律部第12卷（འདུལ་བ་ན་བཞུགས་སོ། །）

རྒྱ་གར་སྐད་དུ།

བི་ན་ཡ་ཨུད་ཏ་ར་གྲན་ཐ།

བོད་སྐད་དུ།

འདུལ་བ་གཞུང་བླ་མ།

བམ་པོ་དང་པོ།

ཐམས་ཅད་མཁྱེན་པ་ལ་ཕྱག་འཚལ་ལོ།

སྡོམ་ལ།

དུད་འགྲོ་གསུམ་དང་ལམ་གསུམ་དང་།

བུད་མེད་གཤེགས་དང་བཅད་པ་དང་།

འཛིན་པ་དང་ནི་བལྟབ་པ་དང་།

སོ་དང་མ་རེག་ཕག་མོ་ཡིན།

སངས་རྒྱས་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ།

དེ་ནས་ཚེ་དང་ལྡན་པ་ཉེ་བ་འཁོར་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས།

བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ།

ཕྱོགས་གཅིག་ཏུ་འདུག་ནས་ཚེ་དང་ལྡན་པ་ཉེ་བ་འཁོར་གྱིས་སངས་རྒྱས་བཅོམ་ལྡན་འདས་ལ་ཞུས་པ།

བཙུན་པ་བཅོམ་ལྡན་འདས་ཀྱིས་ཡང་དགེ་སློང་གང་དགེ་སློང་རྣམས་དང་ལྷན་ཅིག་བསླབ་པ་མཚུངས་པར་ཞུགས་པས་བསླབ་པ་མ་ཕུལ།

བསླབ་པ་ཉམས་པར་མ་བྱས་པར་མི་ཚངས་པར་སྤྱོད་པ་འཁྲིག་པ་ལས་བྱུང་བའི་ཆོས་བསྟེན་ན།

ཐ་ན་དུད་

འགྲོའི་སྐྱེ་གནས་སུ་གཏོགས་པ་དང་།

ལྷན་ཅིག་ཀྱང་རུང་སྟེ།

དགེ་སློང་དེ་ཡང་ཕམ་པར་གྱུར་པ་ཡིན་གྱིས་གནས་པར་མི་བྱའོ་ཞེས་གསུངས་པ་གང་ལགས་པ།

བཙུན་པ་རེ་ཞིག་དགེ་སློང་གིས་མིའི་བུད་མེད་གསང་སྔགས་དང་།

སྨན་དག་གིས་དུད་འགྲོའི་སྐྱེ་གནས་པར་བསྒྱུར་ཏེ།

དེ་དང་ལྷན་ཅིག་མི་ཚངས་པར་སྤྱོད་པ་འཁྲིག་པ་ལས་བྱུང་བའི་ཆོས་བསྟེན་ན་ཅིར་འགྱུར་ལགས།

མཐར་འགྱུར་རོ།

བཙུན་པ་རེ་ཞིག་དགེ་སློང་གིས་གསང་སྔགས་དང་།

སྨན་དག་གིས་བདག་ཉིད་དུད་འགྲོའི་སྐྱེ་གནས་པར་བསྒྱུར་ཏེ།

མིའི་བུད་མེད་དང་ལྷན་ཅིག་མི་ཚངས་པར་སྤྱོད་པ་འཁྲིག་པ་ལས་བྱུང་བའི་ཆོས་བསྟེན་ན་ཅིར་འགྱུར་ལགས།

གལ་ཏེ་འཁྲིག་པ་ལས་བྱུང་བ་དང་ལྡན་པ་བྱར་མི་རུང་བར་དགེ་སློང་དུ་འདུ་ཤེས་ཡོད་ལ།

དེ་ལ་ཡང་བྱེད་ན་མཐར་འགྱུར་རོ།

གལ་ཏེ་དགེ་སློང་དུ་འདུ་ཤེས་མེད་ན་ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གཉིས་ཤིག་གིས་མིའི་བུད་མེད་དང་།

བདག་ཉིད་གསང་སྔགས་དང་།

སྨན་དག་གིས་དུད་འགྲོའི་སྐྱེ་གནས་པར་བསྒྱུར་ཏེ་ལྷན་ཅིག་ཕན་ཚུན་མི་ཚངས་པར་སྤྱོད་པ་འཁྲིག་པ་ལས་བྱུང་བའི་ཆོས་བསྟེན་ན་ཅིར་འགྱུར་ལགས།

གལ་ཏེ་འཁྲིག་པ་ལས་བྱུང་བ་དང་ལྡན་པ་བྱར་མི་རུང་བར་དགེ་སློང་དུ་འདུ་ཤེས་ཡོད་ལ།

དེ་ཡང་བྱེད་ན་ནི་མཐར་འགྱུར་རོ།

གལ་ཏེ་དགེ་སློང་དུ་འདུ་ཤེས་མེད་ན་ཉེས་པ་སྦོམ་པོར་འགྱུར་རོ།

སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ།

བཙུན་པ་བཅོམ་ལྡན་འདས་ཀྱིས་བཅུག་མ་ཐག་ཏུ་མཐར་འགྱུར་རོ་ཞེས་གསུངས་པ་གང་ལགས་པ།

ཇི་ཙམ་གྱིས་ན་ཁའི་ལམ་དུ་བཅུག་པ་ཞེས་བགྱི།

ཉེ་བ་འཁོར་སོ་ལས་ནོར་བུ་འདའ་བར་བྱེད་པ་ཙམ་གྱིས་སོ།

ཇི་ཙམ་གྱིས་ན་བཤང་བའི་ལམ་དུ་བཅུག་པ་ཞེས་བགྱི།

ཇི་ཙམ་དུ་བུ་གའི་སྦུབས་ལས་ནོར་བུ་འདའ་བར་བྱེད་པ་

ཙམ་གྱིས་སོ།

ཇི་ཙམ་གྱིས་ན་གཅི་བའི་ལམ་དུ་བཅུག་པ་ཞེས་བགྱི།

པགས་པའི་རིམ་པ་ལས་ནོར་བུ་འདའ་བར་བྱེད་པ་ཙམ་གྱིས་སོ།

བཙུན་པ་བུད་མེད་ཕྱེད་ཚལ་དུ་གཤགས་པར་གྱུར་ལ།

འདིའི་རྨའི་སྒོ་གསུམ་ཡང་ཉམས་པར་གྱུར་པ།

དགེ་སློང་གིས་ཚལ་པ་དང་ཚལ་པ་སྦྱར་ནས་མི་ཚངས་པར་སྤྱོད་པ་འཁྲིག་པ་ལས་བྱུང་བའི་ཆོས་སྤྱད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་བུད་མེད་རྐེད་པར་བཅད་པར་གྱུར་ལ།

འདིའི་རྨའི་སྒོ་གསུམ་ལས་རྨའི་སྒོ་གང་ཡང་རུང་བ་ཞིག་མ་ཉམས་པར་གྱུར་པ་དེ་ལ་ཡང་དགེ་སློང་གིས་མི་ཚངས་པར་སྤྱོད་པ་འཁྲིག་པ་ལས་བྱུང་བའི་ཆོས་བསྟེན་ན་ཅིར་འགྱུར་ལགས།

མཐར་འགྱུར་རོ།

བཙུན་པ་རེ་ཞིག་དགེ་སློང་གིས་བུད་མེད་མགོ་བཅད་པ་དང་ལྷན་ཅིག་མི་ཚངས་པར་སྤྱོད་པ་འཁྲིག་པ་ལས་བྱུང་བའི་ཆོས་བསྟེན་ན་ཅིར་འགྱུར་ལགས།

གལ་ཏེ་བཤང་བའི་ལམ་མམ།

གཅི་བའི་ལམ་དུ་བསྟེན་ན་མཐར་འགྱུར་རོ།

ཇི་སྟེ་ཁའི་ལམ་མམ།

སྦུབས་སམ།

ཕྲག་པའི་གསབ་གསེབ་ཏུ་སོ་སོར་བསྟེན་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་བཅོམ་ལྡན་འདས་ཀྱིས་མི་མ་ཡིན་པ་མོ་དང་ལྷན་ཅིག་མི་ཚངས་པར་སྤྱོད་པ་འཁྲིག་པ་ལས་བྱུང་བའི་ཆོས་བསྟེན་ན་མཐར་འགྱུར་རོ་ཞེས་གསུངས་པ་གང་ལགས་པ་མི་མ་ལགས་པ་མོ་ཇི་ལྟ་བུ་ཞིག་ལགས།

ཡན་ལག་ཐམས་ཅད་ཀྱིས་ཀྱང་གཟུང་དུ་ཆོག་པ་གང་ཡིན་པ་སྟེ།

དེ་བཞིན་དུ་དུད་འགྲོའི་སྐྱེ་གནས་སུ་གཏོགས་པ་རྣམས་ལ་ཡང་བརྗོད་པར་བྱའོ།

བཙུན་པ་རེ་ཞིག་དགེ་སློང་གིས་སོའི་ཕྱི་རོལ་མཆུའི་ནང་དུ་མི་ཚངས་པར་སྤྱོད་པ་འཁྲིག་པ་ལས་བྱུང་བའི་ཆོས་བསྟེན་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་བཤང་བའི་ལམ་མམ།

གཅི་བའི་ལམ་མམ།

ཁའི་ལམ་གང་ཡང་རུང་བར་མ་རེག་པར་བཅུག་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་ཕག་མོའི་རོ་བསྲེགས་པ་སྤུ་མ་མཆིས་པ་ལ་མི་ཚངས་པར་སྤྱོད་པ་འཁྲིག་པ་ལས་བྱུང་བའི་ཆོས་བསྟེན་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་ཏེ།

དེ་བཞིན་དུ་དུད་འགྲོའི་སྐྱེ་གནས་སུ་གཏོགས་པ་ཐམས་ཅད་ལ་ཡང་བརྗོད་པར་བྱའོ།།

སྡོམ་ལ།

གཞན་གྱི་ཡན་ལག་སྐྱེས་དང་ནི།

སྤྱིལ་ཁང་གཉིས་དང་མཚན་གཉིས་

དང་།

ཉམས་པ་གཉིས་དང་བར་ཆད་བཅས།

དྲུག་ཚན་དང་ནི་བཞི་ཚན་ནོ།

བཙུན་པ་རེ་ཞིག་དགེ་སློང་གིས་གཞན་གྱི་ཡན་ལག་སྐྱེས་སུ་འཛུད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གཅིག་བུ་སྤྱིལ་བུར་ཞུགས་པ་ལ་མི་ཚངས་པར་སྤྱོད་པའི་རྐྱེན་གྱིས་མཐར་འགྱུར་བ་ལྟ་མཆིས་ལགས་སམ།

ཉེ་བ་འཁོར་འགྱུར་བ་ཡོད་དེ།

དཔེར་ན་ནར་བ་པོ་དང་།

རྒྱབ་གཉེན་ལྟ་བུའོ།

བཙུན་པ་རེ་ཞིག་དགེ་སློང་སྦྲང་ཁང་དུ་ཞུགས་པ་དེའི་སླད་རོལ་ན་བུད་མེད་ཅིག་མཆིས་པར་གྱུར་པ་ལ།

དེས་ནང་ནས་ལོག་པར་སྤྱད་ན་ཅིར་འགྱུར་ལགས།

མཐར་འགྱུར་རོ།

བཙུན་པ་རེ་ཞིག་དགེ་སློང་མི་ཚངས་པར་སྤྱོད་པ་ལ་ཞུགས་པ་དེའི་མཚན་གྱུར་ཏེ།

དགེ་སློང་མར་རེད་ནས་མི་ཚངས་པར་སྤྱོད་པ་བགྱིད་ན་ཅིར་འགྱུར་ལགས།

མཐར་འགྱུར་རོ།

བཙུན་པ་རེ་ཞིག་དགེ་སློང་མ་མི་ཚངས་པར་སྤྱོད་པ་ལ་ཞུགས་པ་དེའི་མཚན་གྱུར་ཏེ།

དགེ་སློང་དུ་རེད་ནས་མི་ཚངས་པར་སྤྱོད་པ་བགྱིད་ན་ཅིར་འགྱུར་ལགས།

མཐར་འགྱུར་རོ།

བཙུན་པ་བཅོམ་ལྡན་འདས་ཀྱིས་མིའི་བུད་མེད་གསོན་པོར་ཉམས་པ་ཞེས་གསུངས་པ་གང་ལགས།

ཇི་ཙམ་གྱིས་ན་མིའི་བུད་མེད་གསོན་པོར་ཉམས་པ་ཞེས་བགྱི།

ཉེ་བ་འཁོར་ཇི་ཙམ་དུ་ཅུང་ཟད་ཟིན་པའམ།

ཟིན་པའམ།

སྐྲངས་པའམ།

རུལ་བའམ།

མྱགས་པའམ།

སྲོག་ཆགས་དག་གིས་ཟོས་པར་གྱུར་པ་དེ་ཙམ་གྱིས་ན་མིའི་བུད་མེད་གསོན་པོར་ཉམས་པར་ཞེས་བརྗོད་དོ།

ཇི་ཙམ་གྱིས་ན་མིའི་བུད་མེད་གསོན་པོར་མ་ཉམས་པ་ཞེས་བགྱི།

ཉེ་བ་འཁོར་ཇི་ཙམ་དུ་ངོས་གཉིས་མཉམ་ཞིང་མཉམས་པ་སྟེ།

དེ་བཞིན་དུ་ཤི་བ་དང་མི་མ་ཡིན་པ་མོ་དང་།

དུད་འགྲོའི་སྐྱེ་གནས་སུ་གཏོགས་པ་དང་།

སྐྱེས་པ་དང་།

མ་ནིང་དང་།

མ་ནིང་མོ་རྣམས་ལ་ཡང་བརྗོད་པར་བྱའོ།

བཙུན་པ་བཅོམ་ལྡན་འདས་ཀྱིས་བར་ཆད་དང་བཅས་པར་བཅུག་ན་མཐར་འགྱུར་རོ་ཞེས་གསུངས་པ་གང་ལགས་པ།

བཙུན་པ་རེ་ཞིག་དགེ་སློང་གིས་གོས་རྔམས་སྟུག་པོའམ།

ཕྱིང་པས་དཀྲིས་ཏེ་བཅུག་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

གལ་ཏེ་སེང་རས་སམ།

དར་ལའམ།

གོས་སྲབ་མོས་དཀྲིས་ཏེ་བཅུག་ན་ཅིར་འགྱུར་ལགས།

མཐར་འགྱུར་རོ།

བཙུན་པ་རེ་ཞིག་དགེ་སློང་གིས་ལམ་ལ་ལམ་དུ་འདུ་ཤེས་ཏེ་བཅུག་ན་ཅིར་འགྱུར་ལགས།

མཐར་འགྱུར་

རོ།

ལམ་ལ་ལམ་མ་ལགས་པར་འདུ་ཤེས་ཏེ་བཅུག་ན་ཅིར་འགྱུར་ལགས།

མཐར་འགྱུར་རོ།

ལམ་ལ་ཐེ་ཚོམ་འཚལ་ཏེ་བཅུག་ན་ཅིར་འགྱུར་ལགས།

མཐར་འགྱུར་རོ།

ལམ་མ་ལགས་པ་ལ་ལམ་མ་ལགས་པར་འདུ་ཤེས་ཏེ་བཅུག་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

ལམ་མ་ལགས་པ་ལམ་དུ་འདུ་ཤེས་ཏེ་བཅུག་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

ལམ་མ་ལགས་པ་ལ་ཐེ་ཚོམ་འཚལ་ཏེ་བཅུག་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་བར་ཆད་དང་བཅས་པ་ལ་བར་ཆད་དང་བཅས་པར་འདུ་ཤེས་ཏེ་བཅུག་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བར་ཆད་དང་བཅས་པ་ལ་བར་ཆད་མ་མཆིས་པར་འདུ་ཤེས་ཏེ་བཅུག་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བར་ཆད་མ་མཆིས་པ་ལ་བར་ཆད་དང་བཅས་པར་འདུ་ཤེས་ཏེ་བཅུག་ན་ཅིར་འགྱུར་ལགས།

མཐར་འགྱུར་རོ།

བར་ཆད་མ་མཆིས་པ་ལ་བར་ཆད་མ་མཆིས་པར་འདུ་ཤེས་ཏེ་བཅུག་ན་ཅིར་འགྱུར་ལགས།

མཐར་འགྱུར་རོ།

བཙུན་པ་དགེ་སློང་གིས་མིའི་བུད་མེད་དང་ལྷན་ཅིག་མི་ཚངས་པར་སྤྱད་ན་མཐར་མི་འགྱུར་བ་ལྟ་མཆིས་སམ།

ཡོད་དེ་སྔར་ལྟུང་བ་བྱུང་བ་དང་།

རྐུ་ཐབས་སུ་གནས་པ་དང་།

དང་པོ་མི་མཐུན་པ་ཅན་དང་།

མ་ནིང་དང་།

དགེ་སློང་མ་སུན་ཕྱུང་བས་མི་ཚངས་པར་སྤྱད་ན་ཉེས་བྱས་སུ་འགྱུར་རོ།

ཇི་ལྟར་དགེ་སློང་ལ་མི་ཚངས་པར་སྤྱད་པའི་རྐྱེན་གྱིས་མཐར་འགྱུར་བ་དེ་བཞིན་དུ་བསླབ་པ་བྱིན་པ་དང་།

དགེ་སློང་མ་ལ་ཡང་མཐར་འགྱུར་རོ།

དགེ་སློབ་མ་དང་།

དགེ་ཚུལ་དང་།

དགེ་ཚུལ་མ་ལ་ནི་ཉེས་བྱས་སོ།།

སྡོམ་ལ།

བརྒྱད་བཅུའི་ཚོགས་དང་རྒྱན་རྡོ་དང་།

རིན་ཐང་མ་བརྩིས་མཚན་དང་ནི།

བསྙེན་པར་རྫོགས་པ་བདུན་ཚན་བྱས།

ཤོ་གམ་ལ་ནི་བཅུ་གཉིས་སོ།

སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ།

བཙུན་པ་བཅོམ་ལྡན་འདས་ཀྱིས་ཡང་དགེ་སློང་གང་གཞན་དག་གི་གྲོང་ན་འདུག་པའམ།

དགོན་པ་ན་འདུག་པ་མ་བྱིན་པ་རྐུ་བའི་གྲངས་སུ་གཏོགས་པ་བླངས་ན།

ཇི་ཙམ་མ་བྱིན་པར་བླངས་པས་དེ་རྒྱལ་པོའམ།

བློན་པོ་ཆེན་པོས་བཟུང་ནས།

དེ་ལ་འདི་སྐད་ཅེས་ཨེ་མ་ཀྱེ་ཁྱོད་ནི་རྐུན་མའོ།

བྱིས་པའོ།

བླུན་

པོའོ།

རྐུན་པོའོ་ཞེས་ཟེར་ཞིང་གསོད་དམ།

འཆིང་ངམ།

སྤྱུགས་ཀྱང་རུང་སྟེ།

དགེ་སློང་མ་བྱིན་པ་དེ་ལྟ་བུར་ལེན་པ་དེ་ཡང་ཕམ་པར་གྱུར་པ་ཡིན་གྱིས་གནས་པར་མི་བྱའོ་ཞེས་གསུངས་པ་གང་ལགས་པ།

བཙུན་པ་དགེ་སློང་གིས་བརྒྱད་བཅུ་པའི་ཚོགས་གཉིས་ཀར་བདག་ཉིད་གཏོགས་པར་བགྲངས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་བའི་ཉེས་བྱས་སུ་འགྱུར་རོ།

