ལྷག་མར་འགྱུར་རོ།

དགེ་སློང་དེས་སྟན་དེ་ལ་འདུག་བཞིན་དུ་འདི་སྐད་ཅེས་ཚེ་དང་ལྡན་པ་བདག་ལ་དགེ་འདུན་ལྷག་མའི་ལྟུང་བ་བྱུང་ངོ་ཞེས་བརྗོད་པར་བྱ་སྟེ།

གལ་ཏེ་དེ་སྐད་བརྗོད་ན་དེ་ལྟ་ན་ལེགས།

གལ་ཏེ་མི་རྗོད་ན་དེ་ཕྱིན་ཅད་ནས་དེ་ལ་འཆབ་པའི་ཉེས་པ་འབྱུང་བར་འགྱུར་རོ།

དེ་བས་ན་དགེ་སློང་གིས་ཇི་ཙམ་དུ་གཞི་དེས་མ་བཤགས་ཤིང་སོ་སོར་མ་བཤགས་པར་གསོལ་བ་དང་།

གསོལ་བ་དང་གཉིས་དང་།

གསོལ་བ་དང་བཞིའི་ལས་ཉམས་སུ་མྱོང་བར་བྱེད་ན་ཐམས་ཅད་དུ་ཉེས་བྱས་སུ་འགྱུར་རོ།

ལས་དང་པོ་པ་དང་།

སྨྱོས་པ་དང་།

སེམས་འཁྲུགས་པ་དང་།

ཚོར་བ་དག་གིས་ཉེན་པ་ལ་ལྟུང་བ་མེད་དོ།

ཁྱིམ་སུན་འབྱིན་པའི་དགེ་འདུན་ལྷག་མ་སྟེ་བཅུ་གཉིས་པ་རྫོགས་སོ།།

སངས་རྒྱས་བཅོམ་ལྡན་འདས་ཀཽ་ཤཱམྦཱི་ན་གདངས་ཅན་གྱི་ཀུན་དགའ་ར་བ་ན་བཞུགས་སོ།

དེའི་ཚེ་ན་ཚེ་དང་ལྡན་པ་འདུན་པ་ལྟུང་བ་བྱུང་བ་ཆོས་བཞིན་དུ་ཕྱིར་མི་བྱེད་ནས་དེ་ལ་དགེ་སློང་དོན་འདོད་པ།

ཕན་པ་འདོད་པ།

བདེ་བ་འདོད་པ།

བདེ་བ་ལ་རེག་པར་འདོད་པ།

གྲུབ་པ་དང་བདེ་བ་འདོད་པ་རྣམས་ཀྱིས་ཚེ་དང་ལྡན་པ་འདུན་པ་ཁྱོད་ལྟུང་བ་བྱུང་བ་དེ་དག་ཆོས་བཞིན་དུ་ཕྱིར་གྱིས་ཤིག་ཅེས་གླེང་བར་བྱེད།

དྲན་པར་བྱེད་པ་ན་དེས་སྨྲས་པ།

སུ་ལ་ལྟུང་བ་དེ་ཕྱིར་བྱེད་པར་འགྱུར་རོ།

ཁྱོད་ལ་ལྟུང་བ་བྱུང་ན་སུ་ཞིག་ཕྱིར་བྱེད་པར་འགྱུར་སུ་འགྱོད་པར་འགྱུར་བའོ།

ཁྱོད་ལ་ལྟུང་བ་བྱུང་བ་ལ་སུ་འགྱོད་པར་འགྱུར།

དེ་ལ་དགེ་སློང་རྣམས་ཀྱིས་ཕྱིར་ཞིང་ཕྱིར་ཞིང་སྨྲས་པ་ན་དེར་མཐུན་ཞིང་སྨྲས་པ།

ཚེ་དང་ལྡན་པ་དག་ཁྱེད་ཅག་དགེ་ཡང་རུང་སྡིག་ཀྱང་རུང་བདག་ལ་ཅི་ཡང་མ་སྨྲ་ཤིག །

བདག་ཀྱང་དགེ་ཡང་རུང་སྡིག་ཀྱང་རུང་ཚེ་དང་ལྡན་པ་དག་ལ་ཅི་ཡང་མི་སྨྲའོ།

ཚེ་དང་ལྡན་པ་དག་གིས་བདག་ལ་ཚིག་གི་ལམ་ཐོང་ཤིག །

ཁྱེད་ལ་ཡང་བདག་གིས་སྨྲས་པས་ཅི་ཞིག་བྱ།

འདི་ལྟར་ཁྱེད་ཅག་ནི་རིགས་སྣ་ཚོགས་དང་།

རུས་སྣ་ཚོགས་དང་།

ཁྱིམ་སྣ་ཚོགས་ནས་རབ་ཏུ་བྱུང་བ་དག་ཡིན་ཏེ།

འདི་ལྟ་སྟེ།

དཔེར་

ན་ཤིང་ལྗོན་པ་དག་གི་ལོ་མ་སྣ་ཚོགས་རླུང་གིས་བླགས་པ་དག་གཅིག་ཏུ་ལྟུང་ཞིང་གཅིག་ཏུ་འདུག་པ་དེ་བཞིན་དུ་ཁྱེད་ཅག་ཀྱང་རིགས་སྣ་ཚོགས་དང་།

