律部第8卷（འདུལ་བ་ཉ་བཞུགས་སོ། །）

འདུལ་བ་རྣམ་པར་འབྱེད་པ།

བམ་པོ་དྲུག་བཅུ་རྩ་གསུམ་པ།

སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ།

དེའི་ཚེ་ན་དྲུག་སྡེ་དག་རང་གི་ལག་གིས་ས་རྐོ་བར་བྱེད།

རྐོར་འཇུད་པར་བྱེད།

རྣང་སྒལ་སྤྱུར་བར་བྱེད།

སྤྱུར་དུ་འཇུད་པར་བྱེད།

ཡུར་བ་འདྲེན་པར་བྱེད།

འདྲེན་དུ་འཇུད་པར་བྱེད་ནས།

གཞན་མུ་སྟེགས་ཅན་དག་ཤེས་ལྡན་དག་ཤཱཀྱའི་བུའི་དགེ་སྦྱོང་འདི་དག་རང་གི་ལག་གིས་ས་རྐོ་བར་བྱེད།

རྐོར་འཇུད་པར་བྱེད།

རྣང་སྒལ་སྤྱུར་བར་བྱེད།

སྤྱུར་དུ་འཇུད་པར་བྱེད།

ཡུར་བ་འདྲེན་པར་བྱེད།

འདྲེན་དུ་འཇུད་པར་བྱེད་དེ།

བྲམ་ཟེ་དང་ཁྱིམ་བདག་དག་ཀྱང་རང་གི་ལག་གིས་ས་རྐོ་བར་བྱེད།

རྐོར་འཇུད་པར་བྱེད།

རྣང་སྒལ་སྤྱུར་བར་བྱེད།

སྤྱུར་དུ་འཇུད་པར་བྱེད།

ཡུར་བ་འདྲེན་པར་བྱེད།

འདྲེན་དུ་འཇུད་པར་བྱེད་ན།

ཤེས་ལྡན་དག་ཤཱཀྱའི་བུའི་དགེ་སྦྱོང་འདི་དག་དང་།

བྲམ་ཟེ་དང་།

ཁྱིམ་བདག་དག་ལ་

བྱེ་བྲག་ནི་ཅི་ཡོད།

བསམ་པ་ནི་ཅི་ཡོད།

ཐ་དད་དུ་བྱ་བ་ནི་ཅི་ཡོད།

སུ་ཞིག་དགེ་སྦྱོང་མགོ་རེག་འདི་དག་ལ་བསོད་སྙོམས་སྦྱིན་པ་དང་བྱ་བར་སེམས་ཞེས་སྨོད་པར་བྱེད།

ཕྱར་ཀ་གཏོང་བར་བྱེད།

ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ།

དེ་ནས་བཅོམ་ལྡན་འདས་ཀྱིས་བྱུང་བ་འདི་དང་།

གླེང་གཞི་འདི་དང་།

སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ།

སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ།

སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་རྨས་པ།

དགེ་སློང་དག་ཁྱེད་རང་གི་ལག་གིས་ས་རྐོ་བར་བྱེད།

རྐོར་འཇུད་པར་བྱེད།

རྣང་སྒལ་སྤྱུར་བར་བྱེད།

སྤྱུར་དུ་འཇུད་པར་བྱེད།

ཡུར་བ་འདྲེན་པར་བྱེད།

འདྲེན་དུ་འཇུད་པར་བྱེད་པ་བདེན་ནམ།

བཙུན་པ་མད་དོ།

སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ།

རྗེས་སུ་མཐུན་པ་མ་ཡིན་པ།

རུང་བ་མ་ཡིན་པ།

ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ།

དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ།

དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ།

ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ།

ཡང་དགེ་སློང་གང་རང་གི་ལག་གིས་ས་རྐོ་འམ།

རྐོར་འཇུད་ན་ལྟུང་བྱེད་དོ།

ཡང་དགེ་སློང་གང་

ཞེས་བྱ་བ་ནི་དྲུག་སྡེའམ།

གཞན་ཡང་དེ་ལྟ་བུ་གང་ཡིན་པའོ།

རང་གི་ལག་གིས་ཞེས་བྱ་བ་ནི་ལག་ནས་ལག་པས་སོ།

ས་ཞེས་བྱ་བ་ནི་ས་གཉིས་ཏེ།

རང་བཞིན་ཅན་དང་།

རང་བཞིན་ཅན་མ་ཡིན་པའོ།

རང་བཞིན་ཅན་ཞེས་བྱ་བ་ནི་ཆར་ཆུ་ཞོད་ན་ཟླ་བ་གསུམ་གྱིས་ས་འཐས་པར་གྱུར་པའོ།

ཆར་ཆུ་མ་ཞོད་ན་ཟླ་བ་དྲུག་གིས་ས་འཐས་པར་གྱུར་པའོ།

རང་བཞིན་ཅན་མ་ཡིན་པ་ནི་དེ་ལས་གཞན་པའོ།

རྐོའམ་ཞེས་བྱ་བ་ནི་བདག་ཉིད་ཀྱིས་སོ།

རྐོར་འཇུད་ན་ཞེས་བྱ་བ་ནི་གཞན་ནོ།

ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་།

དུད་འགྲོ་དང་།

ཡི་དགས་ངན་སོང་དང་།

ངན་འགྲོ་དང་།

ལོག་པར་ལྟུང་བ་དག་ཏུ་སྲེག་པར་བྱེད།

འཚོད་པར་བྱེད།

ལྟུང་བར་བྱེད་པའོ།

གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ།

དེས་ན་ལྟུང་བྱེད་དོ་ཞེས་གསུངས་སོ།

དེ་ལ་ལྟུང་བར་ཇི་ལྟར་འགྱུར་ཞེ་ན།

དགེ་སློང་ས་རྐོ་ན་རང་བཞིན་ཅན་རྐོ་ན་ལྟུང་བྱེད་དུ་འགྱུར་ལ།

རང་བཞིན་ཅན་མ་ཡིན་པ་རྐོ་ན་ཉེས་བྱས་སུ་འགྱུར་རོ།

དགེ་སློང་ས་ཞག་འགོགས་ན་སྲ་བ་འགོགས་པ་ན་ལྟུང་བྱེད་དུ་འགྱུར་ལ།

གྲུགས་པ་འགོགས་ན་ཉེས་བྱས་སུ་འགྱུར་རོ།

དགེ་སློང་ས་ལ་ཕུར་པ་འདེབས་ན་ལྟུང་བྱེད་དུ་འགྱུར་ལ།

ས་ལས་ཕུར་པ་འབྱིན་ན་ཉེས་བྱས་སུ་འགྱུར་རོ།

དགེ་སློང་ས་ལ་རི་མོ་འདྲེན་ན་ཉེས་བྱས་སུ་འགྱུར་རོ།

ཤོད་དགོད་པའི་བསམ་པ་ལ་ནི་ལྟུང་བ་མེད་དོ།

དགེ་སློང་ས་དང་འབྱར་བའི་ལྕི་བ་འགོགས་ན་ཉེས་བྱས་སུ་འགྱུར་ལ།

ལྕི་བ་འབའ་ཞིག་འགོགས་པ་ལ་ནི་ལྟུང་བ་མེད་དོ།

དགེ་སློང་ངོགས་རྟིབ་པར་བྱེད་ན་སྲ་བ་རྟིབ་པར་བྱེད་ན་ལྟུང་བྱེད་དུ་འགྱུར་ལ།

གྲུགས་པ་རྟིབ་པར་བྱེད་ན་ཉེས་བྱས་སུ་འགྱུར་རོ།

དགེ་སློང་འདམ་སྐྱོད་པར་བྱེད་ན་ཉེས་བྱས་སུ་འགྱུར་རོ།

དགེ་སློང་འདམ་དང་འབྲེལ་བའི་ཕྲུ་བ་དང་།

བུམ་པ་དང་།

རིལ་བ་འདེགས་པར་བྱེད་ན་ཉེས་བྱས་སུ་འགྱུར་རོ།

དགེ་སློང་རྩིག་པ་འཇིག་པར་བྱེད་ན་སྲ་བ་འཇིག་པར་བྱེད་ན་ལྟུང་བྱེད་དུ་འགྱུར་ལ།

གྲུགས་པ་འཇིག་པར་བྱེད་ན་ཉེས་བྱས་སུ་འགྱུར་རོ།

དགེ་སློང་རྩིག་པའི་སྐྱོང་ནུལ་འགོགས་པར་བྱེད་ན་སྲ་བ་

འགོགས་པར་བྱེད་ན་ལྟུང་བྱེད་དུ་འགྱུར་ལ།

གྲུགས་པ་འགོགས་པར་བྱེད་ན་ཉེས་བྱས་སུ་འགྱུར་རོ།

དགེ་སློང་རྩིག་པ་ལ་ཕུར་པ་འདེབས་ན་ལྟུང་བྱེད་དུ་འགྱུར་ལ།

རྩིག་པ་ལས་ཕུར་པ་འབྱིན་ན་ཉེས་བྱས་སུ་འགྱུར་རོ།

དགེ་སློང་རྩིག་པ་དང་འབྱར་བའི་ལྕི་བ་འགོགས་པར་བྱེད་ན་ཉེས་བྱས་སུ་འགྱུར་རོ།

དགེ་སློང་རྩིག་པ་ལ་རི་མོ་འདྲེན་པར་བྱེད་ན་ཉེས་བྱས་སུ་འགྱུར་རོ།

ཤོད་དགོད་པའི་བསམ་པ་ལ་ནི་ལྟུང་བ་མེད་དོ།

དགེ་སློང་རྩིག་པ་ལས་ཚྭ་རྒོ་འབྲུལ་བར་བྱེད་ན་ཉེས་བྱས་སུ་འགྱུར་རོ།

དགེ་སློང་རྡོ་བ་ཅན་གྱིས་རྐོ་བར་བྱེད་ན།

གལ་ཏེ་ས་ཆེས་མང་ལ་རྡོ་བ་ཆེས་ཆུང་ན་ལྟུང་བྱེད་དུ་འགྱུར་རོ།

གལ་ཏེ་རྡོ་བ་ཆེས་མང་ལ་ས་ཆེས་ཉུང་ན་ཉེས་བྱས་སུ་འགྱུར་རོ།

རྡོ་བ་འབའ་ཞིག་སྐྱོད་པར་བྱེད་པ་ལ་ནི་ལྟུང་བ་མེད་དོ།

དགེ་སློང་བྱེ་མ་ཅན་གྱི་ས་རྐོ་བར་བྱེད་ན།

གལ་ཏེ་ས་ཆེས་མང་ལ་བྱེ་མ་ཆེས་ཉུང་ན་ལྟུང་བྱེད་དུ་འགྱུར་རོ།

གལ་ཏེ་བྱེ་མ་ཆེས་མང་ལ་ས་ཆེས་ཉུང་ན་ཉེས་བྱས་སུ་འགྱུར་རོ།

བྱེ་མ་འབའ་ཞིག་རྐོ་བ་ལ་ནི་ལྟུང་བ་མེད་དོ།

དགེ་སློང་ལག་གི་བླས་རྒྱུ་སྐར་གྱི་སྦྱོར་བས་རུང་བར་བྱེད་པ་མེད་ན་ཐུར་མ་སོར་བཞི་ཙམ་ས་ལ་འཛུགས་པ་ལ་ལྟུང་བ་མེད་དོ།

ལས་དང་པོ་པ་དང་།

སྨྱོས་པ་དང་།

སེམས་འཁྲུགས་པ་དང་།

ཚོར་བ་དག་གིས་ཉེན་པ་ལ་ལྟུང་བ་མེད་དོ།

ས་རྐོ་བའི་ལྟུང་བྱེད་དེ་བདུན་བཅུ་རྩ་གསུམ་པ་རྫོགས་སོ།།

སངས་རྒྱས་བཅོམ་ལྡན་འདས་ཤཱཀྱ་རྣམས་ཀྱི་ནང་དུ་ལྗོངས་རྒྱུ་ཞིང་གཤེགས་པ་ན་སེར་སྐྱའི་གནས་སུ་བྱོན་ནས་སེར་སྐྱའི་གནས་ན་ནྱ་གྲོ་དྷའི་ཀུན་དགའ་ར་བ་ན་བཞུགས་སོ།

ཤཱཀྱ་མིང་ཆེན་གྱིས་བཅོམ་ལྡན་འདས་ཤཱཀྱ་རྣམས་ཀྱི་ནང་དུ་ལྗོངས་རྒྱུ་ཞིང་གཤེགས་པ་ན་སེར་སྐྱའི་གནས་སུ་བྱོན་ནས་སེར་སྐྱའི་གནས་ན་ནྱ་གྲོ་དྷའི་ཀུན་དགའ་ར་བ་ན་བཞུགས་ཞེས་ཐོས་སོ།

ཐོས་ནས་ཀྱང་དེ་འདི་སྙམ་དུ་སེམས་ཏེ།

བདག་གིས་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ལན་མང་དུ་གདུགས་ཚོད་ལ་ཁྱིམ་གཞན་དུ་སྤྱན་དྲངས་ཏེ་བཤོས་གསོལ་ན།

ལན་འགའ་ཡང་ཡོ་བྱད་ཐམས་ཅད་ཀྱིས་སྤྱན་མ་དྲངས་ཀྱིས་བདག་གིས་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ཟླ་བ་བཞིར་ཡོ་བྱད་ཐམས་

ཅད་ཀྱིས་སྤྱན་དྲང་ངོ་སྙམ་མོ།

དེ་ནས་ཤཱཀྱ་མིང་ཆེན་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ།

མཐའ་གཅིག་ཏུ་འདུག་ནས་བཅོམ་ལྡན་འདས་ཤཱཀྱ་མིང་ཆེན་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད།

ཡང་དག་པར་འཛིན་དུ་འཇུད་པར་མཛད།

ཡང་དག་པར་གཟེངས་སྟོད་པར་མཛད།

ཡང་དག་པར་རབ་ཏུ་དགའ་བར་མཛད་དོ།

རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན།

ཡང་དག་པར་འཛིན་དུ་བཅུག །

ཡང་དག་པར་གཟེངས་བསྟོད།

ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་།

དེ་ནས་ཤཱཀྱ་མིང་ཆེན་སྟན་ལས་ལངས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་དགེ་སློང་གི་དགེ་འདུན་དང་བཅས་པས་དགུང་ཟླ་བཞིར་བདག་གི་ན་བཟའ་དང་།

བསོད་སྙོམས་དང་།

གནས་མལ་དང་།

བསྙུང་བའི་རྐྱེན་དང་།

སྨན་གྱི་ཡོ་བྱད་དག་བཞེས་པར་ཅི་གནང་།

བཅོམ་ལྡན་འདས་ཀྱིས་ཤཱཀྱ་མིང་ཆེན་ལ་ཅང་མི་གསུང་བས་གནང་ངོ་།

དེ་ནས་ཤཱཀྱ་མིང་ཆེན་གྱིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ།

བཅོམ་ལྡན་འདས་ཀྱི་སྤྱན་སྔ་ནས་སོང་ནས་དེས་བསྙུང་བའི་རུང་བའི་ཁང་པ་རྩིག་ཏུ་བཅུག་ཅིང་།

བསྙུང་བའི་སྨན་ཡང་འཇོག་ཏུ་བཅུག །

བདེ་བའི་སྨན་དུས་སུ་རུང་བ་དང་།

ཐུན་ཚོད་དུ་རུང་བ་དང་།

ཞག་བདུན་པ་དང་།

འཚོ་བའི་བར་དུ་བཅང་བ་དང་།

རྩ་བའི་སྨན་དང་།

སྡོང་བུའི་སྨན་དང་།

ལོ་མའི་སྨན་དང་།

མེ་ཏོག་གི་སྨན་དང་།

འབྲས་བུའི་སྨན་དག་ཀྱང་འཇོག་ཏུ་བཅུག །

ཞུན་མར་བསྐོལ་བ་དང་མ་བསྐོལ་བ་དག་ཀྱང་འཇོག་ཏུ་བཅུག །

འབྲུ་མར་བསྐོལ་བ་དང་མ་བསྐོལ་བ་དག་ཀྱང་འཇོག་ཏུ་བཅུག །

བ་དག་དང་།

མ་ཧེ་མོ་དག་དང་།

ར་བཞོན་དག་ཀྱང་འཇོག་ཏུ་བཅུག །

ཡོ་བྱད་ཐམས་ཅད་ཀྱང་འཇོག་ཏུ་བཅུག །

སྨན་པ་དང་སྙུན་གཡོག་དག་ཀྱང་འཇོག་ཏུ་བཅུག་སྟེ།

དགེ་སློང་དག་ལ་ཡང་ཡོ་བྱད་

ཐམས་ཅད་ཀྱིས་བསྟབས་སོ།

དྲུག་སྡེ་དག་གིས་སྨྲས་པ།

དགའ་བོ་ཉེ་དགའ་བཅའ་བ་དང་བཟའ་བ་འདི་ལྟ་བུ་རྙེད་ཀྱིས་ཐབས་ཤིག་བྱའོ་ཞེས་དེ་དག་གིས་སྨན་པ་ལ་དྲིས་པ།

བཞིན་བཟངས་ཁོ་བོ་ཅག་ལ་ནད་ཅི་ཡོད་པ་ཇེ་ལྟོས་ཤིག །

སྨན་པས་བསམས་པ།

འདི་དག་ནི་དགེ་སྦྱོང་ཧྲལ་པོ་དག་ཡིན་པས་ཟ་འདོད་ཀྱིས་འདི་དག་དང་མཐུན་པར་སྨྲ་བར་བྱའོ་སྙམ་ནས་དེས་དེ་དག་ལ་སྨྲས་པ།

འཕགས་པ་དག་ཁྱེད་ཅག་ནི་ཤུལ་གྱིས་དུབ་པ་དག་ལགས་པས་ཇེ་སྐུར་སྣུམ་བག་གསོལ་ལ་དེའི་འོག་ཏུ་བསྐ་བ་གསོལ་ཅིག །

དེ་དག་གིས་སྨྲས་པ།

དགའ་བོ་ཉེ་དགའ་འདི་ནི་སྨན་པ་ཆེན་པོ་ནད་དང་།

ནད་ཀྱི་གཞི་དང་།

ཁམས་ལ་མཁས་པ་རྒྱལ་པོ་ལ་མཁོ་བ་ཡིན་ཏེ།

གལ་ཏེ་བདག་ཅག་ཐམས་ཅད་ཀྱིས་དུས་གཅིག་ཏུ་དེ་ལྟར་བྱ་བར་བརྩམས་ན་མྱུར་དུ་ཟིན་པར་འགྱུར་གྱིས་ཇེ་དང་པོར་གཉིས་ཀྱིས་སྣུམ་བག་བསྟེན་ཅིང་བཞིས་ནད་གཡོག་བྱའོ།

དེའི་འོག་ཏུ་ཡང་གཉིས་ཀྱིས་སྣུམ་བག་བསྟེན་ཅིང་བཞིས་ནད་གཡོག་བྱའོ།

དེའི་འོག་ཏུ་ཡང་གཉིས་ཀྱིས་སྣུམ་བག་བསྟེན་ཅིང་བཞིས་ནད་གཡོག་བྱའོ།

དེ་ལྟར་བྱའོ་ཞེས་དེ་དག་ལས་གཉིས་ཀྱིས་སྣུམ་བག་བསྟེན་པར་བརྩམས་ཤིང་བཞིས་ནད་གཡོག་བྱེད་པ་ན་ཅི་ཙམ་ན་ཟླ་བ་གཅིག་འདས་སོ།

དེའི་འོག་ཏུ་གཞན་གཉིས་ཀྱིས་སྣུམ་བག་བསྟེན་པར་བརྩམས་ཤིང་བཞིས་ནད་གཡོག་བྱེད་པ་ན་ཟླ་བ་གཉིས་པ་འདས་སོ།

དེའི་འོག་ཏུ་ཡང་གཞན་གཉིས་ཀྱིས་སྣུམ་བག་བསྟེན་པར་བརྩམས་ཤིང་བཞིས་ནད་གཡོག་བྱེད་པ་ན་ཟླ་བ་གསུམ་པ་འདས་སོ།

ཟླ་བ་བཞི་པ་ལ་ཐམས་ཅད་འདུས་ཏེ་བཟའ་བར་བརྩམས་ནས་ཟླ་བ་བཞི་འདས་པ་དང་ཤཱཀྱ་མིང་ཆེན་གྱིས་བཅོམ་ལྡན་འདས་གཤེགས་སྟོན་ལ་སྤྱན་དྲངས་པ་དང་ཉེ་དགའས་ཕྱག་ཚང་ལ་ཕྲིན་སྤྲིང་སྟེ།

བཞིན་བཟངས་དེང་ཁོ་བོ་ལ་ཁུ་ཤ་དང་།

ཁུ་བ་དང་།

ཤ་ཚོད་དག་གྱིས་ཤིག་ཅེས་སྤྲིང་ངོ་།

ཕྱག་ཚང་གིས་སྨྲས་པ།

འཕགས་པ་དགུང་ཟླ་བཞི་འདས་ཏེ་ཤཱཀྱ་མིང་ཆེན་གྱིས་བཅོམ་ལྡན་འདས་གཤེགས་སྟོན་ལ་སྤྱན་དྲངས་ན།

ཁྱེད་ཀྱི་བྱ་བ་ད་དུང་ཡང་མ་རྫོགས་སམ།

ཉེ་དགའས་སྨྲས་པ།

བཀྲེན་པ་ཤཱཀྱ་མིང་ཆེན་ཁ་ཤིན་ཏུ་ཆེན་པོས་སངས་རྒྱས་ལ་སོགས་པ་

དགེ་སློང་གི་དགེ་འདུན་ཟླ་བ་བཞིར་ཡོ་བྱད་ཐམས་ཅད་ཀྱིས་སྤྱན་འདྲེན་ན།

གལ་ཏེ་སྤྱན་དྲང་བ་འདི་ལྟ་བུས་སངས་རྒྱས་ལ་སོགས་པ་དགེ་སློང་གི་དགེ་འདུན་སྤྱན་དྲང་དུ་རུང་ན་ནི་ཉེ་དགའས་ཀྱང་སངས་རྒྱས་ལ་སོགས་པ་དགེ་སློང་གི་དགེ་འདུན་ཇི་སྲིད་འཚོའི་བར་དུ་སྤྱན་འདྲེན་པར་སྤྲོའོ།