དེའི་སྐལ་པ་ཆོས་དང་མཐུན་པ་གང་ལས་ལགས།

དང་པོ་ལས་སོ།

གལ་ཏེ་བླངས་ནས་བསྙོན་ན་ཅིར་འགྱུར་ལགས།

ཤེས་བཞིན་དུ་བརྫུན་སྨྲས་པས་ལྟུང་བྱེད་དུ་འགྱུར་རོ།

གང་གི་ཚེ་གྲུབ་པ་དེའི་ཚེ་ནི་རིན་ཐང་བརྩི་བར་བྱའོ།

བཙུན་པ་རེ་ཞིག་མི་རྣམས་ཀྱིས་རྒྱན་རྡོ་བཀོད་པར་གྱུར་ལ།

དེ་ནས་དགེ་སློང་གིས་བརྐུ་སེམས་ཀྱིས་རྒྱན་རྡོ་རིན་ཆེན་པོ་ཞིག་རྔམས་ཆུང་ངུའི་གནས་ནས་གནས་གཞན་དུ་སྦེད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

གལ་ཏེ་བརྐུ་སེམས་ཀྱིས་རྒྱན་རྡོ་རིན་ཆུང་ངུ་ཞིག་རྔམས་ཆེན་པོའི་གནས་ནས་གཞན་དུ་སྦེད་ན་ཅིར་འགྱུར་ལགས།

མཐར་འགྱུར་རོ།

བཙུན་པ་དགེ་སློང་གིས་རིན་ཐང་མ་མཆིས་པའི་དངོས་པོ་ཞིག་བརྐུས་ན་ཅིར་འགྱུར་ལགས།

མཐར་འགྱུར་རོ།

རིན་ཐང་མེད་པའི་དངོས་པོ་གང་ཞེ་ན་གང་ཞིག་རིན་ཆེ་ཆེས་པ་ཉིད་ཀྱིས་རིན་ཐང་གདབ་པར་མི་ནུས་པའོ།

གང་ཞིག་ཆུང་ཆེས་པ་ཉིད་ཀྱིས་རིན་ཐང་གདབ་པའི་རིན་མི་ཆོག་པ་དེ་ཡང་རིན་ཐང་མེད་པ་ཡིན་ནོ།

དེ་བརྐུས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་དངོས་པོ་ཞིག་རིན་མ་བརྩིས་པར་བརྐུས་ན་ཅིར་འགྱུར་ལགས།

གལ་ཏེ་དངོས་པོ་ཡོངས་སུ་ཚང་ན་མཐར་འགྱུར་རོ།

ཇི་སྟེ་མ་ཚང་ན་ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་བརྐུ་བར་སྦྱོར་བ་བགྱིས་པ་ལས་དེའི་མཚན་གྱུར་ཏེ་དགེ་སློང་མར་རེད་ནས་བརྐུས་ན་ཅིར་འགྱུར་ལགས།

མཐར་འགྱུར་རོ།

བཙུན་པ་རེ་ཞིག་དགེ་སློང་མས་བརྐུ་བར་སྦྱོར་བ་བགྱིས་པ་ལས་དེའི་མཚན་གྱུར་ཏེ།

དགེ་སློང་དུ་རེད་ནས་བརྐུས་ན་ཅིར་འགྱུར་ལགས།

མཐར་འགྱུར་རོ།

བཙུན་པ་རེ་ཞིག་བསྙེན་པར་མ་རྫོགས་པས་བརྐུ་བར་སྦྱོར་བ་བགྱིས་ལ།

བསྙེན་པར་མ་རྫོགས་པར་བརྐུས་ན་ཅིར་འགྱུར་ལགས།

ཉེས་བྱས་སོ།

བསྙེན་པར་མ་རྫོགས་པར་བརྐུ་བར་སྦྱོར་བ་བགྱིས་ལ།

བསྙེན་པར་རྫོགས་ཀར་བརྐུས་ན་ཅིར་འགྱུར་

ལགས།

ཉེས་བྱས་སོ།

བསྙེན་པར་མ་རྫོགས་པས་བརྐུ་བར་སྦྱོར་བ་བགྱིས་ལ།

བསྙེན་པར་རྫོགས་ཏེ་བརྐུས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བསྙེན་པར་རྫོགས་ཀར་བརྐུ་བར་སྦྱོར་བ་བགྱིས་ལ།

བསྙེན་པར་རྫོགས་ཀར་བརྐུས་ན་ཅིར་འགྱུར་ལགས།

ཉེས་བྱས་སོ།

བསྙེན་པར་རྫོགས་ཀར་བརྐུ་བར་སྦྱོར་བ་བགྱིས་ལ།

བསྙེན་པར་རྫོགས་ཏེ་བརྐུས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བསྙེན་པར་རྫོགས་ཏེ་བརྐུ་བར་སྦྱོར་བ་བགྱིས་ལ།

བསྙེན་པར་རྫོགས་ཏེ་བརྐུས་ན་ཅིར་འགྱུར་ལགས།

མཐར་འགྱུར་རོ།

བསྙེན་པར་རྫོགས་ཏེ་བརྐུ་བར་སྦྱོར་བ་བགྱིས་ལ།

བསྙེན་པར་མ་རྫོགས་པར་བརྐུས་ན་ཅིར་འགྱུར་ལགས།

ཉེས་བྱས་སོ།

བཙུན་པ་རེ་ཞིག་དགེ་སློང་གིས་ཤོ་གམ་ནམ་མཁའ་ལས་བཟླས་ན་ཅིར་འགྱུར་ལགས།

དངོས་པོ་ཇི་ལྟ་བ་བཞིན་ནོ།

ཇི་སྟེ་རྫུ་འཕྲུལ་གྱིས་བཟླས་ན་ཉེས་པ་མེད་དོ།

བཙུན་པ་རེ་ཞིག་དགེ་སློང་གིས་ཤུལ་མ་ལགས་པ་ནས་ཤོ་གམ་བཟླས་ན་ཅིར་འགྱུར་ལགས།

གལ་ཏེ་དེ་རྣམས་ཀྱིས་ལས་འདས་ན་མཐར་འགྱུར་རོ།

ས་ལས་མ་འདས་ན་ནི་ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་ཤོ་གམ་མ་བཅད་པའི་རྫས་ཀྱི་དངོས་པོ་གཡར་དུ་སྩལ་ཏེ་བཟླས་ན་ཅིར་འགྱུར་ལགས།

མཐར་འགྱུར་རོ།

ཚེམ་བུའི་གསེབ་ཏུ་སྩལ་ཏེ་བཟླས་ན་ཅིར་འགྱུར་ལགས།

མཐར་འགྱུར་རོ།

བཙུན་པ་རེ་ཞིག་དགེ་སློང་གིས་ཚོང་པ་རྣམས་ལ་འདི་སྐད་དུ་ཚུར་ཤོག་འདོང་ཞེས་སྨྲས་ན་ཅིར་འགྱུར་ལགས།

ཉེས་བྱས་སོ།

བཙུན་པ་རེ་ཞིག་དགེ་སློང་གིས་ཚོང་པ་རྣམས་ལ་ཐབས་ཀྱིས་སྨྲས་ན་ཅིར་འགྱུར་ལགས།

ཉེས་བྱས་སོ།

བཙུན་པ་རེ་ཞིག་ཚོང་པ་རྣམས་ཀྱི་ཤོ་གམ་དུ་གཏོགས་པའི་རྫས་ཤོ་གམ་གྱི་སར་མ་ཕྱིན་པར་ཚོང་པས་དགེ་སློང་ལ་འདི་སྐད་ཅེས་འཕགས་པའི་ཤོ་གམ་གྱི་གནས་ནས་ཟློས་ལ་སྩོལ་ཅེས་བགྱིས་པ་ལས་དེ་དགེ་སློང་གིས་བཟླས་ན་ཅིར་འགྱུར་ལགས།

ཉེས་བྱས་སོ།

བཙུན་པ་རེ་ཞིག་ཚོང་པ་རྣམས་ཀྱི་ཤོ་གམ་གྱི་རྫས་རྣམས་ལ་ཤོ་གམ་གྱི་གནས་སུ་མ་ཕྱིན་པར་ཚོང་པས་དགེ་སློང་ལ་འདི་སྐད་ཅེས་འཕགས་པས་ཤོ་གམ་གྱི་གནས་ནས་ཟློས་ལ་སྩོལ་ཅིག །

དེར་ཤོ་གམ་ཅི་མཆིས་པ་དེའི་ཕྱེད་ཁྱོད་ལ་འབུལ་ལོ་ཞེས་བགྱིས་པ་ལས།

དེ་དགེ་སློང་གིས་བཟླས་ན་ཅིར་འགྱུར་ལགས།

ཉེས་པ་སྦོམ་པོར་

འགྱུར་རོ།

བཙུན་པ་རེ་ཞིག་ཚོང་པ་རྣམས་ཀྱི་ཤོ་གམ་དུ་གཏོགས་པའི་རྫས་ཤོ་གམ་གྱི་གནས་སུ་མ་ཕྱིན་པར་ཚོང་པས་དགེ་སློང་ལ་འདི་སྐད་ཅེས་འཕགས་པས་ཤོ་གམ་གྱི་གནས་ལས་ཟློས་ལ་སྩོལ་ཅིག་དང་།

དེར་ཤོ་གམ་ཅི་མཆིས་པ་ཁྱོད་ལ་འབུལ་ལོ་ཞེས་བགྱིས་པ་ལས་དེ་དགེ་སློང་གིས་བཟླས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་ཚོང་པ་རྣམས་ཀྱི་ཤོ་གམ་གྱི་རྫས་ཤོ་གམ་གྱི་གནས་སུ་མ་ཕྱིན་པར་དགེ་སློང་གིས་ལམ་གཞན་ཞིག་བསྟན་ན་ཅིར་འགྱུར་ལགས།

ཉེས་བྱས་སོ།

བཙུན་པ་རེ་ཞིག་ཚོང་པ་རྣམས་ཀྱི་ཤོ་གམ་དུ་གཏོགས་པའི་རྫས་ཤོ་གམ་གྱི་གནས་སུ་ཕྱིན་པ་ལས་ཚོང་པས་དགེ་སློང་ལ་འདི་སྐད་ཅེས་འཕགས་པས་ཤོ་གམ་གྱི་གནས་ལ་ཟློས་ལ་སྩོལ་ཅིག་ཅེས་བགྱིས་པ་ལས་དེ་དག་དགེ་སློང་གིས་བཟླས་ན་ཅིར་འགྱུར་ལགས།

ཤོ་གམ་གྱི་རིན་ཐང་བརྩི་བར་བྱའོ།

བཙུན་པ་རེ་ཞིག་ཚོང་པ་རྣམས་ཀྱི་ཤོ་གམ་དུ་གཏོགས་པའི་རྫས་ཤོ་གམ་གྱི་གནས་སུ་ཕྱིན་པ་ལས།

ཚོང་པས་དགེ་སློང་ལ་འདི་སྐད་ཅེས་འཕགས་པས་ཤོ་གམ་གྱི་གནས་ལས་ཟློས་ལ་སྩོལ་ཅིག་དང་།

ཤོ་གམ་ཅི་མཆིས་པ་དེའི་ཕྱེད་ཁྱོད་ལ་འབུལ་ལོ་ཞེས་བགྱིས་པ་ལས་དེ་དགེ་སློང་གིས་བཟླས་ན་ཅིར་འགྱུར་ལགས།

ཤོ་གམ་གྱི་རིན་ཐང་བརྩི་བར་བྱའོ།

བཙུན་པ་རེ་ཞིག་ཚོང་པ་རྣམས་ཀྱི་ཤོ་གམ་དུ་གཏོགས་པའི་རྫས་ཤོ་གམ་གྱི་གནས་སུ་ཕྱིན་པ་ལས་ཚོང་པས་དགེ་སློང་ལ་འདི་སྐད་ཅེས་འཕགས་པས་ཤོ་གམ་གྱི་གནས་ལས་ཟློས་ལ་སྩོལ་ཅིག་དང་།

ཤོ་གམ་ཅི་མཆིས་པ་རིལ་གྱིས་ཁྱོད་ལ་འབུལ་ལོ་ཞེས་བགྱིས་པ་ལས་དགེ་སློང་གིས་བཟླས་ན་ཅིར་འགྱུར་ལགས།

ཤོ་གམ་གྱི་རིན་ཐང་བརྩི་བར་བྱའོ།།

སྡོམ་ལ།

ཆོས་གོས་གདང་ལ་བཞི་དག་དང་།

རྐུ་དང་ན་ན་ཀ་གསུམ་དང་།

སྦྱོར་བ་གསུམ་དང་ཡིད་གཉིས་དང་།

གླིང་རྣམས་གཞན་ཕྱིར་མི་མ་ཡིན།

བཙུན་པ་རེ་ཞིག་དགེ་སློང་གིས་བརྐུ་སེམས་ཀྱིས་ཆོས་གོས་ཀྱི་གདང་གི་ཡ་ཐོག་འགུམས་ཤིང་།

རང་གི་བའི་འདུ་ཤེས་ཀྱིས་མ་ཐོག་བཀུམ་ན་ཅིར་འགྱུར་ལགས།

སྔ་མ་ལ་ཉེས་པ་སྦོམ་པོར་འགྱུར་རོ།

ཕྱི་མ་ལ་ལྟུང་བ་མེད་དོ།

བཙུན་པ་རེ་ཞིག་དགེ་སློང་གིས་རང་གི་བའི་འདུ་ཤེས་ཀྱིས་ཆོས་གོས་ཀྱི་གདང་གི་ཡ་ཐོག་འགུམས་ཤིང་།

བརྐུ་སེམས་ཀྱིས་མ་ཐོག་འགུམས་ན་ཅིར་འགྱུར་ལགས།

ཕྱི་

མ་ལ་ཉེས་པ་སྦོམ་པོར་འགྱུར་རོ།

དང་པོ་ལ་ནི་ལྟུང་བ་མེད་དོ།

བཙུན་པ་རེ་ཞིག་དགེ་སློང་གིས་ཆོས་གོས་ཀྱི་གདང་དང་བཅས་པ་བརྐུ་སེམས་ཀྱིས་རྐུ་བ་ན་ཆོས་གོས་ཀྱི་གདང་དེ་ལ་ཆོས་གོས་དག་གཟར་བཞིན་དུ་དེས་ཆོས་གོས་ཀྱི་གདང་བཅས་ཏེ་འཚལ་ན་ཅིར་འགྱུར་ལགས།

ཆོས་གོས་ཀྱི་གདང་གི་རིན་ཐང་བརྩི་བར་བྱའོ།

བཙུན་པ་རེ་ཞིག་ཆོས་གོས་ཀྱི་གདང་ལ་ཆོས་གོས་དག་གཟར་ཏེ་མཆིས་པ་ལས་དེ་དག་དགེ་སློང་བཞིའམ།

དེ་བས་མང་བ་ཞིག་གིས་བརྐུས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

གལ་ཏེ་སོ་སོར་བགོས་པ་ལས་དེ་རེ་རེས་མ་ཤ་ཀ་ལྔ་ཐོབ་ན་ནི་མཐར་འགྱུར་རོ།

བཙུན་པ་རྐུ་བ་ལ་དུ་ཞིག་མཆིས་ལགས།

ཉེ་བ་འཁོར་དྲུག་ཡོད་དེ།

མི་སྟེར་བར་རྐུ་བ་དང་།

མཐུས་རྐུ་བ་དང་།

ཕྱིར་སྦྱིན་པ་རྐུ་བ་དང་།

གཏམས་པ་རྐུ་བ་དང་།

ཡོངས་སུ་བརྟགས་པ་རྐུ་བ་དང་།

ཆོས་རྐུ་བའོ།

བཙུན་པ་བཅོམ་ལྡན་འདས་ཀྱིས་རྐུ་བ་དྲུག་ཏུ་གསུངས་པ་གང་དག་ལགས་པ་འདི་དག་ལས་གང་གིས་མཐར་འགྱུར་ལགས།

ཉེ་བ་འཁོར་ཆོས་རྐུ་བ་མ་གཏོགས་པ་ལྷག་མ་རྣམས་ཀྱིས་མཐར་འགྱུར་རོ།

བཙུན་པ་བཅོམ་ལྡན་འདས་ཀྱིས་མ་ཤ་ཀ་ལྔ་བརྐུས་ན་མཐར་འགྱུར་རོ་ཞེས་གསུངས་པ་གང་ལགས་པ།

བཙུན་པ་གལ་ཏེ་དགེ་སློང་གིས་མ་ཤ་ཀ་གསུམ་བརྐུས་ན་མཐར་འགྱུར་བ་ལྟ་མཆིས་ལགས་སམ།

ཡོད་དེ་ཉེ་བ་འཁོར་གལ་ཏེ་མ་ཤ་ཀ་གསུམ་གྱིས་ཀཱར་ཥཱ་པ་ཎ་ཁུགས་པར་འགྱུར་ནའོ།

བཙུན་པ་གལ་ཏེ་དགེ་སློང་གིས་མ་ཤ་ཀ་ལྔ་བརྐུས་ཀྱང་མཐར་མི་འགྱུར་བ་ལྟ་མཆིས་ལགས་སམ།

ཡོད་དེ་གལ་ཏེ་མ་ཤ་ཀ་བཅུའམ་མ་ཤ་ཀ་བཅུ་ལས་ལྷག་པར་ཀཱར་ཥཱ་པ་ཎ་ཁུགས་ནའོ།

བཙུན་པ་བཅོམ་ལྡན་འདས་ཀྱིས་མ་ཤ་ཀ་ལྔ་བརྐུས་པས་མཐར་འགྱུར་རོ།

ཞེས་གསུངས་པ་གང་ལགས་པ།

ན་ན་ཀ་ཇི་ལྟ་བུའི་མ་ཤ་ཀ་ལྔ་བརྐུས་ན་མཐར་འགྱུར་ལགས།

མ་ཤ་ཀ་ཉི་ཤུས་ན་ན་ཀ་ཁུགས་པའིའོ།

མ་ཤ་ཀ་ཇི་ལྟ་བུ་ལགས།

ཀ་ཀ་ནི་བཞི་ཁུགས་པས་སོ།

ཀཱར་ཥཱ་པ་ཎ་ཇི་ལྟ་བུ་ལགས།

རྒྱལ་པོ་རྨ་བྱ་བས་བྱས་པའོ།

བཙུན་པ་བཅོམ་ལྡན་འདས་ཀྱིས་མ་ཤ་ཀ་ལྔ་བརྐུས་ན་མཐར་འགྱུར་རོ་ཞེས་གསུངས་པ་གང་ལགས་པ་བཙུན་པ་གལ་ཏེ་དགེ་སློང་གིས་ཀཱར་ཥཱ་པ་ཎ་སྟོང་བརྐུས་ཀྱང་མཐར་མི་འགྱུར་བ་ལྟ་མཆིས་ལགས་སམ།