རུས་སྣ་ཚོགས་དང་།

ཁྱིམ་སྣ་ཚོགས་ནས་རབ་ཏུ་བྱུང་བ་དག་ཡིན་གྱི།

ཁོ་བོའི་འཕགས་པས་ནི་བྱང་ཆུབ་ཐུགས་སུ་ཆུད་པ་ཡིན་ནོ།

དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་རྣམས་ཀྱིས་གདོན་པར་གཏོགས་པའི་བསླབ་པའི་གཞི་རྣམས་དང་།

བདེ་བར་གཤེགས་པའི་མདོར་གཏོགས་པ་རྣམས་ཀྱིས་ཆོས་དང་མཐུན་པ་དང་།

འདུལ་བ་དང་མཐུན་པར་སྨྲས་པ་ནི་བདག་ཉིད་བརྗོད་པར་བྱ་བ་མ་ཡིན་པར་བྱེད་ཅེས་སྨོད་པར་བྱེད།

ཕྱར་ཀ་གཏོང་བར་བྱེད།

ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་།

བཅོམ་ལྡན་འདས་ཀྱིས་བཀའ་སྩལ་པ།

དགེ་སློང་དག་ཁྱེད་ཀྱིས་དགེ་སློང་འདུན་པ་དང་།

གཞན་ཡང་དེ་ལྟ་བུ་གང་ཡིན་པ་ལ་བཞམས་ཏེ་བསྒོ་བར་བྱའོ།

འདི་སྐད་ཅེས་བསྒོ་བར་བྱ་སྟེ།

ཚེ་དང་ལྡན་པ་འདུན་པ་ཁྱོད་དགེ་སློང་རྣམས་ཀྱིས་གདོན་པར་གཏོགས་པའི་བསླབ་པའི་གཞི་རྣམས་དང་།

བདེ་བར་གཤེགས་པའི་མདོར་གཏོགས་པ་རྣམས་ཀྱིས་ཆོས་དང་མཐུན་པ་དང་།

འདུལ་བ་དང་མཐུན་པར་སྨྲས་པ་ན་བདག་ཉིད་བརྗོད་པར་བྱ་བ་མ་ཡིན་པར་མ་བྱེད་པར་ཚེ་དང་ལྡན་པས་བདག་ཉིད་བརྗོད་པར་བྱ་བ་ཁོ་ནར་གྱིས་ཤིག །

དགེ་སློང་རྣམས་ཚེ་དང་ལྡན་པ་ལ་ཆོས་དང་མཐུན་པ་དང་འདུལ་བ་དང་མཐུན་པར་སྨྲ་བ་ན་ཚེ་དང་ལྡན་པ་ཡང་དགེ་སློང་རྣམས་ལ་ཆོས་དང་མཐུན་པ་དང་།

འདུལ་བ་དང་མཐུན་པར་སྨྲོས་ཤིག །

འདི་ལྟ་སྟེ།

གཅིག་ལ་གཅིག་བརྗོད་པར་བྱ་བ་ཉིད་དུ་བྱེད་པ་དང་།

གཅིག་ལ་གཅིག་འདོམས་ཤིང་རྗེས་སུ་སྟོན་པ་དང་།

གཅིག་གིས་གཅིག་ལྟུང་བ་ལས་སློང་བ་ཉིད་དེ་ལྟ་བུས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེའི་འཁོར་འདི་འཕེལ་བར་འགྱུར་གྱིས།

ཚེ་དང་ལྡན་པ་འདུན་པ་ཁྱོད་བདག་ཉིད་བརྗོད་པར་བྱ་བ་མ་ཡིན་པར་བྱེད་པའི་

ལས་ཀྱི་མཐའ་འདི་ལྟ་བུ་འདི་ཐོང་ཤིག་ཅེས་བསྒོ་བར་བྱའོ།

དགེ་སློང་རྣམས་ཀྱིས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ཚེ་དང་ལྡན་པ་འདུན་པ་ལ་ཚེ་དང་ལྡན་པ་འདུན་པ་ཁྱོད་དགེ་སློང་རྣམས་ཀྱིས་གདོན་པར་གཏོགས་པའི་བསླབ་པའི་གཞི་རྣམས་དང་།

བདེ་བར་གཤེགས་པའི་མདོར་གཏོགས་པ་རྣམས་ཀྱིས་ཆོས་དང་མཐུན་པ་དང་།

འདུལ་བ་དང་མཐུན་པར་སྨྲས་པ་ན།

བདག་ཉིད་བརྗོད་པར་བྱ་བ་མ་ཡིན་པར་མ་བྱེད་པར་ཚེ་དང་ལྡན་པས་བདག་ཉིད་བརྗོད་པར་བྱ་བ་ཁོ་ནར་གྱིས་ཤིག །