དེས་སྨྲས་པ།

ཁྱེད་ཅག་ཟླ་བ་བཞིར་ཤ་དང་ཁུ་བ་ཤ་སྟག་ཟོས་པར་གྱུར་ཀྱང་འོན་ཀྱང་ཁྱེད་ཅག་སྨོད་པར་བྱེད་ན།

གནས་བརྟན་གནས་བརྟན་གང་དག་གིས་ཟླ་བ་བཞིར་ཨ་རུ་ར་འབྲུམ་གཅིག་ཀྱང་མ་གསོལ་བ་དེ་དག་ནི་ཤིན་ཏུ་དཀའ་བ་བྱེད་པ་ཡིན་ནོ།

དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་ཧ་ཅང་སློང་བར་བྱེད་ཅེས་སྨོད་པར་བྱེད།

ཕྱར་ཀ་གཏོང་བར་བྱེད།

ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་།

བཅོམ་ལྡན་འདས་ཀྱིས་བཀའ་སྩལ་པ།

དེ་ལྟ་བས་ན་དགེ་སློང་གིས་ཧ་ཅང་བསླང་བར་མི་བྱའོ།

དགེ་སློང་དག་སྔོན་བྱུང་བ་འདས་པའི་དུས་ན་གྲོང་མེད་པའི་དགོན་པའི་གནས་ཤིག་ན་དྲང་སྲོང་ཞིག་འདུག་སྟེ།

དེའི་བསྟི་གནས་དེ་མེ་ཏོག་ཕུན་སུམ་ཚོགས་པ།

འབྲས་བུ་ཕུན་སུམ་ཚོགས་པ།

ཉེན་ཀོར་ཕུན་སུམ་ཚོགས་པ་ཡིན་ནོ།

དེའི་བསྟི་གནས་དེ་དང་ཧ་ཅང་མི་རིང་བ་ན་རྫིང་ཆེན་པོ་ཞིག་ཡོད་པ་དེ་ན་ཀླུ་གཞོན་ནུ་ཞིག་འདུག་གོ།

གང་གི་ཚེ་དྲང་སྲོང་དེ་སྐྱིལ་མོ་ཀྲུང་གིས་འདུག་པ་དེའི་ཚེ་ན་ཀླུ་གཞོན་ནུ་དེ་རྫིང་ཆེན་པོ་དེ་ནས་བྱུང་ནས་ལུས་ཀྱིས་དྲང་སྲོང་དེའི་ལུས་ལ་ལན་བདུན་དཀྲིས་ཏེ་སྟེང་དུ་གདེངས་ཀ་ཆེན་པོ་བྱས་ཏེ་འདུག་གོ།

གང་གི་ཚེ་དྲང་སྲོང་དེ་ལངས་པར་གྱུར་པ་དེའི་ཚེ་ན་ཀླུ་གཞོན་ནུ་དེས་དྲང་སྲོང་དེའི་ལུས་ལ་ལུས་ཀྱིས་བཀྲོལ་ནས་དཔུང་རྒྱན་དང་།

རྣ་ཆ་གདུབ་འཁོར་དང་།

ཕྲེང་བ་རྒྱུ་སྣ་ཚོགས་ཀྱི་རྒྱན་དང་།

བྱུག་པས་བརྒྱན་པར་གྱུར་ཏེ་ཐལ་མོ་སྦྱར་ནས་མདུན་དུ་འདུག་སྟེ།

དྲང་སྲོང་དེ་ལ་ཡོ་བྱད་ཐམས་ཅད་ཀྱིས་སྟོབས་པར་བྱེད་དོ།

དྲང་སྲོང་དེ་ཀླུ་གཞོན་ནུ་དེའི་ལུས་ཀྱི་རེག་པས་སྐྱ་བོ་བསེང་བསེང་པོར་གྱུར་ཅིང་རིད་པ་དང་།

ཉམ་ཆུང་བ་དང་།

རྐེ་བ་དང་།

ལུས་མ་ཐོབ་པར་གྱུར་ཏོ།

དུས་གཞན་ཞིག་ན་དྲང་སྲོང་གཞན་ཞིག་ལྗོངས་རྒྱུ་ཞིང་འགྲོ་བ་ན་དྲང་སྲོང་དེའི་བསྟི་གནས་སུ་ཕྱིན་ནས་དེས་དྲང་སྲོང་དེ་ལ་སྨྲས་པ།

ཀྱེ་

དྲང་སྲོང་ཁྱོད་ཀྱི་བསྟི་གནས་འདི་མེ་ཏོག་ཕུན་སུམ་ཚོགས་པ།

འབྲས་བུ་ཕུན་སུམ་ཚོགས་པ།

ཉེན་ཀོར་ཕུན་སུམ་ཚོགས་པ་ཡིན་ན་ཁྱོད་ཅིའི་ཕྱིར་སྐྱ་བོ་བསེང་བསེང་པོར་གྱུར་ཅིང་རིད་པ་དང་།

ཉམ་ཆུང་བ་དང་།

རྐེ་བ་དང་།

ལུས་མ་ཐོབ་པར་གྱུར།

དེས་སྨྲས་པ།

དེ་དེ་བཞིན་ཏེ།

ཁོ་བོའི་བསྟི་གནས་འདི་མེ་ཏོག་ཕུན་སུམ་ཚོགས་པ།

འབྲས་བུ་ཕུན་སུམ་ཚོགས་པ།

ཉེན་ཀོར་ཕུན་སུམ་ཚོགས་པ་ཡིན་མོད་ཀྱི།

འོན་ཀྱང་འདི་ན་ཉེས་དམིགས་ཀྱང་ཡོད་དོ།

འདི་ན་ཉེས་དམིགས་ཅི་ཡོད།

དེས་སྨྲས་པ།

རྫིང་ཆེན་པོ་འདི་ན་ཀླུ་གཞོན་ནུ་ཞིག་འདུག་སྟེ།

གང་གི་ཚེ་ཁོ་བོ་སྐྱིལ་མོ་ཀྲུང་གིས་འདུག་པ་དེའི་ཚེ་ན་ཀླུ་གཞོན་ནུ་དེ་རྫིང་ཆེན་པོ་དེ་ནས་བྱུང་ནས་ལུས་ཀྱིས་ཁོ་བོའི་ལུས་ལ་ལན་བདུན་དཀྲིས་ཏེ་སྟེང་དུ་གདེངས་ཀ་ཆེན་པོ་བྱས་ཏེ་འདུག་གོ།

གང་གི་ཚེ་ཁོ་བོ་ལངས་པར་གྱུར་པ་དེའི་ཚེ་ན་དེས་ཁོ་བོའི་ལུས་ལ་ལུས་ཀྱིས་བཀྲོལ་ནས་དཔུང་རྒྱན་དང་།

རྣ་ཆ་གདུབ་འཁོར་དང་།

ཕྲེང་བ་རྒྱུ་སྣ་ཚོགས་ཀྱི་རྒྱན་དང་།

བྱུག་པས་བརྒྱན་པར་གྱུར་ཏེ།

ཐལ་མོ་སྦྱར་ནས་མདུན་དུ་འདུག་སྟེ་ཁོ་བོ་ལ་ཡོ་བྱད་ཐམས་ཅད་ཀྱིས་སྟོབས་པར་བྱེད་དེ།

དེའི་ལུས་ཀྱི་རེག་པས་ཁོ་བོ་སྐྱ་བོ་བསེང་བསེང་པོར་གྱུར་ཅིང་རིད་པ་དང་།

ཉམ་ཆུང་བ་དང་།

རྐེ་བ་དང་།

ལུས་མ་ཐོབ་པར་གྱུར་ཏོ།

དེས་སྨྲས་པ།

ཁྱོད་ཀླུ་གཞོན་ནུ་དེ་ཕྱིན་ཅད་འོང་བར་མི་འགྱུར་བར་འདོད་དམ།

དེས་སྨྲས་པ།

འདོད་དོ།

དེས་སྨྲས་པ།

གང་གི་ཚེ་ཀླུ་གཞོན་ནུ་དེ་ཁྱོད་ལ་ཡོ་བྱད་ཐམས་ཅད་ཀྱིས་སྟོབས་པར་བྱེད་པ་དེའི་ཚེ་ན་དེའི་མགོ་ལ་ནོར་བུ་འདུག་པ་དེ་སློངས་ཤིག་དང་ཀླུ་རྣམས་ནི་སེར་སྣ་ཅན་ཡིན་པས་མི་སྟེར་བས་ཕྱིན་ཅད་འོང་བར་མི་འགྱུར་རོ།

དུས་གཞན་ཞིག་ན་དྲང་སྲོང་དེ་སྐྱིལ་མོ་ཀྲུང་གིས་འདུག་པ་དེའི་ཚེ་ན་ཀླུ་གཞོན་ནུ་དེ་དེ་བཞིན་དུ་རྫིང་ཆེན་པོ་དེ་ནས་བྱུང་ནས་ལུས་ཀྱིས་དྲང་སྲོང་དེའི་ལུས་ལ་ལན་བདུན་དཀྲིས་ཏེ་སྟེང་དུ་གདེངས་ཀ་ཆེན་པོ་བྱས་ཏེ་འདུག་གོ།

གང་གི་ཚེ་དྲང་སྲོང་དེ་ལངས་པར་གྱུར་པ་དེའི་ཚེ་ན་ཀླུ་གཞོན་ནུ་དེས་དྲང་སྲོང་དེའི་ལུས་ལ་ལུས་ཀྱིས་བཀྲོལ་ནས་དཔུང་རྒྱན་དང་།

རྣ་ཆ་གདུབ་འཁོར་དང་།

ཕྲེང་བ་རྒྱུ་སྣ་ཚོགས་ཀྱི་རྒྱན་དང་བྱུག་པས་བརྒྱན་པར་གྱུར་ཏེ་ཐལ་མོ་སྦྱར་ནས་མདུན་དུ་འདུག་སྟེ་དྲང་སྲོང་དེ་

ལ་ཡོ་བྱད་ཐམས་ཅད་ཀྱིས་སྟོབས་པར་བྱེད་པ་ན་དྲང་སྲོང་དེས་དེ་ལ་སྨྲས་པ།

ཀླུ་གཞོན་ནུ་ཁྱོད་ཀྱི་མགོ་ལ་འདུག་པའི་ནོར་བུ་གང་ཡིན་པ་དེ་ཁོ་བོ་ལ་བྱིན་ཅིག །

དེས་སྨྲས་པ།

ཕ་མ་དག་ལ་དྲི་བར་བྱའོ།

དྲང་སྲོང་གིས་སྨྲས་པ།

དེ་ལྟར་གྱིས་ཤིག །

ཀླུ་གཞོན་ནུ་དེས་ཕ་མ་གཉིས་ལ་དྲིས་པ།

ཡབ་ཡུམ་གཉིས་དྲང་སྲོང་བདག་གི་ནོར་བུ་སློང་ན་དེ་ལ་སྩལ་བར་བགྱིའམ།

དེ་གཉིས་ཀྱིས་སྨྲས་པ།

ནོར་བུ་འདིའི་མཐུས་བདག་ཅག་གིས་ཟས་དང་།

སྐོམ་དང་།

སྤོས་དང་།

ཕྲེང་བ་རྒྱུ་དང་།

རྒྱན་དག་རྙེད་པ་ཡིན་གྱིས་མ་སྦྱིན་ཅིག །

དེ་ནས་ཀླུ་གཞོན་ནུ་དེ་རྫིང་དེ་ནས་བྱུང་སྟེ་དྲང་སྲོང་དེའི་མདུན་དུ་འདུག་པ་དང་དྲང་སྲོང་དེས་དེ་ལ་སྨྲས་པ།

ཀླུ་གཞོན་ནུ་ཁྱོད་ཀྱི་མགོ་ལ་འདུག་པའི་ནོར་བུ་གང་ཡིན་པ་དེ་ཁོ་བོ་ལ་བྱིན་ཅིག །

དེ་ནས་ཀླུ་གཞོན་ནུ་དེས་ཚིགས་སུ་བཅད་པ་དག་སྨྲས་པ།

བཟའ་དང་བཏུང་དང་དེ་བཞིན་བགོ་བ་དག །

ནོར་བུ་འདི་ཡི་མཐུ་ལས་འགྲུབ་འགྱུར་བས།

དེ་ཕྱིར་ཁྱོད་ལ་ནོར་བུ་འདི་མི་སྦྱིན།

ཧ་ཅང་སློང་བས་ཞེ་སྡང་གནས་སུ་གྱུར།

ཧ་ཅང་སློང་བས་བདག་ལ་སྡིགས་བྱེད་པ།

རལ་གྲི་རྣོ་དང་འབྲུ་མར་བདར་བ་བཞིན།

གལ་ཏེ་ཁྱོད་གནས་ཕྱིན་ཆད་བདག་འོང་ན།

བདག་གི་ཀླད་པར་རྡོ་བས་སྣུན་གྱིས་ཤིག །

ཅེས་སྨྲས་ཏེ་མི་སྣང་བའི་ལམ་ན་འདུག་གོ།

དགེ་སློང་དག་རེ་ཞིག་དུད་འགྲོའི་སྐྱེ་གནས་སུ་སྐྱེས་པའི་སྲོག་ཆགས་དེ་དག་ཀྱང་ཧ་ཅང་བསླངས་པ་ན་མི་སྣང་བའི་ལམ་ན་འཁོད་ན་མི་དག་ལྟ་སྨོས་ཀྱང་ཅི་དགོས།

དེ་ལྟ་བས་ན་དགེ་སློང་གིས་ཧ་ཅང་བསླང་བར་མི་བྱའོ།

དགེ་སློང་དག་གཞན་ཡང་སྔོན་བྱུང་བ་འདས་པའི་དུས་ན་གྲོང་མེད་པའི་དགོན་པའི་གནས་ཤིག་ན་དྲང་སྲོང་ཞིག་འདུག་སྟེ།

དེའི་བསྟི་གནས་དེ་མེ་ཏོག་ཕུན་སུམ་ཚོགས་པ།

འབྲས་བུ་ཕུན་སུམ་ཚོགས་པ།

ཉེན་ཀོར་ཕུན་སུམ་ཚོགས་པ་ཡིན་ནོ།

དེ་ན་བྱ་མང་པོ་དག་གནས་པ་དེ་དག་དེར་སྒྲ་འབྱིན་ཏེ།

བསམ་གཏན་དག་གི་ཚེར་མ་ནི་སྒྲ་ཡིན་པས་དྲང་སྲོང་དེས་བྱ་མང་པོ་དག་གི་སྒྲ་དེས་སེམས་རྩེ་གཅིག་པ་ཉིད་མ་ཐོབ་བོ།

དེ་ནས་དྲང་སྲོང་གཞན་ཞིག་ལྗོངས་རྒྱུ་ཞིང་འགྲོ་བ་ན་དྲང་སྲོང་དེའི་བསྟི་གནས་སུ་ཕྱིན་ནས་དེས་དྲང་སྲོང་དེ་ལ་སྨྲས་པ།

ཀྱེ་དྲང་སྲོང་ཁྱོད་

ཀྱི་བསྟི་གནས་འདི་ནི་མེ་ཏོག་ཕུན་སུམ་ཚོགས་པ།

འབྲས་བུ་ཕུན་སུམ་ཚོགས་པ།

ཉེན་ཀོར་ཕུན་སུམ་ཚོགས་པ་བཟང་བ་ཡིན་ན་ཁྱོད་ཀྱིས་འདིར་སེམས་རྩེ་གཅིག་པ་ཉིད་ཐོབ་བམ།

དེས་སྨྲས་པ།

དེ་དེ་བཞིན་ཏེ།

ཁོ་བོའི་བསྟི་གནས་འདི་མེ་ཏོག་ཕུན་སུམ་ཚོགས་པ།

འབྲས་བུ་ཕུན་སུམ་ཚོགས་པ།

ཉེན་ཀོར་ཕུན་སུམ་ཚོགས་པ་བཟང་བ་ཡིན་ན་འོན་ཀྱང་འདི་ན་ཉེས་དམིགས་ཀྱང་ཡོད་དོ།

དེས་སྨྲས་པ།

འདི་ན་ཉེས་དམིགས་ཅི་ཡོད།

དེས་སྨྲས་པ།

འདི་ན་བྱ་མང་པོ་དག་གནས་པ་དེ་དག་འདིར་སྒྲ་འབྱིན་པར་བྱེད་དེ།

བསམ་གཏན་དག་གི་ཚེར་མ་ནི་སྒྲ་ཡིན་པས་བདག་གིས་བྱ་མང་པོ་དག་གི་སྒྲ་དེས་སེམས་རྩེ་གཅིག་པ་ཉིད་མ་ཐོབ་བོ།

དེས་སྨྲས་པ།

ཁྱོད་བྱ་དེ་དག་ཕྱིན་ཅད་འདིར་མི་འོང་བར་འདོད་དམ།

དེས་སྨྲས་པ།

འདོད་དོ།

དེས་སྨྲས་པ།

ཚེས་ཉི་ཤུ་དགུའི་མཚན་མོ་རྩྭའི་མེ་སྒྲོན་སྦོར་ལ་ཤིང་ལྗོན་པ་དག་གི་དྲུང་དུ་སོང་སྟེ་འདི་སྐད་ཅེས།

སྒོ་ང་དག་བཟའོ།

ཕྲུ་གུ་དག་བཟའོ་ཞེས་སྨྲོས་ཤིག་དང་ཕྱིན་ཆད་འོང་བར་མི་འགྱུར་རོ།

དེས་དེ་ལྟར་བྱ་བར་བརྩམས་པ་དང་།

བྱ་དེ་དག་གིས་བསམས་པ།

དྲང་སྲོང་འདི་སྨྱོས་པར་གྱུར་ཏམ་ཅི་སྙམ་ནས།

བྱ་དེ་དག་གིས་ཕྲུ་གུ་དག་འདབ་མ་སྐྱེས་པར་གྱུར་པ་དང་དེ་དག་དོང་སྟེ།

ཕྱིན་ཆད་མི་འོང་ཞིང་ཇི་ཙམ་ན་མཐར་གྱིས་ཐམས་ཅད་མི་སྣང་བའི་ལམ་ན་འཁོད་དོ།

དགེ་སློང་དག་རེ་ཞིག་དུད་འགྲོའི་སྐྱེ་གནས་སུ་སྐྱེས་པའི་སྲོག་ཆགས་དེ་དག་ཀྱང་ཧ་ཅང་བསླངས་པ་ན་མི་སྣང་བའི་ལམ་ན་འཁོད་ན་མི་རྣམས་ལྟ་སྨོས་ཀྱང་ཅི་དགོས།

དེ་ལྟ་བས་ན་དགེ་སློང་གིས་ཧ་ཅང་བསླང་བར་མི་བྱའོ།

ཧ་ཅང་སློང་ན་འགལ་ཚབས་ཅན་དུ་འགྱུར་རོ།

དེ་ནས་བཅོམ་ལྡན་འདས་ཀྱིས་བྱུང་བ་འདི་དང་།

གླེང་གཞི་འདི་དང་།

སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ།

སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ།

སངས་རྒྱས་བཅོམ་ལྡན་འདས་ཀྱིས་ཉེ་དགའ་ལ་རྨས་པ།

ཉེ་དགའ་ཁྱོད་ཟླ་བ་བཞིར་མགྲོན་དུ་བོས་པ་བདག་གིར་བྱས་ནས་དེ་ལས་ལྷག་པར་བདག་གིར་བྱེད་པ་བདེན་ནམ།

བཙུན་

པ་མད་དོ།

སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ།

རྗེས་སུ་མཐུན་པ་མ་ཡིན་པ།

རུང་བ་མ་ཡིན་པ།

ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ།

དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ།

དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ།

ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ།

དགེ་སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ།

དེ་ལས་ལྷག་པར་བདག་གིར་བྱེད་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ།

དེ་ནས་བཅོམ་ལྡན་འདས་སེར་སྐྱའི་གནས་སུ་ཅི་དགྱེས་པར་བཞུགས་ནས་རྒྱལ་པོའི་ཁབ་ག་ལ་བ་དེ་ལོགས་སུ་ལྗོངས་རྒྱུ་ཞིང་གཤེགས་ཏེ།

མཐར་གྱིས་རྒྱུ་ཞིང་གཤེགས་པ་ན་རྒྱལ་པོའི་ཁབ་ཏུ་བྱོན་ནས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ།

མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་བཅོམ་ལྡན་འདས་ཤཱཀྱ་རྣམས་ཀྱི་ནང་དུ་ལྗོངས་རྒྱུ་ཞིང་གཤེགས་པ་ན་རྒྱལ་པོའི་ཁབ་ཏུ་བྱོན་ནས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་ཞེས་ཐོས་སོ།

ཐོས་ནས་ཀྱང་དེ་འདི་སྙམ་དུ་སེམས་ཏེ།

ཤཱཀྱ་མིང་ཆེན་གྱིས་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ཟླ་བ་བཞིར་ཡོ་བྱད་ཐམས་ཅད་ཀྱིས་སྤྱན་དྲངས་ཏེ།

བདག་གིས་ཀྱང་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ལན་མང་དུ་གདུགས་ཚོད་ལ་ཁྱིམ་གཞན་དུ་སྤྱན་དྲངས་ཏེ་བཤོས་གསོལ་ན།