ཡོད་དེ་གལ་ཏེ་བོར་བར་འདུ་ཤེས་ཏེ་བརྐུས་ནའོ།

བཙུན་པ་བཅོམ་ལྡན་འདས་ཀྱིས་མ་ཤ་ཀ་ལྔ་བརྐུས་ན་མཐར་འགྱུར་རོ་ཞེས་གསུངས་པ་གང་ལགས་པ།

གལ་ཏེ་བཙུན་པ་དགེ་སློང་གིས་མ་ཤ་ཀ་ལྔ་བརྐུས་ཀྱང་མཐར་མི་འགྱུར་བ་ལྟ་མཆིས་སམ།

ཡོད་དེ་གལ་ཏེ་རེ་རེ་ནས་སམ།

གཉིས་གཉིས་ནས་སམ།

གསུམ་གསུམ་ནས་སམ།

བཞི་བཞི་ནས་རྐུའི་ནམ་ཡང་ལྔ་མ་ཡིན་ནའོ།

བཙུན་པ་རེ་ཞིག་དགེ་སློང་གིས་ཡོ་བྱད་ཆེན་པོ་ཞིག་བདག་གི་བའི་འདུ་ཤེས་ཀྱིས་བླངས་ལ་བརྐུ་སེམས་ཀྱིས་སྦེད་ན་ཅིར་འགྱུར་ལགས།

མཐར་འགྱུར་རོ།

གལ་ཏེ་བཙུན་པ་བརྐུ་སེམས་ཀྱིས་བླངས་ན།

བདག་གི་བའི་འདུ་ཤེས་ཀྱིས་སྦེད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་ཅི་འདི་དེའི་ཡིན་ནམ།

འདི་དེའི་མ་ཡིན།

དེ་འདི་ཡིན་ནམ་དེ་འདི་མ་ཡིན་སྙམ་དུ་སོམ་ཉི་དང་།

ཐེ་ཚོམ་འཚལ་བཞིན་དུ་དེ་ཡང་བརྐུས་ན་ཅིར་འགྱུར་ལགས།

མཐར་འགྱུར་རོ།

བཙུན་པ་རེ་ཞིག་དགེ་སློང་གིས་ནུབ་ཀྱི་བ་ལང་སྤྱོད་ཀྱི་གླིང་དུ་མ་སྩོལ་བར་བརྐུས་ན་ཅིར་འགྱུར་ལགས།

གལ་ཏེ་དེ་དག་གི་ལྟར་བརྩིས་ཏེ་མ་ཤ་ཀ་ལྔ་བརྐུས་ན་མཐར་འགྱུར་རོ།

བཙུན་པ་ཤར་གྱི་ལུས་འཕགས་གླིང་དུ་མ་སྩལ་བར་བརྐུས་ན་ཅིར་འགྱུར་ལགས།

གལ་ཏེ་དེ་དག་གི་ལྟར་བརྩིས་ཏེ་མ་ཤ་ཀ་ལྔ་བརྐུས་ན་མཐར་འགྱུར་རོ།

བཙུན་པ་བྱང་གི་སྒྲ་མི་སྙན་གྱི་གླིང་དུ་མ་སྩལ་བར་བརྐུས་ན་ཅིར་འགྱུར་ལགས།

ཉེ་བ་འཁོར་དེ་ན་ནི་མ་བྱིན་པར་ལེན་པ་མེད་དེ།

གལ་ཏེ་བརྐུ་སེམས་བསྐྱེད་ན་ནི་ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་མ་སྨྲས་པར་གཞན་གྱི་དོན་དུ་བརྐུས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་མིའི་མ་ལགས་པ་ལ་མིའི་ལགས་པར་འདུ་ཤེས་ཏེ།

མ་སྩལ་བར་བརྐུས་ན་ཅིར་འགྱུར་ལགས།

ཉེས་བྱས་སོ།

མིའི་མ་ལགས་པ་ལ་མིའི་འདུ་ཤེས་ཏེ་མ་སྩལ་བར་བརྐུས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མིའི་ལ་མིའི་མ་ལགས་པར་འདུ་ཤེས་ཏེ་མ་སྩལ་ལགས་པར་བརྐུས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མིའི་ལ་མིའི་འདུ་ཤེས་ཏེ་མ་སྩལ་བར་བརྐུས་ན་ཅིར་འགྱུར་ལགས།

མཐར་འགྱུར་རོ།།

སྡོམ་ལ།

མཆོད་རྟེན་སྐུ་གདུང་གླེགས་བམ་དང་།

དགེ་འདུན་མང་སྔོས་བརྒྱུད་པ་དང་།

འདུ་ཤེས་གཉིས་དང་དེ་བཞིན་གནས།

མི་དབང་ཁྱིམ་ནི་ཐ་མ་

ཡིན།

བཙུན་པ་རེ་ཞིག་དགེ་སློང་གིས་མཆོད་རྟེན་དང་མཆོད་རྟེན་གྱི་གནས་ལས་རྒྱན་བརྐུས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་སྟོན་པའི་སྐུ་གདུང་དག་བརྐུས་ན་ཅིར་འགྱུར་ལགས།

མཐར་འགྱུར་རོ།

ཇི་སྟེ་འདི་ནི་བདག་གི་སྟོན་པ་སྟེ་བདག་གིས་ཀྱང་འདི་ལ་བཀུར་སྟི་བྱའོ་སྙམ་ནས་མཆོད་པའི་ཕྱིར་བརྐུས་ན་ཉེས་བྱས་སུ་འགྱུར་རོ།

བཙུན་པ་རེ་ཞིག་དགེ་སློང་གིས་གླེགས་བམ་བརྐུས་ན་ཅིར་འགྱུར་ལགས།

གླེགས་བམ་གྱི་རིན་ཐང་བརྩི་བར་བྱའོ།

བཙུན་པ་རེ་ཞིག་དགེ་སློང་གིས་ཕྱོགས་བཞིའི་དགེ་འདུན་གྱི་མ་སྩལ་བར་བརྐུས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་གང་ཟག་མང་པོའི་མ་སྩལ་བར་བརྐུས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

གལ་ཏེ་རྒྱུད་རེ་རེ་ལས་མ་ཤ་ཀ་ལྔ་བྱུང་ན་མཐར་འགྱུར་རོ།

བཙུན་པ་རེ་ཞིག་དགེ་སློང་གིས་ཡོངས་སུ་བརྟགས་པ་མ་སྩལ་བར་བརྐུས་ན་ཅིར་འགྱུར་ལགས།

ཉེས་བྱས་སོ།

བཙུན་པ་རེ་ཞིག་དགེ་སློང་གིས་མང་པོ་ཞིག་བརྒྱུད་དེ་མ་སྩལ་བར་བརྐུས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

གལ་ཏེ་སོ་སོར་བགོས་ན་ཇི་སྙེད་བདག་གིར་བྱས་པ་དེ་སྙེད་ཀྱི་རིན་ཐང་བརྩི་བར་བྱའོ།

བཙུན་པ་རེ་ཞིག་དགེ་སློང་གིས་གཞན་གྱིར་འདུ་ཤེས་ཏེ་མ་སྐུལ་བར་བརྐུས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་ཡོངས་སུ་བཟུང་བ་ལ་ཡོངས་སུ་བཟུང་བར་འདུ་ཤེས་ཏེ་མ་སྩལ་བར་བརྐུས་ན་ཅིར་འགྱུར་ལགས།

མཐར་འགྱུར་རོ།

ཡོངས་སུ་བཟུང་བ་ལ་ཡོངས་སུ་མ་བཟུང་བར་འདུ་ཤེས་ཏེ་མ་སྩལ་བར་བརྐུས་ན་ཅིར་འགྱུར་ལགས།

ལྟུང་བ་མེད་དོ།

ཡོངས་སུ་མ་བཟུང་བ་ལ་ཡོངས་སུ་བཟུང་བར་འདུ་ཤེས་ཏེ་མ་སྩལ་བར་བརྐུས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

ཡོངས་སུ་མ་བཟུང་བ་ལ་ཡོངས་སུ་མ་བཟུང་བར་འདུ་ཤེས་ཏེ་མ་སྩལ་བར་བརྐུས་ན་ཅིར་འགྱུར་ལགས།

ཉེས་པ་མེད་དོ།

བཙུན་པ་བཅོམ་ལྡན་འདས་ཀྱིས་ཡོ་བྱད་ཆེན་པོ་ཞིག་གནས་ནས་བསྐྱོད་ན་མཐར་འགྱུར་རོ།

ཞེས་གསུངས་པ་གང་ལགས་པ།

བཙུན་པ་དགེ་སློང་གིས་ཡོ་བྱད་ཆེན་པོ་ཞིག་གནས་ནས་བསྐྱོད་ཀྱང་།

མཐར་མི་འགྱུར་བ་ལྟ་མཆིས་སམ།

ཡོད་དེ་གནས་གང་དུ་བཞག་པར་གྱུར་པའི་གནས་དེ་ཉིད་དུ་གནས་ཏེ་བརྐུས་ནའོ།

བཙུན་པ་རེ་ཞིག་དགེ་སློང་གིས་རྙེད་པ་མི་དབང་བར་འདི་བདག་དབང་ངོ་ཞེས་དེ་སྐད་སྨྲས་ན་ཅིར་འགྱུར་ལགས།

དེས་ཤེས་བཞིན་དུ་བརྫུན་སྨྲས་པས་ལྟུང་བྱེད་དོ།

གལ་ཏེ་བརྐུ་སེམས་ཉེ་བར་གནས་པར་གྱུར་ན་ཉེས་པ་སྦོམ་པོར་འགྱུར་བའི་ཉེས་བྱས་སུ་འགྱུར་ཏེ་གྲུབ་ནས་ནི་རིན་ཐང་བརྩི་བར་བྱའོ།

བཙུན་པ་དགེ་སློང་གཅིག་པུ་ཞིག་ཁང་པར་ཞུགས་པ་ལ་མ་སྩལ་བར་ལེན་པའི་རྐྱེན་གྱིས་མཐར་འགྱུར་བ་ལྟ་མཆིས་ལགས་སམ།

གལ་ཏེ་བརྐུ་བར་སྦྱོར་བ་བྱས་ནས་ཞུགས་སམ།

ཞུགས་ནས་སྦྱོར་བ་བྱེད་ནའོ།

བཙུན་པ་དགེ་སློང་གིས་ཡོ་བྱད་ཆེན་པོ་ཞིག་མ་སྩལ་བར་བླངས་ཀྱང་མཐར་མི་འགྱུར་བ་ལྟ་མཆིས་ལགས་སམ།

ཡོད་དེ་སྔར་ལྟུང་བ་བྱུང་བ་དང་།

རྐུ་ཐབས་སུ་གནས་པ་དང་།

དང་པོ་མི་མཐུན་པ་དང་།

མ་ནིང་དང་དགེ་སློང་མ་སུན་ཕྱུང་བ་ལ་ནི་ཉེས་བྱས་སུ་འགྱུར་རོ།

ཇི་ལྟར་དགེ་སློང་ལ་མ་བྱིན་པར་བླངས་པའི་རྐྱེན་གྱིས་མཐར་འགྱུར་བ་དེ་བཞིན་དུ་བསླབ་པ་བྱིན་པ་དང་།

དགེ་སློང་མ་ལ་ཡང་མཐར་འགྱུར་རོ།

དགེ་སློབ་མ་དང་།

དགེ་ཚུལ་དང་།

དགེ་ཚུལ་མ་ལ་ནི་ཉེས་བྱས་སོ།།

སྡོམ་ལ།

དུད་འགྲོ་གསུམ་དང་ལས་སྲིད་དང་།

སྲེད་པ་མ་ལ་བཞི་ཚན་དང་།

མངལ་གཉིས་དང་ནི་གསོ་བ་དང་།

འདུ་ཤེས་ལ་ནི་བཞི་ཚན་ནོ།

སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ།

བཙུན་པ་བཅོམ་ལྡན་འདས་ཀྱིས་ཡང་དགེ་སློང་གང་མི་འམ།

མིར་ཆགས་པ་ལ་བསམས་བཞིན་དུ་རང་གི་ལག་དར་ཏེ་སྲོག་བཅད་དམ།

དེ་ལ་མཚོན་འདེབས་སམ།

དེ་ལ་མཚོན་ཐོགས་པ་གཉེར་ཏམ།

དེ་འཆིར་བཅུག་གམ།

དེ་ལ་འཆི་བའི་བསྔགས་པ་བརྗོད་ཀྱང་རུང་སྟེ།

དེ་ལ་འདི་སྐད་ཅེས་ཀྱེ་མི་ཁྱོད་འཚོ་བའི་སྡིག་པ་མི་གཙང་བ་ངན་པ་འདིས་ཅི་ཞིག་བྱ།

ཀྱེ་མི་ཁྱོད་གསོན་པ་བས་ཤི་བླའོ་ཞེས་ཟེར་ཞིང་དེ་ལྟར་སེམས་ཀྱི་འདོད་པ་དང་།

སེམས་ཀྱི་ཀུན་ཏུ་རྟོག་པ་དག་གིས་རྣམ་གྲངས་དུ་མས་དེ་འཆིར་བཅུག་གམ།

དེ་ལ་འཆི་བའི་བསྔགས་པ་བརྗོད་དེ།

དེ་ཡང་རྩོམ་པ་དེ་ལྟ་བུས་དུས་བྱས་ན་དགེ་སློང་དེ་ཡང་ཕམ་པར་གྱུར་པ་ཡིན་གྱིས།

གནས་

པར་མི་བྱའོ་ཞེས་གསུངས་པ་གང་ལགས་པ།

བཙུན་པ་རེ་ཞིག་དགེ་སློང་གིས་གསང་སྔགས་དང་སྨན་དག་གིས་མི་དུད་འགྲོའི་སྐྱེ་གནས་པར་བསྒྱུར་ཏེ།

མི་སྲོག་དང་ཕྲལ་ན་ཅིར་འགྱུར་ལགས།

མཐར་འགྱུར་རོ།

བཙུན་པ་རེ་ཞིག་དགེ་སློང་གིས་གསང་སྔགས་དང་སྨན་དག་གིས་བདག་ཉིད་དུད་འགྲོའི་སྐྱེ་གནས་པར་བསྒྱུར་ཏེ།

མི་སྲོག་དང་ཕྲལ་ན་ཅིར་འགྱུར་ལགས།

གལ་ཏེ་མི་གསད་པར་བྱར་མི་རུང་བར་དགེ་སློང་དུ་འདུ་ཤེས་ཡོད་ལ།

དེ་ཡང་བྱེད་ན་མཐར་འགྱུར་རོ།

གལ་ཏེ་དགེ་སློང་དུ་འདུ་ཤེས་མེད་ན་ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་ཕ་དང་མའི་སྲོག་དག་ཕྲལ་ཡང་མཐར་མི་འགྱུར་ལ།

མཚམས་མ་མཆིས་པ་ཉིད་ཀྱི་ཁ་ན་མ་ཐོ་བས་ཀྱང་རེག་པར་མི་འགྱུར་བ་ལྟ་མཆིས་ལགས་སམ།

ཡོད་དེ་གང་གི་ཕ་དང་མ་དུད་འགྲོའི་སྐྱེ་གནས་པར་གྱུར་པའོ།

བཙུན་པ་དགེ་སློང་གིས་ཕ་བཀུམ་ཡང་མཐར་མི་འགྱུར་ལ།

མཚམས་མ་མཆིས་པ་ཉིད་ཀྱི་ཁ་ན་མ་ཐོ་བས་ཀྱང་རེག་པར་མི་འགྱུར་བ་ལྟ་མཆིས་ལགས་སམ།

ཡོད་དེ་ཟག་པ་དང་བཅས་པའི་ལས་ཀྱི་སྲིད་པ་བསད་ནའོ།

ཉེ་བ་འཁོར་ཟག་པ་དང་བཅས་པའི་ལས་ཀྱི་སྲིད་པ་ནི་མངོན་པར་སྒྲུབ་པའི་དོན་གྱིས་ཕ་ཞེས་བྱའོ།

བཙུན་པ་རེ་ཞིག་དགེ་སློང་གིས་མ་བཀུམ་ཡང་མཐར་མི་འགྱུར་ལ།

མཚམས་མ་མཆིས་པ་ཉིད་ཀྱི་ཁ་ན་མ་ཐོ་བས་ཀྱང་རེག་པར་མི་འགྱུར་བ་ལྟ་མཆིས་ལགས་སམ།

ཡོད་དེ་གལ་ཏེ་སྲེད་པ་བསད་ནའོ།

ཉེ་བ་འཁོར་སྲེད་པ་ནི་སྐྱེད་པའི་དོན་གྱིས་མ་ཞེས་བྱའོ།

བཙུན་པ་རེ་ཞིག་དགེ་སློང་གིས་མ་དགུམ་པར་འཚལ་ནས་བུད་མེད་གཞན་ཞིག་བཀུམ་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་བུད་མེད་གཞན་ཞིག་དགུམ་པར་འཚལ་ནས་མ་བཀུམ་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་མ་དགུམ་པར་སྦྱོར་བ་བགྱིས་ལ།

བུད་མེད་གཞན་ཞིག་སྲོག་དང་ཕྲལ་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་བུད་མེད་གཞན་ཞིག་དགུམ་པར་སྦྱོར་བ་བགྱིས་ལ་མ་སྲོག་དང་ཕྲལ་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་མིའི་

བུད་མེད་ཀྱི་མངལ་ན་དུད་འགྲོའི་སྐྱེ་གནས་པར་སྐྱེས་པ་བཀུམ་ན་ཅིར་འགྱུར་ལགས།

ལྟུང་བྱེད་དུ་འགྱུར་རོ།

བཙུན་པ་རེ་ཞིག་དགེ་སློང་གིས་དུད་འགྲོའི་སྐྱེ་གནས་སུ་སྐྱེས་པ་མོའི་མངལ་དུ་མིའི་བུ་བཀུམ་ན་ཅིར་འགྱུར་ལགས།

མཐར་འགྱུར་རོ།

བཙུན་པ་རེ་ཞིག་མ་ནི་སྐྱེད་པ་ལགས་ལ།

གཞན་ནི་གསོ་བར་བགྱིད་པ་ལགས་ན།

གང་ཞིག་སྲོག་དང་ཕྲལ་ན་མཐར་ཡང་འགྱུར་ལ།

མཚམས་མ་མཆིས་པ་ཉིད་ཀྱི་ཁ་ན་མ་ཐོ་བས་ཀྱང་རེག་པར་འགྱུར་ལགས།

གང་གིས་བསྐྱེད་པའོ།

བཙུན་པ་རེ་ཞིག་དགེ་སློང་གིས་མི་ལ་མི་ལགས་པར་འདུ་ཤེས་པས་བཀུམ་ན་ཅིར་འགྱུར་ལགས།

མཐར་འགྱུར་རོ།

མི་ལ་མི་མ་ལགས་པར་འདུ་ཤེས་པས་བཀུམ་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མི་མ་ལགས་པ་ལ་མིར་འདུ་ཤེས་པས་བཀུམ་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མི་མ་ལགས་པ་ལ་མི་མ་ལགས་པར་འདུ་ཤེས་པས་བཀུམ་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།།

སྡོམ་ལ།

ཡིད་གཉིས་དང་ནི་བདག་གཉིས་དང་།

དགྲ་བཅོམ་པ་ཡང་ཉིད་ལ་བཞི།

རྐུན་པོ་གཉིས་དང་འདུ་ཤེས་གཞན།

བདུན་ཚན་དང་ནི་ཁང་པའོ།

བཙུན་པ་རེ་ཞིག་དགེ་སློང་གིས་དེ་འདི་ཡིན་ནམ་དེ་འདི་མ་ཡིན་སྙམ་དུ་སོམ་ཉི་དང་ཐེ་ཚོམ་འཚལ་བཞིན་དུ་དེ་ཡང་སྲོག་དང་ཕྲལ་ན་ཅིར་འགྱུར་ལགས།