ལན་འགའ་ཡང་ཡོ་བྱད་ཐམས་ཅད་ཀྱིས་སྤྱན་མ་དྲངས་ཀྱིས་བདག་གིས་ཀྱང་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ཟླ་བ་བཞིར་ཡོ་བྱད་ཐམས་ཅད་ཀྱིས་སྤྱན་དྲང་ངོ་སྙམ་མོ།

དེ་ནས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་

འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ།

མཐའ་གཅིག་ཏུ་འདུག་ནས་བཅོམ་ལྡན་འདས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད།

ཡང་དག་པར་འཛིན་དུ་འཇུད་པར་མཛད།

ཡང་དག་པར་གཟེངས་སྟོད་པར་མཛད།

ཡང་དག་པར་རབ་ཏུ་དགའ་བར་མཛད་དོ།

རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན།

ཡང་དག་པར་འཛིན་དུ་བཅུག །

ཡང་དག་པར་གཟེངས་བསྟོད།

ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་།

དེ་ནས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་སྟན་ལས་ལངས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་དགེ་སློང་གི་དགེ་འདུན་དང་བཅས་པས་དགུང་ཟླ་བཞིར་བདག་གི་ན་བཟའ་དང་།

བསོད་སྙོམས་དང་།

གནས་མལ་དང་།

བསྙུང་བའི་རྐྱེན་དང་།

སྨན་གྱི་ཡོ་བྱད་དག་བཞེས་པར་ཅི་གནང་།

བཅོམ་ལྡན་འདས་ཀྱིས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལ་ཅང་མི་གསུང་བས་གནང་ངོ་།

དེ་ནས་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ།

བཅོམ་ལྡན་འདས་ཀྱི་སྤྱན་སྔ་ནས་སོང་ནས་དེས་བསྙུང་བའི་རུང་བའི་ཁང་པ་རྩིག་ཏུ་བཅུག་ཅིང་བསྙུང་བའི་སྨན་ཡང་འཇོག་ཏུ་བཅུག །

བདེ་བའི་སྨན་དུས་སུ་རུང་བ་དང་།

ཐུན་ཚོད་དུ་རུང་བ་དང་།

ཞག་བདུན་པ་དང་།

འཚོའི་བར་དུ་བཅང་བ་དང་།

རྩ་བའི་སྨན་དང་།

སྡོང་བུའི་སྨན་དང་།

ལོ་མའི་སྨན་དང་།

མེ་ཏོག་གི་སྨན་དང་།

འབྲས་བུའི་སྨན་དག་ཀྱང་འཇོག་ཏུ་བཅུག །

ཞུན་མར་བསྐོལ་བ་དང་མ་བསྐོལ་བ་དག་ཀྱང་འཇོག་ཏུ་བཅུག །

འབྲུ་མར་བསྐོལ་བ་དང་མ་བསྐོལ་བ་དག་ཀྱང་འཇོག་ཏུ་བཅུག །

བ་དག་དང་།

མ་ཧེ་མོ་དག་དང་།

ར་བཞོན་དག་ཀྱང་འཇོག་ཏུ་བཅུག །

ཡོ་བྱད་ཐམས་ཅད་ཀྱང་འཇོག་ཏུ་བཅུག །

སྨན་པ་དང་།

སྙུན་གཡོག་དག་ཀྱང་འཇོག་ཏུ་བཅུག་གོ།

ཚེ་དང་ལྡན་པ་པི་ལིན་དའི་བུའི་སྲིང་མོའི་ཁྱོས་བཅོམ་ལྡན་འདས་ཤཱཀྱ་རྣམས་ཀྱི་ནང་དུ་ལྗོངས་རྒྱུ་ཞིང་གཤེགས་པ་ན་རྒྱལ་པོའི་ཁབ་ཏུ་བྱོན་ནས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་ཞེས་ཐོས་སོ།

ཐོས་ནས་ཀྱང་འདི་སྙམ་དུ་སེམས་ཏེ།

ཤཱཀྱ་མིང་ཆེན་གྱིས་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ཟླ་བ་བཞིར་ཡོ་བྱད་ཐམས་ཅད་ཀྱིས་སྤྱན་དྲངས་ཏེ།

བདག་གིས་ཀྱང་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ལན་མང་དུ་གདུགས་ཚོད་ལ་ཁྱིམ་གཞན་དུ་སྤྱན་དྲངས་ཏེ་བཤོས་གསོལ་ན།

ལན་འགའ་ཡང་ཡོ་བྱད་ཐམས་ཅད་ཀྱིས་སྤྱན་མ་དྲངས་ཀྱིས་བདག་གིས་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ཟླ་བ་བཞིར་ཡོ་བྱད་ཐམས་ཅད་ཀྱིས་སྤྱན་དྲང་ངོ་སྙམ་མོ།

དེ་ནས་བྲམ་ཟེ་དེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ།

མཐའ་གཅིག་ཏུ་འདུག་ནས་བཅོམ་ལྡན་འདས་བྲམ་ཟེ་དེ་ལ་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་སྟོན་པར་མཛད།

ཡང་དག་པར་འཛིན་དུ་འཇུད་པར་མཛད།

ཡང་དག་པར་གཟེངས་སྟོད་པར་མཛད།

ཡང་དག་པར་རབ་ཏུ་དགའ་བར་མཛད་དོ།

རྣམ་གྲངས་དུ་མར་ཆོས་དང་ལྡན་པའི་བཀའ་མཆིད་ཀྱིས་ཡང་དག་པར་བསྟན།

ཡང་དག་པར་འཛིན་དུ་བཅུག །

ཡང་དག་པར་གཟེངས་བསྟོད།

ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་།

དེ་ནས་བྲམ་ཟེ་དེ་སྟན་ལས་ལངས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཅོམ་ལྡན་འདས་དགེ་སློང་གི་དགེ་འདུན་དང་བཅས་པས་དགུང་ཟླ་བཞིར་བདག་གི་ན་བཟའ་དང་།

བསོད་སྙོམས་དང་།

གནས་མལ་དང་།

བསྙུང་བའི་རྐྱེན་དང་།

སྨན་གྱི་ཡོ་བྱད་དག་བཞེས་པར་ཅི་གནང་།

བྲམ་ཟེ་དེའི་དང་པོར་མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་སྤྱན་དྲངས་སོ།

བྲམ་ཟེ་དེས་བསམས་པ།

འཕགས་པ་པི་ལིན་དའི་བུ་བདག་གི་ཉེ་དུ་ཡིན་པས་དེ་

སྤྱན་དྲངས་ན་གནང་བར་འགྱུར་གྲང་སྙམ་ནས།

དེ་ཚེ་དང་ལྡན་པ་པི་ལིན་དའི་བུ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་པི་ལིན་དའི་བུའི་རྐང་པ་གཉིས་ལ་མགོ་བོས་ཕྱག་འཚལ་ཏེ་མཐའ་གཅིག་ཏུ་འདུག་གོ།

མཐའ་གཅིག་ཏུ་འདུག་ནས་ཚེ་དང་ལྡན་པ་པི་ལིན་དའི་བུ་བྲམ་ཟེ་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་བྱེད།

ཡང་དག་པར་འཛིན་དུ་འཇུད་པར་བྱེད།

ཡང་དག་པར་གཟེངས་སྟོད་པར་བྱེད།

ཡང་དག་པར་རབ་ཏུ་དགའ་བར་བྱེད་དོ།

རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན།

ཡང་དག་པར་འཛིན་དུ་བཅུག །

ཡང་དག་པར་གཟེངས་བསྟོད།

ཡང་དག་པར་རབ་ཏུ་དགའ་བར་བྱས་ནས་ཅང་མི་སྨྲའོ།

དེ་ནས་བྲམ་ཟེ་དེ་སྟན་ལས་ལངས་ཏེ་ཚེ་དང་ལྡན་པ་པི་ལིན་དའི་བུ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་ཚེ་དང་ལྡན་པ་པི་ལིན་དའི་བུ་ལ་འདི་སྐད་ཅེས་སྨྲས་སོ།

འཕགས་པས་དགུང་ཟླ་བཞིར་བདག་གི་ན་བཟའ་དང་།

བསོད་སྙོམས་དང་།

གནས་མལ་དང་།

བསྙུང་བའི་རྐྱེན་དང་།

སྨན་གྱི་ཡོ་བྱད་དག་བཞེས་པར་ཅི་གནང་།

ཚེ་དང་ལྡན་པ་པི་ལིན་དའི་བུས་སྨྲས་པ།

བཅོམ་ལྡན་འདས་ལ་ཞུའོ།

དེ་ནས་ཚེ་དང་ལྡན་པ་པི་ལིན་དའི་བུ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ།

བཅོམ་ལྡན་འདས་ལ་འདི་སྐད་ཅེས་གསོལ་ཏོ།

བཙུན་པ་བདག་གི་མག་པ་བདག་ག་ལ་བ་དེར་མཆིས་ནས་དེ་བདག་ལ་འཕགས་པས་དགུང་ཟླ་བཞིར་བདག་གི་ན་བཟའ་དང་།

བསོད་སྙོམས་དང་།

གནས་མལ་དང་།

བསྙུང་བའི་རྐྱེན་དང་།

སྨན་གྱི་ཡོ་བྱད་དག་བཞེས་པར་ཅི་གནང་ཞེས་མཆི་ན།

དེ་ལ་མཆིད་ཀྱིས་འཚལ་ལམ།

བཅོམ་ལྡན་འདས་ཀྱིས་བཀའ་སྩལ་པ།

དེ་ལྟ་བས་ན་སོ་སོར་མགྲོན་དུ་བོས་པ་མ་གཏོགས་ཏེ།

དགེ་སློང་གིས་སོ་སོར་མགྲོན་དུ་བོས་པ་བདག་གིར་བྱའོ།

དགེ་སློང་གཞན་དག་ཕྱིས་ལྷགས་པ་དེ་དག་གིས་བསམས་པ།

བདག་ཅག་རྒྱལ་པོས་མགྲོན་དུ་མ་བོས་ཀྱིས་བསོད་སྙོམས་ལ་འཇུག་པར་བྱའོ་སྙམ་དུ་རིག་ནས་དེ་དག་བསོད་སྙོམས་ལ་ཞུགས་པ་དང་།

མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་

པོ་སྟེང་གི་ཁང་བཟངས་ཀྱི་གཞིར་གཏོགས་པ་ན་འདུག་པས་དེ་དག་བསོད་སྙོམས་ལ་རྒྱུ་བ་མཐོང་ནས་དེས་བློན་པོ་རྣམས་ལ་སྨྲས་པ།

ཤེས་ལྡན་དག་ཅིའི་ཕྱིར་འཕགས་པ་འདི་དག་བསོད་སྙོམས་ལ་ཞུགས།

དེ་དག་གིས་སྨྲས་པ།

ལྷ་འདི་དག་སླད་ཀྱིས་མཆིས་པས་འདི་དག་གི་གློ་བ་ལ་དགེ་སློང་གང་དག་བཅོམ་ལྡན་འདས་དང་ཐབས་ཅིག་ལྷགས་པ་དེ་དག་རྒྱལ་པོས་མགྲོན་དུ་བོས་ཀྱིས།

བདག་ཅག་ཕྱིས་ལྷགས་པ་དག་རྒྱལ་པོས་མགྲོན་དུ་མ་བོས་སོ་སྙམ་དུ་རིག་ནས་བསོད་སྙོམས་ལ་ཞུགས་སོ།

རྒྱལ་པོས་སྨྲས་པ།

དེ་ལྟ་བས་ན་འཕགས་པ་དག་ཡང་དང་ཡང་མགྲོན་དུ་བོད་དོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་།

བཅོམ་ལྡན་འདས་ཀྱིས་བཀའ་སྩལ་པ།

དེ་ལྟ་བས་ན་ཡང་དང་ཡང་མགྲོན་དུ་བོས་པ་མ་གཏོགས་ཏེ།

དགེ་སློང་གིས་ཡང་དང་ཡང་མགྲོན་དུ་བོས་པ་བདག་གིར་བྱའོ།

དགེ་སློང་དག་གིས་བསམས་པ།

རྒྱལ་པོ་གཟུགས་ཅན་སྙིང་པོ་ནི་བྱ་བ་མང་བ་དང་།

བྱེད་པ་མང་བ་ཡིན་ལ།

བདག་ཅག་ནི་བྱ་བ་ཉུང་བ་དང་།

བྱེད་པ་ཉུང་བ་ཡིན་གྱིས་བདག་ཅག་བསོད་སྙོམས་ལ་འཇུག་པར་བྱའོ་སྙམ་དུ་རིག་ནས་དེ་དག་བསོད་སྙོམས་ལ་ཞུགས་པ་དང་།

མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་སྟེང་གི་ཁང་བཟངས་ཀྱི་གཞིར་གཏོགས་པ་ན་འདུག་པས།

དེ་དག་བསོད་སྙོམས་ལ་རྒྱུ་བ་མཐོང་ནས་དེས་བློན་པོ་རྣམས་ལ་སྨྲས་པ།

ཤེས་ལྡན་དག་ཅིའི་ཕྱིར་འཕགས་པ་འདི་དག་བསོད་སྙོམས་ལ་ཞུགས།

དེ་དག་གིས་སྐབས་དེ་རྒྱས་པར་བརྗོད་པ་དང་།

རྒྱལ་པོས་སྨྲས་པ།

དེ་ལྟ་བས་ན་འཕགས་པ་དག་དུས་ཀྱིས་མགྲོན་དུ་བོད་དོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་།

བཅོམ་ལྡན་འདས་ཀྱིས་བཀའ་སྩལ་པ།

དེ་ལྟ་བས་ན་དུས་ཀྱིས་མགྲོན་དུ་བོས་པ་མ་གཏོགས་ཏེ།

དགེ་སློང་གིས་དུས་ཀྱིས་མགྲོན་དུ་བོས་པ་བདག་གིར་བྱའོ།

རྒྱལ་པོ་གཟུགས་ཅན་སྙིང་པོས་བཅོམ་ལྡན་འདས་གཤེགས་སྟོན་ལ་སྤྱན་དྲངས་ནས་ཕྱི་དེ་ཉིན་པར་དགེ་སློང་རབ་ཏུ་མང་པོ་དག་བསོད་སྙོམས་ལ་ཞུགས་པ་དང་།

མ་ག་དྷཱར་བྱུང་བའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་སྟེང་

གི་ཁང་བཟངས་ཀྱི་གཞིར་གཏོགས་པ་ན་འདུག་པས་དེ་དག་བསོད་སྙོམས་ལ་རྒྱུ་བ་མཐོང་ནས།

དེས་བློན་པོ་རྣམས་ལ་སྨྲས་པ།

ཤེས་ལྡན་དག་ཅིའི་ཕྱིར་འཕགས་པ་འདི་དག་བསོད་སྙོམས་ལ་ཞུགས།

དེ་དག་གིས་སྐབས་དེ་རྒྱས་པར་བརྗོད་པ་དང་།

རྒྱལ་པོས་སྨྲས་པ།

དེ་ལྟ་བས་ན་འཕགས་པ་དག་རྟག་ཏུ་མགྲོན་དུ་བོད་དོ་ཞེས་ཟེར་བའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་།

བཅོམ་ལྡན་འདས་ཀྱིས་བཀའ་སྩལ་པ།

དེ་ལྟ་བས་ན་རྟག་ཏུ་མགྲོན་དུ་བོས་པ་མ་གཏོགས་ཏེ།

དགེ་སློང་གིས་རྟག་ཏུ་མགྲོན་དུ་བོས་པ་བདག་གིར་བྱའོ།

དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང་།

བསླབ་པ་ལ་གུས་པ་དང་།

བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་མཐུན་པ་དང་།

དེའི་ཤས་ཆེ་བ་དང་།

དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ།

དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ།

འདི་ནི་གནང་བ་ཡིན་ཏེ།

ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ།

དགེ་སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ།

དེ་ལས་ལྷག་པར་བདག་གིར་བྱེད་ན་ལྟུང་བྱེད་དོ།

སོ་སོར་མགྲོན་དུ་བོས་པ་དང་།

ཡང་དང་ཡང་མགྲོན་དུ་བོས་པ་དང་།

དུས་ཀྱིས་མགྲོན་དུ་བོས་པ་དང་།

རྟག་ཏུ་མགྲོན་དུ་བོས་པ་ནི་མ་གཏོགས་ཏེ།

དེ་ལ་དེ་ནི་དུས་ཡིན་ནོ།

དགེ་སློང་གིས་ཞེས་བྱ་བ་ནི་ཆོས་འདི་པས་སོ།

ཟླ་བ་བཞིར་ཞེས་བྱ་བ་ནི་ཟླ་བ་བཞི་ཚུན་ཆད་དུའོ།

མགྲོན་དུ་བོས་པ་ཞེས་བྱ་བ་ནི་བསྟབས་པའོ།

བདག་གིར་བྱའོ་ཞེས་བྱ་བ་ནི་ཁས་བླང་བར་བྱ་བའོ།

དེ་ལས་ལྷག་པར་བདག་གིར་བྱེད་ན་ཞེས་བྱ་བ་ནི་དེ་ལས་འདས་པར་རོ།

ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་།

དུད་འགྲོ་དང་།

ཡི་དགས་ངན་སོང་དང་།

ངན་འགྲོ་དང་།

ལོག་པར་ལྟུང་བ་དག་ཏུ་སྲེག་པར་བྱེད།

འཚོད་པར་བྱེད།

ལྟུང་བར་བྱེད་པའོ།

གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་

པར་བྱེད་པ་སྟེ།

དེས་ན་ལྟུང་བྱེད་དོ་ཞེས་གསུངས་སོ།

སོ་སོར་མགྲོན་དུ་བོས་པ་ཞེས་བྱ་བ་ནི་འདི་ལྟ་སྟེ།

དགེ་སློང་སོ་སོར་ཐ་དད་པར་མགྲོན་དུ་བོས་པའོ།

ཡང་དང་ཡང་མགྲོན་དུ་བོས་པ་ཞེས་བྱ་བ་ནི་འདི་ལྟ་སྟེ།

དགེ་སློང་ཡང་དང་ཡང་མགྲོན་དུ་བོས་པའོ།

དུས་ཀྱིས་མགྲོན་དུ་བོས་པ་ཞེས་བྱ་བ་ནི་འདི་ལྟ་སྟེ།

དགེ་སློང་ནན་གྱིས་མགྲོན་དུ་བོས་པའོ།

རྟག་ཏུ་མགྲོན་དུ་བོས་པ་ཞེས་བྱ་བ་ནི་འདི་ལྟ་སྟེ།

དགེ་སློང་གཏན་དུ་མགྲོན་དུ་བོས་པའོ།

མ་གཏོགས་ཏེ་ཞེས་བྱ་བ་ནི་བཞག་སྟེའོ།

དེ་ལ་དེ་ནི་དུས་ཡིན་ནོ་ཞེས་བྱ་བ་ནི་དེ་ལ་དེ་ནི་རྗེས་སུ་མཐུན་པའི་ཆོས་ཡིན་པའོ།

དེ་ལ་ལྟུང་བར་ཇི་ལྟར་འགྱུར་ཞེ་ན།

དགེ་སློང་གིས་ཇི་ཙམ་ཅུང་ཟད་ཟླ་བ་བཞིར་མགྲོན་དུ་བོས་པ་ལས་ལྷག་པར་བདག་གིར་བྱེད་ན།

ཐམས་ཅད་དུ་ལྟུང་བྱེད་དུ་འགྱུར་རོ།

དགེ་སློང་གིས་ངན་པ་ལ་མགྲོན་དུ་བོས་པ་ན་བསོད་པ་སློང་ན་དེ་སློང་བ་ལ་ཉེས་བྱས་སུ་འགྱུར་ལ།

ཟ་བ་ལ་ལྟུང་བྱེད་དུ་འགྱུར་རོ།

དགེ་སློང་གིས་བསོད་པ་ལ་མགྲོན་དུ་བོས་པ་ན་ངན་པ་སློང་ན་དེ་སློང་བ་ལ་ཉེས་བྱས་སུ་འགྱུར་ལ།

ཟ་བ་ལ་ཡང་ཉེས་བྱས་ཉིད་དུ་འགྱུར་རོ།

དགེ་སློང་བསོད་སྙོམས་ལ་ཞུགས་པ་ན་བུད་མེད་ཀྱི་ཡུལ་ཟས་ཁྱེར་ཏེ་འོང་ན་དགེ་སློང་གིས་སྲིང་མོ་ཆོག་གོ།

མི་འདོད་དོ་ཞེས་བརྗོད་པར་བྱ་སྟེ།

གལ་ཏེ་བུད་མེད་ཀྱི་ཡུལ་ན་རེ་འཕགས་པ་ཅི་ཞིག་བཞེད་ཅེས་ཟེར་ན་བསྟབས་པ་བརྗོད་པར་བྱ་སྟེ།

གང་འདོད་པ་དེ་བསླང་བར་བྱའོ།

ལས་དང་པོ་པ་དང་།

སྨྱོས་པ་དང་།

སེམས་འཁྲུགས་པ་དང་།

ཚོར་བ་དག་གིས་ཉེན་པ་ལ་ལྟུང་བ་མེད་དོ།

མགྲོན་དུ་གཉེར་བ་ལས་རིང་དུ་འདུག་པའི་ལྟུང་བྱེད་དེ་བདུན་བཅུ་རྩ་བཞི་པ་རྫོགས་སོ།།

སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ།

གང་གི་ཚེ་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་ཐུན་མོང་འཆའ་བར་མཛད་པ་དེའི་ཚེ་ན་གཉི་གའི་དགེ་འདུན་སྡུད་པར་མཛད་པས་འདི་ཡང་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་ཐུན་མོང་བཅའ་བ་མཛད་པ་ཡིན་ན་འདི་ལ་གཉི་གའི་དགེ་འདུན་བསྡུ་བ་མ་མཛད་པས་དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ།

ཀུན་དགའ་

བོ་སོང་ལ་དགེ་སློང་རྣམས་ལ་དགེ་སློང་ཞིག་དགེ་སློང་མ་རྣམས་ཀྱི་ནང་དུ་ཐོང་ལ་འདི་སྐད་ཅེས།

སྲིང་མོ་དག་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་ཐུན་མོང་འདི་ལྟར་བཅའ་བ་མཛད་དེ།

དགེ་སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ།

དེ་ལས་ལྷག་པར་བདག་གིར་བྱེད་ན་ལྟུང་བྱེད་དོ།

སོ་སོར་མགྲོན་དུ་བོས་པ་དང་།

ཡང་དང་ཡང་མགྲོན་དུ་བོས་པ་དང་།

དུས་ཀྱིས་མགྲོན་དུ་བོས་པ་དང་།

རྟག་ཏུ་མགྲོན་དུ་བོས་པ་ནི་མ་གཏོགས་ཏེ།

དེ་ལ་དེ་ནི་དུས་ཡིན་ནོ་ཞེས་བཅའ་བ་མཛད་ཀྱིས་ཁྱེད་ཀྱིས་བསླབ་པ་འདི་ལ་བསླབ་པར་བྱའོ་ཞེས་བསྒོ་ཤིག་ཅེས་གྱིས་ཤིག །

ཚེ་དང་ལྡན་པ་ཀུན་དགའ་བོས་བཙུན་པ་བཀའ་བཞིན་འཚལ་ཞེས་བཅོམ་ལྡན་འདས་ལས་མཉན་ནས་ཚེ་དང་ལྡན་པ་ལམ་པ་ག་ལ་བ་དེར་སོང་སྟེ་ཕྱིན་ནས་ཚེ་དང་ལྡན་པ་ལམ་པ་ལ་བསྒོ་བ།

ཚེ་དང་ལྡན་པ་ལམ་པ་ཁྱོད་བཞུད་ལ་དགེ་སློང་མ་རྣམས་ལ་སྲིང་མོ་དག་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་ཐུན་མོང་འདི་ལྟར་བཅའ་བ་མཛད་དེ།

དགེ་སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ།

དེ་ལས་ལྷག་པར་བདག་གིར་བྱེད་ན་ལྟུང་བྱེད་དོ།

སོ་སོར་མགྲོན་དུ་བོས་པ་དང་།

ཡང་དང་ཡང་མགྲོན་དུ་བོས་པ་དང་།

དུས་ཀྱིས་མགྲོན་དུ་བོས་པ་དང་།

རྟག་ཏུ་མགྲོན་དུ་བོས་པ་ནི་མ་གཏོགས་ཏེ།

དེ་ལ་དེ་ནི་དུས་ཡིན་ནོ་ཞེས་བཅའ་བ་མཛད་ཀྱིས་ཁྱེད་ཀྱིས་བསླབ་པ་འདི་ལ་བསླབ་པར་བྱའོ་ཞེས་བསྒོ་ཤིག །

ཚེ་དང་ལྡན་པ་ལམ་པས་བཙུན་པ་ཀུན་དགའ་བོ་བཀའ་བཞིན་འཚལ་ཞེས་ཚེ་དང་ལྡན་པ་ཀུན་དགའ་བོ་ལས་མཉན་ནས་དགེ་སློང་མའི་དབྱར་ཁང་ག་ལ་བ་དེར་སོང་བ་དང་།

ཇི་ཙམ་ན་དྲུག་སྡེ་དག་གིས་དེ་མཐོང་ནས་དེ་དག་གིས་དྲིས་པ།

ཚེ་དང་ལྡན་པ་ལམ་པ་ཁྱོད་གར་འགྲོ།

ཚེ་དང་ལྡན་པ་ལམ་པས་བསམས་པ།

འདི་དག་གིས་ཀྱང་མ་ཐོས་པ་འདྲས་འདི་དག་ལ་ཡང་བརྗོད་པར་བྱའོ་སྙམ་ནས་དེས་སྨྲས་པ།

ཚེ་དང་ལྡན་པ་དག་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་ཐུན་མོང་འདི་ལྟར་བཅའ་བ་མཛད་དེ།

དགེ་སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ།

དེ་ལས་ལྷག་པར་

བདག་གིར་བྱེད་ན་ལྟུང་བྱེད་དོ།

སོ་སོར་མགྲོན་དུ་བོས་པ་དང་།

ཡང་དང་ཡང་མགྲོན་དུ་བོས་པ་དང་།

དུས་ཀྱིས་མགྲོན་དུ་བོས་པ་དང་།

རྟག་ཏུ་མགྲོན་དུ་བོས་པ་ནི་མ་གཏོགས་ཏེ།

དེ་ལ་དེ་ནི་དུས་ཡིན་ནོ་ཞེས་བཅའ་བ་མཛད་ཀྱིས་ཁྱེད་ཀྱིས་ཀྱང་བསླབ་པ་འདི་ལ་བསླབ་པར་བྱའོ།

དེ་དག་གིས་སྨྲས་པ།

བདག་ཅག་དགེ་སློང་མདོ་སྡེ་འཛིན་པ་དང་།

འདུལ་བ་འཛིན་པ་དང་།

མ་མོ་འཛིན་པ་རྣམས་ལ་འདྲིའི་བར་དུ་བྱིས་པ།

རྨོངས་པ།

མི་གསལ་བ།

མི་མཁས་པ།

ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་དེ་དག་གིས་བྱིས་པ་དང་།

རྨོངས་པ་དང་།

མི་གསལ་བ་དང་།

མི་མཁས་པ་ཞེས་བྱ་བ་དག་གིས་ཁུར་བསླང་ངོ་།

ཚེ་དང་ལྡན་པ་ལམ་པ་དེ་ནས་སོང་སྟེ་འགྲོ་བ་ན་དགེ་སློང་མ་བཅུ་གཉིས་སྡེ་དག་གིས་མཐོང་ནས་དེ་དག་གིས་དེ་ལ་སྨྲས་པ།

བཙུན་པ་ལམ་པ་གར་བཞུད།

དེས་སྨྲས་པ།

སྲིང་མོ་དག་ཤེས་པར་གྱིས་ཤིག །

བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་ཐུན་མོང་འདི་ལྟར་བཅའ་བ་མཛད་དེ།

དགེ་སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ།

དེ་ལས་ལྷག་པར་བདག་གིར་བྱེད་ན་ལྟུང་བྱེད་དོ།

སོ་སོར་མགྲོན་དུ་བོས་པ་དང་།

ཡང་དང་ཡང་མགྲོན་དུ་བོས་པ་དང་།

དུས་ཀྱིས་མགྲོན་དུ་བོས་པ་དང་།

རྟག་ཏུ་མགྲོན་དུ་བོས་པ་ནི་མ་གཏོགས་ཏེ།

དེ་ལ་དེ་ནི་དུས་ཡིན་ནོ་ཞེས་བཅའ་བ་མཛད་ཀྱིས་ཁྱེད་ཀྱིས་ཀྱང་བསླབ་པ་འདི་ལ་བསླབ་པར་བྱའོ།

དེ་དག་གིས་སྨྲས་པ།

བདག་ཅག་དགེ་སློང་མ་མདོ་སྡེ་འཛིན་པ་དང་།

འདུལ་བ་འཛིན་པ་དང་།

མ་མོ་འཛིན་པ་རྣམས་ལ་འདྲིའི་བར་དུ་བྱིས་པ།

རྨོངས་པ།

མི་གསལ་བ།

མི་མཁས་པ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་བྱིས་པ་དང་།

རྨོངས་པ་དང་།

མི་གསལ་བ་དང་།

མི་མཁས་པ་ཞེས་བྱ་བ་དག་གིས་ཁུར་བསླང་སྟེ་དོང་ངོ་།

ཚེ་དང་ལྡན་པ་ལམ་པས་བསམས་པ།

བདག་ལ་གནས་ངན་ལེན་ཀུན་དུ་སྤྱོད་པ་འདི་དག་ལ་བརྗོད་པས་ཅི་བྱ།

ད་ནི་སོང་ལ་སྐྱེ་དགུའི་བདག་མོ་ཆེན་མོ་གཽ་ཏ་མཱི་མ་གཏོགས་པ་གཞན་འགའ་ལ་ཡང་བརྗོད་པར་མི་བྱའོ་སྙམ་ནས་དེ་སྐྱེ་དགུའི་བདག་མོ་ཆེན་མོ་གཽ་ཏ་མཱི་ག་ལ་བ་དེར་སོང་སྟེ་ཕྱིན་ནས་སྐྱེ་དགུའི་བདག་མོ་

ཆེན་མོ་གཽ་ཏ་མཱི་ལ་འདི་སྐད་ཅེས་སྨྲས་སོ།

གཽ་ཏ་མཱི་ཤེས་པར་གྱིས་ཤིག །

བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་ཐུན་མོང་འདི་ལྟར་བཅའ་བ་མཛད་དེ།

དགེ་སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ།

དེ་ལས་ལྷག་པར་བདག་གིར་བྱེད་ན་ལྟུང་བྱེད་དོ།

སོ་སོར་མགྲོན་དུ་བོས་པ་དང་།

ཡང་དང་ཡང་མགྲོན་དུ་བོས་པ་དང་།

དུས་ཀྱིས་མགྲོན་དུ་བོས་པ་དང་།

རྟག་ཏུ་མགྲོན་དུ་བོས་པ་ནི་མ་གཏོགས་ཏེ།

དེ་ལ་དེ་ནི་དུས་ཡིན་ནོ་ཞེས་བཅའ་བ་མཛད་ཀྱིས་ཁྱེད་ཀྱིས་བསླབ་པ་འདི་ལ་བསླབ་པར་བྱའོ།

སྐྱེ་དགུའི་བདག་མོ་ཆེན་མོས་སྨྲས་པ།

བཙུན་པ་ལམ་པ་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དེ།

དགེ་སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ།

དེ་ལས་ལྷག་པར་བདག་གིར་བྱེད་ན་ལྟུང་བྱེད་དོ།

སོ་སོར་མགྲོན་དུ་བོས་པ་དང་།

ཡང་དང་ཡང་མགྲོན་དུ་བོས་པ་དང་།

དུས་ཀྱིས་མགྲོན་དུ་བོས་པ་དང་།

རྟག་ཏུ་མགྲོན་དུ་བོས་པ་ནི་མ་གཏོགས་ཏེ།

དེ་ལ་དེ་ནི་དུས་ཡིན་ནོ་ཞེས་བཅའ་བ་མཛད་པ་གང་ལགས་པ་དེ་བདག་མགོ་དང་།

ངག་དང་།

ཡིད་ཀྱིས་ཀྱང་ནོད་དོ།

བཙུན་པ་ལམ་པ་འདི་ལྟ་སྟེ།

དཔེར་བགྱི་ན་རྒྱལ་རིགས་ཀྱི་ཕྱུགས་ཅུང་དག་གམ།

བྲམ་ཟེའི་ཕྱུགས་ཅུང་དག་གམ།

རྗེའུ་རིགས་ཀྱི་ཕྱུགས་ཅུང་དག་གམ།

དམངས་རིགས་ཀྱི་ཕྱུགས་ཅུང་ལེགས་པར་ཁྲུས་བགྱིས་པ།

བྱུག་པས་ལེགས་པར་བྱུགས་པ།

སྐྲ་དང་སེན་མོ་ལེགས་པར་བཅོས་པ།

རད་པ་དཀར་པོ་འཚལ་བ་དག་གིས་ཨུད་པ་ལའི་ཕྲེང་བའམ།

ཙམ་པ་ཀའི་ཕྲེང་བའམ།

བར་ཤི་ཀའི་ཕྲེང་བའམ།

ཨ་ཏི་མུག་ཏ་ཀའི་ཕྲེང་བ་འགའ་ཞིག་སྩལ་བར་གྱུར་ན་དེ་ཡིད་དགའ་བས་སུག་པ་གཉིས་ཀྱིས་བླངས་ཏེ་ཡན་ལག་གི་དམ་པ་མགོ་ལ་གདགས་པར་བགྱི་བ་དེ་བཞིན་དུ།

བཙུན་པ་ལམ་པ་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དེ།

དགེ་སློང་གིས་ཟླ་བ་བཞིར་མགྲོན་དུ་བོས་པ་བདག་གིར་བྱའོ།

དེ་ལས་ལྷག་པར་བདག་གིར་བྱེད་ན་ལྟུང་བྱེད་དོ།

སོ་སོར་མགྲོན་དུ་བོས་པ་དང་།

ཡང་དང་ཡང་མགྲོན་དུ་བོས་པ་དང་།

དུས་

ཀྱིས་མགྲོན་དུ་བོས་པ་དང་།

རྟག་ཏུ་མགྲོན་དུ་བོས་པ་ནི་མ་གཏོགས་ཏེ།

དེ་ལ་དེ་ནི་དུས་ཡིན་ནོ་ཞེས་བཅའ་བ་མཛད་པ་གང་ལགས་པ་དེ་ཡང་བདག་མགོ་དང་།

ངག་དང་།

ཡིད་ཀྱིས་ཀྱང་ནོད་དོ།

ཚེ་དང་ལྡན་པ་ལམ་པས་བསྒོ་སྟེ་ཕྱིར་འོངས་པ་དང་།

ཚེ་དང་ལྡན་པ་ཀུན་དགའ་བོས་དེ་མཐོང་ནས་དྲིས་པ།

ཚེ་དང་ལྡན་པ་ལམ་པ་ཁྱོད་ཀྱིས་དགེ་སློང་མ་རྣམས་ལ་བསྒོའམ།

དེས་སྨྲས་པ།

བསྒོ་སྟེ།

འདི་ལྟར་བྱིས་པ་དང་།

རྨོངས་པ་དང་།

མི་གསལ་བ་དང་།

མི་མཁས་པ་ཞེས་བྱ་བ་དག་གིས་ཁུར་བསླང་ངོ་།

སུས།

དྲུག་སྡེ་དག་གིས་སོ།

ཅིའི་ཕྱིར།

དེས་སྐབས་དེ་རྒྱས་པར་བརྗོད་པ་དང་།

དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་རྣམས་ཀྱིས་ཚེ་དང་ལྡན་པ་དག་ཁྱེད་ཀྱིས་བསླབ་པ་འདི་ལ་བསླབ་པར་བྱའོ་ཞེས་བསྒོ་བ་ན་དེ་དག་ལ་འདི་སྐད་ཅེས་བདག་ཅག་དགེ་སློང་མདོ་སྡེ་འཛིན་པ་དང་།

འདུལ་བ་འཛིན་པ་དང་།

མ་མོ་འཛིན་པ་རྣམས་ལ་འདྲིའི་བར་དུ་བྱིས་པ།

རྨོངས་པ།

མི་གསལ་བ།

མི་མཁས་པ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་ཞེས་སྨོད་པར་བྱེད།

ཕྱར་ཀ་གཏོང་བར་བྱེད།

ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ།

དེ་ནས་བཅོམ་ལྡན་འདས་ཀྱིས་བྱུང་བ་འདི་དང་།

གླེང་གཞི་འདི་དང་།

སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ།

སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ།

སངས་རྒྱས་བཅོམ་ལྡན་འདས་ཀྱིས་དྲུག་སྡེ་དག་ལ་རྨས་པ།

དགེ་སློང་དག་ཁྱེད་དགེ་སློང་རྣམས་ཀྱིས་ཚེ་དང་ལྡན་པ་དག་ཁྱེད་ཀྱིས་བསླབ་པ་འདི་ལ་བསླབ་པར་བྱའོ་ཞེས་བསྒོ་བ་ན་དེ་དག་ལ་འདི་སྐད་ཅེས།

བདག་ཅག་དགེ་སློང་མདོ་སྡེ་འཛིན་པ་དང་།

འདུལ་བ་འཛིན་པ་དང་།

མ་མོ་འཛིན་པ་རྣམས་ལ་འདྲིའི་བར་དུ་བྱིས་པ།

རྨོངས་པ།

མི་གསལ་བ།

མི་མཁས་པ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་བ་བདེན་ནམ།

བཙུན་པ་མད་དོ།

སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ།

རྗེས་སུ་མཐུན་པ་མ་

ཡིན་པ།

རུང་བ་མ་ཡིན་པ།

ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ།

དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ།

དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ།

ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ།

ཡང་དགེ་སློང་གང་དགེ་སློང་རྣམས་ཀྱིས་ཚེ་དང་ལྡན་པ་ཁྱོད་ཀྱིས་བསླབ་པ་འདི་ལ་བསླབ་པར་བྱའོ་ཞེས་བསྒོ་བ་ན་དེ་དག་ལ་འདི་སྐད་ཅེས།

བདག་དགེ་སློང་མདོ་སྡེ་འཛིན་པ་དང་།

འདུལ་བ་འཛིན་པ་དང་།

མ་མོ་འཛིན་པ་རྣམས་ལ་འདྲིའི་བར་དུ་བྱིས་པ།

རྨོངས་པ།

མི་གསལ་བ།

མི་མཁས་པ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་ན་ལྟུང་བྱེད་དོ།

དགེ་སློང་ཀུན་ཤེས་པར་འདོད་པས་ཀྱང་བསླབ་པ་དེ་ལ་བསླབ་པར་བྱའོ།

དགེ་སློང་མདོ་སྡེ་འཛིན་པ་དང་།

འདུལ་བ་འཛིན་པ་དང་།

མ་མོ་འཛིན་པ་རྣམས་ལ་ཡང་དྲི་བར་བྱ་སྟེ།

དེ་ལ་དེ་ནི་ཆོ་ག་ཡིན་ནོ།

ཡང་དགེ་སློང་གང་ཞེས་བྱ་བ་ནི་དྲུག་སྡེའམ།

གཞན་ཡང་དེ་ལྟ་བུ་གང་ཡིན་པའོ།

དགེ་སློང་རྣམས་ཀྱིས་ཞེས་བྱ་བ་ནི་ཆོས་འདི་པ་རྣམས་ཀྱིས་སོ།

ཚེ་དང་ལྡན་པ་ཁྱོད་ཀྱིས་བསླབ་པ་འདི་ལ་བསླབ་པར་བྱའོ་ཞེས་བསྒོ་བ་ན་ཞེས་བྱ་བ་ནི་བསླབ་པ་གང་ཡིན་པ་དེ་ལའོ།

དེ་དག་ལ་ཞེས་བྱ་བ་ནི་དགེ་སློང་དེ་དག་ལའོ།

འདི་སྐད་ཅེས་ཞེས་བྱ་བ་ནི་འདི་སྐད་ཅེས་ཟེར་ནའོ།

དགེ་སློང་མདོ་སྡེ་འཛིན་པ་ཞེས་བྱ་བ་ནི་མདོ་སྡེ་མཐའ་དག་འཛིན་པ་གང་དག་ཡིན་པ་རྣམས་སོ།

འདུལ་བ་འཛིན་པ་ཞེས་བྱ་བ་ནི་འདུལ་བ་མཐའ་དག་འཛིན་པ་གང་དག་ཡིན་པ་རྣམས་སོ།

མ་མོ་འཛིན་པ་རྣམས་ལ་འདྲིའི་བར་དུ་ཞེས་བྱ་བ་ནི་མ་མོ་མཐའ་དག་འཛིན་པ་གང་དག་ཡིན་པ་རྣམས་ལའོ།

བྱིས་པ་ཞེས་བྱ་བ་ལ།

བྱིས་པ་ཞེས་བྱ་བ་ནི་ཉེས་པར་བསམ་པ་སེམས་པ་དང་།

ཉེས་པར་སྨྲ་བ་རྗོད་པ་དང་།

ཉེས་པར་བྱ་བའི་ལས་བྱེད་པའོ།

རྨོངས་པ་ཞེས་བྱ་བ་ལ།

རྨོངས་པ་ཞེས་བྱ་བ་ནི་མདོ་སྡེ་འཛིན་པ་མ་ཡིན་པ་

དང་།

འདུལ་བ་འཛིན་པ་མ་ཡིན་པ་དང་།

མ་མོ་འཛིན་པ་མ་ཡིན་པའོ།

མི་གསལ་བ་ཞེས་བྱ་བ་ལ།

མི་གསལ་བ་ཞེས་བྱ་བ་ནི་མདོ་སྡེ་ལ་མི་གསལ་བ་དང་།

འདུལ་བ་ལ་མི་གསལ་བ་དང་།

མ་མོ་ལ་མི་གསལ་བའོ།

མི་མཁས་པ་ཞེས་བྱ་བ་ལ།

མི་མཁས་པ་ཞེས་བྱ་བ་ནི་མདོ་སྡེ་ལ་མི་མཁས་པ་དང་།

འདུལ་བ་ལ་མི་མཁས་པ་དང་།

མ་མོ་ལ་མི་མཁས་པའོ།

ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་ན་ཞེས་བྱ་བ་ནི་དེ་སྐད་ཅེས་ཟེར་ནའོ།

ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་།

དུད་འགྲོ་དང་།

ཡི་དགས་ངན་སོང་དང་།

ངན་འགྲོ་དང་།

ལོག་པར་ལྟུང་བ་དག་ཏུ་སྲེག་པར་བྱེད།

འཚོད་པར་བྱེད།

ལྟུང་བར་བྱེད་པའོ།

གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ།

དེས་ན་ལྟུང་བྱེད་དོ་ཞེས་གསུངས་སོ།

དགེ་སློང་ཀུན་ཤེས་པར་འདོད་པས་ཀྱང་བསླབ་པ་དེ་ལ་བསླབ་པར་བྱའོ།

དགེ་སློང་མདོ་སྡེ་འཛིན་པ་དང་།

འདུལ་བ་འཛིན་པ་དང་།

མ་མོ་འཛིན་པ་རྣམས་ལ་ཡང་དྲི་བར་བྱ་སྟེ།

དེ་ལ་དེ་ནི་ཆོ་ག་ཡིན་ནོ་ཞེས་བྱ་བ་ནི་དེ་ལ་དེ་ནི་རྗེས་སུ་མཐུན་པའི་ཆོས་ཡིན་པའོ།

དེ་ལ་ལྟུང་བར་ཇི་ལྟར་འགྱུར་ཞེ་ན།

དགེ་སློང་གིས་ཇི་ཙམ་ཅུང་ཟད་དགེ་སློང་རྣམས་ཀྱིས་ཚེ་དང་ལྡན་པ་ཁྱོད་ཀྱིས་བསླབ་པ་འདི་ལ་བསླབ་པར་བྱའོ།