མཐར་འགྱུར་རོ།

བཙུན་པ་རེ་ཞིག་དགེ་སློང་གིས་བདག་ཉིད་སྲོག་དང་ཕྲལ་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་ཕ་དང་མ་དགུམ་པར་སྦྱོར་བ་བགྱིས་པ་ལས་བདག་ཉིད་བཀུམ་ན་ཅིར་འགྱུར་ལགས།

གལ་ཏེ་ཕ་མ་སྔར་དུས་བྱས་ན་ཕམ་པར་འགྱུར་ཏེ་མཚམས་མེད་པའི་ཁ་ན་མ་ཐོ་བས་ཀྱང་རེག་པར་འགྱུར་རོ།

འོན་ཏེ་དེ་སྔར་དུས་བྱས་ན་ཉེས་པ་སྦོམ་པོར་འགྱུར་རོ།

མཚམས་མེད་པའི་ཁ་ན་མ་ཐོ་བས་རེག་པར་མི་འགྱུར་རོ།

བཙུན་པ་རེ་ཞིག་དགེ་སློང་གིས་དགྲ་བཅོམ་པ་དགུམ་པར་འཚལ་ན་སོ་སོའི་སྐྱེ་བོ་བཀུམ་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གི་སོ་སོའི་སྐྱེ་བོ་དགུམ་པར་འཚལ་ན་དགྲ་བཅོམ་པ་བཀུམ་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་ཏེ།

མཚམས་མེད་པའི་

ཁ་ན་མ་ཐོ་བས་རེག་པར་མི་འགྱུར་རོ།

བཙུན་པ་རེ་ཞིག་དགེ་སློང་གིས་དགྲ་བཅོམ་པ་དགུམ་པར་སྦྱོར་བ་བགྱིས་ལ།

སློབ་པ་སྲོག་དང་ཕྲལ་ན་ཅིར་འགྱུར་ལགས།

མཐར་འགྱུར་ཏེ།

མཚམས་མེད་པ་དང་ཉེ་བའི་ཁ་ན་མ་ཐོ་བས་ཀྱང་རེག་པར་འགྱུར་རོ།

བཙུན་པ་རེ་ཞིག་དགེ་སློང་གིས་སོ་སོའི་སྐྱེ་བོ་དགུམ་པར་སྦྱོར་བ་བགྱིས་ལ།

དགྲ་བཅོམ་པ་ཞིག་སྲོག་དང་ཕྲལ་ན་ཅིར་འགྱུར་ལགས།

མཐར་འགྱུར་ཏེ།

མཚམས་མེད་པའི་ཁ་ན་མ་ཐོ་བས་ཀྱང་རེག་པར་འགྱུར་རོ།

བཙུན་པ་རེ་ཞིག་རྐུན་པོ་ཞིག་དགུམ་པར་ཁྲིད་པ་ལས་བྲོས་ཏེ།

དེ་གྲོང་མིའམ།

རྒྱལ་པོའི་མི་དག་གིས་རྗེས་བཞིན་དུ་བསྙགས་པར་གྱུར་ལ།

ཤུལ་གྱི་མདུན་རོལ་ནས་དགེ་སློང་ཞིག་མཆིས་པ་དེ་ལ་དེ་དག་གིས་ཁྱོད་ཀྱིས་རྐུན་པོ་ཞིག་བྲོས་པ་མཐོང་ངམ་ཞེས་དྲིས་པ་དང་།

དགེ་སློང་དེ་ལ་ཡང་རྐུན་པོ་དགུམ་པའི་སེམས་ཉེ་བར་གནས་པར་གྱུར་ནས་དེ་ཡང་དེ་དག་ལ་བསྟན་ཏེ་དེ་སྲོག་དང་ཕྲལ་ན་ཅིར་འགྱུར་ལགས།

མཐར་འགྱུར་རོ།

བཙུན་པ་རེ་ཞིག་རྐུན་པོ་ཞིག་དགུམ་པར་ཁྲིད་པ་ལས་བྲོས་ཏེ།

དེ་གྲོང་མིའམ་རྒྱལ་པོའི་མི་དག་གིས་རྗེས་བཞིན་དུ་བསྙགས་པར་གྱུར་ལ།

ཤུལ་གྱི་མདུན་རོལ་ནས་དགེ་སློང་ཞིག་མཆིས་པ་དེ་ལ་དེ་དག་གིས་ཁྱོད་ཀྱིས་རྐུན་པོ་ཞིག་བྲོས་པ་མཐོང་ངམ་ཞེས་དྲིས་པ་དང་།

དགེ་སློང་ལ་ཡང་རྐུན་པོ་དགུམ་པའི་སེམས་ཉེ་བར་གནས་པར་མ་གྱུར་པར་དེ་དག་ལ་བསྟན་ཏེ་དེ་སྲོག་དང་ཕྲལ་ན་ཅིར་འགྱུར་ལགས།

ཉེས་བྱས་སོ།

བཙུན་པ་རེ་ཞིག་མི་གཉིས་ལས་གཞན་དགུམ་པར་བགྱིས་པ་ལས་གཞན་བཀུམ་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་བསྙེན་པར་རྫོགས་པར་དགུམ་པར་སྦྱོར་བ་བགྱིས་ལ།

བསྙེན་པར་མ་རྫོགས་པར་བཀུམ་ན་ཅིར་འགྱུར་ལགས།

ཉེས་བྱས་སོ།

བསྙེན་པར་མ་རྫོགས་པར་དགུམ་པར་སྦྱོར་བ་བགྱིས་ལ།

བསྙེན་པར་རྫོགས་ཀར་བཀུམ་ན་ཅིར་འགྱུར་ལགས།

ཉེས་བྱས་སོ།

བསྙེན་པར་མ་རྫོགས་པར་དགུམ་པར་སྦྱོར་བ་བགྱིས་ལ།

བསྙེན་པར་རྫོགས་ཏེ་བཀུམ་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བསྙེན་པར་རྫོགས་ཀར་དགུམ་པར་སྦྱོར་བ་བགྱིས་ལ།

བསྙེན་པར་རྫོགས་ཀར་བཀུམ་ན་ཅིར་འགྱུར་ལགས།

ཉེས་བྱས་སོ།

བསྙེན་པར་རྫོགས་ཀར་དགུམ་པར་སྦྱོར་བ་བགྱིས་ལ།

བསྙེན་པར་རྫོགས་ཏེ་བཀུམ་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བསྙེན་པར་རྫོགས་ཏེ་དགུམ་པར་སྦྱོར་བ་བགྱིས་ལ།

བསྙེན་པར་རྫོགས་ཏེ་བཀུམ་ན་ཅིར་འགྱུར་ལགས།

མཐར་འགྱུར་རོ།

བསྙེན་པར་རྫོགས་ཏེ་དགུམ་པར་སྦྱོར་བ་བགྱིས་ལ།

བསྙེན་པར་མ་རྫོགས་པར་བཀུམ་ན་ཅིར་འགྱུར་ལགས།

ཉེས་བྱས་སོ།

བཙུན་པ་དགེ་སློང་གཅིག་པུ་ཁང་པའི་ནང་དུ་ཞུགས་པ་ལ་སྲོག་དང་ཕྲལ་བའི་རྐྱེན་གྱིས་མཐར་འགྱུར་བ་ལྟ་མཆིས་ལགས་སམ།

ཡོད་དེ་ཉེ་བ་འཁོར་འདི་ལྟར་དགེ་སློང་གིས་གསད་པར་སྦྱོར་བ་བྱས་ལ་ཁང་པའི་ནང་དུ་ཞུགས་སམ།

ཁང་པའི་ནང་དུ་ཞུགས་ནས་གསད་པར་སྦྱོར་བ་བྱེད་ནའོ།

བཙུན་པ་དགེ་སློང་གིས་མི་ལ་མི་ལགས་པར་འདུ་ཤེས་ཏེ་བཀུམ་སེམས་ཀྱིས་སྲོག་དང་ཕྲལ་ཡང་མཐར་མི་འགྱུར་བ་ལྟ་མཆིས་ལགས་སམ།

ཡོད་དེ་སྔར་ལྟུང་བ་བྱུང་བ་དང་།

རྐུ་ཐབས་སུ་གནས་པ་དང་།

དང་པོ་མི་མཐུན་པ་དང་།

མ་ནིང་དང་།

དགེ་སློང་མ་སུན་ཕྱུང་བ་ལ་ནི་ཉེས་བྱས་སུ་འགྱུར་རོ།

ཇི་ལྟར་དགེ་སློང་ལ་སྲོག་དང་ཕྲལ་བའི་རྐྱེན་གྱིས་མཐར་འགྱུར་བ་དེ་བཞིན་དུ་བསླབ་པ་བྱིན་པ་དང་།

དགེ་སློང་མ་ལ་ཡང་མཐར་འགྱུར་རོ།

དགེ་སློབ་མ་དང་།

དགེ་ཚུལ་དང་།

དགེ་ཚུལ་མ་ལ་ནི་ཉེས་བྱས་སོ།།

སྡོམ་ལ།

སངས་རྒྱས་སྟོན་པ་རྣམ་པར་གཟིགས།

མི་སློབ་སློབ་དང་ཅི་ཡང་དང་།

ཉམས་དང་གྲོལ་དང་འཇིགས་པ་དང་།

སྐྱེ་དང་ཐོབ་དང་འདྲ་བའོ།

སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ།

བཙུན་པ་བཅོམ་ལྡན་འདས་ཀྱིས་ཡང་དགེ་སློང་གང་མངོན་པར་མི་ཤེས་ཤིང་ཡོངས་སུ་མི་ཤེས་པར་མིའི་ཆོས་བླ་མ་མཐའ་དང་།

འཕགས་པ་དང་།

ཁྱད་པར་ཐོབ་པ་དང་།

ཤེས་པ་དང་།

མཐོང་བ་དང་།

རེག་པར་གནས་པ་མེད་ཅིང་མི་བདོག་བཞིན་དུ་འདི་ཤེས་སོ།

འདི་མཐོང་ངོ་ཞེས་དེ་ལྟ་བུར་ཁས་འཆེས་པ་ལས་དེ་ལྟུང་བ་བྱུང་བ་རྣམ་པར་དག་པར་འདོད་ནས།

དུས་གཞན་ཞིག་ན་དྲིས་ཀྱང་རུང་མ་དྲིས་ཀྱང་རུང་འདི་སྐད་ཅེས་ཚེ་དང་ལྡན་པ་དག་བདག་གིས་ནི་མི་ཤེས་པར་ཤེས་སོ་

ཞེས་སྨྲས།

མ་མཐོང་བར་མཐོང་ངོ་ཞེས་སྨྲས་ཏེ།

གསོབ་གསོག་བརྫུན་དུ་སྨྲས་སོ་ཞེས་ཟེར་ན་མངོན་པའི་ང་རྒྱལ་མ་གཏོགས་ཏེ།

དགེ་སློང་དེ་ཡང་ཕས་ཕམ་པར་འགྱུར་བ་ཡིན་གྱིས་གནས་པར་མི་བྱའོ་ཞེས་གསུངས་པ་གང་ལགས་པ།

བཙུན་པ་རེ་ཞིག་དགེ་སློང་འདི་སྐད་ཅེས་བདག་ནི་སངས་རྒྱས་ཡིན་ནོ་ཞེས་མཆི་ན་ཅིར་འགྱུར་ལགས།

གལ་ཏེ་སྡིག་པ་མི་དགེ་བའི་ཆོས་རྣམས་ཁོང་དུ་ཆུད་པ་ཉིད་དམ།

བརྡ་སྤྲོད་པ་ཉིད་ལས་བསམས་ནས་ལུང་སྟོན་ན་ཉེས་པ་སྦོམ་པོར་འགྱུར་རོ།

འོན་ཏེ་མེད་པ་སངས་རྒྱས་བྱེད་པའི་ཆོས་རྣམས་སུ་ལུང་སྟོན་ན་མཐར་འགྱུར་རོ།

བཙུན་པ་རེ་ཞིག་དགེ་སློང་འདི་སྐད་ཅེས་བདག་ནི་སྟོན་པ་ཡིན་ནོ་ཞེས་མཆི་ན་ཅིར་འགྱུར་ལགས།

གལ་ཏེ་འདི་སྐད་དུ་གདམས་ངག་སྟོན་པ་དང་།

རྗེས་སུ་སྟོན་པ་དང་།

ཆོས་སྟོན་པའོ་སྙམ་དུ་བསམས་ནས་སྨྲས་ན་ཉེས་པ་སྦོམ་པོར་འགྱུར་རོ།

འོན་ཏེ་སྟོན་པའི་ཆོས་རྣམས་སུ་ལུང་སྟོན་ན་མཐར་འགྱུར་རོ།

བཙུན་པ་རེ་ཞིག་དགེ་སློང་འདི་སྐད་ཅེས་བདག་ནི་བཅོམ་ལྡན་འདས་རྣམ་པར་གཟིགས་དང་།

གཙུག་ཏོར་ཅན་དང་།

འཁོར་བ་འཇིག་དང་།

ཐམས་ཅད་སྐྱོབ་དང་།

གསེར་ཐུབ་དང་།

འོད་སྲུང་གི་ཉན་ཐོས་སོ་ཞེས་མཆི་ན་ཅིར་འགྱུར་ལགས།

གལ་ཏེ་སྔོན་གྱི་གནས་སུ་ལུང་སྟོན་ན་མཐར་འགྱུར་རོ།

འོན་ཏེ་དེས་འདི་སྙམ་དུ་དེ་ནས་བཟུང་སྟེ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་སྐྱབས་སུ་སོང་ངོ་།

དེ་ནས་བཟུང་སྟེ་ཡང་དག་པར་རྫོགས་པའི་སངས་རྒྱས་ཐམས་ཅད་ལ་སྐྱབས་སུ་སོང་ངོ་སྙམ་དུ་བསམས་ནས་སྨྲས་ན་ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་འདི་སྐད་ཅེས་བདག་ནི་མི་སློབ་པའོ་ཞེས་མཆི་ན་ཅིར་འགྱུར་ལགས།

གལ་ཏེ་ཉོན་མོངས་པ་སྤངས་པར་ལུང་སྟོན་ན་མཐར་འགྱུར་རོ།

འོན་ཏེ་དེས་འདི་སྙམ་དུ་བདག་ནི་བཟོ་ཅི་ཡང་མི་སློབ་བོ་སྙམ་དུ་བསམས་ནས་སྨྲས་ན་ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་འདི་སྐད་ཅེས་བདག་ནི་སློབ་པའོ་ཞེས་མཆི་ན་ཅིར་འགྱུར་ལགས།

གལ་ཏེ་སློབ་པར་སྤྱོད་པར་ལུང་སྟོན་ན་མཐར་འགྱུར་རོ།

འོན་ཏེ་དེས་འདི་སྙམ་དུ་ཀུན་ཏུ་སྤྱོད་པ་ལ་སློབ་བོ་སྙམ་དུ་བསམས་ནས་སྨྲས་ན་ཉེས་པ་སྦོམ་པོར་འགྱུར་རོ།

བཙུན་པ་

རེ་ཞིག་དགེ་སློང་འདི་སྐད་ཅེས་བདག་ལ་ནི་ཅི་ཡང་བ་མེད་དོ་ཞེས་མཆི་ན་ཅིར་འགྱུར་ལགས།

གལ་ཏེ་ཅི་ཡང་བ་སྤངས་སོ་ཞེས་ལུང་སྟོན་ན་མཐར་འགྱུར་རོ།

འོན་ཏེ་དེས་འདི་སྙམ་དུ་བདག་ལ་ནི་ལྷུང་བཟེད་དང་།

ཆོས་གོས་དང་།

དགེ་སྦྱོང་གི་འཚོ་བའི་ཡོ་བྱད་གང་ཡང་རུང་བ་ཞིག་མེད་དོ་སྙམ་དུ་བསམས་ནས་སྨྲས་ན་ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་འདི་སྐད་ཅེས་བདག་ཉིད་ནི་ཉམས་པའོ་ཞེས་མཆི་ན་ཅིར་འགྱུར་ལགས།

གལ་ཏེ་འདི་སྙམ་དུ་བདག་ནི་དགེ་སྦྱོང་གི་ཚུལ་གྱི་འབྲས་བུ་དག་ལས་སོ་ཞེས་ཟེར་ན་མཐར་འགྱུར་རོ།

འོན་ཏེ་ལུང་ལས་ཉམས་པ་ལས་བསམས་ཏེ་སྨྲས་ན་ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་འདི་སྐད་ཅེས་བདག་ནི་གྲོལ་བའོ་ཞེས་མཆི་ན་ཅིར་འགྱུར་ལགས།

གལ་ཏེ་འདི་སྐད་ཅེས་བདག་ནི་ཀུན་ཏུ་སྦྱོར་བ་དང་།

འཆིང་བ་དང་།

བག་ལ་ཉལ་བ་དང་།

ཉེ་བའི་ཉོན་མོངས་པ་དང་།

ཀུན་ནས་དཀྲིས་པ་རྣམས་ལས་གྲོལ་ལོ་ཞེས་ཟེར་ན་མཐར་འགྱུར་རོ།

འོན་ཏེ་འདི་སྙམ་དུ་ཀུན་ཏུ་སྦྱོར་བ་དང་།

འཆིང་བ་དང་།

བག་ལ་ཉལ་བ་དང་།

ཉེ་བའི་ཉོན་མོངས་པ་དང་།

ཀུན་ནས་དཀྲིས་པ་གང་དག་ཟད་པ་དང་།

འགག་པ་དང་།

བྲལ་བ་དང་།

རྣམ་པར་གྱུར་པ་དེ་དག་ལས་བདག་གྲོལ་ལོ་སྙམ་དུ་བསམས་ནས་སྨྲས་ན་ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་འདི་སྐད་ཅེས་བདག་ལ་འཇིགས་པ་མེད་དོ་ཞེས་མཆི་ན་ཅིར་འགྱུར་ལགས།

གལ་ཏེ་འཇིགས་པ་སྤངས་པར་ལུང་སྟོན་ན་མཐར་འགྱུར་རོ།

འོན་ཏེ་འཇིག་རྟེན་པ་ལས་བསམས་ནས་བདག་ནི་ཅི་ལ་ཡང་མི་འཇིགས་སོ་ཞེས་ཟེར་ན་ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་འདི་སྐད་ཅེས་འདི་ནི་བདག་གི་སྐྱེ་བའི་ཐ་མ་ཡིན་ནོ་ཞེས་མཆི་ན་ཅིར་འགྱུར་ལགས།

གལ་ཏེ་ཟད་པར་འདུ་ཤེས་པར་ལུང་སྟོན་ན་མཐར་འགྱུར་རོ།

འོན་ཏེ་གང་གི་སྐྱེ་བའི་ཐ་མ་འདི་ཡིན་པའི་སྐྱེ་བ་དེ་ནི་ཟད་པ།

འགག་པ།

བྲལ་བ་རྣམ་པར་གྱུར་པ་ཡིན་ནོ་སྙམ་དུ་བསམས་ནས་སྨྲས་ན་ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་འདི་སྐད་ཅེས་བདག་གིས་ཐོབ་བོ་ཞེས་མཆི་ན་ཅིར་འགྱུར་

ལགས།

གལ་ཏེ་འདི་སྐད་ཅེས་དགེ་སྦྱོང་གི་ཚུལ་གྱི་འབྲས་བུ་དག་གོ་ཞེས་ཟེར་ན་མཐར་འགྱུར་རོ།

འོན་ཏེ་འཇིག་རྟེན་པའི་དངོས་པོ་ཡིན་པར་ལུང་སྟོན་ན་ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་འདི་སྐད་ཅེས་ཀྱེ་མ་ཁྱོད་ཁོ་བོ་ཅི་འདྲ་བ་དེ་འདྲ་བར་གྱུར་ཀྱང་ཅི་མ་རུང་།