ཞེས་བསྒོ་བ་ན་དེ་དག་ལ་འདི་སྐད་ཅེས།

བདག་དགེ་སློང་མདོ་སྡེ་འཛིན་པ་དང་།

འདུལ་བ་འཛིན་པ་དང་།

མ་མོ་འཛིན་པ་རྣམས་ལ་འདྲིའི་བར་དུ་བྱིས་པ།

རྨོངས་པ།

མི་གསལ་བ།

མི་མཁས་པ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་ན་ཐམས་ཅད་ལྟུང་བྱེད་དུ་འགྱུར་རོ།

བྱིས་པ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་ན་ལྟུང་བྱེད་དུ་འགྱུར་རོ།

རྨོངས་པ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་ན་ལྟུང་བྱེད་དུ་འགྱུར་རོ།

མི་གསལ་བ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་ན་ལྟུང་བྱེད་དུ་འགྱུར་རོ།

མི་མཁས་པ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་བོ་ཞེས་ཟེར་ན་ལྟུང་བྱེད་དུ་འགྱུར་རོ།

ཡང་དག་པ་ཁོ་ནར་བྱིས་པ་དང་།

རྨོངས་པ་དང་།

མི་གསལ་བ་དང་།

མི་མཁས་པ་ཡིན་ན་ལྟུང་བ་

མེད་དོ།

ལས་དང་པོ་པ་དང་།

སྨྱོས་པ་དང་།

སེམས་འཁྲུགས་པ་དང་།

ཚོར་བ་དག་གིས་ཉེན་པ་ལ་ལྟུང་བ་མེད་དོ།

བསླབ་པ་ལ་ཉེ་བར་འཇོག་པ་སྤང་བའི་ལྟུང་བྱེད་དེ་བདུན་བཅུ་རྩ་ལྔ་པ་རྫོགས་སོ།།

སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ།

གང་གི་ཚེ་ཚེ་དང་ལྡན་པ་འཆར་ཀས་ནི་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱས།

ཚེ་དང་ལྡན་པ་འདུན་པ་ནི་ཀཽ་ཤཱམྦཱིར་སོང་སྟེ་སྙིང་ལས་ཆུང་ངུར་འདུག །

འགྲོ་མགྱོགས་དང་།

ནབ་སོ་གཉིས་ནི་དུས་ལ་བབ།

དགའ་བོ་དང་ཉེ་དགའ་གཉིས་ནི་དགེ་འདུན་གྱི་ནང་ན་འདུག་པ་དེའི་ཚེ་ན་བཅུ་བདུན་སྡེའི་ཚོགས་དག་གདུག་ཅིང་ཕ་རོལ་གནོན་པ་དང་།

མདོ་སྡེ་འཛིན་པ་དང་།

འདུལ་བ་འཛིན་པ་དང་།

མ་མོ་འཛིན་པར་གྱུར་ནས་དེ་དག་གིས་སྨྲས་པ།

ཚེ་དང་ལྡན་པ་དག་བདག་ཅག་ཡུན་རིང་པོ་ནས་དྲུག་སྡེ་དག་གིས་ཐོ་བཙམས་ཏེ།

ཇི་ལྟར་དགའ་བོ་དང་ཉེ་དགའ་གཉིས་ཀྱིས་ཐོ་བཙམས་པ་ལྟར་ཡང་གཞན་གྱིས་མ་བཙམས་ལ།

ཇི་ལྟར་ཉེ་དགའས་ཐོ་བཙམས་པ་ལྟར་ཡང་དགའ་བོས་མ་བཙམས་ཀྱིས་དེ་གནས་ནས་དབྱུང་བའི་ལས་བྱའོ།

དེ་དག་གིས་སྨྲས་པ།

འདིའི་ཕུ་བོ་རྩོད་པ་ལ་མཁས་པ་ཡིན་གྱིས་ཚུར་ཤེག །

ཇེ་གྲོས་བྱའོ་ཞེས་དེ་དག་དཔོང་སའི་ཁང་པར་ཞུགས་ཏེ་སྒོ་བཅད་ནས་གྲོས་བྱ་བར་བརྩམས་པ་དང་།

ཉེ་དགའ་སྐར་ཁུང་ན་ཉན་ཅིང་དེས་དེ་དག་བསྡིགས་ཏེ།

ཀྱེ་མ་བཅུ་བདུན་སྡེ་དག་ཅིའི་གྲོས་བྱེད།

ཁོ་བོའི་ཚངས་པ་མཚུངས་པར་སྤྱོད་པ་ཁ་ཅིག་ནི་ཡོངས་སུ་མྱ་ངན་ལས་འདས།

ཁ་ཅིག་ནི་སྙིང་ལས་ཆུང་ངུ་ཁོ་ནར་འདུག །

ཁ་ཅིག་ནི་དུས་ལ་བབ་པས་ད་འདི་གནས་ནས་དབྱུང་བའི་ལས་བྱའོ་སྙམ་དུ་སེམས་སམ་ཅི།

ཁྱེད་ཀྱིས་ད་ཁོ་བོ་ཅག་ཟིལ་གྱིས་མནན་ཏེ་འཁོད་སྙམ་མམ།

ཁོ་བོ་ཅག་གིས་ཀྱང་ཁྱེད་ལ་མཚམས་ཆེན་པོ་གཅད་པར་བྱའོ།

ཁྱེད་ཀྱིས།

གླང་པོའི་ཐག་པ་ཉི་མ་དང་།

རླུང་གིས་ཡོངས་སུ་བསྐམས་གྱུར་ཅིང་།

གླང་པོའི་གཉའ་ནས་ལྷུང་གྱུར་ཀྱང་།

ལུག་ནི་ལྔ་བརྒྱས་དྲང་བར་བྱ།

ཞེས་བྱ་བ་མ་ཐོས་སམ་ཞེས་བསྡིགས་པ་དང་།

དེ་དག་གིས་བསམས་པ།

འདིས་བདག་ཅག་གྲོས་

བྱེད་པ་འཕྲིགས་ཀྱིས་གཞན་དུ་འདོང་ངོ་ཞེས་དེ་དག་མེ་ཁང་དུ་ཞུགས་ཏེ་གྲོས་བྱ་བར་བརྩམས་པ་དང་།

ཉེ་དགའ་ཡང་དེར་འཇབ་ཅིང་འོངས་ཏེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ།

དེ་དག་སྟེང་ཁང་དུ་འཁོད་དེ་གྲོས་བྱ་བར་བརྩམས་པ་དང་།

ཉེ་དགའ་བར་ཁང་དུ་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ།

དེ་དག་བར་ཁང་དུ་འཁོད་དེ་གྲོས་བྱ་བར་བརྩམས་པ་དང་།

ཉེ་དགའ་འོག་ཁང་དུ་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ།

དེ་དག་གནས་ཁང་དུ་འཁོད་དེ་གྲོས་བྱ་བར་བརྩམས་པ་དང་།

ཉེ་དགའ་ཁྱམས་སུ་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ།

དེ་དག་ཁྱམས་སུ་འཁོད་དེ་གྲོས་བྱ་བར་བརྩམས་པ་དང་།

ཉེ་དགའ་གནས་ཁང་དུ་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ།

དེ་དག་སྒོ་ཁང་དུ་འཁོད་དེ་གྲོས་བྱ་བར་བརྩམས་པ་དང་།

ཉེ་དགའ་བང་རིམ་དུ་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ།

དེ་དག་བང་རིམ་དུ་འཁོད་དེ་གྲོས་བྱ་བར་བརྩམས་པ་དང་།

ཉེ་དགའ་སྒོ་ཁང་དུ་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ།

དེ་དག་འཆག་སར་འཁོད་དེ་གྲོས་བྱ་བར་བརྩམས་པ་དང་།

ཉེ་དགའ་སྤན་སྤུན་དག་གི་ནང་དུ་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ།

དེ་དག་སྤན་སྤུན་དག་གི་ནང་དུ་འཁོད་དེ་གྲོས་བྱ་བར་བརྩམས་པ་དང་།

ཉེ་དགའ་འཆག་སར་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ།

དེ་དག་དགོན་པར་འཁོད་དེ་གྲོས་བྱ་བར་བརྩམས་པ་དང་།

ཉེ་དགའ་ཚང་ཚིང་དག་གི་ནང་དུ་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ།

དེ་དག་ཚང་ཚིང་དག་གི་ནང་དུ་འཁོད་དེ་གྲོས་བྱ་བར་བརྩམས་པ་དང་།

ཉེ་དགའ་དགོན་པར་འདུག་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་སོ།

དེ་དག་ལམ་ནས་འདོང་ཞིང་གྲོས་བྱ་བར་བརྩམས་པ་དང་།

ཉེ་དགའ་ཕྱི་བཞིན་སོང་སྟེ་ཉན་ཅིང་དེས་དེར་ཡང་དེ་བཞིན་དུ་བསྡིགས་ནས་དེ་དག་གིས་སྨྲས་པ།

ཚེ་དང་ལྡན་པ་དག་བདག་ཅག་གིས་འདི་གནས་ནས་དབྱུང་བའི་ལས་བྱ་བར་མི་ནུས་ཀྱིས་འདི་ལ་བཟོད་པ་གསོལ་བར་བྱའོ་ཞེས་དེ་དག་གིས་དེ་ལ་སྨྲས་པ།

བཙུན་པ་ཉེ་དགའ་བདག་ཅག་ལ་བཟོད་པར་མཛོད་ཅིག །

ཉེ་

དགའས་སྨྲས་པ།

བཟོད་པར་བྱའོ།

དེ་དག་གིས་དེ་ལ་དྲིས་པ།

ཁྱོད་ཀྱིས་ཁོ་བོ་ཅག་གྲོས་བྱེད་པ་ཇི་ལྟར་ཤེས།

ཉེ་དགའས་སྨྲས་པ།

གང་གི་ཚེ་ཁྱེད་ཅག་དཔོང་སའི་ཁང་པར་ཞུགས་ཏེ་གྲོས་བྱེད་པ་དེའི་ཚེ་ན་ཁོ་བོས་སྐར་ཁུང་ནས་མཉན་ཏོ།

གང་གི་ཚེ་ཁྱེད་ཅག་མེ་ཁང་དུ་ཞུགས་ཏེ་གྲོས་བྱེད་པ་དེའི་ཚེ་ན་ཁོ་བོས་བཞབས་ཏེ་མཉན་ཏོ།

གང་གི་ཚེ་ཁྱེད་ཅག་སྟེང་ཁང་དུ་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་བར་ཁང་དུ་འདུག་སྟེ་མཉན་ཏོ།

གང་གི་ཚེ་ཁྱེད་ཅག་བར་ཁང་དུ་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་འོག་ཁང་དུ་འདུག་སྟེ་མཉན་ཏོ།

གང་གི་ཚེ་ཁྱེད་ཅག་གནས་ཁང་དུ་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་ཁྱམས་སུ་འདུག་སྟེ་མཉན་ཏོ།

གང་གི་ཚེ་ཁྱེད་ཅག་ཁྱམས་སུ་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་གནས་ཁང་དུ་འདུག་སྟེ་མཉན་ཏོ།

གང་གི་ཚེ་ཁྱེད་ཅག་སྒོ་ཁང་དུ་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་བང་རིམ་དུ་འདུག་སྟེ་མཉན་ཏོ།

གང་གི་ཚེ་ཁྱེད་ཅག་བང་རིམ་དུ་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་སྒོ་ཁང་དུ་འདུག་སྟེ་མཉན་ཏོ།

གང་གི་ཚེ་ཁྱེད་ཅག་འཆག་སར་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་སྤན་སྤུན་དག་གི་ནང་དུ་འདུག་སྟེ་མཉན་ཏོ།

གང་གི་ཚེ་ཁྱེད་ཅག་སྤན་སྤུན་དག་གི་ནང་དུ་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་འཆག་སར་འདུག་སྟེ་མཉན་ཏོ།

གང་གི་ཚེ་ཁྱེད་ཅག་དགོན་པར་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་ཚང་ཚིང་དག་གི་ནང་དུ་འདུག་སྟེ་མཉན་ཏོ།

གང་གི་ཚེ་ཁྱེད་ཅག་ཚང་ཚིང་དག་གི་ནང་དུ་འཁོད་དེ་གྲོས་བྱེད་པ་དེའི་ཚེ་ན་ཁོ་བོས་དགོན་པར་འདུག་སྟེ་མཉན་ཏོ།

གང་གི་ཚེ་ཁྱེད་ཅག་ལམ་ནས་འདོང་ཞིང་གྲོས་བྱེད་པ་དེའི་ཚེ་ན་ཁོ་བོས་ཕྱི་བཞིན་སོང་སྟེ་མཉན་ཏོ།

དེ་དག་གིས་སྨྲས་པ།

ཁྱོད་ཉན་རྣས་འདུག་ཏུ་རུང་ངམ།

ཉེ་དགའས་སྨྲས་པ།

གལ་ཏེ་ཁོ་བོ་ཁྱེད་ཅག་གྲོས་བྱེད་པའི་ཚེ་ཉན་རྣས་འདུག་པར་མ་གྱུར་དུ་ཟིན་ན་ཁྱེད་ཅག་གིས་ཁོ་བོ་གནས་ནས་དབྱུང་བའི་ལས་བྱས་པར་གྱུར་ཏོ།

དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་རྣམས་འཐབ་པར་གྱུར།

མཚང་འདྲུ་བར་གྱུར།

མི་མཐུན་པར་གྱུར།

རྩོད་པར་གྱུར་ཅིང་འཁོད་པ་ལ་དགེ་སློང་འདི་དག་ཇི་སྐད་ཟེར་བ་དེ་བདག་གིས་མཉན་ཏེ།

དེ་ལྟ་དེ་ལྟར་རྗེས་སུ་ཐ་སྙད་གདགས་པར་བྱའོ་སྙམ་པ་དེ་ཉིད་རྐྱེན་དུ་བྱས་

ཏེ་ཅང་མི་སྨྲ་བར་ཉན་རྣས་འདུག་པར་བྱེད་ཅེས་སྨོད་པར་བྱེད།

ཕྱར་ཀ་གཏོང་བར་བྱེད།

ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ།

དེ་ནས་བཅོམ་ལྡན་འདས་ཀྱིས་བྱུང་བ་འདི་དང་།

གླེང་གཞི་འདི་དང་།

སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ།

སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ།

སངས་རྒྱས་བཅོམ་ལྡན་འདས་ཀྱིས་ཤཱཀྱའི་བུ་ཉེ་དགའ་ལ་རྨས་པ།

ཉེ་དགའ་ཁྱོད་དགེ་སློང་རྣམས་འཐབ་པར་གྱུར།

མཚང་འདྲུ་བར་གྱུར།

མི་མཐུན་པར་གྱུར།

རྩོད་པར་གྱུར་ཅིང་འཁོད་པ་ལ་དགེ་སློང་འདི་དག་ཇི་སྐད་ཟེར་བ་དེ་བདག་གིས་མཉན་ཏེ་དེ་ལྟ་དེ་ལྟར་རྗེས་སུ་ཐ་སྙད་གདགས་པར་བྱའོ་སྙམ་པ་དེ་ཉིད་རྐྱེན་དུ་བྱས་ཏེ་ཅང་མི་སྨྲ་བར་ཉན་རྣས་འདུག་པ་བདེན་ནམ།

བཙུན་པ་མད་དོ།

སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ།

རྗེས་སུ་མཐུན་པ་མ་ཡིན་པ།

རུང་བ་མ་ཡིན་པ།

ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ།

དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ།

དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ།

ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ།

ཡང་དགེ་སློང་གང་དགེ་སློང་རྣམས་འཐབ་པར་གྱུར།

མཚང་འདྲུ་བར་གྱུར།

མི་མཐུན་པར་གྱུར།

རྩོད་པར་གྱུར་ཅིང་འཁོད་པ་ལ་དགེ་སློང་འདི་དག་ཇི་སྐད་ཟེར་བ་དེ་བདག་གིས་མཉན་ཏེ་དེ་ལྟ་དེ་ལྟར་རྗེས་སུ་ཐ་སྙད་གདགས་པར་བྱའོ་སྙམ་པ་དེ་ཉིད་རྐྱེན་དུ་བྱས་ཏེ་ཅང་མི་སྨྲ་བར་ཉན་རྣས་འདུག་ན་ལྟུང་བྱེད་དོ།

ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་ཉེ་དགའ་འམ།

གཞན་ཡང་དེ་ལྟ་བུ་གང་ཡིན་པའོ།

དགེ་སློང་རྣམས་ཞེས་བྱ་བ་ནི་ཆོས་འདི་པ་རྣམས་སོ།

འཐབ་པར་གྱུར།

མཚང་འདྲུ་བར་གྱུར།

མི་མཐུན་པར་གྱུར།

རྩོད་པར་གྱུར་ཅིང་འཁོད་པ་ལ་

ཞེས་བྱ་བ་ནི་ཕྱོགས་དང་གཞན་གྱི་ཕྱོགས་སུ་རྣམ་པར་གནས་པ་ལའོ།

དགེ་སློང་འདི་དག་ཇི་སྐད་ཟེར་བ་དེ་བདག་གིས་མཉན་ཏེ་དེ་ལྟ་དེ་ལྟར་རྗེས་སུ་ཐ་སྙད་གདགས་པར་བྱའོ་སྙམ་པ་ཞེས་བྱ་བ་ནི་དེ་ལྟ་བུའི་བསམ་པས་གཉེན་པོས་དེ་ལྟ་དེ་ལྟར་ཕ་རོལ་གནན་པར་བྱའོ་སྙམ་པའོ།

དེ་ཉིད་རྐྱེན་དུ་བྱས་ཏེ་ཞེས་བྱ་བ་ནི་གཞན་མ་ཡིན་པའོ།

ཅང་མི་སྨྲ་བར་ཉན་རྣས་འདུག་ན་ཞེས་བྱ་བ་ནི་ཅང་མི་སྨྲ་བར་རྣ་གཏོད་པས་འདུག་ནའོ།

ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་།

དུད་འགྲོ་དང་།

ཡི་དགས་ངན་སོང་དང་།

ངན་འགྲོ་དང་།

ལོག་པར་ལྟུང་བ་དག་ཏུ་སྲེག་པར་བྱེད།

འཚོད་པར་བྱེད།

ལྟུང་བར་བྱེད་པའོ།

གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ།

དེས་ན་ལྟུང་བྱེད་དོ་ཞེས་གསུངས་སོ།

དེ་ལ་ལྟུང་བར་ཇི་ལྟར་འགྱུར་ཞེ་ན།

དགེ་སློང་དག་སྟེང་ཁང་ན་གྲོས་བྱེད་ཅིང་དགེ་སློང་ཡང་འཛེག་ན་དགེ་སློང་དེས་རྟིང་སྒྲའམ།

སེ་གོལ་གྱི་སྒྲའམ།

མགུལ་བསལ་བའི་སྒྲ་བྱའོ།

རྟིང་སྒྲའམ།

སེ་གོལ་གྱི་སྒྲའམ།

མགུལ་བསལ་བའི་སྒྲ་མི་བྱེད་ན་ཇི་སྲིད་དུ་སྒྲ་ཐོས་ཤིང་དོན་མ་གོའི་བར་དུ་དགེ་སློང་ལ་ཉེས་བྱས་སུ་འགྱུར་ལ།

སྒྲའི་དོན་གོ་ན་ལྟུང་བྱེད་དུ་འགྱུར་རོ།

དགེ་སློང་དག་བར་ཁང་དང་།

འོག་ཁང་དང་།

གནས་ཁང་དང་།

ཁྱམས་དང་།

སྒོ་ཁང་དང་།

བང་རིམ་དང་།

འཆག་ས་དང་།

དགོན་པ་དང་།

ལམ་ནས་འགྲོ་ཞིང་གྲོས་བྱེད་ལ།

དགེ་སློང་ཡང་ཕྱི་བཞིན་འགྲོ་ན་དགེ་སློང་དེས་རྟིང་སྒྲའམ།

སེ་གོལ་གྱི་སྒྲའམ།

མགུལ་བསལ་བའི་སྒྲ་བྱའོ།

རྟིང་སྒྲའམ།

སེ་གོལ་གྱི་སྒྲའམ།

མགུལ་བསལ་བའི་སྒྲ་མི་བྱེད་ན་ཇི་སྲིད་དུ་སྒྲ་ཐོས་ལ་དོན་མ་གོའི་བར་དུ་དགེ་སློང་ལ་ཉེས་བྱས་སུ་འགྱུར་ལ།

སྒྲའི་དོན་གོ་ན་ལྟུང་བྱེད་དུ་འགྱུར་རོ།

ནང་དང་བཅས་པ་མ་ཡིན་པ་དང་།

གྱ་ཚོམ་དུ་འཇུག་པ་དང་།

མཉན་ནས་ཉེ་བར་ཞི་བར་བྱའོ་སྙམ་པ་ལ་ལྟུང་བ་མེད་དོ།

ལས་དང་པོ་པ་དང་།

སྨྱོས་པ་དང་།

སེམས་འཁྲུགས་པ་དང་།

ཚོར་བ་དག་གིས་ཉེན་པ་ལ་ལྟུང་བ་མེད་དོ།

ཉན་རྣ་ལས་གྱུར་པའི་ལྟུང་བྱེད་དེ་བདུན་བཅུ་རྩ་དྲུག་པ་རྫོགས་སོ།།

འདུལ་བ་རྣམ་པར་འབྱེད་པ།

བམ་པོ་དྲུག་བཅུ་

རྩ་བཞི་པ།

སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ།

གང་གི་ཚེ་ཚེ་དང་ལྡན་པ་འཆར་ཀས་ནི་ཉོན་མོངས་པ་ཐམས་ཅད་སྤངས་པས་དགྲ་བཅོམ་པ་ཉིད་མངོན་དུ་བྱས།

ཚེ་དང་ལྡན་པ་འདུན་པ་ནི་ཀཽ་ཤཱམྦཱིར་སོང་སྟེ་སྙིང་ལས་ཆུང་ངུར་འདུག །

འགྲོ་མགྱོགས་དང་།

ནབ་སོ་གཉིས་ནི་དུས་ལ་བབ།

དགའ་བོ་དང་ཉེ་དགའ་གཉིས་ནི་དགེ་འདུན་གྱི་ནང་ན་འདུག་པ་དེའི་ཚེ་ན་བཅུ་བདུན་སྡེའི་ཚོགས་དག་གདུག་ཅིང་ཕ་རོལ་གནོན་པ་དང་།

མདོ་སྡེ་འཛིན་པ་དང་།

འདུལ་བ་འཛིན་པ་དང་།

མ་མོ་འཛིན་པར་གྱུར་ནས་དེ་དག་གིས་སྨྲས་པ།

ཚེ་དང་ལྡན་པ་དག་བདག་ཅག་ཡུན་རིང་པོ་ནས་དྲུག་སྡེ་དག་གིས་ཐོ་བཙམས་ཏེ།

ཇི་ལྟར་དགའ་བོ་དང་ཉེ་དགའ་གཉིས་ཀྱིས་ཐོ་བཙམས་པ་ལྟར་ཡང་གཞན་གྱིས་མ་བཙམས་ལ།

ཇི་ལྟར་ཉེ་དགའས་ཐོ་བཙམས་པ་ལྟར་ཡང་དགའ་བོས་མ་བཙམས་ཀྱིས་དེ་གནས་ནས་དབྱུང་བའི་ལས་བྱའོ།

དེ་ན་ཁ་ཅིག་གིས་སྨྲས་པ།

འདིའི་ཕུ་བོ་དགའ་བོ་རྩོད་པ་ལ་མཁས་པ་ཡིན་པས་བདག་ཅག་གིས་འདི་གནས་ནས་དབྱུང་བའི་ལས་བྱ་བར་མི་ནུས་སོ།

ཁ་ཅིག་གིས་སྨྲས་པ།

གཅིག་སྨྲ་བ་ན་གཉིས་ཀྱིས་མཉན་པར་མི་བྱ་བར་ཚོགས་སྨྲ་ན་ཚོགས་ནི་རྒྱལ་པོ་དང་འདྲ་བས་གལ་ཏེ་དེ་ཅུང་ཟད་སྨྲ་བར་གྱུར་ན་དེའི་ཚེ་གནས་ནས་དབྱུང་བའི་ལས་བྱའོ་ཞེས་དེ་དག་གིས་གནས་མལ་བཤམས་ནས།

གཎྜཱི་བརྡུངས་ཏེ་དྲིས་པའི་ཚིག་གིས་དགེ་སློང་རྣམས་ལ་ཡང་དག་པར་བསྒོ་ནས་དགེ་འདུན་ཐམས་ཅད་འདུག་ཅིང་མཐུན་པར་གྱུར་པ་ན།

གླེང་བ་པོ་རྒན་པའི་མཐའ་ལོགས་སུ་འདུག་སྟེ་སྨྲས་པ།

བཙུན་པ་ཉེ་དགའ་ཁྱོད་ཀྱིས་བཅུ་བདུན་སྡེའི་ཚོགས་དག་གི་ལྟོ་དྲལ་ཏེ་རྒྱུ་མ་དག་གིས་རྒྱལ་བྱེད་ཀྱི་ཚལ་བསྐོར་བར་བྱའོ་ཞེས་བྱ་བ་དེ་ལྟ་བུའི་ཚིག་སྨྲས་པ་གང་ཡིན་པ་དེ་དྲན་ནམ།

ཉེ་དགའས་སྨྲས་པ།

ཚེ་དང་ལྡན་པ་དག་དེ་ནི་དོན་འདས་པ་ཡིན་ན་རྨ་སོས་པ་གླེངས་ཏེ་ཅི་བྱ།

དེ་དག་གིས་སྨྲས་པ།

བཅོམ་ལྡན་འདས་ནི་འདས་པའི་དོན་ཁོ་ན་ལ་བརྟེན་ཏེ་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་འཆའ་བར་མཛད་དོ།

དགའ་བོས་ཕྱིར་བཟློག་པར་བརྩམས་པ་དང་།

དེ་དག་གིས་སྨྲས་པ།

གང་གཅིག་

ཕྱིར་ཟློག་པར་བྱེད་པ་དེ་ཡང་གནས་ནས་དབྱུང་བའི་ལས་བྱའོ།

དགའ་བོས་བསམས་པ།

འདི་དག་གི་བྱེད་སྟངས་ལས་ན་བདག་ལ་ཡང་གནས་ནས་འབྱིན་པའི་ལས་བྱེད་པར་འགྱུར་ན་མ་ལེགས་པར་འགྱུར་རོ་སྙམ་ནས།

དེ་དགུན་གྱི་དུས་ལ་བབ་པས་ལ་བ་ཞིག་གྱོན་ཏེ་དེས་ལ་བ་དེ་རྩིག་དྲུང་དུ་བསླང་སྟེ་བཞག་ནས་ཅང་མི་སྨྲ་བར་སྟན་ལས་ལངས་ཏེ་སོང་ངོ་།

དེ་དག་གིས་སྨྲས་པ།

ཚེ་དང་ལྡན་པ་དག་འདོད་པ་སྨྲོས་ཤིག་ཅེས་དེ་དག་གིས་གྱ་ཚོམ་དུ་ཉེ་དགའ་གནས་ནས་དབྱུང་བའི་ལས་བྱས་སོ།

དེ་གནས་ནས་དབྱུང་བའི་ལས་བྱས་པ་ན་ངུ་ཞིང་ཕུ་བོའི་གན་དུ་སོང་བ་དང་།

དགའ་བོས་སྨྲས་པ།

ཉེ་དགའ་ཅིའི་ཕྱིར་ངུ་།

ལྷུང་བཟེད་ནག་པོ་ཅན་དག་གིས་བདག་གནས་ནས་དབྱུང་བའི་ལས་བྱས་སོ།

དགའ་བོས་སྨྲས་པ།

གང་དག་གིས་ཁོ་བོའི་ནུ་བོ་གནས་ནས་དབྱུང་བའི་ལས་བྱས་པ་དེ་དག་གྲོང་དང་།

གྲོང་ཁྱེར་དང་།

ཁམས་གསུམ་ནས་གནས་ནས་ཕྱུང་བར་གྱུར་ཅིག །

འོན་ཀྱང་གནས་ནས་དབྱུང་བའི་ལས་བྱས་པ་དག་ལ་གྲོང་དང་།

གྲོང་ཁྱེར་མེད་དམ་ཅི།

སྡོད་ལ་ཕྱིས་བཟོད་པ་གསོལ་ཅིག །

འདི་ལྟར་དེ་དག་གིས་མི་མཐུན་པ་ཁོ་ནར་ལས་བྱས་སོ།

སུ་ཞིག་དེར་མ་འོངས།

དགའ་བོས་སྨྲས་པ།

ཁོ་བོའོ།

བདག་གིས་དེ་ན་རྒན་པའི་མཐའ་ལོགས་ན་སློབ་དཔོན་གྱི་སྒྲ་ཐོས་སོ།

དགའ་བོས་སྨྲས་པ།

གང་གི་ཚེ་དེ་དག་ན་རེ་གང་གཅིག་ཕྱིར་ཟློག་པར་བྱེད་པ་དེ་ཡང་གནས་ནས་དབྱུང་བའི་ལས་བྱའོ་ཞེས་ཟེར་བ་དེའི་ཚེ་ན་ཁོ་བོས་བསམས་པ།

འདི་དག་གི་བྱེད་སྟངས་ལས་ན་བདག་ལ་ཡང་གནས་ནས་འབྱིན་པའི་ལས་བྱེད་པར་འགྱུར་ན་མ་ལེགས་པར་འགྱུར་རོ་སྙམ་ནས།

ཁོ་བོ་དགུན་གྱི་དུས་ལ་བབ་པས་ལ་བ་ཞིག་གྱོན་ཏེ་ཁོ་བོས་ལ་བ་དེ་རྩིག་དྲུང་དུ་བསླང་སྟེ་བཞག་ནས་ཅང་མི་སྨྲ་བར་སྟན་ལས་ལངས་ཏེ་སོང་ངོ་།

དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་འདུན་གྱི་ཆོས་དང་ལྡན་པའི་གཏམ་རྣམ་པར་གཏན་ལ་འབེབས་པ་བྱུང་བ་ན་ཅང་མི་སྨྲ་བར་སྟན་ལས་ལངས་ཏེ་འགྲོ་བར་བྱེད་ཅེས་སྨོད་པར་བྱེད།

ཕྱར་ཀ་གཏོང་བར་བྱེད།

ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ།

དེ་ནས་བཅོམ་ལྡན་འདས་ཀྱིས་བྱུང་བ་འདི་དང་།

གླེང་གཞི་འདི་དང་།

སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ།

སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ།

སངས་རྒྱས་བཅོམ་ལྡན་འདས་ཀྱིས་ཤཱཀྱའི་བུ་དགའ་བོ་ལ་རྨས་པ།

དགའ་བོ་ཁྱོད་དགེ་འདུན་གྱི་ཆོས་དང་ལྡན་པའི་གཏམ་རྣམ་པར་གཏན་ལ་འབེབས་པ་བྱུང་བ་ན་ཅང་མི་སྨྲ་བར་སྟན་ལས་ལངས་ཏེ་འགྲོ་བ་བདེན་ནམ།

བཙུན་པ་མད་དོ།

སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ།

རྗེས་སུ་མཐུན་པ་མ་ཡིན་པ།

རུང་བ་མ་ཡིན་པ།

ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ།

དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ།

དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་ཞེས་བྱ་བ་ལ་སོགས་པ་སྔ་མ་བཞིན་ནོ།

ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ།

ཡང་དགེ་སློང་གང་དགེ་འདུན་གྱི་ཆོས་དང་ལྡན་པའི་གཏམ་རྣམ་པར་གཏན་ལ་འབེབས་པ་བྱུང་བ་ན་ཅང་མི་སྨྲ་བར་སྟན་ལས་ལངས་ཏེ་འགྲོ་ན་ལྟུང་བྱེད་དོ་ཞེས་བཅོམ་ལྡན་འདས་ཀྱིས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་དེ་ལྟར་བཅའ་བ་མཛད་དོ།

དགེ་སློང་ནད་ངན་ཅན་དག་འཁོད་པ་དེ་དག་གིས་ཡུན་རིང་དུ་འདུག་པར་མི་ནུས་པ་ན་དགེ་སློང་ནད་གཡོག་དག་གིས་ཀྱང་ནད་པ་དག་གི་བྱ་བ་ཉམས་པར་བྱེད།

དགེ་སློང་ཞལ་ཏ་བྱེད་པ་དག་གིས་ཀྱང་དགེ་འདུན་གྱི་བྱ་བ་ཉམས་པར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་།

བཅོམ་ལྡན་འདས་ཀྱིས་བཀའ་སྩལ་པ།

དེ་ལྟ་བས་ན་དགེ་སློང་འདུག་པ་ལ་སྨྲས་ཏེ་འགྲོ་བར་བྱའོ།

བཅོམ་ལྡན་འདས་ཀྱིས་དགེ་སློང་འདུག་པ་ལ་སྨྲས་ཏེ་འགྲོ་བར་བྱའོ་ཞེས་བཀའ་སྩལ་ནས་དགེ་སློང་ཞིག་གིས་ཁྱིམ་གཞན་དུ་ལྷུང་བཟེད་དང་ཆོས་གོས་བཞག་ནས་ཇི་ཙམ་ན་དེར་མེ་ཤོར་ནས་དགེ་སློང་དེས་དེར་འགྲོ་བར་བརྩམས་ཏེ་དེ་

ལམ་གྱི་ཕྱེད་དུ་ཕྱིན་པ་དང་།

བདག་གིས་དགེ་སློང་འདུག་པ་ལ་མ་སྨྲས་སོ་སྙམ་པའི་དྲན་པ་སྐྱེས་ནས་དེ་ཕྱིར་ལོག་སྟེ་ཇི་སྲིད་དུ་དགེ་སློང་འདུག་པ་ལ་སྨྲ་བར་བྱེད་པ་དེ་སྲིད་དུ་དེའི་ལྷུང་བཟེད་དང་ཆོས་གོས་ཚིག་ནས་དེ་དེར་སོང་བ་དང་ཁྱིམ་བདག་གིས་སྨྲས་པ།

འཕགས་པ་ཁྱོད་ཅིའི་སླད་དུ་འཕྱིས་ཏེ་བྱོན།

དེས་ན་ཁྱོད་ཀྱི་ལྷུང་བཟེད་དང་ཆོས་གོས་ཚིག་གི །

གལ་ཏེ་ཁྱོད་མྱུར་དུ་བྱོན་པར་གྱུར་ན་ཁྱོད་ཀྱི་ལྷུང་བཟེད་དང་ཆོས་གོས་ཚིག་པར་མི་འགྱུར་རོ་ཞེས་ཟེར་ཞིང་དགེ་སློང་དེ་ཡང་ཕོངས་པར་གྱུར་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་དང་།

བཅོམ་ལྡན་འདས་ཀྱིས་བཀའ་སྩལ་པ།

དེ་ལྟ་བས་ན་དེ་འདྲ་བའི་རྐྱེན་མ་གཏོགས་སོ།

དེ་ནས་བཅོམ་ལྡན་འདས་ཀྱིས་བསླབ་པ་འདོད་པ་དང་།

བསླབ་པ་ལ་གུས་པ་དང་།

བསླབ་པ་ལ་ཡོ་བྱད་བསྙུངས་པའི་བསྔགས་པ་བརྗོད་ནས་དགེ་སློང་རྣམས་ལ་དེ་དང་མཐུན་པ་དང་།

དེའི་ཤས་ཆེ་བ་དང་།

དེ་དང་འཚམ་པའི་ཆོས་དང་ལྡན་པའི་བཀའ་མཆིད་མཛད་ནས་དགེ་སློང་རྣམས་ལ་བཀའ་སྩལ་པ།

དགེ་སློང་དག་དེ་ལྟ་བས་ན་སྔ་མ་ནི་བཅས་པ་ཡིན་ལ།

འདི་ནི་གནང་བ་ཡིན་ཏེ།

ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ།

ཡང་དགེ་སློང་གང་དགེ་འདུན་གྱི་ཆོས་དང་ལྡན་པའི་གཏམ་རྣམ་པར་གཏན་ལ་འབེབས་པ་བྱུང་བ་ན་ཅང་མི་སྨྲ་བར་སྟན་ལས་ལངས་ཏེ་འགྲོ་ཞིང་དགེ་སློང་འདུག་པ་ལ་མི་སྨྲ་ན་དེ་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ།

ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་དགའ་བོའམ།

གཞན་ཡང་དེ་ལྟ་བུ་གང་ཡིན་པའོ།

དགེ་འདུན་གྱི་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་གྱིའོ།

ཆོས་དང་ལྡན་པའི་གཏམ་རྣམ་པར་གཏན་ལ་འབེབས་པ་བྱུང་བ་ན་ཞེས་བྱ་བ་ནི་གསོལ་བ་དང་།

གསོལ་བ་དང་གཉིས་དང་།

གསོལ་བ་དང་བཞིའི་ལས་བྱུང་བ་ནའོ།

ཅང་མི་སྨྲ་བར་སྟན་ལས་ལངས་ཏེ་འགྲོ་ཞིང་ཞེས་བྱ་བ་ནི་ཐོས་པའི་ཉེན་ཀོར་ལས་འདས་ཏེ་འགྲོ་ཞིང་ངོ་།

དགེ་སློང་འདུག་པ་ལ་མི་སྨྲ་ན་ཞེས་བྱ་བ་ནི་དེ་ན་དགེ་སློང་གང་འདུག་པ་ལའོ།

དེ་འདྲ་བའི་རྐྱེན་མ་གཏོགས་ཏེ་ཞེས་བྱ་བ་ནི་དེ་འདྲ་བའི་རྐྱེན་བཞག་

སྟེའོ།

ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་།

དུད་འགྲོ་དང་།

ཡི་དགས་ངན་སོང་དང་།

ངན་འགྲོ་དང་།

ལོག་པར་ལྟུང་བ་དག་ཏུ་སྲེག་པར་བྱེད།

འཚོད་པར་བྱེད།

ལྟུང་བར་བྱེད་པའོ།

གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ་དེས་ན་ལྟུང་བྱེད་དོ་ཞེས་གསུངས་སོ།

དེ་ལ་ལྟུང་བར་ཇི་ལྟར་འགྱུར་ཞེ་ན།

དགེ་སློང་ཇི་ཙམ་ཅུང་ཟད་དགེ་འདུན་གྱི་ཆོས་དང་ལྡན་པའི་གཏམ་རྣམ་པར་གཏན་ལ་འབེབས་པ་བྱུང་བ་ན་ཅང་མི་སྨྲ་བར་སྟན་ལས་ལངས་ཏེ་འགྲོ་ཞིང་དགེ་སློང་འདུག་པ་ལ་མི་སྨྲ་ན་ཇི་སྲིད་ཐོས་པའི་ཉེན་ཀོར་ལས་མ་འདས་ཀྱི་བར་དུ་ཉེས་བྱས་སུ་འགྱུར་ལ།

ཐོས་པའི་ཉེན་ཀོར་ལས་འདས་ན་ལྟུང་བྱེད་དུ་འགྱུར་རོ།

ལས་དང་པོ་པ་དང་།

སྨྱོས་པ་དང་།

སེམས་འཁྲུགས་པ་དང་།

ཚོར་བ་དག་གིས་ཉེན་པ་ལ་ལྟུང་བ་མེད་དོ།

མི་སྨྲ་བར་འགྲོ་བའི་ལྟུང་བྱེད་དེ་བདུན་བཅུ་རྩ་བདུན་པ་རྫོགས་སོ།།

སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་འོད་མའི་ཚལ་ཀ་ལན་ད་ཀའི་གནས་ན་བཞུགས་སོ།

དེའི་ཚེ་ན་གླང་ཆེན་ལྷས་ཀྱི་བདག་པོའི་བུ་ནག་པ་དགེ་སློང་རབ་ཏུ་མང་པོ་དག་འདི་ལྟ་སྟེ།

འདི་ནི་ཆོས་སོ།

འདི་ནི་འདུལ་བའོ།

འདི་ནི་སྟོན་པའི་བསྟན་པའོ་ཞེས་རྩོད་པ་ཉེ་བར་ཞི་བར་བྱ་བ་འགའ་ཞིག་གི་ཕྱིར་དཔོང་སའི་ཁང་པར་འདུག་ཅིང་མཐུན་པར་གྱུར་པ་ན་གཅིག་པུས་དགེ་འདུན་ཟློག་པར་བྱེད།

གཅིག་པུས་དགེ་འདུན་མི་མཐུན་པར་བྱེད་ཅིང་།

རྩོད་པ་བཟུང་སྟེ་རྩོད་ཅིང་འདུག་ལ་གཏམ་གྱི་མཇུག་སྡོད་པར་མི་བྱེད།

གུས་པར་མི་བྱེད།

རྗེ་ས་མི་བྱེད་ཅིང་ཕྱིར་སྨྲ་བར་བྱའོ་སྙམ་དུ་སེམས་ནས་དགེ་སློང་དོན་ཉུང་ངུ་དག་ཅིའི་ཕྱིར་དགེ་སློང་དག་དགེ་སློང་རབ་ཏུ་མང་པོ་དག་འདི་ལྟ་སྟེ།

འདི་ནི་ཆོས་སོ།

འདི་ནི་འདུལ་བའོ།

འདི་ནི་སྟོན་པའི་བསྟན་པའོ་ཞེས་རྩོད་པ་ཉེ་བར་ཞི་བར་བྱ་བ་འགའ་ཞིག་གི་ཕྱིར་དཔོང་སའི་ཁང་པར་འདུག་ཅིང་མཐུན་པར་གྱུར་པ་ན་གཅིག་པུས་དགེ་འདུན་ཟློག་པར་བྱེད།

གཅིག་པུས་དགེ་འདུན་མི་མཐུན་པར་བྱེད་ཅིང་།

རྩོད་པ་བཟུང་སྟེ་རྩོད་ཅིང་འདུག་ལ་གཏམ་གྱི་མཇུག་སྡོད་པར་མི་བྱེད།

གུས་པར་མི་བྱེད།

རྗེ་ས་མི་བྱེད་ཅིང་ཕྱིར་སྨྲ་བར་བྱའོ་སྙམ་དུ་སེམས་ཞེས་སྨོད་

པར་བྱེད།

ཕྱར་ཀ་གཏོང་བར་བྱེད།

ཁ་ཟེར་བར་བྱེད་པའི་སྐབས་དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ།

དེ་ནས་བཅོམ་ལྡན་འདས་ཀྱིས་བྱུང་བ་འདི་དང་།

གླེང་གཞི་འདི་དང་།

སྐབས་འདི་ལ་དགེ་སློང་གི་དགེ་འདུན་བསྡུ་བ་མཛད་དོ་ཞེས་བྱ་བ་ལ་སོགས་པ་སྔ་མ་བཞིན་ནོ།

སངས་རྒྱས་བཅོམ་ལྡན་འདས་རྣམས་ནི་མཁྱེན་བཞིན་དུ་རྨེད་པར་མཛད་པ་སྟེ་ཞེས་བྱ་བ་ལ་སོགས་པ་ཡང་སྔ་མ་བཞིན་ཏེ།