དེ་ལྟར་ན་ཡུ་བུ་རྒྱུན་དུ་ཞུགས་པ་དང་།

ལན་གཅིག་ཕྱིར་འོང་བ་དང་།

ཕྱིར་མི་འོང་བ་དང་།

དགྲ་བཅོམ་པར་གྱུར་ན།

ཁོ་བོ་ནི་རྒྱུན་དུ་ཞུགས་པ་དང་།

ལན་གཅིག་ཕྱིར་འོང་བ་དང་།

ཕྱིར་མི་འོང་བ་དང་།

དགྲ་བཅོམ་པ་ཡང་མ་ཡིན་ནོ་ཞེས་མཆི་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།།

སྡོམ་ལ།

མ་སྨིན་ཐོབ་དང་བདག་འདྲི་དང་།

སྤངས་པ་དང་ནི་འབྲས་བུ་གཉིས།

འདུ་ཤེས་བཞི་དང་ཐོབ་བྱ་དང་།

འཇིག་རྟེན་པའི་ཚུལ་ཐ་མའོ།

བཙུན་པ་རེ་ཞིག་དགེ་སློང་ཞིག་ལ་ཚེ་དང་ལྡན་པ་ཅི་ཟག་པ་ཟད་པ་ཡིན་ནམ་ཞེས་དྲིས་ལ།

དེས་ཀྱང་ཤིང་ཐོག་མ་སྨིན་པ་དག་བཅངས་པར་གྱུར་ཏེ།

དེས་འདི་སྐད་ཅེས་ཡིན་ནོ་ཞེས་བགྱིས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་འདི་སྐད་ཅེས་བདག་ནི་རྒྱུན་དུ་ཞུགས་པའི་འབྲས་བུ་དང་།

ལན་གཅིག་ཕྱིར་འོང་བའི་འབྲས་བུ་དང་།

ཕྱིར་མི་འོང་བའི་འབྲས་བུ་དང་།

མཆོག་གི་འབྲས་བུ་ཐོབ་བོ་ཞེས་མཆི་ན་ཅིར་འགྱུར་ལགས།

མཐར་འགྱུར་རོ།

བཙུན་པ་རེ་ཞིག་དགེ་སློང་བདག་ཉིད་ཀྱིས་དྲིས་ལ།

འདི་སྐད་ཅེས་ང་དགྲ་བཅོམ་པ་ཡིན་ནོ་ཞེས་ཟེར་བ་འདི་དྲིས་ཞེས་མཆི་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་ལ་ཁྱིམ་བདག་ཅིག་གིས་ཁྱོད་ཀྱིས་འབྲས་བུ་ཐོབ་བམ་ཞེས་དྲིས་པ་དང་།

དེས་ཀྱང་ལོ་མ་དང་།

མེ་ཏོག་དང་།

འབྲས་བུ་མ་སྨིན་པ་དག་བཅངས་པར་གྱུར་ཏེ།

དེས་འདི་སྐད་ཅེས་ཡིན་ཞེས་བགྱི་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་འདི་སྐད་ཅེས་བདག་ཉིད་ཡོངས་སུ་ཉམས་པའོ་ཞེས་མཆི་ན་ཅིར་འགྱུར་ལགས།

གལ་ཏེ་ཐོབ་པ་ལས་ཡོངས་སུ་ཉམས་པར་ལུང་སྟོན་ན་མཐར་འགྱུར་རོ།

འོན་ཏེ་མ་ཐོབ་པ་ལས་ཡོངས་སུ་ཉམས་པར་ལུང་སྟོན་ན་ཉེས་པ་སྦོམ་པོར་འགྱུར་རོ།

བཙུན་པ་རེ་

ཞིག་དགེ་སློང་གིས་རྒྱུན་དུ་ཞུགས་པའི་འབྲས་བུར་ལུང་བསྟན་ཏོ་སྙམ་པ་ལས་ལན་གཅིག་ཕྱིར་འོང་བའི་འབྲས་བུར་ལུང་སྟོན་པར་བགྱིད།

ལན་གཅིག་ཕྱིར་འོང་བའི་འབྲས་བུར་ལུང་བསྟན་ཏོ་སྙམ་པ་ལས་ཕྱིར་མི་འོང་བའི་འབྲས་བུར་ལུང་སྟོན་པར་བགྱིད།

ཕྱིར་མི་འོང་བའི་འབྲས་བུར་ལུང་བསྟན་ཏོ་སྙམ་པ་ལས་དགྲ་བཅོམ་པའི་འབྲས་བུར་ལུང་བསྟན་པར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་འདི་སྐད་ཅེས་རྒྱུ་རི་ཞེས་བྱ་བ་ལ་རྒྱུན་དུ་ཞུགས་པའི་འབྲས་བུའོ།

བྱ་སྐྱིབས་ཀྱི་ངོས་ལ་ལན་གཅིག་ཕྱིར་འོང་བའི་འབྲས་བུའོ།

བྱ་རྒོད་ཀྱི་ཕུང་པོ་ལ་ཕྱིར་མི་འོང་བའི་འབྲས་བུའོ།

འོད་མའི་ཚལ་དུ་མཆོག་གི་འབྲས་བུ་དགྲ་བཅོམ་པའོ་ཞེས་མཆི་ན་ཅིར་འགྱུར་ལགས།

གལ་ཏེ་འདི་སྙམ་དུ་དེར་བདག་ལ་བསྟན་པ་བཏོན།

ཁ་ཏོན་བྱས་ཏེ།

བདག་གིས་སྙོམ་ལས་མ་བྱས་སོ་སྙམ་དུ་བསམས་ནས་སྨྲས་ན་ཉེས་པ་སྦོམ་པོར་འགྱུར་རོ།

འོན་ཏེ་དགེ་སྦྱོང་གི་འབྲས་བུ་རྣམས་སུ་ལུང་སྟོན་ན་མཐར་འགྱུར་རོ།

བཙུན་པ་རེ་ཞིག་དགེ་སློང་གིས་མི་མ་ལགས་པ་མི་མ་ལགས་པར་འདུ་ཤེས་ཏེ་མིའི་ཆོས་བླ་མར་འགྱུར་བར་ལུང་སྟོན་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མི་མ་ལགས་པ་ལ་མིར་འདུ་ཤེས་ཏེ་མིའི་ཆོས་བླ་མར་གྱུར་པར་ལུང་སྟོན་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མི་ལ་མི་མ་ལགས་པར་འདུ་ཤེས་ཏེ་མིའི་ཆོས་བླ་མར་གྱུར་པ་ལུང་སྟོན་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མི་ལ་མིར་འདུ་ཤེས་ཏེ་མིའི་ཆོས་བླ་མར་གྱུར་པ་ལུང་སྟོན་ན་ཅིར་འགྱུར་ལགས།

མཐར་འགྱུར་རོ།

བཙུན་པ་རེ་ཞིག་དགེ་སློང་འདི་སྐད་ཅེས་ཉན་ཐོས་ཀྱི་ས་ཐོབ་པར་བྱ་བ་གང་ཡིན་པ་དེ་བདག་གིས་ཐོབ་བོ་ཞེས་མཆི་ན་ཅིར་འགྱུར་ལགས།

གལ་ཏེ་བྱང་ཆུབ་པར་བྱ་བ་ལས་བསམས་ཏེ་སྨྲས་ན་ཉེས་པ་སྦོམ་པོར་འགྱུར་རོ།

འོན་ཏེ་ཉན་ཐོས་ཀྱི་ཆོས་རྣམས་སུ་ལུང་སྟོན་ན་མཐར་འགྱུར་རོ།

བཙུན་པ་རེ་ཞིག་དགེ་སློང་འདི་སྐད་ཅེས་བདག་དེ་རིང་འཇིག་རྟེན་པའི་བསམ་གཏན་ལ་སྙོམ་པར་མ་ཞུགས་ཏེ།

དགོངས་ཀར་ཡང་མ་ཞུགས།

དེ་ཕན་ཆད་ཀྱང་མ་ཞུགས་སོ་ཞེས་མཆི་ན་ཅིར་འགྱུར་ལགས།

ཉེས་

པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་འདི་སྐད་ཅེས་ཚུར་འབྲས་བུ་དག་ལུང་བསྟན་ཏོ་ཞེས་མཆི་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།།

འདུལ་བ་གཞུང་བླ་མ།

བམ་པོ་གཉིས་པ།

སྡོམ་ལ།

ཕོ་ཉ་ཡི་གེ་ལག་བརྡ་དང་།

གཞན་ལ་སྙད་འདོགས་བརྒྱུད་པ་དང་།

སྨྱོན་པ་དང་ནི་སེམས་འཁྲུགས་དང་།

ཚོར་བས་ཉེན་འོན་གླེན་པའོ།

བཙུན་པ་རེ་ཞིག་དགེ་སློང་གིས་ཕོ་ཉ་ལས་མིའི་ཆོས་བླ་མར་གྱུར་པ་བརྗོད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

དེ་བཞིན་དུ་ཡི་གེ་དང་གཞན་ལ་སྙད་འདོགས་པ་དང་།

བརྒྱུད་པ་མིའི་ཆོས་བླ་མར་གྱུར་པ་བརྗོད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་སྨྱོན་པའི་དྲུང་དུ་མིའི་ཆོས་བླ་མར་གྱུར་པ་བརྗོད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

དེ་བཞིན་དུ་སེམས་འཁྲུགས་པ་དང་།

ཚོར་བས་ཉེན་པ་དང་།

འོན་པ་དང་།

གླེན་པ་ལ་མིའི་ཆོས་བླ་མར་གྱུར་པ་བརྗོད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།།

སྡོམ་ལ།

གཉིད་ལོག་ར་རོ་རབ་མྱོས་དང་།

སྙོམས་ཞུགས་འགྲོ་བ་མ་ཡིན་ཉིད།

སྐད་དང་ལུས་དང་དབེན་སྔགས་དང་།

གཞན་ལས་གཞན་གྱི་ཐ་མའོ།

བཙུན་པ་རེ་ཞིག་དགེ་སློང་གིས་གཉིད་ཀྱིས་ལོག་པའི་དྲུང་དུ་མིའི་ཆོས་བླ་མར་གྱུར་པ་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

དེ་བཞིན་དུ་ར་རོ་བ་དང་།

རབ་ཏུ་མྱོས་པ་དང་།

སྙོམས་པར་ཞུགས་པ་དང་།

འགྲོ་བ་གཞན་ན་གནས་པའི་དྲུང་དུ་མིའི་ཆོས་བླ་མར་གྱུར་པ་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དབུས་ཀྱི་དགེ་སློང་གིས་མཐའ་འཁོབ་པའི་སྐད་དུ་དབུས་པའི་དྲུང་དུ་མིའི་ཆོས་བླ་མར་གྱུར་པ་སྨྲས་ལ།

ཡུལ་དབུས་པས་ཀྱང་མཐའ་འཁོབ་པའི་སྐད་དེ་མ་འཚལ་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མཐའ་འཁོབ་པས་དབུས་པའི་སྐད་དུ་མཐའ་འཁོབ་པའི་དྲུང་དུ་མིའི་ཆོས་བླ་མར་གྱུར་པ་སྨྲས་ལ།

མཐའ་འཁོབ་པས་ཀྱང་ཡུལ་དབུས་པའི་སྐད་དེ་མ་འཚལ་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མཐའ་འཁོབ་པས་

མཐའ་འཁོབ་པའི་སྐད་དུ་དབུས་པའི་དྲུང་དུ་མིའི་ཆོས་བླ་མར་གྱུར་པ་སྨྲས་པ་ལ།

ཡུལ་དབུས་པས་ཀྱང་མཐའ་འཁོབ་པའི་སྐད་དེ་མ་འཚལ་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

དབུས་པས་དབུས་པའི་སྐད་དུ་མཐའ་འཁོབ་པའི་དྲུང་དུ་མིའི་ཆོས་བླ་མར་གྱུར་པ་སྨྲས་ལ་མཐའ་འཁོབ་པས་ཀྱང་ཡུལ་དབུས་པའི་སྐད་དེ་མ་འཚལ་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་ལུས་ཀྱི་རྣམ་པར་རིག་བྱེད་ཀྱིས་མིའི་ཆོས་བླ་མར་གྱུར་པ་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་དབེན་པར་དབེན་པའི་འདུ་ཤེས་ཀྱིས་མིའི་ཆོས་བླ་མར་གྱུར་པ་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

དབེན་པར་མི་དབེན་པའི་འདུ་ཤེས་ཀྱིས་མིའི་ཆོས་བླ་མར་གྱུར་པ་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མི་དབེན་པར་དབེན་པའི་འདུ་ཤེས་ཀྱིས་མིའི་ཆོས་བླ་མར་གྱུར་པ་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མི་དབེན་པར་མི་དབེན་པའི་འདུ་ཤེས་ཀྱིས་མིའི་ཆོས་བླ་མར་གྱུར་པ་སྨྲས་ན་ཅིར་འགྱུར་ལགས།

མཐར་འགྱུར་རོ།

བཙུན་པ་རེ་ཞིག་དགེ་སློང་གིས་གསང་སྔགས་སམ་སྨན་དག་གིས་བདག་ཉིད་མི་གདའ་བར་བགྱིས་ནས་མིའི་ཆོས་བླ་མར་གྱུར་པ་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་གཞན་ལས་མིའི་ཆོས་བླ་མར་གྱུར་པ་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་གཞན་དག་གི་སླད་དུ་མིའི་ཆོས་བླ་མར་གྱུར་པ་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་མིའི་ཆོས་བླ་མར་གྱུར་པ་སྨྲས་ཀྱང་མཐར་མི་འགྱུར་བ་ལྟ་མཆིས་ལགས་སམ།

ཡོད་དེ་སྔར་ལྟུང་བ་བྱུང་བ་དང་།

རྐུ་ཐབས་སུ་གནས་པ་དང་།

དང་པོ་མི་མཐུན་པ་ཅན་དང་།

མ་ནིང་དང་།

དགེ་སློང་མ་སུན་ཕྱུང་བ་ལ་ནི་ཉེས་བྱས་སུ་འགྱུར་རོ།

ཇི་ལྟར་དགེ་སློང་གིས་བརྫུན་དུ་སྨྲས་པའི་རྐྱེན་གྱིས་མཐར་འགྱུར་བ་དེ་བཞིན་དུ་བསླབ་པ་བྱིན་པ་དང་།

དགེ་སློང་མ་ཡང་མཐར་འགྱུར་རོ།

དགེ་སློབ་མ་དང་།

དགེ་ཚུལ་དང་།

དགེ་ཚུལ་མ་ལ་ནི་ཉེས་བྱས་སོ།

ཉེ་བ་འཁོར་གྱིས་ཞུས་པ།

ཁ་ཆེ་བ་ལས་ཕམ་པ་སྦྱར་བ་རྫོགས་སོ།།

སྡོམ་ལ།

མ་ལོག་སྦུབས་དང་དེ་བཞིན་གཡོས།

རྩོལ་བ་མེད་པ་དག་དང་མཚན།

གཞན་གྱི་དག་དང་བཅས་པ་འདིར།

ཚོགས་སུ་ཡང་དག་བཤད་པ་ཡིན།

སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ།

བཙུན་པ་བཅོམ་ལྡན་འདས་ཀྱིས་ཆེད་དུ་བསམས་ནས་ཁུ་བ་ཕྱུང་ན་རྨི་ལམ་གྱི་མ་གཏོགས་ཏེ།

དགེ་འདུན་ལྷག་མའོ་ཞེས་གསུངས་པ་གང་ལགས་པ།

བཙུན་པ་རེ་ཞིག་དགེ་སློང་གིས་གཉིད་མ་ལོག་པའི་གནས་སྐབས་སུ་བརྩམས་ཏེ་གཉིད་ལོག་ནས་ཁུ་བ་ཕྱུང་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་གཉིད་ལོག་པའི་ཚེ་བརྩམས་ཏེ་སད་ནས་ཁུ་བ་ཕྱུང་ན་ཅིར་འགྱུར་ལགས།

གལ་ཏེ་རྩོལ་ན་ཉེས་པ་སྦོམ་པོར་འགྱུར་རོ།

འོན་ཏེ་མི་རྩོལ་ན་ལྟུང་བ་མེད་དོ།

བཙུན་པ་རེ་ཞིག་བཅོམ་ལྡན་འདས་ཀྱིས་ཁུ་བ་སྦུབས་སུ་ཕྱིན་པ་ཕྱུང་ན་ཉེས་པ་སྦོམ་པོར་འགྱུར་རོ་ཞེས་གསུངས་པ་གང་ལགས་པ།

ཇི་ཙམ་གྱིས་ན་སྦུབས་སུ་ཕྱིན་པ་ལགས།

གནས་ནས་འཕགས་མ་ཐག་ཏུ་སྦུབས་སུ་ཕྱིན་པར་འགྱུར་རོ།

བཙུན་པ་བཅོམ་ལྡན་འདས་ཀྱིས་བསྐྱོད་དེ་བཏང་བ་ལས་ཁུ་བ་ཕྱུང་ན་ཉེས་པ་སྦོམ་པོར་འགྱུར་རོ་ཞེས་གསུངས་པ་གང་ལགས་པ།

ཇི་ཙམ་གྱིས་ན་བསྐྱོད་དེ་བཏང་བ་ལགས།

མཇུག་ཐོགས་སུ་གནས་ནས་འཕགས་པ་ལས་བཏང་བ་ཡིན་ནོ།

བཙུན་པ་མ་རྩལ་བར་ཁུ་བ་ཕྱུང་ན་ཅིར་འགྱུར་ལགས།

གལ་ཏེ་བདག་གིར་མི་བྱེད་ན་ལྟུང་བ་མེད་དོ།

འོན་ཏེ་བདག་གིར་བྱེད་ན་ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་ཁུ་བ་འབྱིན་པ་ལས་མཚན་གྱུར་ཏེ་དགེ་སློང་མར་རེད་ན་ཅིར་འགྱུར་ལགས།

ལྟུང་བྱེད་དུ་འགྱུར་རོ།

བཙུན་པ་རེ་ཞིག་དགེ་སློང་མ་ཁུ་བ་འབྱིན་པ་ལས་མཚན་གྱུར་ཏེ་དགེ་སློང་དུ་རེད་ན་ཅིར་འགྱུར་ལགས།

དགེ་འདུན་ལྷག་མར་འགྱུར་རོ།

བཙུན་པ་རེ་ཞིག་དགེ་སློང་གིས་གཞན་གྱི་ཟག་བྱེད་ནས་ཁུ་བ་འབྱིན་པར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་དགེ་སློང་གིས་ཆེད་དུ་བསམས་ཏེ་ཁུ་བ་ཕྱུང་ན་དགེ་འདུན་ལྷག་མར་མི་འགྱུར་བ་ལྟ་

མཆིས་ལགས་སམ་ཡོད་དེ་སྔར་ལྟུང་བ་བྱུང་བ་དང་།

རྐུ་ཐབས་སུ་གནས་པ་དང་།

དང་པོ་མི་མཐུན་པ་ཅན་དང་།

མ་ནིང་དང་།

དགེ་སློང་མ་སུན་ཕྱུང་བ་ལ་ནི་ཉེས་བྱས་སུ་འགྱུར་རོ།

ཇི་ལྟར་དགེ་སློང་ཁུ་བ་འབྱིན་པ་དགེ་འདུན་ལྷག་མར་འགྱུར་བ་དེ་བཞིན་དུ་བསླབ་པ་བྱིན་པ་ལ་ཡང་དགེ་འདུན་ལྷག་མར་འགྱུར་རོ།