སངས་རྒྱས་བཅོམ་ལྡན་འདས་ཀྱིས་གླང་ཆེན་ལྷས་ཀྱི་བདག་པོའི་བུ་ནག་པ་ལ་རྨས་པ།

དགེ་སློང་ཁྱོད་དགེ་སློང་རབ་ཏུ་མང་པོ་དག་འདི་ལྟ་སྟེ།

འདི་ནི་ཆོས་སོ།

འདི་ནི་འདུལ་བའོ།

འདི་ནི་སྟོན་པའི་བསྟན་པའོ་ཞེས་རྩོད་པ་ཉེ་བར་ཞི་བར་བྱ་བ་འགའ་ཞིག་གི་ཕྱིར་དཔོང་སའི་ཁང་པར་འདུག་ཅིང་མཐུན་པར་གྱུར་པ་ན་གཅིག་པུས་དགེ་འདུན་ཟློག་པར་བྱེད།

གཅིག་པུས་དགེ་འདུན་མི་མཐུན་པར་བྱེད་ཅིང་རྩོད་པ་བཟུང་སྟེ་རྩོད་ཅིང་འདུག་ལ་གཏམ་གྱི་མཇུག་སྡོད་པར་མི་བྱེད།

གུས་པར་མི་བྱེད།

རྗེ་ས་མི་བྱེད་ཅིང་།

ཕྱིར་སྨྲ་བར་བྱའོ་སྙམ་དུ་སེམས་པ་བདེན་ནམ།

བཙུན་པ་མད་དོ།

སངས་རྒྱས་བཅོམ་ལྡན་འདས་ཀྱིས་དགེ་སྦྱོང་གི་ཚུལ་མ་ཡིན་པ།

རྗེས་སུ་མཐུན་པ་མ་ཡིན་པ།

རུང་བ་མ་ཡིན་པ།

ཚུལ་དང་མཐུན་པ་མ་ཡིན་པ་དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་རྣམ་པར་སྨད་པ་མཛད་དོ།

དེ་ནས་བཅོམ་ལྡན་འདས་ཀྱིས་རྣམ་གྲངས་དུ་མས་རྣམ་པར་སྨད་ནས་དགེ་སློང་རྣམས་ལ་བཀའ་སྩལ་པ།

དགེ་སློང་དག་དེ་ལྟ་བས་ན་ཕན་ཡོན་བཅུ་ཡང་དག་པར་གཟིགས་པས་འདུལ་བ་ལ་ཉན་ཐོས་རྣམས་ཀྱི་བསླབ་པའི་གཞི་བཅའ་བར་བྱ་སྟེ་ཞེས་བྱ་བ་ལ་སོགས་པ་སྔ་མ་བཞིན་ནོ།

ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ།

གུས་པར་མི་བྱེད་ན་ལྟུང་བྱེད་དོ།

གུས་པར་མི་བྱེད་ན་ཞེས་བྱ་བ་ནི་གཉིས་ཀ་ལ་གུས་པར་མི་བྱེད་ན་སྟེ།

དགེ་འདུན་ལ་དང་།

གང་ཟག་ལའོ།

དེ་ལ་དགེ་འདུན་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་དང་།

དགེ་འདུན་གྱི་ཐ་སྙད་པའོ།

གང་ཟག་ནི་མཁན་པོ་དང་།

སློབ་དཔོན་དག་གོ།

ལྟུང་བྱེད་དོ་ཞེས་བྱ་བ་ནི་སེམས་ཅན་དམྱལ་བ་དང་།

དུད་འགྲོ་དང་།

ཡི་དགས་ངན་སོང་དང་།

ངན་འགྲོ་དང་།

ལོག་པར་ལྟུང་བ་དག་ཏུ་སྲེག་པར་བྱེད།

འཚོད་པར་བྱེད།

ལྟུང་བར་བྱེད་པའོ།

གཞན་ཡང་ཇི་སྲིད་དུ་ལྟུང་བ་དེ་མ་བཤགས་ཤིང་སོ་སོར་མ་བཤགས་ན་དགེ་བའི་ཆོས་རྣམས་ལ་སྒྲིབ་པར་བྱེད་པ་སྟེ།

དེས་ན་ལྟུང་བྱེད་དོ་ཞེས་གསུངས་སོ།

དེ་ལ་ལྟུང་བར་ཇི་ལྟར་འགྱུར་ཞེ་ན།

དགེ་སློང་དགེ་འདུན་གྱིས་འདུག་ཤིག་ཅེས་བསྒོ་བ་ན་མི་འདུག་ན་ལྟུང་བྱེད་དུ་འགྱུར་རོ།

མ་འདུག་ཤིག་ཅེས་བསྒོ་བ་ན་འདུག་ན་ལྟུང་བྱེད་དུ་འགྱུར་རོ།

སོང་ཤིག་ཅེས་བསྒོ་བ་ན་མི་འགྲོ་ན་ལྟུང་བྱེད་དུ་འགྱུར་རོ།

མ་འགྲོ་ཤིག་ཅེས་བསྒོ་བ་ན་འགྲོ་ན་ལྟུང་བྱེད་དུ་འགྱུར་རོ།

གནས་མལ་ལོང་ཤིག་ཅེས་བསྒོ་བ་ན་མི་ལེན་ན་ལྟུང་བྱེད་དུ་འགྱུར་རོ།

གནས་མལ་མ་ལེན་ཅིག་ཅེས་བསྒོ་བ་ན་ལེན་ན་ལྟུང་བྱེད་དུ་འགྱུར་རོ།

གཙུག་ལག་ཁང་ལོང་ཤིག་ཅེས་བསྒོ་བ་ན་མི་ལེན་ན་ལྟུང་བྱེད་དུ་འགྱུར་རོ།

གཙུག་ལག་ཁང་མ་ལེན་ཅིག་ཅེས་བསྒོ་བ་ན་ལེན་ན་ལྟུང་བྱེད་དུ་འགྱུར་རོ།

སྨྲོས་ཤིག་ཅེས་བསྒོ་བ་ན་མི་སྨྲ་ན་ལྟུང་བྱེད་དུ་འགྱུར་རོ།

མ་སྨྲ་ཤིག་ཅེས་བསྒོ་བ་ན་སྨྲ་ན་ལྟུང་བྱེད་དུ་འགྱུར་རོ།

ཆོས་དང་ལྡན་པར་ཤད་ཀྱིས་སྦྱང་བ་སྦྱིན་པར་བྱེད་ན་ལྟུང་བ་མེད་དོ།

དགེ་འདུན་གྱི་ཐ་སྙད་པས་བསྒོ་བ་ལ་ཡང་དེ་བཞིན་དུ་སྦྱར་རོ།

དགེ་སློང་མཁན་པོས་འདུག་ཤིག་ཅེས་བསྒོ་བ་ན་མི་འདུག་ན་ཉེས་བྱས་སུ་འགྱུར་རོ།

མ་འདུག་ཤིག་ཅེས་བསྒོ་བ་ན་འདུག་ན་ཉེས་བྱས་སུ་འགྱུར་རོ།

སོང་ཤིག་ཅེས་བསྒོ་བ་ན་མི་འགྲོ་ན་ཉེས་བྱས་སུ་འགྱུར་རོ།

མ་འགྲོ་ཤིག་ཅེས་བསྒོ་བ་ན་འགྲོ་ན་ཉེས་བྱས་སུ་འགྱུར་རོ།

གནས་མལ་ལོང་ཤིག་ཅེས་བསྒོ་བ་ན་མི་ལེན་ན་ཉེས་བྱས་སུ་འགྱུར་རོ།

གནས་མལ་མ་ལེན་ཅིག་ཅེས་བསྒོ་བ་ན་ལེན་ན་ཉེས་བྱས་སུ་འགྱུར་རོ།

གཙུག་ལག་ཁང་ལོང་ཤིག་ཅེས་བསྒོ་བ་ན་མི་ལེན་ན་ཉེས་བྱས་སུ་འགྱུར་རོ།

གཙུག་ལག་ཁང་མ་ལེན་ཅིག་ཅེས་བསྒོ་བ་ན་ལེན་ན་ཉེས་བྱས་སུ་འགྱུར་རོ།

སྨྲོས་ཤིག་ཅེས་བསྒོ་བ་ན་མི་སྨྲ་ན་ཉེས་བྱས་སུ་འགྱུར་རོ།

མ་སྨྲ་ཤིག་ཅེས་བསྒོ་བ་ན་སྨྲ་ན་ཉེས་བྱས་སུ་འགྱུར་རོ།

ཆོས་དང་ལྡན་པར་ཤད་ཀྱིས་སྦྱང་བ་སྦྱིན་པར་བྱེད་ན་ལྟུང་བ་མེད་དོ།

སློབ་དཔོན་རྣམས་ཀྱིས་བསྒོ་བ་ལ་ཡང་དེ་བཞིན་དུ་སྦྱར་རོ།

ལས་དང་པོ་པ་དང་།

སྨྱོས་པ་དང་།

སེམས་འཁྲུགས་པ་དང་།

ཚོར་བ་དག་གིས་ཉེན་པ་ལ་ལྟུང་བ་མེད་དོ།

མ་གུས་པའི་ཚུལ་གྱི་ལྟུང་བྱེད་དེ་བདུན་བཅུ་

རྩ་བརྒྱད་པ་རྫོགས་སོ།།

སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ།

ཆུ་སྲིན་བྱིས་པ་གསོད་ཀྱི་རི་ལ་ཁྱིམ་བདག་རྟོགས་ལྡན་ཞེས་བྱ་བ་ཕྱུག་པ།

ནོར་མང་བ།

ལོངས་སྤྱོད་ཆེ་བ།

ཡོངས་སུ་གཟུང་བ་ཡངས་ཤིང་རྒྱ་ཆེ་བ།

རྣམ་ཐོས་ཀྱི་བུའི་ནོར་དང་ལྡན་པ།

རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་དེ་དེ་དང་ལྷན་ཅིག་རྩེ་བར་བྱེད།

དགའ་བར་བྱེད།

དགའ་མགུར་སྤྱོད་པར་བྱེད་དོ།

དེ་ལ་བུ་མོ་གཟུགས་བཟང་བ།

བལྟ་ན་སྡུག་པ།

མཛེས་པ་ཞིག་བཙས་ནས་དེ་བསྲིངས་ཤིང་བསྐྱེད་དེ་ཆེན་མོར་གྱུར་ཏོ།

ཁྱིམ་བདག་དེས་བསམས་པ།

བདག་གིས་བུ་མོ་འདི་གཟུགས་ཀྱི་ཕྱིར་ཡང་མི་སྦྱིན།

བཟོའི་ཕྱིར་ཡང་མི་སྦྱིན་གྱི་བདག་དང་རིགས་དང་།

ནོར་གྱིས་འདྲ་བའམ།

ལྷག་པ་གང་ཡིན་པ་ལ་བདག་གིས་བུ་མོ་འདི་སྦྱིན་ནོ་སྙམ་མོ།

དེས་མཉན་ཡོད་ན་ཁྱིམ་བདག་མགོན་མེད་ཟས་སྦྱིན་ཞེས་བྱ་བ་ཕྱུག་པ་ནོར་མང་བ།

ལོངས་སྤྱོད་ཆེ་བ།

ཡོངས་སུ་གཟུང་བ་ཡངས་ཤིང་རྒྱ་ཆེ་བ།

རྣམ་ཐོས་ཀྱི་བུའི་ནོར་དང་ལྡན་པ།

རྣམ་ཐོས་ཀྱི་བུ་ལ་ནོར་གྱིས་འགྲན་པ་ཞིག་འདུག་པ་དེ་བདག་དང་རིགས་དང་།

ནོར་གྱིས་མཉམ་ཞིང་ནོར་གྱི་རྣམ་པས་ཆེས་ལྷག་པ་ཡིན་ནོ་ཞེས་ཐོས་ནས་དེས་བུ་མོ་དེ་མཉན་ཡོད་དུ་ཁྱིམ་བདག་མགོན་མེད་ཟས་སྦྱིན་གྱི་བུ་ལ་བྱིན་ནོ།

ཁྱིམ་བདག་མགོན་མེད་ཟས་སྦྱིན་གྱིས་ཀྱང་དཔལ་གྱི་འབྱོར་པས་བུའི་ཆུང་མར་བླངས་སོ།

ཁྱིམ་བདག་རྟོགས་ལྡན་ཡང་རྩེ་བར་བྱེད།

དགའ་བར་བྱེད།

དགའ་མགུར་སྤྱོད་པར་བྱེད་པའི་ཆུང་མ་ལ་སེམས་ཅན་ཞུགས་པར་གྱུར་ནས་དེ་ལ་གང་གི་ཉིན་མོ་སེམས་ཅན་ཞུགས་པར་གྱུར་པ་དེ་ཉིད་ཀྱི་ཉིན་མོ་ཁྱིམ་བདག་རྟོགས་ལྡན་ལ་གནོད་པ་བརྒྱ་དག་བྱུང་བར་གྱུར་ཏོ།

མངལ་ན་གནས་པ་དེ་ཇི་ལྟ་ཇི་ལྟར་སྐྱེས་པར་གྱུར་པ་དེ་ལྟ་དེ་ལྟར་ཁྱིམ་བདག་རྟོགས་ལྡན་ལ་ཡང་དང་ཡང་དུ་རྒྱ་ཆེར་གནོད་པ་བརྒྱ་དག་བྱུང་བར་གྱུར་ཏོ།

ཁྱིམ་བདག་རྟོགས་ལྡན་གྱིས་བསམས་པ།

བདག་སྐྱེད་མོས་ཚལ་དུ་སོང་སྟེ་འདུག་གོ་སྙམ་ནས།

དེས་ཞོ་ཤས་འཚོ་བ་དག་ལ་བསྒོ་བ།

ཤེས་ལྡན་དག་གལ་ཏེ་ཁོ་བོ་ལ་གནོད་པ་ཆེན་པོ་ཞིག་བྱུང་བར་གྱུར་ན་སྦྲོན་ཅིག །

ཇི་སྟེ་མ་བྱུང་ན་མ་སྦྲོན་ཅིག་ཅེས་བསྒོ་ནས་དེ་སྐྱེད་མོས་ཚལ་དུ་སོང་སྟེ་འདུག་གོ།

དེ་ནས་དུས་གཞན་ཞིག་ན་དེའི་ཆུང་མ་བཙས་པ་ལས་ཁྱེའུ་ཞིག་བྱུང་ནས་དེ་གང་གི་ཉི་མ་ལ་བྱུང་བ་དེ་ཉིད་ཀྱི་ཉིན་མོ་ཁྱིམ་བདག་རྟོགས་ལྡན་ལ་གནོད་པ་སྟོང་དག་བྱུང་བར་གྱུར་ཏོ།

དེ་ནས་མི་ཞིག་རིངས་པ་རིངས་པར་ཁྱིམ་བདག་རྟོགས་ལྡན་ག་ལ་བ་དེར་སོང་བ་དང་།

ཁྱིམ་བདག་རྟོགས་ལྡན་གྱིས་མི་དེ་ཐག་རིང་པོ་ཁོ་ན་ནས་རིངས་པ་རིངས་པར་འོང་བ་མཐོང་ནས་དེས་བསམས་པ།

བདག་ལ་གནོད་པ་ཆེན་པོ་ཞིག་བྱུང་བར་གྱུར་གོར་མ་ཆག་སྙམ་ནས་དེས་མི་དེ་ལ་སྨྲས་པ།

ཀྭའི་ནང་རྗེ་ཅིའི་ཕྱིར་འདི་ལྟར་རིངས་པ་རིངས་པར་འོང་།

མི་དེས་སྨྲས་པ།

ཁྱོད་ཀྱི་སྲས་བལྟམ་གྱིས་དགྱེས་པ་སྐྱེད་ཅིག །

རྟོགས་ལྡན་གྱིས་སྨྲས་པ།

ཀྭའི་ནང་རྗེ་ཁོ་བོའི་བུས་གནོད་པ་བརྒྱ་ཕྲག་མང་པོ་བསྐྱེད་མོད་ཀྱི་འོན་ཀྱང་བུ་འོངས་པ་ལེགས་སོ།

དེའི་ཉེ་དུ་དག་འདུས་ཤིང་ལྷགས་ནས་ཁྱེའུ་འདིའི་མིང་ཅིར་གདགས་སྙམ་ནས་དེ་དག་འདི་སྙམ་དུ་སེམས་ཏེ།

ཁྱེའུ་འདི་ལ་ཕས་འོངས་པ་ལེགས་སོ་ཞེས་བྱ་བའི་ཚིག་བརྗོད་པས་ཁྱེའུ་འདིའི་མིང་ལེགས་འོངས་ཞེས་གདགས་སོ་ཞེས་དེའི་མིང་ལེགས་འོངས་ཞེས་བྱ་བར་བཏགས་སོ།

ལེགས་འོངས་ཇི་ལྟ་ཇི་ལྟར་སྐྱེས་པར་གྱུར་པ་དེ་ལྟ་དེ་ལྟར་ཁྱིམ་བདག་རྟོགས་ལྡན་གྱི་ཁྱིམ་ན་ནོར་དང་།

འབྲུ་དང་།

དབྱིག་དང་།

གསེར་དང་།

བྲན་དང་།

བྲན་མོ་དང་།

ལས་བྱེད་པ་དང་།

ཞོ་ཤས་འཚོ་བ་དག་ཡོངས་སུ་ཟད་པར་གྱུར་ཏོ།

དེ་ནས་དུས་གཞན་ཞིག་ན་ཁྱིམ་བདག་རྟོགས་ལྡན་ཡང་དུས་ལ་བབ་ཅིང་དེའི་ཆུང་མ་ཡང་དུས་ལ་བབ།

དེའི་ཁྱིམ་ཡང་མེས་ཚིག །

བང་མཛོད་ཀྱི་རྣམ་པ་དང་།

ཞིང་གི་རྣམ་པ་དང་།

ནོར་གྱི་རྣམ་པ་དང་།

འབྲུའི་རྣམ་པ་ཐམས་ཅད་ཀྱང་མེས་ཚིག་གོ།

གྲོང་པའི་མི་གང་དག་ཟོང་ཐོགས་ཏེ་ཡུལ་གཞན་དུ་དོང་བ་དག་ཀྱང་དེ་ན་ཁ་ཅིག་ནི་རྒྱ་མཚོ་ཆེན་པོར་གྲུ་བོ་ཆེ་ཞིག་པར་གྱུར།

ཁ་ཅིག་ནི་ཟོང་ཟོང་མ་ཡིན་པར་གྱུར།

ཁ་ཅིག་ནི་དེ་ཉིད་དུ་ཚུལ་མ་ཡིན་པས་སྡུག་བསྔལ་བར་གྱུར།

ཁ་ཅིག་ནི་དེ་ཉིད་དུ་འཁོད་དེ་ཚིག་ཀྱང་མི་སྟེར་རོ།

ཉེ་དུ་དག་ཀྱང་ཁ་ཅིག་ནི་དུས་ལ་བབ།

ཁ་ཅིག་ནི་བྲོས།

ཁ་ཅིག་ནི་དེ་ཉིད་ན་འཁོད་དེ་ཚིག་ཀྱང་མི་སྟེར་རོ།

བྲན་དང་།

བྲན་མོ་དང་།

ལས་བྱེད་པ་དང་།

ཞོ་ཤས་

འཚོ་བ་དག་ཀྱང་ཁ་ཅིག་ནི་དུས་ལ་བབ།

ཁ་ཅིག་ནི་བྲོས།

ཁ་ཅིག་ནི་དེ་ཉིད་ན་འཁོད་དེ་ཚིག་ཀྱང་མི་སྟེར་རོ།

ཁྱིམ་བདག་རྟོགས་ལྡན་གྱི་སྔོན་གྱི་བྲན་མོ་རྒན་མོ་གཅིག་པུ་ཞིག་ལེགས་འོངས་ཀྱི་བསྙེན་བཀུར་བྱེད་ཅིང་འདུག་པ་དེས་ལེགས་འོངས་ཁྱེའུའི་གྲྭར་ཡི་གེ་དང་ཡིག་འབྲུ་སློབ་ཏུ་ཕུལ་ལོ།

རྒན་མོ་དེས་བསམས་པ།

ཁྱིམ་བདག་རྟོགས་ལྡན་གྱི་ཁྱིམ་ནོར་དུ་མ་དང་ལྡན་པ་ཡོངས་སུ་ཟད་ཅིང་མཐར་ཐུག་པར་གྱུར་ན་གང་གི་བསོད་ནམས་མེད་པས་དེ་ལྟར་གྱུར་པ་ཅི་བདག་གིའམ་འོན་ཏེ་ལེགས་འོངས་ཀྱི་བསོད་ནམས་མེད་པས་དེ་ལྟར་གྱུར་པ་བལྟའོ་སྙམ་ནས་ཇི་ཙམ་ན་དེས་ལེགས་འོངས་ཀྱི་མིང་གིས་ཕྲུ་རྟོག་བཙུགས་པ་དང་དེ་ཆུད་ཟོས་པར་གྱུར་ཅིང་།

བདག་གི་མིང་གིས་ཕྲུ་རྟོག་བཙུགས་པ་དང་དེ་ཚོས་པར་གྱུར་ནས་དེས་བསམས་པ།

འདི་ནི་སེམས་ཅན་སྐལ་ཆད་ཅིག་ཡིན་པས་འདིའི་ལེ་ལན་གྱིས་ཁྱིམ་བདག་རྟོགས་ལྡན་གྱི་ཁྱིམ་ནོར་དུ་མ་དང་ལྡན་པ་ཚུལ་མ་ཡིན་པས་ཆུད་ཟོས་པར་གྱུར་པས་བདག་ཀྱང་འདིའི་ལེ་ལན་གྱིས་ཚུལ་མ་ཡིན་པས་སྡུག་བསྔལ་བར་འགྱུར་བ་གང་ཡིན་པ་དེ་ལྟ་བུའི་གནས་ཡོད་པར་འགྱུར་གོར་མ་ཆག་ན་འདི་ལ་ཇི་ལྟར་བྱ་སྙམ་ནས་དེས་བསམས་པ།