དགེ་སློང་མ་ལ་ནི་གཞི་ཇི་ལྟ་བ་བཞིན་ནོ།

དགེ་སློབ་མ་དང་།

དགེ་ཚུལ་དང་།

དགེ་ཚུལ་མ་ལ་ནི་ཉེས་བྱས་སོ།།

སྡོམ་ལ།

ལུས་དང་ཡིད་གཉིས་སོ་དང་ནི།

རྨ་སྤུ་དེ་བཞིན་སེན་མོ་དང་།

བཞི་པ་གཉིས་སུ་བྱས་ན་ནི།

ཚོགས་སུ་ཡང་དག་བཤད་པ་ཡིན།

སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ།

བཙུན་པ་བཅོམ་ལྡན་འདས་ཀྱིས་ཡང་དགེ་སློང་གང་དྲལ་ཅིང་གྱུར་པའི་སེམས་ཀྱིས་བུད་མེད་ཀྱི་ཡུལ་དང་ལྷན་ཅིག་ལུས་ཀྱིས་རེག་པར་བྱེད་ཅིང་ལག་པ་ནས་བཟུང་ངམ།

དཔུང་པ་ནས་བཟུང་ངམ།

ལན་བུ་ནས་བཟུང་ངམ།

ཡན་ལག་དང་ཉིང་ལག་གང་ཡང་རུང་བ་ལ་ནོམ་པ་དང་།

ཉུག་པ་བདག་གིས་བྱེད་ན་དགེ་འདུན་ལྷག་མའོ་ཞེས་གསུངས་པ་གང་ལགས་པ།

བཙུན་པ་རེ་ཞིག་བུད་མེད་ལུས་ཀྱི་དབང་པོ་ཉམས་པར་གྱུར་ལ།

དགེ་སློང་གིས་དེ་དང་ལྷན་ཅིག་ལུས་ཀྱིས་རེག་པར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་ལུས་ཀྱི་དབང་པོ་ཉམས་པར་གྱུར་པ་དེས་བུད་མེད་དང་ལྷན་ཅིག་ལུས་ཀྱིས་རེག་པར་བྱེད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དེ་གཉིས་ཀའི་ལུས་ཀྱི་དབང་པོ་ཉམས་པར་གྱུར་ལ་དེ་དག་ལུས་ཀྱིས་རེག་པར་བགྱིད་ན་ཅིར་འགྱུར་ལགས།

ཉེས་བྱས་སོ།

བཙུན་པ་རེ་ཞིག་དགེ་སློང་དེ་འདི་ཡིན་ནམ།

དེ་འདི་མ་ཡིན་སྙམ་དུ་སོམ་ཉི་དང་ཐེ་ཚོམ་འཚལ་བཞིན་དུ་དེ་ཡང་དེ་དང་ལྷན་ཅིག་ལུས་ཀྱིས་རེག་པར་བགྱིད་ན་ཅིར་འགྱུར་ལགས།

དགེ་འདུན་གྱི་ལྷག་མར་འགྱུར་རོ།

བཙུན་པ་རེ་ཞིག་དགེ་སློང་འདི་བུད་མེད་ཡིན་ནམ།

འོན་ཏེ་བུད་མེད་མ་ཡིན་སྙམ་དུ་སོམ་ཉི་དང་ཐེ་ཚོམ་འཚལ་བཞིན་དུ་དེ་ཡང་དེ་དང་ལྷན་ཅིག་ལུས་ཀྱིས་རེག་པར་བགྱིད་ན་ཅིར་འགྱུར་ལགས་དངོས་པོ་ཇི་ལྟ་བ་བཞིན་ནོ།

བཙུན་པ་རེ་ཞིག་སོས་རེག་པར་བགྱིད་ན་ཅིར་འགྱུར་ལགས།

ཉེས་

པ་སྦོམ་པོར་འགྱུར་རོ།

བཙུན་པ་རེ་ཞིག་སོ་དག་ལ་རེག་པར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་རྨས་རེག་པར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་རྨ་དག་ལ་རེག་པར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་སྤུས་རེག་པར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་སྤུ་དག་ལ་རེག་པར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་སེན་མོས་རེག་པར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་སེན་མོ་དག་ལ་རེག་པར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་མིའི་བུད་མེད་ལ་མིར་འདུ་ཤེས་པས་ལུས་ཀྱིས་རེག་པར་བགྱིད་ན་ཅིར་འགྱུར་ལགས།

དགེ་འདུན་ལྷག་མར་འགྱུར་རོ།

མིའི་ལ་མི་མ་ལགས་པར་འདུ་ཤེས་པས་ལུས་ཀྱིས་རེག་པར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མིའི་མ་ལགས་པར་མིར་འདུ་ཤེས་པས་ལུས་ཀྱིས་རེག་པར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མིའི་མ་ལགས་པ་ལ་མིའི་མ་ལགས་པར་འདུ་ཤེས་པས་ལུས་ཀྱིས་རེག་པར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་བར་ཆད་དང་བཅས་པ་ལ་བར་ཆད་དང་བཅས་པར་འདུ་ཤེས་པས་ལུས་ཀྱིས་རེག་པར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བར་ཆད་དང་བཅས་པ་ལ་བར་ཆད་མ་མཆིས་པར་འདུ་ཤེས་པས་ལུས་ཀྱིས་རེག་པར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བར་ཆད་མ་མཆིས་པར་བར་ཆད་དང་བཅས་པར་འདུ་ཤེས་པས་ལུས་ཀྱིས་རེག་པར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བར་ཆད་མ་མཆིས་པ་ལ་བར་ཆད་མ་མཆིས་པར་འདུ་ཤེས་པས་ལུས་ཀྱིས་རེག་པར་བགྱིད་ན་ཅིར་འགྱུར་ལགས།

དགེ་འདུན་ལྷག་མར་འགྱུར་རོ།།

སྡོམ་ལ།

འདུ་ཤེས་གཞན་རོ་རུས་པ་དང་།

མཚན་དང་སྐྱེས་པ་མཉེན་པ་དང་།

འཇམ་དྲོ་མ་ནིང་སྨྱོན་པ་དང་།

སྙོམས་འཇུག་

གཉིད་ལོག་འགྲོ་བ་མིན།

བཙུན་པ་རེ་ཞིག་བུད་མེད་གཞན་ཞིག་དང་ལྷན་ཅིག་ཆགས་པ་སྐྱེས་པ་གཞན་ཞིག་དང་ལྷན་ཅིག་ལུས་ཀྱིས་རེག་པར་བྱེད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་བུད་མེད་ཀྱི་རོ་དང་ལྷན་ཅིག་ཏུ་ལུས་ཀྱིས་རེག་པར་བགྱིད་ན་ཅིར་འགྱུར་ལགས།

དགེ་འདུན་ལྷག་མར་འགྱུར་རོ།

བཙུན་པ་རེ་ཞིག་ཤ་མ་མཆིས་པ་རུས་པའི་རུས་གོང་དང་ལྷན་ཅིག་ལུས་ཀྱིས་རེག་པར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་བུད་མེད་དང་ལྷན་ཅིག་ལུས་ཀྱིས་རེག་པར་བགྱིད་པ་ལས་དེའི་མཚན་གྱུར་ཏེ།

དགེ་སློང་མར་རེད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་མ་ཞིག་སྐྱེས་པ་དང་ལྷན་ཅིག་ཏུ་ལུས་ཀྱིས་རེག་པར་བགྱིད་པ་ལས་དེའི་མཚན་གྱུར་ཏེ།

དགེ་སློང་དུ་རེད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་སྐྱེས་པ་དང་ལྷན་ཅིག་ལུས་ཀྱིས་རེག་པར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་གཉེན་ནམ་སྙམ་པའི་བསམས་པས་ལུས་ཀྱིས་རེག་པར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

འཇམ་པའི་བསམ་པ་དང་དྲོ་བའི་བསམ་པས་ཀྱང་དེ་དང་འདྲའོ།

བཙུན་པ་རེ་ཞིག་དགེ་སློང་མ་ནིང་དང་ལྷན་ཅིག་ལུས་ཀྱིས་རེག་པར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མ་ནིང་མོ་དང་ལྷན་ཅིག་ལུས་ཀྱིས་རེག་པར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་སྨྱོན་པ་དང་ལྷན་ཅིག་ལུས་ཀྱིས་རེག་པར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

དེ་བཞིན་དུ་སེམས་རྣམ་པར་འཁྲུགས་པ་དང་།

ལྷན་ཅིག་ལུས་ཀྱིས་རེག་པར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་བུད་མེད་སྙོམས་པར་ཞུགས་པ་དང་ལྷན་ཅིག་ལུས་ཀྱིས་རེག་པར་བགྱིད་ན་ཅིར་འགྱུར་ལགས།

དགེ་འདུན་ལྷག་མར་འགྱུར་རོ།

བཙུན་པ་རེ་ཞིག་དགེ་སློང་བུད་མེད་གཉིད་ཀྱིས་ལོག་པ་དང་ལྷན་ཅིག་ལུས་ཀྱིས་རེག་པར་བགྱིད་ན་ཅིར་འགྱུར་ལགས།

དགེ་འདུན་ལྷག་མར་འགྱུར་རོ།

བཙུན་པ་

རེ་ཞིག་དགེ་སློང་འགྲོ་བ་གཞན་པའི་བུད་མེད་དང་ལྷན་ཅིག་ལུས་ཀྱིས་རེག་པར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་ལུས་ཀྱིས་རེག་པར་བགྱིད་ཀྱང་།

དགེ་འདུན་ལྷག་མར་མི་འགྱུར་བ་ལྟ་མཆིས་ལགས་སམ།

ཡོད་དེ་སྔར་ལྟུང་བ་བྱུང་བ་དང་།

རྐུ་ཐབས་སུ་གནས་པ་དང་།

དང་པོ་མི་མཐུན་པ་ཅན་དང་།

མ་ནིང་དང་།

དགེ་སློང་མ་སུན་ཕྱུང་བ་ལ་ནི་ཉེས་བྱས་སོ།

ཇི་ལྟར་དགེ་སློང་གིས་ལུས་ཀྱིས་ཀུན་ཏུ་རེག་པར་བྱས་པ་ལས་དགེ་འདུན་ལྷག་མར་གྱུར་པ་དེ་བཞིན་དུ་བསླབ་པ་བྱིན་པ་ལ་ཡང་དགེ་འདུན་གྱི་ལྷག་མར་འགྱུར་རོ།

དགེ་སློང་མ་སྐྱེས་པ་དང་ལྷན་ཅིག་ལུས་ཀྱིས་ཀུན་དུ་རེག་པར་བྱེད་པ་ལ་ནི་ཕམ་པར་འགྱུར་རོ།

དགེ་སློབ་མ་དང་།

དགེ་ཚུལ་དང་།

དགེ་ཚུལ་མ་ལ་ནི་ཉེས་བྱས་སུ་འགྱུར་རོ།།

སྡོམ་ལ།

སྐད་དང་ལུས་དང་དབེན་སྔགས་དང་།

གཞན་ལས་གཞན་ཕྱིར་སྤྲུལ་པ་དང་།

ཕོ་ཉ་ཡི་གེ་ལག་བརྡ་དང་།

གཞན་ལ་སྙད་འདོགས་བརྒྱུད་པ་དང་།

བགོ་བཤའ་མ་ནིང་སྐྱེས་པ་དང་།

མ་ནིང་མོ་མཛེས་སྡིག་ཅན་ནོ།

སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ།

བཙུན་པ་བཅོམ་ལྡན་འདས་ཀྱིས་ཡང་དགེ་སློང་གང་དྲལ་ཅིང་གྱུར་པའི་སེམས་ཀྱིས་བུད་མེད་ཀྱི་ཡུལ་ལ་གནས་ངན་ལེན་གྱི་ཚིག་སྡིག་པ་ཅན་ཚོགས་པར་མི་དབྱུང་བ་འཁྲིག་པ་དང་ལྡན་པ་ཇི་ལྟར་སྐྱེས་བུས་ན་ཆུང་ལ་བྱ་བ་བཞིན་དུ་ཡང་སྨྲས་ན་དགེ་འདུན་ལྷག་མའོ་ཞེས་གསུངས་པ་གང་ལགས་པ།

བཙུན་པ་རེ་ཞིག་དབུས་པའི་དགེ་སློང་ཞིག་གིས་དབུས་པའི་བུད་མེད་ལ་མཐའ་འཁོབ་པའི་སྐད་དུ་གནས་ངན་ལེན་གྱི་ཚིག་སྨྲས་ལ།

དབུས་པའི་བུད་མེད་ཀྱིས་ཀྱང་མཐའ་འཁོབ་པའི་སྐད་དེ་མ་འཚལ་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མཐའ་འཁོབ་པ་ཞིག་མཐའ་འཁོབ་པའི་བུད་མེད་ལ་དབུས་པའི་སྐད་ཀྱིས་གནས་ངན་ལེན་གྱི་ཚིག་སྨྲས་ལ།

མཐའ་འཁོབ་པའི་བུད་མེད་ཀྱིས་ཀྱང་ཡུལ་དབུས་པའི་སྐད་དེ་མ་འཚལ་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མཐའ་འཁོབ་པ་ཞིག་གིས་དབུས་པའི་བུད་མེད་ལ་མཐའ་འཁོབ་པའི་སྐད་དུ་གནས་ངན་ལེན་གྱི་ཚིག་སྨྲས་ལ།

དབུས་པའི་བུད་མེད་ཀྱིས་ཀྱང་མཐའ་འཁོབ་

པའི་སྐད་དེ་མ་འཚལ་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

དབུས་པ་ཞིག་གིས་མཐའ་འཁོབ་པའི་བུད་མེད་ལ་དབུས་པའི་སྐད་དུ་གནས་ངན་ལེན་གྱི་ཚིག་སྨྲས་ལ།

མཐའ་འཁོབ་པའི་བུད་མེད་ཀྱིས་ཀྱང་ཡུལ་དབུས་པའི་སྐད་དེ་མ་འཚལ་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་བུད་མེད་ལ་ལུས་ཀྱི་རྣམ་པར་རིག་བྱེད་ཀྱིས་གནས་ངན་ལེན་གྱི་ཚིག་སྟོན་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་དབེན་པ་ལ་དབེན་པར་འདུ་ཤེས་པས་བུད་མེད་ལ་གནས་ངན་ལེན་གྱི་ཚིག་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

དབེན་པ་ལས་མི་དབེན་པར་འདུ་ཤེས་པས་གནས་ངན་ལེན་གྱི་ཚིག་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མི་དབེན་པ་ལས་དབེན་པར་འདུ་ཤེས་པས་གནས་ངན་ལེན་གྱི་ཚིག་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མི་དབེན་པ་ལས་མི་དབེན་པར་འདུ་ཤེས་པས་བུད་མེད་ལ་གནས་ངན་ལེན་གྱི་ཚིག་སྨྲས་ན་ཅིར་འགྱུར་ལགས།

དགེ་འདུན་ལྷག་མར་འགྱུར་རོ།

བཙུན་པ་རེ་ཞིག་དགེ་སློང་གིས་སྨན་ནམ་གསང་སྔགས་ཀྱིས་བདག་ཉིད་མི་གདའ་བར་བགྱིས་ཏེ་བུད་མེད་ལ་གནས་ངན་ལེན་གྱི་ཚིག་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་གཞན་ཞིག་ལས་བུད་མེད་ལ་གནས་ངན་ལེན་གྱི་ཚིག་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་གཞན་དག་གི་སླད་དུ་བུད་མེད་ལ་གནས་ངན་ལེན་གྱི་ཚིག་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་བུད་མེད་སྤྲུལ་པ་ལ་གནས་ངན་ལེན་གྱི་ཚིག་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་ཕོ་ཉ་ལས་བུད་མེད་ཀྱི་གནས་ངན་ལེན་གྱི་ཚིག་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

དེ་བཞིན་དུ་ཡི་གེ་དང་ལག་བརྡ་དང་།

གཞན་ལ་སྙད་འདོགས་པ་དང་།

བརྒྱུད་དེ་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་བུད་མེད་ལ་བགོ་

བཤའ་གྱིས་ཤིག་ཅེས་བགྱིས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་མ་ནིང་ལ་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

སྐྱེས་པ་ལ་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མ་ནིང་མོ་ལ་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་བུད་མེད་ལ་འདི་སྐད་དུ་མཛེས་སོ་ཞེས་བགྱིས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་བུད་མེད་ལ་འདི་སྐད་ཅེས་སྡིག་པ་ཅན་ནོ་ཞེས་བགྱིས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།།

སྡོམ་ལ།

སྨྱོན་པ་དང་ནི་སེམས་འཁྲུགས་སམ།

ཚོར་བ་འོན་མ་གླེན་མ་དང་།

གཉིད་ལོག་ར་རོ་རབ་མྱོས་དང་།

དགེ་སློང་མ་དང་སྙོམས་པར་ཞུགས།

བཙུན་པ་རེ་ཞིག་དགེ་སློང་གིས་བུད་མེད་སྨྱོན་པ་ཞིག་ལ་གནས་ངན་ལེན་གྱི་ཚིག་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

དེ་བཞིན་དུ་སེམས་འཁྲུགས་པ་དང་།

ཚོར་བས་ཉམ་ཐག་པ་དང་།

འོན་མ་དང་།

གླེན་མ་དང་།

གཉིད་ཀྱིས་ལོག་པ་དང་།

ཕྱག་ལས་ཁོམ་པ་དང་།

རབ་ཏུ་མྱོས་པ་ལ་གནས་ངན་ལེན་གྱི་ཚིག་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་བུད་མེད་ལ་གནས་ངན་ལེན་གྱི་ཚིག་སྨྲ་བ་ལས་དེའི་མཚན་གྱུར་ཏེ།

དགེ་སློང་མར་རེད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་མ་ཞིག་སྐྱེས་པ་ལ་གནས་ངན་ལེན་གྱི་ཚིག་སྨྲ་བ་ལས་དེའི་མཚན་གྱུར་ཏེ་དགེ་སློང་དུ་རེད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་བཅོམ་ལྡན་འདས་ཀྱིས་ཡང་དགེ་སློང་གང་བུད་མེད་ཀྱི་ཡུལ་ལ་གནས་ངན་ལེན་གྱི་ཚིག་སྨྲས་ན་དགེ་འདུན་ལྷག་མར་འགྱུར་རོ།

ཞེས་གསུངས་པ་གང་ལགས་པ།

བཙུན་པ་དགེ་སློང་གིས་བུད་མེད་ཀྱི་ཡུལ་ལ་གནས་ངན་ལེན་གྱི་ཚིག་སྨྲས་ཀྱང་དགེ་འདུན་ལྷག་མར་མི་འགྱུར་བ་ལྟ་མཆིས་ལགས་སམ།

ཡོད་དེ་གལ་ཏེ་གཞན་གྱི་ཕྱིར་སྨྲས་ན་ཅིར་འགྱུར་ཞེ་ན།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་བུད་མེད་སྙོམས་པར་ཞུགས་པ་ཞིག་ལ་གནས་ངན་ལེན་གྱི་ཚིག་སྨྲས་ན་ཅིར་འགྱུར་