འབྲོས་སོ་སྙམ་ནས་རྒན་མོ་དེས་ཀྱང་དེ་ན་གཅེས་པ་ཅུང་ཟད་ཅི་ཡོད་པ་དེ་དག་ཁྱེར་ཏེ་བྲོས་སོ།

ཁྱིམ་སྟོང་པ་དེར་ཁྱི་དག་ཞུགས་ནས་ཟས་ཟོས་ཏེ་འཐབ་པར་བརྩམས་པ་དང་།

མི་གཡོན་ཅན་ཞིག་ཕྱོགས་དེ་ནས་འགྲོ་བ་དེས་ཁྱིམ་དེ་ནས་ཁྱི་དག་འཐབ་པའི་སྒྲ་ཐོས་ནས་དེས་བསམས་པ།

ཁྱིམ་བདག་རྟོགས་ལྡན་གྱི་ཁྱིམ་སྟོང་པར་གྱུར་ཏམ་ཅི་ན་འདི་ལྟར་འདི་ན་ཁྱི་དག་འཐབ་ཅིང་འཁོད།

བདག་གིས་ཇི་བལྟའོ་སྙམ་ནས་དེ་དེར་ཞུགས་པ་དང་།

ཇི་ཙམ་ན་ཁྱི་རྐུན་ཕལ་པོ་ཆེ་དག་འཐབ་ཅིང་འདུག་གི་མི་ནི་འགའ་ཡང་མེད་དེ་སྟོང་པར་མཐོང་ནས་དེས་དེ་ནས་ལྷག་རོལ་གྱི་ལྷག་མ་ཅུང་ཟད་ཅི་ཡོད་པ་དེ་དག་ཁྱེར་ཏེ་སོང་ངོ་།

དེའི་འོག་ཏུ་ལེགས་འོངས་ཟན་བཟའོ་སྙམ་ནས་ཁྱེའུའི་གྲྭ་ནས་འོངས་ཏེ་དེ་དེར་ཞུགས་པ་དང་།

ཇི་ཙམ་ན་སྟོང་པར་མཐོང་ནས་དེས་མ་མ་མ་མ་ཞེས་བོས་ན་འགའ་ཡང་ལན་འདེབས་པ་མེད་ནས་དེ་དང་ཧ་ཅང་ཐག་མི་རིང་བ་ན་ཉེ་དུའི་ཁྱིམ་ཞིག་ཡོད་པ་དེར་ཞུགས་པ་དང་།

ཇི་ཙམ་ན་དེར་ཡང་ཁྱིམ་མི་དག་འཐབ་མོ་བྱུང་

བར་གྱུར་ཏོ།

གང་གི་ཚེ་དེ་དག་འཐབ་མོ་ཞི་བར་གྱུར་པ་དེའི་ཚེ་ན་གཅིག་ལ་གཅིག་སྨྲས་པ།

ཤེས་ལྡན་དག་བདག་གིས་སྔན་ཆད་ཁྱོད་མཐོང་ན་སྙིང་དུ་སྡུག་ན་དེང་བདག་གིས་ཁྱོད་མཐོང་ན་ཁྱོད་བསད་དོ་སྙམ་དུ་སེམས་སོ།

གཞན་དག་ཀྱང་གཅིག་ལ་གཅིག་དེ་སྐད་ཟེར་ནས་དེ་དག་གིས་བསམས་པ།

འདིར་གཞན་འགའ་ཞིག་མ་འོངས་སམ་བལྟའོ་སྙམ་ནས་དེ་དག་གིས་བལྟས་ན་ཇི་ཙམ་ན་ལེགས་འོངས་དེར་འོངས་པ་མཐོང་ནས་དེ་དག་གིས་སྨྲས་པ།

ཤེས་ལྡན་དག་འདི་ནི་ལེགས་འོངས་མ་ཡིན་གྱི་ཉེས་འོངས་ཡིན་ཏེ།

འདིའི་ལེ་ལན་གྱིས་བདག་ཅག་འཐབ་མོ་བྱུང་བར་གྱུར་ཏོ་ཞེས་དེ་དག་གིས་བསྐྲད་དེ་དེ་གཞན་དུ་སོང་བ་དང་།

དེར་ཡང་དེ་དག་དེ་བཞིན་དུ་གྱུར་ནས་དེ་དག་གིས་ཀྱང་དེ་སྐད་སྨྲས་ཏེ་དེ་བསྐྲད་དེ་བཏང་ངོ་།

དེ་མུ་ལྟོ་བ་དག་གི་ནང་དུ་ཞུགས་པ་དང་།

ཇི་ཙམ་ན་མུ་ལྟོ་བ་དེ་དག་ཀྱང་ལག་པ་སྟོང་པ་དང་།

སྤྲང་ཕོར་སྟོང་པར་གྱུར་ཏེ་ཕྱིར་ལྷགས་ནས་དེ་དག་གིས་སྨྲས་པ།

ཤེས་ལྡན་དག་བདག་ཅག་སྔོན་ཆད་གང་དུ་ཞུགས་པ་དེར་ལག་པ་གང་བ་དང་།

སྤྲང་ཕོར་གང་བར་གྱུར་ཏེ་ཕྱིར་འོང་ན།

དེང་བདག་ཅག་ལག་པ་སྟོང་པ་དང་།

སྤྲང་ཕོར་སྟོང་པར་གྱུར་ཏེ་ཕྱིར་ལྷགས་པ་འདི་ལ་རྒྱུ་ཅི་ཡོད།

དེ་དག་གིས་སྨྲས་པ།

བདག་ཅག་གི་ནང་དུ་སེམས་ཅན་སྐལ་ཆད་འགའ་ཞིག་ཞུགས་པས་དེས་ན་བདག་ཅག་ལག་པ་སྟོང་པ་དང་།

སྤྲང་ཕོར་སྟོང་པར་གྱུར་ཏེ་ཕྱིར་ལྷགས་སོ།

ཡང་དེ་དག་གིས་སྨྲས་པ།

བརྟག་པར་བྱས་བདག་ཅག་ཁ་གཉིས་སུ་བཅད་དེ་འཇུག་པར་བྱའོ་ཞེས་དེ་དག་གིས་ཁ་གཉིས་སུ་བཅད་དེ་ཞུགས་པ་དང་།

གང་དག་གི་ནང་དུ་ལེགས་འོངས་ཞུགས་པ་དེ་དག་ལག་པ་སྟོང་པ་དང་།

སྤྲང་ཕོར་སྟོང་པར་གྱུར་ཏེ་ལྷགས་སོ།

དེ་དག་གིས་ཀྱང་ཁ་གཉིས་སུ་བཅད་དེ་ཞུགས་པ་དང་།

གང་དག་གི་ནང་དུ་ལེགས་འོངས་ཞུགས་པ་དེ་དག་ལག་པ་སྟོང་པ་དང་།

སྤྲང་ཕོར་སྟོང་པར་གྱུར་ཏེ་ལྷགས་སོ།

དེ་དག་གིས་ཀྱང་ཡང་ཁ་གཉིས་སུ་བཅད་དེ་ཞུགས་པ་དང་།

ཡང་དེ་ལྟར་གྱུར་ཏོ།

དེ་དག་གིས་ཀྱང་ཡང་དང་ཡང་དུ་ཁ་གཉིས་སུ་བཅད་དེ་ཞུགས་པ་དང་།

དེ་ལྟ་དེ་ལྟར་གྱུར་ནས་ཇི་ཙམ་ན་ལེགས་འོངས་དང་མུ་ལྟོ་བ་གཞན་ཅིག་དང་གཉིས་ལྷན་ཅིག་ཞུགས་པ་

ཡང་སོ་སོར་བྱེ་བ་དང་ལེགས་འོངས་ནི་ལག་པ་སྟོང་པ་དང་།

སྤྲང་ཕོར་སྟོང་པར་གྱུར་ཏེ་འོངས་ལ་གཞན་ཐམས་ཅད་ལག་པ་གང་བ་དང་།

སྤྲང་ཕོར་གང་བར་གྱུར་ཏེ་འོངས་ནས་དེ་དག་གིས་སྨྲས་པ།

སེམས་ཅན་སྐལ་ཆད་འདི་བདག་ཅག་གི་ནང་དུ་ཞུགས་པས་དེས་ན་བདག་ཅག་ལག་པ་སྟོང་པ་དང་།

སྤྲང་ཕོར་སྟོང་པར་གྱུར་ཏེ་ལྷགས་སོ་ཞེས་དེ་དག་གིས་ལེགས་འོངས་ཤིན་ཏུ་བརྡེགས་ཏེ་བསྐྲད་དོ།

མཉན་ཡོད་ན་ཁྱིམ་བདག་རྟོགས་ལྡན་གྱི་ཆུང་པོ་གྲོགས་ཁྱིམ་བདག་ཅིག་འདུག་པ་དེ་ཟོང་ཐོགས་ཏེ་ཆུ་སྲིན་བྱིས་པ་གསོད་ཀྱི་རིར་ཕྱིན་ནས་ཁྱིམ་བདག་དེས་ལེགས་འོངས་ལག་ན་སྤྲང་ཕོར་ཐོགས་ཏེ།

སྲང་དུ་སོང་བ་མཐོང་ནས་དེས་བཞིན་གཟུགས་ལས་དེ་ངོ་ཤེས་ནས་དེས་དེ་ལ་སྨྲས་པ།

བུ་ཁྱོད་ཁྱིམ་བདག་རྟོགས་ལྡན་གྱི་བུ་མ་ཡིན་ནམ།

ལེགས་འོངས་ཀྱིས་སྨྲས་པ་ཡིན་ནོ།

དེས་སྨྲས་པ།

ཁྱོད་ཀྱི་ཕ་མ་གཉིས་གར་སོང་།

ལེགས་འོངས་ཀྱིས་སྨྲས་པ།

དུས་ལ་བབ་བོ།

དེས་སྨྲས་པ།

དེའི་ཁྱིམ་དང་།

བང་མཛོད་ཀྱི་རྣམ་པ་དང་།

ཞིང་གི་རྣམ་པ་དང་།

ནོར་གྱི་རྣམ་པ་དང་།

འབྲུའི་རྣམ་པ་དག་ག་རེ།

ལེགས་འོངས་ཀྱིས་སྨྲས་པ།

ཐམས་ཅད་མེས་ཚིག་གོ།

དེས་སྨྲས་པ།

གྲོང་པའི་མི་གང་དག་ཟོང་ཐོགས་ཏེ་ཡུལ་གཞན་དུ་དོང་བ་དག་གར་དོང་།

ལེགས་འོངས་ཀྱིས་སྨྲས་པ།

ཁ་ཅིག་ནི་རྒྱ་མཚོ་ཆེན་པོར་གྲུ་བོ་ཆེ་ཞིག་པར་གྱུར།

ཁ་ཅིག་ནི་ཟོང་ཟོང་མ་ཡིན་པར་གྱུར།

ཁ་ཅིག་ནི་དེ་ཉིད་དུ་ཚུལ་མ་ཡིན་པས་སྡུག་བསྔལ་བར་གྱུར།

ཁ་ཅིག་ནི་དེ་ཉིད་དུ་འཁོད་དེ་ཚིག་ཀྱང་མི་སྟེར་རོ།

དེས་སྨྲས་པ།

ཉེ་དུ་དག་གར་དོང་།

ལེགས་འོངས་ཀྱིས་སྨྲས་པ།

ཁ་ཅིག་ནི་དུས་ལ་བབ།

ཁ་ཅིག་ནི་བྲོས།

ཁ་ཅིག་ནི་དེ་ཉིད་ན་འཁོད་དེ་ཚིག་ཀྱང་མི་སྟེར་རོ།

དེས་སྨྲས་པ།

བྲན་དང་།

བྲན་མོ་དང་།

ལས་བྱེད་པ་དང་།

ཞོ་ཤས་འཚོ་བ་དག་གར་དོང་།

ལེགས་འོངས་ཀྱིས་སྨྲས་པ།

ཁ་ཅིག་ནི་དུས་ལ་བབ།

ཁ་ཅིག་ནི་བྲོས།

ཁ་ཅིག་ནི་དེ་ཉིད་ན་འཁོད་དེ་ཚིག་ཀྱང་མི་སྟེར་རོ།

ཁྱིམ་བདག་དེས་དེ་ཐོས་ནས་མཆི་མས་བརྣངས་ཏེ་འདུག་ནས་དེས་སྨྲས་པ།

བུ་ཁོ་བོ་དང་ལྷན་ཅིག་མཉན་ཡོད་དུ་འདོང་ངོ་།

ལེགས་འོངས་ཀྱིས་སྨྲས་པ།

ཕ་བདག་དེར་སོང་ན་ཅིར་འགྱུར།

དེས་སྨྲས་པ།

བུ་དེ་ན་ཁྱིམ་བདག་མགོན་མེད་ཟས་སྦྱིན་འདུག་པ་དེའི་བུས་ཁྱོད་ཀྱི་སྲིང་མོ་ཆུང་མར་བླངས་པས་ཁྱོད་དེར་སོང་ན་སྲིང་མོ་དེ་ཁྱོད་ལ་མཁོ་བ་སྟོབས་པར་འགྱུར་རོ།

ལེགས་འོངས་ཀྱིས་སྨྲས་པ།

ཕ་འགྲོའོ།

ཁྱིམ་བདག་དེས་ལེགས་འོངས་ལ་ཀཱཪྵཱ་པ་ཎ་གཉིས་བྱིན་ཏེ་སྨྲས་པ།

བུ་ཁོ་བོ་ཟོང་སྒྱུར་གྱི་བར་དུ་ཁྱོད་རེ་ཞིག་འདི་གཉིས་ཟ་ཞིང་སྡོད་ཅིག །

ལེགས་འོངས་ཀྱིས་ཀཱཪྵཱ་པ་ཎ་དེ་གཉིས་གོས་ཀྱི་གྲྭར་ཕུར་ཏེ་བཞག་པ་དང་།

དེས་ལས་ཀྱི་རྣམ་པར་སྨིན་པས་དེ་གཉིས་ཀྱང་བརྗེད་པར་གྱུར་ཏོ།

ཁྱིམ་བདག་དེས་ཟོང་བསྒྱུར་ཏེ་རིན་བླངས་ནས་ལེགས་འོངས་ཁྲིད་དེ་འཕགས་པ་དང་།

ལེགས་འོངས་ཀྱང་དེ་དང་ལྷན་ཅིག་འཕགས་སོ།

ཇི་ཙམ་ན་དོན་མཐུན་དེ་དག་འཐབ་པར་བརྩམས་ཤིང་གླང་དག་ཀྱང་འཐབ་པར་བརྩམས་ནས་དེ་དག་གིས་སྨྲས་པ།

ཤེས་ལྡན་དག་བདག་ཅག་སྔན་ཅད་གཅིག་གིས་གཅིག་མཐོང་ན་སྙིང་དུ་སྡུག་ན་དེང་བདག་ཅག་གཅིག་གིས་གཅིག་མཐོང་ན་འཐབ་པར་བརྩམས་ཤིང་གླང་དག་ཀྱང་གཅིག་གིས་གཅིག་མཐོང་ན་འཐབ་པར་རྩོམ་པ་ལས་ན།

མ་ལ་འདིར་ཉེས་འོངས་དེ་མ་འོངས་སམ་ཞེས་བལྟས་པ་དང་།

ཇི་ཙམ་ན་དེ་དག་གིས་ལེགས་འོངས་དེར་འོངས་པ་མཐོང་ནས་དེ་དག་གིས་སྨྲས་པ།

ཤེས་ལྡན་དག་འདི་ནི་ལེགས་འོངས་མ་ཡིན་གྱི་ཉེས་འོངས་ཡིན་ཏེ།

འདིའི་ལེ་ལན་གྱིས་བདག་ཅག་འཐབ་པར་བརྩམས་ཤིང་།

གླང་དག་ཀྱང་འཐབ་པར་རྩོམ་མོ་ཞེས་དེ་དག་གིས་དེ་བསྐྲད་པར་བརྩམས་པ་དང་།

ཁྱིམ་བདག་དེས་སྨྲས་པ།

ཤེས་ལྡན་དག་འདི་ནི་ཁོ་བོའི་ཆུང་པོ་གྲོགས་ཀྱི་བུ་ཡིན་གྱིས་འདི་མ་བསྐྲད་ཅིག །

དེ་དག་གིས་སྨྲས་པ།

ཁྱིམ་བདག་ཁྱོད་ནི་དོན་མཐུན་ལ་དབང་བ་ཡིན་མོད་ཀྱི།

བདག་ཅག་འདི་དང་ལྷན་ཅིག་འགྲོ་མི་ཕོད་དེ།

གལ་ཏེ་འདི་འགྲོ་ན་བདག་ཅག་མི་འགྲོའོ།

ཁྱིམ་བདག་དེས་ལེགས་འོངས་ལ་སྨྲས་པ།

བུ་ཁྱོད་ཕྱི་བཞིན་འབྲང་ཞིང་ཤོག་ཤིག་དང་།

ཁོ་བོས་ཁྱོད་ཀྱི་ཕྱིར་ཟན་གཞག་པར་བྱའོ།

ལེགས་འོངས་ཕྱི་བཞིན་འབྲང་ཞིང་འོང་བ་ན་ཁྱིམ་བདག་དེས་ཀྱང་དེའི་དོན་དུ་ཟན་འཇོག་པར་བྱེད་ཅིང་ཁ་ཅིག་ནི་ས་གཞི་ལ་སས་གཡོགས་ཏེ་འཇོག་པར་བྱེད།

ཁ་ཅིག་ནི་ཤིང་

ལྗོན་པའི་ཡལ་ག་དག་ལ་ལོ་མ་དག་གིས་གཡོགས་ཏེ་འཇོག་པར་བྱེད་དོ།

དེའི་ཟན་གང་དག་ས་གཞི་ལ་སས་གཡོགས་ཏེ་བཞག་པ་དེ་དག་ནི་ཝ་དག་གིས་ཟོས།

གང་དག་ཤིང་ལྗོན་པའི་ཡལ་ག་དག་ལ་ལོ་མ་དག་གིས་གཡོགས་ཏེ་བཞག་པ་དེ་དག་ནི་བྱ་དག་དང་སྤྲེའུ་དག་གིས་ཟོས་ནས་ལེགས་འོངས་ཀྱིས་ཅུང་ཟད་ནི་ཐོབ།

ཕལ་ཆེར་མི་ཐོབ་ནས་དེ་ཤིན་ཏུ་ཉམ་ང་བས་འཚོ་ཞིང་འགྲོའོ།

སྲིད་པ་ཐ་མ་པའི་སེམས་ཅན་ཟག་པ་ཟད་པ་མ་ཐོབ་པར་བར་མ་དོར་རྒྱུན་ཆད་ཅིང་དུས་བྱེད་པར་འགྱུར་བ་ནི་གནས་མ་ཡིན་སྐབས་མ་ཡིན་ཏེ།

དེ་ནི་གནས་མེད་པས་ལེགས་འོངས་མཐར་གྱིས་མཉན་ཡོད་དུ་ཕྱིན་ནས།

མཉན་ཡོད་ཀྱི་ཕྱི་རོལ་ཁྲོན་པའི་ཁ་ན་ངལ་སོ་ཞིང་འདུག་གོ།

ལེགས་འོངས་ཀྱི་སྲིང་མོ་ཁྱིམ་བདག་མགོན་མེད་ཟས་སྦྱིན་གྱི་མནའ་མ་བྱེད་པ་དེའི་བུ་མོ་མངག་གཞུག་མ་ཆུ་བུམ་ཐོགས་ཏེ་ཁྲོན་པ་དེའི་དྲུང་དུ་ཆུ་ཆུར་སོང་བ་དང་།

དེས་ལེགས་འོངས་བཞིན་གཟུགས་ལས་ངོ་ཤེས་ནས་དེས་དེ་ལ་སྨྲས་པ།

ཇོ་ཅོ་ཁྱོད་ཆུ་སྲིན་བྱིས་པ་གསོད་ཀྱི་རི་པ་ཁྱིམ་བདག་རྟོགས་ལྡན་གྱི་བུ་ལེགས་འོངས་མ་ལགས་སམ།

སྲིང་མོ་ཡིན་ནོ།

ཇོ་ཅོ་ཁྱོད་ཀྱི་ཡབ་ཡུམ་གཉིས་གར་བཞུད།

དུས་ལ་བབ་བོ།

དེའི་ཁྱིམ་དང་།

བང་མཛོད་ཀྱི་རྣམ་པ་དང་།

ཞིང་གི་རྣམ་པ་དང་།

ནོར་གྱི་རྣམ་པ་དང་།

འབྲུའི་རྣམ་པ་དག་གར་མཆིས།

ཐམས་ཅད་མེས་ཚིག་གོ།

གྲོང་པའི་མི་གང་དག་ཟོང་ཐོགས་ཏེ་ཡུལ་གཞན་དུ་མཆིས་པ་དག་གར་མཆིས།

ཁ་ཅིག་ནི་རྒྱ་མཚོ་ཆེན་པོར་གྲུ་བོ་ཆེ་ཞིག་པར་གྱུར།

ཁ་ཅིག་ནི་ཟོང་ཟོང་མ་ཡིན་པར་གྱུར།

ཁ་ཅིག་ནི་དེ་ཉིད་དུ་ཚུལ་མ་ཡིན་པས་སྡུག་བསྔལ་བར་གྱུར།

ཁ་ཅིག་ནི་དེ་ཉིད་དུ་འཁོད་དེ་ཚིག་ཀྱང་མི་སྟེར་རོ།