ལགས།

ཉེས་པ་སྦོམ་པོར་འགྱུར་རོ།།

སྡོམ་ལ།

བཞི་པ་གཉིས་དང་འདུ་ཤེས་གཞན།

གནས་ངན་ལེན་ལ་གང་བསྒྲགས་པ།

བསྙེན་བཀུར་ལ་ཡང་དེ་བཞིན་དུ།

རྒྱས་པར་རབ་ཏུ་བཤད་པར་བྱ།

བཙུན་པ་རེ་ཞིག་དགེ་སློང་གིས་མིའི་བུད་མེད་ལ་མི་མ་ལགས་པར་འདུ་ཤེས་པས་གནས་ངན་ལེན་གྱི་ཚིག་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མི་མ་ལགས་པ་མོ་ལ་མིར་འདུ་ཤེས་པས་གནས་ངན་ལེན་གྱི་ཚིག་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མིའི་བུད་མེད་ལ་མིར་འདུ་ཤེས་པས་གནས་ངན་ལེན་གྱི་ཚིག་སྨྲས་ན་ཅིར་འགྱུར་ལགས།

དགེ་འདུན་ལྷག་མར་འགྱུར་རོ།

བཙུན་པ་རེ་ཞིག་དགེ་སློང་གིས་བུད་མེད་ལ་བུད་མེད་དུ་འདུ་ཤེས་པས་གནས་ངན་ལེན་གྱི་ཚིག་སྨྲས་ན་ཅིར་འགྱུར་ལགས།

དགེ་འདུན་ལྷག་མར་འགྱུར་རོ།

བུད་མེད་ལ་སྐྱེས་པར་འདུ་ཤེས་པས་གནས་ངན་ལེན་གྱི་ཚིག་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

སྐྱེས་པ་ལ་བུད་མེད་དུ་འདུ་ཤེས་པས་གནས་ངན་ལེན་གྱི་ཚིག་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

སྐྱེས་པ་ལ་སྐྱེས་པར་འདུ་ཤེས་པས་གནས་ངན་ལེན་གྱི་ཚིག་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་གཞན་དུ་འདུ་ཤེས་པས་བུད་མེད་ལ་གནས་ངན་ལེན་གྱི་ཚིག་སྨྲས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་བུད་མེད་ཀྱི་ཡུལ་ལ་གནས་ངན་ལེན་གྱི་ཚིག་སྨྲས་ཀྱང་དགེ་འདུན་ལྷག་མར་མི་འགྱུར་བ་ལྟ་མཆིས་ལགས་སམ།

ཡོད་དེ་སྔར་ལྟུང་བ་བྱུང་བ་དང་།

རྐུ་ཐབས་སུ་གནས་པ་དང་།

དང་པོ་མི་མཐུན་པ་ཅན་དང་།

མ་ནིང་དང་།

དགེ་སློང་མ་སུན་ཕྱུང་བ་ལ་ནི་ཉེས་བྱས་སོ།

ཇི་ལྟར་དགེ་སློང་ལ་གནས་ངན་ལེན་གྱི་ཚིག་སྨྲ་བའི་དགེ་འདུན་ལྷག་མར་གྱུར་པ་དེ་བཞིན་དུ་བསླབ་པ་བྱིན་པ་ལ་ཡང་དགེ་འདུན་ལྷག་མར་འགྱུར་རོ།

དགེ་སློང་མ་ལ་ནི་ཉེས་པ་སྦོམ་པོར་འགྱུར་རོ།

དགེ་སློབ་མ་དང་།

དགེ་ཚུལ་དང་།

དགེ་ཚུལ་མ་ལ་ནི་ཉེས་བྱས་སོ།

སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་

འཁོར་གྱིས་ཞུས་པ།

བཙུན་པ་བཅོམ་ལྡན་འདས་ཀྱིས་ཡང་དགེ་སློང་གང་དྲལ་ཅིང་གྱུར་པའི་སེམས་ཀྱིས་བུད་མེད་ཀྱི་ཡུལ་གྱི་མདུན་དུ་སུ་བསྙེན་བཀུར་རྣམས་ཀྱི་ནང་ན་ནི་འདི་ལྟ་སྟེ།

ང་ལྟ་བུའི་དགེ་སློང་ཚུལ་ཁྲིམས་དང་ལྡན་པ།

དགེ་བའི་ཆོས་ཅན་ཚངས་པར་སྤྱོད་པ་ལ་འདི་ལྟར་འཁྲིག་པ་དང་ལྡན་པའི་ཆོས་འདིས་བསྙེན་བཀུར་བྱེད་པ་འདི་ནི་མཆོག་ཡིན་ནོ་ཞེས་བདག་ཉིད་ཀྱི་བསྙེན་བཀུར་བསྔགས་པ་བརྗོད་ན།

དགེ་འདུན་ལྷག་མའོ་ཞེས་གསུངས་པ་གང་ལགས་པ་ཞེས་བྱ་བ་སྟེ།

གཞུང་ལྷག་མ་ནི་ཇི་ལྟར་གནས་ངན་ལེན་སྨྲས་པ་ལས་བཤད་པ་དེ་བཞིན་དུ་བསྙེན་བཀུར་བསྔགས་པ་ཡང་བརྗོད་པར་བྱའོ།

ཁྱད་པར་ནི་འདི་ཡིན་ཏེ།

དགེ་སློང་མས་བསྙེན་བཀུར་བསྔགས་པ་ལ་ནི་ཉེས་བྱས་སུ་བརྗོད་དོ།

དགེ་སློབ་མ་དང་།

དགེ་ཚུལ་དང་།

དགེ་ཚུལ་མ་ལ་ནི་ཉེས་བྱས་སོ།།

སྡོམ་ལ།

ཆོས་གཉིས་དང་ནི་བཞི་ཚན་དྲུག །

དབང་བ་དང་ནི་ཉོ་བ་གཉིས།

སྤོ་བ་དང་ནི་བཞི་ཚན་གཉིས།

བརྒྱད་པ་དག་ནི་ཐ་མ་ཡིན།

སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ།

བཙུན་པ་ཆོས་གང་འདས་པ་ཡང་མ་ལགས།

མ་འོངས་པ་ཡང་མ་ལགས།

ད་ལྟར་བྱུང་བ་ཡང་མ་ལགས།

འགྲོ་བ་དང་ཕྱིར་འོང་བ་ཡང་མ་མཆིས་ལ།

ལས་ཀྱི་མཐའི་མཇུག་གི་མཐར་ཕྱིན་པའི་ཆོས་དེ་གང་ལགས།

ཉེ་བ་འཁོར་མྱ་ངན་ལས་འདས་པའོ།

བཙུན་པ་ཆོས་གང་དང་འགྲོ་བ་དང་།

ཕྱིར་འོང་བ་མཆིས་ལ།

ལས་ཀྱི་མཐའ་མཇུག་གི་མཐར་ཕྱིན་པའི་ཆོས་དེ་གང་ལགས།

ཉེ་བ་འཁོར་སྨྱན་བྱེད་པའོ།

དེ་བགྱིད་ན་ཅིར་འགྱུར་ལགས།

དགེ་འདུན་ལྷག་མར་འགྱུར་རོ།

བཙུན་པ་བཅོམ་ལྡན་འདས་ཀྱིས་ཡང་དགེ་སློང་གང་བུད་མེད་ལ་སྐྱེས་པའི་ཚིག་ཀྱང་རུང་།

སྐྱེས་པ་ལ་བུད་མེད་ཀྱི་ཚིག་གིས་ཀྱང་རུང་།

ཆུང་མ་ཉིད་དམ།

མཛའ་ན་མོ་ཉིད་དུ་སྨྱན་བྱེད་ན་ཐ་ན་དེའི་སྐད་ཅིག་ལ་ཡང་རུང་སྟེ།

དགེ་འདུན་ལྷག་མའོ་ཞེས་གསུངས་པ་གང་ལགས་པ།

བཙུན་པ་རེ་ཞིག་དགེ་སློང་གིས་སྨྱོན་པ་ལས་ཕྲིན་བླངས་ནས་སྨྱོན་པ་ལ་སྐྱེལ་ཅིང་།

སྨྱོན་པ་ལ་ཕྱིར་སྐྱེལ་བར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་

རོ།

སྨྱོན་པ་ལས་ཕྲིན་བླངས་ནས་སྨྱོན་པ་ལ་སྐྱེལ་ཅིང་།

རང་བཞིན་དུ་གནས་པ་ལ་ཕྱིར་སྐྱེལ་བར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

སྨྱོན་པ་ལས་ཕྲིན་བླངས་ནས་རང་བཞིན་དུ་གནས་པ་ལ་སྐྱེལ་ཅིང་།

སྨྱོན་པ་ལས་ཕྱིར་སྐྱེལ་བར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

སྨྱོན་པ་ལས་ཕྲིན་བླངས་ནས་རང་བཞིན་དུ་གནས་པ་ལ་སྐྱེལ་ཅིང་རང་བཞིན་དུ་གནས་པ་ལ་ཕྱིར་སྐྱེལ་བར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་རང་བཞིན་དུ་གནས་པ་ལས་ཕྲིན་བླངས་ནས་རང་བཞིན་དུ་གནས་པ་ལ་སྐྱེལ་ཅིང་རང་བཞིན་དུ་གནས་པ་ལ་སྐྱེལ་བར་བགྱིད་ན་ཅིར་འགྱུར་ལགས།

དགེ་འདུན་ལྷག་མར་འགྱུར་རོ།

རང་བཞིན་དུ་གནས་པ་ལས་ཕྲིན་བླངས་ནས་རང་བཞིན་དུ་གནས་པ་ལ་སྐྱེལ་ཅིང་།

སྨྱོན་པ་ལ་ཕྱིར་སྐྱེལ་བར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

རང་བཞིན་དུ་གནས་པ་ལས་ཕྲིན་བླངས་ནས་སྨྱོན་པ་ལ་སྐྱེལ་ཅིང་།

རང་བཞིན་དུ་གནས་པ་ལ་ཕྱིར་སྐྱེལ་བར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

རང་བཞིན་དུ་གནས་པ་ལས་ཕྲིན་བླངས་ནས་སྨྱོན་པ་ལ་སྐྱེལ་ཅིང་།

སྨྱོན་པ་ལ་སྐྱེལ་བར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

སྨྱོན་པ་ལ་བཞི་ཚན་གཉིས་པོ་ཇི་ལྟ་བ་དེ་བཞིན་དུ་སེམས་འཁྲུགས་པ་ལ་ཡང་བཞི་ཚན་གཉིས།

ཚོར་བས་ཉམ་ཐག་པ་ལ་ཡང་བཞི་ཚན་གཉིས་སུ་བྱའོ།

བཙུན་པ་དབང་བ་དང་མི་དབང་བའི་ཁྱིམ་བདག་གཉིས་ལ།

རེ་ཞིག་དགེ་སློང་གིས་དབང་བ་ལས་ཕྲིན་བླངས་ནས་དབང་བ་ལ་སྐྱེལ་ཅིང་དབང་བ་ལ་ཕྱིར་སྐྱེལ་བར་བགྱིད་ན་ཅིར་འགྱུར་ལགས།

དགེ་འདུན་ལྷག་མར་འགྱུར་རོ།

དབང་བ་ལས་ཕྲིན་བླངས་ནས་དབང་བ་ལ་སྐྱེལ་ཅིང་།

མི་དབང་བ་ལ་ཕྱིར་སྐྱེལ་བར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

དབང་བ་ལས་ཕྲིན་བླངས་ནས་མི་དབང་བ་ལ་སྐྱེལ་ཅིང་དབང་བ་ལ་ཕྱིར་སྐྱེལ་བར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

དབང་བ་ལས་ཕྲིན་བླངས་ནས་མི་དབང་བ་ལ་སྐྱེལ་ཅིང་།

མི་དབང་བ་ལ་ཕྱིར་སྐྱེལ་བར་

བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་མི་དབང་བ་ལས་ཕྲིན་བླངས་ནས་མི་དབང་བ་ལ་སྐྱེལ་ཅིང་།

མི་དབང་བ་ལ་ཕྱིར་སྐྱེལ་བར་བགྱིད་ན་ཅིར་འགྱུར་ལགས།

ཉེས་བྱས་སུ་འགྱུར་རོ།

མི་དབང་བ་ལས་ཕྲིན་བླངས་ནས་མི་དབང་བ་ལ་སྐྱེལ་ཅིང་།

དབང་བ་ལ་ཕྱིར་སྐྱེལ་བར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མི་དབང་བ་ལས་ཕྲིན་བླངས་ནས་དབང་བ་ལ་སྐྱེལ་ཅིང་།

མི་དབང་བ་ལ་ཕྱིར་སྐྱེལ་བར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མི་དབང་བ་ལས་ཕྲིན་བླངས་ནས་དབང་བ་ལ་སྐྱེལ་ཅིང་།

དབང་བ་ལ་ཕྱིར་སྐྱེལ་བར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་ཁྱིམ་བདག་ཅིག་ལ་འདི་སྐད་ཅེས་བུད་མེད་ཉོས་ཤིག་ཅེས་བགྱིས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་ཁྱིམ་བདག་ཅིག་ལ་འདི་སྐད་ཅེས་བུད་མེད་ཆེ་གེ་མོ་ཞེས་བྱ་བ་ཉོས་ཤིག་ཅེས་བགྱིས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་བསྙེན་པར་མ་རྫོགས་པར་སྨྱན་བགྱི་བར་སྦྱོར་བ་བགྱིས་ལ་བསྙེན་པར་མ་རྫོགས་པར་སྐྱེལ་ཅིང་།

བསྙེན་པར་མ་རྫོགས་པར་ཕྱིར་སྐྱེལ་བར་བགྱིད་ན་ཅིར་འགྱུར་ལགས།

ཉེས་བྱས་སོ།

བསྙེན་པར་མ་རྫོགས་པར་སྨྱན་བགྱིད་པར་སྦྱོར་བ་བགྱིས་ལ་བསྙེན་པར་མ་རྫོགས་པར་སྐྱེལ་ཅིང་།

བསྙེན་པར་རྫོགས་ཀར་ཕྱིར་སྐྱེལ་བར་བགྱིད་ན་ཅིར་འགྱུར་ལགས།

ཉེས་བྱས་སོ།

བསྙེན་པར་མ་རྫོགས་པར་སྨྱན་བགྱིད་པར་སྦྱོར་བ་བགྱིས་ལ་བསྙེན་པར་མ་རྫོགས་པར་སྐྱེལ་ཅིང་།

བསྙེན་པར་རྫོགས་ཏེ་ཕྱིར་སྐྱེལ་བར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བསྙེན་པར་རྫོགས་ཀར་སྨྱན་བགྱིད་པར་སྦྱོར་བ་བགྱིས་ལ་བསྙེན་པར་རྫོགས་ཀར་སྐྱེལ་ཅིང་།

བསྙེན་པར་རྫོགས་ནས་ཕྱིར་སྐྱེལ་བར་བགྱིད་ན་ཅིར་འགྱུར་ལགས།

ཉེས་བྱས་སུ་འགྱུར་རོ།

བསྙེན་པར་རྫོགས་ཀར་སྨྱན་བགྱི་བར་སྦྱོར་བ་བགྱིས་ལ་བསྙེན་པར་རྫོགས་ཀར་སྐྱེལ་ཅིང་།

བསྙེན་པར་རྫོགས་ནས་

ཕྱིར་སྐྱེལ་བར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བསྙེན་པར་རྫོགས་ནས་སྨྱན་བགྱི་བར་སྦྱོར་བ་བགྱིས་ལ།

བསྙེན་པར་རྫོགས་ནས་སྐྱེལ་ཅིང་།

བསྙེན་པར་རྫོགས་ནས་ཕྱིར་སྐྱེལ་བར་བགྱིད་ན་ཅིར་འགྱུར་ལགས།

དགེ་འདུན་ལྷག་མར་འགྱུར་རོ།

བསྙེན་པར་རྫོགས་ཏེ་སྨྱན་བགྱིས་ལ་བསྙེན་པར་རྫོགས་ཏེ་སྐྱེལ་ཅིང་བསྙེན་པར་མ་རྫོགས་པར་ཕྱིར་སྐྱེལ་བར་བགྱིད་ན་ཅིར་འགྱུར་ལགས།

ཉེས་བྱས་སུ་འགྱུར་རོ།

བཙུན་པ་གང་ཟག་དེ་ཉིད་སྤོ་བ་ཡང་ལགས།

དེ་ཉིད་སྤོ་བ་བགྱིས་པ་ཡང་ལགས།

དེ་ཉིད་མགུ་བར་བགྱི་བར་སྤྱོད་པ་ཡང་ལགས།

དེ་ཉིད་མགུ་བར་བགྱིད་པ་སྤྱད་པ་ཡང་ལགས་པ་ལྟ་མཆིས་ལགས་སམ།

ཡོད་དེ་འདི་ལྟར་མགུ་བར་བྱ་བ་སྤྱད་པའི་གང་ཟག་ལ་དགེ་འདུན་ལྷག་མའི་ལྟུང་བ་མ་བཅབས་པ་བྱུང་བ་དེ་དགེ་འདུན་གྱི་དྲུང་དུ་སོང་ནས་མགུ་བར་བྱ་བ་གསོལ་བ་ལས།

དགེ་འདུན་གྱིས་དེ་ལ་མགུ་བར་བྱ་བ་བྱིན་ནས།

དེས་མགུ་བར་བྱ་བ་ཕལ་ཆེར་སྤྱད་པ་ལས་དགེ་འདུན་ལྷག་མའི་ལྟུང་བ་གཉིས་པོ་གཅིག་ནི་ཞག་གཅིག་བཅབས།

གཉིས་པ་ནི་ཞག་གཉིས་བཅབས་པ་བྱུང་ནས་དེ་དགེ་འདུན་གྱི་དྲུང་དུ་སོང་སྟེ་སྤོ་བ་གསོལ་བ་ལས་དགེ་འདུན་གྱིས་དེ་ལ་སྤོ་བ་བྱིན་ན་དེ་ལྟུང་བ་གཅིག་ནི་བྱས་པ་ཡིན་ནོ།

གཉིས་པས་ནི་སྤོ་བ་ཡིན་ནོ།

གསུམ་པས་ནི་མགུ་བར་བྱ་བ་སྤྱོད་པ་ཡིན་ནོ།

བཞི་པས་ནི་མགུ་བར་བྱ་བ་སྤྱད་པ་ཡིན་ནོ།

བཙུན་པ་རེ་ཞིག་མོ་ཡང་མི་ལགས།

ཕོ་ཡང་མི་ལགས་ལ།

དགེ་སློང་གིས་དེ་གཉིས་ཀྱི་སྨྱན་བགྱིས་ན་ཅིར་འགྱུར་ལགས།

དགེ་འདུན་ལྷག་མར་འགྱུར་རོ།

མོ་ནི་མི་མ་ལགས།

ཕོ་ནི་མི་མ་ལགས་ལ།

དེ་གཉིས་ཀྱི་སྨྱན་བགྱིས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མོ་ནི་མི་མ་ལགས།

ཕོ་ནི་མི་ལགས་ལ།

དེ་གཉིས་ཀྱི་སྨྱན་བགྱིས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མོ་ཡང་མི་མ་ལགས།

ཕོ་ཡང་མི་མ་ལགས་ལ།

དེ་གཉིས་ཀྱི་སྨྱན་བགྱིས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་མི་དག་ལ་མིར་འདུ་ཤེས་པས་སྨྱན་བགྱིས་ན་ཅིར་འགྱུར་ལགས།

དགེ་འདུན་ལྷག་མར་འགྱུར་རོ།

མི་དག་ལ་མི་མ་ལགས་པར་འདུ་ཤེས་པས་སྨྱན་བགྱིས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མི་མ་ལགས་པ་དག་ལ་མིར་འདུ་ཤེས་པས་སྨྱན་བགྱིས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མི་མ་ལགས་པ་དག་ལ།

མི་མ་ལགས་པར་འདུ་ཤེས་པས་སྨྱན་བགྱིས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་བརྒྱུད་དེ་སྨྱན་བགྱིས་ན་ཅིར་འགྱུར་ལགས།

དགེ་འདུན་ལྷག་མར་འགྱུར་རོ།།

སྡོམ་ལ།

གཞོན་ནུ་མ་དང་བུ་མེད་མངལ།

ཟ་མ་མ་ནིང་མ་ནིང་མོ།

དགེ་འདུན་ཐམས་ཅད་བརྟུལ་ཞུགས་གནས།

མཚན་གཉིས་དང་ནི་འདྲི་བའོ།

བཙུན་པ་རེ་ཞིག་དགེ་སློང་གིས་གཞོན་ནུ་མ་ལ་སྨྱན་བགྱིས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་བུ་མ་མཆིས་པའི་ཁྱིམ་བདག་རྣམས་ཀྱི་སྨྱན་བགྱིས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་མངལ་ན་གནས་པ་རྣམས་ཀྱི་སྨྱན་བགྱིས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་ཟ་མའི་སྨྱན་བགྱིས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མ་ནིང་མོ་རྣམས་ཀྱི་སྨྱན་བགྱིས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་དགེ་འདུན་ཐམས་ཅད་འདུས་པའི་དྲུང་དུ་ཁྱིམ་བདག་གཅིག་ཕྱིན་ནས་འདི་སྐད་ཅེས་འཕགས་པ་དག་བདག་གི་ཚིག་གིས་ཁྱིམ་བདག་ཆེ་གེ་མོ་ཞིག་ལ་འདི་སྐད་ཅེས་བདག་གི་བུ་ལ།

བུ་མོའམ།

སྲིང་མོའམ།

ཚ་མོའམ།

ཡང་ཚ་མོ་སྩོལ་ཅིག་ཅེས་གསུང་སྤྱོད་དམ་ཞེས་བགྱིས་པ་ལས།

གལ་ཏེ་དགེ་འདུན་ཀུན་གྱིས་ཕྲིན་བླངས་ནས་སྐྱེལ་ཅིང་ཕྱིར་སྐྱེལ་བར་བགྱིད་ན་དགེ་འདུན་ཐམས་ཅད་ལ་ཅིར་འགྱུར་ལགས།

དགེ་འདུན་ལྷག་མར་འགྱུར་རོ།

འོན་ཏེ་དགེ་འདུན་ཐམས་ཅད་ཀྱི་ཕྲིན་གྱིས་དགེ་སློང་གཅིག་གིས་སྐྱེལ་ཅིང་ཕྱིར་སྐྱེལ་བར་བགྱིད་ན་དགེ་འདུན་ཐམས་ཅད་ལ་ཅིར་འགྱུར་ལགས།

དགེ་འདུན་ལྷག་མར་འགྱུར་རོ།

འོན་ཏེ་དགེ་སློང་གཅིག་གིས་རང་གི་ཚིག་གིས་སྐྱེལ་ཅིང་ཕྱིར་སྐྱེལ་བར་བགྱིད་ན་ཅིར་འགྱུར་ལགས།

ཉེས་པ་སྦོམ་

པོར་འགྱུར་རོ།

དགེ་སློང་མ་དང་།

བརྟུལ་ཞུགས་ལ་གནས་པར་ཚངས་པར་སྤྱོད་པ་གཞན་དག་གི་སྨྱན་བགྱིས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་ཕྲིན་ལེན་པ་ལས་བླངས་མ་ཐག་ཏུ་དེའི་མཚན་གྱུར་ཏེ།

དགེ་སློང་མར་རེད་ནས་སྐྱེལ་ཅིང་ཕྱིར་སྐྱེལ་བར་བགྱིད་ན་ཅིར་འགྱུར་ལགས།

དགེ་འདུན་ལྷག་མར་འགྱུར་རོ།

བཙུན་པ་རེ་ཞིག་དགེ་སློང་མ་ཞིག་ཕྲིན་ལེན་པ་ལས་བླངས་མ་ཐག་ཏུ་དེའི་མཚན་གྱུར་ཏེ།

དགེ་སློང་དུ་རེད་ནས་སྐྱེལ་ཅིང་ཕྱིར་སྐྱེལ་བར་བགྱིད་ན་ཅིར་འགྱུར་ལགས།

དགེ་འདུན་ལྷག་མར་འགྱུར་རོ།

བཙུན་པ་རེ་ཞིག་དགེ་སློང་ཕྲིན་ལེན་པ་ལས་བུད་མེད་དེ་ལ་ནི་ཕོ་མཚན་སྐྱེས།

སྐྱེས་པ་ལ་ནི་བུད་མེད་ཀྱི་མོ་མཚན་དོད་པར་གྱུར་ནས་མཚན་འཕོས་བཞིན་དུ་སྐྱེལ་ཅིང་ཕྱིར་སྐྱེལ་བར་བགྱིད་ན་ཅིར་འགྱུར་ལགས།

དགེ་འདུན་ལྷག་མར་འགྱུར་རོ།

བཙུན་པ་སྐྱེས་པས་བུད་མེད་དང་ལྷན་ཅིག་བརྡ་བགྱིས་པར་གྱུར་ལ།

སྐྱེས་པ་དེས་དགེ་སློང་ཞིག་ལ་འདི་སྐད་ཅེས་འཕགས་པས་བུད་མེད་ལྟ་གཟིགས་སམ་ཞེས་བགྱིས་པ་དང་།

དགེ་སློང་དེས་འདི་སྐད་ཅེས་དེ་ར་བའི་དྲུང་དུ་འདུག་གོ་ཞེས་བགྱིས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་སྨྱན་བགྱིས་ཀྱང་དགེ་འདུན་ལྷག་མར་མི་འགྱུར་བ་ལྟ་མཆིས་ལགས་སམ།

ཡོད་དེ་སྔར་ལྟུང་བ་བྱུང་བ་དང་།

རྐུ་ཐབས་སུ་གནས་པ་དང་།

དང་པོ་མི་མཐུན་པ་ཅན་དང་།

མ་ནིང་དང་།

དགེ་སློང་མ་སུན་ཕྱུང་བ་ལ་ནི་ཉེས་བྱས་སོ།

ཇི་ལྟར་དགེ་སློང་སྨྱན་བྱས་པ་ལ་དགེ་འདུན་ལྷག་མར་གྱུར་པ་དེ་བཞིན་དུ་བསླབ་པ་བྱིན་པ་དང་།

དགེ་སློང་མ་ལ་ཡང་དགེ་འདུན་ལྷག་མར་འགྱུར་རོ།

དགེ་སློབ་མ་དང་།

དགེ་ཚུལ་དང་།

དགེ་ཚུལ་མ་ལ་ནི་ཉེས་བྱས་སོ།།

སྡོམ་ལ།

གཞི་གསུམ་དང་ནི་ཚད་མ་དང་།

བདག་དང་གཞན་དང་མ་གཡོགས་པ།

བབས་དང་བདུན་ཚན་ཉིད་དང་ནི།

མཚན་ནི་ཐ་མར་གྱུར་པ་ཡིན།

སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ།

བཙུན་པ་བཅོམ་ལྡན་འདས་ཀྱིས་དགེ་སློང་གིས་བསླངས་པ་བདག་པོ་མེད་པ།

བདག་གི་ཕྱིར་ཁང་པ་ཞིག་རྩིག་ཏུ་བཅུག་ན།

དགེ་སློང་

དེས་ཁང་པ་ཚད་བཞིན་དུ་རྩིགས་ཤིག །

དེ་ལ་ཁང་པའི་ཚད་ནི་འདི་ཡིན་ཏེ།

ནང་གི་སྲིད་དུ་བདེ་བར་གཤེགས་པའི་མཐོ་བཅུ་གཉིས་ཞེང་དུ་མཐོ་བདུན་ནོ།

གཞི་བལྟ་བའི་ཕྱིར་དགེ་སློང་དེས་དགེ་སློང་དག་བཀྲི་བར་བྱའོ།

ཁྲིད་པའི་དགེ་སློང་དག་གིས་ཀྱང་གཞི་རུང་བ་དང་།

རྩོད་པ་མེད་པ་དང་།

བརྩམ་དུ་རུང་བར་བལྟ་བར་བྱའོ།

གལ་ཏེ་དགེ་སློང་གིས་གཞི་མི་རུང་བའམ།

རྩོད་པ་དང་བཅས་པའམ།

བརྩམ་དུ་མི་རུང་བར་བདག་གིས་བསླངས་པ་བདག་པོ་མེད་པ་བདག་གི་ཕྱིར་ཁང་པ་རྩིག་ཏུ་འཇུག་གམ།

གཞི་བལྟ་བའི་ཕྱིར་དགེ་སློང་དག་ཀྱང་མི་ཁྲིད་དམ།

དགེ་སློང་ཁྲིད་པ་དག་ལ་ཡང་གཞི་མི་སྟོན་ཏམ།

ཚད་ལས་འདས་ན་དགེ་འདུན་ལྷག་མར་འགྱུར་རོ།

ཞེས་གསུངས་པ་གང་ལགས་པ།

བཙུན་པ་རེ་ཞིག་དགེ་སློང་གིས་གཞི་མ་སྣད་པར་ཁང་པ་རྩིག་ཏུ་སྩོལ་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

གཞི་བསླངས་ནས་ཁང་པ་རྩིག་ཏུ་སྩོལ་ན་ཅིར་འགྱུར་ལགས།

ཉེས་བྱས་སོ།

ཁང་པ་གནང་བ་སྩོལ་ནས་ཁང་པ་མ་བརྩིགས་ན་ཅིར་འགྱུར་ལགས།

ཉེས་བྱས་སོ།

བདག་གིས་བརྩམས་ཏེ་འཕྲོ་བོར་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

གཞན་གྱིས་འཕྲོ་བོར་བ་ལགས་པར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

མ་གཡོགས་པ་རྩིག་ཏུ་སྩལ་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བསམས་ནས་བབས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

དེ་བཞིན་དུ་བདག་ཉིད་སྲོག་དང་ཕྲལ་བའམ།

ཁྱིམ་པ་ཉིད་དུ་གཡར་གྱིས་འཆི་བ་དང་།

དགེ་སྦྱོང་གི་ཆེད་ཉིད་དང་།

ཟ་མ་ཉིད་དང་།

མ་ནིང་ཉིད་དང་།

དགེ་སློང་མ་སུན་ཕྱུང་བ་ཉིད་དང་།

མ་གསོད་པ་ཉིད་དང་།

ཕ་གསོད་པ་ཉིད་དང་།

དགྲ་བཅོམ་པ་གསོད་པ་ཉིད་དང་།

དགེ་འདུན་གྱི་དབྱེན་བྱེད་པ་ཉིད་དང་།

དེ་བཞིན་གཤེགས་པ་ལ་ངན་སེམས་ཀྱིས་ཁྲག་འབྱིན་པ་དང་།

མུ་སྟེགས་ཅན་ཉིད་དང་།

མུ་སྟེགས་ཅན་དུ་ཞུགས་པ་ཉིད་དང་།

རྐུ་ཐབས་སུ་གནས་པ་ཉིད་དང་།

གནས་པར་མི་བྱ་བ་ཉིད་དང་།

དང་པོ་མི་མཐུན་པ་ཅན་ཉིད་དང་།

ཐ་དད་དུ་གནས་པ་ཉིད་དང་།

ཁས་ལེན་པ་ཉིད་དང་།

བསླབ་པ་སྩལ་བ་ཉིད་དུ་གཡར་

གྱིས་འཆེ་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བསྙེན་པར་མ་རྫོགས་པར་སྦྱོར་བ་བགྱིས་ལ་བསྙེན་པར་མ་རྫོགས་པར་ལགས་པར་བགྱིད་ན་ཅིར་འགྱུར་ལགས།

ཉེས་བྱས་སོ།།

འདུལ་བ་གཞུང་བླ་མ།

བམ་པོ་གསུམ་པ།

བསྙེན་པར་མ་རྫོགས་པར་སྦྱོར་བ་བགྱིས་ལ།

བསྙེན་པར་རྫོགས་ཀར་ལགས་པར་བགྱིད་ན་ཅིར་འགྱུར་ལགས།

ཉེས་བྱས་སོ།

བསྙེན་པར་མ་རྫོགས་པར་སྦྱོར་བ་བགྱིས་ལ།

བསྙེན་པར་རྫོགས་ནས་ལགས་པར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བསྙེན་པར་རྫོགས་ཀར་སྦྱོར་བ་བགྱིས་ལ།

བསྙེན་པར་རྫོགས་ཀར་ལགས་པར་བགྱིད་ན་ཅིར་འགྱུར་ལགས།

ཉེས་བྱས་སོ།

བསྙེན་པར་རྫོགས་ཀར་སྦྱོར་བ་བགྱིས་ལ།

བསྙེན་པར་རྫོགས་ནས་ལགས་པར་བགྱིས་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བསྙེན་པར་རྫོགས་ནས་སྦྱོར་བ་བགྱིས་ལ།

བསྙེན་པར་རྫོགས་ནས་ལགས་པར་བགྱིད་ན་ཅིར་འགྱུར་ལགས།

དགེ་འདུན་ལྷག་མར་འགྱུར་རོ།

བསྙེན་པར་རྫོགས་ནས་སྦྱོར་བ་བགྱིས་ལ།

བསྙེན་པར་མ་རྫོགས་པར་ལགས་པར་བགྱིད་ན་ཅིར་འགྱུར་ལགས།

ཉེས་བྱས་སོ།

བཙུན་པ་རེ་ཞིག་དགེ་སློང་ཁང་པ་ཞིག་རྩིག་པར་རྩོམ་པ་ལས་དེའི་མཚན་གྱུར་ཏེ།

དགེ་སློང་མར་རེད་ནས་ལགས་པར་བགྱིད་ན་ཅིར་འགྱུར་ལགས།

ཉེས་བྱས་སོ།

བཙུན་པ་རེ་ཞིག་དགེ་སློང་མ་ཞིག་ཁང་པ་རྩིག་པར་རྩོམ་པ་ལས་དེའི་མཚན་གྱུར་ཏེ།

དགེ་སློང་དུ་རེད་ནས་ལགས་པར་བགྱིད་ན་ཅིར་འགྱུར་ལགས།

ཉེས་པ་སྦོམ་པོར་འགྱུར་རོ།

བཙུན་པ་རེ་ཞིག་དགེ་སློང་གིས་ཁང་པ་བརྩིགས་ཀྱང་དགེ་འདུན་ལྷག་མར་མི་འགྱུར་བ་ལྟ་མཆིས་ལགས་སམ།

ཡོད་དེ་སྔར་ལྟུང་བ་བྱུང་བ་དང་།

རྐུ་ཐབས་སུ་གནས་པ་དང་།

དང་པོ་མི་མཐུན་པ་ཅན་དང་།

མ་ནིང་དང་།

དགེ་སློང་མ་སུན་ཕྱུང་བ་ལ་ནི་ཉེས་བྱས་སུ་འགྱུར་རོ།

བསླབ་པ་སྩལ་བས་རྩིག་ཏུ་སྩལ་ན་ཅིར་འགྱུར་ལགས།

དགེ་འདུན་ལྷག་མར་འགྱུར་རོ།

དགེ་སློང་མ་ཞིག་གིས་རྩིག་ཏུ་སྩལ་ན་ཅིར་འགྱུར་ལགས།

ཉེས་བྱས་སོ།

དགེ་སློབ་མ་དང་།

དགེ་ཚུལ་དང་།

དགེ་ཚུལ་མ་ལ་ནི་ཉེས་བྱས་

སོ།

སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ།

བཙུན་པ་བཅོམ་ལྡན་འདས་ཀྱིས་དགེ་སློང་གིས་བདག་པོ་ཡོད་པ།

དགེ་འདུན་གྱི་ཆེད་དུ་གཙུག་ལག་ཁང་ཆེན་པོ་ཞིག་རྩིག་ཏུ་འཇུག་ན་གཞི་བལྟ་བའི་ཕྱིར་དགེ་སློང་དེས་དགེ་སློང་དག་བཀྲི་བར་བྱའོ།

ཁྲིད་པའི་དགེ་སློང་དག་གིས་ཀྱང་གཞི་རུང་བ་དང་།

རྩོད་པ་མེད་པ་དང་།

བརྩམ་དུ་རུང་བར་བལྟ་བར་བྱའོ།

གལ་ཏེ་དགེ་སློང་གིས་གཞི་མི་རུང་བའམ།

རྩོད་པ་དང་བཅས་པའམ།

བརྩམ་དུ་མི་རུང་བར་བདག་པོ་ཡོད་པ་དགེ་འདུན་གྱི་ཕྱིར་གཙུག་ལག་ཁང་ཆེན་པོ་རྩིག་ཏུ་འཇུག་གམ།

གཞི་བལྟ་བའི་ཕྱིར་དགེ་སློང་དག་ཀྱང་མི་ཁྲིད་དམ།

དགེ་སློང་ཁྲིད་པ་དག་ལ་ཡང་གཞི་མི་སྟོན་ན་དགེ་འདུན་ལྷག་མའོ་ཞེས་གསུངས་པ་གང་ལགས་པ་ཞེས་བྱ་བ་སྟེ།

ཚད་ལས་འདས་པ་དང་།

བསླངས་པ་ཉིད་མ་གཏོགས་པ་གཞུང་ལྷག་མ་ནི་ཁང་པའི་དགེ་འདུན་ལྷག་མ་ལ་བཤད་པ་ཇི་ལྟ་བར་གཙུག་ལག་ཁང་ཆེན་པོ་ལ་ཡང་དེ་བཞིན་དུ་བརྗོད་པར་བྱའོ།།

སྡོམ་ལ།

ཕོ་ཉ་ཡི་གེ་ལག་བརྡ་དང་།

གཞན་ལ་སྙད་འདོགས་བརྒྱུད་པ་དང་།

སྨྱོན་པ་དང་ནི་སེམས་འཁྲུགས་དང་།

ཚོར་བ་འོན་པ་གླེན་པ་དང་།

གཉིད་ལོག་ར་རོ་རབ་ཏུ་མྱོས།

སྙོམས་ཞུགས་འགྲོ་དང་ཕྱི་རོལ་པའོ།

སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ།

བཙུན་པ་བཅོམ་ལྡན་འདས་ཀྱིས་ཡང་དགེ་སློང་གང་ཁྲོས་ཤིང་ཞེ་སྡང་བས་མ་མགུ་སྟེ།

ཅི་ནས་ཀྱང་འདི་ཚངས་པར་སྤྱོད་པ་དང་བྲལ་ལོ་སྙམ་ནས་དགེ་སློང་དག་ལྟུང་བ་མེད་པ་ལ་གཞི་མེད་པར་ཕམ་པར་འགྱུར་བའི་ཆོས་ཀྱིས་སྐུར་པ་བཏབ་པ་ལས་དེ་དུས་གཞན་ཞིག་ན་དྲིས་ཀྱང་རུང་མ་དྲིས་ཀྱང་རུང་རྩོད་པ་དེ་ཡང་གཞི་མེད་པ་ཡིན་ལ།

དགེ་སློང་དེ་ཡང་ཞེ་སྡང་གིས་སྨྲས་སོ་ཞེ་ན།